رواية ملحمة .. إرث سليمان الفصل الحادي عشر 11 - بقلم Hend_AlBoor

سـ نكـون ارقــى ..
لـو كـنـا مـسلـمـين بـ صـدق ☹

يمامة : وصلت يمه وجه بوجه .. رفعت عيني عليه .. عيونه يضون مو عيون بشر

عبرت الباب .. عبرت من خلاله .. حسيت ابرودة بكل احشائي .. كأنو روحه لمست روحي ..

بهاي الثانية وگف نبضي ..

(بهمس)  مستحيل .. جن ..!!

مليك : بقيت واگف اريد اگطع شكي بيقين .. توجهت و احس بارتباكها .. صارت بوجهي خلت عينها بعيني .. و هاي مستحيل صدفه .. عبرت من خلال ..

غمضت عيني .. من اجمل مانمر بي الجن هو ملامسة الروح البشرية .. نعتبره ادمان محرم .. هي ثانية وحده

الروح البشرية .. نور ربي .. نفحة الجنة .. ادم و حواء .. براءة .. خوف .. قوة .. فتحت عيوني ع صوت همسها .. عگدت حواجبي التفتت عليها ركضت ..

يمامة : بدون مالتفت ركضت للبيت .. اركض ع الدرج الف عثرة عثرت .. من الخوف صرت مثل الـ يعلم بساعة موته ..

القرين : جننن .. شفكرررررتي بهذاااا التصرررف جننن جننن ..

يمامة : اول مطبيت للغرفه انفجر القرين بالحجي .. كعدت ع الجرباية نفسي سريع .. و جسمي كله يرجف ..

القرين : اررريد اكووولج .. اااالمح .. اتقيييدت .. بس شنووو الفااايده كشفتينااا

يمامة : كااافي .. كاااافي .. ارررريد اررركز ..

الزم وجهي و انوب الزم ايدي بايد .. مو بس سالفة الكشف خوفني .. موت هفاف ع ايدي.. اكيد راح ينتقم ..

حسيته تلبسني .. منحس بالروح داخل اجسادنا .. شعور يرهب ..

حسيت روحي منفصله عن الجسد .. بثانية الـ عبرت بيها من خلاله .. حسيت روحي انفصلت مني .. اخاف يتلبسني .. كمت ع القرين

يتلبسني ..؟؟؟  خوما كدر يوصلني ..؟؟

القرين : شحت بنظري عنها ..

اي ..

يمامة : لو ذابحني و لا گايل اي .. ماكمت احس برجليني .. ركضت ع السجادة .. طلعتها دافرشها .. اتذكرت الوضوء .. داروح اتوضا توجهت للباب .. صار بوجهي .. شهگت و طگگت عيوني

شـ .. شلون دخل هنا ..؟؟؟ 

حسيت الهوا سيوف بصدري .. صخنت من الخوف .. صح شكله بشري و الشياطين تخوف اشكالهم بس ما نرعبت منهم بكده .. لهنا و رجلي اتخلت عني .. انشليت ..

مليك : جمدت بمكاني بدون الحركه .. حاولت اسيطر .. ادمان محرم .. ميحوز اكرره و لا افكر بي .. طعم روحها بية .. جمعت قوتي و انتقلت للمواجهه ..

جان لازم اگطع الشك باليقين .. ليش تشوفني ..؟؟ و ليش هيج روحها ..!

اول ماخطيت باب غرفتها .. صار الشك يقين من ردة فعلها .. دتوگع لزمتها ..

يمامة : تدوي كلمة القرين .. من كال اي .. اول ملزمني دفعته ايدي لزمت جسمه .. ندفعت خطوتين ليورا .. و هو ثابت بمكانه ..

اتجه نحوي بخطوات .. شلت ايدي بمستوى صدري بحالة دفاع من وصلني  غمضت عيوني حيل ..

لان هايهية انتهيت شيصير خلي يصير عسما يذبحني مثل هفاف .. ع الاقل ارتاح من كل هذا

مليك : توجهت عليها اريد افهم طينتها .. مستحيل يشوفنا بشر عادي .. غمضت عيونها .. وگفت گبالها ..

يمامة : مصار شي ..  لا اتطشرت اشلائي و لا تلبسني ..؟!؟! فتحت عيوني  .. واگف قريب مني .. رگبتي انشلت حتى ماكدر ارفع راسي

مليك : ريحة الطين تفوح منج ..

 يمامة : طين ..!!! عگدت حواجبي .. شيقصد ...؟؟

مليك : عگدت حواجبي و باوعتلها صفح ..

شنو سرج ..؟؟؟

يمامة : رفعت راسي عليه ..

اشلون دخلت للغرفه ...!؟

مليك : رجعت ليورا و عبرت ايدي بالحايط .. و رجعتها ..

شفاف ..!  هسة دورج تجاوبين ..؟

يمامة : رفعت اصبعي بشكل التوحيد ..

اعوذ بالله من الشيطان الرجيم
بسم الله الرحمن الرحيم
الله لا اله الا هو الحي القيوم لا تأخذه سنة و لا نوم له مافي السموات و ما في الارض ..

اقرا و هو اتقدم تجاهي حاولت الزم نفسي و استمر .. المفروض يشرد .. جن المفروض ينفعل او يكسر الغرفه .. عاد المفروض يوكع .. اي شي مو يجي طاير علية ..!!!!!؟

مليك : واگف انتظر اجابه منها .. كامت تقرا اية الكرسي .. توجهت عليها بسرعه و رفعت اصبع التوحيد بوجهها و قاطعتها

من ذا الذي يشفع عنده الا بأذنه يعلم ما بين ايديهم و ما خلفهم و لا يحيطون بشيء من علمه الا بما شاء وسع كرسيه السموات و الارض و لا يؤده حفظهما و هو العلي العظيم ..

صدق الله العظيم ..

يمامة : انصدمت من كملها .. نزلت ايدي ..

مسلم ..؟!!!!!

مليك : الحمدلله ..!

يمامة : بقيت ساكته .. تملكني نوع من الاطمئان ناحيته .. و اصلا ليش اتعجب و انصدم .. هو اكو صدمة اكبر من انو اشوفهم ..؟؟ اني عبرت مرحلة العقل السليم ..

لهذا السبب كدرت تدخل لغرفتي رغم التحصين ..

مليك : باوعت ع القرين ..

ماعتقد تشوفيني بس الي ...!

القرين : تشوف الكل .. اكيد

مليك : صفنت عليها .. شلون و ليش  ..؟ الهالة الـ تحيط بيها قوية .. تحصينها حيل قوي .. ماظن بيها خبث او حكم ع جن ..

يمامة : رحت كعدت ع الجرباية .. كولشي بجسمي خدر من الصدمات .. ارتاحيت من انكشف هالجبل الـ حاملته وحدي .. قابل شراح يسوون ..!؟

فجاءة صاحت مرة خالي ..

ام غدير : اخذت الاسياد و رحت حددت قبور مهجوره .. رجعنا ورا المغرب اول مطبينا ..

يوليس : من وصلنا اجتني اشارة من الجن الحارس بفشل عملية هفاف و موته ..

خسرنا خادم عمل الطفل مولاتي

ام غدير : مشيت ع السريع للغرفه سديت الباب ..

هفاف ..!!!! شلووون ...؟؟

يوليس : اخطئت تم القضاء من قبل الحارس ..

دنهش : شنو اظهر نفسه لانسان غير مكلف بي ...؟؟؟

ام غدير : ااالمن .. هووو مو يعرف القوااانين .. قااابل اااني اعلمه بقوانين عالمكم .. و اااالعمل شلوون ..

يوليس : انتهى ..

ام غدير : دليني ع الـ فكه حتى اهجم البيت ع راسه

يوليس : باوعت ع دنهش .. و رجعت نظري عليها ..

يمامة ..

ام غدير .. روش : يماامة ...؟؟؟

يوليس : بسبب خطاءه ظهر كدامها و لزمته .. حاولت تدخله دينها

ام غدير : طلعت اركض من الغرفة ..

يماااااااااااامةةةة ...؟؟؟

روش : لزمته .. سحقا لك هفاف كيف تقدم ع خيانه عظمى كهذه .. لماذا ليس انا ..؟

دنهش : يتمزق جسدك كـ هو ..

روش : فليكن .. المهم الفكرة .. لمسة ايد و موت .. تضحية اسطورية

يمامة : طلعت من الغرفة ..

ها خالة ..

ام غدير : تعااااالي ..

يمامة : اكيد عرفت .. دانزل التفتت ع باب غرفتي واكف بيها الجن .. نزلت .. جرتني حيل من ايدي و دفعتني لغرفتها .. صار كدامي الجن .. انصدمت ..

هذا الشي الـ مجنت مستعده اواجهه .. تنكشف اوراقي ..

مليك : انتقلت مباشرة وصلت قبلها .. لگتني گبالها .. دهشتها و ملامحها المصدومة تحسسني بالفخر .. شي حلو استعراض القدرات كدام البشر ..!

ام غدير : رررحتي لبيييت اخوووية ..؟

يمامة : من وجهها عرفت كولشي وصللها .. ماستغرب هو واحد من اتباعها .. بس شتكول ليش بطلتي عمل خبيث اني سويته .. ماعتقد تتجرأ

اي اديان رادتني بشغله جامعية ..

ام غدير : من فورت اعصابي رحت عليها قبضت جف ايدي و ادك ع صدرها .. صكيت سنوني

ااااديااان لووو حذيفةةةة ..

يمامة : تخبلت من حجيها ..

شدتحجين ...؟؟؟

قرين ام غدير : هاويته .. تحبه .. تتمناه وياها بالفراش ..

ام غدير : هاااويته موو .. عبالج مادري .. بييت اخوووية متخطين عتبت بابه زززززين .. طلعي حذيفة من دماااغج

يمامة : كافرة و هيمنة قرينها عليها كامله .. حاولت اكتم بس هو بعد انكشفت ..

اني الـ ادري .. لوو اخووج متهلكي بسحرج ..

ام غدير : مووو انتي تعلميني الاخوووة ..

يمامة : شنووو الـ ظهرررلي ااااابيتهم .. اخووة ..؟؟؟  حب ..؟؟؟؟

يوليس : وين جنت من صار هالشي .. المفروض تحمي المكان ..

مليك : اعتقد مهمتي حماية المكان .. مو جن غبي ..

ام غدير : يعنييي اتدخلتيييي ..

يمامة : من سمعت كلامه .. ارتبكت المفروض هو كاشفني الهم .. جنت مقررة اكول كولشي بس غيرت الخطه .. ادور ع جملة احجيها بقيت ساكته .. هوو الـ ظهررر فجاااءة

ام غدير : لزمتها من زندها و جريتها حيل ..

شسوووويتي ...؟؟؟

يمامة : آاااا .. ماسوويت هو ظهرلي شكله بشع و هجم علينا قابل ابقى صافنه و بعدها اختفى من لزمته

دنهش : غبي .. غبيييي

روش : شلون نخطأ و نظهر انفسنا .. هل توجد تعويذة لذلك ..!؟

يوليس : اخرس ..

روش : لا افكر في الهجوم  .. اريدها بس تشوف جمالي لا اكثر .. 

ام غدير : حليتها ..

السحر لصالح اخوية .. انتي شمفهمج بهاي السوالف .. خليج خارج الموضوع

يمامة : كمت افرك بيدي ..

الطفل جان مات و اخوج ديصارع الموت .. و تكولين لصالحه .. بس الله يعلم بشنو تفكرين ..

غدير : رحت لغرفه يمامة ماكو .. نزلت للمطبخ .. فتت من يم غرفة شغل امي .. سمعت صوتها .. راسا طبيت ..

هاا يمامة انتي هنا ..

ام غدير : دكي الباب من تطبين غرفه

غدير : شنو السالفة يمة قابل طابه غرفة رجال و مرته .. يمامتي العشا ..

يمامة : اي جاية .. بس اصعد اتم الفرض

غدير اجتي انقاذ .. افكاري كلها تخربطت .. و الخطه تغيرت .. اصعب شي من الانسان يغير عزيمته باخر لحظه

دنهش : مولاتي هفاف جبلي ضعيف .. خطأ مثل هذا متوقع ..

ام غدير : مهمة هفاف مهمة ثانوية .. الاكثر اهمية الحرب .. دتشوف حرب السحرة .. الـ فك مهمة روش و رد السحر ع بيتي ..  ساحر .. و هاي بداية حرب

يوليس : احنا بخدمة السيدة .. و ماعتقد تشك السيده بتهاون من عدنا ..

ام غدير : باجر المغرب تنهي مهمتك مليك .. و كلشي يصير يوصلني مثل الضوا .. هاي المهمة اني ماخذه عليها هواي .. اذا فشلت امر بالقضاء عليك

روش : اما النصر او الموت

ام غدير : انتشروا ..

مازن : دجيبي .. جييبي انتي فاهية .. تنكة دهن مكدرتي عليها

غدير : لتنجرح ارنولد

مازن : خشمج ..

يمامة : واگفة اغسل الفطر .. و فكري شارد .. ليش منطق .. اذا مسلم يعني اكدر اثق بي .. بس مسلم ليش ينفذ اوامر خالتي .. لا .. لا مابي امان ..

و اذا راح يستخدم السر وسيلة ضغط اني اكشف و خلي يصير اي شي .. قوتهم متعادل قوة لزمة ايد .. هفاف انتهى بدقيقه ..

دخلوا من الحياطين .. وجودهم صار امر عادي .. لازم اركز ع تواجدهم .. اخاف فد يوم لا افز من واحد و انكشف ..

مليك : (بهمس) المياه ... تبذير الخيرات ..

يمامة : محسيت الا ع صوته من جهتي اليمنى واكف .. انتبهت ع البوري فاتحته كله و شارده بفكري .. سديته .. سحبت المصفي و انسحب ..

ريحة البخور و المسك قوية بي .. احسه مخلوق من بخور ..

لمحت واحد منهم يخترق باب الفريزر براسه و يطلعه و نفس التصرف بالكاونترات ..!

روش : لا دم سايل .. و لا فضلات فيران .. متت جوع

يمامة : واگفه ع الطباخ اگلي من سمعته ردت اطبب اصبعي بالدهن .. معدتي صارت بحلگي .. شياكلووون ..

مازن : جسبي البتيته اريدها تقرمش

يمامة : اريد اكول وووييييع مابية احجي .. خليت ملح بحلگي

مازن : شبيج وجهج اصفر منايمة بالليل

يمامة : بحجة تسولف لا كل اشوي تمد ايدك مازن ..

مازن : بس هاي اخر وحده لج ..

يمامة : كملنا اتعشينا و صعدت صليت العشا ..

القرين : متتركين وقت لنفسج .. كل شي منتهي بهاي الدنيا .. شنو الـ انجزتي لنفسج ..

يمامة : باوعت عليه و رفعت المصحف .. هذا الوقت لنفسي .. انجازي العناد بيك

ك

ملت و طلعت للصالة يم مازن و غدير .. اريد اختلي من قريني .. اريد اركز بدون تدخلات

كمت اجهل اي خطوة اخطيها .. بس الشي الوحيد الاعرفه ..

اني انسانه مو طبيعية ..

غدير : صايرة بالقنادر ع الانستا .. ناس تسب ناس

يمامة : بسلا مذهبية ..؟

غدير : لا صارت قديمة هاي .. شوفي شوفي .. هاي سوت بث مباشر و تحجي ع الحجاب ناس تأييد و ناس تعارض و تعاركوا ...

يمامة : تابعت البث وياها ..

ناس فاضية ..

غدير : بس ترا صدوك يعني الناس شعليها ..

يمامة : ما المفروض منها تفتح نقاش ع موضوع بي اية مفروضه ع كل مؤمن .. اني اختصاصي جمال و مكياج و مبتغاي يزيدون متابعيني و اعلانات .. شعلية بالقرآن و الدين ..!!! لو هو نفاق و تفلسف ..!؟

غدير : صح .. بس هم بدوا .. و هالشي بينها و بين الله  ...

يمامة : كمت اگلب بفوني ..

هممم .. غدورة .. هي متابعينها فوك الـ مليون و اغلبهن مراهقات يعتبرنها قدوة الهن ..

و دتطلع تصرح بانو الحجاب مو دليل ع ستر و شرف ..؟؟ و هذني كلهن دياخذن طريقها الـ سالكته و يقلدنها .. بعد وين الـ بينها و بين الله ...؟

رفعت راسي عليها ..

و لو ماكو مقارنه .. بس محمدﷺ يتعبد بغار حراء هذا بينه وبين الله .. محمد ﷺ طلع علن الدين .. هذا ماعاد بينه و بين الله .. دخلوا عباد الله وياه

خلي تكعد بغرفتها و تكول اني ماتحجب بكيفي .. تمشي بالشارع بكيفها .. هذا هو الـ بينها وبين الله محد يتدخل ..

بس مشهورة و بث و مليار متابع .. و بيني و بين الله !!!!؟ لا ينراد واحد يضربها ع حلگها حتى بعد متعيدها ..

غدير : بقيت صافنة ع كلامها ..

ههههه والله لو تنطيني الف سنة مراح يجي ابالي مثل الـ كلامج

يمامة : احسن .. لان اذا حجيتي يكولون عليج مضغوطة منها ..

غدير : عوفج من الـ بينها و بين الله .. قنعتيني .. بس شلون و هي حرة ..!! هاا

يمامة : هههه والله مالي خلگج شنو دتمتحنيني ..؟

مازن : عوفيها لو تحجين وياها الف سنة يبقى الزمال الـ صغيروني نايم بجمجمتها

غدير : تراا ادفرك محد يمك خليك بفونك ..

مازن : لج بابة هذني النماذج امهات الـ فلوگات و مكياج و كذا بس يگطعون النت عن العالم نهائيا .. يديحن .. اسرحهن بالگنافذ .. عايشات عليج و ع امثالج ..

غدير : كام يسرح العالم ملك قومه .. دير وجهك احسن ..

يمامة : ليش تتناگرون ع حرف .. متملون ..؟

غدير : هو حشري و غثيث .. نرجع لموضوعنا .. اسمعج

يمامة : وين نفرض الحجاب بالقران ...؟

غدير : سورة النور ..!!

يمامة : شنو بدايتها ..؟

غدير : شنو .. والله محافظته ..

يمامة : بسم الله الرحمن الرحيم

سورة انزلناها و فرضناها و انزلنـا فيها ايات بينات لعلكم تذكرون ..

صدق الله العظيم ..

فرضناها .. يعني شنو ..؟

غدير : يعني كل اية بيها فرض ..!

يمامة : كل حرف مو بس كل اية .. و الحجاب من ضمنها .. و الفرض عكس الحرية ..

فـ اذا ترك الحجاب حرية ..
يعني الزانية حرة .. و الزاني حر .. و رمي المحصنات حرية .. دخول بيوت مو بيوتنا بدون استئذان حرية .. كشف العورات ع الغرباء حرية ..

زوج يتهم زوجته الشريفه بفاحشه و بدون شاهد حرية .. عدم غض البصر حرية ..

و التهمة الـ توجهت لزوجة النبي ﷺ  بحادثة الافك .. حرية ..

هذني كلها فرض بسورة النور .. مابيهن اي حرية .. و الحرية بيهن معناها تجاوزنا حدود الله

بس منو يقرا القرآن و يتمعن ..؟ كاموا يتسابقون ع ختم القرآن بدون ميفهمون دينهم .. فـ اكيد هاي تطلع و تصرح من كيفها و تكول اني حرة ..

الاسلام هو  اساس الحرية لان حرر المرأة من قيودها .. الحجاب حرية مو قيد ليش الاغلب يعتبره قيود ..؟؟

غدير الحرية مو بالجسد .. الحرية بالعقل .. حرية فكر ..

غدير : والله ماكدر اناقشج بعد .. لان لا كلام يعلوا ع القرآن .. حتى لعبت نفسي منها هههه عبالي مثقفه و دتحجي و كلها تأييدها ..

يمامة : هههه لو قرأت الجاهلة عن الحرية لـ تعرت ..

غدير : شوفي مازن غفى .. مثل الطلي وين ميجي ينام ..

يمامة : كمت عليه .. 

غدير : وين .. شنو راح تشيلي ..

يمامة : شكو هرقل و اشيله ..

مازن .. مازن ..

مازن : ها .. ها ..

يمامة : كوم نام بغرفتك .. جسمك يتكسر هنا ..

مازن : اي .. كايم ..

يمامة : طبيت لغرفتي شغلت الضوا .. خليت فوني ع الشحن

مو من عوايدك ساكت ..

القرين : عادي تريدين ابدي ..

يمامة : انضرب الشباك بحجارة .. التفتت عليه .. رحت يمه باوعت حذيفه .. اشرلي بيده ع الكاع ..

باوعت شفت ورقه ملفوفه بـ نت برغي .. شلتها و فتحتها ..

باجر نروح زيارة لكربلاء .. تجين ..؟

يمامة : مادري ليش نشرح صدري .. اخر مرة رحت وية ابوية قبل ليموت باسبوع .. اشرت براسي قبول ..

حذيفة : تعالي للبيت الصبح ..

القرين : ايي .. اي .. شتگولين لخالتج ..؟

يمامة : سديت الشباك و رحت بالفراش .. متلهفة ع الصبح ..

اي شي .. عسما اشرد ..

كعدت الفجر صليت و قريت قرآن .. و كمت اجهز العدة .. و هذا يدردم فوك راسي ..  اني من ورا عرفت وظيفة الاذانين .. وحده تطبب و وحده تطلع

نزلت سويت ريوگ و كعدت اتريك .. كملت و رحت طبيت ع كيفي لبيتهم ..

اديان : ها اجيتي .. هسه داجي عليج .. جهزتي ..

يمامة : اي .. بس انطي خبر لخالتي و اجي ..

اديان : تمام ننتظرج بالسيارة ..

يمامة : رجعت ع السريع .. رحت لغرفة نوم خالتي ..

دكيتها و طبيت ..