رواية ملكتي قلبي الفصل الخامس والعشرون 25 - بقلم نور الشمس

كل هذا واني اريدها ليش مارحت جبتها اني محتاجها اكثر من ماهيه محتاجتني محتاج احضنها وبس وانسه روحي وانسه كلشي صار
اريدها يمي ويتوقف الوقت عندي مااريد اعيش بعدها ولا اريد شي كلشي مااريد بس هيه
ياربي شلون وياي ياالهي ساعدني
ليال طفله صح بس فاهمه وتعرف شجاي تسوي تعرف شلون تستفزني وتعرف الكلام اليضوجني
بس متعرف تعترف وتگلي احبك انت الي كلشي
اريدها تشوفني مثل مااشوفها اني اشوف حياتي ليال اشوف عمري منذور الها سنيني الراحت واليجن منذوره الها
گلبي واجعني واريدها اني ضعيف وياها حته القرار الي اقرره انساه مااريدها تحس بيه خلاص يكفي اني احس بيها مااريدها تحبني يكفيني اني احبها خل تفكرني مربي الها
اني صح ربيتها على ايدي خل تعتبرني كلشي بس اريدها تجي وخل تگول عني ماعندي كرامه ماكو كرامه بالحب خل تگول كلشي بس اريد احضنها
رحت الغرفتنه مارايحلها من ثاني يوم طلعتها منها
هذا عطرها بس مايريحني هيه الي تطيب العطر مو هوه الي يطيبها
تمنيت نفسي بمكان فارغ واصيح بصوت يوصل للسما اريد ارتاح تعبت لشوكت ابقه هيچ
تمددت ع الچربايه خليت مخدتها بحضني باقي بيها شي من ريحتها بس شي قليل مو هذا الي اريده اريدها هيه
ظليت اسمع اغنية قحطان العطار شگول عليك
لحنها وكلماتها وصوته السلب روحي
هذي اغنيتي المفضله
ردت أسمعها وأرتاح بس زادت همومي اكثر

شگول عليك ..
أگول انساك وروحي وياك
شگول عليك
اضل زعلان مر فرگاك
  ومثل فزة طفل روحي
تفز لو سمعت بطرواك
ومثل ورده وشحيحة ماي
ونزلت مطر تتنخاك
وأگلك هاااك شوف جفاك
شوف شسوه بيه جفاك
شوف شسوه بيه جفاك
شوف شسوه بيه جفاك
تعال عيوني وبلياك
ماعاود وسن ليها
تعال شفافي محتامات
بهمس شفاف ناغيها
تعال وعندي اسوالف
اسولفها الك واحچيها
تعال العين الك تبره
ضلام وطلعتك گمره
وأضل مثل اليحفر
بير بيده يدور الگطره
شگول عليك أگول انساك
مر فرگاك

تنهدت وحسيت روحي بعد مااگدر اسمع ولااگدر ابقه هنا شفت الساعه وحده ونص تقريبا
نزلت على كيف حته الوالده متحس طلعت احس الهوه ضاع عليه
لا اگدر اگعد ولاگدر اوگف احس نار بيه
ليش اني هيج اتصرف
ليش اكابر اني احبها
ومااريد منها شي كلشي مااريد شوفتها تكفيني
احسن شي اجيبها من بيت ابوها بس لازم تعتذر
يلله ترجع علاقتنه هسه اهم شي اشوفها گبال عيني هذا المهم
اشتياقي الها ذبحني فوگ كل هذا خوفي عليها اكثر
وهيه هناك
گلت جني اضحك على نفسي ادور اعذار الروحي حته اجيبها
ليش بداخلي صوتين صوت يگلي لاتهتم الكلشي ريح گلبك وارتاح وصوت يگلي لا خلي هيه تعتذرلك
بالأخير  الصوت الي يگلي ريح نفسك وارتاح وجيبها يمك وهيه ماالها غيرك هوه الي انتصر
فتحت الباب الخارجي وطلعت
بابنه بالنص يصير بيت جدي ثالث بيت هوه بيت عقيل
تقريبا ساعه ثنتين الا ثلث
وصلت يم الباب
ادگه لو عيب ومو وكتها
ليش عيب عقيل مو غريب بعدين مادام النفس طاوعتني ورضت خل استغلها اخاف بعدين عقلي يقفل واتندم على هذي الساعه
زين اخابر عقيل احسن
شخابر واني تليفوني مو يمي
خلي ادگ الباب واخلص
دگيت الباب مره مرتين تلاثه
وگلت اذا ماانفتح ابقه گاعد للصبح
عادي مستعد ابقه بوقتها كلشي مااشوف ولا افكر
مابقه ابالي بس صوتها الي حسيت بي عبره وحسره
شويه وسمعت صوت عقيل
..منووو
..اني ..عقيل اني علاء
..علاء شكوو ابوي بي شي
..لا ماكو شي افتح الباب تبقه هيج تحاجيني من وره الباب
..يمعود شبيك خوفتني اكو شي
..ماكو شي
..شجابك بهالليل
..اريد ليال
..انت عاقل
..لا مو عاقل منو گلك عاقل
..لا والله مو عاقل
..ادري بنفسي والله
..شتدري ولك هذا وكته
..عقيل اريد اشوفها
..لك منو گلك گاعده هيج وكت
..حته لو نايمه.. تنهدت عقيل طولتها اريد اشوفها بعد مابيه اصبر تسويلي طريق لو ادخل وحدي
..لك فوت فوت صاح علاء
..درت عليه هاا
..انت شارب .لو مااعرفك اگول شارب
..ليش مبين عليه سكران
..مبيين مو صاحي
..ماسامع بهذي الأبيات
سكرنا ولم نشرب من الخمر جرعة
ولكن احاديث الغرام هي الخمر
فشارب الخمر يصحا بعد سكرته
وشارب الحب يبقى طول العمر
سكران
..الله عليك مگعدني تالي الليل وراعبني
بس حته تشوف ليال وتسمعني هذا الشعر
..عقيل انت مرتاح ونايم اني شينومني يابه اسف گعدتك بس وديني الغرفتها وين
..لا اسف ولا شي بس اخذ مرتك واعقلوو هيه طفله انت شجاك متگلي
..اخذها مااني اجيتك حته اخذها قابل اخليها يمك
..يابه لاتخليها فوت جوه يلله بس يمكن هيه نايمه دگ الباب وفوت
..ميحتاج ادگ مااريد ازعجها روح عقيل اتركنا

دخلت للغرفه ضلمه
نايمه هيه فتحت الضوه
قربت عليها احساس حلوو
مثل الملاك نايمه ومخليه ايديها جوه خدها
قربت عليها اكوو دموع على خدها معناها گاعده
ويمكن سمعتني او ابالها احد يشوفها متريد تحسسه هيه گاعده
خليت ايديه على وجها وبالأبهام مسحت دموعها بستها براسها على كيف وطولت بست عينها ونزلت على خدها
حسيتها تريد تشهگ
حاچيتها
..ليال گلتها بهدوء دموعها كسرت گلبي واذتني وايدي احسها ترجف من كد شوگي الها
رجعت حاچيتها
..ليال حبيبي اعرف بيچ گاعده فتحي عيونچ مشتاق الهن
لچ مااگدر بدونچ والله مااگدر
مااريد شي منچ بس اريدچ گبال عيني
ولچ ميت على شوفتچ
دنگت عليها
..ليال أنتي ممشتاقتلي متردين تشوفيني
..فتحت عيوني بس ماچنت اشوفه من الدموع
مسح عيني بطرف ايده
..حبيبي كافي دموع اني گلبي خلصان
لج ليش هيچ تعذبيني ليش
..گمت اشهگ وماعرفت اسيطر على نفسي حضني وحسيت روحي رجعتلي اني هذا المحتاجته محتاجه حضنه هوه هذا اماني هذا بيتي وعائلتي حضنه هوه الأمان
..كافي حبيبتي كافي اني اجيتچ بعد مااخليچ ممنوع تطلعين الأي مكان ممنوع تنامين بغير مكان ممنوع اتركيني ممنوع تعرفين شنوو ممنوع
لج اني بدونچ ضايع والله ضايع جسم وطول بعرض بس بدون روح بدون قوه جسم خاوي انتي نقطة ضعفي وانتي مصدر قوتي
لچ گلبي بگد الشوگ البي بي عتب ليش هيچ ليال ليش من اول عثره انسحبتي وتركتيني
لچ مستعد اخسر كلشي كلشي اخسر
بس انتي مااريد اخسرچ
ليال احچيلچ كلمه ريحيني
ليش تسكتين مااستاهل منچ كلمه
..علاء والله اني احبك وحقي اغار عليك حقي
..ولچ اني هذا الأريده اني اريدچ تحبيني وتغارين بس الغيره موقلة ثقه الغيره شي وقلة الثقه شي ثاني
ليال عوفينه من كلشي الفات خل يولي كلامچ الگلتي والي سچينه حسيته بگلبي والله مستعد انساه مستعد اشيل كل حرف من بالي بس اريدچ تفكرين اريدچ تقررين انتي تحبيني كزوج لو متعوده عليه حته لو متعوده اني قابل اقبل بس انطيني فرصه اخليچ تحبيني كزوج تحسين نفس احساسي هسه تحسين الدنيا انطبگت عليچ تعرفين بشنو حسيت واجيتج بهالليل حسيت البيت ضاگ عليه الحياطين خنگتني كلشي بدونچ مابي طعم كلشي بدونچ ميراد
..علاء والله اني احبك والله احبك بس مااعرف شلون اوصلك مااعرف اتصرف وياك
انت عودتني تدللني واني اريد ابقه دائما طفلتك المدلله مااريد تعاملني غير تعامل ابقه مثل ماانت فدوه لاتتغير
..والله ادللچ وابقه الأخر يوم ادللج بس انتي كبرتي ودلالج غير عن دلال الطفوله كل مرحله ودلالها يختلف اوعدچ انتي تبقين مدلله تبقين غاليه وتغلين اكثر بس مااريد تبقين مثل ماانتي طفله
تنهدت لزمت ايدها وخليتها بين اديني
باعي نتفق اني وياچ اتفاق
ادللچ وتبقين طفلتي بس تخلين ابالچ حتصيرين ام ولازم تثمنين كلامچ وياي مااريد تجرحيني لچ مااتحمل منچ أذيه
..عمري مااذيك
..زين ليش طلعتي واني گايلچ لتطلعين
..خل نسسه الصار
..نفخت الهوه تنفست ننساه نسساه هسه تجين وياي لو باچر تجين
..بكيفك
..لو على كيفي مااخليچ لحضه بس اني مااريد اضايقچ هسه ارتاحيت انتي هم ارتاحي
..علاء لتعوفني بعد اخذني وياك
..حضنتها حيل بستها بوجها كله حاچيتها 
..نروح
..نرووح ليش منروح
..بس البس شي اخاف احد يشوفنه
..اي يلله تأخرت اني اخاف امي تحس عليه ومگايللها يضل ابالها
..مشتاقه الماما هواي
..تلگيها زعلانه عود رضيها لاعبالچ مثل علاء وهيه الترضيچ حته وانتي غلطانه غمزتلها وابتسمت
..ههههه بدينه من هسه نبسمر
..والله اتحمليني
..اتحمل عادي حقك شتريد تگول حقك
..اي والله حقي لچ كل دقيقه بدونچ سجن انتي تعرفين نفسج نقطة ضعفي وگمتي تتغلين عليه
..ماعاش اليتغله عليك
..يعيش ويعيش ان شاءالله
اخذتها ورحت دخلنه اللبيت ماكو امي محاسه على شي
شلتها وصعدت الدرج
..وهاي وصلنه ونورت الغرفه بوجودچ ليال اگلج شي
..گول
..الغرفه بدونچ متنطاق لچ حته العطر ميغنيني عن عطرچ..عطرج على جسمچ غير
..علاء مشتاقتلك
..اني اعلمچ منوو المشتاق وشلون يشتاق ...

گعدنه ثاني يوم متأخرين نزلت ساعه عشره تقريبا
..صباح الخير يوم
..صباح النور حبيبي هاي شعجب اليوم ممداوم
..لامداومت وحته بدون اجازه راح عليه اليوم اخابر مصطفى اشوف الوضع
..اها شعجب تعال اسويلك ريوگ
..تنزل ليال ونتريگ سوه اخذي راحتچ يوم لتعبين نفسچ
..لتگلي ليال فوگ شنو تنزل وين هيه
..اي فوگ جريت الكرسي وگعدت
..اي شجابها
..اني رحت جبتها
..لك شوكت وليش مكتلي
..يوم چنتي نايمه جبتها ساعه ثنتين ونص تقريبا
..الله عليك
..والله
..لك انت مجنون
..اي اعرف ضحكت مجنون ليال
..وينها مشتاقه الها البذاته
..تنزل واتصافو انتي وياها شتسوين حقچ
..لا والله كلشي مااسوي بس اريد ابوسها مشتاقه الها هواي
..متلگين مكان تبوسين بي
..ههههههههه ولا شويه
..تتتوو تتتوو ولاشويه
.. اگول باقي الهالساعه نايم اول تالي
..هههههه
..منو الي بادر منكم وعرف يتصرف
..ممم هيه خابرتني رادتني اجيها اخذها دست بالكلام وضوجتها بعدها معرفت لا انام ولااگعد رحت جبتها واجيت
..زين تسوي ماما ليال بعدهي طفله قبل تزوجت واني بعمرها چنت مااعرف اتصرف
بس ابوك چان يصبر عليه وحبيته حيل تقريبا سنه ونص اوسنتين الا الأن خلاني مااشوف احد غيره يستحق ياخذ مكانه
چان يگلي اصبر عليچ انتي بعدچ مثل العجينه واني اشكلچ بيدي قصدي اگلك ليال بعدهي طفله تتربه على ايدك وانت الربيتها كمل وياها وراح تعرفك من نضرة عيونك بالسنين الجايه ان شاءالله
..ان شاءالله
..يوم بعدچ الهسه تحبين والدي
ابتسمت بمراره
..مو بس احبه مااشوف غيره والدك اول شخص وعيت علي حبيته وحبني  وانت ثمرة هالحب
انت خليتني احبه اكثر واكثر اشوفه بيك وافرح
الحمدلله الي خلالي ذكرى منه ومو ذكرى عاديه احلى ذكرى
افتخر بيك بين اقاربي والأهل
چنت اخاف يگولون عليك تربية مرأه ومحد يحاسبك بقيت هنا يم بيت جدك حته يساعدوني على تربيتك بس الحمدلله انت متعبتني ولاتعبتهم بالعكس
انت نعمه من ربي
..بستها براسها يووم انتي النعمه ونعمه كبيره
انتي الي شمااسويلج مااجازي من تعبچ واخلاصچ وخوفچ وحرصچ عليه
امنيتي تحجين بيت الله وبيدي احججچ ونطوف اني وياچ سوه
..أمين ربي يحقق هالأمنيه
..يوم اخذ زوجتك اليوم وشوف الطبيبه اكيد مرايحه صار فتره لتتركها
..صار يوم العصر اخذها