للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي مهيائيل مع بعض
مهيائيل
الكاتبة (زهراء احمد)
__
- امشي على قدمك المكسورة ولا تترك أثر يدك على كتف أحد.
__
كلبي فز على كلماتها الشرطه معقوله شنو تسوي هنا؟؟
نزلت من الدرج سمعت صوت اللاسلكي واكو ناس تحجي، دخلت للمطبخ لكيت الثلاثي المرح واكفات ويضحكن، خزرتهن ورحت يم الشباك،
واكف بكُل هيبه ولا كأن عليه قضيه وراح يعتقلوا مكدرت اشوف منو يمه بس اللي واكف كدامه على جتفه نجمتين، حاولت قدر الامكان اسمع حديثهم لأن قريبين على حايط المطبخ.
لازم تجي ويانه قدموا عليك شكوى بأنك تمارس السحر والشعوذة وراح نفتح وياك تحقيق.
مهيائيل: صحيح كلامك هذا البيت يمارس بي السحر والشعوذة بس اللي يمارسهن موجود هسه بغرفته نايم اذا تحب اصيحه السيادتك.
نريدك انت لأن الشكوى جايه بأسمك مو انت مهيائيل لو اني غلطان؟
مهيائيل: اي نعم مهيائيل، بس قبل الاعتقال اني عندي دليل يثبت برائتي تكدر تدخل جوه وتشوفه اني شخص ما اسوي أمور غير قانونيه تاجر معروف بالسوك واللي اسمي والناس كلها تعرف بيه وبسمعتي الطيبة، اللي اسويه لا سحر ولاشعوذة مجرد ادعيه ومي مقري عليه جايبه من صحن اهل البيت عليهم السلام، وكل كلامي اثبته ألك وبالدليل بدون متفتح ويايه تحقيق وتعب نفسك وي بريئ اني اكلك المتهم موجود وهو نايم هسه فوك،
رائف ابني روح كعده.
رائف: تدلل خويه.
انطيني الدليل ناخذه ونتأكد من عنده وانت هم لازم تجي ويانه حتى تنطي أقوالك.
مهيائيل: ميصير خاطرك الا طيب بس بالأول تعال وياي، شوف الدليل وبعدين اجي وياك وين متريد.
دخل رائف قفل الباب مالت المطبخ وخله أصبعه على حلكه يعني بلا صوت وراها دخل الضابط هو ومهيائيل وياهم كم واحد، درت وجهي الها من كالت.
تالين: راح يسطره بسحر يخلي يعتقلنا كلنه وهو لا.
ترانيم: يطبكم مرض واحد واحد ياهو اهم أنتوا لو هو.
تالين: اي طبعاً شهامج احنه ننداس برجلين وانتن مدللات مخليجن.
ترانيم: اكيد اني اخته الجبيرة وهل كمر مرته انتِ منو وتردين دلال؟!
تالين: مرت ابو مو كافي.
ترانيم: تخسين انتِ وابو على اساس بيكم حظ ثنينكم ترحون فدوة للتراب اللي يمشي عليه.
تالين: اي مو هو نبي، ليش مو هو يروح فدوة لتراب رجلينا.
ترانيم: خلي يطلعون منا وأخذج من هاي كفشتج سحلاً بكُل البيت ذهاباً واياباً واني اعلمج على هذا السانج الادبسزز.
بقيت صافنه عليهن احنه بيا حال وذني يتعاركن صدك بطرانات،
مرت فتره والصوت هدء شويه بعدها طلع والكلبجه بمكان متصير بأيد مهيائيل صارت بأيده نصدمت من المنظر شلون صار هيج وهو يسوي سحوره واني شاهده على اعماله؟!
ملحكنه نفكر بشي ونستنتج طلعت الشرطه نفتح باب المطبخ ودخل يطك صبعتين وراه مهيائيل مبتسم سحب الكرسي وكعد عليه ورائف وراه يركص ويغني.
رائف:
درب الحمامه على السما
دربك عليه وافتهم
تبقى ورايه اشما صرت لو تهجم
مهيائيل: اي باركلي اليوم إمام الملأ وكدام الشهود ظهر الحق وزهق الباطل، ان الباطل كان زهوقا.
رائف: واني اشهد شلون ظهرت الحقيقه وثبتت برائتك وتلبست التهمه بي.
ترانيم: شلون صار هيج؟
مهيائيل: اكو شيطان صاير سباعي ومتصل بالشرطة ومنطي اسمي الكامل وعنواني على اساس اني رجال مشعوذ وسحار وضحك على عقول الناس، بس نسوا اني منو وشنو أكدر أسوي لفتها عليهم وخليتهم ينسحلون سحل من البيت وأعتقد المنظر الجميل صار كدامجن عجبجن مو؟
شنو رأيج تونه؟
تالين: الله لايوفقك اشتكيت عليه وهو حاله من حالك ثنينكم شياطين هسه اني مو مهمه اولي بس احترام لشيباته على الاقل.
مهيائيل: وشيباته انكس منه بهذا العمر ورجليه بالكبر يوميه مخرب بيت ويكعد يشرب بطالته ويكبسل بنص الصاله، من يحترم شيباته هو بذلك الوقت احترمه عود.
تالين: مفكرت بنته خطيه شلون هيج تسوي بيها منو يقبل يزوجها بعد الفضايح اللي سويتها لبوها؟
مهيائيل: خلي يسويلها سحر شاطر هو بهاي السوالف.
تالين: الله لاينطيك دمرتنه.
مهيائيل: انتِ دعائج باب المطبخ ميعبره، وإذا على التدمير فكُل ساق يُسقى بما سقى، يطبكم مرض فوك المرض وأكثر اني أعلنت عليكم الحرب هاي المره ومراح اطلع منها الا وكلكم مدمرين.
أعلن الحرب
ذلك الجميل على ماضيه الصعب
يريد قتلهم جميعاً بمنتهى الغضب
الا هي وصلت لإعماق القلب
احبها بجنون حتى انتهت حلول الأرض
لعشقهم ورفع الأمر للرب
احضان قيدتها بكُل حُب
وشياطين سيطرت على العقل والقلب
صدفة جمعتهم فهل ستنهي الصدف رابط بينها وبين ذلك الغريب
ومامن مجيب
سوا الصبر والانتظار ودعاء لرب عسى أن يستجيب
ويحل البلاء على بيت مليئ بطرب بدل الصلاة
ينفرون من القرآن
ويقدسون الشيطان
وفي كُل زمان ومكان
الشرك يحل بالاوطان
وبكُل غل يعلنون العصيان
فيا سادة أعلن لكم بدأ حربان
الأول محب عانى من الخذلان
وليس لهُ أيدي تأخذه للأمان
وكان لهُ نصيب بالحرمان
والثاني
كاره غضبان
يريد الخروج عن القانون والاديان
انهُ انسان لايوجد لديه عنوان
فهل يجمع القدار قطبان مختلفان
ام ستكون لأعوان إبليس قربان؟؟
(بقلمي زهراء احمد)
رائف: خلونا نحتفل بالحدثين الجميلين اللي صارن رجعت اخوي وزوجته الغاليه وعتقال دَاسِم، وعليه راح اطلع اشتري صمون وكيمر عرب وزوجة اخوي سوي جاي من اديج الحلوه.
اجيت اتحرك صاح بيه مهيائيل.
مهيائيل: سوي لنفسك مرت اخوك مو خدامه عندك.
رائف: ايا خاين تخليت عني علمودهاااا؟!
صُدك اذا حضر الماء بطل التيمم.
مهيائيل: اي المي اضبط من التراب.
رائف: حاجتك يم...
مهيائيل: كملها وشوف يجيك بنص وجهك جوابي.
رائف: اشاقه وياك اصلاً راح اطلع عندي اتصال مهم مع السلامه.
طلعوا ثنينهم وبقيت حايره شلون صار هيج، متحملت الفضول اللي بداخلي ورحت وراه جان كاعد على الجربايه اول مشافني ابتسم وضرب بأيده على المكان اللي بصفه، بدون ما اتحرك خطوه حجيت.
ايريم: شلون صار هيج؟
مهيائيل: بالسحر.
ايريم: مفهمت؟
رفع ايده بيها محبس وبنصه شذره حركه بإتجاهي وبتسم ورفع حاجبه بمعنى شفتي.
ايريم: تقصد محبسك بي سحر؟
مهيائيل: محبه وطاعه وخضوع، من يتحرك بوجه أي أحد يسوي اللي أريده ومره سويتها وي امج من اجيتكم الصبح، لهذا السبب تغيرت نبرتها ونعكس كلامها.
ايريم: تسويها ويايه هم؟
مهيائيل: خليني اشاركج سر، مسويت وياج اي سحر من ناحيتي انتِ نظيفه ميه ميه.
نصدمت بكلامه وحجيت بثقه.
ايريم: مستحيل واللي عشته!!!
مهيائيل: مو سحر، ولهذا السبب مكدر أحد يسويلج شي من السادة الرحتيلهم.
ايريم: بقيت نايمه بالفراش بدون حركه شلون صار هيج؟!
مهيائيل: يكفي اللي عرفتيه باقي الأسرار نكشف عنها بعدين.
بقيت مصدومه بكلامه شلون يعني مو سحر بنفس الوقت اعراض سحر، هذا يحجي صدك لو يريد يخبلني؟!
نام على الجرباية رحت كعدت يمه حركت بأيدي وحجيت.
ايريم: واللي صار اليوم؟
مهيائيل: درس بسيط الهن حتى محد تندك بيج لو بترانيم.
ايريم: ومتخاف على نفسك انت؟
جان مخلي ايده على عيونه من حجيت هيج خلاها جوه راسه وكال.
مهيائيل: محد يكدر يندك وياي من الأساس واللي صار الصبح اكبر مثال على الاكدر اسويه.
ايريم: مو حرام تتهم بريئ؟
مهيائيل: انتِ الوحيده بريئة اللي موجودين بهذا البيت الحيوانات اشرف منهم، لو ينكشفلج الغطاء تشوفين خنازير وقردة.
ايريم: انت مثلهم لتنسى.
مهيائيل: هذا شغلي وافتخر بيه.
دار وجهه ونام واني نزلت بعد متيقنت مستحيل يجاوب، على الدرج لاكاني رائف صاعد، الفضول يخلي الانسان عنده جرئه.
ايريم: ممكن سؤال؟
رفع راسه اليه وبتسم بكُل لطافه وكال.
رائف: كُل الهلا بيج ارنوبه، تفضلي جواب.
خجلني الملعون مع هذا مسكتت وحجيت.
ايريم: الشرطه ليش عتقلت ابوكم مو مهيائيل؟
رائف: لأن مهيائيل هيج راد.
ايريم: مفهمت قصدك شلون يعني؟
رائف: هذا البيت الشياطين تاكل وتشرب بي حالها حالنا ومهيائيل هو اساسهن وبس.
ايريم: منين جاب الدليل؟
رائف: سرر.
غمزلي وصعد، غسلت ايدي منهم عائلة كلها نفس الطباكات، مر باقي اليوم طبيعي حتى صار العصر اندك الباب وطلع رائف فتحه سمعت صوتها لو هي فزه وهي طفره رحتلها ركض بدون مقدمات حضنتها حيل وكأن صار سنه مشايفتها وصدك هاي الأيام اللي مرت اعتبرهن سنين إني، جانت جايه هي واستاج وام مقتدر كعدن بالصالة وترانيم مخلتني اكوم هي جابتلهن الضيافة.
ترانيم: نور البيت بيكم ياكُل الهلا.
تسنيم: نوركم هذا بنيتي فدوة لطولج.
ام مقتدر: اي خاله تعالي كعدي بصفي اريد اشوفج مشتاقتلج.
رحت يمها وكعدت سحبتني وهمست بأذني.
ام مقتدر: سحارج شلونه؟
ايريم: الحمدلله بخير.
ام مقتدر: انتوا شلونكم؟
ايريم: بخير الحمدلله.
ام مقتدر: لتصيرين فاهيه أفهمي سؤالي وجاوبي عليه شلونكم يمه؟
شصار ماصار وياكم؟
ايريم: خاله الحمدلله بخير.
ام مقتدر: راح اهفج بالكلاص وحق هو علي.
ايريم: ليش هسه اني شكلت؟!
ام مقتدر: اقصد اكو طفل على الطريق؟
ايريم: طلفيش خاله مصار شهرين من تزوجنه.
ام مقتدر: اي واذا هوايه حبلن بليله العرس وين المشكلة؟!
ايريم: ربج كاتب كل شي بوقته حلو.
ام مقتدر: ولج بس لامايريدج؟
ايريم: فدوة لكلبج خاله منين تجيبين هذا الحجي؟!
ام مقتدر: مدري ممبين عليكم وأحد يحب الثاني.
ايريم: بله هاي شلون خمنتيها؟
ام مقتدر: احساسي يكول.
سكتت عنها سحبتني امي وهم رجعت لنفس السيرة.
تسنيم: شخبار رجلج؟
ايريم: طالع عنده شغل.
تسنيم: ماكتلج هو وين كلت شخباره؟
ايريم: الحمدلله بخير مابيه شي.
تسنيم: شلونكم انتوا علاقتكم شلونها؟
ايريم: يمه فدوة اروحلج أشيائي الخاصة ماريد احجيها هي شغلات تصير بين ثنين مزوجين نتعارك، نتصالح، واحد يكتل الثاني بما انو كل شي يصير بالغرفه شنو فايدة أفضح نفسنا كدامكم، لا راح تكدرين تحلين مشاكلي ولا اني ستفاديت شي غير خنت الثقه والعلاقة اللي بينه، الأسرار أسرار عود اذا صار شي مكدرنه انحله بذلك الوقت اطلب مساعدة منكم.
تسنيم: ماضاعت بيج تربيتي عاشت ايدج يوم، ربي يسعدكم ويوفقكم اني شنو اريد غير تعيشين بسعادة وراحه.
ايريم: اكلج صدك منو كلكم رجعنا للبيت؟
تسنيم: محد كال بس ام مقتدر شايفه الشرطه ابابكم اول مكلتلي أجيت اشوفكم واجب هذا ميصير عيب من عيالج وانتوا من عدنه عبر شارع.
ايريم: وشلون عرفتي اني موجوده؟
تسنيم: ولج عوبه اجيت اشوف عيالج وشفتج بالصدفه ويا محلاها من صدفه خلتني اتمتع بشوفتج، مشتاقتلج حيل وانتِ منا متغيره صايره كمر ضاوي والخدود متفحه.
ايريم: اي من السعادة.
تسنيم: يديمها عليكم بحق الحبيب المصطفى.
ايريم: ويديمج.
نزل رائف واحنه نسولف جان يغني هو وعلى الدرج من شافهن سكت و سلم على امي وخالتي وباوع على استاج وكال.
رائف: الكمر شعنده عايف السما ونازل هنا؟
رفعت عينها عليه بسرعة صارت خدودها طماطه اختي حيل خجوله ودبدوب أو وجها ابيض على وردي شكلها مجذب حيل بس طفولي بنفس الوقت كُل عمرها 14 سنه، تسجلت عمرها سبع سنين وبالخامس تمرضت وتركت سنه، بس كُل اللي يشوفها عباله صغيره هي على رغم مليانه بس ناعمه ماعرف شلون رهمت بس هي هيج،
ابتسم بوجهه هي خزرته ضحكت اختي نسره فديتها والله صدمتني من جاوبته.
استاج: عيب تحجي هيج وي خطاركم لو اهلك ممعلميك الأصول؟!
عبالي راح يعصب من كلامها فاجأني من رفع حاجبه وكال بابتسامة.
رائف: علميني اهلي هوايه قصروا بتربيتي.
طلعوا نفس الأسلوب سبحان الله الاستفزار يمشي بدمهم، سلم وطلع وهي تريد تنفجر من العصبيه هاي اول مره اشوفها هيج معصبه من واحد لأن طول عمرها هادئه ليش هسه هجمت عليه وكأن عدها ثار وياه، امي جانت تسولف وي ترانيم هي وام مقتدر منتبهن عليهم بس اني رحت يمها وسحبتها ويايه بره تصرفاتها خلتني اشك وان شاء الله يطلع احساسي غلط،
وكفتها بالمطبخ وقفلت الباب حتى محد يدخل.
ايريم: سولفي رائف شعنده وياج؟
نصدمت من سؤالي عيونها صاروا حمر وأيدها كامت ترجف ثبتت شكوكي، اكو شي مسويه، ناس سرسريه شتوقع منهم، على اخوه يطلع قابل نبي مرسل،
عرفت القوة راح تخليها تخاف مني ابتسمت بوجهه وحجيت بلطافه وياها حتى تفتح كلبها وتسولفلي.
ايريم: احجي اني اختج وتعرفيني عدل مستحيل اسوي شي حتى لأمي ماكول سرج مايطلع من الباب، اعرف بيج مؤدبه وشريفه والغلط ميوصل يمج تربيتي وتربية أبيل، سولفي بنيتي شبيه رائف وياج؟
رفعت عيونها إليه وحجت ابراءه.
استاج: اسمه رائف؟
ايريم: اي تعرفيه قبل هاي المره؟
استاج: سمعت أبيل اتصل بيه بيوم عرسج وتعارك وياه.
ايريم: ليش؟
استاج: لأن جان صديقه بس مكله هو اخو زوجج.
ايريم: شايفته قبل هاي المره؟
استاج: لا.
ايريم: لعد ليش هيج جاوبتيه؟
استاج: اكره هذا الأسلوب، هُم عبالهم غزل واني اعتبره تحرش، يبقى رجال غريب ليش يحجي ويايه بهاي الطريقه.
ايريم: صحيح كلامج عاشت ايدج حبيبتي، طمنيني عنج شلونج وي الدراسه؟
استاج: خلصت امتحانات ومنتظره النتائج.
ايريم: ان شاءالله من الأوائل يارب.
استاج: المهم النجاح مو مهم المعدل.
ايريم: صاير وياج شي وضعج معاجبني؟
استاج: مصاير بس خالي أرشد حيل مريض وخايفه عليه.
ايريم: كالت امي، معقوله بعده لسه ماصار زين؟
استاج: غسل كليه بالأسبوع مرتين وهسه عنده كلبه تعبان راح يسوي قسطرة نهاية هذا الشهر.
ايريم: يارب يطلع منها سالم وترجع صحته وعافيته.
استاج: ما اعتقد صحيح الموت والحياة بأيد الله بس هو حيل تعبان حتى ضعف حيل وبما انو غسل كلية يعني أيامه معدوده حتى الدكتور هيج كال، حضروا نفسكم بأي وقت يسلم أمره.
ايريم: ربج قادر على كُل شيء مو صعبه عليه ترجع صحته وعافيته واحسن من قبل هم.
استاج: والنعم بالله.
ايريم: شعجب اجيتي وي امي؟
استاج: لأن راح نشتري ملابس وعيب منكم اجتي مجانت النيه نزوركم.
ايريم: اي ولتخلوها آخر مره.
استاج: تعالي انتِ هم من زوجتي لحد الآن مشفناج ابويه طاك كلبه عليج.
ايريم: أو أبيل؟
استاج: أبيل سالفته سالفة كلما يتصل يسأل عليج وامي تكله بخير.
ايريم: ليش سالفته سالفه صاير شي وياه؟
استاج: اعتقد مطلع علمود الدراسه هو من زمان ناوي يهاجر وتسهل عليه الأمر هسه بحجة يكمل طلع.
ايريم: مستحيل ميعوفكم وحدكم اكيد طلع يدرس ويرجع أخوي واعرفه.
استاج: متعرفيه اني نصدمت بيه من زوجتي تغير 180 درجة.
ايريم: شلون يعني تغير؟
استاج: اربع وعشرين ساعه بره البيت واذا رجع كبل لغرفته آخر مره شفته تحت عيونه ازرك ومن يمشي وكأن يريد يوكع، أو حجيه ثكيل، أخير شي اجه فجأة وحضر جنطته وكال طالع بره اكمل دراسه اني وبتال، امي شكد صاحت وضربت على خدها وتوسلت بيه هي دك رجل ما أبقى ما ابقى، كُل اللي صار بيه لأن متحمل تزوجين سحار ونخان من صديقه متحمل وهج.
ايريم: ليش اني ما ادري بكُل هذا؟
استاج: مهيائيل حذرنه محد يحجي كال لحد يقهرها وهي بعيده عنكم ليصير بيها شي واني ما أكدر ارجع هاي الفتره.
ايريم: وامي هيج سمعت كلامة بدون متحجي شي؟!
استاج: اي.
مكدرت اخذ منها بعد معلومات طلعت بعد مصاحتها امي ودعتهن بالباب ودخلت وعقلي بيه الف فكره أبيل وسالفته الغريبه ورائف واستاج شنو بينهم؟
نفضت الأفكار وكمت حضرنه العشا والثلاثي المرح مشفتهن من الصبح ميدرن الدنيا طشت لو رشت، الشغل واكع براسي اني وترانيم، صحيح هذا ثاني يوم إليه هنا بس مليت وكرهت الحياة، البيت خنكه مو شلون مجان، احس الملائكة متدخل بي اصلاً،
اجه مهيائيل صبينا العشا وعلى صوت المواعين نزلن، ستات الحسن، صدك نقهرت لأن اكره الاستغلال احنه كلنه بالبيت حالنه من حال بعض ليش يسون هيج مادري، هو من شافهن خزرهن وكال.
مهيائيل: ترانيم شنو صار بغيابي؟
ترانيم: مصار شي خويه مرتاحين من الصبح لحد الآن.
مهيائيل: يعني معناها الشغل واكع براسجن؟
ترانيم: عادي اهم شي ماشوف هاي الوجوه اللي تسد النفس.
مهيائيل: ماكو هيج حجي، اذا ذيل الجلب اعوج نعدله وحتى لو ميقبل ينعدل نسحبه بحبل واذا طلب الأمر نكصه، ما كاعدات بمطعم يوميه على وحده الطبخ والتنظيف، ترانيم وايريم حالهن حالجن واللي معاجبها تاخذ مجلوبها وتطلع، ولحد تفكر تزوجت معناها اجت جنه تشتغلن براسها واللي خلقها اخليها كاعده والاكل يوصل يم حلكها وتعرفني اذا صعدت عندي شسوي.
طفرت من مكانها وحجت بمياعه.
رولين: وشبيك عيني قابل جايبها بس للنوم، شكو بيها من تحرك طولها وتشتغل لو تخاف عليها تتعب وتنام من وقت ومتلحك تشوفها.
حسيت الحراره تطلع من خدودي اني مرته وخجلت وتمنيت الكاع تنشك وتبلعني وهي مرت اخوه ولا كأن تحجي برحابة صدر ومتخصره،
عجبتني ردة فعله جانت بأيده خاشوكه شالها وشمرها صارت بوجهه عدل رجعت ليوره وأيدها على كصتها منطاها مجال وكال بغضب.
مهيائيل: السانج اذا جان قذر اسحبه واشمره بالزبل لأن حتى الحيوانات متتقبل قذارتج، ماعرف ذلك المطي على شنو مخليج على ذمته شو عقيم أو وجهج يطرد النعمه وانسانه فاسدة بدون أخلاق تربيه شوارع ومن بيوت مشبوهه شطلعين قابل ملايه على الحسين!!
اذا هو معرف يربيج ويعلمج على الاحترام اني اكفي أو اوفي والله اسحلج سحل وشمرج بره البيت واخليج فرجه لأمة محمد وانتِ تعرفيني عدل سوابقي تشرحني،
وهسه ولي من خلقتي ورجلج الاغبر اللي حجي وياه لو يلكيلج حل لو استلم شغلتج انا.
نزلت دموعها وتحجي مراضيه عليه.
رولين: تعيرني لأن مايصير عندي جهال ربك ياخذ حوبتي وبعمرك كله متصير أب.
مهيائيل: ليش قابل مرتي مثلج تشرب مانع.
صار وجهه ينطي الوان فتحت عيوني بصدمه هاي شلون عرف بيها، ابتسم بطرف شفته وكال بستهزاء.
مهيائيل: عدل وكبل لغرفتج وجهج القذر ماريد اشوفه سديتي نفسي سود الله وجهج، ولو هو شمبقي بيج فحمه محتركه.
طفرت الثانيه من مكانها.
تالين: التنمر على خلك الله حرام.
مهيائيل: حجه العلامه المجلسي، ولج خليني ساكت مو الساني اذا نفتح مينسد بعد.
تالين: شتكول مثلاً؟
نظيفه انظف منك ومن عشيرتك.
مهيائيل: واللي اجت تلطم لدَاسِم نص الليل لأن.. له له له خليني ساكت عيب منا نسوان تخجل.
صار وجهه ينطي الوان صعدن ثنينهن بدون كلمه ياسيم رادت تلحكهن صاح بيها بصوت.
مهيائيل: وينننن، هن نسوان عدهن التزامات انتِ شعندج؟!
ياسيم: ماعندي شي.
مهيائيل: اي اكعدي راويني شكلج الحلو، شلونج بالدراسه؟
ياسيم: الحمدلله.
مهيائيل: اقل من 95 معدل ماكو جامعة.
ياسيم: ان شاءالله.
ذكرني بجامعتي بعد كُل اللي صار نسيتها، اليوم لازم اذكره حتى اروح أشوفها،
صبينه عشا واحنه ناكل دخل من باب المطبخ اول مباوعلي خزرته عملته اليوم ترن بعقلي لهاي اللحظه مستحيل اعبرها اله لازم انبهه واكول لاخوه عليه ليصير شي على اختي بعدين ومنو يتحمل النتيجة هيج مواضيع تخص الشرف ملازم ينسكت عنها ابدد.
غسلنه مواعين وكُل وأحد صعد لغرفته بس اني بقيت بالمطبخ انتظر بلكي يجي حتى احجي وياه من شفت الوقت تأخر هوايه قررت اصعد ماكو فايدة من هاي الكعده، وسبحان الله واني امشي صار بوجهي بأيده الموبايل ويخابر بصوت عالي ويضحك وكفت مقابيله، بما انو السالفه تخص اختي انزع المستحه والعيب علمودها.
ايريم: اريد احجي وياك بموضوع مهم.
سلم وسد الاتصال عقد حاجبه وكال.
رائف: صاير شي شكوو؟!
ايريم: ماحب اللف والدوران شعندك وي اختي؟
رائف: ماعندي شي شعندي مثلاً؟!
ايريم: لتفكر ابداً اني غبيه لعلمك الكفها على الطاير، نظراتك الها والجملة الحجيتها ورجفت أيدها كُل هاي الادله تثبت انت متهم.
رائف: صايره ذكيه حبيت.
ايريم: هي وحده مالها ثنين لو تبعد عنها ودور وحده مثل هواكم لو اندمك على التحرش بيها.
رائف: يادهرر، اني متحرش أعوذ بالله، لعلمج اني ما ادور بنات ولابعمري تحرشت بوحده فبإي حق تتهميني هيج اتهام؟
ايريم: بحق انو شفتك.
رائف: مو كُل شي نشوفه بعيونه صحيح، ماخفي كان أعظم.
غمزلي وطلع تصرفاته خلتني اتيقن اكو شي والله، بسرعه صعدت للغرفه لكيته هسه طالع من الحمام وكفت للحظه قبل ما انطق بشي خطر على بالي انو ماراح يصدك بيه، سكتت هو حس اكو شي ابتسم بوجهي وكال.
مهيائيل: سولفي لتخليها بكلبج تحوص.
جملته خلتني اتشجع احجي اخذت نفس وحجيت وبكلبي خوفه مراح يصدكني.
ايريم: اليوم اهلي اجو العصر.
مهيائيل: اي هلا بيهم، كملي.
يارب ماكدر احجي والله خايفه لا تلتف عليه وتصير مشكله براسي واني ما إليه علاقه، اتقرب من عندي وكف مقابيلي وخله ايده بجيب التراك ورفعلي حاجبه وحجه مُطمأن إليه.
مهيائيل: سولفي اذا جانت مشكلة نحلها، واذا شك نوصل للحقيقة، وإذا اكو احد زاعجج كائن من يكون اكسرلج راسه، لتخافين من عندي مراح افهمج خطأ.
ابتسمت لا ارادي على كلماته وهذا الشي اللي شجعني انطق.
ايريم: شاكه اكو شي بين اخوك وختي بس ماعرف هو شنو، هي مراهقه وهسه يلا فتحت عينها على الدنيا ومع هذا تبقى تربيتي وحافظتها بصم، اعرفها خجوله ومترد على احد، من المدرسة للبيت والعكس بس اليوم لأول مره حجت وطلعت من صمتها وخزرته، وهو اخوك محترم حتى امي وخالتي وتغزل بيها كدامنه.
مهيائيل: منو منهم؟
ايريم: رائف.
مهيائيل: خوش اشوف شغلي وياه لتشيلين هم خلي رجليج بمي بارد.
ايريم: مصدكني يعني؟
مهيائيل: وليش ماصدك ماكو داعي تجذبين بهيج موضوع مهم وبي كص ركاب.
ايريم: لأن مره كلت رائف هو الوحيد اللي اثق بي لهذا السبب.
مهيائيل: ومازلت، رائف من هذا البيت هو الوحيد اللي اثق بي بس هذا ميمنع يطلع عنده هيج سوالف، الثقه اللي قصدتها مو هاي ابد.
ايريم: خايفه عليها ماريد تدمر حياتها بعدها صغيره.
مهيائيل: اخذيها مني كلمة اكص رجليه الج اذا تعده يمها لو بخطوة وحده.
عافني وراح يم المرايه يمشط شعره اخذت نفس براحه وهنا ذكرت الجامعة والامتحانات.
ايريم: وجامعتي؟
مهيائيل: شبيها؟
ايريم: راح تضيع السنه عليه.
مهيائيل: ماكو هيج حجي بالامتحانات ترحين.
ايريم: وهذا شهر الخامس يعني الإمتحانات هسه.
مهيائيل: اي هي الأسبوع الجاي سألتلج.
ايريم: المحاضرات كلها بيت اهلي اريد اجيبهم.
مهيائيل: اخذج باجر العصر الهم من أرجع بالليل اجيبج.
ايريم: الجدول ماعرفه.
مهيائيل: تواصلي وي صديقاتج وسأليهن.
ايريم: ماعندي صديقات بس زميلات الدراسه.
التفتلي ورفع حاجبه ورجع يعدل شعره وكال.
مهيائيل: اجيبه الج اني.
حبيت اخلق وياه مواضيع من تزوجته لحد الآن مكعدنه كعده بيها حظ.
ايريم: ليش خليتني اكمل؟
مهيائيل: مو ضد الدراسه اني، برسيم وخليتها تكمل.
ايريم: ليش تسميها برسيم؟
مهيائيل: يعجبني.
ايريم: ليش تكرههم؟
مهيائيل: لأن مينحبون.
ايريم: شنو تخصصك؟
مهيائيل: طفره حلوه، ممكمل دراسة.
ايريم: الياصف وصلت؟
مهيائيل: تخرجت من السادس وتركت.
ايريم: شكد معدلك؟
مهيائيل: يدخلني طبية.
ايريم: ليش مترجع تكمل هسه؟
مهيائيل: الأطباء يشتغلون جوه أيدي ليش اتعب نفسي واصير مثلهم.
ايريم: تنقذ حياة الناس مهنه شريفه.
مهيائيل: اذا الكُل شتغلوا بالانقاذ منو يسوي الحريق؟
ايريم: شكد عمرك؟
التفتلي وضحك.
مهيائيل: هههههه، له له له، لتكوليها متعرفين زوجج سر سعادتج شكد عمره!!!
ايريم: ليش احنه زواجنا مثل البقيه؟
مهيائيل: 30 سنة.
ايريم: العمر كُله يارب.
مهيائيل: ويخلص كُله يمج.
خجلت ومحجيت شي هو راح للجربايه واني دخلت الحمام طلعت بعد فترة لكيته مخلي ايده على عيونه، جففت شعري ورحت يمه خليت راسي على المخده ميجيني نوم صافنه بالسكف شوية وكال.
مهيائيل: اليوم مصليتي ليش؟
ايريم: قطعتها.
مهيائيل: احسن متفيدج.
ايريم: اي كلامك صح.
مهيائيل: كومي صلي حتى لو بالبيت ماينذكر اسم الله عاندي شياطينه وكسري شوكتهم.
ايريم: وليش تريد اسوي هيج؟
مهيائيل: حتى تبقين مثل ما انتِ ومتصيرين مثل البقيه.
التفتت اله خليت أيدي جوه راسي وكلت سائلته.
ايريم: وليش مو انت تكسر شوكتهم؟
مهيائيل: ربيت وياهم من الطفوله اذا هسه تركتهم يزعلون واني زعلهم ثكيل على كلبي، يكلولي توقعناها من الكُل الا انت مهيائيل.
ايريم: الشياطين مو اهم من الله، مصير الحياة تنتهي والحساب واقع لامحاله، ربك من يسألك باجر ليش صافحت كف الشيطان وتركت ديني شنو يكون جوابك؟
مهيائيل: مثل جوابج هسه وانتِ ممصليه اليوم.
ايريم: سامع بمقولة ناقصات دين؟
مهيائيل: اي.
ايريم: عندي عذر شرعي حتى اترك الصلاة ايام معدوده بس انت ماعندك عذر.
وخر أيده والتفتلي ابتسم بوجهي وكال.
مهيائيل: شكلها هدايتي راح تصير على ايدج.
ايريم: الله اذا حب عبداً هداه اني مالي علاقة مجرد ناصحة لا أكثر.
مهيائيل: نعمتي انتِ ومن اجمل النعم.
بقيت ساكته محجيت شي غير الإبتسامه اللي نرسمت على وجهي وماعرف شنو سببها رجع كمل كلامه بهدوء.
مهيائيل: من ماتت امي فكرت بعد ماكدر اعيش لأن متعلق بيها هوايه صرت صايع، ودايح وماعرف ارضي من سماي، جنت اضوج من يذكرون اسم الله يمي بكُل عقلي اخذ أمي وحرمني منها وماكو حكمه من موتتها، جنه عايشين بحضنها ويا محلاها دنياي من ارجع تعبان وتتلكاني بأبتسامة وتكلي حياك وليدي عسى التعب بيه ولابيك، ماتت وأخذت كل شي حلو وياها كعداتنه، ضحكنه سوالفنه، حضنها الدافي والحنيه العودتنا عليها، البيت صار بارد بدونها مثل شهر الواحد غيبتها نجماد بعز تموز،
صفن بعيوني شويه ورجع كمل بهدوء.
مهيائيل: "حتى شفتج عرفت الله اخذ أمي وعوضني بيج"
مكدرت احجي شي اصلاً كلامه خلاني احس بشعور مختلف، اهتمامه معاملته إليه، والثقه اللي منطيني اياها تجبرني لا ارادي احترمه، بتسمت بوجهه كرد فعل وكلت.
ايريم: ليش انت هيج؟
عقد حاجبه وكال بتساؤل.
مهيائيل: شبيه؟
جاوبته بهدوء.
ايريم: ساعه حباب وساعه لا، مرات اتمنى اخليك بنص الكلب واقفل عليك ومرات ما اطيق اشوفك، يوم تداوي جرحي بإيدك ثاني يوم تجرحني انت، حيرتني وبأي طريقه لازم اتعامل بيها وياك ماعرف، انت منو مهيائيل عرفني عنك خليني افتهم لأي بيت اني داخله أو وي شخص اني مزوجه، اطباعك تصرفاتك كلها هاي من حقي اعرفها، خلينا نبدي ولا كأن صاير شي من قبل، نبدي من جديد تعرف عليه وعرفني بيك.
سكت شوية وكال.
مهيائيل: عطرج، عيونج، عيوني من تغوص بيج وتبحر، نعومت ايديج من تلعب بشعري، دفو روحج من يلامس روحي، هدوئج، وبرائتج، وصوتج المينسمع، حيائج حتى مني، احترامج، خشوعج وقت الصلاة، ايمانج وثقتج، وكعن ساحر شكبره بسحر مايطلع منه طول العمر لو يروح لآخر الدنيا.
بقيت صافنه عليه شلون يحجي، مبقى شي منبض بقوة، كلبي وعقلي وحتى روحي، شي غريب تولد يمكن بداية حُب أو هذا الشعور بسبب كلامه هسه والأجواء اللي تساعد الشخص يحس بهيج شي،
رفع راسه اليه تلاقت عيونه ونبض كلبي بعنف حسيته يريد يطلع من صدري، بهاي اللحظه بالذات نسيت كُل شي وعشت وياه، شعور خلاني سعيدة إلى أبعد حد، لفني بحضنه وهاي المره سوا العكس خله راسي على صدرة وأيده يحرك بيها شعري ياخذ نفس عميق من عنده ويحجي بنبره عميقه.
مهيائيل: فيش يريحتج ترجعلي الحياة.
فتحت حلكي لأذني من الإبتسامه بعد فترة غفيت، فزيت بعد فتره طويله ميته عطش، السبلت مشتغل والدنيا ظلمه أجواء نوم خرافيه وغير حضنه اللي ماريد أبعد من عنده ماعرف شبيه مثولة حيل هاي الليلة، لبست حجابي تحسباً خاف أحد يصير بوجهي، واني نازله سمعت صوت غريب اول مره اسمعه جاي من جوه الدرج مشيت على كيف وركزت منين جاي، جانت صدمه من شفته كدامي..
يتبع..
مسائكم خير وعافيه وجمال.
البارت اكثر من 4080 كلمه.
لأي اي شي يخص القصه تعالوا يمي انستا.
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!