رواية مبعثر فيك ماللحزن لايشفى الفصل التاسع والعشرون 29 - بقلم ايمان يوسف🕊️

البارت التاسع والعشرون
(الأخير)

طلع سيف من مطار هيثرو..
وارثر ينتظره جنب سيارته الروز..
سلم عليه ورحب فيه وخذ الشنطة ركبها بالسيارة..
ارثر:دعني اتولى القيادة ياسيدي.. لتو وصلت من رحلة طويلة..
سيف يتوجه لباب السائق: لن اذهب للمنزل هناك عمل يتوجب علي القيام به.. هل تريد ان اوصلك..
ارثر بتنهيدة: لا مارت احضر سيارتي..
سيف :حسناً الى اللقاء..
قفل الباب وانطلق بها..

دعك عيونه بارهاق..
وهو يستعيد كل شي صار قبل جيته..
مهره بعصبية:
لا اكيد فولدي شي.. كم يوم ماكلمته.. والحين انت بتروح.. وش سيف وش..!!
سيف بهدوء:
صدقيني صايره عندي مشكله بالورشة ..مضيعين قطعه وعليها مشاكل..
مهره تمسك ضلوعها:
لابالله ماهي قطعه ضايعه.. شي يقولي قطعة قلبي هي اللي ضايعه... اكيد صاير بسيفي شي..
ابتسم ووجهها بين كفوفه وباس جبينها:
لايشطح مخك لـ الشين سيف بخير.. وقلت لك انهم طالعين فيه برحلة كروز.. وداعية وبجيبه معي..
مهره عيونها تغرق دموع:
ليتني اصدقك وارتاح.. خذني معك قلبي نار..
ضمها: ماغامر فيك..مهره انتي بالثامن.. صعبه.. خلك وانا بجيبه لك..
بتوسل وكنها تبي تكذب قلبها:
يعني اكيد سيف مافيه شي..؟!
مسح دموعها بحنية:مافيه شي..

سافر وماحد يدري هناك عن السالفه الا نواف ومهره اللي مهما سلكت.. واضح ان قلبها عارف وش صاير..

توجه لبيت راجح..
وصل..
رن الجرس.. افتحت الخادمه..
عقدت ليان حواجبها وهي تسمعه يسألها عن راجح..
جات :سيف... حياك..!
دخل وباللهجه جافه:وين ابوك..؟!
ناظرته كيف وجهه مرهق..
وكيف لبسه كاجوال وازرار ياقته مفتوحه.. مستحيل مايفز قلبها مع وسامة سيف.. بجميع حالاته..
ابتسمت وتذكرت موضوع سما ..تلعثمت:
تفضل.. اروح اناديه هو بمكـتـ...
دفها وهو يدخل  ويتوجه لمكتب راجح: انا اروح له..
لحقته ولانها تدري مشاري كلمه وعطاه خبر باللي صار :
سيف لحظه.. ترى بابا تعبان.. وضغطه متذبذب..
فتح المكتب بعنف:
مسيك بالخير ياحافظ الأمانه.. ياوافي الوعد..
رفع راجح عيونه بهدوء له:
ماله داعي ياسيف هالكلام.. اقعد وعين خير ونتفاهم..
ضرب سيف المكتب وبغضب :
وش عليه.. على بنتك اللي شالت الورع والله اعلم باراضيها.. هالحين صار حبيب وصارت تبيه.. لعلمك ياراجح.. عساف تارك تقاريرها وهي كم مره تحاول تجهضه.. حتى الكحول شربتها تبيه يموت..
راجح بوجه تعبان:ماني غشيم فيها..
سيف بكل انفعال وغضب:
لا والله غشيم.. بنتك كم مره تحاول تنتحر.. وتراجع عند اطباء نفسين.. المفروض فاهم انها غير مؤهلة حتى انها تخطي بالشارع لحالها معه ..بس والله ياراجح.. لو صار لسيف شي.. والله لاتروح رقاب 'واشار نحوه بسبابته'واولهم انت ..
ليان بانفعال دخلت:
خير سيف..احترم نفسك.. ماسمح لك تتكلم مع بابا بهالأسلوب.. تراه ماله ذنب واكثر واحد تعبان من تصرف.. سـ.....
مد يده يسكتها وبدون يلتفت :
لاتكلموا الكبار لاتحشرين نفسك بينهم..
راجح بصرامه:
اطلعي ياليان وخذي الباب معك..
طلعت واغلقت الباب بقوه..
راجح عقد حجاجه:
تهددن ياسيف.. تراني ماهو غافل بشغلك ضدي.. ولاتفكرني ساكت عاجز.. لا والله ماسكتني الا العشرة اللي بينا..
سيف ماتفاجئ ان راجح معه علم .. عنده خبر من هاشم:
تدري ان اقدر اوديك بداهية.. عرقلت كل شي لخاطرك يابومشاري ما انت ارخيص عندي.. بس والله لو ماطلعت سما.. لاتتخيل اني بصير الكفو اللي مايسحبك..
عقد حواجبه ومن بين اسنانه:
لاتستفزني ياسيف.. تراك غالي..
ضحك  بقهر وسخرية:
لايكون بتحطني بالقايمة السوداء عند منصور عشان يشطبني.. مثل غازي.. تراها ماهو غريبه عليكم..
استوقفته جملة سيف والطاري :
وش جاب طاري غازي هالحين..وش الهرج اللي قلته ..؟!
سيف بسخرية يشير للصور على المكتب.. واللي فيها غازي بصحبة راجح:
كنت اسمع باللي يقتل القتيل ويمشي بجنازته.. بس والله اللي يقتل قتيل ويرز صوره بكل مكان.. هذي جديده علي..
توسعت عيون راجح وهب واقف وبانفعال وغضب:
هوب سيف هوب.. لاتفكرني وقعت وبتكثر سكاكيني.. اهملت سما ايه.. وماصنت امانتك يحق لك تخوني.. بس تجي تنبش ذكرى خوي عمري وتتهمني فيه.. لاوالله اقص لسانك من عرقه.. غازي مات حادث وماكان بيني وبينه الا وضح النقا..
سيف بخفوت مثل السم وعيونه في عيون راجح:
هذا اللي بلغك فيه منصور عقب ماذبحه وعطل بريكات موتره.. افتعل له هالموته.. يوم بغاه بشتغل معه ورفض.. واصر.. وكان بيبلغ...راح زاحه من دربه.. مثل مايبي يوصل لي الحين ويزيحن من طريقه..
راجح حس بشوك بيده اليسار وحرارة في كل جسمه..
وجبينه يعرق ووجهه يحتقن وبصعوبة:
انت وش تقول..تسمعه اذنك اللي يقوله لسانك..

سيف ضرب الطاولة بقبضته:
مهره قالت لي.. والعلم من جدتها.. بس الملف تقفل انه نسب للعطل بالسيارة.. بس الواقع الموتر جديد ومايشكي من شي ابد.. البلاء والشكوى من الحاح جماعته القديمة اللي ماتعرف ام غازي من اسماءهم احد...ولاقدرت تدين اشخاص بعينهم.. نبشنا الاوراق القديمة وحققنا.. وماكان فيه طرف الا انتوا ياجماعته.. انت ومنصور..!!
غازي مقتول ودمه على الأرض.. ماحدن خذ بثاره.. بس عيب على وجهي الشنب.. اذا ماجبت منصور على وجهه..!!

واستدار بيمشي.. استوقفه صوت راجح وهو شارد في الصدمه:
انت تدري.. منصور.. وش يصير لمهره..
عقد حواجبه بدون يلتفت:
مهره ماتدري عن اسامي.. ذا شي انا ادري به..
راجح:منصور رجل امها.. ابو اخوانها 'اسامه وباسل'..
التفت بحده وصدمه..
تمتم راجح:
واللي رفع سبع ماكنت ادري انه مقتول..كنت اشك واسأل منصور بس ينكر ويسخر.. وكنت استبعد.. ماهقيت انه واطي لذي الدرجه.. هو خذا مرته بأول العمر.. وخذه روحه بآخره.. والله وكشر الوجع بوجهي نابه..

سيف طالع راجح كيف متأثر وموجوع.. وهو يسحب صورة غازي ويتكلم وكأنه يسمعه..

'اتضح لي ان علاقة راجح بغازي كانت اكبر حتى من علاقة الأخ واخوه.. للمره الأولى اشوفه بهالحال.. وكأن قضية سيف الصغير تقلصت عند راجح قدام كارثة قتل غازي اللي مايدري عنها '

اطلق تنهيده حاره وبألم متهكم يخاطب الصورة :والله من كبرها ياغازي ماعاد يوسعها حساب..!!

*****

الأيام بعد اليوم..
كانت الأصعب لسيف..انشل تفكيره في البحث عن سما وسيف بالتعاون مع راجح.. ورجاله..
راجح من عرف وش سوا منصور.. وهو يبي يتفضى له وينسف فيه..
بتقديم كل الأدله اللي عنده ضده للحكومة..!
بس كان مايبي يلعب بالنار.. وبنته وحفيده برا نطاق حمايته..
سيف واللي كانت اتصالاته لمهره عباره عن غصه وكذبات.. واعذار واهية..!
مهره بطبيعة الحال كانت حاسه.. وبأمل تحاول تصدق كذباته..
لمن جاء ذاك اليوم وكانت بيت سعود..طلعت لأن فارس ينتظرها عشان يمشون بيتهم..
واسمعت نواف وهو يتكلم مع فارس بالكارثه..
ووضع سيف هناك..
وان سما اختفت بسيف..!

'ابتلعت غصاتي والألم.. كنت اعلم ان هناك مصيبه حلت بابني.. لكن اهونها انه اختفى مع امه.. ابليس وضع امامي انه سقط من يختهم وغرق.. او خرج من المنزل وخُطف.. او ركض في شارع واصيب في حادث..
طبعاً مصيبه ان تخطفه امه وتختفي..ليست سهله وكأني ابتلع كمية من الزجاج المجروش..
عدت ادراجي للمنزل.. وحاولت ان ابدو وكأني لم اسمع شي..
حالي مثل المريض الذي حددو مدة عيشه ويضحك بأمل.. عل الله يكتب له عمر جديد..
اطبطب على قلبي..
سيجدونه.. امه معه لن تدع مكروه يصيبه.! '

زينه طالعتها وهي سانده كفها على الجدار..
تمسك بطنها وتحس بوخزات شوك داخله :
مهره ابوي وش فيك رجعتي..نسيتي شي؟!
مهره تحاول ماتبكي ابتسمت بغصه:
شكلي بدخل الحمام..لااتوهق فالسيارة
ضحكت زينه:
الله يعينك..عاد مو من بعد البيت..
مهره تتوجه للحمام:
تعرفين فارس يوهقني يمر كوفي ولا شي..
ودخلت واغلقت الباب وقفلت..
ومسكت المغسلة.. وهي تشهق ومو عارفه تتنفس وصورة سيف تداهمها.. بهمس منهار:
مشتاقه لك يمه.. حرموني منك.. حرموني..

طاحت دموعها وهي تنزل راسها وتفتح الماء..
اغسلت وجهها..
والماء ينزل مختلط بالدم النازف من انفها..
ملطخ كفوفها والرخام..

*****

بعد كم يوم..
سيف بمحله..
وعلى غير العادة لبسه غير رسمي.. بقميص مفتوحه ياقته..
تعبان ومرهق..
خذ ملف من آرثر بدء يوقع فيه وهو واقف..
ويناقشه عن بعض الامور..
التفتت زبونة:
مستر سيف..؟!
رفع راسه ببتسامه باهته: اهلا ًمدام سيلين.. كيف حالك..
صافحته ببشاشة :بخير..الا تساعدني في الاختيار.. فأنا أثق بذائقتك..
قرب من الطاوله بمجاملة.. يشوف قطع محتاره فيهم..
حاول يركز مثل عادته.. ويستحضر أسلوبه مع الزبائن.. بس ماقدر..
تنهد ودعك عيونه:
اعذريني مدام سيلين.. لست في مزاج جيد..
وتركها بعد اعتذاره وتوجه لارثر..اخذ منه باقي الاوراق وطلع..

وصل لسيارته ورمى الأوراق فيها..
وتداهمه وعوده..
اقترانه بمهره كان عشان سيف..
تضحيتها بكل شي عشانه..
تقبلت اتهام بشرفها..
عانت الأمرين.. كله لعيون سيف..!!

سيف واتصالاته ولهفته للرجعه لهم.. عيونه تمتلي دموع وهو يقول 'ماما وحستيني'
أكبر خطأ ان طاوع راجح وحكم ضميره.. وقال سما امه ويحق لها تشوفه..
بس الواقع لو مقدم تقاريرها وحكم القانون.. ماقبلوا انها تاخذه..
بس كانوا مايبون يدخلون القانون ولا انه ينسب لسما رسمياً..
او ان مهره تدخل بإشكالات..
فكانت الأمور كلها وديه بدون اثباتات..

مشى بسيارته..
ضايع..
ارتفع رنين جواله ابتسم بتهكم مرير :
وش تبين اقولك يامهره..مالي وجه والله مالي وجه ..
لم يرد..
مهره كانت في بيت سيف بلندن وصلت بدون علمه :مايرد..
فارس: بينصدم لاشافنا هنا..
شردت في الخارج من النافذة:
كم يوم مايبي يرد علي ولايكلمني.. ابوك هربان من انه يواجهني..
فارس واقف يشرب قهوة قدام المدخنه الكبيرة:
هو من درى انك دريتي.. وهو منعفس..
عيونها امتلت دموع وبقهر وخوف :
وين راحت بولدي.. ماخلوا مكان ولالقوها..وين..؟!

*****

سيف في الورشه..
واقف قدام لوحه يشتغل فيها.. ينظفها بدقه..
يحاول يتناسى كل الاحداث..
ماينام ولايرتاح..
ياسمين تلملم اشياءها.. طالعت الساعه وطالعته كيف دمر ملابسه الغاليه بالمواد:
سيف خلاص اتركها عدمت قميصك.. حرام..

مارد عليها ولا حتى انتبه لها..
نادته:سيف..؟!
رفع عيونه..
تنهدت:تأخر الوقت اترك اللوحه بكره.. راين يسويها..
سيف:ياسمين خلاص روحي لاتتأخرين اكثر على امك..
بحنيه:والله وجهك مرهق روح ارتاح ونام..
هز راسه:ليت اقدر انام ان كان نمت..
ياسمين:لاتسوي بنفسك كذا.. وارجع الرياض عشان مهره.. حرام هي باشهرها الاخيره وتحتاجك..
يشتغل بدقه باللوحة :
لو اقدر احط عيني بعينها رجعت..
ياسمين:وش ذنبك انت.. سيف لاتحمل نفسك الخطأ..
مستمر في شغله ولارد عليها.. تنهدت وطلعت..

بعد مضي وقت..طلع من الورشه..
اخرج جواله كان تاركه صامت.. لقى مكالمات كثير من نواف.
اتصل وبقلق: وش صاير.. وش هالمكالمات يانواف..؟!
نواف بعصبية:انت حي.. ميت.. عنبوك من كم ساعه ادق عليك ماترد..
سيف:كان صامت وكنت مشغول بالورشه.. وش فيك.. فيكم شي..؟!!
نواف بانفعال:حضرتك محمل نفسك الذنب.. ومنطفس وماترد على احد وتحرق في روحك.. مرتك تتصل وترسل ولاترد عليها..
زفر سيف وشغل سيجار:
اختصر نواف.. مهره ماقدر ارد عليها الا ومرجع سيف معي..اذا ماعندك شي ثاني تقوله بقفل..
نواف :الا فيه.. مهره وفارس وصلوا عندك بلندن.. وترى من وصلوا وهم يكلمونك وانت مو حولهم..
توسعت عيونه بذهول وبانفعال وغضب:
شهالجنووون..شلون خليتهم..مهره تعبانه وفارس مدرسه.. وش ذا الخباااال..
نواف:والله مادريت الا وهم فالمطار.. كلم فارس وقال.. مهره كانت بتجي لحالها وماخلاها.. وهو مدرسته اهليه ودبر الوضع.. مهره ماعادت متحمله تبي تكون قريبه من سيف.. وبتلقاه..
سيف بغصه وتهكم:
وش تلقى يا اخوك.. وش تلقى.. طوال الشوارب اعجزوا..
نواف:عاد هي عندك.. وخفف اللوم على روحك..

قفل سيف.. وتلفت بحيره وغبن..
تنهد وركب السيارة وتوجه للبيت..

******

مهره كانت فوق بعد ماتأخر الوقت وماجاء..

'تكات الساعه تحفر عقلي كمعاول حاده.. برودة لندن تقصف عظامي..
شعوري بالضياع والألم.. يجعلني كجثه باردة في ثلاجة موتى..
اقف عند حاجز السلم وانظر للباب الموصد..
انتظر ذاك الذي لا أدري أأغضب منه.. او ابكي على صدره.. اواسيه او ابحث عن مواساتي لديه.. فُتح الباب اخيراً.. ودخل سيفي.. سندي وذخيرتي.. وكأن المأساه حطت فوق رأسه كغراب.. ذبوله تعبه وشحوبه.. كيف بالله ذاب قلبي وانصهر..'

دخل سيف وجلس في الصاله الشبه مُظلمه..
ماصعد فوق..
راقبته من عند الدرابزين كيف مرخي جبينه على كفوفه.. وسيد الموقف السكون..
مرت الدقائق والربع ساعه والنصف..

هي مو قادره تنزل.. وهو مو قادر يصعد لها..
جلست في الصاله العلوية بشرود وصمت.. يشبهه..!
وقعت عينها على العود هدية راجح..!
خذته وجلست تحتضنه..
لتسكب ألمها في اناملها.. وتنسج على تلك الاوتار مقطوعة'مُره'..
احيان الانسان من شدة الغصه لايعبر.. لايخرج صوته..
لكن قد تتغير لغته لقصيدة او خاطره او رسوم تعبيرية عشوائية.. او دندنة وتر..!

سيف.. 'كنت غارق في خذلاني..
وصلتني تقاسيم مهره على هيئة مشارط حاده..
قطعت بقايا قلبي وروحي..
نهضت.. اصعد السلم.. وكأن هناك خيوط وهمية خرجت من انامل مهره والعود وسحبتني الى حيث هي..
نظرت اليها تعزف.. شارده في نقطه ..
ذهبت نحوها واطرقت..
لم ترفع عينيها لي ولم تنظر.. استمرت تجلدني بالوتر الحزين..
كانت على الكرسي..
جلست امامها على الارض بيننا متر.. هي تدندن حزنها..
وانا اسمعه..
ضمرت اضلاعي وضاقت..
من نحن لنسطر الحزن في عمر مهره ملحمه..؟! '

مهره..
'حانت ألتفاتتي اليه.. لايرفع رأسه ولاينظر لعيني.. وازدادت غصاتي ومراري.. '

وقفت عزف..
وتركت العود..
نزلت على الأرض عنده..
وبخفوت :ماتبي تشوفني.. ماتبي تحط عينك بعيني..
بخفوت مجروح:
خذلتك يامهره.. خذلتك.. كل وعودي تحرقني.. ماوفيت فيها..
مسكت كفوفه وبخفوت باكي:
بتوفي ياسيف.. وبتجيبه.. لاتيأس كذا وتكسر مجدافي..
سيف بشرود:عجزت يامهره.. ابشرك عجزت.. مابقى شي بيدي ماسويته..
طاحت دموعها على كفوفه وانهارت بكاء صامت ..همست:
باقي.. بتلقاه.. مو انت اللي لاقمت تقوم قومة جمل..
كمل بتهكم مر:وانا اللي طيحتي طيحة حصان..

اخفت وجهها بكفوفه في حضنه وبكت بانهيار وهي تردد:
ابي ولدي سيف.. ابيه.. والله ان قلبي على فرقاه ذايب.. ابي سيف.. جب لي سيف.. تكفى..!!. ابي اضمه.. ابي اشمه.. خلوني اشوفه ..عروق قلبي جفت بدونه..

فارس كان صاحي سمع العزف وطلع..
واقف يشوف الموقف المُخضب بالدموع..
وابوه يمسح على راس مهره وظهرها..
اللي من صارت السالفه الأخيرة.. توها تبكي بهالشكل وتنتحب..!

******

بعد يومين تقريباً..
وفي صباح لندني هادئ.. سيف ومهره وفارس يفطرون بهدوء وصمت..

حط كفه على خدها البارد الشاحب:
اليوم نبي نروح المستشفى وتشوفك دكتورة .. ونضبط لك مواعيدك هنا ..
ردت باختصار:ماله داعي.. اموري طيبه..
سيف يحاول يسيطر على انفعاله:مهره.. خافي على البيبي اشوي.. يعني باسلوبك ذا بيموت وتموتين.. قبل حتى نلقى سيف..
مهره بعصبية:
ماناقصني الا هالفال سيف.. اففف.. اففف..

وقامت راحت عنهم..

صفق كاس جنبه وطاح على الارض وانكسر..
فارس:يبه روق.. ماهو كذا..
سيف بانفعال:
اذا استمرت كذا بتموت.. بتموت وتلحق امك ولاتقول ماقلت..
فارس زفر بوجع:
لاتقول هالكلام.. والله ترى الحكي يوجع..
ارتفع رنين جوال سيف..
وخذه ورد..
وكان يستمع للطرف الثاني و واضح انه مشاري..
وكان انفعاله وغضبه  يدل على انها حلت كارثه..
مهره جات على صوته وكلامه.. عيونها طارت وهي تستشف الحاصل ..بس ماقدرت ترتب كل الامور..
قفل..
مهره برعب:كيف.. مافهمت.. شلون يعني ارجعت بدونه ..
سيف بغضب:الله يلعنهاااااا..
مهره بانهيار صرخت :شصاااار..!!!

******

في بيت راجح..
كانوا متواجدين عايلة راجح.. وطلال وفواز.. عشان يحققون مع سما والجميع.. فالموضوع اللي حصل..
طلال طالع ساعته:سيف ماجاء..؟!
مشاري :جاي فالطريق..
التفت على سما وهي ترجف وشارده ووجهها ماله لون..
نادها:سما..!!.
ماردت..
نادى بصوت اقوى:يا أخت سما..
ارفعت راسها بارتياع..
طلال عاقد حجاجه:ممكن الحين تتكلمين.. وتقولين لي اللي حصل من الاول..

حطت كفوفها على راسها وانهارت بكاء وبكلام ملخبط بين العربي والانجلش:
ضيعت ولدي.. ضيعته..انا وضيعه.. انا مختله.. عساف كان محق.. اضعته..
مشاري جلس قدامها: اشششش سما.. اهدي عشان نقدر نوصل لسيف.. لازم تتذكرين كل تفصيل وحدث..
فواز بعصبية وانفعال :يابنت الناس اهدي.. ترى الوقت ان طال ماهو من صالحنا..واذا انتي عارفه نفسك.. ليه بالله من البداية تهربين فيه..

انهارت اكثر..
مشاري:تكفى شوي شوي.. ماراح ينفع كذا..
راجح ساكت بملامح جامده تخفي الكثير.. يحرق سيجار ورى سيجار..
لمن دخل سيف ومهره وفارس..
مهره تقدمت ووقفت وناظرت سما وبصوت عالي متهكم:
انبسطتي هالحين.. انتصرتي..كسرتي خشمي.. وصار ولدك الحالك..بشري.. تعلقك..؟! نساني..؟! الله لايحلك انتي وعساف.. كانكم حلفتوا علي الوجيعه..
مسكها سيف :مهره ماهو وقته..
سحبت ذراعها وبصياح:
ليش هو بقى فيها وقت.. ولدي ضاع.. ولدي بحححح..
انهارت بكاء وبصياح وهي واقفه قدام راجح :
هااا ياعم راجح.. عساك بس وفيت حقوق غازي.. عساك بيضتها بنذرك.. ليتك مادورتني ولالقيتني.. ليتك ماحطيت عساف بوجهي..

غمض عيونه بقوه وغصه..
وكل شي نواه خير بغازي رجع بالمقلوب..
انتحبت سما وهي توقف وتتوجه لمهره:
آسفه مهره.. آسفه..
وبشكل غير متوقع.. عاجلتها مهره بكف وصاحت بوجهها:
كيف هان عليك.. كيف ضيعتيه من يدك..ليش ماتمسكتي فيه..
سما تبكي بنحيب:
كانوا مسلحين..هددوني..قالوا له بنوديك لمهره.. وترك يدي وتعلقهم ماخاف.. تركني وراح..سمع اسمك وراح..!!
مهره بنحيب:آااااه ياسيف كانك جرح بقلبي مايطيب..كيف ماتمسكتي فيه بظافرك واسنونك..

سما شردت..
في لحظة الرجال يمسك يد سيف ويقول بياخذه لمهره.. وكيف سيف ترك يدها.. وتركته.. وانسل من كفها بخفة.. ماقبضت على يده.. لانها كانت مذهوله كيف تركها بس سمع اسم مهره.. كيف راح مع رجال غريبين في سبيل انه يشوفها..

تمتمت بشرود مرعوب:
آسفه مهره..والله آسفه..
مهره بألم وصياح:على ويش.. على جوفي المحروق.. ولا قلبي المقطوع... مابي من احد أسف..
مدت كفوفها بانهيار:
ابي سيف بحضني.. جيبوه واخذوا عمري..
سيف ضمها وانهارت :
شلون القاه.. ولدي مخطوف..ضايع ببلاد هالاجانب.. كانت هينه وامه معه.. كانت هينه ياسيف.. احس روحي بتطلع..
ضمها اكثر وجلس معها :
اهدي ابوي..بنلقاه.. الحين ناخذ معلومات من سما.. ونتابع كاميرات الشوارع وكل شي.. الامن البريطاني والسعودي كلهم معنا..
خذ كاس ماء من ليان.. حاول يشربها و رفضت..

فواز..
'اقشعر جلدي لانهيار تلك المجروحه.. اكثر انسان ممكن ان يشعر بالضياع والفقد.  والايدي المربوطه انا.. ذكرتني بنفسي.. وانا ابحث عن حنين.. وكل ماوجدت طرف خيط اضعته.. اصعب الامور ان يضيع لك قلباً.. لاتعرف حجم الخطر حوله ولا بصيص أمل لايجاده'.

طلال:والحين ممكن نهدا كلنا.. عشان نقدر نوصل لشي..
جلست سما وهي تمسك بيديها وتحاول توقف رجفتها..

والتفت على مهره :ام سيف.. زينه انتي هالحين..؟!
فواز ناظر جهتها.. ويجي له شي يقوم ويذبح سما على اللي سوته..
امسحت وجهها واعتدلت وهي تبعد عن صدر سيف وبضياع:
زينه..وش يفيد الصياح والعظم مكسور..

طلال:
لك وعد.. ان المسئلة ماطول.. وسيف بنجيبه بحضنك ولايطلع منه الا رجال.. واذا هو يبي وبإرادته..
عقدت حواجبها بتسائل..
طلال ماجاوب بتفاصيل..
التفت لسما وبجديه:وهالحين.. ابي كل تفصيل صار ياسما.. وبالبدايه وين بالضبط صارت السالفه..

سما برجفه قامت تتكلم..
النتيجه..
ان من كم يوم جاها واحد وعرض عليها يضبط لها ورق وجوزات.. لها ولسيف.. وبسريه تامه.. وبيساعدها على السفر..
مارتاحت وارفضت.. وغيرت مكان السكن اللي هي فيه.. خاصه انها ماعرفت المقابل.. وش يبي..

ومن يومين اختطفوها هي وسيف..
وحطوهم بيخت فخم.. مليان رجال مسلحين.. عاملوهم بشكل كويس...
وكانوا معبين المقصوره العاب لسيف..

امس دخل واحد وكان مسلح.. وقال لها انه بياخذ سيف.. وهي ترجع لابوها وتقوله.. 'يبون مبلغ ٤٩ مليون ريال..وخل عم حفيدك يساعدك'
سيف ترك يدها بسهوله وتعلق بالرجال.. لما وعده انه بياخذه لمهره..

عقد سيف حواجبه:٤٩ مليون...؟!
والتفت بحده لطلال وفواز:وضحت وبانت.. ماغيره منصور ولد الحرام..
فواز:والله اني قايل.. انه بيرجع فلوسه بسواد وجه.. بس عاد يخطف ورع..
طلال بهدوء لراجح:
ها يابو مشاري وش رايك بهالحكي..؟!
زفر راجح:
غزر هالبحر غزر.. وانا والله مافيني حيل على الغوص.. بس المبلغ ابد مني ومايظل سيف عندهم يوم..
طلال:
منصور يبي يسترد فلوسه اللي تصادرت وعن طريق لوي ذراعك..و واضح انه توصل لسيف من ذكره لعم حفيدك.. يعني ان طلعنا سيف الحين من عنده بترجيع فلوسه.. انت وسيف ماراح تسلمون من شره..ومثل ما انهى غيركم يقدر يسويها فيكم..!

مهره باستغراب وبتسائل:
مين ذا.. وليش ياخذ سيف.. مين منصور..
طلال :ماتدرين من منصور اللي نتكلم عنه.. منصـ..
سيف قاطعه وهو يتنحنح:
منصور.. خوي بو مشاري..كان مخدوع فيه ومثل ما انتي شايفه طلع ماهو مثل مايظن..

راجح بتأييد لسيف.. لأن مهره وشكلها التعبان مافيها لزيادة صدمات:
اي والله انه طلع ولد حرام.. عساني انفض يدي عن ترابه..
طلال رفع حاجب وماعجبه التغطيه الحالية.. لأن ممكن لو درت مهره عن منصور.. تلقى خيوط تساعدهم على العثور على سيف..

مهره مارتاحت وحست بريبه.. بس اسكتت.. واسم منصور يتردد في مخها..
وطبعاً منصور اللي تعرفه زوج امها.. بس شدخله بهالقضايا.. هو تاجر معروف وله اسمه بالسوق..
لا مو هو المقصود..
طيب ليش لا.. راجح طلع خوي ابوي.. ومنصور كان خوي ابوي.. معقول؟!!!!

فجأه مهره وبإلهام غريب.. وكأنها منومه مغناطيسياً..
افتحت جوالها وشغلت برنامج وبفهاوة:
انا معي برنامج مقترن بايباد سيف.. يحدد مكان الجهاز..كنت مركبته لان دوم يضيعه واشغله والقاه..
توسعت عيونهم بصدمه وهم يلتفتون عليها..
سيف جنبها.. و بذهول وانفعال:
من جدك..
مهره وهي تشتغل في الجهاز :
ايه.. ودام جهازه معه..ممكن يضبط..
وفعلا ً بين على الخريطة موقعه..
وقف فواز وهو يسحب الجهاز من يدها :
انا اشهد انك ذيبه..
وراح لطلال..وراه: كلم آدم .. وخذ اذن عشان نتحرك..
مهره بانفعال:
يعني لقينا سيف..
رجع جوالها :قولي ان شاء الله.. ممكن يكون اخر نقطه اشتغل فيها الجهاز.. احنا نداهم ونشوف..
مهره برعب :
وش تداهمون.. لايصير فولدي شي...
سيف:اذا هناك مايجيه شي..
مهره بصياح:
لاداهمون ولاشي... عطوه فلوسه واخذوا سيف..
طلال وهو يقوم:
ماينفع.. واصلاً هم ماحددوا وسيلة اتصال ولانقطه حق نتواصل معهم.. يعني واضح مطولين ويبونكم تستون على نار هاديه..

مهره بانفعال:
طيب حددنا مكانه.. نروح ومعنا الفلوس وناخذ سيف..
طلال:تحديدنا للموقع.. وصولنا يدل على شيين.. يا ان سيف هناك..وغير متوقعين وصولنا.. او ان معهم علم ببرنامج سيف وينتظرون نلقى المكان.. ممكن يكون فخ..
مهره قامت وبحزم :انا بروح معكم..
سيف مسك كتوفها:
يابنت جنيتي.. والله ماتروحين مكان..
مهره بجنون:
لا والله بروح.. لو بظل اموت تعرف شلون اموت..  اعصابي تآكلت..
فارس واقف بوجهها:
مهره انتي شايفه حالك.. وش بتسوين.. خلاص الامن يجيبونه شيوديك..
مهره بتهكم وعصبية:
الأمن بس..؟!.. ابوك بيروح وانا بركب قبله بالسيارة..
فارس بانفعال:وابوي وش يوديه.. حق مجرمين..
التفت لابوه بدهشه..
سيف لبس الجاكت واستعد يطلع مع طلال وفواز :
وليد بيخلص شغلة بلاغات في الامن تخص سيف  وبيجي ياخذكم.. خلكم معه بالبيت لمن اجيكم..
مهره اندفعت له وبتحدي :
والله ماتعدي الا وانا معك.. وماكون بنت رجال اذا طلعتوا بدوني..
صاح فيها:انهبلتي.. احنا بنروح وماندري وش يصير.. انتي حالفه تموتين قبل تولدين..
مهره وعيونها بعيونه :ماحدن يموت الا بيومه..
طلال بهدوء:سيف خلها تجي..
سيف بعصبية :واذا...
قاطعه طلال:تحت حمايتي..
سيف بقلق:مهره اقعدي مكانك لاتدوشيني..
شالت شنطتها وجوالها..
وراحت طلعت قبلهم..
فواز وهو يمشي جنب سيف:
والله كنت اظن اللي عندي راسها يابس.. طلعت زوجتك راسها جدار..
سيف بخفوت:ومير طلال بدل مايقول كلمة العود ويمنع.. وراه عطاه على جوها..
فواز :ماهو لله.. بتفيدنا..

فارس طلع بقلق للحديقة ..
ليان وهي تطالع مكان اختفوا :
بالله سما.. تقدرين ترمين نفسك بخطر عشان سيف مثلها.. ليش ماقلتي انك بتروحين معهم.. كيف تبين سيف لك الحالك ومنافستك هالأم اللي بايعه روحها عشانه..

سما بشرود وقلبها يقرع كالطبول..
سيف انسل من يدها.. كخيط الحرير..
ومهره تهاجم وتناظل وتوقف قدام المدفع عشان ترجعه..

وهي ابداً ومستحيل تدخل في مداهمه عشان تستعيده..
تهاب الموقف والحدث..!

تخيلت كيف شكل مهره.. وكيف تغيرت عن آخر مره شافتها فيها..
لونها اصبح ابيض كالموتى.. 'لفقده'..
كيف انافس مهره في حب سيف..
كيف تشتري سيف بروحها..
وانا بعته.. وهو كان بين يدي..!

*****

بعد شوي..
وصلوا عند بيت بره المدينة في مكان ريفي..
مُظلم..
وواضح مافيه احد..
مهره تطالع من النافذة وهي ترتجف..
وتشوف سيف يمشي معهم للبوابه..
طلال وهو يتقدمهم ومعه مسدس:واضح البيت فاضي..
سيف :بس ماهو مهجور..
واشر على زباله.. واضح انها توها من بقايا وجبات الاكل اللي ماتغيرت..
فواز وهو يتحرك بحذر ويطل من النوافذ :خلكم متأهبين..

مهره فتحت الباب ونزلت.. وواحد من الامن واقف :
اختي ارجعي السيارة.
مهره:مافي احد.. واضح البيت فاضي..
وراحت بتدخل..
حط ذراعه قدامها:اختي ارجعي.. لايعصب بوعقاب..
مهره ماعليها منه.. راحت دخلت الحديقة.. لمحها سيف ..تكلم بعصبية:
وش تبين.. ارجعي السيارة..
بعناد:وانا جايه عشان اقعد بالسيارة.. البيت واضح فاضي..
فواز يفتح الباب بأداة عنده :
البيت مافيه احد.. مقفول من بره.. ادخلوا بس بحذر..

شوي وكانوا داخل..شغلوا النور..
البيت صغير بس نظيف واثاثه سليم ومرتب.. الا من بقايا اعقاب السجاير وزجاجات البيره..
افتحو الابواب عشان يتأكدون ان مافي احد..
واخذوا يشيكون على كل شي..
وينبشون فالاوراق  على المكتب والكتب الموجودة.
مهره تمشي بحذر..
توجهت لاحد الغرف.. وحست انها تسمع صوت سيف.. وهو يلعب بسيارة :
'نااااان.. نااااان.. لمبرديني حقتي قووويه..' 
عضت شفتها وهي تدخل الغرفة الخاليه وخطت داخلها..
وطاحت عيونها على مجموعة سيارات صغيره.. مبعثره في الأرض..
تشوشت عندها الرؤية..
وهي تشوف قصص مصورة على السرير..
رفعتها برجفه.. وشافت خربشات طفولية ماليه الكتاب.. كانت كلها حرف الـM.. بتعرجاته الكثيرة..
طريقة سيف في كتابة حرفها..
طاحت دموعها بغزاره...
وهي ترفع عيونها للجدران.. كاتب حرفها بكل مكان...!!
طلعت من الغرفة وراحت لسيف.. ومدتهم له وبصوت يقطع القلب:
كان هنا....!! هو يكتب حرفي كذا.. سيف كاتب حرفي بكل مكان حتى بالجدران..
خذ الكتاب وبزفره مخنوقه ماقدر يعلق..
تهالكت مهره على الارض:
ياربي رحمتك.. كيف وضعه الحين.. خايف.. يبكي.. وليه مايتصلون.. اذا يبون فلوس نعطيهم.. بس يجيبونه..
حست قلبها بينفجر مسكت ضلوعها..
طلال جلس على كنب قريب..
وباللهجه حازمه قال:
ام سيف ركزي في اللي بقوله واللي ابيك تسوينه.. اذا تبين نوصل لسيف..
ناظرته بعيون حمراء.. وقصدها (قل)....!
سيف ماعلق..بس ممكن يكون الحل الأخير..

طلال بجدية:
اللي خاطفين سيف.. جماعة منصور زوج امك..
شهقت بذهول وصدمه:
منصووووور..؟!. ليه وش يبي..
طلال تكلم بشفافيه عن كل شي.. وحتى عن اصرار سيف للوصول له عشان ثار ابوها..
ومهره كانت في حالة صدمه وشلل في الاستيعاب.. ووجع وقهر من امها.. من امها.. كل شي صار شين لهم منها ..

تركت المكان بسرعه لدورة المياة وهي تمسك معدتها..
واستفرغت..
حتى حست ان معدتها بتخرج من حلقها..!
سيف لحقها..
فواز :ياشين العله لاجات من اقرب الناس لك..

طلال شارد وساكت.. لكن من داخل يغلي..
بعد شوي.. طلعت مهره وسيف ماسكها.. وهي ماسكه انفها بمنديل.. ويقول:
خلونا نأجل كل شي لبكره.. لازم اوديك لدكتور..
مهره بعناد رغم التعب:
الحين بوعقاب.. قالي عن سواد وجه منصور.. باقي اعرف وش ممكن اسوي عشان اوصل لولدي..
فواز بقلق:وش هالدم.. انا مع سيف نأجل كل شي بعدين..
مهره باصرار تجلس :رعاف عادي.. يجيني.. مافي شي خطير.. تكلم يابوعقاب.. وش الخطوه الثانية..
سيف بانفعال:
تعاندين..!!!
مهره بخفوت وتوسل:اذا في شي ممكن نسويه لانأجله.. سيف ماعاند.. والله ماهو عناد.. قد ما انا محروقه عليه.. الدكتور ماراح يسوي لي شي.. انا علاجي ولدي..
بعد المناديل عن انفها:
أنفك ينزف بلا جنون.. سيف ماحد مأذيه.. ماهو في صالحهم.. ومثل ما انتي شايفه.. واضح ان منصور موفر كل شي عشان مايبكي ولايخاف..
مهره بتوسل:عشان خاطري سيف.. عطني وجه اليوم.. وخذني على قد عقلي.. وتالي مابي شي..

جاء فواز من المطبخ معاه كيس ثلج عطاه سيف :
كمد راسها شوي.. الواضح ان ضغطك يلعب يا ام سيف.. هدي والامور طيبه..
مهره :يعطيك العافية..
وبأمل :يعني بنكمل اليوم..؟!
ابتسم فواز:وقفي رعافك.. وابشري..
طلال:اهدي يا اخوك.. لأن كذا ماراح نقدر نسوي شي.. حطي فبالك ان سيف بخير.. وبنلقاه..

هزت راسها ايجاب وهي تتمسك بيد سيف :
انا واثقه فيكم.. ومتأمله خير..
سيف يحرك الثلج اللي براسها:
والله لاطلع تكسرك لكلامي من عينك..
مهره ابتسمت وشكلها يكسر الخاطر:
اضم سيف لقلبي.. وبعدها سو اللي تبي..

بعد شوي كان طلال يتكلم:
امك مالها دخل بأي اعمال منصور.. تشتغل صدق.. بس باعمال مشروعه ومباحه.. وعندها الاعمال الخاصه فيها وتحققنا من كل شي.. و واضح ان حتى اخوانك مالهم في شغل ابوهم.. لان اسامه بالجامعه وباسل بثانوي.. ووضعهم ماعليه غبار..
مهره بتسائل مرتجف:
اكيد ماما ماتدري.. ان منصور قتل ابوي...
طلال:ماتوقع.. لان قتله لابوك كان ضمن اعماله في المجال اللي ماتعرفه امك.. وماهو في صالحه تدري.. لان ردة فعلها بتكون سيئه قدام قتله لابو بناتها..
مهره بوجع:ليتها ماتدري.. يارب ماتدري..
سيف مسك كفها بقوه:
مستحيل يكون عندها علم.. ذا شي ماطلعه منصور لاحد.. ملف ومتسكر.. ويكون بعلمك اصابع الاتهام 90٪على منصور.. بس فيه 10٪ممكن يكون مو هو..
مهره بأمل مقتول همست:يمكن بعد.. نكون ظلمناه وماقتله..
طلال بحزم:بس احنا ماظلمناه في خطف سيف..
مهره التفتت.. لطلال اللي كمل :بالنسبه لبيت منصور في فيلا كبيرة هنا معروفه انها له نفسها اللي يعرفها راجح وهذي مراقبينها من مده.. ومافي اي شي يقول ان سيف فيها.. وخاصه ان منصور حريص ويدري انه تحت المجهر .. لازم عنده ممتلك خاص فيه ثاني هنا.. ابيك تتصلين على امك بحجة......

وراح يكمل لها الخطه بالضبط....
استوعبتها مهره..

وبعد شوي كانت تنفذ..
وكانت تتصل على امها والجوال سبيكر.. وثلاثتهم يسمعون..
ردت..
امها باللهفة:مهره ماما..؟!. شكلي احلم..
مهره:الله لذي الدرجه انا عاقه..
امها :يلا حسبي.. متى اخر مره كلمتيني..
مهره: عيد رمضان يمكن..
نوير:ذيك زوين تكلمني وتوصل.. ولا انتي وسندس قاسين.. الله يسامح صبحا.. ماليه خواطركم علي..
مهره امتلت عيونها دموع وعضت شفتها:
ماما والله احبك..
سيف حس بغصه ويدري ان مهره مهما كابرت تحب امها.. بس خاطرها دوم زعلان من بعدها عنهم..
نوير بحنية وحب :يابعد روح مامتك.. وانا احبك يابعد الدنيا.. قولي لي.. قربت ولادتك..
مهره:ايه.. انا بالثامن بس شكلي بولد اليوم..
امها:بسم الله عليك.. تولدين ان شاء الله بوقتك.. شهالفال..
ضحكت مهره والدمع يختنق بعينها:مجرد شعور..
نوير:ايش رايك.. تكسرين الحاجز واسوي استقبالك عندي..
مهره :ليت ماما بس ماتضبط.. انا بلندن..
نوير :وش مطيرك هناك.. يابنت اقضبي ارضتس.. لمن تولدين تالي روحي وين ما تبين..
مهره بتردد وهي ترفع عيونها لهم:
عاد جات كذا.. ماما انا بلندن وصايره لي سالفه.. وماجاء في بالي الا انتي..
نوير:آمريني فديتك.. لو تبين اجيك جيتك..
مهره:حبيبتي انتي..!!
نوير وقلبها يتقطع ماتدري ليش.. بإحساس ام :
مهره تكلمي.. كلني قلبي عليك صاير لك شي.. وش فيك ياعينها..
مهره انهارت بكي.. خافوا تجيب العيد.. بس تكلمت :ماما زعلت من سيف وقدني هايمه بالكفيات والشوارع بلندن.. ماعرف وين اروح.. ولا ابي ارجع بيته...
امها بقلق :ليه وش صاير يخليك تطلعين.. يابنتي اعقلي وارجعي لبيت رجلك.. ماعدتي بزر.. وتراك بغربه.. لاتخوفيني عليك..
مهره بانفعال ونحيب:
مابي ارجع.. ماما زعلانه منه زعل كايد.. لو برجع مالي كرامه..
امها وتبي تحل المشكله:وش مسوي.. لاتقولين شارب وبتسوين سالفه.. اكثرهم يشربون بره..
مهره:لا يمه مو شرب.. والله لو يشرب كان اصبه بغاز واحرقه..
انصدموا الشباب من مهره..
والمصداقية..
هي بكت وانتحبت عشان الوضع اللي هي فيه..
بس صار الوضع جداً عجيب مع السالفه اللي حبكوها..
امها:لاتقولين اجل غيرانه.. ومطالع هنا ولاهنا.. عاد قدك عارفه نفسك وزينك ياروح امك..مايلقى مثلك..
مهره:خلاص ماما.. مابي اتكلم فالاسباب.. بتساعديني ولا..
امها :وانا عارفه اساعدك وقلت لا.. انا احاول اعرف مشكلتك وانصحك ترجعين..
مهره :ماما.. ابي مكان ابات فيه الليله.. انتي مره قلتي عندكم بيت تجونه بالصيف هنا.. واذا رجلك فيه مابي اروح..
امها بسرعه:اصبري وش فيك عجله.. منصور حتى لو جاء لندن عنده مكان يقعد فيه.. فيه بيت ثاني.. تبين تروحين بعطيك العنوان..
مهره:قبل تعطيني العنوان.. توعديني وعد ماتقولين لرجلك شي.. بكره يذلني اني مادقيت الا للحاجه..
نوير :ياربي مدري ليش ماتواطنين منصور..
مهره:بتوعديني وتحلفين ولا والله انام في الشارع ولا اطب بيتكم...

نوير:خلاص تم.. واللي خلق عيونك الحلوات ماقوله.. وش تبين بعد..
مهره:بعد عمري والله..
نوير:برسلك موقعه بالواتس.. بس ترى فاضي.. العاملات مايجون الا لاجينا فيه.. ماتخافين..؟!
مهره:لا ماخاف.. خبرك فلاحين وراعين مزارع..
نوير افهمت قصدها :ترى انا ماقلت.. انتي اللي قلتي..!!
ضحكت مهره:طيب مو قصدي شي.. بس كيف ادخل بيتكم..
نوير:اول ماتوصلين عند الباب الداخلي.. فيه يسارك تمثال كبير.. ابد بتلقين المفتاح بالسله اللي شايلها التمثال فوق راسه..
مهره:تمام.. انتظر الموقع..
نوير :طمنيني عليك ماما تمام..؟!
مهره:تمام..
وقبل ماتسكر.. همست بتردد :
ماما....؟!
امها:عيوني..
قامت مهره وصدت عنهم وببكي مكبوت:
قولي لي.. من حبيتي اكثر.. غازي ولا منصور..
سيف انعصر قلبه عليها..
ونوير سكتت.. همست بارتياب:وش هالسؤال..
مهره ودموعها تسيل :
يمكن لان انا عندي سيف وقبله كان عساف.. وحبيت سيف اكثر.. انتي مثلي صح؟!
سكتت نوير مده بعدها :
انا ماحبيت في عمري قد ابوك.. ولاتسأليني عن اي تفاصيل.. مع السلامه امي..
وقفلت..

لتنهار مهره في بكاء يقطع القلب..
ضمها سيف من ظهرها.. يحاول يلملم خاطرها المكسور ..

(‏عزاه ياصدرٍ ذاق من لوُعات الأيام م يكفيه)

*******

وصلنا البيت المقصود..
واللي أكد لنا ان هو نفسه وجود رجال فيه والانوار  مشغله..

وقفت السيارت على بُعد..
سيف وقف عند بابها وانحنى لها وبتحذير:
لو يصير شيصير لاتنزلين.. ذا البيت مو فاضي..
مهره بعيون زايغه :
سيف انتبه.. تكفى..
باس جبينها :
قلت لك لو يصير شيصير لاتعدين السيارة.. الرجال حولك ولو نزلتي بيمنعونك حتى لو بالقوه..
تمسكت في كفوفه:
ماراح اجي.. بس تجي سالم انت وسيف.. اوعدني سيف..
ابتسم يطمنها:
ماهنا الا الخير.. معي ذيابه.. انتبهي لحالك وقفلي السيارة..

هزت راسها ايجاب..
وقبل يغلق الباب.. سحبت يده واسحبته اكثر نزل راسه لها وضمته.. وهمست في اذنه تستودعه..

حس بوخزه بقلبه و'رهبه'..
وهو يبعد عنها ويغلق الباب..
وياخذ سلاح مده له فواز واخفاه عند خصره..
ومهره ترجف برعب وترقب..

*****

بعد ٢٠ دقيقه..
وبعد اقتحام سلس وتعارك بالايدي..
كان الامن وسط البيت.. ويطالبون من الرجال المتخبين فوق وبالغرف يسلمون نفسهم..

طلال بحدة :
سلموا الطفل اللي معكم..
واحد صاح من فوق :
مافيه اطفال.. الفيلا ممتلك خاص وراح تحاسبون على هالتصرف..
طلال يتسلل للدرج :
خلك رجال وتعال وقف قدامي وحاجج..
اطلق رائد من فوق رصاصه عشوائية :
لا تصعد.. لاني برمي عشوائي..

تراجع طلال..
سيف وفواز محتمين بعمود كبير..
سيف بهمس :يمكن سيف مو هنا..
اشر فواز بعينه على كرسي قريب :الا هنا..
التفت حيث اشار.. لقى جاكيت صغير على الكرسي..

وفجأه اعتلى بكاء سيف المكان..
توسعت عيون سيف وهو يتلفت بجنون.. ولايدري من وين يجي الصوت..
راح ينادي بقوه:سيف ابوي .. سيف..
وسيف اللي سكت مع صوته.. بعدين صاح يناديه :
اوبا.. اوبا.. ابي ماما.. اوبا ابيك..
جن جنونه وهو يتحرك.. فواز مسك ذراعه بخفوت:
لاتتهور.. اصبر اشوي..
بعصبيه وخفوت:ماقدر يافواز..
فواز:انت عارف مكانه ذا الحين..
صوت سيف اختفى واكيد اللي معه منعوه يصرخ..
سيف وعيونه تلاقط :
الصوت مو فوق.. الصوت جاء من شمال..
صاح سيف من جديد بانهيار باكي :
اوبا اتروح عني.. اوووبا شلني..
سحب ذراعه بقوه من فواز.. وتركه متوجه للصوت..
رائد من فوق:
وقفوا تحركاتكم بالمكان.. ولا والله بتروح ارواح..
طلال اشر بعينه لسيف.. يوقف..
وخاصه سيف بين يديهم..!
واشر لفواز بحركه فهمها على طول..
وهو تكلم: انتوا تبون فدية.. ليش نسيل دم.. خلينا نشوف الورع ونطمن على وضعه..

بره مهره.. ومن اسمعت صوت رصاص..
وقد انفتحت لديها بوابات الجحيم.. من ألم مُريع قصف ظهرها وبطنها..
وابنتها التي عنفتها بنفسيتها طوال الحمل..
بدت معلنه القدوم..!
بجو مرعب ومخيف.. ورصاص مزري لاندري من سيسقط فيه..
امسكت بطنها بصرخه مكتومه..
وبدت في حالة احتضار..
والموت يحلق بها من كل جانب..!

في الداخل..
طلع واحد من بوابة القبو.. يغرس فوهة مسدسه الباردة داخل رأس سيف وشعره الغزير وهو يبكي..
الا ان عيونه توسعت لمن شاف سيف وشهق :
اوباااااا
وحاول يركض بس امسكه الرجل وراه..
وسيف يطمنه بحنيه وهو يشير له بكفوفه:
انا هنا ابوي.. لاتخاف الحين نمشي.. مهره بره تنتظرك..
تناسى الخوف وهو يصيح بفرح من بين دموعه:
ماما هنا.. والله اوبا جات..؟!
سيف:جات وتنتظرنا..
طلال باسفل السلم.. يحاور رائد  فوق..
وكان كله لاشغالهم..
حتى يدخل فواز للقبو من الباب الخارجي.. وباغت اللي ماسك سيف وهو يضرب المسدس من يده.. وقبل مايستعدل عاجله بشوته على راسه سقط بعدها..
وسيف انطلق كالرصاصة ..
لتتلقفه ذرعان سيف ويضمه بقوه.. وهو يرفعه ويخفي وجهه برقبته.. ويصيح بآااااه..
وهو يشمه ويستشعر وجوده..
ومو مصدق انه اخيراً امسكه..
طلال:اطلع حالاً سيف..
توه بيطلع..
فجأه وبدون ينتبهون..طلعوا اثنين من احد الغرف قريبه من فتحة الباب.. واحد ضرب سيف على راسه بأداة..
فتح جرح كبير براسه..
والثاني غرس سكين صغيره بذراعه.. في محاوله منهم لاستعادة الصغير...
حس بعضلاته تمزقت وتقطعت..
حتى كادت يدينه تفك سيف..
لكنه تمسك فيه بذراع .. والتفت وهو يشهر المسدس بوجههم..
والصغير تعلق فيه.. واخفى وجهه برقبته ببكاء يقطع القلب..
وقبل مايضغط الزناد..
فواز اطلق على الاثنين.. واحد في فخذه.. والثاني بالساق..
والتفت لطلال بحده: 'خلنا نصعد لولد الكلاب دام خذنا الورع'..

****

طلعت مهره من السيارة..
الألم الرهيب الذي داهمها.. استكان امام صوت الرصاص.. وسكون الموتى الذي خلفه..
لم يخرج.. لاسيف ولاسيف..
وجعي يتباهى وينتصر..
اردت ان اقع على الأرض.. حيث سأعود اليها اليوم..
الم طلق.. والم فقد..
'اللهم هون علي سكرات الموت وغصاته' ..

جلست عند جذع شجره قريبه..
وماتبي تقول لرجل الامن القريب منها.. عن ألمها ووجعها وماطرئ عليها ..
تبي تركيزهم يظل في دعم الرجال داخل..

'امسكت العشب بقوه..
وروحي ستخرج..
لكن خدراً يشلني..
لست في ولادة..
بل احتضار..
ابنتي لن تخرج روحي ستخرج..!!!

عيني على الطريق المُظلم حيث المنزل..
سيف يمشي نحوي..
والدم ينزل من رأسه.. ملوث قميصه ووجهه..

وعلى كتفه..
قلبي وروحي صغيري.. رفيق وحدتي ومراري..
لكنه يستكن على كتفه دون حراك..
هل وجوده ميت.. هل الدم من سيف..
لاقوة لي على النهوض.. او حتى النداء..
صوتي لايخرج ابداً..
انا منهاره تماماً..
توجه سيف لها وهي مستنده على الجذع.. عقد حجاجه.. حجابها نازل ورجولها ممده على الأرض..
ناداها :مهره.. !
رفع سيف راسه عن كتفه باللهفه بس سمع اسمها.. وصاح:نزلني اوووبا..
نزله واندفع لها..
مهره ببتسامه منهكه.. ترفع ذراعها بصعوبه..
ليعود لروحها واضلاعها..
ضمته بقوه متراخيه.. وهي تهمس بنحيب:
ياحلو ريحتك يمه.. اشتقت لك ياروحي.. ياعمري..
سيف انهار بكي وهو يبوس وجهها وعيونها :
ماما ماتخليني اروح لسما.. ماتخليني اروح عنك.. ماما ابي بس مهره.. بس مهره..

سيف وجعه قلبه.. كيف سيف يحاول يدخل في صدر مهره.. كيف يحاول يتخبى في جسدها وضلوعها ..
ابتسمت بوجع وهي تحط خدها على خده:
ولدي والله مايخذك من حضني الا الموت.. خلاص لاتبكي امي اوجعته قلبي ..

قالتها وارخت راسها وذراعاها..
سيف شاله عن حضنها وبارتياع :
مهره.. مهره بسم الله عليك.. كلميني.. مهره الوووووو...
سيف يطالعها بهلع:
ماما ماتت.. ماتت..؟!!!
سيف يضرب خدها ويتحسس النبض :
لاتقول كذا يابابا..
وصاح في احد الرجال:عزام.. ساعدني نبي اقرب مستشفى..

*****

نوير كانت بتنام وتتقلب وصوت مهره:
والله احبك ياماما.. والله احبك ياماما..
توترت اعصابها وحست بشعور غريب..
وهي تدق عليها وماترد..
طلعت من الغرفه وراحت جلست فالصالة الشبه مظلمه..
وطفولة مهره تداهمها..
وقت افتحت عينها اول ماولدتها.. وانبهارها:
يمممه يمممه على العسل.. غازي هالفص خذت عيونك.. عشان تاخذ قلبي مره وحده..
غازي :وش رايك نسمي هالشقرا مهره..
تطالعها بشفاقه وحنيه:
والله اسم على مسمى..

تنهدت.. وقلبها مثقل..
صعد اسامه وشافها.. باستغراب:
يمه.. صاحيه من النوم والا مانمتي..
نوير :
ماعرفت انام.. مدري وش فيني..
جاء حب راسها :
مشتاقه لمنصور..؟!
ابتسمت وهي حاطه كفها على رقبتها:
ابوك عودني على غيابه.. ماهو جديد..
اسامه:اجل وراه..
همست:اختك مهره مكلمتني..
عقد حواجبه:ايه وش فيها..؟!
بقلق:مدري.. اول مره تعبر وتقولي احبك.. واصلاً اول مره تطلب مني شي..
ابتسم :يمكن مأثر فيها الحمل وصايره حساسه.. يازينها.. والله صاير لي فوق السنه ماشفتها.. 
نوير:وصلوا خواتكم يا اسامه.. لاتقطعونهم مثلي.. انا مافيني خير.. لاتصيرون مثلي..
اسامه :انا اتواصل معهم.. بس تعرفين على اللقا.. يالله تضبط.. جدتهم قفل وغير مرحب فينا..
نوير :ماعليه امي.. كلهم تزوجوا.. مهره وزينه بالرياض الحين.. وسندس بحايل وتراها اختكم الكبيرة ولها الحق تروحون لاعندها هناك..
اسامه:ابشري.. والله وبدون توصين.. عارفه غلاتهم عندي.. والحين قومي نامي الساعه سبع ونص.. ومهره مافيها الا العافية..
نوير:بنتظر اشوي يمكن ترد اطمن عليها ..
اسامه:وش يقعدها لسبع اكيد نامت..
نوير:هي بلندن.. عندها اربع ونص الحين..
اسامها:ايه نايمه.. قومي وصلي على النبي.. ومافيها الا الخير.. يعني لاقلت لك احبك بموت ولا بيصير لي شي..
نوير :فال الله ولافالك.. عساني ماذوق حرتكم لاانتوا ولاخواتكم..

*****

صباح لندن - المستشفى
وفي ممر بارد ..
اعلن الطبيب ان مهره ولدت وانجبت بنت..
لكن حصلت مضاعفات لها..
وهبوط حاد في علاماتها الحيويه..
وكله من تأثير الاحداث اللي مرت فيها..
وباقيه تحت الاكسجين والاجهزة وغايبه عن الوعي..
سيف شارد..
وليد :سيف.. ادخل خل يشوفون جروحك.. شفيك انت ماتحس..
دعك جبينه وعيونه:
شلون الحين.. شبيصير عليها.....(وليد..شبيصير عليهااا..؟!!! )
قالها بصرخه حاده ملت الممر..
فارس جالس وسيف في حضنه.. التفتوا لصوته..
سيف بتهضم:افيها ماما.. فالس ابيها.. ودني لها...
ضمه فارس:
تعبانه اشوي.. لمن تصحى نايمه..

سيف بانهيار ضرب الجدار كم مره:
انا تسببت فيها... كانت جثه تمشي.. لاعاشت فترة حمل زي الناس.. ولا حتى تابعت مثل الحريم.. لاترقد ولاتاكل.. وفي الاخير خطف وضيعه.. وتوتر ورصاص.. ياوليد انا مب رجال اللي سمحت بكل ذا يصير فيها..
وليد مسك كتوفه:
سيف فوووق.. لاتسوي في نفسك كذا.. العن الشيطان ذا مقدر ومكتوب..

سيف ولأول مره فارس يشوفه منهار ويبكي :
طيب وان ماتت مثل نجود.. كنت صغير وتوني بعد سنين سليت عنها.. هالحين اللي دخلت في هالقلب والراس خالطه شيب.. شلون...
وليد قاطعه بحده:
ماحد بيموت.. لاتنهار كذا قدام عيالك..سيف ماهو كذا.. اصحى..
فارس ضم سيف وحاول يخفي دموعه على كتفه..
لو بيصير لمهره شي..
كلهم بينهارون مو بس ابوه..
وليد اقنع سيف وخذه عشان يضمدون جروحه..

جاء راجح ومشاري.. وسما..
قربت من سيف.. وتوها تشوفه بعد ماخذوه ونادته:سيف ماما..
التفت طالعها وهو عاقد حواجبه..
مسكت كفه :تعال ماما.. خلني ابوسك..
سحب يده بجفاء :مابي..
سما:الله سيف بس شوي..
راح ضم رقبة فارس بقوه:
مابي.. ابي فالس.. فالس مابيها.. وديني حرامي..
بكت سما وهي تعض شفتها :
لاتقول كذا ماما والله ماكنت اقصد..
فارس قام وهو شايل سيف.. وبجفاء:
خلي نفسيته تهدى.. ممكن سما ؟!.. الورع تعبان وطالع من حادثه..
وراح بعد فيه وترك المكان لهم..
سما انهارت على الارض تبكي :
شلون يعني.. خلاص ماعاد يبيني..
راجح جلس على احد المقاعد:
خلي امه تقوم بالسلامه.. واللي تقوله هي يصير..

*****

بعد خمس ايام..
تم القبض على منصور..
مهره ظلت في المستشفى ووضعها مافيه اي تطور..
موضي ونواف وزينه جاوا عندهم..
سيف مايفارق المستشفى..
وحالته النفسيه تدهورت..
موضي وزينه..
كانوا واقفين عند الحضانه وفارس شارد في اخته الصغيرة..
شي صغير يشبه السكر..
كل يوم يجي يوقف عندها ويحصي تحركاتها.. لأن ابوه مو حولها..
ويدعي لمهره داخله.. انها تقوم وتحضن بنتها..
يدعي لنتفه هذي انها ماتاخذ حضه.. وتعيش من غير أم..
امس دخلته الممرضه.. وخلته يلامس اصابعها وكفها الصغير..
وكانت اللحظة كفيله بانهيار دمعي حار من فارس..
الى الآن ما اطلقوا عليها اسم..
لا ابوه قال شي..
ولامهره قامت وسمت..

موضي قفلت المصحف بيدها:
فارس ابيك تروح البيت.. تشوف شنطه او شي مجهزتها مهره.. عشان ولادتها..
فارس:ماهقيتها جابت معها شي للبيبي..
زينه:هي كانت مجهزه اغراض لولادتها.. اكيد جابتهم.. انت روح وشوف..
موضي:ايه امي.. اليوم بيعطونا البنت.. عشان نبدل لها.. واذا مافيه  تطلع زينه وعمك ويشترون..
فارس:تمام.. انا اروح واشوف..

ترك المكان..
وراح ناحية غرفة خاصة حاجزها سيف لمهره..
فتح الباب بخفوت.. الغرفه شبه ظلمه.. وصوت الاجهزة تحصو النبض والمؤشرات.. تتابع في وتيره واحده..
ومهره نائمه.. مستسلمة.. بعد حرب طاحنه.. طالت منذ زواجها بعساف حتى اليوم..
رفعت راية الانهزام وسقطت..
ولم ترقص على انتصارها.. سيف لها.. تم تبرئتها.. بشهادة الدكتورة اللي حضرت عملت عساف فيها..
سيف في حضانتها..
بحكم وفاة ابوه وعدم كفاءة سما النفسية في الاحتفاظ فيه.. وبتنازل من سما..
وبدعم للقرار من راجح..
سيف راح يوصلهم.. بس مالهم حق بحضانته.. الا اذا كبر واختار هالشي..
انتصارك الثاني ثار ابوك.. والقبض على الفاعل..
امك اللي انهارت وماكانت تدري عن شي..
امك على الأقل بريئه من دم ابوك..
قومي..
افلحي من هالمكان البارد..
قومي وشقي الكفن..
ماهو لايق لروحك الحلوه.. الموت..!!

حاول يتنحنح يجلي حنجرته وهمس:
يبه..
سيف جالس على الكرسي جنب مهره.. بشاش ملفوف على راسه.. رفع راسه له:يبه..؟!
حب راسه :
انا بروح اجيب شغلات من البيت.. تجي معي ترتاح اشوي..
سيف:لا ياعينه..
فارس :طيب تبيني اجيب لك شي من هناك..
سيف:لا يا ابوي
وطلع من محفظته بطاقة ومفتاح السيارة:
اسحب لي فلوس معك..
فارس خذهم: ماشي..كم..؟!
سيف ينظر لمهره:مثل كل يوم..
التفت فارس يطالع فيها..
ابوه يدافع بالصدقه البلاء..
ويكافح وقوع الأسوء..
وكل يوم يخرج لمتسولين الميادين.. ويوزع بنية الشفاء..!
قرب منها وحط يده على جبينها وابتسم :
وجهها اليوم احسن..
سيف بشرود:انا حسيت كذا.. نقول ان شاء الله..
باس فارس جبينها وطلع..

تكتف سيف يتأملها..
'ليه لما اللي نحبه يموت او يكون قريب من الموت.. نتذكر اخس مواقف معه.. واقسى كلمات قلناها له.. ليش نتذكر زعلاته ودمعاته.. وقهره..

ليه مو رايح عن بالي وانا اتهمها بشرفها.. وهي تبرر واسكتها.. واصيح بوجهها..
ليش اتذكر اختناقها ونومها وسكوتها بباريس..
ليه مو رايح عن بالي وصيتها اللي اكتبتها بالجوال.. و قريتها بالطيارة..
ليه اتذكر كل حرف وكل وصيه..
ليه يدي ترجف وانا اتخيل الكف اللي نزل على وجهها مني..  وكلته بدال فارس..

صمتها مزعج..
ونومها اكثر ازعاج..!!

******

فارس دخل غرفة ابوه ومهره..
يدور في الشغلات اللي جابتها معها..
لقى وسط شنطة السفر.. شنطه صغيرة.. فتحها ولقى فيها ملابس لها وللبيبي..وشغلات من الصيدلية..
شيك على الجيب الأمامي..
لقى علبه مخمل فتحها.. فيها قلادة ذهب آية الكرسي وسلسال.. وورقه..
تردد انه يفتحها.. بس قال يمكن شغلات تبي نشتريها..
فتحها وقراها... رعشة اصابته.. ابتدت من يده لكامل جسمه..
بعد البسملة والسلام.. وبناء على الاحداث الأخيره وما أحسه يعتمل بداخلي..وجب علي ان اكتب ماسأكتب..
اعتدت متى ماشعرت بالموت اوصي.. واحتذي برسولنا الكريم عليه الصلاة والسلام..
حين قال:
(مَا حَقُّ امْرِئٍ مُسْلِمٍ لَهُ شَيْءٌ يُوصِي فِيهِ يَبِيتُ لَيْلَتَيْنِ إِلَّا وَوَصِيَّتُهُ مَكْتُوبَةٌ عِنْدَهُ))..

اوصت بالجميع خيراً والدعاء لها وبرها بالصدقه.. وتذكرها بالترحم..
ثم..
لاأدري هل سألد او لا.. او تولد ابنتي واموت انا.. وان عشنا سوياً لن تروا ماكتبت..

سيف.. اسم بنتي على فارس.. مره سألته وقال سدن.. بس كذاب كان بيقول 'نجود' وخاف يزعلني لان اسم زوجتك..

تشوشت عنده الرؤية لمن وصل لهنا..
كيف مهره تحس فيني وش ابي.. وش ودي.. وش الشي اللي تلعثمت فيه قبل اقوله..

رجع يقرى كاتبه..
لا سيف مايزعلني ابد.. نجود ام فارس.. وحبك الصادق اللي الله مامد له في العمر..
انا ابي يحيا اسم نجود فالبيت من جديد..
شفت عيون فارس..
كيف ملهوفه لما شاف ولد جمان يشبه نجود..
ومن يومها قررت ماسمي بنتي الا نجود..

سيف.. فارس وسيفي ونجود اللي ماشفتها.. امانتي عندك..

كمل ختام المكتوب..
وطوى الورقه بآااه ودموع ومرار...

*****
باليوم الثاني.. في بيت سيف.. كانت عندهم البنوته الصغيرة..
و ظل فارس محتفظ بالورقه وماعلم فيها احد..
بس كان يهمس لها باسم نجود.. وهي عنده وبدون ماحد يسمع..
نواف وهو يطالع البنت بحضنه:
سبحان الله.. شقد نتفه..
زينه :المفروض مهره تدخل التاسع من يومين..
موضي :تكبر وتربرب.. انت يانواف.. ولدتك مع اخوك بالسابع..
ضحك:زين اجل في امل..
سيف الصغير.. يلمس وجهها بصبعه:
حلووه نوونو.. اسمها..؟
زينه بخفوت:لمن تطلع ماما من المشفى وتسميها..
سيف:متى ماما تجي..
زينه تحاول تخفي حزنها ببتسامة :يمكن بكره..

موضي القت نظره على فارس.. مايتكلم وشارد:
فروس ابوي.. وراه.. هونها وتهون امي..
تنهد واستعدل في جلسته:
مافيني شي يمه..
موضي بحنيه:ياولدي عين خير.. ومهره اليوم وضعها احسن من امس.. الدكتور قاله ماهو انا..
فارس :
بس ماتبي تصحى يمه.. وابوي وضعه دمار.. يمه حتى ماشال اختي ولايدري عنها..
زينه بحنيه:
فارس لاتشيل الهم بعدك صغير.. وصدقني ازمه وبتعدي.. والحمدلله اليوم توازن الاكسجين عند مهره والضغط.. وبتشوف بتقوم وتصحى.. وكل ذي بتبقى ذكرى..
فارس رجع راسه على ورى:
ان شاء الله.. الله يسمع منك..
سيف:ديون.. شتقولين..؟!
شالته وضمته :اقول ان مهره تحب سيف مره.. وتسوي كل شي عشانه..

لحظة صمت مرت..
انفتح الباب ودخل سيف.. التفتوا ناحيته.. لذبوله..شحوبه.. وجفونه الداكنه.. الشاش الابيض يغطي راسه..
الغريب انه جاي ابكر.. بالعاده يجي قريب الفجر.. يتروش ويبدل ويصلي ويرجع لها..

كان بيتوجه للدرج..
لما سمع صوت بكاء الصغيرة..
وكأنه ناسيها تماماً..
وقف.. بدون يلتفت..
والبنت تبكي..
قطعة مني ومنها.. كيف سليت عن كنزي الثمين..
تلك الروح..
نبتت من عشقي المجنون بها..
متى طلعوها..؟!

التفت..
وكأن احبالها الصوتيه تشكلت خيوط وهمية.. تجره بلطف لها..
وقف يناظرها بحضن نواف..
موضي:تعال امي.. اليوم سابع لاسميتها ولاحبيتها.. تعال ابوي سم وصل على النبي وقر عينك بشوفها..

قرب وبحذر شديد.. خذها من حضن نواف..
رفعها لوجهه وشم صدرها..
لتثير قنواته الدمعية..
'تبكي ولا اتبين ملامحها.. لكن بها رائحة تلك النائمه.. باستكنان يثير جنوني..
هدهدها وهو واقف فيها.. ويبتعد عنهم اشوي وهو يكلمها بخفوت..
لمن اسكتت.. وجلس بالجلسات الثانيه بالصالة.. حط كفوفه تحتها ورفعها.. يتأمل ملامحها الملائكية..
اعظم طبطبه من ربي.. انها تشبه مهره..
ياربي تلك الشقراء..
المتمرده.. المُقاتلة..
حققت امنيتي.. في طفله تشبهها..
عينها عسلية.. رمشاها طويله.. انفها شفتاها..
مهرتي.. بشكل طفله..
ابتسم وهو يتخيلها.. تقول بشقاوة'ولا لايكون ماتبيها تشبهني'..
رفعها وباس وجنتها..
مرر انفه على ملامحها الصغيرة..
والطفله مستكنه عنده..
شالها وتوجه للدرج..
موضي:وين بتوديها..جبها..
سيف :بخليها عندي اشوي.. ابي اتعرف على بنتي.. ماشفتها..
موضي بتقوم تاخذها مسكها نواف.. وهمس:
اتركيه معها اشوي.. ماراح يصير فيها شي..

سيف دخل غرفته وحطها على السرير.. كيف صغيره كذا.. لايكون ماكتملت..
الا قال الدكتور امورها تمام..
ابتسم وهو يفك لفتها:تدرين امك فتحت عيونها من اشوي.. بس قليلة الحياء.. ارجعت نامت من جديد.. عاد من يحب النوم كثرها..لاتصيرين مثلها في هالشي.. حد يحزن ويرقد.. يتوجع ويرقد.. يبي يولد ويرقد..
لا تمادت امك..!!!

مسك كفها الصغيرة:
زعلانه ان ماعندك اسم.. بتسميك امك.. بس خليها تتكرم علينا وتصحى..
يلمسها لمسات حانيه..
خدرت ونامت..
بعد شوي.. انسدح جنبها ونام..

تحت..
موضي بقلق:هالحين يدخل يسبح ويخليها تفحط لحالها.. ولايرقد ويفغصها.. اصلاً سيف مفهي ولاهو شلي.. بقوم اجيبها..
فارس قام :
خلاص يمه.. انا اشوفها..
وصعد..

موضي:كلم خالك.. هالحين قايل بيجي يتعشى مع ماريا.. ورى ماجاء..
نواف :عادي.. هي ماريا شفتيها تلوب.. تبي تروح تشتري هدايا للبنوته..
موضي :ليتها.. تجتهد وتجيب له ضنا.. بدال ماهم يناظرون بعض كل هالسنين ياحظي..
زينه كتمت ضحكتها:
خليهم مبسوطين.. جايز لهم المطالع مايبون احد ينكد عليهم..
موضي:الخلا بس.. افكار هالاجانب ماتجوز لي.. ووليد معطي هالعصله وجه.. اذا مب جايبه له ذكرى.. اعرسه اللي تجيب له درزن..
زينه:يوه يمه.. وش عليك منهم.. يمكن يتبنون زي انجلينا جولي..
موضي :ما عاد باقي الا هي.. ياتجيبه من ظهره.. ولايطالعون احسن لهم..
نواف :والله اللي اشوفه ظهر خالي وليد يابس ومافيه عيال..
موضي:بسم الله على اخوي.. مافيه الا العافية.. بس مطاوع هالانجليزيه.. الله يخلف عليه..

فوق..
دخل فارس الغرفة وشاف ابوه نايم وجنبه نجود..كما يسميها بينه وبين نفسه.. قرب جهتها وجلس جنبها وابتسم وقت شافها فاتحه عيونها..
وكيف طالعه كيوت ولفتها مفتوحه.. لملم المفرش عليها وشالها:
زينك..كنك بتنشبين لي في حب بوفارس..
بدت تبكي وهدهدها وهو يهمس باسمها:
جودي.. ابوي.. جودي.. زينك ياعين اخوك..
سيف فتح عيونه..
وفارس على السرير شايل اخته ويلاعبها..
وانتبه للاسم اللي يناديها فيه..
قال:سميتها..؟!
فارس :ماهو انا مسميها.. مهره سمتها..
اعتدل :وشهو.. عساس كانت تقول انك تبي سدن..
طلع فارس ورقه من جيبه مدها لابوه:
لقيتها بأغراضها مجهزتها.. لولادتها..
قراها ..
وبخفوت:ياكثر ماتكتب وصايا..وش فيها مستعجله على الموت..

شق الورقة:وانت تبي تسميها نجود صدق..؟!
فارس ابتسم:اي والله ودي.. شلون افهمتني مهره مدري..
قام سيف وسحب منشفه:
اجل نجود.. ودامك سميتها.. جب لاختك سماوه عدله عنك وعن امك..
فارس بفرح:يعني اقول لامي موضي ولهم الأسم..
سيف:ايه يبه.. وياطيب من سميت عليه..
شالها فارس وقبل يطلع :
قل لجدتك تبدل لاختك وتشبعها وتدفيها.. نبي نروح لمهره وناخذها لها..
فارس:ليه صحت.. كلمتك؟!.
سيف : فتحت اشوي بس ماحاكتني..خلينا نودي لها جودي يمكن تعطيها وجه..
فارس: تمام..

******
'مهرة'
وكأني على ظهري في مزرعتنا.. اسمع صوت حوافر حصان تضرب الأرض..
لأن هناك ابي كان يمارس هوايته في ركوب الخيل..
سمعت صوت امي وكان صوتها غريب في المزرعة..
تقول بصوت أثير:
‏من دون خلّي يمر الوقت مالي به
‏وش لي بـ ليلٍ طويل وسَيده غايب.

وسمعت ابوي يرد عليها بصوت رخيم :
‏عليگ السّلام ولا بقى بالخواطر شي
تعدتگ شرهات الخواطر بما فيـــــها.

لايسعني الا ان اسمع.. لااستطيع النهوض من ذاك التراب..
حاولت ان اناديهم لأفهم..
لكن صوتي لايخرج..

رأيتنا الثلاثه صغار باطواق ورد.. نركض جميعاً ونضحك..
اغمضت عيني بقوه..
حين ركضنا ثلاثتنا نحو جسدي المرمي على الأرض..
لكنهم توقفوا قبل دهسي.. سندس وزينه..
يطبطبون على بطني الكبير..
بشكل مضاعف اخافني..
سندس:شكلك يامهره حملتي بفيل..
زينه تلمس بطنها :بطنك يخوف.. كنك بالعه وحش..
ناظرتني واقفه بهيئة الطفله.. حزينه لوضعي وسخرية الاثنتين..
وكأن فمي تقوس واقول:
ولدوني بطني ثقيل.. ماعرف امشي.. والله ماعرف اتنفس..
سندس وزينه يسحبون يديني :
قومي وقفي.. قومي يالبطه..

عوروني من سحبهم وابي اصرخ اتركوني ماقدر اقوم..
بس انا وانا طفله.. ضربت بطني بقوه :
قومي لاتخليني بروحي ..قومي...
تمزقت ولا استطيع النهوض..
جاني صوت ابوي :
ابعدوا عنها..

تركوا يديني وابتسم ابوي.. وبصوته الحاني:
انتي مهره..؟!
وكرر: انتي مهره..؟!
حاولت ارد.. ماقدرت..
قال لي :المهره الاصيلة ماتخلي السبق بوسط المضمار.. قومي وانا ابوك وراك مشوار طويل..

حاولت النهوض واللحاق به وهو يستدير ويتركني..
لكن بطني الهائله منعتني..
فجأه وجدت جدتي تمسح على بطني.. وتقرى وتنفث وتدعي.. بكفها زيت مقري.. وتعيذني.. وانا ابكي..
وهي تقول :شدي يمه.. بتولدين كل شي.. كل شي بتولدينه..
شعرت بطلق هائل.. واني في حالة ولادة..
رفعت كفوفي لامسك بشي..
وكانت ذرعان سيف.. وراسي على حجره..
وهو يقول.. هانت ياروحه.. هانت..
وكنت ألد.. وألد.. وألد..
وجدتي تردد: ولدتي الضيم والظلايم.. ولدتي الخوف والفقده..صبرتي ونلتي يمه.. قومي وشوفي هالورد اللي جبتيه..

اختفى بطني وانا اتنفس واتنفس وصدري يعلو ويهبط وسيف يبتسم.. ويمسح جبيني :
مبروك ماجاك مهره.. مبروك..
همست بتعب وصوتي الضئيل:وينه.. وش جبت..

كأن جدتي رمت على صدري.. مجموعة هايله من الورد الطايفي..
ورمت على رجولي مثله : عساه مبارك.. عساه مبارك..
وانقطع الحلم وصوت جدتي تصلي على النبي وتبارك.. ورائحة الورد تخترق انفي.. وشيء بوزن الورد يلامس صدري..
وشيء اخر يقبل اقدامي..
'لكن هذا واقع..'!

فتحت مهره بصعوبة وخفوت.. لتجد رأساً صغيرة..
شيء بخفة الورد أعلى صدرها..
استوعبت.. واستوعبت.. وهي تحاول ترفع كفها..
كانت ماتسمع.. اذانها مقفلة..
لما بدت اصوات محببه لقلبها تداعب طبلتها..
فارس بفرح عارم:
بنتك مهره.. فتحي عدل وشوفيها.. جبتي لنا مهره صغيرونه..
حركت عيونها لسيف واقف وماسك نجود.. ومخليها فوق صدرها.. همس بحنية:
قومي يا ام النوم.. وشوفي هالزينه اللي جبتيها..
ابتسمت بجانب فمها..
ورفعت كفها بصعوبه وحطتها فوق ظهر البنت..
وحست بقبله على قدمها:
انا ببوس رجولها لمن تصحى.. قومي ماما قومي..
امتلت عيونها دموع وهي تهمس:
سيف ابي اجلس..
شال نجود وعطاها فارس ورفع السرير لها..
وسيف الصغير يضم كفوفه وهو جالس عند رجولها.. وبفرح كبير متأثر يوم شافها مفتحه:
والله ياماما اشتقت لعنونك..
وقام وارتمى بحضنها وهي تضمه :وانا اشتقت لعيونك يمه.. وانا اشتقت..

******

بعد ساعه تحسنت مهره.. وسولفوا معها..
نجود عندها وهي تناظرها بوله وحنيه:
شفتها بالحلم زي الورد الطايفي..
وشمتها:يازين الورد.. ياحلو ريحتك امي..
سيف:الحمدلله على سلامتك.. والله ارعبتينا ياشيخه.. قلنا لا نفست تنام بس عاد ماهو كذا..
مهره ضحكت:
النوم طوله وقصره حسب هول المصيبه..
فارس كان ساكت وجالس..
التفتت مهره عليه وتداعبه:
في واحد صاير كلامه قليل.. وش فيهم..؟!
فارس ببتسامه باهته:
اسمع لك..
توسعت عيونها :فارس.. وراه..؟! الا ضيقك يابعدهم..
مدت يدها له ومسكها وبخفوت:
انتي من جدك تكتبين وصيه.. وماطيح الا بيدي.. لا وفيها انك عارفه وش ابي وتبين تنفذين رغبتي..
ضحكت :ياكثر ماكتب وصايا.. عادي لا تكبرها.. هذا انا حيه ارزق..
سيف يمسح على راسها:جعل عمرك طويل ياعينه.. ماتصلح الدنيا بدونك والله..

******

مرت السنه واكثر..

مرت بابطالنا بسلام.. بعد الحروب الطاحنه.. التي مرت وحلت..
استطاعوا ترميم الأنقاض.. وتضميد الجروح..

وخلالها..
مرت عليهم الاعياد مجتمعين.. بعد ان تفرقوا فيما قبلها..
في عيد رمضان..
سندس وزينه ومهره..
راحوا يعايدون امهم.. وقد عادت لهم عودة حميده بجرحها الكبير الذي لايندمل..
بطعنة منصور السامه..
اكثر من انهار بحقيقة قتله لغازي.. وخطفه لولد مهره..
راحوا يعايدونها بعيالهم..
راحو.. مع مكابرة صبحا وصدها للفكرة..
بس الكل كبر.. والكل عرف الصح من الخطأ..

اسامه وباسل فرحانين فيهم..
اسامه:عاد سندس بكبرها داخله بيتنا.. لابيموت جني..
سندس بنص عيون:تراه بيت امي ياحيوان.. يومه بيت ابوك مادخله.. بسمك ذا امي ولا اطلع..

ضحكت نوير:
بيتي.. حلال زلال.. ياجعلكم دوم تجتمعون فيه ولايفرقكم شي..
مهره تتأمل ملامح امها وعينها الحزينه:
ماما.. عاد فرحي.. واللي فات مات.. احنا عيال اليوم..
ابتسمت بحزن:
والله فرحانه فيكم.. بس في جروح يايمه غايره.. ومايوصلها الطبيب..
زينه :يوصلها ان شاء الله.. هذا احنا حولك.. خمسه مانكفي.. وفوقنا هالاحفاد مايشفعون..

نوير بحنية:يشفعون وزياده ياقليبي ..
اسامه يلعب نجود وتضحك له:
تنوووكل.. مهير عادي اعض..
مهره:عضها.. اذا مافترستك..
باسل:عوذه.. ماتمزح.. وين سيف ماجبتيه؟!
مهره :يبي فارس.. يقول بيقعد مع الرجاجيل..
اسامه:كفووو ماعرفنا له..
زينه تقهويهم وتصب لامها:
يمه.. ببشرك..
نوير :بشري امي..
ابتسمت:الله عطاني..
نوير بفرحه خذتها وضمتها وباركت لها:
الله يبارك لك ويتمم لك ياعين امك..

****

مشاري يلبس ياسمين الدبله ويبوس اناملها:
متأكد..
ياسمين تضحك:
ماتجي تقول استعجلنا..
مشاري:يابنتي اكثر من هالتأني.. احبك.. والله احبك..

****

شاهين حاط قبعة الطيار على فهد..
وجمان تضحك وتصوره:صاير يخرفن..
شاهين شايله:
الايطالي.. اللي انفجعنا فيه..
جمان :وانت ماتنسى..
شاهين :ولاراح انسى..
وانطلقت ضحكة صافية منها ..
وشاهين يطالعها بنص عين..!

****

سما دخلت مجال الصحافه حتى الادمان... غرقت في العمل..
تتواصل مع سيف سناب..
واذا كانوا بلندن بالاجازات تلتقي فيه...
حست بكتفاء وقناعه..
سيف عند مهره.. افضل وصحته ونفسيته اجمل..
تركته عشانه..!

*****
اليوم ..
اصبح عمر نجود سنتان..
الآن الاجازة الفاصله لدخول فارس الجامعه..
ودخول سيف الصف الأول بعد ماخلص الروضه..

وانا وعائلتي الجميلة.. جينا لسياحة في فرنسا..
قبل ان نستقر باقي الاجازة.. بلندن بحكم عمل سيف..
لنعود بداية الفصل الدراسي للرياض..

في مدينة آنسي الساحرة..
وعند نهر لوتيو..جالسين للغداء..
اراقب فارس ونجود النتفه حايسته.. وغيرانه..
ليش يشتري لسيف آيسكريم..
طبعاً الشبر هذي..
تبي تستولي على فارس لحالها.. وتغار عليه حتى مني..
يعني صدق.. احذروا من كل ماقترب من الأرض..

سيف ياكل الايسكريم وماعليه منها :
عندك واحد شتبين يالساحرة..
ضحك فارس والتفت على مهره وابوه:
ماكنه سرق لقب نوف..
ضحك سيف ويجنن مهره:
لاتشلع قلبي على الطاري..
مهره وهي تتصفح بروشور سياحي.. بنص عيون:
ودك فيها.. توه القطار مابعد فات.. اترك ثلاثتي لي وروح..
ضحك وحوطها بذراعه:
انتي قبل ثلاثك..ارفس النعمه.. اطيح في النار..
تهامسوا بغزل..
ومهره نست على طول..

فارس يلتقط لهم صور..
شال نجود وحطها على الحاجز جنب اصايص الورد..
وهي تاكل الايسكريم..
سرق من عيونها بوسات..

نجود..
العصفورة الصغيرة.. التي تكبر في قلبي.. 'اختي' بعد ان كان ذاك مستحيل..
نجود :فالس.. بيبي..
ابتسم:حبيبي..؟!
بدلع:ابي كليم.. شوكلت..
فارس :ماترضى ماما.. توسخين فستانك.. كلتي ابيض خلاص..
بامتعاض :سيف عنده شوكلت..
ضحك:سيف كبير مايوسخ نفسه..
ونزلها على الارض..
سيف منسجم ياكل الايسكريم :سيف ابي..
اعطاه لها :اخذيه يادلوعة..

خذته..
فارس :ابشركم سيف آثر جودي على نفسه..
مهره:والله من زينه ايثار.. بتخبص فستانها حرام فاتح..
سيف:خليها.. نرجع الفندق نبدل ونطلع..
ببتسامه حلوة ناداها:عين ابوها....
نجود ارفعت راسها:عووونك.. (ياعونك)..
سيف:تعالي.. ابي حنان..
رجعت الايسكريم لسيف..
وراحت تركض له..
سيف :وقفي وقفي..
ومسح فمها وانفها وشالها.. وضمها بحنان الكون..
وهمس لها :احبك يـ(الثنتين) ..
وكان دوم يقولها..
جودي الصغيرة نسخه مصغرة من 'مهره'.. باسم حبه الاولي 'نجود'..

اصطفت الاطباق ومهره نادت فارس وسيف :
يلا ابوي.. تعالوا تغدوا.. قدكم ميتين جوع..
جاء فارس وعطى القرسون الجوال.. وطلب منه ياخذ لهم صورة عائلية..

والتقطت الصورة..
لم يتفقوا على الابتسام.. لكن جميعهم ابتسموا..
هناك ايام صعبه.. ومره..
لكن النضال والكفاح فيها يعني 'أمل'..
للحياة عثرات.. والنهوض لايأتي الا من سقوط..!!

على نهر لوتيو.. ضمها بذراعه وقربها اكثر..
وتأملوا المياه الصافيه..التي لاتعكر..
ربي حياه صافيه لايشوبها شائبة..

بغيتك نصفي آلثآني
ولقيتك كلي آلبآقي
...
تمت بحمدالله
الساعه ١:٥٠ دقيقه صباحاً
يوم الخميس
٣ سبتمبر ٢٠٢٠
١٥ محرم ١٤٤٢
بقلم: ايمان يوسف العيسى❤️
......

تابعوني
على تيك توك
@i_em1234

سناب و تلقرام
i_em1234

روايتي الثانية (تحت رهن الحنين)
كاملة على قناة خاصه في التلقرام 🕊🤍