رواية ملحمة .. إرث سليمان الفصل الخمسون 50 - بقلم Hend_AlBoor

كـل الـذيـن آذونـــي
حقـدوا حسـدوا و نـافـقوا
فـ لـم يـؤذنـي انـسـان

تنضرب الباب بقوة و تنفتح كلها مخلوق بوجه وحشي بشع يصرخ بقوة يتخذ دنهش و يوليس الاستعداد للهجوم بينما روش يسقط ارضا مغمى عليه

القرين : رجلهاااااا هجمممم

يمامة : جسمي فز درت ع الباب مازن لابس قناع غوريلا اسود و شعر مكفوش

حسبي الله

رجعت داحجي ويا جلنار متخربطه و روش فاقد الوعي بالكاع امدد جسمة متيبس رجلينة مرفوعات

مازن : كلها نرعبت امي ركض ع بنية نزعت القناع

هاي منو؟

درت ع غدير

غير تكولين اكو زبونة

غدير : انت انطيت مجال اششش و اششش و سديت حلگي

ام غدير : درت عليه

ماااازن

مازن : طال عمرج

القرين يمد راسه : تففففف

يمامة : صدوك عصبت خالتي من وراه نزعت النعال و شمرته بي و هو يتجادل وياهة و يضحك رحت ع البنية فاقت

لتخافين هذا اخوية

جلنار : متت خوف من اندفرت الباب عبالي مامير

يوليس : روش افيق هياا

دنهش يضربه برجله : انا متاكد انه نائم لقد سنحت له الفرصة

يوليس : توقف لا تضربه ايها الاحمق ليس نائما

يمامة : من اتزوجتي علاقة مثل البشر لو اشلون

جلنار : اي بالحلم زواج كامل كولشي اشوف و احس مرات افز من النوم عبالك من صدك اتقربلي دتفهميني

يمامة : و محسيتي بي جن

جلنار : بلي بديت اشك و اتاكدت ورا ما طلب مني انتقل ويا

يمامة : وووين

جلنار : لعالمه و رفضت بعدها منمت يومين حتى ما اشوفه تخبلت كمت اخاف لا يطلعلي من كل زاوية و اذا احجي لاهلي ميصدكوني بس امي كلتلها و دزتني ع ام غدير

يمامة : بقيت صافنه عليها تحجي و ما اسمعها اشلون ينقلها لعالمه مفكر تموت منو هذا مامير اذا مظهرلها بالواقع يعني بعده بعالمهم او موجود حوليها بس ميريد يظهر

جلنار : غفيت وراها لان متحمل عقلي سهر و اجاني هو و اخته يقنعوني الي خبلني الحلم ديكمل واقعي يعني معبالك نايمة الكلام الي اريد اكوله له من انام نفس تفكيري و اكوله الحجي الضامته
اتهسترت اتعاركت وياه لان مكالي هو جن و خدعني اني عبالي حلم والله حلم كلتله ابتعد عني ماريد اشوفك احلامي بيك صارت كوابيس

يمامة : و هو شيكول

جلنار : يكول احبج و مابتعد و ما اطلگ

يمامة يعني شنو اني هسة متزوجة و الا يطلگني فدوة فهميني

يمامة : ربكتني لان اني شمعرفني بهاي سوالف باوعت ع يوليس

يوليس : كلا بما انه مسلم لا يعقد لهما الحكيم

دنهش : ماذا تعني بمسلم

يوليس : اعني على دينهم

دنهش : بل اظنك لم ترتد و لا زلت على دينهم

روش كاعد بالكاع و ساند ظهره ع الحايط : دنهش ما شأنك انت

دنهش يتقدم من روش الذي يرفع راسه نحو دنهش
: شأني انهم يكفرون بـ سيدنا و معيننا

روش : من معيننا

دنهش : عزازيل ايها الاحمق

روش : على ماذا اننا نعيش الذل هنا و هو هانئ على عرشه نحن من نعينه

دنهش : لا الوم جني متخلف ولد في عالم البشر .. انك لا تعرف شيئا

روش : نحن نعذب و نقتل لاجل ماذا؟

دنهش : ان يستمر هو

روش يوگف ع حيله و يفتش بجيوبه : و شنخلي بجيوبنه

دنهش : ماذا .. لا اعلم هكذا هي حياتنا

يمامة : باوعت عليها قلقها غرگ عيونها

لا ديكذب عليج انتي شفتي شيخ يعقدلكم

جلنار : اي

يمامة : يمكن ديوهمج

جلنار : مادري

و البارحة اجاني گال ادري رحتي لمعالجة حتى تتخلصين مني و اتوسل بية اعوف الفكرة هاي
يمامة يگولي اذا تريدين اتجسد بشري و نتزوج زواج كامل مثلكم اشلون اذا سواها

يمامة : يعني اشلون يتجسد مدافتهم

انصدمت التفتت ع يوليس ساكت

جلنار : فدوة خالة سويلي حجاب شي يسترني منه ماريد يجيني

ام غدير : سهلة عيوني

يمامة : نشغلت وية خالتي تسويلها حجاب طلعت صعدت بغرفتي

اشلون يتجسد باوعت ع قريني

اشلون؟

القرين : اشمدريني .. يتجسد ميتجسد مرته و هو حر انتي شعليج لو هم ناوية تهدين عليه

يمامة : سكتت اباوع عليه صغرت عيوني

اكيد

القرين بانفعال : و انتي شعليييج

يمامة : شنو شعليج

القرين : بااعي تلازمي وياه هناك لا هنا بعالمنا و تخلين العفاريت كلها تلحگنا منو يوكع بيها غيري شهاامج انتي

يمامة : ليش شهامني اذا يمسني اني المتضرر الاول اشو هامتك بس نفسك

القرين يصرخ : منوو يمسسسج الااا مخببببل هذااا

يمامة : خوش لعد شعليك اني مطمنة

القرين يوكف و يفتح ايدية بانفعال يمثل الشگ : اييي مو ايشگوني ااالي

يمامة : خوش فكرة ادوره بعالم الجن و اشوف سالفته انت بس ارتاااح

القرين : غلطانة ما ارتاح مادام اتورطت بانسان مثلج خرب بية ما اموت

يمامة : بس خلي اعطل الدوام ربطني

القرين : نعلعلا والديك وزير التربية ماعينتها من زمان و ريحتني

يمامة : عفته و التهيت اجهز بهدومي و غراضي باجر عندي .. مر اليوم بسكون قبل لا انام راجعت دفتر القصاصات داشوف الاسئلة شاملة ظهر يوليس كبال الجرباية رفعت راسي

يوليس : مالذي حدث مالذي حل بمليك

يمامة : سديت الدفتر و كمت شفته حالته فدنوب عبالك سامع خبر موته

ماكو شي اهدا مليك بخير

يوليس : كيف دونجاد اخبرني بانه قتل

يمامة : و انت تصدك يكلام شيطان؟

يوليس يهدا قليلا : يا الهي المعلون اصابني بجلطة قال انه قد قتل في اخر غارة شنت عليهم

يمامة : لا اطمن شعجب متروح تشوفه

يوليس : مستحيل انني مملوك و مراقب من قبل اخرين

يمامة : من منو

يوليس : هنالك من يسيطر ع الشر في عالمكم لديهم اجنده قوية ان انتقلت سأُقتل

يمامة : اكيد اكو حل و اني احررك

يوليس : اياك .. ان تحررت سيعلمون بامرك و لا تعلمين ما قد يفعلوه

يمامة : شيسوون اذا ميكدرون يمسوني

يوليس : ان علموا من انتي سيقضون على كل شي مقترن بك حتى البشرية التي تخيط بك

يمامة : كلامه دخل الرعب بداخلي اتراجعت و كعدت ع الجرباية

تقصد مازن و غدير

يوليس : اجل هدمك ليس موتا و انما بقتل كل شي تحبي بذلك ستهدمين تلقائيا

يمامة : سكتت هذا الشي الوحيد الي مخطر ع بالي انو اخليهم بخطر اختفى كلامه حيل قلقني

القرين : دربك اخضر يوليس

يمامة : بس شيدليهم بية

القرين : عركاتج وياهم

يمامة : بعد ما اتواجه هنا او انتقل لعالمهم و انوب ارجع انتقل لمكان الشر و اقضي عليه هيج مراح يندلوني

القرين : تخطط الف خطه في سبيل تبقى تحارب

يمامة : باوعت عليه و هو يدردم ويه نفسه علية تمددت و نمت ماتوقع من تابع شيطاني يشجعني ع الخير اكيد يعارضني

نمت و كعدت من الفجر صليت و بدلت مرت علية غدير دتتطمن كعدت لو لا نزلنا نتريك و اجة مازن بقينا نسولف لحد ما اتصلوا عليه خطها وصل راحت لو طريقها ع طريق مدرستي جان رحت وياها

مازن : حصعد ارتاح و بـ 8 اطلع الجو ثلج

يمامة : اني اروح يادوب الحك

مازن : الله وياج ..

يمامة : فتحت باب المطبخ داطلع جان يصيحني

مازن : يمامة نسيت اكولج حذيفه يوصلج

يمامة : نعمم

سديت الباب و درت عليه

و منو طلب منه اني داروح و اجي و مرتاحة

مازن : عبرية لمنطقة نائية طبعا لا متروحين وحدج و الولد ابن خالي مو غريب و اني ءڷمن عليج يمه احسن من الغريب

يمامة : مازن السيارة داصعدها عامة هواي يصعدون وياية و حذيفة سيارته خاصه اني صعبة علية

مازن : ماشي ام راس يابس

يمامة : رجع لبس قمصلته و اجه ديطلع

ووين

مازن : اوديج للمدرسة من تكملون اتصلي علية اجي اخذج

يمامة : هنا هنا مدرستي و توديني و باب رزقك مازن لخاطر الله ارجع

مازن : لو تروحين بسيارته لو اني اوصلج

يمامة : اروح اروح ويا هسة اطلع و ادك بابهم

مازن : والله

يمامة : باوعت عليه

تعرفني ما اقسم ع اي شي تافه شنو متصدك بية

مازن : لعد هاج رقمه

يمامة : طلع فونه

رقمن شسوي يي هو هيانه بيتهم

مازن : بابة اشلون بالرجعه غير تتصلين عليه يجيج

يمامة : ادك عليك و انت اتصل عليه

مازن : صدك جذب انتي يمعودة

يمامة : هذا العندي ترا اتراجع و ما اروح زين

مازن : انفعلت و دتروح جوا لزمتها

مااشي مااشي عود اتصلي علية

يمامة : تمام و مو تنطي رقمي اتخبل

مازن : لا

يمامة : يلا اني رايحة

مازن : بحفظ الله

يمامة : طلعت سديت الباب و وگفت مترددة

ما اروح ادگ بابهم .. هسة منا اصعد عبرية مشيت وصلت ليم السيارة طلع حذيفة منها فزيت خليت ايدي ع صدري

حذيفة : صباح الخير

يمامة : باوعت عليه

صباح النور

حذيفة : اني اوصلج مازن بلغج مو

يمامة : لا ماكو داعي اني منا اروح عادي

وجهه تحول من الغضب و فتح باب السيارة بقوة

حذيفة : اصعدي

يمامة : مسمعتني كلت اروح عبرية كيات

داروح جان يجرني من ايدي حيل و يطببني بالسيارة و رگع الباب جان يصعد

شنو هالتصرف الهمجي؟

حذيفة : همجي مو

يمامة : راسا رفع راسا ع المراية اترددت احجيها بس حجيتها بعد

اي لعد

حرك السيارة بسرعة حسيت خلة اعصابه بالاستيرن

حذيفة : ما ارد ع مرة

يمامة : بقى الوضع هادئ مشغل تلاوة قران اباوع ع الطريق حتى رگبتي تشنجت استغربت من طب بشارع الي يروح ع مدرستي اتوقعت راح يسألني منين و وين

باوع علية بالمراية ديشوف ردة فعلي عود يندل درت ع الجامة كأنو عادي حجيت بعقلي وية القرين

اشلون عرف

القرين : شنو صاحبك يندل المكان

قرين حذيفة بالمقعد الامامي يدير ليورا

: نبش المكان نبش تعبني بتفكيره من عرف لليوم يمكن اربع مرات جاي و رايح لهنا

القرين : شعنده هي مرة و يندل شنو زهايمر

قرين حذيفة : يدور ع الولد الي اتجاوز عليها الف ملحمة و سيناريو شغل براسه علمود كتلته بوكسيات ع دفرات ع كلات

القرين يلتفت ع يمامة : سمعتي وية روحه يتعارك باعي هذا بالذات ما تتزوجي ترا اني بيج مكتفي

يمامة : مطلعت من صدمة كلام قرينه هذا كملها علية صكيت سنوني حيل من ورا
وصلنا للمدرسة ع اعصابي و القرناء الطريق كله يخططون زواج طلاق لا فسخ عركات اطفالنا المشردين

دافتح الباب مقفول خير شنو سجن باوعت عليه

حذيفة : اشلون اعرف خلصتوا حتى اجيج

يمامة : عود اتصل بمازن يكولك

حذيفة : ماشي ديري بالج ع نفسج

يمامة : فتحت الباب و نزلت

مع السلامة

طبيت للمدرسة جانت مها قبلي واصله

صباح الخير

مها : صبااح النور و السرور

يمامة : هاجر ماكو

مها : اتصلت بيها كالت بالطريق

يمامة : شنو مو بالخط

مها : يا خط مو صار تشريب شو نسيتي

يمامة : اتوقعت رجعوا

مها : لا متكسرين بس سألت المدير قبل اشوي گال مهند اجازة الامتحانات كلها حالته مو زينة بس ساري يداوم اليوم

يمامة : اها لعد اشلون اجيتي

مها : بسيارة رجلي و انتي بسلا عبرية

يمامة : لا ابن خال اخوية وصلني

مها : ابن خال اخوج شلون

يمامة : شبيج ماازن

مها : يو نسيت اي گلتيلي گلتيلي وج عيني عقلي فدنوب صاير من اتعينت لليوم

هاجر : صباح الخير سابقاتني

يمامة : سلمنا عليها بوستنا و گعدت

هاجر : ام جاسم الجاي صار

ام جاسم ( موظفة الخدمة) : اي عيوني خدرته قبل لتجون بشوي

هاجر : عاشت ايدج عيوني جيبي من ادارة المعلمين لما احضر الكلاصات

مها : شكو مستعجلة ع الريوك

هاجر : عندي امتحان وياهم اشوكت اتريك اموت جوع والله

يمامة : طلعت لفاتهن و صبن جاي و ياكلن

مها : قسمت لفتي و مديتها ليمامة

هاج يمامة اكلي راح تهلكين بالمراقبة اليوم

يمامة : لا عمري تسلمين اتريكت و اجيت

مها : ولج هااج لا ترديني اخذي
اتريكت بالبيت شيفيدج هذا؟

يمامة : خلتها بيدي و صبتلي جاي رغم شبعانة بس اكلها علمودها

عاشت ايدج طيب الكباب

مها : الف عافية عيوني

استاذ علي : مطلوبات بالادارة

مها : درت عليه لان ظهري ع الباب

عاد حيات لو ميتات

استاذ علي يضحك : لا حيات حيات

مها : هههه يلا جايات استاذ

يمامة : رحنا للادارة اني وراهن لان ماعرف شي
انطاهن كل وحده قائمة القاعه و راح وياهن معلمين اثنين

المدير : ست يمامة اليوم محتاجيج بشدة

يمامة : كول استاذ

المدير : معلم العلوم اتخربط الصبح ضربته جلطه و ودا للمستوصف

يمامة : خطية ميستاهل الله يشافي

المدير : و اليوم الثالث عدهم امتحان امتحنيهم ابداله لان انتي مرشدتهم و تعرفيهم اخاف يرتبكون اذا اخلي غير معلم يمتحنهم

يمامة : عادي استاذ ماكو مشكلة

المدير : ست هاي قائمة اسمائهم تسجلين بيها الدرجة رقما و كتابتا اخذي ..
و هذا دفتر اسئلتهم انتي هذا تعرفي لان سويتي مثله و هذا كتاب العلوم

يمامة : اي بلي اعرفه
هايهية؟

المدير : اي و الله يحفظج ديري بالج عليهم

يمامة : ان شاء الله

طلعت للادارة مالتنا اخذت اقلام سبورة و مساحة و رحت كلهم واكفين بالباب ركضوا طبوا

السلام عليكم

الطلاب : ووووو عـــــ لــيـــ كــــم الــــســــ لـاام

يمامة : خالين رحلتين وحده كبال الخ يم السبورة اتذكرت من جنت بالابتدائية جان هذا المكان رعب حقيقي و شوق بنفس الوقت لما كملوا السلام اني كعدت و رتبت الوضع

سجاد : ست ست

يمامة : نعم

سجاد : انسلمج الكتب

يمامة : لا تبقى عدكم لان ورا العطله ترجعون تقرون بيهن

سجاد : ست لعد اشوكت نسلمهن

يمامة : باوعت عليه مبين بس يريد يخلص منه

باخير السنة ماما باخير السنة تسلمون

يلا الي اصيح اسمه يجي يكعد كبالي راح اصيح اثنين اثنين ماشي و لتحجون لان هذا امتحان

الطلاب : نعممم ســـــــــت

يمامة : احمد عباس .. ادهم عبدالله

اجوي اثنينهم كعدوا كبالي لابسين تراكسودات الشعر مكفوش من الفراش للمدرسة واضح اهتمام الام
اكص ايدي اذا راجعتلهم او شافتهم شعدهم قراية ابتسمت بوجوهم

اشلونكم

الاثنين : زيــــنـيـــــن

يمامة : شتريكتوا

ادهم : ست بيض

احمد : اني شربت حليب لان اخوية اكل البيضة و مبقالي و امي مقبلت تطگلي بيضة مضل وكت

يمامة : و شبي الحليب ينطيك قوة و يسويك شاطر شوف اشلون راح تبدع هسة
جاهزين

الاثنين : نعممم ست

يمامة : احمد اريد منك تكولي اسم تلث حيوانات اليفة

احمد : اسد

يمامة : انصدمت

ماما حيوان نكدر نربي ببيوتنا

احمد : اي ست

يمامة : تربون اسود هنا بالعرب؟

احمد : لا

يمامة : غير الاسد

احمد : جلب

يمامة : و بعد اثنين اذكرلي

احمد : ديج و طلي صغيرون عدنا بالبيت

يمامة : عفية بالسبع زين شنو يتنفس الانسان

احمد : هواء

يمامة : اي يا هواء هن لثنين واحد احنا نتنفسه و واحد النباتات

اباوع ع الطلاب ذبحوا روحهم رافعين ايديهم و هو صافن بوجهي

زين اشلون يتنفس؟

كال ست هيج و كام يشهق و يزفر

و ع هالمنوال اجوبة زينة و اجوبة لا وصلت اخر اثنين

واثق صالح .. ياسر مجيد

كعدوا كبالي اني داكتب درجات الي راحوا رفعت راسي ابن استاذ صالح سحبت القائمة جوا ايدي اخاف يشگها و ابتلي بديت بياسر

ياسر متريك زين لو ممتريك

ياسر : متريك

يمامة : عفية يلا شنو يغطي جسم الدجاج

ياسر : جلد

يمامة : فوگ الجلد؟

ياسر : صوف

يمامة : ماما الدجاجة مو الطلي

ياسر : ريش

يمامة : زين يا فطر سام ميصير ناكله

ياسر : المشروم

يمامة : عفية بالبطل كملت ويا خمس اسئلة و راح بقيت مكابلة واثق عاوج راسه و يضحك حسيته مكيف لان دا امتحنه
طلعت صفحة بيها حيوانات درت الكتاب عليه

واثق وين الاسد هنا؟ ووينه
اشرلي ع الاسد
عفية بالسبع الشطور يلا روح ع بابا .. كام يضحك و راح طاير

شلت الغراض و كمت لزمني تشنج برجلي من الكعده بقيت واكفه اشوي افرك بيهن
اويلي
رحت للادارة
ها فرغت القاعات؟

هاجر : اي خية و ديصححون نمتي وية الثالث اكيد تعبوج مو

يمامة : وج عيني الا تعبوني تلف و لا عبالك فاتحين كتاب خو الاسئلة اشكد سهلة بس شنو الفايدة مقارين انوب اني الح وياهم

هاجر : اشايفه والله ليخبلوج بالرياضيات و القراءة

يمامة : الله يعين .. وين مها

هاجر : لجنة تصحيح ان شاء بس يكملون و ينزلون الدرجات يدققوهن و نطلع

يمامة : اهاا ان شاء الله
بقيت كاعده بالادارة طلعت فوني و كمت العب كاندي كراش
ما اتصل بمازن اني ارجع ليش مسويها قضية اني جبيرة
صارت بـ 11 و نص ضجت طلعت كدام المدرسة الجو دافي كمت اتمشى بالحديقة رحت يم الباب فتحتها داشوف المنطقة من داومت لليوم
مانتبهت هواي عليها طلعت جان اشوف سيارة حذيفة انصدمت شيسوي جاي من شافني طلع من السيارة لابس كله اسود

حذيفة : من العشرة و نص عفت العمال مالتي بالاسواق و طلعت لمدرستها اجاني احساس مراح تتصل اعرف عنادها

( بصوت عالي ) هااا كملتوا

يمامة : رحت عليه ركض

لا تصيح منا المعلمين

حذيفة : شبيج مستحية
و اذا قابل طالعين موعد غرامي ؟

يمامة : شدتحجي انت هنا عرب مو مدينة ميفسرون شي لله بالله و بعدين شجابك

حذيفة : اتلفتت هيج و هيج

هي منگطعة وين اكو عرب

يمامة : شجابك

حذيفة : غير اخذج

يمامة : باوعت عليه بغضب

بس ما اتصلت بمازن

حذيفة : و متتصلين

يمامة : نعم؟

القرين : هسة يطلع حاكم ع جن و تكمل

حذيفة : اعرفج اكثر من نفسج

يمامة : سكتت اتأفأفت و درت عنه دا اروح طلع كدامي للمدرسة

حذيفة : بينت الضوجه بوجهها راحت سبقتها

عادي اطب اسلم عليهم مو

ركضت وراية جان تلزمني من قميصي و تسحبني ليورا ابتسمت و دنگت خليت ايدي ع حلگي مسحت لحيتي درت عليها بوجه جدي بدون صارم

شبيج دا اطب اسلم مو اقتل

يمامة : ماكو داعي اكعد بالسيارة هسة نكمل و اجي شكو مسلم عليهم بعد

عفته و مشيت ع السريع .. مو معقول ابد .. طبيت و سديت الباب و بالسرگي رحت كعدت بالادارة كل اشوي اتذكر من سحبته اباوع ع ايدي يرجفن غمضت عيوني حيل عصرتهن
اشلون هيج سويت

حذيفة رجعت كعدت بالسيارة الابتسامة تارسة وجهي رجعت شغلت اغنية هيثم يوسف و راسي ع مسند الكشن غمضت ما اريد اشوف شي غير بس الي شفته اخر وجهه

هيثم : ويــــن مــتــحــب انـــي اجـــيـــك
روحــــي مـــلـــهـــوفــة .. مــلهــوفـة عليـك
حجـيـك يـلوگ الـدلال
اطـلب و مـاكو محـال
كـلـي الـك و ابـيـن ايـديـك
............

يمامة : كملوا تصحيح و نزلوا درجات المدير انطانة الاذن نطلع قريب الـ 12 و نص طلعوا قبلنا المعلمين طلعت وية هاجر و مها حذيفة جان واگف يم السيارة

مها : ها هذا اقارب مازن عزا ولج بالعافية عليج

يمامة : ضربتني بعكسها و هي تباوع عليه و تحجي التفتت عليها

الرجال سايق يمعودة شنو ع شنو العافية

مها : تگابلين هذا الوجه روحة ردة المفروض تطبين طايرة متمشين ع الگاع

يمامة : عزاا اوي مها مالي خلگج

عفتها و مشيت اضحك ع ملامح وجهها و هي تحجي مها عبارة عن ايقونة مرح و كلما تشةف اثنين لازم تربطهم او تحاول ترهم

اول موصلت للسيارة فتحلي الباب و كل المعلمين ديمشون و اكو واكفين باوعت عليه

عندي ايد

اشرلي بعينه عاقد حواجبه مافهمت تصرفه صعدت سد الباب

القرين : قصدج رابط حواجبه بحبل

يمامة : انتبهت ع ساري واگف و يباوع علينا صعد هوا راسا باوعت علية بنظرة حقيرة عرفت شسوا مشت السيارة

ماكو داعي لتصرفك

حذيفة : يا تصرف؟

يمامة : عيب المعلمين كلهم واگفين شيگولون علية بس الصوج بمازن

حذيفة : اكولج شيحجون خلي يحجون مسويت شي غلط عود گولي ابن خالي

يمامة : بعد اركن سيارتك يم الباب الثانية بصفحة المدرسة

حذيفة : باجر اطب بنص المدرسة و انتظرج زين

يمامة : يتقصد يستفزني اتعصبت درت وجهي عنه شيخلص هاي الساعه و نص ؟
شغل اغنية راح يدوخني اني منا راسي طبل

هـيـثــم : عـنـيـد و اتخـيـلـت كـل الـگـلوب عـنـدك عـــبـيـد
عـنـيـد و اشـحصـلـت گلـي بـعـنـادك و اشـتـريـد

يمامة : الطريق كل برعاية هيثم يوسف نعست ع صوته

القرين : شوكت يشغل ساجده عبيد

يمامة : لخاطر الله

مرت ايام الامتحانات و اني ع نفس الحال اخر يوم الامتحان كملت مراقبة و كعدت بالادارة مها لجنة و هاجر راحت تدقق سجلاتها وية سجلات الادارة

كمت ارتب باللوكر مالتي طلعت الاوراق الي ما استفاد منهن سديت باب اللوكر عمر صار بوجهي رجعت ليورا خطوتين من الفزة شمرت الاوراق بالكاع من الاعصاب

عمر : اعتذر اعتذر لم اكن متقصد

الله يخليكم لا هيج دتلعبون باعصابي

عمر : اسف

يمامة : شجابك للمدرسة

عمر : احتراز لا اريد التردد لمنزلك في كل مرة فيلاحظون وجودي و اتسبب في اذيتك

يمامة : باوعت عليه

شنو الشي المهم الي جابك

عمر : مليك افاق سيكون اليوم احتفالا لعودته يجب ان تحضري

يمامة : اشلون احضر اني بمكان عام

عمر : ليس الان ساتي مساءا لنقلك

يمامة : الله كريم

يمامة : كملنا كولشي وزعوا النتائج جنت جايبة هداية بسيطة لكل الناجحين وزعتهن بعد دوخة راس رجعت للبيت قرآن يصدح بالبيت طبيت لغرفة الاستقبال التلفزيون ع قناة مجد

طب يوليس : انها السيدة

يمامة : التفتت عليه باستغراب

خالتي؟؟؟

يوليس : اجل

يمامة : الله يهديها و يثبت

عفته مشتغل و صعدت لغرفتي بدلت دا اضم هدومي طبت غدير بهدوم الدوام و حذائها للغرفة وجهها اصفر و ترجف

غدير : يمامة .. يمامة

يمامة : راسا لزمتها من ايديها

شبيج شكووو

غدير : الحگي فدوة الجن فلش غرفة امي يمامة امي بالغرفة عيوني

يمامة : كامت تحجي و تبجي

يا جن شبيج شدتحجين

غدير تصرخ : ولج كتلوا امي فدووة الحگي

..............................................................

حـمـلـة
❀ الـفـن لـيـس احـتـكـاراً ❀
و ذلك بـدعـم كـل انـسـان خـط قلـمـه لـيـبـدع
فـ كـمـا بـدؤوا مـن الـصـفـر بـدءنـا

اقـرؤوا قـصـة آهـات مـنـذ الـطـفـولـة
للـكـاتـبـة huda_hadosh

ادعـمـوا كـل مبـدع فـلا تعـلم الـسـعـادة الـتـي تنـالك لانـك اسـعـدت كـاتـب بـدعـمـك