رواية مُقيد أجنحتي الفصل الحادي وثلاثون 31 - بقلم 💗

البـارت الثاني والثلاثون
/بقلمـي '' مريم علاء ...

حـاتم:- باجي بدون زحمة عليج، ندهيلي
بتول .. خل نتفق على كل شي ..

سحاب:- كمت من السفرة بغضب
واردفت بصوت عالي
: بتـول ما تروح وياك لأي مُكان..

رمقني بنظرة، مدري شلونها
لا هي صفح لا هي عدلة

بس عود يكلي ''مو هي بكيفج ''
رد كال لبـاجي: يلا باجي فدواتج

رديت بصوت اعلى: كتلك متروح وياك
لأي مكان ..

نزل صخر من فوك يدگم قيصة اردف
وملامح وجهة مستغربة وجود حاتم
: شصاير؟ شبيكم !!

رديت بحرگة كلب: صخر حاجيه
بتول متروح وياه لأي مكان ..

كال وعيونه توجهت على حاتم
: خير حاتـم وين تريد تاخذ البنت !

حاتم:- خوية، ناوي احجي وياها
رجال ومرتة .. قابل وي غريب هي؟

نطيت اني من يمي، لان حاتم حيل صاير
ينرفر ببـروده وفهاوتة
: مو مرتكك هي، لا تنسى نفسك
مو واعد بنية انتَ ..

حاتم: سحاب، فدواتج ترى الي بية
مكفيني، بعدين تفهمين كل شي ..

صخر:- عيني انتِ، حقـه الولد خليهم يحجون سوة، ويحددون شيسوون

رفع حواجبة يطمني
: هزيت راسي ببرود

بتـول:- دخلت للغرفة اللبس
گلـبي واجعني، ما اريدة يكسرني لان احبة
ما اريد اعوفة، ما استحمل فكرة اصير لغيره

لفيت شالي، وعباتي وطلعت ورا
حرك السيارة بكل هدوء، شلونج ما گـال

ظلينا نفر بالسيارة، هو ساكت واني كذلك
احس الخوف امتلگني، معقولة خلص
راح يعوفني .. !

ركن السيارة، واخذ نفس لصدر
نزلت راسي بخجل، اللعب بمدالية الجنطة
خجل ، خوف ، رجفة

مشاعر مختلطة، تحت مسمى حب من طرف
واحد، الي دمر حياة هواي بنات بـُعمري

اردف بصوت هادئ
: النظرات الي وهمتي بيهن نفسج، طول هاي
السنين حقيقة، ومـو صدفة

اني فعلا حبيتج بتـول ، بس مو هذا الحب
لا 'جان حب فطري ' حب انسند على
اعجابي بشخصيتج، طموحج

هدوئج، هواي شغلات بيج تعجبني
بس فرق العمر، خلاني اغير تفكيري تجاهج

وخلاني اعتبرج اخت، صح الله ما رزقني
بأخـت، بس دوم اكول عوضني بيج

انتِ وسحـُاب .. صح يمكن اذيتج
وجرحتج، بس اني جان ببالي بعدج طفلة

واذا انتبهتي، قللت جياتي الكم بذيج الفترة
ردتج تصيرين انسانة ناجحة ، ردتج الج الخير

الغلط مني بتـول، اعتذر على كل شي
حبيتها بتـول، وماكدر اكسر نفسي واكسرها

انت تحسين هذا الي تحسيـه تجاهي حُـب ؟

بتـول: رديت بگلب معصور من القهر
واتصنع الابتسـامة

.. لا، جنت طفلة بوكتها
وانت نظراتك تغيرت، لهذا ما طول الوهم
الي عشت بي، لا تشيل همي

اني اهم شي عندي هسة دراستي
واحقق احلامي، واستقل
يعني لا تخاف عليه، لا ابجي ولا انقهر

ابتسم نص ابتسامة، وباين على وجهة
التعب، فتح الجكمجة ويبحوش بيها

اخر شي طلع تليفون، خلاه بأيدي
اردفت باستغراب: هذا الي؟

: ايي

الفرحة ملت وجهي: والله حاتـم !؟

ابتسم ورد: اي بوية الج والله،،
وذكرتيني، اسبوع الجاي تردين للمدرسة

فتحت عيوني بصدمة وفرحة
: والله؟؟؟؟

حاتم: وأي درس تحتاجي، اخلي الج خصوصي ..

،، وعمو ايهب؟!

حاتـم: محـد الـة علاقة، دام انت على
ذمتي، محد يتدخل بيج وبمستقبلج غيري

بتول: هواي شكرا، مدري شلون ارد معروفك

رد ونبـرة الصوت تغيرت: تسامحيني

رفعت عيني، نظراتة بيها ندم
تصنعت الشجاعة ورديت: شبيك يمعود
لا تكبرها عااد، لا اني هسة عندي الك اي مشاعر بگلبـي ولا انت ..

نبدي بداية جديدة، ونرجع ولد عم حبايب
لحد ما يجي يوم تهدئ الاوضاع نفسخ
حتى نروح نخطب الك محبوبتك ..

ظلينا نسولف، رجع كلامة طبيعي
بس احسة ضايج وبي شي، اعرفه اكثر من روحي

دخل لمحل جاب علاليك، كال
: هاي الج، ومصروفج يم باجي
واي شي تحتاجي خابريني زين يابة؟

: محاجة كل هذا والله ..

حاتـم: ميصير تحجين هيج، دام انتِ
على ذمتي، يعني كل شي يخصج
على مسؤوليتي ..

بتول: كلامة يكسر، ويجبر
كل لبالة، من يحجي هيج يطمني، بس هو يشعل نـار كلبي لا اكثر

وصلنا للبيت، وصاني هواي
وكال: اسبوع الجاي اجي عليج

بس حرك من كبال الباب
روحي طفت ، اعترف ماكدر اسلم حُبي
لأي انسانة، ضعيفة واحس قوتي يمة

حتى لو ميبادلني هالمشاعر
صعب تتسمك بشغلة، وهي مو الك
وانت حيل محتاجهة، حيرة

كلبي عطشان لعيونة، شيصير لو يحبني
بدل عنها. ،شيصير لو اروح اظم نفسي
بين صدرة وابجي، واكول الة لا تعوفني
معقولة، هذا الحب يروح عبث

محتاجة حضن امي الدافي
، ابجي بحضنهة بدون متكلي، شبيج
اريد اصرخ، اريد ارتاح من هالحب

شنو ذنبي بالي صار ..واصعب شي بالدنيا
من تتصنع القوة، وانت داخلك انسان مكسور

سـحُاب: شفتها دخلت، جنت اغسل المواعين
كبل صديت وجهي،

كملت كل شغلي، الولد طالعين
صعدت للغرفة، فرشت السجادة

توني اصلي، دخلت عيونها حمر دم
منظرها، عصر كلبي، فتحت ذراعي الهة
"بدلالة الحضن " تقدمت بخطوات
يأسة ، خذيتها بين احضاني ..

اخذتها وكعدنا على التخم
: اييي شحجيتوا؟

بتول: ماكو، بس تهدأ الاوضاع نفسخ
ورجعني للدوام

سـحُاب: صدكك والله. ؟
بتول: وعيونج ..

سـحُاب: يلا، خل يولي هو مو مهم
المهم انتِ،

بتـول: لا يابة، شبية زعطوطة وابجي عليه
سحاب: تخيلي تصيرين جنة لعني ايهب

بتول: هههههه
سـحُاب; والله وبدل ما ينطوج اكل
يحرموج، ويرجع يحوم يم ماما

صدك، حيل مشتاقة لمـاما
بلكت صخر يودينة ..

شمرت راسهة بحضني تضحك
رفعت راسهة باطراف اصابعي واردفت
: ابجي بتول ..

ردت بتوتر وبؤبؤ عيونها ما ثبت بوجهي
:لا ليش ابجي شبيج انتِ

سحبتهة لحضني، كبل شددت قبضتهة
وبس اسمع صوت ونينهة ..

بتول: صعبة سـحُاب، نياط كلبي يتگطع
احس هذا الهوى ثكيل على صدري

يحبها وما يحبني ليش، محد يحبة بكدي
والله، اريد اصرخ بوجهة واكلة احبكك
اني استاهلك، اني احتاجك، تعبانة سـحُاب

سحاب: بيـة ولا بيج، روحي انتِ
ما يستاهلج، انت تساهلين احسن منة
فاهي هذا، امة تحطج وتكتلج وهو صافن

عوفج منة، النساتل الي جابهن الج
بالنص، اني وياج

مسحت دمعها وردت بقهر
: ليش يمة. ؟

سحاب: مال صحيبة ..

سـُحاب:- نزلنا ليلتها نسوي عشة
حيل احب عشاء هذا البيت ، كل انواع الاكل
يخليها الك ، طلعت زينب بتيتة وباذنجان
وطماطة ، وكبة بيت

دخلت باجي ، كالت
: يمة سـُحاب يمج بالفريز عجينة كباب ..
طلعيها يمة ، وكليها وي خواتج

..كمت امطك ، عندي كباب البيت
ملك الساحة بگلبي .. لو خيروني بينة
وبين الشاورما، اختار الشاورما طبعا

بديت اقشر  البيتية والباذنجان
.. دخلو الولد ،

صخر :- الله يساعدكم يابة

ردت زينب : هلا .. كواكم الله ..

حيدر :- لككك هلا بمريتي ، أم عيالي
بنت الغالي ابن الـ ...

نطت زينب : حيدر لا تغلط ..

رد بضحكة : لا يابة شبيج ، داكول ابن الغالي
زينب :- عبالي ..

تقدم بهدوء بنص جدالهم ..
رفعت عيوني آلة ، ضحك بوجهي وشمرلي
بوسة بالهواء الطلق .. يمااااي شصار بية

تكول مو بوسة هواء ، باسني من حلگي
سوة براسة حركة ''عود غطي شعرج ''

بديت اشتغل وياهن بالي يمة ، مدري شمالي
استخفيت .. واحاول اجذب الشي الي
ديحللة عقلي. .

زينب :- ايي صافن الحلو ، بالج وين ؟

رديت بغباء " قلة حيلة " :- هـاا !!

ضحكت باعلي صوت وكالت
:- ولج شبيج من اول ما دخل البيت
عقلج راح وراه !؟

سـُحاب:-انـي !!؟

زينب :- لا اني ،اي انتِ ، مو بالله عليج بتول !؟

هزت راسها بأي
اردفت بحيلة :- لا انتن نيتجن زفرة
اني بنية فقيرة ، وافكر بحال البلد التايـه هذا

زينب ,, بلد تايـه ام الوصخ ، صحصحي عيني الاكل احترك يحظي ، تريد تفكر بالبلد .وهي بس شافت صخر حركت الاكل والعراق

سـُحاب:- انتو تسئون الظن بي ، وهذا حرام
بتـول :- ها سحابة ، چنج وكعتي ..

سـُحاب:- لا حبيبتي ، اختج نچرة .. ولا تخلن بالجن يمي ،

بلشنا ننقل الاكل ، وصخر كال ناكل بغرفة جدتي اليوم ، لان الجو بلش يبرد

بدو صخر وحيدر واحد ينصب على الثاني
.. صخر نصب على حيدر ، خلاه ميز مال مضحكة ، مرتين غصيت من الضحك

اخر شي استسلم حيدر وكال
:- عادي حبيبي ، جسر للطيبين ، بس مو الك

سـُحاب:-احلى فقرة بالكون ، من تكمل غسل المواعين وتجلف السنك. وترشة ماء
وتنشفـه . بالخاولي يبوييي
شني بهاي اللحظة املك الدنيا ومابيهة

صعدت بخطوات بطيئة ، عبالك ما اريد اوصل
للغرفة . مكيفة بي هيج وما أريد يكلي
اريدج .. وهاي السوالف مال ادبسززية

احبة من يصير حباب .. وهيج ويحترمني
بالله عليجن مو انتن هم حبيتنة بنات !؟

اصعد انام كبل ، وما احجي ويا شي
بعدني اخاطب عقلي الباطن ..
فززني صوت ضحكتة الطالع من غرفة باجي

اللعب .. يعني بعدة جوة . اصعد اخمد روحي
قبل ما يجبرني على فعل الرذيلة

ونحن أقوامٌ مسلمون ، مـُجبرون على فعل
الفسق والغلط .. لكن لا ثُم لا سوف

والله شكلي راح انعلس ، صعدت ادبج
غطيت راسي بالبطانية وفتحت حلكي
حتى يبين صدك نايمة

هاي السوالف الخايسة ، جنت اسويها
من امي تريد تكعدني على الدوام

غمضت عيوني بأحكام وقوة
وأحس کلبي بي عرس ،، هيج دماااام
مدة قليلة كلش ، حسيت بي فتح الباب

سارت رجفة بروحي ، جني وحدة لازمين
عليها لزمة ، شلون هاي الاعظاء تشتغل
بهالدقيقة مادري ،

حسيت بي شال الطرف الثاني من البطانية
ودحس روحة.. احس بكل حركة يسويها

فجأة حسيت على ايديـه ،حاوطت بطني
احتلوناا يابو الأكبر

قرب خشمة من اذني ، انفاسة لفحت ركبتي
وفززت روحي  .. انتقل من اذني

لركبتي،، شمني قووي لدرجة شوية
واحسة خلص .. راح يشفطني .. ولو هو على هذا الخشم .. ذبانة متفوت بي

مو خشم ،، فتسفة شكدوتة، بس لو اللزم جدي
كل شي ما سويلة ،

سحبني لحضنة أكثر .. حسيت بدفو صدرة
بضهري .. يا معت يا ذبت . عقل ما ظل
براسي....

بعز البرد ، وأحس دخان يطلع من آذاني
وعيوني وخشمي، جسمي نااررر صار

شال وحدة من اديناتة.. ومشاهة على ايدي
بحركة بطيئة .. أخذ كف ايدي بين كفوف اديـه .. شبك اصابعة بين أصابعي بأحكـام

ظلت ايدي تتراجف بين ايديـه .. وأحس بخوف .. همس بأذني بكل هدوء

صخر :- ادريج صايحة يا كلهم ..
فتحي عيونج ترى ، كليبي ولهان ..عبن اليوم ما شبعت من وجهج يالجنج حلم حلو ما اريد افز منة .. يلا عاد بلا تدلل علية

كلبي خلصان ولج .. رايد شوفتج
زين ما اريد شي بس صدّي وجهج علـّي
خل انام براحة ..

يول يبوي اشوف خدودج داترد روحي
.. غمضت عيوني اقوى .. خايفة حيل
رجع قرب اشفافة من يم اذني وهمس

صخر :- يا رجفة روحي أنتِ ..عاينيلي
تاشوف روحي بيج .. يا دفو روحي انتِ ..

يأست منة ، عندة استعداد يكعد للصبح
يقنع بية اصد وجهي عليه

صديت عليه بدلال ومغمضة عيوني
اسمع بس تكركر ضحكتة .. فتحت عيوني
شفتة نايم صفح على تگ ايد '' نص نومة ''

ويمسد على لحيتـه .. بأطراف اصابيعة
ومبتسم .. يويي اخرب عليه من بس يبستم
احس .. تروح هيبتة من يضحك بصوت عالي

حجيت بانزعاج :- شبيك .. متنام متعبان
من الخوارة.. والبنات الحلوات !؟

حجة بضحكة متصنع الجَّد :- خوارة شنو ولج !!؟

سحاب : لعد شنو ، بنات وبغداد .. ما تعبت اليوم !!

صخر :- بس لا تغارين يا تعبي ..

رديت متصنعة الشعور :- اني .. لا بس تعودت عليك بالبيت ، فضجت ..

شال تك ايد وسحبني لحضنو وكال
: بس انـة اليوم .. ميت شوگ لوجهج

سـُحاب:-بنات بغداد قامن بالواجب
..

كرص خشمي بخفة ايدة وكال
:- ماكو وحدة بيهم عندهة مثل خدودج
.. ولا عيوني شافت وحدة بحسن طولج ..
وما شفت وحدة عيونها تجيب التايـه

كلهن عبرن كبالي.. بس انة كليبي هنا
يمج .. يم مريتي ..

نطيت بسرعة .. وخربت كل شي
نعم أنا سحاب " مخربة اجمل اللحظات''

سحاب:- اريد احجي شي
بس اخاف تفهمني غلط ..

ضحك ورد :- كولي يا تعبي .  ما افهمج غلط
سحاب :- شسمة .. حلو من تكول مريتي

قرب وجهو من خدي .. وطبع عليه بوسة
سريعة وهمس :- مريتي .. !؟

سحاب :- هـاا

صخر :- أجو بعدچ نهر ممدود بس ظليت عطشانچ ،

بلعت ريكي بصعوبة واردفت بصوت يرجف
:- صخرر .. بردانة

رفع حاجبة يجذبني :- لا بربج !!؟

: شبيك اكلك بردانة .. اريد صوبة
قصدي .. بالك وين !!

صخر :- هههه .. جنج على صوبة
اصيرلج صوبة

سحاب :- شبيها صوبة علاء الدين
مقصرة خطية.. اشوف مدفيتنا ليل نهار
على طول الشتاء

زفر نفس بعصبية وكال :-
انتِ مال عزل أنتِ ..

كام وطلع برى الغرفة
كمت ورا داشوف اخاف زعل .. فتح الباب ودخل شايل الصوبة من برة

رمقني بنظرة بمعنى ' ما زعلان  '
كعدت يمة،  اخذ الجداحة وبلش يشعلها
يمةة اعشك ريحتها من تشتغل

بحيث افتح خمشي كل كبرة
من يفتحوهة يمي،  صخر من شافني هيج
كام يضحك ..

قربت روحي من الصوبة اكثر،  باردة كلش
كام هو،  فتح الكنتور طلع تراك

وبلش ينزع،  اني بس ذب القميص دنكت راسي،  امي تعبت عليه ميصير اباوع

بس البية ما يخليني،  رفعت راسي
واباوع على جسمة،  احس صخنت

ساعة احتر ساعة ابرد من ورا
حرام طرزان شفتة وشافني متصلخ

هو من شافني هيج،  تقصد يجي يمي
كعد نص رجل،  ورفع راسي بايدة

شتت نظري منة وحجيت بحدة
: امشي اللبس لا تتمرض صخر

- صار. مريتي ..

سـحُاب :- اكزكز عليه من يكول 'مريتي '
سحب فانيلة لبسها ولبس بجامة
وتقدم كعد يمي،  عيونة تسلطت عليه وحاوطتني ..

ميل راسة وكال:  احبج ..
قرب نفسة مني اكثر،  صرت على جهتة
اطراف اصابعـة تلمست خدودي

حاوط خصري بتك ايد،  والايد الثانية تتلمس خدي بكل حنيـة .. ميل راسة لرگبتـي

حسيت بحنچة،  صار على جتفي
همس بصوت ذايب:  مشتاقلج يا بعد كلهم

اصابعة انتقلت،  من خدي لشفتي
غمضت عيوني بخوف ..

صخر:- شو فتحي ..

اول ما فتحت عيوني , عيوني التقت بعيونة
نظراتة سلبت قوتي،  سرعان مـا شتت انظاري منة .. شدد قبضتة على خصري اكثر

وكال:- خلي عيونج بعيوني ..

حجيت برچفة:- مـاكدر صخر

صخر:  - يابعَد چلمات گلبي الما گلتهن ...
قرب شفافة من عيوني،  وطبع بوسة على
عيني اليمين،  وثانية على اليسرى

خليت ايدي على صدرة،  ادفعة عني
بس هو رفع ايدي وباسهة،  احس الغرفة ضاكت بيها النفس،  عيونة نزلت لصدري
الي جان فاضح تنفسي الغير منتظم

ابتسم واردف:- بيج ريحة من الجنة انتِ
.. حوريتي، مريتي،  تعبي وراحتي

لج احب كل شبر بيج،  هااايم انـة
ثكيل انـة وطحت فدوة لأظافيرج

اجيت احجي،  سكتني من رفع اصبعة السبابة
وخلاه على شفافي
: اشـششش

سحب مخدة من الجرباية،  خلاها يم الصوبة
نام وسحبني من ايدي ونومني يمة

ثبتني من حاوط بطني بقوة ،و برجلة
قفل حركة رجلي .. وجوهنة حيل قريبة من بعض. ،، حتى الهوى بطل يفصل بينا

مادري شوكت يبطل سالفة يخلي عينة بعيني
وما ينزلها ابدا،  ادري ما يخجل هذا

صخر: عيونج،  خليهن بعيوني يابة

: ما اعرف صخر عفية، كافي نام ونبي كلبي كام يوجعني ..

ضحك وعظ خمشي وكال:- نامي ، جعل ما غيرج ينـام،..

سـحُاب:- زين ما عدنا مخاد،  جيب المخدة الثانية. ..

صخر:- نامي لا اموتج

ضميت راسي بصدرة،  وبسرعة استلسمت للنوم..

كعدت ثاني يوم كلي نشاط
بس هو ماكو،  واني على الجرباية

حلكي نشك واني اتذكر من شالني بالليل
ويلولي الي حتى ارجع انـام

اكوم اتريك احسن،  هذا الشتاء يدور دفو وسوالف ادبسززية،  واني ماما ما تقبل

والله لو تدري ماما،  الة تدفرني دفرة
نزلت جوة،  واكفات زينب وبتول يسون ريوك
سندت نفسي على الكاونتر اسأل على. صخر وين،  بس استوقفني شكلة من كاعد بالحديقة.ووياه بنت ويسولف ومنطلق

تقربت من شباك المطبخ اكثر،  ولنـه زهراء
بلعت ريگي بصعوبة ، احس الموقف صعب
بس ليش قبل من جنت اشوفة وياها ما اضوج هيج، 

زينب:- بتـول '' اشم ريحة عطاب
شحتركك؟

بتـول:- ماكو شي عاالطباخ بس القوري زينب
زينب:- شوف هاي الفطيرة ..

تقدمت يمي بأيدها الجفجير
: خليج مسيطرة على الوضع،  ترى ما دخلها للييت حتى متغثج،  وهي جاية اصلا تخرب مزاجج..

لا تشلين هم ويلا تعالي ايدج بأيدي
..

سـحُاب:- بديت اشتغل وياهن بكلت انسى
بس كل شوي عيني تروح لجامة المطبخ

ماكو دقايق ودخل،  احس عيومي علية
مت بينت ضايجة، وحاولت اتصرف طبيعي
بس احس نار تسعل بصدري

زين ليش هيج احس، احنة بعدنا اصدقاء
التفكير اكل راسي،  بحيث ما احس بروحي

اول ما خلصت ريوك،  لزمت اريد اغسل المواعين،  شفتة دخل بسرعة شتت نظري

كال:- سحابة،  تعالي حظري ملابس بين
ما اسبح ..

هزيت راسي وصعدت ورا،  لكيتة فاتح الكنتور،  ومطلع قميص وبنطرون

نظرلي واردف:- طلعيلي الساعة السودة الجلد
الي بيها اطار ذهبـي ..

هزيت راسي بدون ما ارد
توجهت لميزلتواليت ادور بين ساعاتـه
حسيت على. ايديه تحاوطني،  رفعت عيني للمراية،  دحس راسة بركبتي كال وهو يناظرني بالمراية

: شبيج اليوم يروحي،  ماكو ضحكة حلوة ؟

: ما بية شي ..
كال بحزم:  متاكدة. !؟

سحب الشال من راسي،  وشمرة وشم رگبتي قوي،  غمضت عيوني وبلعت ريگي بخوف

همس:  على العموم، احبج لاخر لحظة بعمري
اخاف اروح وما ارد،  اذا زعلانة كليلي اراضيج..

رديت بخوف:- اسم الله عليك، 
;- چـاا ماكو زعل؟

هزيت راسي نافية، سحب ساعته من ايدي لبسهة طبع بوسة على راسي وطلع

بنفس اليوم بليل كاعدين على العشة
كالت باجي:  يمة صخر،  خالك وخالاتك ثلاثتهم باجر عدنا،  علمود يباركون لعرسك
فشلة ما عزمت احد،  عاد كلت الهم تعالو
باتولكم يوم وروحوا ..

رد عليها بـ:  صار. .. من عيوني
وهالمرة من صعدنا نمنة ما سوة شي بس حضن،  هم ارحم من سوالفة السزز ..

كعدث ثاني يوم هم مالگيتة يمي
شوكت اكعد مثل السنوان قبل رجلي،  واسوي الة ريوك واصير معدلة ..

بدت تسترسل لبالـي اول بارحة
شفافي رسمت ضحكة، اييي

جني صدك وكعت،  ومـو على ضهري
لا چبح على وجهي،..
يغبرة دثگلي شوية،  حتى الهنود يخلون 15 حلقة يلا البطلة تكوم تحب البطل

انة شبية من اول بوسة اتطوطح

نزلت سوينة حملة على. البيت وزينب سوت تمن احمر،  وهم وصو على دجاج وسمج

شوي وصولوا،  جانوا هواي
صبينا غداء،  ورة الجاي صعدنا كلنا بغرفة
زنوبة،  تعارفنة وظلينا نسولف

هنوب كلهن حبابات،  نسخة باجي مروة
اهلهة هم مثلهة عسل ..مال گرط

ثنين صغار، وحدة مواليد 99 وثانية 95
نووب كلهن حلوات،  جيت اغار عود وهاي السوالف،  بس الكعدة حلوة

بسرعة طردت الافكار من راسي وكعدت اسولف وياهن،  اني بس احد يدوس تشغيل
بعد ما اسكت،  ما اخلي شي بنفسي

..

صخر ما شفتة بعد،  يم ولد خالو وخالاتة
وخالة بالصالة،  واحنة وكفنا نسوي العشاء

اجة ياخذ الصينية،  كال
: سحاب ، ناوشيني الصينية بوية

: شلتها وكلبي طاير،  بس وصلت يمة
باوع هيج وهيج،  ما شاف احد
باسني بسرعة بخدي واخذ الصينية وطلع

يثول هالرجال يثـوول ..
طلعت باجي هالكرزات بالليل
كعدت نسوان بعد،  يحتاج حَب

اباوع لزينب تخزر بيه،  اشرت الي اجي يمها
: شبيج يمعودة

زينب:  وجعع،  صخر فوك يريدج ..

سـحُاب:- صاعدة لا تعيطين ..

زينب:- صعدي ركض، هاي لو كايلتلج سوي شي.. صخير تصعدين ركض

سـحُاب:- رجلي هذا تررى،  مو صاحبي شبيج !!

طلعت ادبج واهز ركبة .. شكد خفيفة اني خرب .. اول ما فتت سحبني وسند ظهري بالحايط،  شمر الشال بالكاع

وبلش يشمشم،  اجتني حجاية وعلي
بس امي مربيتني،  ما ينطيني مجال حتى اخجل،  همس

صخر:  اشتاقيت ..

: بس كلي شوكت تلحك تشتاق،  توني جنت يمك ..

: يولي انتِ ليش نفسية!؟
.. يعني ما بيها مجال ننـام هنا

: لا ما بيها

: يول  لا تيبسيهة ..

سـحُاب:- عيب من الولد والله ..

صخر: اووف، خر* بالولد ..

: ديلا انزل، باقية وين اروح قابل

باسني قوي ونزل
نزلت اني هم يمهن،  ظلن هواي يحجن
اني اصلا نعسانة،  والشغل مكسر جسمي
كبل غفيت

حسيت على بتول تكعد بية
: هـاا !!

بتول:  صخر بالهول يريدج..

سحبت الشال بنعـاس واسب بي بكلبي
والعباس نعسانة ..

اول ما طلعت سحبني لفوك
فتح باب الغرفة، مدد وسحبني يمة

حجيت بنعـاس:  عيب من الولد صخر!؟

:اششـش،  كعديني قبل الاذان انزل انـام جوة..

سحاب:-ما جادلتة، نعسانة حضنت صدرة ونمت ....

•يتـبعُ ...

كلش اسفة، الاسبوع الفـات ما نزلت
بس جان عندي على. طول الاسبوع دراسة
اني لو عندي وقت فراغ ما اقصر وياكم ابدا

غلط وابلع واكول عادي،  بس حيل زودتها
القصة متعجبج لا تقريها يمة

ما مجلبة بيج اني،  المفروض تعذروني من اكول ظروف، ، مو تكولين " ما طلعت ظروف هاي " ترى ظروف مو ملابس واختارهة بكيفي ..

¶ والقصة بعد ما انزل بارت ثاني الى يصعد البارت الي قبلة 200 نجمة و500 تعليق

لان التعب الي جاي اتعبة استحق عليه تحفيركم وكلام جميل منكم

يعني اكتب  بالـ 4 ساعات واجي الاكي
التعليقات بس 100 وانتو 1000 قارئ

هذا ابسط شي اطلبة منكم،  لان ماكو اي شي يحفزني اكتب .. شكرا لكل شخص يعذر ويقدر الظرف،

احبجن يمُـة + لا تنسون التصويت 🕊️💙

الكلمة الطبية صدقة
* جزء من جمال حروفكم،  😙😙💙