رواية مبعثر فيك ماللحزن لايشفى الفصل الثاني 2 - بقلم ايمان يوسف🕊️

البارت الثاني

اوجعني قلبي .. كيف سيف في يدينهم .. خايف من دموعهم .. وشمهم وبوسهم ...موضي ضمته بنهيار وبكاء :
يابوي .. ياعساف .. ياقلبي يمه..
سيف : بشويش يمه .. خوفتي الورع ..
موضي تناظر وجهه .. وتضحك : يازينه .. يمه ياجمال عويناته ..
انصدمت مهره لما ضحك ولدها مع ضحكات جدته ..
جمان بضحكه : يمه مبسم عساف .. شوفي خشمه .. ياويلي .. نسخه ..
مهره عيونها امتلت دموع .. حست ولدها بعيد .. وكنهم خذوه منها ..

سيف انتبه لعيونها .. وهي تهل دموع وتبلل نقابها ..بدون ماتحس..
عقد حواجبه .. وخواته لاهين بسيف .. مر من وراها وبخفوت : مهره .. وعدتك .. ماحد ياخذه منك .. امسحي دمعك ولاتبكين ..
مسحت دموعها بسرعه .. وبكذب: مابكي والله ..

وجاء صوت سعود ..وبصوت يتهدج :هو صدق كلام بلقيس ..؟!!!!
موضي بفرح :
تعال ياسعود .. تعال وشوف فضله ورحمته .. من قال بنشوف ضنا عساف ياسعود ...

راقبت ذاك الأب .. كيف يسرع بالعصا .. نحو ابني ..وشيباته تبتلع دمعاته .. اللتي والله قتلتني ..
حين يذكره عساف .. لايذكر الا قسوته ..
وجبروته .. وسطوته ..
لاأدري مالحقائق ومالزيف .. !
من الظالم ومن المظلوم ..
عساف .. ماذا كان يريد بالضبط .. ولما فعل كل ذلك ..لما اختار الغربه والوحده ..
وعائلته تكاد تسجد لابنه الآن ..

بعد قليل .. وبعد كم هائل من الترحيب بي .. والتعبير عن فرحتهم بلقائي انا وسيف الصغير..
حاولت ان اتعرف على الاسماء بدون السؤال .. واوضح اني اعرف ان لديه اخت اسمها جمان وبلقيس ..
وانا والله لتو ادري ..
فقد كان عساف .. لايأتي بسيرة احد امامي .. فقط اعرف ان والده اسمه سعود .. واخاه الاكبر سيف ..
وعرفت سيف لما جاء بيسمي سيف ولاقبلها ماكان يطريه ..
عساف كان غريب .. غريب لاقصى حد ..
سيف : مهره كلمي جدتك وطمنيها ..
مهره : ان شاء الله الحين اكلمها ..
وقف .. ومهره حست انها بتقوله (وين بتروح ..؟! )

لسى ماخذت على المكان .. مرتبكه .. مانطقت .. بس سيف تكلم : بصعد ابدل .. وبروح بيتي .. الله الله بمهره ..
موضي ببتسامتها الحلوه: افا.. بيتها ..في عيوني والله..
جمان رفعت حاجب وبسخريه : من ليلته اليوم الاميره نوف .. ولاالملكه هيا .. ولا في شي جديد ماندري عنه ..
ناظرها بنص عيون :
والله في رد في خاطري .. بس خليني حاشم هالضيفان ..
وراح متوجه للدرج ..
موضي بخفوت : جمان ووجع ..
بلقيس : ماتوبين .. والله نسيتي يوم كب الماء في وجهك ..
سعود  باين في عالم ثاني مع سيف الصغير .. ويلعب فيه ويداعبه ..: شوفوا احسن غرفة وعطوها للامير سيف وامه .. ام سيف .. خلهم يرتبون المكان .. للشيخه مهره ..

بلعت مهره ريقها : يعطيك العافيه عمي .. عادي لاتكلفون ..
بلقيس : وش فيك لابسه نقابك .. شيليه راح سيف ..
مهره بربكه : ها .. مادري .. يعني ..
وكنها تقصد سعود ..
ضحكت موضي : سعود ابوك  .. ابو زوجك يابنتي .. افتشي .. خلينا نشوف .. عساف من خذ واختار ..

سيف كان بيدخل غرفته .. وانتبه انه نسى جواله تحت .. نزل وفي نص الدرج .. سمع عبارات الانبهار من امه وخواته ..
والواضح .. انهم يعبرون عن جمال مهره ..
موضي : بسم الله تبارك الخالق .. وش هالزين .. وش هالملح ..
جمان : تجننين .. يازينك ... لاله الا الله ..
بلقيس : تهبلين يامهرة ..ليت سيف طلع يشبهك .. ههههههههههههه.. ماله حظ .. لو ماخذ هالعيون العسليه .. كان طلع مززز ..
مهره وردت خدودها .. ومره استحت : عيونكم الحلوه والله ..
موضي بضحكه وكانها تكلم طفل: ياربي على اللي استحوا ..سلمهم ياناس  ..
مهره حطت كفوفها على وجهها : لا عاد مو كذا.. مره لا  ..
كلهم  يضحكون ..
سيف ..
زفر بعد الكلام اللي اسمعه .. ورجع غرفته .. فوق ..!

****
دخل غرفته .. رمى شماغه على السرير .. فتح ازرار ثوبه ..
دار بعيونه في الغرفه الواسعه .. الفخمه .. واناقة كل قطعة اثاث .. وجمال كل لمسه ..
لكن استقرت عيونه على الصوره في البرواز .. هو بالبشت وجنبه نجود عروسه ..
توجه للصوره ..

واصوات ترن في اذنه (بزارين .. تزوجونهم .. ) .. (دامه يبي بنت عمه .. اعين واعاون .. ازوجه حتى لو انه ببتدائي ..).. (نجود رضوا ..) (الله .وناسه.. متى الملكه )..

صياحه:(شااااهين خفف بعيير ).. صرخة شاهين (بننقلب سيف بننقلب ..) وصرخت نجود (سيييييف..!!)..
وتظلم الدنيا.. مع تلك الانقلابه .. وتظلم اكثر بعد افاقته من المشفى ..
حدق في عيونها في الصوره .. وبحجم حزنه تكونت غصه .. ثم دمعه ..
ويدينه على الجدار .. وفي مجال حضنه الصوره ..
مُبعثر فيكِ ما للحزنِ لا يُشفى
كأنَّ عينيكِ لا أرضُ ولا منفى..

*****
بعد شوي .. بالصاله ..انطباعي عن العائله انهم جداً جميلين .. وطيبين ..
كذا احتواني بشكل .. وماحسسوني اني غريبه .. ولاحسيت بغضب او نفور من فكرة زواجي بعساف من غير علمهم ..

ويمكن هالشي جاء .. ان عساف توفى .. ومافيهم قلب يغضب عليه واهو تحت رحمة ربه ..
امهم مره تجنن .. وباين ان سيف طالع عليها حيل .. وماخذ من تقاسيمها الجميله .. هو وبلقيس .. جمان تشبه عساف ..  كان وسيم بسمار .. اقرب لابوهم ..
بوسيف جاله اتصال وراح مكتبه  بالدور الارضي ..

كنت اجاوب على سؤال جمان : إحياء .. تخرجت وتزوجت على طول .. الى الان ماتوظفت ..
ابتسمت : يعني تبين تصيرين معلمه ..
مهره: مادري .. ماعندي ميول تدريس .. ممكن اشتغل بعياده بيطيريه .. او حتى في مختبر جامعه .. شي .. بس ماحب ادرس .. مع ان جديده حلمها بالحياه .. اصير معلمه ..
موضي : ياحليلها جدتك .. من طاريها ودي اشوفها ..
مهره ضحكت بتسليك : هي مره كيوت .. بس حادة الطباع ..
موضي : عصبيه ..؟!
مهره : يعني ..!! تقدرين تقولين ..
جمان : عندنا وعندك خير .. جدتي ام ابوي.. تقولين لك ضابط .. اعوذ بالله .. من تجي فيذا .. توقف الكل على رجل ..
بلقيس : واضح ان الجيل القديم .. ممشين رجالهم صح ..
موضي : اففففف .. خليني ساكته مابي اطيح هيبة جدكم ..
ضحكوا البنات .. وجاء صوت سيف .. يتنحنح..  مهره .. تغطت بالشيله ..

سيف الصغير .. كان يلعب مع بنات جمان .. في جهه من الصاله ..
نزل ...امه بحنية : تعشى يمه .. وين بتروح ..
سيف وهو يدور جواله على الكنب : عوافي ..يمه ..
موضي: وش تدور ..؟! ..
سيف: جوالي ..
مهره رفعته من جنبها : هذا .. ؟!
جاء ناحيتها : ايه هذا اهو ..
خذه..
وتوه بيطلع ..رجع : فارس وينه ..؟!
موضي : على جيه .. كلمته من شوي .. (رفعت الام  عيونها له .. ولاحظت ضيقه من نزل ..وحتى خواتها من صمتهم .. واختلاس النظر له باين .. فيه شي ..)
موضي: خليك يابوي .. دامك ضايق .. لاتزيدها على نفسك ..
رفع راسه وزفر بغصه :
من قال متضايق .. عادي .. اروح عند نوف .. وماشاء الله مع بربرتها .. تنسي الواحد اسمه ..
جمان بضيق : ايش جلد هالذات ..ياخي اصحى ..
خزها وبحده : جمان ..!!!

مهره ( ارتجفت .. وبصراحه .. مادري شالسالفه .. واضح ان على سيف هاله وفوقه علامة تعجب ..لكن ..!!!
انا وش يدخلني ..) ..
موضي : طيب خلك بيجي فارس ..
راح ناحية الباب : بكره اشوفه .. سلام ..
قال كذا وطلع ..
موضي بخفوت وعصبيه: جمان .. لاشفتي اخوك كذا .. قفلي حلقك وابلعي لسانك ..
جمان بقهر : يعني انا اللي ازيده .. مقهوره عليه وقلبي واجعني .. بدل ماياخذ وحده عدله تنسيه .. نجود .. كل شوي ماخذ سلوقيه ..يطقطق معها .. ويطلقها ..
بلقيس : طيب لاتستغيبينهم .. عيب ..وش سلوقيات ذي ..
جمان بتهكم : اجل مسيار ..لو انها وحده عدله مارضت ..
بلقيس : يخرفنهم اخوك .. بهالزين .. والماده ويرضون ..
جمان : ويه مالت على هالزين اللي فنى .. مضيعه على زويد وعوير واللي مافيه خير ..
موضي : اسكتي انتي وياها فشلتونا مع مهره .. ماتحشمون ..
مهره ضحكت بربكه : عادي خالتي .. خذوا راحتكم ..
جمان : يعني يمه مهره .. اكيد عندها لمحه عن حياة الشقا تبع سيف .. ماتوقع الله يرحمه عساف .. ماقال .. لها ..
قبل ماتعلق مهره .. احمدت ربها انفتح الباب الخارجي ..
ودخل منه ولد عمره ١٦ تقريبا ً .. وتو مهره بتتغطى .. كلهم : خلك عادي .. ذا فارس .. توه ثانوي ..لايغرك طوله ..
مهره .. مستغربه .. وخاصه جدتها كانت قفل حيل .. وحريصه ..
وهالعايله مره .. فري .. والله يستر من القادم ..

ابتسمت .. وهي تشوف فارس .. يالله .. يالله .. الولد يجنن ..
نحيف .. وشعره ناعم وكثيف بقصه حلوه .. عيونه واسعه .. ولابس كات وشورت .. وعليه ايشارب ريال مدريد ..فارس يشبه الأم وسيف .. كثير ..

قبل يسلم .. توسعت عيونه .. وهو يشوف سيف الصغير .. شهق :
والله صدق .. بسم الله الرحمن الرحيم..
بلقيس تضحك : قلت لك .. بترتاع .. نفس عساف ..
جثى .. عند سيف اللي طالعه باستغراب .. وبانفعال :
الطغااااااه ... لايموووتون .. عساف .. طلع من جديد ..
وصرخ بانفعال ويسوي نفسه يبكي .. سيف الصغير صقعه على جبهته باللعبه .. وهو يقول : تب .. !!(شب)
البنات يضحكون..
مهره بإحراج : لاسيف امي عيب .. حب عمي ..
فارس يسوي نفسه يبكي : ورب الكعبه تأثرت ..هذا الجرو من ذاك التسلب ..
موضي : فارس استح .. تزعل امه شفيك منت على طول ..مهره تراه يمزح.. هو فارس شيطان ..
مهره ببتسامه ومكيفه عليه:بالعكس  خليه ياخذ راحته ..

فارس يناظر جواله .. ويعدل وجه سيف .. اللي عاقد حواجبه بغضب ..ومصع خدوده: يازينه .. ياجماله .. ياحلوووه ..
جمان : ياخي روعت الولد .. وش تبي فيه ..
فارس : بصوره .. ارسله لنواف ..اصدم عيشته ..بس ماش .. مايبي يبتسم ..
مهره : صوره سلفي وحط فلتر .. يعجبك ..
خذه فارس ولصقه عنده ورفع الجوال : يلا يلد سلفي .. سلفي ..
سيف عطى ابتسامه فتاكه .. مع فلتر الكلب اللي حاطه فارس ..
وطلع لسانه .. ..
عماته انصدموا وجمان : ياويلي ..طلع لسانه بعد ..
بلقيس تخرفنت: كيوووووت ..
فارس باس خده  بقوه .. وقام وراح صافح مهره : اخبارك ام سيف ..
مهره :يسرك الحال ..
راح بعدها عند موضي وعطاها حضن وظل ضامها وراسه على صدرها  : يمه .. من الظهر ماشفتك .. جاني جفاف عاطفي ..
موضي بعتب:خل الدواره تنفعك ..  ماتستحي ..
فارس ياخذ يدها ويبوسها : رحنا العصر منتجع .. وقضيناها سباحه .. برجع .. الا ابتدت المباراه وقعدت اشوفها مع الشباب ..

باست راسه : المهم .. الوقت قضيتوه بنظافه .. ومافي اشياء ماتعجب ..
رفع عيونه : افا عليك .. الله وكيلك مشغلين قرآن  .. وبعدها سمعنا قصص الانبياء من المغماسي..
بلقيس : ياكلب لاتمهزل .. والله ماورا قعدتكم نظافه .. واصلا ً ابوي قالك لاتروح المنتجع .. ايش وداك ..
فارس اعتدل :الثقه يابلقيس الثقه ..
جمان :والله ماضيعكم الا الثقه ..
فارس توتر .. وتغيرت ملامحه : لااد يكلمني كني فاسد .. بلاوي غيري .. مالي شغل فيها .. امي واثقه فيني .. وانا قد هالثقه ..

عقدت مهره حواجبها .. والواضح ان الشباب في هالعايله جايبين العيد بأشكاله ..
بس ياربي هالفارس كيوت .. ومستحيل عنده بلاوي ..
موضي بدفاع :حدكم عاد .. الا فارس ..بعد عيني ماتطلع منه العيبه ..
رجع ضمها : بعد قلبي يمه ..

*****
فتح باب فيلته ..ودخل .. اجواء رومانسيه ..
ونوف ماخلت شمعه .. ولا فواحه الامشغلتها .. ومحضره طاوله .. بعشاء من بره بس منسقته .. بالشموع والورد ..
كانت مستمره تشغل .. الشمع لما انتبهت لدخوله ..
وتركت اللي بيدها .. جات ناحيته : وحشتني .. ياقلبي ..
ابتسم وهو ياخذها في حضنه ..ونوف تحوطه بذراعينها وتلصق فيه اكثر ..
ضمها اكثر .. ويد على ظهرها .. ويد مغروسه في شعرها ..
وعينه على الاجواء اللي محضرتها ..
(اهرب من اختناقي .. واختنق اكثر ..)
نوف ترفع راسها وتناظره :كذا ثلاث شهور ماشوفك .. ماشتقت لي ..
باس خدها : لو ماشتقت لك ..ماجيتك .. ايش هالحلاوه ..
خفق قلبها .. بسعاده : صدق ..؟!
سيف .. يتأملها .. جميله .. وبيضاء .. وباين مجتهده .. في الميك اب .. وشعرها قصير وناعم ..
رفع حاجب : وشاكه بحلاوتك ..تجنين ..ياقلبي..
نوف .. وهي بين ذراعينه .. وعيونها على وجهه بسؤال يائس : سيف .. تحبني .. ؟!
تغيرت ملامحه .. وراحت ابتسامته ..وهو يناظر  عيونها بشكل مطول .. بعدين باس شفايفها .. وبهدوء : نتعشى ..؟!
تركها وراح ناحية الطاوله ..
وقفت شوي .. تحاول ماتنزل دمعتها .. ناداها : يلا حبيبي ..لايبرد الاكل ..
رفعت راسها .. وخذت شهيق .. ونفخت : تمام حبي .. جايه ..

****
تتقلب تحت البطانيه ..مو عارفه تنام .. الساعه ثلاث ..تغير عليها المكان ..
جلست .. بتصرخ تعبر عن توترها .. بس اسكتت .. وسيف نايم ..
الغرفه مره واسعه .. وفخمه .. واصلاً غرفة عساف ..
اختاروها لها .. ورتبوها .. ونظفوها .. سيف نام عادي .. واهي .. لا ..
كلمت جدتها .. وسندس .. وزينه ..وعطتهم كل الأخبار والمستجدات ..
بعدين الكل نام .. ومافي احد تكلمه .. متوتره .. وتحس عساف حولها ..!

قامت مشت في الغرفه .. ووقفت قدام صوره كبيره له .. تأملتها..
اول ماخطف عينها وسامته ..وسمرته الجميله .. واناقته ..
منطوقه .. وانُ بياخذها لامريكا .. كان مثل الحلم الجميل .. اللي بيطلعها من قوانين الجده .. وكبت المزرعه ..

لكن ..!!
طرى عليها بكاها : بتموت .. والله بتموت .. الدكتور قالك الكبد عندك تلفت .. عساف .. كل ادمان له علاج .. حرام اللي تسويه في نفسك وفيني ..
وهو يشرب والالم بادي في وجهه : ماقدر .. اموت لو ماشربه .. انتي مو فاهمتني ..مهره .. سامحيني .. حللني ..

*****
في طرف اخر .. ومن شرفة غرفته ..  جالس يدخن ..
ونوف نايمه .. الليله هاديه والسماء صافيه والقمره كامله ..
نفخ الدخان بشرود .. وعيون مهره .. قبل يمشي في باله ..
ليه حسها خايفه .. وكنها ماتبيه يطلع .. هو جابها .. لبيت ابوه .. ووعدها ..لكن من الوضع اللي صار .. وضحكة الكل بوجود ولد عساف ..بعد ماغابت بسمتهم مع عساف ووفاته ..
شكل بتصعب .. وبتتعقد .. والله يستر ..
ماسك جواله .. ومتردد .. هو تبادل معها الرقم .. قبل يطلعون من مزرعتهم ..عشان في نزلاتهم للاستراحات واذا احتاجت شي ..

طفى زقارته وشغل ثانيه .. يمكن نامت .. بس لو جات على توقعاته .. من شخصية مهره اللي استشفها بهاليومين ..
ماعرفت تنام ..
دق عليها .. وبعد رنتين قفله..
مهره التفتت بستغراب لجوالها  .. خذته .. سيف .. ؟!
غريبه ..
جاتها رسالة واتس : لو صاحية اتصلي ..
بلعت ريقها ..الطبيعي .. انها ترتبك ...
وبعد تردد .. اتصلت .. اجابها .. بصوته الرجولي .. العميق : مرحبا ..
بخفوت : هلا..
سيف ينفخ الدخان .. ويروح سحابه قدامه : توقعت انك صاحيه .. واضح مارتحتي في المكان .. والى الآن توسوسين ..
مهره : لا والله المكان مريح .. بس تغير علي المكان وكذا .. من جد .. مع ان سيف نام من زمان ..
ابتسم : هماني نمت في بيتكم .. وروحت بغيبوبه .. ماقلت تغير علي المكان ..
مهره بتنهيده: ماينام الا خلي البال ..
ضحك بخفوت ورفع راسه .. يداري الغبنه ..
مهره بنص عيون : ماقلت شي يضحك ..
سيف : طيب آسف ..ضحكتي واسحبها ..
مهره : سيف الانطباع اللي حصلته البارح ..من الجميع.. زين .. بس برضو يخوف ..
شرد .. والنتيجه هذي وصل لها قبلها ..
كملت : حسيت الكل تعلق بسيف .. وتشفقوا عليه .. وحسيت انُ رجع ضحكه غايبه من البيت من زمان ..
سيف مستمر يدخن : المتوقع كذا ..
ظلت ساكته .. مده .. وشردت ..
عقد حواجبه : مهره .. ؟! ..
بشرودها : همممم ..
سيف : انا وعدتك .. ماتثقين فيني ..
مهره: لا ما أثق .. وليش اثق ..يقولك.. انا واخوي على ابن عمي .. وانا وابن عمي على الغريب ..
ضحك  بصدمه : جاملي يابنت ..
مهره: انا ما اجامل .. انا صريحه .. بكره بس يقولون اهلك يبون ولدهم .. بتوقف معهم وتتركني ..
سيف : لاقالوا نشوف لهم حل ..
مهره بعصبيه :ياربي يعني بيقولون  شلون بنام الحين ..
سيف ابتسم : نامي .. ومالك الا اللي يسرك وانا اخوك ..
سيف .. استغرب .. من نفسه .. انه يسولف .. وياخذ ويعطي .. الشي ذا .. بطبيعة شخصيته غريبة ..
مهره فجأه عقدت حواجبها وهي تشوف وقت المكالمه وكيف مشت الدقايق ..
ارتبكت ..وارجعت اسكتت ..

سيف عاجبه اسلوبها في الكلام ونبرتها ..رغم انه يكره كثرة الكلام.. الا انه مايبيها تسكت : مهره ..؟!
مهره: انا آسفه  واضح تبي تطمن على وضعي .. واحنا طولناها..
سيف:طيب وين المشكله ..؟!
مهره: الحين انت تركتنا ورايح لزوجتك ..
قاطعها : واذا ..؟!
مهره في خاطرها ياربي العايله  فسقانه وكل شي عادي ..
قالت : لا ولاشي .. بقفل يمكن انام .. قبل يصحى سيف .. ويقلقني ..
سيف: تمام .. مع اني شاك في انك بتنامين .. واضح ان ابليس مخاويك بالغرفه ..

رفعت عيونها تدور في الغرفه وبتنهيده:لحول  ..
وقبل ماتقفل ارتفع صوت الأذان .. تلتها لحظة صمت .. وهم يسمعون الاذان المتداخل ..من كل مكان .. وبعد مانتهى .. قال: صلي .. وفالك الراحه والنوم ..
مهره: الله يجزاك خير ..

ابتسم .. وقفل.. وظل ماسك الجوال ..هل ما اطال الحوار بساطة مهره .. ام فضوله .. او نبرتها ..
جات نوف وباستغراب: دخل علي صوتك بالحلم وتسولف.. ماصدقت .. قمت والله صدق .. تحقق الحلم .. من تكلم ..؟!
شغل زقاره ونفخها ببرود دون يلتفت عليها .. بنص عيون :
اكلم نفسي ..
نوف بعصبيه: وتبيني اصدق .. انت الناس ماتحاكيها .. عشان تكلم نفسك .. من تكلم سيف ..؟!
بهدوء: قلت لك.. نفسي ..
نوف: وماصدقتك ..
رفع حاجب: عمرك .. ماصدقتي ..!
بغضب:سيف ..!
قام ودخل الغرفه ولا كنه يشوفها ..

******
صلت مهره .. وارجعت فراشها ..حاولت تنام .. بس عجزت .. يمكن مانامت الا ست الصباح ..

سيف نام .. وصحى ع السبع ..نوف كانت تجهز فهي موظفه وبتروح تداوم .. قام خذ منشفه ..:
نوف ماله داعي تجين الليله الفيلا ارجعي بيتكم ..
التفتت : ليه بتجي هيا ..
سيف : لا .. انا بظل بيتنا .. ابي اشوف اهلي .. ماصار فيه وقت قعدت معهم ..
نوف .. وهي تقفل شنطتها الصغيره: طيب سيف تكفى .. من كنت تكلم .. وانا نايمه..
سيف : مو شغلك .. عارفه .. اني ضد الاسئله والتحقيق .. خلينا حبايب ولانزعل من بعض ..

تركها وراح دورة المياه ..
تحلطمت وهي تلف الشيله عليها وتطلع ..

****
بعد شوي  سيف يدخل بيتهم .. والبيت فاضي الا من الخدم ..
ابوه اكيد مداوم .. امه نايمه .. جمان في بيت زوجها .. وبلقيس في الجامعه وفارس في المدرسه ..
صعد فوق .. قبل يدخل غرفته .. سمع صوتها من غرفة عساف .. تتوسل : تكفى سيف نام .. حرام عليك .. توني نايمه..
وهو يبكي : قومي .. نلوح بله .. ماما نلوح دجاجه ..
وقف يسمعها:خذ الايباد شوف جيري..
سيف : مابي جيري .. نلوح بله ..
تذمرها .. وهي تصيح : ياصبر الأرض ..عشاني ماما خليني شوي .. 
راح سيف ناحية الباب .. طق بخفوت .. واسكتوا اثنينهم ..
مهره: هلا ..؟!
هو : خليه يجيني .. وانتي نامي ..
توسعت عيونها.. حست بالاحراج  .. وزين ماهفت النزغه كف : فشلتنا حسبي الله على ابليسك..

ظل سيف ينتظر شوي .. الا انفتح الباب .. ومن خلاله طلع سيف ببجامه كيوت .. وابتسامه مصحصحه ..
مهره من ورى الباب : والله فشله ..اذا ازعجك .. خلي الخدامه تجيبه ..
مد يده ومسكه سيف : ماعليك .. ادبره..
وتوه بيمشي .. الا قالت:  سيف ..!!
التفتوا اثنينهم ..
قالت: بالله .. خلي الخادمه تعطيه حليب ولا كورن فليكس ..
رفع سيف حاجب وبسخرية: ابشري ..تبين اخذه للحمام بعد ..
مهره بعفويه: لا خلاص خذته انا ..
سيف والجميل ان مهره مو عارفه شخصيته الا بشكل سطحي ..ولا عارفه مكانته الاجتماعيه ..وشغله ..
قال: تمام ..نامي ..
راح وهي قفلت الباب .. وفعلاً تلحفت وارجعت نامت ..

****
الساعه حدعش تقريباً.. صحت .. مصدعه .. ومتكسره .. من التكيف البارد .. بدلت وحطت شال كبير على راسها .. وانزلت ..
تأملت وهي تنزل فخامة المكان والنوافذ العملاقه  مخليه الشمس تدخل من كل جهه ..
توسعت عيونها وهي تشوف سيف الصغير .. جالس على الارض ويلعب مع قطوه رماديه كبيره وجنبه لفافات صوف باين العاب القطوه ..

وسيف جالس ع الكنب .. يشرب قهوه .. ومندمج في الايباد وكان يكلم جوال ويقول : هو راجح قبل يفتح المزاد ومنوي عليها .. عليه بالعافيه ..
واستطرد : وليد .. مر الورشه  ..وتأكد اذا العمال ..بدو بتلميع لوحة لويس سيمون .. الكلب آرثر من اسبوع قايله .. وقبل امشي المطار مريت ومابدء فيها اصلا ً..
ضحك : اجل كيف .. بمزاد بونهامز القادم .. بنزلها ..فالنا لوحة كلود مونيه ..
سكت شوي بعدين قال بتحدي  : انا لاحلمت ..ما احلم على قدي .. لازم اتعدا قدي يابعدي..
وانهى المكالمه بـ: .. سلم على راجح ومشاري لاشفته ..سلام ..
مهره .. ماستوعبت المكالمه .. ولا ايش يقصدون ..
بعد ماقفل تكلمت: صباح الخير ..
رفع راسه لها : صباح النور .. ماتوقعت تصحين ..
جلست وهي متغطيه بالشال .. ومسكت ذرعانها: التكيف مره بارد ..احسه كسر عظامي ..
عقد حجاجه: ليه ماقصرتيه ..
مهره : دورت ريموت .. ماحصلت ..
سيف: مو من جدك .. كان طلبتي من الخدم ..
مهره: والله مو ماينه على المكان .. بكره ان شاء الله ماشين .. 
سيف يحط الايباد ع الطاوله : بدري ..
هي : لا حنا اتفقنا يومين .. نجي مره ثانيه بوقت ثاني ..
سيف : اهجدي .. ماراح تفرق لامددتي كم يوم .. خلي الولد يتعود علينا شوي ..
التفتت على ولدها وهتفت : عساس جالس تلعبه بحضنك .. الولد يلعب لحاله .. مهمله .. مع هالقطو الكبير..
سيف يشرب قهوته :
شوفي انا خذته لاني ادري مانمتي .. ولا انا  مو رفقه ابداً مع الاطفال .. وبعدين ولدك يحن يبي الدجاج .. عاد جبت له قطوة فارس .. وماشاء الله مبسوط معها ..

انهارت.. وهي ترفع شيلتها شوي وتشوف شعر سيف وهو مليان من شعر القطوه :
سيف .. ماباقي الا تاكل شعر القطوه ..
سيف وكفوفه مختفيه داخل شعر القطوه : قتوووه حلووه ماما..
مهره : حرام عليك .. ازعجتها يالموذي .. يجيك فارس يضربك ..
سيف : ترى عادي .. بالعكس سيف ألطف من فارس في التعامل .. مع شيلي ..
مهره بغت تنجلط من برود سيف .. والقطوه كل شوي صرخت من دفاشة سيف معها ..
راحت جلست على الأرض: هاتها اشوف .. عطني هالشي .. مشطها ذا ..
سيف : مسطتها..
مهره كفخت سيف على راسه بالمشط:
رح تقلع ..هذا مو تمشيط .. انت عفستها .. صار شعرها كنها غدت بكبينة كهرباء .. يالحجي ..
سيف يهاوش امه : انتي اجيه .. آهو انا ..
سيف بغى يفقع ضحك على حوارهم .. ومهره حطت القطوه بحضنها وتمشطها بحنان ..:
هذا كائن حي .. ياعميري .. قلبها يرجف .. ويرعد .. ياللي ماتخاف الله ..
سيف يبي يسحبها :آتيها .. آتيها .. انا امسطها ..
مهره : والله ماتاخذها شفها كيف زابنه عندي ..حرام ماما ..
سيف يبي يسحب القطوه : تيبيها أجيه أجيه .. (جيبيها يالحجيه ..)
دفعته مهره :اللحجي انت واشكالك .. رح فيذاك يامروح .. يالقاسي ..
سيف وبدون ماتلاحظ مهره كان مستمتع .. في تأملها هي وسيف الصغير ..
كانت كنها طفله وهي تهاوش معه .. ويسبون بعض ..
سيف يهددها : اطه تحل عنونس .. (احط كحل في عيونك)
مهره وهي تمسح على القطوه اللي ساحت بحضنها: بالله .. تعال قرب وشوف مين بنعبي عيونه كحل ..
جات ام سيف .. وضحكت :
والله التهديد أليم يامهره .. بس ياويلك لو سويتيها بالحفيد ..
رفعت مهره عيونها لها .. وقامت : صبحك بالخير ياخاله ..
ام سيف بوستها : صبحك بالنور والسرور ياعين الخاله ..
سيف عطى وضعية  مو حولهم وانه منسجم بشغله بالجوال ..
خذت موضي  سيف وضمته وبوسته : كيفك .. ياروحي .. تعال عط جديده بوسه ..
سيف باسها  : لعبت قتوو ..
ضحكت : بعدي ولدي ..
راحت جهة سيف الكبير .. : ماشاء الله منورنا .. الشيخ ..
سيف : نورك يمه ..
موضي : افطرتي مهره ..
مهره : لا والله توني نازله من شوي .. بغسل وآكل تمره وقهوه ..
موضي: افا.. الفطور ع الطاوله .. روحي وشوفي مشتهاك واكلي ..
مهره : لا وين تأخر الوقت .. لو صاحيه ابكر فطرت ..
سيف : انتي وش يصير لك معارض ..؟!
توسعت عيونها : مين ذا ..؟!
سيف : السنجاب اللي في فلم الكرتون القديم..
انصدمت : انا سنجاب ..؟!
سيف : روحي افطري وعيني خير .. لاترجعين لجدتك .. وتقول حنا جوعناك ..
مهره بانفعال: بالله ..يعني مو عشان انا جايعه .. عشان جدتي .. برافو والله ..
سيف : اجل خير لسى ما أذن الظهر ماتبين تفطرين ..
مهره : انا عاد متعوده كذا .. يعني خلاص لا افطرت ..ذا الوقت ما اتغدى.. يعني وش اقتراحك اخوي سيف .. افطر .. ولا اتغدى ..
سيف بنص عيون : بتفطرين وتغدين .. جدتك اهلكتني وصايه عليك .. وانا صراحه ابي اطلع ببياض وجه ..
مهره وشكلها عجيب تتكلم والشال على وجهها : بالله .. اجل مابي لا افطر ولا اتغدى دام النيه كذا .. الله يسلم التمره والشقرا ..
سيف يهاوشها : لاتسوين نظام شيبان .. خير تمره وقهوه ..ولا مو جايز لك المكان ياحرم عساف .. وسادين نفسك ..

ام سيف ..رافعه حجاجها .. ببتسامه .. العجب العجاب .. اللي جالس يصير .. انُ سيف يناقش بهالاسلوب .. والاعجب .. ان واضح مهتم ان مهره مافطرت ويبيها تفطر ..

مهره : ايش دخل المكان في الموضوع ..
موضي قاطعتهم : طيب عشاني ياقلبي .. اكلي حتى لو اشوي .. ولو تبين شي مختلف ..قولي للخدم ..
سيف بلامبالاه وهو يتسند : تبين بعد نطلب لك من بره ..عادي ..لاتستحين ..

مهره قامت وراحت ناحية المطبخ .. اللي البارح دلوها عليه مع بقية البيت ..:هفففف ..

اختفت بالمطبخ .. ضحكت موضي : ياحليلها هالمهره ..
سيف : بزر ..
موضي : تراه عمرها خمس وعشرين..
سيف : كويس ..
موضي : ايش اللي كويس .. غريب مبكر ..
سيف : عادي يمه .. صحيت ومافيني النوم .. قلت اجي فيذا .. واشوف الجميع .. لي ثلاث شهور عنكم ..
موضي  بحنيه : سعيده .. عشان هالشعور ..
رفع راسه وتنهد .. : لاتحسسيني متبلد يمه ..
موضي وعلى طول طلعت دمعه بزاوية عينها مسحتها : حاشاك يمه .. بس تعبت من بعدكم  .. تعبت .. متى المكم حولي واشبع منكم .. عساف راح وماشبعت منه .. راح وهو قاطعني عن نفسه سنين ..
تنهد سيف .. وقلبه يوجعه : الله يرحمه .. ويرحم نجود .. هم راحوا .. وأوجعونا ..

مسكت امه يده وخذتها عندها :
الله يرحمهم جميع .. سيف يابعد عيني .. انسى ..سنين مرت .. لاحزنك بيرجعها .. ولابعدك عن الحب بيغير شي .. الحياه قدامك .. حاول تحب .. وتكون اسره سليمه .. وفك عن حياة الشعثره اللي ماتزيدك الا شتات يا امك .. 

ضحك بتهكم : قصدك اعيش مع نوف بشكل رسمي .. ولا عاد هيا .. ولا اجيب منهم عيال .. مستحيل ..ما اتحملهم بشكل مطول يمه .. والله ماتحمل ..
موضي: من حقهم .. يعيشون حياه طبيعيه ..
سيف : هم عارفين ظروف هالزواج وراضين ..
موضي:والله تلقى داخلهم شعور نقص .. بس ساكتين .. وبالعينها ..
سيف ببرود: ماحد مغصوب .. الحياه قدامهم .. وانا والله معطيهم الضوء الاخضر .. متى مابغت .. اسرحها .. لها الطلاق .. بمؤخر دسم وفوقه باقة ورد ..
موضي بقهر : بالله مافيه شوية مشاعر .. ماتحس بتفقد هالحرمه .. ماتقول مر معها يوم حلو..
سيف رفع حاجب ونزله : ابد يمه .. شوفي انا رجال .. واذا تزوجت وحفظت نفسي من الحرام .. مو معناها .. اني نسيت نجود وممكن احب غيرها .. صدقيني لو شايف في هالزواجات اللي مرت شي شدني .. وحرك قلبي .. بالعكس ممكن اتمسك .. بس والله مافيه .. مافيه يمه .. يالعيب فيهم ولا فيني ..
موضي محتفظه بيده : الله يهداك يمه ..
سيف بوجع قلبه : الله يجبرني يمه ..

صرخت القطوه .. اللي رجع سيف يتحرش فيها ..ضحك سيف : بتجيك امك الحين ..
سيف شال القطوه اللي طوله وحضنها : تدي ماما .. اتكها (تجي ماما بطقها)
توسعت عيون موضي :يازيييينه ...!
سيف زقره: استح ياولد احد يطق امه ..
النتفه عقد حواجبه يجاري عمه: اتكك انت بعد ..
توسعت عيون سيف: ايا ابن الكلب ..
ضحكت موضي: راحت الهيبه ياسيف وروحها سميك.. الظاهر خزتك ماعاد بها مفعول ..
سيف : لاتستفزيني يمه اقوم افغص هالنمله  ..
موضي عارفه يسويها : لا والله ماطقه .. بعد نفر الورع من بيتنا وحنا فرحانين فيه ..

****
مهره .. ومعشرها الحلو.. امضت الوقت مع موضي في طبخ الغداء .. وسولفوا سوى .. جات عند سيف اللي كان يلعب بالايباد وغفى ..
شالته .. قالت لها موضي:
خذيه غرفة الجلوس .. تحت .. في فراش صغير البارح حطته جمان لبنتها ..
طلعت من المطبخ : تمام ..

مرت في الصاله ..  ستايرها مقفله .. على سيف العم  نايم ع الكنب بالصاله ..
كانت ماره ومو متغشيه ..
طاح نظرها  عليه ..نايم على جنب .. فوق راسه مخده ..
*كيف يكون كيان سيف مريح في المكان .. ومطمئن .. عكس عساف ..
لما شعوري الغريب .. بهذا الرجل وكأني اعرفه منذ زمن .. وكأنه احضرني الى هذا المنزل .. واصبحت انتمي اليه هو .. لما .. ؟! .. *

توجهت للغرفه .. ونومت سيف على الفراش ع الارض .. وتوعى .. وتباكى .. وجلست جنبه .. ظلت تغني عليه وتنومه .. !
بعد شوي طلعت من الغرفه .. وتقفل الباب بخفوت .. وسمعت الكلام الهامس .. رفعت عيونها ..
فارس  جاي من المدرسه .. وجالس ع الكنب جنب بطن سيف النايم .. ويقول : طيب كلمني .. مشتاق لك ..
سيف ببتسامه وعيونه مغمضه يفتح ذراعه: تعال وعطني هاق .. خل ترد الروح فيني ..
فارس بشوق .. ولهفه .. طب في حضنه وهو منسدح .. وضمه :اقسم بالله نورت السعوديه .. ياعينه ..
سيف يربت على ظهره وضامه كنه طفل : يابعد حيي .. يعني وش يبي الواحد اكثر يصحى ويشوف عيون فارس ..
ضحك فارس وعيونه امتلت دموع.. وحاط خده على خده :ايه واضح .. وانت رايح قبل تشوفني عشان تصبح بعيون الساحره نوف ..
ضحك بنعس:فكني من الطاري.. يا ابوي ..
سيف باس خده ..واستعدل :
لو تجي معي لندن .. خلاص .. ماجي السعوديه الا بالاعياد ..
رفع فارس حاجبه: والله كان ينجلط ابوي .. وفوقه امي .. تعرف مايعزون عن زولي ..

مهره متخرفنه على هالاخوه .. لما عساف طرى أبوة سيف وحنانه.. كان يقصد كذا .. يالله .. !!
مرت  .. بترجع للمطبخ ..
شهق فارس : اوووه مهره .. تعالي ..كيفك يالمزيونه ..
مهره : تمام ..
سيف يدعك عيونه ..ورفع راسه لها : اجل شاركتي امي بالطبخ ..
مهره : يعني .. شوي ..
سيف باستحسان : ممتاز .. في تطور .. يعني بديتي تحسي ان ذا بيتك ..
مهره : مع الخاله موضي .. لازم احس  بهالشعور ..
قام سيف : تحسسيني .. ان احنا نمشي وندقر فيك ..وين السمي ..؟!
مهره: نايم ..
فارس باندفاع: بروح اصحيه ..
مهره : لاتكفى ..خله دام نامت شياطينه ..
فارس : يالله .. خلوا الورع يمارس هواياته ..

راحت توجهت ناحية المطبخ .. ومع الشال على وجهها صقعت ركبتها في الطاوله: اووووش ..
التفت سيف بسرعه وبعصبية :انتبهي .. ماتشوفين ..
مهره تضغط على ركبتها : ظلام .. ومتغشيه ايوه ماشوف ..
شغل النور بسرعه: زينه انتي .. تعورتي؟!
مهره تحس ركبتها انفلقت .. وبكبرياء : لا شدعوى..ضربه خفيفه ترى..
سيف رفع حاجب .. وعشان يقهرها : اتوقع الطاوله هي اللي انشرخت .. على هالصوت ..
ضحك فارس : من جد ..شيكي مهره على ركبتك ..
راحت وكانت تعرج شوي .. سيف اشر بعيونه لفارس .. وذاك فهم على طول .. راح مسك ذراعها: خليني اساعدك ...

******
على طاولة الطعام .. بغياب الاب .. سيف كان جالس على رأس المائده ..
وفارس على يساره والام يمينه .. بلقيس جنب فارس ومهره جنب الام ..
موضي : عادي يابنتي افتحي وجهك .. خليك متحجبه ..
مهره : لاماعليك .. اعرف آكل خالتي ..
بلقيس : تبين تقنعيني .. بامريكا مع عساف كنتي تتحجبين ..
شردت مهره : ايه كنت اتحجب .. بس ما اتغطى ..
بلقيس : تمام .. اعتبري نفسك بامريكا واكشفي ..

مهره وماتدري ليه .. مرتاحه بذا الحاجز بينها وبين سيف ..
في قوه عجيبه .. بعيونه ..يخففها الحاجز ذا .. ويسهل الحوار معه .. وحتى يسهل الرد على لسانه اللاذع .. قالت وهي تاكل وماسكه الشال مغطيه جنب وجهها : بلقيس .. سمي واكلي.. ماعليك من خشتي ..

بعدها لاحظت سيف شال صحن فارس .. ويسكب له وبهتمام: لاتاكل حشو .. فيها مكسرات .. عشان تقويمك ..
فارس عطى سيف كشره تبين صف اسنانه : شرايك بالتغيرات ..
سيف قرب يناظر فم فارس .. ويفتح فمه من جنب بصبعه: جميل تقفلت الحفره اللي هنا .. رحت موعدك الاخير ..
فارس بدء ياكل : ايه يبه .. وترى ..

وقبل مايكمل شرقت مهره .. مع كلمة 'يبه' .. راحت تسعل..و موضي ..طقطقت ظهرها .. وعطتها ماي ..
شربت مهره شوي .. وبعيون مصدومة تناظر فارس : فارس .. وش ناديت سيف .. من شوي ..
فارس مصدوم : كيف يعني .. ؟! ..
سيف عقد حجاجه ..
مهره بذهول : انت قلت يبه .. قلتها ولا يتهيئ لي ..؟! .
فارس بدهشه : اجل وش اقول دادي .. ولا بابا .. ايه قلت يبه ..
سيف استوعب .. ان مهره .. اصلاً طول الوقت ماتدري ان فارس ولده ..
بشبح ابتسامه : مهره .. ترى فارس ولدي .. من ردة فعلك ..واضح تفكرينه اخوي ..
مهره حطت يدينها فوق راسها :
لا .. دار راسي .. جد جد .. تستهبلون ..في شي غلط بالموضوع ..
فارس مات ضحك : اما انك تحسيني .. كبير بزياده ولا ابوي صغير .. لانُ بصراحه نتعرض لهالموقف كثير خاصه من الناس اللي مايعرفونا ..

التفتت ناحيتهم .. واثنينهم يبتسمون .. الشبه بينهم رهيب .. مثل الشبه بين عساف وولدها ..
تمتمت : يالله وضعكم غريب .. وربي من البارح افكره آخر العنقود عند الخاله موضي ..
ابتسمت موضي : فارس انولد وعمر سيف عشرين .. كبر ابوه الله يحفظه ..
بلقيس :والنزغه شايف نفسه اخونا .. لايقول عمتي .. ولاجده وجدي ..
رفع حاجب : سلامات اقول لك عمتي .. ماتطلع ..اغص بها  ..
بلقيس: وقح ورب الكعبة ..
مهره .. رجعت تاكل مبهوره بهالحقيقه ..سيف شاب كثير على انُ يكون عنده ولد شاب كبر فارس ..
بس والله .. كابلز عجيب .. حلوين مره سوى..واسلوبهم وحواراتهم ..تشوق ..!!!

****
مضى ثاني يوم باهتمام مكثف من العائله .. وحب هائل لي ولسيف الصغير ..
سيف مع شقاوته .. وكلامه ولسانته .. علق قلب الجميع به..
والجد سعود .. يحضنه ويضمه ويقبله .. وكأنه ينوي ان يعطي سيف حب العالم وحنانه ..وكأنه ينوي تعويض سنين العجاف  مع عساف من خلال ابنه ..
يفترض اني ذاهبه في الغد .. لكن .. !
سيف اتصل بجديده .. وباسلوبه .. ودبلوماسيته اقنعها بالتمديد ..لاسبوع لكن وبصعوبة ..رضت اظل ثلاث ايام .. وعلى مضض  ..
وكلمتني .. واعطتني موشحات .. في العقل والستر والاحتشام عند اهل زوجي ..
وصوتك لايعلى .. وخلك مؤدبه .. وسنعه .. وفساله ما أبي .. '

تنهدت وقفلت .. كانت في غرفة الجلوس ..
الجده صبحا ..وانظمتها .. النقيض .. للناس هنا ..
هنا كل حاجه ماخذينها سهاله .. وفري بعقل .. اما الجدة .. استغفر الله ..
لو بودها قفلت على البنت بصندوق احفظ لها ..
تضايقت بعد تكرار الجدة ووصايها .. طلعت من غرفة الجلوس وكانت حدعش الليل ..
لقت بلقيس وفارس يتابعون فلم ومعهم سيف اللي غاب اكثر اليوم وتوه جاي ..
جلست وهي متغشيه بصمت ...
رفعت رجولها ع الكنبه وضبتهم ..ومن تحت شالها الكبير شردت .. وتحاول تنسى واقعها ..
حياتها القشره .. وخيباتها ..  وفوقها الجده وضغطها ..
سيف .. كانت عينه بالجوال .. لكن .. مهره في مجال رؤيته .. يرفع عينه لها ..
وحاس ان فيها شي .. مر الوقت وهي حاضنه نفسها .. بالصوره اللي لاحظها فيها بيت جدتها .. وكأنها تعزي نفسها ..

فارس وبلقيس يتناقشون عن الفلم .. ضحك فارس :
يبه .. ذكرتني الرقصه بليان .. في لندن ..بحفلة عمي راجح .. غصب تبين ارقص معها .. دعست رجولها .. وكرهتها نفسها ..
بلقيس : من جدك راقص مع هالزبده .. يع .. كن مافي ابو دلع بنته الا ابوها ..
فارس : هي مو الغايه ترقص معي .. تعرفين بزر ..هي تبي تتميلح على ابوي ..عشان يجي ويقول لها تعالي يابعد حيي ارقصي مع الأصل .. بس ذيبان مابرد قلبها ..
ضحكت بلقيس ..
وفارس : يبه ..!
سيف و باله مو معه .. منشغل بمهره ..ايش فيها .. وليه تغير مودها .. ليه ذاويه .. وحزينه ..
فارس : يبه .. !
التفت :هلا ابوي..
فارس:وراك .. وش مشغول به ..
سيف يحاول يلفت انتباه مهره: افكر هو سيف..بيصمل بنومته في غرفة ابوي .ولا..
بلقيس : والله هو اندعس مع ابوي .. وسولف عليه وصدق كذب نام ..
سيف عقد حجاجه .. والتفت جهتها: مهره .. انتي ايش رايك ..
ارتعشت .. من شرودها وتنبهت: ها .. في وش ..؟!
كرر عليها السؤال ..
مهره بخفوت : مادري .. ممكن .. هو احيان ينام مع جديده بالمزرعه .. ممكن يكمل ..
بعدين وقفت:
اعذروني بصعد انام .. تصبحون على خير ..
كلهم : تلاقين خير ..!

*****

يا ضيقه الليل خليني على فالييّ
يكفيني من الدهر عرجاته وسوآته.

بعد منتصف الليل ..
سيف  في غرفته ..على طاوله وكرسي جانبي..وزقاره في فمه ..وبيده قطعه بحجم الكف شكلها حجر كريم او الماس .. ويلمعه بدقه بمحلول .. وقطعة قماش ..كان مجتهد بس تركيزه الى الان مع مهره ..
ويحاول يطرد هالشعور ..
والاهتمام .. الغريب لها ..!
بس ماهو قادر .. خذ جواله .. فتح صفحتها تبع الواتس .. متجاهل رسايل نوف وهيا .. رسل لها: يابنت .. طمنيني عليك .. حد مزعلك ..
ظل شوي ..لاحظها تكتب وتمسح .. وتكتب وتمسح بعدين ارسلت:مافيني شي .. و'فيس منهضم' ..
ارسل:مهره ..انا اخوك ولا .؟
كتبت:الا ..
كتب : طيب سولفي لاخوك ..وش بلاك..
كتبت:لاتشغل بالك ياخيي .. الأمور طيبه ..
سيف .. قفل الواتس واتصل ..
ظل يرن وقت .. ويرن..
بعدها ردت .. بصوت مخنوق : هلا ..
عقد حجاجه .. ويتوعد : مهره .. من زعلك .. قولي لي بس من .. ومالك الا اللي يسرك ..
ضحكت بصوتها الباكي: من قال زعلانه ..
سيف: تبكين ؟!
مهره تكذب: لا .. بس ساكته من وقت تغير صوتي ..
سيف : بلاش كذب .. ؟! ..وش فيك .. كنتي بالنهار مبسوطه .. وكل شي تمام .. وش غير احوالك ..

مهره .. سكتت .. وخفق قلبها .. مع شعور سيف فيها .. وكيف يعرف تقلبات مزاجها .. مع ان مايشوف وجهها .. ولاعيونها ..
مسحت دموعها وانفها بمناديل ..
واسندت جبينها في ركبها :
‏يمكن ..جايتني الطواري .. ويمكن ضغوط .. يمكن مخنوقه ..من الدنيا..يمكن مشتاقه لسندس وزينه .. اي جد مره واحشيني ..مادري او حيل مخنوقه من اسلوب جديده .. اصلاً  حتى ركبتي توجعني من ضربة الطاوله .. (وراحت انهارت تبكي) مره تووووجع ..

سيف فتح عيونه بذهول: مهره .. كل ذا .. (وكان يقصد غبنتها وبكاها ) .. اهدي .. قولي وش تبين.. وش اللي يطيب خاطرك ..
مهره تشوهق : والله مابي شي .. والله .. مافيني شي .. صدق ..
سيف : فاقده عساف ..؟!
سكتت مهره .. تخيلت عساف .. وايام عساف .. وجنونه ..
ردت: مادري .. الاسئله عن عساف ..ماعندي لها جواب ..
عقد حواجبه : كيف .. ماكنتي تحبينه .. ؟!
مهره : الا .. زوجي كيف ماحبه.. يكفي ان سيف ولده .. ذا يشفع له كل شي ..
سيف يقلب الحجر ع الطاوله .. بعدها قال : اخوي واعرفه .. بادمانه للكحول اكيد آذاك ..
حست بغصه:
الله يبيحه ويحله .. مابي اذكر الا محاسنه ..
ومع حشرجة صوتها .. سئلها : مهره ..آذاك .. وانتي مجروحه منه .. قولي لي .. عارف عساف .. طايش .. ودفش .. واذا شرب مايشوف قدامه ..
مهره بصوت باكي مخنوق : تكفى سيف .. خلنا نقول شي ثاني .. عشاني .. عشاني ..

وعندما كررت مهره مستجديه بشانها .. اقسم ان شانها اصبح لاينزل الأرض عندي ..
ابتسم وبحنيه :طيب ابشري .. سولفي لي .. انا واحد ليلتي طويله ..وابي اسمع هرج ..
مهره بعفويه: يالليل .. الحين خواتك وخالتي اجمعوا انك ماتحب الحكي .. وان كلامك مختصر .. من اصدق الحين ..
شغل زقاره : مادري .. يمكن عاجبن ان عندي اخت جديده وابي اتعرف عليها اكثر ..
مهره ضحكت وهي تمسح دموعها :
تدري لو جديده .. تدري عن هالمكالمه وش تسوي ..
ابتسم : وش ..؟!.
مهره : ماراح تاخذها من باب الاخوه .. وبتقول .. حماك .. وبتسوي لي محاضره .. وتلعني وتفل علي ..وبتعتبرني ساقطه وماستحي ..
سيف : افاا .. كل ذا .. ايش هالتعقيد .. الوضع عندنا جداً ًمختلف ..
مهره : لا .. جدتي اسلوبها في حفظ البنت مختلف .. كيف اوضح لك .. امممم ..تخاف عليها من الفتنه .. والرجال .. تخاف ان البنت تحب او تنحب .. اصلاً حتى لو علقنا على ممثل انُ وسيم او جميل .. نكون وقعنا في المنكر والمحظور ..كنا صغار .. وتحط كحل اثمد في عيونا .. واذا قمنا نصيح من حرارة الكحل .. تقول عشان تتذكرين نار جهنم لانصبت بعنونتس .. تغازلين هالكفار يالبازع ..

سيف بصدمه: ايش هالاسلوب .. ذا عنف ..
مهره : بس صدقني ياسيف تحبنا .. وتخاف علينا من الهوى الطاير .. بس هي مره حاده اتجاه بعض الامور .. وخاصه تحس كل شي يمس البنت وكل شي ممكن يجيب عليها كلام  ..  عندها الستر هو الزواج .. وتخيل .. مو احنا  اخترنا زواجاتنا .. هي اللي تنظر للمتقدم .. اذا تمام .. نسبه كويس .. عمره مناسب ..و لان حنا بنات ولدها وحيدها.. لازم يقدم مهر مره غالي ..تاخذه  وتروح فينا سوق الذهب وتشري به كله ذهب .. وتعطينا اياه ..

سيف بتسائل: ليه هالشرط ..طيب ..؟!
مهره تنهدت : جديده .. رغم حبها لنا .. الا انها ماتنسى ان امي تخلت عن ابوي .. عشان ظروفه الماديه اللي دخل فيها بفتره من الزمن .. فإذا اعترضنا على هالشرط التعيس .. تقول امكم .. سوت وافعلت ببوكم .. والعرق دساس .. فأنا بأمن لكم حياتكم .. عشان ماتنفصلون بسبب القريشات ..

سيف : يا وجه الله ..! 'مستمتع على اسلوب كلامها ويبتسم وهي تقلد اسلوب الجده في الحكي'..

مهره :  اختي سندس الله وفقها .. عنده فلوس و ماشاء الله رجل والنعم  .. اما اختي زينه خذها واحد يقرب لنا من بعيد .. ابوه اقشر .. واهو ألعن .. وزينه مسكينه مالها لسان .. وماجابت عيال .. والعيب من زوجها النفسيه .. الا حاط البلاء فيها .. ويخطي في حقها .. يعصب على اقل شي .. الا انه .. مايبي يتركها .. متعلقن في زينها وجمالها .. وعارف ماراح يلقى مثلها ...
سيف يداعبها:بس متعلق فيها عشان زينها ..
مهره بتفكير: امممم .. زينه اختي .. زينه في كل شي .. ان جاء في شكل ومضمون .. ماسموها زينه الا انه تبطي الحريم تجيب مثل زينها ..
سيف يبي يطيحها بالكلام: وليه سموك مهره ..؟!
مهره بعفويه :لاني شقراء مثل المهار .. وغاليه عند ابوي .. كان يقول انتي مهره نادره واصيله .. وصعبه على كل خيال ..
سيف رفع حاجب: بس عساف جاب راسك ..
مهره بنص عيون: بعيد عن شواربه ..
سيف باستنكار : وشوو ..؟!
مهره ببرود : ولاشي ..
سيف ومايبي يدقق على معنى كلمتها .. دام زان مزاجها :طيب على اي اساس اخطبك عساف .. كيف وصلك ..
مهره : ابد واحد قريب جديده .. بامريكا .. يعرفه.. نصحه فيني .. كان عساف يدور وحده بنت ناس ومتربيه .. وتخاف الله ومحتشمه .. وقال له عني .. تقدم .. وقريبنا مدح فيه .. وتعرف وش قال لجديده .. ان ابوك يبي يغصبه على وحده مايبيها .. ومادري ايش ..وانه يبي يظلمه.. ورضت .. خاصه انه وضح ان شارينا وشاري نسبنا .. انُ حتى لو درى ابوك .. بيقدر هالنسب ..

عقد حجاجه: ماني عارف استوعب ليش .. عساف خطى هالخطوه ..
شردت وبخفوت: يمكن ..كان يبي يستقر .. يمكن ..!
سيف: واستقر..؟!!
بشرود : مادري..
سيف : لاخذت منك حق ولاباطل ..
اطلقت مهره ضحكه صافيه : ياشيخ .. انت سحبتني في الحكي .. ومابقى شي الا قلته ..
سيف وضحكتها  داعبت روحه ..
لاأدري .. لكن شعوري ان مهره .. لاتستحق الا ان تضحك ..
تلك البسيطه .. !
لا الإنسانيه .. ولا القانون .. تسمح ان تظلم .. وان تخطف ضحكتها ..
سكتت .. وهو بعد ..
مرت ثواني ..
بعدها وبتردد تكلمت : طيب وانت .. ؟!
سيف : وش فيني انا .. ؟!
مهره بشقاوه: الحين اخوي .. وخذت علمي .. المفروض اعرف انت وش علمك ..
سيف واللي مايفضي لأحد :
وش علمي عاد.. ماعندي علوم ..
مهره : بالله .. سمعت انك تتزوج وتطلق .. ليه ..ايش هالفوضى .. اللي عايش فيها ..
رفع حجاجه :
تدرين ..انك قاعده تتجرئين على شي ماحد يجرئ عليه ..
مهره بعدم اهتمام : ليه يالبيت الأبيض .. يعني خير .. من حل لك المسيار .. احسه خطأ ..
سيف بتحذير: مهره ..!!!
مهره: اقنعني ..
سيف ينفخ الدخان : وش اقنعك فيه ..
مهره: لما تتزوج .. وتروح تسير على حرمتك وتمشي .. ماتحس في غلط ..
رفع حاجب :
ماروح لها هي تجيني .. انا عندي بيت غير هذا ..اللي ابيها تجيني فيه .. ماهو انا اروح لهن في بيوت اهلهن ..
مهره : استغفر الله .. ايش الأذلال هذا .. كيف تهون عليها نفسها ..
هتف : زوجها .. !!!!!.. ماهو واحد من الشارع ..
مهره باعتراض : زوجها ومخلي بيت شكبره فاضي .. وانت فيه .. و الحرمه تجيك .. لو هي حاسبه عمرها زوجتك .. ظلت في البيت وماطلعت ..من حقها تقعد في بيت زوجها ..
سيف يدافع عن نفسه: انا اتزوج  وشروطي بينه ..لو ماعجبها ماترضا وانتهى ..انا من سنتين .. مر علي وقت اربع على ذمتي .. اجيبهم كلهم بيتي .. يهبون ..
توسعت عيون مهره : اربع .. يالظالم .. ايش عندك قلب ولا فندق ..
سيف : ورب الكعبه ولا وحده عتبت قلبي .. زواج بس ..انا رجل الله منعم علي وراعي سفر .. واخاف الله .. مافيها شي لاصنت نفسي بالحلال ..
مهره معترضه من المنطق : كيف الواحد يقدر يكون مع شخص مايحبه .. يعني كيف .. هذا ..
وسكتت قبل تتعمق وزفرت وهي تقول : لاتعليق ..
ابتسم يوم فهم وش تقصد .. و بيضحك.. على احراجها وصمتها..
قال : طيب ماعلينا .. حياتي كذا وش نسوي ..
مهره وكأنها تعرف سيف من سنين: سيف لازم تشوف حل .. اذا مو عشانك .. عشان فارس ..وش وضعه وهو يشوف حياتك كذا ..
سيف بهدوء : عادي والله .. هو مقدر اني ماقدر احب بعد امه .. بالعكس من البيت ذا كله فارس .. هو اللي يدور سعادتي .. ولاعمره اعترض .. عكسهم تماماً..
مهره : انت وش دراك وش في نفسه ..واهلك اذا اعترضوا لانه اللي تسويه غلط .. وربي غلط ..
سيف يناظر الساعه باستغراب كيف مر الوقت ..
قال : وش الحل في رايك ..؟!
مهره بكلام عقلاني : لازم تحط في قلبك نية التغير للأفضل ..اوك حلو انك متمسك بحبك القديم .. ووفي له .. بس انت الحين حي .. والحي ابقى من الميت .. ودامك تقدر تتزوج .. وماعندك حاجز ضد المرأه .. اذا تقدر تحب .. دامك تقدر تخون ام فارس جسدياً.. لاتسوي نفسك وفي قلبياً..
عقد حجاجه وتوترت اعصابه : مهره ..!!!!
مهره بثبات :
كلامي واقع  .. الحاجز اللي ينهدم بين المره والرجال .. انا اشوفه اختلاط مشاعر .. الله اكرمنا عن الحيوان .. ياسيف ..
سيف بغضب : مهره .. لاتمادين ..
مهره بهدوء : ليه عصبت من كلامي .. لأن لامس شي .. انت رافضه بداخلك ..انت رافض هالحياه وهالاسلوب .. بس شي يرضي ذاتك ورجولتك ..
حط كفه على عيونه وبعصبيه وخفوت : ماهو كذا .. مهب انا اللي اثبت رجولتي بهالاسلوب ..
مهره : طيب بعيد عن اثبات رجولتك .. ليه .. اقنعني .. وش الشيق .. اني كل شوي رابط حرمه في اسمي ومطلقها ..
سيف بحده : انا رجل .. واحتاج للحرمه بحياتي ..
مهره : الحرمه سكن يا اختك .. ماهو شي عابر يمر .. ويمشي .. حتى الخادمه في البيت تنام فيه وتقعد طول مدة عقدها ..
توسعت عيونه .. للقصف اللي جاه من مهره .. وكيف لسانها لاذع ..
كملت :مع الأسف سيف .. انت مخلي حبك لام فارس .. شماعه لاغلاطك في بنات الناس .. واغلاطك على نفسك .. لان لوجينا للواقع .. لو ام فارس عايشه .. كان ذبحتها جزع من وضعك هذا ..
عقد حجاجه ..وبخفوت : انا ماقدر احب غيرها .. والله ماقدر ..
مهره : طيب لاتحب .. موده .. رحمه .. استقرار .. وكل شي يجي بعده ..
سيف حس انه ارهق .. ومخه انشل : ياشيخه خلاص غيري الموضوع...
مهره ضحكت: نحاول نحل قضيتك ..
سيف ويشغل زقاره : لو انحلت قضية فلسيطن ..يمكن تنحل قضيتي ..
مهره ببتسامه : الهادي الله ..
ابتسم : ضغطتيني ..
استطرد يغير الموضوع: السبع صمل عند ابوي ..
مهره بانبهار: ملاحظ كيف سوى علاقه مع جده ..
سيف : كل سيف ذكي .. ويعرف من وين تأكل الكتف ..
مهره بنص عيون: انت تمدح ورعي ولانفسك ..
ضحك ..
وابتسمت مهره مع ضحكته ..
سيف في مكالمته وحواره .. قدر يطلعها .. من شعور البؤوس .. والضيق ..
ابتدينا مكالمتنا بدمعه ..
وانهيناها بضحكه ..!
وسبحانك اللهم وبحمدك .. اشهد ان لااله الا انت استغفرك واتوب اليك ..

*****

صحيت الظهر .. لاني مانمت الا متأخر ..البيت كان مافي احد .. نزلت .. وقالت لي الخادمه .. ان العم سعود .. خذ ولدي سيف ..للمزرعه  ..
لأن ظل يلح يبي يشوف الدجاج .. راحت موضي .. وحتى بلقيس اللي كانت اوف اليوم ..
سويت لي قهوه تركيه ..
وخذت حبة شوكلت .. ابي افكك صواميل مخي .. اللي انعدم مع نومي التعبان ..

وتوني ارتشفت اول رشفه .. الا سمعت صوت سيف يتكلم بغضب وحده:طيب .. وانا مو راضي كيف ..
بلعت ريقي .. والصوت يقرب عند درابزين الدرج من فوق .. ولو ارفع راسي اشوفه ..
صاح بصوت زلزل المكان بالصدى : والله ان سافرتي ياهيا .. فانتي طالعه من ذمتي ..
توسعت عيون مهره ..وقمطت مع الصوت .. الغاضب :
ماهو انا اللي تبين تجاكريني  .. يعني انا اسافر واخليك .. ولما جيت تبين تسافرين وتخلين .. لا يبه لا ..عندك ثلاث شهور انا مو فيه .. ليه ما انقلعتي .. مع خواتك .. توها تجي السفره .. !!
سكت شوي يسمعها .. وبعدها بصيحه حست مهره ..انها هي ارتعدت :
مشكلتك ..
بعدها سمعت باب غرفته اللي سكره بحده .. ترك صدى يرن بعده ..
توسعت عيونها :
بسم الله .. بسم الله .. وش فيه ذا ..

بعد شوي .. مهره شاردة فالصاله تسبح في ملكوت آخر ..
حضروا الخدم سفرة الغداء .. وجات الخادمة تناديها .. 
مهره: وانا بقعد لحالي ع السفره .. ماله داعي ..
سونا: كلام انا مستر سيف .. الحين يجي من فوق ..
مهره: اوك الحين اجي .. شكراً ..
 
جلست على طاولة الاكل الجانبيه .. وسمعت صوته على الدرج :المفروض طالع من المدرسه .. وراه ماجيت ..
فارس وحس ان ابوه معصب: بجي يبه ..بس بنتغدى .. بماك .. انا والربع ..
سيف عاقد حجاجه : ومن الربع .. ؟!
تلعثم فارس : ربع المدرسه .. معاذ وذياب واحمد ..
سيف بتهديد واضح : ولايكون تيم وثامر معهم ..
فارس : لايبه .. لا .. خلاص انت مو راضي عليهم .. تركتهم .. جد ..
سيف: المهم .. تتغدى .. وتدحدر البيت .. جدك مكلم .. بنروح له المزرعه ..
فارس : تم يبه من عيوني ..
سيف : السواق معك .. ؟!
فارس بربكه : لايبه هو جاء المدرسه .. وصرفته .. لان معاذ معه سيارته ..يعني واحنا مخططين نطلع نتغدى سوى ..
سيف من بين اسنانه : هين يافارس وعدك  بالبيت..
وقفل في وجهه..
راح جهة الطاوله وسلم .. ردت.. بخفوت : وعليكم السلام ..
جلس في كرسي بعيد .. ومهره .. تناظره بجنب عينها .. ماسك جواله ودق رقم .. وظل شوي ..: هلا نواف ..
نواف : هلا .. حيالله العضيد .. وش اخبارك ..
سيف: تمام يابوي .. انت كيفك ..
نواف : بخير جعلك بخير ..
سيف : سمعت ان ابوي منتدبك .. في مهمه ..
ضحك : نوسع الشغل والعلاقات يا اخوك .. صاري لي عشر ايام ..
سيف يشغل ويطفي في الولاعه :  ع القوه  .. عساك احسن من اخوانك ..
نواف : العين ماتعلى ع الحاجب وانا اخوك ..
سيف : نواف .. قبل ماتمشي .. انا وصيتك فروس .. مايماشي تيم وثامر ..
نواف : وهوا كذلك .. فارس كان اغلب الوقت معي .. وش فيه .. صاير شي ..
سيف : مادري عنه الكلب ..صوته واضح يلف ويدور .. طلع من المدرسه وماجاء ..
نواف : هد ياخوك ..اقعد وياه .. وتكلم باسلوب .. وعقل .. وبيقول كل اللي عنده .. لاتضغط عليه .. فروس مايجي بالقوه ..
سيف : خلاص لاتحاتي .. انتبه لحالك ..
نواف : سلامي للجميع .. في امان الله ..
قفل ..

وساد الصمت .. بينهم ..ياكلون بهدوء ..ولما طال الصمت ..
سيف : بالله ..لسانك اللي تحكين فيه بالجوال .. بلعتيه ..
توسعت عيونها: اييييش ..؟!..
سيف : ليه ساكته .. علامك..
مهره : ولاشي .. ماعندي كلام ابدء فيه حوار ..
سيف عقد حجاجه : طيب وش فيك متوتره ..
مهره بعصبية: باقي انا تهاوش معي بعد .. رجاءً.. خلني في حالي ..
رفع حواجبه .. وعرف انها اكيد كانت تحت وقت كلم هيا وهزئها..
تنهد : سمعتي مكالمتي.. وانا اهاوش هيا ..
مهره: أياً كانت .. ايش هالاسلوب ..ياخي.. توني برتشف قهوتي .. الا صوتك يرعد .. احترق لساني ..
ابتسم وبهدوء : سلامتك .. بس استفزتني ..
مهره : طيب .. الي فهمته انها بتسافر .. وانت مو راضي ..
سيف : يعني حبكت تسافر يوم جيت ..
مهره بعقلانيه : هي جات كذا .. وياسيف من كلامك البارح .. انت اللي بينك وبينهم مجرد زواج والسلام .. فاعشان تطلع ببياض الوجه .. وماتطلع بصورة المستعبد لهم .. خلها تروح ..ومنها الثانيه .. راح تلقى مجال تحتويك .. وتحتفظ فيك لنفسها ..
سيف ومو عاجبه : تحتفظ فيني لنفسها ..!! خير ..
مهره تنهدت : سيف وش فيك .. مو المفروض تحاول تحسن في اسلوب حياتك .. وتعطي مجال لقلبك  ..
سيف : ياشيخه .. عاد نوف .. لا مستحيل ..
مهره بنص عيون : طيب سافر مع هذي الي بتسافر ..ترى السفر والغربه .. تقرب المسافات ..
سيف: لا مستحيل  .. انا توني جاي .. ماسافر الا بعد ثلاث شهور ..
مهره ترجع تشرب شوربه : كيفك..  انت حاله ميؤوس منها ..
سيف .. القى عليها نظره .. وهي ماسكه شالها على جنب وجهها وتتغدى :
المهم ابوي كلمني .. يبي نروح له هناك ..بالمزرعه ..
مهره  بهدوء :جدتي ماراح ترضى ..
عقد حواجبه: وانتي بزر ..ليش ماترضى ..
مهره : شوف .. لو اكلمها واقول لها .. بكره بتجي تاخذني ..
توسعت عيونه : طيب  ليه تكونين سلبيه .. خلاص اجهزي .. ولاتعطينها خبر ..
مهره : ماقدر والله .. احس اني اسوي جريمه .. اذا بطلع من بيتكم .. لازم ابلغها ..
سيف : يابنت الحلال .. نفسه قروب بيتنا .. بس بيختلف المكان .. قومي وماجاك عندي ..
مهره ودها وخايفه ..

*****
كانت جالسه بالسياره ورى واقفين عند البيت.. وتشيك بملابس سيف بالشنطه .. وجوالها باذنها: ايه خالتي شلت كفايه .. بس تكفين خلاص لايقرب من المويه .. سيف يمرض ع طول ..اوك يعطيك العافيه ..
قفلت .. وسيف اللي جالس قدام :ماخذوا له ملابس ..
مهره : تبديله وحده .. وعدمها .. بدلت له خالتي ويبي يرجع يلعب بالمسبح ..
سيف : يالبى السمي .. خلوه يمارس هواياته ..
مهره  : وانا ماقلت شي .. بس سيف .. على طول يمرض ..
سيف: طالعن علينا الله يحفظه ..
وراح يهرن ..
مهره تناظر الباب : لاتعجله .. توه جاي .. بيبدل ..
طلع فارس يركض .. وينزل العتب بسرعه وركب جنب ابوه ..وهو يلهث : سوري يبه .. بس خذت لي ترويشه سريعه ..

سيف مارد عليه حرك بالسياره .. مهره تناظر فيهم.. اثنينهم ..  بشورتات جينز وتشرتات ونظارات شمسيه ..
الوضع كيوت .. انهم ابو وولده ..
فارس شبك جواله بلوتوث .. بالمسجله .. وشغل اغنية اجنبيه ..
وسيف كذا جكاره .. طفاها ..
فارس راح شغل اغنيه ثانيه ..
وسيف طفاها ..

فارس بانفعال : يبه شفيك .. خلينا نسمع ..
سيف ببرود : مالي خلق لك ولا لذوقك المعفن ..
توسعت عيون فارس :الله .. زعلان علي يبه ..
مارد ..
فارس سحب يده وبرجاء: الا زعلك .. ياعقالي .. انا آسف .. تكفى .. سامحن .. وربي ماعيدها ..
سيف مارد عليه..
فارس بالحاح : والله جات كذا واضطريت امشي السواق .. وكان صعبه ادق استأذن .. بيقولون عني ..
قاطعه  : رخمه ..
فارس شهق : ترضاها علي ..
سيف سحب يده : ولما تعصاني .. ماهي رخامه ..
فارس :يايبه افهمني كلها ماك  .. ومعاذ معه سيارته .. ماني بزر يبه ترى كبرت ..
سيف بحده : ومعاذ ال**معه رخصه ..
سكت فارس ..
مهره ابلعت ريقها ..
كمل بنفس الحده : تدري اني ناهيك تركب مع اي واحد من المدرسه ..بس والله لو تليعنت معي يافارس .. بتكمل دراستك عندي هناك بلندن ..
فارس انفجع: شدعوى يبه .. حصل خير ..
سيف ياخذ جواله .. وبيدق رقم:
لا تصدق بكلم وليد .. يشوف التسجيل هناك ..
سحب الجوال من ابوه : والله ماتدق عليه .. عاد خالي وليد مايبيها الا من الله ..
سيف بحده  :والله عنده وجهة نظر .. قايل الثانويه خله يدرس هناك .. بس ماش.. انا الكلب اللي ماطيع ..
فارس سحب يده وباسها وبرجاء: محشوم يبه .. لاتقول عن نفسك كذا ..
سيف بيسحب يده وفارس ظل يبوس فيها : والله ماهدها الا اذا سامحتني ..
سيف يسوق .. وترك يده عنده ..
ومهره خلاص بتدمع عيونها على فارس .. كيف يبوس في يده ويترجاه ..
فارس يستجدي عطفه .. ويتكلم بصيغة شخص ثاني يتوسط له:
سامحه .. مسكين .. سامحه يتوب . والله مايعيدها .. تكفى سامحه يتيم ماعنده أم ..
خلاص هنا سيف حس بغصه في حلقه... (ورب الكعبه ضرب فارس في اشد الأوتار ضعفاً في قلبه) ..
وقف بسرعه بجانب الطريق .. والتفت عليه وبانفعال  : ياحيواااان مو كذا..

ناظره بعيون شاخصة ..يتفقد آثار اليُتم ..وانكسارات الفقد في وجهه ..
سحب راسه واحضنه ..
فارس رفع راسه له وبنظره خبيثه: عرفنا كيف نطحن اللي براسك..
كفخه على راسه.. ودفعه عنه: لاتكرر هالكلام وجع ..
فارس يحك راسه : اححح .. بعد انت ساحب ماترد ..
سيف : واذا مارديت .. تقعد تستخدم اسلوب الشحاذين ..
مهره ورى ساكته .. وانفعالاتها تتشكل مع هالاثنين ...بكوها .. وتروها .. وضحكوها ..
وكانت تفكر سيف ناسي تواجدها بالسياره .. لمن وقف بشيشه وقال: وش تبين مهره من البقاله ..؟!
مهره: مويه ..
:وبعد ..؟
مهره: بيرة شعير ..
نزل ..
فارس: وانا قول لي وش تبي ..
سكر الباب في وجهه ولارد عليه ..
فارس:يالله معصب الابو ..
مهره:والله ما انت صاحي يافارس .. جننت ابوك ..
ضحك وهو يفر عمره جهتها ويفسخ النظاره:وش رايك .. شفتي كيف جبت راسه ..
مهره: بس مايصلح تستقل نقاط ضعفه ..
فارس:ما ألجئ للاسلوب ذا الا لمن تتقفل السُبل ..
مهره : والله عيار ..ايش هالاسلوب تلح تلح .. وفي النهايه تكسره بذا الكلمه ..
فارس : عاد لاتحسفيني ..
مهره: الا باين تأثر ..
استعدل : لا ماعليك اروقه الحين ..
دق جوال .. سيف .. خذه فارس ورد : هلا نوف ..وش تبين ..؟!
سمعته مهره وهو يقول بتهكم : ايش اقول يعني ..ماما نوف ..؟!
فارس وهو قاعد يعبث في التكيف والمسجل :لا ماراح يجيك اليوم .. اليوم لي ابوي ..
توسعت عيون مهره وهو يقول : والله عاد .. هذا آخر الحتسي .. مستعد ارمي نفسي من السطح واقلبها عزاء بس مايجيتس ابوي اليوم ..
مهره قرصت كتفه ..لا ارادي .. تنبهه ..
ضحك ..
بعدين قال: لا مامزح معك .. انا اضحك .. مع مرت ابوي الجديده ..
جلط نوف ..!!!!!
مهره انهرته: ياحيواااااان .... !!!!!!
نوف خلاص انهارات خاصه اسمعت الصوت .. وتبي تفسير .. وفارس جننها .. مره ينفي ومره يأكد .. ويوم لمح ابوه طلع من البقاله قفل في وجهها .. وقفل الجوال .. وحطه .. كنه ماسوى شي ..
مهره بانفعال: بقول لابوك .. مانت صاحي والله ..
فارس ميت ضحك .. ويمسك في فكه يحاول يسكت: امانه لاتقولين .. انا اعلمه بعدين .. بس خل الساحره تتواكل شوي ..

فتح الباب ودخل ..
وحط الكيس بحضن فارس : في شغلات لسيف .. لاتلعب فيها ..
طالع الكيس حلويات وشبسات: والله مايصلح كذا ..الحين انت لما تجيب لهيا خاتم .. تجيب لنوف صح..؟!
سيف وهو يسوق : طيب ..؟!
فارس: المفروض جبت لي نفس سيف .. وين العدل ..
سيف : اعدمته جوي .. وتبين اكافئك ..
فارس يحط اغنيه .. وبشطانه: اعرف شلون اضبط جوك .. اسمع عبادي .. شيقول اهداء..
وحط اغنية (من عذابي .. قلت لعيونك هلا .. ياهلا بك ياعذابي ياهلا ) ..

سيف .. و يطربه عبادي .. طول الصوت شوي ..
كانت الاغنيه دوم توديه لعيون نجود ..
بس كان يبحث عن عيون نجود .. بمخه ..
ولايلقى الا عيون مهره .. بمراية السياره ..
كانت شارده تناظر من النافذه .. !
وكل ماتحاشى .. يناظرها ..
رجعت عينه غصب عنه .. لعيونها ..
عيونها حزينه .. ضايعه .. شارده بعيد .. كيف لعينان تحمل كل هذا الكم من الجمال .. ان تحزن بهذه الطريقه الظالمه ..
كيف لمهره .. ان تبدي عكس داخلها .. كيف تكون مغلفه .. بهذا الشكل العجيب .. محصنه دواخلها .. تمزح .. وتسخر .. وداخلها الكثير ..
عقد حجاجه ..
وهي تمسح زوايا عينها .. من دموعها اللي خانتها .. !

وصلوا المزرعه .. وقبل ينزلون ..فارس مد جوال ابوه له :يبه .. ترى دقت نوف .. وصرفتها ..
خذ الجوال .. وشافه مقفل : كيف صرفتها يعني .. متى اتصلت ..
فارس: وانت بالبقاله .. وعطيتها خبر ..انك ماتقدر تجي اليوم ..
سيف من بين اسنانه: وبس .. ؟!
فارس فتح الباب يبي يهج: ايه بس ..
سيف: ومادام بس .. وشهولا قافل الجوال ..
فارس توهق: قلت لها انك اليوم لي .. يعني خير وانا مالي حق فيك ..
ونزل رجل من رجوله ع الارض ..
سيف بتهديد : تعال تعال .. يا **.. وش هببت ..
مهره ضحكت : النحشه فارس ..
فارس : كنت امزح معها .. وكذا ..وقامت تبكي .. وجاتها نوبة هستيريا ..
سيف خلاص يبي يذبح فارس : ياكلب وش قايل لها ..
فارس: انا ضحكت لمهره .. وتفكرني اضحك لها .. وقلت لها انا مع حرمتك الجديده .. ومهره كملتها قالت لي 'حيوان' وهي سمعت .. انهارت .. قفلت في وجهها ..بس ..

ونزل وانحاش واهو ينادي  : يمااااه ...
سيف ضغط جبينه يستغفر .. ويتعوذ الشيطان .. لايذبح فارس ..

******