للتواصل انستا/zahraaahmedn99
لتنسون التعليق بين الفقرات والتصويت للبارت والمتابعه شمعاتي ❤️
مهيائيل
الكاتبة (زهراء احمد)
_________
ايريم:
شنفضهن نفض شو كلهن التمن
ولا عطوه نطني ولا رضن يهدن
شكثر اسهام كلهن فد وكت هدن
سهم اوداع وسهم اوجاع
وسهم ذاك العزيز الصار جوه الكاع
وسهم عمري وزماني الضاع
وتاليهن العوز الاكل بيه اضلاع
شنفضهن بعد ونيابهن حدن
شاه وبين سبع اذياب شيخلن؟
انه بطرك العضم والدود بيه اكلن
___
مهيائيل: شنو مشكلتج؟ فهميني ليش طول هاي الفتره مبتعده عني الف متر كلما اريد أقرب منج تبعدين وكأن بيه مرض معدي؟
واكف كدامها وعيني عليها تعصر بجفوفها حيل حسيتها راح تمردهم وعينها بالكاع مارفعتها بوجهي، افتهم انو هي تمر بمرحله صعبه بس كلبي شلون يكدر يقتنع كل هذا الجفا وبدون سبب، من اليوم الطلعت بيه من المستشفى لحد الآن عيونها متخليها بعيوني،
قتربت منها لازم ايدها بأيدي ورفعت وجهها باصابيعي جبرتها تباوعلي اريد بأي طريقه ينكسر هذا الحاجز من جانت ماطيقني ماسوت هيج مو بعد هاي الفتره الطويله كلها اسمح ترجع لحالتها قبل زواجنا.
مهيائيل: شنو بيج يروحي، ليش لهاي الدرجه كارهتني ومطيقيني؟
نفت براسها بسرعة كايله.
ايريم: لااا لااا، ليش حتى اكرهك!! الموضوع مو مثل مافاهم شي ثاني.
مهيائيل: شنو هو؟ احجيلي البيج خليني افتهم شصار فجأة ونكلبت حالتج؟
ايريم: المشكله مو بلي صار وانما بالديصير، كلما اريد اتذكرك واحارب عقلي علمود ارجع ولو جزء بسيط من حياتي وياك اكو عائق، اشياء مشوشه لحظات ماكدر اجمعها، اسمع صوتك بأذني وانت تحجي وياي ومرات اشوف أمور ماعرف شلون اوصفها تصير بينه، مثل الخيال يمر بعقلي فجأة مسبب ألم فضيع بداخلي،
اني متفهمه شعورك حيل بس ماكدر اتعرف عليك وعلى الماضي اللي جمعنا، بعقلي هوايه اشياء، عمي وعمتي وابويه اللي نقتل بجريمه ماله ذنب بيها، صحيح جنت صغيره بس واعيه وافتهم وعندي علاقه صداقه وي والدي لدرجه يحجيلي كل شي واعرف أصدقائه واحد واحد، ابويه بعمره كله ماضر احد ولا دخل بذنب أحد وبعيد كل البعد عن الناس خاصه بعد وفاة امي صارت حياته بس اني وشغله،
ياريت تكدر تستوعب اللي امر بيه صحيح وعيت على المرحله العمريه اللي اني بيها هسه بس ماكدر اتعرف عليك بشكل عميق، انطيني وقت حتى اتقبلك كزوج واكدر اتأقلم وي هذا الشعور الكاعد اعيشه.
تحجي وعينها بعيني مازحزحتها نفس القوة والثبات وذات الألم والحسرة، ماعرف شنو اسوي حتى ابعد عن كلبها الحزن وارجع انسيها فترة الطفوله مره ثانيه وماخليها تتعذب بهاي الطريقه،
من اول يوم تزوجتها لهذا اليوم ولا مره شفتها كجسد ايريم شي خاص وعميق بكلبي اعتبرها مثل الوالده تماماً، الكلام اللي تكوله يطلع من حلكها يعبر القفص الصدري ويدخل بكلبي قبل أذني، وماكو شي يمنع اروح ألمها بحضني واطبطب عليها بكل حب هامس بكلمات مواسيه لكن نابعه من الداخل وتأثيرها عميق لأبعد درجه.
مهيائيل: اشيل تعب وهم وحزن الدنيا كله من كلبج وخلي بنص روحي، لتفكرين هوايه وتعبين عقلج اني وياج والعمر طويل ومثل مكدرنه نبني علاقه قويه يمليها الحب والأمان نكدر نرجع من جديد نسوي نفس الشي، حياتي كلها ماراح اعوفج يا قُفلي والمفتاح.
حسيت نفسي ملكت الدنيا واللي بيها من بادلتني الحضن لافه ايدها على ركبتي، داخلي رغبه عارمه اقترب منها اكثر بس كبحتها لخاطر صحتها وشعورها الحالي نحوي ولأن عقلها مامدرك شنو يعني علاقه زوجيه،
لحظات اكثر من رائعه مرت بهدوء مسببه راحه نفسه لقلبي بشكل كبير بعد فتره تعب طويله قطعتها بصوتها الهامس البيه نبره خوف واضحه.
ايريم: يجي يوم تعوفني مثل ما سوه بابا؟
بتعدت عن حضنها ولزمت وجها بكفيني مبتسم الها باعث لكلبها مشاعر اطمئنان حتى اهدي الخوف الموجود والمقري بعيونها بشكل واضح.
مهيائيل: من أول مره خليت بيها عيني عليج قررت مستحيل اتركج بيوم وراح اسجلج بأسمي مدا العمر، حتى لو ربج يصدر قراره بمفارقه روحي الجسد وصعودها يمه راح ابقى احوم حواليج واجيج بكل وقت وسليج وضحك وياج ونكعد نسولف حتى تتعبين وتملين مني.
خلت ايدها على أيدي كايله بنبره يطرب كلبي من يسمعها قبل أذني.
ايريم: بالعكس احب اسمع صوتك ما أمل منك اني، اكو شي داخلي ينولد مثل ميفز واحد من النوم فجأة هيج كلبي يصير بيه من اخلي عيني بعينك، حاسه بوجود رابط قوي وماضي يجمعنا بس هذا شعور قلبي لا أكثر.
مهيائيل: وهذا المهم كلبج منساني.
ايريم: انطيني وقت مهيائيل.
مهيائيل: عمري بأكمله الج يحلوة اللبن.
ايريم: شنو معناة هاي الكلمه؟
مهيائيل: هاي الكلمه مديح للأم واني اعتبرج امتداد الها بحياتي لهذا السبب سميتج هيج اسم.
ايريم: امك شلون ماتت؟
مهيائيل: مريضه.
ايريم: شنو بيها؟
مهيائيل: ذبحه صدريه.
ايريم: هم جنت صغير وقتها؟
مهيائيل: لا سادس اعدادي، بيوم النتائج توفت.
ايريم: امي ماتت بالامتحانات وخلاني بابا يم بيت عمي على اساس راح ياخذها للعلاج، بقيت يمهم اسبوع ويوميه اسأل عمتي تسنيم عليه تكلي مسافرين بس تجي العطله يرجعون وره ماكملت اجاني مرجعني للبيت ودخلتله لأول مره ومابيه امي ولا سمعت صوتها وهي ترحب بيه كالعادة سألته عليها كلي راحت يم أهلها ترتاح تعبانه ومن يشوفني ابجي وماكدر انام لان متعوده على حضنها يقنعني بس انام تجيني ثاني يوم واني اتقشمر بسرعة، وعلى هذا الحال خلصت هاي السنه مجان يقبل أحد يجيب سيرتها يمي ولا يكول ماتت بعد ماترجع، عرفت بهذا الشي من شفته يلزم صورتها بالليل ويكعد يبجي وحده تيقنت ماكو رجعه لأمي ومن هاي الدنيا مابقى عندي غير ابويه، اللي القدر اخذه من يمي بأسرع وقت بدون ماحسب حساب لفقدانه.
مهيائيل: كل واحد بينه عاش قصه مختلفه عن الثاني بس احنه الثنين نحس بنفس الألم لهذا السبب فاهم مشاعرج الحاليه.
ايريم: شفته مقتول والدم مالي جسمه، عيونه مفتوحة وحلكه هم، خليته بحضني وكمت ابجي واحجي وياه اعرفه مات خلص بس عقلي مايريد يستوعب الأمر، طلع يشتريلي من المحل وطول مارجع ردت اشوف شنو صار رحت يم باب البيت لكيته مفتوح فتحته اكثر وشفته واكع، ماكو كلمه أكدر بيها احجي عن كلبي وشعوره، أخير شخص بقالي بهاي الدنيا فقدته بذنب مجهول.
مهيائيل: حقد البشر ماله نهاية، بسببهم ماتوا اهلج وأهلي.
ايريم: جان يكول رب العالمين مايعوف ذنب على أحد، الدنيا دين ولابد يجي يوم وكل شخص ياخذ جزاءه اذا مو بهاي الحياة بالآخرة.
مهيائيل: وهو صادق رب العالمين اخذ جزاء كل واحد اذاج وأذاني.
ايريم: منو تقصد؟
مهيائيل: انسي الموضوع وتعالي نتابع فلم نغير جو، مشتاق نتسامر صار وقت طويل مكاعدين هيج كعده.
لزمت ايدها رفعت عينها اليه بتساؤل كايله.
ايريم: شنو يعني نتسامر؟
مهيائيل: يعني نكعد ونعبر عن حبنه لبعض.
ايريم: ماحبك اني.
مهيائيل: عفيه عليج اطحني مشاعري شهامج انتِ.
ايريم: هههههههههههههه.
ضحكت بصوت عالي هاي اول أمره اشوفها تضحك بيها من طلعت من المستشفى لحد الآن، طرب كلبي واني اعاين على ملامحها المبتسمه، اخذتها بين احضاني وبمكان ميكون مشروع فلم رجعت خلدت وياها ذكرانا، راسها على صدري وايدي تلعب بشعرها ونتسامر.
ايريم: احجيلي عن حياتنا قبل اني وياك.
مهيائيل: مليانه رعب.
رفعت راسها إليه مخليه ايدها مثبته بيها ابتسمت بوجهها مكمل.
مهيائيل: زوجج يحلوه اللبن ساحر سابق واغلب العشنا سوه جان رعب وخوف.
ايريم: يعني أشباح وهاي الأمور؟
مهيائيل: اي شلون عرفتي؟
ايريم: أبويه جان يتابع هيج افلام رعب.
مهيائيل: ويخليج بعمر صغير هيج تشاهدين!!
ايريم: لا من أنام بس اني اروح يمه امشي بهدوء حتى مايسمع الصوت ويكوم يرجعني لفراشي، افتح الباب على كيف وابقى اتفرج بدون ميدري ومره صرخت من الخوف وكام مرعوب من شافني واكفه ورجف وابجي مرتعبه خلاني بحضنه وطفه التلفزيون وبقى يقرالي قرآن حتى نمت من يومها بطل ميشوف شي ابد.
مهيائيل: طلعت السرسره عندج من زمان مو جديده.
ايريم: كاعد تحجي كلمات ما أفهمها، شنو قصدك؟
مهيائيل: شرحها طويل اسمعيها وعبري.
ايريم: و **** شنو؟
مهيائيل: تعني وحده قليلة أدب.
ايريم: شنو تسوي؟
مهيائيل: مثلج هسه وانتِ بحضني بس بدون زواج.
دفعتني وخرت عني مبتعده كايله بصدمه.
ايريم: عززززززااااااااااا شكد عيبب.
مهيائيل: كلش عيب بس انتِ مالج علاقه ارجعي لمكانج حبيبي.
ايريم: لا ميصيرررر، راح اروح انام يم ترانيم لا هسه يكولون عليه ****.
رادت تكوم سحبتها من ايدها مرجعها لنص لحضني كايل بهدوء واني مثبتها بين أديه.
مهيائيل: شحده اللي يكول عليج هيج اكص السانه، افهميني يحلوه كتلج الماتزوجه اني وياج متزوجين.
ايريم: اني شاكه بالأمر من قريت بالعقد اسم مو اسمي.
مهيائيل: اسمج ايريم لو لا؟
ايريم: اي.
مهيائيل: يعني هاي انتِ مو وحده غيرج.
ايريم: بس اسم ابويه مو هو.
مهيائيل: سنمار مو عمج؟
ايريم: هاي انت كلتها عمي مو ابوي.
مهيائيل: بس هو سجلج بأسمه وصرتي بنته بالقانون.
فتحت عيونها بوجهي مصدومه.
ايريم: يعني اني اسمي ايريم سنمار؟
مهيائيل: حالياً اي.
ايريم: ماريد مستحيل اسم ابويه رضا وما اقبل اكون غير بنته، اني هذا الشخص ماحبه اصلاً شلون يصير ابوي!!!
مهيائيل: اهدي وسمعيني خليني اشرحلج الموضوع بهداوه لتعصبين هيج مو زين على صحتج يروحي.
ايريم: ماكو شي اسمه هداوه، عمي عمره كله ماحب بابا جان يوميه يجي يتعارك وياه يريده يبيع البيت وينطي حصه من عنده وابويه جان يرفض ومن مات همه اجو وكعدوا ابيته ومحد بيهم مهتم إله يضحكون ويسولفون ومن يشوفوني ابجي ولا كأن، محد جان ينطيني اكل ويعاملوني ك شخص منبوذ وردت اروح لصديقه اللي هو جوارينه وحتى مرته تعرفني وتحبني حيل وبتها صديقتي، ردت احجيله عنهم واخليه ياخذني من العذاب العشته بس هو يقفل الباب ويمنعني وأخير مره جان وقت مغرب وصوت القرآن عالي شفت الباب مفتوح ركضت طالعه اروحلهم بس ماعرف شنو صار وقتها وليش كل شي ممسوح من عقلي وما اذكر شي ابد.
مهيائيل: تردين احجيلج؟
ايريم: اي، أريد اعرف ليش اني مسجله على اسمه وشنو صار ويايه بعد مطلعت.
مهيائيل: صار وياج حادث وراها فقدتي الذاكره بشكل كامل وعمج سجلج بأسمه حفاظاً على صحتج وحتى ميصير بيج شي، همه فكروا بهاي الطريقه من شافوج شكد حزينه على عمي الله يرحمه.
ايريم: تصدكني اذا حجيت؟
مهيائيل: اكيد طبعاً بدون متسألين.
ايريم: عمي بعمره محبنه اصلاً يضوج مني جان ومن العب وي أبيل يجي يضربني شوكت همه أمري وسماني على اسمه خوف عليه!!
مهيائيل: وتصدكيني اذا حجيت؟
ايريم: اي اصدكك.
مهيائيل: علمود بيت ابوج صارت هاي المشكله.
ايريم: بيت ابوي مجان ورث هو اشتراه من عنده وامي موظفه وتساعدوا ثنينهم بيه ليش حتى يسون هيج!!
مهيائيل: هذا السؤال جوابه يمهم.
ايريم: اخذني الهم اسأل، أريد اعرف ليش أسم ابوي مات هم.
مهيائيل: من ترجع صحتج اخذج هسه الوضع مايسمح نطلع بعدين تنتكس حالتج وتصير مشكله.
ايريم: ليش هيج صار؟ جنه عائله سعيدة متعاني من اي مشكله، ضحك وسوالف بدون هموم، حياتي كلها مسمعت امي وابويه يتعاركون يعاملها احسن معامله واذا مرضت يبقى سهران وياها للصبح، آخر أيام من حياتها مفاركها ثانية حتى للشغل ميطلع، وجودها بلسم فراقها موت وهذا اللي صار، امي راحت واني بعمر صغير وابويه راح وراها منتظرني أكبر، وعودهم وكلامهم ويايه محد وفى بيه وتركوني وحدي وي ناس ماترحم.
مهيائيل: الموت حق مكتوب علينا امس همه باجر احنه ويجوز اليوم، تعرفت عليج انسانه متدينه تؤمن بقضاء رب العالمين وقدره ميصير تكولين هذا الكلام والا ربنا يزعل عليج.
ايريم: عندي ايمان منو كلك ماعندي بس حقد البشر وطغيانهم هو المشكله، ثنينهم ماماتو بطريقه طبيعيه وانما قتل بدون سبب.
مهيائيل: شنو تعرفين بعد؟
ايريم: امي جان مسوالها سحر، هذا الشي سمعته من عماتي الثنين هن اتفقن سوه علمود يدمرنها واجيت وحجيتلها زعلت مني وكالت لا تتسمعين عليهن مره ثانيه ولاتنقلين حجي، بذلك الوقت مجنت اعرف شنو يعني بس هسه لا تأكدت هي ماتت بالسحر من سمعت راضيه عادت الموضوع، وبابا مات مقتول وجذب سالفة عداوه لأن كل الناس عنده علاقه طيبه وياهم.
مهيائيل: ابوج شنو جان يشتغل؟
ايريم: حارس مدرسة.
مهيائيل: يعني جندي؟
ايريم: اي بس مخليه على المدارس.
مهيائيل: ليش انقل؟
ايريم: هو جان جندي قديم من صار السقوط حولوه على المدراس.
مهيائيل: يجوز بسبب شغله عنده عداوه متدرين.
ايريم: حارس مال مدرسه ابتدائية منو تقتله المديره!!
مهيائيل: لتعبين عقلج بهاي الأفكار بكًل الأحوال مراح نكدر نعرف اي شي هسه السالفه صارلها سنين يجوز حتى المجرم مات.
ايريم: آمين، الله لايرحمه ويغفرله هو السبب بضياع هويتي وفقدان عمود بيتي.
انتبهت عليها من تسولف عقلها رجع يفكر بنفس الطريقه قبل ماتتعرض للحادث وتفقد ذاكرتها، شويه شويه راح ترجع ومن تذكر شنو صار وقتها شلون اكدر اساعدها وطلعها من هذا الحزن؟ مستحيل تكدر تتقبل فكرة هي على اسم شخص ثاني وعاشت طول عمرها معدومة الهويه، درست وتخرجت وحتى تزوجت بأسم عمها الظالم، هيج ناس بيا وجهه يقابلون رب العالمين باجر وشنو يكون جوابهم إله؟
نامت بس التفكير يلعب بعقلها اني اعرف وضعها الحالي وحاس بيها لأن عشت بيه سنين طويله، بنيت خطة للانتقام لأن جنت ادري شنو صار واعرف المجرمين واحد واحد لكن وبوضعها الحالي ماكدر اسوي شي غير شتكيت على عمتها ونسجنت صحيح صارت عداوه بيني وبينهم بس اهم شي هي وأمها ماراح دمها هدر،
السحر والشعوذة وطريق الشيطان من اسوء الأعمال الممكن يسويها البشر، تدمير علاقات وتهديم أسر ويمكن يوصل الأمر للموت وبالنهاية محد يربح شي سوا معصية الله والعقوبه اللي تجي يوم القيامه اذا مسبقتها بالدنيا،
غمضت عيوني طارد الأفكار ويوم صار يجر يوم حتى خلص شهر بالكامل، علاقتي بايريم تصلحت نوعاً ما صارت تحجي وتضحك وتعودت عليه صحيح هي متذكر اشياء مهمه من حياتنا قبل بس تقبلها اليه مريحني ومخليني سعيد،
كاعدين الظهر على السفره دخلت ياسيم وجهها مخطوف لونه عقدت حاجبي وكلبي حس هذا المطي وره السالفه كمت بدون ما اسمعها ورحت لبيتهم دكيت الباب وبدون ما اسمع اي صوت فتحته ودخلت شفتها تغسل بالطرمه بدون سلام وكلام فتت للبيت شفته يشرب مي سحبته من ياخته.
مهيائيل: سير بنعالي ماخليك واحد ادبسزززز ساقط بطل سوالف الهتليه لا ادفنك بصف ابوك ال****، ان شفتك لامح ظلها ومحمد افنيك اول مره تحذير ثاني مره فعل وقد اعذر من أنذر.
تليد: بمكان مكاعد تحاسبني روح حاسبها وشوف بنت عمك المصون شعدها وي ابو الخط، ذيل الجلب ماينعدل وبسوالفها ثبتت هاي المقوله.
اجاه بوكس وكله ودفره بطنه.
مهيائيل: واذا الماي يروب ال**** اتوب وبسوالفك نثبتت هاي المقوله، لا انت وصي عليها ولا من باقي اهلها طلع خشمك من حياتها لا اطلعه من وجهك واخليه بأيدك واحد سرسري مهتلف.
عفته وطلعت احس كل شي بيه يفور، دمي وكلبي وعقلي رجليه وصلني للبيت كوه الشك مزروع بداخلي بيها صحيح تابت بس بعدني اخاف ترجع لسوالفها وهي بنيه مطلقه والسمعه ماترحم أحد، من باب البيت لباب غرفتها دكيتها وفتت شفتها كاعده ومخليه راسها بين رجليها اخذت نفس حتى اهدي نفسي شويه وبالهداوه أكدر اسمع منها الصار مخلتني احجي شي هي بسرعة نطقت.
ياسيم: والله العظيم ماعندي وياه شي مجرد خط ياخذني للمدرسه ويرجعني واذا تريد اسأله هو، كل اللي صار واني نازله عثرت صاح وراي الله وهذا اجاني يصيح ويرزل بيه كدام العالم من شافه هيج نزل وتعارك وياه صار عصبي اكثر، "يدافعلج اكيد عندج شي وياه" حلفتله ماعندي شي مو لخاطره لا وداعتك بس فضحني بين اهل المنطقة أخير شي صرخ بيه بتال وعفتهم ودخلت.
مهيائيل: الغريب عنده غيره احسن من هذا الساقط، لتخافين اذا مره ثانيه حاول يندك بيج اشيله من العراق كله.
ياسيم: اذا مشكلته الخط خلي اغيره اهم شي سمعتي.
مهيائيل: يخسااا كل واحد يمس بت مهيائيل بكلمه ارجعه لبطن أمه، ما الكه احسن من بتال، أأمن بيج يمه ومبين من تصرفه اليوم خوش زلمه وعد توقعاتي، راح تبقين وياه وليهمج كلام احد واذا سمعت بيج خايفه لو شفتج بنفس منظر اليوم اجي اعاقبج انتِ بداله، تربية مهيائيل ينحلف بيها اريدج تصيرين مثل ترانيم كبحه وحقها تاخذه من حلك السبع.
درت وجهي من سمعت صوتها.
ترانيم: شبيه ولك ليش تحجي عليه؟
مهيائيل: امدح بيج متردين؟
ترانيم: سمعت كبحه كلت الله يستر ابو الطلايب شعنده اليوم عليه.
مهيائيل: كل خير داده، إلا صدك عندي وياج موضوع مهم تعالي للغرفه نحجي بيه.
مشيت قبله مستعجله من تصير السالفه بيها فضول رجليه هي اللي تتحكم بيه مو اني اتحكم بيها.
ترانيم: كليبي كام يلعب كول شتريد؟
مهيائيل: سلامة كليبج، شنو رأيج تكملين نص دينج؟
ترانيم: ليش منو كلك ديني ناقص؟
مهيائيل: بطلي ثول وشغلي الذكاء محتاجه دقيقتين وركزي وياي، كملي نص دينج يعني اكو وأحد خطبج مني شنو تكولين؟
ترانيم: خرب بس لا اخو هاي الاثول؟
مهيائيل: ها خيه طلعت السالفه مبيته وانا مادري!!
ترانيم: كفيلك الله حجيتها من باب الشقه لا اعرفه ولايعرفني وحتى لو اريد ازوج فمو هو.
مهيائيل: بس انتِ توقعتي هو، شلون رهمت ام الكباحه؟
ترانيم: راح احجي الصراحه تعرفني انت ماحب الف ودور بهيج مواضيع، اخوها مو يجي يوميه تقريباً يشوفها اني ابقى يمهم ماكدر اعوفها وحدها وخاصه مرات انتم ماموجودين بالبيت، اني وياه فاره وبزون اربع وعشرين ساعه مناكر هو يسميني العجيز واني اسميه شرشبيل، كل ما اشوفه اطنكر بوجهه فمنين يجي الحب بشرفك!!
مهيائيل: والله صراحه اني ضد مامقتنع بس بما انو اجه وطلبج مني ماكدر اكوله لا بدون ما سألج، تعرفين اهله مو خوش اوادم واني اخاف عليج بعد هذا العمر توكعين بقسمه سوده.
ترانيم: يأجرلي بيت وحدي شكو بيها استاهل.
مهيائيل: عز الله اي وين يلكه مثلج يكفي اخوج مهيائيل.
ترانيم: والنعم.
مهيائيل: هسه شرد جواب للولد؟
ترانيم: ماكو نصيب الله يسعده وي غيري.
مهيائيل: فكري ترانيم.
ترانيم: لا خويه فات قطار العمر هنا وسد السالفه.
مهيائيل: الله يسعدج خيتي ويريح بالج.
نزلت وماعرف شنو الكدر خاطري، لا ترانيم لا دير بالج انتِ ماتحبيه والولد أصغر منج بهواي ماترهم علاقتكم سوه، حرام اظلمه وياي، يوم يومين وينساني هاي اذا جان يحبني اصلاً، طردت الأفكار من عقلي ونزلت جوه للحديقة اشم هوه.
___
:خلص اليوم واني افكر بلي صار، تليد وبتال ثنينهم تعاركوا عليه، ليش فرحانه من شفته لعد يدافع عني؟
معقوله حبيته؟ لاا لااا ابدد مستحيل كلبي مراح يخوني للمره الثانيه ويدمرني وحتى لو سواها ما اتبعه،
ثاني يوم الصبح كمت واني كلي نشاط ماعرف شبيه متحمسه اشوفه، بعد آخر مره حجه بيها ويايه قطع الكلام نهائي حتى صباح الخير بطل يكول قنعت نفسي خلص هو نسه واني اصلاً مامهتمه لسوالف لحب اريد أنجح وخلص،
لبست ملابسي ونزلت جوه وبدون ريوك طلعت صار بوجهي ألبومه اتقرب مني يريد يحجي وصل الخط عفته ومشيت، مد ايده سحب أيدي دفعته ورحت بسرعة صاعده بالسيارة، كلبي يرجف ورجليه هم، احس معدتي نمغصت غمضت عيوني ماخذه نفس بقوة وزفرته بدون ما أهتم لوجوده يمي، مكدرت الزم دموعي وشعور لمست ايده بعده موجود على أيدي، رجعت بيه الأيام من جان يعنفني ويجبرني على علاقة ماريدها واشمئز منها إلى أبعد حد، عصيت الله واذنبت وبقيت ساكته وكممت حلكي حتى ماعيش بظلم طول عمري،
علت شهكاتي مخليه أيدي على عيوني وابجي بكُل قوتي على ماضيي الأسود صحيت على نفسي وادركت اني وين من توقفت السيارة فجأة رفعت راسي اله اعاينله بتساؤل وهو عينه ما وخرت عني يباوعلي بالمرايه.
بتال: هذا الحقير سوالج شي؟
مكدرت الزم نفسي واسكت وفتحت كلبي إله، جنت محتاجه هيج سؤال صار فتره طويله واني اكبت بداخلي وردت بس حجه وافجر همي مره وحده يم أي أحد، اي احد حرفياً.
ياسيم: شنو الما سوه؟ بالنهار يعاملني مثل الخدامه وبالليل عبده، يضرب ويهين وحابسني مثل الحيوان، ارتكب بحقي جريمه وتزوجني غصب ودمر حياتي بالكامل، ترك بداخلي ندب لو اعيش عمري كله مستحيل يجي يوم ينشفي بيه، لهذا السبب رافضه ابدي من جديد لو تفتح أمامي أبواب الجنه ويخيروني اقبل اكون زوجه مره ثانيه مستحيل أوافق، غلطت الشاطر بألف واني غلطتي بمليون.
بتال: اعرف كل شي عنج، ولتفكرين بيوم فكرت بيج بنفس الطريقه اللي يشوفج بيها، من اول يوم شفتج بيه ولليوم انتِ بداخل كلبي ساكنه ومن يومها واني ادعي رب العالمين يجمعنا سوه، صحيح تزوجتي وطلعتي من بيت اهلج بس بقيت افكر بيج ومكدرت اطلعج من عقلي، حتى لو صرتي بذمة واحد ثاني تبقين اول حب إليه، ومن نفصلتي عنه ورجعتي لبيتكم حسيت الدنيا ضحكتلي من جديد والله سبحانه بده يستجيب دعائي، ومن خابرني رائف علمود اخذج خط هنا تأكدت ربج رادنا ننجمع سوه،
مالي علاقه باماضيج وشنو عشتي اني رايدج وشاريج لان انتِ ياسيم البنيه اللي حبيتها،
هو يحجي واني صافنه عليه وكلبي يريد يطلع من مكانه منتفض بداخلي بعنف، ضاع الكلام مني وبقيت اباوعله مصدومه ابتسم بوجهي مكمل مخليني انسه حتى اسمي.
بتال: تقبلين تصيرين زوجتي وشريكة حياتي على سنة الله ورسوله؟
صخنت والحرارة تطلع من كل جسمي، التزمت الصمت وهو اخذه الواهس درت وجهي للجامه وشغل اغنيه معلي الصوت ويغني وياها، داخلي مبتسم وفرحانه حيل ناسيه ويمكن تناسيت اللي صار ويايه حتى اعيش هاي اللحظه بالكامل بدون هم، كمل الطريق وصلنه للمدرسه نزلت بدون ما باوعله وطول اليوم امشي على الهوه طايره للسما بدون خوف ماعرف السبب، يمكن لأن أني حبيته غصب عني.
___
زُمردة: رائف، رائف، كووممم.
رائف: انفجار لو إعصار منو ماتتت!
زُمردة: كوم شغل السياره راححح اموت من الألم.
رائف: ليش شبيج؟
زُمردة: راحح اجيبببب كوممممم.
رائف: رجعي نامي يروحي ولادة شنو بهل ليل.
زُمردة: الحكولللللليييييييي.
طفرت من مكاني من ستوعبت الأمر كمت اكمز بالغرفة مثل القرد فتحت الباب بدون ما انتبه لنفسي شنو لابس وماكدر اروح ادك كل البيبان وكفت بالنص وصرخت بصوت عالي.
رائف: الحكولييييييييي.
كلها طلعت من غرفها مفزوعه.
مهيائيل: خيرك ولك شكو.
رائف: ابني جاي بالطريق.
ترانيم: ديلاااا تحرك منتظر شنووو!!!
هي مجهزه نفسها اخذت اللي نحتاجه وساعدناها تنزل مادري شنو من ثول وتصعد درج وهي بهيج شهر، اخذناها للمستشفى وهذا واكف كدامي سطر راسي سطر.
رائف: بس يجي للدنيا العن والديه.
مهيائيل: صاير سباعي الخايس.
رائف: اي شنو يجيني نص الليل هذا بدايتها هيج بعدين شنو يسوي؟
ترانيم: كافي مسلته ودعيلها بالسلامة.
ميمون: عافت الايام كلها مرتك ماعرفت تجيب الا نص الليل، وانت المطي يكول إنذار تبقى طول عمرك فاهي واحد اغبن.
رائف: راح اصير اب وبعدك تغلط عليه افااا.
ترانيم: شلون وياك انتتت كتلك ادعيلها وخلص كافي تحجي بهاي الطريقه وتفاول عليها.
ميمون: لتخافين عار على ابوه.
رائف: اي والله اكل نص العاشر يلا فكر يشرف للدنيا، هتلي على عمامه.
مهيائيل: على ابوك سرسري و **** قابل تطلع معمم.
بقوا يتناكرون ويضحكون اعرف رائف مشغول بداخله ويفكر بيها بس ميريد يبين هذا الشي كدامهم ويصبر نفسه بهاي السوالف، بعد فتره طلعت الدكتوره طمنتنه جابت ولد ومن تأكدوا من سلامتها وسلامته طلعونه للبيت.
رائف: مهيائيل وميمون فتحوا موبايلاتكم بساع.
ميمون: شتريد؟
رائف: غيروا اسمي من رائف لأبو قحطان.
مهيائيل: ياسين.
رائف: لا والله وجهه مال قحطان.
ميمون: لو يصير عمرك سبعين سنه واحفادك مسويك مضحكه يبقى اسمك رائف اخونه الصغير اللي احنه ربينا.
رائف: لا هيج تبجيني وانا توني صرت اب.
مهيائيل: يضحك عليك قصده خبل مو مال نكبر راسك.
رائف: يوم الالك خويه وداعتك اركص ركص ما صاير.
مهيائيل: كله من وره ترانيم هي الفكرتني، كلما شافت ايريم كلتلها اريد اصير عمه وتالي متالي تخبلت البت.
ميمون: جدد، الشرع حلل اربعه.
مهيائيل: يخسن نسوان العالم كلهن، مابدل اظفرها بالكون تريدني اتزوج على حلوة اللبن!!
ميمون: شكو بيها اني ازفك ومهرك عليه.
مهيائيل: فلوسك عرس بيها لا تشيل همي مرتاح وي مريتي انا.
ترانيم: ليش تقنعه عليها متخاف الله ولك؟
مهيائيل: ليش هو يكدر يقنعني!! عيوني اصلاً مايشتغلن يم غيرها.
ترانيم: الله يحفظكم ويحميكم ويبعد عنكم عيون الحساد يارب.
مهيائيل: آمين أولهم خوانج.
ميمون: ناكر المعروف.
مهيائيل: ايي.
وصلنه للبيت ومابين خطار وخبصه وناس طالعه وداخله خلصت هوايه أيام، ياسيم تعيش لحظات سعيدة وي بتال اللي بقت لحد الآن ممنطيته جواب لكن مجرد شوفته هي سعادة لكلبها، و زُموردة ملتهيه بأبنها اليبجي اربع وعشرين ساعه، تبقى بس هي صافنه على الكل وتفتقد بداخلها لمة اهلها من تشوف الضحكه على وجوههم،
كاعدين بالصاله وره العشا وبدو الاخوه يحجون.
ميمون: ابو عمار اليوم اجاني يشتكي من تليد يكول واكف بالباب من الصبح لليل ويفتر بالمنطقه مثل الحارس ممخلي واحد ياخذ راحته.
رائف: وهو شعليه رجلينه لو رجليه؟
مهيائيل: عنده بنيه طالبه يوميه تطلع يخاف عليها من عنده وهو عاد سمعته شلونها تخبل.
رائف: مع هذا ماله حق يدخل بيه باب بيته أو واكف كدامه نوب نلزم رجليه ومنخلي يطلع.
ميمون: الأفضل يشيل من هاي المنطقة.
مهيائيل: اختي ماخليها بعيده عن عيني.
ميمون: جيبها يمنه تعيش.
مهيائيل: امها تبقى وحدها.
رائف: اني برأيي تخليهم ابيتهم بس تحجي وياه وتكله يبطل مراقبه للعالم.
مهيائيل: ميراقب العالم ابن ابوي واعرف عقله شنو بيه.
ترانيم: داده شبيج؟
ايريم: اني؟
ترانيم: اي صار ساعة صافنه بالحايط، بيج شي؟
ايريم: لا.
مهيائيل: شنو بيج حبيبي؟
ايريم: مابيه شي والله شبيكم؟
ترانيم: انتِ اللي بيج داده واضحه من وجهج المخطوف وعينج الماراحت عن الحايط.
ايريم: ماكو شي بس بعقلي صور حادث اجت فجأة كاعد اركز بيها اريد اعرف هي لمنو.
التفتت الها بكل جسمي دايرها اليه بدون ما أهتم للموجودين لزمت ايديها وكلت.
مهيائيل: حادث شنو؟
ايريم: سيارة.
مهيائيل: منو متأذي؟
ايريم: اسمع صوتك يصيح بأسمي وسيارة ضربتني بس اكو شي على عيوني ماشفت شي.
مهيائيل: بعد شنو تشوفين؟
ايريم: ماكو بس هيج.
مهيائيل: كومي وياي نصعد فوك وريحي مخج من هاي الأفكار لتضغطين على عقلج ماكو شي.
لزمت ايدها صاعدين، عقلها مو يمي ابد، صافنه وضايعه، خليتها بحضني وبقيت اسولف وياها وهي ولا حرف نطقت خفت عليها لا تصير عدها صدمه ثانيه لو ترجع ذاكرتها فجأة وبهاي الحاله ماعرف شنو أتصرف، بقيت مهموم وعقلي مابطل تفكير لوجه الصبح هي نامت وغفت واني عيني صاحيه عشره على عشره، بقيت يمها اضحك وسولف وغيرلها جو، ساعه فلم ساعه مسلسل بس اريد اخليها تتفاعل وياي وهي رافضه تبتسم شويه وترجع تصفن، مرن يومين واحنه على نفس الوضع صارت الساعه اربعه العصر اجاني اتصال ضروري مكدرت ابقى يمها ونجبرت اطلع، اسوق بالسيارة وعيني على الشارع بس كل شي بيه يمها، شلون اذا رجعت ذاكرتها فجأة واني مو هناك شنو يصير بيها وقتها؟
هديت نفسي بألف ياعلي وقررت اكمل طريقي بدون توتر وقلق بس منو يكدر يقنع كلبي الخايف عليها؟
ترانيم: عيوني شو باوعيلي خليني اشوف هذا الوجه الحلو شبيه؟
ايريم: امي وين؟
كالت هيج مسببه صدمه إليه بلعت ريكي ماعرف اي وحده منهن تقصد، كامت من مكانها بسرعة وصعدت فوك مطولت دقايق ونزلت لابسه عبايتها رادت تطلع لزمت ايدها.
ترانيم: وين؟
ايريم: لأمي اذا هي امي صدك..
يتبع..
البارت ٤٠٢٦ كلمه..
اعتذر عن التأخير اللي صار بالبارت، تعرض والدي لوعكه صحيه لذلك مكدرت اكتب شي..
شوفوني حماسكم للبارت شمعاتي..
تصبحون على الف خير وعافية..
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!