للتواصل انستا/zahraaahmedn99
لتنسون التعليق بين الفقرات والتصويت للبارت والمتابعه شمعاتي ❤️
مهيائيل
الكاتبة (زهراء احمد)
____
الجميع اليوم يقول:
لم يكُن لقاؤنا صُدفة ، بل رحمة من الله❤️.
____
أبيل: مانطيك اختي الا بشرط تنطيني اختك.
مهيائيل: مو اكوم العن والديك طايح الحظ مقايضة عندي انا.
ابيل: هذا شرطي والا اخذ مرتك واهج بيها وماتعرف سماها من الكاع.
مهيائيل: اختك مرتي لاتصير مطي بس اختي ماتريدك ولو يخلون على راسك نخله وبيها عشر عثوك مال تمر مانطيها غصب.
أبيل: اسألها يجوز وافقت هسه؟
مهيائيل: هاي كدام الكل يابه ترانيم موافقة تتزوجين هذا الاغبر؟
ترانيم: لا خويه.
مهيائيل: هااا سمعتت؟
أبيل: اي لعد اختي مانطيها.
مهيائيل: خايبين العن ابهاتكم كلكم وعلي هسه اخذها وطلع ونروح نسوي زفه وعرس وشهر عسل بغير دولة ولا منيتكم سرسريه.
ميمون: احنه وعكلنا وهيبتنا وتريد تاخذها هيج بكيفك غير نكسر رجليك اكعد وستجن.
رائف: اي وحتى محبسك بعد مايفيد، رجال تايب انت.
مهيائيل: توبتي مو نصوحه على ساعة ارجع وخليكم تشدون وصله مثل النسوان استروا على نفسكم احسن.
أبيل: اللي عندي كلته اختي بأختك.
مهيائيل: اني اليوم مشتري شحاطة جديده مايهون عليه اكطعها عليك بعد لبستين ودلل الواضح انت مو مال عيني واغاتي ابدد.
أبيل: يا جماعة الخير اني طالب أيد بتكم ترانيم للزواج على سنة الله ورسوله وافقوا مو شكيتوني شكك.
ميمون: تره لحيت هواي كلنالك البت ماترضى شلون يعني اتزوجك على ريحتهااا!!
أبيل: ويعععع طاح حظك شلون ****.
ميمون: مو خبصتنااا كل دقيقه عايد الجملة، اذا هي ماتكلبك شنسويلك يعني؟
أبيل: انطوها مهله تفكر.
ميمون: بوية جابريجج، احجي وفضينا سوا عندي ب***** من ملحته هاييي.
أبيل: لاتسألوها كدامي يجوز تخجل تجاوب.
مهيائيل: ياهي التخجل؟!
أبيل: أختك.
مهيائيل: لا عيوني هاي راضعه وي ابليس هي والخجل بعمرهم ماملتقين اذا تريدك تسحبك من شعرك وتروح تعقدلك هي وحتى العصمه تصير بيدها شوكت ميعجبها طلكك.
أبيل: ميخالف موافق، بس خلي توافق وكل شي ماريد منكم بعد.
ميمون: خويه بنيتنا تريد وقت حتى تفكر عاد انت على كيفك ويانه مو حبها ولبط، انطينا عطوه.
أبيل: لشوكت من يصير عمري أربعين سنه؟!
ميمون: شكو بيها بوقتها عقلك يكتمل وتكدر تتحملها وماتعيش هوايه وياها عمركم ثنينكم يقل كم سنه وتودعون.
أبيل: عمي قابل وراية العباس قابل شنوووو هاييي موتونييي.
مهيائيل: تذكر خيرتي؟
أبيل: لا مو بس تعبت نشكيتتت من وراك وره اختك.
مهيائيل: اكو وأحد عاتب عليك؟!
أبيل: كلبي الخايس هو السبب.
مهيائيل: اشمره للجلاب وانت ترتاح.
أبيل: هاي نهاية الحديث؟
مهيائيل: هي ماتقبل شسويلكك!!
بعدين تره اليوم تجديد الخطبه بيني وبين مرتي مدخل خشمك بالنص المن؟!
أبيل: خير البر عاجله حتى نعقد نفس اليوم.
مهيائيل: لا بله.
أبيل: اي والله، بس عليكم العباس وافقوا.
ميمون: هسه انا شكلت تبننن!! كتلك اخيتنا تبيع ثكل يوم يومين ونردلك جوابها كافي تلح لابطل وعلي وزركك بسحر اخليك تمشي على رجليك.
رائف: ليش هو يمشي على أديه هسه!!
زُمردة: من العصبيه مايعرف شنو يحجي، كافي شلعتوا كلبه هي خطبه لو قضية الأمم المتحدة وافقوا وخلص.
ايريم: اني هم هيج أكول، همه ثنينهم كبار ويعرفون شنو يردون خليهم يعقدون ويتعرفون على بعض براحتهم.
أبيل: وزوج من يصير عمري ستين سنة!!
مهيائيل: ليش شتريد يمه؟
أبيل: هسه تنطي الجواب بالليل نعقد شيخ باجر محكمه الخميس حنه وعرس.
مهيائيل: والجمعة تجينا بيدها جاهل، تحجي صدك ولك؟
أبيل: اي والله، انا اعرفها وهي تعرفني فترة مرض ايريم حفظتها وعرفت طبعها وسوالفها وراضي بيها وبعيوبها كلهن.
ترانيم: هاك خويه شوف بعدني مانطيت الموافقه يكول عندي عيوب باجر يطلعني وحده خبله كل عقل ماعندي وكوه متحملني، انا العندي كلته زواج مازوج وأبيل معتبرته اخوي.
أبيل: هاك ستلم.
مهيائيل: هذا بكج ينزل وياهن من الولاده لتهتم.
ايريم: شنو قصدك؟
مهيائيل: يعني تفضل لافت لافت وجتني.
ايريم: كولها ليش سكتت؟
مهيائيل: بكج عناية بالقدم عيوني ماقصدي شي.
ايريم: اي عبالي.
ميمون: بده التهديد احب هيج شغل نظيف زلم ماتجون الا بالعين الحمره.
رائف: يجي يوم والله يورطك بحب وحده تلعن يوم يومك وكول كلت.
ميمون: مهرتي بعدها صغيره عود خلي تكبر وتلعب بكيفها.
رائف: هااا هاااا طلعت عاشككك ولك واحنه ماندري افاااا وهاي عود اخوانك وشيالين همك.
ميمون: كام يمسلت سكتوه لا اكومله ودفنه بمكانه والعن والديه اليطلع وره.
مهيائيل: اكلكم خلصتوها عركه وسالفتي شنو صار بيهااا؟
ميمون: لازم نسأل عليك اهل المنطقة، ماننطي بتنا لحي الله وأحد.
مهيائيل: وشوكت تردون الجواب ان شاء الله؟
رائف: احنه هسه مشغولين يعني فد اسبوع اكثر اقل بيومين بيوم ندز عليك وننطيك الخبر.
مهيائيل: مريتي كومي جيبي عباتج وجنطتج وخلي نرجع لبيتنا وذولي يفكرون براحتهم.
ايريم: مهيائيل هي شنو خلينا نعيش اللحظة.
مهيائيل: احتركت عشيرة نعال على هيج حظ اغبر.
ترانيم: ابو الطلايب استجن كافي كل شويه ساب العالم الميته هن يوميين تحملهن شيصير عليك!!
مهيائيل: مرتي ماكدر افاركها.
ايريم: فديت كلبك الميكدر بدوني حبيبي انت.
رائف: اخوان احنه اهنا.
ميمون: يا وسفة على الشوارب بتنا طلعت مستهتره، انا اخوك ماعرفنا نربي.
زُمردة: يمعودين صدك تحجون كافي تخجلوها.
رائف: والله لو تشوفين ختلاتهم بالمطبخ جان ماعرفتيهم هسه، عود خجلانه وكذا.
زُمردة: عزااا رائف شهل حجي!!
رائف: اي والله شبيج قابل مجذب، يوميه الزمهم بالمطبخ لو يم الدرج، مستعجل مو بيده.
مهيائيل: ابو كوكب سبيستون عاجبك امطلك وخليك تون مثل ياسين؟
رائف: غير اسولف بطولاتكم لمرتي.
مهيائيل: محد طالب منك تسولف شي انجب وسكت.
ميمون: يلا خويه تبقى سهران هنا كوم على بيتك توكل.
مهيائيل: ومنو يبقى يمهن؟
رائف: انا ومريتي الحلوه توكل بالله عيوني.
مهيائيل: وعود ليش تبقى انت مو انا؟
رائف: غير انتم بعدكم ماعاقدين ياخويه عيب من العالم شتكول علينا؟
مهيائيل: لابارك الله بيكم شله مسربته.
همه يسولفون واني حلكي مفتوح من السعادة، حتى مخلوه يحجي وياي سحبه أبيل وميمون وطلعوا، راح رائف للغرفة يرتاح واني و زُموردة وياسيم كعدنا يم ترانيم بغرفتها.
زُمردة: ليش متوافقين؟
ترانيم: هاي فرحة عرس يوم يومين ويندم، اني اكبر من عنده بهواي ماكو توافق فكري.
ايريم: مو شرط بالعكس انتم ثنينكم كبار وفاهمين اذا صار فد خلاف معين تجاوزي الأمر بذكائج، واخوي واني اعرفه اضمنه الج يكعد عاقل حباب ميسوي مشكله.
ترانيم: هو حباب بس انا لا، بعدين لاتنسين أهله مايردوني ماترهم خطبه وزواج بدون علم امه وابوه منين متخليها سالفتنا عوجه.
ايريم: اذا تردين اني احجي وياهم اهم شي عندي سعادتكم.
ترانيم: ازعل منج دير بالج تسامحيهم علمود هيج موضوع تافهه، لاترضين على أحد سرق هويتج ولغه اسم ابوج.
ايريم: ما اسامحهم بس احجي وياهم بخصوص موضوعكم، ماطول هسه همه يردون رضاي نستغل الأمر بعدين انتم راح تعيشون ابيت وحدكم وخوتج سحاره اموركم عدله، ترانيم الفرصه تجي مره وحده بالحياة استغليها، هو يحبج وشاريج وانتِ هم مبينه تحبيه ليش العناد وكبرة الراس متكليلي!!
زُمردة: كلام ايريم صح، وافقي واذا شفتي الحياة متناسبج اخوتج موجودين والبيت بيتج وانتِ الآمره الناهية واحنه بناتج وخواتج.
ياسيم: عمرج كله عشتي متعذبه شكو بيها اذا نطيتي لنفسج فرصه تفرحين وتشوفين حياتج، عيشي الحب وداعتج هاي الأيام من العمر مستحيل تتعوض.
ايريم: ويجوز رب العالمين كاتبلج تصيرين ام ويصير بيبي صغيرون واني اصير عمه قبلج.
ترانيم: مادري افكر.
ايريم: هو شنو تفكرين اريد اسمع منج موافقة توكلوا حتى باجر اخليه يجيب الشيخ ويعقد.
ترانيم: خلي يكمل عرسج وبعدين نفكر بهاي السوالف ماعدنه شي.
زُموردة: الحياة تمر ماراح تنتظر منج الوقت المناسب وافقي وفضيها ياعيني.
ترانيم: انتن حاميات أكثر مني الزمن ارواحجن شبيجن!!
ياسيم: والله انا فرحتي بيج مانطيها لأحد، يارب تصير صدك واشوفج احله عروس.
ترانيم: بعد هاي شيباتي وعرس والله عيب.
ايريم: بالعكس ماكو اي عيب، الناس على الله ما راضيه لتنتظرين منها ترضى عليج، سوي اللي يعجبج واليحجي يطبه مرض.
زُمردة: والله صدقتي منو مات واخذها وياه ماطول انتِ مقتنعه خلص.
ترانيم: اريد احجي وياه.
ايريم: اي هسه ادك عليه.
ترانيم: مصخمة الوجه مو هسه شيكول عنيي، عززااا بعينج لادكين.
ايريم: هذا فتح الخط.
ترانيم: **** على رجلج.
ايريم: لا داده هو **** مو ****.
زُمردة: ولجج عزااا منين هذا السان جنتي عاقله!!
ايريم: متحمسه مو بيدي ماكدر الزم نفسي ماحجي.
ياسيم: خلنه نروح للمطبخ ميته جوع.
زُمردة: اني اروح اسوي ممه لياسين تصبحون على خير حبيباتي.
ايريم: وانتِ من اهل الخير داده.
طلعنا اني وياسيم وخليناها تسولف وحدها بالغرفه وياه.
أبيل: هلا بعجوزتي.
ترانيم: اسده تره اكعد عاقل.
أبيل: حاضر تأمرين انتِ.
ترانيم: اريد أسألك بخصوص الشسمه.
أبيل: ياشسمه؟
ترانيم: راح اكون صريحه وياك واحجي كل شي بكلبي، اني تزوجت من عمر صغير وعشت اغلب حياتي وي زوج وعيال كبرت أو وعيت على أمور اكبر من عمري، عانيت وصبرت وصرت قوية، صحيح الساني طويل وتشوفني ارد الكلمة بعشره وهذا بسبب العشته من قبل، اللي اريد اكوله انا بعمري كله مراح اتغير، يمكن ماكدر انطيك الأشياء التحلم بيها وي شريكة حياتك، ويجوز ابقى طول عمري خايفه احبك، ممكن ماتشوفني مثل متصورتني بعقليتك، وانا اكولها اليوم وحتى احجيها كدام الكل اذا تقبلني بكل شي بيه بدون ميكون عندك شروط انو اتغير.. قاطعني كايل.
أبيل: اني حبيتج لصفاتج الحالية وشخصيتج، بعمري مافكرت اغيرج ولا أريد اسوي هيج اصلاً بيوم من الأيام، اريدج انتِ ترانيم بكل شي بيج، اقتنعي احبج ومستحيل يجي يوم ابدلج بالدنيا كلها مستعد اعوف العشيرة كلها وجلب بيج بس وافقي.
ترانيم: مع السلامة، سديت الخط وشمرت الموبايل حسيت نفسي صخنت، احساس حلو ويخبل بقيت اضحك للهوه مثل المخابيل معقوله بديت احبه؟ لا منين اصلاً اني كبرت على هيج شعور، لا ليش كبرت من حقي بعدني معجزت كلش وما ماخذه حق أحد حبني وخطبني لا عيب ولا حرام،
اي ترانيم عيشي حياتج وستمتعي، اشمري الأسود وبدي حياة مليانه ألوان وحب وفرح، جنت دائماً اكول اقبل اتزوج اذا واحد تقدملي بس جان مجرد كلام لا أكثر لأن اعرف وحده جبيره مثلي وارمله منو يكلبها بعد بس سبحان ربنا منعرف شنو كاتبلنا باجر، شمرت نفسي على الجربايه سامحه لخيالي يسافر لبعيد.
ياسيم: بدت العطله ولازم اراجع وحس نفسي مامستعدة للامتحان خايفه ارسب.
ايريم: لتفكرين بهاي الطريقة، السادس حاله حال باقي المراحل الدراسيه المواضيع تكبر من تكبريها وتصغر من تصغريها، هونيها وتهون ياعيني.
ياسيم: مو بيدي صار ثلاث سنين افكر بهذا اليوم وشلون بيه خايفه يضيع حلمي.
ايريم: ميضيع يم ربج تعب أحد، ادرسي وسوي اللي تكدرين عليه وشوفي شلون الله سبحانه يوفقج بكل خطوه تخطيها.
ياسيم: ان شاءالله الله يسمع منج، اكيد هسه ترانيم خلصت رايحه انام تصبحين على خير.
ايريم: وانتِ من اهل الخير حبيبتي،
البيت صار هادئ ومن راحت الاصوات من يمي حسيت كلبي شتاقله يوميه هيج وقت كاعدين اني وياه نسولف ونضحك، صار عندي ندم لو باقية يمه هسه هاي الأفكار التعبانة شنو الداعي الها!!
فتحت موبايلي نيتي اراسله لكيته سابقني وداز مسج.
مهيائيل: البيت اظلم ولاينطب كاعد بالسيارة ماكدر ادخل جوه وانتِ ماموجوده.
ابتسمت وبنفس الوقت نقهرت عليه اتصلت عليه كام شويه وفتح الصوره ظلمه شويه واسمع صوت الاغاني عالي.
ايريم: هاي شنو تسمع يحلو امك؟
مهيائيل: مشتاقلج ملعونه، كطعتي بيه ورحتي وره حجيهم.
ايريم: غير اريد اعيش اللحظة، زواجنا مجان مثل باقي الناس خطبه وعرس بأقل شهر كل شي مافتهمت من عنده وياريته اكتمل صار حادث ونمت بالمستشفى لا احرك لا أيد ولا رجل.
مهيائيل: انسي الماضي خلي يولي وفكريلي اباجر، أريد العصر اجيب شيخ عاجبني حتى العقد نجدده وراها عازمج عشا بره البيت ونروح نديح.
ايريم: اخوانك مراح يقبلون.
مهيائيل: لو مو اخواني الشغب ماتخلصج مني.
ايريم: هههه، اذا هيج من بدايتها تهديد بطلت ماريد.
مهيائيل: مو هي بكيفج وعلي اجيبج سحل لحضني، افهمي يابت الناس زوجج مشتاققققققق ذابحه الشوقققق.
ايريم: والله حتى اني مشتاقه.
مهيائيل: تعالي اطلعي بره لعد واكفلج ونرجع لبيتنا.
ايريم: عززززاااا صدك واكف يم البيت؟
مهيائيل: اي والله هذا الباب كدامي.
ايريم: لا مهيائيل راح تتعب هيج تعال فوت لتبقى بره مو زين عليك متنام.
مهيائيل: مو تردين نعيش شعور العشاق خليني اكعد بالسيارة انتظرج تحنين عليه وتفتحين الباب وانا ادخن ومشغل أغنية وماخذلي صفنه وحالتي حالة.
ايريم: سمعتك مشغل اغاني بس مكاعد افهم كلماتها زين.
مهيائيل: هاج اسمعي وشوفي رجلج شلون متلوععع.
قرب الموبايل من المسجل وعله الصوت ضحكت على سوالفه والاغنية اللي مخليها.
ايريم: مهيائيل تعال فوت للبيت لتبقى بالشارع.
مهيائيل: اطب وين ابقى؟
ايريم: بنص حضني كالعاده.
مهيائيل: افتحي الباب.
طلعت بسرعة فتحت الباب لاكاني بوجهه المبتسم سحبني لحضنه، دخلنا بالصاله اكو قنفه بيها مقبل أجيب فراش ونام جوه فدخلت بهدوء للغرفة مالت ترانيم وسحبت بطانيه خاف واحد يطلع الصبح ميشوف من عندي شي، لكيته مشغل السبلت ومتمدد مسويلي مكان رحت يمه لزم أيدي وسحبني يمه، صدك احله شعور عشته وياه هاي الليلة من بقى واكف بالباب ومراح علمودي اكتشفت من صدك شكد هو يحبني وميكدر يفاركني، نمت بين احضانه واني مرتاحه ومطمأنه اني بين أدين أمينه، ودعيت بداخلي ربي يديم عليه هاي النعمه وما يحرمني منها طول العمر.
فزيت الصبح على صوت واحد يغني، صرخ بيه بصوت عالي فززني.
مهيائيل: قززز القرط طايح الحظ كاعد من صباح الله تغني المننننن هسه ياريت صوتك حلو حتى بزازيني صوتها احله منه.
رائف: نام نام نوم هني ومعليك بصوتي لا وعلي هسه اسويك سالفة بحلوك العالم فد سنة نسولف بيك لكدام.
مهيائيل: بيمن تسولف ملعون الأصل؟
رائف: دور دور اشرب جاي بس انا وامي.
مهيائيل: استغفر الله شلون بيه وي الحس الطربي انااا، اللهي ليش خلقتني بنص هيجج بيت اهله كلهم مخابيل؟
رائف: علمود تكدر تاخذ راحتك وتحضن بكيفك بعد روحي.
مهيائيل: شوف عدل تكوم هسه من يمي لا والخلقك اعوف كل شي واسطرك بسحر يارائف اخليك تصوفر بالهندي.
رائف: سويها باكستاني على الأقل مسلمين.
مهيائيل: زُمردةةةةةةة.
زُمردة: ها خويه؟
مهيائيل: اخذي رجلج وخلي يروح من وجهي.
رائف: اي علمود تختلي بيها موووو؟
مهيائيل: زُمردة تردين تحافظين على بيتج وابنج مايتيتم اخذي ومشي يلا عيوني تحركي.
زُمردة: رائف عوفهم وكوم عيب هاي السوالف تسويها.
رائف: ماكوم اريد اشوف شلون يطلعها.
مهيائيل: والعباس راح انزع اخلاقي واكوم اكضي بيك التوبه تحرككك بدون لغوه زايده.
زُمردة: رائف فدوه اروحلك بطل سوالف الصغار وعوفهم مره ورجلها عيب تبقى تراقبهم ميصير.
رائف: اريد افتهم شلون دخل؟
ترانيم: شكوو ولك تصيح من صباح الله ماتكول اكو عالم نايمه ماكو احساس ابدد.
مهيائيل: كملت السبحة.
ياسيم: صباح الخير.
مهيائيل: صباح النعل، وين اكو خير يجي وأنا مكابل هيج شكووول؟
ترانيم: شبيككك انت الثاني خبصتنااا؟
مهيائيل: اخذيهم ترانيم يزقنبون.
ترانيم: اي وماتاكل انت هم؟
مهيائيل: ترانيممممممم.
ترانيم: عززززاااااا بعينك وانا اكول البت وين طلعت هنا الدالغة.
مهيائيل: لشوكت تبقين تسولفين تاخذيهم لو لا؟
ترانيم: يلا ولك كدامي للمطبخ، وانتن تعالن وياي نسوي ريوك.
ماعرف شنو صار بيه صخنت وبردت وطفيت وشتغلت من الخجل، وخر البطانية عن وجهي بسرعة بتعدت عنه بدون كلمه وهي كومه وطفره للغرفه اخذت نفسي بعمق وزفرته ميته خجل شلون اكدر اطلع كدامهم بعدد مستحيل خاصه رائف شلون تجي عيني بعينه وهو اموت واعيش ومراح ينسى، هفيت على نفسي بأيدي وبقيت اشجع روحي بالكلام الإيجابي حتى اقنعها مسويت شي غلط وشي طبيعي هو زوجي اتناسى الموقف الخايس اللي عشته قبل شويه،
درت وجهي للباب من سمعته ينفتح دخل واجه وكف يمي حاضن خدودي بين أديه كايل بهدوء.
مهيائيل: لتفكرين هوايه بلي صار كل مره تنام بحضن زوجها وكل الكوكب يدري ومو شي عيب ولا مخجل وبعدين اذا هو عنده شويه خجل وشرف موكف على روسنا ويدقق.
ايريم: مع ذلك اللي صار خلاني ماكدر اباوعلهم بعد.
مهيائيل: احسن خلي عيونج بس اللي.
ابتسمت على كلامه الحلو، قرب وجهي من وجهه كايل بحب.
مهيائيل: هي كل وحده تخجل هيج تصير حلوه لو هاي بس مرتي؟
جاوبته بنفس نبرته.
ايريم: لا هاي بس مرتك.
مهيائيل: افديها بكلبي وروحي.
ايريم: يحفظلي كلبك وروحك يبيتي.
مهيائيل: اليوم ماكتلج احبج.
ايريم: ولاحتى صباح الخير.
مهيائيل: هاي صباح الخير رسمية لأن اصلاً صباحي مايبدي الا من اشوف وجهج.
ايريم: زوجي حبيبي ربي مايحرمني منك.
مهيائيل: ولامنج يريحتها للمرحومه.
ايريم: اكلك شوكت نعقد؟
مهيائيل: والله بعد ماكدر اتحمل افاركج العصر اجيب الشيخ ونطلع نختار غرفة ونتعشا بره، أريد نبدي من جديد.
ايريم: أريد اطلب منك شغله اذا عندك وقت تسويها إلية.
مهيائيل: تأمرين انتِ.
ايريم: ميأمر عليك ظالم ،أريد اروح لبيت عمي علمود احجي وياهم بخصوص موضوع أبيل وترانيم، من حقها يجون يخطبوها وكل الناس تعرف بالأمر متصير سكته بينه.
مهيائيل: وافقت؟
ايريم: مبين عليها الرضا، احنه خلينا نسعى والباقي على رب العالمين.
مهيائيل: ما انصح تسوين هيج، هسه يفكرون احنه بايعين بتنا.
ايريم: اعرفهم مراح يوافقون لازم نسعى ميصير نسكت.
مهيائيل: شلون يعني أسعى بزواج اختي عيبه بحقنا هاي، خليها شلون ميريدها ربج يسويها، انا طالع انتبهي على نفسج وان شاء الله الساعه تلاثه اجيب الشيخ واجي.
ايريم: بحفظ الرحمن حبيبي،
هو طلع واني طردت الخجل متناسيه الأمر ورحت يمهم، تريكنا ودكت رجل ترانيم نروح للسوك وي رائف معارضت الفكره اتصلت بيه منطيته خبر ولبست عباتي رايحين للمول، اشتريت فستان أبيض مخصر على الجسم ايده كيبور ومستور نوعاً ما ماحب الملابس الفاضحه كدام الناس، وشتريت فستان ثاني اسود قصير فوك الركبه بيه فتحه من ظهره بسيطة وبدون اردان مخصر من الخصر وكلوشه من جوه، واكيد احذية وباقي هاي الأمور رجعنا للبيت الساعة ١١ بوجهي للحمام من طلعت لكيتها لازمتلي المعدات ومكتفه اديها ضحكت كايله.
ايريم: خلي نصلي ونتغده بعدين استلميني.
ترانيم: رجلج خابر قبل شويه كال ساعتين وانا يمكم، ابو الطلايب مستعجل شبيدي عليج؟
ايريم: على الأقل نصلي على شنو الاستعجال تره هم زايده من عنده غير هو رجلي.
ترانيم: بعد مايتحمل فراكج يريد تكملون بسرعة حتى ترجعون للبيت.
ايريم: اصلي ونشتغل.
ترانيم: خوش ستعجلي.
كملت صلاتي واجت سوت عليه هجوم هي و زُموردة وياسيم حسيت نفسي من صدك عروس، كملت كل شي تسريحه بسيطه ومكياج خفيف بس خلت الروج احمر تكول يناسب الفستانين، سمعت دكة الباب طلعت زُموردة تشوف منو، سمعته يكول العريس اجه ابتسمت بنفس الوقت ماعرف شبيه خجلت كومتني للصالة مخليه كرسي يم باب الإستقبال وجابت انجانه بيها مي أو أورد خليت بيها رجليه وفتحتلي القرآن بين أديه وبين اصابيعي حبات هيل، رجع عقلي لا ارادي للماضي شلون جانت حياتنا قبل سنتين وشلون صارت هسه، هاي الكعده ذاتها صارت غصب عني بيومها واليوم كاعده بهذا المكان وسعادة الدنيا كلها بكلبي، اللي جمعتني بيه صدفة ونجبرت أوافق عليه وهسه وافقت عليه بكامل قواي العقليه،
سمعت صوت الشيخ بده يحجي خليت كل بالي يمه.
:مهيائيل مسوط تقبل الزواج من ايريم رضا على مهر مقداره 50 مليون مقدم و 50 مليون مؤخر اذا قبلت قول نعم.
مهيائيل: نعم.
:مستعجل مهيائيل.
مهيائيل: اي والله شيخنا لدرجه اريد هسه اخذها ورجع للبيت.
:الله يلم شملكم ويجمعكم دنيا وآخره تحت رحمته ورضاه.
رائف: شيخنا تره هي مرته بس هاي السوالف إعادة مشاعر لا أكثر.
:اول مره اشوف هيج عرسان يجددون العقد الله يديم افراحكم ابني.
مهيائيل: يحفظك شيخ.
:نكمل وي بتنا، بابا ايريم تسمعيني؟
ايريم: اي نعم شيخ.
:خوش، ايريم رضا هل تقبلين الزواج من مهيائيل مسوط على سنة الله ورسوله بالمهر المقرر اذا قبلتي عقدة النكاح قولي نعم انت وكيلي.
أجيت احجي كرصتني زُمردة رفعت راسي الها اشرتلي ماحجي شي ابتسمت وسكتت رجع حجه مره ثانيه نفس الكلمات.
:بابا ايريم اذا تسمعيني جاوبي، تقبلين بمهيائيل مسوط زوجاً لكِ؟
ترانيم: احجي ولج شكيتي كلبي انا تره الله يساعده شلون متحمل وماكام دفر الباب عليج.
زُمردة: هي مره بالعمر خلي تشلع كلبه شويه شكو بيها ياعيني.
ترانيم: شوفي هسه اذا ماسوه علينا هجوم وكولي ترانيم كالت.
من شفت الوضع ميتحمل سكوتي أكثر نطقت لأن فكرت مهيائيل ماعنده رادع هسه يدفر الباب ويفوت وهيج يوم حلو ماريده يخرب.
ايريم: نعم قبلت انت وكيلي.
شتغلت الهلاهل من الستات اليمي بس اللي ضحكني صوت اخوانه وهمه يهلهلون، دمعت عيني من الفرحه ساعدتني ترانيم كمت وكعدت على القنفه شويه ونفتح الباب داخل لابس دشداشه بيضه وغتره بيج، محبسه وساعته اللي تضيفله جمال، وكف مقابيلي نزل جسمه مقبل راسي بعدين خدودي وكعد بصفي ساحب أيدي بين أديه وعطره تخلخل بروحي، تذكرت الموقف من لبسني حلقه غصب طردت هاي الأفكار من شفته طلع من جيبه علبه حمره فتحها بيها خاتمين واحد إلية والثاني اله خله عينه بعيني وهو يطلع الخاتم ويلبسني اياه واني سويت نفسي الشي ملبسته، فتح غترته مسويها ساتر وسرق قبله مني وترانيم والباقيات راحت حنجرتهن من الهلاهل، خجلت لكن بنفس الوقت مستمتعه بكل لحظه دتمر بهذا اليوم، عدل نفسه كاعد وكال بثقه.
مهيائيل: ها اها جددنا العقد راح اخذ مرتي ونديح واللي يفكر يفتح حلكه وياي بكلمه ويعترض العن والديه.
عفته وكمت لأن مستحيل أكدر اتحمل سوالفهم، غيرت ملابسي لبنطلون وبدي ولبست عباتي وحجابي وره ممسحت المكياج وطلعت لكيته منتظرني رحنا للسيارة وخلص الطريق كله لازم أيدي بين أديه وضحكتنا ثنينه واضحة، فرحة اساسها وجودنا بحياة بعض وهاي هي السعادة الحقيقيه من يكون الشريك مكمل الك مو مفروض عليك،
وصلنا لشركه مالت اثاث نزلنا نختار غرفة، جانت غرفتنا قبل حلوه وجديده بس الوانها بناتيه ومن زمان عاجبني اغيرها لكن الظروف وقتها مسمحت فاختارينا هاي المره ألوان كلها نزاكه ورقي، احب اللون الأبيض وبيه خيط ذهبي احسه هيج ملكي وفخم، اختارينا هيج تصاميم وهو كال يغير كل اثاث البيت ويسوي ترتيبات جديدة بيه شجعت الفكره لأن احنه بحاجه لطاقة مختلفه تساعدنا نكمل براحة بال واستقرار نفسي،
خلصنا شغلنا هنا رايحين للمطعم قضيت وقت ولا اروع وذكريات ندفنت داخل الروح، متت تعب طلبت من عنده نرجع رفض كال تعالي نختار بدله، وبقى مصر حتى رحنا نختار ملكيت شي من اللي جان مرسوم بعقلي تركنا ورجعنا للبيت مأجلين هذا الموضوع لباجر، ثاني يوم الصبح اجه من وقت تريكت سريع لأن مستعجلني نطلع، من كد الفره بالسوك راحت رجليه أخير شي وكفت ودكيت رجل يرجعني حلف هذا آخر محل اذا ملكينا اللي نريده نرجع معارضت لأن باجر يريد نسوي العرس على رغم رفضي القاطع بس هو مصر يكول احنه متزوجين من الأساس وهذا مجرد تجديد لتخلينا نطول بيه،
اول مدخلت للمحل صارت عيني على بدله بيها حمالات بدون ردن ظهرها كله ماكو، مخصره على الجسم ومن جوه منفوشه بشكل بسيط مو أوفر، اباوع عليه وباوع عليها ضحك على تصرفاتي ومقبل نأجرها اشتريناها ورجعنا ميته تعب بقيت نايمه بفراشي لليل ثاني يوم كعدت من الصبح سحلتني ترانيم سحل، كومي اليوم عرسج كمت اركض مقبلت اروح للصالون ترانيم هي موجوده وتساعدني وفعلاً مكياجها وترتيبها يجنننن شكد لحيت عليها تفتح صالون مقبلت،
لبست البدله البيضه ودخل زوجي حبيبي لابس ابيض مثلي وبشت اسود وعكال ضايفله هيبه وجمال لازم أيدي بين ايده ماخذني بين احضانه، ضحكنا وركصنا و زُموردة وترانيم وياسيم يصورن ويهلهلن، أجواء نستني الماضي بلي بيه ومن هاي اللحظه حسيت نفسي من صدك بديت بداية جديده،
لبسني البرنص لازم ايدي مطلعني للسيارة مشغل اغنيتنا اللي حفظتها من كد مسمعتها.
وقف السيارة ونزل قادم بأتجاهي فاتحلي الباب ومنزلني لازم أيدي بين أديه دخلنا ماعرف وين رفع عني البرنص نتبهت للمكان استوديو مال تصوير، ابتسمت بأتساع اليوم صار متكامل من كل شي، اخذنا صور بوضعيات مختلفه وابو الطلايب صار مستهتر اليوم بشكل مو طبيعي مترك حركه تعبانه مسواها كدام المره خلاني اشتعل ونطفي من الخجل، خلصنا هذا الوقت الجميل وجان ختام ليلتنا بالفندق فتح الباب مدخلني ودخل قافله، نزعت البرنص وهو شمر البشت والعكال معدل شعره متقرب مني ساحبني لحضنه محاوط خصري بين أديه كايل بكُل حب ونبرة تطرب مسامعي الها.
مهيائيل: اليوم من صدك اكول بدينا علاقه نظيفه مليانه حُب بعيدة عن السحر والشياطين والناس المنافقه الجانت موجوده بحياتنا، اهلاً وسهلاً بيج بداخل حياتي للمره الثانيه ولنهاية العمر ياجهاتي الأربع وقلبي وعمري وكياني ووريدي وشرياني وأبهري ودعاء امي المستجاب.
ايريم: كل الغزل يوكف استعداد لهاي الكلمه، من كلتها واني حسيت بيك حبيب لقلبي زوجي ابو السحوره.
مهيائيل: مو تبنا ليش تخلينا نرجع!!
ايريم: راح تبقى الطف سحار عرفته بحياتي كلها والأقرب لروحي.
مهيائيل: تدرين مشتاقلج؟
ايريم: لا مادري.
مهيائيل: تعالي اشرحلج لعد داده.
ضحكت ونتهت هاي الليله على اجمل مايكون، الأيام تمشي بسرعة مر اسبوع كامل واليوم وبعد معاناة وإصرار ابيل وي اهله وافقت عمتي بالإجبار وتحت التهديد تجي تخطب ترانيم، دخلت يمها للغرفة تغني والضحكه شاكه الحلك نازعه الأسود ولابسة فستان بيج مخصر على الجسم وهي ضعيفة وطويله طالعه تجنن، تخط بالكحل وتغني.
ايريم: هاااا هاااا اغاني وكذا.
ترانيم: اخيج واحد وكيح مايكعد عاقل يوميه يدزها إليه خلاني انحرف واسمع أغاني، هاي من بدايتها توفقنا لعد.
ايريم: ههههههه، لا والله انتِ حرفتي الولد جان ابد ميسمع اغاني خليتيه يصير مستهتر.
ترانيم: والله اكله حرام بس هو يكول لا هاي بسببج شلون ملوعه كلبي.
ايريم: ايا ملعون أبيل طلع يعرف يتغزل.
ترانيم: اي لعد هي صعبه انتِ بس انطي مجال اله هو يبدع من وحده.
ايريم: والعباس اخوي راح يضيع يمج انتِ مابيج أمان.
ترانيم: ههههههه، ماطول حبني يتحمل هاي انا وهاي سوالفي قابل بعد شيباتي اخجل منه يخساااا.
ايريم: واذا كمتي ترجفين؟
ترانيم: عليمن ارجف يمه تعالي بليلة عرسي وشوفي شنو اسوي اصفنج.
ايريم: أعوذ بالله منج ومن عرسج، جهزي نفسج بسرعة شويه ويجون.
ترانيم: هاي كملت بس اجر الكحله.
ايريم: تخبلين بدون كحله.
ترانيم: ماتشوفين شلون وكعت اخوج بغمزه.
ايريم: لاداده وكعتي بسوالفج.
ترانيم: مابعد الكره عشق وهيام.
ياسيم: بعدجن كاعدات العالم اجوي كومن يلا.
ترانيم: عيب انزل أول وحده روحن كدامي واجي وراجن.
ايريم: لا ماكو هيج الزم ايدج وننزل سوه.
نزلت قبلنا ياسيم واني وترانيم نزلنا سوه دخلنا الصاله وكعدنا وحده بصف الثانية، عمتي اول مشافتني كامت تريد تسلم احترام لترانيم ولأن ماريد اخرب فرحتها سلمت عليها بس بقيت ثكيله وياها بالكلام تمت الخطبه الحمدلله وحددوا موعد العقد اخوي مستعجل حيل لدرجه يريد باجر يكمل كل شي، ثاني يوم الصبح بدينا تجهيزات الصاله والكوشه وهاي السوالف هي لبست ابيض واني لبست الفستان الأسود اللي شتريته بخطوبتي، كعدت بالباب مالت الإستقبال عمتي مبين من وجهه مجبوره متريدها بس كدام أبيل متكدر تعترض تم العقد وصارت مرته شرعاً وستلمناها هلاهل رجعناها كعدت على الكوشه شويه ودخل لابس قاط اسود ومرتب شعره واللحيه ردت احضنه وبجيت من تذكرت هو مو اخويه هو حس بيه باوعلي وبتسم وراح كعد بصفها وبقوا يتهامسون وترانيم بعد ماتعرف شنو الخجل.
:من عقدنا وسمعت صوت موافقته كلبي دكله وحسيت نفسي هسه وكعت بالحب من صدك، حب وحارب علمودي ويستاهل من عندي افتح صفحة جديده وياه، دخلي لابس قاط ومبتسم الأسود ضايف جمال على جماله كعد بصفي نزل راسه هامس بأذني.
أبيل: الف مبروك يروح ابيل واخيراً فزت بيج وحصلتج بعد ما طاح حظ حظي والعن سلفة سلفاي.
ترانيم: استاهل هذا التعب.
أبيل: وحق ربج اي.
ابتسمت وتصنعت الخجل بعد هذا العمر ماكدر امثل عليهم انو اني ميته مستحه بس الوضع يجبرني حتى محد ياخذ عليه نظره غلط ويكولون مستعجله خاصه امه اللي ولا اطيقها،
جابتله ايريم الخواتم فتح العلبه مطلع الحلقه ملبسني أياها رفعتله راسي مبتسمه بادلني اني هم سويت نفس الشي ولبسته خاتمة، راد يلبسني الكلاده لزمت ايده هيج مشاهد رومانسيه ملازم تصير بالعلم نضمها ليوم عرسنا، من حقه يعيش أجواء مفرحه وكلته وكلني ومعارضت هذا الشي علموده بس والا هاي الأمور كلها متهمني، عقلي يختلف عن عقليته ولازم اتأقلم على هذا الفرق وتحمله وحاول اتغير حتى نعيش براحه وسعاده، قبلني بجبيني مغادر المكان، امه ما باوعت بوجهه وصعدت لغرفتي،
مرت باقي الأيام بالتجهيزات والتحضير، هو كان مرحب بفكرة العرس البسيط لا قاعة ولا شي بعدها نروح سفرة لإيران عندي جواز وهو كمل الحجز بيوم العرس خلصت الزفه ورحنا مباشرة للفندق ومن هنا بدت حياة جديده مختلفه تماماً عن العشتها من قبل.
ايريم: شنو ناقص؟
زُمردة: بس خلي ملح على الزلاطه وحضري الطرشي وهاي هي.
ياسيم: خابر مهيائيل جابهم وراجع من المطار.
ايريم: خلينا نستعجل لعد.
زُمردة: اويلي شكد مشتاقتلها.
ايريم: والله اني أكثر صار سنتين ونص ممفاركتها ابد من بداية زواجي هاي اول مره هيج تغيب عنا.
زُمردة: فرحانه الها هوايه، الف الحمدلله نسعدت بالنهايه.
ايريم: الله يديم عليهم السعادة والفرحه ويرزقهم الذريه الصالحة.
زُمردة: آمين يارب العالمين يوم الألج هم.
ايريم: ان شاءالله.
رائف: هلاا بأم قحطان.
زُمردة: كم مره كتلك اسمه ياسين لطلعله اسم جديد الله يوفقك.
رائف: شبيج اسم قحطان يخبل شفهمج انتِ.
زُمردة: عفت الفهم الك ما اريده، خابرتهم؟
رائف: اي هسه يجون، اجيت اكلج اني صديقي خابرني طالع بقى ياسين بالغرفة روحي شوفي لتخليه وحده.
زُمردة: شعجب مو قحطان؟
رائف: ماطول مضوجج هذا الأسم بعد ماكوله خياشيم روحي.
ابتسمت على كلامه هو طلع واني صعدت فوك يم ياسين، صحيح حياتنا هادئة بس ابد متخلو من المشاكل على رغم هو حنين وسبورتي وشنو اللي اكله بيه يسوي بس عصبي اذا نهد عليه ميسكت مع هذا احبه مقصر ويايه بشي، بأيام ولادتي هو يسهر يم ياسين علمود أنام ويبقى كاعد يم الكاروك مالته اول ميبجي يشيله حتى ميخليني اكعد، ماكو علاقة زوجية سعيدة بالكامل بس التفاهم والحب والإحترام والثقه هي اللي تخليك تحارب حتى تكملون سوه وهيج علاقتي وي رائف كسر وجبر ساعة نتعارك ساعة نتصافى بس بكُل حالاتنا احنه أحباب،
شلت ابني نازله من شافه ميمون بحضني اخذه من عندي حاضنه ويبوس بيه، حابه علاقه الاخوه على رغم بالبداية جنت كلش خايفة وموت رعبه خاصه من عرفت بيهم سحره، الأصوات اللي اسمعها والصريخ القادم من الناس اليفتحولها السحر عذاب نفسي بحت، خو البزازين صارت صديقتنا الصدوقه بالبيت، اذكر مره جنه نايمين هاي بداية زواجي وفجأة صار صوت صياح قوي حيل ركض رائف واني وياه وحتى منتهبت شنو لابسه، وكفنه جوه الدرج والصوت جاي من غرفتهم مالت الأعمال، بنفس الوقت صارت ضربه بشباك المطبخ ودخلت بزونه راحت للغرفة بسرعة صرخت صرخه من الخوف حسيت جسمي تبنج وقررت يومها دقيقة ما ابقى بعد بهذا البيت، والمصيبة رفعت راسي لكيت ايريم واكفه وتضحك وشكلها غريب شكيت بيها حتى هي ملبوسه عافتنا وصعدت فوك، ومن حجيت وي رائف بموضوع طلعتنا زعل وعارض وكال تتعودين ماكدر اعوف أخواني ولان هو ادمي ويايه ومابيه مشكله متركته وتحملت وشرطت عليه من المغرب انت اهنا وابقى طول الليل بحضنه حتى أكدر انام، بعدين مع مرور الأيام تعودت،
هذا البيت عشنا بيه اسوء الأيام واحلاها واجمل شي بيه هو علاقة الاخوه مع بعض، دائماً واحد ساند الثاني رغم الظروف الصعبة العاشوا بيها،
رحت للباب ضاحكه من شفتها داخله النه والابتسامه مرسومه على الوجه والراحه مبينه بملامحها، حضنتها وسلمت عليها داخلين جوه.
ترانيم: فددد مشتاقةةةة اويلييي يابه.
ايريم: ها عيوني علمج الحليو على لهجته؟
ترانيم: فديته شكد كيوت ومحبوب.
ايريم: ههههههههه، ماطول بيها فديته يعني الوضع متأزم واصله مرحلة انتِ.
ترانيم: اي والله كملن غداجن بسرعة علمود نرجع لبيتنا، حسيت نفسي ولهانه عليه.
زُمردة: مبينه لازمه الرجال متخليه يطلع لمكان.
ترانيم: وداعتج بيوم الطلعنا ميعرف باب الحمام من باب الشقه متيهه.
زُمردة: خرببببب، هههههههه، شمسويه بالولد انتِ الله يساعده عليج.
ترانيم: شمسويه غير شهر عسل والعسل كدامه هو شعليه بالناس المهم يستمتع بوجود زوجته حبيبته كباله، مو زبنن؟
ايريم: لا زين ونص واحد وين يكدر يحصل مره مثلج مرتبه ومعدله وحلوه.
ترانيم: مو بله؟
ايريم: اي والله.
ترانيم: هسه يصير اروح اكعد يمهم لو عيب؟
ايريم: هههههههههههههه، ولكم داده بعد ماتحمل صار عندي مغص بسببها.
ترانيم: هاي شبيج!! من زمان كلتلج مكان الزوج يم زوجته تشوفه وتعرف سوالفه كلهن وتحافظ عليه من بنات الحرام.
زُمردة: من هاي الناحيه لتخافين الموجودين كلهم ولد حرام مو بنات.
ترانيم: شوفي عترفت بلسانها أخواني ولد حرام.
ايريم: وانتِ خايفة على رجلج منهم؟
ترانيم: مو اني ادري بيهم حافظتهم حفظ هسه يلزمه مهيائيل اكس مربع يزوعه العافية.
ياسيم: لا عمه مهيائيل حباب لتظلمين الرجال.
ترانيم: شوف هاي البطرانه، هو منو الظالم منو انا لو هو؟
ايريم: لا تحجين على رجلي ابو الطلايب لا نخرب تره.
ترانيم: عمت عينج، تخربين وياي علمود ذلك المعصعص!!
ايريم: شبيه معصمص احله من رجلج بألف مره، يخبل زوجي حبيبي.
ترانيم: هاك شوف اجه من سمع مرته تمدح بيه نافش ريشه.
مهيائيل: يحقلي مرتي وتمدح بيه شغاثج!!
ترانيم: ما غاثني خويه، اكلك داده عندي مشكله من يوم فاركتكم لليوم بس احلم بالبزازين يمكن اشتاقلي صار فتره مشفتهن.
مهيائيل: عندج تابعه اسبحي وتروح.
ترانيم: ومنو كلك انا خايسه ماسبح!!
انطيني حبشكلاتك حتى أسويها.
مهيائيل: اكتبي بموبايلج هاي التعليمات وسويها (تخلين على بطل مي صم ملح خشن وياس وتقرين (٢١ مره الحمد) اما (التوحيد، الزلزلة، المعوذتين، ايه الكرسي) كل وحده سبع مرات وتسبحين بيهن يوم الجمعه والاثنين قبل صلاة الضهر لمدة ست مرات كل مره تعيدين الأعمال يعني ميصير تسوينهن مره وحده ولازم قبل صلاة الظهر، وآية الكرسي لازم آخر آية) بعد السبحة الثالثه تشوفين فرق.
ترانيم: اي والله تعذبت ماكدر انام بس اغمض عيني تطفر عليه.
مهيائيل: خاف مو بزونه هاي ولج رجلج ومشتبهه.
ترانيم: لا هذا اقفل عليه قبل مانام لتخاف.
مهيائيل: عفية بأختي السباعية، من كلت ماينخاف عليج مغلطت دوله وعلم انتِ.
ترانيم: اي شعبالك أعجبك.
مهيائيل: ليش متبقين اهنا يومين لمن يكمل البيت بالكامل؟
ترانيم: لا داده ماعوف رجلي وحده.
مهيائيل: ياكله البعبع، عجيز ولكت رجل.
ترانيم: بطل من هاي السالفه لا تصير مثله هم.
مهيائيل: ليش يكلج عجيز؟
ترانيم: اي عود يتغزل.
مهيائيل: وعلي انتِ احله منه، بس هي الزلم ثوله ماتفتهم.
ترانيم: بس انت تفتهم يخوي.
ايريم: كاعد تحجون على اخويه تره.
مهيائيل: عادي انتِ من العائله متسوين شي.
ايريم: مطمأن حضرتك.
مهيائيل: اي طبعاً قابل تبيعين زوجج ميصير.
ايريم: منو يكول؟
مهيائيل: هااا تبيعيني؟!
ايريم: شكو بيها اخويه هو.
مهيائيل: خوش عود خلي يفيدج اخوج.
زُمردة: يمعودين لتكلبوها عركه والناس منا عيب.
ايريم: اي يحجون على اخويه كدامي اكيد ما اقبل.
مهيائيل: لا افر عليج المحبس خليني تايب لهمود.
ايريم: هاج تفضلي ستلمي.
ترانيم: هاي لهمود شنو؟
ايريم: عود سمينه يعني.
ترانيم: انتِ سمينه!!
ايريم: غير اخوج خابصني كلما شافني كال لهمود.
ترانيم: روح افحص نظر عيوني مبين سالفتك مستعصيه انت مالك جاره.
مهيائيل: شعرفج انتِ عجيببب بسرعة حكمت بدون ماتشوف.
ترانيم: ششوف غير هاي كدامي!!
مهيائيل: عندي نظر خاص حلوه هاي.
واحنه نسولف دخل ميمون يحجي عليه.
ميمون: صار ساعه منتظرك ملعون الصفحة اجيت تكلهن يصبن غده لو داك وياهن سوالف!!
مهيائيل: من شفت هاي الوجوه الحلوه شبعت ونسيت الغده.
ميمون: عوف كلاواتك الرجال يريد يروح علمود يكمل البيت، ستعجلن وانتِ ترانيم لاياخذج الواهس كومي وياهن صبي.
ترانيم: عازميني لو عازمتكم؟
ميمون: خايبة لاتخليني اطفر عليج ام البيت انتِ ماعدنه هاي السوالف، يلا ستعجلي رجلج يريد يولي.
ترانيم: لا ما اقبلها منك لا تغلط عليه.
مهيائيل: انا الساني بعد ماكدر الزمه اروح يم رجلها احسن.
ميمون: ماشايفه رجل عوذه.
ترانيم: وين شايفه؟
مهيائيل: بالعباس اختنا ستهرت امشينا منا لا انتحر بيها.
مابين ضحك وسالفه خلص اليوم، أبيل جان مأجر بيت بنفس المنطقة مالتنا قبل زواجهم مجرد رتبوا واشتروا اثاث ونتقلوا عليه، حياتنا هادئة مابيها شي يذكر مرت الأيام سريعة وصار وقت امتحان ياسيم كلنه متوترين وياها حتى خلصت بألف ياعلي وبقت منتظره النتائج نجحت بمعدل 80 طايره من الفرح واحنه على واهسها فرحانين،
كاعدين بالليل نتابع تلفزيون وكل واحد مخلي مرته بصفه بس ياسيم عينها بالموبايل ندك الباب شويه وفاتت الابتسامة شاكه الحلك كالت بفرحة.
ترانيم: باركولي ولكم راح تصيرون خوال.
كمت من مكاني بسرعة شبكتها فرحانه الها فرحة مو طبيعيه صدك صبرت ونالت وربنا مايعوف حمل مطروح لابد يجي اليوم اليعوض بيه.
ترانيم: جنت دائماً احلم اصير أم وسبحان الله بعد هاي السنين الطويلة ربي حققلي هذا الحلم اول مرحت للدكتور اسوي فحوصات وكالت حامل رجليه ماحملتني اما أبيل راد يشيلني بنص الشارع لو مو عيب، فرحتي مانطيها لأحد صدك صبرت ونلت وربي عوضني بزوج ماكو مثله مدللني وشايلني على كفوف الراحه ممخلي شي بنفسي يسويه حتى تنظيف هو ينظف ويتابع فيديوهات على الإنترنت ويطبخ، شكد ماكول احبه ما اوفي حقه، ايام من العمر مرت عليه حتى صار موعد الولاده والحاضره اكيد والمتركتني ابد اختي وحبيبتي ايريم البنيه اللي تغيرت حياتي للأفضل من تعرفت عليها لليوم مشفت منها شي مو زين، وانا بألم الولادة بجيت ودعيت الها بالذرية الصالحة لأن من صدك يستاهلون هي ومهيائيل يصيرون أهل ومحظوظ بيهم إلى أبعد درجه ابنهم،
وصارت عندي بنوته سميتها سكينه على اسم امي الماتت وهي بعمر صغير، نزلت دموعي واني اشيلها بين أديه واخيراً بعد هذا العمر صرت أم شنو اقدم لرب العالمين حتى اشكره وظهرله امتناني على عطفه ورحمته بيه، تقدم ناحيتي وكعد يمي ماخذها من أيدي مأذن بأذنها ابتسم بوجهي كايل.
أبيل: محظوظ صارت عندي بنيه من أكثر انسانه احبها بالكون.
ترانيم: اني المحظوظه بيك يروحي انت.
أبيل: احبج ياعطاء ربي بعد لتعب، احبج لدرجة احس كلمة احبج قليله بشعوري ناحيتج انتِ ساكنه بنص الكلب، يمي ومشتاقلج وأريدج، ما أشبع منج ولا امل شسويتي بيه يالعجيز!!
ترانيم: تستاهل شرشبيل وين تحصل وحده مثلي.
أبيل: لا اشهد لو افر الدنيا كلها مستحيل الكه مثلج.
ترانيم: اكسر رجليك نوب تريد تفر الدنيا دور على وحده تشبهني.
أبيل: هو انا أكدر، وداعتج كاعد ادعي اكبر بسرعة حتى اطلع تقاعد وابقى مكابلج وكاعد طول اليوم.
ترانيم: احبك وعسى ربي مايحرمني منك طول العمر.
أبيل: اموت عليج والخلقج يالعجيز.
ترانيم: شوكت تبطل هاي السالفة، اربعينية مو عجيز انا.
أبيل: عجوزتي بس انا وبس غزل وعيونج.
ترانيم: اي اضحك عليه بهاي السوالف.
أبيل: هاي الكلمه خلتج تتربعين بنص كلبي وتمشين وي النفس.
ترانيم: احبك.
أبيل: اموت عليج.
ترانيم: خلينا نرجع لبيتنا.
أبيل: تدللين من عنيه الثنين.
ابتسمت ودعيت ربي يديم علينه هذا الحب والنعمه وميحرمنا من بعض، رجعنا لعشنا وعشنا اسعد أيامنا وي سكينتنه الحلوه.
___
ايريم: وينك اليوم؟
مهيائيل: راسي مصدع كلش ايريم اذا اكو حباية بندول جيبيها إليه.
كمت بسرعه جبتله حبايه وكلاص مي شربها وسويتله مساج لراسه حتى رتاح شويه وغفى وهو بحضني، ماعرف شبي هاي اليومين اغلب وقته ضايج ويجي بوقت متأخر ومن اسأله ميجاوبني، بقيت العب بشعره شويه ونزلت راسي قبلت جبينه فز دار وجهه إليه عيونه حمر دم رفع ايده ومرر اصابيعه على وجهي كايل بنبره حنينه.
مهيائيل: ايريم لو مصار عدنا أطفال شنو يصير؟
ابتسمت بوجهه مجاوبته.
ايريم: وجودك بحياتي اهم من ألف طفل، اريدك انت ماريد الأطفال.
مهيائيل: لو ماكدرت اصير اب هم راح تعوفيني؟
ايريم: مستحيل، ابقى وياك لآخر نفس، لو يصير موتي مربوط بيك هم ما اعوفك، حبي ألك فاق المعقول مهووسه بيك انا مهيائيل.
مهيائيل: من حقج تصيرين ام.
ايريم: واصير ام منك انت وبس، الايد اللي بقت لازمتني باصعب الأوقات احاله يجي يوم اعوفها بيه.
مهيائيل: ماريد اظلمج وياي.
ايريم: انتِ كاعد تظلمني بهذا كلامك، افهم انو اني احبك وماريد غيرك، بعد ما عافوني أهلي لتفكر تعوفني والله اموت بعدك ماتحمل.
مهيائيل: اشششش مستحيل افكر مجرد تفكير اتركج، ولج اذا ماشم ريحتج وشعرج يصير على وجهي ماكدر اغفى، بس.
ايريم: لابس ولا شي ربك هو كاتب وشوكت ميريد يرزقنا، المهم اني وانت سوه وماريد أكثر من هيج.
مهيائيل: يادعاء امي المستجاب وفرحتي، ماغلطت من كتلج هاي الجمله.
ايريم: شنو رأيك نروح للزيارة؟
مهيائيل: هسه؟
ايريم: اي هسه، كلما نقرر تتأجل خلي نسويها بهاي الساعه.
مهيائيل: كومي بدلي راح انزل أشغل السياره.
بسرعة كمت لبست عباتي وحجابي ونزلت حتى مغيرت ملابسي حسيت بهاي روحتي هسه ربي راح ينطيني حاجتي كلبي كلي مشكلتج يم الحسين عليه السلام تنحل، خلص الطريق كله قرآن ومايحجي ولا كلمه حتى وصلنه، مشينا اني وياه صارت القبة كدام عيني دخلت للضريح بعد معبرت من التفتيش نزلت دموعي وحده تتبعها الثانية رحت كلي لهفه مجان ازدحام لان الدنيا ليل لزمت الشباك ودعيت من كلبي،
بحق رضيعك ارزقنا الذرية الصالحة، لتخليني اعيش بحسرة كلمة ماما، أريد طفل يملي بيتي بصوته وبوجود أبوه، انت وسيلتي لرب العالمين واجيتك بهل ليل لأن اعرف حاجتي يمك تنقضي، عشت سنين وياه على الحلوه والمره لتخلي مجرد هيج موضوع يخرب علاقتنا، مو صعبه عليكم تقضون حاجتي وانتم وسيلة الله لعبادة، اذا نطيتني مرادي هاي من شيم الكرم الموجوده عدكم واذا رديتني فأكيد لسبب مقنع، انا حرمه والحرمة بشارب الخير واجيتك بملابس البيت لأن همي بس الله وأنتم تدرون بيه شنو، هنا وتنقضي يا أبا عبدالله ماريد يعبر شهر الا وسامعه خبر يسر خاطرنا اني وزوجي.
بجيت ودعيت وقريت قرآن، ضريح الحسين والدعاء بيه راحه مابعدها راحه، طلعنا ورحنه لابو الفضل العباس قمر العشيرة عليه السلام دخلنا للضريح وهم سويت نفس الشي دعيت بحركة كلب، كملنا وبقينا كاعدين بين الحرمين هو يقره قرآن واني صافنه على القبب الطاهره ودموعي تنزل، ماريد تخرب علاقتي بيه لأن لا محاله راح يبقى يفكر بيه ويشيل همي هاي غير انو هو ديكبر بالعمر ويريد يشوف أطفاله ويربيهم على ايده،
كمل ولزم أيدي ابتسمت بوجهه كايله.
ايريم: عندي ثقة كامله بيهم من بعد الله صدكني راح ينطونا حاجتنا لتشيل هم مصار هوايه من تزوجنا، الحياة كدامنا طويله ان شاء الله ونصير أهل.
مهيائيل: الدكتور يكول عندي درجه عاليه بالعقم صحيح انطاني علاج بس داخلي فقد الأمل.
ايريم: اني وياك ونتغلب على كل الصعاب ومن تكون الشغله يم رب العباد ماكو لادكتور ولا غيره يكدر يكول شي، الاقدار بأيد الله تفائل ياعمري انت.
مهيائيل: هاي عقوبه إليه بسبب شغلي قبل استاهل اللي يصير بس انتِ مالج ذنب.
ايريم: شوف وحق هاي القبتين اللي يناطحن السماء بشموخهن ورفعتهن والخلقهن وخلاهن رمز الحق وأساس الجنه والنار، ما اعوفك لو اعيش عمري كله بدون اطفال، وجودك بحياتي اهم من كل شي ثاني بهالدنيا، ريحلي كلبك اني مايهمني شي غيرك انت.
مهيائيل: احبج.
ايريم: اعشقك.
مهيائيل: نرجع؟
ايريم: بكيفك.
مهيائيل: ماعدنا شي خلينا هنا بس اذا تعبتي كولي حتى نرجع.
ايريم: تعال نام على رجلي.
مهيائيل: لا عيب ميصير كدام الناس.
ايريم: لعد خلينا نرجع ميصير تتعب هيج.
مهيائيل: البقاء اهنا راحه إليه.
بقينا كاعدين لصلاة الصبح صلينا وكملنا ورجعنا للبيت مرت ثلاث اشهر على هاي الحادثه، علاقتنا طبيعيه بس الهم والحزن مبين عليه، قررت افاتحه بالموضوع ونروح نعالج سوه خليته يتغدا ويرتاح وحجيت اللي عندي.
ايريم: اريد اروح للدكتوره.
مهيائيل: ليش شبيج؟
ايريم: مابيه شي بس اني مرايحه ابد اسوي سونار وهاي الأمور يعني انت تعرف.
مهيائيل: ايريم اذا بيج شي احجي باباتي لتخليني اقلق.
ايريم: والخلقك مابيه شي بس هيج اريد اروح اذا متريد عادي ماكو مشكله.
مهيائيل: لا ماعندي شي نروح الساعه بالاربعة حضري نفسج انام شويه وكعديني.
ايريم: تمام حبيبي.
دخلت للحمام سريع كملت ومشطت شعري شفتها الساعة اربعه لبست كيلوت اسود وقميص نيلي وحجابي رتبته خليت العبايه على أيدي ورحت كعدته.
مهيائيل: كملتي؟
ايريم: اي.
مهيائيل: انزلي جوه بس البس واجيج.
ايريم: تدلل حبيبي.
نزلت لكيت ياسيم تاكل تفاحه شويه واجت زُمردة شايله ياسين وتلعب بيه.
ياسيم: وين رايحه؟
ايريم: اريد اروح للدكتوره.
زُمردة: اسم الله داده شبيج؟
ايريم: فحوصات والله.
ياسيم: شاكه بشي؟
ايريم: لا.
زُمردة: يارب هيج وترجعين وعندج بشاره وحق ربج تجهيزات الولادة كلها عليه.
ايريم: يروحي تسلميلي.
ياسيم: اني اخلي يمي بالليل حتى تنامون براحتكم.
ايريم: هيج تبجني.
زُمردة: لا يمعودة الله يبعد عنج الهم والغم، اني متفائله كلش.
ايريم: الله يسمع منج.
زُمردة: اكلج شخبار الشسمها؟
ايريم: والله ناسيه آخر مره شوكت بس هي كل فتره هيج مو مضبوطه.
زُمردة: بلكي هيج وربج.
ياسيم: عندج اعراض؟
ايريم: لا كل شي ماحس.
زُمردة: ميخالف مو كل الحوامل يحسن بشي، اني من صرت حامل متوحمت.
ايريم: العلم عند الله، ادعلي.
زُمردة: بكل صلاة وحق الله ماناسيتج.
ياسيم: حتى صديقاتي خليتهن يدعلج وعلي.
ايريم: ماعرف شكول ربي عوضني بيجن من صدك.
زُمردة: لتكولين شي خوات احنه والزاد والملح بالشريف يغزر.
ايريم: اي والله يغزر.
نزل مهيائيل طلع بدون كلام واني مشيت وراه، طول الطريق صامت منطق ولا حرف حتى وصلنا، دخلت للدكتوره سولفتلها عن كل شي كلتلي سوي تحليل دم سويته وبقيت منتظره نص ساعة راح جابه ودخلتلها باوعتله وباوعتلي وكالت.
:زوجج موجود؟
ايريم: اي منتظرني بالباب.
:خلي يفوت اريد احجي كدامكم سوه.
ايريم: دكتوره اذا اكو شي مو زين لتكليله ميتحمل احجي بس كدامي.
:لتخافين ماما ماكو شي بس اطلعي صيحي وتعالي.
كمت من مكاني اشرتله ودخلنا سوه هي من شافتنا هيج متوترين وادينا ترجف ابتسمت مطمنتنه كايله.
:صار شكد ماعدكم اطفال؟
مهيائيل: اربع سنين تقريباً.
:وهسه انتِ حامل ماما الف مبروك.
صفنت بوجهه ماعرف شنو احجي درت وجهي اله هو باوعلي بصدمه رجعت كالت.
:ماما والله حامل هذا التحليل كدامي، وشرطت تدخل وياها حتى اشوف فرحتك بهذا الأمر على كد محجت عليك وخايفه على صحتك بسبب هذا الموضوع ردت افرحكم سوه، وللتأكيد روحي للغرفه البصفي سوي سونار وتعالي نقراه.
مهيائيل: دكتوره متأكده؟
: اكيد شلون يعني مامتأكده حامل ميه ميه بس خلي تسوي سونار نشوف شكد عمر الطفل.
طايره بالهوه مشاعري ماكدر اعبر عنها بشي خلصت المسافه اللي بينها وبين السونار بس احمد الله وشكره على عطائه وفضله وكرمه علينا، سويت سونار ابتسمت بوجهي الدكتورة وكالت.
:تردين زوجج يدخل اصيحه؟
ايريم: اذا يصير اي.
طلعت صاحته ودخل لازم أيدي بين أديه شويه وسمعت صوت دكات خفيفه درت وجهي الها ودموعي نزلت.
:هذا صوت دكات كلب الجنين تسمعينه؟
من العبره مكدرت احجي شي بس اشرتلها براسي بمعنى أي ايده جعصت أيدي متحملت بجيت بشهكه كملت عدلت ملابسي كايمه أخذت السونار راجعه للدكتوره أخذته من عندي وكالت.
:عمر الجنين سبع اسابيع، هسه راح تبدي عندج اعراض الحمل انطيج فيتامينات وعلاج وكل شهر راجعيني، اذا تردين تحافظين عليه التزمي ولتشيلين شي ثكيل ولصعدين درج وزوجج اهجري خلال هاي الفتره.
مهيائيل: عادي اطلكها ورجعها من تولد اهم شي صحتها دكتوره.
:ههههههه، لا مو لهاي الدرجه الله يسعدكم ويتمملكم على خير.
أخذ من عدها العلاج وطلعنا اشتراه من الصيدليه ورجعنا للبيت اول مدخلت سحبني بالباب حاضني بكل قوته بادلته والدنيا مواسعة لفرحتي.
مهيائيل: ربنا ماقصر، وأن شاء الله نصير احله ام وأب بالدنيا كلها.
ايريم: هذا الشي واثقه بيه ابنا محظوظ بيك يروحي.
مهيائيل: ممنوع صعده فوك بعد راح ارتب الغرفه الجوه ونكعد بيها والبيت لو يصير حضيرة مال حيوانات متمدين اديج وتنظفين واضح؟
ايريم: واضح يروحي.
دخلنا لكيناها كلها مجتمعه من شافونا نضحك فرحانين زُمردة بسرعة هلهلت على الواهس ميمون وياها ضحكت على فرحتهم وحمدت ربي على هيج عائلة احسد نفسي عليها والله،
نتقلنا جوه أنام زُمردة تنظف بالليل وياسيم ماخذه العشا واشتروا غسالة مواعين وهذا جان مقترح الشباب علمودنا، خلصت هاي الأيام باسعد مايكون احس نفسي طايره من امشي مو على الكاع حتى دخلت بالشهر التاسع مجانت ولاده سهله بس الفرحه طغت على كل الألم وصرت ام لبنوته حلوه وعلى واهس ترانيم سميناها زاهده نحيي اسم امه الله يرحمه وأن شاء الله تكون بأخلاقها وصفاتها الحلوه،
مجتمعين كلنا بالصالة وفتح رائف موضوع متفاجأت بيه لأن احساسي جان بيهم واضح من زمان واخيراً اللي وصل الوقت اللي بيه نفرح بيهم.
رائف: خويه خطبوا بنتك مني.
مهيائيل: يجيب اهله ويخطبها.
رائف: عرفته؟
مهيائيل: بعدها الشياطين تلعب بعقلي تره.
رائف: خوش على بركة الله باجر ارجعله خبر.
مهيائيل: بشرط.
رائف: شنو هو؟
مهيائيل: بعد التخرج تزوج ماريد ينعاد الماضي.
ميمون: من شال تليد لحد الآن مرتاحين ونكطعت اخبارهم بعد متسأل عليهم مهيائيل؟
مهيائيل: خليهم بعيدين وكل شي يصير وياهم يجيني أول بأول.
رائف: اي والله فضحنا فضيحه بالمنطقة.
مهيائيل: ميكدر يسوي شي هسه عقل وخليته يشتغل صار مسوؤل لتخاف عليه.
رائف: هي مُزن شوكت تقدم ثالث؟
مهيائيل: هاي السنة ان شاء الله اقدملها.
رائف: والله تستاهل شاطره حيل.
مهيائيل: خليتها تدرس من اول منجحت من السادس لحد الآن، سلامي عليها أكلها تقرالي شي، اشوف بيها مستقبل ان شاء الله.
رائف: ان شاءالله.
مهيائيل: وانت ياخويه شوكت تزوج؟
ميمون: بعدني مامستعجل.
مهيائيل: شيبت شوكت يعني من يصير عمرك خمسين سنه؟
ميمون: مهرتي صغيره اريدها تكبر.
رائف: عليمن مخلي عينك خويه؟
ميمون: على بتك.
مهيائيل: طاح حظك اي والله.
ميمون: ملعون الوالدين اكوملكم وعلي هو منيله بت!!
رائف: السانك فالت فد مره.
ميمون: واصله عندي لطرف خشمي هسه اكوملكم بالنعال سكتو عني احسن.
مهيائيل: شبيك؟
ميمون: كايم انام انتم مبين ما من وراكم راحه تجي.
صعد معصب وكلنا مصدومين بيه هاي اول مره هيج ينكلب شكله، بقينا كاعدين شويه وكل واحد راح لفرفته، مرت سنين طويله على زواجنا وهسه عمر زاهده سنتين وسكينه بنت ترانيم تلاثه ونص اما ياسين دخل هو أكبر القوم اربع وعشرين ساعه كاعد يم زاهده ويعض بخدودها وذيج تصرخ،
نيمتها بفراشها ورحت فتحت حضن مهيائيل وختلت بيه اهنا الأمان والراحه لكلبي، ثاني يوم نخبصنا لان راح يجون يخطبون ياسيم اللي صار وجهه احمر على اخضر من الخجل.
:حبيته وهو بادلني الحب، جانت علاقتنا هادئة لطيفه مجرد سلام وسؤال بسيط من تخرجت من السادس ودخلت كليه هندسة نفط أهلي، أصر عليه يجي يتقدم بس اني رفضت ردت انتبه لدراستي وماخلي شي يشغل فكري غير النجاح، من وصلت للمرحله الأخيره متحمل أكثر من هيج او واجهني.
بتال: لشوكت ابقى منتظر مو والله عليتي كلبي.
ياسيم: اريد اتخرج، ماكدر اتحمل مسؤوليتين سوه.
بتال: ماعندي مشكله بدراستج حتى لو تردين تتعيين هم موافق، امي يوميه تسألني شوكت نروح نخطب، تعبت واني انتظر وافقي خلي نجي نتقدم.
ياسيم: خابر أهلي واخذ موعد الكلام الأول والأخير يمهم.
ضحك كايل: اي هيج من البدايه وريحيني.
ابتسمت دايره وجهي للجامه اغلب الحديث اللي يصير يكون بالسيارة بالبيت ابد ميتصل ولايدز رسالة وهذا الشي خلاني احترمه أضعاف مضاعفة لأن حبني من كلبه مو بالغريزه، من كال رائف راح يجي يخطب الليله كلها مكدرت انام احس نفسي تسرعت بعد آخر غلط سويته كمت اخاف من كل خطوه اخطيها بحياتي لازم ادقق وافكر هوايه يلا، بالأخير صفيت على انو اللي كاتبه رب العالمين يصير، ثاني يوم الصبح حضرت نفسي والتوتر يقره تريليون، لبست فستان بصلي بينصل على الجسم ومن سمعت بيهم اجو صار عندي مغص اول مدخلت للغرفه وشفتها حجيت.
ياسيم: بشاربج ماريد ازوج بطلت.
ترانيم: يااا يااا شبيج ولج ليش هيج ترجفين!!
ياسيم: خايفة.
ترانيم: من شنو؟
ياسيم: بلكي طلع مثله.
ترانيم: طردي هاي الأفكار من عقلج والعني الشيطان ونزلي امه واخته اجن علمود يشوفنج يلا كومي وياي ننزل.
ياسيم: عمه.
ترانيم: لاتخليني ابتلي بيج هسه، تره ادري بيج تحبيه ويحبج، وبما انو صبر عليج ونتظرج طول هاي الفتره معناها الرجال صادق ومشتريج ويريدج، هي بس رهبه لا أكثر صدكي بس تزوجينه وتعيشين وياه وتشوفين تصرفاته متكدرين تفاركيه لحظه بعد.
قنعني كلامها، نزلنه سوه من شفتهم اخذت نفس المره والبنيه حبابه واني كتشفت شكد هي طيبة كلب من وافقت اصير جنتها ماعدهم احد بالبيت بس هو او اخته وامه وابوه واني ماعندي مشكله اعيش وي اعيال اذا جانوا حبابين، حددوا موعد بعد يومين المشيه يمشي الوقت بسرعة لبست فستان أبيض للركبه وفتحت شعري ومكياج العائله برعاية ترانيم أكيد، الطقوس والعادات نفسها رجليه بأنجانه مي أو ورد وبايدي مفتوح القرآن وبين اصابيعي هيل تم العقد وصرت زوجته رسمياً، دخل لابس قاط نيلي وقميص أبيض كعد بصفي واخذ أيدي رافعها لشفايفه مقبلها لبسني الخاتم ولبسته قطعنا الكيك وركصنا وراح،
تمر الأيام بهدوء تام على البيت بالكامل خلصت امتحانات الفاينل وحددنا الجمعة العرس، طول الفتره الفاتت حضرت نفسي شويه شويه وجهزت اغلب اللي احتاجه بقت بس الأشياء البسيطة، الحنه صارت بس يم الشباب اني مقبلت اسوي ردته بس عرس، يوم الجمعه الصبح لزمني خواتي متركني منا للأربعة العصر، لبست البدلة البيضه والتاج على راسي شفت نفسي بالمرايه هاي المره راح ادخل بيت حابته من اعماقي عسى تكون حياتي القادمه بنقاء هذا اللون، نزلت وسوينا حفلة بسيطه بالبيت بعدين رحنه للقاعة ركصنا وصورنا وجانت ختامها بالفندق، نغلق باب من الماضي ونفتح واحد جديد مختلف تماماً وربما يجي العوض على شكل إنسان.
___
ايريم: الحياة بيها السعادة والحزن، المصيبة والفرج، أو وره كل عسر يسر مضاعف من ربنا، تمر الأيام بشكل طبيعي على العائلة، ياسيم حامل بالشهر الثاني وترانيم هسه محلله وهم طلعت حامل واني و زُموردة كبروا أولادنا وعايشين بهدوء،
اجتمعت العائلة السعيده كلها اليوم والأطفال يلعبون بالنص مسوين ضجيج محبب لقلوبنا كلنا، ومن بين السوالف قاطعهم بحزم كايل.
ميمون: اريد اخطب.
مهيائيل: بيها الخير منو سعيدة الحظ؟
ميمون: استاج اخت ايريم.
مهيائيل: بكد بنتك ميمون ميصير.
ميمون: مسلته لتمسلت البنيه احبها وتحبني ومن سنين وهي موافقه وماعدها مشكله وجبيره وعبرت العشرين وانتظرت تتخرج من السادس وتدرس جامعة يمي باجر اروح اخطب تجون وياي لو لا؟
مهيائيل: أمرنا لله شنسوي بعد.
همه يحجون واني صافنه عليهم شوكت حب وشوكت سوت علاقة!!
ثاني يوم صدك راحوا خطابة توقعت راح يرفضون عمتي وعرفها بس من رجعوا جانت الصدمه يضحك وفرحان عرفته سطرهم بسحر، خطبه وتحضيرات وعقد مطول شهر واليوم عرسها لبستها فستانها دارت وجهه إليه كايله.
استاج: اني مالي علاقه بلي سوو اهلي بيج كافي زعل مني تعرفين بيه شكد احبج وريدج.
ايريم: من شوكت حبيتي ميمون؟
استاج: جذاب ماحبه بس هو لح عليه يوميه يجي وراي للمدرسه وكم مره وكف السيارة كدامي خوف من الفضيحة كتله اذا تريد بيت اهلي موجود وتعال تقدم رسمي هو بسرعه دك صدره وكال وره ماتتخرجين من السادس اني عد بيتكم وصدك وفه وعده.
ايريم: متحبيه يعني؟
استاج: بس ماعندي مشكله اتزوجه، اني من زمان احب الرجال الواعي الفاهم.
ايريم: ميمون واعي فاهم!!
استاج: ليش شبي؟
ايريم: مابيه شي ربي يسعدكم وأن شاء الله زواجة الدهر.
لبستها البرنص طالعين من الصالون اجه لزم ايدها ويسولف وياها بهمس ضحكت عليهم شوف شلون الزمن دوار ويلعب لعب والا منو جان متوقع ميمون يزوج استاج،
بعد ماخلص العرس كل واحد راح لعشه واحنه رجعنا للبيت صعدت لغرفتي عجبني اسوي عرس اليوم اني هم شغلت شموع معطره بالغرفه وغيرت الفرشه مالت الجربايه وعدلت نفسي، لبست فستان ستن احمر يوصل لنص الفخذ وشغلت موسيقى هادئه حتى تنطي راحه نفسيه النه، فتح الباب ودخل مبتسم شمر السويج ونزع الغتره متقدم ناحيتي ساحبني من خصري إله قبلني قبله خاطفه مراقصني ابتسمت بسعادة، طوينا الماضي بلي بيه مكدرت اسامح أعمامي وقطعت علاقتي بيهم نهائيا وكل فرد بهذا البيت عاش مرتاح، صحيح اكو مشاكل بس الحب يطغي على كل الصعوبات اللي تواجهنا،
مخليه راسي على صدره ويلعب بشعري كال بنبرة الحب المعتادة اللي يطرب كلبي الها قبل أذني.
مهيائيل: عطاء ربي ودعاء امي المستجاب كتلج اليوم شكد احبج؟
ايريم: لو تكولها الف مره كأن اول مره اسمعها منك.
مهيائيل: احبج لا بل اعشقج دلهومي.
ايريم: اموت عليك يا قُفلي والمفتاح.
مهيائيل: تذكرين خيرتي الج؟
ايريم: اي هوايه كلام مصار خاصه بخصوص استاج شكد خفت عليها وقتها.
مهيائيل: وهذا دليل على انو كذب المنجمون ولو صدقوا.
والآن
آن الآوان
لربط أحزمة الأمان
ومغادرة بيت يسكنهُ الإنس والجان
ونختم قصة بدت بالحرمان
بسبب الكتمان وغدر الزمان
وبشاعة الأنسان
ومن احضان الشيطان
لسجادة الرحمن
طالب العفو والرضوان
فأعطاه سعادة الأزمان
وعوضهُ خيراً بعد الفقدان
هو مهيائيل الساحر الشرير
والملعون الخطير
اليوم اصبح تائب عابد
ولرب العباد ساجد
وهنا نغلق الباب
ونعانق الأحباب
ونختم قائلين
وداعاً من الأعماق مع قُبلة طائرة للعشاق
النهاية
خُتمت يوم10/9/2023
وبقلمي 7/10/2023
الساعة 07:07
شكراً لحبكم وصبركم أو وجودكم وياي طول هاي الرحلة وأن شاء الله لنا عودة بقصة أخرى لكم كل الحب شمعاتي..
لا نقول وداعاً بل إلى اللقاء دمتم سالمين..
تعالوا يمي انستا راح انشر كل التطورات عن حياتهم هنا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!