للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي مهيائيل مع بعض
مهيائيل
الكاتبة (زهراء احمد)
_______
أسيرة بين احضان شريرة
دموعها دواء لكل عله وداء
أراد قتلها في ليله ظلماء
ورقص على جثمانها بكل انتشاء
واستولا على جسدها استيلاء
فأراد الوصال إلى القلب بكل وسيلة نكراء
وصلاتها وصيامها وبقلب طاهر كان الدعاء
عسى أن يعم الخير على بيت شياطينهُ شنطاء
في كل وقت هي ساهره مكراء
ونست الأنفس ان الله حافظ من البلاء
الخاطره بقلمي
زهراء احمد
___
: انقطعت آمالي وي النفس من سمعت جايب اهله حتى يتقدم رسمي ردت اعرف شلون هيج صار معقوله امي رخصتني بهاي السهوله؟؟
زين ليش؟؟
اعرف هذا من خوفها عليه بس مو لدرجه تبيعني بهذا الشكل لشخص ساحر ومتعرفه وهو اصلا سوه بيه كل هذا لو سحره مجان صار هيج،
اصعب شي بالكون من تتعرض للاذى ومتكدر تنطق اهنا كل الحلول تصير صعبه لا حركه، لا نطق شلون اخلص نفسي من هذا الوضع والمصيبه هو عازم لدرجه اهله مطلبوا يشوفوني وكأن الموضوع مخطط اله من زمان،
الف فكره راحت هباءً منثورا من سمعت أصواتهن قريبه عليه، فرحتهم ولهفتهم مبالغ بيها لدرجه من تسمع راح تتأكد اكو شي غريب بالموضوع ومن اكبر الأشياء اللي قهرتني ومخليتني ما انام الليل هي عمله، انو ارتبط بساحر من أكثر الأمور المجنت افكر بيها حتى وبشكل فجائي صارت واقع حال دا اعيشه أو راح انجبر اعيشه بسبب امي،
طلعن وأجتني والابتسامة على وجهها وكأن شخص رجع منتصر من حرب، فرحتها مبالغ بيها مقابل الشي اللي راح يصير،
مو زواج وإنما اتفاقية لتحطيم حياتي من قبل أقرب الناس اليه وشخص عرفته عن طريق الصدفه أو ربما من زمان لكن اني ممنتبهه،
حجت بحماس وكأن عرسها مو عرسي،
تسنيم: اجوا اهله خطبوج ولج داده لو شايفه الاناقه والجمال امبينين اهل عز وكرم راح تعيشين حياة ورديه وياهم ، وطلع عندج حظ واخيراً وحده من بناتي تعيش احسن من عندي.
نزلت دموعي وحركت راسي بمعنى رفض اتقربت من يمي وضربت جبيني بأيدها وتحجي مقابله على رفضي وكأن مخطوبه لنبي معصوم مو ساحر.
تسنيم: عشتوا ليش مقابله داده شنو بيه ينرفض؟!
مال وجاه وسمعه طيبه وبيت عز ومعروف بالمنطقه ام مقتدر حجتلي عنهم وين تحصلين مثل هيج قسمه ياعيوني!!!
ابتسمت مستهزءه الرسول (صلى الله عليه وآله وسلم) يقول(من اتاكم ترضون دينه وخلقه فزوجوه) مجتمعنا صاير بالعكس اللي يجيك وعنده فلوس ومنصب زوجه وبالنهاية توكع بيها المرأة والأطفال وفوك غصبها على زيجة باطله شرعاً يخلون الحق عليها بالمشاكل والإهمال اللي تعيشه بعد جمع راسين بالحلال مثل ميكولون،
الناس صاير همها جيب النسيب مو اخلاقه وعلى هذا الأساس قيسوا مدا فضاعه وضعنا احنه البنات ومصيرنا اللي تحكمه الماده،
غمضت عيوني بتعب من وضعي الحالي ومستقبلي المجهول وشنو راح يصير ويايه بعدين وهذا مهيائيل شنو مضموملي وياه، تنفست و الضيق البصدري فضيع صار فتره طويله ممصليه، الصلاه جانت راحتي الوحيده وهسه هاي الراحه نحرمت من عدها بسببه، نزلت دموعي صايره بهاي الفتره ونيستي بنص هاي الوحده اللي عايشه بيها كل واحد ملتهي بحياته والكل راح الشغله ومتناسيني أو هم تعودوا على هاي حالتي فصار الموضوع عدهم مو مهم،
دخلت باسوء عالم ممكن تعيشه اي وحده شفت ظل اسود قريب من جربايتي كلما يقترب يزيد الخنكه عليه ويصير تنفسي صعب حيل إلى أن وصل يمي مجانت أيد وإنما خيال اقترب من ركبتي وضغط عليها بقوة مكدرت اصرخ لان اصلاً صوتي بالطبيعي مختفي مابالك بحلم أو كابوس على شكل حلم،
قرب راسه وهمس قريب أذني.
: وافقي.
فتحت عيوني بسرعه وكلبي ينبض سريع من الخوف معقوله جان حلم لو حقيقه عشتها على شكل تهيئات من الأفكار والخوف اللي صابني بهاي اللحظه نسلب من عندي النوم بقيت كاعده وعيني على الحايط اللي كل دقيقه اشوف بيه ظل اسود اول ايام خفت حيل بس هسه حسيت نفسي تعودت هذا السحر مالته هو هيج مسوي بيه واني اعرف تأثيره حيل قوي جنت قبل مطلعه على هاي الأمور لذلك متفاجأت ابد من اللي صارلي خلال هاي الفتره،
نزلت دموعي اللي هي انيسي الوحيد على حظي العاثر الوكعني بأيد مجرم بدون ذنب حرام،
سمعت صوت حركه قريبه من الباب جسمي ميساعدني حتى انهض من مكاني واشوف شكو بقيت على وضعي إلى أن انفتح ودخل واحد الدنيا ظلمه لذلك مكدرت اعرف منو هو سوا صوت خفيف مال رجلين وخطوات قريبه كعد على أطراف الجربايه ولمس أيدي عرفته منو ابتسمت بقهر صايره اشتاقله هاي الفتره حجه وغصه جبيرة واضحه بصوته.
أبيل: شلونها بنيتي اليوم؟
حركت أيدي بصعوبه وكدرت اضغط على ايده برقه لان صعب حيل اتحرك اعاني من شلل غير مرضي حسيته رفع أيدي لوجهه وقبل باطن كفي حنين حيل هو اكثر شخص بهذا البيت لطيف وحباب ويايه من بعد بابا الله يحفظه رجع كمل كلامه أو واضح نبرة التأنيب بصوته.
أبيل: اعرف اللي اسويه امي غلط بس ما أكدر اردعها خاصه لو الموضوع يخص سلامتج ابقى عاجز عن التفكير واتخاذ قرار سليم بنفس الوقت ما أريد اجازف بحياتج ، بقيت محتار بين سلامتج وبين زواجج ماعرف إي القرارين صح بس عقلي يكلي كلشي ممكن ينحل بما انو تبقين عايشه.
صفنت بوجهه شويه ونزلت دمعتي هو ميعرف انو كل الكلام اللي انكال جان عباره عن كذب بس علمود اصير أسيره لعشق شيطان مصيري وياه مجهول وقدري اسود فهم عليه من نظرتي بعض الأحيان النظرات الها مفعول اكبر من الحجي.
أبيل: اعرف بشنو تفكرين وصدكيني اني مثلج ما مقتنع اصلا بكل الكلام السمعته وراح أحقق بالموضوع وعائلته واصله وكل شي يخص حياته بس ماعرف اذا أكدر اوصل لكل هاي المعلومات خلال فتره قصيرة لو لا.
عقدت حاجبي شنو قصده فتره قصيرة ليش شوكت ناوين يزوجوني؟
كمل كلامه وهو ينظرلي بحزن جبير.
أبيل: امي مكلتلج؟!
نزلت دموعي هي الجواب الوحيد بوسط هاي الحاله العايشه بيها هسه همهم بحزن وكال.
أبيل: زواجج حيكون بعد العقد المقرر يوم الإثنين امي خايفه على سلامتج قنعت الوالد يوافق حتى بدون ميسألون عليه واذا تسألين وبداخلج عتب ليش مكدرت اسوي شي فالجواب واضح اهلج مخلو بأيدي إي حل اني عاجز تماماً بهذا الوقت واكيد عجزي هذا مراح يستمر فتره طويله مستحيل اسمح تبقين عايشه أبيت تمليه الشياطين والجن.
نهض من مكانه ومشى بخطوات بطيئه وصل للباب والتفتلي وكال.
أبيل: راح يجون علمود الكعده ويصير العقد مالت السيد يوم الثنين هو والمحكمة طلبوا كل شي يكون بسكته امج مراح تعزم احد وهذا الشي افضل حتى متنحرجين كدام الضيوف واني راح أسعى اعرف معلومات عنه واسأل عن سادة اكثر يكدرون يعالجوج قبل منتورط.
طلع من يمي واني صفنت ليش هيج يصير ويايه اني بالذات شنو الحكمه من هذا الامتحان الرباني؟
اخذوني بهاي الفتره لكومة سادة واطباء وكلها تكول مابيها شي الغريب بالموضوع شلون كدر يسيطر عليهم كلهم بسهوله لو اكو شي سر ثاني محد يعرف بيه؟
أبيل: الوو.
بتال: ها بعد روحي.
أبيل: مهيائيل كاعد بالمنطقه الساكن بيها اكيد تعرفه أريدك تجي ويايه نسأل عليه ونجيب معلوماته.
بتال: السحار هو نفسه؟
أبيل: اي ليش تعرفه؟
بتال: كل المنطقه تعرف بيه سحار مشهور هذا.
ابيل: ليش اني ماعرفه لعد؟!
بتال: انتوا ناس مؤمنين وين تعرفون بالسحر اسم الله.
أبيل: سمعت من امي تكول منتقلين جديد اهنا فشلون عرفته؟!
بتال: سحار عزيزي تعرف شنو يعني؟ بأي مكان يكعد لازم يصير ترند بالمنطقه.
أبيل: المهم اذا تكدر تسألي عليه اكون ممنونك.
بتال: اذا أكدر ليش لا ادلل بس شنو تسوي بيه بس لاتريد تسوي عقد السان؟
أبيل: خطب اختي.
بتال: بشرفك!!!
أبيل: ليش متفاجئ؟!
بتال: سحار هذا ولك شغله كله وين الجن معقوله تريد تزوجوها لهيج شخص!!!
بعدين ليش لحد الآن مصارت زينه لكم سيد اخذتوها لحد هسه معقوله ولا واحد بيهم وكف على علتها وهذا مهيائيل شنو دخله بالموضوع؟!
أبيل: الشغله مو بيدي بعدين اسولفلك المهم اريد معلومات ضروري مبقى شي للعقد بلكي اكدر الغي الموضوع من وقت قبل الندم.
بتال: ان شاءالله ادور عليه ومايكون خاطرك اله طيب بعد شنو تريد.
أبيل: مشكور خويه متقصر ربي يديمك.
بتال: ازعل من عندك اخوه احنه قبل منكون اصدقاء.
أبيل: مع السلامه.
بتال: بحفظ الرحمن.
___
رائف: هذا الخبل شنو يريد؟
بتال: يريد معلومات مهيائيل.
رائف: يريد يندك وي الجن هاي المره حلوو.
بتال: خطب اخته لهذا السبب هو داك رجل يريد يعرف.
رائف: سحار خاطب اخت أبيل؟!
بتال: ليش متدري؟
رائف: ليش شايفني اشتغل وي مهيائيل حتى اعرف بكل صادرة او وارده؟
بتال: المهم يريد يعرف من اجيب معلومات ما ادري ماعندك طريقة تساعدني بيها؟
رائف: شنو اسويلك مثلاً؟
بتال: نروح نسأل عليه برأيك اكو حل غير هذا.
رائف: شوف حبيبي اني ما ادخل نفسي بسوالف الشعوذة والسحوره هو اني بنص عقل تريد تخبلني فد مره؟!
بتال: ما مرتاحلك اني ابدد.
رائف: شايفني اشتغل رقاصه بنص الليل شو كايم تمسلت انت يحتاجلك سحر حتى ترجع تمشي عدل مثل ميل الساعة.
بتال: ومنو يسويلي؟
رائف: منو غيره مهيائيل.
___
تالين: انت من عقلك هيج تسوي شارب شي انت؟!
مهيائيل: صوتج.
تالين: معليك بصوتي كُلي شنو هذا الموضوع الجديد من شوكت انت تسوي شي بدون علمي؟!
مهيائيل: هه ليش منو انت حتى اخذ رأيج بله!!!
تالين: كبرت وصرت تلعب بذيلك عبالك ما اكدرلك يعني؟!
مهيائيل: اكو باب وراج لونه اسود سدي من تطلعين لاتصير حياتج اغمق من هذا اللون وتعرفين عدل اذا خليتج بعقلي شنو يصير.
تالين: تهددني!!
هين اني اراويك شنو أكدر اسوي حضرة الساحر.
مهيائيل: لتندكين بيه احسن ما اخليج تهزين ركبه بنص الفاتحه.
تالين: تهدد السمجه بالمي!!
متوقعتك بهذا الغباء لتنسى انت منو واني منو، حكم عقلك وفكر عدل بالكلمة قبل متحجيها لا وجل جلاله اخبلك مثل مخبلتها.
مهيائيل: من شوكت صرتي تعرفين القاب وأسماء لرب العباد؟!
تالين: عفت كل كلامي ركزت على هاي!!!
مهيائيل: ماتعودت اسمع مسلته من احد اعذريني.
نظرتله بعصبيه وحقد اجيت اطلع استوقفني وهو يكول.
مهيائيل: شوفي يا تلونه ايام زمان ولت وعفى عنها الدهر واحنه ولد اليوم القوة اختلفت والطاقه هم وخدامي اكثر من خدام زوجج ومطيعين ويسمعون كلمتي بدون اسأله يخافون وينفذون لهذا السبب هم مفيدين اليه اكثر من وجودج بهاي الحياة وياريت وصلت الرسالة.
غليت من القهر التفتت اله وحجيت بعصبيه.
تالين: انت منو مفكر نفسك حتى تهددني بالقتل تعرف مجرد نطقك لهاي الجمل يوديك بستين داهيه لو لاا؟؟
مهيائيل: لا اهنا دخلنا بالصندوق الأسود هل ياترى مرت الأب خايفه عليه واني ماعندي علم؟!
غيرت نبرة صوتي واني اتمنى يخضع ويقبل يسمعني بدون اعناد.
تالين: بعدها بنيه صغيرة ليش تحطم حياتها ودمر برائتها انت مو شخص ينعاش وياه حرام عليك تلعب بنات الناس باجر تطلع بأهلك مهيائيل.
مهيائيل: له له له هاي انت هيج صرتي تحجين ماعرفتج، شوفي زوجة ابويه مو كل الناس مثل زوجج الحلو احنه زلم بس لنسوانه منلعب يمنى يسرى بعدين تصير خيانه وكل شي ولا هذا الطريق حسب كلامج فهو حرام.
تالين: تستهزء حضرتك؟!
مهيائيل: ايريم هي خطيبتي ومبقى شي على انو تصير جنه بهذا البيت وجزء منه وزوجه الابن الثاني لهاي العائلة الموقرة واتمنى من اعماقي انو متدخلين، كافي انو رحتي وخطبتيها وإهنا انتهى دورج، وهسه اتفضلي بلا مطرود عندي اتصال مهم.
طلعت واني معصبه من اسلوبه شلون شايف نفسه علينه وهو كله على بعضه خلك ساحر حقير يضحك على عقول الناس ويستفاد بروسهم.
___
مهيائيل: ألوو.
: ياهلا بهل صوت مشتاقين ياجميل شلونك شخبارك شكو ماكو وين هل غيبه لاتسأل لاتستفسر متكول عايشين ميتين هيج الحب يسوي بالواحد!!!
مهيائيل: احجي عدل وكول ليش متصل؟
: تعودت على نفسيتك الخايسة مو مشكله مع هذا راح احجي، عندي ألك خبر تموت عليه بس لازم تكلي شنو استفاد لو حجيته ألك تعرف اني احب افيد واستفيد.
مهيائيل: ميحتاج اخوها يدور عليه منتظر صديقك الحلو يجيب معلومات وصله رسالتي احنه نلعب على الناس محد يكدر يلعب علينه.
: خوش ادلل بس مكتلي شلون عرفت هيج ردت اكول؟
مهيائيل: طول عمرك غبي مو جديده.
: مو صوجك صوج اللي يحجي وياك يلا باي.
مهيائيل: لحظه.
: خيرك.
مهيائيل: عيف دروبك التعبانة ورجع للبيت مبقى شي للعرس وأريدك حاضر.
: تأمر كم مهيائيل عندي اناا.
___
: صار الصبح كعدت على صوت العصافير فتحت عيوني بتعب روتين يومي وحياة ممله دراستي تركتها وصاير وضعي اسوء من السيء حسيت بخنكه قويه من تذكرت اليوم المشية و العقد من اليوم راح اعيش ايام تعيسه محد يعرف بيها غير رب العالمين، نفضت الأفكار من عقلي من سمعت صوت الباب ينفتح ودخلت امي، بهاي الفتره المرت هي تساعدني بكل احتياجاتي الشخصيه ما أكدر انكر معروفها ويايه بس بنفس الوقت اللي تسويه هسه اكبر خطأ شلون تثق بشيطان وتسلمه ركبتي صحيح خايفه عليه بس اني افضل الموت على انهُ اعيش هيج حياة ملعونه.
الوقت يمشي بسرعه يركض ركض احساسي هسه مثل شخص منتظر المحكمة تعلن اعدامة وهو بريئ شعور الظلم ميفارقني ابد، ليش هيج صار ويايه وشنو السبب اللي يخلي ساحر ينعجب بوحده مثلي وياريت اني وهو ملتقين بعمري كله مشفته غير مره وحده وجان يوم اسود تمنيت بيه مطالعه أبد،
رجعتني على الجربايه وطلعت ماعرف وين بقيت افكر وصفنه تاخذني وثانيه ترجعني، أستسلم داخلي وايقنت زواجي واقع لامفر منه بجيت وندبت حظي ولمتهم كلهم من صعدتلي وبيدها بطل مي صغيرون فتحته وشربتني اياه بعدين يلا حجت.
تسنيم: هذا المي من مهيائيل الله يسلمه دزه بيد أم مقتدر على اساس يكدر يساعدج شويه ويخليج تتحركين اكيد قاري عليه تعرفيني اني ماعرف بهاي السوالف فجبته وشربته الج عسى ولعل ربج يباوعلج شويه ويخلصج من هاي المصيبة.
باوعت عليها وعيوني تريد تطلع من مكانها يعني هسه اني شربت سحر، دخل لجسمي سم من كل عقلهم يسون هيج؟!
معقوله محد يفكر لو يحس انو اكو شي غلط!!
ليش بس اني الوحيده اشوف شيطان على هيئة بشر اما البقيه شايفيه ملاك؟!
صار الظهر اجتي امي وام مقتدر ثنينهم ساعدوني طبعا ام مقتدر جوارينه من سنين طويله وعلاقتنا بيهم أخوة وأكثر همات صحيح بيت عمي يصيرون قريبن علينه حيل بس علاقتنا وي هاي المره اقوة يكولون انو نساء الاخوة متكون بينهن علاقه جيدة وامي ومرت عمي هيج عزمتهم للعقد والمشية بس مطلبت من احد يجي يساعدني اني ماعندي بنات عم بس ولد عمام ثنين وثنينهم مزوجين ويشتغلون بعيد عنه وبالنسبة لخوالي فهم بغير محافظه عزمتهم بس مكدروا يجون للعقد،
باوعت لنفسي بالمراية عمري 22 سنه طالبة جامعة مرحلة ثالثة، ابنيه خلصت حياتي بالدراسة والعبادة ابد مجنت اهتم لأمور الحب عشت أيامي بعيدة عن الناس ماحب اختلط بأحد ولا كونت صديقات مالي دخل بلي يروح ويجي عيني لطريقي ومسلكت درب بيه غضب رب العالمين وأهلي ليش هيج صار ويايه فجأة ماعرف ويا لعنه حلت على هذا البيت ودمرته ودمرت ضحكتنا وسعادتنا؟
لبستني ماما فستان ابيض ناصع مفتوح من الصدر بشكل بسيط، وردانه تول من فوك مخصر على الجسم ومن جوه منفوش شكله حلو ومجذب وهادئ بنفس الوقت، سوتلي تسريحه بسيطه خالتي ام مقتدر لان امي ماعدها خبره بهيج سوالف، قسمت شعري نصين اللي فوك رفعته على شكل كعكه والثاني خلته على طوله اني شعري كيرلي ويتعبني هوايه بالتمشيط، خلتلي كحله وروج أحمر قاتم تكلي يطلع حلو وي اللون الأبيض كملت مكياجي واني صافنه بشكلي لعبت نفسي حيل ماعرف شنو صار بيه وقتها وكأن جنت مقيدة من كل جانب او وأحد فتح قيدي حركت أيدي باشارة لامي تاخذني للحمام سوت مثل مطلبت لزمت أيدي وبقت تدعي وام مقتدر وياها على الواهس تقيأت لدرجه حسيت نفسي انقطع والرؤيه تشوشت بعيني اختل توازني وسمعت صوتها وهي تلزمني بأيدها.
تسنيم: الله الله يمه ديري بالج على كيفج وي روحج يعمري.
واني بهذا التعب كدرت احرك راسي شويه وأأشر الها انو اني بخير لتخاف غسلتلي وجهي ورجعتني للكرسي تعدل مكياجي اللي خرب سمعت ام مقتدر وهي تكول.
ام مقتدر: صل على محمد وآل محمد عين الباردة عليها شوفي شلون طلعت تخبل هسه تسحر كلب الساحر وتخلي مايشوف طريقه.
تسنيم: والله بينه الحجي اني بكلبي مراضيه تطلع من بيتي بهذا الوضع بس شنو نسوي حكم القوي على الضعيف.
ام مقتدر: اتوكلي على الله متشوفين من بطل المي شلون بنتج رجعت تمشي، اشويه اشويه وترجع طبيعيه هو مبين رجال صادق شوفة عينج محد وكع على علتها لاطبيب ولا سيد غيره لتخلين هيج افكار ادمر قسمتها وانتوا عاد شلون عدكم حظ ماخطب من بيتكم الا ساحر.
تسنيم: وداعتج هذا حجي بس ،راح نصير علج بحلوك الناس زوجت بتها لمشعوذ وخاصه عمتها هسه ماتفرح توكع بحلكها حجايه تلكيها بالشرقيه خبر عاجل بالليل.
ام مقتدر: حتى يسطرها انوب ماتعرف ليلها من النهار، بعدين كافي تسمعين البنيه هيج حجي وتخليها تكره الرجال بدون متعيش وياه يجوز يطلع خوش ادمي.
تسنيم: والله داده ماعرف اني اقنع عقلي هم خوش ناس بس كلشي صار اني كلبي ماراضي عليه وشنو يطلع بيدي اذا الموضوع بيه سلامتها اكيد مستحيل اني وابوها نجازف بهيج أمر، اتزوجها وتبقى كدام عيني مابيها شي احسن ماتموت ودفنها بالنجف.
ام مقتدر: سمي بسم الله موتيش والبنيه اليوم عقدها شلون تفاولين شو وخري من يمي خليني اعدل مكياجها وانت روحي شوفي الناس سمعت صوت الباب يندك اكيد اجن النسوان.
طلعت امي وخالتي بدت تعدل بالمكياج خلت ايدها تحت حنكي ورفعت راسي باوعتلها بانعكاسها من المرايه ابتسمت بوجهي وحجت.
ام مقتدر: انت بنيه واعيه وجبيره ومتدينه وتعرفين الحلال من الحرام ، اليوم هذا العقد راح يتم برضانه لو غصب وافقي من كلبج حبيبتي لان اذا مقبلتي راح يصير زواجج باطل وعلاقتكم غير شرعية وهذا الشي انت متقبلين بيه أكيد.
سكتت شويه ورجعت كملت حديثها.
ام مقتدر: الزواج مسؤوليه وحمل جبير عليج، طاعة الزوج بما يرضي الله واجب، الرجال يلين بالكلمة الطيبه احبك وحبيبي حتى لو مجنتي تحسين هيج اتجاهه اوهميه باسلوبج ونظافتج والسانج أهم الشي، لتنقلين حديث اهله اله ولتكليله سون هيج وهيج ويايه يبقى يكرهج وميحب يشوف وجهج، اللي يبدي العلاقه هو الحب لكن اللي يخليها تستمر هي الثقه والاحترام والاهتمام بعد صارت وراح يصير زوجج لازم تحافظين عليه بوجوده وغيابه والله يمكن مع الايام تكدرين تجريه لطريق الحق والدين الرجال يجي بالكلمه الحلوة، لتسكتين عن حقج بس خلي ابالج كوني مظلومه مو ظالمه حتى لو مو هو ياخذ بثارج رب العالمين موجود،
راح ادخلين لبيت ملعون الملائكة متدخل بيه تسمعين الشيطان يبجل وماكو احترام حتى لأوقات الصلاة بس اريدج قويه صيري كدها واني على يقين مصير هذا الساحر مسحور بيج.
ابتسمت بوجهي وكملت تعديل شويه وصعدت امي كالت اجوي الزلم والنسوان همات امي معازمه أحد بس كم جارة علاقتهم قويه وبيت عمي وأهله،
أيد لازمتها امي والأيد الثانيه بيد خالتي كدرت اتحرك شويه بعد طول هاي الفتره ارجع امشي على رجليه مره ثانيه يخليني طايره من الفرح صدك محد يحس بالنعمه غير اللي فاقدها شكد احنه مقصرين وي ربنا لعد؟
دخلتني امي للصاله شفتها مسويه ترتيب يجنن مخليه الكوشه وناثرة ورد من الباب للمكان اللي اكعد بيه نزلت دموعي ردت اعيش هيج أجواء بس والله مجانت النيه هيج واحد كعدتني امي واسمع همس النسوان عليه شلون قبل بيه واني بهذا الوضع مشغلت بالي بكلامهن ليش اغث نفسي من مجرد حديث ميقدم ولا يأخر،
واني صافنه اجت استاج يمي أو وكفت قريب مني وهمست بأذني.
استاج: اكو واحد لابس دشداشه بيضه وغتره لافها على راسه انطاني هاي الورقه وكال انطيها الج.
اخذتها من ايدها بصعوبه حركتي لحد الآن ضعيفه، فتحتها جان مكتوب بيها طلسم واكو بيها تراب قليل بنهايتها كاتب جملة،
"خليه بحلكج حتى تكدرين تحجين زوجتي الحبيبة"
قهرتني آخر كلمه بعدنه معاقدين وهيج يتحكم اذا تزوجته شلون؟
ماعرف شنو خلاني اخلي التراب بأيدي قربته من انفي وشميته ريحته طيبه كلش يشبه ريحة تربة الحسين عليه السلام هذا الشي شجعني أكلها على رغم اني ابد ما اكل طين لأن حرام لكن ماكو شي منطقي اسويه أو صار ويايه من شفته لحد الآن دائما سُفني تمشي عكس الرياح،
شويه وسمعت صوت اخويه يحجي قريب الباب حتى اتجهز علمود العقد كلبي راد يطلع من مكانه وعيني امتلت بالدموع اريد ملك الموت بهاي اللحظه ينزل ويأخذ عمري شكد ما اكول على هذا اليوم اسود صعب اشرحه، بيدي اسلم نفسي الابليس واصير عروسته بأي ذنب أُقتل بهاي الطريقه البشعه؟؟
مكدرت اكوم من مكاني رجليه من وحدهم متحركوا اجتي امي وخالتي وكومني كلما امشي خطوة لكدام ترجع رجلي الثانيه ليوره موقف لا يحسد عليه ابدد،
كعدت على الكرسي اللي يصير بصف باب الإستقبال جابت امي انجانه بيها مي أو ورد خلت رجليه بيها وخلت بين اصابيعي هيل وياس على اساس ابيض واخضر الحياة القادمه تكون مباركه متدري بنص الشياطين حتى رحمة الله متنزل، رادت تخلي جوه أيدي قرآن مفتوح اشرتلها لا لان ممتوضيه فغلقته وخلت جوه أيدي علمود يبارك رب العالمين بهذا الزواج متدري هذا غضب راح ينزل على راسي وامتحان عظيم ماعرف شلون اخلص منه،
سكتت وصمت عم المكان فقط صوت الشيخ يحجي بأمور العقد سرحت بمخيلتي ورجعني صوته وهو يسألني بالموافقه جانت المره الثالثه اللي يعيد بيها السؤال ومحد حاجتني فكرن اريد اشلع كلبه يلا اوفق هو حرفياً اني اريد كلبه ينشلع ويتأذة بنفس الوقت مستحيل اسوي هيج طرق مابيها فايدة من البدايه لو اوفق لو لا،
من شفت السيد عاد مره رابعه حاولت اطلع صوتي بكل الطرق لكن حنجرتي مثل صندوق مقفل صوتي صعب يطلع بس سبحان الله كدرت انطق بصوت ناصي شبه الهمس،
قبلت انت وكيلي.
امي سمعتني وحجتها بصوت عالي على اساس بلاعيمي بيهن ألتهاب وما أكدر احجي بصوت عالي،
بعد منطقت هاي الكلمه طشن جكليت على راسي حسيت نفسي مثل شهيد ويجيبوا لبيته ملفوف بعلم وتجي امه تحتفل بيه شكد شعور مؤذي ميدري بيه غير الميت نفسه هيج حالتي هسه،
رجعتني امي لمكاني وأكيد خالتي وياها شويه وسمعت صوت كالوا يريد يدخل يلبس الذهب، مرفعت راسي بقيت جامدة بمكاني شكد ما اكول اكرهه ما انطي لأحساسي حقة،
حسيت عليه كعد بصفي شميت عطره عود خليجي على بخور العطر كلش حلو رفعت راسي بغضب من شفت ايدة لزمت أيدي اجيت احجي واصرخ بس ما أكدر غرغرت عيني بالدموع واني أحاول أرتب جمله مفيده حتى اخليه يبتعد،
التقت عيني بعينه قابلني بابتسامة حسيتها توصف فرحته بهاي اللحظه حقدت عليه أكثر لان هو سعيد بموتي، منتبهت على شكل وملامح الشي الوحيد اللي بقيت اباوعله هو الابتسامه احسها خنجر يدخل بنص كلبي فززني صوت وحده من أقاربه وهي تنطي علبة الذهب طلع من عدها الحلقات واخذ أيدي اليمين بأيدة رفعت اعيوني صارن بعيونه لونهم بني على سواد وحواجبه مرسومه ونظرته حادة تخوف رفع حاجبه وي طرف شفته والابتسامة موجوده لسه وشكد غثني من يعاند ويايه هيج،
لزم أيدي وعيونه بعدها بعيوني ثابته قبلها وبعدين لبسني الخاتم وقبل ميتركها خلاني الزم محبسه والبسه اله ماعرف شلون سوا هيج اصلاً بكل هذا اني صافنه وبالي مو يمي رجعت لواقعي من حسيت اصابيعه لازمه أذني اخذت نفس بصعوبه ونظرتله بغضب ابتسم وكال بصوت هادئ بس اني اسمعه.
مهيائيل: التراجي ميصير اطلع بدون ما البسج كل الذهب بعدين يكولون مغصوب عليها وتجيج كلمة مو حلوه وهذا الشي مستحيل اقبل بيه.
لبسني اياهم بعدين اخذ الكلاده لبسني أياها وابتعد وعلى عينه نظره انتصار تركني وطلع وعله صوت الهلاهل والأغاني واني سرحت بعالمي الخاص المليان غموض وتعب،
بقيت كاعده حتى راحوا كل المعازيم مهمني احد مثل مهتميت لحياتي اللي ادمرت اجت ماما ساعدتني انهض ورجعتني للغرفه غيرتلي ملابسي وبقيت كاعده على الجربايه نزلت دموعي على وضعي اللي اني بيه هسه بركبة منو حالتي هاي؟
رجعت نفسي وغمضت عيني بين حلم ويقضة لمحت ظل شخص وسمعت فتحت باب مهتميت ودخلت بسبات عميق بسبب التعب فزيت فجأة على صوت ضربه قويه ورنة موبايل فتحت اعيوني بخمول واني استرجع الاحداث اني وين وشنو صار ويايه استوعبت كلشي بعد فتره ورجعت اسمع صوت الموبايل مره ثانيه كمت من مكاني ورحت أخذته من على الميز اللي يصير بصف جربايتي لكيته رقم غريب سويته صامت وطلعت من الغرفه حتى اتوضأ لمحت اخويه يصعد على الدرج اول مشافني بقى صافن اني هم باوعتله نظرته نظره شخص متعجب من حالتي تفاجأت ليش هيج يباوعلي شكو شنو سويت؟!
سوا الدرج خطوتين وشالني وفرني بالهوا وحضني لصدره وبصوت عالي كام يصيح خلاني اعرف شنو صار بيه فجأة وليش هيج مستغرب وجانت ردة فعله غريبه.
أبيل: يومممم، يابةةةة، استاججج، تعالووووا شوفواا شكووو،
يمه فدوة لله وأخيراً رجعت اشوفج واكفه على طولج مره ثانيه.
نزلت دموعي واني استوعب شنو صار فعلاً موقف يقشعر اله البدن بعد كل هاي الفتره ارجع امشي ولا كأن شي صار، الفرحه ماسايعتني واني اشوف امي وابويه حواليه واستاج هم كلها فرحانه مثلي وأكثر برجعتي للحياة مرة ثانية شي غريب محد تسائل شلون صار هيج أو بالأحرى محد أهتم للسبب بكد مهتموا للنتيجة،
تركتهم ورحت اتوضأ واقضي مافاتني من صلاة وأشكر ربي بنفس الوقت على رجوع عافيتي بقيت ثلاث ساعات كاملات بالعبادة مابين قرآن وصلاة وادعيه جنت تاركتها طول الفتره الفاتت لدرجه رجليه خدرن وتعبت نهضت من مكاني ولميت السجادة ورجعت الكتب لمكانها خطر على بالي الموبايل اروح اسأل البنات شنو اخذنه مواد،
نسيت ماعرف تناسيت اللي صار ويايه اليوم وزواجي من هذا الشيطان رجعت تذكرت من لكيت ثلاث مكالمات أو رسالة فتحتها وجانت من عنده كاتب بيها.
" اتمنى هسه انت فرحانه بصحتج وانو كدرتي تصلين مره ثانيه وقضيتي حاجاتج بدون متحتاجين احد"
صفنت شلون عرف بالموضوع اذا اني نفسي ستغربت من عنده شويه وصلني مسج ثاني.
" ماحب احد يقرأ ميرد عليه بس مو مشكله بعدج جديده وتتعودين على الأشياء اللي احبها واكرهه"
بقيت صافنه شويه واتصل مجاوبت حتى خلص الاتصال ورجع مره ثانيه همات مجاوبت غلقه ودز مسج رعب اوصالي من قريته.
"عجبني الأحمر اللي لابسته ايريم صيري عاقله وردي قبل ما اجي لبيتكم وتعرفيني اني بأي طريقه أدخل اخلي مو بس ايدج ترجف كلج ترجفين بس ذيج الرجفه مستحيل تنسيها يوماً ما"
خفت اكثر هو شلون عرف أيدي ترجف وشنو قصده يسوي اذا يجي وشلون يجي اصلاً؟!
واحد ضربني على راسي معقوله اللي جنت احس بيه ويايه بالغرفه هو نفسه؟'
مستحيل شلون يدخل،
بس اي والله هو حتى جان يهمس بأذني بكلمات ما افهمها هسه تأكدت هذا الرجال نهايتي راح تصير على أيده،
فززني صوت الموبايل بقيت افكر افتح لو لا لخير شي قطعت النزاع وقبل ميقطع الخط فتحته خليته على أذني اسمع صوت أنفاس قريبه حسيتها تضرب أذني من بالواقع غمضت حسيت عطره ضرب انفي صارت دفعه قويه بالباب وصوت صرخه عاليه فززتني من صفنتي وبين كل هاي المشاهد المرعبه تخلل لمسامعي صوته وهو يكول...
يتبع..
البارت اكثر من 4080 كلمه.
مسائكم عافيه ويومكم جميل شمعاتي شلونكم شخباركم ان شاء الله كلكم بخير وصحه وعافيه يارب..
اجيت اكلكم على موعد التنزيل كبدايه حيكون كل يومين يوم الثالث بارت وفي حال شفت تفاعل قوي يسوي واهس راح اغير الموعد..
اي سؤال بخصوص القصه أو الاحداث تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!