للتواصل انستا/ zahraaahmedn99
لتنسون التعليق بين الفقرات والتصويت للبارت والمتابعه شمعاتي ❤️
مهيائيل
الكاتبة (زهراء احمد)
___
فدوه لـ عيونك عيوني
الـ ضام چم غنوة بـ جفنها
فدوة الك روحي وسوالفها وحزنها..
___
دخل مهيائيل بنفس اللحظه اتقرب منها فرحان والضحكه شكت الحلك وقبل ما يحضنها هي فتحت ايدها مرحبه بيه وكالت شي كان أكبر صدمه للكل ماعدا امها وابوها.
ايريم: بابا وين جنت؟ خفت عليك هوايه عبالي صار بيك شي.
تغيرت ملامحه وبلع ريكه بابا شنو!!
ابتسمت بوجهه بطفوليه حركاتها مال بنيه صغيره متشبه ايريم العاقله والفاهمه، راح يمها موافقها الرأي وماخذ دور والدها اللي شبهته بيه والسبب مجهول.
مهيائيل: يروح بابا هذا انا مابيه شي، كليلي تحسين بألم بمكان معين بجسمج؟
حركت راسها بمعنى لا وحاضنته بقوة مثل واحد مشتاق وصار فتره طويله مشايف محبوبه.
ايريم: ماحس بشي بس خفت عليك وين رحت وعفتني؟
مهيائيل: مارحت لمكان بس خابرت ورجعت.
ايريم: اي لتعوفني مره ثانيه تره ازعل عليك.
مهيائيل: لا كل شي ولازعلج ابقى هيج مخليج يمي طول العمر وماكو شي يفرقنا خوش؟
ابتسمت كايله بحماس.
ايريم: خوش.
دخل الدكتور بعد مصاحه ميمون تقدم منها فحصها وبده يسألها، فتح اصابيعه بوجهه كايل.
:تعرفين هاي شكد؟
ايريم: خمسه، اعرف الرياضيات اني بابا علمني عليه.
:وينه ابوج؟
رفعت ايدها مأشره عليه.
ايريم: هذا واكف وراك.
:شكد عمرج؟
ايريم: عشر سنوات.
:بيا صف؟
رفعت ايدها فاتحتها بوجهه كايله بفخر.
ايريم: رابع ابتدائي، ونص السنه نجحت أولى ودرجاتي كلها عشره.
:تعرفين هاي يا سنه؟
ايريم: ٢٠٠٧
:تذكرين وين جنتي؟
أشرت براسها بمعنى أي وبسرعة صارن عيونها حمر وكالت.
ايريم: بابا كايل راح يجيبلي جبس من المحل وراها مارجع ابددد واني طلعت اركض ادور عليه المغرب.
:وشنو صار وراها؟
ايريم: ماكو شي صار هذا ابوي اهنا ماصار بيه شي، كافيي اسكتها لتحجيييي شي ابوييي ماماتتت، ماماتتتت هو بعده عايش ابويييي ماماتتتت تسمععععع.
كامت تصرخ دفعه مهيائيل الدكتور وراح حاضنها.
مهيائيل: هذا انا يروح ابوج مابيه شي ماميت كافي تبجين يلا لتضوجيني بدموعج يروحي.
ايريم: عايش انت مامتت مو؟
مهيائيل: مامتت هذا انا عايش ماتشوفين؟
ايريم: طلعني منا خلي نرجع لبيتنا.
مهيائيل: تدلل بنيتي الحلوه نامي هسه اروح اسوي إجراءات الخروج ونطلع.
ايريم: ماكو متروح تبقى يمي، خلينا اهنا عادي لتروح انت.
مهيائيل: باقي يمج ماروح يلا بس اهدي يروح ابوج انتِ.
ضربتها الممرضه أبرة مهدء وابوها سأل الدكتور.
سنمار: شنو صار بيها ليش فجأة رجعت بيها الذاكره لقبل سنين طويله؟
:بهاي الحاله لازم نسويلها فحص حتى نعرف فقد الذاكره نفسي لو مرضي بسبب ضربة الراس اللي تعرضتلها، بس هو سؤال حضرتك شنو تصير منها؟
مهيائيل: زوجها.
:وليش سمتك ابوها؟
جاوبت والدمعه من عينها مانشفت.
تسنيم: لأن ابوها يشبهه حيل بنفس الهيئة واللبس.
:لازم نفحص ونتأكد واعرف شنو صار بالضبط حتى نحدد طريقه للعلاج وشلون تتعاملون وياها.
مهيائيل: اكو علاج؟
:كتلك بعدنه ممحدين السبب لازم نفحص راسها بالرنين المغناطيسي ونعرف وضعها بالتحديد شنو سببها، ياريت تعوفوها ترتاح راح اصيح الممرضين ياخذوها علمود الفحص.
ترانيم: وكولي مهيائيل السبب سبحان الله بعمري كله ماشفت وحده مثلج طول عمرج معيشتها بوهم ماخفتي من الله؟!
محسبتي حساب هيج يوم يجي!!!
تسنيم: اللي سويته علمود انقذها لا أكثر والا شنو استفاد اذا محجيت شي الها!!!
ترانيم: من شنو حميتيها بله؟
تسنيم: اسرار بيتي ماكو داعي احجيها الج.
مهيائيل: خليني انتهي من هاي السالفه والله كريم، ترانيم رجعي وي ميمون للبيت وانت ابيل اخذ اهلك ماكو داعي لوجودهم اهنا بعد.
ابيل: يلا يمه.
تسنيم: ماطول اختك وحدها اهنا مستحيل اتحرك خطوه رجلي على رجلها.
مهيائيل: على سيرة اختك، مو عيب عليك معيشها بوهم هاي السنين كلها على انك اخوها وانت بالحقيقه مو هيج!!
مخفتوا ربكم وانتم عائله مؤمنه على الأساس من تحضن وتبوس وتشكي وتسولف وتنزع الحجاب يم شخص محرم عليهاااااا!!
شنو من عالم انتو اريد افتهممم ليش محجيتوا شي الهااااا؟ ليش خليتوها تعيش العذاب طول هاي السنين وهي بحسرة تذكر ابوها وامها الحقيقين لو تقره عليهم الفاتحه؟!
سنمار: لأن خفنه عليها سكتنا عن الموضوع وصارت بتنا وهاي السيرة محد فتحها كدامها طول هاي السنين.
مهيائيل: وهسه بيا وجهه تباوعولها وانتوا حرمتوها من ذكر اهلها الحقيقين وعيشتوها بنص جذبه يا أخي حتى بالافلام ماكو تفكير إجرامي وخطط، بحياتي كلها ماشفت أقذر منكم.
تسنيم: كافي عاد اخذتنا بالسانك، البنيه فقدت الذاكره بسبب الصدمه النفسيه اللي تعرضتلها ويمكن ترجع بعد أشهر ويمكن تستغرق سنين، ساعدوها تذكر وحجولها عن حياتها قبل بس احنه مكدرنا نحجي شي وسميناها على اسمنه وعشنا كل عمرنا خايفين يجي يوم وترجع ذاكرتها لأن مستحيل راح تتحمل اللي صار.
مهيائيل: وشنو صار؟
تسنيم: ماطول عقلها حاذف هذا الجزء بعده مستحيل نحجي الك، ولتفرح هوايه فتره مؤقته وترجع ذاكرتها مثل قبل وحسن.
مهيائيل: بس ما ترجع تصيحلج يمه، ولا تعتبركم اهلها، لأن انتم سرقتوا هويتها واسم اهلها واجمل ذكريات عمرها وطفولتها.
تسنيم: اللي سوينا علمود مصلحتها والله، انا لليوم ماكدر انسه ابني وشلون مات ماردت افرط بيها هم كل اللي سويته علمود احافظ على سلامتها ومارجعلها نفس الألم والحسرة والحمدلله بعدها ماتذكر وان شاء الله طول العمر تبقى ناسيه هذا الشي، الشفنا ماريدها تشوفه وحتى لو تكرهني ماعندي مشكله لأن انا ام وماكو ام بالدنيا كلها تكدر تفرط بتها.
مرات تكون الأخطاء اللي ينتج عنها عواقب وخيمه بدايتها كان حسن نية وظن صالح، احنه مندري شنو يصير بعد عشر سنوات لذلك نمشي بدون وعي ومنحسب حساب للمستقبل، بالوقت اللي الدين يستنكر ويحرم هذا الفعل لكن حسن النيه ومشاعر الأمومة الموجوده بكلبها لبنت حماها خلاها تسوي هيج،
دكت رجل وبقوا بالمستشفى لمن طلع الدكتور.
مهيائيل: بشر شنو صار وياك عرفت السبب؟
:أجزاء من الدماغ المسؤوله عن الذاكره متضرره بسبب الحادث الصار وياها وبهيج حاله لازم نعالج هذا الخلل، اللي اريده منكم تذكروها وتعرفوها على الأشخاص بشكل بطيئ بما انو ذاكرتها رجعيه مو فقد عام،
وأهم شي بحالتها لازم نعرف حياتها السابقه بالكامل وشلون صار الفقد وآخر مشهد شافته شنو جان؟
مهيائيل: هذا الشي موجود يم اهلها تكدر تسألهم وهم يحجون الحقيقه كامله.
سنمار: اذا جانت صحتها متوقفه على هذا الأمر نحجي ماعدنا مشكلة، امها نصابت بمرض سرطان وهي عمرها تسع سنين توفت بعدها بسنه ابوها خسر حياته.
:شلون مات؟
سنمار: قتل، هجمو على بيته وقتلوه وهي بسبب هاي الصدمه سكنت المستشفى لا تاكل ولاتشرب ومتحجي وي احد، مكدرنا نبقيها فتره طويله هناك ورجعناها للبيت يوميه تطلع بالباب توكف تنتظر ابوها حتى بيوم مر وأحد لابس دشداشه وعكال عبر بدون متشوف وجهه بسرعة ركضت وراه طلعت انا وخوها وراها ندور عليها لكيناها بمكان اظلم واكعه والدم تارس راسها وديناها للمستشفى ومن صحت فاقده الذاكره بشكل تام بكد مضجنا عليها فرحنه لأن راح تبدي من جديد غيرت جنسيتها وسميتها بأسمي واسم عمتها وعتبرناها بتنه عمها الثاني ما عارض وخوالها هم ونسدت السيرة مالت ابوها المغدور وعاشت بأسم "ايريم سنمار".
:لازم نعالج الاضرار اللي صارت بالدماغ بسبب الحادث وان شاء الله ترجع ذاكرتها مره ثانيه.
مهيائيل: وبالنسبه لذاكرتها قبل صدمة ابوها شنو يصير بيها؟
:هذا الشي منكدر نحدده هسه بالأول لازم ترجع ذاكرتها ونشوف.
بقينا منتظرين اني وامها بالغرفه والبقيه رجعوا للبيت، هي تقره قرآن واني مغمض عيوني، حتى لو تركت السحر تبقى الخيره موجوده بعقلي ماكدر اخلص منها بسهوله وهذا الإحساس القاتل بأنو راح يصير شي عند السحره يكون اكيد اعيش اللحظه قبل متصير بأيام وتبقى تعذب بيه،
اذكر مره جنت كاعد بالغرفه مالت السحر فجأة صار هوه قوي نفتح الشباك ودخلت بزونه سوده تمشي بأتجاهي وكعدت بين رجليه هيج اشياء ممكن تصير اذا استحضر جن لكن بوقتها مجنت اسوي شي أعمال عاديه علمود وحده تريد ترجع لزوجها،
احنه السحره والجميع بدون استثناء منكدر نشوف الجن بالهيئة الحقيقيه إله وانما يجي متشكل على هيئة حيوان لو انسان، واغلب المرات الجن اللي يجيني يكون بشكل بزونه سوده عيونها تصير خط واحد،
شغلنا وي الجن هو سوالف وكعدات عاديه لكن يحجي بالاذن مو شي يكدر الكل يسمعه لهذا السبب اهل الطشه والخيره الكلاميه بدون استخدام اي شي والفنجان والتاروت وغيرها مو هو يشوف هاي الأشياء بورقه لو بكوب مال كهوه ويضحك على المسكين أو المسكينه الشغله أعمق من قرايه وخبره وانما هي جن، وللعلم حتى خيره القرآن نفس الشي لأن محد عنده علم بتفسير الآيات حسب حياة الأنسان القادمه وشنو يصير بيها،
مو كل كلام الخيره صح والسبب الخيره تصير بأمور تغيريه مو مصيريه على سبيل المثال اليوم مكتوب يصير وي رائف حادث مثلاً اني تنبأت بالخيره هو راح يتأذه وهو من طلع دفع صدقه لو قره آيه الكرسي للحفظ مراح يصير شي بيه مو لأن أني جذبت ولكن هاي الأمور تغيريه ممكن تبقى ثابته وتصير وممكن رب العالمين يغيرها ويصير العكس،
أصعب انواع السحر هو السحر الأسود ممكن يموت الأنسان واغلب السحر القاسي اللي ميتعالج بسهوله يمكن يموته، سحر المقابر والسحر اللي ينشمر بالمي هاي الأنواع صعب حلها يحتاج فتح عمل وتبطيله ومن الصعب يصير هيج لا بل من المستحيل لأن هو مو يم الساحر، هسه ممكن سؤال يخطر شلون الساحر ميعرف مكان السحر وين؟
هذا جوابه بسيط لأن الساحر مو هو اليعلم وانما الجن الموكل بخدمته ومو كلهم عدهم هاي القدره الكامله بالتعرف على الأشياء بدقة تفصيلية، نعرف انو السحر موجود بالمقبره مدفون وي ميت لكن تحديد المكان بدقه وبالشبر والمتر هذا غير ممكن لأن احنه مو GPS مجرد سحره،
هاي البزونه اللي اجتني جانت جن مشت على أطراف رجليها وهي واكفه عدل مثل الأنسان ونظراتها تغيرت وصارت تباوع بتركيز مثل شخص يريد يطلع على روحك، الغرفه ظلمه والأجواء تساعد لوجود الشياطين التفتت على صوت فتح الشباك شفت بزونتين وتجمعن يمي حتى صارن خمسه دارن حواليه، وهناك واسمع نقاش واحد بأذني،
اطلب منها عظم جلب السحر مايضبط بدونه.
وهذا الشي وارد بعالم الجن اصلاً ما ياقام السحر بدونه، من يطلب الساحر عظم خروف أو شي معين من الشخص اللي يجي علمود السحر فهذا يكون بأمر من الجن والا الشخص اللي يسوي سحر هو إنسان لا حول له ولا قوة مجرد عبد مأمور للجن،
صفنت بنفسي اني وين جنت أو وين صرت معقوله خلصت العمر اضحك على العالم وليش هم أغبياء لدرجه يصدكون بيه؟!
المحبه بعمرها مجانت بالسحر ولا الطاعه والخضوع ورد المطلقه وتعالي ادفعيلي كذا مبلغ واخلي حبيبج يجي يخطبج، اللي مايشتريني بدم كلبه ويضحي علمودي ويحارب الدنيا والعادات والتقاليد بس لخاطر يحصل عليه مادفع عليه درهم واحد، كرامة الأنسان عزيزه والسحر مؤقت يوم يومين وينتهي وتبين الحقيقه وراح تسمع كلمات جارحه من عنده وهاي الجمله اللي مستحيل تنسي ويكدر أحد يعبرها "ياريت ماتعرفت عليج ولا تزوجتج اني ندمان"،
واحجي بمجال شغلي وخبرتي من سنين هوايه بنات شابه اجتني تبجي زوجها بطل يحبها ومن يكون سؤالي عن السبب راح تكول مسواله عمل لا ممسواله بس هو مايريدج هذا الواقع،
من يبطل الرجال يحب ومن يجي يصاحب بأسم الحب ومن يوعد وما يكدر يوفي بالعهود ومن يكول امي ماتقبل ومن يطلب منج تعارف ودزي صوره هاي كلها مو نيته زواج ولا هو بداخله حبج اصلاً وغيرج بحياته اكو عشره وعشرين والرساله يحددها للكل ويدزها، اوعن حقيقة مجتمعنا اللي نعيش بيه هسه، لتوصلين لمرحله تردين سحر وشعوذة من ساحر وتمشين بالباطل والحرام بس لأن أني احبه، انتِ متحبيه انتِ موهمه بهذا الشعور بس بالحقيقه مع الايام والعشره وياه تكتشفين نفسج غلطتي واني احجي من مجال خبرتي وشغلي،
الخيره والسحر وهذا الطريق كله غلط وضحك عليكم علمود كم فلس وهذا كلام ساحر القرن واتحده احد يكول عكس هيج من زملائي السحره وحتى الناس التمشي بهيج طريق.
فتحت عيونها كمت يمها بسرعة اول مشافتني عقدت حاجبها مبتعده برعب وكايله بتساؤل.
ايريم: منو انت؟
مسحت على وجهي بكف أيدي جانت عايزه التمت، امها فرحت لأن ناسيتني روحي يمها وحضنيها طلعت بسرعة أصيح الدكتور يموتون كلهم ومستحيل اتخله عنها، طلعتها من المستشفى لبيتنا وهذا آخر كلام.
مهيائيل: دكتور شنو وضعها؟
:قبل شويه من صحت جان عقلها موشوش لهذا اعتبرتك والدها بسبب هيئتك المتشابهه وياه لكن هسه رجعت ستذكرت شنو صار ونستك انت منو، الأمر مو خطير لهاي الدرجه تكدر تذكرها وتحجيلها وتاخذها للأماكن المريتوا بيها جامعتها المدرسه خليها تحجي وي الأصدقاء والأهل عرفها على البيت وعيشتها هناك.
تسنيم: هي عاشت ويايه سنين طويله خليها تجي يمنه للبيت حتى ترجع ذاكرتها وتتعرف عليه ميصير نعيشها يم شخص غريب متعرفه.
مهيائيل: زوجها اني غريبيشش ام أبيل!!
تسنيم: حتى لو زوجها هي ماتعرفك هسه واكيد راح تخاف منك وتنفر وجودك بحياتها.
مهيائيل: تردين تخبليني تره انا من الأساس نص عقل تكفي شري وخليها تعدي على خير وايريم ماتروح لمكان ثاني غير بيتها هذا خصم الكلام،
عفتهم وفتت يمها دايره وجهه للجهه الثانيه وهادئه حسب كلام الدكتور هي رجعت لأيام الصدمه وكأن كاعد تعيش هاي اللحظات هسه ما مرت عليها سنين،
سحبت الكرسي كاعد يمها قربت أيدي الزم ايدها سحبتها وبتعدت مفزوعه.
ايريم: منو انت؟ ليش موجود يمي بالغرفه؟ شنو تريد؟ وعمتي وين؟
ابتسمت بوجهه وداخلي محترك عافت العالم كلها ونستني اريد اشوف اللي كالي انت محظوظ حتى اركعه بالنعال بنص وجهه.
: اني مهيائيل، جنتي تلقبيني ساحر القرن وعندي لقب ثاني منج ابو السحوره.
ايريم: مو عبالك صغيره تضحك عليه هسه اصيح عليك ابوي يموتك تره، ماعرفك اني اصلاً من شوكت انطيتك لقب؟!
مهيائيل: شلون متعرفيني اني وانتِ صار سنتين عايشين سوه تحت سكف واحد.
ايريم: لجذب والله هسه يجي ابوي ويسمعك ويضربني ماعرفك لتبتلي عليه،
عمهههه وينج عمهههه؟
كامت تبجي لأمه نفسها ومنا هي ايدها مجبره وراسها ملفوف مكدرت اتحمل اشوفها بهاي الحاله طلعت بره خابرت رائف.
مهيائيل: كدامك دقيقه تجيب ترانيم وياها العقد مالت الزواج وصورنا بساععع.
رائف: كعدت؟
مهيائيل: لا منتظره خالتك تجي، روح بدون كلام زايد سوي اللي كتلك عليه منتظرك.
سديت الموبايل ورجعت للغرفه شفت امها كاعده يمها قريت السلام اكيد راح تلعب ضدي.
ايريم: عمه هذا منو؟
تسنيم: واحد مزعج عوفج منه هسه يجي عمج ونرجع للبيت وبعد متشوفيه.
مهيائيل: مو هي كوتره وبكيفج نمشي احنه.
تسنيم: ها تريد تعارض كلام الدكتور؟
مهيائيل: والدكتور كال احجولها الحقيقه علمود تستعيد ذاكرتها مو جاهل انا وتمشين دروبج عليه، وخري منا خلي احجي وياها لا اطلعلج شياطيني وتعرفيني عاد انا شلون واحد عاقل ويتفاهم بهيج مواضيع.
سمعت الكلمه متدري بيه تبت من السحوره وهذا من صالحي اسوي اللي اريده بدون ما أتعب، رحت يمها سحبت ايدها ولو هي تعاند وباقين هي توخرها واني ارجعها تعبتني ومتقبل تسمع صحت بيها.
مهيائيل: اثبتيي خليني اكل تبن شكيتيني شككك.
نزلت دموعها معبسه الملامح انا هم مدري شمالني منجلب بوجهه وناسي هي متعرف شي وعقلها عقل طفله رجع ويحتاج وقت وجهد حتى تستوعب كلامي وتفهمه.
ايريم: وخر عني ماحبكك هسه يجي بابا وحجيله عليكك ويضربك.
مهيائيل: ميخالف خلي يضربني بس انتِ لازم تسمعيني البنات الشاطرات هيج يسون وبابا يحب يشوفج بنيه واعيه وتسمعين الكلام مو؟
اشرتلي براسها بمعنى أي رفعت ايدي ماسح دموعها باوعتلي بنظرة بريئة ماريد بهاي اللحظه غير ألمها بحضني وعوضها عن كل شي عاشته وشافته بحياتها من ألم وعذاب: تدرين احنه بيا سنه هسه؟
ايريم: اي اعرف ٢٠٠٧.
مهيائيل: لا احنه ٢٠١٩ هسه.
فتحت عيونها بوجهي مصدومه الأمر صعب عليها بس الأفضل تعرف الوقت العايشه بيه هسه مرت عليه سنين طويلة والحياة تغيرت مو نفسها.
ايريم: مستحيل تضحك عليه انت مصار اسبوع من راح أبويه يعني بعدنا بنفس السنه واصلاً اني بصف الرابع يعني شوكت طفرت هيج، معقوله بطلت؟
مهيائيل: لايروحي انتِ تخرجتي مصار فتره طويله.
ايريم: هسه طلعني ام.
مهيائيل: لحد الآن بعدج مصرتي لكن ان شاء الله مستقبلاً.
ايريم: وخررر واحد قليل ادببب ويععع يريدني اصير ام واني بعدني بهذا العمر.
مهيائيل: شكو بيها ياعيوني تصيرين ام واحله ام بعد اولادج محظوظين بيج، كليلي شنو تحبين تسميهم اذا ولد او بنيه؟
ايريم: اذا ولد اسميه باسم أبويه واذا بنيه ماعرف أختار انت.
مهيائيل: بأسم امي.
ايريم: ليش انت هم امك ميته؟
مهيائيل: اي شفتي عدنا صفات مشتركه.
ايريم: اني هم امي ميته قبل سنة امك شوكت ماتت؟
مهيائيل: قبل ١٤ سنه.
ايريم: يعني بعدني مجايه للدنيا هوايهةةةة صارلها.
مهيائيل: لا جايه للدنيا بس بعدج صغيره.
ايريم: اذا انت تكول احنه ب٢٠١٩ معناها هسه شكد عمري؟
مهيائيل: ٢٣سنه.
ايريم: منين تعرفني؟
مهيائيل: مرتي انتِ يروحي.
ايريم: شوكت تزوجنا؟
مهيائيل: من سنتين تقريباً.
ايريم: ليش ماذكرك؟
مهيائيل: صار وياج حادث.
ايريم: اريد ارجع وي عمتي للبيت.
مهيائيل: ميصير ترجعين وياها بيتج موجود.
ايريم: بابا ميقبل اروح وي غريب.
مهيائيل: مو غريب زوجج انا.
ايريم: اي بس ماذكرك منو يكول تحجي صدك؟
مهيائيل: هسه راح اثبتلج كلامي بس خلي نتفق اذا شفتي بعينج تقبلين تجين وياي خوش؟
ايريم: بالأول راويني.
مهيائيل: اكول عليمن طلعتي السان اثاري من الطفوله هذا الطبع.
ايريم: معاجبك؟
مهيائيل: لا عاجبني ونص أكدر مانعجب انا!!
ايريم: شنو اسمك كلتلي؟
: مهيائيل ليش تنسين بسرعة؟
ايريم: اسمك صعب اني معليه.
مهيائيل: مع الوقت يصير سهل، شنو تحبين تاكلين اكيد جعتي؟
ايريم: ماريد شي ما اشتهي شبعانة.
عبست الملامح، سوالفها مو محزوره من تحجي دقيقه احسها ايريم مرتي اللي اعرفها ودقيقه تنكلب وترجع طفله، وكأن من تسولف وياي يحجي كلبها مو هي.
مهيائيل: ليش عبستي؟
باوعتلي بعيون بدمعه كالت جملتها وبجت بصوت عالي.
ايريم: ابوي صدك مايرجع بعد؟
رحت يمها حضنتها وحجيت وياها بهدوء مشاعرها هسه حاسهم وحافظهم عدل، شعور ميكدر يوصفه حتى الحاس بيه من كد مابيه ألم وعذاب وحزن وكره للدنيا التاخذ من عدنه احبابنه قبل منشبع منهم.
مهيائيل: انتِ متكدرين تشوفيه بس هو موجود بكلبج، يشوفج ويسمعج وتكدرين تسولفين وياه.
ايريم: راح يم امي وعافني، كتله لتروح ماريد شي لتشتريلي بس هو أصر يطلع ويعوفني وحدي، شفته واكع كدامي وكعدت بيه هوايه والله وحلفتله اسمع الكلمه واقره دروسي بوقتها وماسوي وكاحه بس ماكعد، اكرهههه عمي من صحتله كتله ابوي نايم مايقبل يكعد كلي مات شلون ترديه يكعدد، اريده والله اريده ليش راح وعافني بعدني ماشبعت منه، حلفلي ياخذني للملاعيب بس أنجح ويشتريلي لعبه وراح قبل ميشوف نتيجتي، جان ميقبل احلف جذب يكول حرام ودفعين كفاره وهو حلف جذب منفذ وعده وياي.
تبجي وتشهك فطرت كلبي رفعت وجهه بين أديه ومسحت دموعها خدودها وخشمها صاروا حمر بست عيونها وحجيت.
مهيائيل: ممنوع تبجين بعد ابوج راح انا موجود بمكانه اصيرلج اب وأخ وصديق وكل شي ترديه متفقين؟
ايريم: ماريدك تصير ابوي.
مهيائيل: هااا ليش؟
ايريم: خاف تعوفني وتروح هم.
مهيائيل: ماعوفج يمج كاعد على كلبج طول العمر.
ايريم: ماريدك ابوي.
مهيائيل: جا شترديني؟
ايريم: يااا وخررر متستحي انت لازمني من أيدي صار ساعه ماخذ راحتك، كوم من يمي عيبب عليك تسوي هيج.
مهيائيل: ليش عيب انتِ كلتي ماريدك تصير ابوي ارجع لوظيفتي الحقيقيه اللي هي زوجج.
ايريم: لحد الآن مامصدكتك فوخر عني احسلك.
مهيائيل: نامي ووخر.
ايريم: ما نعسانه.
مهيائيل: الساعه دكت ١٢ نامي يلا باجر نطلع من المستشفى وترجعين للبيت.
ايريم: عمتي وين؟
مهيائيل: مادري هسه اطلع اشوفها وانتِ نامي.
غطيتها وطلعت شفتها كاعده على الكرسي وتبجي.
تسنيم: الخايفه من عنده صار ان شاء الله ترجع ذاكرتها وتنسى هاي الأيام بنيتي مستحيل تكدر تتحمل هيج ألم بعد العاشته والشافته مراح تعيش.
مهيائيل: بكل الأحوال خسرتي ام أبيل لأن هذا الحادث ونومتها هنا كلها بسبب الماضي مالتها.
رفعت عيونها إليه وضربت على رجليها مصدومه.
تسنيم: شنو قصدك يعني هي تذكرت كل شي قبل الحادث؟
مهيائيل: راضيه هي السبب.
تسنيم: وهاي عجوز البين شدخلها بالنص!!!
مهيائيل: عجوز البين اجت حجتلها كل شي والله اعلم شنو كايله الها وخلتها تطلع بالشارع مصدومه هيج بدون عبايه تريد تجيج وتفهم منج السالفه، حتى لو رجعت ذاكرتها راح توكفج وتسألج ليش سويتي هيج وماذكرتيني بأبوي وامي واني بنت منو؟ وليش خليتها تعيش وي أبن عمها على اساس هو اخوها، انطيتوها هويه جديده ومحيتوا اشياء ومسمحتوا الها تذكرهن.
تسنيم: هوايه تذكرت ويخطر على بالها واحد لابس دشداشه ومن تسألني أكلها هاي من المسلسلات ماكو هيج حجي، دائماً تحلم وتكعد مرعوبه واني اطمنها واقره يمها حتى ماتذكر، بيتتها مره يم الأمير علي عليه السلام حتى تبقى مو واعيه لشنو صار اريدها تنسى حتى ماتعيش بألم وحسرة اهلها،
ابوها مات مقتول تعرف شنو يعني مقتول وكدام عينها وهي طفله ماتعرف شي عبالها نايم، بذلك الوقت محد يحجي يم الأطفال هيج أمور عايشين على الفطره مو مثل هسه، حتى امها من ماتت خلاها يمي وهو راح للفاتحه ومن خلصت الفاتحه ورجع وسألته مبين شي كدامها خاف عليها بنته الوحيده وحقه، خوالها شكد طالبو بيها ومقبل كال أني اربيها تصدك حتى رادوا يزوجونه اخت المرحومه ورفض رفض قاطع كال مستحيل اجيب زوجة اب لبنتي حتى لو خالتها،
يغسل ويبدل ويمشط ويوكل وينيم ويقري وأربع وعشرين ساعة تلكاها بحضنه، رضا جان خوش رضا الله يرحمه ويغفرله.
مهيائيل: ماكدر اصدك انتِ هيج سويتي بيها ومحجيتي شي الها وذكرتيها منو ابوها وشنو قدملها، ابوها مات من محيتي ذكراه من عقلها ومخليتي يعيش بروحها، انتِ قاتله بس من نوع ثاني وماكو مبرر مقنع للي سويتي.
عفتها ومشيت واكف اباب المستشفى وكفت سيارة كدامي نزل منها المسعد.
ترانيم: ها خويه شنو صار وياك؟
مهيائيل: بقى قاطع واحد وحرر الموصل.
رائف: ههههاي جايبنه بنص الليل حتى تحشش عيوني؟
مهيائيل: لا عاجبني اكتلك وادخلك مستشفى واضيع بيك وكت.
ترانيم: اي مهيائيل شهل النفسيه الخايسه مالتك احجي عدل خلينا نفتهم شنو الموضوع.
مهيائيل: ارجع للبيت عزيزي وانتِ تعالي وياي، جبتيهن؟
ترانيم: اي وجبت شويه ملابس هم الكم.
مهيائيل: عاشت ايدج.
ترانيم: شنو كال الدكتور عليها؟
مهيائيل: فقدان ذاكره رجعي، بعد الحادث صار عدها اضرار بالدماغ سبب نسيان الاحداث الصارت هسه وتذكر بس الطفوله.
ترانيم: اي شفتها عبالها أنت ابوها.
مهيائيل: هاي اول ماصحت بس من كعدت مره ثانيه عرفتني اني مو ابوها وكامت تبجي.
ترانيم: اي وشسويت؟
مهيائيل: فريت المحبس وكدرت احجي وياها شويه.
ترانيم: سحرتها ولك!!
مهيائيل: سحريش يمعودة الأطفال كائنات بريئة تكدرين بالأسلوب الحلو تجذبيهم الج.
ترانيم: بس هيج؟
مهيائيل: ليش تخليني اقسم عليج هسه بشرفج ترانيم وراس الحسين مالي خلك البيه مكفيني والدنيا طالعه من اذني مو بس خشمي.
ترانيم: كلتلها انت زوجها؟
مهيائيل: تضحك عليه تكلي كوم اطلع بره لايجي ابوي ويشوفك.
ترانيم: يعني تذكرت ابوها متوفي ياعيني الله يصبرها.
مهيائيل: ذكرياتها مشوشه ساعه تكول مات ساعه تكول عايش، خوفي لاتطلع مشكله ثانيه بعدين.
ترانيم: أعوذ بالله من هيج تفكير كول يالله وكل شي ينحل وداعتك هونها وتهون ياعيني.
مهيائيل: شهون منها ترانيم الدنيا من جميع الأبواب نسدت بوجهي.
ترانيم: لاتحجي هيج ربك ماطول خله بيها نفس وعايشه معناها كل شي ممكن، يقول للشي كن فيكون متصعب عليه هاي حاشه.
مهيائيل: والنعم بالله.
ترانيم: امها بعدها هنا؟
مهيائيل: دكت رجل ماطلع الا هي وياي.
ترانيم: راح تخليها تروح وياهم؟
مهيائيل: نجوم السما أقرب مستحيل اضحي بيها واني اعرفهم شنو من ناس ماخليها يمهم دقيقه.
ترانيم: لتكبرها عمامها همه يعني اهل.
مهيائيل: اللي ضمو عليها ابوها تردين أأمن بيهم ميسون شي وياخذوها مني؟
ترانيم: علمود صحتها هيج حجو.
مهيائيل: لا وداعتج السالفه مو علمود صحه ولا كلاوات، اكبر وحق ربج، عبالج هيج عالم يضمون أمر مهم مثل هذا ميكون وراهم سر عميق؟
ترانيم: والله يعيوني السالفه تحير مادري الزمن وين راح يودينا اكثر من هيج.
مهيائيل: مبقى شي وتبان الحقائق اهم شغله نسويها هسه نطلعها منا وناخذها للبيت ويانه وعود من تذكر الله كريم.
ترانيم: مهيائيل ليش متستغل وضعها وتعرف اسرارهم منها؟
مهيائيل: شنو قصدج؟
ترانيم: اني اعتقد هي تعرف بعض الأمور ممكن تساعدنا نعرف السر يجوز اكو ورث مندري بيه لو ملعوب منهم.
مهيائيل: شلون فاتتني هيج سالفه طلعتي مو هينه ولج.
ترانيم: صرت شيطانه مثلكم عيوني.
مهيائيل: اكو سديه فارغه يمها روحي نامي عليها حتى يصير الصبح نأكدلها الكلام وناخذها ويانه للبيت.
ترانيم: وامها؟
مهيائيل: شغلة امها سهله هسه نتصل بأبيل يجي ياخذها وتنحل.
صدك خابر أبيل شويه وصل وبعد ملحته عليها راحت وياه، نمت بصفها على السديه الثانيه وعيني عليه شلون مخلي الكرسي يمها وأيده على راسها يلعب بشعرها ما أخذت عينه نوم ولا اني كدرت، عقله يفكر بشنو راح يصير وعقلي يكلي حياتهم يا طريق راح تسلك،
تمشي الساعات ابطئ شديد على الأشخاص المنتظرين شي معين وبين غفوه وصحوه سمعت صوت الدكتور كمت بسرعة مخليه أيدي على حلكي اتثاوب نعسانه حيل وراسي مسطور سطره من التعب.
مهيائيل: بشر نكدر نطلعها؟
: مؤشراتها الحيويه كلها جيده تكدر تسويلها خروج وبقى راجعنا علمود علاجها حتى تستعيد الذاكره بأسرع وقت ممكن ان شاء الله.
مهيائيل: عادي اذكرها بأشياء خاصه؟
: اني انصح تذكروها اصلاً وياريت اذا اكو دليل تنطيه الها وثبتلها كلامك تثق بيك اكثر، اخذها لكل الأماكن اللي راحتلها من قبل وديها للجامعه وخليها تسولف وي الدكاتره المدرسيها عيشها الأجزاء اللي عاشتها حتى تكدر تتأقلم عليك وتستعيد الذكريات.
مهيائيل: ممكن ترجع تنسى الطفوله مره ثانيه؟
:هاي الأيام عقلها مراح يحتفظ بيها على الأغلب ينسون المرضى شنو يصير وياهم قبل الحادث بعد استعادة الذاكره ولكن لكل قاعدة شواذ منكدر نعمم على الكل، بالأول خلينا نركز بعلاجها ولكل حادث حديث ان شاء الله.
مهيائيل: اكو مشكله ثانيه دكتور، زوجتي فقدت الذاكره بصدمه ثانيه صارت وياها.
:تعرضت لحادث ثاني؟
مهيائيل: بيوم زواجنا جنه طالعين من المصور علمود صور العرس السياره جانت بالجهه الثانيه من رحت اجيبها اجت سيارة وضربتها ومن صحت ناسيه الموضوع تماماً واني كتلها انو صار حادث بالسيارة ولفيت راسي بضماد حتى متشك.
:ليش سويت هاي الحركه؟
مهيائيل: لأن الضربه جانت عداوه مو شخص عادي وادري راح يصير بيها سين وجيم ومردت اعيشها بقلق.
:هاي مشكله ثانيه، الواضح زوجتك عدها مشاكل نفسيه، زواجكم تقليدي؟
مهيائيل: اي.
:إجباري؟
مهيائيل: اي.
:شلون جانت فتره الخطوبه؟
مهيائيل: مشلوله.
:مرضي؟
مهيائيل: لا احنه عائله عايشين على السحر والشعوذة.
:يعني نشلت بسبب سحر؟
مهيائيل: اي.
:هنا نكدر نكول السبب بفقدان الذاكره نفسي وهيج نوع اما يرجع أو مايرجع وحتى فقدها بالطفوله يرجح الهذا السبب، بعد منعالج دماغها ونمشي بخطه لاستعادة ذاكرتها نشوف تذكر هاي الحوادث لو لا.
مهيائيل: شكراً الك دكتور.
:يارب معافايه.
ترانيم: شنو سيرة هذا الحادث مهيائيل؟
مهيائيل: عوفج من عنده بعدين احجيلج.
واني احجي وياه كعدت من النوم رحت يمها.
ترانيم: ياصباح العافيه لو هيج واحد يصبح لو ماكو.
ايريم: عفواً بس منو حضرتج خاله؟
نزلت بستها بوجهه وبتسمت كايله.
ترانيم: اخت زوجج يحلوه.
ايريم: اني فكرت بس هو عنده مشكله بعقله طلعت العائله كلها هيج.
ترانيم: وداعتج مو بس مخابيل حتى انتِ خبلناج ويانه.
ايريم: كليله اريد ارجع لبيتنا.
مهيائيل: ميحتاج تكلي احنه راح نرجع لبيتنا.
ايريم: اقصد بيت بابا مو بيتك.
مهيائيل: هو بيتي بيت بابا معليج انتِ.
ايريم: خاله احجي وياه ماعرفه شلون اروح وياكم؟!
ترانيم: تثقين بيه؟
ايريم: لا.
مهيائيل: ههههههههه الله يلعن بليسج.
ايريم: بابا ميقبل اجذب واني احجي الصراحه، ماعرفكم ليش اثق بيكم!!
طلعت الاوراق مخليها بوجهه قرتهم وبتسمت كايله.
ايريم: شوف والله مو مرتك مكتوب اهنا ايريم سنمار واني ابويه اسمه رضا.
ترانيم: مو عمج تبناج بعد وفاة والدج..
مخلتها تكمل بسرعة صرخت بوجهه.
ايريم: ماماتتتتت ماماتتتتتتت لتجذبين عليههههه كلكم جذابينننن ابويييي ماماتتتتتت.
راح يمها حضنها ويحجي مطمنها.
مهيائيل: ماميت اتجذب عليج عوفج منها اصلاً البارحه اجه باسج براسج أو وصاني عليج كلي اخذها وياك ودير بالك عليها.
رفعت راسها مبتسمة وكالت بعيون فرحانه.
ايريم: صدكك.
مهيائيل: صدك بس هسه انتِ متقبلين تجين وياي فراح اعتذر من عنده واخابر عمج يجي ياخذج.
كام سحبت أيده كايله بنفي.
ايريم: اروح وياك والله لتخابره بس يجي يكول ابوج مات وهو ماميت ماحبه اني هوايه يجذب عليه.
مهيائيل: ماشي بس لتبجين اذا شفت دموعج اكله وبعد مايجي يشوفج.
ايريم: شوكت يجي هو اريد اشوفه؟
مهيائيل: يجي بالليل يبوسج براسج ويشوفج ويروح.
ايريم: وليش اني ماشوفه؟
مهيائيل: اليوم تشوفيه.
ايريم: احلف.
مهيائيل: ابوج ميقبل أحلف يكول الحلف حرام.
قتنعت بكلامه راح يجيب ملابس حتى يساعدها دفعت ايده.
ايريم: حرامممم وعيببب لتمد ايدك وخر عني.
مهيائيل: خوش، خوش هاي وخرت بس لتصيحين فدوة للخلقج.
ساعه ابجي ساعه اضحك على سوالفهم من اشوفهم سوه احس صدك اب وبنته مو زوجها، دعيت بداخلي ربي يديمهم ويحفظهم،
غيرت ملابسها وهي كل شويه تصرخ بيه اغمض صدك ونعم التربيه على رغم عقلها بعده طفل بس تعرف الحرام والحلال تعبان بيها الله يرحمه،
طلعنا من المستشفى راجعين للبيت وبالطريق خابر ابيل يسأل عليها كله طلعناها وقفل الموبايل، ساق السيارة واني غمضت نعسانه فزيت على صوته يصرخ فتحت عيوني شفت مهيائيل اعصابه طافره وشرايين ايده بارزه ويسب ويشتم بصوت عالي...
يتبع..
البارت ٤٣٤٠ كلمه..
تفاعلكم صاير ميشجع للكتابه شنو راح الحماس شمعاتي؟
تصبحون على الف خير وعافيه..
للتواصل حسابي الأنستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!