رواية مبعثر فيك ماللحزن لايشفى الفصل الثامن والعشرون 28 - بقلم ايمان يوسف🕊️

البارت الثامن والعشرين

مرت الأيام..
ومرت بعض الاحداث فيها..

واقترنت الاعياد..
بمناسبات هادي وبلقيس..
بعد عيد الأضحى تم زواجهم في حفل مُبهر.. يليق باحباب سعود.. ومن توجهم بنفسه بذاك الرابط..

بلقيس قلبها يخفق..
في زفه اسطوريه.. هادي هناك ينتظرها.. وهي تعبر كالملكة بين ابيها وسيف ونواف وفارس..

'حقاً الحياه تصدمنا.. ظننت دائماً ان قصتنا مستحيلة.. وان عشقنا صعب المنال.. وسيقتل في كل ليلة..
لكنها طالت واستمرت.. وانا تمسكت كشهرزاد وهي يخرج عليها الصباح.. فتسكت عن الكلام المباح..
شهرياري رهاني..وقد فزت به..'

*****

سيف الصغير وتأقلمه الواقعي مع سما وعايلتها..
راجح حبه من كل قلبه..
مطبق مقولة ما اعز من الولد الا ولد الولد..
دخل مشاري مكتبه في البيت.. وسيف يلعب بمجموعة سيارات على الأرض.. ومسبب فوضى بالمكان.. وراجح عينه عليه..
ضحك:لا يبه.. سيف صنع المعجزات.. العاب وفي مكتبك.. الله يرحم ايام تطردني فيها.. خايف على هالتماثيل اكسرها.. ولا اصيدها..
راجح :خله يسوي اللي يبيه.. فدا رجوله.. محد فيكم مثله.. لامنطوق ولا سلوم.. الولد ماخذن قلبي يامشاري..
جلس على الكرسي جنب المكتب وحط رجل على رجل:
وانت عشان كذا رافض امه تعلمه انجليزي..ماتبي كلامه يتغير..

راجح لوح بيده :يتعلمها لاكبر.. لايقعد يخلط ويعيد امجادكم..
جاء سيف مد سيارة.. طايح كفرها:
شالي.. سلحه لي..
حاول ماضبط:منكسر.. مايركب..
بتوسل:تكفى شالي..
ضحك راجح:الحين بذمتك.. لاقال تكفى.. مثل لاقال بليز..
ضحك مشاري :لا بومشاري.. ما انت صاحي..

*****

سيف رتب بيته على ذوق مهره وغير كل شي .. للأستقرار فيه مع فارس.. وسيف والطفل الجديد..

مهره جالسه تجلد كتب فارس..
سيف دخل بعد ما انهى مكالمه.. وشافها:
مهره خليها لاتعورين.. من متى وانتي ثانيه نفسك عليها..
مسحت جبينها وببتسامة :
احس فيني طاقه عجيبه.. ابي اسوي اي شي.. متحمسه حبيبي.. قربت رجعت نتفتي..
قرص خدها بخفه:
مهرتي.. تعودي.. ترى سيف بيصير بينا وبينهم... مابيك كل ماراح تتعذبين وتأزمين ..
ارتجفت يدينها بالمقص.. الا انها كملت:
خله يجي.. تالي لكل حادث حديث.. ايش رايك نروح احنا.. وانت بعد عشان تشوف شغلك.. ماكنك بعدت عنه واجد مع هالظروف..

سيف: ارثر مهتم بالشغل.. ومتابع الوضع كله انا من بعيد.. وياسمين معطيها صلاحيات في الورشه.. وتنقل لي كل شي اول بأول.. اول تولدين وتقومين بالسلامه بعدها نروح..
مهره بعصبية:
سيف.. تكفى.. ترى والله ماعاد اصبر.. والله حتى لو نروح بيت بومشاري زياره.. وماخذه الا بيوم اللي اتفقنا عليه..
سيف بحزم: قلت لك لا.. مهره انتي شايفه وش صار لك برجعتنا من المالديف.. تكلفتي مع الطيران والرحله.. ماراح تسافرين مكان الا بعد ولادتك.. واعقلي ولاتوجعين قلبي بهالموال..!

مهره بنرفزه ترتب التجليده بالمسطرة :
ان سكتنا قالوا تكلمي لاتحشكين.. وان قلنا اللي في خواطرنا قالوا اقفلي هالموال.. بس صدق ماتحرق النار الا واطيها.. وش عليك مبرد.. ولدك عندك.. وانا قلبي على ولدي نار..

قلبت الكتاب تسويه من الجهه الثانيه:
يعني وش صار لي واحنا راجعين.. رجولي انتفخت.. ترى حتى اللي ماهي حامل يصير لها كذا..
سيف بضحك وتهكم:
بس عاد ماتصير رجولها ماتدخل في نعولها..
رمت انبوبة التجليد عليه:
ساعات وانا مدندله رجولي.. شوي اذا انتفخت وماتفجرت..
ضحك وهو يصد رميها بذراعه..
وهي ترفع ساقها :والحمدلله.. شفني عودت على حالي.. بس قل ماتبي توديني.. تخاف اولد هناك وتبلش بي..
سيف:طيب تمام.. نزليها لايجيك شد..
مهره تهاوشه:لاتعاملني كني مشلوله.. ترى حامل..
سيف يصب له فنجال:
ليتك تعاملتي مع حملك مثل باقي الحريم.. مدري كيف بتطلع بنتي.. هو من زعل.. وبكى.. واكتئاب.. ولا من ركض وسفر..
مهره وهي تقصص التجليد:
بتطلع قمر على امها..
سيف رافع حاجب.. يتأملها كيف تسولف وتتحرش وهي تقصقص..
ظل يحدق في رموشها  نازله..
يوم حسته ساكت رفعت عينها عشقه.. وبشقاوة :
ولا لايكون ماتبيها تشابهني..
ارتشف من فنجاله وابتسم:
حظها جايها من دعوة بعرفه لو طلعت تشابهك..

توقع نظرات دلع وخجل..
الا انها واجهته بنص عيون وبنظره حاده واتهام:
سيف انت وش مخبي هالايام.. وش هالمكالمات والطلعات.. اللي ماهي في اوقات سنع..وش عندك..؟!
سيف رفع حجاجه :
لايجيك شك اني راجع لمسايري..
مهره بتهكم: عارفه قدري عندك وعارفه غلاي .. انت فاهم وش اقصد يابوفارس..؟!
تغيرت ملامحه بعصبية :
وش قصدك..!
مهره تنهي كتاب وتضعه على الكتب:
الشغل اللي حذرتك منه.. وراح عمر ابوي باسبابه.. فكرتك وقفت من هالامور بس الظاهر مالك خاطر.. الا لمن تروح فهالسالفة ارواح..
سيف بانفعال:
مهره.. في امور مابيك تدخلين فيها.. ولاحتى تشورين علي فيها براي..
قامت وبانفعال اكبر:
سيف ذولا ناس مايخافون الله.. ان كانك معهم ولاضدهم.. ان عرقلت لهم نسفوك.. وان كنت معهم ووقفت شغل ذبحوك... لاتامن لاحد..!
'تقصد المهربين'

سيف وصل فيه الغضب من كلام مهره وتدخلها في الموضوع من بين اسنانه:
قلت لك قفلي الموضوع.. لايدخل فارس.. ولاتفتحينه ثاني.. لايصير عاد علم جديد..
مهره واقفه قدامه:
والله ماقفله.. دامني حيه  وماوسدت اللحد.. ماراح اتركك تروح مراح ابوي ياسيف..
انقطعت السبحه  بين اصابعه وتناثرت حباتها على الأرض مخلفه.. اصوات متناغمه..
وقف قدامها بطوله الفارع وبخفوت:
انا بهالدرب من سنين.. وليد وهو وليد.. مادرى عنه الا تالي .. لاتجيني بعد هالسنين.. وتناقشيني في شي حتى ابوي ماسمحت له يتدخل فيه..

ناظرته بتحدي:
لاني ابوك.. ولاوليد.. انا مهره ياسيف.. واذا كنت بهالدرب ومو خايف على احد.. انا وثلاث في رقبتك هالحين..
بعصبية:مايجيكم شي.. انا عارف وش اسوي.. اسمي غايب فكل شي.. وماحد يوصلني..

دخل فارس من الباب الخارجي..
سيف بهمس غاضب:خلينا نفض هالسيره هالحين..
مهره بسخرية وخفوت:
والله ياهالدنيا تلعب فينا مثل الهوى والمراجيح.. والله يستر من الجاي ياسيف..!

تركها وطلع بعد نظره حاده لعيونها..!

فارس باستغراب:وش فيكم.. جيت بوقت ماهو مناسب..
مهره وهي تجلس نص جلسه وتلتقط حبات مسباحه فكفها:
مافي شي ابوي.. قل لي شالوا الاسياخ من رجل ذياب..؟!
فارس ينحني معها ويلتقط الحبات :
ايه شالوها الحمدلله..
تنهدت :الله لايعود لكم شر ياعينها..
فارس يناظر حبات السبحه الغالية ويرفع عينه لها:
وش فيه ابوي.. كنه معصب..
جلست على الارض وتربعت وشردت:
تضايق لاني اقوله نبي نروح لندن.. بس..
فارس ماصدقها وهو يحط الحبات في يدها :
هالشي ماراح يخليه يعصب..
مهره شاردة..
من يومين قال بيروح عنده مزاد في دبي.. وراح.. ومن شوي وهي تشيل ثيابه لقت ورق تذاكر لجده.. ماطلع من السعودية اصلا ً..
وهذا ان دل على ايش..
على امور قاعد يخفيها..!

قاطعها فارس من شرودها: مهره.. وش..؟!
ابتسمت :قم عطني التحفه اللي جنب الشاشه.. خل احط فيها مسباح ابوك.. ولد المهراجا.. فرطها وراح..
جابها وحطتها فيها.. مد يده وساعدها توقف..
حطت يدها تحت بطنها وتأوهت..
مسك ذراعها وبقلق: هااا..!
مهره بمحاولة ابتسام:مافيني شي ابوي.. لاتصير خريش على طول تتصروع.. تعال ساعدني خل اخلص كتبك..
فارس توه ينتبه انها سوت اغلبهم.. هتف:
وشهولا جلدتيها.. بزر انا..
جلست قدام الكتب وبنص عيون:
احفظ لكتبك.. شل هالقراطيس وتعال نكمل الباقي..

****
سيف بره.. بالحديقة الخارجية.
يدخن بشرود..
قبل يومين بجده...
احبطوا الدوله عملية غسيل اموال تخص منصور.. بس مع الأسف ماقدروا يمسكون اي ممسك عليه..

الناس اللي تحته شالوا الاتهام..
طلال احتاجه في العمليه لان السلعه.. عباره عن عقد المفروض انه اثري..
ويقدر بالملايين..
الوضع كله توقف بين البايع والمشتري والايداع..
لمن يتأكدون من السلعه..
سيف وهو يفحصها..
بعدسه في عينه.. واضاءة..
وبحضور طلال وناس من فريقه.. وبعد وقت..
قال ببساطة:
مزور..
عقد طلال حجاجه:
طيب لو قلنا ماهو اثري مقلد بجواهر ولا.. يعني كم تكلفته..
سيف مد شفايفه:
العقد فضه والفصوص الخضراء زمرد حقيقي بس من ابخس الانواع.. الفصوص البيضاء ولاوحده فيها الماس كلها زركون.. كله على بعضه تكلفته.. ان شد حيله ثلاث آلاف ريال..بس واضح ان مصنع على يد خبير.. لان بصراحه ولاغلطة.. من الأصل..باستثناء المواد..لاحظ من هنا كيف معطي الفضه لون صاير بالفعل كأنُ انتيكا..

شال الورق :وحتى المزاد وموعده خطأ.. سوثبيز سوت مزادها بفرنسا ب١٤ مارس.. هنا مسجل ٢٦.. البايع والمشتري داخلين في القضيه.. ختم واحد من الاختام في الورق صحيح.. واكيد وخذ بالرشاوي.. الباقي تزوير..

طلال بتفكير:الغريب انه ماستخدم قطعة اثرية صحيحه هالمره.. خابر انت ياسيف.. القطعه الفرعونية..  قبل فترة كانت هي.. واوراقها كلها صحيحه..
سيف:الواضح.. ان راجح ماعاد يدعمه.. راجح القطع اللي معه صحيحه ويشريها.. ومن عشق مجنون في المجال انا  اعرفه.. منصور.. يسوي فيها بيعه وهمية.. وتالي ترجع الملكية لراجح..

واحد من الموجودين:ومنصور يعجزه يشتري القطع هذي.. ويسوي فيها الامر ذا..
سيف يوضح:
القطع هذي تكلفتها بالملايين.. يعني العقد الاصلي من هذا.. منباع ب١٢ مليون دولار.. والمبلغ اللي يبي يحوله منصور بعمليته ١٣ مليون .. لو شرا القطعه وش استفاد.. ولاشي.. هو مايبي القطعه يبي المبلغ بحسابه بس.. ناهيك عن كم الرشاوي.. عشان يخلص العمليه ويصفى على المبلغ بحسابه..
طلال :برايك.. ليش ماشاف هاوي جديد بدل راجح.. واستثمر معه..
سيف :منصور حذر.. واللي بينه وبين راجح عمر وثقه.. مين بيشري قطعه قيمتها فوق عشره مليون وبيأمنها عند عصابة.. ياطلال المهوسين في المجال هذا.. تراعي قطعها اكثر من عيونها..

رجع سيف يدقق في القطعه :بس والله محترف اللي اشتغل هالعقد..
رفع طلال صورة حقيقية للعقد :
انت متخيل انه عبر من مطار فرنسا..
سيف ببساطة:ماحد فحصه.. واضح ان الرجال.. راشي الدرب صح.. هذا جاي على انه مشتريه من فرنسا.. والبايع استلم.. ابي افهم.. كيف مر هذا.. بمبلغ كبير كذا..
طلال :الواضح ان في له احد مساعده ومنزلها بالطيارة قبله.. بنفتح تحقيق على كامل الطاقم..
.
.

تنهد سيف وهو ينفخ الدخان..
من سنوات.. يعرف طلال.. لجئ له في بعض الامور في مجال الاثار وخلافه..
من بعدها سيف حب الشغله.. ومستحيل يرده في اي طلب ممكن يساعد في القضاء على شبكات.. او خاينين للوطن..
بطبيعة شغله ومجاله في فحص الاثار والقطع النادرة وعمرها..
تلجئ له بعض الجهات.. في بعض الامور في اختصاصه..
بس الشغل مع طلال غير..
يحس يسويه من قلبه..
ويسويها من اجتهاد شخصي.. مالها علاقه بالورشه والعمل..
لسرية المهام..
الشغل ضد منصور صار له شهور..

ماراح يتخلى عن الموضوع الحين.. ابد..
مرتاح نوعاً ما ان راجح مبتعد عن العملية..
بس متوتر شوي..
وخايف الأمور تاخذ منحنى ثاني..
ماينسى.. ان عقاب ولد طلال كان بيروح فيها برصاصه انتقام.. من ابوه..
ارعبته الفكره.. وهو يطالع مهره وفارس من الزجاج العاكس داخل البيت..

*****

صغيري يتعلق في صدري الآن.. اعتاد حضني.. ونحن نمضي الشهر الثالث معاً..
اضمه اكثر.. اريد ان ادخله في اضلاعي.. اليس ثمرة حبي مع عسافي فقيدي..!

كيف تمنيت اختفاءه..
كيف سعيت لقتلك في بطني..
كيف عشت بدونك.. ولم اشعر انك فعلا ً على قيد الحياة.

كيف ينوه والدي انه اقترب وقت رحيله..
في كل قانون وشرع..
الحضانه لي..!
من هي مهره غير انها زوجة ابيه.. واصبحت زوجة عمه..
فعلياً صغيري مع الوقت تعلقني..
حتى لو لم يخرج مهره من خاطره..
حتى لو ألح باشتياقه..
حتى لو لم يسلى عن اتصاله بها.. وسؤاله ..
لو انفردنا في عالم وحدنا..
لن يجد غيري..
سيتعلق بي اكثر.. ولن يستطيع احد نزع روحي مني..
تشبث سيف فيها وهو نايم..
وكان ينادي بماما..
تدري انه ينادي مهره..
هو الى الان مايعرف انها امه ولايناديها الا 'سما'..
بس لما يهذي بها بمنامه..
قلبها يبكي..
حتى لو كان يقصد فيها احد غيرها..

يطالبوني بالمستحيل بتركك..
همست:ماحد يقدر ياخذك مني..!

*****

منصور بثورة:
القطعه كانت ولاغلطه.. ولاغلطة ياراجح.. ولعلمك مر من مطار فرنسا سلاماً.. مع انهم فحصوه.. من اللي ملتم عليه طلال ويخرب علي شغلي..!
راجح شارد.. ويدري انه سيف.. سيف عقليه فذة في مجال القطع والاثار..
وبما ان هو عرقل تهريب لوحة ادوارد.. هو  كان سبب في تخريب عملية غسيل الاموال لمنصور الحين..
راجح بهدوء:
تحصل يامنصور.. بس انت ماتعودت على النكبات.. في ثغرة هي اعدمت الموضوع.. ويسلم راسك.. اهم شي ماصابك شي..
منصور ضرب الطاوله:
٤٩ مليون ريال راحت كذا..المبلغ تصادر والاغبياء انسجنوا.. والدنيا انحاست.. وكله منك..
راجح مد شفته وبنفس الهدوء:
لاتحملني خطاك.. انا بعيد عن المسأله كلها هالمره.. ولاانا بحاجه غسيل اموال.. تدري ان تجارتي نظيفه من سنين..قبلها اشتغلت على تهريب أثار وقضيت منها.. انت ماكتفيت يامنصور.. رحت تتمادى فبلاوي جرتك لغسيل الاموال.. اللي والله بتجرك لحد السيف..

منصور بانفعال:
لاتسوي نفسك الشريف العفيف.. من اللي يساعدني في التخطيط.. من اللي كان يعطيني القطع النادرة ويتمم لي الشغل النظيف.. انت ياراجح.. انت..
لوح راجح بيده:
هذا من باب الرفاقه.. ماتهون علي يامنصور.. بدينا من الصفر انا وانت وغازي.. وبنص الدرب.. كلن سلك له طريق.. وانت انحدرت في طريق مايل مرتن وحده..
منصور بانفعال:
انا طريقي اختصر لي كل شي.. الثروه عندي اضعاف ثروتك.. كنت محتاج ارقى الثريا بسرعه.. ووصلت.. رجعت نوير لقلبي.. بعد ماخذها غازي وغرها بوسامة زايله وكم قرش جمعهن وطارن.. حبيتها قبله ودارت وارجعت لي انا..
راجح بسخرية :
لاترافع بقضيه خسران فيها يامنصور.. ان كانها ارجعت لك فبخشم الريال.. ولا كلنا ندري بحب نوير وغازي.. يومك على فقرك مابغتك..بس نوير من طينتك.. الغايه عندكم تبرر كل الوسايل..!

منصور مايحب هالسيره.. اللي يضربه راجح بواقع زوجته وواقع ارتباطهم فبعض :
ماعلينا من الماضي.. اللي ابيه الحين.. ليش شغلي للقطع النادره والقديمه ينعدم.. انت تعرف ناس في هالمجال.. اللي يتعرفون على الصحيح من المزور.. دور لي فالموضوع.. ابي اعرفه عشان ابلعه العلقم..

راجح بانفعال:انا معارفي بلندن.. القطعه انمسكت بالسعودية.. فكني ورح قفع شوكك بيدك..
رفع منصور حاجب :
تراي مانسيت.. ان لوحة ادوارد ماراحت الا بثغرة من عندك.. يعني اللي كشف اللوحه ماهو بعيد من معارفك ومعارف رجالك..
صاح فيه:
وانت بتخون فيني على تالي العمر  يامنصور.. قصدك انا بايعك..
قام وباللهجه هاديه كلها تهديد:
يمكنك ماخونت فيني.. بس في احد ثاني ماتبي تخون فيه بعد.. بس والله ياراجح ان كانك تدري.. من قاعد يلعب فيني وساكت.. لا انسى عشرة السنين.. وعاد انا شين لانسيت ..
راجح بخفوت غاضب:
تهددني؟!!.. والله و بتطلع لك جبل عالي مانت قده..
منصور ببتسامة تخفي الكثير:
مزوح يابومشاري.. تدري انك راس المال والمكسب الصافي..
راجح وهو يوقف وبجمود:
ماعاد ينفع رقع الثوب والشقوق كثرت..

عقد حواجبه:
يعني..!
راجح:ماعاد لي شف بمقابلك يامنصور.. خلنا نحفظ اللي كان بينا.. قبل ندوسه في الايام اللي بتجينا..

*****
يوم الجمعة.
بلقيس فغرفتها تسوي شعرها ويفي وتتجهز..لزوارة بيتهم..
ابتسمت وهي تسمع صوته مع انفال:
ماهو اليوم يا انفال.. بوصل بلقيس بيت ابوها وبروح اخلص شغله..
انفال :يعني كيف ياهادي.. تونا بالحمد.. اشوف بلقيس صارت الاوله وانا حذفتني من القايمه..
ضحك وهو يجننها:
عاد هذي بلقيس ياغنايمي..لاتقارنين نفسك فيه.. ترجح كفتها ويخرب الميزان..
صاحت :بعد..!..هين ياهادي.. صدق انك بياع عشره وقلاب نعل..
فصلت بلقيس السلك وهي بتنفجر ضحك وهادي يقول :
لازم تقتنعين اني الحين متزوج وماعدت عزابي وفاضي لك بس ولطلابتك..
انفال بقهر :والله براڤوو ياولد ابوي.. لو ندري ماعرسناك.. جوالي مايشتغل له اسبوع.. الفلوس عندي.. ودني بس اشريه..هادي لاتقهرني فوق قهري..
هادي برواقه:
بسم الله عليك من القهر.. خليها الاحد يقولون بيجيبون عروض جديدة..
افتحت بلقيس الباب:
وانا اقول كذا انفال.. تعالي معي بيتنا وخلي جرير بعدين..
توسعت عيونها:
وشهوو..حتى انتي يابلقيس.. اقول عاد.. ليته يرجع الزمن.. ان كان ماسويت اللي سويته..
هادي :وش قصدك..
انفال وخلاص بتبكي صاحت:
مانب قايله وش سويت.. بتوديني ولا والله لاخلي رجل النور ولارجل ضحى يوديني.. واخليهم ينقدون عليك يالأخو العاق..
بلقيس بنعومة:
هادي حبيبي.. زوارة اهلي ماقدر اتأخر عليها..اذا بتنشغل اخلي السواق يجيني..
هادي رفع حاجب وبتخرفن:تامرين امر ابوي.. لو تتعطل كل اشغالي اخذك أول ياملي..
انفال تناظرهم بعيون متسعة..
مستنكره اسلوبهم الحقير معها..
خلاص بتبكي..
هي كل شي ولاهادي يتغير عليها..

توها بتفر تروح.. الا مسكتها بلقيس:
لحظه لحظه نفول..
انفجرت ضحك:وراك عصبتي..
انفال تحاول تتفلت:
لا ياشيخه.. اجل تمسحون فيني الأرض واظل واقفه..
هادي:واحنا وش قلنا.. بوصل حرمتي بيت اهلها وبروح عندي شغل.. اعقلي ولاتقلبينها حزازيات..
صاحت فيه وهي تحاول تفك ذرعان بلقيس:
والله لو هو جوالك المكسور ماقلت كذا.. بس غيروك العواذل وانا كنت مفكرتك الذهب.. هديني.. بلقيس..
بلقيس غمزت لهادي وهي تكتم ضحكتها:
امسكها هادي لاتفضحنا مع خالتي.. بتصدق اني فريت مخك.. وانا عاد شحليلي مابي الا الستر..
انفال خلاص نرفزت وهادي يمسك ذراعها ويسحبها.. ويدخلها معهم الغرفة ويغلق الباب..
هي تكتم البكاء :
افتح هالباب لاوالله اذبح نفسي..
هادي بشبه ابتسامه:
يابنت اعقلي لاتفشليني.. كل ذا عشان جوال..
انفال تحاول تبعد يده عن الباب:
البلاء والله ماهو في الجوال.. البلاء بأسلوبك الوسخ معي.. اول ماترضى يظل الشي بخاطري  ولاتجيبه.. والحين مير ولاكنك تسمعني..
بلقيس وراها:
ويعني انا غيرته..
سكتت وعيونها تلمع.. وتعض شفتها ماتبي تبكي..
هادي:قولي لي كم معك فلوس..
انفال بعبره:
مابي اروح.. خلاص.. انا اعطي الفلوس ضحى وتجيب لي.. خلاص بعد.. افتح الباب..
هادي:طيب انتي قلتي جوال اللي تبينه ب٤٧٠٠.. ومامعك الا ثلاث آلاف .. ماتكفي.. اصبري جمعي فوقها ..
انفال انصدمت..
يعني حتى مايبي يزيدها.. سحبت كفه:افتح هالباب الحين.. لا انادي امي تتفاهم معك..

بلقيس بشقاوة وهي ورى انفال:
على مقالبك فينا.. ماتحملين المقالب.. والله من جدها بكت..
خذ هادي كرتونة الآيفون من بلقيس..
وبدون سابق انذار لصقه على وجه انفال:
هدية..مابي منك ولاريال..
توسعت عيونها.. وهو يحط العلبه بين كفوفها..
تصنمت تناظر العلبة.. وناظرته بدموع صامته..

هادي:عاد ماحصلت اللي تبين جبت لك بو خمس آلاف واشوي..
رفعت كفوفها والكرتونه بيدها على وجهها وعيونها وانهارت بكي..
مسك يدينها وهو يضحك:
هيييييي نفول.. ماهو كذا عاد..
بلقيس:شكلنا ثقلنا العيار..
ضمته وهي تعتصر خصره:
والله لو  تتغير علي أموت هادي والله اموت..
ضحك وهو يضمها:
من يغيرني.. بلقيس.. تراك تزنين على هالجوال من جهه وهي تزن علي من جهه.. يعني لاتخافين.. داعمه لك ماتغيرني عليك..

انفال ببكاء:
انا داريه عنها.. والله لو ماعرفها صح ان كان ماخطبتها لك..
بلقيس وهادي يتناظرون باستغراب..
بس ماعلقوا..
وهادي يحاول يهجدها ويروح يجلس معها ويفتحون الفون..
سكتت وهي تطلعه بحماس وتضحك..
هادي :شغليه انتي عشان يتبارك..
شغلته واضافة ايميلها..
وافتحت الكام وصورتهم وهي تضحك:
عشان يتبارك صح.. اول صورة للجميلين حقيني..
بلقيس تلملم الكرتونه وتحطها بالكيس:
والحين قولي لي.. كيف تقولين خطبتيني لخوك.. هالحين ابوي هو حذفني عليه.. وش دخلك بالموضوع..

انفال حركت حواجبها وبخبث:
والله لو عم سعود خالتي قماشه.. ان كان قال الهام وشفافية وصدقنا..
هادي عقد حجاجه:لايكون انتي قايله لعمي سعود عن حبي لبلقيس..
قامت وبمكر وحاجب مرفوع:
الله الله..
توسعت عيونهم بصدمه:شلوووووون..
رفعت انفال الجوال:
استاهله ولاماستاهله..!!
سحبها هادي وقعدها وبلقيس من الجهه الثانيه..
هادي بذهول :قولي لي كل شي.. من اوله لاتاليه..
ناظرتهم  ببراءة..
بعدين انفجرت ضحك..

******

دخل نواف المطبخ.. بعد ماسأل عن زينه وقالت له امه انها هناك..
قرب وداخ على ريحة القهوة العربية وروائح شهيه ثانيه..
لقاها واقفه ترتب معمول في صحن فخم.. ابتسم على تركيزها بشغلها:
اساعدك..
رفعت عينها له وضحكت وارجعت ترتب:
بالله شبتسوي.. بتشيل الصحن للصاله.. شله ..
جاء عندها:ع القوة..
هي :يقويك..
ناظر شغلات مجهزتها:كنك معطيه الجماعه وجه..
قربت قطعة  معموله بفمه وأكل منها:ايش رايك حلو..؟!
نواف خذ باقي القطعه من يدها:لذيذ.. تسلم الايادي..
غطت المعمول :يسلمك ياروحي..
راحت وبيدها ترمس.. شافها وهي تفت الزعفران والهيل فيها..
ابتسم ومن خلال العشره معها.. يعرف انها اذا كانت تطبخ ولاتشتغل بالمطبخ ماتتكلم.. وتظل مركزه في شغلها ولاتعطيه وجه..

وجهها جدي وهي تعطي العامله الترامس.. عشان تاخذهم الصالة.. وتقول لها شتسوي في باقي الشغلات..
ومتجاهله وجوده..!
رفع حاجب وهي تطلع صينية موالح من الفرن.. وبس حطتها على الطاوله الجانبيه..
تلفت ومالقى احد.. راح باغتها بضمه من ظهرها..
شهقت: نواف.. شهالطفاقه..
باس خدها بقوه:انتي ماتستحين.. واقف ولاكنك تشوفيني..
زينه بضحكه وهي تشيل الموالح الطوليه.. وتصفها بزجاجات كرستالية:
تعرف ان التركيز عندي مايتوجه الا لشي واحد..
لاتشغلني وخلني اخلص.. عشان البس..
نواف ضام خصرها :ماراح اطلع الا بك.. خليها جودي ترتبها..
زينه ترتب فيها بسرعه:لا انا بكملها.. يلا روح نواف وبجيك..
بخبث راح تحرش فيها اكثر وهو يقول :
ماروح الا معك.
نقزت مع حركته ولسعها الطبق..
رفعت صبعها :اححححح..
نواف يفكها :بسم الله عليك..
وراح خذ صبعها :بسيطه..بسيطة..
وباسه..
دخلت موضي واصبع زينه على شفايفه وبشطانه:ماتجوزون انتوا من هالافعال.. الا لمن تصكم هالعاملات عين وقعدوا..
زينه وهي تبعد :والله امي تعرفيني.. عاقله شحليلي.. بس نواف يجيني المطبخ ويحوسني..
موضي تشيل المعمول :اصلاً انا خابرته.. ماكنه العازف عن العرس واللي طلع عيني..
نواف مسك يد زينه:
عاد مو كل عرس عرس.. ولا كل بنت زينه يايمه..
موضي  مستمتعه على هالكبلز ..
واللي صفوا معها في البيت..
وتجنن فيهم دوم وتتحرش:
طيب اترك يدها.. ماخلصنا شغل.. وراك متعلبش فيها كذا...
نواف يسحبها معه:
كملي الشغل مع فلبينياتك.. ابي زينه وعندها اصابة عمل.. احترقت..
توسعت عيون زينه..
وموضي :الله اكبر.. وش اصابته ابوي.. خل البنت تساعد امها.. وانت يلا اذلف تيسر مجلسك..
نواف:ماحد جاء بالمجالس.. بصعد مع زينه فوق ولاتزيدينها يمه ترى ماخليها تنزل الا بكره..
وقبل ترد.. طلع معها..
وموضي ماسكه ضحكتها:شف التسلب.. استخف مره وحده..
جات العامله عطتها موضي الطفرية:اخذيها جودي.. وارجعي رتبي الموالح كلها.. واخذي منها للمجلس والصاله..
جودي:مدام زينه سوي..(ماترضى لهم يكملون شغلها)
موضي:مدام زينه صعدت تلبس.. كمليها انتي ياجودي.. وعجلي كوكلي..

*****

بعد شوي وبعد ماجتمعت العايله..
مهره جات مع فارس..
لان سيف انشغل وماكان موجود..
وقاهرها على هالحركات والغموض.. واصلاً هي متكهربه معه.. من ردة فعله هاك اليوم وقت عصب عليها.. وانه مايبيها تدخل بشغله..

وقفت جنب فارس وهو يشيل صحن من المقعد الخلفي.. وتوها بتاخذه.. قال:
خليها.. انا بدخلها..
اغلقت مهره الباب..
وتوجهوا للباب الداخلي:
لاجاء ابوك المجالس.. عطني خبر..
هو:ليش هو ماكلمك..
سكتت..
فارس قبل مايدخلون:مهره .. ما انتي طبيعيه انتي وابوي.. صاير شي..
همست:لا مافي شي.. بس ابي اطمن لاجاء..
بسخريه:طيب.. دقي عليه انتي..
هي بعصبية وتفتح الباب: يوووه فارس خلاص لاتعطيني خبر ولاهو يعطيني..مابي منكم شي..
ضحك:والله هالكرشه عامله عمايلها فيك.. ضاربه فيوزاتك مرتن وحده..
دخل يسلم على موضي وعماته..
وهي وقفت تشلح عباتها وتعلقها..
لابسه فستان حمل مره ناعم وميدي.. وشعرها  طاول لانهاية ظهرها.. رابطته بربطه ناعمه مشجره.. ومجوهرات ناعمه جداً تليق بشكلها الحالي..
دخلت..
جمان كانت تتوجه لها.. تلقفت بطنها بين كفوفها وبانهيار  :
يااااعمري.. تفوووزين بأكيت حامل شفتها بحياتي..
ضحكت مهره:
عززي.. عززي.. لهالبطه..
ضمتها  وسلمت عليها :يازينها بطه اللي بتجيب لنا بنت سيف..
فارس يقلد مهره.. يحط يده عند بطنه:
آاااه.. شكلي بولد بالسابع..
وكرر الحركه:اووووحححح.. سيف شكلي بموت قبل اولد..
ورفع يده :فارس.. امسك يدي.. جلست على الارض وتوهقت..
توسعت عيونها وهي تشد شعره :
حيواااااان.. ومسوي فيها تتروع.. وانت قاعد تمسخر علي..
كلهم يضحكون..
وفارس يبي يبعد يدها عن شعره:
والله انك خابصه قلبي.. كل اخاف تولدين واتوهق فيك.. اتركيني مهره.. لا احوس بطنك..

مهره تركت شعره وراحت تسلم على موضي:
بذبح ولدكم يمه.. اصبري عليه..
ضحكت موضي:
اتركيه.. يخاف عليك من الهواء الطاير..
فارس يتمسكن:
شر مرت هالابو.. مخليتني سندريلا.. من اصحى وانا اكنس واغسل واشطف.. ماتصحيني للمدرسه الا برفسه.. تقطني من السرير.. عنيفه وتخوف.. قاعده تهددني.. ارجع اسكن عند امي موضي.. ولا بتخليني اسكن بغرفة السواق..

بلقيس وهي تضحك :
لااا  يامهره.. عطيناك اياه لحم وبترجعينه عظم..انتبهي له.. يتيم.. كسبي فيه اجر..
مهره بنص عيون:
من اليتيم..!!.. ماخذ حقه دبل ومدبل..

فارس ياخذ فهود من بلقيس: عجلي بس جيبي لنا شي كذا ألعب فيه.. يازينه الطلياني.. وبانبهار:ورب الكعبه صار يشبه امي..
جمان ابتسمت:
ايه حيل احسه صار يشبه نجود الله يرحمها..
موضي :عاد يانعومه.. لاصار يشبه عمته..
ابتسمت مهره بشرود..
وهي تراقب فارس.. كيف يدقق بفهد.. ومبسوط بملامح امه فيه..
جمان:وين الزينه..؟!
موضي:ياعمري ماصعدت الا من شوي تتزين..ماقصرت وهي تسوي لكم هالضيافه..
مهره رفعت حاجب:
بعد وتغطين عليهم يمه..
موضي:وانا صادقه.. شوي وتنزل لكم.. تقهوو.. وخلوها براحتها..
مهره توسعت عيونها:بنات ملاحظين ان امي.. تسوي تغطيه لزوين والخديوي.. خايفه عليهم من العين..
بلقيس:الله يرزقنا بس..
جمان:ان حبتك عيني ماضامك الدهر.. الله يخلف علينا.. ماحد يسوي لنا اجواء.. ولا احد يعتم علينا.. من نزبن مع هالرجل.. اللي يبكي واللي يطق الباب.. بس ماقول الا حظوظ..

توسعت عيون موضي وهي تلوح بكفوفها:
كش عليكم... عليكم الله اكبر..!.. ذكري الله انتي وياها..
بلقيس بضحكه:خافت على الكناري حقينها.. قومي اخذي غسول فناجيلنا يمه..
قام فارس وعطى فهد لجمان:بطلع انتوا ناس فاسخين..
قامت مهره الحقته: دقيقه فارس..
وراحت توشوش في اذنه..
بعدها وشوش في اذنها..
جمان :الحين هذا سندريلا ومرت ابوها..
ضحكت بلقيس:عياااره..
مهره وعيونها متوسعه لفارس:
اها فروس عشاني..
بشقاوة:اوعديني تسوين لي محاشي نفس امس وبشري..
مهره :خلاص تم..
سحب شعرها وهو بيطلع:اجل انتظري مني ألوو..

******

❤️

يوم امس-لندن
راجح بغضب وانفعال:كيف اتركت البيت.. وشلون مب لاقينها..وانتوا وينكم فيه عنها..
مشاري بعصبية:
هي طلعت العصر.. انها بتمشي سيف بالحديقه.. وهي اصلاً تطلع فيه هالطلعات.. من وين بيجيني انها مبيته النيه تهرب فيه..!
راجح بصياح:
وانتي ياليان.. تبيني اصدق انك ماتدرين عن نوايا اختك وفعولها..
ليان :واللهِ مدري بابا.. وش تبين احلف لك فيه مدري.. اوك انا معها في انها احق بولدها.. بس صدقني ماقالت لي شي..
راجح: والله لو اعرف انك تدرين وساكته.. والله لا انسى انك بنتي.. وامسح فيك الأرض.. وهذا انا قلت والله..
توسعت عيونها وبانفعال:بابا.. انت ليه معصب كذا.. ولد وامه وراحوا سوى.. انت تبالغ..سما مسكينه حسوا فيها.. معقول تولد الطفل وتعطيه لمرت ابوه.. فكر فيها.. لاتصير متحجر عشان كلمة قلتها لسيف.. لو احد بياخذ منه فارس ماراح يرضى..
اخرسها كف صارخ من راجح علم في خدها.. وبجمود :
زيدي بالحكي شوي..اذا ناويه اقص لك لسانك..
ناظرته بصدمه وعدم استيعاب.. للضربه الأولى من ابوها..
مشاري بذهول :يبه..!!
مد كفه يسكته:اسمعوني عاد زين.. ان ماطلعت الكلبه اختكم هاليومين.. لايصير شي ماتندم عليه لحالها.. كلكم بتاكلون الاصابع ندم..
وراح وهو يكلم:
سويت اللي قلت لك ياهاشم.. يلا جايكم بالطريق..

*****

خلال الزواره وجمعة البنات داخل والشباب بره..
ارسلت مهره لفارس:ها  كلمت ابوك..
كتب :مايرد.. عجزت..
مهره بعصبية كتبت:وش فيه يعني.. من الظهر طالع..فارس تكفى.. شف كذا نواف.. لاتقول انا اسأل بس يمكن يدري هو وين طمني.. تراي قاعده على جمر..
فارس حط ضحكه طويلة: اكذب عليك..
ورسل لها صورته فالمجلس.. وهو ماسك عصا سعود ومندمج مع الجماعه..
مهره قلبها انخرط:
حسبي الله على ابليسك يافارس.. كانك خبصت قلبي..
فارس :بسم الله على قلبك.. المهم لاتنسين المحاشي..
مهره حطت ملصق معصب:انقلع.. ماراح اسوي لك شي..
زينه مدت قهوه لها:
اتركي هالجوال.. وسولفي وراه..وراك يامهير ماعاد تعرفين السنع..
مهره قفلت الجوال:
يووه زوين.. لاتسوين الحين السلفه اللي تحشر مرت حماها.. تراي اختس ..
ضحكت زينه:
يقولون يمشي المركب بحريم الرجل.. ولايمشي بحريم الحما..اخذي قهوتس وقابلينا..

بلقيس :الحمدلله ان ماعند هادي اخوان.. مافيني حق تحديات ولامقارنات..
ضحكت مهره:انتي يكفي عليك انفال.. مرت رجل مب حماه..
بلقيس بضحكه:اسكتي اسكتي.. ياختي انفال صاير عندها فوبيا اني اكوش على هادي ويكشت فيها..
موضي:يحق لها البنت.. انفال من وعت على الدنيا وهادي ابو واخو.. لاتسوين بعد انتي فيها حركات غيره.. وتبين تاخذينه بصفك..
زينه:ايه انتبهي.. ترى الدنيا دواره..
جمان:واللي ماترضينه على نفسك.. لاترضيه على غيرك..
توسعت عيون بلقيس:الله أكبر.. الحين تحسسوني اني باكل حق اليتيمه وبحرمها من اخوها..
مهره ضربت كتفها:ماعليك منهم..جلديها.. لاتخلينها تلعب عليك..
جمان:ياشيب عيني يافارس.. يمه انا اقول رجعي ولدنا بحضنك..عشان نطمن عليه.. لاتخلينه تحت رحمة هالقشرا..
مهره بنص عيون وهي تسحب الدله وتصب:
فارس.. بعجنه اليوم وامصع اذانه.. يصبر علي..
زينه وهي تضحك:
وش فيك عليه.. شمسوي..
مهره بنص عيون ترتشف من القهوة..
زينه بنظرة عميقه لها:انتي وش فيك.. ما انتي شليه.. بعيد عن فارس والمزوح.. وضعك ماهو عاجبني..
مهره رافعه حاجب وترتشف قهوه:
ليش وش فيه وضعي.. ترى انا من جيت من المالديف والايجابيه عندي مليون..
ابتسمت لها وعينها بعينها تعلم ان مهره متوتره:الله يزيدك من الايجابيه.. ويطمن قليبك ياخيتي..

بعد شوي جاهم صوت سيف وهو يطق الباب:
يا ولد..
زينه  خذت شال حطته عليها..
ومهره خفق قلبها مع الصوت..
وسبت نفسها.. الحين زعلانه عليه وشهولا هالرعشه لمن اسمعت صوته..
وبعدين ليش ماتدخل مع زينه في شالها وتختفي عن عيونه..
ودها حطت رجلها وعثرت لزينه.. وقت قامت من جنبها.. يعني بتفضي المحل له عشان يجلس..

مهره بحقاره شالت ديم اللي تلعب في بيالة شاهي.. وهي تدقدق خواصرها وتقول:
انتي ماتقولين لي ليش انتي عسل كذا..؟!
ديم تضحك:انا مربى.. انتي العسل..
جلستها جنبها مكان زينه:آكل لسانك آكله..
سيف انتبه لها ورفع حاجبه..

جمان وبلقيس قاموا سلموا عليه.. داعب بلقيس وقرص خدها:
محلوه مع العرس يالنتفه..
بلقيس ردت بتكنيشه:بالله..!
قال :ياحظه هادي فيك..
وانحنى يبوس راس امه والقى السلام على زينه:اخبارك يا ام سعود..
زينه:بخير.. جعلك بخير..
وانتهى من سلامه بقبلة راس لمهره اللي جالسه ومتشاغله مع ديم..
ارتجفت.. لكن مارفعت عينها.. وهو يجلس جنب جمان..اللي  حركت حاجبها وبخفوت ميلت راسها:
واضح انك مزعل الحلوين..
سيف بخفوت وثقل:
تدلع..!ولامافينا شي..
جمان بنفس الخفوت:والله لو انك مو غلطان فيها.. مادنقت وبست راسها..
سيف بتحذير:جمان..!
قاطعتهم موضي وهي تسولف لسيف.. وسيف يندمج معها بالسوالف..
ومهره حاولت تبدي ان مافيه شي..
بس تتذكر حركاته وغموضه.. غيابه الغريب.. واللي واضح بيجيب العيد باسبابه..
وتصد تلتهي بأي شي..
جمان لكزته بكوعها:
انت ماتستحي.. الحين هالعيون الشواهين تزعلها..
سيف ابتسم واخفى ابتسامته وطنشها.. مارد عليها..
جمان تتحلطم وهي حاطه كفها فوق فمها:
انا دارية.. انت نوف وهيا ويخبون عليك يالجاف.. قل لها شي.. داعبها.. اكسر الزعل والحاجز ياحظي..
سيف يمد الفنجال لبلقيس وهي تصب..
ومطنش جمان..
مهره قامت من المكان.. وراحت المطبخ.. واقفه تشرب ماء بتوتر..
كل شي فيها يتواكل..
هو من غيابه طول اليوم..
ولا من سيف الصغير.. ماحصل تكلمه من امس..
وحتى يوم اتصلت..
ماحد رد عليها وطمنها...
وسيف الحين.. باس راسها وجلس.. وتجاهلها تماماً..
هو افضل يتجاهلها..
لأن لو كلمها هي بتتجاهله..
احيان تحس انها ماتفهم سيف ولاردود فعله.. ولاتصرفاته..
كانت مواجهه الكاونتر وتشرب من الكاس وترجعه.. لمن حست فيه يدخل وبخفوت:
تراها ماهي حلوه الزعله ياقلبي.. ماحبيت ان جمان تلاحظ وتحشر لي بالكلام..
التفتت وبنص عيون وهي تشرب من الكاس:
انا طبيعية.. انت اللي فوق راسك البطحا..

رفع حواجبه..
هو جايها يعاتب ومع نظراتها الطفولية ووقاحتها لقى نفسه 'يخق'..

حاول مايبتسم وقرب منها:
المفروض لو صار شي بينا.. يظل بينا مو حلوه نحسس اللي حولنا بشي..
مهره بلامبالاة : ماقلت عند احد شي.. ولاحسست احد بشي.. انت جيت تحب راسي.. ناوي يعني تربكني.. واقوم اعطي نظرة حياء.. وتبوسم كني مب زعلانه.. لاعيني ..ماتلوي ذراعي ببوسات راس عند اهلك..

قالت كذا وتكتفت واسندت جذعها..
رفع حاجب يراقبها والواقع ان مهره تلعب على اوتار حساسه بهالنظرات..
قرب منها وحط كفوفه على الكاونتر وهي بينهم:والله شايله يابنت غازي.. كبر خاطرك على شي مايسوى..

عينها على ازرار ثوبه.. ماتبي ترفع راسها وتلتقي عيونهم:
والله لما تقول لي انك في دبي.. وتطلع بجده.. المسئله فيها انَّ.. ولما اشوفك تكلم.. مكالمات غريبه وسريه وحذره.. اعرف انك مخبي بلاوي.. ولاتقول شغل.. اعرف شغلك المعتاد.. وانت تكلم آرثر.. ياسمين.. وحتى وليد وماريا.. انا ماجهل شغلك في المعرض ولا الورشه.. ولاحتى المزادات.. بس الوضع المشبوه ذا.. يذكرني بسالفة اللوحه بفرنسا..
نزل راسه عند اذنها وهمس:
كلها شغل.. مافيه شي مشبوه.. ولافي شي خطر.. انتي بس لاتخلين الشيطان يلعب عليك..
دفته مهره بعصبيه وبخفوت عصبي :
الشيطان عشعش بمخي.. انت مع الحق ولا.. لما انت تبطل عمليات سرقة او تزوير.. وتكون في صف الشرطه باوروبا.. وتجي هنا.. وتقول انك بمزاد بدبي.. الا تصير في جده.. وتواصلك الغريب مع هاللي اسمه طلال.. لاسمعت طشار كلام احس انك تغرد خارج السرب... في شي ماهو واضح.. وتجي تقول لي لاتخلين الشيطان يلعب عليك..

قابل ثورتها ببرود اعصاب ومسح على راسها بكفه:
اهدي ياقلبي.. احنا مو في البيت..
توسعت عيونها:سيف ماتقدر تقول توضيح  بسيط... تراي زوجتك..!!!
استمر يمسح على شعرها وبخفوت:
ماعندي اي توضيح .. في امور واسرار مايشيلها اثنين.. تفسد..
رفعت عيونها له وبحزم وصوت خافت:
دام كذا ..اجل ماعاد لنا ببعض حاجه..
عقد حجاجة:
وش قصدك..؟!
مهره وهي تحدق بعيونه وبهمس لاذع:
نطلق.. وكل راس يرتاح من وجعه..
مسك خصلاتها بقوه وحدق في عيونها:
والله لو جرت هالكلمه على لسانك ثاني..لايصير شي مايعجبك يامهره.. لاتخلين شي تافه يخرب بينا.. اعقلي وخلك اكبر من كذا..

عيونها لمعت بدموع وقبل ماتعاتب وتتكلم.. باسها وسكتها...
نزلت منها دمعه حاره..
خايفه عليه.. بجنووون..!!

حسوا بصوت احد يدخل المطبخ.. وتو مهره بتجفل تبعد.. ضمها..
وبحنيه يداعبها مغير الموضوع اللي يتكلمون عنه:
ماعليه هانت.. ترى راح الكثير وباقي القليل.. انتي قومي بالسلامه.. وكيفك سوي عملية تجميل لبطنك..
انصدمت مهره وزين ماعضت كتفه.. كيف حول سبب زعلها لموضوع تافه حيل..

وصوت موضي وهي تشيك على العشاء :
هذا اللي شايله همه.. لاتخافين يا أمك..تروح لاولدتي.. مشد ورياضه وتنمسح الكريشه..

دفته..
وعطته نظرة انها بتذبحه.. وهو غمز بعينه..
بعدت مهره عنه:صدق امي..؟!
هي :ايه.. هذا انا علي خمسه والحمدلله.. شوفيني غزال.. انتي بس لاتفكرين بهالشي.. فكري باشياء حلوه..
سيف:انا بطلع المجلس.. عجلوا بالعشاء يمه تراه دوخنا الجوع..
موضي بحنيه:يخسى الجوع يا بوي.. يلا ربع ساعه ويطيح العشاء..
هو يتوجه لباب المطبخ الخارجي:ع القوه ياعينه..
وطلع..

ومهره تنظر لمكان اختفاءه..
'واكثر ما أخافه مصير اسود.. وظلام.. ماذا لويحدث له شيء؟!.. كسوري مضاعفه.. بفقدأبي.. وامومتي الناقصه لسيف.. وهاهو ذاك الشاهق في روحي.. يعبث متجاهل اني اموت دونه..!'

*****

مشاري رجع راسه على ورى وبنبره مخنوقه:
ابوي شعره ويجن.. تصرف سما ماعملنا حسابه ابد.. ان جيتي من وعدنا لسيف.. ولا من تعلقنا فيه وبالذات ابوي..
مسك جبينه بقوه:
ماعمري شفته بهالحاله..
خذت ياسمين الكاس من يده.. حطته على الطاولة ومسكت كفه:
سما ماراح تبعد كثير.. بترجع.. وهي اللي بتقول اخذوه لاهله.. سما مهما ابدت من مشاعر.. بس الواقع ماتتحمل.. ولاتحب تكون مسؤولة وانانية.. هي حبت الوضع وانتوا كلكم تشاركونها مسؤولية سيف.. بس لحالها ماتقدر..

مشاري بتعب وهم:
خايف على الورع والله.. جيسي.. سما لو جاتها نكسه في نفسيتها تنسى نفسها في الاكل والشرب.. انا اخلط لها الحليب والشوكلت واجيبه..كيف بالله لو يلذع عقلها.. ولاتشرب ومعها هالصغير.. هذا المجنن ابوي..

خذت بالشوكه قطعة من الاكل قربتها من فمه.. لانها شايفته طول اليوم ما اكل:
بتلقونها مشاري.. اكل عشاني.. واترك هالكاس لان ماراح يحل شي..
بضيق صد بوجهه: ياسمين.. تكفين..!
مسكت ذقنه ولفته وحطت القطعه بفمه:
ماهو على كيفك..
وبصلابه:العم راجح قوي.. وعنده معارف ومصادر.. بيجيبها وانت خلك رجال وقف معه.. لاتحرق نفسك في شي لايودي ولايجيب..

ابتسم بعيون ذابله:
والله تعودت عليه.. كيف سما تهرب به كذا.. مايحق لها والله..
كانت فاتحه شاشة جوالها..
لما انتبه وعقد حواجبه واسحبه:
انتبهي تقولين لسيف شي..
هتفت:ماراح اقول.. خبله انا..
هو يمشي صبعه ع الشاشه:
انتي كلش توصلينه لسيف عارفك..
سكت فجأه وهو يناظر الاستديو المفتوح.. كان مليان صور له ولايدري متى التقطتها..
ناظرها بصدمه..
وهي اسحبت الجوال برتباك من يده:
أكل مشاري.. عشان نمشي.. تأخر الوقت..
ناظرها وهي تناظر الجهه الثانيه وضامه كفوفها..
مخه مشوش..
تعبان من الوضع اللي هم فيه وعصبية ابوه..
كلمها هي..
يوم حصل له وقت باخر هاليوم الثقيل..
ماكان يبي يشوف الاياسمين..
'هناك اشخاص نتقبل ان يرونا.. في بؤسنا.. وسؤنا وحين يدنو منا الألم.. ياسمين تستطيع ان تسمع مني موجات مكثفه من الهموم والشكوى.. وحتى التفاهات..
ياسمين تعارض شربي لكنها الوحيدة التي تتحمل مزاجي السيئ لو اكثرت..!
الوحيدة التي اتقبل منها ان توقفني عن الشرب وتأخذ الكأس..
لو حاول غيرها..
سيكون عليه تحمل محتوى الكأس في وجهه..
لما صوري بكثرة في هاتف ياسمين..!
ولما اصلا ً صورها تملئ هاتفي وهي لاتدري..
الواقع اني مهوس بجمال ياسمين ولونها..
على مايبدو لدينا نفس الهوس..!. '

همس:جيسي..؟!
التفتت ببطء:وش؟!
بعيونه الذابله ومخ شبه واعي: احب عيونك.. لاتناظرين بعيد.. ناظريني انا..!
حدقت في عيونه..
واطلقت تنهيدة حاره

*أنتِ الملاذ لغربتي لا من شعرت إني وحيد وأنتِ البلاد الامنّي اتوه ألجالها * "اقتباس"..

*****

دخل راجح مكتبه فالبيت..
مسك راسه وضغط على جبينه.. فك ازرار قميصه..
وارتمى على اقرب كرسي..
زفر واليوم مر في بحث عقيم عن سما..
اعتدل وهو يسحب سيجار يحطه بفمه..
وتوه يدور الولاعه..
طاحت عينه على سيارة صغيرة على الأرض..
ليداهمه صوت سيف:جدي.. شف المبرديني.. حقتي..
ترك السيجار وقام التقطها من الأرض وبخفوت:
كنت شايل هم روحتك عند عمامك.. مادريت ان البلاء اللي تنام في حضنها كل يوم.. مير الأوله امان ياجدك.. بس امك هاللي عقلها ضارب..بتحفظك..؟!
آااه ياجدي كانك غصه بالقلب توجع..!.
شال السيارة.. واودعها رف مع مجموعه اثرية..
وظل يناظرها..
تأثير غياب سيف وخوفه عليه.. يستفحل داخله..
مايثق بسما ابد..
ولابتصرفاتها.. ولابطريقة تفكيرها..!

*****

بعد مارجعوا من بيت سعود..
ولحظات الصمت في السياره..
مهره صعدت..
وهو ظل تحت..
يدخن وجالس على كرسي الحديقة..
لمن دخل فارس بسيارته ووقفها..
نزل:فكرتك نمت..
سيف بهدوء:معودك انام قبل تحضر..
فارس:شدعوى يبه ترى بيت ابوي سعود قريب.. وقلت لك بخلص الفلم مع نواف واجي..
طفى السيجار:
وانا ماعجلتك.. بس ماعرف انام الا لاجيت..
فارس ببتسامة ينحني يضمه ويبوس خده:
ياجعلني فدا مواطيك يابوفارس..
قام معه وهو يداعب شعره ببتسامة باهته بدون تعليق..
دخلوا الفيلا..
سيف:قفل الباب معك..
فارس قفل والحقه على الدرج :
يبه وش فيك مع مهره..؟!
ابتسم وهو يصعد معه:ليه قايله لك شي..
فارس مد شفته:
لا.. صرت اعرف مهره حتى لو ماقالت شي انت اختفيت طول اليوم وهي تتواكل.. وحتى يوم دقيت العصر ماترد علي ولا المغرب.. مشينا بيت ابوي سعود وانت ماترد..
سيف:هذا انت تقول دقيت.. هي ماكلمتني..
فارس مسك ذراعه وهم بالصاله العلوية:
ترى هي تحدني وتلح وانا اتصل.. حتى واحنا بيت ابوي سعود.. ماهجدت الا يوم صورتك لها بالمجلس وانك وصلت..
حرك حاجبه: اهاا.. يعني كذا..!
فارس :يبه لاتصير انت والزمن عليها .. يكفي ورعها البعيد.. والله تكسر الخاطر.. وكله تحاول تبين عكس اللي فيها..
سيف رفع راسه وضغط جفونه باصابعه وزفر:
وش تبي هالحين يافارس..؟!
فارس:تراضيها..!
سيف بضحكة خافته مرهقه:
ماتبي..!هي ميبسه راسها علينا..
فارس:انا مدري وش سبب هالزعل.. بس شف خاطرها.. يعني يبه انا بعلمك.. انت سيد الفاهمين..
سيف باس راسه :
لاتفكر فالموضوع..تصبح على خير ابوي..
فارس: تلاقي خير..

سيف وبعد مادخل الغرفة..
القى نظره على مهره النايمه او تتظاهر بالنوم..
ماقال شي تركها وراح دورة المياه..
مهره شارده بعيونها بالجهه الثانية.. تستشعر حركة جنينها.. اللي شكله مو عارف ينام.. ولايرتاح من قلقها وتوترها..
حست فيه وهو يجي جنبها ويدخل بالمفرش..
ولا التفتت..
القى نظره عليها..
ببجامه حريريه سوداء وشعرها ع المخده.. كيف يقاوم زعلها.. انحنى وباس ذراعها وهمس :
ترى كثر الصد.. يولد الجفا..
مهره بهمس :وكثر الاسرار.. تولد الشك..
اسند كوعه عند راسها وصار قريب منها :
مهره.. ترى الشغل اللي انا فيه قانوني.. ويخص طرف من امن الدوله..
عقدت حواجبها وهي تسمع له بدون تلتفت.. وكمل:
انا دوري يخص مجالي.. ولأنها عمليات سريه.. صعب اصرح فالشغل.. ولاتقولين انت مو ضمن الأمن.. انا اقدر افيد وماراح ابخل بهالشي.. تذكرين يومك تبين تعلقين لي بروش باليوم الوطني.. تذكرين وش قلت لك..انا حبي للملكه ماهي بعلم اشيله ولا بدبوس اعلقه بجيبي.. واصباغ ارشها على سيارتي.. انا دمي مقدم لهالديره.. واي شي اقدر اسويه راسي يفداها..

ظلت تسمع له وهو يداعب ذراعها بانامله :
مارحت دبي..كنت بجده صدق وكنت هناك عشان افحص عقد على انُ اثري.. مستخدمينه بعملية غسيل اموال.. والنتيجه العقد مزور.. انا لاسويت الشغله هذي.. تظنين فيها خطر علي ولاعليكم...؟!

انقلبت على ظهرها:
يعني بالله عليك سيف مايجيك شي من ورى هالأمور..
ابتسم واشار بالنفي:مايجيني شي بأذن الله..لاني شايل سلاح واحارب بالميادين..ولا احد يمسك علي ممسك.. شفتي احد يتقصد صايغ ذهب.. لاشيك على القطعه ان كانها ذهب ولافالصو..

مهره بنص عيون على ذبته الساخره :
والله صايغ الذهب.. بيشيك معضد ولا حلق ملحوش بدرج عجوز ميته.. ولا لاقينه طايح بالشارع.. ماهو عقد المفروض بملايين.. ومزورينه رواعي مخدرات وغسيل اموال..

ضحك بخفوت وهو يداعب شعرها وخدها:
كلها نفس الشي..
مهره ترفع يدها لخده :
لاتوجعني فيك ياسيف.. ترى هالقلب ماعاد به طاقه..
باس انفها وهمس:لاتوسوسين..الوضع ماهو صعب مثل مارسمه خيالك..
طوقت رقبته بذراعينها وضمها.. خبت وجهها عنده :
مدري وش بعد ينتظرني من عذابكم يا السيفين..
عقد حجاجه:
ليه ماكلم سيف اليوم..؟!
مهره بهمس:لا.. ولاحد رد علي.. بس قلت يمكن نفس هاك اليوم يوم طلع مع بومشاري على اليخت.. كان مافي ابراج..
عقد حواجبه اكثر.. وهو يربت على ظهرها وبخفوت:شكلُ كذا..!!

*****

بعد صلاة الفجر..
سيف طلع من المسجد وراح يمشي متوجه لبيته القريب.. وهو يتصل على احد الأرقام..
رد:هلا يابوفارس.. أُعذرني يابه..
وقف سيف وبعصبية:
وش صاير ياهاشم.. اتصلت علي امس واختفيت.. صاير شي ..
هاشم :شگلك..اريدك تهدا.. وماطيش..
سيف بعصبية:وش.. تكلم.. راجح تورط مع منصور من جديد.. تكلم هاشم.. انا عارف ان ورى غطستك بلاء..
هاشم:لا الموضوع ماله علاقه بمنصور.. باوع.. هاذ الله يسلمك.. سما.. لحشت الولد سيف وهُربت بيه.. لوين..لهسا ماعروفنا شي..

توسعت عيون سيف:ايـــش..؟!!.. شلون يعني.. ووينكم عنها.. ومن متى ومن معه..
هاشم:اهدا بوفارس برضاي عليك عيني.. كافي عمي ابو مشاري شوي ويوقف قلبه.. من تصرف سما.. اگلك طلعت بيه ع العصر هيج.. جان ودها تمشيه بالبستان..والبنت راحت ولارجعت.. تگلك فص ملح وذاب.. اتاريها مبيته الَّنية.. وتاركه مكتوب وشارده..
سيف بغضب وعصبيه:
والله لا احرقها هي وابوها .. انا مأمن عندهم ولد اخوي ماهو قطو ياهاشم..كيف تركوه معها..!!!
هاشم :ابو فارس انتبه لكل خطوة تخطوها.. ماتنسى انا معك بس مو ضد عمي راجح.. ماريد تلوي ذراعه بشي احنا تسترنا عليه..

سيف كان دخل سور بيته.. ومن بين اسنانه:
والله.. والله لو ماطلعوا سيف.. لاانسف بكل مبادئي والعشرة.. واقطع كل المواصيل اللي تشفع..
هاشم بعصبية :ابو فارس.. مو هيج.. لاتخلين اندم وصلت لك هاي الخبر..
سيف :انا بجي خلال هاليومين.. وقل ان شاء الله توصلون لسيف قبلها.. ولا بتصير علوم ماحد حط لها حساب..
وقفل الجوال..

تمتم بغضب وذهول: الله يلعنك ياسما على هالفعله السوداء..
شب سيجار وهو يتصل على وليد وماريا.. بس مايردون..
ارسل رساله لوليد :(انتبه لجواز سيف واوراقه.. انتبه تعطيها  او ياخذها احد منك لأي ظرف..الكلبه سما انحاشت بالورع.. ان اطلعت من بريطانيا الجن الأزرق ماراح يلقاها)..
ارسلها ورمى السيجار وداسها..
ودخل البيت..

وش هالكارثه.. طيب واللي احترق جوفها من فراقه.. ووعدي لها..
كيف لوطالت المسئلة..
وخلال ماهو واقف محتار..
جاه صوتها الهادي على الدرج :
سيف..!
رفع عيونه لها وهي تنزل.. عليها شرشف الصلاة.. منزلته على كتوفها..

'تتهادى في قلبي والله..
كفاك يادنيا جرحاً.. في انثاي الأثيره.. '
ابتسم وبخفوت:كنت بجي واصحيك تصلين.. شكلك صليتي وخلصتي..
ابتسمت:حسيت فيك وانت تسكر الباب وقمت.. شكلك مانمت صح..؟!
خذها لحضنه وباس جبينها:
لا والله مانمت..
عقدت حواجبها:سيف ..وش فيك ..؟!
ابتسم :وش فيني..؟!
بشك:مدري.. كنت عند البلكون وشفتك دخلت السور وتكلم احد.. ماسمعت.. بس باين انك معصب..
رفع حواجبه:اشوفني صاير تحت المجهر يابنت غازي.. وتراقبيني من الدرايش والبلاكين..
ضحكت:والله مو قصدي.. بس كنت افتح الستاير.. عشان الشجر الداخلي وشفتك..

راح معها  الدرج وهو محوطها بذراعه:
تعالي ننام واتركي الهروج ..

*****

منصور يدقق في الشاشه والمقطع اللي قدر يوصل له اخيراً:
وهذا نفسه.. هو سيف خوي راجح  و مشاري..
رائد:ايه.. واخو نسيبهم اللي تزوج بنته ومات..

منصور بتفكير:يعني الورع الصغير اللي شفته مع راجح باليخت.. يصير هالكلب عمه..
رائد:عليك نور..
منصور:اسمع يارايد.. ابيك تعرف لي كل صغيرة وكبيره عن ولد هالحرام.. والولد الصغير.. حطوا عينكم عليه.. لانه الحجر اللي بيصيد لنا كل العصافير..
رائد مد شفته:هالوقت صعبه.. من مصادري.. عرفت ان البنت مختفيه بورعها.. وراجح قالب الدنيا ولاهو لاقيها..
منصور بتهكم:راجح مايلقاها.. ماهو منصور..!

'وكان المقطع اللي طاح عليه بعد شهور من البحث.. سيف وهو يفحص اللوحه في المعرض'

******
اتمنى البارت نال على رضاكم واعجابكم..
وقراءة ممتعه لكم..!

اقترب وداع الروايه وابطالها..
فالبارت القادم (الأخير)..
كونوا بخير..

ايمان يوسف