رواية ملاك الشيخ جراح الفصل الثاني عشر 12 - بقلم ~yaqeen.hassan~

‏قال لي يوماً :
‏"في بحرِ عينيكِ هانت كل أشواقي
‏ياربة الحُسّن هل تنوين إغراقي ؟"

بارت ليلي لعيونكم 💕💕

لتنسون النجمة وعلقو على الفقرات 💕

#الكاتبة : yaqeen. Hassan
#مـلاك _ الـشيـخ _ جـراح
#البارت _الحادي عشر

ملاك : درت وجهي على كيف واني خايفة جان اشوف جراح كبالي يايابة احس ماي بارد نزل على كلبي تنفست بقوة

جراح : شدسوين هنا شبيج لازمة كلبج

ملاك : داكل وخترعت من شفت خيالك

جراح؛ خلصتي يلة صعدي لغرفتج لايفوت واحد من الولد

ملاك : دنجت ومشيت جان يلزم معصممي ورجعني كبالة

جراح : تعلمي من احد يحجي جاوبي

ملاك : باوعت بعيونة ومدري حسيت بنضراتة بذاك اليوم ودنجت بخوف_ ع عوف ني

جراح : شبيج

ملاك : عوفني فدوا _ فلت ايدي واني عفتة وصعدت ابجي بالغرفة خفت هواي مدري ليش

احس صرت ضعيفة هواي جنت قوية بس بعد الصار صرت ضعيفة وابجي من اقل موقف

رحت نمت وثاني يوم كعدت بدلت واخذت كتبي نزلت نور جانت جوة متداوم لان جايات بنات خالاتها بس اني ماكدر اغيب يوم لان ينكلب علية الاول والتالي

صبحت عليهم وكلهم عينهن علية من فوك ليجوة جنت لابسة بشت حني وجوا بنطرون وحاطة على خصري حزام هذا اغلب لبسي هيج

كعدت اكلت لكمتين وفات جراح

جراح : ملاك خلصي وتعاي للسيارة انة اوصلج

ملاك : تنفست بقوة مالي خلكة ابد

هسة نتكافش

هاجر : ليش ماعندج خط يوديج

ملاك : لا عندي

نوران : لعد ليش جراح يوصلج

ملاك : شمدريني اني مشفتي اجة حجة وطلع

نور : مو ابو الخط عندة شغل اليوم فجراح يوصلهة

نوران : و ليش ما خليل او مصطفى

ملاك : استغفر الله هسة اني شمدريني نور اني طالعة يلة بيباي

_ طلعت واحجي بصوت ناصي _ حاشرة خشمهة بكلشي كبور اي والله عبالها كاتلة روحي على الغثيث مالتها كبر يلفج انتي وياه

علي : هوب هوب رح توكعين

ملاك : نبتهت على روحي داطبش بالطين وهمة توهم ساقين الحديقة مشيت على الكاع امسح حذائي

علي : هذا منو اللي الي امة داعيتلة اللي شاغل بالج

ملاك : هههه لو تسمع اللي داحجي تنتحر والله يلة اروح هسةجراح يجيني لان تاخرت بيباي

علي : اطالبج بمعرفتة هالشخص

ملاك : ههههه تمام _ مشيت ورحت للسيارة ركبت كدام مابية اتناقش وياه وحرك هوة ومشينة ضلينة ساكتين طول الطريق

جراح : شوكت متحاناتج

ملاك : بعد شهر

جراح : يعني ماعندج متحانات هسو

ملاك : لا ليش

جراح : باجر رح اودي خالاتي لنجف وكربلاء وكلت اشوفج ترحين لو لا

ملاك : تروحون للمقبرة

جراح : اي

ملاك : تمام اروح

جراح : خوش باجر الفجر نطلع

ملاك : تمام _ وراها سكتنة روحتي كلهاا علمود المقربة مشتاقة اروح لبابا وماما وصلني للكلية ونطاني فلوس اخذتهن مردت اناقش صايرا ماريد اتعارك وياه لان مالي خلكة واحس تهيج الذكريات اذا تناقشت وياه

نزلت ورحت يم صديقاتي كعدنة بالكافيتيرا نسولف واني بس ابتسم واراجع بالمادة اجة ولد سحب كرسي وكعد ويانا اني دنجت راسي مهتميت لحد ما هوة حجة

حازم : ملاك ليش متشاركينة الحديث

ملاك : رفعت راسي _ داراجع للامتحان

حازم : قابل حيطير الامتحان

ملاك : عفوا خوية بس اني جاية ادرس مو اسولف اشرت لرجاء وكمنة طلعنة احس اخاف حتى اباوع على شاب اكول اخاف جراح يلمحني اتخيلة مخلي مراقبين علية

رحنة متحنة وجاوبت زين وراها طلعت انتضر جراح برا يجي شفت سيارة جاسر طبكت رحت ركبت حتى بدون سلام ودرت وجهي عللى الجامة

جاسر : وعليكم السلام

ملاك : ضلينة ساكتين ووصلنة للبيت مطايقتة احس بودي اخفي من حياتي مرات اصفن شكد جنت احبة واحسة حياتي بس بعد السوا اكرهة كره مو طبيعي

رجعت للبيت سلمت وصعدت بدلت ونزلت اتغدة وراها صعدت انام واكعد اقرة

من يجون خوال نور احب اكعد بغرفتي لان اضوج ومالي خلكهم وهمة ميحبوني اصلا ولا اني اطيقهم لهذا ابتعد

ثاني يوم الفجر

كعدت على اصواتهم بدلت بسرعة ونزلت تريكت وياهم وراها طلعنة وقريبا كلنا رحنا مضلو بالبييت بس كم واحد ومنهم جاسر ما اجة ركبت وية بيبي وجدو وعمة مريم وجراح السايق والباقي بالسيارات متوزعين اول ما ركبنة حطيت راسي على الشباك ونمت لان ميتة نعس

مادري شكد مر وقت بس صحيت على شخطة السيارة وكفت فجا كمزتني _ شكو شصار

الجد : علكيفك ياابني هبطتنة

جراح : دشوف هذا المطييي اللي جاي يسوق ثول حتى ثول

ملاك : والله وكف كلبي مكدرت انام وراها ساعة يسولفون ساعة يسكتون لحددد ما وصلنة للنجف

اول شي رحنة للامام زرنة وخلصنة وطلعنة للمقبرة حسيت كلبي طار كولش مشتاقة لبابا وماما روحي طايرة عليهم وصلنة للمقبرة طبعا جدو شترى قطعة ارض كبيرة بالمقبرة وكل اقربائنة بيهة يندفنون

حتى كرايب عمة ماعندهم كاع يدفنون بيهة فدفنو اهلهم بكاعنة راحو كلهم للكبور كل واحد لاهلة بقيت اني واكفة صافنة على القبرين مال اهلي ضليت بعيدة وصافنة ودموعي تنزل

تقربت على كيف وبكلبي اكول شنو اسولفلكم ومنين ابدي ومنين انته ابديلكم باخوية اللي اذاني وخلاني ماتغمض عيني من الوجع لو من الشخص اللي رباني وعتبرتة سندي لو من الاذية الشفتهة لو صراخي لو ذلي واهانتي لو شنو

عندي حجي هواي وماكدر احجي اتمنى اضل يمكم احجيلكم كل المريت بي كعدت بالكاع بين الكبرين جانن متقاربات هواي بيهن مجال يكفيني حشرت روحي بينهن واني بس دموعي ونزل بهدوء بدون اي تعبير بوجهي طلعت من جنطتي شهادتي وصدريتي خليتهن بنص القبر وكمت احجي بشهكة وصوت ناصي

_ شوفو شوفو شنو جبتلكم هئ رغم كل المريت بي بهاي الفترة بس هالشي الوحيد اللي ردت افرحكم بي باوعو هاي شهادتي هاي فخركم وانتو بقبركم رفعت راسكم ومانزلتة شوفي ماما هئئ هاي هاي امنيتج اصير دكتورة والبس مريول ابيض

جاهدت ماما وتاذيت ونسلبت حياتي وكل فرحة بداخلي لخاطر هالصدرية البيضة وهالشهادة

عانيت معاناه محد يكدر يحس بيهة لخاطرهن

تاذيت من اقرب اشخاص الي من اخوية وسندي

تحملت وصبرت...

ماما ادعيلي وباوعي علية تعاليلي بالحلم اريد اشوف فرحتج لاتحرميني منج

ماما تعاليلي فدوة وانت هم بابا تعال رزلني اذا بيوم شفتني ما قريت تعال رزلني لتعوفوني وحيدة اني ماعندي غيركم عفتولي سند بهالدنيا وهالسند اذاني وكسرني بقيتولي انتو واتاملكم بالحلم تعالولي اذا بيوم شفتوني ابجي لتركوني تعالو

_دنجت وحسيت صوتي كام ميطلع حطيت راسي على القبر وابجي واشهك وكأن بدموعي اشكيلهم اللي مريت بي واللي عشتة

ماعرف شكد مر وقت بس رفعت راسي باوعت ماكو احد درت وجهي ورا باوعت جراح واكف هوة وجدو كمت وردت اوكع تقرب جدو سندني وتقرب جراح غسل القبرين وجدو يقرة قران بصوت عالي بالايات اللي حافضهة واني لازمة عبايتة وابجي

ضل شوية يقرة ايات بصوت عالي وهداهة الهم وقرينالهم الفاتحة ومشينة

حسيت الدنيا فترت بية اول مبتعدنة مكدرت اتوازن وجدو مجان بصفي وكفت واريد اتوازن بس مكدرت غمضت عيني ووكعت بين ايدين احد واخر شي سمعتة صرخة جراح باسمي

فتحت عيني احس بشي بارد على وجهي ينرش حطيت ايدي على وجهي وفتحت عيني جانت بيبي يمي ونور وعمة وجدو واكف وايدو على راسي

نهضت كوة

الجد : شون صرتي بوجي

ملاك ؛ دايخة

جراح: جدي روحو انتو اوديهة مستشفى واجيي

ملاك؛ لااا مابية شي اريد ارجع للبيت _ ركبنة بالسيارة واني حطيت راسي على جتف بيبي وغفيت من لتعب صحيت من وصلنة بحيث شبعانة نوم

نزلنة واني صعدت لغرفتي مددت وغمضت وعيني اريد ارتا احس صدري مقبوض

مكدرت انام

كمت نزلت للحديقة كعدت وصافنة بالفراغ حسيت احد كعد يمي
باوعت جان جاسر ردت اكوم بس لزم ايدي وكعدني

جاسر : كعدي هسة حكوم بس احجي وياج

ملاك : ماعندي حجي وياك عوفني

جاسر : شلون صرتي كالت بيبي تخربطتي

ملاك : زينة مدامك بعيد عني

جاسر : اوف لهلدرجة حاقدة علية

ملاك : وااكثر

جاسر : اي ولشوكت رح يستمر حقدج هذا

ملاك : لحد ما الله ياخذني يمة

جاسر : ملاك انة اخوج

ملاك : اخوية مات واني قريتلة الفاتتحة وية بابا وماما

جاسر : ملاك لا تقسين كلبج محتاجج والله

ملاك : مجنت محتاجني بذاك اليوم وجنت تريد تطلعني جثة من الغرفة

جاسر : مجان بيدي ملاك يعني شفتج بعيني تنهزمين شلون تريدين افكر بالكامرات وانتي قبلهة كلتي ان تنهزمين

ملاك : جاسر لتجي تبرر رجاء لتبرر لان بهالشغلة ماكو شي اسمة تبرير الاثر اللي تركتو بجسمي وكلبي للابد حيضل ومستحيل بيوم ينمحي واذا صار يوم وانمحة بوكتهة اني اكون بالكبر

جاسر : هذا اخر حجي عندج

ملاك : اي ولتحاول وياي خليني عايشة حياتي بعيدة عنكم ومرتاحة وجودكم بحياتي انتة وابن عمك ياذيني

جاسر : يجرالج التردي

ملاك : كام من يمي ودموعي نزلت مخنوكة ياربي مخنوكة اني هم محتاجتة بس كل ما اتقرب منة احس ارجف واخاف رعبي منة اكبر من احتياجي الة ماريد اتعذب

كمت فتت جوة ثاني يوم عطلة جان وراها داومت

ورجعت اكمل حياتي جتي امحانات نصف السنة ب ولتهيت بيهة ومن خلصنة قررو يصير عرس هدى

جنة طايرن فرح مصاير عرس عدنة من زمان لهذا جهزنا بكل قوتنا

شترينة فساتين اني ونور وجهزنة كولشي

وحتى خالات نور ضلن لان عزموهم همة هم

بيوم الحنة جنة مخبوصين اغلب الخطار صار بيتنة لان اكبر شي هوة بيت عمامني صغار يعني ميتحمل الضيوف الهواي فكلهم جانو يمنة ونص متوزعين هناك واحنة نركض منا ومنا

ورا الغدا ورا ماخلصنة كلشي صعدنة بالغرفة نبدل غرفة نور محتلة وغرفتي جنت قافلتهة ماحب احد يدخللهة سمعت حجي هواي منهم على هالسالفة بس مهتميت وبيبي كالت احسن لان بيهة الذذهب مالتنة اني ونور وبيهة ملازمي واوراقي وماكدر اخاطر اخاف شي يضيع بيهن

فتنة نبدل شغلت نور اغاني ونركص وياهة ونبدل

فستاني هذا

فتت للحمام اخفي الاثار اللي برجلي  حطيت اساس وكونسيلر ولبست  جواريب بيجي يلة ختفن

طلعت من الحمام تلكتني نور

نور : يلة تعاي رسميلي الايلاينر

ملاك : جيبي كعدت ارسملهة اني اعرف ارسمنة مضبوط وهية تخيط وتخربط بي رسمتيالها واني بديت احط خلصنا وسبحنة بالعطر ولبست اسواراتي وهاي الاشياء والكعب والعباية ونزلنة عبرنة بسرعة في من الباب لخارجي لبيت عمو وصلنة وفتنة سلمننة على الكل ورحنة للغرفة نزعت العباية وعدلت شعري جنت فالتة كلة على ضهري

لونة اشقر شوية غامق يعني محير بحيث كلهة عبالها صبغ وتسالني على اللون لان اني شعري اشقر بس بيبي من جنت صغيرة خالتلي حنة لهذا اللون نخبط وصار هيج اتذكر بوكتهة جراح تخبل لان جان يموت على شعري

فليتة ونزل لنهاية ضهري وطلعت للمطبخ

كلها تباوعلي من دخلنة للكيلة صرنة محط انضار اني ونور كلها تصفن علينة وتكصنة كص

سرى : يولي شو ممشلحة مطلعين زنودج

ملاك : ههههه ماريد عجبني الفستان وبعدين اشلح المن حتة خالات نور يكصني كبال الرايح والجاي

_ اخذت الضيافة وطلعنة نقدم وياهن اللي انطيهة تكولي انتي الدكتورة حفيدة الشيخ وتضل تكول ماشالله

اني اعتبر طفرة بعائلتي لان كلهم سمر حتى نور سمرا بس اني بيضة وبياضي صافي

وعيوني عسلية حتى حواجبي مو سود يعني على جوزي هيج لان ماما جانت شكرا لهذا طلعت عليهة اما جاسر فطلع على اهل بابا

لهذا ياهية تشوفني وتنصدم ويعني شلون حفيدة الشيخ اللي كلهم سمر المهم ضليت اقدم واني بطبعي

مجاملة يعني ادك سوالف لهذا كلسع وحدة ساحلتني يمهة لحد ما جتي هدى وهنا شتغل الركص شغلنة الديجي وذبينة لحم ركصنة ركص مو طبيعي وحتى هية ذبت لحم

وراها تعشينة وخلصنة تونسنة لمينة المواعين ورحنة بدلنة وكل العائلة لتمت بالهول تسولف واني كاعدة اباوع بالفون اطلب بالفديوهات رفعت راسي شفت عمو علي كبالي بتسمتلة وهوة اشرلي تعالي

كمت كعدت بصفة

علي : ها ولج صايرين منشوفج

ملاك : هههه والله لتهيت بالحفلة

علي : تونستي عاد

ملاك : يمة متتنة من الونسة صدك غيرت نفسيتي

علي : هههه دوم يلة شدي حيلج على الكورس الثاني

ملاك : اي والنببي خرب شايلتلة هم من هسة

علي : انة موجود شكو موضوع ممفتهمتة تعاليلي

ملاك : متقصر يالغالي

سمية : اي علي شوكت ناوي تتزوج

علي : الله كريم

الجدة : هوة هذا علي شفتهمت منة غير الله كريم صارلة سنين يكولهة وكلشي ماشفت منة وانوب ذولة هم لحكو وميردون زواج

جاسر : افا انة ازوج وعمي بعدة لا واالله ماترهم

علي : انة مامانع احد وبعدين مامفكر بالزواج

عبدلله : عمرك شكد انتة هسة

علي : ستغفر الله 34

عبدالله : اي وتكلي ممفكر جا شوكت تفكر منو حترضة تزوجك يعد هالعمر

ملاك : عمو صدك جذب اصلا هنيالها اللي تتزوجة دشوفة شلون صاك

علي : شوفو شوفو هذا الحجي الزين اللي يرفع المعنويات مو حجيكم

ملاك : هههههه اعيش وارفع معنوياتك _ لمة عائلتنة حلوة هواي احبهة لان منتقيد بيهة يعني مو عيب ان بنية تحجي وية ولد عمهة لا نشاقة ونضحك عادي

عقيل : ولج وين جهالج

عبير : مادري مو جانو يمك

عقيل : خرب بابوكم وين ولو ذولة

ملاك : منة ضحك علي عقيل لسانة فالت بحيث يغلط عليهم هوة ابوهم فاتو مطينين وكاتلهم الوصخ

عقيل : ولد الكلللب انعل ابوكم لابو الجابكم شكم مرة كلتلكم لتطلعون

علا : اثووون يعنيييي منلعبببب

عقيل : يا كلبة يا حيوانة يا تربية سزز عليمن تعيطين

ملاك : يابوية سوالفهم تموت ضحك ضلو يتعاركون بيناتهم وجهالهة لسانهم ينكط عسل ههه

رجعنة نمنة وثاني يوم العرس همات مر اجمل صورة نطبعت بذاكرتنة وهاي همات وحدة من بنات عمتنة راحت بقن حوراء وسرى يعني اجة الدور النة

رجع الدوام وبدت الصعوبة ومرت علية فترة صعبة وكدرت اتخطاها ومتحنت ونجحت وطلعت من ال10 الاوائل بحيث بذاك اليوم حتى جاسر فرح

وبتسم بفخر جدو ذبح ذبيحة وسوا عزيمة ونور همات نجحت بدرجات عالية

وهنا نصدمنة بحجي عمو علي بيوم العزيمة

علي : يابة انة قررت قرار

الحد : خير اللهم اجعلهة خير كولي وليدي

علي : قررت اتزوج خلي امي تدورلي مرة

ملاك : هنا محسينة غير هلاهل عمة رجت البيت هية تحبة لعمو علي هواي وتكول اتمنا اشوفة مستقر ومرتاح

علي : شنو كيفتو حتخلصون مني

الجدة : يوم الهنا انشالله يمة والله فرحتني باجر تلكة مرتك يمك

علي : هايمة بسمالله علكيفج اصبري كتلج اختاريلي بس مو بهالسرعة

ملاك : شكد فرحانة بقرار عمو علي يعني كأنة غير جو العائلة بي رجعت حياتنا تمشي
طبيعية ......

يتبع.....

__________________

اتمنى يعجبكم البارت 💕

انتضروني بارت جديد 💕

#الكاتبة : yaqeen. Hassan
#مـلاك _ الـشيـخ _ جـراح