للتواصل انستا/ zahraaahmedn99
لتنسون التعليق بين الفقرات والتصويت للبارت والمتابعه شمعاتي ❤️
مهيائيل
الكاتبة (زهراء احمد)
________
مهيائيل:
بينما الجميع ينظر لكِ بنظرةٍ عابرة أنا أذوب بتفاصيلكِ.
___
ترانيم: انتظري على الأقل يرجع مهيائيل وهو ياخذج ميصير طلعين بدون علمه.
ايريم: كليله من يرجع طلعت ماكدر ابقى اهنا منتظرته اكثر، كلبي شويه وينفجر.
ترانيم: اوكفي دقيقه البس عباتي واجي وياج.
راحت تلبس عبايتها عيني عليها وداخلي يريد ينفجر، عمري كله خلص بجذبه جبيره، اريد اعرف ليش هيج صار وشلون صار اصلاً، ومنو سمحله يسجلني بأسمه؟اسأله بعقلي تفتر دوختني وتعبتني وقررت هسه وبهاي اللحظة اروحلهم وأريد اعرف بيا ذنب يسوون بيه هيج ويحرموني من عائلتي،
نزلت وطلعنا من البيت، الخطوات القليله التفصلنا عنهم احسها مسافة سنة، صار الباب كدام عيني رحت بكُل قوتي دكيته ودموعي لازمتها غصب ماتنزل، بعد هاي السنين اكتشف اللي ربوني لاعبين عليه لعبه خطره شي مو بالسهل يعبر،
فتحت الباب اجت تريد تشبكني خليت أيدي على صدرها مبعدتها داخله للبيت.
ايريم: ليش جذبتوا عليه جذبه جبير، وليش اني على اسمكم؟
تسنيم: اني امج بعد روحي لتخلين مهيائيل يضحك عليج ويقنعج بغير حجي، اني اللي ربيتج وكبرتج وتعبت عليج وايامنا تشهد شلون جنه عايشين من قبل.
ايريم: هه اياميش؟ بعتيني علمود ابنج لساحر متعرفين أصله من فصله، وحتى مهر مطلبتي منهم كتله اخذها بعبايتها، اياميش هاي التحجين عليها مرت عمي؟ جنتي تشترين لبنتج وتعوفيني حتى يجي أبيل وياخذني للسوك غصب عنكم، وتسوين عركه ومشكله جبيره وتضربيني اذا سويت غلط بسيط واني طفله ما افتهم، ذكرياتي منج اغلبها مو زينه بس تحملت وصبرت وكلت امي وأخذت نظره على انو كل الأمهات نفس الشي من تخلي بنتها تنضف وتطبخ وتدرس بنفس الوقت، وكل هذا على صفحة وزواجي من مهيائيل بصفحة ثانيه مختلفه تماماً، عشت الرعب بأنواعه، ليلي ماكدر انامه كل دقيقه افز على صوت يمي شكل، ساعة هو ساعه ترانيم وابقى للصبح هيج،
ماشفتي شلون من يجي والعيون حمر والعصبيه طافره من وجهه وملامحه كلها مكلوبه ويصرخ ويعيط بوجهي بدون سبب ويكعد يكسر ويضرب على راسه من الألم ولازم اتحمل وما احجي شي والا تجيني ضربه بدون مايحس، تخيلي بس شلون عشت هاي الأيام وتحملتها وحتى وهو نايم يهمهم بأشياء غريبة، يحتر ويبرد ويبقى يرجف واني بس وحدي يمه، مرات يكون ملاك ومرات هو الشيطان بعينه،
شمرتيني بدون متحسبين حساب لشي وهسه يلا عرفت شنو السبب لهاي سوايتج.
تسنيم: والله حبيتج مثل بنتي بالضبط صحيح بالبدايه جنت قاسيه وياج بس اعتبرتج وحده من عائلتي وحتى ابوج نفسي.
ايريم: ابوي ميت ليش تجذبين عليههههه!!
تسنيم: ابوج سنمار حبيبتي، رضا تركج يمنا واحنه ربيناج، وحق الوالده على الولد لتنسين أيامنا الحلوه وشلون جنه عايشين قبل، لخاطر رباي الج ارجعي لهنا وشنو تكولين عليه يصير.
ايريم: رجعيلي سنين عمري الضاعت بسببكم، ورجعي هويتي السرقتوها، وبيتي وبيت أهلي وذكرياتي، رجعي طفولتي وايامي النسيتها، رجعي ذاكرتي الفقدتها بسببكم، رجعي رضاا الما راضيه عليه بذلك الوقت أكدر اسامحج،
وسفة انتوا اهل ذلك التحجين عليه جان احن عليه منج متركني ولا لحظه وبقى ويايه باصعب الظروف، انتوا الشياطين الحقيقيه مو مهيائيل، علمود السنين اللي عتنيتي بيه بيهن راح اتركلكم البيت بس من هذا اليوم لا اني اعرفكم ولا انتوا تعرفوني.
درت وجهي نيتي اطلع وقفني صوتها.
استاج: ايريم.
بقيت بمكاني غمضت عيوني بقهر وحجيت وي نفسي مصبرتها: حتى انتِ مو أختي.
طلعت من البيت ودموعي عشره عشره صار غواش عليهن ماكدر اشوف شي امسح وحده تنزل الثانيه اسرع، عقلي فارغ تماماً الهوسه كلها بكلبي، ماعرف شنو الحل والحجي البداخلي ماتشرحه الكلمات، شكد ما احجي محد يفهمني وصلت لمرحله طفى الكون بأكلمه بعيوني اريد بس اهرب لأي مكان بعيد واكدر اخذ نفس وانسى كل شي صار، زواجي والسحر وامي وابوي اللي طلعوا عمامي، وهويتي المزوره، أريد انسى ايريم ومنو هي بالكامل،
دخلت البيت نزعت عباتي ورحت لغرفتي شمرت نفسي على الجربايه صافنه بالسكف، شنو صار خلال الأيام المرت وشلون جنت عايشه، رفعت نفسي ماخذه الموبايل متصله بيه ومادري ليش مكتله شي عن ذاكرتي وطلعتي من البيت بدون علمه، كل اللي ردته بهاي الساعه اسمع صوته لا اكثر، فتح الخط كايل بنبرة اطرب قلبي لسماعها احس نفسي مشتاقتله اشتياق مينوصف كل شي غادر مخي بقى هو فقط موجود بيه.
مهيائيل: هلا بريحة امي، شلونج عيوني الثنين؟
دمعت من كال هيج سيطرت على نفسي كوه وجاوبته بهدوء.
ايريم: الحمدلله، انت شلونك؟
مهيائيل: ايريم بيج شي؟
ايريم: لا مابيه بس هيج شويه تعبانه، شوكت ترجع؟
مهيائيل: فد ساعتين بالكثير، وين كاعده؟
ايريم: بالغرفة.
مهيائيل: لتبقين وحدج يروحي انزلي يم ترانيم واني بس اخلص شغلي ارجع.
ايريم: تمام انتظرك لتتأخر.
مهيائيل: اروح فدوة للينتظرني انا.
ايريم: اسم الله عليك ابويه انت.
سكت الواضح عرف بيه تذكرت شويه وكال بتساؤل.
مهيائيل: ايريم تذكرين؟
ايريم: قُفلي والمفتاح حتى لو ينساك العقل لابد الكلب يبقى متذكرك.
مهيائيل: خليج بمكانج لتسوين شي خلي ارجع ونسولف ماشي يروحي.
ايريم: رحت الهم اني وترانيم مكدرت انتظرك ترجع، صحيح السويته غلط اطلع بدون علمك بس مو بأيدي متحملت.
مهيائيل: وليهمج اهم شي رتاحيتي.
ايريم: مو مال موبايل من تجي نسولف دير بالك على نفسك حبيبي.
مهيائيل: يادعائها لزاهده وريحتها انتِ، العن ابو الشغل مسافة الطريق واني يمج.
غلقت الخط ودخلت الحمام، صار فتره طويله مضيعه بيها نفسي وأريد ارجع لحياتي قبل وروتيني المعتاد، كملت وطلعت امشط شعري صفنت على وجهي اني شنو جاي اسوي؟ معقوله تخبلت لو الصدمه جبيره عقلي مكدر يستوعبها؟!
حجيت وي روحي اريد اسمع صدى صوتي: انتِ منو؟ ايريم رضا لو ايريم سنمار؟ حياتج وعمرج الخلص وانتِ عايشه وي عمامج على اساس همه اهلج ومن كتشفتي الأمر بقيتي ساكته بدون صوت، ماعبرت ومن رجعت للبيت خطرت على بالي هوايه افكار ولمت نفسي ليش محجيت هيج وقتها؟ ورجع اكول لا خلص افضل حل هو قطع العلاقة بالكامل، لا اني اعرفهم ولا همه يعرفوني بس بهاي الحاله اعيش مرتاحه، يمكن كاعد اقنع نفسي بهيج حجه لكن مابليد حيله لو بقيت أسعى حول هذا الموضوع ينتهي عمري واني ممستفاده شي،
تعبانه والنفس على كلبي ثكيل احاول اكمل بس بصعوبة احس نفسي مثل اعمى ويمشي على الجمر واخرس ميكدر يصيح أحد يساعده،
مسحت دموعي كايله من سمعت دكت الباب.
ايريم: فوتي داده.
دخلت على وجهه ضحكه ابتسمت الها مجاملة واضح هوايه أمور متغيره بهذا البيت من السعادة الباينه على ملامحها تقربت مني كايله بهدوء.
ياسيم: الحمدلله على السلامة يارب تنذكر ماتنعاد.
ايريم: الله يسلمج اللهم آمين.
ياسيم: اعرف الوقت مو بمحله بس اريد اكلج شي ومادري منين أبدي.
ايريم: من النقطه اللي تريحج.
ياسيم: شوفي اني من علاقتي الأولى بتليد قررت بعدها ما افتح صفحة جديده وي أحد واعيش عمري كله بدون زواج بس كلبي عارضني ودك مره ثانيه غصب عني ومحتاره وخايفه بنفس الوقت، انطي لنفسي فرصه وأبدي من جديد لو اخذ الماضي درس وماعيد التجربه بعد؟
ايريم: اول زواج الج مجان بدكة كلب ولا انتِ راضيه عليه اما الثاني وحسب كلامج يختلف، الإختيار الصح هو أساس العلاقة الناجحه والحياة بيها هوايه تجارب اذا فشلتي بالأولى مو شرط تفشلين بالثانية، اذا كلبج هاويه وهو رجال من صدك ويكدر يحتويج وهذا الشي تعرفيه من اسلوبه وياج وتصرفاته، الأهتمام والإحترام والثقه اهم عناصر بأي علاقه بين ثنين اذا تواجدوا يكونون حياة سعيدة لنهاية العمر، تشوفين بهذا الشخص هاي المواصفات؟ اذا جوابج اي وافقي اما اذا لا اتركي حتى لو دوسين على كلبج الحب يوم يومين وينسي وتكدرين تتجاوزين لكن الزواج لا بأي خلاف ومشكله تعضين الاصابع العشرة ندم،
وبالأخير الحياة حياتج والطريق طريقج وانتِ اللي راح ينسد عليج باب يمه شايفته كد هاي المسؤولية ويكدر يحافظ عليج خلي من باجر يجي يخطب، بالحلال كل شي حلو ومبارك هم، واني ادعيلج دائماً براحة البال والعوض الجميل.
ياسيم: فدوه لهيج كلام جنت كلش محتاجته صراحه.
ايريم: اني موجوده وياج بكل وقت لتترددين بيوم تجيني وتسأليني.
ياسيم: ربي يريح عقلج مثل مريحتي عقلي.
ايريم: اذا ابالج شي تسويه خلي وره السادس امتحني وكملي بعدين نخطبي، هاي مرحله مهمه لتفكرين بشي غير الدراسة.
ياسيم: اكيد طبعاً، اني اصلاً ماعندي شي وياه وحتى منحجي سوه، راح اكمل السادس بعدين ارد جوابي.
ايريم: ان شاءالله تنسعدين.
طلعت واني رحت سحبت الكرسي وكعدت مقابيل الشباك، الجو حلو والشمس مشرقه والسماء بيها غيوم متفرقه، المنظر مجذب ومريح للعين، خطرت بعقلي هوايه افكار رجعت بنفسي لأيام الطفولة من جان يلاعبني ويخليني على ظهره يفتر بيه البيت وامي تصيح عليه تخاف يتأذه لو اني اوكع، بجيت وندبت حظي بس بعدين ستغفرت وكمت توضيت وفرشت سجادتي وصليت من كملت نفتح الباب ودخل،
صفنت بوجهه شويه مشتاقتله حيل وأريد اطبع ملامحه بكلبي كمت سريع ولفيت أيدي على ركبته حضنته بقوة بادلني بلهفه وحب، لحظات ماردتها تنتهي واحنه نعبر عن مدا اشتياقنا وحبنا لبعض، مخليه راسي على صدره وأيده بشعري والثانيه لازم بيها أيدي ونتسامر بهدوء.
ايريم: تدري احبك؟
مهيائيل: تدرين اموت عليج؟
رفعت راسي مخليه عيني بعينه وكلت: لو فرضاً مارجعتلي الذاكره والحادث اللي صار ويايه سبب عندي إعاقة دائمه هم راح تعوفني؟
مهيائيل: ماكو انسان بالدنيا يعوف أمه، وانا اعتبرج بمقام الوالده.
ايريم: انت حظي بهاي الدنيا مهيائيل، تنطبق على علاقتنا آية( عسى أن تكرهوا شيئا وهو خير لكم )، على مقدار كرهي الك من قبل حبيتك أضعاف مضاعفة هسه.
قدم راسه مقبلني بهدوء ابتسمت بوجهه مكمله: اريد اسولف هوايه اليوم لأن بكلبي حجي مضموم من زمان وكلما اريد احجيلك اياه أأجل بس هسه مراح اترك يوم واحد بدون ماعبر بيه عن حبي ألك.
مهيائيل: انتِ الحسنة الوحيده المسويها بحياتي، وجودج اعتبره مثل النور بنهاية النفق، تسرين بدمي ومتصله بالروح، للحب أنواع وحبي الج مخزون بشوفتج كدام عيني.
ايريم: قبل شويه خطرت بعقلي فكره كلت اسويها وتراجعت لأن ماكدر اتحمل فراكك.
مهيائيل: ردتي تعوفيني؟
ايريم: لاا مستحيل اني حياتي كلها مافكرت ابتعد عنك باسوء اللحظات وحتى كلامي بداية زواجنا جان مجرد تهديد لا أكثر بس كلت ابتعد عن هاي الحياة فتره ومن استعيد طاقتي ارجع مره ثانية اكمل.
مهيائيل: وشنو المنع؟
ايريم: انت، من شفتك هسه ودك كلبي بعنف عرفت نفسي ماكدر ابتعد عنك ولو للحظه، اشتاقلك وانت موجود يمي شيصير بيه اذا فاركتك.
مهيائيل: حتى لو تردين اني ما اقبل تخطين خطوه عن حضني، مره من المرات كلتيلي حتى لو اني تركت إيدك لا تتركني لأن اكون مجبوره، وحتى لو ماتردين تبقين يمي غصب، زوجج سحار وحارب الكل علمود ياخذج ماعوفج وحدج علمود مشكله بسيطة تنحل بمرور الأيام وتصير سوالف.
ايريم: مره كتلي تتعايش وي الألم بس مستحيل تنساه وهذا الشي هسه قتنعت بيه، حسيتهم هسه ميتين مو صارلهم سنين طويله.
مهيائيل: ابوج جان خوش رجال يحبج ومدللج وهو رباج على ايده، بقى وياج لآخر لحظه، العقل ممكن يكدر ينسى بس الكلب احاله، احنه منتجاوز وانما نستمر متناسين الحزن.
ايريم: تشابهنا اني وياك هسه، مو بس انت امك توفت حتى امي طلعت ميته.
مهيائيل: امج دعتلي وامي دعتلج، وربج جمعنا بالأخير على رغم العقبات كلها.
ايريم: صرت زوجة ساحر القرن.
مهيائيل: اريد اتذكر وياج أيامنا الحلوه.
ايريم: بدينا.
مهيائيل: نجبي ولج صار أشهر كاعد عاقل لاتخليني انتحر بيج هسه.
ايريم: هههههه، اللي يسمعك يكول اني معترضه.
مهيائيل: من اكول مستهتره متقبلين.
ايريم: ههههههههه، شبيك حلوه السرسره مرات.
مهيائيل: اي والله خاصه من تصير يمج.
ايريم: تدري؟
مهيائيل: شنو؟
ايريم: احبك.
سحبني لحضنه وسط سعادة عميقه تتولد عندي بس من اكون يمه، رب العالمين اخذ اهلي وعوضني بيه، سند وظهر وعزوه وحبيب لقلبي وملجأي الما يشبهه أحد.
صار الليل وجتني نوبة الكآبه هيج وقت مكروه بشكل مو طبيعي من شافني هيج ضايجه اجه وكف يمي كايل.
مهيائيل: كومي لبسي نطلع نغير جو.
ايريم: هسه؟
مهيائيل: اي هسه بعدنا بأول الليل.
مكلت لا لأن أني بحاجه اطلع واشم هوه، غيرت ملابسي ونزلت طلعنا تعشينا بره وفرني شويه من مرينا على الفرع اللي بي اهلي حجيت.
ايريم: خلي نوكف هنا شويه.
مهيائيل: ليش؟
ايريم: اريد اشوف بيتنا بداخلي حنين لأيام الطفولة.
مهيائيل: ماشي اللي يريحج يروحي.
وكف على بعد مسافة قريبه من البيت، صفنت بيه مسترجعه أيامنا قبل بعد هاي السنين كلها تذكرت وجوههم شنو هي وشلون عشنا سوه، عقلي مسافر لبعيد فزيت على صوته وهو يكول.
مهيائيل: سولفي بلي مضوجج لتبقين كاتمه بكلبج ايرو.
مسكتت لأن صدك اني بحاجة اشاركه جزء من همي بلكي ارتاح من التفكير الماينتهي ومسوي عقلي ساحة كرة قدم كل دقيقه مكول بمكان مسببلي صداع ما إله علاج، درت وجهي للباب رجعت لعقلي ذكريات الطفوله الأيام اللي طمح الكل ينسيني أياها وبعد هاي السنين رجعت نحيت من جديد،
شفت نفسي اركض والعب وابوي لازم سبحته أو واكف بالباب يباوعلي ركضت وحضنت رجله شالني وباسني بجبيني مدخلني للبيت وهناك جوه اسمع ضحكات امي حجيت وبداخلي غصه ماتنوصف.
ايريم: بهذا المكان كبرت ودخلت مدرسة وعرفت الفقد لأول مره وي امي وبعد فتره قصيرة شفت ابوي سابح بدمه،
درت وجهي اله ونزلت دمعتي مكمله: طول الفتره العشت بيها وياك جنت تحجيلي عن امك وهوايه كتلك اتفهم شعورك بس هاي اول مره احس نفسي اعرف شعور الفقدان من صدك،
اني وياك هوايه نظلمنه امي ماتت من السحوره وامك ماتت من القهر وابويه مات عداوه وعمامي باعوني وشروني علمود بيت والله اعلم لو مو أبيل موجود وين اني هسه، تعبت لدرجه حاسه نفسي راح اموت فقط من الهم، ماكو احد يحس بشعوري غير اللي عايشه، كل عمري تسع سنوات بالأول امي اتروح من أيدي بدون ذنب والثانية ابوي الماعرف منو قتله، تتوقع يجي يوم واعرف منو السبب؟
مهيائيل: ما أعتقد لأن هيج جرائم اكو اشخاص يغطون عليها من الأحاله تعرفين بس ربج يعرف ويعاقبهم واحد واحد، لتشيلين هم لهذا الموضوع.
ايريم: مجنت متخيله امي وابوي الحاليين همه عمامي السارقين هويتي علمود مصالحهم الشخصية، عجيب الفلوس شكد تلعب لعب بالناس لدرجة يبيع ضميره وغيرته علمودهن.
مهيائيل: أساس المشاكل هي الفلوس والنسوان، وهوايه عالم راحت ضحيه لذني الشغلتين.
ايريم: الحياة عباره عن وهم مستمر بالاستمرار ولكن فجأة تصدمك انت وصلت للخط النهائي من المسابقه وصار الوقت اللي لازم بيه تنسحب، ولهذا السبب ربنا حذر من اتباع الهوى وأمرنا بالطاعة والعبادة لأن مندري شوكت نسلم الروح ونروح من هذا العالم المؤقت.
مهيائيل: انسي كل شي صار وخلي نبدي صفحه جديده بيها اني وانتِ وبس.
ايريم: أو أولادنا.
مهيائيل: تردين نصير اهل؟
ايريم: ليش متريد؟
مهيائيل: حاولنا سنتين ومصار اتركي الأمر لرب العالمين شوكت ميريد يرزقنا.
ايريم: والنعم بالله، اذا متريد نعالج ماعندي مشكله المهم عندي انت.
مهيائيل: اذا عندج رغبه تصيرين ام مستحيل اصير سبب واحرمج من عدها باجر ان شاء الله احجز يم الدكتوره ويارب خير.
ايريم: سمعني كلمتك الشهيره مهيائيل.
مهيائيل: يا قُفلي والمفتاح.
ايريم: لا مو هاي.
مهيائيل: انتِ دعاء امي المستجاب، يروح مهيائيل وراحته.
ايريم: اريد أغلق الباب على حياتنا من قبل ونبدي من جديد، عاجبني نسوي زفه وعرس وخطبه حقيقية، معشت هذا الإحساس وياك مهيائيل اريد اعيشه هسه شنو رأيك؟
مهيائيل: اخطب مرتي عاقلة انتِ داده!!
ايريم: اي شكو بيها اني وانت معشنا هاي الفتره سويها وخطبني تغيير جو ونخلق ذكريات جديده مليانه حب.
مهيائيل: مقتنعه؟!
ايريم: اي والله كلش، خطرت على بالي الفكره هسه حباب لاتكول لا بعدين انت مره اخذتلي خيره وكلت راح تلبسين الفستان الأبيض مره ثانيه حقق كلامك على الأقل.
مهيائيل: لا بله!!
ايريم: اي والله، كول اي فدوه حباب.
مهيائيل: ربي جاي تشوف.
ايريم: وافقت؟
مهيائيل: افكر بالأمر.
ايريم: معناها وافقت هلااا هلااا.
ضحكت على ضحكتها اصلاً احنه محتاجين هيج تغيير جو حقيقه، رجعنا للبيت لكيتهم كلهم كاعدين بالصاله هي صعدت للغرفه وانا رحت يمهم.
رائف: ها خويه اليوم وي المريه وناسينه، صدك لو كالوا اذا حضر الماء بطل التيمم.
مهيائيل: وهسه شرايد؟
رائف: سلامتك بس مشتاقين ردنا نشوفك.
مهيائيل: هذا انا يمك باوعلي وشبع.
ميمون: شبيك؟
مهيائيل: اريد افاتحكم بموضوع بس خلي تجي ايريم حتى يصير الحجي كدامها.
ترانيم: خيرك ابو الطلايب شنو الفلم الجديد خوفتني تره.
مهيائيل: ماكو شي لتخافين بس هي شغله جنت ناوي اسويها من زمان وماصحت فرصه وبما انو ايريم ستعادت عافيتها أكدر امشي بيها بعد.
ترانيم: هي شنو غير نفتهم!!
ميمون: هاك تفضل نزلت سمعنا شنو الموضوع؟
كعدت بصفه دار وجهه إليه وغمزلي كايل.
مهيائيل: قررت ازوج مره ثانية.
لطمت ترانيم على صدرها كايله بعصبيه.
ترانيم: ومرتكك!!
مهيائيل: معززه مكرمه بيتها وهي الآمر والناهي بس اني تعبت من هاي الحياة وحابب اجدد زواجي.
رائف: تجدد يعني ماتتزوج، كول هيج من الأول تريد تقنعنا تعوف العنكود.
مهيائيل: ابو كوكب سبيستون انجب وسكت لا اكوملك، أريد اخطبها منو يروح وياي؟
ميمون: روح وحدك عزيزي واذا سويتها صدك لا انا أخوك ولا اعرفك بعد.
ترانيم: بالعباس اتبره منك، أكو واحد يعوف هيج كيمر ويخلي على راسها شريجه!!
مهيائيل: شكو بيها الشرع حلل اربعه.
ميمون: شوف هاي السالفة بالذات مامقتنع بيها طبق قواعد الدين كلها بعدين روح للزواج تريد تثني وانت وحده مامدبر روحك وياها يوميه واكعين بمصيبة.
مهيائيل: ماريدكم رائف يروح وياي.
رائف: ادفنك وماروح وياك تخطب تحجي صدك ايريم هاي.
مهيائيل: وانا اخوكم ياهو احسن هي لو أنا!!
ميمون: هي.
مهيائيل: صريح طاح حظك.
ميمون: انجب لا اخلي النعال بحلكك الخايس يريد يزوج هسه كلنا بسم الله ردت عافية البت بس ماتكدر تخلي الفرحه تكتمل لازم ****** مثل ابوك عليمن تطلع قابل.
ترانيم: قبل متسوي اي شي انا اخذها وروح لبيتي، عمت عيني شوفها شلون صافنه علينه وعيونها حمر وحق الله متوقعتها منك عبالي زلمه وبراسك خير بس طلعت واحد **** مامن وراك منفعه.
مهيائيل: اي عفيه اخذيها، حتى اجي اخطبها منج.
ترانيم: شلون يعني؟!
مهيائيل: اريد اخطب مرتي منكم منو يصير مسؤول عنها؟
ميمون: انا بمقام ابوها تعال اخطبها مني.
رائف: وعلي ماكو غيري تخطبها مني.
ترانيم: ومنو كلك ننطيك بتنا!!
مهيائيل: انتم راضعين وي الشيطان طايحين الحظ سود الله وجوهكم توكفون ضد اخوكم بكل شي علمودها وهاي انا تعبت وربيت وكبرت هيج تاليها تبريتوا مني!!
ميمون: بنيه ماسمعنا صوتها، مؤدبه حبابه خلوقه، والنعم التربية والأخلاق انت واحد ساقط هتلي مهتلف شجاب هذا على هذا تحجي صدك؟
مهيائيل: بس انا اخوكم.
رائف: ولأن نريد مصلحتك يا خويه حجينا هيج.
زُمردة: راح تسوون عرس من جديد؟
مهيائيل: اي مريتي هيج تريد عاجبها نجدد العهد.
زُمردة: ربي يسعدكم ويوفقكم ان شاء الله يارب زواجة الدهر.
رائف: انتِ ام زواجة الدهر منو يكول احنه نقبل اصلاً؟
مهيائيل: ها ولك رجلها انا تره.
رائف: بس تريد تجدد الخطوبة يعني هسه هي تعتبر اجنبية عليك تنام يم البنات وباجر الصبح اني أخذهم وروح لبيت ترانيم ونحدد موعد تجي تخطبها.
مهيائيل: اكوم العن والديك ولك استجن لا اكوم.
ميمون: هذا القانون خويه هي تحرم عليك حتى تعقد عليها مره ثانية.
مهيائيل: شلون بيه وي المخابيل انا اكلهم مرتي ولكم مرتييي.
ترانيم: خلوها خطيه بس الليله باجر نبعدهم.
مهيائيل: تحجين صدك؟
ترانيم: حيرتنا تره غير انت تريد هيج عجيببب.
مهيائيل: كلت نريد تجديد عرس عاجبنا نعيش هذا الشعور مره ثانيه ونحس بيه بس مو تكطعون عليه المي والكهرباء.
رائف: والنت هم خاف تراسلها وتريد تحجي وياها ممنوع.
مهيائيل: بطلت ماريد مريتي يمي وبدون هاي اللغوة كلها.
رائف: ماكو هيج حجي خويه لازم تصير كد كلمتك ومتتراجع بعدين هن كم يوم لتكبر السالفة.
مهيائيل: حسبي الله ونعم الوكيل شورطنيييي!!
ترانيم: سوالفها هي جبرتك تسوي هيج، ربي يسعدكم.
اباوعلهم شلون يدافعون عني ومقبلوا عليه ومن كال راح اخطبها الكل راد يصير اهلي، العائله اللي دعيت بكل صلاة اتخلص منها هي نفسها الاحتضنتني وعوضتني اللي صار بماضيي الأسود، بعض المصائب هي نعم خفيه منحس بيها،
كل واحد صعد لغرفته واني ومهيائيل همات، اول مدخلنا سحبني من خصري لصدره حضنته من ركبته مقربه وجهي من وجهه سرق قبله سريعه من ثغري كايل بحب.
مهيائيل: مكتلج اليوم يمكن.
جاوبته بنفس نبرته.
ايريم: شنو هو المحجيته؟
مهيائيل: احبج دلهومي.
ضحكت وهو شالني بين احضانه، صافنه على السكف قاطع افكاري كايل.
مهيائيل: اخوج معجب بأختي.
ايريم: أبيل؟
مهيائيل: اي.
ايريم: حب ترانيم؟
مهيائيل: لهاي الدرجه واضحه سالفتهم؟
ايريم: جنت احس من عركاتهم راح يصير شي بينهم.
مهيائيل: مقبلت.
ايريم: ليش؟
مهيائيل: ميعجبها اخوج.
ايريم: ما اعتقد مشكلتها شي ثاني.
مهيائيل: انا هم كلت هيج، اختي واعرفها هي تفكر بطريقة علاقنيه متريد تدمر حياته وهو بعده شاب صغير، تفكر اذا قبلت يتحطم بسببها.
ايريم: ماكو هيج قاعدة بالحب، ربك يرزق الناس بدون ميتعبون لو نفكر بيها شويه نشوف كل شي بالحياة مُقدر النا، الدنيا منخلقت للراحه وانما للبلاء والألم لأن اصلاً احنه مغادرينها هي مجرد أيام متدري شوكت تنتهي، نكعد نفكر بأمور بعيده ويمكن الشي اللي نفكر بيه نموت قبل منحصله.
مهيائيل: اترك اقناعها الج.
ايريم: تريدها تتزوجه؟
مهيائيل: خوش رجال يكدر يصونها ويحافظ عليها.
ايريم: اهله يقبلون؟
مهيائيل: من طلبها مني سألته، كال هاي حياتي الخاصه مالي علاقه بيهم.
ايريم: عمتي تضوج اذا صار بدون رضاها.
مهيائيل: خليها تقتنع بيه ومشكلته محلوله.
ايريم: تسحرهم؟
مهيائيل: تبت.
ايريم: شوكت؟
مهيائيل: من صار وياج الحادث.
ايريم: هذا ثالث حادث، سبحان اللي يخليني عايشه وميموتني.
مهيائيل: سبحانه وتعالى قادر على كل شيء.
ايريم: تذكر من جنت تكلي راح أتوب؟
مهيائيل: اي والحمدلله تبت قبل مايخلص عمري.
ايريم: يارب الثبات والطاعة.
مهيائيل: اللهم آمين.
خلصت هاي الليلة بهدوء وسلام ثاني يوم الصبح نزلت جوه لكيت ترانيم كاعده وبصفها جنطتها والعباية وميمون لابس دشداشه وعكال ومخلي الموبايل بأيده، ابتسمت على منظرهم متحمسين أكثر من عندي، درت وجهي من سمعت صوته من ورايه.
مهيائيل: على خير وين النيه؟
ميمون: ناخذ بنيتنا لبيتها عود من تخطب نقرر نرجعها الك لو لا.
مهيائيل: ومنو كال انا قابل هاي هي هونه ماكو لاخطبه ولا بطيخ.
ترانيم: شوف وعلي اكوملك كاعده من الصبح ومحضره نفسي وعايفه النومه خلينا نطلع لا ميمون يسطرك بسحر يخليك اطك أصبع بنص الفاتحة.
مهيائيل: زمن كاموا يهددوني بشغلي.
ميمون: مو الزمن دوار خويه.
مهيائيل: أمري لله بس انا اخذكم.
ميمون: لا عيوني انت روح حضر نفسك ورتب أمورك حتى العصر تصير جاهز.
التفتلي كايل وهو مصغر عيونه.
مهيائيل: راضيه بهذا الوضع؟
ابتسمت مجاوبته: اي.
مهيائيل: عادي تعوفيني؟
ايريم: خلينا نعيش هاي اللحظه شكو بيها؟
مهيائيل: ماطول مرتاحه هاي هي أهم شي عندي سعادتج ارنوب.
ميمون: يلا ولك فضنا خلي نولي وراي شغل.
مهيائيل: طالع قبلكم دير بالك وانت تسوق لاتستخف وتصير سباعي وبعدين تسوون حادث.
ميمون: هاي المره تفقد حياتها مو بس الذاكره.
مهيائيل: اطلع ابوك من كبره وحركه.
ترانيم: كافي ولكم خلونا نروح ورانه ترتيبات وكذا.
وحق الله توترت ولا كأن قبل ساعه جنه سوه فجأة حسيت نفسي راح انخطب من صدك حتى مطلعت وراه من طلع، صعدت جبت عباتي وخليت بجنطه كم شغله احتاجها وكم قطعة ملابس، ورحنه لبيتها، طول الطريق ميمون يسولف ويضحك وي ترانيم واني مبتسمه وياهم على الواهس، وصلنه للبيت احنه نزلنا وهو راح للسوك، دخلنا البيت نظيف لأن هي تجي بين فتره وفتره تبقى يومين وترجع لهناك هي عادتها هيج من اول متزوجت،
شمرت نفسي مستذكره إيامي هنا، طردت كل شي من عقلي سامحه لنفسي ابدي من جديد بدون هموم ونكد،
مر الوقت بسرعة وصارت الساعه وحده رحت يمها كاعده بالمطبخ وتشرب جاي سحبت الكرسي وكعدت بصفها عرفتني عندي سالفه رفعت حاجبها كايله.
ترانيم: اذا موضوع اخوج انسي.
ايريم: يحبج.
ترانيم: ماحبه.
ايريم: جذابه.
ترانيم: ايريم اني واخوج مانرهم سوه، هو صغير بعده والحياة كدامه وانه مره جبيره ارمله القطار سحكني ومرد ضلوعي مو بس فات، سدي السيره لأن تضوجني حيل وانا فرحانه اليوم.
ايريم: العمر مو مقياس هي بس عشر سنين.
ترانيم: والعشر سنين شنو!! هي مو ايام عاديه كلتيها سنين، انا ما اتحمل ادخل بخطيته، عمري عبر حتى ام يمكن ماصير شنو ذنبه تتحطم حياته وياي؟
ايريم: لتفكرين بهاي الطريقة، الأولاد رزق من رب العالمين اذا يريد ينطيهم حتى لو عمرج مية سنة.
ترانيم: ماكدر اتفهميني.
ايريم: أبيل ماطول خطى هيج خطوه معناها يحبج من كلبه أخوية وعرفه عشت وياه سنين طويله وحافظته حفظ، اذا ميريدج تصيرين مرته ميقرر يعارض اهله علمودج.
ترانيم: وهذا احد الأسباب، ماريد ادخل لبيت اهله ميحبوني، شوفي ايريم اني مره جبيره وعشت اغلب حياتي بنص بيت رجل وعيال وخلصت ايامي بالحسره والونه وبعد كل التعب الشفته برأيج أكدر اتأقلم وتقبل هيج حياة؟
خليني هيج مرتاحه بدون زواج ومسؤوليه، اريحلي بألف مره.
ايريم: زين بس احجي وياه حتى لو بس تتفاهمون، وافقي توته حبابه لخاطري.
ترانيم: ما اقبل اتزوجه حتى لو حجيت وياه.
ايريم: ماعندي مشكله اهم شي تحجين، كولي اي يلااا.
ترانيم: اثبتي شبيج كمتي تكمزين!!
ايريم: يارب يتحقق اللي ابالي وتنجمعون سوه.
ترانيم: ابطل تره.
ايريم: لاا لاا هاي هي سكتت.
طلعت بره واتصلت عليه فتح خط مرحب بيه.
ايريم: اكلك سمعت بشغله صدك لو لا؟
أبيل: بخصوص شنو؟
ايريم: جانت تغاريد شنو سواها ترانيم؟
أبيل: تغاريد هسه حامل، سكتت سكتت تالي راحت لنصيبها بس ترانيم اول ماحسيت نفسي حبيتها أجيت وطلبتها من اخوها بس هي رفضت.
ايريم: بعدك تريدها؟
أبيل: اي بس هي قاطعه كل التواصل وحتى رقمها مو عندي شسوي بله كولي؟
ايريم: شنو رأيك اذا خليتها تحجي وياك؟
أبيل: عليج الله صدك تقبل؟
ايريم: اي والله بس ها اريدك تخليها توافق هاي فرصتك الوحيده.
أبيل: روحي يا ايريم الله يخليلج ابو السحوره ويسعدج بحياتج، وينهااا؟
ضحكت عليه، صدك لو كالوا أعمق العلاقات هي التبدي بكره.
ايريم: هسه راح انطيك أياها.
رحت يمها ونطيتها الموبايل أخذته من عندي واني طلعت وكفت بالباب ماكدر انتظر لازم اسمع حديثهم.
أبيل: مساء الخير، شلونج؟
ترانيم: هلا.
أبيل: اني بالحقيقه عندي وياج موضوع مهم اذا تكدرين تسمعيني.
ترانيم: شبيك خجلان اكثر من عندي تره ادري بالسالفة وجوابي وصلك.
أبيل: مابيج مجال مو والله احبج.
مدري شمالني من كال هاي الكلمه رجفت امداني بعمري كلها ماسمعتها من وأحد وبعد ماخلص وقتي اجت من الشخص الغلط.
ترانيم: شهل حجي خويه حبيش!!
أبيل: خليني اكون صادق وياج، بعد كل المواقف الجمعتنا سوه اكتشفت نفسي حبيتج لا مو بس هيج واقع للنعال، وافقي واصيرلج كل شي ترديه، بيت وحدج وقريب على اهلج وأهلي، ازرعلج الكاع التمشين عليها ورد، حبيتج حب صادق الله يشهد خلينا نجرب، اني عزابي وانتِ مثلي خلي نشوف حياتنا.
كلامه لامس كلبي، فاقد الحنان والحب من يسمع هيج أمور لابد تصير فراشات بكلبه تخليه يستمتع للحظات بس الواقع يفرض علينا شي ثاني.
ترانيم: ماترهم، هذا الحب غلط من بدايته كمل حياتك وي بنيه بكدك وتناسبك اني اكبر منك مافيدك.
أبيل: بس اني حبيت اللي اكبر مني، أريد وحده عاقله تفهمني واكدر اكمل وياها حياتي الجايه ومالكيت احسن منج، تقبلين تكملين نص ديني؟
ترانيم: غلطان بالعنوان انا مو وحده عاقله ولا أكدر افهمك وكون وياك.
أبيل: خبالج عين العقل، هسه انتِ شعليج اني قانع بيج، بكل شي بيج قانع وراضي وحابج من كلبي، شكلتي؟
ترانيم: مادري، مع السلامة خلص رصيد البنيه.
أبيل: مع السلامه ديري بالج على نفسج.
دخلت بسرعة اول مسدته شفتها صافنه عليه ومبتسمه عرفت انو نجحت الخطه هلهلت بصوت عالي: هلااا راح يصير عدنا عرسين.
ترانيم: انجبي ولج ماقابله تره.
ايريم: مو هي بكيفج.
ترانيم: عوفج مني وتعالي نحضرج راج يجي خطيبج عيني عيني.
ابتسمت رايحه وياها، لبست فستان وردي مال محجبات كون راح اطلع كدامهم يعني ورفضت اخلي مكياج ترانيم تصيح واني اصيح معنده مهما يكون همه غربه وحرام يشوفوني،
واحنه كاعدين سمعنا الباب ندك دك كلبي وياه ماعرف شبيه خجلت وحتريت يكول صدك راح انخطب مو مزوجه صار أكثر من سنتين، غمضت عيوني متنفسه بعمق، كمت من شفته مترأس القائمة ابتسمت بادلني بغمزه طلع ورده حمره من جيبه وتقرب مني طابع بوسه على خدي منطيني أياها خجلت خاصه من سمعت صوته وراهم.
أبيل: ها خويه سالمين بعدك ماخطبتها.
مهيائيل: اجي امددك بنص الصاله تره، مرتي هي ولك.
ابيل: ومنو كال انطيها الك؟!
ميمون: وانا وياه.
مهيائيل: هو صوجي انا انتوا شكول واحد يجيبكم وياه.
كعد مقابيلهم وحده مخلي سبحه بأيده ويفر بيها، راحت عيني على المحبس ضحكت من ذكرت سوالفه قبل بكلبي كلت هسه يفره عليهم، اما الإخوان الثنين همه وابيل وترانيم و زُموردة وياسيم واني كاعدين مقابيله ٧وبدت خطوبه رسميه وكأن هاي اول مره يطلبني الأجواء حلوه ومن العمر بس اللي صدمنه كلنه حجي ابيل..
يتبع..
البارت ٤٣٢٤ كلمه..
ملاحظة البارت القادم هو الأخير لذلك احتمال اتأخر بنشره شمعاتي..
حماسكم طافي كلش ومطفي حماسي اني هم..
تصبحون على الف خير وعافيه يارب..
لأي شي يخص القصه تعالوا يمي انستا..
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!