للتواصل انستا/ zahraaahmedn99
لتنسون التعليق بين الفقرات والتصويت للبارت والمتابعه شمعاتي ❤️
مهيائيل
الكاتبة (زهراء احمد)
___
مهيائيل:
حبني وأخذ شتريد گص واطبخ چلاي
وشتم هَلي العدلين وأعبر لموتاي..
___
رائف: هذا قاسم عم ايريم واكف بالباب وياه ابنه الجبير الواضح عليه مسحور شكله مو طبيعي يريدكم.
كام مهيائيل وميمون راحوله احنه دخلنا للمطبخ وسدينا الباب واني البيه مايخليني نزلت رأسي وباوعتلهم من مكان القفل اشوف شنو الموضوع لأن السالفه ماطول سحوره راح يدخلهم لهنا اكيد.
ميمون: شنو المشكله حجي؟
قاسم: ابني صار فتره مريض وتعبان مايطيق مرته ولا يريد ابنه وحتى البيت مايتحمل يبقى بيه اجه يمي من يصحى ساعات يكول أشوفهم مثل الخنازير ومخابره ميخابرهم مرته شامرها يم اهلها بدون مصرف وهاي حالته أخذته للطبيب يكول مابيه شي حوله لدكتور نفسي هم نفس الحجي خطرت على بالي أنتم شاك بيه جني لو مسواله سحر لان وضعه مو مال مرض.
ميمون: يصلي؟
قاسم: كاطعها صار سنين، والقرآن مايعرفه هو شنو عايش بغير عالم.
مهيائيل: وهاي حالته تروح وترجع لو بس هاي المره؟
قاسم: لا والله بين فتره وفتره تجيه وشكد اخذه وفتر بيه محد واكع على علته، بس يبقى فتره ويرجع طبيعي ويرجع لحياته.
ميمون: اخذه مهيائيل شوف شنو بيه.
مهيائيل: رجال تايب اني ماسوي سحوره بطلت.
قاسم: احلفك بغالي كلبك ساعد ابني اعتبرني مثل ابوك وطلب منك لاتردني واني داك بابك، ماعندي بس الله وأنتم لاتصيرون انتوا والدنيا عليه.
ميمون: عاد هو شلون يحب ابوه، كوم خويه اني وياك نشوف وين مشكلته.
اخذنا للغرفه واجه ابوه وياه، اول مادخل وشفته من الباب عرفت مسواله أكثر من عمل، الواضح وحدها تشرب والثاني تكلب وطيحن حظه، فتحت ايده ك شي روتيني كدامه بس بالواقع اني اعرف بدون هاي السوالف شنو المشكله والعلاج لكن مو بالسهوله اقدم العلاج بعد ما اجت الفرصه ليم رجليه.
مهيائيل: ابنك ياعمي مسواله أكثر من عمل، واحد مشمور بغرفته او اكثر من واحد مشربينه اله، وسحر مشمور بالباب مال بيته، ومسويله توقيف حال وقطع رزق وين مايروح يشوف الدنيا سوده مصخمه وكل شي بالكون ضده.
قاسم: اي والله صحيح، زين ماتعرف العلاج شنو؟
مهيائيل: صعب علاجه حيل ويمكن مانكدر عليه.
ميمون: صحيح كلامه هيج حالات تستعسر يمنه.
قاسم: اي شي تطلبونه حاضر اهم شي عندي يطيب وترجع صحته ويشوف بيته.
مهيائيل: لازم تجي أمه.
قاسم: وامه شنو دخلها؟
مهيائيل: هي تعرف الشخص المسويله سحر.
قاسم: مستحيل هي ماتعرف بهاي الأمور.
مهيائيل: اذا ماصدكني مشكلتك اللي عندي كلته مرتك تعرف بلي سوه السحر واصلاً هي مشربته.
بقى الرجال مصدوم وجه كام ينطي ألوان مايعرف شنو يكول بس مع هذا ماشكك عاف ابنه كاعد وكام كايل.
قاسم: دقايق وجيبها بس ياريت تساعده بين ما اجي.
ميمون: من عيونه حجي راح نسوي اللي نكدر عليه حتى توصل.
طلع درت وجهي إله: شنو بعقلك؟
مهيائيل: أفضح سوالفها كدامه واخرب بيتها مثل مسوت وي ايريم.
ميمون: عندي فكره احسن.
مهيائيل: شنو؟
ميمون: عمتها تعرف بكل سوالف امها وبينهن عداوه تكدر تستخدمها ورقة رابحه لعلاج إبنها.
مهيائيل: راح اطلع انتظرهم وانت ابدي بفتح السحر.
ميمون: استخدم المحبس ماوصيك.
مهيائيل: هذا رفيق الدرب أكدر استغني عنه.
طلعت من الغرفه ورحت للمطبخ من فتحته لكيتهن مصطفات وحده وره الثانيه بس ايريم لازمه تفاحه وكاعده على الكرسي تاكل بيها، فكرت هاي الشغله راح تفيد هوايه لو حجتها كدامها ممكن استفيد وترجع ذاكرتها.
ترانيم: وين صافن؟
مهيائيل: البسي عباتج وجيبي ايريم وياج للصالة.
ترانيم: واحد جاي يخطبني؟
مهيائيل: ومستعجل الا يشوفج هسه حضري نفسج بعد مايكدر ينتظر كاتل روحه عليج.
ترانيم: السالفه بيها عرس خمس دقايق تلكاني جاهزه ادلل.
صعدت جبت عباتي وعدلت شالي ولبستها شالها وأخذتها وياي للصالة و زُموردة صعدت يم رائف فوك ماعدهم اهتمام لهيج أمور، كعدت بصفها ومهيائيل يفتر ماخذها عرض بطول سطرني دقايق وندك الباب دخل عمها وياه مره جبيرة اول مصارت عينها على ايريم خزرتها وهجمت عليها تريد تضربها وكف مهيائيل بوجهه واجه زوجها لزمها ساحبها اله والسانها السان ****** ماسكت بس يغلط.
راضيه: هاي الحقيره هي السبب، بسببها راح يموت إبني الله لا يوفقج ام الزلم طالعه على امج بواكت الرجولة، الله ياخذج مثل ما أخذها ياساقطه يا ادبسزززز.
لزمت أيدي باوعتلها الدمعه بعينها وكالت بشهكه.
ايريم: خاله هاي المره شبيها ليش تغلط على امي وتدعي عليه؟
سمعها مهيائيل صارت عيونه حمر صاح بصوت عالي.
مهيائيل: ميمووووون.
طلع من الغرفه بسرعه باوعله مأشرله على الباب.
مهيائيل: ماعدنا علاج لابن هاي الساقطه الحقيره ام السحوره، اشمرهم بره بيتي واني اعلمج شلون تهجمين على حرمتي بنص بيتها تردين تخبليها، اذا ماخليتج تمشين بالشارع بدون هدوم فلا اسمي مهيائيل.
عافها واجه لزم ايده يتوسل بيه كسرلي خاطري شلون رجال حباب وخير ومزوج وحده شيطانه ابليس يتعلم منها العهاره.
قاسم: الله يخليك هاي ايدك ابوسها شنو تريد اسويلك بس كل شي ولا إبني اعاين على الله وعليه لاتلجمني بيه والله ما اتحمل خسارتهم همه بس ثنينن عندي.
مهيائيل: مرتك شنو سوت بمرتي؟
قاسم: والله العظيم ماعرف هسه انصدمت منك من كتلي هي مسويه لبنها سحر، هي من يوم يومها تكره بيت اخوي وكلت بسبب النسوان تصير مشاكل عادي عزلنه وفرحت هاي هي خلصنه مع هذا مارتاحيت يوميه جايه تشكي منها، وماتت وبقت مجلبه بسيرة ايريم حتى من مات اخوي رادت تاخذها هي تربيها بس سنمار بدون ماندري رايح ومسجلها بأسمه، هاي هي كدامك وسوي بيها اللي تريده ماطولها لاعبه بحياة ابني هيج مالي علاقه بيها بعد وماتبقى على ذمتي دقيقه طلعتها منا لبيت اهلها وبدون رجعه.
مهيائيل: تستاهل وهذا اقل شي ممكن تسويه الها، هيج شيطانه ما تستحق واحد يخليها ابيته، بس قبلها اريد افتهم شنو مشكلتج وي ايريم ليش تكرهينها لهاي الدرجه؟
راضيه: لا تعتبر كلامي هذا خوف منك ولعلمك حتى مُرتجى مايهمني سواء خلص من السحر لو لا يبقى مو ابني الحقيقي وابن مرته الأولى الماتت محتركه بسبب ظلمه،
قبل أربعين سنه وحالي حال اي وحده ماشايفه وشافت حبيت جوارينه وتعلقت بيه حيل وصارت وربك اجوا اهل محبوبي وخطبوني واني مكيفه واخيراً حلمي راح يتحقق وحضر وبدل وفكر وانصدم بيوم العقد المعرس اخو مو هو، اخو المزوج وعنده ولد عمره سنتين، رادني اصير مربيه وجان يكرهني بداية عرسنا ومشاكل يابو مشاكل كلما يشوفني يصيحني بأسمها الواضح جان عاشكها قبل وماكدر ينساها واني عيني على اخوه يطلع ويطب كدام عيني وكلبي يحترك وماكدر احجي شي ابلع وسكت، وحبه بكلبي غصب يوم عن يوم يكبر بقيت ادعي الله يموت زوجي الظالم وتزوجه، إلا أن عشك وحده وياه بالجامعة وخطبها واني رحت وياه وشفتها وبقيت اطحن بداخلي من اشوف نظراته واهتمامه بيها واني محد معبرني لا اللي حبيته ولا زوجي،
تزوجوا وبعدها كلت اي اخلص منها بس بيا طريقه ماعرف، كمت اخلق مشاكل وتعارك وسويتلها مصايب يابو مصايب وكل هذا ما فاد بكلمه وحده منه تنسى الأول والتالي ويصيرون أنعم من الحرير واني كلبي مشعوط من جوه ومحد يحس، تطلع وطب وتشتغل وداوم والهداية أشكال تجيها من رضا وانا أيدي على خدي لا حنيس ولا ونيس ومحد ذاكرني بجكليته، جوارينه جانت وحده ملعبه تعرف بهاي السوالف طلبت منها تسويلي سحر وفرقهم وسوت بس ميطول يوم يومين ويبطل، تعبت ومليت وهي صارت حامل وخلفت ايريم زادت حركتي أكثر وزادت مصايبي متحمل وعزل بيها، عبالك لهنا وعفتهم؟
لا بقيت اسوي اسوي لحد آخر واحد جان القاتل الها بسببه صار عدها سرطان بالمعده وطلعها لإيران علمود العلاج ومفادها شي وماتت، حزن عليها شكد ونقهر واني اشوف دموعه على جنازتها وحسدها حتى وهي ميته، وراها ماطول سنه ونقتل بزمن الطائفيه جان اكو وأحد يكرهه من الصوب الثاني هجم على بيته وضربه طلقه بالكاتم،
تدري ليش ردت اربيها؟
لأن البيت مسجل بأسم ابوها ردته يصير حلالي بس عمها استغل الفرصه وراح اخذها وسجلها بأسمه مزور الأوراق واخذه وهسه كاعدين بيه هذا السبب الوحيد المخليهم يركضون وراها والا منو يحب بنيه ويخاف عليها يخليها تطلع المغرب تركض واكو باب مقفول يكدر يمنعها؟
من هاي القصه كلها ايريم بس هي الوحيده العانت، وإذا تسأل ليش عمتها تريدها وكاتله نفسها عليها فالجواب واضح تخاف تنفضح سيرتهم ويرحون للسجن، وإذا تشكك بكلامي وتكول خلوها تدرس ومحد أذاها فهذا بتهديد أبيل الهم والدليل شلون اول ماخطبت وافقوا عليك، اما هسه وخوفهم عليها يردون يخلوها بصفهم حتى ميضيعون.
مهيائيل: وانا راح اضيعج وضيعهم والعن والديكم كلكم ادبسزيه، كلامج وسوالفج باجر كلها يم الشرطه ومثل ماسجنت القبلج اسجنج انتِ، بحياتي كلها شفت شكد ناس حقراء بس مثلج عمري كله ماشفت.
نزع العكال وطاح بيها كتل وين اليوجعك حسيت مي بارد نزل على كلبي واخيراً رجلها طلع بيه خير، بشنو من بيت وعائلة عاشت هاي المسكينه!!
درت وجهي الها شفتها ترجف وخدودها صاروا حمر مبين ختنكت صحت بمهيائيل الواكف ويباوع عليها شلون تنكتل بتشفي.
ترانيم: مهيائيل ايريم مدري شبيها.
اجاها يركض مفزوع وهي صارت سعفه بنص ريح مخليه اديها على راسها وكلها ترجف لزمتها اني وهو نثبتها وهي ولا كأن ابد ماهدأت بالعكس تزيد ماتنقص كلبي وكع عليها من الخوف ومهيائيل بس يهدي بيها مايعرف شنو يسوي.
مهيائيل: اششش، اششش، بس اثبتي ماكو شي والله ليش هيج ترجفينننن، رائففففففف هذا النعال وينه؟
نزل يركض وراه زُمردة اول مشافتها حجت.
زُمردة: مهيائيل صار عدها نهيار عصبي وديها للمستشفى بساعع.
طلع رائف شغل السيارة ومهيائيل شالها واني رحت وياهم مخلي راسها على صدره وحاضنها بأديه الثنين شويه والبنيه راح صوتها طفر من مكانه يصيح.
مهيائيل: تسوقققق على بيضضض مكسررر ما تمشييييي سريعععع ماتشوف شنوووو صار بيهااا من تموت يلا توصللل!!
رائف: شسوي إذا الطريق هو هيج تريدني اطير فوك السيارات يعني.
مهيائيل: هو انا صوجي جبتك وياي طاح حظك اي والله واحد ارعن ماتفتهم.
رائف: انعم الله عليك فوك ماجاي اوصل مرتك.
مهيائيل: انجب وسكت مان عليه، تخلص وحده نوكع بالثانيه اني وياج بعمرنا كله مامكتوب نرتاح ساعة السوده الشفتج بيها ودمرتج هيج لو اعرف يصير بيج اللي صار هسه وحق ربج الخلقج ماخليتج تسمعين اي شي،
ايرو تسمعيني حبيبي؟ باباتي، بنيتي الحلوه اصيرلج رضا وعم رضا وابوه هم بس فتحي عيونج وجاوبيني مو دمرتي حال دمار ولعبتي بكلبي لعب.
ترانيم: صلِ على نبيك وهدي ميصير تسوي بروحك هيج ان شاء الله فتره بسيطه وتعدي لتخاف عليها.
مهيائيل: تعدي بس كولي شلون راح تعدي وانا اشوفها هيج تذبل كدامي ومابيدي اسويلها شي، عود هذا كله وهي ناسيه من تذكر وتعرف اهلها اللي تحبهم وكبرت بحضنهم هيج مسوين بيها شيصير بحالها؟
ترانيم: لكل حادث حديث، لتخلينا نستبق الزمن، كل شي بوقته حلو،
وصلنا للمستشفى ودخلها شايلها على صدره، آمانة موسى ابن جعفر تعدي على خير وترد ويانه للبيت سالمه،
هاي المستشفى حفظت شكولنا يوميه جايبها لهنا، طول عمرها معلعله وما شافت راحه الله يساعدها ويخلصها من هل هم، شويه وطلع الدكتور.
:اني نبهتك تخليها بعيده عن الضغط العصبي ولتضغط على دماغها هوايه هاي المره عدت سلامات المره الجايه ما اضمن شنو يصير لهذا نصيحه مني خليها تتذكر براحتها لتحجون شي يمها، طلعها ونسها مشيها بس لتذكر الأشياء الموزينه الصارت وياها هذا كلش يأذيها ويدمرها بعدين وممكن متتحمل ويصير بيها جلطه.
ترانيم: عزه بعيني اسم الله الرحمن.
مهيائيل: هسه هي صارت زينه؟
:ضربتها مهدء من تفتح عيونها ممكن تشوف بعض الآثار عليها متحجي وممكن تنعزل وتبقى هاي الأمور تفكر بيها بعقلها وتضغط على نفسها حتى تذكر وبهاي الحاله لازم طلعها من الجو الكئيب نصيحه اخذها لمكان بيه ذكريات حلوه خليها تستعيد نشاطها وتطلع من الروتين، صحيح هي فاقده الذاكره بس هذا من العقل الواعي اما العقل الباطن كل شي يذكر ويحس ويعرف، خلي عقلها يرتاح وعيد يمها السوالف التحبها بهاي الطريقه راح تساعدها تستعيد النسته لكن براحه بدون ضغط وهم تغيرون جو.
سمعت كلامه وقررت اخذها بس هاي المره اريد اوديها للزيارة وفر بيها مقدسات العراق كلها نسوي جوله سياحية بالبلد، دخلت يمها للغرفه نايمه بهدوء رحت كعدت بصفها وعيني تتنقل بملامحها، شكد صارت بينه مشاكل وشكد عشنا لحظات حلوه لا اني فكرت يجي يوم وعوفها ولا هي هم، الحب مو بالشعور اللي تحسه ناحية محبوبك لا هو باللحظات اللي تعيشها وياه وتتمناها ماتنتهي، واني حبيتها لبرائتها وهدوئها وتفهمها وعقلها الرزين، أو يمكن لثكلها وادبها وحشمتها، ويمكن للطافة كلبها وحنيته اللي تشبه حنية الأم،
عليت صوتي وبديت احجي وياها واني لازم ايدها بين أديه: ماعرف شنو السبب اللي خلاني احبج يامفتاح كلبي وقُفلة، بس بالنهاية حبيتج ومن أعماق كلبي هم لدرجه ماريد تمر لحظه عليه واني بعيد بيها عنج، قررت اتوب وبدي صفحه جديده من حياتي بس حتى اكون وياج دنيا وآخره، حبيتج لدرجة ادعي ربي بكل صلاه تكون خاتمتنا سوه واحنه شياب ولازمين أدين بعض ومخليه راسج على صدري ويجي عزرائيل ياخذ امانتي وبآخر دكة كلب تسمعيها تباوعين للباب وتشوفيني واكف مبتسم تكومين من مكانج وتجين تلزمين أيدي ونروح من هذا العالم واحنه حاضنين أدين بعض، انتِ الحسنه اللي ادعي ربي يرزقني اياها بكل وقت، دوه روحي وسالفتي الماريدها تنتهي والما امل منها.
فتحت عيونها قابلت سوداويتي بنيتها تذكرت مقوله قريتها نزلت على عيونها قبلتهم وكلتها: اني مو من عشاق القهوه بس كلبي نسلب من شاف "البُندقَ المَطحونَ في عَينيكِ"
صفنت بوجهي حسيت بيها تذكرت شي رفعت ايدها ولامست ايدها الدافيه وجنتي وكالت بصوت هادئ خطف روحي من جسمي.
ايريم: مهيائيل شايفتك اني من قبل؟
أشرت براسي مبتسم بوجهه.
مهيائيل: شايفتني وشابعه مني شوف، شنو تذكرتي شي؟
ايريم: ذلك اليوم وانت تضفر بشعري وتسولف خطر على بالي سؤال نسيت اكوله وغفيت بدون ماحس بس هسه تذكرته، كبرت حيل وكلما اشوف نفسي بالمرايه اعرف مر على موت بابا سنين طويله يمكن بديت استوعب التغيرات اللي صارت وستوعبت هم ذاكرتي الفقدتها، مكدرت احجي شي لأن أني بداخلي مامقتنعه بلي صار شلون صار وشنو السبب، بيت عمي جنت اروح يمهم كل أسبوع وي بابا بس أبيل جان يجي يوميه يمنه يلعب وياي وياخذني يوميه للمدرسة لأن ابويه يروح للشغل، ومره سمعت عمتي واني عدهم تحجي عليه لأن مخلص وقته ويايه ومن عدها بطلت ماروح الهم بس مطولت فتره طويله ومات ابوي،
ذلك اليوم من كتلي ابوج اجاج بالليل جنت تجذب عليه اعرف هو هم جان يحجي هيج من ماتت أمي، ولليوم ما اجتني لا هي ولا هو.
مهيائيل: اني وانتِ نفس الشي ثنينه اهلنه ميتين فخلي اصير اني اهلج وانتِ صيري اهلي.
ايريم: واذا ماتذكرتك؟
مهيائيل: نصنع ذكريات جديده، المهم وجودج بحياتي وقربج مني هذا يكفيني وزياده.
ايريم: ليش كلبي يدك سريع هسه مريضه؟
ابتسمت ساحبها لصدري.
مهيائيل: مريضه وهذا المرض الوحيد اللي ادعي ربي يزيده ويبقيه ومايشافيج منه ابد.
كرصتني بزندي الواضح ارنوبي بده يذكر بدوم ميحس وهذا الشي زاد سعادتي أضعاف مضاعفة.
ايريم: واحد خبيث ليش تدعي عليههه!!
مهيائيل: الحب ياعيوني الحب مرض الحب هذا، قابل يصيبني ومايصيبج مايصير.
ايريم: انت هم كلبك يدك سريع؟
وخرتها عن حضني ماخذ ايدها مخليها على كلبي.
مهيائيل: سامعته شنو يكول؟
ايريم: بس يدك، لتضحك عليه بهاي السوالف الكلب مابيه صوت.
مهيائيل: منو كال مابيه؟ اساس الصوت هو من الكلب، عقلج نساني بس كلبج يذكرني وحافظني مو كافي هيج؟
غمضي عيونج وسمعي بروحج صوت كلبي يروحي.
غمضت عقدت حاجبها وكالت بتساؤل.
ايريم: كلتلي مره يادعاء امي المستجاب؟
مهيائيل: كلتها الف مره وابقى اعيدها ماطول بيه نفس.
فتحت عيونها وصاروا خدودها حمر مبينه خجلت فرحت روحي واني اشوفها تذكر اللي صار بينه وسوالفنه شويه شويه.
ايريم: ماعرف من غمضت سمعتها، سولفلي شلون تعرفت عليك؟
مهيائيل: مجانت ايام حلوه وياريت هذا الجزء ماخليج تذكريه طول العمر.
ايريم: ليش؟
مهيائيل: جنتي اغلب الوقت ضايجه مني وماترديني.
ايريم: هم ليش؟
تقربت منها هامس بأذنها.
مهيائيل: لأن أني خطفتج من نص بيت اهلج وسويتج عروسه للشيطان.
ايريم: يعني انت شيطان؟
مهيائيل: تكدرين تكولين، سابقاً جنت شيطان وي الكل بس هسه تغير الوضع.
ايريم: حتى ويايه؟
مهيائيل: اصير شيطان يم الكل بس يمج ملاك، قوتي تضيع من تصير عينج بعيني شتحجين انتِ.
ايريم: مو حلو الشيطان ماحبه، خليك انسان حباب هيج احله.
مهيائيل: اصير شيطان بس وي اليندك بيج حتى لو ادخل نار جهنم قابل المهم ما اسمح بأذيتج تحت أي ظرف كان.
ايريم: انت تشبه بابا هوايه.
مهيائيل: شلون يعني؟
ايريم: هو هم جان يحجي هيج، دائماً يكلي اني وياج ماعوفج ومنو يكدر يدنالج واني موجود.
مهيائيل: ومحد يكدر يدنالج واني موجود.
ايريم: واذا عفتني ورحت مثله؟
مهيائيل: ماعوفج لآخر نفس بيه والرب الخلقج مريتي.
بتسمت بوجهي وقربت شفايفها من وجهي وباستني بهدوء حركه لطيفه خلتها تخجل حيل دارت وجهه عني وكالت بهمس.
ايريم: اريد انام غطيني.
مهيائيل: نامي حبيبي نوم العافيه.
غطيتها وبقيت يمها لمن غفت وطلعت لكيتها على كعدتها ويمها رائف عفتهم ورحت للدكتور دكيت الباب عليه ودخلت، سحبت الكرسي كعدت مقابيله وبديت احجيله حالتها.
مهيائيل: بدت تستوعب اني زوجها وهي كبرت مو بنيه صغيره هذا بسبب الصدمه لو العلاج دكتور؟
:اني لاحظت اكو تطور ملحوظ بالعلاج ودماغها بده يستعيد عافيته بشكل جيد، بداية تقبلها للمرحله العمريه وبدت تاخذ امر زواجها على محمل الجد وتغير حياتها وعبور مرحله طويله من وفاة اهلها لليوم نكدر نعتبرها ايضاً إشارة جيده لبدايه التذكر، وحسب خبرتي بهذا المجال انو هي راح تستعيد ذاكرتها شويه شويه وهذا افضل متجي الاحداث كلها بعقلها مره وحده، المرحله القادمه مرحله صعبه ياريت تاخذ حذرك وانتباهك ممكن تشوف عليها الابتعاد عن العائله والعزله بسبب الحاله النفسية والحزن، هي ما عاشت فقدان ابوها بشكل كامل لهذا السبب راح ترجع وتعيشها هسه، وبما انو انت زوجها داريها شكد متكدر وبقى يمها، الذاكره لهيج اشخاص ممكن تجي فجأة مثل ما راحت فجأة ويجوز تجي بشكل متقطع لازم تكون مستعد لأي شي يصير.
مهيائيل: انت كلت قبل شويه ترجع بشكل أجزاء.
:المرض يختلف من شخص للثاني حسب الحده والأعراض والمده، كتلك من قبل ماكدر اجزم، تبقى الضروف والصدمات العايشتها الها دور ومهم هم.
مهيائيل: ان شاءالله خير، في حال صار اي شي اتصل بيك، تعبتك ويايه دكتور شكراً الك.
:واجبي هذا.
___
ترانيم: اخوك شماله طلع بدون كلمه وباوعلنه وراح يكول كاتلين ابوه.
رائف: حقه الرجال متعوب.
ترانيم: وانا شرايده منه ياخذني للحج؟
رائف: شبيج يكول عجوز كلما تكبرين تصيرين ممله.
ترانيم: انجب ولك اكبر شنو أمره ثلاثينيه جاده بعدني.
رائف: ادورلج على عريس؟
ترانيم: اي هسه اجه دكتور يطق بالقاع، روح حاجيه وخلي يتقدم واذا كلك شكد المهر كله ابلاش للطيبين كبع وخذ لا وهم مايحتاج يكبع اني مكبعه ولابسه نعالي جاهزه بس امشي وياه.
رائف: بس نحتاج واحد يشهد ويانه بالعقد مو بس اني مايصير.
ترانيم: مهيائيل موجود هو يشهد وياك.
رائف: لا هذا ملتهي.
ترانيم: خابر ميمون.
رائف: اي والله ذكرتيني شلون نسيت اروح اخابره هسه يلعن والديه لأن ماطمنته.
ترانيم: عليمن اطمنه احنه شمفتهمين اصلاً، واخيراً شرف الأخ، شخبارها شكال الدكتور؟
مهيائيل: مابيه حيل احجي.
ترانيم: واني لازم افتح عقلك وافتهم السالفه احجيها وفضني ورتاح بعدين اليسمعك يكول مطلعتك للمسطر.
مهيائيل: ماكله السان طير الساعه نص الليل منيلج خلك؟
ترانيم: نفس خلكك من كعدت تتغزل بيها وتبوس ماخذك الواهس.
باوعلي رافع حاجبه منصدم مني.
مهيائيل: جنتي فاتحه الباب؟!
ترانيم: اي لتباوع هيج صار ساعتين كاعد وناسيني كلت أكيد صار شي وياهم فتحت الباب شويه اطمأن ومن شفتك مايع سديته.
مهيائيل: احلف عليج بلا خجل، منين جايبه هذا الاستهتار مادريي!!!
ترانيم: من ابوك وداعتك وراثه، وهسه حجيلي شبيها؟
مهيائيل: مابيها شي بس بدت تستوعب هي بيا عمر ومزوجه عقلها بده يتعرف عليه شويه شويه والدكتور يكول الذاكره ممكن ترجع صدفه كلها وممكن ترجع بشكل جزئي.
ترانيم: وهسه شنو راح تسوي؟
مهيائيل: خليني اتخلص من عمتها واشوف السالفه وين تصير بعدين اخذها وروح للزيارة.
ترانيم: راح تسجنها؟
مهيائيل: قاتله أكيد تنسجن قابل يصفكولها.
ترانيم: مادري شنو من عالم الله لايوفقهم على هيج خباثه وحقاره دمروا حياة البت علمود بيت الله لايشبعهم بالدنيا والآخرة.
مهيائيل: هوايه هيج مثل عمتها والاسمهم أهلها، الشياطين بريئه من سوالف بعض البشر النجسين.
ترانيم: سالفة ابنها مافهمتها هي شنو تاه عليه الأمر ليش مسحور؟
مهيائيل: تسويله سحوره حتى يطلك مرته ماتحبها وذيج ترجع تسويله سحر ويرجعها ولعبن بيه لعب وبس يكعد ميمون يحجيله هو مايسكت مثلي.
ترانيم: الله لايوفقهن بحق الحبيب المصطفى.
مهيائيل: هو ماموفق متشوفين نهايتهم شلون صارت.
ترانيم: يستاهلن هذا اللي يدمر حياة الناس بدون سبب ربك يمهل ولايهمل.
مهيائيل: والنعم بالله، روحي ارجعي وي رائف واني الصبح اجيب ايريم واجي لتبقين هنا ماكو فايده من كعدتج بعد.
ترانيم: اذا صار شي انطيني خبر.
مهيائيل: ان شاءالله.
طلعت وي رائف راجعه للبيت دخلت للغرفه لكيتها نايمه بنص الكتب ماكعدتها هذا حالها يوميه من ترجع من الدوام لثاني يوم الصبح، تليد سوالها درس وخلاها تشوف أهمية مستقبلها شنو، خليت راسي وغفيت من التعب.
مرت الآيام بهدوء تام على الكل ايريم بدت تستعيد اشياء بسيطة من ذاكرتها و زُمردة دخلت بالشهر التاسع وعلى أبواب ولاده واني اليوم آخر يوم بامتحانات نص السنه، مخليه راسي على الجامه مالت السيارة الجو بارد نهاية الشهر الواحد، مغمضه عيوني وداخله بسبات، الايام المرت جانت تعب بتعب إليه من الدراسه والسهر، وكفت السيارة بداية الفرع فتحت عيوني عبالي اكو عطل باوعتله بالمرايه بدون ما احجي شي هو عرفني بلساني سؤال سبقني كايل.
بتال: اعذريني اذا كلامي راح يكون مفاجئ بس ماكدر اسكت بعد وضم بكلبي اكثر من هيج، الصراحه من اول يوم صعدتي بيه وياي جذبتني اخلاقج وادبج ومايهمني شنو عشتي من قبل اني رايدج وشاريج وحتى امي واهلي عدهم علم بالموضوع ماريد احرجج بالجواب هسه ولا اطالبج بشي اريد منج بس تفكرين بالموضوع عدل طول العطله براحتج ومن تشوفين نفسج مستعده انطيني جواب اجيب اهلي وتقدم رسمي، ما رايد علاقات ولا ادور حب كل اللي اريده حلقتي تصير بأيدج بالحلال.
كلامه طلع من حلكه دخل كلبي وهاي لأول مره اشوفه بغير نظره، اني ما اعرف عنه شي ولا سألت اخواني عليه مجرد خط ياخذني ويوصلني، تيهني وخلاني احتار بس مع هذا ما خليت هيج شعور لحظي يدمر احلامي ومخططاتي فوصله الجواب قبل ما انزل.
ياسيم: اعذرني، اني أخويه لا اريد حب ولا زواج اكمل دراستي وبس وياريت ماتفتح ويايه هيج موضوع بعد.
بتال: ان شاءالله، ماطول هذا رأيج بعد ماراح احجي شي اعتذر اذا حجيت بوقت غير مناسب.
ياسيم: وقتي الغير مناسب، اسفه جداً اذا جرحتك بكلامي بدون قصد، وإذا تريد تعوف الخط ماكو مشكله اكول لمهيائيل يغيره.
بتال: لا ماكو داعي اني موجود ان شاء الله ماعندي شي ابقى اخذج ورجعج على طريقي اصلاً.
وصلني للبيت ونزلت بوجهي للغرفه ماحجيت وي احد شي شمرت نفسي على الجربايه ونزلت دموعي وتذكرت حياتي قبل لو ماسويت شي غلط وبقيت اروح بطريقي وارجع بطريقي جان هسه اني مرحله أولى جامعه واكدر احب وجرب هذا الشعور واعيشه وي شخص يستحقني، لا اخون اهلي بيه ولا نفسي ولا اضيع مستقبلي بهيج سوالف، هسه وبهاي اللحظه ذقت طعم الندم على أصوله من شفت نفسي ماكدر انطي فرصه ثانيه مو بس لنفس الشخص الدمرني وانما للعالم كله عرفت شنو يعني واحد يخون نفسه ويحطمها بأديه، غمضت عيوني بقهر وراسي يريد ينفجر من الألم،
عدلت نفسي كاعده من سمعت صوت الباب يندك، كلت تفضل فتحته ودخلت والابتسامة تزيين محياها، طول هاي الفتره تغيرت هوايه صارت منعزله ومتحجي وي أحد حتى مهيائيل، اربع وعشرين ساعه ضايجه وكلما تشوفها تحس هم داخلها احنه نعرف سببه بس هي لا صح تذكر بعض الأمور بس كلها أشياء بسيطه، وحتى مهيائيل من كلها نروح الزياره نغير جو مقبلت، ماتكعد يم احد ابد ولا تسولف ابتسمت من شفتها واكفه كدامي هسه، اجت كعدت بصفي وخلت ايدها على أيدي وبدت تسولف.
ايريم: الكل معتبرني هنا طفله بعقلي بس اني احس بيج كاعد اشوف داخلج حزين وهذا الشي واضح بنظرات عيونج، اذا حابه أكدر اسمعج وما اكول لأحد.
ياسيم: انتِ مو طفله ومحد يشوفج هيج بس همه يردون صحتج لا أكثر من آخر موقف صار وياج محد يحجي شي كدامج يضوج من حبهم الج صدكيني.
ايريم: عوفج مني احجيلي عنج.
ياسيم: ماكو شي مهم تعبانه من الدراسه لا أكثر.
ايريم: اذا ماتردين تحجين براحتج.
ياسيم: لا ليش بالعكس بس ما اريد ادوخج بمشاكلي.
ايريم: مدوخيني اذا بداخلج شي زاعجج سولفي ترتاحين.
ياسيم: اني مطلقه وقبلها عشت قصه صعبه بس اليوم الحياة بدت تشرق بوجهي مره ثانيه وخايفه اخطي خطوة واندم عليها بعدين مادري شنو اسوي محتاره.
ايريم: سهله، كومي صلي ركعتين لوجه الله تعالى وطلبي منه يريح عقلج ويخليج تمشين بالطريق الصح وهيج الصوره توضح كدامج وماكو شي يحيرج وتكدرين تتخذين قرار.
ياسيم: عمي اني الطفله والله مو انتِ.
ايريم: بابا جان هيج يسوي واني تعلمتها من عنده، جربيها وان شاء الله يتوضح كل شي كدامج ويسهل طريقج.
ياسيم: ان شاءالله اسويها اليوم.
ابتسمت بوجهي رادت تكوم لزمت ايدها: مثل ما سمعتيني اريد اسمعج شنو بيج؟
ايريم: مابيه شي، اصلاً عقلي مايذكر بس أحداث الطفولة.
ياسيم: وهذا اللي مضوجج؟
ايريم: ماكدر اذكر شي عن حياتي وي مهيائيل ومن اشوفه شلون مهتم بيه وبصحتي وحتى بطل يروح للشغل وكل وقته وياي خايف عليه احس بالعجز مقابل حبه ماكدر اقدمله شي، ماعندي ام اسولف وياها ولا عندي أب والمصعب الأمر اكثر كلبي يدكله بس الساني من اوكف يمه ينخرس، ماعرف شنو شعوري ناحيته وما كاعد أفهمه والحل مادري شنو.
ياسيم: احجيله مثل ماحجيتي يمي هسه.
ايريم: ماريد اضوجه، نظراته ماتحملها من يباوعلي.
ياسيم: مهيائيل مثلج ماعنده أم وأب ومو بس هو احنه كلنا نفس الشي.
ايريم: مو اهلي السبب المشكله يمي اني.
ياسيم: افهم قصدج، رافضه القرب موو.
ايريم: ياقرب؟
ياسيم: كأي زوجين طبيعين يعني.
ايريم: ماكو بينه قرب اصلاً وما اعرف اللي تقصدي شنو.
ياسيم: شريف ابن العم، لتفكرين بالأمر هوايه اسمعي مني وحجيله المشكله هو راح يتفهمج اكيد وتنحل سالفتكم.
ايريم: واذا ماتفهم وضاج مني؟
ياسيم: مستحيل، مهيائيل يمج ينسى نفسه ماكو شي يصعب عليج، انتِ بس ابدي والباقي عليه.
ايريم: راح اجرب اذا كدرت، وانتِ كومي غيري ملابسج المله راح يأذن.
طلعت واني كمت غيرت ملابسي وتوضيت وصليت ومن كملت صليت ركعتين لوجه الله وطلبت من عنده يساعدني ويحل مشكلتي ويخلصني من سالفه تليد وينسيني اللي صار حتى أكدر اكمل حياتي بشكل طبيعي، لميت السجادة ونزلت يمهن نجهز غده.
رائف: خويه شمالك مغندب؟
مهيائيل: اطلع ابوك من كبره تره.
ميمون: اتفضل ارتفعت الأعصاب، ضايج الأخ.
رائف: شكو شبيه؟
ميمون: شوف البصفه وانت تفهم.
رائف: حبيبي صاير شي؟
زُمردة: قاطعه الكلام من طلعت من المستشفى لحد الآن معتزله تماماً.
رائف: ليش؟
زُمردة: والله قريت عن حالتها بالنت وفهمت شنو بيها، اعتقد بداية اكتئاب.
ضرب على رجله كايله بصوت عالي.
رائف: لاااا، انا اخوك يمهيائيل، حضر روحك للكبر.
مهيائيل: كبرك ان شاء الله وبصف الوالد حتى اللعنه تجيكم ثنينكم.
رائف: اسم الله الرحمن بعدني بعز شبابي ابني حبيبي بعده ما صار وشفته بيش طالبني؟
مهيائيل: مثل ماطالبها شبيك وياها واحد غبي ارعن مابيك خير.
ميمون: شفت هذا بس حجيت عليها هيج صار بيه صدكني لو تكثر بعد شويه يركعك بالنعال.
مهيائيل: وحق ربكم اذا ماسديتوا هاي السيره اكوم العن ابهاتكم روحي واصله لعيني مو بس خشمي اسكتوا احسن.
ترانيم: داده زوجج شبيه؟
ايريم: مادري.
ترانيم: تعالي وياي فوك اذا ضجتي منا نطلع نسولف شتكولين؟
ايريم: اي احسن ختنكت اني من هذا المكان.
كمنه ثنينه وصعدنا فوك قبل ما ندخل اجه سريع لزمها من ايدها مدخلها الغرفه وقافل الباب...
يتبع..
البارت ٤١٧٣ كلمه..
شوفوني تفاعلكم الحلو شمعاتي..
تصبحون على الف خير وعافية..
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!