للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي مهيائيل مع بعض
مهيائيل
الكاتبة (زهراء احمد)
_______
كأنّما كانَ في الفردوسِ مسكنُها
فجاءتِ النّاسَ للآياتِ والعِبرِ
لم يخلقِ اللهُ في الدّنيا لها شبهََا
إنّي لأحسبُها ليستْ من البشرِ
___
مهيائيل: هوايه رخيتلج الحبل، شفتيني ساكت ومغلس على عدم احترامج وتجاوزج كلتي خلي اتمادى اكثر لأن بكل الأحوال شما حجيت راح يسكت، بس نسيتي اني عندي شخصيتين أو وجهين اطلع اللي يعجبني بيهم وبأي وقت فلا تفكرين ابداً انو سكوتي حُباً بيج ومقدر وضعج واكول حقها بعدها ممتعوده عليه، انا مايمشي وياي هذا الحجي، وعلى رغم من تنبيهي ألج على الصوت العالي وانتِ بكُل مره تعاندين وترجعين تتجاوزين لازم اعاقبج حتى توبين من هاي الحاله.
واحد ويلعب بعقلي يخليني احجي شي مناويه احجيه ابداً.
ايريم: لتهدد بيك زود سويلي شي، باقي بس تعربد بوجهي وماشفت منك فعل، راويني عضلاتك يلا اني منتظره.
باوعلي بتمعن وصغر عيونه صفن شويه وبعدين نطق.
مهيائيل: الواضح الطيب والعقل مينفع وياج تردين اعاملج بطريقه ثانيه هيج تخافين مني وتعقلين وتبطلين سوالف الصغار.
ايريم: اني متحمسه حتى اشوف طريقتك الثانيه راويني شنو تكدرين تسوي؟
سكت دقيقه وهو ينظرلي بتعمق فاجأني من كال.
مهيائيل: ايريم اقري سورة الناس.
ايريم: ما أقره.
مهيائيل: ارجعي كرري وراي شنو اكول انتِ عيدي يلا بدون عناد.
صرخت بوجهه لاأرادي.
ايريم: لتلح كتلك ماريد أقره هسه معاجبني اذكر القرآن.
مسح بكف ايدة على وجهه وحجه بنفاذ صبر.
مهيائيل: استغفر الله العلي العظيم، وتالي وي هاي السالفة الماتخلص.
ايريم: ياسالفه تقصد؟
مهيائيل: سالفة الجنيه اللي كاعد توسوس بعقلج.
ايريم: مفهمت!!
مهيائيل: انتِ متلبسه بيج جنيه بين قوسين ممسوسه.
ايريم: شدتحجي انت؟ مستوعب كلامك؟!
مهيائيل: اي.
ايريم: مستحيل ماكو هيج حجي ما صدك.
مهيائيل: مو شرط تصدكين هذا واقع كاعد تعيشيه.
ايريم: والحل.
مهيائيل: ماكو حل بالوقت الحالي غير الأنتظار.
ايريم: رجعني لبيتي أريد امي ما أبقى يمك.
مهيائيل: حتى لو رجعتج امج مراح تقبل بيج.
ايريم: امي مستحيل تعوفني اعرفها لتحاول تخبثني عليهم لأن مراح توصل ويايه لنتيجة.
مهيائيل: اتصلي بيها وشوفي.
اخذت الموبايل بسرعة وتصلت اريد اثبتله انو كلامه غلط وأهلي ماممكن يتركوني بوقت حاجتي الهم، انفتح الموبايل وبدون مقدمات حجيت.
ايريم: وينج خلي ابيل يجي ياخذني مشتاقتلكم حيل اريد اشوفكم.
تسنيم: على كيفج ياماما هاي شبيج ليش تحجين بخوف صاير شي وياج يا امي؟
اخذت نفس وبلعت ريكي وكملت.
ايريم: مصاير شي بس مشتاقه الكم شنو يعني ميصير ازوركم بهاي السرعه تبريتوا مني؟!
تسنيم: هاي شتحجين انتِ شبيج ياعيني؟!
منو زارع بعقلج هيج أفكار؟
ايريم: محد بس حجيج وكأن مترديني.
تسنيم: أعوذ بالله من أفكارج، مو اني ما أريدج بس هسه احنه يم بيت خالج لأن مريض وصار اسبوع يمه وكتلج اني من تصلت بيج البارحه صايره تنسين هوايه خو مابيج شي يروحي؟
ايريم: مابيه شي بس يمكن من التفكير نسيت الموضوع، أبيل وين؟
تسنيم: سبحان الله والله بيج شي خوفتيني عليج شو انطيني مهيائيل خلي اسولف وياه وضعج معجبني ابد.
ايريم: ليش شكو شبيه؟
تسنيم: اني مو كتلج طلع لتركيا علمود يكمل ماستر نقبل وراح هناك صار يومين هاي وين عقلج انتِ؟!
ايريم: ليش محد حجه جان على الأقل ودعته!!!
تسنيم: مو انتوا بأربيل لحد الآن شلون يودعج؟!
ايريم: هو حتى متصل بيه وسأل عني ليش هيج صايرين انتوا ويايه ولا عبالك اني بتكم؟!
تسنيم: ياعمري فدوة لعيونج هسه على شنو البجي، اخوج من يوم اللي تزوجتي بيه مشفنا بعد اربع وعشرين ساعه بره البيت واجاني فجأة كال قدمت على دراسات والاسبوع الجاي اطلع خارج العراق بدون مقدمات، ابوج واني شكد لحينه عليه وهو ولاسمع من عدنا دك رجل الا اروح وراح، وبالنسبه إليه اني وابوج وعيونج منلحك نحك راسنه اختج خلصت امتحان منا ثاني يوم وكع خالج، بعيد عن هذا كله كلما اتصل بيج يطلع الموبايل مغلق لو متفتحين خط وزوجج يكول من التعب والفره مخلصتها نوم، على كيفج انتِ هم لتضوجين الرجال بعدين يمل منج.
نصدمت بكلامها شلون ليش ماعندي علم بكُل هذا معقوله اني صاير عندي فقدان ذاكره؟
غلقت الخط بدون ماكول شي رفعت عيني اله شفت على ثغره إبتسامة هي نفسها اللي نرسمت على شفايفه يوم العقد من العصبية وحركت كلبي شمرت الموبايل بوجهه اجه عدل بحاجبه مسح على المكان أو وجهه نعقج من الألم جنت مترقبه ردة فعله بنفس الوقت اكو نار داخلي وغضب جبير لو يطلع لبره جان حركه وحرك البيت بأكمله، اكتفى بالصمت واني هم بقينه نحارب بعض بنظرات العيون جان واكف يم الباب مد ايده للقفل وعينه بعدها بعيني، قفل الباب وتقدم ناحيتي نزل بجسمه إليه وخله ايده على أطراف الجربايه وحاوطني من الجهتين وجهه قريب وجهي، وعينه بعيني، والابتسامة المستفزه موجوده على شفايفه مراحت، حجه بكُل برود تمنيت لحظتها اموته على كمية الغرور اللي عنده.
مهيائيل: شفتي محد ألج غيري لا هسه ولابعدين انتِ مُلك لمهيائيل وبس راح تبقين طول عمرج مسجله بأسمي، لاجن ولا أنس يكدرون ياخذوج مني خليها بعقلج دائماً.
نظرتله بتحدي وحجيت بغضب.
ايريم: اكرهكك وراح ابقى طول عمري اشمئز منك، ولتفكر بيوم يدك كلبي الك، انت شيطان رجيم واني مستحيل احب أعداء الله.
قرب راسه من عندي أكثر واني ارجع بجسمي ليورة حتى وكعت على الجربايه دار ورايه وسحبني من خصري، أديه مقيد بيها جسمي ورجليه على رجليه ما أكدر اتحرك وهو ضاغط عليه بكُل قوته حجيت بعصبيه من تصرفه.
ايريم: وخرر عني يا أخي ليششش متحس ياحرف من كلمة اكرهك متفهمهاااا؟
خله ايده جوه متني والايد الثانيه لزم بيها أيدي اللي نايمه عليها سحبني منها وصرت بحضنه نص جسمه خلا عليه وقيدني بيه حتى ما اتحرك رفع ايده أو وخر شعري اللي على عيوني، عيونه تحفظ بوجهي متباوع بيه نظره عاديه، نزل راسه لدرجه ميفصلنه شي حرفياً سخونة النفس مالته احس بيها، زفيرة صار شهيق إليه من كد القرب، قرب ايده من حنكي وضغط عليه وكال بنبرة عميقه حيل.
مهيائيل: "اكرهيني الشياطين تحب الحقد والكره والغل أما الحُب صار موضة قديمة".
على رغم الخوف اللي بقى محتل داخلي من هذا القرب، وعيونه اللي تفترسني بنظراتها، وكلامه الكُله توعد مبقيت ساكته وكلت بثقه.
ايريم: لشوكت؟
مهيائيل: حتى آخر نفس بصدرج تبقين "مُلك لمهيائيل" أو على كولتج "ساحر القرن".
ايريم: "دوام الحال من المُحال" لتفرح هوايه يجي يوم واخلص منك.
مهيائيل: بذلك الوقت طلعتي من حضني ورحتي لحضن المكبرة.
ايريم: وين ميكون المكان المهم اخلص منك.
مهيائيل: مو للقبر لو ينرفع جسمج عن الأرض ابقى وراج وراج، عقلي قافل عليج ياقُفلي والمفتاح لتحاولين وياي كلامج كُله ميجيب نتيجة.
شايفين من يتحكم بيكم عقلكم ويخليكم تحجون أشياء خارج نطاق الوعي؟
اني عقلي اليوم قافل على القضية ماعرف شبي مخليني بس اوكع بالمشاكل.
ايريم: هوايه سمعت بإشباه الرجال وهسه يلا شفتهم.
ضغط على أيدي بقوة حسيت عظم بيها نكسر اجيت اصرخ رفع ايده الثانيه خلاها على حلكي دموعي بدت تنزل من الألم ومن الخنكه اللي احس بيها بسبب ثكل جسمة المحاوط جسمي،
خله شفايفه على أيده المسكتني بيها وكال بتحذير.
مهيائيل: كلمة وحده قسم بالرب الخلقج كلمة وحده وراح تشوفين شي بعمرج مشفتي، لتختبرين صبري لأن ما اضمنلج النتايج.
بدت عيوني تنسد وحدها وحسيت بجسمه نرفع وايدة هم ،اخذت نفس عميق وماعرف شنو صار بعد.
جنت واكفه يم الباب استمع الهم خفت لايسوي بيها شي اول مراح الصوت مالتهم رحت للمطبخ، مطول شويه وطلع من الغرفه اني اباوع عليه من الباب لأن يصير مقابيل غرفتهم، نزلت عيني على أيده لازم بيها خاولي لطمت على وجهي،
عزةةةة بس لا اللي أبالي صح ركضت وبدون تفاهم دفعته وحجيت بعصبيه.
ترانيم: اعرف بيك وأحد فاسق ربك ماتعرفه، لادين ولا عبادة بس على الاقل خاف الله بهاي المسكينه؟ لاباقي بيها عظم صاحي ولا مكان مابيه أثر، جسمها مثل المجرمين بكُل منطقه جرح شلون تدني نفسك عليهاا وهي بهيج وضع شلوووون؟!
عقد حاجبه ومد ايده لجبيني وكال بستهزاء.
مهيائيل: شبيج انت مصخنه؟
دفعت ايده ورجعت صحت بيه.
ترانيم: اللي يعيش وياكم ينجلط يا أخي والله العظيم لو عشق اعشقه من اشوفه ميحبني احافظ على كرامتي وابتعد انت ليش داك رجل ما افهمم!!!
مهيائيل: خلصتي؟
وخري عني اريد اسبح تأخرت.
ترانيم: ماوخر حتى تكلي شسويت بيها؟
مهيائيل: غتصبتها.
لطمت على خدي وصرخت بوجهه.
مهيائيل: عزااا بعينك ولك ليششش هيجج تخبلتتتت شلون طاوعك كلبككك هيج تسوي بيهااا؟!
مسح على وجهه بعصبيه وكال بقهر.
مهيائيل: لتخبلينييي واني بنص عقلل، من عقلج أكدر اخذ شي منها بالغصببب لهاي الدرجه شايفتني مجرممم؟!
ترانيم: لتصيح انت اللي كلت شعرفني.
مهيائيل: ريحي عقلج ولو هي سالفه بين رجال ومرته ومو من حق أحد يدخل بس خليها بدماغج الماعرف بأي طريقه يشتغل، أيدي متنمد عليها غصب عنها، لآخر يوم بعمري متزوجتها علمود شهوه اني اريدها ام بيتي فهمتيني؟
ترانيم: لعد صراخكم قبل شويه وخاوليك هسه على شنو يدل؟
مهيائيل: أعوذ من تفكيرج ونيتج الطايرة، شلون يعني ابطل ما اسبح!!!
ترانيم: شدراني من شفت صياحكم كلت افترسها.
مهيائيل: وحش كدامج، شو وخري مني تأخرت وانتِ كاعده تحققين.
دخل للحمام واني رحت يمها فتحت الباب على كيف شفتها نايمه ومتغطايه عفتها ورحت للمطبخ اليوم لو اني لو هو، بقيت انتظر نص ساعه شرف الأخ لابس دشداشه وغتره وساعته والعطر اجه فتح الثلاجه وطلع بطل مي دار وجهه اليه وعقد حاجبه وكال بتساؤل.
مهيائيل: شكو اليوم؟
ترانيم: انت اللي لازم تحجي شكو اليوم؟
مهيائيل: اهاا يعني الأخت شاكه بيه ليش متحجين وتكولين السبب على شنو هاي الألغاز؟
ترانيم: تعال اكُعد كدامي خلينا نتفاهم عندي كم سؤال اريد اعرف جوابه.
سحب كرسي وكعد عليه.
مهيائيل: استعجلي عندي شغل مهم.
ترانيم: ليش زوجتها؟
مهيائيل: شفتها زوجتي.
ترانيم: ميفيد وياي هذا الحجي اريد جواب يقنعني اعرفك واعرف سوالفك مستحيل تخطي خطوة ماحاسبلها حساب.
مهيائيل: اللي بعده.
ترانيم: ليش وضعها هيج؟
ساعه تضحك ساعه تبجي ومرات تحجي بدون متفكر؟
مهيائيل: هذا السؤال جوابه واضح بس انتوا متحبون تفكرون بيه هوايه فأذن مو مشكلتي.
ترانيم: قصدك بيها جني؟
مهيائيل: ممكن.
ترانيم: وهاي شغلتك ليش مخليه مسيطر عليها؟!
مهيائيل: مو كل شي أكدر اسوي اني ساحر مبتدأ.
ترانيم: صار سنين وتكول مبتدأ!!!
مهيائيل: عمل عن عمل يختلف بعيد عن هذا كُله الموضوع مو سهل لهاي الدرجه يحتاج دراسه مطوله وشرح عميق ومراح تفهمين.
ترانيم: ليش شايفني غبيه منو كلك ما افهم؟
مهيائيل: لو تفهمين مسألتي هذا السؤال على اساس متعرفين شغلنه شلون يصير ومع هذا جايه تحققين.
ترانيم: خليها ترجع لبيتها اعتق البنيه بيا ذنب تتحمل هيج حياة؟
مهيائيل: بذنب انو دخلت عقلي ولازم تدفع ثمن هذا التجاوز.
ترانيم: من عقلك تحجي هيج؟!
مهيائيل: لا من كلبي، عيفج من موضوع ايريم وتصلي بتونه اريدج تخرعيها قبل ماروح.
ترانيم: ملعبي وصلت يمي.
مهيائيل: تحبين هاي السوالف اعرفج.
ترانيم: ولايهمك دلل.
مهيائيل: يلا تصلي وفتحي سبيكر خليني اسمع.
اخذت الموبايل وتصلت مفتحت اول مره اتصلت مره ثانيه وثالثه ومفتحت باوعتله شفت عيونه على الموبايل وأيده لازم بيها السبحة يفر بيها بالعكس وصافن عقله مو يمي شويه وكال.
مهيائيل: تونه كاعد تخابر واحد.
بسرعه حجيت واني ناسيه هو منو.
ترانيم: وشلون عرفت؟
مهيائيل: شويه وراح تتصل عليج اسمعي اول كلمة تكولها.
ترانيم: خوفتني شراح تكول؟
مهيائيل: تذكر اسم هذا الشخص جانت تتصل بيه قبل شويه.
ترانيم: لهاي الدرجه ثوله؟!
مهيائيل: هي من يوم يومها ثوله شنو الجديد.
صدك شويه وتصلت فتحت خط وعليت الصوت حتى يسمع هو هم، نصدمت من كالت.
تالين: ها تقي، اقصد هلو حبيبتي شخبارج صار هوايه ممتصله شكو ماكو؟
اجيت اسألها هذا تقي منو أشرلي بمعنى لا اني هم سكتت طلع موبايله وكتبلي واني احجي مثل ميريد.
ترانيم: والله الحمدلله اسأل عليج تعرفين عده وكذا ما أكدر اطلع عاد اني شلون مشتاقتلج موت ومنتظره تخلص هاي الأيام علمود اجي اشوفج، طمنيني الوالد شلونه؟
تالين: والله الحمدلله نفسنه ماكو شي جديد، انت سولفي وين ماوين حتى نجي نزورج ونأدي الواجب.
ترانيم: يا واجب يمعودة انتِ تدرين اني عندي عيد لأن مات وخلصت منه ميتعاشر باقي بأيد امه وخواته حتى حسرة عليه احجي كلمه بسرعه كلبنها وشكن مني وهو ميصدك يركض وراهن مثل الأعمى.
تالين: اي والله الزلم مالهم آمان ناس حقراء يردون بس شهواتهم.
رفعلي الموبايل واشرلي احجي المكتوب بيه واني اسوي اللي يريده.
ترانيم: اي والله يختي تعبنه من وراهم وكل شي ممستفادين، عيفيني منهم سولفيلي اخواني شلونهم شو لسألوا لذكروا اختهم وين صافي بيها الوكت بسرعه تبروا مني صدك ألك الله يالفقير، بهاي الدنيا مايفيد لا ولد ولا تلد عمت عيني على نفسي وحياتي اللي ضاعت بدون فايده.
تالين: اي والله كلامج عين العقل اخوانج ولا دارين عنج ولا يسألون لو شايفه شلون اتوسل بيهم، اختكم وحدها مالها احد روحوا اسألوا عليها أجبروا بخاطرها خاصه من سمعت بيج طالعه من بيت عيالج حتى بجي عليج بجيت وهم ولا كأن هيج ناس حرامات بيهم التعب وداعتج.
فتحت عيوني بصدمه على الجذب مالتها عينك عينك، اجيت اجفص متحملت بس أشرلي بأيده استمر سكتت وحجيت اللي كاتبه.
ترانيم: اي وانتِ صح سولفيلي عنج ياسيم دَاسِم ميمون مرته شخبارهم؟
تالين: كلهم بخير هل ايام راس البله ماكو ومرتاحين منه وراسنه بارد.
مهيائيل: اي تونه مرتاحه مني؟ والله لتشوفين شي مشفتيه اني اعلمج، حظري نفسج اليوم ترحين لهلج مدمايه.
تالين: ايا طايحه الحظ تضحكين عليه هين اني اعلمج بسيطة.
مهيائيل: تخوفيها بتقي مو؟
لو يصير طير من طيور الجنه اصعدله واكسر جناحه وانزل وكولي مهيائيل كال، واني اعلمج درس بالخيانه مرتب على أصوله.
تالين: شنو تريد وتسكت؟
مهيائيل: العقيق الموجود بغرفة الثور مالتج أريده.
تالين: الحجر خاص بيه شلون تاخذ شي مو ألك لهاي الدرجه صاير متخاف من الله؟!
مهيائيل: عيفج من الدين وانتِ أكبر فاسقه شفتها بحياتي، المهم هذا العندي بعد ساعه واني يمكم اذا مشفت الحجر يمي كولي بي باي للبيت ولزوجج الجحش.
تالين: وشلون اضمن ماتكله؟
مهيائيل: عندي هوايه شغلات اضحك بيها عليج مستحيل اخسر هيج فرصة، لعلمج عندي دليل كامل عليج واذا حجيت يمج اهلج والثور مالتج اخليج تعترفين بكُل شي لذلك اتقي شري ولتسوين شي يضوجني تعرفين العواقب شلون تصير.
تالين: الله ليوفقك ماكول غيرها.
مهيائيل: الدعاء اللي يطلع منج السكف ميعبره.
سديت الموبايل وبسرعه حجيت.
ترانيم: ليش جاوبتها؟
مهيائيل: وليش اتصلنا من الأساس؟
ترانيم: يعني جانت هاي النيه؟
مهيائيل: اني احب اوصل للي أريدة بدون لف ودوران التخطيط والانتظار سوالف الفارغين.
طلع من البيت وعيني بقت وراه هذا الرجال غريب من صُدك.
___
رائف: حي الله اخوي الغالي.
مهيائيل: يحيي أصلك شنو الأخبار؟
رائف: اليوم كعده بين العشيرتين والعُمدة مموجود رايح.
مهيائيل: عندي علم، ميمون وين؟
ميمون: موجود بس انت ماكو.
مهيائيل: تعال رايدك بشغله مهمه.
رائف: صارت شغلات بينكم ليش اني ماعندي علم؟!
مهيائيل: الشغله اذا متخصك لتدخل بيها.
رائف: حرجتني ألعن يومك.
ميمون: تعال وياي هذا اذا حجه ميسكت.
مهيائيل: تربيتي اعرفه.
ميمون: شنو صار وياك؟
مهيائيل: ماعرف بعدني بنفس السيره.
ميمون: اكو اعراض عليها؟
مهيائيل: اي صايره هوايه تنسى وعقلها مو وياها بأغلب الأوقات وتحب تعاندني.
ميمون: اي؟
مهيائيل: اكو مرات احسها قريبه مني حيل ومرات بعيدة كُلش ومطايقتني.
ميمون: ومخطر على بالك السبب؟
مهيائيل: السبب معروف بس الخلاص منه صعب.
ميمون: سهل بس انت وافق اكو الاقوى منها يكدر يخلصك.
مهيائيل: ماريد ادخل بمشكله ثانيه علمود اخلص من هاي، خلي اشوف شنو يصير بعدين.
ميمون: خاتم العقيق ليش متشتريه؟
مهيائيل: راح اخذ الأصلي واللي عمره طويل ليش اشتري مغشوش.
ميمون: لتكولها!!!
شلون حصلت عليه ملعون؟!
مهيائيل: عندي اساليبي الخاصه راح اخذه واطلع واي شي يصير اتصل بيه.
دخل للبيت وصاح بصوت عالي.
مهيائيل: تونةةة ماكو ترحيب بابنج؟
معقوله مشتاقيتلي؟!
طلعت من الغرفه وعيني عليهم هو يباوعلها ومبتسم بغيض وهي نظرتها حقد اتقرب منها ومد ايده لأيدها ماعرف شنو اخذ منتبهت عليهم اول مبتعد حجه وهو مستهزء.
مهيائيل: هذا البيت شياطين الإنس بيه اكثر من الجن سبحان اللي مخليكم عايشين مرتاحين لهذا الوقت ومنزل عليكم البلاء.
تالين: باوع منو اليحجي اذا احنه شياطين فأنت الزعيم مالتنه.
مهيائيل: لو جنت الزعيم صدكيني نزلت بيكم عقوبه وكلكم متوا تحت ايدي بس اني انسان مُسالم ماحب الدم، لكن اخرب على المشاكل جوي أو اجوائي.
تالين: وجودك يمنه اكبر مشكلة.
مهيائيل: وحضري نفسج بعد كم يوم اني ومرتي أنور هذا البيت ونُسكن بيه.
تالين: لا هله ولا مرحبا.
مهيائيل: اخلاقج الهابطه من قلة ذوقج هذا يا تونه.
بزازيني وخدامي الأوفياء خبلولي هاي المره اريد أرجع اشوفها مكفشه شعرها وتركض بكُل مكان.
ابتسم بوجهه بعدين التفتلي ورفع حاجبه.
مهيائيل: وانتِ برسيم شخبارج؟
جاوبته بخوف.
ياسيم: الحمدلله اخبارك انت؟
مهيائيل: متفيدج للأسف.
ميمون: مهيائيل شبيك وياها؟!
مهيائيل: ماعرف يمكن لأن مغرب.
رائف: يعني بدن السوادين.
مهيائيل: مسمعت.
رائف: الله يحفظك خويه كاعد ادعيلك.
مهيائيل: صدكت، يلا رايح ان شاء الله من أرجع الكي نقص بعددكم كولوا آمين.
رائف: ليش نكول آمين لهيج دعاء؟!
مهيائيل: يجوز رايحين للحج وهناك تغفر كُل الذنوب وتطهرون من المعاصي بس ولو الناس لو تعرفكم ترمي عليكم الجمرات مو على الشيطان ، بس يلا هو حجي لكن ربك يعرف اللي بالكلب شنو.
طلع من البيت بدون ميسمع جواب أحد، وهذا الشي المزعج بشخصيته، اصلاً شخصيته كُلها مزعجه ياريت لو تبقى بس على هاي النقطه.
___
كعدت من النوم على صوت القرآن، راحة نفسيه مو طبيعيه بداخلي، الجو بارد والاضويه طافيه وبعدني نعسانه رجعت غمضت عيوني مابين يقظه ونوم سمعت احد صاح اسمي بصوته، طفرت من مكاني واني ادور بعيوني عليه مشفت شي صليت على محمد وآل محمد وكمت بصعوبه شغلت الاضوية مر كدامي خيال أسود، الخوف لعب بداخلي لعب مكدرت أتحرك من مكاني ردت اصرخ صوتي ميطلع، اخذت نفس عميق وبقيت اردد سور قرآنية بداخلي فجأة مر بعقلي خيال الرجال اللي اشوفه بالحلم بسرعة بقيت أصيح اسمه لا أرادي.
ايريم: ياعلي مدد، ياعلي مدد، ياعلي مدد، احضرني يا أمير المؤمنين، ابو الأيتام اكفلني وساعدني، يا أمير المؤمنين، ياعلي، ياعلي، ياعلي.
كدرت افتح الباب وطلعت تنفست براحه والخوف نمحه من كلبي حسيت الحماية الربانيه محصنتني من كُل جانب، رحت توضيت وصوت القرآن من غرفة ترانيم عالي، فتحت الباب بعد مدكيته ودخلت يمها مخليتلي الكرسي حتى اصلي عليه ويمه سجادة وكتاب مفاتيح الجنان والصحيفه السجادية والقرآن الكريم والسبحه من اخلص الصلاة انزل وأقرأ على السجادة او أمد رجلي على طولها لأن اتعب على الكرسي واني كاعده عليه فتره طويله،
اول مشافتني كامت من مكانها واجت يمي سندتني حتى وصلنه للكرسي ساعدتني اكعد وسألتني والقلق مبين بصوتها.
ترانيم: ابو الطلايب شنو سوالج؟
ابتسمت بوجهه اطمنها وكلت.
ايريم: مسوالي شي بس عصب لأن عليت صوتي عليه.
ترانيم: عشتوا واذا عليتي صوتج قابل انتِ مو انسان وتضوجين حالج حاله شنو هاي العادة انوب!!!
اخذيها مني ولتعلميه يصيح عليج بعدين على الطالعه والنازلة يرزل بيج ويعلي صوته.
ايريم: لتخافين ميصير شي خلينا نصلي ونذكر الله.
صليت وكلبي يبجي بمكان عيوني خلصت هي قبلي وطلعت من الغرفه واني بقيت كاعده ردت افضفض لأن تعبت وماعندي احد يسمع واصلاً اني ما أريد اشكي لأحد لأن الكُل ميكدر يساعدني غير ربي،
ايريم: "اليتيم مو اللي يخسر أهله ويموتون اليتُم الحقيقي هو اللي أهله يتخلون عنه وهم عايشين"، لمنو اشكي همي ومنو يسمع وحتى لو لكيت اللي يسمعني منو يحلي مشكلتي؟
نزلت دمعة تبعتها الثانيه والثالثه وسمحت لنفسي ابجي وافضفض راحه مو طبيعيه تحس بيها من تشكي همك لرب العالمين لأن تعرف بعدها تكوم وانت مرتاح ومتخاف على سرك ينفضح ومتفكر يباوعلك بغير نظره، تفتح كلبك وتحجي بأريحية وهو يستمع بدون ميكُلك كافي أسكت وهذا الشي اللي يشجعني اذب حملي يمه لأن يرزقني راحه متنوصف من اسولف وياه واحجيله.
عافوني لا ام ولا اب وحتى اخويه اللي جنت شادة ظهري بيه هم تركني وراح، لمنو اشكي واني اشوف الشيطان بنص بيتي، انجبر انام يمه واحجي وياه، اكو شي يمنعني ابتعد وبنفس الوقت القرب صعب، ساعات احس نفسي عاشقة مُغرمه وساعات اكرهه واتمنى اشرب من دمه، حرت وحتاريت وهذا الضيق ميفارق كلبي تعبت ربي وكاعد اموت باليوم الف موته،
"ضاقت اللهي وماكو مفرج غير بابك حلها وانت الحل للصعاب"
سكتت ودموعي بقت تشرح وضعي الحالي مسحتهم وبديت أقره قرآن بصوت عالي شويه ردت بركه تصير بالمكان وصلت لآية السحره وخطر على بالي هو ماعرف ليش {قَالُوا يَا مُوسَى إِمَّا أَنْ تُلْقِيَ وَإِمَّا أَنْ نَكُونَ أَوَّلَ مَنْ أَلْقَى قَالَ بَلْ أَلْقُوا فَإِذَا حِبَالُهُمْ وَعِصِيُّهُمْ يُخَيَّلُ إِلَيْهِ مِنْ سِحْرِهِمْ أَنَّهَا تَسْعَى فَأَوْجَسَ فِي نَفْسِهِ خِيفَةً مُوسَى قُلْنَا لا تَخَفْ إِنَّكَ أَنْتَ الْأَعْلَى وَأَلْقِ مَا فِي يَمِينِكَ تَلْقَفْ مَا صَنَعُوا إِنَّمَا صَنَعُوا كَيْدُ سَاحِرٍ وَلا يُفْلِحُ السَّاحِرُ حَيْثُ أَتَى}
ندمجت وي الآيات ونسيت نفسي والهم والحزن اللي بداخلي فعلاً حقيقة مقولة رب العالمين عزوجل ( الَّذِينَ آمَنُوا وَتَطْمَئِنُّ قُلُوبُهُم بِذِكْرِ اللَّهِ ۗ أَلَا بِذِكْرِ اللَّهِ تَطْمَئِنُّ الْقُلُوبُ)
صدقت وقريت دعاء اليوم وادعيه المساء خلصت وقبل ما اكوم من مكاني سمعت حركه رفعت راسي شفته مكتف أيدة لصدره وعينه عليه بلعت ريكي وكُل شي صار ويايه اليوم اجه كدام عيوني وكأن دا اعيشه هسه درت وجهي عنه ورجعت ألم السجادة، نزلت دموعي واني اذكر شلون خنكني لدرجه حسيت نفسي راح اموت بين أديه وهو محس بيه، الكرامه اهم شي بكُل العلاقات بس تخسرها تكون خسرت نفسك،
واني احجي بداخلي قاطعتني من أفكاري ايده وهي تسحب أيدي رفعت راسي اله وباوعتله بغضب.
ايريم: ايدك وخرهاا لتستغل ضُعفي وأهلي البعيدين عني لأن ربي ويايه وين ماكنت وهو ياخذ حقي منك.
تربع بالكعده اخذ نفس وكال.
مهيائيل: اني وانتِ بعدنه جدد انطي فرصه لهاي العلاقه خلينا نحب بعض ونعيش سوا على الحلوة والمره، انتِ ما الج غيري واني نفس الشي، صيريلي الأم الخسرتها واني اصيريلج الأب والأخ وكُل الأهل.
وخرت ايده وصرخت بيه ردة فعلي جانت غبية بالنسبه لكلامه بس صدقاً اني ما اتحكم بتصرفاتي يمه ماعرف ليش.
ايريم: لتشبه نفسك بأهلي شيطان مثلك مستحيل يوصل لأظفرهم، هُم ناس شرفاء طيبين مأذوا نمله مابالك انت مخليت عمل نكس مسويته.
مهيائيل: اني شيطان اعترف خليني اصير ملاك على ايدج يمكن تكدرين تغيريني متدرين.
ايريم: (إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ)
ماكو فايدة مراح تتغير لو شنو اسوي وياك.
مهيائيل: جربي شنو تخسرين؟!
ايريم: ربك اذا يحبك يهديك هذا كلامك لو اني غلطانه؟
مهيائيل: ويجوز يهديني عن طريقج حاولي تاخذين بيه أجر.
ايريم: تريد تنهدي؟
مهيائيل: اي شنو اول شي اسويه؟
ايريم: اترك عمل الشياطين وتعال للطريق الصح.
مهيائيل: هسه صعب خلي نبدي من أسهل شي بعدين نوصل لترك السحر.
ايريم: ابدي بصلاة لأن هي عمود الدين والالتزام بيها ينهي عن الفحشاء والمنكر ابدي بيها.
مهيائيل: ماعرف علميني شلون أصلي.
ايريم: اتوضأ بالأول بعدين تعال يمي اعلمك شلون تصلي.
مهيائيل: ماعرف اتوضأ كومي ويايه علميني.
ايريم: تضحك عليه انت؟
مهيائيل: ليش شنو حجيت قابل؟!
ايريم: حياتك كُلها ممصلي؟
مهيائيل: القبله ماعرف من وين.
ايريم: كوم ويايه،
نهض من مكانه ولزم أيدي ساعدني حتى اكوم وياه علمته شلون يتوضأ والأخ استغل الفرصه وشالني مرجعني للغرفة اني همات محجيت بقيت ساكته اكو شي داخلي فرح لأن يريد يصلي حسيتها علامه لأستجابة دعائي بهدايته،
نزلني على الكرسي وكال.
مهيائيل: يلا شلون نصلي؟
بقيت احجي وهو يحجي ورايه بصوت عالي الفرحه بداخلي متنوصف لدرجه نزلت دموعي واني اشوفه شلون يركع ويسجد ويردد الكلمات ورايه خلص وكعد على السجادة التفت إليه ولزم أيدي نزلت وصرت يمه سحب أيدي وبدأ يسبح بيهم تسبيح الزهراء اللي علمته عليه اني اباوع بوجهه وهو مستمر يسبح بأصابيعي كمل ورفع راسه اليه قرة بوجهي علامة استفهام ابتسم وكال.
مهيائيل: مره عن طريق الصدفه سمعت شيخ يكول اللي يسبح بأيده تشتغل اصابيعه نور بيوم القيامة، واني رجال كُلي ذنوب خاف اضيعج بذلك اليوم وما الكاج أكدر اشوفج حتى لو من بعيد عن طريق نور اللي يطلع من اصابيعج.
معرفت شنو احجي بقيت اباوعله وعيوني ينزل دمعها رفع ايدة ومسحهن وكال بنبرة حنينة.
مهيائيل: امسح اللي ينزلهن ادموعج ينزفن بكلبي لتبجين تأذيني هوايه وانتِ متدرين.
حجيت وياه بهدوء بلكي رب العالمين يهديه ويطلعه من هذا الطريق.
ايريم: انت مابيك شي غلط غير شغلك اتركه مهيائيل وكمل حياتك وانت قريب من الله احسن ميصير شي بعدين وتندم بوقت ميفيد الندم شي.
مهيائيل: ادعيلي انتِ الله يحبج ويستجيب دعائج اكيد.
ايريم: راح ادعيلك وعد بس الدعاء وحده ميفيد اذا متحاول ويايه.
مهيائيل: احاول اوعدج.
بتسمت بوجهه وداخلي يرقص طرباً ونسيت الشياطين تخلف وعودها، جانت حرب وهاي اول معركه ينتصر بيها ضدي.
رجع السجادة والكتب الطاهره لمكانها وساعدني حتى اكوم مجنت ماكله شي من الريوك وما اشتهي اكُل اصلاً نفسي مسدوده، بس على اللي صار هسه شهيتي نفتحت، وخاصه طبخ ترانيم طيب بشكل يعكس روحها الحلوه، كعدنه ناكُل هو صاير كدامي وهي بصفي، أيدي اليسرى تأذيني حيل لأن هي جانت مكسوره وهو ضغط عليها وزاد الألم ماعرف شلون نتبهت عليها وحجت بنبرة خوف جبيرة.
ترانيم: ايدج ولج يمعزايه شبيهااا؟!
رفعت عيني اله وبتسمت بخباثه وكلت.
ايريم: ثور نطحني.
جحظ عيونه بوجهي واني رفعت حاجبي ماعرف ليش استمتع من اغيضه مدلي رجله من جوه الميز وضرب رجلي وكال.
مهيائيل: وانتِ ليش تندكين وي الثور تستاهلين اللي يصير وياج من تأمنين الخطر.
ايريم: واذا الثور متوحش؟
مهيائيل: نروضه مو مشكلة.
باوعت عليهم وعلى نظراتهم اللي يتحدون بيها بعض وكلت بغباء.
ترانيم: هذا ياثور تقصدونه؟
مهيائيل: اني شبعت الحمدلله سفره دايمه.
ترانيم: الحمدلله!!!
مهيائيل: سويني نجوسي مره وحده شخليتي بيه بعد.
طلع وهي ضربتني على متني خفيف.
ترانيم: زوجج وضعه معاجبني شبيه؟
ايريم: ماعرف تصرفاته غريبه من رجع لحد الآن.
ترانيم: ديري بالج انتِ تتعاملين وي شيطان مو بشر عادي وهاي اني اخته وحذرتج لتكولين مكلت.
كلامها خلاني اعيد التفكير بكُل شي صار من عركتنه وعصبيته لهدايته المفاجأة، خفت ليريد ياخذ كلبي ويسيطر عليه من هاي سوالفه واني الثوله ما انتبه عليه ولا على أسلوبه، ربطت كُل الأحداث بعقلي وستنتجت اكو شي غلط مامعقوله ينهدي بين ليله ويوم اكو حلقة مفقودة من هاي السلسلة،
غسلت المواعين واني يمها بقينه شويه نسولف حتى تعبت وكامت تنام واني بقيت بالمطبخ، سمعت صوته وهو يصيحني كمت من مكاني امشي على كيف فرجت اسناني وتوضيت رفعت راسي خطف خيال من الغرفه اللي هو نايم بيها حسيته دخل جمدت اطرافي واني اشوف هيج منظر تعالت الأصوات واسمع بأذني همس ساعه على صوت أبيل وساعه صوت ترانيم أخير شي جان صوته، ماعرف شلون اجتني الشجاعه صحت "ياعلي" وتقدمت من الغرفه فتحت الباب وجانت هنا الصدمه منظر بعمري مجنت اتخيل اشوفه خلاني ما اتحكم بجسمي ابد..
يتبع..
البارت اكثر من 4000 كلمه
اريد اشوف تعليقاتكم بين الفقرات وتصويتكم للبارت ومشاركتكم للقصه شمعاتي.
تصبحون على الف خير وعافيه.
اي شي يخص القصه تعالوا يمي انستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!