رواية مازلت طفلة الفصل الثامن والعشرون 28 - بقلم الكاتبة شمس السعدي

مساء الفل لاجمل قرآء .. ومتابعين ..
حبايب مع بدأ الامتحانات .. حاولت اختم القصه الكم
واليوم راح انزل اربع البارتات الاخيره ..
متابعه ممتعه..

…البارت الثامن والعشرون ….
       {#مازلت_طفلة}
     #بقلم_الكاتبة_شمس

الليل كله گضيناه سويه .. وضحكني بسوالفه .
مااعرف من خلال تجربتي بالزلم .
شما يكبرون لو يتعصبون لو ينفخون ارواحتهم علينا .
بس گدام ذيج الشغله . يصيرون مثل الطفل الوديع .
وشنطلب ينفذون ..

بس اني مانطيته بسرعة . شلعت گلبه حتى يعرف قيمة هدوه ومايزعلها .

للصبح گعدت سويت ريوگ وجهزتها .
لان امي والحجيه يگعدن من الصبح .
بعدين شويه شويه نزلت كلها .

وبدأ صوت الجهال . اولادي واولاد اصيل .
هوستهم ولعبهم احلى شي بالبيت ..

تريگوا . وحبيبي بوسني وطلع يشوف الولد لان يردون يدزون خبر الاهله ..

وامي حضرت غراضها .. گالت اروح اسلم ع الشيخ واهله عيب نروح هيج ..

اخذتها الحجيه وراحن ..
سلمن ورجعن . بس فرقان ماراحت وماادري ليش غيرت رأيها مع العلم جانت تطفر من نگول نروح البيت الشيخ .

مرت الايام ..
واجت عمه وفاء گالت هداوي .. حسين تعرفين خلص جامعه واريد اخطبله وافرح بي .
اني ردتله نور بنت خالته .
بس هو شايف اختج . ومجبور بيها .
واني هم عاشرتها وشفتها ونعم البنيه واخلاق ..
شتگولين امج تقبل تزوجها ..

هدى..  والله باجي ماادري . حسين مايتعيب .
بس هي بعدهي تدرس .. واخاف الشيخ يسويلنا سالفه .
لان هو ابن ابنه الجبير ويريد يخطبله على رايه .

وفاء .. اني اهم شي عندي سعاده ابني . ومدام حسين هوايها مااكسر بخاطره .

هدى .. باجي ادري . بس مااريد اختي تعاني مثلي .
وتعرفين هناك نضال واخاف تسوي بيها مثل ماسوت بيه .
وفاء .. شبيج يهداوي سديتيها فد مره . خلي نشوف البنيه وامج شتگول وبعدين وكت الحجي ..

رحت الامي حاجيتها اخذني لؤي .
وامي رحبت وماحجت شي . وفرقان طارت بعد .
والعصر اجو . الحجيه وباجي وفاء وام نضال يعني بيبية حسين ونضال ..
اني من شفتها انقبض گلبي ..

حجن وي امي بس وجوهن جانت ماتتفسر . وكل وحدها وجهها بمكان .
تگول جايات جبر .

گالتلهن امي اشوف عمامها وانطيكم خبر .
هو اصلا عمامي مو بحالنا .
بس گالت امي مااريد ارخص بنتي وگبل انطيها .

من رجعن رجعت وياهن ..
والطريق كله نصال تبسمر .

والله الشيخ ماراضي وعلى عيونه . بس لو ماحسين وگف بوجهها وهو يحبه .

وفاء .. نضال مو وكته الحجي .

نضال .. شأسكت ترى والله انطيتوا مجال البنات الفلاح وساويتوا روسهن بروسنا .

الحجيه .. يمه كافي شنو روسهن وروسنا.  كلنا ولد ادم . ومن طينه وحده . بعد شلج بهل حجي الماسخ .

سكتتها امها . واني افور دم .
تالي گلت الباجي . ترى اختي مابايره باجي . اذا ماتردون اني اخابر امي واحجي وياها ..

گرصتني الحجيه . وگالت اسكتي يمه مالج شغل بالحجي
رجعت ضايجه . وطالعه روحي .
سألت على لؤي .
گالوا راح ياخذون الولد الاهله .

للمغرب اجت وفاء ضايجه .وسمعتها دخلت للججيه وگالت الشيخ يگول تريضوا بسالفه البنيه .
خلي الاوضاع تهدأ نشوف جارة البلد . وينا ووين العرس .

صدگ انقهرت بقيت منتضرة لؤي لليل اجه .
گتله اريدك تدز على حسين .
گال شكو .
سولفتله .

گال . گومي البسي عباتج .

هدى .. وين .

لؤي .. نروح البيت الشيخ . فرقان بحسبة اختي واني المسؤول عنها .

امشينا يله .
رحنا اني وياه .
گاله شيخنا اريدك انت وحسين وابو ايات ووفاء بالاستقبال بشغله .

دخلنا للاستقبال . اجت نضال ورانا .
گالها من رخصتج خويه شغله خاصه بينا .

الشيخ .. خير يالؤي وشعندك .

لؤي .. كل خير شيخنا .
والتفت على حسين ..

گاله حسين انت مو قبل فترة . حتجيتني على فرقان .
وگتلك من يجي وكتها اني اخطبها الك .
واني احجيلك وي البنيه .

حسين .. اي خالي صحيح اني عجبتني البنيه . وطلبت منك ومن ام حمودي تحاجوها الي .

لؤي .. خوش حجي . وهسا بعد ماحجينا للبنيه وامها وراحت نسوانكم خطبنها .
هسا تريضوا .. شنو هو لعب .
هاي خطبه .
ترضاها يشيخ . وانت دوم تطلع مشيات وشايف بعينك .
اذا المره اخطبت وتراجعوا اهل الولد.
معناها كسرتوا بختها . وهنا لازم تمشون وتنطون فصل بعد ..

صحيح لو مو صحيح ..

الشيخ . بويه اني ماگلتلهن روحن هن راحن من كيفهن اني من البدايه گلتلهن تريضن .

لؤي .. اعذري شيخ . بس مالك حق بهاي الحجايه .
البنيه حجيتوا بيها وخطبتوا .
واذا استثنيتوا . اني هنا اوگف الها واخذ رد اعتبارها .
لاتشوفوها بلايه احد وتستغلوها .
تراني موجود وبحسبة اخوها .
واخت مرتي اختي ومااقبل واحد يدوس على عرضي .
مفهوم الحجي ..

وبعدين الولد ورايدها انتو شكو .

باوعت لحسين .. شوف ولك اني رضيت بيك لان ادري بيك رجال وگد كلمتك .
بس اذا تبقى بججي هذا وهذا . لو عمتك تجركم طول وعرض .
انسى عدنا مرة الك .
وهي مابايره الف واحد يتمناها ..

يله اترخص . گومي هدى ..

طلعنا .. واني فرحانه برجلي وحبيبي اخذلي حقي وحق اختي .
گتله . لؤي التفت .وهو معصب .
گتله اروح فدوة الحلگك يخبل من يحجي .

-هههههه والله خبله . دفوتي من شفتج متعصبه گلت راح تنفجر هناك عليهم تالي ختلتي وراي مثل الدجاجه .

-اي غير انت مكفي مكاني . شلون اقاطعك ميصير .

-ههههه خوش عذر .

تعشينا وخلصنا . وسولفنا للحجيه الي صار .
گالت يمه انتم تدرون الحجي شلون يحب نضال ويعزها من هي صغيره .
واكيد شو شحجت وعبت براسه عليج . ولان اختج عود خاف تطلع مثلج .
قابل هو الشيخ يعرفج گاعد وياج لو ماهي تسولف وتحجي ..
والله اني ماكاسر گلبي بس حسوني .
جان فرحان وطاير من رحنا نخطب .

هدى .. شنسوي بعد كلشي بالقسمه .
اني هم مااريد اختي تشوف الشفته ..
#بقلمي_الكاتبه_شمس

……………………………………

ورى العشا .. اجت باجي وفاء ورجلها . يعتذرون
ولؤي گام يحجي وطوخ بالحجي .
گاله .  الى متى شيخ وشكبره تمشي نضال .
انتو مايمشي بحجيكم بگد ماهي مسيطره.
ندري مكسوره بخت وارمله .
بس خلي تتهدى وتگعد .
ظلمت هدى وجابتها وبهذلتها وماخلت شي ماسوته الها جا اذا صارت اخت هدى عندكم شتسوي بيها .

وفاء .. اني موجوده اكو واحد يحجي وياها .

ابو ايات . لؤي اني حجيت وي الشيخ وحسين هم ماسكت .
بس خلي ننتظر يهدأ الوضع . وبعدين نسوي كلشي رسمي ..

وفعلا مرت الايام . بس الوضع صار من سيئ الاسوء .
وكل الي عنده حساب قديم طلعه .

وكل يوم نسمع واحد مقتول لان عندهم حساب وياه قديم لو هذا جان مختار وقتلوه .
لو عضو بالحزب . لو ولو ولو .
يردون اقل حجه حتى يبررون افعالهم .

البلد تاه . وصار الي يگله ارجع لورى ينقتل وبدون سبب كثرت العصابات والاحزاب .
وماتنعرف السالفه شني ..

الى ان بيوم .
طفرنا بذيج الليله على صوت رمي وهونات وقصف على بيوتنا .

نزلنا لؤي بسرعه وشال ولدي ونزلهم
ومرتضى شال ولده .
والخوف والرعب .
وبس نبجي والجهال خايفه وتبجي .
گال لؤي اگعدوا هنا جوه الدرج ولاتطلعون .
ووصه الحجيه .

گالها .  يمه ابد لاتطلعون من جوه الدرج .
شفتهم صعدوا ركض ونزلوا
كل واحد سلاحه بيده .

رادوا يطلعون .
ركضت وراه .
لؤي وين رايح ادخلوا لاتجيكم تايهه.

عصب عليه .  ادخلي ولج بسرعه ولاتعاندين .
شتردين اگعد يمج جوه الدرج مثل النسوان والجلاب ترمي علينا .

عاط بيه ورجعني .
وقفل الباب من بره خاف اطلع .

بقيت نبجي ونلطم .
والحجيه تصيح ولدي راحوا يمه .

مانسمع بس الرمي . وكل ساعه ضربه قويه مثل القنبله .
نسمع الهوسه والضجه .
ومانعرف شني السالفه .
تالي گلتلهن مااتحمل راح اصعد من شباك غرفتي اشوف شكو .
صعدت وشفت البساتين نهار من الرمي والضرب .
وناس ترمي على ناس .
واسمع عياط .
بعثيه . مجرمين . كتلتوا ولدنا كلها .
اليوم القصاص الكم .

نزلت مرعوبه .. ركضت للحجيه وگلتلها .
گامت تحجي وتدعي ..
الله لاينطي البعث شحصلنا من وراه غير بس الضيم .
اخذوا رضا وهسا راح ياخذون ولدي .
من شگول عليك يخضير .
راح يرحون ولدي من وراك ورى حزبك .
وتخرمش بخدودها .
بساعتها ماعرفت شتقصد .
وهي تحجي بحرگة گلب . واحنه خايفين مادققت .

حاضنه اولادي وابجي وبالي يم لؤي وادعي ربي يحفظه
ادري بلؤي يموت ومايخليهم يخطون خطوة وحده بگيعانهم .

ساعه وهدأ الوضع بعد ماكو رمي .
ردنا نگوم . گالت الحجيه .
گومن الغرفتي كلحنه نتجمع سويه ..

گمنا الغرفة الحجيه . الجهال انرعبت .
اصيل تحاول تنيم اولادها . خايفين مايقبلون ينامون .
واولادي گاعدين يصفطون جذب واحد ع الثاني .

حمودي يگله . ولك الامليكان دخلوا علينا . ( لأن هو يلفظ الراء لام ) وعمو لؤي وعمو مرتضى كتلوهم .

وصفاوي يگله .. لا ولك ذوله حراميه مو الامريكان .

اني مرعوبه . وهمه ولاعبالك شنو من جيل ..

مرت ساعات والولد مارجعوا . والخوف ماكلنا عليهم .

شويه وانفتحت الباب طفرت .
شفت لؤي . وركضت عليه حضنته وابجي .

باسني براسي . وگال . فضت يعمري لاتخافين .
وين امي ??

-بغرفتها كلنا گاعدين .

دخلنا للغرفه تلگته الحجيه ..

-مايرتاح خضير الا لمن ياخذكم واحد ورى الثاني مني .

لؤي .. يمه شني هالحجي . الشيخ شعليه اول وتالي هاي گيعانا وتعدوا على حدودنا جا نسكتلهم .

-لو ما الحزب مالته وسوالفه ماتهجمت علينا العالم . جا رضا شلون راح .

بعدين سألت .. ماعرفتوهم منين .

-من عشيرة……… واكيد ماراح نسكت لازم نگاومهم .

الحجيه .. ولك شتگاومون . البلد تايه . وعمك مامخلي فراري مالازمه .
وهسا اجتهم فرصه ياخذون ثارهم .
وادري بيك يمه تذب روحك بالنار .

لؤي .. جا شلون يمه اگعد يمجن .

الحجيه .. وجا هاي كوم اللحم مافكرتوا بيهم .اذا صار عليكم شي منو الهم .

لؤي .. مايصير شي ان شاء الله. وهذا الحجي مو وكته خلي تخلص هالسالفه واني الي غير حجي وي الشيخ

باوعلي .. شوفي هدى . لمي غراضج وغراض الولد .
وانتي اصيل هم وباجر . انتن وامي اوديجن البيت اهل هدى هناك آمن .
منا لمن تفظ السالفه ..

هدى .. اني ابقى هنا وياك مااروح .

لؤي .. اسمعي الحجي مو وكت عناد . اذا بقيتوا هنا بالي يبقى يمكم .
وذوله الانذال . يضربون هاونات ورمانات .
واخاف وحده منهن تجي ع البيت وتتأذون .
احنه نگدر ندبر ارواحتنا .
خو مانحير بيجن وبالجهال اذا صار شي .
حتى عيال الشيخ كلهم راح يروحن البيت عمتي سهيله وبيت عمي كاظم هم محد يبقى بس الازلام
انتي شعندج هنا  . 

گمت رحت الغرفتي واني ضايجه .
وماحجيت شي .
اجه وراي .
حضني من ظهري . حبيبتي والله مااعوفكم كل يوم اجي يمكم واطمنكم .

التفتت . عليه . جا ودوام الجهال .

لؤي .. هو مين اكو دوام بهذا الوضع ماتشوفيها تايهه .
يله يروحي . لمي غراضكم ونامي كم ساعه للصبح .
واني طالع الزم مناوبه يم الولد .

لميت ملابسنا ونزلت .
واصيل هم حضرت ملابسهم . وخليناهن بالصاله .
الحجيه ماقبلت تروح تگول اموت وي اولادي .
بالگوه قنعناها وقبلت تروح ويانا .
بقت ساعتين للصبح .
حضنت اولادي ونمت .
#بقلمي_الكاتبه_شمس