رواية مازلت طفلة الفصل التاسع 9 - بقلم الكاتبة شمس السعدي

مساء الورد حبايب

….البارت التاسع….
  {#مازلت_طفلة}
#بقلم_الكاتبة_شمس

من دخلت عمه نضال للغرفه . شافتني رزلته ومانطيته مجال .
بس هي فضحتني وگالت كل البله بيج .
غويتي الولد وقشمرتي ..
اشوفج شلون تعاينين عليه من يمر وتتشاقين وياه وتتختلين .

تحجي وتعلي بصوتها لمت البيت كله .

اجه الحجي والحجيه تصيح من جوه .. شكو شبيكم احجو مااگدر اصعد ..
هداوي بيها شي ..

الحجي .. شكو شبيج تصيحين .

نضال .. اني شبيه لو اخوك ومرتك . لگيتهم وحدهم بالغرفه .

باوعلي وعيونه تجدح نار . شتسون وحدكم .

ابجي واحجي . والله ماكو شي والله .

مرتضى يفرك بوجهه . حجي ماكو شي جنت جاي للبيت اشتريت حلويات وذكرت هدى تحب الحلويات اجيت انطيها ونضال ماصدگت تريدلها حجايه .

الحجي . انجب ساقط . مهما يكون ماتدخل غرفتها . جان دگيت الباب

مرتضى . دگيته بس هي نايمه وماسمعت دخلت انطيهيا .
نضال .. وانت تصدگ بهذا الحجي .

الحجي .. اشششش انتي تسكتين واذا سمعت مطلعه حجايه بره البيت اعتبري نفسج طالگ فاهمه مو تالي عمري تردون تفضحوني .
ويله طلعوا بره بسرعه .
وانت حسابك بعدين . وباوع على مرتضى .

ساعتها لو ذيبحوني مايلگون قطرة دم بيه .
سد الباب واجه لزمني حيل من ايدي ولواها .
باعي ولج . عمري 38 سنه محد جاب صيتي بالموزين  مو هسا تجي وحده زعطوطه مثلج تشوهها فاهمه .

مرتضى تشوفيه منا تروحين منا .
اذا شفتج بيوم گاعده وياه لو تسولفين اسوي بيج سوايه مصايره فااااااهمه (بصوت عالي)

-والله مالي دخل هو اجه دخل للغرفه . وگتله عيب تدخل ونبهت عليه . وبعدين دخلت عمه نضال تحجي .

-حتى اذا هالمره عديتها المرة الثانيه اذبحج والله ولا يگولون مرة الحجي رضا عليها شبهه فاهمه .
احنه بناتنا كلهن محشومات ومايعاينن على غير زلمتهن .

تحملت اهاين واسكت ميخالف بس يجيب سمعتي بالعاطل مااقبل ..
گتله . اني الحمد لله كلها تحلف بسمعتي بالمنطقه من المدرسه للبيت ومااعاين على احد غريب .
لاتتهمني وتظلم بختك . واذا حاسبني زعطوطه واشوه سمعتك حجي محد گالكم اخذوني من اهلي وجيبوني لهنا .. احجي وابجي . عبالك اني مرتاحه هنا .واني ادري كلها ماتحبني وتريدني .
وخاصه عمه نضال تدور زله عليه حتى تطردني وعود هي الي جابتني .

-اتقرب يمي حيل ودفعني ع الجربايه .
كافي ولج كافي لاتلاسنين صوتج لاتعليه عليه .
هو كله من ورى نضال الي بلتني بيج .
تالي عمري وحده مثلج توگف بوجههي .
اشكري ربج ع الطفل الي ببطنج . لو ماهو جان موتج جوه اديه .
يله ولي من وجههي وبعد مااريد اشوف خلقتج گبالي .

نزلت اركض وابجي . ماعندي غير الحجيه .
نزلت ابجي واشكي الها .
گالت يمه . مصدگتج لاتبجين ادري گلبج نضيف بس شسوي هاي قسمتج .ونضال اذا حطت شي ببالها تسوي .
خلي يهدأ الحجي واني احجي وياه .

نمت بيومها يم الحجيه . والدمعه مافارگتني .
اني تالي عمري يطعنون بشرفي .
خفت احجي واگلها مرتضى . يتحارش بيه .
اكيد ابنها وتصدگه وماتقبل عليه . وبعدين اخسرها هي هم . عاد بس هي الي بقت تدافعلي وزينه وياي .

مر كم يوم واني اخلص شغلي واصعد الغرفتي اقفلها عليه وانام .
حتى تلفزيون ماكو التهي بي .
بس مرات اباوع من الشباك ع البساتين والجو حلو .
صحيح الحجي مايقبل . بس شسوي اضوج وهو حارمني الطلعه .
جاي اباوع . وشفت توته وجنات وبعد بنات اجن من المدرسه . انقهرت حيل وتذكرت مدرستي ..

گعدت ابجي . صارت دمعتي هي الوحيده الي تخفف همي .
حتى امي من يوم الي تهموها باگت . بعد ماتجي .
والحجي كل شهرين يوديني يوم وارجع .
اشتاقلهم هواي .
وهسا الحجي مايحجي وياي شلون اگله اريد اروح لهلي .
ماكو غير اگول للحجيه .
نزلت .
صار بوجهي مرتضى .
درت وجهي وردت امشي . اجه وراي .

-حباب عوفني لايشوفنه واحد الحجي يذبحني والله

-هدى والله اعتذر . اني بسببي صارت المشكله ماادري هيج يصير .

-هاهي يله بس عوفني .

-هدى من اشوف الحجي يعاملج مو زين انقهر عليج .
شعندج باقيه وياه وانتي صغيره .
عوفيه والف واحد يتمناج .

-😲😲😲انت تحجي صدگ والله جنك تخبلت .ولي من وجهي وبعد لاتحاجيني ولا احاجيك تريد تجيبلي بلوه .
دفعته ونزلت .
شافتنا الحجيه . غلست .
وره شويه صاحتني .

گالت شعنده مرتضى وياج .

-ها لايمه ماكو شي بس يتعذر مني على الي صار ذيج المره .

-اي عفيه بنيتي ادري بيج عاقله لاتنطيه مجال . واني هم احجي وياه . مالنا خلگ نضال تطلع عليكم اشاعات . وادري بأبوج قاسي ومايرحم اذا سمع شي عليج .
ولو انتي بنيه حبابه وماتطلع العيبه منج .

صحيح اني طفله وزعطوطه مثل مايگولون . بس عرفت حجي الحجيه بي تحذير الي . وجنها تهددني بأبوي لان يدرون بي مايتفاهم . بس هي حذرتني بغير طريقه وگامت تكسر وتجبر .

اني هم بعد گمت مااحجي وياهم وبعدت روحي . بس اخلص شغلي واصعد .

ورى يومين . گالت الحجيه .
هدى يمه . لمي غراضج . راح ارتبلج هاي غرفة البنات الجوه .
وانزلج يمي انتي حبله وماتگدرين تصعدين وتنزلين .

اني فهمت قصدها بس سايرتها . الفوگ بي ثلاث غرف .
غرفتي وغرفه مرتضى ولؤي . وغرفه نضال والحجي .
#بقلمي_الكاتبة_شمس
يتبع..
………………………………………………
والجوه غرفتين . غرفه الحجيه وغرفه البنات من جانن عندهم ..
وصدگ صبغت الغرفه مال بناتها مرات من يجن يمهم يرتاحن بيها . صعدت غراضهن فوگ .
ونزلت غراضي وغرفتي لجوه .
طبعا بيومها صارت هوسه . جابت ولد عمهم ينگلون .
الحجي مايدري . يطلع الصبح يجي بالليل.  بالصدف يجي الظهر .يرتاح ويرجع للمضيف .

صارت الغرفه الجوه حلوه ورتبت غراضي بيها .
بس مو احلى من غرفتي الي فوگ جنت اباوع ع الزرع والبساتين والخضار من فوگ .
بس هاهي اهم شي ماكو مشاكل .وهم ابعد عن نضال ومشاكلها .

مشت الايام واني التعب يزيد عليه وظهري ابجي منه حيل يأذيني .
وبطني كبرت . وگمت اتلاگف الهوا بالگوة . والجو صيف وحاره .
كل يوم اگول روحي راح تطلع وهذا اخر يوم الي .

الحجي بعده زعلان ومايحجي وياي . حتى مصرفي وحلوياتي يدزها بيد الحجيه .
واني هم ضجت منه ومااريده عبن يصدگ بحجي مرته والله العالم شحجتله عني .
وهي تتشمت بيه وتضحك عليه .
لان الحجي مايعاين عليه .
وتگلي بعد ماشفتي شي . بس تجيبين ياخذ الي ببطنج ويشمرج .

عبالها اهتم . ماتدري اني افرح اهج منهم .بس ابوي شلون بي يموتني اذا رجعتلهم .

مرات اوگف ع الشباك . شباك الغرف مابي سياج يطل على البساتين .
بس من گدام البيت اكو سياج وباب وطارمه .
مرات اوگف اعاين ع الحله مال مدرسه واشوف البنات والجهال من يرجعون .
واني بگدهن وبطني واصله الحلگي .

لمحت وحده . شايفتها بس مدري وين . يمكن وحده من گرايبهم . ولو اني صارلي هواي ماطالعه وحتى مااتذكر منو وماعندي اختلاط بيهن .
دور غشت روحها وتتلفت . ودور طلعت ع البساتين .

يا هي وين راحت بهالظهريه .
يووه واني شلي غرض . خليني بهذا الي ببطني شگد ياكل . كل ساعه اجوع من وراه.  واستحي اطلع واكل هسا اذا شافني واحد شيگول هستوه تغدت شبسرعه جاعت .

طلعت بسكته . رحت للگدر مسوين احنه تمن ويابسه .
صبيت بالبوگة تمن وفوگه مرگة واخذت خاشوگه .
ورجعت على اطراف اصابعي امشي .
وصلت يم باب غرفتي سمعت الحجي يكح .
ركضت وسديت الباب .
دور نزلت وراه نضال . رضاوي مو تنسا بالليل تعال من وكت ماشبعت منك .

يااا هاي شبيها ماتستحي تحجي بصوت عالي . مدري تسمعني .
ويييع عبالها ميته على هاي السوالف ماتدري بيه من يجي يمي الحجي جنت روحي تلعب واگوم اتقيأ .
مدري شعاجبها بي شو جسمه كله شعر ويلعب النفس .
جنت احبه واعتبره مثل ابوي .
بس من رزلني وانطه بيه من ورى نضال بعد كرهته وضجت منه .

من صارت غرفتي جوه . گمت اگعد وي الحجيه هواي ونسولف وتحجيلي على ايام قبل .
وعلى اولادها . وتگول كلهم بجفه ولؤي بجفه .
راسه يابس وعصبي . وعنده عزة نفس .

گلتلها . يعني مثل الحجي . هم عصبي ومايتفاهم .

الحجيه .. ههههه لا يمه رضا زين وگلبه طيب . واذا احجي وياه يسمع كلمتي ذاك فد مره . اذا قفل هاهي بعد جيب الي يفتح قفله ويراضيه .
مايتفاهم ابد .

اووووف اشتاقيتله . سوده عليه غرب روحه وبعد عنه من ورى گلبه وراسه اليابس .

-اي هم حقه حجيه . جا انتو اخذتو البنيه الي يحبها وزوجتوها شلون بعد مايضوج ويهج منكم .

-ولج هداوي لصمي السانج ولاتجيبلنه سالفه . انتي ماتعرفين سالفه العشاير .
حتى لو يحبها ويريدها اذا شيخه گال هاي البنيه ياخذها فلان محد يناقشه ويگله ليش .
وهو وگف بوجه عمه الشيخ ولاسنه وگاله انت اخذت مني الي اريدها .
باجر اخذ الي تعجبني ومحد يفك حلگه .
والشيخ ضاج منه وطرده من مضيفه .
وهو هم لم هدومه وهج .

جده الشيخ جان يسميه الذيب من هو صغير.  ياخذ حقه بيده من اكبر واحد . وهو الي شجعه وخلاه هيج .
وجان الي يحجي وياه يگله اني الذيب ومحد يتلاوه وياي .
اوووف وهاي تاليتها جابلنه وحده اردنيه مانعرفها منين .
حتى يعاند اهله . وماياخذ بتول .
بعد ماانطاها الحجي اله جبرة خاطر .

…. تذكرت . اي هي يمكن بتول الي شفتها الظهريه من طلعت ع البساتين . بس ماحجيت سكتت .

گتلها يمه .. شكو ورى البساتين من يم غرفنا .

-ياااا ولج شمالج اني اسولف وين وانتي طفرتي وين .

-ههههه لا هيج بس اجت على بالي .

-منا البساتين وراها بحيره مثل النهر.

-هاااا (جا هاي شعندها تروح للبحيرة ) .

سكتت ومافتحت الموضوع بعد .

گمت احس بمغص . عبالك مال العاده بس هالمره قوي .
گلت اروح انام بلكي يروح ..
بس هذا ماراح وزاد . واني مگرفصه ع الجربايه وابجي .
ولج يمه وينج اريد اموت . تعاليلي .
بقيت النص الليل الوجع كاتلني وبعد مااتحمل .
گمت اصيح وابجي . يييييييمة الحگيلي اريد اموت .
يييييمه تعاليلي .
ماحسيت الا الحجيه اجت .

-ها يمه هدى شبيج تصيحين .

-بطني يمه راح اموت من الليل لسه اريد اموت .

-ياولج بعدج يمه بالسابع شبسرعه .
دتعاي خلي افحصج .

-لا ما مااقبل شني تسويلي .

-ولج يمه خلي اشوف الطفل شبيج راح تضيعينه منج .

-فحصتني واني مستحيه . شگد تفشلت بس الوجع ماخلاني اعرف العيب اريد بس واحد يطلع الي ببطني وارتاح .

الحجيه . يايمه يارضا . هذا راس الطفل .
لمي روحج بسرعه وغراضج طلعيهن .خلي اگعد رضا وناخذج .
#بقلمي_الكاتبه_شمس
يتبع….