رواية مُقيد أجنحتي الفصل الثاني وثلاثون 32 - بقلم 💗

البـارت الـثالث والثلاثون ..
بقلمـي 'مريـِم علاء '

يواهس تضحك الدنيا علئ شفافك
يبو الليل الحلو اليلعب علئ جتافك
احس روحي تأمن بيك وتخافك💛

سـحُاب:- واكفين يم هاي النقطة ' الصوبة مال علاء الدين الفتيلة مالتهة انتهت ..
واكلنا البـرد صار يومين ..

واكف فاتح النقطة احنـة نصيح الهة
الجوزة .. لان هي نقطة الوطني الي ينربط عليها السبلت،  ومرات الـصوبة الكهربائية

واني يمة لازمة الة الدرنفيسات، والبراغي مال نقطة الفاتحة ويشتغل بيها .. وبحلگة درنفيس،  ويشتغل بتركيز

الي يشوفة يكول،  كهربائي من سنة الـ90
وكل شوي يجأ جأ عود هو يفهم بالكهرباء وكذا..

اردف بضجر:- هسة شلج بيها سـحُاب، مو كتلج يوم يومين،  واخلي حيدر يجيب فتيلة واسويها،  عليـش الكهربائية هاي هسة ..

رديت عليـه بعناد:- يوو يمعود شلون يعني،  اموت من البرد يـلا ترتاح ..

شال راسة من الشغل، ورفع حاجب بغرور وكال:- مو كتلج،  اني موجود وكافي ووافي ..

سـحُاب :- لا بشرفكك صخر .. مو مال هاي السوالف، الدنيا برد الواحد يلبس تراك قديفة
، وجواريب تك وتـك،  وقمصلة ثخينة
ويجيب بطانيتة،  ويگعُد يدثر روحة يم الصوبة ..

هز راسة منزعج:- يولي،  حيدر لو اتغزل  بي واقمشر عليه حتى يجيب الي شغلة،  يفيد بي وانت لساني وكع واني اتغزل بيج
وماكو فايدة ..

سـحُاب:- لا تنسى عزيزي،  احنـة شنو هسة ..
جـر حسرة قوية وكال:- والله راح اصير مثل ام سيد علي ...

رجع راسة يشتغل بالكهرباء،  وكلبي يمة كل شوي اخاف ينـتل،  يلعب بالوايرات
ويجيب ويودي،  حتى يربط واير الصوبة وي واير النقطة ..

ديشتغل عاط:- ولج سـحُاب، جيبي هذا الشسمة ..

توترت بسرعة واني ادور بأيدي على الشسمة
: يا شسمة صخر ..

رد بانزعاج:- شبيج هذا الشسمة، صدك تحجين انتِ،  يلا عادد ..

سـحُاب:- صخر بشرفـك لا تكلي شسمة
،يعني هو شنو الشسمة؟ 

كمت اشيل كل انواع الدرنفيسات الي بأيدي واكول ' هذا ' زين هذا '' لعد هذا

وهـو يصرخ بـ:  لاااا مو هذا ..

اخر شي شمر الي بايديه واجاني
والعباس،  ما خليت اية بالقران ما قريتهة
كلت هسة يهفني براشدي،  يفر وجهي فرة مزدوجة،  تخبل كبل حطيت ايدي على خدي
نوب تخيلت ،  ينوم  علبة العدة براسي

وصل يمي،  سحب عُلبـة البراغي
وحجة بحرگة گلـب ..
: وكع لساني واني اكول الج،  جبيبهم
وانتِ صافنة بوجهي .. شبيج بالج وين؟

تخوصرتلو ورفعت حاجبي متعجبة
: لا بربكك،  صارلك ساعة شسمة وشسمة
تالي هذن،  ليش هذن شسمة

بعدين تعال كلي،  هذا الشسمة شنو فهمني
، امي هم هيج، من تكولي تعالي اعلمج
تطبخين،  ومن نوصل للبهارات

تظل شسمة وشسمة،  اخر شي لاهي معلمتني
ولا هي مسوية غذة لان صعد ضغطها

فظل بنفسي ، اعرف ماهو الشسمة !؟
وليش ما درسنا!!

صخر:- هو البراغي،  بس نسيت اسمهة..
هسة مو كتلج اني ادفيج يابة،  يحتاج كل هذا،  وشحلاتي اشتغل صيف شتاء

والفتيلة مالتي ما تحترك  تجدد وي كل بوسة وحسب المكان بعد ..

سـحُاب:- صاير،  تدور سوالف مو مال حبابين
صخر:- من زمان،  بس ناطر منج اشارة،  حتى اشوفج الانحراف على اصولة ..

عفتـه ونزلت،  لان هذا لسانـه مابي فنتك
، يطلع كبل وينسى روحة، ويكلبها بينا
ومحد يطيح حظة غير اني

هنَّ اخلاقي على گدي،  جمعتهن من رزايل امي ومدرسة الاسلامية. وصرت خوش

لكيت باجي بلشت بالغـدة، احب ابتسامتهة
من ادخل يمها بالمطبخ وهي تطبخ
احسها دفوو،  بعز برد ورة سبحة الشتة ..

من تكعد يم الصوبة الي ما سواها صخر
شافتني صافنـة ومبتسمة كالت
: عساهـة دوم حبيبتي ..

رفعت عيوني مبتسمة:- ايامج باجيتي العسل،  وام زوجي ابو قرودتي ..

ضحكت وكملت كلامها وهي تگلب بالتمن
: شراح تجيبين لصخر !؟

فتحـت حلگي مستغربة
: ليـش،  كالج محتاج شي ؟

: چـاا غير انت تعرفين شيحب ..

سـحُاب :- شنو المناسبة ..
تركت الجفجير وباوعت علية بأستغراب

مروة:- يعني متعرفين شكو، بنهاية هذا الاسبوع .. متعرفين ميلاد زوجج ..

ضميت شفافي لجوف حلگي ورديت
: حراام اذا ادري ..

مروة:- يـاا،  صدك عود؟ 

سـحُاب:- والله ياباجي ابنج، جان مشغول
بحرب،  كل ما اكوم على حيلي يكتلني كتلة
يخليني بعد ما اكوم،  ولا اكعد

عكدت حواجبهة وكالت:  بعدكم تتعاركون؟
سـحُاب:- لا قبل، هسة الله هادي وصاير زي العسل،  بس بعدني ما اعرف لكل اطباعة
ولا كل تفاصيلـه .. تونـة بدينة واحد يتعود على الثاني ..

مروة:- ربي يسعدكم بنيتي،  هسة انتِ دريتي مني،  حظري روحج وفاجئي بشي حلو

هزيت راسي وصعدت واني احفظ تاريخ ميلادة،  يعني ما بُقى شي،  اول مافحت البـاب لكيتة راجع يسوي بالصوبة

لا اراديا انرسمت على شفافي ابتسامة
.. من شافني هيج،  وبدون ما يعرف شكو
رد علية بابتسامة، اقتحمت ملامحة

كفيت الغرفة من الهوسة الي صارت بيها
.. سمعت صوت تليفونـه يرن على الطبلة

ظل يرن ويسكت،  هو كمل بس بقى يلزك الواير لان الاسلاك مالتة طالعات ويخاف تنتل
كال وهـو مركز بلف التيب حول الواير
: سـحُاب شوفي من هذا ..

باوعت على الجهاز مكتوب عثمـان
: عثمان صخر ..

صخر: جبيبي وفتحي السبيكر ..
وحرف منج ما اسمع ..

خليتـة يمة
عثمان:- هـا ولك ..
صخر:- هـاا زربـ** ..

عثمان:- امنيتي فـد يوم نتخابر،  ويصير بينة سلام مثل البشر ..
صخر:- ليش انت حاسـب روحك على البشر؟
احجي يول شراديد،  بأيدي شغل ..

عثمان:- لا سـلامتك حبيب،  بس حبيت اذكرك اسبوع الجـاي دوامك ..
صخر:- انت،  شوكت يصير براسك خير ..وتجيب اخبار مثل البشر؟ 
عفية صديق زرب* انت. ؟؟

عثمان:- خايـس صارلك اسبوعين كاعد
طيـ** ما خاس من الكعدة ..
صخر:- من يخيس الي عندك يخيس العندي
..يلا انگلع ، واذا تتصل بعد تعرف شسوي

سـحُاب:- باوعت عليه سد الخـط ضايج
.. كال بصوت مزعوج:- بعدين انت شنو هذا الي راسمتـه بطرف عينج

رديت ببـراءة:- ايلاينر ..

رفع حاجبـة:  شـنهييي !!

: كحل ، شبيك ليـش ..

صخر:- مسحي يابة انة بدون، كحل روحي طالعة هنوب كحل،  مسحي واستري علية وعلى نفسج ..

سـحُاب:- لا بشرفكك صخر، اني منتظرة اتزوج حتى اخلي مكياج،  اجي يمك تگلي مـاكو ..هسة احـط وانتحر..

ضحك من گلبة وكـال:- حلوة انت،  هاي السوالف تخرب وجهج النـاعم يبوي..

سـحُاب:-ما اخلي هواي وعيونك ..

رد مبتسم:- هـاي هي،  مثل ما تحبين ..
نزلنة تغدينا وكفيت المواعين .. وي البنات
صبينا جاي،  كعدو يحجون العراق واوضاعة
واني مـتت نعس .. من شافني هيج سحبني
وصعدنا فوك ..

مددنا ودحسني بحضنة ونـام وياي
فزيت باوعتعها ساعة 4:00 العصر

ادور عليه ماكو، تالي لكيتة كاعد بغرفة الكعدة .. ويشتغل بالابتوب..

غسلت وجهي،  وتوجهت يمـة،  بس شافني ضحك .. اول ماكعدت يمة سحبني لصدرة
ورجع بينا لـضهر التخم .. وشدد قبضتة ايديـه على ضهري .. همس

: شبـي الحلو ضايج ..

: هوَ اني لـو انتَ ..

صخر:-  چـاا انا ليش ضايج يبعد روحي
غير دوام وبـعد من اصبح ما اشوف هالعيون ..

سـحُاب:- مو احسن الك،  ما مليت مني ..

صخر:- يول ياهـو يمل رمش عينـة ..

سـحُاب:-شكد مطول؟

- اسبوعين ..

: ودوامك شوكت ..

- هذا السبت ..

سـحُاب:- صفنت بوجهة،  رفعت ايدي بادلتة الحضن .. توني انتبـه اني اسبوعين مـااشوفة
.. يعني 14 يوم،  اگابل حياطين الغرفة

همس: احبج ..
: صخـر، ؟

- عيـونة !!

سـحُاب:- راح اشتاقلك..

بـاس راسي ورد كـال: چـاا انا من هسة مشتاگ ..

صاحو الولد وطلع وياهم، صفنت الشعو يوصلني متأخر،  عزة اني شلون بية

شنو شلون بيج، شبيج انتِ .. صدك شبية اني
من اجت هالحنيـة يربي..
هو يروح السبت،  والخميس عيد ميلادة

واكفة وياهن بالمطبخ،  اليوم الشعة برة سوو حيدر وزنوبة، همبرگر،  واني بتـول نگلي وياهم نواشف .. دخل صخر ايديه بجيبة

تقرب ودخل يمي للمطبخ الـحار
: سحابة،  صعدي بدلي دا نروح للبستان ..

رفعت حاجبي مصدومة:- هسة ؟

:اي ينـور عيني هسة،  صعدي طلقة قبل ما تظلم ..وخل زينب وبتـول هم يصعدن ويـاج

: وياهو يسوي عشة للحجية وباجي ..

صخر:- هسة من نرجع نجيب ويانة من برة..
بعد وكت للعشة ..

سـحُاب:- عفتة ورحت لزينب وبتـول
: يلا بنات،  صعدوا بدلوا.. صخر راح يطلعنا

كالت زينب:- وين اودي جهالي اني؟

سـحُاب:- يم حيدر ..

زينب:  يا حيدر عيني،  ارجع الگاهم بالحمام
..

سـحُاب :- وانتِ يلا صعدي بتول ..

بتـول:- باجر عندي فيزياء،  ويادوب الحگ
امشي روحي مني ..

.سـحُاب.. صدكك تحجن انتنّ؟ يعني شنو اروح وحدي ..

زينب:- فرصة واجتج، طلعي فرفري وحدكم
شكو نابصتنة وياكُم ..
يلا كبالي صعدي يلاا،  بدلي ونزلي ترى ما بقى بس ساعة وتصير ليل ..

كتلة وصعدت ابدل .. بسرعة بسرعة
كلت بالسيارة نفتر،  بس لبست ستريج جوة الدشداشة وجواريب ثـخان وخليت عبيتي على راسي ونزلت ..

لكيتة بالسيارة كاعد،  بس صعدت باوع الي مبتسم كال:- يبـاا حياج الله ..

: الله يحيك ..

اردف وهـو يسوق ..
: كَلَيتي يبـوي؟ 

سـحُاب:- لا مو شفتهم بعدهم ..
صخـر:- انزل اجيب الج شي تاكلي بين منوصل ..

سـحُاب:- لا لا .. من جنت فوك اكلت نمنمات
مجوعانة هواي ..

: چـاا عافيات يبعد هلي ..

ظل يسوق وكل شوي يصد وجهو علية
يبتسم ويكمل سواقة .. عيونة تحجي فرحتة

اردف .. سحابة،  هاج هذا اكو برنامج بي هي اغنية وحدة،  طلعيها دنسمعها ..

: اخذتة من ايده، دخلت على البرنامج طلعت اغنية لحسـام الرسام .. ''راح اكتب احبك ''

ابتسمت وسحبت اواكس وربطتة بالجهاز
بلش يغني،  وصخر نشك حلگة بس ساكت ويستمع .. واني هم مدري شجاني شتخفيت

وهذا يصيح '' ابوس واحضن بكيفي ''
يعمود استر علينا واسكت ..

وصل لشمهد .. علاه صخر هواي

رااح اللغي لكلبي. ، كلبي مااحتاج
واخلي صورتك انت بمكانة .. والـيسالني عنك
ما اكول بعيد،  اكولة بصدري واتنفس حناانة ..

واول عيني ما تغمض، تجيني بالحلم تركض
وابـوس واحضن بكيفي،  اموتك غير اذا ترفض..

صخر :- ايييي والله يحسام، جنك تدري شنهي الـ بالگلب ..

سـحُاب:- وصلنا لبداية طريق، نزل هو
سالتة:  نتمشى ؟!

:اييي يبوي،  يلا قبل ما يصير الليل ..
سـحُاب:- بدينا نتمشى واني البرد اكل عظامي وصرت ما احس لا بأيد ولا برجل

مشينة شوي،  وبدينا ندخل ببداية البستان
جنة مو بستان ..

: الله،  شكد حلوة ..

باوع عليه بضحكة وكال:  مثل عيونج ..

ظلينا نمشي والمناظر تخبل،  الشجر والنخل
والبستان مرتب حيل ..

دخلنا بحديقة دانگعُد،  صاحت مرة بصوت عالي ...

- ياهـو انتو ..

سـحُاب:- صديت وجهي، واشوف مرة جبيرة
التجاعيد تارسة ملامحهة .. ولافة عبايتهة
على بطنها .. ولابسة سواد بـسواد

كال صخر وهو يتبسم :- هذا اني حجية ..
كالت هي:- ياهو انت ولك، كرب هين داشرف
زوين .. عبن ما شوفن

ضحك وتقدم بأتجاهة .. بس كرب لعدها
بدت علامات الاستغراب تختفي من وجهة
ضحكت وكالت

: هـاا ولك يصويخر .. شعندك هين اليـوم ..
رد عليها:- چايب مريتي حجية ..

الحجية:- وينها ما جاي اعاين عدل،  خل تكرب مني .. داشوفها مرة .. صخلة

ضحك واشرلي اجي يمهم .. شافتني وابتسمت وردت حجت وي صخر

: ولك صويخر.. بالله انت ثور ما تخاف
جايب هاي الغزالة لهينا .. بنصاص الليالي شني .. طالع تكـو* بيهة ولك ..

ضحك وكال:- رحم الله والديج .. الغزالة ضايجة وطلبت من الثـور يطلعها ..

الحجية:- اهـاا، چـا كلي من اولتها
.. غزالتنة، كريصة برد لا تروح تكفخج
شلج بطلعات الكحـا* بنص الليل ..

رديت بضحكة:- هو كال امشي.. وصح باردة
..

عقجت ملامحها وكالت:  يـاااع يصويخر
.. هالبت بغدادية .. وتتبغدد عليك يمكرود

رد عليها بحسرة:- اييييـه،  على كليبي مثل العسل. ..

الحجية:- عبنك ثوررر .. .. لا تفر بيهة هنيا يصخير .. الليل برد وهي هاكداتهة

خربت ضحك على سوالفهة .. جنها بيبي بس بيهة حيل،  على الرغم مبينة اكبر منها ..

كملنا مشينا وهو يسولف :- هاي اكو مسجد بنهاية الـبستان .. هي مرة صاحبة ..

وكل ما نجي هنا، تكعد تستلمنة تصنيف
ياهو الي ما تحبة .. هاي عود اني تحبني وهيج سوت بية ..

ضحكت وكتلة:- بس حيل حبـابة ..
شافني اتراجف سألني

صخر: بردانة يبوي. ؟

: هـاا .. لا زينة

- يـا زينة،  شفافج زرگن ..

نزع قمصلتة كبل حجيت بفزع
: لااا لااا .. محاجة دفية .. وانت شلون تبقى بالقميص ..

صخر:- مرتاح اني مالج شغل بية
نزع القمصلة وخلاها عليه فوك العباية

همس وهو يضحك:- شهالحسن يبوي
.. حيرة، انت لو الشمس تطلعون ..

داتشوفيهة شلون بدت تغيب ..
هزيت راسي واردفت:-هسة يطلع الكمر ويضربك بوري،.. ويروح كل هالغرل هباء منثورًا ..

ضحك وهز راسة بدلالة ' ما منج جارة '
شبجت ايدي بين ايديه .. وحضنت ذراعة .. ابستم هو .. باس راسي وضحك
احب شكلة
وجسمة .. وحواجبة .. وخشمة القلم ..

هذا كلو وين جان عني .. عالنص الطريق احتاجيت  حمـام .. وظليت مستحية

احجي لو ما احجي .. خل احجي
لا لا .. اخر شي اردفت
: صخر محتاجة حمـام ..

رد باهتمام:- هسة يا تعبي .. وصلنا يم المسجد اكو حمامات نسائية ..

مشينة والحمـام صاير بنص الزرع
والهوسة .. وشوي بعيد عن البستان

كال هو:  يلا دخلي .. منتظرج هنـا
هزيت راسي ودخلت .. اول ما طلعت مديت راسي مالگيتة يم البـاب ..

صحت بصوت عالي:- صخر .. صخر ..وينك؟
لا رد .. فريت لورى الحمـام كلت يمكن واكف هناك .. والله وافر واشـوف جلب اسود

من هذن الكبار .. خال كبالة مدري شنو كاعد
.. كبل نبح بوجهي .. صرخت ووكعت
كمت بسرعة اركض .. لان شفتة يركض وراي

صديت وجهي واني اركض واحاول اكتم صراخي اخاف من صخر .. بس عيوني كمت ما اشوف بيهن من الدموع .. وهم جان بعدة يركض وراي .. ولا بقى بية حيل اركض

هسة شجاني ما رجعت للحمـام وقفلت الباب
.. حتى نفس ما بقى عندي،  ولا حيل اكمل ركض .. مدري وين رحت،  صار قريب مني

بديت اركض  بمسافة ما مزروعة .. ..
وبيهة كومة حجار كبار ..ومن الركض لت ظلت عباية ولا شال .. ظليت بخلگ الدشداشة .. عثرت بوحدة ووكعت على رگبي .. روحي شاغت وركبتي احسها تشككت .. الوجع اكلني اكل ..

شفتة يتقرب عليه .. ويلهث ولسانة برة حلگة
.. منظرة ترس روحي خوف .. وكلت هاي اخر لحظات عمري خلص .. راح اروح شهيدة جلب

صرخت باعلى ما عندي من صوت
: لاااا ياربي ..

غمضت عيوني .. حسيت بلسانة على رجلي
صرخت : لاااا لاااااااا .. الحگونيييي

من حلاة روحي .. رفستة بالظل عندي من قوة وحيل .. نبحح بوجهي بصوت عالي وراح .. ايدي تشككت .. وركبي تحركني

واحس ما بقى عندي صوت .. ما بية اكوم من مكاني .. عيوني من الدمع غوشت

شفتة من بعيد .. يتقدم هو ووياه رجال
عافة واجاني يركض .. من شفتة روحي صارت بي .. صرت اناشغ من البجي ..

كل ما يتقدم يتبين الي ملامح وجهة..
الي حيستهن ممحيات .. وجهة اصفر
والقلق باين بعيونة ..

شالني من الگاع ( الارض)  من ذراعي
سندت جسمي على صدرة .. لان رجلي ما احس بيهة ..

اخذ وجهي بين ايديه .. بوسط ملامحة الضايعة .. ونفسـه السريع

وصدرة الي يعتلي وينزل بسبب الركض
همس وبعيونة القلق:  شجرالج يا تعبي
وينج .. شنو الي صار وياج

بچيت واني اتذكر الموقف .. ضميت روحي بصدرة وصرت اناشغ .. مسد على راسي

وكال .. سودة بوجهي ابوية انتِ .. بية ولا بيج ..

تركني وسحب العباية .. الي جانت بنص التراب.. نفظهة وخلاها على راسي ..

سندي على جتفة ومشة بية .. وهو يردد
: كلة مني .. كلة

واحنة نمشي .. سمعت صوت رجال كال
: ها بوية صخر محتاج شي..

.. لا سلامتك عمي .. بس بطل مي( ماء)
اذا متصير ..

الحجي :- لا رحمة وليدي .. جا خوش
انطرني بنص البستان ..

وصلنا لنفس المكان الي ردنة نكعد بي
كعدني وكعد يمي .. اجة رجال كام
هو اخذ البطل منة ورجع ..

اخذتة شربت مي .. سحبة هو ترس چف ايديه مي .. وغسل وجهي

شمر البطل وسحب راسي لصدرة
وهمس:  هدي يبوي لا تخافين يمج اني..

اخذ ايدي .. وظل يناظر لچفها المشكك
رفع چفها لشفافة وباسهة

اردف :- توجعج .. بية ولا بيج يا كل راحتي ..

..يلا نروح ترتاحين بالبيت ..

هزيت راسي بأي .. سندني على جسمة ومشينـة للسيارة ..

ومن وصلنا استملونة .. شكو وشبيكم
وكل ظنهم  مد ايدة عليه ..

كال الهم هو:- لا يابة .. ركض وراها جلب وركعت .. جانت ساعة 7 المغرب ..

صعدت انام لان جسمي يون عليه ..
صعد يمي كال:- كومي نزعي هذا الستريج
وتعالي اعقم رجلج .. راح تظل تأذيج

هزيت راسي بـلا بخوف ..
همس بصوت حنين :- يلا ابوية انتِ..

كمت بخجل .. نزعت الستريج..
لكيتة ديطلع الگطن والكحول من الملحق
مال كنتور ..

اخذ بايدي للجرباية .. نزل يم ركبي
وبلش يعقم بيهة .. ولزكهة اخر شي بلاصق جروح ..

رفع رجلي على الجرباية .. ذب الگطن
واجة لمني بحضنة .. شكد جنت موجوعة
بس حيل احب حنانة ..

كعدت الصبح ما لگيتة يمي .. مكانة دافي
حضنت مخدتة .. اجيت ارجع انام

بس لكيتها ساعة 10:00 الصبح
كمت غسلت وجهي ونزلت .. اسمع صوتهم بغرفة بيبي كاعدين وصوت ستكاين وخواشيك
.. توجهت يمهم بالغرفة .. توهم بادين ريوك
والولد ماكو ..

مروة:- يا صباح الخير .. شلون صرتي يمة
: بخير الحمد لله ..

كالت بيبي:- ليش يمة شمالج ..
زينب:- يا بيبي .. مو البارحة اخذهة صخر للبستان .. راكض وراهة جلب واكعة

بيبي ;-يبوييي سودة بوجهي ييمة

تقدمت يمهـة .. بست راسهة
: لا حجية .. اسم الله عليج . ما بية شي وعيونج ..

زينب:- اكلي دام الصمون والجاي حارات ..
بس كلمت المطبخ .. صعدت كلبت الغرفة
رتبتها .. وكنست ومسحت الاخشاب

واني طويلة .. صعدت على الجرباية نظفت
البنكة .. ونزلت الثربات غسلتهن ..

مدري منين اجت الندراة
.. تحمست ومسحت الطابق الفوك
غسلت الملابس .. واحس بعد عندي طاقة

نزلت لكيت البنات بالمطبخ يسولفن ..
اردفت اني:- بتول عندج شي؟

: لا ما اداوم باجر .. ليش

سـحُاب:- هسة انتظري .. وانت زنوب؟
زينب: - شعندي قابل .. نورة نايمة
ونوري يم ابن عامر يلعب .. ليش

سـحُاب:- نسوي حملة على البيت ?
زينب:- ولج انتِ .. مو رجلج؟!

سـحُاب:-صرت احسن .. ها بيجن حيل..
بتـول:- اذا انت ما بيج شي .. ما عندي شي كومي..
زينب:- چاا اخذني وياجن ..

دخلت باجي مروة وكالت
: ها شبيجن يمة ..

سـحُاب:- مادري باجي ..نزلت علية ندراة
واريد اسوي حملة ..

مروة:- اي بعد انتن امهات البيت .. اني حيلي نهد يادوب اطبخ ..

سـحُاب:- عد عييناجج
بلشنا سوية .. غسلنا المغاسل بالقاصر
ونظفنا غرفة بيبي .. وغرفة باجي هم

والهول هم سحبنة التخم .. وسويت السيراميك. جلف بالسيم لحد ما طلع لونة
وصلنـة للصالة .. هنا الضيم ..

التخم حيل جبير وضخم .. من هذا الملكي
الي تلعب روحي منة .. عكس الي بالهول تخم عادي وخفيف وحلو ..

بالكوة تلاثتنة جرينة وحدة .. والثانية هم هيج.. شلنة الزوالي لان خفاف .. حتى نجلف الگاع فد مرة ..

بس سحبنا .. صعدت درج وسويت الحايط
وجلف لحد مـا ايدي وكفت ..

نكعت الگاع ورشيت زاهي مواعين ..
واخذت المكناسة اليدوية ام العودة

واجلف بالگاع من كل كلبي ..
ولابسة نعال (مكرم القارئ) الوردي مال حمام.. ما حسيت شلون رجلي زلگت بالزاهي
والوگعة صارت على ضهري خليت ايدي تحت ظهري حفاظا عليه وصرخت

الحكينييي يمة ..
حسيت صوت طگة صارت بأيدي ..
صرخت باعلى صوتي موجوعة ..

اجن البنات وباجي يركضن .. واني اصرخ موجوعة .. يحاولن وياي ما اكدر

واسمع بيبي تصرخ بباب الصالة
: ولكم شبيهة البنت .. تعالي مريوة
خابري صخر خل يجي يلحگها للبت

ردت باجي وهي تشيل بية وي البنات ..
: ما بيهة شي يمة .. وكعة شوي وتصحى
ماكو شي لا يظل بالج ..

الحجية:- ولج يمريوة البت جاي تصرخ
.. جبيبها لعندي يا ما بيهة شي

سـحُاب:- احس ايدي خدرت وما احس بشي
بس بلش الوجع شوي شوي .. واحس روحي بدت تطلع .. ما بية خلوني على التخم

شوي اسكت وشوي ابجي ..
كلت الهن اخذني يم بيبي .. ظل بالهة
بطلاع الروح يلا وصلت للغرفة

كل ظني ما بية شي .. وجع شوي ويروح
خلوني يم بيبي على الجرباية واحاجيها
واطمنها:  مـا بية شي وعيونج شوي ويروح الوجع ..

الحجية:- يا ما بيج شي يمة .. دخابروا خل يجي صخير .. وعلي لو يدري بيج

لا يسوي الطريق خطوتين .. خابري يمة
سـحُاب:- لا بيبي طريق يخوف عوفي ما بية شي..

جابت باجي مسكنات الآم ..تهيد شوي
وساعة تموتني وجع .. اخر شي من الوجع
صرخت باعلى صوتي .. اضطروا يخابرون عليه ..

متت من الوجع .. ساعد ايدي ما احس بأي
شي بي .. بس نغزات اكلت كلبي
وحرارة تطلع من وجهي وكل جسمي

تمنين الموت .. شوي وسمعنا صوت الخبصة مال هورنات مالـتة .. اردفت باجي

سترك يا ربي ..
دخل مفزوع يدور وجهي بينهم ..
كعد يم راسي وهمس ..

: شبيك يا عيوني ونظرهة ..حاجوني شجاها
ردت باجي:  ولك يمة كالت نشطة اريد اسوي حملة .. وزلگت ..

وجهة احمر ددم .. صرخ بصوت عالي
: عبايتهة بسرعة ..

بتـول:- بس كال عباية .. ركضت طلعت عباتي ..وخليتها بأيدة ..

شمرهة علية .. وتقدم شالهة لصدرة
وهمس يم اذنها ..
: لزمي عدل يبوي ..

جنت قريبة منهم حيل .. معاني وجهة ما تتفسر .. وزاد العصبية مالتة .. بجيهة وونينهة
ركضت وراهم .. وباجي لحگتني .. شمرها بحضني ورة .. وصعد يسوق بكل سرعتـة

وعينة عليها .. والحاجب مرفوع والوجـه ما يكصو السيف .. ما حجة ولا كلمة طول الطريق

بس وصلنا للمستشفى .. اخذها ودخل يركض وياهو الي يطخ بي بالغلط .. يزفة زف

هرج المستشفى بعياطـة .. يريد كلها تركض وراه .. اشرولة على قسم الكسور ..

اول مـا دخل وشافة ولد كاعد
صرخ .. وينكم رحمة لمحمد

تقدم الدكتور يسال سـحُاب.. تقدم دفعة
وصرخ .. امشي صيح طبيبة بسرعة

الدكتور طلع يدردم .. دخلت بنوتة
تركض.. لزمت ايدها وسالت

- الدكتورة :- شنو الي صار وياهة؟
صخر:- وكعت على ايدهة .. استعجلي شوي روحي فرفحت .. خر* **** على هيج مستشفيات زبالة .. صار ساعة اصرخ ..

ردت وهي تحاول تهدي:- اهدأ اخي
بس انطيني مجال .. رفعت ايدها وسوت بيها حركة .. كبل صرخت سـحُاب..

هزت راسهة واردفت:  عيني هذا خلع مرفق جزئي .. ونكدر نرجع العظم بمكانة بس لازم شخص متدرب .. لان اي غلط ممكن يسبب بتلف الانسجة .. وتروح ايدهة . يعني لازم دكتور ..

بتـول ;-عيونة صارت براسة ..
صرخ بوجهة:- صيحي للشفية فظيني ..

اول ما طلعت .. سبحهة لصدرة ويهدي بيهة
دخل الدكتور .. وظل يحجي وي سـحُاب
وصخر يلوب بالغرفة ..

اخر شي كال الدكتور .. محتاج شخص يساعدني .. ويلزم المريضة .

تقدم صخر وحجة بنترة ويا:-
شوي شوي عليهة ..

وجهة صار اصفر من الخوف كالت
; ما اريد فدوة
. سحبهة لحضنة واردف ;- اني يمج ليش
كل هالخوف ابوية انتِ ..

قربت شفافهة لاذنة وهمست بدموع
:- اخاف اصرخ ..

رد هو بأهتمام:  صرخي ابوية انت
عادي ..

مد الهة ذراعة .. بس لزم ايدهة الدكتور صرخت .. ما اهتم الهة وكمل

صرخت وسحبت ايد صخر .. وعضتهة بقوة
خطية عصر عيونة موجوع بس ما سحب ايديه منها ..

مرة مرتين .. بالثالثة خلص
كال الدكتور :- الحمدالله على سلامتها جبرهة الهة. وطلع

ظلت تصرخ بوجع وتبجي ..
سحبهة بحضنة يسكت بيها

لحد ما روحها  خرطت بين ايديه
كالت الممرضة :- ما بيها شي
لا تخافون .. هاي ما استحملت الوجع

نومها صخر على الجرباية .. وظل يلوب
وكل شوي يلوم باجي وهي خطية

ما فتحت حلكها بحرف ..
صحصحت شوي .. احذناهة ورجعنة للبيت
خلاها يم الحجية .. وغطاها

حيدر :- ها شلونهة؟

صخر ;- احسن الحمد لله .. بدل ملابسك وتعال نكمل الصالة .. التخم ثكيل والبنات ما يكدرون الة ..

حيدر:- بشرفكك؟

صخر:  حيدر اصعد لا .. والله اطلع ضيم كلبي بيك ..

بتول:- خطية صعد يدردم .. حاولنة ويا
اني وزينب .. ما قبل كال انتن بلشن بالعشة

وفعلا نزل حيدر ضايج .. مثل الجنة من رجلها كتلها لان ما تقبل تنضف تالي تنزل كالكرتة .. غسلو الصالة .. ورجعوا التخم

وفرشوا الزوالي .. وكل هذا ويمشي ويزرل بحيدر .. نسمع بس عيطة

وكلمة : عدل لا اطيح حظكك ..
وحيدر يرد عليه .. ترى صرت اب ما يصير هيج ..

يرد عليه .. كملت .. يلا اشتغل عدل ..
وحيدر يشيل بروحة ويرگعهة ..

بليل يالله كعدت .. وهو مكابلهة وكاعد
لا قبل يتعشي .. ولا يبدل ..
شوي وصعدهة وصعد فوك ..

سـحُاب:- فتحت عيوني .. لكيتة لامني بحضنة .. اريد اتذكر شبية .. بس عيني صارت على ايدي المجبرة .. تذكرت

بس حس عليه كام يفرك بعيونة
همس:- شلون صرتي يا تعبي ..

حجيت بتعب:- الحمد لله احسن شوي..
: كلبي وكف عليج .. يلا كوم نغسل

سندت جسمي عليه بتعب .. ومشة بية للحمام .. سحب الخاولي من ورة الباب

وكفني على المغسلة وصار يدفي المي
ومميل راسة لوجهي .. ومبتسم

اخذ الصابونة وسوة وغف بين ايديه
ومسح بوجهي .. شال مي بجف ايديه
وقرب راسي من المغسلة وغسل وغف الصابون

كال:- تفرشين سنانج؟
هزيت راسي بـ(اي) ..

سحب فرشة الاسنان .. وصار يفرش
والابتسامة ما فاركت وجهة ..

بس طلعنا كال:- تنرلين نتريك .. لو اصعدة هنا..

: لا .. بيبي بالهة يمي ادري .. خل ننزل
صخر:- صار ..

سحب الشـال وخلاه على راسي ..
نزلنا جوة .. استلمني حيدر

حيدر:- ها يابة .. يكلك حمرة ..بشرفج سـحُاب بالنص .. اخوج حافي منتف
هههههه .. شجاج يحظي

حيدر وصار احد بلسانـه بعد ..
مرت 3 ايام .. محد بيهم قصر وياي بالاخص صخر .. كل شي بية يريدة صاير
وشايلة هم لدوامة ..

تقريبا 3 ايام ورحت شلت الجبيرة..
لان خلع جزئي ما يحتاج يطول
وبلش
كاعد اعدل الملابس .. قريت تاريخ على التلفزيون .. عزة مابقي شي لعيد ميلادة

نزلت جوة اركض للبنات .. اخذتهن بغرفة باجي واردفت: اريد منجن تساعدني
اريد اجيب لصخر هدية وما اعرف شنو اجيب

حجت زينب بضحكة:- حاليا هو ميريد شي بس يريدج صاحية ..

سـحُاب:- لا جد زنوبة .. شلون هسة ..
كامت كعدت يمي ..

زينب:- انت هديتة سـحُاب..
رديت بغباء:  هـاا؟

زينب: - اني وانتِ ندري .. صخر بعدة ما متقرب منج ..

جلت صوتها وسالتني
: انت تحبي سحاب؟ 

• يتبع ...

اليوم البـارت طويل ..
تعبت حيل بي .. لهذا طلبي منكم شغلتين

النجمة .. وتعليقات بين الفقرات
حتى قصتكم تصير ترند ..
(500) "تعليق و (200) نجمة "

افرح من اشوف عدد جبير يريد البارت
واعدادا جبيرة تدخل تكول مريم نريد بارت

لهذا تفاعلكم يحفزني اكتب .. كلامكم
وحيل اشتاق لجمال حروفكم

رأيكم بالبارت. ..

وشنو توقعاتكم .. 😉😉

جايتكم احداث اقوى