حسابي الأنستا zahraaahmedn99
لتنسون التعليق بين الفقرات والتصويت للبارت والمتابعه شمعاتي ❤️
مهيائيل
الكاتبة (زهراء احمد)
___
لا ﺃڪﺘﺐ ﺇﻟﻰ ﺃﺣﺪ ...
ﺃڪﺘﺐ ﺇﻟﻰ ﺍﻟﻔﻀﺎﺀ ﺍﻟﺬﻱ ﺿﺎﻋﺖ ﻓﻴﻪ ﻳﻮﻣًﺎ ﻃﺎﺋﺮﺗﻲ الورقية ﻭﻓﻬﻤﺖ ﻣﻨﻬﺎ ﻷﻭل ﻣﺮﺓ ﺃﻥّ ﺍلبڪاء ﻻ ﻳﻌﻴﺪ ﺍﻷﺷﻴﺎﺀ ﺍﻟﺘﻲ ﺃُﺣﺒﻬﺎ.
___
ترانيم: الووو، ها مهيائيل بشر شنو صار وياك لكيتها؟
مهيائيل: بالمستشفى.
ترانيم: عزةةةة بعيني اسم الله الرحمن شبيهااا؟
مهيائيل: ترانيم مابيه احجي حرف خليني اطمأن عليها بالأول وتصل بيج.
سد الموبايل صعدت راكضه فوك اصيح ميمون ياخذني يمهم، من نزلت ودورت عليها وملكيتها جوه لعب كلبي لأن شفتها طلعت للباب تفتحه قبل ما اصعد فبسرعة اتصلت بيه يشوفها وين راحت وصار ساعه اتصل بيه ومايرد خفت حيل ليكون صار بيها شي وخوفي زاد هسه من سمعت بيها بالمستشفى،
لبست عبايتي سريع ونزلت رايحه وي ميمون وكلبي لعب جوبي من الخوف، يارب مايصير بيها شي ويعدي هذا اليوم على خير يارب.
ميمون: شنو صار؟
ترانيم: طلعت للباب ومادري شنو صار بعدها البنيه فص ملح وذاب دورت عليها البيت كله ملكيتها، انا كلبي نغزني اساساً من شفت الباب مفتوح بس ماتوقعت تطلع استبعدتها حيل.
ميمون: نرجع الكاميرات ونشوف منو اجانه وشنو صار.
ترانيم: رابطها على الموبايل؟
ميمون: لا على الحاسبه بالبيت بس نطمن عليها وبعدين نشوف شنو يصير.
ترانيم: يارب بحق نبيك أو وليك تعدي على خير وتكوم بالسلامة.
وصلنه المستشفى نزلت ركض وسألت بالاستعلامات يدليني بغرفتها رحت يمهم وعايفه ميمون مادري بيه وين صار، شفته كاعد على الكرسي مقابيل الباب ومخلي راسه بين أديه وشعره مكفش نزلت دمعتي ورحت يمه مخليه أيدي على كتفه رفع راسه إليه عيونه حمر والدموع مبينه بيها، ما لومه ابد وعلى الواهس بجيت وياه.
مهيائيل: من طلعت بالسيارة ادور سمعت جوارينه يحجون بحادث نزلت بسرعه وكلبي يكلي هي بس عقلي رافض يكول لا مستحيل ايريم شياخذها لهيج مكان وبدون متحجي شي لأحد مرتي اعرفها صار سنتين وياي احاله تسوي شي بدون علمي هي حتى الباب ماتفتحه، بعقلي سؤال راح يموتني ليش هيج صار ومنو اللي اجه وشنو كال الها حتى هيج يصير بيها!!
ترانيم: كل شي ينحل بس بالأول خلينا نطمأن على صحتها، شلون عرفت بيها هنا؟
مهيائيل: سألت ابو محمد وهو كال اللي داعمها نازل بسرعة ومسعفها.
ترانيم: الله يرضا عليه.
مهيائيل: الله لا يرضا عليه شبيه يسوق سريع وهو مو طريق سريع على شنو مستعجل!!!
اذا ماتتت يفيدني هل الطايح الحظ؟
ترانيم: ياخويه ولو ماترضا عليه بس هي شوداها بنصاص الظهاري بره البيت واحنه ندري السواق اغلبهم مجازفين ويمشون سريع ومحد بيهم يهتم.
مهيائيل: طلعت تروح لأمها لأن هذا الشارع ياخذها لبيتهم ماكو غير احتمال.
ترانيم: وليش تروح لأمها؟
مهيائيل: ترانيم صدك تحجين؟ شمدرينيييي!!!
ترانيم: على كيفك وي روحك ماي عيني مايصير تعصب هيج ابمكان ميصير بيك شي اكعد ودعيلها بلكي ربك يساعدها وطيب.
مهيائيل: الله كريم، خابري اهلها خلي امها تدعيلها دعاء الأم مستجاب.
خابرتهم والمره اول مسمعت نطتني صرخه طرشتني، وساعه ماكو وتجمعت كلها هنا، إلا ميمون اول مدخل سحب مهيائيل وطلع.
تسنيم: شصار بيها؟
ترانيم: حادث.
تسنيم: وشلون صار هيج؟!
ترانيم: نازله هي ومهيائيل وماشيه قبله وجايتها سيارة ضاربتها،
همزين اخذت احتياطي للجواب والا راح تصير سين وجيم والجواب الأول والأخير يمها.
تسنيم: عزه بعيني وين مضمومتلها هاي، بيه ولابيج بنيتي.
ترانيم: ستهدي بربج ام ابيل صل على النبي وآل بيته وان شاء الله مابيها غير العافية.
تسنيم: من يوم يومها معلعله ماشافت سعاده بحياتها خلصتها بس عذاب وهاي تاليها نايمه بالمستشفى، بيوم ولادتها كلولي حظها نحس بعمرها مراح تشوف سعاده كامله وهاي شوفت عينج من مصيبه لمصيبه راح تروح من أيدي بنيتي الله لاينطي السبب.
ترانيم: ليش شنو صاير وياها قبل؟
تسنيم: تزوجت اخوج شيصير انكس من هيج بعد؟
ترانيم: لا اعذريني داده ما اقبل تحجين عليه شايلها بعينه ومداريها برموشه، شيسوي بعد اذا ربج كاتب يصير وياها حادث!!
من يوم عرسهم لليوم مشفت منه شي مو زين صح يتعاركون يتزاعلون بس بيناتهم اني اللي وياها مثل ظلها متحجيلي كلمه، لو نسيتي ام ابيل هذا اخوي الما راضيه عليه شلون ساعدها وخلاها توكف على رجلها مره ثانيه بعد ماعمتها السحوره!!
تسنيم: كل شي بسعره اخوج ما سوه شي مجاني وكل شي وفيته اله وازيد من حقه هم، شنو يريد بعد اكثر كافي عليه شمعة البيت راحت.
ترانيم: راحت برضاتج لتتهمين مهيائيل ام أبيل.
تسنيم: لو ماجنت مجبورة مانطيها.
ترانيم: ليش جبرج قابل؟ خله سيف على ركبتج وكلج اكصها؟ ههه هاي السوالف على منو تمشيها على بالج ماعرف اخواني؟ لعلمج داده كلهم تربوا جوه أيدي وحافظتهم بصم.
تسنيم: اخوج هددني لو يزوجها لو يسحر بيتنا كلنه ويموت ولدي ورجلي.
ترانيم: وصدكتي بيه وشمرتيها ابيت الشياطين مسويته مسرح هم الداخلين واحنه الطالعين،
البيه ايريم هسه والعاشته قبل كله من ايدج لتلومين احد حتى تبرين نفسج، الشياطين متكدر تسوي شي بدون إذن الرحمن وانتِ ضحيتي بيها بدون محاربه وهذا ميدل بس على انو هي شكد عزيزه عليج ومتكدرين تفرطين بيها.
عفتها وكمت رايحه يم زُموردة لأن صدك فورت كلبي.
سنمار: شبيج وي المره هاده على اخوها شنو حجت هي اصلاً؟
تسنيم: لا دافع عنهم هم السبب بلي صار وي بتنا وهاي حالتها اليوم.
سنمار: خليج محضر خير لو لاتحجين شي الواضح انتِ نسيتي شلون اجيتي تبجين تردين تزوجيها وخوش بيت وأحسن الناس واصل وفصل وبقيتي تقنعين بيه حتى أقبل وتزوجت وانا ما راضي بس لأن ملحتج على الموضوع كتلتني.
تسنيم: لا لأن سطرك، اني وانت مسوالنا عمل نوافق على الزواج.
سنمار: حتى لو سحرنا مثل متكولين، متشوفين بنتج شلون فرحانه وكلبها يضحك من يشوفه؟ واحنه شنو نريد اكثر من هيج؟
علمودها اسكتي ولاتحجين على العالم مهيائيل الما راضيه عليه مخليها بين عيونه ممنقص عليها ذره، كافي وكفته هنا أو وجهه اليلطم خوف عليها، استهدي بربج وخلي رجليج بالكاع لتخربين حياة بنتج.
تسنيم: تصف وياهم اكيد ساحريك مو بيدك.
سنمار: خليج انتِ بتفكيرج العاطل اروح ادعيلها اشرف من الكعده يمج.
مهيائيل: شفت الكاميرات؟
ميمون: ايي، عمتها اجت وماعرف شنو حاجيه وياها لأن وهي واكفه عافتها وطلعت.
مهيائيل: مبينه اذا هيج تلكاها ماكدرت تسد حلكها وحجت كل شي خبلتها الله يخبلها.
ميمون: شنو راح تسوي هسه؟
مهيائيل: مادري خلي ترجع لوعيها وصحتها ونشوف شنو يصير، راجع لجوه وانت روح للبيت ياسيم وحدها.
ميمون: راح ادخل اخذ ترانيم وياي.
مهيائيل: لا عوفها من تجي بعدين تعال اخذها.
ميمون: خوش دير بالك على نفسك واذا صار شي اتصل بيه.
مهيائيل: ان شاءالله.
زُمردة: اشربي مي وبلي ريكج ميصير تسوين هيج بنفسج هسه يصعد عندج الضغط.
ترانيم: ولج فورت كلبي نزلت على مهيائيل دوسه ونص، همه من البدايه يعرفونه سحار بعد شكو زوجوه!!
زُمردة: انتِ هم اعذريها خايفه على بتها يصير بيها شي حقها.
ترانيم: وليش احنه ماخايفين؟ وحقج اني رجليه ماكدر اوكف عليهم واحس كلبي شويه وينفجر من القلق بس بعد امر ربج لازم ندعي ونصبر مو نكعد نحجي على العالم ميصير هيج.
زُمردة: الله كريم ان شاء الله تنحل وماكو شي، هذا رائف يتصل عليه بس اشوف شنو يريد،
الووو.
رائف: هلا بكوكبي، أريد اسأل صدك اللي سمعته؟
زُمردة: شنو سمعت؟
رائف: ايريم بالمستشفى صاير وياها حادث؟
زُمردة: اي والله وهسه هي بغرفة العمليات اني مقبلوا ادخل وياها أخذوا غير ممرضه فما اعرف شنو وضعها حالياً.
رائف: بس اكمل شغلي اجي ماكدر اطلع من الدوام هيج وقت بس يصير شي خابريني.
زُمردة: اوكي حبيبي انتبه على نفسك.
ترانيم: انا راجعه اشوف بلكي يطلع الدكتور يطمنه ماكدر اصبر اهنا كلبي يموتني ما اتحمل.
زُمردة: لازم تتأخر عمليتها هي مصار ساعه من دخلت ترحين هناك شنو تسوين غير تبقين تتعاركين وي امها وبس حرك اعصاب، ابقي اهنا يمي فد شويه ونروح اني وياج سوه.
ترانيم: بس تصحى ويصير مابيها شي اكول لمهيائيل نشيل نرجع لبيتنا القديم ونخلص من هذا البيت وذكرياته.
زُمردة: ماله علاقه البيت بس طلعوا غيروا جو ورجعوا كم يوم تتحسن النفسيه ويتعدل المزاج.
ترانيم: نشوف وين تصفه بعدين.
مرت ثلاث ساعات وكلنه بالباب ساعة يطلع ممرض يركض ساعه تدخل ممرضه وفوكاها محد يوكف ويجاوب ومخلينا بقلق، اما مهيائيل وجهه صار اسود بمعنى الكلمه محترك حرك، اعرف شنو بداخله وحاسه بيه ومابيدي اقدم شي غير الدعاء.
واكفين وكلنه على استعداد شوكت يطلع الدكتور يطمنه وبعد جهد وعناء وتعب وتفكير نفتح الباب وبوجه ممبين هاي المره اللي صار راح يعدي على خير.
سنمار: طمني بنتي شنو وضعها؟
:اول شي الأمر بدايته ونهايته بيد رب العالمين لكن راح احجي من وجهة نظر الطب لا أكثر اما الباقي بأيد الرحمن،
الضربه صايره براسها مسببة نزيف داخلي والحمدلله مجان قوي كدرنا نسيطر عليه بالأضافة لكسر بأيدها ومجان نكدر نحله فقط بجبيرة سوينالها عمية ورجعنا العظم المكانه، النزيف خلاها تخسر هوايه دم كدرنا نوفرلها وننقذها لكن مثل مكلت الأمر متروك يم الله ادعولها، مراح اكذب عليكم النزيف الداخلي بالدماغ خطر واحتمال وارد يسبب مضار اهمها ممكن تدخل غيبوبة وخلال اربع وعشرين ساعه اذا ماصحت منكدر نسوي شي.
دموعي نزلت وماكو كلام ينكال واكدر اعبر بيه عن شعوري هسه درت وجهي حتى اشوفه لكيته رجليه ماخذته بره المستشفى بسرعة اتصلت برائف يعوف زُموردة ويروح يلحكه خاف يصير بيه شي وهو بهاي الحاله.
مهيائيل: عشت وياها سنتين إله، خلال هاي الفتره كلها ماشفت منها غير الخير، مهيائيل المعروف بين الناس ساحر وشغله كله بالنجاسات حب وحده متدينة، صحيح هي مو السبب الرئيسي لهدايتي لأن أني من البدايه ناوي يجي يوم وتوب مستحيل استمر بهذا الطريق لنهاية العمر ولهذا اليوم اني أحاول استمر بصلاتي والادعيه وقراءة القرآن وما انسى الفضل الكبير من بعد الله الها لأن هي شجعتني وكفت يمي وأصرت عليه استمر بهذا الطريق،
نولدت بنص بيت شيطاني الجميع بيه سحره ومن كبرت أو وعيت وسلكت طريقهم قررت ما اخلي رائف يصير مثلنا واغير بطريق العائلة سعيت وبنيت النه اسم وصيت ومكانه بعيده تماماً عن السحر والشعوذة وكلها بفلوس حلال،
ابوي جان بالأضافة لمهنة السحر عسكري وعنده قطعه منطيها اله صدام بذلك الوقت وهو انسان ذكي بناها وشتره قطعه ثانية ومن مات اتحول الراتب لأمي اللي بقت تجمع بيه متصرفه حتى صار مبلغ جيد دخلته شراكه وي أخوها، انسان ادمي ويحبها حيل وسجل كل شي بأسمي مقبلت يصير بأسمها، سجلته بأسمي لسببين الأول تعرف بيه كلبي على بيتي واخواني ومستحيل يجي يوم وتركهم والسبب الثاني اني مراهق مابلغت السن القانوني وفي حال صار شي الها بذلك الوقت محد يكدر يتصرف بالأموال حتى اكبر وتعرفني السان ومستحيل اتعامل وي دَاسِم ولا انطي حقي وحق اخوتي لأحد وخالي ساعدني بهذا الشي، يوميه وره المدرسه ياخذني وياه يعلمني على الشغل والمحل اللي جنه بيه شركه صار كله بأسمي ومنه المحلين حتى بنينه وأسسنا وصار النه اسم بغير محافظه بذلك المكان محد يعرف بينه سحره، معروفين بالتجار وهذا كله بفضلها من بعد الله،
فاليوم لو قررت اترك هذا الطريق اتركه واني مطمأن بعمري مادخلت لبطني ولا لبيتي لكمة بفلوس حرام وكل شي سويته وبنيته حتى أنهي علاقة أولادي وعائلتي بالكامل عن الشياطين والسحر والشعوذة، واليوم قررت ابدي صفحة جديده وانهي علاقتي بالماضي بأكمله واعيش مثل ما رادت امي مني قبل متموت حتى إذا قابلتها بيوم تشوف ابنها بالوجه الأبيض وتعرف تربيتها ماضاعت بلاش،
اسوق بالسيارة وعقلي وكلبي وروحي كلهن يمها، من شفتها وعاشرتها عرفت هي ملاك من صدك، انسانه مختلفه عن كل اللي دخلن حياتي من قبل ويمكن مو لأن هي مميزه ومختلفه بالواقع لكل الناس بس شعوري هذا لان اني حبيتها وتعلقت بيها وحسيتها بمقام ام وهيج مرتبه متجي بسهوله لأي أحد،
ضحكتها، حركاتها، عيونها، طولها، برائتها كلهن صارن كدام عيني، اذا مو علمودها أسعى وحارب وتنازل علمود منو لعد اسوي هيج؟!
الايد اللي تمسكت بيه بوقت ضلالي مستحيل اتركها بسهولة، خسرت امي مره وحده وشبيهتها على موتي مافرط بيها تحت أي ظرف كان،
عمري كله مادخلت مكان مقدس وحتى لو اجيت وي احد ابقى بعيد مافوت للضريح بس هاي المره غير اجيت وبنيتي التوبه والقرب من الله وأهل البيت، وبحبهم وبقربهم أريد نجاتي ونجاتها،
فتحت باب السيارة ونزلت امشي بخطوات بطيئة والحركه بداخل كلبي لاتوصف مثل نار مشتغله، ألم وخنكه بصدري مكاعد تخف من عرفت بوضعها لحد الآن، شفت كدامي منارته حسيت بدمعتي راح تخوني مسحتها بساع ومخليتها تنزل، شفت شنو مكتوب على الباب دعيت بداخلي تكوم سالمه،
خط عريض باللون الاخضر مايميز هذا المكان وهاي البقعه من الأرض بالتحديد ويخليها طاهره مقدسه بداخلها ريحانه الرسول وابنه القتيل الخضيب المسلوب، ابن فحل الفحول وزوج البتول، سرعت خطواتي دخلت التفتيش وعقلي وكلبي يرددون نفس الجمله،
"اريد عافيتها منك ياحسين"
ولأول مره يصير عندي هذا اليقين بعد دخلتي لهذا المكان راح اطلع منه انسان ثاني،
وصلت للباب شميت عطره والهوه مالت الصحن المبارك ضرب وجهي دخلت برجلي اليمين وعيني تباوع للزلم منين يدخلون رجليه تبعتهم، الدنيا مغرب وازدحام وصوت القرآن عالي وصلاة جماعة أجواء روحانية تخطف لها الأنفاس،
دخلت للضريح ومن صارت عيني بعين الشباك المكان المدفون بداخله السبط المنتجب والسيد المحجب، وابن خير الناس اماً وأبا، دمعت عيني وماكو رجال بالكوكب كله يخجل من البكاء على الحسين، وكفت وكتله جمله وحده قبل ما اخطي اي خطوه لكدام،
"السحره والشياطين اذا راداو التوبة يمك تقبلهم؟
مستحي منه داخل وانا رجال خلصت عمري بالذنوب والمعاصي ومعفت منكر مسويته، والشخص المثلي مقبوله توبته؟ الله يفتحله صفحه جديده حتى يستأنف العمل؟
مشتني رجليه ازدحام كلش بس مع هذا وصلت ولزمت الشباك وبقيت اسولف وياه،
"عفتها بين الحياة والموت واجيتك لأن اعرف انت غالي على رب العالمين وباب قوي لاستجابة الدعوة، احلفك بضلع امك المكسور وبعلي المغدور وبالحسن وبالمحسن، باخوك ابو الفضل اريد اسمع اخبار طيبة وعهد عليه من هاي اللحظه اذا صحت وعاشت وعدت علينه سلامات اترك شغل السحر والشعوذة والحرام وبعمري كله ما ارجعله بعد بس رجعلي اياها سليمه مُعافات، بحق زينب وغربتها ومصيبتها"
واني اسولف سمعت ابو التوجيهات الدينية يدعي، الليله جمعه ومناسبه عظيمه، بقيت اردد وياه ودموعي تنزل مامسحتها ومنو يكدر يلزم دمعته وروحه تصارع الموت؟!
( الهنا بوجهك الجليل، وبمولانه الحسين الوجيه، وجده وابيه، وامه واخيه، و المعصومين من ذريته وبنيه، والمستشهدين بين يديه، و بأخيه ابا الفضل العباس قمر العشيرة، و بزينب الكبرى العقيلة، يالله، يالله، يالله، عجل وقرب فرج وضهور وليك صاحب الزمان يالله، وجعلنا من اعوانه والمجاهدين والمستشهدين بين يديه يالله)
(ياحامد بحق محمد، وياعالي بحق علي، ويافطر بحق فاطمه، ويامحسن بحق الحسن، ويا قديم الإحسان بحق الحسين) شافيلي مرتي ورجعلها صحتها وعافيتها يارب،
صليت جماعة وكملت واحس براحه واطمئنان مو طبيعي بداخلي، لأول مره كلبي يرتاح بهاي الطريقه، الحمل اللي على اجتافي كله نزاح وطلعت منه مبتسم بعد مدخلتله هموم الدنيا على ظهري،
اخذت موبايلي من الأمانات لكيته محترك حرك من الاتصالات.
ميمون: ها وينكك يمعود صدككك تحجي!!!
مهيائيل: ميمون مالي خلك بشرفك ليش متصل؟
ميمون: شنو يعني ليش متصل؟ صار خمس ساعات نتصل بيك وانت ماكو متتت خو ماتت!!
مهيائيل: هذا انا مسمسم عرج ماطكني ايريم شلونها؟
ميمون: بعدها بالعناية.
مهيائيل: خوش يلا مع السلامه.
ميمون: رائف طلع وراك خابره شوفه وين، هذا الأثول هم اتصل بيه مايرد مادري وينه.
مهيائيل: ناوين تموتوني انتم انااا ادرييي.
ميمون: لاتصيححح هذا اجه.
مهيائيل: جا شمالك خبصتني!!!
ميمون: خلي موبايلك يمك واذا تريد ابقى بمكانك اني اجيك هسه لاتسوق الدنيا ليل وانت بهاي الحاله.
مهيائيل: عود من تجيني تبعد موتي مثلاً الكاتبه ربك يصير مع السلامة راجع ولو يصير انقلاب لتخابرني الا تسمع صار شي وياها جديد.
ميمون: عاد احنه ولد البطه السوده اهم شي هي، روح الله يردك سالم لهنا.
شمرت الموبايل وبعقلي فكره وحده اذا ماروح العب بيهم طوبه فلا اسمي مهيائيل بسيطه.
زُمردة: وين جنت؟
رائف: طلعت وراه اشوف وين راح مالكيته، اتصل بيه مايرد موتني رعب عبالي بيه شي فتريت كل الأماكن اللي يروح عليه اختفه ومن صار الليل كلت ارجع لهنا يجوز اجه.
ترانيم: وليش نتصل بيك ماترد؟
رائف: من كد ماتصلت بيه خلص شحني.
ميمون: هذا الطايح الحظ راح يجلطني مادري بيه وين دايح بدون مايكول وهو بهاي الحاله.
رائف: خابرته؟
ميمون: خابرته انسمط ابوه على هيج خلفه رأسه يابس ومعند شكني شك.
رائف: مكال وين؟
ميمون: هو يحجي مثل الأوادم خلصها بس يصيح كل شي مافهمت من عنده.
رائف: شلون صارت هي؟
زُمردة: بعدها حالتها لحد الآن مستقره.
رائف: اذا صار بيها شي ينتحر مايتحمل.
ترانيم: طاح حظك على هيج تفاؤل جايف مثلك.
رائف: احجي صدك انا.
ميمون: ادعيلها وربك يكومها بالسلامه.
ترانيم: اكلكم احنه ماخذنه الواهس كلنه اهنا روح رائف انت وزُموردة للبيت ياسيم وحدها هناك وانا وميمون نبقى هنا حتى تصحى.
رائف: خوش يلا حبيبي جيبي شغلاتج خلي نرجع.
ميمون: دير بالك يصير شي منا منا.
رائف: مافهمت.
ميمون: الأخ الرابع جوارين اريدك تروح طيارة للبيت.
رائف: شلون ناسييي خرب.
ياسيم: اجيتتت اجيتتتت، منووو؟ احجي منوو؟ خليك دك براحتك.
دخلت وسمعت دكه الباب مره ثانيه اخذت نفس واجيت اتقدم افتحه بس خطرت على بالي فكره خلتني أتراجع، معقوله يسوي هيج!! اي والله ليش لا هذا خبل كل شي اتوقع من عنده،
دخلت بسرعة ماخذه موبايلي متصله بيها.
مُزن: هلا بالكاطعه هاي وعود احنه جوارين لو بعيدين شنو سويتي؟
ياسيم: عيفج من هاي السوالف اخوج وين؟
مُزن: نايم بالغرفة من العصر ليش اكو شي؟
ياسيم: الباب كاعد يندك بقوة ماعرف منو عبالي هو.
مُزن: لا مستحيل لأن هذا نايم، انتظري لحظه اتأكد، كمت من مكاني رايحه لغرفته اشوفه فتحته على كيف شفته نايم وبسابع نومه يعني مو هو،
مو هو هذا نايم.
ياسيم: لعد هذا اللي يدك الباب منو؟!
مُزن: محد يمج بالبيت؟
ياسيم: لا كلها راحت يم ايريم.
مُزن: تعالي يمنه لمن يرجع واحد بيهم.
ياسيم: ماكدر.
مُزن: تمام راح اكول لأمي واني اجي يمج بس ثواني.
غلقت الخط وبقيت منتظره شويه ودكت الباب رحت يمه من سمعت صوتها فتحته.
ياسيم: كلبي وكف من الخوف عبالي اخوج اجاني ومحد يمي شلون بيه.
مُزن: ميكدر يسويها يخاف من مهيائيل وحقج لو شايفته من كعد الصبح وشاف ولا شعره بوجهه ماخله شي ماكسره لعب لعب وبقى معتزل ماطلع سبوعين حتى طال شعره شويه.
ياسيم: يستاهل.
مُزن: هوايه حاقده عليه انتِ.
ياسيم: اللي سواه بيه مو قليل مستحيل أكدر انسه.
مُزن: محبيتيه؟
ياسيم: هه، حبيش عيوني ولو هو اخوج ومتقبلين عليه اكيد بس اشوف عزرائيل وماشوفه واذا سمعت بيه واكع بمصيبة أكول هاي حوبتي، جان يسحلني بنص الليل ويسد حلكي حتى محد يسمع صوتي ويشمرني بعدين حالي حال العبده لا والله هن احسن محد يعاملهن مثل ما عاملني، وكل هذا بكفه ومن يكلي ماريدج تصيرين ام جهالي ماتشرف بوحده **** مثلج بكفه ثانيه، سبب جرح بكلبي لو اعيش عمرين مراح يشفه.
مُزن: مجان بوعيه.
ياسيم: بس اني جنت بوعيي وكلماته لليوم مكدرت اتخطاها.
مُزن: الله يهدي سركم ثنينكم.
ياسيم: كليله يبطل يراسل يوميه لو يذبح نفسه احاله ارجعله اني ماشوف نفسي غير طالبه مجتهده تريد تدرس وتحقق حلمها وفي حال تخطيت اللي صار وتقبلت فكره وجود رجل بحياتي فأكيد مراح يكون هو.
رائف: عيوني.
زُمردة: همم.
رائف: كلبي.
زُمردة: همم.
رائف: روحي.
زُمردة: همم.
رائف: هسه لو اممم بيها مجال اكول اعتراف غير مباشر بالحب خبصتيني بالهممم.
زُمردة: همم صحيح.
رائف: شبيج اليوم؟
زُمردة: متعرف شبيه؟
رائف: تره اخوتي سحاره اني مو منهم وعيونج.
زُمردة: مابيه شي سلامتك.
رائف: شنو مضوج الحلوه مالتي انااا؟
زُمردة: هرمونات لتهتم.
رائف: اذا انا ماتحمل هرموناتج منو يتحملها؟
زُمردة: قصدك يعني اني مزعجه مو؟
حجت هيج وبجت: خياشيم روحي هسه شحجيت شو بسرعة دمعتي!!
زُمردة: اعرفك بطلت تحبني مبين من كلامك، صاير هوايه تنزعج مني ومتحب تسمع صوتي حتى اتصال متتصل بيه بالدوام تغيرت انت مو مثل قبل.
رائف: افااا عليج هذاا انااا هيج مسوي بيج بدون مادري!!
زُمردة: لتغشم روحك من توظفت لسه متغير ليكون صاير عندك حبيبه واني مادري،
بجت بالزايد حلكي وصل لكرشي مصدوم هاي شني هاي معقوله كل وحده حامل يصير بيها هيج لو هذا حظي الاغبر؟
زُمردة: كافي اخذني للبيت انام ماريد شي منك وبقى اركض وروه البنات انت.
رائف: من شوكت راكض وره البنات؟!
زُمردة: انت كلت لاتنكر بأيام الخطوبة.
رائف: حجيت هوايه سوالف اغلبها جنت اتغزل بيج ذكريني بله يجوز انا ناسي.
زُمردة: مره كتلي انت اكبر زاحوف بالكوكب.
رائف: بس ستقريت يم كوكب سبيستون وقنعت ورضيت لأن هي عشقي وحبيبتي وروحي وكلبي ومعدتي واشلائي.
ابتسمت على كلامه والضحكه شكت الحلك من شافني هيج ضرب على الستيرن كايل.
رائف: اذا عدتها مره ثانيه عاتبيني نعله على والديه اليخلف بعد.
زُمردة: يعني هسه انت متندم زواجنا مو؟ متريدني اصير ام اي اعرفك تريد تبقى تركض من وحده لوحده رجليك تزلغت من الزحف توبب كافي عاد بس وين يفيد يمشي بدمك الموضوع.
تبجي وتشهك واني صافن عليها مستغرب يعني اني هسه راح اتحمل هيج مود متقلب ست أشهر؟ ويكلك الأمهات والأمهات والله المفروض ناخذ جائزة كأفضل رجال يتحملون هرمونات نسوانهم، بس يلا كل شي يهون على مود كوكبي.
__
ترانيم: عيونك ولك وين صافن؟
ميمون: هاي اخت ايريم؟
ترانيم: وانت شنو تريد منها؟
ميمون: ليش جايب اخته وياه شنو تسوي مثلاً تفحص جرحها لو تلوليلها؟!
ترانيم: نفس السبب ليش جبتني وياك للمستشفى؟
ميمون: وانتِ حاسبه نفسج مره؟!
ترانيم: متشوف شواربي اثخن من شواربك؟
ميمون: روحي جيبيها يمنه كاعده وحدها والمراجعين طابين طالعين.
ترانيم: اخوها راح يجي يمها متشوفه وين واكف؟
ميمون: اخوها اغم مايفتهم اكو وأحد عاقل يجيب بنيه صغيره وياه للمستشفى وتصير مفرجه لأمة محمد!!
ترانيم: محد عدهم بالبيت لتحجي عليه احسن ميخليها وحدها والدنيا مو أمان على الأقل اهنا كدام عينه.
ميمون: شكد عمرها؟
ترانيم: مادري يمكن دخلت 17 سنه هي ثاني متوسط راحت.
ميمون: ليش هيج راسبه؟
ترانيم: بالخامس مبطله وبالف ياعلي تكول رجعت للدوام، انت ليش تسأل شنو تستفاد؟!
ميمون: الفضول.
ترانيم: بكد بنتك دير بالك ميمون.
ميمون: وهذا تهديد مثلاً؟ لو اريدها اخذها هسه من يم اخوها بس انا رجال عاقل ماسويها لتخافين.
ترانيم: اي عبالي دير بالك تسويها.
ميمون: كايم اخابر مهيائيل اشوفه وين صار لتخليها وحدها روحي يمها.
شلون بيه بالإخوان الوالهين العشاق انااا، كمت رحت يمها كاعده ابتسمت بوجهه هسه شحجي وياها والله ماعرف شنو اكول وشلون افتح موضوع ياربي ساعدني.
ترانيم: شلونج؟
استاج: الحمدلله.
ترانيم: شلون الصحه؟
استاج: الحمدلله.
ترانيم: انا امسلت وانتِ بس الحمدلله، خير ان شاء الله،
هاك تفضل شرف شرشبيل.
أبيل: مالي خلكج خاله.
ترانيم: انت الواضح هوايه حاب ينغلط عليك.
أبيل: يعني شنو اسميج غير خاله لخاطر الأسلام؟
ترانيم: ترانيم اسمي ترانيمممممم احفظه.
أبيل: وعود ليش احفظه مو شي مهم هو.
ترانيم: اولي احسن ما كابل هاي الخلقه الراح تجلطني.
___
: نزلت من السيارة وبداخلي نيه سوده نومتها بالمستشفى مراح أعديها الهم هيج لابد ادفعهم الثمن وبشرط يكون غالي،
دكيت الباب فتحلي الرجال الجبير سلم عليه بأدب عرفتها هي الوحيده الشيطانه بهذا البيت دخلت جوه وسد الباب توسل بيه افوت ماقبلت.
مهيائيل: اريد اشوف عمة ايريم.
قاسم: تدلل بس ادخل بالأول ميصير بالباب هيج.
مهيائيل: لا اريدها اهنا مرتي بالمستشفى وأريد ارجع الها بسرعة.
قاسم: ايريم بالمستشفى!! شبيها؟
مهيائيل: ليش مرتك مكلتلك!!
قاسم: لا وهي شمدريها مطلعت اليوم بس لام مقتدر.
مهيائيل: لعد شكد مسكين عمي، مرتك اجت لبيتنا الصبح وتهجمت على مرتي وبسببها هسه هي بين الحياة والموت وحتى لو صحت محد يعرف شنو يصير بيها يمكن اعاقه دائمة لو تنعمي ويجوز تصير مخبله مندري.
قاسم: ولجججج راضيةةةةةةةة.
طلعت مفزوعه شفتها وردت اهجم عليها اموتها هنا بنص بيتها مثل مسوت وي مرتي بس كفه أو وفه العم مقصر بيها وشفه غليلي، اسمع الضربه وتطرب أذني الها ام السحوره تريد تلعب على ساحر القرن ودوس عتبة بابه بدون عقاب،
اني تبت من السحر بس اليدوس على طرفي لو يأذي اهل بيتي اصير انا سحر وشيطان والعب بيه طوبه.
طلعت وبداخلي رضا جبير عن اللي صار هسه صعدت بالسيارة رايح لحبيبة كلبي وساكنته،
اصوات الاجهزه الوحيده المسموعه بهاي الغرفه جو بارد معتدل وانفاس بطيئه تسحب بتعب، القلب والنفس والاكسجين والمغذي والدم والجبيره وراسها الملفوف، زوجة ساحر القرن مابيها شي صاحي مربطه من كل مكان والروح بين السماء والأرض بأمر ترجع لجسدها وتعود للحياة من جديد وبأمر ثاني تصعد يم ربها الكريم وتصير نسي منسي،
بداخله حُرقه وألم وعذاب محد يحس بيه ولا أحد يكدر يوصفه، من تشوف حبيبك بهذا الوضع ماكو كلمات تكدر تعبر عن هذا الشعور بس نكول بكسرة كلب "الله يساعده"
لازم ايدها البارده بأيدي الدافيه والكلمات اللي ينطقها تدخل لمسامعها بدون حواجز.
مهيائيل: أعظم هدايه الكون، واجمل عطايا الرب من بعد امي، نظلمت حياتي بفقدها وبجيتج نورت واشرقت، اللي مريت بيه قبل ماشوفج كان اشبه بمدينه نحرمت من الشمس سنين طويله وبارده ومظلمه ومابيها حياة
"وانتِ صرتي لكلبي مثل ليالي شهر رمضان ماتنمل ومليانه روحانية"
"احبج ياروحي، وراحتي، وسعادتي، ومهجتي، وقلبي، وسكني، ومسكني، وسكناي، وموطني، وملجأي، واغنيتي المفضله، وامنيتي المتحققه، ونعمتي الربانيه، ياريحة امي ودعائها المستجاب، ياعطرها، وبتسامتها، وضحكتها، وحنيتها، وعطائها"
تلوع كلبي بالفقد مره لتخليني بيج اعيش فقد امي للمره الثانية، فتحي عيونج يعيون روحي انتِ وخليني اكحل عيني بهدابج الحلوه وهي تنرفع وتنزل وتغازل كلبي بحركاتها.
قاطع هاي اللحظات الجميلة والخلوه المليانه حب صوت الممرض.
:تفضل بره انتهت الزياره.
مهيائيل: شنو يصير اذا بقيت اكثر؟
:هاي قوانين العنايه المركزه ماكدر اعذرني.
مهيائيل: خوش نطلع أمرنا لله.
طلعت صارت بوجهي ترانيم وأمها اول مشفتها عقدت حاجبي هاي بعدها هنا!!
تسنيم: ليش خلوك تدخل وماخلونا؟!
مهيائيل: بنتج بين الحياة والموت ادعيلها احسن من هذا الحجي الميقدم ولا يأخر.
تسنيم: فريت محبسك مو؟
مهيائيل: ولا تخليني افره هسه تدرين بيه واحد خبل واسويها تكفي شري.
ترانيم: خويه وين رايح؟
مهيائيل: ادخن سم بلكي اموت واخلص.
ترانيم: ارتاحيتي مو؟
تسنيم: اي رتاحيت لأن هو السبب بلي احنه بيه هسه.
ترانيم: الحجي وياج ضايع اسكت احسن.
بين صحوه وغفوه سمعت صوت ركض فتحت عيوني مفزوعه امها وابوها والكل واكفين مستعدين طلع الدكتور مبتسم اني من شفته رتاح كلبي.
:الف الحمدلله على سلامتها المريضه فتحت عيونها.
دخلت امها للغرفة واني رحت وراها وشفت منظرها شلون شابكتها وتبجي وتحجي بحركه كلب كسرت خاطري وعذرتها على سوالفها اليوم وخرت عنها حاضنه خدودها بأديها وتبوس بيها بكل مكان بوجهه، دموعي تنزل بنفس الوقت مبتسمه وفرحانه لأن رجعت لوعيها وما صار بيها شي، بس يا فرحه ماتمت من صغرت عيونها بوجه امها كايله.
ايريم: عمه ابوي وين؟..
يتبع..
البارت اكثر من 4034 كلمه..
اريد اشوف حماسكم ويايه عيناي انتوا..
تصبحون على الف خير وعافيه يارب..
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!