رواية ملحمة .. إرث سليمان الفصل الثاني 2 - بقلم Hend_AlBoor

و فـيـمـا كـانـوا ..؟
ظـلـمـوا و ضـلـوا و اتـبـعـوا الـهـوى ..!

بيت ام غدير هندسيا لا يختلف عن باقي بيوت الحي .. مساحتة 300 متر مربع .. غرفة استقبال و مطبخ و هول ( غرفة جلوس)  بواجهة البيت  .. غرفتين بالخلف و صحيات .. الطابق الثاني ثلاث غرف نوم و صحيات تتوسطهن صاله مطلة ع كل ابواب الغرف ..

بس الداخل اكيد يختلف و اختلاف جبير .. 

يمامة عمر عبد القدوس ..  24 عام .. حنطاوية بعيون بنية .. شعر طويل مائل للون البني .. متوسطة الطول .. متخرجه من كلية التربية .. يتيمة الاب و الام من عائلة دراويش .. يرجع نسبهم للامام الحسن عليه السلام ..

  عاشت لسن العاشرة وية ابوها .. بعد وفاة ابوها بحادث .. انتقلت اتعيش في بيت خالها الذي توفى بعد ذلك بسنة ..

السبب في انتقالها للعيش مع خالها لان ماعدها عمام .. فقط عمات و خالات و خال واحد .. للامان الها انو تعيش وية خالها مو وية خالتها او عمتها .. و لان ازواجهن غرباء عليها .. كانت الافضلية لخالها ..

لخالها المتوفي ولد ( مازن ) يبلغ من العمر 20 عام خريج معهد .. متوسط الطول .. اسمر  بعيون بنية و شعر اسود ..

و فتاة تبلغ من العمر 25 سنة ( غدير ) متخرجة من كلية التربية .. بيضاء بعيون بنية و شعر كستنائي .. قصيرة نوعا ما .. متناسقه الجسم ..

غدير : مازن .. مااازن

مازن : هيييه هييييه .. شكوو تصيحين من فووك نزلي و الغي مثل الاوادم

غدير : نزلت اركض من فوك .. و احجي عليه

مترووح تشتري شاحن شكو ماخذ شاحنتي ترا بهذلتني ..

مازن : ديلا لج هسة شماخذ هي شاحنة

غدير : اي روح اشتري اني فوني بساع يخلص شحن خوما اضل اركض وراك

مازن : بابه داشتري يومين و تعطل هو اني بشنو كعد حظي ..

يمامة : سويت شامية فرغتها بكاسه بلاستك جبيرة  .. اخذتها و طلعت من المطبخ ..

مازن يمكن الخلل بـ الايسي مالت فونك من هذا ديعطلن الشاحانات

مازن : مادري بعد درويشة .. الله جابج ريحة الشامية ترست البيت ..

غدير : اي والله .. يبوووو العشق احبهااا

مازن : مدت ايدها جان اضرابها

اااايدج ..

غدير : الشامية كلها اتطشرت بالكاع

اي لاااااا ياا صخااام ..

مازن : و سم .. شاحنة اخذتيها مني ما الج وجع شامية زين

غدير : شلت بيدي و طشيتها بوجهه ..

معليك انت

يمامة : شبييييكم حرمتوهاا نصهاا .. شنوو جهااال .. اصعدو فووك يلااا كدااامي

غدير : هو الـ بدا متشوفي عبالك صغير

صعدنا فوك كعدنا بالصاله ناكل .. 

لعد امي وين ..؟

مازن : راحت للسوك ..

غدير : ياا يمةةة اني متكسره راح اروح انام اشوي من تجي امي كعدوني ع الغدا

مازن : اكل و نوم هذا الفالحة بي

غدير : تسكوت لو اهجم الدنيا .. من الصبح كاعده اني و هالبنية تنظيف و طبخ .. و انت نايم للظهاري

مازن : و المطلوب ست الحسن

غدير : تسكوت هذا المطلوب .. انت ايدك متشيلها

مازن : هيي قزمة لعد منو يغير گلوبات البيت و ينزللجن البردات ام حلگين

يمامة : هااها بدت حرب البسوس اني اروح لغرفتي .. كملوا القتال

مازن : ولن من وجهي يللا ..

غدير : هففف منك

يمامة : هذولا ولد خالي .. كبرت وياهم لحد متعودت عليهم مثل اخوية و اختي .. لا مو مثل .. بالاصل اخواني .. بسطاء كوولش و 24 ساعه مناگر ..

طبيت للغرفة ارتاح اشوي لما تجي مرة خالي .. غفيت مصحيت الا ع صوت اشعارات الفون ..

ساعة بـ 2 شلون هيج نمت .. ادري معقولة بقى بدون غدا لحد هسة

ام هيثم : عاشت ايدج ام غدورة  بس سويت ارشاداتج بالحرف و ماكوو الا صار محبس بيدي

ام غدير ( 48 سنة .. بيضاء الوجه مع وجود بعض التجايد الخفيفه .. بعيون بنية .. ذات ملامح ماكرة .. قصيرة القامة .. ممتلئة الجسم بشكل معتدل )

افا عليج .. شنو تشكين بشغلي .. كتلج يصير يعني يصير ؟؟

ام هيثم : والله ثم والله يا ام غدير الرجال الـ جان اذا نطق اني انخرس .. اعصاااب نااار .. هسه لااا مثل الطلي روح تعال .. اطلع اطب ما ع عيني حاجب مثل الخاتم .. انعمى و انخرس هههه

ام غدير : ههههه بالعافية

ام هيثم : شوفي شوفي صورتلج شلون خليت رجلي ع راسه .. من فرحتي مامصدكه

ام غدير : هاااي شنووو .. قاادرة قاادرة

ام هيثم : ههههه بفضلج .. رحم الله والديج ع هالشغـ....

يمامة : و حاسة بالفخر ...؟؟؟ انتصااار هذا لو شنو .. ووو تحلفين بالله ع شي قذر!!!

نزلت جان اسمع خالتي و مرة يمها كالعاده بالغرفه الخاصه بالشعوذه .. متحملت طبيت عليهن و الكلام طلع مني و احس بعيوني نار مو اعصاب و انما قهر ..

ام غدير : يماااامة اطلعي ..

يمامة : المرة اذا خضعت زوجها الها بعمل خبيث هاي ابالها شي قذر و تريد تسوي بس غيرته مانعتها .. لان اتريد تنحل

ام هيثم : لاااااا عاااد .. ام غدير شنوو هااي .. مغثة افففف يلا رايحة بعدين ازورج

يمامة : فاتت من يمي تركض مو تمشي من اعصابها ..

ام غدير : كمت عليها من فورت اعصابي

اااالف مرررة كتلج لا تتدخلين باشياااء متخصججج ..

يمامة : لحد يا مرحلة وصلت قوتج بهذا الشر و الشعوذة ...؟

ام غدير : يمامة لتخلين نفسج بالـ الشي الـ معينيج ززين

يمامة : شلوون ميعنيني خاالة هاي موبقااات

ام غدير : موبقات مو موبقات معليج انتي مو تكولين ماؤمن بقوة الشعوذه و السحر  .. خلاااص

يمامة : ماا اؤمن بانو انتي او اي بشر يتحكم بحياة الناس و مصيرلهم ..

ام غدير : خلااص لتتدخلين

يمامة : خاالة و النماذج الـ دتطب البيت و تطلب تأذين هذا و هذاك .. هذني شرر

ام غدير : احد امأذيج .. اااني غصبتج ع شر ..؟؟ شنووو ربيتلي عدو بالبيت

يمامة : اتركي والله مالها داعي

ام غدير : شغلي هذا قبل لتشوف عيونج النور .. كافي اسطوانتج هاي حفظناها .. شتتوقعين اعووف شغل سنين لان حضرت جنابج رادت ..

يمامة : هسةةة شنوو مرتاحة لان خليتي مرة تدوس راس رجلها و تنحل ع راحتها و عدها بنات .. تدرين شراح يصير من سترهن ضعف و انداااس ..

ام غدير : هذا شي ميخصج .. حلي عني دوختيني ..

يمامة : بقيت ساكته .. اعرف لو احجي منا لباجر ميفيد .. لان هالحالة تكررت و تكررت من يوم وعيت ع شغلها لليوم و الحديث نفسه و الرد واحد ..

ام غدير : كبرتي اعقلي .. ربيتج و كبرتج و عايفتج ع راحتج فـ لا تتدخلين باشياء متخصج ..

يمامة : عفتها و طلعت ..

مازن : دانزل ع الدرج و صعدت يمامة تركض ..

وين .. الغدا .. الغدا ..

يمامة : ماا اكل ..

مازن : احد عزمج يمعوودة اني جوعان

هاا .. عافتني وية الحايط احجي ..

يمامة : كعدت بالغرفة مخنوكة .. يوم عن يوم هالشي ديكبر بداخلي .. مرات اكول ميعنيني و مرات احاول اغير ولو شي بسيط .. بس هاي حرب اكبر مني

غدير : لعد وين يمامة منزلت اكلت

مازن : مادري صعدت تركض احجي وياها مترد اعتقد اتعاركت وية امي

ام غدير : ماكو شي اكل و اسكت

غدير : يمة شنو منخلص من هالسالفة ..؟

ام غدير : بنت عمتج الظاهر كبرت و كبرت مشاكلها دتتدخل بشغلي و تكطع رزقي

غدير : شلون سالفة هاي استغفر الله ..

لميت المواعين و صعدت الها .. دكيت الباب و طبيت ..

شنو متاكلين لو زعلانة ..؟

يمامة : لا مالي نفس

غدير : رحت كعدت يمها ..

اعرف .. الـ مضايقج شغل امي ..!

يمامة : مو بس شغلها .. الناس همين هاي الناس ليش تحل مشاكلها بشر .. انتي ممتضايقه ..؟ مو خانگج هالشي غدير ..؟

غدير : هههه عود انتي مصدكة امي سحارة من صدوك .. الله وكيلج الناس مغفلين طكت حجرين و كالت اسياد و هذني النسوان طاير عقلهن

يمعودة دطيري امي لو صدوك سحارة جان جابلتي رجال او تعيين

يمامة : ههه فديتج الله ينطيج ع هاي نيتج الحلوة

غدير :  اني فديتج و لتهتمين .. اصلا اني واصلة المرحلة ماندك بامي لان اعرف النتيجة ..

يمامة : ع گولتج و جان كلامي جاب نتيجة ..

غدير : مو بلله .. و بعدين تعاي انتي من شوكت تؤمنين بسوالف السحر و الجن طول عمرج تكولين هذا كله شعوذه و السحر ميسري الا بامر و اختبار

يمامة : مادري غثني كلام المرة اليوم .. حتى بدون مافهم السالفة طبيت ..

غدير : ههه سولفتلي امي غير من حماسي ردت اكوللها عاشت ايدها بس ضبطت روحي خفت لا انكتل

يمامة : بقت تسولف و تضحك .. سرحت بتفكيري .. غدير مرحة و حيل طيبة كل خوفي لا يوم تتغير بفعل الشر .. حيل يوجعني گلبي من افكر بهالشي

بكل مرة ادخل بنقاش وية خالتي ينتهي بهزيمة مني او بمعنى اخر تنازل .. لان مهما يكون هي بمثابة امي

ام غدير : غديررر .. يماااامة

غدير : جاااية يمةةة

يبو بسلا ع المواعين

يمامة : محسينا بالوقت اخذتنا السوالف طفرت من الجرباية لان علية مواعين الغدا .. نزلت و غدير تركض كدامي ع الدرج ..

ام غدير : شبيجن تركضن ثيران و نازلة هزيتن البيت ..؟؟!

غدير : غير صحتينا

ام غدير : خالج علي جاي بالطريق اتصل بية ..

غدير : خااالي علي ..!!! انتو مو متزاعلين من الف سنة مدري مليار سنة

ام غدير : هذا لسانج مينطق خير

يمامة : اني رحت للمطبخ اكمل شغلي

غدير : يمة يا خير غير اني حتى ماتذكر شكلة

ام غدير : تذكرتي ماتذكرتي .. ميخصج امشي سوي كيكة و جهزي شي

غدير : صار

ام غدير : و ها البسن شي حلو عيب منا اخوية

يمامة : التفتت عليها من بعيد ..

اني ليش ..؟

ام غدير : غير خطار و تطلعن تسلمن

يمامة : خالة هو خالهم اني غريبة شكو كاعده بالنص ماطلع

ام غدير : براحتج

غدير : اتذكررررت

مديت راسي من باب المطبخ ع الصالة

يمةةة هو مو عنده ولد اني اتذكره اكبر مني

ام غدير : اي جاي وياه

غدير : دكووولي هيييج

طلعت ركض صعدت للغرفة

ام غدير : تعاااااالي ووولج الكيييكة  .. من طيييح الله صبغججج

يمامة : واكفة اغسل المواعين ع السنك و ميتة ضحك .. متجي لو تصعدلها سحل تنزلها متنزل ..

ام غدير : خرررب حظييي عووود هم عندي بناااات

عوووفي الـ بيدج و سوووي الكيييكة

يمامة : جتي تركض للمطبخ و تصيح ضربت الباب اني طفرت للسگف و صميت حلگي من الضحك ..

تمام .. عفت

كمت اسوي بمقادير الكيكة .. اجة مازن من برا

مازن : هاي شنو كيكة لازم جاينة خطابة

يمامة : عفت مسدس الكيك و فتحت عيوني من كلامه

انت وين جنت ؟

مازن : طلعت افتريت بالبايسكل ..

كمت اركصلها حواجبي

لازم جاييك خطابة درويش مو مو

يمامة : ضربته ع جتفه ..

لا ..

مازن : هاا لعد ع غدورة البومة  ..! معجزة لو امي سوت جلب

يمامة : مو خطاابة .. شنو انت الناس عندك بس خطابة

مازن : هو الـ عنده بومتين بالبيت شيشوف لعد .. راح اوكف ادلل بيجن يا ولد الزمه عمي فدواتك ما تزوج عندي بومتين بالبيت لا تعين و لا زواج

يمامة : يااا .. احد طالب منك تدلل بينا

مازن : علواه جان اخذت فلوس منه بالمقابل .. بس غير اكسب بيجن اجر

يمامة : منريد .. مأجور ..

فرغت عجينة الكيكة بالقالب و خليتها بالفرن و رجعت ع المواعين ..

غدير : نزلت شفت مازن

ماازن مدريت؟؟

مازن : اجوج خطابه؟

غدير : اول مرة تنطق بالخير الله يسمع منك بس لا .. خالي علي

مازن : مات ..؟

غدير : اعوذ بالله مو قبل اشوي كلت حجاية براسها خير

مازن : شمدريني غير هو حرب وية امي و كلت مات و دتحتفلون بالخبر كيكة و كذا

يمامة : هههه تحليل يجلط

غدير : هو ذكي بس بالبلاوي .. راح يجينا امي كالت

مازن : ادري من قبل اسبوع يالثولة

غدير : شمدريك؟

مازن : امي راحت لبيتهم و صالحته ..

غدير : هاا .. هاي شنو يمامتي سويتي الكيكة

يمامة : همم ..

غدير : عاشت ايدج .. لعد خلي اعاونج

يمامة : لا گلبي انتي روحي غيري هدومج اخاف باي لحظة يجي خالج

غدير : ههه ولج اتشاقه بسالفة ابن خالي  غير نسيت فوني بدون شحن و ركضت .. خفت اكول لامي تعرفيها تكره طاري الفونات .. انتي اجلفي و اني اغسلهن بالمي حتى نخلص بسرعه

يمامة : تمام گلبي ..

خلصت شغل طلعت الكيكة زينتها و خليتها بالثلاجة .. صعدت لغرفتي صليت فرض العصر و كعدت اقرا قران ورا كل فرض اربع اوراق او خمسة ..

كملت ذكر ربي و مددت ع السجاده ..

ام غدير : هلا هلا بابو حذيفة نور البيت بيك تاج راسي

ابو حذيفة ( 47 سنة .. معلم .. اشيب الشعر حنطاوي البشرة .. بعيون سودا .. طويل القامة .. هادئ الطباع .. اب لثلاثة اطفال .. بنت و اثنين من الابناء )

: هلا خيتي منور باهله

ام غدير : تفضلوا تفضلوا اكعدوا ليش واكفين .. البيت بيتكم ..

ابو حذيفة : عامر ان شاء الله .. شلونك مازن كبران ماشاء الله عليك صاير زلمة

مازن : الله يخليك خالي .. الحمدلله بخير

ام غدير : ادري ليش مجبت ام حذيفة و الجهال ..

ابو حذيفة : ع المرة الجاية ان شاء الله

ام غدير : غديرر شلوون خالج يبقى ينتظر المي .. وين الضيافة

ابو حذيفة : خليها ع راحتها ام مازن

ام غدير : شلونك يمة .. هاي رزانه لو خجل هدوئك ..!؟

حذيفة ( 29 سنة .. حنطاوي بعيون بنية .. لحية خفيفة .. اسود الشعر .. طويل القامة متناسق الجسم .. حاد الطباع .. رزن الفعل .. ذو نبرة صوت خشنة .. خريج اداب ) 

بابتسامة خفيفة : الحمدلله بخير عمة ..

ام غدير : دوم الخير .. ابو حذيفة عيني اني حجيت وية صاحب البيت و اتفقت وياه ع كولشي حسب كلامك ..  اخذت مفاتيحه ارتاحو شوي و نروح نشوفه

ابو حذيفة : متقصرين ام مازن ..

غدير : قسمت الكيكة و خليت مي و ببسي و رحت ..

السلام عليكم ..

ابو حذيفة : هلا خالو و عليكم السلام .. كبرانة بنيتي و حليانة

غدير : بوست خالي و كعدت ..

تسلم خالي الله يحفظك

شلونك حذيفة

حذيفة : الحمدلله خيتي بخير انتي اخبارج ..؟

غدير : بخير الحمدلله .. شعجب ماكو خالتي و البقية والله مشتاقيلهم

ابو حذيفة : ان شاء الله بس نستقر هنا كل يوم تشوفيهم ..

غدير : صدوك .. يا هلا بيكم

مازن : تنور المنطقة بيكم خالي .. شعجب راح تترك المنطقة هذيج خوما اكو مشكلة ..؟

ابو حذيفة : والله يا ابني دوامي صار بهاي المدرسة .. كلت ءاجر بيت هنا ع القرب

مازن : بيها الخير ..

ابو حذيفة : عاشت ايدج ع الكيكة بنيتي ع امج ام بيت

غدير : بالعافية خالو .. والله الصراحة مو اني سويتها يمامة ..

ابو حذيفة : بنت شيخ عمر ..! بعدها يمج ام مازن

ام غدير : اي

ابو حذيفة : الج بيها اجر جبير يتيمة و احسنتي تربيتها ..

ام غدير : الحمدلله .. و ياخوية البنية شايلة نفسها براتب ابوها

ابو حذيفة : اعرف بس همين اجرج محسوب الله ميضيعلج تعب ..  و ابوها صديق الطفولة و الدراسة ..

مازن : خالي هو درويش ..

ابو حذيفة : و استاذ و شيخ صاحب طريقة و معالج بالقرآن بشكل رهيب .. شتريد بعد

مازن : والله يا خالي بدون متگول .. بنته 30 ساعة باليوم بخورها وراها يركض .. الحمدلله متصلي بينا جماعي ..

غدير : ( بهمس ) .. ماازن

ابو حذيفة : الله يرحمه

الكل : آمين ..

ابو حذيفة : يللا وليدي نتوكل نشوف البيت

ام غدير : يللا جاية وياكم .. عبايتي غدورة ..

غدير : صار يمة ..

طلعوا وية امي و مازن .. بقيت الملم الكلاصات من الغرفة ..

يمااامة .. يمااامة طلعوا تعالي

يمامة : سمعت صوتها نزلت ..

قابل اني خاتله لان هم هنا غدورة ..!

غدير : هم صدوك .. شمدريني ..؟

يمامة : وين خالتي و مازن ..؟

غدير : طلعوا وياهم ديشوفون بيت ..

يمامة : اها لازم راح ينتقل هنا ..؟

غدير : يس علمود دوامه ..

يمامة : بالخير عليه ..

غدير : صدووك خالي طلع صديق ابوج الله يرحمه متعرفي اسمه علي هم معلم ..؟

يمامة : و يرحم والديج .. لا ماعرفه ..؟

غدير : عزا لو شايفة حذيفة .. حواجبه و وجهه هيج حسيته عصبي من الله

يمامة : منو هذا ..؟

غدير : ابن خالي علي .. و لا عبالك هذاك الولد الـ جنت العب وياه من جنت بعمر خمس سنوات و سته

يمامة : لعد ليش الله وصى بصلة الرحم لان هاي نتيجة الگطع تحسين الـ من دمج غريب

غدير : اي والله

مازن : رحنا افترينا بالبيت حايط بحايط وية بيتنا .. نص ساعه و راحوا .. احنا رجعنا للبيت ..

غدير : ها شصار ..؟ وينهم ..؟

ام غدير : راحوا يادوب يوصل لبيته ..

غدير : وين هذا البيت الـ راح يكعدون بي ..؟

مازن : جيراننا .. و ازيدج باجر راح ينتقلون حضري روحج حتى اخاف تصير حرب اهلية من فوك الحايط مشامر النعل و السب .. و احتمال تشترك المنطقة و انطش

غدير : ههههه

مازن : درويشة انتي ويامن يا فريق ..؟

يمامة : بالمشاكل لا هنا و لا هنا ..

مازن : ادري شنسوي بيج باوقات الصلح ..؟ غير نريدج بالشدة .. بس جبانة ادري بيج

غدير :  يمعود و اخيرا گرايب اعوذ بالله من المشاكل شكد تحرم البشر من ناس و اعزاز ..

ام غدير : شسوي لخواني البقية بالخارج جان شبعتي خطار

غدير : هههه احسن من الحبسة ع الاقل اشوف وجوه

ام غدير : مالي خلگ الكم اروح ارتاح بغرفتي ..

مازن : اي غدورة مثل وجه حذيفة طول الكعده حواجبه متعاگده .. كولشي بي يكول  ان هذا الرجل لا يطيق الحياة .. فـ تجنبوه

غدير : هههه حرام عليك استلمته .. هو حواجبه هيج ثخان من الله ..

مازن : بس حواجبه بس لحيته انتي شفتي ايده مليانة شعر يتمشطن بمشط

غدير : نضغط نضغط .. دباوع ع ايدك مقاصره صير بسن 30 الا ينزل شعر ايدك و رجلك بالگاع يسحل وراك

مازن : هااا .. لجج راح اهفج ابوكسي احولج بمكان الثلاجه .. انضغط من واحد بكد جدي

يمامة : اكل كيك و اباوع عليهم تبدي سالفتهم بخير و تنتهي بعركه كالعاده ..

الحمدلله و الشكر .. ابد متتغيرون عبالك رويسية ..! اروح اصلي فرض المغرب احسنلي ..

غدير : اخذيني وياج يمامتي ..

ام غدير : ( في غرفة مظلمة .. و اضاءة شمعة يتراقص لهيبها )

بعد ضعفي هذاك .. استلمت قوة .. ابو حذيفه ..

و راح تشوفها بيك و باعزازك ..