للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي مهيائيل مع بعض
مهيائيل
الكاتبة (زهراء احمد)
_______
شياطين أنسية
أتت اليها بكُل مكر
قيدتها بسلاسل الشر
وجعلتها خاضعه راكعه
ليس لدين بل لقدرها خاشعة
من كانت تعبد الرب بالأمس اليوم أصبحت طائعة
لابليس وأوامرهُ الخادعه
صلت على دماء كان أساسها القتل بأيدي طامعه
وسجدت بثوب أسود وأعلنت الحداد لروح أرادت الصعود بكُل وسيله لوصلها قادره
أقدار كُتبت على الجبين ليس منها مفر ولا لها حلول مدبره
تخطيط مُسبق انها حياة السحره المكره
أراد الوصال لقلبها وسلك ابشع الطُرق وتملكها كقعطه نادرة
بدون عقل ولافكر والناضجة عادت طفله بين احضان القاتل
فهل لخلاصها مناضل؟
الخاطره بقلمي
زهراء احمد
___
جان كاعد على الأرض ومقابيله اربع شمعات بيض ماعرف شنو مكتوب عليهم بحبر أسود مبين من انعكاس الضوه مالهن، وبالنص شمعه هم يعني خمس شمعات واكو قصاصتين على شكل جسم انسان ولعابه ودنابيس وخيوط وماعرف شنو، من المنظر اللي شفته فقدت توازني لزمت الباب حتى ما اوكع وهو عينه هلى الشموع ويقرأ كلمات وبصوت اشبه للهمس، ممفهومات بس اكيد طلاسم حتى يكدر ينفذ العمل مالته، نزلت دموعي معقوله اني اعيش حياتي وي هيج شخص مستحيل،
شجعت نفسي ودفعتني الغيرة مالت الدين ماعرف منين اجتني كُل هاي القوة والخوف اللي جان بداخلي تحول فجأة تذكرت القرآن والدين والحرام اللي يسويه وخطر بعقلي الشخص اللي راح تدمر حياته بدون ذنب بسبب المايخافون من الله بداية من اللي طلب يسوي السحر وصول بالساحر،
رحت يمه وطشرت كُل الغراض ومفكرت بالعواقب، صدمتني ردة فعله من ضربني كف خلاني صافنه بلعت ريكي واني اباوع عليه نقهرت من داخلي حيل وعيوني غرغرت بالدموع هاي اول مره واحد يمد ايده عليه صحيح اني سويت شي غلط بس من الأساس هو اللي جان يسويه جريمة، رفع أصبعه بوجهي بتحذير وحجه بغضب.
مهيائيل: مره ثانيه اذا جاوزتي الحد وحاولتي تخربين طقوسي ثقي بالرب الخلقج عقوبتج تصير أسوأ من هذا الكف وحفظي كلامي عدل لأن ماعيده مرتين.
صرخت بيه بغضب حركلي اعصابي وفورلي دمي ومن العصبيه والرجفه مكدرت اسيطر حتى على حركة أيدي.
ايريم: انت مستوعب اللي تسويه؟؟
انت كاعد تخرب حياة ناس ممسموحلك تدخل بيهااا، شنووو مجان السبب ماكو عذررر يبررلك هاي الجريمه، بإي حق ومنو منطيك الأذن تتحكم بعقول الناس؟
سحبني من أيدي بقوة طخيت بصدرة حجه بغضب وصوت عالي رعبني.
مهيائيل: هذا الحق اني نطيته لنفسي، بالوقت اللي يلعبون بكيفهم بنات الناس وميحسبون حساب العواقب هيج يصيرر، من تنقتل بنيه بسبب كلب ابن سطعش كلب يصير اللي الحق ونص ولازم ادخل، من تكون نيتي إصلاح ما احتاج إذن من احد وهسه انت حضرتج خربتي كُل شي جنت اسويه تعرفينننن شنوو العواقب؟؟
دفعته من صدره وباوعت بعيونه بغضب وحجيت.
ايريم: كُل علاقه ميرضه عليها رب العالمين هاي نتيجتها، كُل بنيه تمشي بطريق الخطأ بإسم الحُب تستاهل اللي يصير، رب العالمين ميحمي الناس المذنبه.
سكتني من كال.
مهيائيل: بس يغفرلها لو انتوا تؤمنون بنص الكتاب وتكفرون بنصه؟!
اذا جانت مساعدتي الها وانقاذها من الموت يدخلني النار فيا مكثر ذنوبي، وإذا رب العدل اعتبرها إنقاذ روح فشوفي شنو راح يقدملي مقابيلها، أول مره أريد اساعد بريئة يمكن هاي النعمه ربج دزها بسبب الصلاة اليوم ومستحيل افرط بيها.
ايريم: وبالسحر؟!
تريد تنقذ بنيه وانت تعصي ربك!!!
لهاي الدرجه مستهين بالقرآن؟!
مهيائيل: ليش ربج ميكول بالقرآن {وَمَنْ أَحْيَاهَا فَكَأَنَّمَا أَحْيَا النَّاسَ جَمِيعاً} لو انت من ذولي اللي يقرون ويفسرون على كيفهم؟
ابتسمت بستهزاء.
ايريم: على اساس هسه انت مسوي شي عظيم يعني؟!
كُلك خلك ساحر تسوي اللي يغضب الله ورسوله واذا انت هيج حافظ القرآن مامريت على آية السحره اللي يكول بيها رب العالمين{وَأَلْقِ مَا فِي يَمِينِكَ تَلْقَفْ مَا صَنَعُوا ۖ إِنَّمَا صَنَعُوا كَيْدُ سَاحِرٍ ۖ وَلَا يُفْلِحُ السَّاحِرُ حَيْثُ أَتَىٰ} لو هاي تضر شغلك متحفظها؟
مهيائيل: اني ساحر ساعه اقرأ القرآن وساعه اسوي عن طريقه سحوره، اعرف السحر السفلي والعلوي، احفظ ادعيه وطلاسم، وكُل وحده بوقتها استخدمه أو حسب الطلب، هاي هوايتي استمتع من أدمر وألعب بحياة الناس واضحك عليهم، وانتِ مُجبرة تعيشين وياي وبنص ذنوبي وجرائمي وتتقبلين الأمر الواقع لأن غير ساحر القرن محد يكدر يساعدج بهذا الكون كُله.
ايريم: يجي يوم اخلص منك ثق وممطول اني متأكدة.
رفع طرف شفته بأبتسامه حتى يغثني وكال بتحدي.
مهيائيل: نعيش ونشوف كلام منو يتحقق بالنهاية.
أجيت اجاوب وشميت ريحة الدخان درت وجهي لكيت الشموع مشتغلات ومسويات حفره بالغرفه والنار بدت تعله من صارن خمستهن سوه صرخت بصوت عالي.
ايريم: ياعلييي.
دار وجهي اله وحجه يطمني.
مهيائيل: اششش لصرخين هن كم شمعه هسه اطفيهن بس اهدي شوي على شنو الصريخ؟
ايريم: راح نحترك مدشوف!!!
مهيائيل: شوف النادره، بسبب منو صار هيج؟!
ايريم: عيفك مني وطفي النار قبل متاكل البيت.
مهيائيل: وخري عني.
ايريم: ليش منو يمك انت؟!
مهيائيل: منو لازم الدشداشه بأديه معقوله جنيه؟!
عبست وجهي وخرت عنه طلع بسرعه واخذ وياه جرجف موجود على الجربايه شويه ورجع منكعه بالمي اول مشمره عليهن طفت النار اخذت نفس عميق هو فتح الباب وطلع واني فتحت الشباك حتى يطلع الدخان بقيت صافنه بالنجوم والجو بيه هوه حلو نسيت نفسي واني اباوع بالسماء ومنظرها اليلمع والقمر ونوره اللي ياخذك لغير عالم، حسيت بيه قريب من عندي، كايل.
مهيائيل: أسف بلحظتها معرفت شنو اتصرف وطلع رد فعلي بهاي الطريقه بالعادة اني مو عنيف لهاي الدرجه بس صارت بعد أعتذر.
ماعرف ليش جنت ناسيه سالفة الكف من ذكره هو التفتت اله، عيوني غرغرت بالدموع باوعت بعيونه وحجيت بقوة.
ايريم: ما أسامحك إني مو ضعيفه لدرجه اغفرلك عدم الاحترام بهاي السهولة.
رفع حاجبه وكال بحده.
مهيائيل: واللي سويتيه انتِ مو غلط؟!
مو زين من عندي كاعد أعتذر منج بمكان ما اعاقبج على سوايتج وياي؟!
ايريم: اللي سويته رد فعل لجريمة تسويها وبنص غرفتي اما اللي سويته انت على شنو يدل؟
اني اكُلك، يدل على الهمجيه والتخلف والنظرة القبلية للمرأة، انت زوجي على عيني وراسي بس تمد إيدك عليه هذا الشي مستحيل اقبله.
ابتسم مستهزء وكال بثقه.
مهيائيل: مو أمد أيدي عليج اكسر راسج هم لإن هاي الشغله مثل الحياة والموت أي غلط بيها نصير بححح بخبر كان، شغلنه مثل الأطباء لازم يكون بدقه حرف يتقدم على حرف أو العكس تصير مصيبة، اني ما اشتغل وي ناس عادية أكدر أعتذر منهم وتنتهي المشكلة، شُغلي وي العالم السُفلي وهذا العالم أخطر من النووي اذا متدرين.
ايريم: على قوتهم ميوصلون لقوة الله وحفظه لعبادة.
مهيائيل: وانت حالتج هسه شنو تسميها؟
الدين وحده كدر ينقذج؟
ههه لاا اكيد لاا تدرين ليش؟
لإن الشيطان نخلق يغوي الانسان وعنده قدرة اكبر من عنده لهذا السبب هو يتقدم علينه بخطوة بس السحره يعرفوها ويكدرون يستغلوها لصالحهم كُلنه هيج وماكو سحار بالكون يشتغل بطريقه شريفه مستحيل لازم تقدمين شي مقابل الخدمة اللي يقدمها وحسب الطلب.
حجيت واني ممستوعبه كلامه.
ايريم: وشنو الشي اللي قدمته انت؟
جاوبني بهدوء.
مهيائيل: أشياء هواية كولي شنو ماقدمت اني كُلي مُلك للملذات والشهوات انسان عاصي من شعري حتى اصابع رجليه.
ايريم: وشنو ستفاديت؟
سكت مجاوب نزلت دموعي وهاي المره مكدرت الزمها بسرعة خطرت أبالي امي حجيت وياها بعقلي وتمنيتها موجوده حتى تسمعني: شستفاديتي هسه من قدمتي بنتج قربان لإبليس على طبق من ذهب؟
أسئلة بدون جواب، حالتي مثل شخص داخل لامتحان ميعرف اللغه مالته يبقى صافن بوجهه الطلاب أو وجه الاستاذ ميعرف شنو يريد، لاهو يكدر يحل ولامسموح يطلع من القاعه،
والله مجنت رايده هيج اعيش بس العين بصيرة والايد كصيرة، ضيعوني اهلي بأيد ناس متخاف من الله استباحت المحارم ونتهكت الأعراض وسوو كُل قبيح وعمل مُحرم،
بتعدت عنه بخطوات بطيئة وهو بقى واكف بمكانه صار ظهري على ظهره حجيت بدون ماباوعله وتشجعت لأن ماشوف عيونه من اسولف ماعرف ليش اضيع الكلام من يصيرن بعيوني.
ايريم: اني وانت مستحيل نجتمع، مثل نار ومي، وحر وبرد، وصيف وشتا، وليل ونهار، وملاك وشيطان، الشرك والعبادة، هاي المعاكسات كلها موجوده بينه احنه الثنين لا انت تكدر تجي لطريقي ولا اني أكدر اروحلك، خلي كُل واحد يروح بحال سبيله هذا أفضل حل ويجي يوم اللي تلكي بيه البنيه التناسبك.
صار صمت فضيع بس الهوه اللي يضرب الأشجار صوته مسموع مجاوب بإي كلمة، اني هم كملت طريقي وجبت سجادتي والكرسي حسيت المكان صار ملوث ولازم نطهره بالقرآن والصلاة، اول مبديت اصلي طلع من الغرفة نزلت دموعي لا أرادي لأن عرفته راح يكمل شغله بره كملت صلاتي واني ادعي بداخلي انو رب العالمين يخلصني من هاي الحياة المليانه معصية اله بشكل علني لو يهديه، صلاتي هي عبارة عن ركعتين مثل الصبح دائماً اصليها قبل النوم بركه وحفظ وتوفيق واحسها تقربني من ربي أكثر وفي حال متت أثناء نومي اروح لربي واني طاهره، كملت وقريت كم آية من القرآن وكم دعاء قبل النوم ملتزمه بيهم ولميت سجادتي ورجعت الكُتب والكرسي لأماكنهم ورحت لفراشي علمود انام، الشهر الخامس بدايته صح الجو حار بس لأن منطقة زراعية فأكو هوا بالليل ويكون لطيف مو حار بنفس الوقت مو بارد، خليت الشباك مفتوح وماعرف بيه هو وين ولهتميت كلت ناره تاكُل حطبة الواضح شخص مثله متعلم ورابي على الحرام مو بالسهولة ينهدي للطريق الصح،
غمضت اعيوني واني اطرد الأفكار من عقلي وبين صحوه وغفوه حسيت بأديه سحبتني الها صار ظهري على صدرة اخذ نفس بصوت عالي من شعري ورفع راسه شوية وهمس بكلمات غزل.
مهيائيل:
ابحضني كون تنام واشتم عُطرها
وچفوفي تلتف حَيل لفة بخصرها.
مسويه نفسي بسابع نومه بس اني صحصحت واسمع كُل كلمة يكولها.
مهيائيل: "اذا مو حضنج يصير بيتي احس بغربة وانا بنص الوطن"
سويت نفسي اتمغط وحركت جسمي حتى أوخر عن حضنه، هذا القرب وغصب عني يجبرني أميل اله واني ماريد احبه أبد، لاشغلة ولاحياته يناسبوني، أريد بيت هادئ بيه مخافة الله هي الأساس ومستحيل احصل هيج عيشه يم مهيائيل،
صرت بعيده عنه شويه سحبني من أيدي وفرني إله، عرفت انو عرف بيه منايمه والتمثيل بهيج حاله ميجيب نتيجة تقبلت الأمر الواقع وخليت عيني بعينه وحجيت.
ايريم: اني مو من النساء الترضه بكلمتين غزل تالي الليل، صح حبابه ومخافة الله عندي اهم شي لكن من تصير الشغله بيها كرامتي حتى لو تصير النفس مستحيل اقبل اشمك.
ابتسم وجاوبني بطريقه حسيته مفهم شنو حجيت ابد أو يمكن منطه كلامي أي اهميه.
مهيائيل: هسه شنو اني مثل النفس بكلبج يعني؟
ايريم: اي بس ملوث.
مهيائيل: نعقمه مو مشكلة.
ايريم: احسن شي انام اذا ابقى اخذ وانطي وياك على هاي أجوبتك تصير بكلبي جلطة.
مهيائيل: تمرني قبل متمرج.
حجيت بفهاوه.
ايريم: منيه؟
مهيائيل: كُل وجع وألم وضيكة خاطر ياقُفلي والمفتاح.
ماعرف ليش صار عندي حس فكاهه فجأة وكلت واني اضحك.
ايريم: ألم لو مساحه؟
عضيت شفتي بفشله من شفته صافن بوجهي بدون حتى ميبتسم، غميت جبيني داخلياً ولمت نفسي ليش حجيت هيج هسه شيكول عليه، قاطع أفكاري صوته وهو يكول بكُل رقة وهدوء.
مهيائيل: جنت أحلم من المراهقه ببنيه حلوه شعرها أسود، ولابسه ثوب أخضر طويل مغطي كُل جسمها هي تمشي واني اتبعها حتى وصلنه لمكان أظلم بقيت ادور عليها فتره طويله حتى لكيتها كاعده ويمها بزون أسود اول مشافتني بتسمت وكالت جمله لسه بعقلي "انتظرك لتتأخر" بقيت اشوفها دائماً بأحلامي وكُل مره بهيئة مختلفة بس على رغم سترها باللبس مجانت تلبس حجاب وتجي تلزمني وتضحك وتسولف وياي ما اذكر حجيها بالتفصيل بس جملتها انتظرك لتتأخر ترن بعقلي لليوم.
يحجي وأيده تلعب بشعري شويه وساعه يمرر اصابيعة على خدي خلاني صافنه بحركاته وكلامه ونصدمت من كمل الحديث.
مهيائيل: ذلك العمر جان بدايتي بالسحر والأعمال يعني تكدرين تكولين اتعلم جديد فرحت لميمون يفسرلي حلمي بس مجنت اكله تكعد يمي وبدون حجاب احس اغار عليها حتى وهي حلم ماعرف عنها شي تعلقت بيها وحبيتها وهي مجرد خيال يجيني بنومي، جنت احاول انام هوايه ومرات اغيب عن المدرسه بس حتى اشوفها وللأسف مكدرت احلم بيها بشكل يومي تجيني مرات.
كلامه جذبني عنها ومن يحجي بيها اكو لمعه تحسها صدك واقع حال موجود وتعلق بيها مو وحده يحلم بيها، سألته من باب الفضول حتى اعرف منو هاي وليش يحلم بيها بشكل دائم.
ايريم: اي وشنو كلك ميمون؟
مهيائيل: كلي هاي البنيه هي مستقبلك وقدرك راح تصير حياتك عباره عن ظلام دامس وبنص هاي الزحمه والناس اللي تعاديك هي الوحيده التوكف وياك وتسندك، حظك راح يبين بيها بس حتى تجتمعون سوا لازم تمرون بحياة مليانه تعب وقهر وحزن وبلاء جبير بس مستحيل اكو شي يفرقكم.
ايريم: وليش تكلك انتظرك لتتأخر؟
مهيائيل: معرفت جواب هذا السؤال بس احساسي يكول توكع بمشكله واني الوحيد اللي راح تستند عليه وتثق بيه وتأمله.
ايريم: لكيتها؟
مهيائيل: شتكولين انتِ؟
ايريم: ماعرف انت اللي حلمت بيها مو اني.
مهيائيل: هي قدري واني قدرها كلبي دك اول مشفتها وصارت كُل شي بحياتي.
ماعرف ليش ضوجني كلامه ابتسمت بوجهه مجامله أو وخرت نفسي عنه، نمت على ظهري وهو بصفي ،عيوني تعاين بالسكف، الساني ينطقني من وحده لأن اكو شي داخلي يريد يسمع اجوبه تريحه ولو شوي.
ايريم: هي نفسها اللي كلت تحبها بأيام خطوبتنا؟
مهيائيل: ذيج جان إعجاب مراهقه لا أكثر راحت لحال سبيلها.
درت وجهي اله عيني تحفظ بملامح وجهه الصايرة من جهتي، حاجبه المرسوم ولحيته المحدده أو وجهه الحنطاوي المايل للبياض، صفنت بيه شويه وكلت بهدوء.
ايريم: لعد منو هاي البنيه المنتظرها؟
التفتلي، خله ايده جوه خده وعيونه بعيوني تهت بيهن وبنظرتهن ونسيت السالفه والرباط، داخلي يجبرني مازحزح عيوني من عليه، أريد اخزن صورته بعقلي وكلبي وبكُل مكان، شعور مُبهم ماكدر افسره،
مد ايده لوجهي حرك اصابيعه وداعب خدودي وصل لشفايفي توقف ونظراته نزلت الهن صمت عم المكان حتى قطعه وهو يكول.
مهيائيل: يهمج تعرفين؟
جاوبته بفهاوه واني اصلا مفهمت السؤال لحظتها بس ردت احجي.
ايريم: أي.
جاوبني بهمس وصوت مليان حُب هيج نبرته بدون متعبر اذاني دخلت لنص الكلب وعشعشت بيه.
مهيائيل: اللي شاركتني أحلامي واني مراهق هي نفسها تشاركني غرفتي اليوم.
كلبي صارت بيه طبول من السعادة ابتسمت بثول بسبب كلامه، رفع عينه لعيوني وكمل بنفس النبرة.
مهيائيل: لو مجنت ادري انتِ انسانه كفو ويُعتمد عليج جان مخليتج بحياتي اصلاً، اطردي الأفكار من عقلج إني مو أي وحده تاخذ كلبي.
رجعت لوعيي بسبب كلامه حسيت مثل واحد ضربني على عقلي وذكرني اني زعلانه عليه هو صح صارت هوايه سوالف بينه مع هذا ما انسى الكف اللي اكلته عبست وجهي وكلت بعدم اهتمام.
ايريم: حبيت لو ماحبيت آخر همي اصلاً.
ضحك بصوت عالي وضغط باصابيعه على عيونه أسنانه واضحه وتصير خسفة بخده من يضحك مو غمازة بس هو من وحده ينزل شكله يصير مُجذب لعيوني بشكل مو طبيعي ابقى صافنه بيه بدون كلل حتى ما ارمش، اخذ نفس وتنهد بصوت عالي وكال.
مهيائيل: كلت اسف وبررت خلي علاقتنا تمر بسلام بدون مشاكل، لدققين هوايه وتزعلين على اي شي، اللي سويتيه غلط بس جان بسببج يعني ثنينه غلطانين، الكرامة مطلوبه لكن مو بكل المرات التنازل شويه همات حلو.
ايريم: اللي سويته مو غلط جان ردة فعل طبيعيه للي شفته.
مهيائيل: شلون يعني مو غلط لو محتركين؟
انتِ تدرين لو واصله النار لنقطة كهربائيه جان هسه احنه بحح ويساعدج الشجر والزرع الموجود غير الأخشاب، العجلة من الندامه مو كُل شي ميعجبنا لازم نخربه، لأن ممكن بتخريبه تترتب علينا مشاكل متنحل بسهوله وتخسرنه هواي أمور.
ايريم: صح كلامك بس تبقى غلطان منو يسوي سحر بغرفة النوم؟!
اذا انت متخاف فأني اخاف من الجن والشياطين ليجوني واني نايمه او يسوولي شي.
خله أيده على حلكي وسحبني بسرعه لحضنه دفن راسي بصدره وبقى يهمس بكلمات ممفهومه تحركت حتى أوخر عنه أو ارفع راسي همس بأذني بكلمات خلت كُل شي بيه يرجف خوف.
مهيائيل: هنا اسكتي ليسمعوج.
عرفت هاي الجنيه رجعت اجت عضيت ايده عضه لان بسببه صار هيج بس مسمعت صوته متألم ولاصارت عنده رد فعل، دفعه ضربه مثلاً، فاجأني من بقى ساكت وبس صوت النفس مالتنه مسموع، وصدمني اكثر من سحبني لصدره حيل حتى نقطع نفسي من كد مخنكني بحضنه، وبنص هاي الأجواء المليانه رعب ماعرف شلون غمضت عيني ونمت.
مرت باقي الليله طبيعيه وخلصن اربع ايام من ذيج الليله لحد الآن هو هادئ وميسوي شي اصلاً اغلب وقته بره البيت يجي بنص الليل ويطلع من الصبح، ردت اسأله عن السبب لكُل هذا التوتر والقلق اللي يعيش بيه بس ما أكدر، احس بيه ميريد يحجي شي حتى وجهه تعبان وسواد تحت عيونه،
خلال هاي الفتره رحنه اني وترانيم واجه رائف وصلنه للمستشفى علمود اشيل الجبيره لان مهيائيل مشغول حسب ميكول، وهذا الشغل اللي ماعرف منين طلع بدون مقدمات، خليت السؤال بكلبي ومحجيت بس زاد الموضوع عن حده والقلق بده يكبر من كثرت غيباته وحتى بالليل بطل ميجي ومن شافت ترانيم الوضع هيج صارت تنام يمي،
خلص اسبوع كامل على هاي الحاله أخير شي متحملت اخذت الموبايل وتصلت بيه مجاوبني من اول مره كررت مره ومرتين بالخامسة يلا فتح الخط بقى ساكت منطق كلمة بلعت ريكي وحجيت بتوتر.
ايريم: شلونك؟
سمعت صوت جداحه تشتغل فكرت كاعد يشغل شموع علمود السحر مالته بس طلعت غلطانه لإن بس صوتها اسمع، يشغلها ويطفيها مستمر، رجعت حجيت بهدوء وياه حسيت بيه زعلان من عندي لإن مسألته شبيك.
ايريم: صاير شي وياك؟
جاوبني بعد فتره بصوت ناصي وبعده يشغل بالجداحه.
مهيائيل: يهمج؟
اخذت نفس وكلت.
ايريم: لو ميهمني ليش اتصل يعني؟!
رجع جاوبني برود.
مهيائيل: صار سبع ايام اني بعيد عنج نتبهتي اليوم؟!
مو كأن السالفه غريبه ماكاعد تدخل عقلي.
ايريم: ليش تحجي ويايه بهاي الطريقه؟
اتصلت بس اطمأن عليك لا أكثر إذا جان هذا الشي زاعجك أعتذر مراح اضوجك مره ثانيه.
مهيائيل: مستعجله حتى تسدين الخط، مو مشكله روحي الله وياج.
حسيت بتأنيب بسبب كلامه رجعت أحاول وياه مره ثانية.
ايريم: شنو مشكلتك ويايه اليوم ليش تحجي بهذا الأسلوب وكأن مسويه جريمه؟!
مهيائيل: ليش اللي سويتيه شنو؟
ايريم: فهمني احجي شنو مسويه؟
مهيائيل: ميحتاج اشرحلج شنو سويتي المفروض تعرفين من وحدج.
ايريم: ماعرف والله ماعرف شنو مسويه غير تفهمني؟!
مهيائيل: مو كُل شي ينشرح اكو اشياء وحدج لازم تعرفيها.
ايريم: وهسه انت زعلان من عندي؟
مهيائيل: لا ليش ازعل ممسويه شي يزعل.
ايريم: ليش مختفي لعد وينك هاي الأيام؟
مهيائيل: مو كأن متأخره لو اني غلطان؟
ايريم: عبالي راح تنزعج اذا سألتك عن أشيائك الخاصه ماعرف انو راح تزعل مني.
مهيائيل: انتِ مرتي مو وحده غريبه ليش حتى ازعل اذا شفت منج اهتمام؟!
ايريم: ماعرف هيج فكرت.
مهيائيل: شلونها رجلج؟
ايريم: الحمدلله احسن.
مهيائيل: لتضغطين عليها هوايه حتى تصير زينه وطيبين بالكامل.
ايريم: هو على كيف امشي ما اضغط عليها.
مهيائيل: ديري بالج من تصلين لتتأذه ونرجع نجبرها من جديد الله لايقدر.
ايريم: ان شاءالله.
مهيائيل: أكلتي؟
ايريم: اي.
مهيائيل: والعلاج؟
ايريم: شربته على الوقت.
مهيائيل: اكو احد ضوجج؟
ايريم: منو يضوجني، ترانيم وصايره امي الثانية.
مهيائيل: تنام يمج بالليل؟
ايريم: اي تعرفني اخاف وحدي.
مهيائيل: لتخافين محد يكدر يوصل يمج واني موجود.
بتسمت وعصافير تغرد بأذني من كلامه حتى مكدرت اعبر عن مشاعري بالكلمات قاطع أفكاري صوته وهو يكول.
مهيائيل: لتبقين وحدج خاصه المغرب ابقي يمها ان شاء الله ماطول ورجع الكم.
ايريم: ان شاءالله ترجع بالسلامة.
مهيائيل: الله يسلمج قُفلي والمفتاح.
ايريم: وينك انت هسه؟
مهيائيل: بالبيت.
ايريم: شنو تسوي هناك؟
مهيائيل: سحوره.
ايريم: غيبتك بسببها؟
مهيائيل: تقريباً.
ايريم: ليش مسويت شغلك هنا؟
مهيائيل: ما عندي نيه اموت محروك بعدني بعز شبابي.
ايريم: الله يحفظك من كُل مكروه ويحميك اللهي.
مهيائيل: ويحفظج إليه ملاكي.
بتسمت وخجلت بنفس الوقت حسيته يمي ويحجي ويايه هيج، أجيت اجاوبه ماكو صوت وخرت الموبايل لكيته ساده، غميت نفسي عود جنت عايشه اللحظه طلع الرجال مو يمي اصلاً،
طلعت من الغرفه ورحت يمها للمطبخ دتحضر بالغده، ترانيم وين متضيعها تلكاها بالمطبخ عشقها الابدي الأكل وابد ممبين عليها ضعيفه وجسمها مرتب، رحت يمها اساعدها بسرعه صاحت بوجهي.
ترانيم: يمه اسم الله تردين رجلج يعزيني ويصخمني؟
باوعتلها بصدمه من ردة فعلها لغير مبررة.
ايريم: ليش شكو شمسويه؟!
ترانيم: ما صار اسبوع من شلتي الجبيرة جايه هسه تشتغلين من عقلج انتِ بابا؟
ايريم: عبالي اكو شي مهم على هاي كاعد تصيحين!!
ترانيم: هاي عندج مو مهم يم رجلج المصون مايمشي هيج حجي، كال "ديري بالج عليها هي بأمانتج حتى ارجع اذا صار بيها شي لو خدش بسيط انتِ تتحاسبين" فالله يرضه عليج روحي اكعدي مالي خلك سوالفه.
ايريم: ليش مكبرتها قابل شيصير مثلاً؟
مثل كُل يوم نطبخ عادي مو شي جبير.
ترانيم: حظي وعرفه تنفجر عليج القنينه لو يطك بوجهج الطباخ، لو تحتركين بالزيت، خليني مرتاحه من سوالف رجلج وعتبه وملامته، على كولة راشد الماجد ابعد عن الشر وغنيلو.
ضحكت على تفكيرها.
ايريم: والله عندج سوالف تضحك.
ترانيم: واني صح ليش اجيب الأذيه النفسي.
كعدت على الكرسي وسويت رغبتها عيني عليها شلون تشتغل وعقلي سافر لغير مكان، هوايه أفكار بعقلي وحده منهن شلون راح تكون حياتي الجايه، رجعتني لواقعي حجاياتها، اجت كعدت يمي وبيدها تفاحتين وحده تاكُل بيها والثانيه انطتني اياها.
ترانيم: خابرتي ابو الطلايب؟
ايريم: اي قبل شويه.
ترانيم: شكال؟
ايريم: عنده شغل.
ترانيم: شو مدري شبيكم لاسالفه لاضحكه اربع وعشرين ساعه متلاطمين على شنو؟
ايريم: مفهمت؟
ترانيم: اسمعي مني اني وحده خبره بالزلم خواني ماشاء الله وحمويني غير رجلي المقبور، حافظتهم بصم واعرف شلون يفكرون.
ايريم: ايي.
ترانيم: اي الرباط مال سالفتي وين؟
رجلج معوز حنان.
صدك ضحكتني وهي بقت صافنه عليه واني متت ضحك رفعتلها راسي وحجيت بتساؤل.
ايريم: مهيائيل اللي هو ساحر القرن معوز حنان، هههههههههه، اخ يمه كلبي.
ترانيم: هو مو صوجج صوج الكاعده تحجي وياج وعايفه كدرها شو روحي صلي أو ولي من يمي مالي خلكج.
مسحت دموعي بكف أيدي ورجعت حجيت والضحكة بعدها بوجهي.
ايريم: عليج الله منو كلج؟
شلون خطر بعقلج هيج موضوع؟ معقوله سامعه شي واني مادري؟
ترانيم: ما يحتاج اسمع بس هي مبينه متشوفيه اربع وعشرين ساعه طالع من البيت بدون عذر وغير هذا وجهه ميكصه السيف من يجي صار سبوع على هاي حالته معقوله مسألتي نفسج زوجج سر سعادتج ليش هيج يتصرف؟!
ايريم: عنده شغل غير.
ترانيم: دباع الفاهيه عنده شغل، هو سحر سواها منا ربطها مناك ونحلت فضت، قابل يشتغل بالأمن الوطني وعنده مهمه صعبه وميكدر يفرغ شوي.
ايريم: سولفي وين تردين توصلين؟
ترانيم: اوصل للي يريده اخويه ابو الطلايب اللي هو نفسه زوجج سر سعادتج.
ايريم: شوفي اني بسوالف الألغاز كُل شي ما افهم اختصري عليه الطريق وغردي.
ترانيم: انتوا تممتوا زواجكم؟
خجلت وبلعت ريكي اني ناسيه السالفه ولا بعقلي اصلاً شلون مخطر على بالي هيج موضوع، حسيت نفسي صخنت وبنفس الوقت ضجت، مامستعده لهيج أمر هسه وماحس نفسي متقبلته يمكن من التوتر أو شي ثاني بس اللي عرفته ظُلمت الدنيا بعيني من ذكرت السيره وشي داخلي شمئز من عنده،
قرت ملامحي المعبسه وضربت على رجله وكالت.
ترانيم: ولج يالثوله يطير منج الرجال، صحتج والحمدلله وصارت زينه واذا على التعويد صار الكم أكثر من شهر انتوا اهنا وأخذتوا على بعض، لتكليلي تستحين منه لحد الآن لأن صدك اكتلج وخليهم يرجعون يجبروج من جديد.
جاوبتها بهدوء ماعرف ليش شاركتها هيج شي شخصي.
ايريم: مو قصة تعويد بس اني ناسيه واصلاً مو بالي.
ترانيم: وهاي اني ذكرتج استعجلي ياعيني وخلصي السالفه بسرعة.
ايريم: اكلج فدوة لكلبج غيري السيره كلبي ينعصر من تحجين بيها.
صفنت بوجهي شويه بعدين كالت.
ترانيم: ولج بس لابيج جن عاشق!!!
ايريم: اسم الله منين جيبين هذا الحجي؟!
دققت بشكلي وبعدين كملت تحجي وتجاوب نفسها.
ترانيم: لا انتِ تصلين معناها مابيج شي.
هم رجعت سكتت ضربت على خدها حيل وصرخت بصوت عالي فززتني من مكاني.
ترانيم: عزةةة بعيني لعد رجلج بيه جنيه، واني اكول شبيه هذا الرجال انكلب أمره فجأة وحتى من يتصل عليه بس يسأل على صحتج ويسده، شوفي الحظ، صُدك انتوا عليكم عين نافستكم.
ايريم: شهل حجي شلون يعني تتلبسه جنيه وهو اصلاً يشتغل وياهم ميعرف يطلعها من جسمه!!!
ترانيم: مو هُمَ شغلهم يختلف الجني لو الجنيه حتى تساعده بعملة لازم يقدملها شي وهذا حسب الطلب ميمون مره فلتها كدامي وعرفت منه هاي المعلومه.
نصدمت بكلامها ورجع عقلي للخيال اللي شفته حاضنه، ومرات هوايه شفته يحوم حواليه ويم الغرفة خاصه بالليل، والأحلام وحالة الرعب اللي يدخللها وهو نايم معناها كُل هذا جنيه متشارك وياها بعمل، بس معقوله يسوي شي وياها!!
لاااا لااا مستحيل وين اكو هيج ماكوو البشر والجن متصير بينهم علاقه من هيج نوع،
رجع عقلي سأل، اذا مستحيل فشنو جانت تسوي يمه وليش يحتر ويضيق نفسه وحالته تسوء لهاي الدرجه من ينام؟
اسأله هوايه بعقلي وجوابها عنده هو وبس مكدرت ابقى صابره وانتظر يرجع بالوقت اللي يعجبه كمت من مكاني ورحت للغرفه حتى اتصل بيه، من اول مكالمه فتح الخط وسمعت صوته مبين بيه شي مو طبيعي ابد من نبرته وطريقة كلامه الغريبه.
مهيائيل: اكو شي ليش متصله؟
ايريم: وين انت؟
مهيائيل: سألتي قبل شويه وكتلج شنو داعي السؤال هسه؟
ايريم: اريد احجي وي ياسيم وماعندي رقمها تكدر تنطيني اياها؟
مهيائيل: لا متفيدج عقلها طكه ونص، احجي وي ترانيم اذا عندج شي مهم.
ايريم: اللي أريده يم ياسيم وبس ترانيم ماتعرف الشغله اللي اريدها.
مهيائيل: ايريم كُلش تعبان ومالي خلك هاي السوالف كولي من الأخير شنو تردين لو سدي الخط وروحي.
عرفت هذا الأسلوب ميفيد وياه وجان اغبى شي اسويه هو جوابي اله.
ايريم: مشتاقتلك.
سكت محجه شي ورجعت سمعت صوت الجداحه الفضول هاي المره قره مليار فسألته.
ايريم: شنو تسوي؟
مهيائيل: ادخن.
ايريم: مضر بالصحة مو زين اتركها.
مهيائيل: من اشوفج اتركها.
ايريم: تعال وشوفني منو لازمك؟!
مهيائيل: ما أكدر هسه عندي شغل من اكمل اجيج.
ايريم: صاير شي وياك؟
مهيائيل: اكو نار داخل صدري كلما أريد اطفيها ترجع تشتغل من جديد، اللي حواليه يذبون عليه بنزين ويردون ردة فعل هاديه بس والخلق ناقة صالح إذا مندمتهم واحد واخد من الجبير حد الصغير مايكون اسمي ساحر القرن على كولتج.
ايريم: منو مضوجك؟
مهيائيل: كُلهم يدوسون على كلبي برودة اعصاب وميدرون المنتظرهم شنو.
ايريم: على كيفك وي نفسك منو مستاهل تسوي هيج علموده، الناس من شوكت مشت ويانه عدل بدون مصلحه الا القله القليله وذولي يردون راحتك ميحبوك تضوج وتنقهر.
مهيائيل: النار اللي يشغلوها بكلبي تحركهم وتسويهم رماد وانتِ راح تشهدين وياي.
ايريم: ارجع للبيت هسه واللي يريحك سويه، خايفه وانت مموجود يمي.
مهيائيل: حضري نفسج بس ارجع تجين وياي مراح تبقين يم ترانيم بعد.
ايريم: ليش؟
مهيائيل: لأن ذلك بيتج وانتِ هنا ضيفه.
ايريم: وين متريد ويعجبك اني وياك.
مهيائيل: قُفلي والمفتاح روحي رتاحي بعدين اتصل بيج.
ايريم: انتبه على نفسك.
ومهيائيل: ديري بالج على نفسج مع السلامة.
ايريم: بحفظ الرحمن.
سديت الاتصال وعضيت الساني على كلمة مشتاقتلك، شهل غباء شلون احجي وياه هيج هسه شيكول عليه، بس ليش شاكه هو مو بالبيت معقولة جان يجذب عليه؟
نفضت الأفكار من عقلي ورحت يم ترانيم اساعدها وهم اصلي صلاة الظهر، خلص اليوم بشكل طبيعي وصار الليل اللي يكون بقمة الرعب بالنسبه إليه وللأسف ماكدر اسوي شي غير ابقى ادعي واذكر رب العالمين، الخوف والقلق اللي اعيشه ماعرف شوكت يخلص ورتاح،
خليت راسي على المخده وبدأت الأحلام تاخذني لعالمها فزيت على ضربة قويه على الشباك كعدت مرعوبه وترانيم يمي وحده صافنه بوجه الثانية وصارت ضربه اقوة، والباب يندك بكُل قوة الرعب اللي صار هسه ماكدر اوصفه بالكلمات..
يتبع..
البارت اكثر من 4200 كلمه
شمعاتي ليش ما اشوف تعليقاتكم بين الفقرات؟
عقلوا وصوتوا سولي حماس عيناي انتوا.
تصبحون على الف خير وعافية.
حسابي الأنستا لكُل شي يخص القصة..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!