رواية ملحمة .. إرث سليمان الفصل الخامس عشر 15 - بقلم Hend_AlBoor

ان تُخلق في بيئة غير صالحة لذاتك .. ملحمة

ام غدير : حذيفة ابن خالج ..

غدير : حذيفةةةة ..!!!!!

يمامة : غدير عاطت من الاستغراب .. رفعت راسي ع خالتي .. اتعجبت من كلامها ..! 

مازن : حذيييفة مو داكول ماكو عاقل يجي عليها ..

ام غدير : ماازن

غدير : هذاا الهامج ...!!؟ تشمريني و خلاااص يمةةة

ام غدير : شنوو هاااالحجي داكولج جايج خطابه

غدير : خنگتني العبرة من كالت حذيفة هي تعرف كلش زين المشاكل الـ بينها و بين خالي و مستحيل حذيفة يفكر ياخذ منها هو حتى للبيت ميطب

مجاااايني .. لا تدخلينيييي بشغللللج .. مجااااااااي ززززين .. هذااا كله من تدبيررررج .. شنووو حمل ثگييييل عليييج اااني ..

اريد الزم دموعي ماسيطر ع روحي بعد .. انهاريت .. رحت يمها .. بالموت تطلع الحروف مني من البجي

ااااعنس و ما اخذ واااحد جايبته بسحرر يمة .. اعنس

مازن : كمت من مكاني بكل هدوء ..

سوالف النسوان اني ماتدخل بيها .. تكافشن بيناتجن ..

يمامة : انهارت و ركضت فوگ .. بقيت كاعده .. انصدمت بس توقعت القرين يجذب .. او احتمال كلام غدير صح .. لهذا متدخلت لان شي ميخصني .. لهيت روحي بالمواعين .. كاعده و اجمعهن ..

ام غدير : كله منج .. فسدتي بنتي علية

يمامة : طككت عيوني و رفعت راسي عليها ..

اني ...؟؟ شعلية ..؟ حجيت حرف

ام غدير : ضربت ايدي ع الميز و نزلت يم وجهها ..

حذيفة لغدير فهمتييي .. بالطوع بالغصب هي له ..

يمامة : ضيقت عيوني بوجهها ..

ترا ميهمني ابن اخوج .. بس لتدخلين جهالج بالشر الـ انتي تشتغلي .. بعدين يرجع عليهم .. شنو ميكسرون گلبج

ام غدير : مووووو اااانتي تعلمييييني

يمامة : كمت وكفت بكل هدوء ..

لعد لتدخليني .. بنتج و ابن اخوج .. ميخصني .. من انطق بحرف عود حاسبيني خالة 

عفتها و كمت الم بالمواعين .. ربعها كلهم يفترون بالبيت .. الظاهر بدت تخلي ايدها بالنار .. بدوا يهدموها الخدم ..

عافتني و صعدت لغدير .. اسمع صياح غدير و عنادها .. ليش هيج عكس امهم

سبحان الله معقولة ولد مشعوذه بهذا النقاء ..؟

مليك : ممكن .. تنبت ورده بنص مزبلة ..!

يمامة : التفتت عليه .. فززني .. بقيت اتلفت حولي اخاف احد موجود منهم ..

مليك : منتشرين فوك لتخافين ..

يمامة : انظلمت هاي الورده

مليك : الظلم ميهدمها اذا جانت روحها قوية .. تبقى فارضه نفسها ع المكان ..

يمامة : داشيل المواعين جان يطيرن .. رجعت ليورا خطف و لزمت الحايط ..

مليك : ههه .. هاا

يمامة : انتبهت عليه بحركه ايده كام ينقل بيهن للسنك .. انصدمت اكثر ..؟ يا نوع من التحكم هذا ..؟ مثل السحر ...؟؟

القرين : اي .. سمعت بهاي القدرات .. قدرات خاصه يتعلمها الجن من ساحر مقتدر بعالم الجن .. و مو اي جن يتقنها ..

مليك : من الجيد انك تقرا افكارها .. انا احسدك ع ذلك .. مبتغاي هذا ..

يمامة : عگدت حواجبي بوجهه .. ليش يريد يقرا افكاري ...؟؟؟

باوعت ع قريني بنظره اتحلفتله بكتله ..

القرين : شنو .. مو بيدي  ..! 

يمامة : رحت للسنك و المواعين يغسلن بنفسهن .. من جهه استغربت بس من جهه تمنيت عندي هيج قدرة .. حتى الماسحه اخليها تمسح لحالها ..

التفت ع مليك و حركات ايده مثل الموسيقار قائد اوكسترا و ديتحكم بحركات الملحنين .. المواعين تطير من السنك للكاونتر ..

خلاص .. هسه يجي واحد يشوف كل هذا ..

مليك : لا بأس لم يتبقى سوى هذان ..

يمامة : خلصهن كلهن .. نسد خلاط المي .. باوعت عليه ابتسم و فتح ايدينه اثنينهن و انحنى الي تحية اجلال ..

عفته و مشيت .. فتت من يمه ..

شكرا ..

مليك : الشكر لله مولاتي ..

طلعت من المطبخ ..رغم استغرابها حسيتها حبت الوضع  ..

وكفت وكفة ملوك ..

لو يعلم جدي بما افعله ..!؟ هه مليك ايهاا الشقي .. سحقا قد اشتقت لك جدي

يمامة : صعدت فوك اسمع خالتي تقنعها و غدير تبجي بغرفتها .. رحت توضيت و طبيت لغرفتي اصلي ..

كملت طبت علية غدير هالكه وجهها بالبجي ..

غدير ..!!

غدير : شلوون وية امي شلوووون شلوووون .. راااح تهدم حيااااتي يماااامة

ام غدير : احجي وياها عناد بنتي .. رحت وراها ..

يمامة مو تحشين رااس بنتي عليةةة زززين ..

يمامة : استغفر الله .. اني من اشوكت حرضت غدير عليج خاله .. شنو هالحجي ..؟

ام غدير : داحذرج بس زززين ..

غدير : يمةةة .. يمةةة

يمامة : غدير بمكانها تكمز و تبجي مثل الطفلة و خالتي تهدد .. اني بقيت ساكته لحد ما طلعت خالتي .. غدير شمرت نفسها بالكاع كعدت و تبجي

طفلة يالله طفلة ..

غدير : انتحررر انتحررر زززين ااااخنك روحي و اموووت حتى ترتاااح مني

مازن : طلعت من الغرفة ع عياط غدير و امي .. طكيت ماتحمل اذا ما اشارك .. رحت ركض .. نزلت امي تركض .. مديت راسي من فوك ..

هااا اشو فلتي يمةةة .. وا اسفاااه .. وااا اسفاااه .. خيبتي ظني من اول معركة انسحبتي ..

لو هاد عليج خالد بن الوليد من ورا الجبل شتسوين لعد ..؟ تسلمين مفاتيح مكه بدقيقه .. بس يسحب السيف تنطيني له ابكايت جكاير .. يمةةةةة

طبيت للغرفة .. كمت اطك اصبعين و اركص فوك راس غدير هي كاعده بالكاع ..

عروستنااا جكليتةةة حامض حلو ابكاتيه .. هلا هلا

غدير : روووح من وجهيييي انت .. مناقصتكككك

مازن : هلا هلا حامض حلو ابكايته بس اكسباير .. خفت هالوجه خفت خفت اجاها رجال كالت اعور

غدير : ماااازن لااا احرك الامةةةة

يمامة : اني بين شبعت قهر ع غدير و بين ميته ضحك ع مازن و قرينه يفترون حولها و يركصون و يطكون اصابع و يغنون .. مصدك يدابلها .. لكاها من الله

مازن : ميحتاج تخنكين روحج حبيقتي ايدي موجودة ..

لزمت من رگبتها و بطحتها بالكاع ..

عاااا وو عااااا

يمامة : طفرت من مكاني .. اريد افاككهم ماكدر هو مجلب بركبتها و هي مجلبة براسه خلت كل قهرها بشعره شلعته ..

مازن : يمااااااامة .. الحكيييي .. اااااااااا .. لججج اجججج خبلةةةة غديرررر العوووورة خبلةةةةةة

يمامة : اجر بي من ايدها ..

تستااهل دتشوفها بيا حال و انت مثل الجن دكعد راحه

مازن : خلصتني من ايدها .. كعدنا اني و يمامة بالكاع كبالها ..

اويلي يابة شنوو هاااي .. و لا تعيش وية رجال .. شعري يا مفترية شعري

غدير : ماااا ارررريده ززززين اذا اجه اطلع اطردهم

مازن : هو يشرد من يسمع هذا صوتج خرب بيج وي الانوثة

يمامة : مازن .. لتستفزها كافي

غدير : دتسوي جلب مازن .. تعرف شنو جلب يعني اني و الجلبة سوااا .. اذا فك السحر يشمرني شمرة القندرة

يمامة : حشاج  .. اهدي

مازن : اقبل تسوي جلب لاديان .. الله .. هههه غير اشتغل عند امي جن سبع سنين جزاء لهذا الشي ..

غدير : اني مو بحالك مازن متملخةةة متملخةةة ..

مازن : اني اخوج و حزام ظهرج حتى اذا ضد امي .. نعاشرها بالمعروف بس منطيعها بالظلم .. لا تنقهرين و لا تاذين روحج ..

غدير : كمت ابجي ع كلامه ..

كووول والله وياية

مازن : صدوك جذب .. المن الاخو لعد ..

يمامة : اتحاضنوا و تبجي مثل الطفلة .. ابتسمت من كل گلبي .. حرامات هيج اولاد بهذا النقاء لهيج انسانه مشعوذه .. بس استغفر الله محد يوزع الارزاق غيره .. سبحانه

نمنا بالليل اني وياها بالغرفة .. اصعب المواساه من نواسي بشر ع ظلم امه .. يوجع صراع المعاشرة بالمعروف و عصيان الشر بنفس الوقت ..

ان تُخلق في بيئة غير صالحة لذاتك .. ملحمة ..

كعدت الصبح صليت و نزلت اسوي الريوگ .. عفت غدير ترتاح .. تعب النفس يهلك اكثر من تعب الجسد ..

كالعاده الشياطين بكل مكان .. معقولة مينامون ..؟؟؟

روش : لم ينقص حظي التعس سوى ذلك الادمي .. ينافسني ع فتاتي .. تبا له

دنهش : ما اجة الامر مراعاة لمشاعرك المرهفة ..!

روش : انت ما هي معلوماتك عنه .. كيف جرى الامر

يوليس : ما لگينا عليه سلطان .. بس ابو

روش : ماذا هل عصي عليكم فتى ..؟

دنهش : فرض هيمنته ع قرينه بصلاته روش .. مالنا عليه امر

روش : هه شنو .. كلت صلاة .. هذا هو الضعف بعينه .. دنهش يستتر ضعفه و فشله بطقوس هؤلاء الدينية المدعاة .. لو يدري بهذا الاب عزازيل .. ياويلك

دنهش : هجمت عليه لزمته من ركبته

رووووووش ... اااانت و ااااااني و هوووو ندري بوووجود هذااا الرب ..

يمامة : كاموا يتصايحون واحد هجم ع الثاني و تلازموا .. عيوني ع البيض و اذني يمهم و الاصعب انو اسوي روحي مادري ..

روش : نزززززل ايدك عنيييي .. ذليييل متهاوووون .. ماكو فرق بينك و بين مليك

يوليس : كاافي .. روش ايها الغبي يمكن ننكر الرب و نحرض البشر بس احنا ع يقين بوجوده .. دعك من الثرثرة تلك ...

دنهش : احمق ..

يمامة : باوعت ع قريني و ابتسمت .. اغتاض مني .. اعرف هم يدرون اكثر من عدنا بعظمة الله .. بس شرهم مهيمن عليهم .. غايتهم بس يحرفون الطريق المستقيم ..

كعدت اكل طب مليك و عبايته وراه طايره .. مرات احسه من مقاتلين معركه احد لو بدر المسلمين سلام الله عليهم ..

روش : تطيب بشيء من الروائح ايها العفن .. يالهي نعلم بقدومك قبل وصولك بسبب تلك الرائحة ..

مليك : ايهما .. المسك ام البخور ..؟؟

يوليس : وين جنت ..؟؟

مليك : في بعض شئني ..!

يوليس : و هو ..؟

مليك : حجى بضيغة امر .. رحت اتقربت يم وجهه ..

( بهمس ) لن يسرك ذلك ايها القائد ..!

يوليس : و لازم اعرف ايها التابع

مليك : حسنا .. كما تريد ..

لقد كنت اقيم صلاة عند البيت العتيق ..

دنهش : ايهااااا النجسسسس ...

مليك : هجم علية بسرعه اتفاديت هجومه و لزمت ايده ..

ميسعدني شرك و لا يسعدك خيري .. لك دينك و لي دين يا غبي ..

نزلت ايده حيل و انسحبت ..

روش : يوليس الا تتخذ بحقه شيئا .. تشعل جد جده

يوليس : حتى اذا جان تابع شنو نسيت هو عفريت .. صدك الجن عقول و الغباء تسلط ع عقولكم .. الصرعه مو بالجسد ايها الغبي دنهش .. شوكت تعقل هذا و تتزن

روش : يوليس دعك من هذا .. ما الامر الاخر بعد امر تزويج حذيفه بغدير ..؟

يوليس : اختيار الساحرة الوريثة ..؟

روش : ارتاحيت .. جنت قلق من تزويج يمامة باحدهم .. الا ياتي امر بالتلبس بها كجن عاشق ..؟ الى متى سانتظر ..؟

دنهش : هه و ان اتى ذلك الامر لن تكون انت المختار

روش : يرفع كذلته ليفوك يطيرها بحركه خاطفة

سحقا .. و هل يوجد من هو اجمل مني ..؟

دنهش : ليست بالجمال ايها الاحمق .. بالقدرة .. قد يكون مليك مثلا

روش : جذذذذب ...

يمامة : داخلي بدا ينهار من كلامهم .. اللگمة گامت متعبر بزردومي .. مادري انصدمت من زواج غدير الـ هو امر من الجن و مو بارادة امها .. لو بسالفة التلبس بية .. البيت ديسيره شيطان ...!!!!؟؟؟

مازن : صباح الخير ..

يمامة : ها  ..

مازن : شبيج گبيتي يمعودة ..؟؟ يابة مو صباح الخير

يمامة : صباح النور .. تتريگ ..؟

مازن : لا اتاخرت بس اشرب كلاص جاي و اطلع ..

يمامة : صبيتله جاي شرب ع السريع و طلع .. لميت المواعين الاكلت بيهن و الكلاصات غسلتهن و صعدت ..

طبيت لغرفتي ماكو غدير .. سديت الباب...

شتعرف عن الـ حجوا

القرين : علمي علمج ..

يمامة : مستحيل .. جذااب .. منوو امر بزواجها و ليش دخلوا البنية باعمالهم ..؟؟؟ شنووو سالفة التلبس ..

داحجي فجاءة ظهر مليك ..

مليك : لا تستجوبي و ان الله يحب عبده ان يمسك نفسه عند الغضب ..

يمامة : يبس دمي من ظهر ..

سلام قول من رب رحيم .. مو عصبية و لتظهر هيج ..

مليك : اعتقد سمعتي شي من ثرثرة الجن ..

يمامة : التفسير .. ماعتقد انت همين تجهل هالشي ..؟

مليك : ابدا .. اني مو قرين ..!

يمامة : ليش تدخلون غدير بشركم ..؟

مليك : الساحرة و الاتباع يتبعون خطة مارد ساحر من الجن .. بقدر اعماله يتقرب من ابليس و يتكرم ..

يمامة : شنو .. غدير ضمن مخططه ..؟

مليك : و كل من في هذا البيت ..

يمامة : لييش ..؟

مليك : الشر بالناس شوكت يكون باعظم درجاته ..؟

يمامة : استغربت و ماعرفت جواب .. صفنت عليه ..؟

مليك : بالاقربين .. صلة الرحم .. هدم هالشي من اعظم اعمال الشر الـ ممكن يحققها مارد او عفريت مقرب

الاتباع عرفوا برغبة حذيفه بيج .. كزوجه .. و ميله عن رغبته بالسحر و تسخير گلبه لبنية لخ .. عمل شيطاني محبب بالشر

يمامة : بس مؤقت هذاا يعني هذا راح يهدم حياتهم ..

مليك : بالضبط ..

يمامة : و خااالتي تعرررف ..؟

مليك : تعتقدين تجهل ..!؟

يمامة : زين لييش .. تسخر الشر لبنتها ..؟ وين گلب الام ..

مليك : الـ يمد ايده بالشر .. بعد ميكدر يتراجع حتى اذا ع نفسه سرى الشر .. لازم تستمر تنفذ كل مطاليب المارد الشيطان ..

يمامة : اذاااا متوووكف عن حدهااا اااني اوكفهااا

داطلع جان يلزمني و يسحبني ..

مليك : لا تخوضي حربا بغباء و تسرع .. لم نجد سلطانا ع الرجل ..

يمامة : حتى اذا ملكيتوا .. يشوفون غير طرق للاذية .. الغاية مو الزواج .. الغاية شر بيها و بي ... بالدم الـ يربطهم

مليك : و اذا امرتي بكف الاذية تاخذ بكلامج ..؟ تنفذ اوامر مارد موكل الها خدم بالمقابل .. مراح تاخذ بكلامج لو تحجين دهر ..

يمامة : سكتت و داخلي يتآكل .. اباوع عليه و ع قريني .. اذا واجهت ماكو تغيير و اذا سكتت ديستمر الشر .. ابليس غارس ايده بكل لحظة بحياتنا ..

مليك : جبتلج شي من مكه ..

يمامة : اشرلي بعينه ورايا التفتت .. معالم وجهي جانت مگلوبة من القهر من سمعت بمكة سكن كل شي بداخلي ..

باوعت احجار بخور ..

مليك : قد اكلت الكثير منك بالسر .. ظننتها سرقه لذا هذا تعويض لك ..

يمامة : ابتسمت .. جنت اعرف هو ياكلهن لان هم ياكلون مثل اكلنا بالاضافه للبخور و المسك و هذا الخليط واضح بريحته ..

شلونها الكعبه عن قرب ..؟

مليك : هل يكفيكِ ان قلت جميلة بقدر جمال الجنة .. فهي ترى بالقلب قبل ان ترى بالعين .. بقعة حتى الجبال ترنوا للقائها ..

يمامة : بمجرد كلامه عنها تولد بداخلي شوق يلح الها ..

مليك : خصوصا اذا تشوفين المنظر الـ تشوفه عيوني ..

يمامة : وكف وجهي من الابتسامة ..

ملائكة ..؟

مليك : اي .. السماء متهدأ بهذيج البقعه المباركه .. نورهم يشع باستمرار

يمامة : صفنت .. اجه ابالي الزيارة .. معقولة الـ شفتهم بجناحات بالامام ع ملائكة ..!!

القرين : اكيد لا .. هذولا من الجن ..

يمامة : كطع سلسلة افكاري بخيبة امل ..

همين عدهم جناحين ..؟

باوعت ع مليك ماشوف جناحين

مليك : كامت تباوع ع جوانبي تدور جناحين ..

لا املك ..

يمامة : تفاوت بالخلق ..؟

مليك : بعض من عدنا يمتلك الجناحين .. مملكة الرياح .. و الكل يكدر يحور جسده لجسد يحتوي جناحين

يمامة : استوعبت كلامه .. انو فروقات بخلقهم .. فجاءة هو و يحجي .. تحور ظهره و ظهرن اربع جناحين .. جناح فوق جناح .. بريش ابيض عملاق .. اخذن نص الغرفه ..

خشعت لدهشتي من المنظر .. جلدي كله وكف ..

سبحان الله ..

مليك : رجعت لهيئتي العادية بدونهن .. بسبب قدرات خارقه خاصه بالجن نكدر نحور اجسامنا لاي شي ممكن .. و هذا يتفاوت من مملكة لمملكة ..

ام غدير : يماااامةةة .. يماامة ..

يمامة : بغرفتي نسيت اني بهذا العالم .. حسيت اني بمكان ما فوق الواقع .. بخيال .. عالم سحري .. بس ليش اتعجب ..! الـ يوگف السماوات بدون عمد .. يخلق اي شي بقدر جبير من الجمال  .. ماكو شي اسمه خيال ..

الخيال نابع من شي موجود  .. بس ميستوعبه العقل البشري ..

صحيت ع صوت خالتي .. طلعت ركض ..

بليي ..؟؟!!

ام غدير : صديقتج هنا انزلي ..

يمامة : صديقتي ..؟؟

نزلت داشوف منو  ..؟

بسمةةةة ..!!  جمدت بمكاني من المنظر

مافهمت .. ماستوعبت ..؟؟؟ خلفها قرينين ..؟؟؟؟!! خفت انصدمت .. ردة فعلي بينت مستحيل اكدر اخفيها ..

قرينها بنية تشببها هزيلة كولش و مغلوبة ع امره .. و قرين ثاني بنية شعرها عكش اسود ع بياض .. غباري .. وصخه .. وجهها بشع بشع .. مجعد و سودة خشمها جبير حيل حلكها مفطر .. حواجبها ثخان .. عيونها سود و بياضها احمر .. معالم الشر كله بوجهها ..

شايله بقبضة يسارها سجينة جبيرة معدنها كله دم يقطر ..

انتبهت الي اباوع عليها .. بعدت نظري ع وجه بسمة ..

بسمة : هلوو عمررري .. مشتاقتلج

يمامة : اجتي بوستني بوستها جنت بارده حيل .. من بوستها كمت اسمع صرخات طلعت من السجينة زرفت اذني ..

آاااااااا ...

كبل سديت اذاني و ركعت .. نزلت راسي ليجوا من الالم براسي فقدت السيطرة .. حسيت السجينة تحجي و تصرخ .. صرخات اطفال .. و ونين ..

بسمة : من بوستها عاطت و دنگت راسها و جسمها .. سدت اذاناتها

يمامةة .. شبييج .. اسفة ..

يمامة : سحبت نفس صكيت سنوني اريد اسيطر ع الم راسي ..

القرين : شلون تدخلين بيت ساحرة و انتي دخيل شر .. ماتخافين لا جاية تتخلص منج

التابعة ( قرين انسان ميت .. يستدعى من المقابر بواسطة السحر .. لاغراض الشر ) : هههه .. اطمن .. متعرف بجودي ..

( بهمس و بحركة شفاه ممددة اثناء الحديث  ) انهااا جاااهلة ولا تؤمن بهذه الامور .. انا بخير اطمئن

يمامة : مابية .. الم شقيقة ..

التابعة : ( بنظرة استكشاف تطوف حول يمامة ) سولفلي ع صاحبتك .. اظن شافتني ..

القرين : من الناس الـ يكولون عليهم ذوي نسل مبارك تابع لاخر نبي .. مجرد تستشعر وجودج

يمامة : نظري و وجهي يم بسمة .. و عقلي يمها من تطوف حولي بهاي البشاعة و نيتها للشر .. من حجى قريني كمزت عني متر .. و رفعت السجين

التابعة : لعنها الاب المبارك ..

بسمة : اوي عيوني اسم الله عليج ولج عيني شكد تموت الشقيقة ..

يمامة : تعالي اكعدي عمري .. حامل مو زين عليج الوكفة ..

بسمة : تسلمين .. والله مشتاقتلج كلت امرلها مادام نزلنا يمكم

يمامة : طبينا لغرفة الاستقبال .. كعدتها و رحت صبيت شربت و رجعتبها

صدووك .. شوكت انتقلتوا

بسمة : قبل اسبوع .. عاشت ايدج عمري

يمامة : والله اني همين مشتاقتلج .. ماكو اخبارج انكطعت .. رقمج ماعندي ادك ع القديم مقفل ؟؟

بسمة : يمعودة رجلي يغار من كولشي لا رقم لا شي .. هسة بالتواسيل يلله كدرت اجي  .. امه قنعته كالتله خلي تغير جو زين الها .. و الا بنفسه جابني يلله امن

يمامة : حسبي الله .. و هذا شعلي بالغيرة .. قابل اخذج من بيت اهلج مسلسلة بزناجيل .. و هو ديكمل العهد ؟؟

بسمة : شسوي هايهية ..

يمامة : العلاقة الزوجية الله اختصرها بكلمتين ..

مودة و رحمة ..

بعضهم فاهمين فكرة الزواج غلط ..  هو تملك بس برحمة .. مو استعباد

بسمة : يمامة بسبب كم بنية انحرفت ورا الزواج .. كامو الرياجيل يخافون و يحسبون ..

يمامة : صح بس و لا تزروا وازرة وزر اخرى .. هو اخذج من ابوج حرة .. مو من حقه يقيد .. الا بضمن المعقول

بسوم .. المحترمة محترمة سواء يم ابوها او يم زوجها .. و السخيفة سخيفة لو يسجنها بقوطية ..

بسمة : اي والله بهاي صدكتي ..

يمامة : المهم ماعلينا .. صايرة طوبة بيا شهر هسة؟

بسمة : هههه راح اطب الخامس .. بس خايفة ..؟

يمامة : ليش .. من الولادة ..؟

بسمة : لا .. كلما ادخل الخامس اذا ولد ميكمل يوكع و اذا بنية تكمل و اولدها بسلام ..

التابعة : هههه .. هههههه ... عندما يتقن عمله التابع المخلص

يمامة : حواجبي التمن بفد مكان .. اريد اسيطر ع نفسي .. ضغطي ارتفع .. بلعت ريگي ..

مراجعتي سيد .. شيخ ..!؟

بسمة : راجعت مفاد .. و زوجي و اهله خلكهم نفذ .. يمامة ماعتقد راح استمر وياه .. شنو ذنبي و ذنب بناتي ..؟

يمامة : كامت تبجي .. ليا مرحلة يوصل البشر بالاذية .. قتل روح قبل لتشوف النور .. ليش ...؟؟؟ اريد احجي الحروف تخنگني ..

شكالولج من راجعتي ..؟

بسمة : تابعة صبيان .. كمت اشوفها بالمنام تهددني و تتوعد بقتل ابني .. كمت اعرف الـ ابطني ولد قبل لا اكشف سونار ..

يمامة كل مرة تجيني تكول الا اكطع احشاءه ابداخلج .. تستلذ بصرخاته و المه من تملخه بيدها .. و صح .. صحح يوكع ورا يومين ..

و لا علاج لا حل .. والله يمامة القران مدافارگه و صلاتي ملتزمة بيها

يمامة : انهارت بالبجي .. عيوني غرگن .. و روحي شاطت .. دمي بدا يفور .. كل صرخه سمعتها بسجينتها .. كامت تدك بگلبي

بسمة : مادري ليش هيج حظي .. اني مليت و عفتها ع الله ..

يمامة :  احاول اسيطر ع اعصابي .. و هذيج تضحك ضحكة شريرة و تفتخر ..  ماكدر فقدت .. كمت من مكاني اريد اسحب السجين منها و اطعنها بيها

خطف من يمي مليك

مليك : رجعت للبيت من دورية معلومات .. خطفت ع القرين  الدخيل .. خنگتها من ركبتها و رفعتها ع الحايط ..

التابعة : ما اجييت بشر باهل البيت .. اتركنييي

مليك : المستدعون من عالم الاموات .. ااانتم اشررر من اولئك الشياطييين ..

يوليس : مليييك .. دعك منها .. انها تابعة لساحر اخر لا نريد الدخول بمعركة نحن في غنى عنها ..

روش : سحقا .. من هذه انها قبيحة ...؟

مليك : عصرت ركبتها بقبضة يميني لحد الاختناق .. تركتها وكعت بالكاع ..

بواسطة سكين تلك الشيطانة قد قتلت ارواح لم تشاهد النور بعد

بسمة : يللا اني اروح لان اتاخرت .. اسفة ضايقتج عود اجيت اغير وياج جو انوب نكدت عليج الجو

يمامة : كل الافكار طارت من عقلي ..

بسمةةة ..

بسمة : عيوني ..

يمامة : تعاليلي مرة لخ ..! تكدرين ..؟

بسمة : اي عادي عود اقنع زوجي ..

يمامة : قبل لتدخلين بشهر الخامس ..

بسمة : ليش .. يمامة تكدرين تساعديني
.؟

يمامة : اا .. اعرف كم شغله من ابوية الله يرحمه .. راح اسويلج حجاب عود تعالي اخذي ..

بسمة : فدددديتججج عيوووني .. فدوووة عمرري

يمامة : كامت تحضن بية .. اني ماعرف ليش حجيت هيج .. حتى ماعرف اشلون اساعدها .. بوستها و وصلتها للباب ..

داصعد فوك ..

ام غدير : شبيها صديقتج تبجي ..

يمامة : مابيها .. شوية مخنوكة و جتي تفضفض ..

صعدت لكيت غدير كاعده بالصاله تتصفح بفونها ..

اتريكتي ..؟؟

غدير : لا مالي نفس .. و ما اريد انزل اشوف امي .. نفسيتي منتهية ..

يمامة : اذكري الله .. هسة اصعدلج الاكل مو زين

غدير : لا مكتئبة حيل والله و نفسي مسدودة .. تعالي اكعدي ..

يمامة : اويلي منج شكد عناد ..

رحت كعدت يمها .. كمت اتابع وياها منشورات ..

هذا حلو .. بي توصيل .. اصعدي ع المنشور غدورة ..

احجي وياها مترد .. انوب اني كاعده وراها ماشوف وجهها ..

غدير ..

درت جسمها بيدي .. اباوع وجهها دم دم و متقلص .. كل وجهها ملموم يم خشمها عبالك عيونها  .. حلكها .. جلدها .. كولشي تحرك من مكانه و التم يم خشمها ..

راسها مدنگته و متقلص .. كام يهتز بحركه سريعة و خفيفه .. ركبتها ثابته بس راسها يهتز تزيد سرعته ..

گامت تطلع صوت مقاومة .. صراع سيطرة

لزمتها راسها بيديني اثنينهن .. نااار راسها .. تخبلت .. حيلي كام يرجف

غديرررر .. غديرررر