الفصل الثالث

رواية مختلفة الجزء الثالث 3 بقلم وتين خالد مختلفةرواية مختلفة الحلقة الثالثة ‏ادهم : سابتني كالعادة و مشيت و انا دماغي هتنفجر من كتر التفكير ضربت ايدي بقوة على العربية و انا متعصب مبقتش فاهمها و لا فاهم نفسي ‏نِفسي تتكلم و اخلص من التعب ده كله

‏انا فعلاً محتاجها في شغل بس مش هقدر اشوفها قدامي من غير ما اواجهها لانها هربت و استسلمت زمان من المواجهة و فَضلت البُعد من غير ما تتكلم او تِفَهمني ، كنت عايز احرق الدنيا باللي فيها من الي انا حاسس بيه ‏~~~~~~~~~~~~~~~~~~~~~~~~~~~~~

‏موج : و صلت لعربيتي الحمد لله قبل ما اقع ، كنت سامعة صوت نفَسي العالي و مش سامعة اي حاجة تانية ، ايديا بتترعش و مش قادرة اسوق ، رميت شنطتي باهمال على الكرسي جنبي و شربت شوية ماية كمحاولة اني اهدى، تِعبت و نفسي ابعد عن كل ده ، نِفسي آخد تميم و اهرب من الدنيا ‏اخدت نَفس طويل و حاولت اثبت ايدي على الدركسيون و بعد كام دقيقة قدرت اتحرك ، طول الطريق كنت سايقة بشرود و كل شوية الاقي دماغي بتعيد نفس المشهد

‏وصلت بيت خالتو و طلعت خبطت و الي فتحتلي خالتو ‏خالتو : تعالي يا حبيبتي مال وشك عامل كدة ليه ، انتِ تعبانة؟ -لا بس محتاجة ارتاح مش اكتر ‏~طيب تعالي ادخلي ارتاحي -لا معلش يا خالتو انتِ عارفة مش هقدر ، نادي بس تميم ‏~يا حبيبتي مش هيحصل حاجة اصلاً تميم بيلعب جوا مع عُمر و امير و نرمين نزلوا يجيبوا طلبات

‏هزيت راسي بالموافقة ودخلت، أول ما دخلت سمعت صوت ضحكهم. لقيت تميم وعمر قاعدين على الأرض بيلعبوا بالمكعبات، وأول ما تميم شافني ساب كل حاجة وجري عليا. ‏~مامي ‏نزلت لمستواه وحضنته بقوة، يمكن أقوى من كل مرة. دفن وشه في رقبتي وهو بيضحك، أما أنا فكنت بحاول أخبي دموعي اللي كانت هتنزل في أي لحظة. ‏~ إيه يا مامي؟ انتي زعلانة؟ ‏ابتسمت بالعافية وأنا بمسح على شعره. -لا يا حبيبي ، مامي تعبانة شوية بس. ‏راح

جاب لعبة و قدمهالي و قال: ‏~بصي عملت انا و عُمر دي ‏كانت عربية معمولة من المكعبات ابتسمت و انا بحضنه هو و عُمر و بقول : انتوا اشطر حد اصلا فخورة بيكم ‏خالتو بصتلي شوية وقالت بهدوء: ‏~موج… حصل حاجة في الشغل؟ ‏اترددت كام ثانية، وبعدين قولت: -لا زي ما قولتلِك محتاجة ارتاح بس ‏بصيت لتميم و انا بقول : مش يلا ولا ايه ‏تميم : انا لسة عايز اقعد -بص عُمر تقريباً قاعد بكرة و انتَ كدة كدة هتيجي بكرة فهتكملوا لعب مع بعض

‏فضل باصصلي شوية بعد كدة وافق اخدته و نزلنا و اتحركت لشقتي ‏طلعت المفتاح من شنطتي وأنا حاسة إن دراعي تقيل، فتحت الباب ودخلت الشقة. الهدوء كان خانق، مفيش غير صوت باب الشقة وهو بيتقفل ‏تميم قلع الكوتشي بسرعة وجري على أوضته يجيب حاجة ‏~مامي بصي عُمر طلع معاه زيها ‏كانت عربية لعبة بريموت ‏بصيتله وابتسمت ابتسامة صغيرة. ‏بجد؟ ابقى وريهاله ‏~انا هاخدها بكرة معايا

‏قعد يحكيلي بحماس عن اللعبة، وأنا كنت بهز راسي بس، نص كلامه داخل وداني ونصه التاني ضايع وسط الزحمة اللي في دماغي ، و انا مش مبسوطة بكدة انا عايزة اديله كل الاهتمام مش عايزة حاجة تانية تشغلني عنه ، خايفة يكبر و يبقى مش سوي و يقولي كل ده بسببك!

‏عند الفكرة دي دموعي غرقت وشي ، مش هقدر استحمل يحصل ليه مرض نَفسي بسببي ، بس انا و الله بحاول ، مش عايزة اخلق ليه شخصية وحشة ، او حتى مهزوزة ، مش عايزة السيناريو يتعاد تاني بسببي ! ‏حضنته جامد و انا بشم ريحته بقى أماني الي من حضن واحد بنسى همومي ، ازاي لطفل مكملش الاربع سنين يبقى ليه المفعول ده عليا ‏بَعد شوية بِعد عني و وقف قدامي وبصلي باستغراب ‏~انتِ لسه تعبانة؟ ‏مسحت على شعره. -آه شوية… بس هبقى كويسة.

‏~أعملك حضن تاني؟ ‏ضحكت لأول مرة من قلبي، وفتح دراعاته الصغيرين. نزلت لمستواه وحضنته. -أحسن حضن في الدنيا. ‏ابتسم بفخر وكأنه عمل إنجاز كبير ‏~أنا كل يوم هديلك واحد -ايه ده انت بخيل اوي حضن واحد بس؟! ‏~ضحك جامد و هو بيقول : هديلك كتير -ضحكت معاه و انا بقول : حبيب قلبي الحنين يا ناس ‏جهزتلنا أكل خفيف، وقعدنا ناكل سوا. تميم كان بيحكي عن يومه و حاجات عايزها وأنا كنت بسمعه باهتمام ‏أول ما خلص، بدأ يفرك عينيه. -نعسان؟

‏~هز راسه. ‏غيرلتله هدومه، وحطيته في السرير. قعدت جنبه لحد ما نام وهو ماسك صباعي الصغير، كأنه خايف أسيبه. ‏استنيت شوية، وبعد ما اتأكدت إنه نام، سحبت إيدي بالراحة وخرجت اخلص الي ورايا و هرجعله. ‏قعدت في الصالة لوحدي، والسكوت رجع يملأ المكان. ‏رميت راسي على الكنبة وقفلت عيني. ‏كل ما أحاول أنسى، أفتكر نظرة أدهم و صوته..كان باين عليه الصدق ! زي المرة الي فاتت ! ‏بس معقول هكدب عنيا و الي شوفته قصاد مجرد احساس بحسه

‏فتحت عيني بسرعة وكأني بهرب من الذكرى. ‏كفاية بقى هخلص الي ورايا ‏قومت عملت لنفسي كوباية قهوة، وفتحت اللابتوب قدامي و بدأت اشتغل. ‏فتحت الايميلات و الورق الي قدامي و بدات اجمع تصميمات في ملف واحد على اللاب و بعد ما اخلص هطبعهم ‏دخلت انام بعد الفجر بكتير عقبال ما خلصت كل حاجة ‏كان فاضل على ميعاد الشغل ساعة بس ! يا رب الحق انام ‏صحيت على صوت تميم ‏~يا مامي اصحي بقى ‏~يوه ..انتِ نايمة كتير ليه -خلاص صحيت خلاص

‏بصيت في الساعة و قومت اعمل المهام اليومية قبل ما انزل ‏لبست بليزر و بنطلون فورمال لونهم اسود و سيبت شعري و جهزت شنطتي و تميم و نزلت علشان كالعادة هتحرك عند خالتو ‏وصَلت تميم عندها و اتطمنت عليه و عرفت ان امير و نرمين قاعدين كام يوم عند خالتو علشان امير هيسافر تقريباً شهر يشتغل برا و اعتقد نرمين و عُمر هيقعدوا معاها لحد ما يرجع ‏~~~~~~~~~~~~~~~~~~~~~~~~~~~~~ ‏وصلت الشركة و قابلت سلمى

‏سلمى : ايه يا قمر مش هتحني عليا و تحكيلي ‏موج : بجد مش قادرة و مش عايزة احكي لما اعوز اكيد هاجي و احكيلك ‏~اوكي براحتك المهم تكوني كويسة -بحاول ابقى كويسة ‏~لا لا بس انتِ مُزة انهاردة انا اصلا بحب الاسود عليكي -تسلمي يا سوسو انت الي قمر ‏ايه خارجة بعد الشغل ولا ايه ‏~اه يعني احتمال زياد خطيبي يعدي عليا لو خلص شغل بدري -ربنا يخليهولك و تتجوزوا لان انا زهقت منك بصراحة ‏قالت بكبرياء مصطنع:

‏~حبيبتي اعيش و ازهقك ..اصلا من غيري مش هتعرفي تشتغلي ‏ضحكت عليها و ابتديت اشتغل و انا ناسية خالص التصميمات الي كان المفروض اطلعها لمكتب مستر احمد ! ‏لحد ما تليفون الشغل رن جنبي ‏رديت و كانت سكرتيرة مستر احمد -الو ‏~آنسة موج مستر احمد بيقولك انتِ فين و الورق الي طلبه منك مجاش عنده لحد دلوقتي ليه -يلهوي انا نسيت ..خلاص بلغيه ان الورق دقيقة و هيبقى عنده ‏~تمام

‏قفلت معاها و قومت بسرعة و جيبت الورق و اتأكت بسرعة من عددهم و كانوا مظبوطين بس انا كنت عاملة فلاشة احتياطي و كنت بدور عليها بسرعة و توتر في شنطتي ‏سلمى : مالك يا موج ‏قولت بتوتر : مش لاقية الفلاشة الي نقلت عليها التصميمات في الشنطة ‏~طيب انتِ بشكلك ده اصلا مش هتلاقي حاجة اهدي كدة و انا هدور ‏اديتها شنطتي و دورت شوية لحد ما لقيتها ‏~اهي ليه التوتر بقى طالما انتِ عارفة انك جايباها -قولت

و انا بمشي باستعجال : شكراً يا سوسو مش عارفة من غيرك هعمل ايه و اديتها في آخر كلامي بوسة في الهوا و جريت على الاسانسير الي بيطلع على مكتبه ‏وقفت في الاسانسير بظبط في شكلي و بهدي نفسي ، هو اكيد مش هيتعصب بس خايفة ليكون حصل مشكلة بسبببي ‏طلعت و وقفت عند ميرنا سكرتيرته و قولتلها : ‏اتفضلي الورق اهو دخليه لمستر احمد ‏ميرنا : لا هو قال هي تديهولي ‏نفخت بنفاذ صبر و قولت : حاضر

‏رحت عند مكتبه و خبطت علشان يجاوب عليا و يأذَن بدخولي -احم..اتفضل حضرتك التصميمات الي حضرتك طلبتها و عملت نسخة منهم على الفلاشة دي علشان لو حصل اي ظرف ‏قال و هو بيبتسم : ‏~ايه يا بنتي اهدي كدة ..تمام كله مظبوط لو في حاجة هبلغك -قولت بابتسامة مجاملة : تمام عن اذنَك ‏~اه صحيح استني يا موج ..نسيت اعرفك ‏التفت تاني بعد ما كنت همشي و بصيت على الي كنت غافلة عنه من ساعة ما دخلت المكتب ‏~ بشمهندس أدهم المَهدي ..شريكي الجديد

-عنيا وسعت على آخرها قصاد البارد الي قاعد و بيبتسم إبتسامة خليط بين الاستفزاز و الانتصار ‏»»»»»»»»»»»»»»»»»»»»»»»»»»»»»»»»»»»»»»