رواية ملحمة .. إرث سليمان الفصل التاسع عشر 19 - بقلم Hend_AlBoor

لـو لـا اسمـاء الله الـتـسـع و تسـعـيــن
لــ اخـتـلـت مـوازيــن الـعـالـمــيــن

يمامة : فجاءة بنص الغرفة ظهرت مرة طويلة بوجهي صارت .. رجعت ليورا من الخوف فقدت توازني و وكعت .. زحفت ليورا مسافة .. گلبي بحنجرتي صار ..

رفعت راسي عليها .. گلبي يدك الف بالثانية .. اريد اشوفها .. حسيت فقدت نظري .. طلع من وراها طفل .. لازم ثوبها مثل الخايف او خجلان .. هي لازمته من راسه ..

اتقربت علية دنگت و مدت ايدها .. كمت وكفت بدون ما اعتمد عليها لزمت فخذي من الالم ..

مرجانه : جنية نارية .. مسلمة .. سمرة عيونها سود صغار مسحوبه .. وجه طويل نوعا ما .. اذان طويله رفيعه .. شعر اسود طويل ..

اسفة ع دخولي المفاجئ .. ماقصدت ارعبج ..

يمامة : اباوع عليها و ع الطفل .. مرتبكه و تحجي ..

منو انتي ..؟

مرجانة : مرجانه .. التقيت بيج بالسوك ..

يمامة : ( باستغراب ) التقيتي بيةة ...!!!

مرجانه : اي يم محلات الغذائية .. حجيتي وياي ..

يمامة : صفنت ..

ــــــ ذاكـرة ـــــ

العفو بس افوت ..

ــــ حــاضــر ــــ

باوعت عليها .. مانتبهت الها من الهوسة و جنت دايخة .. اشلون ما ميزتها من شفتها ..!؟

غمضت عيوني و خليت ايدي ع جيوبي الانفية فركت العضمة ..

مرجانه : من حجيتي وياي .. انصدمت .. عرفت انتي تشوفيني .. ريحتج الطينية واضحه انتي بشر .. بالاول عبالي ساحرة .. تتبعتج انتي و الادمي و وصلت ..

مكدرت ادخل البيت بسبب الحارس .. اضطريت انتقل هنا اني و ابني

القرين : شفتييي ..جنت متوقع توكعين نفسج بمصيبة .. هذا الـ يخوفني من طلعاتج ..

يمامة : تجاهلته .. اصلا ما سمعتله .. فتحت عيوني و نزلت ايدي ..

مرجانه : اني مجاية قصدي اذية والله .. لا تفهميني غلط ..

يمامة : حلفت بالله ..!؟

مسلمة ..؟؟

مرجانة : اي .. الحمدلله ..

القرين : انتي نارية .. و قومكم من المستحيل يتبع اخر نبي ..؟

مرجانة : تحجي بلهفه و ارتباك و سرعه .. دفاعا عن نفسها ..

لا .. لا .. اي صح اني نارية بس اسلمت ع ايد ادمي .. حبيته و اسلمت و هذا ابني منه ..

يمامة : عگدت حواجبي من الصدمة .. اريد اجمع الكلام الـ حجته ..

ما فهمت .. ابنج من منو ..؟ و شنو جابج لهذا العالم ..؟

مرجانه : اني مملوكه لساحر .. شيطانه .. و هواي نفذت اوامر شر و اذية و هجمت بيوت .. اخر مهمة وكلني بيها ادخل حياة رجل و اهدمه ..

بس حبيته .. و اسلمت من وراه بدون علم المارد و الساحر .. و اتزوجته و اعرف هالشي حرام .. مكدرت امنع نفسي منه احبه .. و لحد هسه احبه

يمامة : شلون .. شلوون تتزوجين بشر و تخلفين منه ..

مرجانة : اني سلمته نفسي بارادتي .. و حرام لان لازم يرفض العالم الخارجي كله مقابل يتزوج من جنية .. اني صرت انانية و اخذته لنفسي ..

القرين : اذا بعدج تحبي ليش جاية ..؟ لازم انطردتي منه بفعل اتباع ساحر

مرجانة : لا مات .. كتله الساحر ..

يمامة : مات ..؟؟؟ انتي موتي ..؟؟

مرجانة : لا .. لا .. بعمل خبيث ربطه بقلب حيوان و عگده .. بشهر مات .. حاولت امنع .. ساعدت امه تودي لمعالجين بشر .. قنعته بدون متدري .. بس العمل جان اقوة مني و منه ..

يمامة : تحجي بالم و تبجي .. ابنها دفن راسه بين رجليها .. مادري حنجرتي وجعتني من العبرة .. كلامها اتأثرت بي

مرجانة : من الاول جنت اعرف النهاية فراق .. و لازم يعيش هو بعالمه و اني بعالمي .. من وراه اتمنيت بشرية .. حتى ابقى وياه طول العمر ..

يمامة : ليش كتله ..؟ اكيد احد حرك الساحر عليه ..؟

مرجانة : جان متزوج و بسبب خيانتها طلگها .. و سبب باذية للرجل الـ خانته وياه .. فـ انتقمت منه طليقته ..

يمامة : صفنت عليها و خشمي وجعني لان حبست دموعي .. يوم عن يوم اعرف انو الـ لازم نخاف منهم و نعتزلهم البشر مو الجن .. فاقوا الشياطين بشرهم ..

لا اله الا الله ..

القرين : لتغشج .. منو يكول كل هذا صدك ..؟؟ تعرفين الجن اذا عصا سيده جزاءه القتل ..

مرجانة : لهذا السبب اجيت .. من تركت بيت زوجي سكنت المقبرة .. يريد يستخدم ابني تابع له مقابل يسامحني لان عصيت اوامره .. بعده ابني مخاضع للعهد وياه مثلي .. فـ اضطريت اودي للمقبرة يعيش .. دعيت الله يفرجها عليه .. لحد ما شفتج

اني جنت ضالة و اذيت هواي .. بس ابني ماله ذنب .. خلي يعذبني و يقضي علية .. اموت و ماخلي يقدم العهد للساحر ..

يمامة : المطلوب مني ..؟

سحبت ابنها من بين رجليها .. و دفعته كدامي برفق ..

مرجانة : حرري .. تكدرين تحرري مدام تشوفي ..

يمامة : بس هو ابن انسان .. اذا انتقل يموت ..

مرجانة : ابن انسان بس جن .. نص جن و نص انسان .. يكدر ينتقل ..

يمامة : و انتي .. اذا عرف الساحر بخسارة ابنج .. اكيد يقتلج ..؟؟

مرجانة : استاهل الموت .. جزاء ع السويته بالماضي .. اني اصلا ما اريد اعيش ورا ما مات الانسان الاحبه ..

يمامة : شنو اسم ابوج ..؟؟

مرجانة : بهرو .. بس ابني يتحرر ع اسم ابو .. حمزة .. نابو بن حمزة

يمامة : رغم تريد تحررة .. بس من لزمتها لايده واضحة غريزة الام .. متريد تفارقه .. خوف عليه من العالم الـ راح يتواجد ..

لولا الغفران .. لـ اختلت موازين العالمين

يمامة بنت فاطمة باسم الله احرر مرجانة بنت بهرو و نابو بن حمزة  من عبودية البشر

اختفوا .. لمحت ابتسامه دهشه و فرح بعيونها بلحظه انتقالهم ..

القرين : تخبلتيييييي .. الحااارس موجوود ..

يمامة : الله غفور رحيم .. اني منو و احكم عليها و افصلها عن ابنها ..

القرين : و اااانتي شعلييييج .. عوفيهااا لواليهااا .. وراهااا سااحر

يمامة : مخلوق من جان شيطان محد حاسبه و عاقبه .. من اهتدت اجي اعاقبها ليش ..؟؟ ارحمني بسكوتك محد راح يرجع عليك

نرجت الكاع وية صوت هبوط بالباب .. اكيد الشيطان الحارس ..

القرين : هاااا .. استلمييي .. لووو صاير قرررين زمااال و لا قررررين بشر

يمامة : كعدت بكل هدوء ع الجرباية ..
يعني شيصير اكثر من الصار ..؟ اخاف من شيطان ..؟

اني گلبي تحول صخر .. حاليا الـ اخافهم البشر .. البشاعه مو بالشكل .. البشاعه بالداخل ..

القرين : فضيني من هالتفكير .. ماعرف بشنو تستخدمون عقولكم انتو البشر

يمامة : باوعت عليه ..

اكدر احرر قرين ..؟

القرين : تحرريني ..!؟

يمامة : لا انت اخنكك مو احررك .. اعرفك مرتبط بروحي .. اقصد القرين المسلط ..؟

القرين : متكدررررين .. شيلي هاااي الافكااار من راااسج و اررررحميني

يمامة : ( بابتسامة ساخرة) لو اني لو هو ..

القرين : راااح اكبررر رررربج من وراج راااح اكبر و اكفررر بمعتقداااتي

يمامة : خلي اكوم اصلي .. لازم استعد لمعركتي زين ..

طلعت ماكو احد .. جنت اتوقع اشوف الشيطان .. طبيت للحمام توضيت و طلعت .. فجاءة هبطت كبالي مثل ابليس .. شهگت من الفزة ..

الشيطان الحارس : قد فتحتي بوابه للعالم الثاني ايتها الحمقاء ..

يمامة : هو منفعل و ماد البوري بوجهي .. و اني مركزه ع وجهه .. لحم مصلوخ .. كله بجهه و العين الوحده بجهه .. اشلون يشوف ..؟

القرين : بوري ...!!!؟ صولجان .. سلاح

يمامة : طككت عيوني .. احمد الله ماقرا افكاري الباقية بصوت .. جان قريت ع روحي الفاتحه ..

نزل الصولجان ع حنجرتي ..

الشيطان الحارس : ان قمتي بالتدخل في عمل اي سيد و حررتي تابع .. ستكون نهايتك ايتها البشرية ..

يمامة : گلبي گام يدك سريع .. رفعت راسي اتفادى الصولجان .. نهايته حاده مثل السيف ..

ظهر مليك سحب الصولجان و بعده عني ..

مليك : قد تجاوزت الحدود ايها الحارس .. واجبك خارج المنزل ..

يمامة : باوعله بنظرة اعصاب .. و اختفى ..

وين جنت ..؟ بقى بالي ع بسمة ..؟!

مليك : اثنينهم بخير ..

يمامة : الحمدلله .. طبيت للغرفه

مليك : حررتي جن .. البوابة الـ انفتحت طاقتها وضحت لكل جني متواجد ضمن النطاق ..

يمامة : رحت طلعت سجادتي دافرشها ..

مافهم بهاي الشغلات .. مخلوق مظلوم و طلب العون ..

مليك : بس هذا خطر ع حياتج .. و حاولي تسيطرين ع الحالة ..

يمامة : اسيطر ..!؟ كولشي ديصير تلقائي و قدر ..

مليك : اتوقفي عن هاي التصرفات لتصيرين لا ابالية .. فكري باي شي قبل لتقدمين عليه .. انتي بشر

القرين : تريد تواجه قرين الادمي علي ..

مليك : باوعت عليها ..

اياج ..

يمامة : اذا شي فوك طاقتي ساعدني .. لتتوقع اعوف الرجال يتملخ و يملخ اهله

مليك : هذاا سحر فوك طاقتج بهواااي .. مو جن و تحرري ..

يمامة : اندليت العمل وين ..

مليك : و تروحين ...؟؟؟؟

يمامة : اكيد .. افككه و ينتهي ..

مليك : هاااااااي مقبررررررة ..

يمامة : من عاط نشف دمي .. باوعت عليه ..

مليك : المارد الجان واكف كبالج هو حارسه .. يقضي عليج بحركه وحده

يمامة : لو بي اذية الي جان ما تردد

مليك : انتي متعرفين نظام الجن .. لتحاربين شي متعرفين بي ..

يمامة : هذا يا نظاام ..؟

القرين : الجن التابع يتحرك بس ع مهامه و الاومر .. و مادام انتي مو ضمن مهماته ميمسج .. بس اذا تدخلتي بشغله و هددتي الشي الـ ديحمي .. يقضي عليج

مليك : هذاا مارد .. مو جن عادي .. اعقلي و سهلي علية امري لحد ما تنحل

يمامة : يا امر ..؟ ترااا مطالبةةة منك تحمينييي .. و شعليةةةة بنظااامكم .. انتووو بعالمنااا و دتملخووون بينااا .. انتووو المعتددددين ..

فقدت كمت اصيح عليه .. لان جنت اتوقعه يساعدني بهاي المهمة .. طلع حاله حالهم .. اختفى .. بقيت واكفه و سجادتي بيدي ..

القرين : دتاذينا كلنا ..

يمامة : اااانت تسكتتت ..

فرشت السجاده ..

لا اله الا الله ..

بقيت بغرفتي .. كل الابواب نسدت .. مبين راح احارب وحدي .. منو يوديني للمقبرة .. مازن ..!؟ ماريد ادخله بخطر .. هو يتخبل من المقابر ..

نزلت جوا اريد اتنفس .. يمكن القرين عاد الاسطوانه الف مره .. عقلي تعب .. سوينا العشا اتعشينا .. حتى اكل نفسي متريد .. بيا مصيبه و مصيبه افكر .. هن كلهن الـ عشتهن وكفن عقلي ..!؟

صعد مازن بقينا بس اني و غدير كاعدات .. هي تتابع بفونها .. فتحت فوني همين اذا اريد ابحث بالگوكل شاكتب ..

مالسبيل للعوده كـ انسانه ..؟

طلعت خالتي من غرفة شغلها لغرفة نومها .. صفنت ..

شنو الـ تحصلي من هذا كله ..؟ فلوس ...؟ انعل ابو الفلوس ..!؟

انتشروا من غرفتها .. اتجاهلت حركتهم و دنگت ع الفون اتصفح ..

روش : آاااه يا الهي .. كان يوما عصيبا ..

دنهش : كيف سارت امورك مع البشرية تلك .. هل اوقعتها في عشقك ..؟

روش : ( بهمس ) اششش .. تبا لك ..

ماذاا .. من ..؟ لا اعرف عن ماذا تتحدث ..!؟

قد اكتفيت بوجها يضفي لحياتي جمالا ..

يمامة : اجه روميو من يميني دنگ راسه و يحجي .. بقيت اتصفح بالفون .. متحركت ..

ما حبني غير الجلب ..!!

القرين : تكولك ما حبني غير الجلب ..

يمامة : عصرت عيوني حيل .. هذااا يتقصد .. دينتقم مني ..

روش : ماذا ..!!؟؟ انك منافق كاذب .. لا تفتري حديثا من عندك .. اياك ان تفسد الامور بين العاشقين ..

دنهش : ركز في عملك ايها الغبي .. الم نرسلك ع فتاة كي تعشقها .. اترك من ليس لك عليهم مهمة ..

روش : ايهاااا الجن المتبااااهي .. ابن الجلب انعل ابوك لابو جدك ..

يمامة : هه صار عراقي مية بالمية .. ركض عليه يتصارع .. و هذاك منتعش لان يستفزه ..

لمحت مليك طلع .. گالب وجهه ..

يوليس : لست ع ما يرام هذه الايام ايها السيد ..

مليك : فتت من يمه .. وكفت .. تمالكت نفسي مارديت .. كملت خطوتي

يوليس : ستسقط تلك المماليك .. و تبقى فقط مملكة ..

مليك : ايهاااا اللعين ..

يمامة : رفعت راسي و التفتت عليهم .. مافهمت كلامه بس واضح ديستفزه .. و نجح .. مليك هجم عليه لزمه من ركبته و رفعه ع الحايط

يوليس : يحجي بصعوبه بسبب ايد مليك

هه .. مـ .. من الجيد لك ان تكون في عالم البشر و لا تشاهد سقوطهن واحدة تلو الاخرى ..

مليك : اعصابي انهارت ..

هلل ترريد الموت الاااان ..

هبوط الشيطان الحارس وسط الصالة ..

الشيطان : ستلحق به قبل ان يلفظ انفاسه ايها الكافر ..

مليك : التفتت عليه .. فتحت ايدي عن ركبه يوليس ..

تعتقد انك تستطيع ايها المارد ..

يوليس : نعلم .. اااجل .. ااجل .. انتم لا تضاهي قوتكم قوة .. لكنك عبدا ايها العفريت الضوئي المهجن ..

يمامة : مهجن ..؟ اذا متضاهي قوتهم قوة شيسوي هنا مستعبد ..؟

القرين : العفاريت فقد من قوم النار ..

يمامة : من الصدمة نسيت نفسي ..

شنووو .. ؟؟؟؟ ناااري ...؟؟

كلهم التفتوا علية ..

غدير : شنو ..؟ منو ناري ..؟

يمامة : راسا درت عليها و عيوني مطككات .. حتى ماعرف شارد .. رفعت الفون بوجهها ..

هنا .. هذا .. قريت سالفة ..

غدير : يمعودة فززتيني عبالي اكو شي ..

يمامة : هه .. هه اسفة .. اندمجت ..

هه الله لا يوفقك صدمتني ليش مكلتلي بهاي المعلووومات من قبل ..

مليك : تركتهم و مشيت وصلت ليمها و انتقلت ..

القرين : ما سئلتي ..؟ خوما بكيفي احجي ..؟

يمامة : كمز جسمي من انتقل .. خطواته باعصاب مشاها

احجييي .. لا بس لغوة بدون فايده ..

القرين : العفاريت اقوة مخلوقات الجن .. و هم بس ناريين .. ماكو عفريت اباقي المماليك الاربعه ..

يمامة : ماتحمل احجي وياه بعقلي .. كمت ع السريع

تصبحين ع خير غدورة .. نعست

غدير : فجاءة كامت و راحت ..

وووين .. ووولج لتعوفيني وحدي اخاااف ..

صعدت وراها رحت لغرفتي ..

يمامة : سديت باب الغرفة ..

مليك جن ناري .. مليييك ناري و هذولااا نارييين .. اكيد اكوو غلط

القرين : مليك جن مهجن .. ابو عفريت ناري و امه جنية ضوئية .. بالتالي طلع عفريت ضوئي .. الجن الضوئي يعتبر اقوة مخلوق بعالمهم .. كيفما اذا عفريت ضوئي .. و عندج الحساب

يمامة : كعدت ع الجرباية ..

لعد ليش اجه لعالمنا ..؟

القرين : مملكتهم خاضعه لمملكة النار .. الـ عرفته من دنهش

من خضعت مملكة الضوء .. الشرط خضوع الملكة .. انتقاما من شعبهم المقرر ارسالها عبده بعالم البشر .. فجان ابنها بديل ..

يمامة : مليييك ..؟! ..

القرين : بالضبط .. هذا الـ طمحت له مملكة النار .. ارسال مليك لعالم البشر ..

يمامة : الليل كله عقلي يفتر من كلامه .. الظلم بكل مكان .. زين ليش يتقاتلون بيناتهم ..؟!

معقولة همين ع النفط ..؟

كعدت الصبح صليت و نزلت تريكت .. بقيت افكر بسالفة مليك .. اذا هو هيج ضحا و شمر روحه بالنار ..؟ ليش يمنعني ..!؟

انتظرته للعصر حتى اواجهه .. و اخلي يساعدني غصبا عليه .. ما اجه ..

القرين : ميساعدج .. اتركي الموضوع احسن .. انتو مو تؤمنون ب اله واحد ..

يمامة : باوعت عليه ..!!

اذا ناوي تكفر و تسفه ديني .. اخلي كل قهري بيك زين

القرين : لا بس خلي هو يعينه .. لعد مو عبده ..؟

يمامة : صفنت ع كلامه ..

صح ..

ابتسم ابتسامه اول مرة اشوفها بوجهه ..

والله من يعين يخلي اسباب للفرج ..

القرين : اي بعد شكو .. انتي شيلي ايدج ربه يتكفل بي ..

يمامة : كمت لبست هدومي و خليت الشال ع راسي ..

القرين : وين ..؟

يمامة : نسيت اكولك .. الله يجعل عباده اسباب للفرج .. يستخدم بعضنا حتى يعين بعضنا ..

طلعت و هو يلطم وراية .. رحت لبيت خالهم .. دكيت الباب ..

حذيفة : طلعت ابوية من المستشفى الصبح .. صار يومين نمت بي حالته اتأزمت .. داطلع اندكت الباب الـ بيننا و بين بيت عمتي الله لا يوفقها .. رحت و اعصابي فايرة

والله اذا هي الزمها اعجب امة لا اله الا الله عليها ..

فتحت الباب حيل صارت بوجهي يمامة .. ناري طفت ..

يمامة : فتح الباب و وجهه مكلوب ميتفسر من الاعصاب .. حسيت راح يجيني بوكسي ..

السلام عليكم ..

حذيفة : و عليكم السلام .. اتفضلي .. اتفضلي امي و اديان جوا ..

يمامة : راسا دنگ راسه و فسحلي المجال .. طبيت رحت وياه للهول

ام حذيفه : هلا هلا .. زارتنا البركة

يمامة : تسلمين خاله .. البركه باهل البيت ..

بوستهن و كعدت .. جان ابوهم نايم بالكاع فارشيله .. و الشيطان واكف فوك راسه .. اقوة من قبل بهواي ..

ام حذيفة : اليوم الصبح طلعنا من المستشفى .. تعبانه صحته ..

يمامة : ليش اسم الله .. مابي غير العافية ..

ام حذيفة : فشل كلوي .. ع اساس نسويله غسل بس مقبل .. يكول اذا غسلتهن مرة بعد يتلفن الا غسل مستمر

يمامة : دار علية بطنه صاعده هواي منفوخه .. انصدمت .. هو ضعيف

ابو حذيفه : منو .. بنت شيخ عمر ..؟

يمامة : اشلونك عمو ..

ابو حذيفه : هلا بالطيبة بنت الطيب .. ايباا ام حذيفة بلا مو تشبه المرحوم هواي ..؟

ام حذيفة : اي هواي تنطيله شبه .. بس هم ماخذه من امها الله يرحمها

يمامة : ابتسمت ع حجيهم .. حتى معرفت شارد .. لان من القهر علية خنكتني العبرة .. ميتوقع اخته هيج سوت بي .. اخته الـ طول حياته جان سند الها .. بلحظه هدمت سندها ..

بقيت اشوي اجرع المر وياهم .. بالوجه مبتسمين بس بالداخل القهر و الالم  كاتلهم

طلعت ديكومن يوصلني ..

لاا خاله اني اروح .. هو هيانه البيت لتعبون حالكم ..

طلعت اجا حذيفه وراية .. و جنت اتمنى يجي ..

حذيفة .. اريد احجي وياك ..

حذيفة : باوعت عليها بدهشه ..

وياي .. كولي ..

يمامة : بس امانه تساعدني ..

حذيفة : اذا شي اكدر عليه تأمرين ..

يمامة : تكدر .. تكدر ان شاء الله .. حذيفة اريد توديني لقبر جدك ..

فجاءة صار عصبي و نگلبت خلقته ..

حذيفة : جددي ...! و ليش ..؟

يمامة : مجان كدامي غير اكوله لان مراح يقتنع باي شي .. اما قرينه فما اعتقد يلحك يحجي لاحد ..

هناك مدفون العمل ع ابوك ..

حذيفة : شنوووو ..؟

يمامة : ع كيفك ..

حذيفة : شمدريج .. و ليش يم جدي ..

يمامة : عرفت .. لان هو الرابط الوحيد بيناتكم ..

قرين حذيفة : صدك تحجي صاحبتك ..؟

القرين : لا تسئلني .. ماا اعرف .. ماا اعرف .. ترا املخ روحي لحد يسئلني عنها .. هاي مخبله زززين

حذيفة : و اشلون اثق بكلامج ..؟

يمامة : قابل اموديني ع كنز ذهب .. عوود ادفني هناك يم جدك اذا سويت شي شر ..

حذيفة : فشلت من كلامها .. مسحت راسي ..

تمام .. اوديج ..

يمامة : من الفرحه فقدت .. بس ماعرف ليش گلبي كام يدك سريع .. شي من الخوف تملكني

هسة ..

حذيفة : هسة ..!؟

يمامة : اي .. عفية .. مادام خالتي مانتبهت ع غيابي .. اذا ماعندك شغل ..؟

حذيفة : لا عادي اتصل ع صاحبي يلزم المحلات ..

يمامة : رحت وياه و اتلفت اخاف خالتي تشوفني .. اعرف مداحسب لهاي خطواتي بس هي دتصير و خلاص .. صعدت بالسيارة ليورا .. كل ثانية و احنا متوجهين للمقبرة مرت علية بسنة .. حسيت راح انجلط ..

مشهد بالمدينة المنورة مقام النبي محمدﷺ ..  مراقد الانوار الثلاثة .. ارض الهداية .. تسجد المخلوقات للقبله .. و تصلي ع رسول الهداية ..

تدعي الله الذي لم يترك عباده في ضلاله و ارسله نوره ع عبده .. فاصبح للعالمين رحمة .. ان يثبت الاقدام ع صراطه المستقيم .. و يكفي عباده شر المخاليق و شر الانفس

مريت ع شابو و توجهنا للمسجد النبوي .. كملت صلاتي و كعدت .. ع يميني شابو ..

مراقد الانوار الثلاثة .. صحبة كهذا قد لا يكررها التاريخ ..

شابو : بين البشر .. فانه مستحيل ..

مليك : اما بيننا فهذا يزيد شوقي لعمر و ابراهام

يظهر اوكين من العدم

سيد مليك ..

مليك : كمت وكفت ..

اوكين .. ما الامر ..؟

اوكين : ارسل في طلبك سيد داوود ..

اختفاء الثلاثة من الموقع ..

مليك : انتقلت مباشرة للحرم المكي .. مشيت و وراية اوكين و شابو .. عرفت الامر الـ بعث بطلبي داوود امر عظيم .. ع الاكثر .. امر عبوري لعالمي ..

دامشي ظهرت كدامي دائرة من المجال .. بطئت خطواتي لحد ما وكفت

امي ...!!!!!   

المشهد .. دائرة من المجال .. تشبه البوابه حوافها تشع اضوية .. الملكة اورنا .. ممددة  بتابوت زجاجي مطرز بحواف من بالالماس ..

شعرها ابيض ثلجي بشرتها بيضاء تلمع كالزجاج .. ثوبها ابيض ملكي مطرز بخيوط ماء الذهب .. حول التابوت ورود بيضاء باحجام كبيرة .. و جنيات ذوات شعر ابيض  و بشرة بيضاء .. عيون سمائية .. البستهم رداء من الرٲس حد القدم ابيض .. مراسيم تشييع ..

اختفاء الدائرة و ظهور داوود من وسطها يسير باتجاه مليك ..

نعزيك بوفاة الملكة سيد مليك ..

جميع الجن الموجودين ارضا و جوا ..  يوكفون وكفة احترام و عزاء ..

مليك : دخلت عالم البشر فداء الها .. قتلوها ..!!!

لقد طلبت منك العبور .. اااااالم ااااطلب ذذذذلك ...!

داوود : سييد مليك

يرجع مليك للخلف منهار نفسيا يطفر من وسط اوكين و شابو .. و ينزل للكاع بهيئة الهجوم ... يركض ... يختفي  من الموقع

يمامة : بالطريق طلبت منه يشتري شتلات ورد حتى نزرعها يم القبر ..

طبينا المقبرة .. امشي و احاول اتجاهل الـ داشوفه .. الجن بكل مكان .. صغار و كبار .. من خوفي لزمت قميص حذيفة ..

حذيفة : المقبرة مو جبيرة .. قبر جدي بالاخير .. دنمشي من بين الكبور .. لزمت قميصي من ورا .. التفتت عليها

شبيج ..؟

يمامة : باوعت عليه .. وكفت .. بلحظه ترددت ..

ها .. مابية .. بس اول مرة ادخل مجنة

حذيفة : وجهها اصفر كركم ..

اذا تريدين نرجع .. لونج راح ..

يمامة : لا .. لا .. بس لازم اطلع قبل المغرب

مشيت وراه .. اذا بقيت للمغرب ماطلع عايشه .. بكل خطوة احس دامشي لنهايتي .. الانسان يحس بموته .. كمت امشي و اتشاهد ..

اول ما وصلنا .. القبر بالاخير المكان معزول يعني اذا احد كتلنا و دفنا .. محد يدري .. حذيفه خلة سنادين الشتلات بالكاع .. بحجه ازرعهن اريد احفر مكان العمل .. بس ما اندله ..

حذيفه : وين نزرعهن ..

يمامة : كعدت يم القبر .. ايدي ترجف .. فجاءة نزل الشيطان سحب صولجانه .. فزيت جسمي كله كمز و عطت .. جنت واكفه ع شعراية امان .. لعنة الله عليه كطعها

حذيفة : درت دافل السنادين فجاءة طفرت و عاطت رجعت ع ظهري

ااالله .. شبيييج .. اسسسم الله

يمامة : كمت اتنفس سريع و حيلي كله يرجف  .. ليش يدفنن بمقابر .. هسة انتن دافنات دافنات .. ادفنن بحدايق .. منتزهات .. مكافي رعب السحر انوب القبور ..

ماابية .. مابية .. اخاف اخاف من الكبور

حذيفة : ههه اذكري الله .. كلهم تراب و عظام .. اني هنا لتخافين

المارد : مالذي جاااء بكِ هنا ...

يمامة : اتجاهلته .. ماعندي غير حل .. سويت روحي افلفل السنادين وية حذيفه ..

حذيفة : تندلين مكان السحر وين مدفون ..؟

يمامة : سديت عيوني حيل .. خرررب كشفنا ..

المارد : ارررررجعي مع هذاااا الاددددمي ايتهااااا الحمقاااااء

يمامة : باوعت عليه ثبت رجله بالكاع و اخذ وضعيه دفاع .. انتبهت ع مكان اقدامه .. يم جهة القبر اليسرى

اي اندل .. هناك

اشرت بيدي ع المكان الـ هو واكف عليه

حذيفة : اتوجهت مباشره ع المكان

خلي احفره جيبي الشتله ..

يمامة : لااا .. اني ..

ملحكت اكمل هو بدا يحفر ضربه بالصولجان رجع راسه ع الشاهد و فقد الوعي .. ركضت عليه ..

حذذذيفةة .. حذيفةة ..

المارد : اخبرتك ان لا تتدخلي في امور لا تعنيكِ .. الثانية ستكوون القاضية ..

يمامة : حاولت اصحي ماكو فايده راسه ينزف .. ردت ابجي .. باوعت ع الجن كلهن وكفوا يباوعون ..

درت ع الشيطان .. رغم الخوف .. اني بمرحله مو مال رجعة .. طفرت ع المكان ضربني بالصرلجان بعدني .. وكعت ليورا بعد متر .. عرفت ميكدر يمسني مباشرة .. قريني اختفى ماشوفه ..

احس ظهري تكسر من وكعت .. حاولت استعدل .. فجاءة تحول لضبع عملاق بشع .. يشبه الهاجمني بالزيارة .. كام يتقدم علية و ينزل من حلكه مي .. زحفت ليورا

المارد : هل تظنين انني لا استطيع قتلك .. بلى ايتهاااا العاااهرررة هكذاا استطيع تمزيق جسددك  ..

يمامة : جسمي كام يرجف من الخوف .. رجلية تدفع بية ليورا لا اراديا .. بعشوائية و رعب .. اباوع ع حلكه .. اريد شي احمي جسمي منه ..

طفر علية فاتح حلكه .. عطت و ضميت راسي بـ ادية .. ع الكاع نمت .. گلبي يدك الف بالثانية .. احس التربة الـ نايمة عليها تهتز من دكته .. كمت اشهك من الخوف .. اسمع صوت مرافس ..

شلت راسي .. اباوع مخلوق اول مرة اشوفه .. ذيب عملاق ابيض .. لونه قريب ع زجاجي .. يتصارع وية الضبع .. بسرعه خاطفة ينتقلون من مكان لمكان .. واحد يعض الثاني من ركبه و يشمره ..

انشمر يمي الذيب .. عطت .. بينت بكد النملة يمة .. كام و خطف طفر ع الضبع .. لزمه من ركبته و كطعها ..

اباوع عليه و ازحف باتجاه حذيفة و ارجف .. كتله .. راح يرجع علية اكيد ..

دار علية و راس الضبع بحلكه .. جان يجي .. كمت ابجي وصلت لايد حذيفة .. اجر بيها .. و اعيط

حذيفةةةة .. حذيفةةة

شمر الراس بعيد .. و وصل ليمي .. ايده تنزف .. اني سلمت روحي للموت .. سكنت من وكف و اني جواه بكد النملة .. اذا قاومت اكثر اموت بسبب جلطة قلبية ..

اختفى .. رجعت ع حذيفة .. راسه ينزف بس قليل .. عفته و رحت ع مكان العمل .. حفرته طلعت قطعة قماش .. باقي بيها بس خرز .. الباقي كله متحول رماد ..

القرين : وصلتينا للمووت ..

يمامة : بينت .. ااانت نهائياااااا متحجيييي .. اااااابد ..

قرين حذيفة : تشوفنااا ..؟

القرين : لولاا ملييييك جااان انتي نااايمة يمم هذااا المكبووور .. رررربج ميفيييدج ..

يمامة : مليك ..؟ الذيب مليك ..؟ جاان مليك

القرين : لعد ابوووج

يمامة : هجمت علية اضرب بي و ماوصله خرب بي .. الجن كلها مصدومة

ااحترم نفسك .. داحترم نفسك .. معلييك بابوووية ..

سمعت حذيفة يون .. ركضت عليه

حذيفةة ..

حذيفة : اااخ يااابة رااسي .. شصاار ..

يمامة : مادري .. مادري فقدت توازنك و وكعت .. راسك نضرب بالشاهد ..

حذيفة : لزمت راسي مجلط الدم بالجرح

اااخ .. يمكن ضغطي ..

يمامة : خليت الوصلة كدامه ..

هذا لكيته ..

حذيفة : اخذته من ايدها ..

خرز ..!؟

يمامة : و رماد .. يمكن الباقي احترك لان فككته ..

شاكوله ضبع و ذيب تمالخوا و كطع راسه و احترك العمل ..!؟!؟

حذيفة : ليش هيج متربه هدومج ..

يمامة : باوعت ع روحي ..

من .. من الـحفر .. لان بقيت ادور

حذيفة : عاشت ايدج

اخذته منها .. من الفرحه احس صار خفقان بگلبي .. لوما الحرام و المستحى احضنها .. و الا هي كلها كبور هنا .. 

انطيني الشتله ..

يمامة : زرعنا الورد .. و مشينا هو لازم راسه .. و اني اسحل بجسمي متكسر .. لزكت بي لان الجن كلهم ورايا يمشون ..

القرين : اليوم يلحكوج للبيت .. شفتي المصاااااايب شفتيييي ..

يمامة : لا اله الا الله

شيصير خلي يصير .. المهم الخير انتصر
وصلنا للبيت .. رحت لبيتهم كبل اريد اشوف القرين ..

طبينا سمعنا ام حذيفه تعيط .. ركضنا للهول ابو متخربط لازم كليته و يتكلب بالكاع ..

حذيفة : يااااابةةة .. شبيييي .. يمةةة شبييي

ام حذيفة : مادري مااادري .. كووم نوووودي للطبيييب ..

يمامة : باوع علية حذيفه بنظره الم .. يعني يئس .. كانو مفاد الـ سويناه .. بس القرين الشيطان ماكو .. بس قرينه .. ليش هيج ديصير ..!؟

ديشيله حذيفه ظهر مليك راسا غرس ايده ابطن ابو حذيفه ..

مليك : گوليله ينززززله

يمامة : طفرت من مكاني ع حذيفه ..

نززله .. نزززله حذيفةةة خليي يرتااح بالكااع ..

حذيفة : شيررتاااح ديموووووت .. فككك العمل هييييج السحررر

يمامة : جريته من ايده و نومته ع ظهره

مليك : فك العمل .. بس العمل المشروب بعده بمعدته .. لازم يذبه كله هسه لان السحر فك .. عبالج هاي نفخة البطن من لا شي ..!؟

يمامة : شلوون .. شلون ..؟

مليك : اتعلمت شغلات من طب مملكه الماء ..

دخلت ايدي تحسست مكان استقرار السحر .. متمركز بجدار المعده مسبب ضرر حتى الطب البشري ميكتشفه ..

حذيفة : ااانتي وياامن تحجيين ..

يمامة : فقدت مادري نسيت ..

ويةةة نفسييي ..ووويةة رووحي

خمس دقايق و كام يرد من معدته .. كتل شعر و مي اسود .. رجعت ليورا .. جلدي كله وكف من الحاله .. خشعت ..

ام حذيفة : لاااا اله الااا الله .. لااا ااااله الااا اااالله .. ااااالله اااااكبر .. اااالله ااااكبر ..

حذيفه : كعد ع حيله كام يرد السحر .. لزمته سندته لان حيله مهدود ..

ام حذيفة : اااالله ااااكبر .. اااالله فوووك اااالكل .. ااالله فووك كل ظااالم .. الله نصييير المظلوووم .. اااالله ااااكبر

يمامة : اني و اديان و حسوني نبجي .. امهم مثل كامت تتدروش .. كامت تمجد و تصيح و تبجي تمسح ع ظهر زوجها ..

فجاءة صار صوت انفجار ابيتنا .. طفرت من مكاني بدون ارادتي .. و ركضت للبيت .. طبيت المطبخ يشتعل .. كمت اعيط ..

غدددددديررررر ..

طلعت تركض من غرفة الاستقبال تبجي و تعيط ..

غدير : انفجااااار ... قصفووووونا بهاونااااات ...

يمامة : حضنتها راسا ..

وين جنتي .. وين مازن ..

غدير : بعده مرااجع .. جنت فوووك بالغرفة ..

يمامة : الحمدلله .. الحمدلله ..

غدير : هذاااا المطبخخ .. احتركناااا .. يمةةةة .. يمةةةة

يمامة : طلعت خالتي تركض علية جرتني من غدير و شبعتني كتل ..

ام غدير : عرفت بتدخله بشغلي .. و بقتل المارد .. و القنية رد فعل لكسر الشر
طلعت من الغرفة عليها ركض ..

شسوووويتي .. شسوويتي هجمتيييي بيتيييي .. هجمتيييي

غدير : امي تكتل بيها و اني اجرجر بامي ..

عوووفيهااا .. عوووفي شبيييج يمةةة .. عوووفي .. قااابل هييي الـ طكتتتت .. روووحي اكتلييي القنينةةة .. يمةةةة .. خررررب ..

فقدت حتى متسمعني مادري شبيها .. دفعتني شمرتني بالكاع ..

شنوووو هالبييييت مليااان مخابيييل ياااالله .. دنحتررررك يمةةةة عوووفيهااا

يمامة : اريد اخلص روحي مكدرت .. جرجرتني و دفعتنب ابيت اخوها

ام غدير : رووحي هناااا مووو متييي عليهممم .. ماااا اريدج ابيييتي بعددد .. براااا .. برررااا

غدير : العالم طبت تطفي بالمطبخ و هي ملتهية تتعارك .. ركضت وية الناس اطفي ..

يمامة : كمت وكفت الجن اكتفوا بالتفرج .. من حرة اعصابها تفلت علية و طبكت الباب ..

القرين : شحجينا .. اني بعد ماحجي راح اسكت احسن ..

يمامة : بيت خالهم من المصيبه العدهم يمكن حتى مسمعوا الصوت .. حقهم مصيبتهم اعظم .. بس المهم انتهت ..

طلعت من بيتهم امشي بالشارع .. ما اريد ابجي .. عادي .. بكل الاحوال لا هي امي و لا ابوية .. اكيد متحن علية مثلهم

اصلا عادي .. شبيهن الشوارع .. امشي و ابجي بدون ما احس ..

مشيت مشيت .. رحت كعدت بحدايق معزولة ..

القرين : هسة وين تروحين ..؟

يمامة : عندي خالات .. بس خلي ارتاح اشوي و اروح .. ما ابات بالشارع بس حل عني اشوي ارتاح ..

مليك : و هل جزاء الاحسان الا الاحسان ..!

يمامة : تعبانه من الدنيا كلها .. كعدت ابجي .. ظهر كدامي فجاءة .. مسحت دموعي ..

باوعت ع ايده تنزف .. تذكرت الذيب .. نفس مكان الاصابة ..

عصيان الجن لسيده جزاءه القتل ..

مليك : بالضبط ..

يمامة : مقابل احسانك الي .. احررك ..

مليك : الي طلب قبله ..

يمامة : شنو ..؟

مليك : ابعدي عن كل شر .. لا تستخدمين الحالة العندج و تواجهين .. انكشفتي بالنسبه للجن مراح يتركوج ..حاولي تبتعدين ..

يمامة : كمت وكفت ..

من وصل الشر لمملكتك غامرت و شمرتك نفسك بمجهول .. تريدني من يوصل الشر للناس اتجاهل ..! من يا ملة انت ..!؟

مليك : بعالمج الشر استبد .. لو كل محاولاتج فهي قطرة ابحر ..

يمامة : عكدت حواجبي .. استغربت من كلامه ..

مافهمت ..!؟

مليك : انه وقت الغروب .. دقائق و انظري حولك ..

يمامة : باوعت حولي تقريبا المكان ساكن .. بقيت صافنه .. فجاءة الجن انتشروا بكل مكان .. باعداد جبيرة .. اشكال مختلفه ..

المنظر رعبني .. مثل الهجموا بكل مكان يتحركون .. غزوا لعالمنا ... باوعت ع مليك ..

مليك : وقت الغروب تنفتح الابواب الهم .. بكل عتبة بيت يكعدون ..

يمامة : صفنت .. اواجه وحدي ممكن .. بس اتجاهل مستحيل .. ابقى ع هذا الحال لحد ما ارجع عمية عنهم .. رفعت ايدي باتجاه صدره

مليك بن ....؟!

مليك : اودوم .. وعديني متواجهين بعد الـ شفتي ..

يمامة : اشرتله براسي بالرفض ..

يمامة بنت فاطمة بسم الله احرر مليك بن اودوم من عبودية البشر ..

بحركه خاطفة لزمني من ايدي ..

اعـتـذر ع التـاخـيـر دمـجـت بـارتـيـن تـعـويـض عـن اول بـارحـة

قـراءة ممتـعـة ♡