للتواصل انستا zahraaahmedn99
علقوا بين الفقرات+ صوتوا للبارت+ تابعوا حسابي عيناي انتوا.
شاركوا القصه حتى نستمتع وي مهيائيل مع بعض
البارت هديه لأن تأخرت هوايه عليكم فهذا تعويض عن الايام السابقة
مهيائيل
الكاتبة(زهراء احمد)
_______
لا يغرك هذا ﭑلوجه ﭑلجميل ﭑلمتماسك ، ڪل ﭑلاحداث ﭑلسيئه تحدث بالداخل .
__
بقيت صافنه بدون حركه المشهد ينعاد كدام عيني شلون جان حاضنها ويب.. استغفر الله، استغفر الله، هاي شلون تسوي هيج ومنين اجتها الجرأة مدخلته بنص البيت ولا كأن اكو زلم هنا، مخافت، مستحت على نفسها،
صعدت واني بعدني مصدومه، عقلي يكُلي كولي كلبي يكُول لا لتحجين شي راح يصير بيج شي، قطعت النزاع وفتحت باب الغرفه، شفته نايم بعمق منطاني كلبي اكعده بس اللي صار قبل شويه يجبرني احجي مستحيل ابقى ساكته عن هيج موقف،
تقربت من راسه وحركت ايده فتح عيونه وكال بنعاس.
مهيائيل: ها داده شمكعدج هيج وقت صاير شي؟
بلعت ريكي وشجعت نفسي لازم احجي هيج شي ميصير يبقى سر، اول شي حرام، ثاني شي دخلت واحد غريب لنص البيت وهم موجودين اذا صار شي وبقينا بس النسوان كُل شي يطلع من أيدها.
ايريم: شفت شي جوه الدرج مقابيل الغرفة الأخيره.
مهيائيل: ايي شنو شفتي؟
ايريم: وحده واكفه يم واحد مكدرت المحه عدل وجانوا بوضع محلو ابدد.
مهيائيل: ليش شنو جانوا يسون؟
ايريم: شسمه.
مهيائيل: راح اموتج من وره هاي الشسمه كولي شنو الفلم خلي افتهم.
اخذت نفس وحجيت مره وحده.
ايريم: يبوسها.
نظرته إليه خلت الحراره تطلع من وجهي عضيت شفتي اني شورطني وحجيت هسه ياخذ عليه غيره النظره،
صفن شويه بعدين كال.
مهيائيل: شفتي منو هو؟
ايريم: هو معرفته جان واكف بالظلمه بس هي شفتها.
مهيائيل: ياملعونه منهن؟
ايريم: رولين.
سحبني من أيدي وخلاني بصفه وكال بهدوء.
مهيائيل: خوش نامي انسي ولتفكرين بيها.
ايريم: مراح تسوي شي؟
مهيائيل: وحده بدون أخلاق شسويلها يعني!!!
ايريم: متخاف على سمعة العائلة؟!
مهيائيل: هم سكط على شنو اخاف!!!
ايريم: وأن، غير انت تنتمي لهاي العائلة واي شي يمسهم يمسك.
مهيائيل: وانتِ ليش هيج قلقه على سمعتي؟
ايريم: لأن هي من سمعتي غير انت زوجي واللي يمسك يمسني.
مهيائيل: استري علينه، انتِ ناقصة دين هسه.
ضحكت على كلامه وخجلت بنفس الوقت، حسيت بثكل ايده عرفته نام، واني منين يجيني النوم والمشهد يعيد نفسه بكُل لحظه براسي، فكره تاخذني وثانيه ترجعني حتى سمعت صوت الأذان من الموبايل، خليته يكمل قريت القلاقل الأربعه وآية الكرسي خمس مرات والتوحيد ثلاث مرات عدتها ودخلت بنوم عميق محسيت على شي الا والشمس تضرب بعيوني، درت وجهي ملكيته موجود اخذت نفس اكيد طالع من الصبح كالعادة، عدلت كعدتي مابيه حيل اكوم وتعالي صبحي بوجوهن ومالي خلكهن ابد،
غسلت وجهي وطلعت من الغرفه صارت بوجهي اول مشافتني ضحكت بستفزاز بسرعة ذكرت بأي موقف شفتها البارحه، هنا الشيطان تربع بعقلي أو واحد يكٌلي حركي كلبها مثل مدسوي بيج هسه.
ايريم: صباح الخير.
رولين: صباحي حلو قبل ماشوفج.
ايريم: اي قابل اني ابوسج لو اختل بيج بنصاص الليالي، اكيد صباحي يختلف عن صباح البقية.
حتقن وجهه أحمر ابتسمت بخباثه رادت تضوجني صار العكس عجبني الوضع وحبيت استفزها اكثر.
رولين: احترمي نفسج شدتحجين انتِ؟!
تقربت يمها وهمست قريب اذنها.
ايريم: اللي صار جوه الدرج، بو... لا لا لا، السر لازم يبقى سر ميصير نحجي بيه لأن الحياطين الها أذان مثل ميكولون ابقي حذره، هاي المره اني الله اعلم منو يشوفج مره ثانيه.
غمزلتها ونزلت، حضرنه الريوك تريكنا بس اني وترانيم وصعدنا فوك قررنا منسوي شي اليوم، بقيت كاعده بالغرفة اني وترانيم، ولازم اطلع سالفه إليه.
ترانيم: من زوجتي لحد الآن ممخليه مكياج شبيج فاهيه هسه يضيع منج الرجال وتجين تلطمين يمي، والله العظيم اني اشجعه اصلاً شنو شاف بيج اربع وعشرين ساعه بس عاكفه الخلقه راح يملل.
ايريم: على كيفج اكلتيني وبلعتيني شويه، شويه عليه.
ترانيم: كومي ويايه نعدل شي شياتين بيج، لتبقين صافنه بوجهي يله.
ايريم: والله ماكوم شتردين تسوين بيه؟
ترانيم: اصنع منج خلقه تعجب رجلج.
ايريم: ومنو كلج رجلي مامعجب بيه؟!
ترانيم: ايااا ملعونه صايره تطورات واني مادري؟
حركتلها بحواجبي واني مبتسمه ضربتني على متني وكالت وهي تمثل العصبيه.
ترانيم: اياا ثوله واني شايله همكم وافكر بيكم من الصبح لليل عبالي اكو مشاكل اسم الله، طلعتوا مثل العسل واني ياغافلين الكم الله، هسه تغردين اريد اسمع بشريني شنو صار؟
ايريم: ماصاير شي.
ترانيم: تضحكين عليه ولج؟!
ايريم: والله ماصار شي لسه بس الحمدلله عايشين بدون مشاكل.
ترانيم: الرجال يمل تره مراح يبقى صابر عليج طول العمر، تلكيه يتحمل يوم يومين بس يجي يوم ويغصبج وتندمين وعيونج، استعجلي بالموضوع وشتري راحة عقلج هي وراج وراج على شنو مكبره الموضوع؟
ايريم: اني هم مفكره بس مصار مثل ماريد خلي تخلص هاي الأيام ويصير خير.
ترانيم: علمودج تره، لو جان يعبدج عباده هم عنده طاقة تحمل وتجي الساعه اللي ينفجر بيها، مرته ومحروم منها شتتوقين يسوي يعني، اخذيها نصحيه مني اتقربي من عنده خلي يحبج ويتعلق بيج حيل صدكيني محد يكدر يساعدج بهذا البيت غيره حتى اني شايفه وضعي بس السان وادافع عنج وما أكدر اسوي غير هيج البيت مو بيتي، بس هو لاا وداعتج يطردهم لخاطرج وشفتي بعينج شنو سوا بيهن البارحه، هنا حتى الزلم الجبيرة تحت ايده مسيطر على الكل، يكولون كُن إلى جانب الرامي تنجو، وانتِ سوي هيج قوي نفسج بيه تعيشين مرتاحه.
ايريم: رب العالمين موجود هو يساعدني، يكدر عليهم كلهم.
ترانيم: والنعم بالله اني ماكلت ربج مايكدر عليهم بالعكس يطيح حظهم بساعتها، بس هم اكو وسيله وسبب للمساعده ومهيائيل هو هذا الشخص المقصود.
ايريم: ولشوكت يبقى يدافع عني؟
حياة بنص المشاكل على طول متنراد.
ترانيم: هي هاي الدنيا، دوام الحال من المحال، قابل تردين امسج مثل اليوم مستحيل، بيت الأهل يختلف عن بيت العيال، الزواج هو ارتباط بعائلة ثانيه مختلفه بكُل شي، بتوقيت اكلهم وكعدتهم وعاداتهم والتقاليد، وغير عن الرجال، يريد حتياجات كومه، صح الدين يكول مو واجب المرأه بس هو واجب، يعني الزهراء عليها السلام مجانت تطبخ وتنظف وتربي الأولاد؟
المرأه هي عمود الميت وجودها مهم ورب الأهميه، بس مو كُل وحده تفهم وتقدر هاي المسؤوليه لهذا السبب الطلاق تارس المحاكم.
ايريم: ماكو تفاهم بين الثنين هذا السبب اللي يخليهم ينهون الزواج، يعني شكو بيها لو الزوج ساعد مرته مراح ينقص شي تره.
ترانيم: صدكيني لو حبج وشافج تستاهلين يخليج كاعده وهو يشتغل بمكانج، بس جيبي اللي تفتهم، نسوان هل وقت تريد تسيطر على الرجال بالصياح والصوت العالي وتكعد تتأمر عليه، يرجع من الشغل تعبان بمكان متكله الله يساعدك تشكيله من أمه وخواته، وإذا بالليل طلع يشم هوه وي جماعته يبوو ربج كتبها عليها تراويه نجوم الظهر، انت شورطني بيك وانت كذا وانت وكذا وهو راجع يريد يرتاح ويسمع الكلمة الحلوه تقابله بالنكد وضيجة الخاطر، يملل حتى لو جان نبي مو زلم هل وكت بس يريد حجه علمود يطفر،
اكسبيه، من يرجع من الشغل تلكيه تعبان جيبيله كلاص مي بارد، كليله روح اخذ حمام تطرد التعب واني اجهز الغده علمود ناكُل سوه، هسه يكلج ليش مأكلتي؟ حضنيه، دلعي بكلامج وكليله متدخل اللكمة بحلكي اذا ماشوف طولك الحلو، وحق هو ربج يسيح ويسرسح، مو شرط الكلام يطلع من الكلب، لأن أغلب الحجي جذب، المهم يشوف افعالج وهتمامج، حتى لو متحبيه تظاهري بالحب تعيشين حياة انتِ تحسدين نفسج عليها،
كُل الزلم ماكو اختلاف بيهم، احتياجاتهم بسيطة، وفريله راحته، وخلي يشوفج بأجمل صوره مرتبه ومعدله، ومبتسمه بوجهه، وشوفي شلون يدافع عنج ويوكف وياج بالمره قبل الحلوه، ولتكولين وسويت هيج ومشفت منه غير الجفا، اللي يكول هيج بس الناقص غيره وماعنده اصل، ابن الحلال يذكر كلاص المي وقت العطش ويعوضج عنه نهر وكولي ترانيم كالت.
ايريم: كلامج حلو ليش مجنتي مرتاحه لعد بزواجج؟
ترانيم: لأن مجان عندي احد ينصحني ويعلمني، تزوجت قاصر وهو عمره 25 سنة، معرفت اكسبه، اعاند وما احترم ومانطي حقوق وأربع وعشرين ساعة اشكي، حتى مل من عندي وقرر ميصير عدنه جهال، جان يكول وحده مثلج خبله ما أمن ابني يمها، بالبداية جان عندي عادي لأن صغيره ما افهم بس من كبرت أو وعيت عرفت منكدر نخلف والسبب مجهول هيج من قدرة الله،
وهذا العمر اللي فات هم مكدرت اكسبه لأن تعود عليه وكام يصدك بحجي أمه وخواته يعرفني ملسنه وما أسكت ابد، واللي تحجي ويايه كلمة اردها بعشره، ردت هوايه اطلك بس لا اهل بيهم حظ ولا اني عندي وظيفه واصرف على نفسي كعدت وسكتت، جان بأول زواجنا خوش رجال ليش الجذب، بس بسبب تصرفاتي المامحسوبه تغير لحد مامات،
والغلط منه هم مجان يكعد يمي ويفهمني يجي يضرب ويعنفني بكُل سنين زواجي منه مجان يحترمني ابد يهيني كدام الجبير والصغير واني عبالج اروح ابجي لو اعتزل ابدد، الكلمة بعشره اخذ حقي من حلك السبع واعرف انكتل ويبقى حابسني بالغرفه حتى الحيوانات احسن من عندي مع هذا لازم ادافع عن نفسي لان ماعندي زلمه حوك ياخذ حقي منهم.
ايريم: ليش اخوانج وين؟
ترانيم: مهيائيل جان بعده ما صاير من زوجت وميمون ما اعتمد عليه لأن هم صغير جان، ومن كبروا صاروا اخوه ونعم الأخوه خاصه مهيائيل هذا لو انطي عمري ما اوفيه حقه ابدد.
ايريم: لهذا السبب هو هم يحبج ويثق بيج؟
ترانيم: يعرفني كد الثقه، تدرين اني مشاكلي مجنت احجي بيها لأحد بس مره اجاني يشوفني جان كُل اسبوع يجي يمي يشوفني ويسأل عني وينطيني مصرف ومرات اذا شافني ضايجه ياخذني يطلعني رافع راسي يمهم، مره اجاني فجأة، قبلها بيوم تعاركت وي عمتي وابنها المقبور دفعته الغيره على أمه وضرب راسي بالحايط شك راسي وخشمي ورم، هو من شافني هيج كلب الدنيا على راسه وسوه بيه العمايل والله العظيم خلا فرجه لأمة محمد وسحبني من أيدي وكال دقيقه متظلين هنا، وصدك اخذني للبيت يدافع عني مثل الأب يدافع لبنيته، خله عشيره بكبرها تجي وتعتذر مني، ورجعت لأن شفتي الثلاثي المرح شلوني يخبلن مكدرت ابقى وياهن اكثر، حتى لو ذليله بيتي وغرفتي احسن بألف مره، هو من يومها بطل يضرب بس كام يسوي الانكس لو باقين على الكتل احسن بألف مره.
شفتها شلون ضاجت قررت اغير الموضوع.
ايريم: خليلي مكياج خلينا نغير جو.
ترانيم: اي هيج ومن الأول تعبت واني بس الغي هم زين جاب كلامي فايده.
اول مره اشوف هيج انسانه على رغم هي حماتي بس ابد محسستني هيج اشوفها بطيبتها وحنيتها أم وكلامها اللي يجنن ونصائحها تسحبني إلها بأسلوب راقي،
كعدت على الكرسي كدام المرايه وهي جابت الفرج وبدت تخلي واني مغمضه جان سؤال يلعب بعقلي من حجتلي على مهيائيل وشلون يدافع عنها مخليته بس بداخلي.
ايريم: ليش مهيائيل مسوالج محبه؟
ترانيم: اني مجنت اقبل بالأساس ومره هو كلي هم "هذا السطل حرامات اخسر عليه ربع وخليه يحبج، يكفي راجدي ودفرتين يمشي مثل ميل الساعة".
ضحكت من كلبي اليوم المود عالي العال،
كملت نعجبت بشكلي طلعت الأخت خبره، مخليه مكياج سموكي لايكلي حيل، صار آذان الظهر هي راحت تصلي واني عجبني اغير ملابسي، لبست ثوب صيفي قصير للركبه بلون البني وردانه ربع خليت عطر وشغلت التلفزيون خليته على دعاء، بهذا البيت محد يسمع هيج اشياء، فعلى الأقل اخلي غرفتي مباركة،
منزلت وقت الغده وقررت اليوم اسوي مثل مكالت وابدي صفحه جديده مختلفه كُلياً، احياناً العلاقات حتى تنبني بشكل صحيح يحتاج شوية تنازلات بما انو مراح تمس كرامتي فكُل شي يهون،
صارت الساعه اربعه العصر متت جوع، لمت نفسي اني وين وسوالف الدلع وين لو ماكله مثل الاوادم ومن يجي اسوي غده جزء ثاني، هو الأخ ولا خبر، نفتح الباب ودخلت بدون مدكه باوعتلي وصغرت عيونها وحجت بتساؤل.
ترانيم: ابو الطلايب وين؟
رفعت أكتافي بحركه مادري غمتني بأيدها وكالت.
ترانيم: اي غير تتصلين بيه، حبيبي ابو بيتي ابو السحوره وين صرت؟
مرتبه ومعدله وصافنه بالحايط على شنوو!!!
ولج اني جنت اعلم بيج لو احجي للحايط؟!
شلون الرجال تكسبيه لعد غير بهاي السوالف، هسه يكول شكد تهتم بيه فديتها.
ايريم: واذا عصب بوجهي وكال شعندج متصله وهو اكيد تعبان والجو حار تلكين روحه بخشمه صايره.
ترانيم: عود اتصلي وتغزلي بي واحجي بأسلوب رومانسي ودلعي واذا حجه شي يضوجج عاتبيني اني اسحله الج وخليج تنامين يمي ومتجين يمه واعلمه درس مرتب، يلا اني طالعه وانتِ خابري ابو الطلايب.
هي طلعت واني اخذت الموبايل وتصلت بي بآخر ثواني فتح الخط.
مهيائيل: واني اكول ليش دك كلبي فجأة قُفلي والمفتاح.
خجلت وبتسمت بفرحه وكلت.
ايريم: شلونك؟
مهيائيل: بخير من سمعت صوتج.
ايريم: عساك دوم بخير، شوكت تجي تأخرت هوايه اليوم؟
مهيائيل: جنت بغير محافظه هسه راجع بالطريق ساعتين واني بالبيت.
ايريم: ربي يحميك توصل بالسلامة.
مهيائيل: سولفيلي منو ضوجج اليوم؟
ايريم: بالغرفه منازله من الصبح.
مهيائيل: ليش؟
ايريم: بدون سبب.
مهيائيل: لتحبسين نفسج بالغرفه بسبب أحد، انتِ ام البيت، انزلي واكلي وشربي وخلي رجل على رجل وبزودج واللي تحجي وياج شكي حلكها، لتنتظرين أحد يدافع عنج ادخلي بكُل قوة واني بظهرج.
ايريم: ماحب اكعد يمهن بالأضافة انت ماموجود على شنو انزل وعكر مزاجي.
مهيائيل: على هذا كلامج مماكله اي شي طول اليوم مو بله؟
ايريم: اي.
مهيائيل: ليشش؟!
سويت تعاليم ترانيم وحجيت بهدوء.
ايريم: منتظرتك تعودت ناكُل سوه.
بقى ساكت شويه وقطع الصمت وهو يكول.
مهيائيل: ارنوب ليش متكعد عاقل؟
كلت بتفاجئ.
ايريم: ليش اني شمسويه قابل!!!
وصدك هاي ارنوبه منك؟
مهيائيل: كُل شي ممسويه داده، ليش هاي الكلمة سامعتها من غيري؟
ايريم: من رائف.
مهيائيل: هذا طايح الحظ متصير بأذنه كلمة ابد، نقل مباشر CNN متلحكه.
ضحكت على كلامه ودعته وغلقت الخط، غيرت ملابسي و نزلت جوه، حضرنه العشا وبين السوالف والشغل خلصن الساعتين بسرعة، صعدت للغرفة اخذت دوش سريع وغسلت المكياج رجعت لطبيعتي مبين مجان مكتوب يشوفني بشكل جديد وهمات احسن لأن وضعي ميسمح ينعجب بيه هسه،
واني امشط بشعري نفتح الباب ودخل، التعب مبين على ملامحه، التقت عيونه مع بعض بتسم بوجهي بادلته، دخل للحمام حضرت ملابسه ونزلت جوه، جان وقت آذان وبمكان ما اسمع صوت القرآن والدعاء الصاله تمليها الأغاني، دخلت بغضب كُل يوم يثبتولي شي جديد من الانحطاط مالتهم وعدم احترام الله،
شفتها كاعده ومخليه رجل على رجل طبعاً هن بالبيت حجاب ماكو، لابسة برمودا ورجليها طالعه وصدرها نصه مبين والشعر مفتوح، ومخليه مكياج ومعليه صوت الطرب،
رحت يمها بغضب وسحبت الريموت ودرت القناة على القرآن، كامت بعصبيه ورادت تضربني اجاها كف مفاجئ من عندي خلاها مصدومه، عيونها غرغرت وحجت بغضب.
رولين: حقيره شلون تتجرأين وتضربيني، اني اعلمج والله راح اشكيج لزوجج يعيد تربيتج اذا اهلج جانوا ممربيج، اني اعلمج ****.
ضحكت بوجهه وحجيت بستفزاز.
ايريم: ليش قابل خاتلين بيه يم الدرج بنصاص الليالي؟!
نشعلت ونطفت واني فرحانه على حرك اعصابها.
رولين: شخبصتيني بالختله؟!
جان زوجي لو هم حراممم ابوسة ابيتي!!!
رفعت حاجبي الها وحجيت بتساؤل.
ايريم: ليش ماعدكم غرفه؟!
وبعدين منو كال هذا بيتج!!
اللي اعرفه هذا المكان اللي كاعده بيه هسه هو بيت زوجي وبما انو اني مرته فأني اللي اقرر شنو نسمع وبأي وقت وانتِ متكدرين تحجين.
التفتت على صوتها لكيتها متخصره وتحجي بغضب يا أخي منظرهن بهذا الشكل يخليني مستمتعه لأبعد حد.
تالين: طلع للحيه السان وراح تبرز انيابها علينه.
ايريم: اي وراح تلدغج فأخذي حذرج منها متعرفين سهام الغدر منين تجي بعدين.
تالين: والله وكت النايمات للظهاري صارن أمهات بيوت ويتحكمن بينه، لا ونوب يهددن، متدرين والرب الخلقج العب بيج لعب ومحد يكدر يحجي ويايه حرف واعلمج تالين منو.
اجيت احجي نزل هوه من الدرج، رفعلها حاجبه وحجه مستهزء.
مهيائيل: اي تونه شبيج تكمزين معقوله لبسج جني بهل ليل وين نوديج بله وزوجج بحح ماكو لبست عليه التهمه واكلها مدبسه وراح ينحكم للأسف الشديد.
تالين: هسه يطلعوا خواني بكفاله وغصباً على راسك يجي وينور بيته مره ثانيه ومتكدر تحجي حرف واحد، اذا ما اخليها عشاير واشتكي عليك ما اطلع بنت ابوي.
كعد على القنفه وخله رجل على رجل ابتسم بوجهه وكال بتساؤل.
مهيائيل: ومنو كال انتِ بنت ابوج؟!
وبعدين ياعشيرة هاي ملفيه بس ***** ودافع عنهن!!!
عرفيني عليها، اعرف جماعة زوجج المصون كلهن نفس الطبقة وحقوقهن ماكوله للأسف الشديد، لو له له له، عندي مقترح مفيد اكثر وهو نسوي نقابة خاصه بيجن وحتى تصير حمايه قانونيه لهيج نوع وحقوقجن بالحفظ والصون.
تالين: سود الله وجهك ماتحترم حسبة امك اني شنو من أخلاق عندك وتحجي ويايه بهذا الأسلوب؟!
مهيائيل: اخلاقي وراثه منكم، وبالنسبه لأمي انتِ انكس من انو توصلين لنعالها، اسمها طاهر يتلوث من تلفظيه بالسانج القذر.
تالين: يطلع قابل يبقى مسجون ويجي ياخذ حقي منك بسيطه.
عافته وراحت وهو صاح بيها بصوت عالي.
مهيائيل: عود سلميلي عليه اذا شفتي، شوفتها تسد النفس وحده ملعونه.
بقت على مكانها واكفه شمعة فكر وعيونها حمر دم تباوع لمهيائيل بنظرات غريبه كلبي لعب شنو عدها وياه؟!
من شفتها هيج متحملت وحجيت.
ايريم: وانتِ هم ليش واكفه هنا مره وزوجها كاعدين مع بعض عيب تعكرين مزاجهم.
صرخت بوجهي بغضب حسيتها منتظره فرصه وتجي تهجم عليه.
رولين: وانتِ شدخلج وين اروح وين اجي، بكيفي، ماعندج سلطه عليه، وإذا انتوا دورون خصوصيات روحوا لغرفتكم شعدكم نازلين بنص الصاله يمنه؟
سبقني وكال.
مهيائيل: مثلج ليش دورين ختلات جوه الدرج غرفتج موجوده؟!
رولين: صدك متستحون تحجوها هيج بوجهي بدون خجل.
مهيائيل: من تخجلين احنه نخجل، صاير عدنا نقص بالأخلاق بلكي دزين وياج دلفري.
ضحكت عليها شلون صارت عصبيه وصعدت فوك، وجودهن مغثه، اخذت نفس وصفنت على نفسي هاي ليش هيج سويت مجانت النيه أتجاوز على وحده بيهن فززني من تفكيري وهو يكول.
مهيائيل: اليوم مكدرت اروح للجامعه باجر بلكي يصير عندي مجال وإذا ملحكت اخذج انتِ ترحين، وبالنسبة لأهلج وره العشا اخذج الهم.
ايريم: ان شاءالله.
مهيائيل: بيج شي؟
ايريم: لا ليش؟
مهيائيل: ماعرف حسيت، سولفي اسمعج، صاير شي وياج مخليج هيج ضايجه؟
ايريم: وضعكم معاجبني لهذا السبب.
مهيائيل: أي وضع منهن تقصدين؟
ايريم: وضع الأغاني وعدم احترام رب العالمين، مامعقوله بوقت الصلاة تنعلك وصوتها يوصل لسابع جار، ميصير هيج انتم مسلمين متخافون من الله، آمنت بالله شغلكم سحر وشعوذه بس مو تكفرون بي لهاي الدرجه، حولوا دينكم اذا هيج، الإسلام مامتوقف عليكم.
تركته وطلعت، خلص هذا الوقت بصعوبه بس ردت اطلع من البيت وروح يم اهلي، صار يومين اني هنا احسهن سنتين من كد ممخنوكه من عائلتهم، بس مهيائيل وترانيم ارتاح بوجودهم والأخ ميجي طول اليوم بس كم ساعة وترانيم مخلصتها بغرفتها تجي يمي شويه وتروح،
لبست حجابي والعباية ونزلت لكيته منتظرني بالصالة، زعلت من عنده بدون سبب منطقي وهذا اللي مخبلني ليش اني هيج ماعرف،
صعدت بالسياره يمه وشغل اغنيه ذبي العباية اجتي من الله واني منا ضايجه ومقهوره صرخت بي.
ايريم: حرام، حرام، على شنو يوم القيامة يذبون بأذني رصاص مصهور، منو يستاهل ونعذب نفسنه علموده هيج؟!
الأغاني لذتها دقايق بعدها العواقب لاتحمد عقباها، هسه متصلي و متصوم انت وربك مالي دخل بس اذا جان ذنب اتحمله وياك هنا لاا مستحيل اقبل، طفيها واذا تريد خلي هيتفون واسمع وحدك لتاخذ ذنبي وياك.
التفتلي بأبتسامه وكال برودة اعصاب.
مهيائيل: كُل شي منج حلو حتى الذنب.
فورلي دمي حيل مكدرت احجي شي وماعرف منين يطفون المسجل بالسياره، درت وجهي للجامه ودموعي تنزل يعني إلى أي درجه توصل الحقاره بعد، هو يعرفني عدل اني مره اصلي وصوم وما اسمع اغاني صحيح جان يشغلها من ياخذني من البيت بس بذلك الوقت علاقتي بيه مو قويه مثل هسه واستحي احجي كلمة ومو بس اني وياه وما أكدر اخجله كدامهم هسه يكولون متحترمه وتريد تسيطر عليه وتثبت نفسها قبل ميزوجون حتى،
اخذت نفس عميق تحول لشهكه وهو من سمعني هيج بس غيرها لقصيدة مالت باسم الكربلائي.
لا تـرد ما ظل أثر كلشي إنتهه إبسفركم
لا تـرد مـات الورد من إنقطع خبركم
كـتـبـت إعله دارك...دمعة إنتظارك
هاي القصيدة حيل تأثر بيه ومن اسمعها لسبب وبدونه تنزل دموعي وهسه اني بوضع سيء صار اسوء بفضله، بقيت ابجي حتى راسي حسيته راح ينفجر، مسحت دموعي من خلصت انتبهت احنه وين، مو يم البيت أبد، درت وجهي اله وحجيت بتساؤل.
ايريم: وين ماخذني؟
جاوبني وعينه على الطريق.
مهيائيل: اخطفج.
ايريم: هذا مو طريق بيت اهلي وين رايحين؟
مهيائيل: مو كلت اخطفج.
ايريم: تضحك عليه انت؟!
مهيائيل: له له له، ليش اضحك عليج، وضعج معاجبني، شفتج خلال هاي اليومين هوايه متغيرة حبيت اغيرلج جو لا أكثر وين المشكلة؟!
ايريم: تعرف عدل وضعي هذا بسبب اهلك، اذا تريد نعيش بسلام لتخلينا عايشين وياهم.
مهيائيل: اصححلج، مو اهلي بالإضافة ماكدر اتركهم وحدهم لإن ما اضمن سلامت البيت ولا اللي بي.
ايريم: انت تكول مو اهلك ليش تهمك سلامتهم؟!
مهيائيل: يحتاج اشرح هوايه حتى تفهمين كلامي، بس مو مشكله ارجع اعيد، رائف وياسيم هم من ضمن العائلة وذولي الثنين مهمين حيل بالنسبة إليه، وبعيد عن هذا اكو حيايه ثنين يقودن بعران ثنين لازم اتخلص منهم وبهيج ماكدر اطلع من البيت.
ايريم: واني مالي علاقه بانتقامك، أو حمايتك، نيتك متهمني بكد ميهمني سلامي الداخلي وراحتي النفسية والجسديه، ما مجبره اعيش بيت تمليه الشياطين بس لأن اني زوجتك، البارحه جابت شخص غريب وختلته جوه الدرج وانتوا مسويتوا شي وياها، الله اعلم باجر شنو جيبلي من مصيبة، انت ماخذ الأمور ابساطه واني اشوفها جريمة كبيره لازم تتعاقب عليها.
وقف السياره التفتلي وكال بنبرة عميقه حيل.
مهيائيل: ومنو كلج اني ماعرف؟
اني اسمع بالأبرة من توكع بنص القش واندل مكانها هم، متعبر عليه سالفه بسيطة مثل هاي، سامعه المثل اللي يكول، "يفوت المي من جواه"، اني اللي يحفر واني اللي يعرف من يامكان ينبع النهر ومحدد موقعه، بس منطي فرصه ومهله ونكشف الأسرار ونوكع الحصن وكُل واحد ياخذ عقابه فخلي راسج بارد ورتاحي محد يكدر يضرج بسوء واني عايش.
ايريم: شنو منتظر لعد اذا عندك ادله عليهم كلهم؟
مهيائيل: بعد ماكو شي مُكتمل نحتاج شوية وقت بعد.
ايريم: ولازم اتحمل هيج حياة؟
مهيائيل: بما أنو انتِ مرتي اكيد.
سكتت عنه ميفيد الكلام مبين، سمعت صوت جداحه درت وجهي اله لكيته مخلي الجكاره بحلكه ويدخن، فتحت الجامه اللي يمي وبقيت اشم هو نظيف، الهوه حار بس احسن من ريحة الدخان، كُل شغلة تمنيت ابقى بعيده عنها اجت بوجهي فجأة،
جانت ابسط أحلامي زوجي عالم دين، لو رادود على الحسين عليه السلام، أو على الأقل شخص يعرف الله منو، قدري وكعني بعائلة متحترم الدين ولا الإسلام ولا حتى الأنبياء والائمة مستهزئين، عاصين، حياتي وياهم ذنب حتى التوبه ما إلها،
اختبار صعب وخايفه لا اخسر الامتحان الرباني بالنهاية،
نزل يم سوبرماركت دقايق ورجع بيده عصير وايس كريم خلاهم يمي، جنت ميته حر واجن بوقتهن، ازعل على كُل شي الا المعده الها حق علينه ولازم نوفيه،
لاف السياره ورجع والمخطط مالت اهلي نلغه بالكامل، رجعني للبيت ونزلت بوجهي للغرفه، دخلت للحمام خلصت روتيني اليومي وطفيت الاضويه ونمت، وكُل هذا هو مأجه،
مرت فتره ماعرف شكد حسيت على ثكل بصابيعي فتحت عيوني بفزه عبالي دوده لو أي شي ثاني من لزمته طلع محبس شغل الكلوب واجه يمي باوعت عليه بتمعن تصميمه مبهر ولونه احمر، بي طاقه عجيبة حسيت براحه واني لابسته،
رفعت راسي اله وحجيت بتساؤل.
ايريم: شنو هذا؟
مهيائيل: خاتم من حجر العقيق، بي طاقه تحصينيه، لتنزعي ابدد، يحميج هذا من الشياطين والحسد والسحر، حافظي عليه.
بتسمت بوجهه وحجيت بلطافه لان زودتها عليه اليوم وهو اصلاً ماله ذنب بس اني ماعرف شبيه.
ايريم: شكراً أو اسفه بنفس الوقت.
مهيائيل: ميحتاج تشكريني ولا تعتذرين هم، اعرف من حقج تضوجين اني لو بمكانج كسرت البيت بأكمله ومبقيت لحظه اهنا بس الظروف احياناً تجبر الأنسان على تقبل أشياء هو ميريدها من الأساس،
اللي يكلج تحملي وتقبلي الوضع هذا الشخص ميريدج تتقدمين خطوه للأمام، لتاخذين نصيحة احد حياته هو مكدر يمشيها عدل، وبالنسبه لعلاقتي بيج ميقويها التقارب الجسدي، هذا مجرد شيء غريزي نولد وي الكائنات الحية بأكملها واللي ميكدر يتحكم بنفسه هذا مجرد حيوان لا أكثر، لو جنت اريدج كجسد متزوجتج نهائياً، فلتجبرين نفسج على اي شي ممقتنعه بي،
تفكير النساء الكبار ونظرتهن للرجال وتعميمهن للعقول، قديمة حيل، ومو كل الناس متشابهه، واني واحد منهم، أريد قربج ماصير براسج نبي بس القرب من القلب والروح، من تصيرين تثقين بيه، وتحبيني مو لأن زوجج ونفرض عليج، بس لأن عقلج وكلبج يريدون هيج، من تتقبليني بسيئاتي وتشوفين الجانب المظلم من عندي وتبدين بكامل قواج تنوريه، هنا راح اكول صرنه شخصين بروح وحده، ومحد يكدر يفرقنا حتى لو جان السحر الأسود،
العلاقه الجسديه والغريزة العميه هاي للحيوانات اما الحُب والموده والتفاهم هذا هو الزواج الأصلي الحقيقي اللي اني أريده، حتى نعيش للنهايه بسعادة وراحه،
شايفه تونه والثانيه اللي وياها، شكد تكرهيهن وقارفه منهن، بس لو حبيتيني مراح تتأثرين بيهن اصلاً،
الدين والعبادة ماكو شيطان بالكوكب كله يكدر يمنعج منهن اذا كلبج وعقلج رايدهن وبقوة، اذا ايمانج صح وقوي انتِ اللي تخلين الشياطين تتبرغل على التراب، الأنبياء شلون كدروا يتغلبون عليهم؟
بالعبادة والثقه برب العالمين، هو الحامي والقادر والمنقذ بدونه لاشيء ممكن يصير حتى السحر،
تدرين اغلب الأشخاص اللي يتأثرون بالأعمال هم قليلين عبادة، حتى لو يصلي ويصوم، هاي الأعمال مجرد عادة عند الاغلب قله الخاشعين ويدورون مرضاة الله من صدك مو مجرد واجب يخلصه ويكوم، لو بس يسلم وركض يريد يشرد من أيدي الرحمه الربانيه، هذا من اكثر الناس يقودهم الشيطان ويكدر يسيطر عليهم،
راح تتسائلين اني ساحر شدخلني بالصلاه والصوم، جوابي واضح، انتِ متدينه وهاي النصيحه مقدمه بس الج لأن اني اريدج تبقين هيج متتغيرين ابد، حافظي على الدين وزيدي بالعبادة وإذا غلستي عن فرض حتى لو جان مستحب اني اسحبج واكلج كومي صلي.
جان جوابي لكُل كلامه العميق كلمة بسيطة وهي.
ايريم: ليش؟!
مهيائيل: "لأن قلب الساحر انسحر بطريقة مميزه جداً"
بقيت صافنه بعيونه منطيت اي رد فعل، هسه اعتبر هاي الجمله اعتراف لو شنو؟
كلبي دكاته مليار، وحسيت نفسي شتغلت نار بداخلي، اكو شي داخلي تحرك عيني راحت لغمازته بس هي شكلها حفره بخده والله، تصير من يبتسم لو يسولف، حضني وكال.
مهيائيل: ومثل لف الجگاره عليج حَيل التف.
بادلته الحضن واني الفرحه مسايعتني، كلامة وتوضيحه طلعني من أفكار دمرت نفسيتي، بسبب الحادث والأشياء اللي صارت بعدين، كُل شي منع اعيش وياه وتقبله كأي شخصين مزوجين بشكل عادي، اني مكارهه قربه بنفس الوقت اكو شي يمنعني، مرات اريد اخليه بنص كلبي، مجرد شوفه عيونه تخلي يومي حلو، ومرات اسمه من ينذكر كدامي يخبلني، وهذا الشي من خطبني لحد الأن اعاني من عنده،
خليت راسي على صدره وأيدي بشعره احركها، اخذنه النوم لأحضانه ومرت الأيام اللي وراها بهدوء تمام، جابلي الجدول وبديت امتحن ومرحت لأهلي لأن راحوا يم خالي داخل مستشفى، امي جابتلي المحاضرات وبديت أقره، استاج طلعت نتائجها ونجحت وانتقلت لمرحله ثانيه فرحتلها حيل بس خفت عليها هم بسبب رائف وبعده كلبي يلعب منه لأبعد حد،
اليوم اول يوم امتحان وصلني مهيائيل للجامعة نزلت ورحت للقاعه علمود امتحن، التفتت على صوت واحد يصيحني، فتحت عيوني بصدمه من شفته واكف كدامي ومبتسم رجعني لأيام مردت اذكرها ابدد..
يتبع..
البارت اكثر من 4245 كلمه.
تصويتكم تعليقكم بين الفقرات راووني حماسكم شمعاتي.
اريد انوه لشغله وهاي لأول مره اطرقلها وآخر مره هم، اني من الأساس نوهت القصه، قصة جن وناس بعيدة عن الرب بشكل تام، ف شنو ينكتب هو مو استهزاء بشخص معين ولا اسم معين ولا مرقد ولا نبي ولا أمام، وإنما كُتب لتوصيل فكره لا أكثر، اتحدا واحد يكول اني اهين بقصصي مرجع أو شخصيه معينه، اني احترم الجميع سواء كبار صغار مابالكم بالائمه مفترضين الطاعه، ما أريد ارجع انوه واحجي بالموضوع وي كُل بارت شرحي اهنا يكفي ومع كل الحب والتقدير لقرائي الجميلين المنتظريني بحماس ويشجعوني بكلامهم اللطيف مثلهم،
تصبحون على الف خير وعافيه سُكراتي الجميلات.
اي شي سواء تأخير بالقصه أو تغشوشه قبل البارت راح تلكوها يمي هنا بالانستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!