رواية مُقيد أجنحتي الفصل الرابع وخمسون 54 - بقلم 💗

- احبج والله .
احبج
ومتصيرين لغيري .

مو مهم تبادليني هالمشاعر
المهم انتِ الي بعد .
وخليها ببالج لو مو صغيرة والفرق بينا جبير
لو الشيب ترس راسي .. لغيري متصيرين بتول .

- من الرجفة حسيت راح اوكع من طولي
دفعته من صدره ما يوخر
صهيب
- روحه
- وخر حباب .
- وخرت ..

بس سواالي مجال جريت العطر ونزلت اركض
دقايق ونزل هوَ سلم على امي
واخذ محفضته من الميز مال تلفزيون وطلع

ظليت اتصفن وباجي انتبهت علي
رجعنا وخلص بديت ادرس للوزاري ما ظل الا كم شهر
مدرسة  سويت انتساب وحرت بالمواد

كاعدة بالغرفة البيت كله نايم ساعة ٣ مكابلة كتاب الاحياء
من يوم يومه عندي بي تراكمات
فتحت الجهاز اخذ ريست .. واول ما فتت لواتس شفت صهيب
حاط ستوري
واول ما اجة ببالي ابتسمت ما اعرف ليش

حاط شعر لـسيد خلف
ولوَ انك مو دَمع ما ضـَمتك عيني
ولو انك مو كـِحل ما شالتك عيني .
يلوموني ، واحسك تكبر بِروحي
ويلوموني
وانا بلا شوفتك .. شينفعن عيوني
يشوفي ورَجوتي وِدنياي
دنياتي وعذابي وبسمتي وَشكواي وضنوني .
يخيعونك علي وبيك خَيعوني .

عدته مرتين .. واحس بشعور حلو
سديت كتابي ومددت بفراشي اضحك
يمة هاي شبيه انا ؟؟
ما صدكت شمرت الكتاب ولفيت راسي ونمت

بيوم امي طلعت ، وحسن بالشغل
اتصلت بيه باجي تبجي
: بتول ، تعالي يمي فدوة .
- توسلت بيها تحجي شكو .. ما رضت وشهكتها تشك الصدر

لبست عباتي وخابرت ماما وانا امشي بالشارع
: يمة رايحة يم باجي ..
- ماشي من ارجع اجي اخذج .

فتت اركض للصالة شفتها تبجي كاعدة
تقربت يمها
: شبيج شبيييج ؟
- لج بتول گلبي متكطع على صهيب اسبوع صار ما جاي للبيت .
- صاير شي شبيي ليش مديجي ؟
بجت : كال لخالج اريد بتول .. وخالج گلب الدنيا علي
انتَ فاشل وتريد تفشلني وي اختي
شايب شكدك تركض ورا وحدة لو متزوج بكد بنتك
ويا تولة استلمه اكس مربع
بس عوزه يمد ايده علي
وشال ملابسه يكله وجهك ما اريد اشوفه

- حضنتها اخفف عنها
: بس صهيب مو ذاك الكبر .
حتى اذا بيوم وافقت ماكو فرق جبير بينه وبينه.

- خالج تفكيره يختلف
لو بينج وبينه خمس سنوات ميرضى يكول ما يتفاهمون .
مو ١٤ سنة .

- زين صهيب وين .
رجعت تبجي
: ما ادري يا بنتي .. البارحة اتصل بي اليوم كله ما يرد
وخالج كتله رجعة وين يروح
گلب البيت گلاب يكلي طلعتي عينه .

- ظليت يمها .. ما اعرف شنو اتصرف .
لحد ما اجت امي وما قبلت احجي شي كدامها
ظليت الليل كله افكر بي
لا اكدر انام ، ولا اكدر ادرس
لزمت جهازي اتصلت بي مرة ، مرتين ماكو .

قررت اللبس واروح لصديقتي اخابره منها
توني اللبس عباتي جهازي دك
ركضت للجرباية
شفته هو كبل رديت
: الو صهيب
- هلا بتول .
- شلونك ؟
- مو مهم ، انتِ شلونج شخبار الدراسة وياج .
رديت بتوتر واضح بصوتي
: صهيب شلونك .
ضحك
: اذا مهم عندج ، زين الحمد لله .
- وين تبات .. ليش مترجع
جر نفس : حجتلج امي .
- اي ، ارجع صهيب .
- ما ارجع بعد .. خل يرتاح خالج .
- حباب ، لخاطر باجي.. وسد الموضوع والله احسن الك
- وانتِ ؟
- شبيه !
- بتول ، تعبان اروحلج فدوة
- شسويت
- تعبتيني حيل .. حتى بنص احلامي ملاكيج .
- صهيب .
- عيونه
سكتت هو هم سكت شوي وكال

اسأل ليش احبك
حتى اكلك ليش
وليش شما تسوي
وياي اقبلك لحضه
موت عمري سنيني
كلهن خوف بس وياك
آامن لَمن اولصلك
وانت اخر نِفس .
وشكد عزيز تصير
وبلحضه الموت تريدنا نملك

- لشتي كلها كامت ترجف ، سديته وشمرت روحي على الجرباية
واحس كل شي ديصير غلط .
وما رجع ومشى كلمته.. وحيل احس بالذنب لمن اشوف باجي
دتتكطع علي .

مرت الايام وصدك بدى الجد
واول امتحان وزاري الي باجر
خالو شافلنا خط سيارة خصوصي
وياي ٣ بنات شاب بمتوسط عمره

وجاوبت اسلامية وطلعت كلش فرحانة
وبيوم العربي الاكشر
اجت الاسئلة وجنت حيل مجاوبة
طلعت من القاعة عيوني تضحك .. واشكر ربي بداخلي
لان كل الي وياي أجلوا المادة
ركبت بالسيارة ننتظر بعد ٢ وياي
غفيت .. كل شوي افز وهن ماكو
لحد ما فزيت على صوت هوستهن يحجن بالاسئلة

رجعت خليت راسي على الجام نعسانة
ماكو دقايق
وحسيت السيارة سريعة حيل
فتحت عيني واول ما فتحتها فتنا بالحايط  .
بعدها اي احساس ما احس

شيمـاء.
- وك يمة تعال ارجع ، اريد اشوفك هسة ابوك ماكو .
صهيب: اليوم العصر اجيج للمدرسة .
- ما غيرت رأيك ، متشوف الفرق يينكم هواي يا يمة.
رد بجزع: حتى انتِ يمة .
- علمودكم والله .
رد بصوت عالي
: الله خلاها كدامي وحبيتها بعد ، من اعجز واموت خل تاخذ غيري
رايدها يمة ونفسي بيها .. وعلي لو كاعدة براسي
جان رحتي كبل اخذتيها الي .

وبعدين وين العيب بفارق العمر
تعيش حياتها مثل متحب .. راح احرمها من شي هي حقها بي ؟
وكل شي بعقل .. مراح اكلها لو ااذيها .
يعني انا اولى بيها لو الغريب.. لو هذا ابن عمها المسربت .

سديت منه الخط .. وما اخذت منه لا حق ولا باطل
ماكو دقايق .. واتصل ابو
: ها عيني .
- جيبي واحد من الولد وتعالي للمستشفى بتول مسوية حادث .

ماكو بس سدة احس اذني صوفرت
اريد عباتي ماكووو .
حتى ما بية امشي
الموبايل بأيدي كبل اتصلت بي ..
- يمةة  تعالي بـَسرعة للبيت بنت عمتك مسوية حادث .

كبل عاط : منية يمة .
- دتعال هسة يمة .
- منيةةةة يمة حاجيني .
- بتول بتووول .
- يا مستشفى يا هيَ ؟؟
- لك يمة تعال اخذني وياك .
عاط : اسمها يمممة بسرعة اسم المستشفى.
- الـ **** .
تعالي يمة نروح سوية
- هسة ادزلج صاحبي تحضري .

اول ما وصلت .. كابة العيطة ، لازم ابو الولد من ياخته
: هو لو ما مطي ، متخلون بايده سيارة .. والله اذا صاير بيها شي
يابة والحسن اكتله خلاااااص .

الرجال ساكت حرف ما كال
وابوه يدفع بي وينتر .. بس ابني ارعن

دفعه وكع على الكرسي ركضت
: لك يمة عيببب عيببب والله .

نتر ابوه : شبيي ابنج تخبلل ، احجي وياه لا والله هسة اخزيكم تخزي .
-لزمت ايده اتوسله بعيوني كافي ..
ظل يروح ويجي اباوعله يلزم الجهاز ايده ترعش ..
ساعة واجت كريمة تلطم وحسن يهدي بيها .

طلعوها من الردهة بالعربانة
كبل ركض عليها اول واحد .. لزم ايدها
: حاجيني بتول ، شيوجعج ؟

ردت بصوت حيل ناصي
: امي..
صهيب: شنو عيني ؟
- اميي امي اريد امي .

كعدت يم رجلها تبجي
: لو صاير بيج شي اموووت والله اموووت .. سودة بوجهي يا نور عيني .
ما كملت كلامها نقلوها لغرفة خاصة
ما بيها شي هيَ .. بس رجلها تصيح احسها مكسورة .
ووجها يخوف بي اثار الدم رغم مبين ممسوحة .
اكشر شي تأذى السايق ويمه بنية بالصدر كالوا ضهرها مكسور .

بشرنا الدكتور رجلها سليمة
بس تبقى بالمستشفى ليلة اخاف تصير عدها مضاعفات  .

دخلنا يمها نايمة .
: كافي كريمة .. ليش هالبجي يا عيني هاي كدامج جنها العافية .
المهم هي بخير

كريمة : شيماء لو صاير بيها شي والله اموت وراها والله .
: عمرج طويل يابة .. الحمد لله عدت على هاي وربج سترنا .

للـ ٩ ضلينا وميصير يبات اكثر من ثنين
اخذني صهيب على صفحة
:يمة بهدوء وبدون مشاكل ، اخذي ابوية وحسن وروحوا انا وباجي نظل
لان لا هي تروح .. وانا لو هسة يجيب الشرطة يطلعوني
ما اطلع .. فانتِ تفاهمي وياه تعبان والله .

لزمت بسته بخذه
: ولك يمه مشتاقتلك .
حضني يضحك : شلون بالنسوان الحلوة هاي دخيلك يا علي .

لزمته
: ابو صهيب ، خلينا نروح نرتاح   نبدل والصبح نرجع الهم .
نتر: شبيج يمرة نخبلتي .
- ابنك شالع گلبي ، وانتَ هم والله تعبت شصير انا
باوعلي : شبيج عيوني ؟
: خل نروح نرتاح ، كريمة متقبل ترجع .. وصهيب هم
والله بس يصير الصبح احنا هنا

: ميصير شيماء اعوف اختي وحدها .
- شعليها هذا ابنك يمها .. وحسن يكول راح اظل كاعد برة
نروح نرتاح والصبح نجيب ريوكنا ونجي وداعتك .

كوووة قنع .. يوصي بكريمة ويسمع صهيب
عود احاجيج يبنتي اسمعج يجنتي .

بتول ..
فتحت عيني .. لكيت امي نايمة بالجرباية الي بصفي
وصهيب على كرسي كاعد يتفرج بجهازة
كبل غمضت عيني.. والالم برجلي مو طبيعي .
وحيل محتاجة حمام ... وريكي يابس
يعني تمنيت ظالة مخمودة ولا هل كعدة

سويت روحي حركت رجلي وفزيت موجوعة
انتبهلي وكبل وكف كدامي .
: هاي عيني شبيج ؟
- رجلي حيل تأذيني .. مكسورة مو ؟
- لا عيني انتِ ما بيج شي .. بس لان واكعة عليها تأذيج .

: صهيب عفية محتاجة حمام .
- كومي يالله .
- لا كعد امي ..
ابتسم: كومي عيني توها نامت ..
- لا صهيب كعدها .

تخوصرلي : هيج هيج راح اشيلج متكدرين تكومين على شنو مكعدتها .
- لا لا اكدر ، شو شوي وخر .

ضحك ووخر جسمه.
ما كدرت اكوم كل شي بيه يوجعني
نترت بي : دنطيني ايدك شبيك .
: مو توج جنتِ هيرو ؟
بس حط ايده ورا ضهري شنجت جسمي
باوع بعيني: مريضة انتِ يابة .
- كعد امي فدوة ..
- هسة ، بس اخليك بالكرسي والله .
بس كعدت نزلت رجلي على كيف
اول ما ضغطت عليها عطت كبل فزت امي مخروعة
: شبيجج يمة شبيجج ؟

بجيت: راح اموت من الوجع يمممة .
- شبيدي عليج سودة بوجهي ، هسة انتِ ليش كمتِ يا امي
: محتاجة حمام يما .

باوعت لصهيب : صيح حسن يمة خل يشيلها .
مسح وجهة : يابة غريب انا تحجين صدك عمة
شو سويلي مجال .

خو امي متصدك ، كبل وخرت
همس: لزمي ركبتي .. اذا وكعتي كبل سفرة الى الله ترى .

ضحكت موجوعة
شالني وصاح : يا علي يا ابو الحسن .
امي خلت العربانة كدامه .
حط شال على راسي
ومشى هوَ بية وامي ويانا تسولف وياه .

فتت ومن صدك حرت
واول مرة احمد ربي على كل نعمة انا بيها
بنص الحمام بجيت لان ما اكدر اكوم اقضي حاجتي
اجت مرة شوي ضخمة تعاونت وي امي

رجعت شالتني خلتني بالكرسي المتحرك
اول ما طلعنا لكيته واكف
بس شاف وجهي عكد حواجبه يسأل امي
: شبيها وجههة احمر.

- ما كدرت تكوم وكعدت تبجي اسم الله عليك .
اخذ منها العربانة : هسة يومين وتصير سباعية وتكوم على حيلها .

رجع شالني بس هالمرة عينه بعيني .. كبل غمضتها
حطني راد يشيل الشال لزمته واشرت براسي رافضه

- تختنكين .
- عادي ..
- امج ما حجت شي .
- اي ميصير كدامك بدون حجاب .
- اطلع برة هسة انزعي .
- لا .. ما مضايقني والله .

رجع كعد على الكرسي وامي كدامي تسولف ..
لحد ما غفيت
رجعت فزيت .. بعده كاعد بس هالمرة يم راسي الكرسي مالته
باوعلي: بتول .. شبيج تونين .
بجيت كبل : موجوعة .
سحب ايدي باسها : بية ولا بيج .
كبل بجيت تخبل هوَ : شبيج يابة
: ميصير تبوس ايدي .
نتر: ومحمد لو ما باقية الحـلقة الاخيرة .. جان هفيتج براشدي
انيمج اسبوع كامل بالمستشفى .

ثاني يوم طلعت ..
خالو ما قبل اروح لبيتنا ..
: ماكو حبيبة خالو ، حضرتلج مكانج يمي ادرايج .
وفعلا رحنا لبيتهم .. صهيب ما رجع ويانا .
تحسنت وكمت اكدر امشي
اول ما وصلت لكيتهم كلهم هناك
صخر وسحاب وباجي مروة وحاتم .

سحاب خبصت الدنيا ..
: يابة هياتني ما بية شي .
- ولج سودة علي شصاير بيج .
صخر: كافي يابة ، حتى اذا ما بيها شي .. راح يصير من وراج .

ساعة وفاتوا علينا ابراهيم وصهيب ..
عيني صارت على صهيب .. گلب وجهة

رجع ضهرة  لورا وورث جكارة سأل
: جبيركم ماكو ؟ ما يتطمن على بنت اخو .

رد حاتم : عنده شغل ابوي ، بس يكمل يجي عليها كبل .
صهيب : جيد .
حاتم: شلون صرتي هسة بتول عيني ؟
عدل صهيب كعدته وعيونه زرفت حاتم زرف .

صهيب : انا اكول نكعد بالهول ..خل ترتاح احسن .
بجت سحاب : ششفت منها طلعوا انتوا خلوني يمها ..

طلعوا كلهم وضليت اسولف وي سحاب
دقايق ووكف فوك راسي حاتم
توة يحجي دخل صهيب نتر بي
: امشي صديقتي الغدة صااار .. يلا سحاب

طلعوا وسد الباب قوي
شوي واجة بأيده الغدة مبتسم
: جوعانة ولج ؟
ضحكتله: كلش .
: يا يابة ، يخسى الجوع .

حط الاكل على الطبلة يمي سألني
: تكدرين تاكلين مو ؟
- اي ، رجلي توجعني بس.
ضحك: يا بوية .

- صهيب .. امتحاناتي شلون ؟
- هسة جنت احجي وي امج ، ناجلها دور ثاني بين متصيرين زينة
- لا لا .
- شنو لا ؟
- امتحن عفية ما اريد ااجل .
-ميخالف الامتحان الجاي عوفي .. واذا ما كدرتي ناجل الورا هم ماشي ؟
- ماشي

كعدنا العطلة مال عيد اسبوع كامل
بصباحية العيد .. فزيت على طكطة خالو طلع بالسيارة .
وجع رجلي مو طبيعي يروح ويجي
شوي واجة خالو بأيده صينية الريوك باس راسي
: كل عام وانتِ بخير حبيبتي .. ان شاء الله اشوفج احلى عروس
وسنة التجي بالمكان الي انتِ تتمني .

بسته بخده وراسه
كعد كدامي تريكنا كاهي وكيمر
العادة الطبيعية بكل صباحية عيد

شوي وكعدن امي وباجي واشتغلت المعايدات بالتلفونات
ما شفت لا ابراهيم ولا صهيب الا بالغدا
دخل بايده السفرة  يفرشها
ابتسم : كام عام وانتِ بخير .
: وانت بخير .. عريس ان شاء الله
ضحك بوجهي وكمل يفرش .

تقرب من خالو وحضنه وباس راسه
: كل عام وانت بخير.. نشوفك على جبل عرفه ان شاء الله
وعريس هم .

ضحك وباسه: وانت بخير واشوف جهالك بنص بيتي .

اليوم جان كلش حلوو ..
بنهاية اليوم من جيت انام رجع وجع رجلي بس ما حجيت
وين يالله فزيت روحي تطلع من الوجع ..
حرت المن اصيح .. براسي اسم واحد وشخص واحد صهيب
بس ما موجود ما يبقل يبات هنا بعد

لزمت جهازي عيونه مغوشة من البجي
اتصلت بي ماكو اخر شي من ديكطع الاتصال شاله
والنعاس بصوته : الو .
بجيت : صهيب وين انتَ .
: يم حسن ببيتكم نايم .. شبيج تبجيين يابة .
- تعاال حباب راح امووت ..
دقايق ودخل علي وجهة اصفر وبعده بالبرمودة ووراه ابراهيم
: ها ها شبيج عيني .
باوعتله : رجلييي رجليييي بيها شي والله .

باوع لابراهيم
: السيارة بسرعة .
راح بسرعة واجة بايده عباية
فزت امي : يا يا شبيج يمة .
رد صَهيب باستعجال: رجلها عمتي رجلها ... راح اخذها انا وابواهيم للمستشفى

كريمة : اجي وياكم يمة اصبرلي
دنك شالني بسرعة : شتحسين بتول ؟
كتله واشهك: روحي دتطلع روحيي
رد يلهث: بية ولا بيج ..

خلاني ورا بحضن امي وركضوا بيه خطية
ومن وصلنا طلعت مفسوخة ..
ظل يكمز وما خلة فشورة تعتب علي ..
سوووها وصوتي ملى المستشفى.. وجع مو طبيعي موتتتت احمر .

كوووة صرت زينة
اجلت رياضيات واحياء ..
وكسرتي طلعت بمعدلي .. جبت بالدور الاول ٩١
وبوقتها صار يوم اكشر .. الناس فرحانة وانا عيوني ورمت تورم من البجي

قررت اشد حيلي بالدور الثاني حتى ارفع معدلي
جان حلمي تخدير وايست من شفت معدلي .
بيوم الضهر طلعت من الغرفة لكيت امي تبلس جواريبها
: وين يمة .
- شو جيبيلي الربطة من الغرفة .
- دكولي وين رايحة بشرفج .
- شعليج بتي .
- دحجي عليج العباس .
- يممممة منج .. خابرتني باجيتج تريد نروح نشوف بت ام صاحب
هاي الناعمة لصهيب .

• 🌚
هلو اسفة ؟
تقبلن اعتذاري ؟ ترى امتحانات والحمزة 🥲
باعن هو البارت مو يعني معتبر ومال عوض اسبوعين
يومين هيج ونختم القصة بأخر بارت يشفي گلبجن والله
احبجن هواي 🤍