رواية ملحمة .. إرث سليمان الفصل الثالث عشر 13 - بقلم Hend_AlBoor

هـل تـعـلـمـون مـن هـم المـنـافـقـيـن ..؟
نخـطـوا كـ خـطـوات المـلائكـة فـي النيـة
فـ يـسيرون مـسـيـرة الـشـيـاطـيـن ..

يمامة : المخلوق بالسما كل اشوي يهجم ع المكان و يبتعد .. تذكرت هفاف ..

شيطان حارس .. فريسته .. دفعت الباب و طبيت ..

ركضت ع الرجال الممسوس .. الجروح مو بي .. بجسم الجن .. ديتعذب و يستنجد ..

بدون ارادتي ضربت صدر الممسوس حيل بجف ايدي و لزمت الجن سحبتها بكل قوتي .. حسيت اشلون داصلخ لحم من عظم .. اثنينهم صرخوا ..

رجعت ليورا حيل فقدت توازني .. وازنت جسمي .. السيد و الـ وياه التهوا بالرجال ..

عمر : ( جن هوائي .. مسلم .. ابيض البشرة .. عيون زرقاء مخططه البؤبؤ .. اسود الشعر .. ملتحي بنسبة معتدلة .. طويل القامة .. )

اتأسرت من قبل مملكة النار .. باحد معارك الجن .. رسلوني كعبد في عالم البشر .. خادم لاحد السحرة .. بتعويذه حبسني في احد الاجساد البشرية ..

عجز الانسان انو يطردني من الجسد بسبب قوة التعويذه .. و عجزت اني الگي منفذ للخروج .. فـ التجئ لحرقي داخل جسد المريض ..

رغم اني مسلم .. بس اذا دخلت جسد بشري تحرگ جسمي الايات .. علاقة محرمة ع الجن المساس بالبشر .. لان هم اسياد الارض ..

حرريني ..

السيد : ارتل الايات لقتل الجن داخل جسم المريض .. صارت بنصنا بنية ضربته و رجعت ليورا .. سكتت عن الترتيل .. و درت عليها ..

المعالج : نزل كل جسم الممسوس بالگاع

سييييد ...!!!!

السيد : التفتت ع المريض .. خرج منه بس جسده ضعيف قابل لدخول اي جن بي

التحصين ...

يمامة : من سحبته مانتبهت بعد للمعالجين و لا للممسوس .. فزيت من حجى .. جسمه هلكان و مليان جروح حرق .. اني ماعرف شي .. باوعت ع قرناء المعالجين .. ماكدر حتى اتواصل وياه لان انكشف ..

قرين السيد : تشوفه ..؟؟

القرين : اظهر نفسه الها ..

قرين المعلج الثاني : اعتقد راح تموت من الصدمة .. المارد غضب بسبب خروجه ..

القرين : هو اي دين يتبع ..؟

قرين السيد : دين اخر نبي ..

عمر : اسمع صوت المارد الحارس .. غضبه و محاولة وصوله للقضاء علية .. جسمي فاقد القوة و الجروح تحرگني ..

لازم انتقل لعالمي .. ماكدر انتقل لان مستعبد .. و حتى اذا سلمت من المارد .. فـ بسبب الجروح اموت .. رفعت راسي عليها ..

عمر بن نون .. انطقي اسمج و اسم حواء الـ ولدتج .. باسم الله حرريني ..

يمامة : بالموت وگف ع حيله من جروحه .. لزمني من ايدي .. ايات التحصين الـ ديرتلوها المعالجين .. تبعد الشيطان الحارس .. رغم عناده بالوصول .. بالي اتشتت بين القرناء و بينه و بين الشيطان ..

( بهدوء ) يمامة بنت فاطمة بسم الله احرر عمر بن نون من عبودية شياطين الانس و الجن ..

جان گبالي و اختفى .. طلعت ركض قبل لينتبهون ..

القرين : طفرت بجتفها الايسر .. حتى ليشوفني الشيطان و يتعرف عليها

غطي وجهج .. الشيطان يتتبعج ..

يمامة : لفيت وجهي و خطواتي صارت سريعه .. ماعرف رجلي شلون دتمشي بس من الخوف كل جسمي يرجف ..

القرين : دايحاول يعرف وجهج .. عرف بالصار ..

يمامة : سنوني كامت تتضارب من الخوف مگمت اسيطر ع حلگي .. و كلامه يرعبني اكثر ..

ادررري .. ادرررري ..

وصلت الصحن .. صار وراية .. صرخ بصوت بشع .. احس گلبي وگف .. اتمنيته كابوس و راح اكعد منه .. بعد مابية امشي خطوة .. رجلية انشلت .. وگفت ..

التفتت عليه .. صار غواش بعيني من شفته كبل كعدت بالگاع ..

اني بحلم .. مستحيل ...

حيوان اسوود فحم ضخم بعلو سيارة كية .. اثنين من انيابه نازلات للگاع .. يشبه الضبع بس ابشع و شكله يخوف يسلب الروح من جسدها ..

اريد اعيط اجة طاير علية .. النااس متشووف .. متشووفه .. اريد احرك ايديه و ازحف بعيد اشرد منه ماكدر جسمي مكام ياخذ امر من عقلي .. وصل يمي ..

آيتان : وصل شيطان لمنطقة محرمة .. انتقلت انتقاله مباشرة للهدف .. ديهجم ع بنية صرت مباشرة بوجهه .. لزمته من رگبته لويتها .. رفعته عن الگاع و طرت بي امتار و حيل نزلت بي بالگاع ضربته ..

يمامة : اباوع ع الحرب بيناتهم .. من هجم عليه الشايب و ضربه بالگاع .. الضبع اتحول لمخلوق بتلث عيون و اربع ايدينات و جناحين اضخم من الجن الابيض بهواي ..

هجمت عليه ذيابه عملاقة بشكل .. رمادية اللون .. و بحركاتهم الخاطفه و السريعه لدرجه اشوفهم اطياف من السرعه .. كل واحد گام يجر بجزء من جسمه گطعوا .. و صراخه من الالم يزرف الاذن .. سيدهم ضاغط ع صدره بحيث بس جزء الصدر بقى جواه .. الدم اسود من كل اجزاءه ينفر بقوة

حذيفة : يماااامة .. شبييييج ...؟؟

يمامة : رفعت راسي عليه بس ماشوفه غواش عيني عتم عني الرؤية .. احس مي كام ينزل من راسي .. محسيت بشي وراها ..

حذيفة : كعدت قبل اذان الفجر بساعه .. انتبهت ع يمامة ماكو .. رحت سئلت عنها بجهة النسوان يم المقام لان ماكدر ادخل ادورها .. صاحن اسمها ماكو ..

كمت ادور بالصحن .. يمكن دتستكشف المكان و ضاعت .. شفتها من بعيد گاعده بالگاع .. ركضت عليها بعدني ممكمل حجي فقدت الوعي .. وجهها مابي دم .. اصفر شاحب حيل ..

شلتها و ركضت .. وصلت للمكان

قرين حذيفة : شصار ..؟؟؟ ميهجم مارد واحد ع منطقة مقدسة .. شلون لزموا ...؟؟

القرين : مادري مفتهمت .. مالحگت ع البداية من جينا جانوا يگطعون بي ..

قرين حذيفة : فاتني خررب ..

ام حذيفة : يمةة شبيهااا .. وووين جنتوو .. حذيفةةة شصاااير ...؟

حذيفة : نزلتها بالفراش ..

مادري .. لگيته واكعه ع مسافه منا

جريت البطل و كمت اغسل بوجهها .. رجع وعيها بس ترجف

ام حذيفة : لونها شاحب .. يمةة اديان حلاة ..

اديان : اي .. اي ..

يمامة : عيوني مغوشه و اصوات الونين و صراخه من يگطعوا و اصواتهم بالهجوم تدك براسي .. بعدني اسمعها و الرعب ماليني ..

حذيفة : لازمه جف ايدي بقوة .. احس برجفتها بية .. ستندت بيدي و كعدت

يمامة : راسي من الالم يريد ينفجر .. كعدت .. اباوع حولي .. ماكو شي .. المكان هادئ من اي انفعال ..

المشهد .. آيتان يمشي و ورا الذئاب بلحظه يتحولون و يتخذون اشكالهم العادية ..

آيتان : اجمعوا اشلائه .. و بلغوا داوود سيد خدم الكعبة بالامر ..

هابيل ( جن هوائي .. مسلم .. بشرة شفافة بيضة .. عيون زرقاء .. شعر اسود طويل .. طويل القامة ) :

عُلم سيدي ..

شابو ( جن مائي مهجن .. بشرة بيضة .. شعر رأس رمادي طويل .. عيون خضراء فاتحه اللون .. طويل القامة .. )

: انتقل هابيل مباشرة ..

سيدي .. تم تحرير عمر ابن سيد مملكة الرياح نون بن رابيل .. من عبودية الشر

آيتان : التفتت عليه .. و وگفت

مليك و عمر .. و من التالي ..؟؟؟!!!

اذا استمر استعباد اولاد الاسياد .. و استخدامهم للشر بعالم البشر اذن تم القضاء ع الدين بعالمنا

شابو : وگف جحى بحزم و حده .. و استمر بالمشي ..

سيدي ..!!!

آيتان : اعرف .. البنية تتبعها و وافيني بالاخبار ..

شابو : عُلم ..

مشهد .. اختفائهم كلهم من داخل الصحن بثانية .. بـ الانتقال

يمامة : اذن الفجر .. بقى عقلي ميستوعب كل هذا .. رغم الالم براسي .. كدرت ارجع شي من حيلي .. و داخلي متملخ ..

اريد كل هذا ينتهي .. تعبت .. حيل تعبت

صليت و عيوني موگفن من البجي .. ماعرف شنو اليوجعني .. كولشي .. روحي ..!

سحلت روحي يم المقام .. كعدت ابجي .. كلها تبجي بس هم ناس عن ناس يختلف ..

ابجي ع روحي .. و حالتي .. ابجي ع مكان الم ماندله وين بية ..

غفيت ع الشباك ..

لگيت روحي اطير فوگ ارض خضرة ناصح لونها .. ماكو اشجار بس مثل الجواو محفورة ع طول الارض .. و ع اطرافها شجيرات صغيرة تحمل ثمار احمر لونها يشبه الكرز ..

شفت شخص كاعد كل لبسه ابيض .. ما لمحت شلابس بس انتبهت للعباية ع ظهره و عمامتة ..

نزلت كعدت گباله .. يقطف و ياكل .. انطاني وحده ..

شنو هذا ..؟

الطيف : يبتسم ..

يمامة : اخذت من ايده و كمت اكل ..

اديان : يمامة .. يماامة ..

يمامة : صحيت .. رفعت راسي ..

اديان : شنو غفيتي ..!؟

يمامة : اي ..

اديان : يلله حذيفة يكول اتأخرنا لازم نروح ..

يمامة : باوعت بداخل القفص .. وجه الـ شفته نسيته .. بس ابتسامته شرحت صدري .. و ماعرف منو ..؟ ماكدر اجزم و اكول الامام الحسين ع .. يمكن هو او يمكن لا .. بس بكل الاحوال احساسي يگول انسان صالح ..

تمام ..

طلعنا من كربلاء .. الطريق كله افكر .. بس بشنو افكر ..؟ اريد شي ثابت يشغلني .. هدف .. شي معرف .. مو نكره ..

حذيفة : حالها مو ع بعضه من الفجر .. معقولة عمتي شربتها شي و قلب عليها من زارت ..!! والله عمتي ينرادلج حرگ .. شنو ما سلم منج احد ..؟!

اديان : انتبهت ع اهتمام حذيفه بيمامة .. واضح كولش .. عيونه و تصرفاته يفضحنا ..

يمامة ..

يمامة : همم ..

اديان : انطيني رقمج عادي ..؟

يمامة : اي گلبي ..

اخذت فونها و سجلت رقمي بي ..

فتحت الجامة .. ضاقت بية الدنيا ربي .. ضاقت .. شفت طير حجمه مو طبيعي .. يطير ع بعد مسافه فوگانه .. گلبي گام يرجف مو يدگ .. قريني راسا انتبه له من خلالي ..

بسلا شيطان .. اني طبني مرض بس هذولا شنو ذنبهم مناقصين اذية .. فدواتك ربي ..

وصلنا للبيت و روحي مقبوضة .. من القلق راح اموت .. اذا بقيت ع هالحالة شهر انشل ..

غدير : لج هلاا زيارة مقبولة عمري ..

يمامة : نزلت غدير من فوك بوستني

هلا عمري .. منا و منكم صالح الاعمال .. تسلمين

غدير : خاينه ويامن عفتيني گرع راسي

يمامة : هه مازن .. وينه ..؟

غدير : اكو غيره .. نايم و خلصانه منه .. تريدين غدا اخاف ممتغدية

يمامة : لا الحمدلله .. بس اريد اصعد ارتاح من الطريق ..

غدير : ع راحتج عمري ..

يمامة : داصعد .. فجاءة خطفوا طايرين كلهم توجهوا برا .. وجوههم مگلوبه بشاعه .. شبيهم ..؟

الشيطااان ..!!!!!!؟

ركضت فوك للغرفة سديت الباب .. رحت لزگت بالشباك الامامي ..

مليك : اجلت مهمتي بسبب خلاف ع سعر وية البشر الـ صابهم شر الشعوذه .. المال مقابل تعذيبهم .. عادي تستمر الاذية .. المهم المال ..!؟

هه هكذا هم البشر ...!؟

نفروا الشياطين من المكان .. بقيت كاعد

اعتقد شيطان دخيل .. !؟

يوليس : وصلت الاشارة من المارد الحارس .. بدخول جن غريب .. من الغضب و الخطر تحركنا مباشرة برا ..

يمامة : اباوع عليهم تغيرت اشكالهم .. تمثلوا بـ اضباع سودة ضخمه يشبهون الـ هاجمني .. ايدي من الرجفه كامت تدك بالجامة .. ختلت ورا البرده و اباوع بنص عين و اسبح .. گلبي يدك بحنجرتي ..

يوليس : اتخذنا اشكال الهجوم ..

شابووو مااااذا تفعل في هذا النطاق .. هل تريد الموت ...؟؟؟

شابو : تمثلت بشكل الصقر عملاق .. حاولت احلق بالسما عالي حتى يبين حجمي طبيعي ..

تتبعت البشرية لحد سكنها .. انصدمت تعيش بمكان هالة الشر تنبعث من البيت .. هذا يعني السكن لـ مشعوذة ..

رجعت لهيئتي و نزلت .. اول ما شنّوا الهجوم اتخذت هيئة الهجوم .. ذيب رمادي عملاق .. وگفت وضعية استعداد

بالرغم اعرف فرصة الانتصار عليهم قليلة لانهم ناريين .. بس لا بئس بالمحاولة ..

مليك : صوت يوليس عم المكان .. انتقلت مباشرة ..

شابوو ...!!! ايها الشقي .. قد مر زمن

شابو : مليك ..؟!!!!

من شفته اتخذت هيئتي العادية ..

يمامة : من تحول ذيب ابيض .. شي من الخوف بداخلي اختفى ..

مو شيطان ..!؟ هففف الحمدلله

اباوع ع الشيطان الحارس بالسما يراقبهم .. فجاءة كلهم رجعوا لاشكالهم الطبيعية

هذا اهون .. جن و لا مخلوقات غريبه تگطع بعضها .. انتبهت ع ابو عباية ..

القرين : اسمه مليك ..

يمامة : باوعت عليه و رجعت اباوع عليهم ..

مليك : توجهت عليه .. وگفت و التفتت ع يوليس قائد الاتباع

الحرب هنا ممنوعة لاجل تصفيات شخصية .. فنحن هنا اتباع .. ايها القائد

يوليس : و ضيوفك كذلك ..؟ خصوصا اذا من هالنماذج ..

مليك : اتجاهلته .. رحت ع شابو ..

مالذي جاء بك هنا .. الست مكلف بخدمة مقدسة ...؟

شابو : بلى

انسحبت من المكان بسبب المراقبه .. سحبت مليك ..

ما امر حواء تلك ..!

مليك : التفتت ع غرفة يمامة تختلس النظر ..

يمامة ..؟!!

شابو : حررت بن سيد مملكة الرياح ..

مليك : عمر ...؟؟

شابو : انت تعرف باخر هزيمة لمملكة الهواء ضد عزازيل و جيشه ..! استعبدوا اغلب شعبهم ..

مليك : و المارد

شابو : مزقناه .. مليك سأترك تلك الحواء بعهدتك .. امر آيتان بحمايتها .. من الشياطين فقط

مليك : حسنا ..

مشهد .. اختفاء الاثنين من الموقع .. انتقال

مليك : صرت وراها مباشرة .. دارت عليه نخطف لونها .. طگيت رگبتي بحركه خاطفه ..

قابلتي عمر بن نون ..؟

يمامة : اراقبهن من بعيد بلحظة اختفائهم حسيته وراية .. فز جسمي درت عليه .. يعني حتى اذا قابلت عمر نسيته من ورا هالحركه ..

عمر ..؟

مليك : تعرفين شنو تحرير جن مستعبد ..؟!

القرين : احجيلها بلكي تستوعب .. لان اني مليت ..!

مليك : اتحركت من كدامها ..

ليش تخطون خطوات مو بحجمكم .. اكبر من حجم الارض .. دائما متهورين .. ماكو حسابات .. طيش .. لو غرور ..؟؟

يمامة : لا هذا و لا هذا .. الجن جان يحترگ .. و يتعذب .. ما اجه ابالي استعرض شي لو غرور ..

مليك : انه صاحبي ..!

يمامة : بقيت صافنه عليه .. و شنو الـ يهم .. بنظري كلهم جن و دخلاء لعالمنا ..

و المطلوب ..؟

مليك : قريت و سمعت عن غرور بني ادم .. و تهورهم و عنادهم .. بس هسه داشوفه بيها ..

لو آيتان ممتواجد جان عواقب فعلتج اعظم .. تبصرين وجودنا مو معناها تكدرين تواجهين ..

يمامة : مفرحانه لا داشوفكم .. الهدف شنو ...؟ حياتي و نهدمت .. اذا تعررف تعويذه شي ترجعني عمية انطق ..

مليك : للاسف ... لا ..

يمامة : لعد اكرمني من هالفلسفة ..

عقلي تعبان و مابية حيل حرف .. و لا بعد اهتم يعني قابل شيصير يموتوني .. بعد احسن .. اريد اصلي و انام

مليك : حضرت السيدة ..

سحبت حجر البخور من ع مبخرتها ..

ممكن ..!!

انتقلت مباشرة للغرفة ..

ام غدير : اول مدخلت للغرفة ظهروا كلهم كبالي .. اشرت ع مليك

تتم المهمة المغرب .. و ركز خسارة .. يعني موتك

مليك : حسنا ..

ام غدير : صاحب العمل رجال .. و الرجال اذا لزم سحر يفوق المرة باضعاف قوة .. فهمت ..؟

مليك : مفهوم ..

ام غدير : انصراف .. بس يوليس يبقى

يوليس : طلعوا كلهم ..

مولاتي .. راح يواجه عفريت ..

ام غدير : القوة ..؟

يوليس : متعادلين .. نسبة الانتصار قليلة بسبب قوة العمل الـ استخدمه الساحر

ام غدير : رحت بوجهه ..

لو اخسر عفريت لو انتصر بعفريتين .. و اذا حصلت ع هذا العفريت .. اتخيل القوة الـ املكها بعفريتين

يوليس : ستكون قوة عظيمة ..

مليك : انتقلت مباشرة للحديقة .. وگفت اكل بحجر البخور .. بخور البشر اطيب بهواي من بخور مماليكنا ..

روش : رائحتك مقززه يا رجل ..

مليك : صار بجانبي روش ..

نظرة استهزاء ..

روش : يباوع باستصغار .. متعالي عفن

عرفت بمقدرتك ع دخول غرفتها ...؟؟

مليك : و تحتاج قدرة ..؟ لو انتو مطرودين

روش : سحقا لك

مليك : اتجاهلته .. و مشيت

روس : حسنااا .. تفاخر بقدررررتك ايها العفريت العفن الهجين .. سااجد وسيلة للدخوول و اضمن وقوعها في عشقييي ..

تبا صوتي الجميل ..

مليك : وية غروب الشمس انتقلت مباشرة للسكن المسحور .. المارد الحارس يتتبعني .. يقتنص لحظة ضعفي و الخسارة .. يستمتع بالقتل

وگفت وسط البيت .. كأنو مهجور مابي حياة .. السحر المسلط .. نشر الفساد و الخراب بي .. محو السعاده و الود بين الافراد .. تفريق بين الزوج و زوجه .. عداوة بين ادم و ابنه .. قمع حواء ..

الهالة السودة و الطاقه السلبية مهيمنة ع المكان بشكل كامل .. بقيت واگف استشعر المكان

فجاءة ندفعت منرصدري بضربه قوية .. بحيث رجعت ليورا نسحلت رجلية ع الارضيه الملسة .. لحد ما وصلت للحايط .. رجعت ايدي ليورا و لزمته .. وازنت جسمي

وگفت .. ظهر گبالي .. بمنطقة مسحورة مثل هذا البيت تتقيد كل قدراتي الانتقالية و الاختفاء .. بس قدرة الهجوم متاحة .. عكس الند المقابل متاحة له كامل القدرات بالاضافه لقوة العمل

يتموش : جن ناري ... هيئة الهجوم .. مخلوق مخيف اسود اللون .. راس ضبع بانياب طويله و رقبة طويلة عملاقه .. ملتصقة بجسد عملاق لطائر الخفاش .. بجناحين مابين عظامهن جلد ممزق نصفه ..

و اخيرا سيد مملكة الضوء مليك بن اودوم .. عبد لدى البشر ..!!!!! لم اتوقع اللقاء ..!؟

مليك : شيطان من مملكة الشر ..!!!

يتموش : ايها العفريت الهجين ..

مليك : هل تظن انك سيد هنا ..؟

يتموش : متعجرف كـ ابيك .. متمرد .. احمق

مليك : خادم و عبد لبشري ..

يتموش : لا يهم فـ مقدار هيمنتي ع هولاء البشر .. يستحق التصخية .. اتمتع بغرس الحزن و العداوة هنا و هم يستجيبون طوعا و كرها ..

مليك : اذا استمتع باخر لحظات هيمنتك ..

يتموش : ايهاااا العاااااصي ..

مليك : هجم علية .. اتحركت بحركة خاطفة .. ضربته ع رگبته من ورا لزگته الحايط .. رد علية جناحه حيل شمرني ع الحايط المقابل ..

كمت وكفت ..

هجمنا سوا و بحركات خاطفة دام الصراع دقايق .. اتمكن منه و يتمكن مني .. اندفعنا اثنينا واحد مقابيل الثاني .. كل واحد يم حايط

هه .. لا بئس بقوتك ..

يتموش : اذاااا عليك ان تتخذ هيئة الهجووووووم ايهااا العاااااصي

بحركة خاطفة هجمت عليه .. اختفى...

مستحيل ...؟

مليك : كمزت ليفوگ ..

مخطئ .. لا اتخذها لقتال شيطان متباااهي ضعيف ..

قبضت ايدي .. و نزلت عليه بكل قوتي ..

يتموش : اتوقعته طفر للاعلى .. لان مستحيل ينتقل .. الساحة ساحتي .. نزل علية من فوگ علية .. اتفاديت الهجوم .. لزمته بمخالبي رفعته و لزكته بالحايط ..

ههه .. هه مليك .. هل نسيت إني عفريت كـ انت .. الم تعلم ان الاستهانة في الخصم هزيمة ...!؟

قربت وجهي من وجهه ..

( بهمس ) لا اريد ان اقتلك مباشرة .. اريد استمتع بذلك ببطئ .. فـ قتلك نصرا عظيم .. اجل .. قد اشتهر في عالمنا و اكرم ..

يااا الهي .. لاه لاه لاه .. كان يجب ان تتخذ الهيئة سيد مليك

مليك : مادام بجسدي قوة .. المارد الحارس ينتظر .. اما يتموش يقضي علية او هو ..

مخالبة قفص .. قبل ليهدم صدري بقبضة ايده .. اتخذت ميزة الشفافية للجن .. فلتت من مخالبه وكعت جواه بالگاع

بحركة خاطفة سحبت صولجاني المخفي بظهري ( يشبه البوري ابيض اللون .. يحمل راس ذئب .. خاص باسياد مماليك الجن ) .. غرسته بصدره طلع من ظهره .. دفعت رجلية بالگاع و كمزت بي و الصولجان مغروس بجسمه ..

طرت بي امتار فوك الارض و نزلت بكل قوتي ضربته بالگاع .. صرت فوگ صدره

لزمت راسه .. و نزلت ع وجهه

ها انا ذا .. بن اودوم اقضي ع حشرة النار ..

گطعت راسه من جسمه .. و طفرت عنه .. نزلت المارد الحارس گطع اشلائه بالصولجان الخاص بي ..

اختفت الهالة السوده .. التفتت ع طفل بشري يركض و يضحك .. بانتهاء السحر .. انتقلت مباشرة

يمامة : نمت كعدت المغرب مقبوض صدري .. صليت و نزلت ..

ليش مكعدتيني غدورة ..؟؟

غدير : ها عمري مو كلت تعبانه ..

يمامة : لا ميصير خطية انتي من البارحه كل شغل عليج ..

غدير : ميهم اهم شي زرتي .. اشلونه الامام الحسين ع بلله مو جنة ..

يمامة : بذاتها ..

صفنت ع الـ شفته هناك .. ابن بنت رسول العالمين .. امام العالمين ..

روش : شنووو هاي رجعت .. شوووكت .. اااني وين جنت

يمامة : طلعت البيض من الثلاجة .. استغفر الله .. رجعت ع الهم

روش : الا توجد بيضه فاسده لي ..

يمامة : شكد جوعانه لعبت نفسي ..

دنهش : ما رجع مليك .. اعتقد تم القضاء عليه .. يوليس انه يواجه عفريت ..

يوليس : يتموش

روش : ممممممممن ...؟؟؟؟؟

دنهش : تمززززح ..

يوليس : من شوكت اني اتشاقه وياكم ..؟؟

دنهش : ههه اخبر السيدة بمقتل مليك اذا ..!

روش : لقد كان جميل الوجه .. منافس لا بئس به للقتال ع حب يمامة ..

دنهش : انت وين و احنا وين ..

روش : صحيح .. لا يمكنه منافسة جمالي .. لقد تواضعت بذلك سحقا

يمامة : انگلب وجهي من لعبان النفس .. متواضع ..!! حلو ..؟؟؟؟ اذاناته واصله للسگف ديتقشمر لو شنو ..؟؟؟

غدير : انتبهت ع يمامة وجهه مكلوب عبالك ماكله شي مر .. او مالح

ها خوما البيضه مالحه ..؟؟

يمامة : لا .. لاا ..

بهذا الاثناء ظهر مليك بنص المطبخ .. صار گبالي مباشرة ..

مليك : انتقلت للبيت لگيت نفسي بالمطبخ .. ابتسمت بوجهها و ميلت رگبتي ..

التفتت ع يوليس ..

تمت المهمة بنجاح ..

دنهش : داكل بخور ( بخور ذو رائحة كريهة مصنوع من مواد و فضلات بعالم الجن يتغذون عليه ) .. وگع من حلگي ..

ماذا ...؟؟

يوليس : جنت گاعد .. وگفت

متوقع من سيد القوم .. ع الرغم من انك قد قتلت ابن مملكتي ..

روش : طلعت عيوني من وجهي من حجى مليك .. و متوقعت رد يوليس

شنوو دتمدحه ..؟؟؟

يوليس : نحن في نفس المركب روش .. يستحق الثناء ان كان معنا .. و البلاء ان كان ندا لنا ..

دنهش : هل اتخذت هيئتك الهجومية ..

مليك : لا اتخدها لقتال عفريت ضعيف

دنهش : يتموش احد اقوى عفاريت المملكة ..

مليك : حسنا .. عندك فقط ..

انتقلت ورا يوليس لغرفة السيدة ..

ام غدير : وين العفريت ..؟

مليك : مزقته سيدتي ..

ام غدير : ردته هناااا ..

مليك : الاوامر ان انهي العمل .. سيدتي

ام غدير : ااانصرررف ...

اختفاء مليك بالانتقال ..

يمامة : كعدنا نتعشا .. و هم يفترون رايحين راجعين .. حتى راسي انسطر

مازن : لگيت شغل الصبح ..

يمامة : صدوك .. وين ..؟؟

مازن : يم حلاق ..

غدير : انت وين و الحلاقة وين ..؟؟ اكعد يمعود لتگطع رزق الرجال

مازن : بومة اتدرب عنده و بعدين الزم شغل ..

يمامة : بالخير .. والله احسن من الكعده

غدير : هااا

مازن : وجعااا

غدير : و هذا يا مخبل يقبل تتدرب براسه ..

مازن : عادي .. راسج موجود ..

غدير : شنووو شنووو ..

ام غدير : طبيت للمطبخ ديتعشون ..

غدير ..

غدير : ها يمة ..

ام غدير : جهزي نفسج لخطوبة ..

غدير : صدوووك .. منوووو اشوووكت اشووو ماااادري .. ماااا شفت نسوان اجني عدا العدهن مشاكل و يرعصون

مازن : هسة غير تسكت حتى نعرف يا زمال هذا ...؟

ام غدير : حذيفة ابن خالج ..

ـــــــــــــــــــــــــــــــــــــــــــــ

اشـكال الصـولجـان بـس عـملاقـة بالـروايـة مو صغـيـرة مثـل الصـور

صـولجـان ملـيـك .. بـرأس ذئــب ☟

صـولجـان الشـيـاطـيـن ☟

ـــــــــــــــــــــــــــــــــــــــ

تـــنـــويـه

الخـاطـرة الـتـي تكـتـب فـي بـدايـة بـارتـات قـصـصـي .. هـي بـ قلـمـي .. لا احـلل الاقتـبـاس دون ذكـر الاسـم ♥

حـقـوق الـقـلـم ✑