رواية ملحمة .. إرث سليمان الفصل الرابع 4 - بقلم Hend_AlBoor

بـلا وعـي نـتـصـارع فـوق الارض
و هنـالك من يـتصـارع لـ اجلـها

ام غدير : اخذه مني و شربه ..

بالعافية ..

هـه الف عافية ع گلبك ..

ابو حذيفة : الله يعافيج عيوني .. يسقوج من لبن الجنة ان شاء الله

مازن : دزتني امي ع بطل ببسي رحت اشتريته من المحل الـ براس الشارع و رجعت .. اريد بس اسبح و انام .. صعدت كبل للحمام ..

غدير : تقبل الله ..

يمامة : منا و منكم عمري ..

غدير : شراح نسوي ع العشا ..؟ دخت هلكد ما افكر

يمامة : اي شي احتمال ادز مازن ع سمج مسگوف

غدير : اي ولج عيوني هلكت من ورا الغدا مابينا ع العشا نفس الخبصة

اديان : ليش تعبون حالكم اي شي سوو عادي ناكل من اكلكم

يمامة : لا گلبي التعب هذا راحة ..

اديان : اريد اسئل سؤال بس استحي

يمامة .. غدير : لا عادي

اديان : يمامة صدوك انت درويشة

يمامة : هه اريد افهم غاية السؤال حتى اعرف اجاوب ..

اديان : يعني تعالجين مثل ابوج الله يرحمه

يمامة : عرفت هذا قصدج .. المعالجة و فك الشعوذة و السحر شي ممرتبط بالدروايش گلبي .. الساده من نسل الامام الحسين عليه السلام همين يعالجون

اديان : اي بس يكون اضبط لان نسل مبارك

يمامة : اعتقد ..

اديان : و انتي ..؟

يمامة : لا .. المعالجة لازم اتمرس و اكون تلميذه تحت ايد شيخ معالج ..

اديان : ما علمج ابوج ..؟

يمامة : مات و اني بعمر 10 سنوات ماعتقد جان يفكر يدخلني هيج عالم و اني طفلة .. بس جنت اتمنى و انتظر اكبر حتى اصير مثله

اديان : هاا .. الله يرحمه .. عبالي تعلمتي منه ..

غدير : زين هو ميتوارث ..؟

يمامة : والله مادري .. الاعرفه ماعندي استعداد اواجه روح مجهولة بجسد .. ابدا

بقينا نسوالف ع الدروشة و انوب الجامعات و طبيعة الدراسه بيها .. اخذنا الوقت للمغرب ..

حذيفة : كعدت المغرب لگيت مازن فارش بالگاع و نايم  ..

استغفر الله .. ليش ما كعدني و نام ..

طلعت شفت حسوني هستوه صعد ..

ها حسوني ..!

حسين : ( 8 سنوات طالب ثالث ابتدائي .. ابيض البشرة بشعر اسود كثيف و عيون بنية) 

عمة دزتني ع غدير ..؟

حذيفه : اسمع اصوات سوالفهن و ضحكهن ..

طب بهاي الغرفة ..

اشرتله و نزلت ..

يمامة : دنسولف فتح الباب و طب ابنهم الصغير ..

اديان : ها حسوني امي دزتك ..؟؟

حسين : لا عمة رجاء .. گالت خلي ينزلن يسون العشا ..

غدير : كمت عليه بوسته ..

فديت الخدود يبووو .. يمامة اني اروح اداهم مازن و اكوله

يمامة : ماشي لعد اني انزل للمطبخ ..

نزلت اني و اديان و حسين .. ورا اشوي اجتي امهم ..

ام حذيفة : علي اروح اسلم ع البنية مادام تستحي تجي .. انتة سبقوني للبيت ..

ابو حذيفة : ع راحتج ..

ام حذيفة : طبيت للمطبخ ..

السلام عليكم ..

يمامة : التفتت ..

و عليكم السلام ..

اجتي بوستني ..

ام حذيفة : شكد تشبهين ابوج الله يرحمة فدوة الـ خلف ما مات ..

يمامة : تسلمين خالة الله يحفظج ..

ام حذيفة : و يحفظج عيوني ..

غدير : طلعت لغرفة مازن .. دكيت الباب و فتحتها ع كيف مديت بس راسي .. ماكو حذيفة .. هجمت شفته نايم

ماازن .. ماازن

مازن : همم .. همممم

غدير : اكعد صار المغرب ..

مازن : هسة انتي شعليج مغرب ليل عوفيني ..

غدير : ولك اكعد جيب عشا ..

مازن : اهوووو مازن مازن مازن ..

غدير : هوهاوة كوووم

مازن : تعبان والله عوفيني اشوي

غدير : اني هم تعبانة و منمت ..

مازن : لازمج اني روحي انطمري

غدير : راح اصيح امي عليك هي تعرف شلون تكعدك

مازن : كعدت ع حيلي ..

اني من المغضوب عليهم .. عايش بنص نسوان .. ولي من وجهي لا ادفرج

غدير : ننننن ..

عفته و طلعت نزلت للمطبخ ..

وينهم اشو ماكو احد ..؟

يمامة : راحوا للبيت يكملون ترتيب الغراض .. كعدتي مازن ..

غدير : اي ..

مازن : وجعي .. بعد لتدزيها تكعدني ..

يمامة : شصاير خوما تعاركتوا

مازن : لا .. اتشائم مثل وجه الجن فوك راسي و الدنيا مغرب انقبضت روحي

غدير : هسة مو زين كعدتك .. انت مخنوك لان كعدت المغرب مو زين شعلي اني

يمامة : هسة روح جيب سمجتين مسگوفات و جيب فواكه لتنسى ..

مازن : اشو بس من يجي الخطار الفواكه تزور بيتنا ..

يمامة : هسة وكت شقا ..!

مازن : منو كالج داتشاقه انتو منافقين بالاكل .. و هذا حرام درويشة

يمامة : يااا .. هسة يعني شلون مندز .. مازن فدوة والله هلكنا الظهر 

مازن : اوك بس اريد كروة الي

يمامة : هههه ماشي ..

غدير : لعد اني اروح اساعدهن تحتاجيني بشي ..

يمامة : لا گلبي روحي  ..

بقيت اسوي مقبلات و نواشف شغلات ثانوية وية السمج .. كعدت اشوي اتابع المسلسل .. اربع ساعات تقريبا و اجوي ..

غدير : مازن بعد مجااااي ..؟؟

يمامة : اي ..

غدير : هذا بسلا اخذ الفلوس و گلب بيهن

يمامة : هههه عداوة شنو .. لا يمكن يسگفوها گدامه ..

غدير : هم مو هلكد .. تهي بهي اعتمدنا ع مازن

مازن : مو بعينج لج ..

يمامة : طب اخذت منه العلاليك .. حارات ..

مازن : اي جان واحد حاجز كدامي انتظرت يسگفوهن .. و ام حلگين مراضية ..

غدير : مرديتله عيبتله و بديت اساعد يمامة .. اجه شال ايده عود يريد يضربني بوكس ..

مازن : اهفج هسه انسيج وجه امي ..

يمامة : راح تفضحونا منا الناس ..

غدير جهزي السفرة ماعدنا شي .. كولشي جاهز ..

الحمدلله العشا جان اخف من شغل الغدا .. ع السريع خلصنا .. صعدت فوك صليت و بس اريد انام هلكت لان منمت الظهر ..

كعدت ثاني يوم اتريگوا و راحوا .. مرت ايام هادئة و حلوة .. اتعودوا ع بيت خالهم طابين طالعين ..

ام غدير : راح اطلع للسوگ وية ام حذيفه ديرن بالجن ع البيت ..

غدير : ماشي يمة .. جيبيلي هتيفون ..

ام غدير : رحت ع ام حذيفه و طلعنا للسوگ بقينا ساعتين نفتر اخذنا الحاجيات و رجعنا ..

ابتهال عندي حجي وياج ..

ام حذيفه : عيوني ..

ام غدير : اشوفج فقيرة و علي اشوي عصبي و القرارات بيده .. تريدين اسويج الكل بالكل

ام حذيفه : ما فهمت شلون يعني ..؟

ام غدير : اخلي خاتم باصبعج بس بالمقابل شاطلب منج تسوين ..

ام حذيفه : رجاء شدتحجين شنو خاتم شنو طلابات .. عندي بنية اني شمعرفني شنو طلابتج ..؟

ام غدير : افا عليج قابل راح اطلب شر ..

ام حذيفه : لا فدوة .. ماريد خلي ساتر علية و ع جهالي .. و كل رجال عصبي عادي ..

ام غدير : براحتج ..

ميخالف ما جيتي بالطيب .. الـ علية سويته .. رح تجين بالغصب ..

ام حذيفه : انقبض صدري من حجت هيج و قبل من جانوا متعاركين علي يكول تسوي سحر .. بس كلت لحظة اعصاب و هيج يحجي .. شتريد مني و من جهالي و رجلي .. شنو طلاباتها ..؟

ابتعدت فترة و منعت اديان تروح الهم ..

ابو حذيفه جهزتلك الحمام عيوني ..

ابو حذيفه : عاشت ايدج يلا جاي ..

ام خذيفه : داروح للمطبخ وكع علي لازم صفحته و يصيح .. ركضت عليه

اسممم الله اسم الله شبييك عيوووني

صار فترة الم بخاصرتي كتلني .. هملته كلت من التعب .. بس ديزيد الوجع ..

حذيفةةةةةة .. حذيفةةةة يااااابة .. ااااااخ

حذيفة : نزلت ركض من فوگ ع صياح ابوية .. سندته راسا و كومته ..

يمةةة مييي ..

طلعته بالحوش كعدته بالحديقة ..

اديان : اركض وراهم و دموعي تجي ع صياح ابوية و حسين يعيط ..

ابو حذيفة : خاصرتي ابوووية داموووووت يااااابةةة

حذيفه : يمةة راح اطلع ءاجر تكسي و اجي اخذه للمستشفى ..

ام حذيفه : اجي وياكم حذيفة .. مابقى

حذيفه : لا ابقي يم اديان و حسوني

طلعت ركض لراس الشارع جبت تكسي و اجيت اخذته للمستشفى .. سوولها تحاليل دم و ادرار .. نومته بالطوارئ شدوله مغذي و انطوا مسكنات ..

الدكتورة : والدك عنده حصوة و رمل بالكلى اثنينهن .. و هذا ممكن يسبب فشل كلوي

حذيفه : تخربط حالي ..

و اشلون دكتورة .. فدوة سوي شي

الدكتورة : كتبتله ادوية و خلي يلتزم بنظام غذائي ..

حذيفه : هسة انزل اخذهن .. يبقى بالطوارئ اليوم

الدكتورة : لا بس يخلص المغذي تكدر تطلعه ..

حذيفه : مشكورة دكتورة ..

طلعت اخذت الادوية ابر و حبوب من الصيدلية و رحت اخذت ابوية و رجعت ..

ام حذيفة : بقيت اكل بروحي .. مادري ليش شكيت باخته رجاء .. طلعت روحي لما رجعوا ..

هاا يمةة شگال الدكتور

حذيفة : يمة كلياته متاذيات .. يرادله نظام اكل .. هسه خلي ينام و يرتاح ورا العشا اودي للمضمد يضربه ابرة

اديان : يمامة تعرف تضرب ابر حذيفة

ام حذيفة : لااا .. لا .. ودي للمضمد

حذيفة : امي منفعله ..

شصاير يمة .. ليش ..؟

ام حذيفة : ماكو .. ماكو مصاير .. اروح اشوف ابوك .. سوودة علية

حذيفة : اني طالع للشغل عفت العامل وحده بالاسواق .. ديروا بالكم ع ابوية اديان ..

اديان : ان شاء الله ..

فرحتي مكملت بعد القبولات و اول ايامي بالجامعة .. طلعلي علوم حاسبات .. حيل قلقني حال ابوية ابد مشايفته يصيح هيج من الالم .. فدوة ربي ارحم بينا ..

يمامة : مازن .. ماازن

غدير : سمعت يمامة تصيح عليه من فوك ..

راااح .. راااح ..

يمامة : نزلت ..

وين راح عبالي ادزه ع كم شغلة

غدير : مادري امي اخذته و راحت تزور قبر جدي ..

يمامة : اها يلله ع باجر عود ..

مازن : يمة مو كلتي بس للمگبرة وين فريتيني السوگ ..

ام غدير : نكمل و نروح نزور لتضل تلغي من راسي مسطور  ..

مازن : ورطة اطلع وياهن .. شيلتني علاليك الامة كلها ..

ترا رح يصير المغرب ماطب المگبرة لو تكتليني

ام غدير : رجال انت فهمني رجااال

مازن : يمعودة هسة الرجولة شعليها بهالسوالف ماطب مگابر المغرب ..

ام غدير : امشي و اسكت ..

مازن : طبينا للمقبرة قبل المغرب .. بقت ترش مي و كعدت ..اني قريت الفاتحه ع روح جدي ..

يلا يمة ..

احجي وياها مترد .. انتبهت عليها تدفن و تحجي بصوت ناصي ..

لا اله الا الله ..

ام غدير : اششششش ... سد حلكك

مازن : يمةة جايبتني علمود شغلج شدتسوين رحمة لله

ام غدير : امشي كلما مرتاحه بدونك و بدون لغوتك ..

يمامة : نظفت البيت .. وصلت غرفة خالتي الـ تشتغل بيها كالعاده قافلتها ..

كملت و رحت للمطبخ .. طلعت كيكة و ببسي و كعدت اكل و اتابع  ..

ورا اشوي طبت خالتي و مازن .. كمت اغلس الماعون الگلاص ..

وين جنتوا لحد هسة ..؟

مازن : بالمگبرة ..

يمامة : عفت الكلاص و التفتت عليهم ..

بالمجنة المغرب ..؟؟؟

مازن مرد صعد يركض ساكت و حسيت بي ضايج .. باوعت ع خالتي ..

ام غدير : اكفيني شر لسانج ..

يمامة : خالة عوفيهم .. ليش تدخلينه بشغلج

ام غدير : خلخالة .. ابني مو ابنج زين

يمامة : استغفر الله ..

عفتها و صعدت ع مازن .. دكيت الباب و طبيت ..

مازن ..

مازن : يمامة رحمة لابوج عوفيني هسة

يمامة : بعد لتروح وياها .. طريق لتمشي بي

مازن : ما ماااشي بي .. اخذتنييي للسووگ و مناك ولينا للمگبرة .. اني شبيدي ع امي .. اااالله غاضب علية وين ما اودي وجهي ينسد شغل .. تعيين .. ينسد ينسد ماكل خرا

شسووي لامي اااانتي احجيي .. قااابل اكتلهاا حتى تعوووف

يمامة : لا اله الا الله .. بسم الله .. و ان جاهداك على ان تشرك بي ما ليس لك به علم فلا تطعهما و صاحبها في الدنيا معروفا و اتبع سبيل من اناب ..

يكفي انت مراضي و مبتعد عن هالسوالف .. هسة ارتاح لتنفعل ماشي عيوني ..

مازن : حسبي الله ..

يمامة : الدمعة بعينه و يحجي بقهر .. مهما يكون بعده صغير .. شنو بيده ع امه ..!

نزلت ساعدت غدير بالعشا .. اتعشينا بس اني و غدير .. مازن منزل ..

غدير : ادري كولوا مناكل حتى اطگ بس بيضتين و ناكل .. لو الا اتعب .. بلا امس متعودين عليها مازن شبي وجه الجليكان

يمامة : هسة اصعدله صنية ..

اخذت صنية الاكل و صعدت طبيت لگيته نايم .. رجعتهن للمطبخ .. لميت المواعين غسلتهن و صعدت لغرفتي ..

عقلي تعب من التفكير .. هذا الـ جنت خايفة منه تسحب جهالها بهذا الطريق

اشلون اسحبهم اني .. اذا هسه هو معارض هالشي اكيد تسوي شي و تقنعه او تربط لسانه .. كمت ادعيلهم بالصلاة ..

اكعد اصلي الفجر و انام ارجع اكعد بـ 8

سويت ريوك .. نزلت غدير

غدير : صباح الخير

يمامة : صباح النور ..

غدير : مازن ماكو بغرفته ..

يمامة : ليش .. شفتي ؟

غدير : اي رحت اخذ الشاحن مالتي .. عبالي يمج جوا .. اكيد راح يدور شغل .. هو من يدور شغل يطلع من الصبح

يمامة :  يمكن  ..

غدير : اكولج يمامة

يمامة : بلي ..

غدير : اشو اديان و حسوني مكاموا يجون و لا مرة خالي ..؟

يمامة : والله مادري اخاف عدهم ضرف

غدير : اليوم العصر اروح اشوف لازم نتطمن عليهم

يمامة : عفية عليج ..

حذيفة : مافهمت فسررري يمةةة فسررري

ام حذيفة : يمة هذا كلامها و وراها ابوك وكع .. شدار ابالك انت اني عقلي تعب

اديان : ابوية يوم عن يوم تزيد حالته سوء .. فجاءة يصرخ من الالم و نتراكض .. و كام ميتحملنا .. كثرت المشاكل مرة يتعارك وية امي مرة وية حذيفة ع ابسط شي ..

بقيت صافنه ع الكلام ..  امي تحجي و تبجي .. معقولة صدوك عمتي اذته زين ليش مو تصالحوا

ابوية كام يكفر من يتعصب يمة .. مو بيوم ليله ينگلب و هيج يصير .. ابوية ابتعد عن عبادته .. يعني شنفسر هذا ..؟

حذيفة : اكيد الـ دااار اباااالج .. سحرر هذااا .. لييييش محجيتي فهميني .. اشلووون يشرررب الللبن يمةةة شبيج مجااان منعتي

ام حذيفة : شامنع اني شمعرفني يمة شمعرفني بهاي السواالف .. حير بابوك يم سيد يم احد راااح يضييع من ايدي

حذيفة : انهاريت من الكلام .. واضحة مثل الشمس .. احوال ابوية تخربطت من يوم الـ طبينا بيتها .. طلعت من يم امي تلطم ع وجهها و تحجي وياي ..

بلا ادراك و وعي طبيت لبيت عمتي .. من الباب البينا و بينهم ..

يمامة : للظهر و مازن مرجع .. بقيت قلقه اخاف خالتي دزته بشغل .. بس هو البارحه بين عليه مطايق هالشي .. حسبي الله و نعم الوكيل ..

اتغدينا غدير صعدت نامت .. اني كمت اغسل المواعين ..

ام غدير : مازن وين ..؟

يمامة : طلع الصبح .. انتي متدرين ...؟

ام غدير : لا .. عاد اتريك لو لا

يمامة : مادري طلع قبل لا اكعد ..

فرحت لان كل شكوكي انتهت .. مادام متعرف لعد مدزته بشغل ..

داحجي وياها خطف حذيفة بالحوش يركض و كبل للمطبخ

حذيفة : شسووووويتي باخوووووج

ام غدير :  شسويت .. شبي علي ؟

يمامة : اني يبست بمكاني .. استمريت اغسلهن و لا كأنو موجودة ..

حذيفة : اااالج عييين تجذبييين .. نووومته بالمستشفى من سحرررج .. ابوووية اااااتخبل

ام غدير : والله اااااانت الـ متخبل .. اسوي سحر لاااااخوية .. هذااا حجي ابتهااال مووو

حذيفة : لااا تجيبين طااااري امي ع لسااانج ... ووووين ااااابنج النثيةةة ووووينه ..؟

يمامة : صارت بية شقيقة من صياحه .. صوته يدوي بالبيت .. حسيته سبني منرسب مازن .. هذا اخوية .. التفتت عليه ..

لا عاد كلمن عثر گال مسويلي عمل ..

حذيفة : فاقد اعصابي بدون ماحس بس سمعت كلامها .. قبضت ﭼـفي و شلت ايدي عليها ..

ااااسكتييين لوووو ااااانسيييج ددددينج

يمامة : هجم علية صار عكس ايده يم وجهي .. و يصيح .. ماتحركت بس حسيت لون وجهي تغير ..

رجفت رجفه بس ع الصلاة ارجفها .. بس هذا خوف مو خشوع .. اول مرة بشر يعاملني هيج و يصيح بوجهي .. اكيد هذا انسان مو سوي و لا عاقل

ام غدير : مشكلته وياي معليك لا بابني و لا ابنت الناس

حذيفة : طبعاااا تدافعييين مصيرهااا مثلج تهجم بيوووت الناااس بالسحرررر ..

يمامة : احس صخنت ع كلامه ..

اطهر منك ..

التفت علية وجهه ميتفسر من الاعصاب .. صاير بشع عبالك مسكون

يمامة : نزعت المريول و خليته ع السنك
طلعت من المطبخ ..

حذيفة : قسما بالله العظيم اذا صار شي ع ابوية اكون دافنج و دافن كل روح تتنفس ابيتج ..

عفتها و طلعت ..

يمامة : حبست روحي بغرفتي .. شصار لو عايشة بحضن ابوية .. بيئة تساعد و لا بيئة تهجم البيوت .. اختبار هذا لو قدر ؟

ندكت الباب ..

مازن : ماكو اليوم  .. شبيج ؟

يمامة : مابية .. وين جنت ..؟

مازن : رحت كعدت يمها ..

ادور شغل ..

يمامة : و اني ضل بالي عبالي خالتي شغلتك

مازن : هو هم هيج تاليها اذا ما لگيت شغل اشتغل جن جوا ايد امي .. احسن من الكعده

يمامة : ههه اعوذ بالله

مازن : احسج مخنوگة ..

يمامة : هو بس تعب من الدنيا ..

مازن : الحمدلله ع كل حال

يمامة : الحمدلله

مازن : هاج .. كل عام و انتي بخير يا اجمل اخت الدنيا

يمامة : انطاني بوكس مربع مغلف ..

شنو هذا ..؟

مازن : ادري باجر ميلادج بس داسبق غدورة كل مرة اكعد متاخر بميلادج و تضل تفتخر بانجازها .. باجر اصمط جد جدها بالعيارة

يمامة : هههه الله يحفظك الي و الها و يخليك سند

مازن : سند الموصل ..!!

يمامة : هههه هاي شجبتلي

مازن : لااا اوكفي لتفتحيها اروح يلله استحي ..

يمامة : منو يستحي ..؟؟؟

مازن : اني غير ..

يمامة : الحمدلله و الشكر ..

طلع يركض .. فتحتها .. مجسم للكعبه بدائرة زجاجية بس ارجها يتساقط ثلج .. حبيتها كولش .. ابتسمت من كل گلبي ..

الفراق ديزيد يابة .. بكل ميلاد يقرب اللقاء و يزيد الفراق ..

نمت ع الـ بسمة الـ دخلها بگلبي مازن .. گعدت الفجر صليت و داقرا قران سمعت صياح غدير  ..

غدير : طلعت داتوضى لمحت ضوا بالصالة جوا .. مديت راسي عبالك نار و ريحة الـ لايلون واصله ليفوك ..

عزاااا .. يمةةةة احترگناااا

يمامة : طلعت ركض ع صياحها .. ريحة الحرگ تخنگ .. نزلنا ع السريع دانشوف شصاير ..

مفتاح الكهرباء بالصاله يحترگ و النار واصله للسگف .. ماكو شي مشتغل عليه ..! فارغ .. ليش احترگ ..؟؟؟

غدير : ركضت ع المطبخ ترست الدولكة مي .. شلتها و طلعت

يبوووو كهربااااا هااااي ..

يمامة : النار تجسمت .. راس و صدر و ايدين .. هيئة بشر يشتعل .. جمدت بمكاني و عيوني شاخصه عليه ..

الجن : انفك العمل .. انفككك .. خسرنا المعركة مولاتي ..