رواية مُقيد أجنحتي الفصل الثالث وخمسون 53 - بقلم 💗

بداية شهرا الخامس طالعين انا وامي ويانا باجي شيماء نفتر
ندور على مطعم نتعشى بي ..
دقايق وباجي لمحت مطعم اردفت بأستعجال
: هذا هذا تعالن .

تقدم الويتر وسألنا شنو تحبون
وبعد هوسة الاختيار .. عم الصمت ننتظر الاكل
كسر هالهدوء صوت باجي
: كريمة ، اخوج يكول قبل ما تبدي بتول دراسة ، خل نسافر للشمال .

ردت امي بسرعة
: لا لا شيماء ، لا شمال ولا هاي شعدنا هاي مو طالعين احنا هسة .
شيماء : صدك تحجين كريمة ؟ هاي هم طلعة خلينا نروح نتونس يابة
جهالج روحهم طالعة

باوعت عليَّ تأشر
: شوفي تولة سودة بوجهي ، وجهة اصفر وضعفانة .
ابتسمت الهة .. كملت كلامها

شيماء : يابة خل نروح نتونس انا روحي طاكة من صهيب وابو .
قدمت امي روحها بقلق تسأل
: شصاير يا ستار ؟

سحبت باجي كلاص المي البلاستك تفتح بي وتزفر نفسها بجزع
: شنو ما صاير كريمة ، اخوووج ميرحم بحال هالولد ، وذاك طايش ميفهم
وتعالي شوفي البيت ٢٤ ساعة مكهرب لازمة گلبي على ساعة تكب العيطة ..

كريمة : رجع لهاي المسيحية ؟
هزت  راسها مبتسمة
شيماء : شفايتلي يرجع الهةة يكريمة ..

رجع عمَ الهدوء من شفنا الويتر يتقدم بايده الطلب
حطهن دقايق ورجع بأيده الببسي .
كملت باجي كلامها ومركزة عيونها عليَّ
: كريمة ، ابني عاشگ  .. وللمرة الثانية اختياره خطأ .

كريمة : يعني شنو هالمرة ، يهودية .

ضحكت: لا مسلمة .. بس صغيرة وصعبة وصاكرته ومخليته يرجف عليها

قهقهت امي وهي تسحب الببسي
: ياا ، اخاف بس عاجبته لان صعبة ، ما اظن حب هذا .

شيماء: لا كريمة ، وليدي واعرفه .
كريمة: وينسى ريناد بهل سهولة ؟
شيماء: ريناد خسرته ، جان عنده استعداد يعوفنا علمودها .

كريمة: حلووووة هيَ كلش يشيماء ، العيون .. والشعر ناعمة شحلاتها .
هن المسيحيات يصيرن يخبلن صلوات على النبي .

عفست وجهة وردت
: منيلهة ..
سكتت ورجعت كملت
: حلوة صح ، بس مو بعيني .. كريمة جمال وجهة مو كافي
الجمال ما دايم .. يظل الاصل الطيب للبني ادم .

- صح ..

كل هذا الحديث وعيوني تتنقل بينهن .
باوعت لجهتي باجي وضحكت
: شوف والله نسيناج ..

ابتسمت الهة رجعت تكمل كلامها وهي تمسح شفافها بكل نزاكة بالكلنكسس
: مثل بتول اريدها .. هدوء ، رزانة ، واخلاق كل هذا ووياه جمال .

نصيت راسي  خجلانة خدودي اشتعلت نار وتوترت
جنها باجي ناوية تصخم ابنها وتخلي الموضوع ببال امي
بس امي ما انتبهت ولا ركزت .. جان كل بالها وي الاكل  ضحكت لمنظرها .

صارت تسعَة ونص كملنا وطلعنا نتمشى هنَ يسولفن وانا اباوع للشارع
واسمع كل وحدة بيهن شلون تسولف عن مشاكلها .
لحد ما وصل المووضوع لزواج امي

شيماء : كريمة شكلتي ، تولة وحسون كبروا وانتِ فنيتي عمرج تربين بيهم
الرجال شاريج ، واخوج ما رد الجواب ينتظرني اقنعج .

امي مباشرةً باوعتلي .. ردت بتوتر واضح
: شيما مو كدام بتول ..

شيما : لا كدامها ، شكو مستحية ؟ ربيتي وكبرتي وسويتي الي عليج
وتولة جبيرة سنة التجي جامعة .. بعد شكوو وحسون بعد روحي حسون
رجال ومعتمد على روحه ، ومن هسة يشتغل ومعيشكم فوك
راتب المرحوم .

كريمة : انا حيلي خلص .. يحرم علي رجال بعد المرحوم
ولا حلى بعيني زواج .. البنات وحسن ترسوا عيوني وما احتاجيت غيرهم .

بتول: الموضوع استمر لحد ما اشرنا للتكسي .
كعدت باجر بالنص وامي بصفها وانا بعد السايق تماما .
جان مشغل اغاني والصوت عالي
اغانية غريبة ، وصوتها عالي وباجي تعيط من تحجي وي امي
جليت صوتي وطلبت منه ينصي الصوت

رفع عينه بالمراية ونظراته تلعب الروح
صديت وجهي لجهة امي وباجي
كل ما ارفع عيني اريد اباوع لجهة الشارع الكه عيونه تباوع لجهتي لعبت
روحي لحد ما وصلنا

خابرت باجي ابراهيم يطلع بالباب لان كومة علاليك
اول ما وصلنا جان ابراهيم واكف ينتظر بالباب
فتحت الباب دانزل همس : الرقم بحضنج يحلوة .

كالها وانا اكوم ..
وكع الرقم بالكاع .. ومن حضي الحلو شافه ابراهيم
جان وراي يطلع الغراض من الجنطة
: هاي شنوو ؟

باوعلته شفتي ترجف
: مـ مـادري ..

دنك شاله وجان مستعد .. لان يعرف ومتاكد شنو بداخله
فتح باب السايق وانهال علي بالضرب والفشار
ظلت باجي تصيح
: لك ابوك مريض عوفه ، عوفه لخاطري يمة خل يولي

تزلغ بخدها وتبجي
كوة سحبته .. دفعه للسيارة وتفل عليَّ ( العفو )
كله وهوَ يلهث : هاي حتى تبطل

ورجع ضربه برجله كال: وهاي حتى تتربى يا *** ، ****
امشي لا *****

شغل سيارته وحرك سريع
وكف يخنزر بينا نتر
: ساعةةة  عبرت الـ ١١ تحجن صدكككك ؟

ردت باجي ترجف
: ولك يما والله ما حسينا بالوقت .. مصار شي هسة بعد متصير
متسوى تحرك بدمك خل يولي ..

بعده ما كمل كلامه
وكفت دراجة صهيب .. نزل تقدم يمنا يسأل .
: شو برة ؟ شنو الحجي طكن عنده ..

نتر بي ابراهيم
: صهيببببب !!
ضحك : شعدكم واكفين هنا لعد ؟

خزره ابراهيم ورجع نتر بي
: احسن ما تتمضحك يالسفيه ، أسالهن راجعات بهل ليل .

صد علي باجي رافع تك حاجب
: جنتِ يم عمة غير ؟ وهسة رجعتن غير ؟

عضت شفتها بخوف وحذر
: لا جنا بالــ ****.

گبل عاط بينا بدون تفكير حتى
: **** بببببهل ليل يماااا ؟؟؟ لل١٢ بالـ *** تحجين صدك انتِ ؟

راد يحجي ابراهيم جنت واكفة يمة لا اراديا لزمت ايده
باوعلي ووجهة ما يتفسر .. ترجيته بعيوني يسكتت 

صد علينا صهيب وعينه جت على ايدي نتر
: هيوووو ، شكوو شبيككك ؟

سحبت ايدي ارجف ، هسة يطلع خالو وتكمل السبحة
صدت امي علينا : يالله بتول حسون ينتظر .

شيماء: متسوى كريمة باتوا عدنا اليوم .
: لا لا،غير مرة حسن بدون اكل لحد هسة ..

صهيب : يالله اوصلكم .
كريمة: لا يما متسوى احنا نروح..
ما سمع منها ، اخذ العلاليك من ايدها وبدينا نمشي
دار حديثهم ما بين حسن وشغله
وانا اكتفيت استمع ، وصلنا لكينا حسن كاعد بالباب يمه صديقه
فتت انا كبل للبيت

صعدت فتحت العلاكيك وطلعت الفستان
بعد كم يوم عرس اخت باجي شيماء ، والبارحة قررنا نطلع ناخذ فساتين
اخذت واحد مرتب كلش .. لونه فستقي وبي بالصدر شغل مخصر شوي
لبسته وطلعت من الغرفة اركض صادفت حسن يغسل
: حسووونه .
سد البوري وصد يباوع صوفر وضحك
: اميرة وعلي .
-حلوو ؟
- يمووت .

ضحكت ورحت اركض للمطبخ امي بي كبل عطتت
صهيب متجي على الباب وامي ماكوو
جيت ارجع كبل تقدم وسحبني علي ، مدري شبي مثل المخبل
: لا بتول لا ، لتلبسي مفصل جسمج تفصل .

حجاها بكل هدوء وانا كل جسمي يرجف
هزيت واسي واريد املص روحي منه ماكو
رجع كال : نرجعه باجر اكو حلووات لا تلبسي هذا .
بلعت ريكي ارجف لا شال لا شي : حسن كال زين .
صفن بعيني: حسن زمال .

- هد ايدي صهيب حرام .
كبل سحب ايده طلعت اركض فتت للغرفة ارجف رجيف
اباوع ايدي ترجف قوييي وگلبي دمام صارر .. هذا شبي صاحي مخبل
مر على الي صار ٣ ايام اليوم على الريوك خابرت باجي كالت نروح نبدل
فستان بتول كالت كصيف ..

امي ما قبلت تجي .
بدلت ووكفت انتظرها ، رحنا بدلنا وي ابراهيم ورجعنا
خطية اخذتلي مكياج وحلفتني اخلي
انا مو ما اعرف جانت سحاب تموت على المكياج تحط هواي وتشتري بدون علم
امي لان جانت ما تقبل ، ولا زالت بس انا تعودت وهم ما اريد اكسر كلمتها
الا منو بينا ما تحب المكياج .

صعدت من ال٣ ابدل وامكيج ، كلت لامي كالت حطي لا تطوخين
بديت بالعين وحرت شلعبت لعب .. لوصت الدينا
ما عجبني كمت مسحته .. ولون بصلي بلون الجفن حطيته
ورسمت عيوني بالكحل .. وخدود وكريم اساس ترست روحي

رحت  اشوفها لامي ظلت تحجي
: اوفر امي شجاج تخبلتي .. صعدي مسحي ماكو روحة .
ما ناقشت رحت  امسح بدلت وكملت كعدت على جربايتي عيوني مغوركة

فاتت جنها نسمة .. لابسة ثوب بنفسجي راهم كلش عليها
ومكياج هادئ وعيونها مرسومات ، هاي باجي من يوم يومها انيقة .
بدون اي كلام جابت المكياج من المراية .. كعدت يمي وبدت تمكيج الي
حرف ما حجيت .. اخر شي خلت قلم حمرة بايدي

: كومي رسمي شفتج وبدلي ينتظرونا جوة ، ما رحت للصالون وي اسماء علمودج
ادري بيها راح تسوي هيج ، حسبت حسابي وحضرت كلامي بالطريق
يالله كومي بسرعة ..

طلعت وسدت الباب كمت لبست الفستان.. بدلته جبت جوزي طووخ
هذا كلوش مو مخصر لفيت الشال الابيض وخليت العباية على راسي
نزلت داالبس الجواريب دخلت عاطت بيه

شيماء: تردين تلبسين رياضي ، بشرفج وين رايحة للمدرسة
هاج هاج ..
طلعت من العلاكة حذاء كعب ابيض تكرمون
نزلت وراها مستحية من امي ومن خالو والولد .

لكيت بس خالو وامي يسوولفون
باوعتلي امي ضايجة .. بس كعدت كدامها باجي دنكت
كام خالو
: يالله نتوكل ورانا طريق ..
طبطب على ضهري : شطالعة خالوو .
ضحكت خجلانة .

طلعت اطك بالكعب وعلجي بحلكي .
بس طلعت صار بوجهي ، واكف يم ابراهيم مدري شيباعون بالجهاز .
شكله حيل مرتب .. منسق قميص زيتوني وي بنطرون اسود
ما عدهم هنا ثقافة الشعر العالي .. شعرهم سوي ومرتب
وابراهيم طالع يخبل اضعاف.. ابراهيم كلش طويل ووسيم اكثر .

هو هم ضحك بوجهي .. بادلته الابتسامة كلش ما استحي منه .
صهيب انتبهت علي مشة .. فتح باب السيارة اخذ منها شغلة وركعها قوي
كال بصوت عالي: رايح وي وليد .. حتى السيارة تكفيي

طلع بعدهم حتى محد جاوبه ..
ركضت ورا باجي.. دقايق ورجعت ردنا نركب
امي يم خالو .. واحنا ليورا اردفت باجي
: كرررريمة تعااالي يمي عندي كم سالفة خل ابراهيم يكعد كدام

الطريق ازدحام .. الطريق ابو الساعة صار ساعة ونص .
اول ما وصلنا صعدنا لكينا صهيب حاجز ميز جبير ..
مكانه حلوو نهاية القاعة حتى ناخذ راحتناا .

كالت باجي: اكلج كومي للحمام ذبي العباية كاعدة انتِ من نطلع اللبسيها
اشرت لامي تكوم ما قبلت تكول استحي
باوعتلها : انا هم استحي ..
ضحكت واجت يمي:لج كومي طالعة تخبلين خل اتفرج عليج بالفستان ..

كملنا ورجعنا وبرجعتي كعدت يم ابراهيم لان باجي كعدت يم امي .
باوعلي : حلوو لوجهج المكياج الناعم لايگلج هواي ..
ابتسمت بوجهة خجلانة : شكرا ، انتَ هم اليوم كلش طالع مرتب

فتح جهازة يشوفني الصور الي كصهن اليوم .
: يا هيَ انشرها على الانستا .. شتكولين هاي يم السيارة
لو هاي بالحديقة ؟

بعدني ما جاوبت نتر صهيب بينه وبيني خالو
: الي بالمرافق هم حلوووووة برهومم .

سكتت لان هذا فضيحة .. شوي وصارت دخولية العرسان
اختها تزوجت بعمر يمكن البعض منا يعتبرها جبيرة
تسولف باجي تكول جانت تريد تكون نفسها
بفلوسها راحت سوت عمرة .. وراحت للشمال كله
منها ومحد متفضل عليها .. واشترت سيارة ما جانت بحاجة شخص

لحد ما صار عمرها ٣٤ سنة يالله لكت شريك حياتها
قصة حبهم خيالية ومستحيلة .
هو مديرها .. وتكول باجي جان شالع كلبها
يعاركها ، ودوم تكول يغثتني وكرهت الدوام من ورا

عاد تكول بيوم وكعت هناك وانكسرت واخذوها يمه
حار بيهاا يرجف .. يعيط على الموظفين شلون ما ماخذيها للمستشفى
تكول وراها اشتغل الورد والهدايا .
وبدون اي مقدمات صدمنا واجة خطبها
رغم عمره جبير .. ٤٦ بس جان مهتم بنفسه
وفعلا بس دخلوا عيني صارت علي عندة كاريزما مو طبيعية

دخلته هيبة .. حتى ضحكته رزنه .
وي هوسة الدخولية حسيت على ابراهيم كام من يمي
وكعد بداله صهيب كبل عدلت كعدتي وتوترت
سويت روحي اباوع للعرسان بس وترنيي بكعدته هاي

شوي وبلشت العائلة تركص
كامت باجي وراح وياها ابراهيم وصهيب
كل واحد بيهم اخذ ايد العروس ويركصون وياها
فرحانين بيها، وواضح حيل يحبوها
اباوعلها تسولف وتضحك وياهم

حضنت باجي وبلش البجي
عيني اجت على صهيب لكيته مبتسم بوجهي
مدري ليش رديت الابتسامة .. يمكن لان فرحانة والموقف الصار حلو .

وزوعوا الكيك والعصير .
مرتب كلش مرتب كل شي هنا احسه حلوو
انخفضت اضاءة القاعة وتبدلت الاغاني من الردح للرومانسي
عرفت هنا العرسان راح يركصون .

صهيب : اي ست محاسن منعجب احنا ؟!

باوعلته مصدومة ، يا هذا شبي ؟
- نعم ؟

- نعم الله ضلو... ضلوعي ضلوعيي وطحنهن طحن .
زفر نفس ورجع ضهرة لورا الكرسي .. كال بهدوء
: لايك عليج هذا الفستان حيل ، احلى من ذاك .

سكت رجع كال: ذاك هم يخبل .. بس مو مال مناسبات .
- اي.
- بتول ..
- ها
- لا تنزعين العباية بعد ، ما اكدر اشوفج بدونها ..

گلبي كام يرجف ، مديت ايدي اشرب العصير
واباوع محد منتبه خالو غير مكانه وبس ابراهيم بجهتنا واخاف يسمع

هسة غير يسكت گلبي راح ينط من صدري من الخوف .
-يعني مو حلو الفستان ؟
- ببيها وبدونها حلووة .

مسح لحيته بتوتر وكام من - يـَمـيٰ بسرعة .
بس كام طلبت من باجي نروح للحمام
وكفت اغسل وجهي طماطمة صار
حسيتها تعرف بكل الحديث الي دار بينا

باوعلتها : كل شوي مكومتج من مكانج .
ضحكت : لا حبيبي عادي .

تقدمت يمي حضنت وجهي بين ايدها
: محد يجبرج على شي تولة ، اذا صهيب مضايقج اخفي من الدنيا كلها
لتخافين وانا يمج خوش ؟

ابتسمت ودنكت راسي
رجعت كالت : لتخافين محد حس وهوَ لوتي يحجي بصوت ناصي .

حسيت عدها حجي ، بس فضلت تسكت
من طلعنا هم ما لكينا لا هوَ ولا ابراهيم ..

العرس نهايته وبقى بس اهل العروس ..
يكصون صور وفرحانين .
كعدت يم امي وباجي راحت يم اختها
كال خالو : ذول وين راحوا ، غير يجوون ياخذون صور وي خالتهم
دنروح ما ظل وقت .

نزتني امي
: كومي صيحي الولد خالج كاعد .

كمت بس ما ادري منين اروح
مشيت لباب القاعة والرجفة بدمي عبالك مدري وين رايحة
استحي وهو محد معبرني بس احس كلها تباوع علي .

جان طابق ثالث
فريت الطابق بلكت الكاهم
من ما لكيتهم فتحت المصعد ونزلت لاول طابق هم ماكو
باوعت واكفين برة يمهم ٣ ولد يمكن كرابتهم
ظليت بمكاني .. هسة اروح لو شلون
ظليت مترددة تقدمت شوي كلت بلكت واحد يشوفني
اوووف منج يممما .. شلون انا بيها بكيفها تتبرع

واحد من الي واكفين شافني .. واشر علي لابراهيم
صهيب جان ناطيني ضهرة كبل صد علي
رفع حاجبه.. ذب الجكارة واجة يمشي سريع
بس وصل يمي نتر : شمنزلج هناا ؟؟؟

كبل دمعت : والله خالو كال صيحيهم .
: يعننني ماكوو تليفون يخابررر بييي لخاطر النبييي .

كتله بهدو عكس العاصفة الكدامي
: اي مو اخذوهن على مود التصوير .

حط ايده جوة حنچة : ايي بالله ؟ وتنزلين تفرين بطولج بدون عباية
شكتلج انا فوك بتول ؟

- ملابسي طويلة وعريضة ما بيها شي .
نتر كبل : بتوووول ؟

درت وجهي .. هسة اذا يحجي بعد اطك بجي هنا
اشر بأيده : شووو دمشي كداميي امشييي .
داس الدكم وفات وياي للمصعد كدامنا مراية المصعد
عيونه علي بالمراية .. نزلت عيوني بالكاع مقهورة

اول ما وصلنا انفتح الباب
بس طلعت لزمي ايدي وجرني علي عطت بي
: صهيب شبيك تخبلتتت ؟

باوع للطابق وكز سنونه
: لسانج .

كتله بغصة ما تحملت : والله ما مسوية شي .
لانت ملامحة شوي .. مسح وجهة
: استفغر الله .. اسف

عتيت ايدي منه وفتت امسح بعيوني
محد انتبه ..دخلو اخذوا صور وياها

خالو راح كال عندي شغل بالمستشفى
الطريق من رجعنا صارر طويل .. وانا عيوني مدمعة
امي وباجي يسولفن وهو يسوق ..

شيماء : يمة صهيب خفف شبيك طاير ؟
راد يحجي ابراهيم عاط بي
: حلكك لتفكه قندرة سمعت ..

نترت بي باجي: شبيكك صهيب .
ما رد .. ولا حجة حرف

شيماء: كريمة .. تعالي باتي يمنا والله مشتاقتلج .
ردت امي : خو انتِ تعالي انا قابل منو عندي ..

ضحكت: بيتي نفسه بيتج .. وبيتج نفسه بيتي ولج
ماكو فرق ..
كتلهن : لا باجي اريد ابدل ارتاح .. غير مرة والله .

اول ما وصلنا نزلت اركض ..
صعدت وبجيت بجي اضوج من اسلوبه
مو هذا وياه ابراهيم.. بكل شي يبالغ لعب روحي

الليل كله كاعدة ، جنت انتظر منه رسالة
ما ادري ليش انتظرت منه رسالة .. وانا ما اريدة
مرت الايام وهوَ ماكو ، مرات يجي ابراهيم وباجي
بلشت اخذ دروس تقوية .. خالو حلف الخط علي
لان امي ما رضت يدفع فلس

دخلت ٣ دروس .. واشتريت ايباد اكمل بي الباقي
رغم تعب الطريق .. والدراسة بس ما ادري ليش يجي على بالي مرات

قررت اركز بدراستي .. اريد اعين امي واخوية
ذبيت كل حيلي بالمواد .. اطلع بال٨ وارجع ب٣
ارجع اغسل واصلي وكبل لكتبي ..

مر تقريبا شهرين .. خابر خالو كال معزومين على عشة
بمناسبة تخرج ابراهيم ..
تحججت بالدراسة.. صار هواي ما رايحة امي تروح
تسير وباجي تجي بس انا بطلت اروح
وهم صارت الدراسة حجة
بس هالمرة برهوم خابر
- تجين لج .. مشتاقلج والله .
- والله غير مرة اجيبلك هدية واجي .
- اذا ما جيتي اليوم ، بعد لتشوفيني وجهج .

انجبرت ابدل واروح .. امانة رغم اخر تصرف خلاني انقهر
بس بداخلي شعور انو اريد اشوفه
انا ما عندي اي مشاعر تجاهة اعرف بروحي
انا بعدها اذية وروحة حاتم تدك بصدري بحياتي ما راح احب غيره

شبيه تخبلت انا شدخرط يربي
حطيت عباتي على راسي ومشينا
وصلنا وكعدنا خالوو طالع يجيب العشا ابراهيم وباجي ما شفته هوَ .

كعدت يم ابراهيم نسولف .. يحجيلي عن اجواء التخرج والكلية
كنوع من الحماس علمود اطلع من السادس ..
ضحك: مخدخدة ولج ..

: ايييي مو من الكعدة..
ابراهيم: بس لايكلج والله ، مو تضوجين

ضحكت رجع كال: بوووية بتول ذكرتيني .. شلون عطر جبتت
والله يموت ادري بيج تحبين العطور
باعي صعدي فوك تلاكي على المراية جيبي وتعالي ..

صعدت اخذته من دانزل افتحت باب غرفته وطلع منها
گلبي يرجف كام من شفته .. باوعلي
:- شلونج ؟
- زينة .
- شلونها المواد مال سادس .
- زينة داسوي العليَّ ..
- الله يوفقج يابة .

عفته دانزل .. ما حسيت بس على جرته لزندي
سد الباب وحصرني علي سند ايده وصدرة يصعد وينزل
: ياا شبيك صهيب ؟

بلل شفته الترجف: بتول .
- صهيب وخر ميصير
عينه بوجهي تعبانة ملامحة: بتول ..

نترت : هاااا .
وخرة وحدة من ايديناته من الباب يريد يلزم ايدي عطت بي
: صهيب عفية
اخذ العطر من ايدي خلا على الكومدي يمه كال
- تعبتيني والله ..
- شسوووويت ؟؟

- بتول احبج والله .