رواية مُقيد أجنحتي الفصل الخامس وخمسون 55 - بقلم 💗

بسم الله الرحمن الرحيم

قررت اشد حيلي بالدور الثاني حتى ارفع معدلي
جان حلمي تخدير وايست من شفت معدلي .
بيوم الضهر طلعت من الغرفة لكيت امي تبلس جواريبها
: وين يمة .
- شو جيبيلي الربطة من الغرفة .
- دكولي وين رايحة بشرفج .
- شعليج بتي .
- دحجي عليج العباس .
- يممممة منج .. خابرتني باجيتج تريد نروح نشوف بت ام صاحب
هاي الناعمة لصهيب .

. صفنت ولشتي كلها رجفت ، والحب والكلام
ما طولت امي دقايق واختفت من كدامي واسمع صوتها بس وهي توصي بيه ادرس
توجهت للغرفة مالتي واحسها صارت بنهاية الدنيا كلها

هسة انتِ مو تتعززين عليَ ومتريدي شكو ضايجة !
شبيج بتول شبيججججج ؟
عيوني راحت على موبايلي المشمور ؏ الميز توجهت يمه
طلعت اسمه ودست اتصال وايدي ترعش

بس طلع يمي جاوب مدري شصار بيه وسديته
شمرته وكعدت ؏ الجرباية اريد بس اهدي من روحي ورجفتها
سمعت موبايلي يدك .. ما بيه اكومله

سندت روحها ؏ الحايط شفت المتصل هوَ .
ظليت بحرب تفكيري ، ما بين ارد واكوله بالغلط اتصلت
او اصارحه بالي احس بي هسة او ما اجاوبه أصلًا
وانا بنص هالهوسة الي براسي خلصت الدكة بعدني ما شلت عيني
بدت دكة ثانية .. قررت ما اجاوب

فتحت باب الغرفة دانزل تذكرت هسة يتصل بامي ؟
رجعت بسرعة ولكيت المكالمة خلصت
بسرعة اجة اتصال ثالث منه وهالمرة رديت

- الوو ، بتول شبيج ؟؟ مو اتصل ليش متردين ؟
- جنت بالمطبخ
- ها ، اكو شي محتاجة شي ؟
- لا
- ليش اتصلتي لعد ؟
كتله بكل هدوء : بالغلط .
- بتول بيج شي ؟
- لا ليش ؟
- ما ادري صوتج ما عاجبني ؏ العموم اذا موجوعة او شي كولي
لان هيج هيج راح امر اجيبلج العلاج واكل .
- لا ما اريد شي ، زينة .
- مو بكيفج علاج هذا ، والاكل لا تاكلين منو كلج بس الج لخالتي ولحسونة

هو يحجي وانا بزحمة وهوسة افكاري ، اتذكر كل تصرف بدر منه
قاطعته : صهيب .
- عيونه ؟
- انتَ ليش هيج تسوي وياي ؟ انتَ تكرهني

نبرة صوته تغيرت للجد : شنو سويت ؟
- سديت الخط بوجهة كبل ، انا تخبلت انا شجاي اسوي بروحي
ذبيت الجهاز واخذت ملازمي وطلعت اقرا بالهول
مرت ربع ساعة ولكيت الباب يندك .. شصار بيه
انا شبيها رجلي ترجف يربي .. عادي كوليله ماكو شي وفضيها

حسن وين يربي ، شلون افتح اله الباب وانا وحدي
فتحت باب المطبخ وصحت بتردد : منو ؟

اجة صوت يرعد: افتحي الباب لا احركلج البيت كله
بلعت ريك واحجي ولشتي ترجف
: محد بالبيت روح ، من يجون جيب الدوا وتعال .

عاط بسرعة : بالحسين اذا ما فتحتي الباب ، اطفر من السياج واخزيكم
والدنيا كلها واكفة .. افتحي الباب واتجفي شري

- ما اكدر .
- سهلة ..
كال هيج دقايق وشفته رجله اختفت من جوة الباب .
وايده صارت على السياج القريب عليَ كبل عطت
: لا صهيب لاااا .

نتر: صوتج لا ومحمد اطيح حظج افتحي الباب وخل هاليوم يمر ؏ خير
حجيت بعجز : واذا اجة احد ؟

كال بنفاذ صبر : افتحي وخلصيني .. محد يجي عفت حسن بالمطعم ينظف وامج اذا اجتِي اكوللها جبتلها العلاج .

فتحت السركي وهو كبل دخل وركع الباب قوي
جرني من ايدي ودخلنا للمطبخ ورجع ركع باب المطبخ ركعه اقوى
رفع ايده متحلف : انا مو اتصل الكائناتتتت ليش مغلق ؟؟؟

- خـ خـلص شحن .
- بسرعة صعدي جيبي .
كتله وكلي خوف : لا

اجة تقرب مني وانا رجلي ما تعيني حتى اتحرك
خايفة لا احد يطب علينا
: ليش تجذبين بتول ؟ احجي ليش كلتيلي هيج
ليش اكرهج ، وشنو سويته مخلي صوتج هيج ووجهج اصفر هسة ؟

دنكت راسي : ماكو شي .
باطراف اصابعه رفع راسي من حنجي
: احجي .

- ماكو شي صهيب ، روح لا احد يجي للبيت
عافني وراح سحب كرسي وكعد
: واليوم ما اتحرك منا اذا ما تحجين .. واذا طولتي من تجي خالتي اسألها

لطمت ؏ خدي بردة فعل سريعة
: صهيب كووم روح .

اخذ الدولكة وقبل ما يشرب رفع كتافه
: كيفج انا اليوم يمكم للصبح .
اشر بأيده ؏ الكرسي الي كدامه
وكمل : تعالي نتفاهم هنا واحجيلي كل شي
وانا شنو تريدين اسوي وراها حاضر ، شرط تفهميني كل شي .

توجهت للكرسي يمه بقلة حيلة ، كعدت كتله بهدوء عكس العاصفة الي براسي
: انا اتمنى الك كل الخير وي اي انسانة انتِ وياها
بس ما جان اله داعي هيج تسوي بيه ، انا بنية وعندي احساس
بالنهاية كلامك اثر عليَ .
بس انا اتمنى الك كل الخير ، لو كايل الي برسالة مو اسمع من امي .

جيت اكوم لان احس بوخت من نظراته
الي جانت كلها استفهام وعبالك ما يفتهم اللغة الي احاجي بيها
لزم ايدي ونتر : تعاااالي ، وين رايحة شدتحجين انتِ بابا ؟
يا انسانة يا خير !

- مو باجي وامي راحن يخطبن الك ، بنت خالة ام صاحب
- ام صاحب منية ؟
- الي وراكم بفرع ..
- االيه انا ؟
- لا لخالو ، صهيب روح الله يوفقك لا يجي احد .

جاب كرسيه وكعد من جهتي مبتسم .
: بتول ، باعيلي لج انتِ ضايجة وهيج مقهورة لان راح اخطب .
بخزرته كبل وكمت رجع سحبني نترت بي
: صهيب ايددددك لاتلزمني !!

ضحك : بس اكعدي حاجينيي ؟
هسة هاي الضوجة كلها لان راحننن .. لج احجي ريحي گلبي اشتلعوا اهلج .

دنكت راسي وهيج احس بوختت خجل وعصبية من ردة فعله الباردة
والدمعة لحظات وتعلن عن انطلاقها .
ضحك بصوت عااالي وقرب باس راسيييي قوي

: لو ادري هيج جان من زمان وديتهن يخطبن .
عطت بي : انتَ صدكككك تحجي اكولك لا تلزمني تبوسني من راسي !!

ضحك: وعلي فلا احس بروحي .
سحب ايدي باسها .. بتول سامعة مال احرك العراق علمودج ؟
اليوم احركلج الدنيا كلهااا .

طلع شوي ورجع بايده الاكل والعلاج
: اكلي واشربي دواج .. واقري زين يالله في امان الله .

طلعت ورا اقفل الباب بس كل شي ما فهمت منه
هسة شنو
ساعة وراها ورجعت امي ما حجت شي واستحي أسألها
مرت الايام يوم ورا يوم وبلشت بالدور الثاني
والحمد لله جاوبت بهذن المواد

عطلت وطلعت من السادس بعد عناء طوووويل
قررت االتفت لربي اكثر
وبديت احفظ من القران.. صهيب اختفى رحنا مرتين لبيت خالو ما لكيته
واستحي اسأل ، بس عيوني تدور عليَّ اول ما افوت .

اتوقع نسيته ، انا ما اريد الي صار بيه وي حاتم
يرجع يصير .. كافي عليَّ الي صار أصلًا
وراها بيومين بلش اعلان النتائج ونسهر للصبح وماكو شي

ظليت هيج يومين لحد ما صبحت ؏ اتصال من صديقتي
تبشرني ناجحة ومعدلي صار ٩٣
بوقتها سجدت شكر هذا الي ردته وصلت اله
نزلت لكيت حسن ديطلع للشغل بشرته
وهو يحضن بيه : تستاهلين كل الخير تووله .

لل ١٠ اجو باجي وابراهيم يباركون
باجي دخلت تطش بالجُكليت فرحانة وتهلهل
وابراهيم يصيح : سباعية عمي سباعية

خالو من رجع كال تجهزوا باجر نطلع للشمال
حاولت امي وياه ما قبل ، كال هاي هدية نجاحها وتعبها .

رحنا وحيل حيل تونست ، الجو هناك احلى واهدء
واول ما رجعنا بلشنا نجهز للجامعة يومية باجي تراسلني تكول شوكت
نبلش نجهز .. ومتحمسة اكثر مني .

عاد نزلت سألت امي كالت ؏ باجر نروح ونقسمها على طلعتين لان
رجلها وما تكدر تمشي هواي .. انا هم صعدت كلت لباجي
ودخلت للبرامج اگلب ببيجات الملابس واخذ فكرة شنو اشتري

وبما انو عباية قررت اخذ شغلات اساسية
بناطير مرتبة ، كم قميص اللوانهن اساسية .. واخذلي فد حذائين مكرم السامع
وشالات .. وهـاا اريد مكياج هم وبعد ؟
وجريتها هيج لحد ما حسيت الضوة طلع

نمت كعدت ؏ صوت امي تعيط
: يومية نايمة للضهر يا بتول ميصير هيج ؟
- يمة دراسة وخلصت طلابة بعد !!

- لج كومي عينيني ، خنسوي اليوم حملة للبيت
راح اروح اصب الريوك الج ولحسن اذا ما جيتي اليوم ماكو روحة

بعدها ما طلعت .. سبقتها ورحت للحمام اغسل
ولزمنا البيت جرد من الغرفة للمطبخ ..
اول ما كملت دخلت سبحت واتصلت بيه باجي
: ها حبيبتي ؏ ال٤ نطلع تمام ؟
- تمام التمام .

صعدت حالفة الا اترس روحي مكياج
صرت جامعية بعد شحدها تحجي
وكعدت ارسم واتفنن ؏ كيفي والخاولي على راسي
حضرت فستان حلو قصير بس مو كلش
ووياه جواريب سود ، لونه جوزي يخبل
والشال كريمي ..
ڪريمة : بتول اذا متنزلين بالقران اشمر عباتي واكعد .

سمعتها تعيط من جوة .. نزلت اركض
- ها اهـاا حجية كملت .

باوعت بوجهي بتركيز تريد تحجي بس بعد متكدر
باجي هسة بس تجي تشوفني ضايجة تغسلها غسل .
ابتسمت بوجهة : ما طوخت لخاطرج .

نترت: هم عوز تطوخين اكثر من هيج
دنحجي رمشت باجي .
طلعنا للباب توقعت ابراهيم ياخذنا ، لان البارحة سألني وين راح تروحون تشترون ملابس ..
تفاجأت من شفته ، دنكت راسي وما اعرته اي أهمية
خلص كل شي انتهى الولد خل يشوف نصيبه

ركبت امي بالصدر يمه وانا باجي ليورا
وانطلقن امي وباجي بالسوالف طول الطريق
جان فاتح الاذاعة .. اغاني ام كلثوم
من صوت سوالفهن ما جنت مركزة.. شوي وصار هدوء
ركزت بكلمات الاغنية واول مرة احس صوت ام كلثوم هيج حلوو

كُنت بـ اشتقلك وانا وانتَ هـِنا
بيني وبينك ، خطوتين .. خطوتين .. خطوووتين
شوف بقينا ازاي انا فين !
يااا حبيبي
وانتَ فين
انتَ فيننن ، انتَ فيييين !
والعمل ؟ ايه العمل ؟
ما تقولي اعمل
ايه
والأمل انتَ
انتَ الامل
تحرمني منك ليييييه !!

رفعت راسي ولمحت عينه بالمراية ، كبل دنكت
حسيت باجي حسيت بينا شكد استحيت
ظل المقطع يتردد براسي لحد ما وصلنا لشارع سيد الحليب

دننزل كال : شكد وارجع الكم .
شيماء : ساعتين وارجع يمه ..

رد مستهزء : ساعتين ، دكولي ستة ، سبعة .
- روح يمه ساعتين وتعال .. نكمل لتخاف .
ضحك : ظلوا للصبح يابة انتظركم شعندي ، شغل عمل .

كلتله امي : ليش متنزل ويانا يمة ، شوديك ويجيبك ؟
باوعلي ورجع كاللها : خوما تطولن !!

ڪريمة: ان شاء الله منطول .. خلي السيارة بمكان زين وتعال نتنظرك هنا.
- انطيت لامي نظرة حقيرة ، يابة اتمنيت اكول لا بصوت عالي .
هسة شلون ناخذ راحتنا راح يظل ينقنق الطلعة كلهاا

اجة وكام يمشي هو وامي كدامنا
شوارع المنصور اغلبها ازدحام .. وهناك النسوان كلها حلوووة
من تمشي من يمهم وحدة ، بالقران اظل احوس
هو اوكي هن يموتن .. زين انا شبيه !

الطريق كله اباوع وضايجة
ما حسيت الا على صوته : شبيج ؟

لكيته يمشي بصفي ..
: ما بيه
- ضايجة لان اجيت ؟ هسة ارجع
: لا
سكت : احجي شبيج اذا ضايجة ارجع هسة عادي
- لا قابل شنو مسويلي انتَ ؟ عادي ابن خالي ومثل حسن اخوية

وكف وكفة بنص الشارع خزااانه
جريته من ايده اريده بس يمشي العالم كامت تباوع علينا
- صهيب !! صدك تحجي هاي شبيك ؟

نتر والحواجب انطبگن والگصة انعقجت
: مثل اخوية شنو ؟ شوكت صرت اخوج ست بتول ؟

: من زمان .
- اسكتي اسكتي لا اهفج براشدي ارجعج للبيت مشي تبجين .
ظل يعيب بحلكه ويقلد جملتي
: مثل حسن اخوية ، عاب لهل حلگ .

ابتسمت وانا امشي .. كبل نتر
: سدي حلكج لج !!

كبل أختفت ابتسامتي ، باوعتله بطرف عيني ضايجة
كلهن الي مرن من كدامه اكلهن اكل بعيونه .. هسة صار شريف .

فتنا تقريبا ٤ محلات من قهرتي ما عجبني شي الملابس زينة حلووة
قربت يم امي : خل نرجع يما غير مرة نجي .
سألتني بشك : شكو ؟

- راسي يوجعني .
نترت بيه : نشتري ونرجع بلا هالسوالف هاي هسة ..
عفتها ورحت لباجي : باجي فدوة اروحلج خل نرجع

باوعتلي بخوف: شبيج يمة ؟؟
هنا حصرتني البجية وكوة لزمت دمعتي داحجي اجة يمنا
: ها .. ما قررتي ذاك القميص الفوك حلو شفتي ؟

وخرت عيني منه وما رديت
قرب روحه مني كال بصوت ناصي باجي واكفة
: اسف ، بس ضحكتج حلوووة وما اريد احد يشوفها
اعذريني هالمرة ولا تضحكين لان گلبي خلصان وابو فاضل

دنكت راسي ضايجة ، بس كلامه غير مودي شوي
اخذت القطع الاساسية .. بقت شغلات قليلة
ودانا تعشينا .. خلصنا ؏ الـ ١١ بالليل
حرف ما حجة على التأخير بالعكس جان مرتاح ويضحك

ليش هيج يسوي ؟ يريد يعلقني بي ويروح
شنو يستفادون .. وين المتعة بهيج موضوع انا تعبت
هذا الاهتمام الزايد شنو نهايته !!
مو اختفى وراح وعاف كل شي ، مو خلاني ابين مشاعري واتجاهلهن
شلون ادعي عليَ ؟ المن اشتكي
وهاي المشاعر ااي بداخلي وقربه الي احبه

شوكت حبيته ؟ انا ما حبيت شخصه
حبيت اهتمامه ووملحته .. ومحاولاته حتى اصير زوجته
انا هذا الاهتمام ما شفته من احد قبل
مو بس انا كلنا احنا البنات

كل حرف كل حجاية منهم تطبع طبع
ما ننسى مثلهم
ولا عدنا سرعة تخطيهم
اول ما رجعت للبيت .. وانا اعزل الملابس بشغف معدوم
انا انهزمت من بيتنا ذاك علمود انسى حاتم
هسة وين اروح حتى ما اتعلق بهذا اكثر

قررت ادزله رسالة طويلة
واحضره
واريح راسي الي تعب من كثرة التفكير
بس ما كدرت

ثاني يوم كعدت ضايجة اكثر
دنتريك سألت امي .
: يوم خالة ام حسين زوجت ابنها لا ؟
- ليش ؟
كتلها بخجل : هي مو تريدني جانت ؟
- ايي
- اذا يقبل اكمل دراستي انا موافقة .

ضحكت امي : ها ولج عوزتي لازم
ضحكت: يااا يمة شبيج .

شوي وكامت من يمي اتصلت بيها
وعرفت منها يقبل اكمل
قررت اكعد وياه واشوفه

وطلبت من امي فترة اتعرف عليَّ واعرف شخصيته
بالاول مــاا قبلت ، بس بعد اللحاح مني اضطرت توافق .
وكتلها لا تكول لاحد حتى باجي ولا سحاب لحد ما اشوفه

المرة ردت خبر لامي ورا يومين كالت العصرية نمر عليكم
خليت مكياج حلوو ، ولبست فستان طويل عندي سمائي
وشمرت شالي على شعريي

حيل جنت متوترة وخايفة
ما خليت شي ببالي غير ، انو انا استحق انسان
يحاول علمودي اكثر ، ما يخليني بنص طويق ما ادري وين اروح
ومنين ارجع  .. انا استاهل اعيش حياتي مرتاحة

دخلت مدنكة سلمت على امه
ورحت كعدت يمه
الولد لطيف ، شكله مقبول وجان هادئ
حتى أسالته بهدوء ورقي ، كلش عجبتني شخصيته
يشتغل بمختبر ومتعين وكال ما عندي اشكال على اي شرط انتِ تحبي

اغلب الكلام جان منه
وما طلب مني احجي غير بس سؤال واحد
: انتَ طالعة اليه برضاتج ؟

باوعتله : اي.
ابتسم بوجهي : على بركة الله .. انتظر منج ترديلي الخبر الي يفرحنا ان شاء الله .
وراها طلعوا .. ومر اسبوع وامي تدور مني جواب

بيومها ورا صلاة المغرب باشت بالعشا واكفة بالمطبخ اگلي
حسيت على ركعة الباب القوية مال مطبخ
يمةة اجة يمي وجهة يخووففف

لزمني قوي من زندي يعيطط : انت صاااااحية لخاطر محمد بس حاجيني
اجت امي تركض تريد تجرني منه متكدر
نتر بيهاا: شنو يجي يشوفهااا وتكعد ويااااه ، ومحد عنده علم
زلم قنااادر احنا هناااا ؟؟؟ يعني اعرف من عندددده من الغريب اعرف .

كلتله امي :يمة والله ما رجعنا الهم خبر كلت ارد خبر موافقتها منكم انتوا .
صهيب : صدك تحجين ، يعني ما تدرين انا رايدها ؟

ردت : ما اكيف يا يمة تصير نسيبي بس شوفة عينك ابوك ما يقبل شنو بايدي
كالللها بعَصبية: اربد احجي وياها وحدنا تسمحيلي ؟
- اخذوا راحتكم يمة ..
طلعت وعافتني يم نظراته الي تخوف
سد باب المطبخ الي يودي للصالة واجة يمي
: اي ؟ ودراستج .. مو جانت اهم شي عندج ؟؟؟؟

عيني بعينه كتله : يقبل اكمل.
مسد لحيته بعصبيه : ها حلوو ؟ عجبج شفتي وطلعتي كدامه مو ؟
سكتت
- ليش هيج  بتول ؟ انتِ مو ضجتي لان راحن يخطبن شنى تغير

آنا أصلًا كلبي محمل علي من هذا اليوم نهديت بي ابجي واحجي
: شووى انت ما تستحي ؟؟ جا ياهو عافني وانطاني ضهرة ورا ما خلاني
ابينله مشاعري ابوووية ؟؟؟ مبروك  لنجاحي ما كتلي
روح شوف طريقك انا وياك ما نتوالم  .. هيج احسن الي والك

- يعني انتِ فسرتي بعدي هذا انو ما اريدج ؟
- عندك غير تفسير .

رفع ايده بوجهي وكالها بعصبيه
: جنت الم فلس على فلس علمود اجي اخطبج يا غبرره .
من شغل لشغل ، فوك شغل المطعم طلعت عمالة وبالليل دليفري
انا ما كتلج لان ميحتاج هذا واجبي ولازم اوفرلج كل شي
بيومها طلعت منج رحت لابوية حتى ايده بستها
كال مهرها هلكد بهلكد من يصير جوة ايدك تعال اروح واخطبها الك .
وهذا الموضوع كله ؟

دفعته : جذاب .
سحب شالي من باب المطبخ شمره على راسي وطلع
اجتني امي شبعتني رزايل لان سمعت كل شي
ماكو ورا ساعة اندكت الباب ودخل خالو ووياه ٢ زلم وابراهيم وصهيب للصالة
وباجي اجت يمنا الضحكة شاكة الحلك

كالت بابتسامة عريضة :عيني ڪريمة ، لبسي وفوتي اخوج يريدج جوة..
امي بدون نقاش حطت العباية علو راسها وفاتت
اجتِ يمي باجي تضحك : شمسوية بي ولج اجة يرجف يتوسل بخالج .

باوعتلها بتوتر وخجلانة : ما سويت شي والله وما ردتها ترصل لهل مواصيل .
ضحكت : انا المفروض ازعل منج ، من يجي يشوفج وتحجون وانا ما ادري
بس هسة الكاع ما شايلتني من الفرحة ..

ورا نص ساعة طلع ابراهيم : بتول يريدوج .
سحبت الجبة الإسلامية ودخلت بس شنو كل خطوة اخطيها رجلي احسها وكفت
باجي وياي دخلت مدنكة راسي كاعد يم خالو والزلم يمهم ما عرفتهم منو
بوست خالو وكعدت يمه من الجهة الثانية وراسي ما رفعته

- انا ضايج ومقهور منج ، لان تصرفتي انتِ وامج هيج تصرف بدون علمي
ولا علم احد من الولد .. بس اكول هاي حياتج والمفروض ما اتدخل بيها
بس هيج قرار ميصير بالختلة والتضمضم يا بنتي

رديته بخجل : انا اعتذر خالو .
كمل كلامه : وانا اليوم جاي اطلب ايدج لابني صهيب
ويوم المنى تصيرين جنة اليه وكدام عيني
ما الكه احسن منج زوجة لابني .. وام لأحفادي
ونعم التربية ونعم الاخلاق .. من يوم ما دخلتي بيتي
وانا اتمنى الله يرزقني ببنية حلوة مثلج
وهاي بعد ما يحتاج اتمنى .. اذا صرتي جنتي وزوجته لأبني
القرار الج ، وما اضغط عليج بنيتي

- لساني ساعتها انبلع .. حتى صوتي احسه اختفى
بووووخت واريد بس اكوم من يمه
بس احس فشلة اعوفه بدون رد ظليت دقايق صافنة افكر
شنو ارد واكوم قررت اكوله

- الي تشوفه خالو .
ضحك : يعني شنو ؟ موافقة

نقذتني باجي من كالت : خليتها تفكر يا ابو صهيب لا تحرجها .
بس كالت هيج اترخصت وكمت من يمهم
من طلعوا امي دخلت يمي للغرفة ، كعدت ؏ الجرباية وكالت بكل هدوء
: المرة هاي القرار الج ، بس اجيت انطيج رأيي
ما تلكين مثله احد يحبج يمه .. من تشوفين شخص هيج متمسك بيج
جلبي بي بكل ما عندج من قوة
من خالج يحجي عيني على ايده ترجف منتظر ردج

وكامت وعافتني توقعته يدز رسالة بس ماكو
للصبح ما نمت كمت صليت استخارة
وحسيت براحة .. اي انا احبه فعلا شنو منتظرة ؟
اخاف
اخاف هذا الحب بعدين كله يروح

بس المودة والرحمة بينا ما تروح .
طلع حسن من الحمام يباوعلي ويضحك
: يابة ارضي بي خطية خوش ولد .

ضحكت : شو جنك مكيف تخلص مني .
- لا والله فرحان بيج وبي .. خطية الاشهر الفاتت اكل وحل الولد
-الله كريم .
- لا بتول ادري الله كريم اذا ما وافقتي اخلي يجي يخطبني الي
هاي الفلوس الي جمعها متروح للغريب

خربت ضحك علي ، حضرتله الريوك  بس طلع كعدت امي
كتلها قبل ما اصعد : يمة الي تشوفوه سووه وانا قابله

ضحكت : موافقة يعني ؟؟
دنكت راسي اضحك كبل طگتها امي بهلهولة .
صعدت اريد انام ماكو توني نمت اجتني ڪالت
: كومي باجيتج جااية .

اجتِ تبوس وتحضن وفرحانة يمكن اكثر منه
كالت العصر راح ياخذ خالج ويروح يطلبج من عمامج ..
وبعد ما كلها اتصلت بيه
وبعد يوم متعب محرومه منه من النوم .. اتصل هوَ بيه

فتحت الخط وحرف ما حجيت .
اسمعه يضحك:ظلي ساكته ظلي كلهن هذن اطلعهن من خشمج .

-بتول .
-ها  ..
- اسبوع الجاي ، هي مشية هو عقد سيد تمام ؟
- بكيفك
- جا هو عرس امي غير عرسج .
ضحكت : ما ادري .
-ياااابة  اخرب ؏ الخجلان انا .

وهذا الخجل ما كسره غير يوم العقد
ما ردتها تختلف عن المراسيم الي جنت اشوفهن بالنت
واحلم بيهن مثلي مثل البنات
الكوشة صارت تخبل .. فستان العقد جان دمار اختاريته تصميم شوي مختلف

كلها يمي ، بس احس روحي بعالم وحدي
دخلوا اهله كلهم ، خالاته وزوجات خواله
شفت باجي من بعيد الفرحة تارسه عيونهاا
اجت لجهتي تبوس وتضحك
ما مر وقت طويل وكالوا راح يعقد

كعدت ؏ الكرسي يم الباب .. بين ايدي الترجف سورة الفتح
بلش السيد يحجي .. وما حسيت غير على الهلاهل
بعد ما رديت على سواله : نعم وانتَ وكيلي .
ورا شوي دخل .. تقدم بوسني وحضني حضن قوي كلش
ضحك : والله گلبي طاير بيج ، جعلج سعادة ايامي الجاية كلهاا .
تذكرت .. من كلتيلي ما باركتلي على ناجحة .. جنت داحضرلج هديتج

ضحكت: شنو هيَ؟
- عش الزوجية .

وبهاليوم السعيد انقعد گلبي وي گلبه .

——————————————————————-

وها اهـااا خلصناا 🤡
شبيجن وياي بنات عمي جنت امتحانات والله
مو انا طالبة صيدلة ما كلت الكم 🙈🙈🙈🙈🙈🙈
حتى محد باركلي دروحن يلا زعلت

؏ العموم النتائج مالتي باجر ادعولي من كلبجن
وكلش اعتذر لان شلعت كلبجن بالتنزيل بس والله
من امتحان لامتحان ، وشغفي مطفي

القصة لهنا انتهت بالنسبة اليه
سحاب ما عندي اي تواصل وياها وما اعرف شي عنها
ظلت بس بتول وياي .. وسالتها عن اخبارها كالت عايشة
حمل ما صار عدها

واخر شي تواصلت وي بتول حجتلي هاي الاحداث
وصار فترة كلش طويلة
كالت على فرحة الزهرة السنة الجديدة  يصير العرس
العقد مالتهم صار نهاية ال ١٠ يا يوم متقبل اكول 🙈

ولهنا انا ختمت وياكم كل شي
بتول مو مثل سحاب علاقتي مو هلكد قوية بيها
ولحيت عليها اريد اكتب قصتها وي ابن خالها
لان ما احب النهايات الي ما بيها نهايات تفهموني ؟
ما احب اخلي قصة معلكة  وهي جانت حبابة وقبلت
بس ما اكدر اكثر من هيج لان القصة تصير ملل

وشكرا لان الكل تحملني
القصة كتتبها بفترة جنت صغيرة
وتعرفون كل يوم نكبر اكثر بعد
اتمنى اكدر ارجع واعدل هواي شغلات
جنت ممكن اكتبها بشكل افضل
بس راح اخليها حتى اتعلم من اخطائي وبنفس الوقت
تعتبر انجاز الي ما احب اغيره او اعدل عليَ

اذا انتِ قريتي القصة بالجديد اعرفي القصة قديمة
والانسانة الي كتبتها تفكيرها تغير
القصة حلوووة كلش استمعت وانا اكتبها ووانا اسمع احداثها
اتوقع بعد ما اكدر ارجع اكتب لان وقت ماكو
بس ان شاء الله النا لقاء ثاني 💋