لتنسون التعليق بين الفقرات والتصويت للبارت والمتابعة للحساب حبايبي
للتواصل انستا / zahraaahmedn99
___
مهيائيل
الكاتبة(زهراء احمد)
___
: انتَ منو وشنو تريد من عندي؟!
: شنو رايج انتِ؟
: بس اني مسويت شي الله يوفقك خليني ارجع للبيت امي منتظرتني هسه واكيد خايفه عليه.
: ليش طالعه من البيت هيج وقت؟
: رحت يم بيت عمي امي دزتني عفيه والله بابا ميقبل اذا شافني واگفه يمك.
: راح اعيفج بس كولي شنو اسمج بالأول؟
: ايريم
: وهسه عوفني الله يخليك.
: الله لايخليني اذا سويتها.
: ليش منو انت شنو تريد من عندي؟!
: اني مهيائيل..
رجل قادم من أسفل العوالم
لايؤمن بالدين ولهُ قانون صارم
مع الشياطين نائم
والجن أوفى الخوادم
في قلبه قسائم
لقتل كل انسان حالم
لديه عنوان حازم
بلون الأحمر القاتم
عمله في ظلام
والناس نيام
يحيك لهم الألام
ويدبر لهم الأثام
يقتل كل بريئ حلام
ويدنس كل طاهر بالأجرام
يصنع من الدمى سموم
للأبدان والعظام
ويدمر قلوب كانت لرب العباد قيام
هدفهُ ليس الا قتل تلك البريئة بمنتهى العشق والغرام
وانت نخلقتي حتى تبتلين بيه ومحد يكدر ينقذج من بين أيدي.
مسويت شي والله حباب عوف أيدي لا ادعي عليك وربي ميرجعني خايبه.
ضحك بصوت عالي ضحكه ارعبت كل اوصالي حسيت رجليه عظم يضرب عظم خفت حيل من عنده تحيطه هاله مخيفه تجبرك تكون مطيع وخاضع اني اللي مطخيت راس لأحد خلاني ارتعد خوف فقط من لزمة ايدة،
صفن بوجهي شويه بعدين ابتعد لفت انتباهي بزونه سودة ماعرف من وين طلعت صارت تمشي بصفه خليت أيدي على كلبي وأخذت نفس عميق هاي هم سالفه امي تسويها وطلعني هيج وقت حتى اجيب خبز من بيت عمي.
فتحت الباب ودخلت خليت الخبز على الميز بالمطبخ ورحت لغرفتي بعد متوضيت وحضرت نفسي لصلاه المغرب بعد ساعه تقريباً الها بس اني متعودة اقرأ قرآن حتى لو عشر صفحات باليوم من صدك راحه نفسيه وشعور انو رب العالمين محيط بيك وقريب من عندك موجود وياك طول اليوم كملت وقريت القلاقل الاربعه ( التوحيد، الفلق، الناس، الكافرون ) وايه الكرسي خمس مرات للحفظ حتى ثاني يوم الصبح ودعاء الايام بقيت هيج إلى ان صار وقت الصلاه كملت صلاتي ورحت ساعدت ماما بالعشا ،
بعد هذا الروتين العبادي حسيت نفسي ارتاحيت حيل وبطلت افكر بيه او اخاف من عنده،
احنه متعودين نجتمع دائماً على السفره خاصتاً وقت العشا اني وبابا واخويه أبيل وعندي اخت صغيره بالصف السادس ابتدائي اسمها استاج وبابا الله يحفظه هو وماما،
روتين حياتي كلش طبيعي مبي شي مهم بس تغير كل شي من بعد هذا اليوم،
خلصنه العشا ومن التعب مسويت شي من أعمالي حتى متوضيت بسرعه خليت راسي على المخده ماعرف ليش خطر على بالي فجأة منو هو هذا الشخص وشنو يريد من عندي والله شغله تحير؟!
مكان أظلم مبيه احد بس أصوات بزازين عاليه شفتهم اربعه داير مدايره واكفين عيونه غريبه او وعلى شفته ابتسامة تخوف حسيت نفسي بفلم رعب عقلي توقف عن العمل هو واطرافي الساني نخرس ومكدرت انطق ولا كلمه حسيته متحكم بيه ويحركني مثل ميريد تقدم ناحيتي ومال راسه للجهة اليمين صغر عيونه وابتسم همهم بكلمات مفهمتها بس اكو شي داخلي صار ماعرف شنو هو،
ألم، خوف، سيطره من عنده، اكو جزء من عندي أعلن استسلامه وبقيت انظرله بدون حيله ما أكدر اتحكم بشي عدا النفس اذكر كلمه كالها وهو لازمني من وجهي وراسه يم أذني.
مهيائيل: خمسة.
ابتعد وهو مبتسم طلع من الغرفه وتبعته البزازين للحظه حسيتهم حمايته.
فزيت اتنفس بصعوبه اكو شي مخيم على صدري حمل ثكيل ماعرف شنو هو ومن وين بس الحلم بعده أبالي نفس الشخص وذات الهاله خيم على كلبي الرعب بسرعه تذكرت اني مقارية اليوم اي سورة وحتى ممتوضيه لهذا السبب حلمت هيج بسرعة نهضت من مكاني ودخلت الحمام غسلت وجهي ورفعت راسي للمرايه حتى اتوضه شفت خيال أسود بلعت ريقي كملت بسرعه وطلعت ركض للغرفه حاولت اقرأ الايات اللي حافظتها فجأة نسيت بقيت ارجع اعيدها بس ما أكدر اكو شي مربط الساني عن النطق أديه صارت ترجف وعيوني ماعرف شنو بيها اكو شي غريب وماعرف هو شنو مسيطر عليه بالكامل ميخليني أكدر احرك جسمي بسرعه رجعت للجربايه ونمت الأحلام المربعه مفارقتني،
أصوات غريبه ومخيفه بأذني اكو شخص يحجي ويايه بلغه ما افهمها احس مسيطر عليه حيل ويحركني مثل اللعبه، أيد تلامس وجهي بس ماكو احد يمي، فلم رعب على أرض الواقع جانت من اسوء إيام حياتي اللي عشتها قطعت الصلاه وتركت العبادات وحتى اكل ما اكل، المرايه بتعدت عنها تمامآ لان بس اتقرب من عدها اشوف خيال أسود حاضني احس بي اعرف اكو شخص يشاركني الغرفه بس منو ماعرف وخايفه من عنده حيل،
اصعب المعارك هي اللي تخوضها وي جهه مجهوله متعرف منو العدو وشنو يريد وبأي وقت يهجم والسلاح المستخدم غير معلوم شلون تكدر تنقذ نفسك بهاي الحاله وانت تعرف ماكو سبيل للخلاص؟؟
خلصت هاي الايام واني صرت بالفراش ما أكدر اتحرك لأي مكان وسائت حالتي اكثر، اهلي سوو كل شي حتى اصير احسن متركوا دكتور ولا مستشفى مرحنالها وكلها تكول نفس الجمله.
( اذا اني مريض هي مريضه)
امي تكعد يم راسي وتقرأ قرآن صوته يزعجني صح بس الساني منعقد ما أكدر احجي ابقى اهمهم بس هي متفهمني على بالها أرتاح فتعلي صوتها اكثر ومن تسوي هيج اكو طوق يخنكني حيل والظلام يصير على اعيوني واتخيل اشياء مرعبه،
خلصن اربع ايام الليله الخامسه جنت نايمه وحلمت بيه لابس ابيض ابتسم بوجهي وتقرب يمي واني نايمه على الجربايه مرر اصابيعه على وجهي وفحص ملامحي بعمق بعيونه بعدين التفت للجهة اليسره وبقى يهمس بصوت ناصي وي شخص بس ماكو احد وكأن يحجي وي جن بقى هيج بعدين تركني وطلع بس الغريب اليوم مشفت بزونه يمه،
كعدت الصبح على صوت امي وهي تحجي ويايه.
تسنيم: ايريم يمه اجت جوارينه ام مقتدر وتريد تشوفج تكدرين تجين ويايه جوه وهم تغيرين جو راح يصير اسبوع وانت على هاي النومه حتى دوامج مرحتيله.
مكدرت احجي واجاوبها اخذت نفس بقهر وطلعت نزلت دموعي لشوكت راح ابقى هيج وهذا شنو يريد من عندي ليش يسوي ويايه هل شكل؟!
اشويه واجت ام مقتدر اول مشافتني بسرعه كالت.
ام مقتدر: على بختج هيج صاير بالبنيه ولسه ساكته؟!
تسنيم: شنو تردين نسوي واحنه ماتركنا دكتور يعتب علينا؟
ام مقتدر: اي طبعا مطيب لان حالتها مو مرض.
تسنيم: عزه لعد شنو؟!
ام مقتدر: بنتج مسوالها عمل ومبين من شكله قوي حيل لحكي عليها قبل متروح من ايدج خيتي.
تسنيم: اني ماعرف احد يعرف بهاي السوالف وابوها مايؤمن بيهن شلون هسه ياعيني؟
ام مقتدر: محلوله يمي وره فرعين اكو رجال يشتغل بهاي السوالف خوش رجال ومعروف يكلج يعالج كل أنواع السحر وطلباته كلش بسيطه معروف بطيبه كلبه متأكده يكدر يساعدها.
تسنيم: منو هذا صار سنين عايشين اهنا ليش مسامعه بيه؟!
ام مقتدر: اي حقج متسمعين هو مصارله شهرين من نزل اهنا جان بغير منطقه المهم هسه العصر اجيج وناخذها هو يعالج المغرب قنعي زوجج وخلي نلحك عليها قبل ميصير بيها شي والندم بعد مينفع.
خلص اليوم وصار العصر ماما قنعت بابا حتى تاخذني لهذا الشيخ اجت ام مقتدر وامي لبستني شالي وساعدتني بتغيير الملابس مكدرت امشي خطوة فصعد بابا شالني ونزلني للسيارة دقايق قليله وصلنه الباب مالته اول منزله صار هوه قوي بوجهي وسمعت صوت ضحكة غريبه من الداخل رجفت جسمي داخلي يكلي ارجعي بس شلون وهن مقيداتني بأديهن واني اصلاً ما أكدر اتحرك وحدي؟
اول مخليت رجلي على العتبة مالت الباب طلعت بزونه سودة وركضت ناحيتي سمعت صوته وهو يصيح وكأن عرف احنه دخلنه.
مهيائيل: بس المريضه والأم لتدخلين ام مقتدر.
ام مقتدر: تدلل شيخ.
تسنيم: ليش ياعيني مدخلين اني ماعرف ادبرها وحدي بعمري مدخلت هيج أماكن.
ام مقتدر: تردين يلبسني جني يمعوده ميسويلج شي اطمأني هسه ينطيها حجاب ومي تسبح بيه وهاي هي ليش هذا الخوف؟!
تسنيم: ولو كلبي مامرتاح بس ادخل وامري لله.
دخلنه منتبهت للبيت بشكل جيد بس لاحظت الغرفه الكاعد بيها ريحتها كلها بخور وعطرها يجنن والمكان حيل نظيف ومرتب للحظة حسيت انو هو إنسان أدمي بس كل ظنوني خابت من بده يكول.
مهيائيل: بنتج بنهايه ايامها حضرو نفسكم راح تموت عن قريب.
تسنيم: يمه عزه بعيني ليش اسم الله شنو بيها؟
مهيائيل: بوقت المغرب تلبس بيها جني وهذا النوع خطر حيل اذا تعلق بالشخص يسيطر على كل اعضاءة ويصير صعب نتخلص من عنده بسهوله وهذا حال بنتج هسه ما أكدر اطلعه من عدها مو بس اني ولاساحر يكدر يخلصها من اللي ابتلت بيه.
اعذريني ما بأيدي شي أقدمه.
تسنيم: ماكو حل ابد الله يوفقك سوي اللي تكدر عليه شنو ماكان بس المهم ميصير عليها شي واني شنو تريد انطيك حتى إذا اطلعه من جسمها تلبسه بيه.
مهيائيل: ماقبلتها من عندج اني مو انسان سيء لهاي الدرجه حتى اسوي بيج هيج انت بمثابة الوالدة الله يحفظها.
تسنيم: لازم اكو حل ماكو مرض ما اله علاج.
مهيائيل: اكو بس ما اعتقد تقبلين بيه لان صعب ومتتحمله وانتوا هم مستحيل تقبلون بيه.
تسنيم: شنو هو نقبل بيه صدكني المهم سلامتها.
مهيائيل: عندي جنيه متلبستني وهي متلبسها جني اذا كدرنه نجمعهم سوه ترجع صحتها مثل ماهي واحسن هم.
تسنيم: شلون يعني مفهمت؟
مهيائيل: لازم اتزوجها حتى أكدر اجمعهم سوه.
تسنيم: يمه اسم الله شنو تزوجها؟!
مهيائيل: اني كتلج مراح تتقبلين علاجها ولهذا السبب ما أكدر اسوي شي الواضح بنتج حيل متدينه لذلك تحملت كل هذا العذاب غيرها يومين ميتحملون انتوا احرار اذا تقبلون لو لا بالنهايه هي بنتكم وانتم اعرف بمصلحتها من عندي.
تسنيم: حتى لو اني قبلت ابوها واخوها مستحيل يقبلون شيخ الكي غير حل الله يوفقك.
مهيائيل: راح انطيج حل خلي الموضوع بيناتنا واني اجي اخطبها مثل أي بنت عاديه ويبقى دورج تقنعين الأهل.
تسنيم: ومستقبلها شلون؟
مهيائيل: هدفي اعالجها مو اكثر ولخاطر جيتج ولان انت عرف ام مقتدر اني هاي الحلول ما انطيها لأي أحد بس للأشخاص الغالين عليه.
تسنيم: تدمر حياتها بهذا الزواج مو؟
مهيائيل: تكدرين تكولين ترجع حياتها وصحتها افضل ماتموت كدام عيونج وانت منتظره حل أكدر اجزملج ماكو احد عنده علاج للي هي بيه غير اللي كلته.
وقبل متفكرين خليني اشوف حياتها القادمه شنو مخبيه الها.
لزم أيدي وماعرف ليش ابقى جامدة من يسوي هيج ومانطي اي رد فعل مثل التنويم المغناطيسي تماماً هيج تاثيره عليه فتح كف أيدي وصغر اعيونه بقى صافن شويه شفت اكو خيال أسود واكف قريب يمه خفت حيل وسحبت أيدي بس هو لازمها بقوة نزلت دموعي والمشكله ما أكدر انطق مخرسني فد مره،
رفع عينه اليه وخزرني رجليه ماتوا وبطلت احس باطرافي بعدين شويه ابتسم وكال.
مهيائيل: اهدأي مجرد ناخذلج خيره ونشوف حياتج الجايه شنو ظامتلج.
اي يا ايريم كدامج طريقين الأول اسود ومظلم مليان اشواك ومصاعب والثاني حياة طبيعيه مثل أي شخص عادي بس من سوء حظج بديتي تمشين بالطريق الأسود اللي مابيه وجهه محدده ومامعلوم شوكت تكون النهايه لذلك حظري نفسج مجرد ايام معدودة وتعرفين قصدي باباتي.
تسنيم: ارخصنه شيخ لازم نطلع تأخر الوقت حيل.
مهيائيل: فكري ورجعي خبر وخلي ابالج اي تأخير مو بصالحها.
قبل ما اطلع سمعت همس بأذني كلمات مو مفهومه مثل الطلاسم بسرعه وكعت على الأرض وصارت الدنيا ظلمه بعيني امي صرخت وسمعت صوته قريب عليه يحجي وياها.
مهيائيل: صار المغرب هذا الوقت يسيطر على جسمها بيه بالكامل وعليه مراح تكدر تتحرك خليكم اهنا شويه واني راح اسويها حجاب تلبسه حتى تاثيره يقل هاي الفتره بس ما اوعدج يجيب مفعول لان الجني سيطرته اقوة من عندي.
دخلنه بغرفه ثانيه تختلف تماماً عن أول غرفه ريحتها تلعب النفس وبيها أصوات غريبه يمكن اني الشخص الوحيد اللي اسمع واشم لان امي عدها الوضع طبيعي،
كعد وطلع كيس فتحه ورمه اللي بيه على الارض يمكن طشه بيها عظام وماعرف شنو بعد مكدرت اميزهم او من الأساس معرفتهم شنو وعلى جانب ثاني جاب ورقه وقلم وبده يكتب ويرسم حسيت الغرفه تخنكني وما أكدر اتحمل وصارت عندي طاقه غريبه تخبلت فعليا وي كل جرة قلم يسويها ضربت امي وضربت نفسي وصرت اصرخ وماعرف شنو احجي بس اريد تطلع من عندي جملة مفيدة حتى امي اطلعني من هذا المكان اللي صار مثل السجن اليه بس بدون فائدة،
اصعب شي بالكون من تحس نفسك عاجز تماماً عن كل شي وما بأيدك تسوي شي غير تعاين نفسك شلون تمشي للهاويه برجليك وانقطعت حلول الأرض وبقى الأمل الوحيد برب السماء.
تقدم ناحيتي ولزمني من اكتافي وصار يحجي بطريقه غريبه بعدين جاب مي وانطاه لأمي.
مهيائيل: هذا لازم تسبح بيه واذا مصارت زينه اعرفي انو خلص تمكن من عدها بالكامل سويت كل اللي أكدر عليه وستصعبت جداً اخلصها من عنده اطلعوا من هذا المكان ولتلتفتين ابد هذا الوقت تتجمع بيه الشياطين وتصير مصيبتها اكبر اذا تعرضت للمس من شيطان ثاني.
المصيبه امي مصدكه بيه ومقتنعه ومتعرف انو هو اللي يسوي هيج وبدون ماعرف السبب بحياتي مملتقيه بيه ليش يعاقبني بهذا الشكل ماعرف!!!
بعض الأحيان يصير بطريقك شخص ينسيك عذاب حياتك باكملها ويصير هو العلاج لجروح كلبك واحيان ثانيه يجي عكس هذا الشخص تماماً ويغير ايامك السعيدة لوحده سودة معتمه وهذا اللي صار ويايه فعلياً.
تسنيم: امبين خوش رجال بس مع هذا ما أكدر اصدك بيه باجر من الصبح اخلي ابوج ياخذنا للزيارة اهناك اخليج بحضرة ابو فاضل هو يحلها.
ثاني اليوم الصبح فعلاً اخذني بابا وامي الزياره وصلنه تقريبا الظهر هم تغدوا بس اني لا بقت عيني تناظر المجهول، جسمي نحل تماماً وصرت وحده هزيله اذا واحد يخلي أصبعه عليه اوكع غير انو ما أكدر احجي وتركت كل الأعمال العباديه،
توجهنا للحسين عليه السلام اول مشفت قبته شخص وحاوط ركبتي باديه صار صعب حتى انو اتنفس وكعت على الأرض مثل الشخص اللي ينازع تاليتي انتهت بالمستشفى فتحت اعيوني ابويه وامي يبجون اول مشافوني بسرعه ركضوا ناحيتي.
تسنيم: وكعتي كلبي ياعمري فكرت بعد ما اشوفج مره ثانيه.
سنمار: على كيفج وياها هسه فتحت اعيونها بسرعه ذكرتي الموت!!
والدي رجل عشائري صعب نوعاً ما يعني ميظهر حبه النه الا في ما ندر لكن من تمرضت لحد الان متركني ابد أتقدم ناحيتي وخله ايده على جبيني وكال بنبرة حنينه.
سنمار: حاسه بشي بابا أصيح الدكتور يشوفج؟
أشرت برأسي بمعنى لا اشويه ولمحت ظل خطف من يمه بسرعه طفرت من مكاني وحضنت امي هو من شافني هيج طلع بسرعه مبقى يمي،
ايدها تمسد بيها على راسي وتحجي وهي تبجي.
تسنيم: ياريت ميته ومشفت هيج يوم اسود يمر على بنتي من عمري على عمرج يايمه وين مضمومتلج هاي النومه يروح امج وعمرها.
نزلت دموعي وحاولت احجي بس ما أكدر التزمت الصمت الواضح راح ابقى هيج اتعذب ومستحيل تخلص هاي الأيام بسهولة.
خلص هذا الأسبوع بصعوبه وحالتي صارت اسوء من قبل لدرجه حسيت امي من صدك تحضر نفسها لموتي كل هذا بكفه وكفه ثانيه اللي صار ويايه بنفس اليوم.
يتبع.
البارت قصير لكن اعتبروا بدايه للقصه،
ماكو موعد محدد للقصه وكأن المفروض تنكتب بعد الهَيْصَم لكن اسم القصه نسرق بالأضافة للفكرة مالت القصه وقبل ماتنسرق حقوقي ايضاً كتبتها وعليه تحملوني بتنزيل غير محدد حتى نختم الهَيْصَم.
تصبحون على الف خير شمعاتي.
حسابي الأنستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!