رواية ملكتي قلبي الفصل الرابع والعشرون 24 - بقلم نور الشمس

السلام عليكم ورحمة الله وبركاته
اني من عرضت قصتي ردتها للعبره
ردت اوصل رساله الشخص مهما كانت ضروفه يگدر يوصل للي يريده والي يحب عمره ميخون والي عنده طموح ليخلي معوقات امامه صح انولدت واني مشايف والدي لكن كانت والدتي واهلي عون الي وسند بالمقابل جازيتهم بأخلاقي ونجاحي ردت اثبتلهم اني گد ثقتهم والحمدلله بالنسبه الليال هيه احلى شي بحياتي رغم التعب والحزن والي انذكر الكاتبه گدرت توصله بصوره حلوه وبينت مدا حبي واهتمامي بس الي بداخلي اكثر وأكثر الي اتمناه منكم تاخذون العبره من القصه وتعرفون وين الغلط وين الصح وياريت بدون تجاوز والنصيحه حلوه
تحياتي الكم واشكركم لأن من اقره ردودكم ارتاح وكأنكم تشاركوني همومي كل شخص منه حياته عباره عن قصه وكل قصه بيها عبره اتمنالكم حياة جميله
ألدكتور علاء ..

الكلام بالأعلى يخص الدكتور علاء وموجه الكم كجمهور واكيد وصلتلكم الفكره

الملاحضه هذي تخصني
الصراحه انتو غالين عليه وتأخيري لتفكروو انو اني اتغلى عليكم بالعكس انتوو اقرب الروحي واشتاقلكم ولو اگدر انزل اسرع انزل بدون متگولولي اني اسفه اذا دخلت النفوسكم الملل بس الصراحه بيت واطفال اثنين صغار ومسؤليات كثيره لذلك التمس منكم العذر
                  ...................................

خلهن مو وكتهن خاطر احچيهن
يجيني الليل وأگعد وأنفرد بيهن
وأفتح بابهن فتحت جناح الطير
وأراويك الجروح المامراويهن

ليال..
اجه بابا بس محاچاني اي شي وچان مبيين عليه متضايق مني او حسسني بغلطي وهالشعور أذاني حيل اني اصلا ضايجه من نفسي بس چنت اعاند العناد دمرني اعاند حته نفسي وزياده على عنادي اكابر مسويه نفسي ممهتمه واني روحي تريد شوفته اتذكر نومتي بحضنه احن الصدره واحن اسمع دگاته چان يگلي راقبي دگات گلبي وانتي حكمي شگد اني احبچ من انام على صدره اسمع دگات گلبه سريعه ومن يتقربلي اكثر يزيد نبضه چنت اخلي عيني بعينه اشوف نضرته شگد هادئه وحلوه اطمأن واحس بالأمان من اشوف عيونه مشتاقه العطره مشتاقه النبرة صوته اسمعها بس يروح كل هذا من اتذكر شلون حاجتني الي خاني وياها واتذكر خيانته كل هالحنين يروح مني ويتحول بمكانه نار بگلبي احس ساعتها كل الكلام الگلته وماشفيت غليلي واتمنيت حاچيه اكثر وحارگه دمه اكثر واكثر
قاطع شرودي بابا بنبرة صوته الحاده بصيغة الأمر صاحني
..ليال هاچ هذي الأمانه الچ من علاء
اخذتها بدون اي كلام بس عيني صارت بعينه شفت بيها كلام يعجز السانه ينطقه حسيت بيهن عتب
نزلت عيني ورحت عنه بخطوات سريعه
شنوو الأمانه كان رام استغربت وشنو الي بداخله
كلام موجه الي او صوري الي محتفض بيهن اجن ابالي صوري الي تعكس اهتمامه علاء كان يصورني فوتوغراف من اني طفله الحد ماكبرت كل شهر صوره وكان جامعهن بصندوق خاص
بعدها كان يصورني يوميه صوره بكامره الكترونيه الحد قبل المشكله بيوم
فكان ابالي دزلي صوري وميريد ذكرى مني او يحاول يذكرني بحبه واهتمامه وفعلا نجح بهالشي اول مشفت الرام تذكرت اهتمامه خليت الرام وفتحت الحاسبه تفاجأت بالتصوير وشلون مرام دخلت وهوه طالع ماجمعت ومعرفت شنو معنى هذا التصوير
شفت التسجيلات وسمعت كلشي
الي سمعته بگد ماصدمني فرحني فرحت بوقتها اي هذا علاء مستحيل يخوني الحد الكلام الي گاله الها حسيته موجها الي اني دائما الي يأذوني يگلولي احبك واذيتي من اليحبوني اكثر
هالكلام حيل أثر بيه
تذكرت كلامي اله وشلون حاچيته حسيت بالندم بس فات الأوان الگلته اكيد كسر گلبه وعمر الي انكسر ميتعمر
حسيت همومي زادت قبل چنت مفكره نفسي اني الي لازم يعتذر مني والي صار هسه غير
هوه الي يستحق اعتذار
شلون اتصرف وشلون افكر مسحت دموعي بطرف ايدي مصار شي علاء يحبني وهسه يجي يرجعني علاء ميگدر بدوني وبديت احضر جنطتي واني فرحانه لميت اغراضي وبقيت انتضره ساعه ساعتين تلاثه لليل وماكو منه خبر
چنت اوهم نفسي وأكول مشغول بعده بالدوام اجه تعبان او حب يخليني ارتاح اكثر
هواي افكار بدماغي والأنتضار صعب بقيت اتمشه داخل الغرفه حملي متعبني ونساتي بعدهي مخلصانه
گمت احس نفسي مااريد اي شي غير شوفته كلشي مااريد مباقي للدوام فتره قليله ويبدي واحس نفسي تعبت والضغوطات تعبتني چني عايشه بدوامه كل ماأگول فرجت تضيق

علاء..
دزيتلها التسجيلات وبديت انتضر منها مكالمه او رساله اوو أي شي يحسسني انو هيه عرفت كلشي لزمت فوني حاولت اتصل تنفست نفخت الهوه شمرت الجهاز بعيد عني مااريد اضعف مااريدها تبقه هيج غلطانه مو غلطانه تنتضر اني اراضيها تعودت على دلالي والدلال الزايد يفسد ابقه طول عمري ادللها بس رايدها تفهمني مااريد شي منها بس تحس بيه تحبني كزوج تشتاق الي تشتاق الحضني تشتاق العلاء الزوج مو المربي هذا كل الردته
قررت من هالساعه ليال اتعامل وياها بغير اسلوب الحد مااخليها تعترفلي بحبها وبنفس الوقت افكر وأگول صغيره بعد ومتعرف تتصرف بس لازم تتعود الي صار صار

داومت الصبح شفت مرام تحاشتني حته مانضرالي نضره ارتاحيت نوعا ما بس هم حزنت عليها يمكن اني احس بيها هيه تحبني واني مو يمها واني احب واعرف احساس العاشق شنوو بس رغم حبي اني ماأحب أذي احد وعمر اليحب ميأذي ياريت الي يعشق يخلي اباله الأذيه مو من مفاهيم العشاق اني الأحبه اتمنه راحته حته لو بعيد عني المهم مرتاح
حبيت اسأل ع الحجيه وشنو اخبار الحجي
رحت للردهه شفتهم حصلتوو حجز ع الرنين
..لا والله يمه ما حصلنه يگول الحجز شهرين
..اوووف شهرين هواي حجي مو هوه جهاز واحد وكل المرضا علي بس هواي شهرين اني العصر اخذكم الصديقي طبيب اختصاص وهوه يسويلك رنين
شفتهم ارتبكوو اوو ماحبوو يثقلون عليه اوو ميملكون المال الكافي
..لا وليدي مقصرت ويانه الف رحمه ع البطن النگتلك بس احنه ننتضر شنسوي
..حجي لتزعلني منك بعدين مو يگولون الدم يحن للدم اني دمي بعده بي ملوحتكم ورف گلبي اول نشفت الحجيه خليني اكمل معروفي وياكم ولتخاف العياده حكوميه بس حجزها يطول ولأن الولد صديقي اني بنفسي اخذكم حته يفوتكم اسرع
..ربي يريحك ويزيل همك ويفتحها بوجهك ان شاءالله
..امين يارب هذي الدعوه تكفيني
طلعت واني افكر بيهم ليش من بين كل المرضا حسيتهم يخصوني واني مسؤل عنهم ليش هالأحساس بعدين ممعقوله بهالعمر مخليهم لاولد ولا اخو ولا قريب وياهم معقوله ماعدهم احد
المراجعين والمرضا نسوني التفكير وتركت كلشي
بس ماكو شي يشغلني عن ليال اوووف ياليال وين تردين توصلين وانتي تكابرين وتعاندين ليش مااتصلتي بيه من عرفتي معقوله نفسج متهون عليچ وياي واني المستعد كلشي اسويلچ
شيخلصها وي گلبي الرهيف وي راسي هذا اليابس گلبي يگلي اترك كلشي وروح شمها واحضنها وگلها كلشي لعيونچ يهون واني الأسف واني الأعتذر بس ريحني وخليني استقر
وعقلي يگلي اذا سمعت گلبك تتعب وتتعب هواي وراح تبقه نفس ماهيه ماحاسه بيك
ولازم اختار بين عقلي وگلبي
خلص الدوام ورجعت ارتاحيت ورجعت للحجي والحجيه حته اخذهم اخذتهم وياي وبالطريق سألتهم
..ابو منو حجي
..ابو غايب يسموني بمنطقتنه الله ماقاسملي ولد
..الحمدلله ..بس نضرته والحسره الي ذبها حسيت بيها وحسيت الولد مهما يكون بهيچ اوقات مطلوب
..اتحنحن الحجي ابني قصتي قصه بشبابي حبيت هالحجيه التسمعني حبيتها الدرجه گمت ماشوف بت غيرها چن هالبنات مو نسوان بس هيه مره صارت طلايب ونهاوي گعدوها عشر سنين
..عشر سنين وانتضرتها
..وچنت مستعد انتضرها العمر كله چانت حلم عمري وياما طلايب اطگ وانطگ من وراها وماجزت صرت مضرب مثل بين العربان الحد ماهلها ملوو مني ومنها واخوها مشاها غصبا على النهاي الي هوه ابن عمها
تزوجنه بعد ماشفنه المرار
هيه تعبت واني تعبت وتعبت اهلي وياي
تزوجنه دنيتنه حلت وكلشي بعيونه حله حته السما والگاع والزرع تغيرن بالنسبه الي گمت اشوفهن احلى
مر على زواجنه سنه وسنتين وتلاثه وخمسه وماكو خلفه النسوان بلنها بلوه چنت اضوج عليها ومابيدي شي امنعه الحد ماخذتها للعارفات وللدكاتره وماخلينه طلعت الحجيه عقيم مااعرف بوكتها الدنيا اسودت بوجهي وهيه حيل تعذبت گتلها اليسألج گولي الصوج بالزلمه مارضت
واخر شي قنعتها حته نعيش مرتاحين
بدت شويه الأمور تهدأ والحجيه تستاهل كل السويته چانت امي مره صعبه تجيبلها الماعون تشمره عليها چنت اشوفها واحس بيها بس ماتشكي وتتلگاني بوجه يضحك الحد ماكبرو امي وابوي وصار مثل الجهال گمنه نداريهم بيدي اغسللهم والبسهم واتصرف وياهم مثل ام وابنها چانت امي تبچي تگلي  اريد من الله يباري كبرتك ماكو ولد عندك حته اكلك يباريك مثل ماباريتنه ومرت السنين وكبرنه وماتندمت على زواجي من الحجيه ولا تمنيت يرجع بيه الوكت واخذ غيرها راضي بقسمة الله وقدري
كبرنه والله سخرلي ولد جيرانه مداريني بكلشي وبنياتهم يجن للحجيه خبزتنه الحاره منهم الحجيه تطبخ وهمه هم يطعمونه والحمدلله من اجينه ماگلنالهم نراجع ابغداد خفنه نثگل عليهم وعدهم دوام وبيوت بس الله ماتركنه ولگيناك انت وباريتنه مثل الولد من يباري اهله هسه عرفت دعاء امي من دعت الله يباريني الله يسخر عباده والف الحمدلله وانت هم الله يباريك وليدي
..حجي ونعم بالله انت انسان تستحق كل هذا وفي وفي  الزوجتك وبار بأهلك اكيد الله ميتركك
من سمعت قصته واحد وضربني على راسي وين عن امي اني لاهي بمشاكلي وتارك امي ليش لحاجي وياها لامطلعها صار فتره
گلت بس ارجع اصلح غلطي كملنه فحوصات والحمدلله الحجي مابي ذاك المرض الخطير بس يرادله علاج اشتريته الهم وودعتهم وفهمت صديقي ميگلهم عياده خاصه ودفعت اجوؤها بدون ميعرفون لأن نفسهم عزيزه وماحبيت اضايقهم
ودعتهم وانطيتهم رقمي واخذت رقم الحجي حاه اتواصل وياهم حسيته هذا درس الي وربي راد يشوفني مشكلتي مو فد شي ولازم انطي الكل حقهم زوجتي وامي
ليال بس اريد منها تنتبه التصرفاتها وبعدها اعرف شلون اتعامل وياها وادللها الأخر يوم بعمري بس هسه مااريد انزل نفسي اكثر وهالمره لازم هيه الي تبادر
رجعت للبيت
مبتسم
السلام عليكم شلونج يوم
..هلا حبيبي شلونك انت
..ألحمدلله يوم حضري نفسچ نطلع مشوار
..حبيبي وين
..نتعشه بره بستها براسها يوم عذريني صار فتره انشغلت عنچ
..حبيبي اني بالي مشغول عليك عاذرتك امي
..لعد يلله نطلع
بالطريق امي گالت
..يوم شوكت ناوي ترجعها
..ماارجعها يوم
..لا ماما لتضوجني منك حبيبي شجاك
..يوم هيه ترجع مثل ماطلعت
..يوم ليال متعوده انت ترضيها حته لو غلطانه
..هوه هذا الغلط وحاب اصلحه يوم عوفينه من هالموضوع اني جاي اريد اسولف وياج صار فتره ممتناقشين بأمور تخصنه سولفيلي شي غير موضوع ليال
..وانت منيلك غير موضوع تعرف بعد شكم شهر واني اصير مو سائله عنك
..ابتسمت لا متسويها منو يشغلچ عني
..ابنك حبيبي يوميه اتخيل حفيدي ولد لو بنيه ياربي والله لو اجه ولا اشوفكم بعد تنسوني
..هههههه يوم تدرين ماحاس حيجيني طفل چنت متمني من يكبر داخل بطنها احس بي احس بحركته هدأ صوتي ودرت وجهي ماردت اشوفها عيوني تنهدت  اوووف يوم مشتاق الها
..مو ع اساس تريد نغير الموضوع اشو مشتاق هههههه
..مو بس مشتاق گلبي يريد يطگ القاهرني هيه ولا يمها حته من عرفت السالفه مكلفت نفسها وتتصل يووم احتاريت بگلبي واحتاريت بعنادها لاهوه مقتنع ينسه ولاهيه تطخ راس
واني هيچ ماأگدر اكمل مااحب تعيش متجاهلتني اريد انحب مثل مااحب يوم تعبت والله تعبت
..حبيبي ماما حاسه بيك وصدگني ليال تحبك بس متعرف تتصرف يرادلها توجيه
..لشوكت تبقه هيج يوم ميصير اني هم طاقتي بدت تنفذ والله مااعرف تاليها وي ليال شلون
كملنه عشه اخذتها اشتريتلها ملابس على ذوقي حسيتها فرحت تمنيت ربي يديم فرحها

رجعت للبيت واجه الليل ووحشته
صار ساعه دعش اجاني اتصال
قريت الأسم
اميرتي الحلوه
ياربي معقوله هذي ليال
جاوبت
..ألوو
..علاء شلونك
..تنهدت شلوني يعني
..ليش مفهمتني الصار
..فهمتج هواي بس انتي مفهمتي ولا ردتي تفهمين
هدأ صوتي ليال متصله بيه حته تسأليني ليش مفهمتني يعني حته بهاي تردين تخلين الصوچ بيه
..لا مو هيچ
..لعد
..علاء ليش متجي تاخذني
..ماطلعتج اني حته اجي اخذج اذا تذكرين اكدت عليچ مطلعين بس انتي عاندتي وطلعتي شسويلج قابل كلمتي متهمچ
..لا تهمني اكيد
..ممبين تهمچ تنفست قوي وهدأ صوتي ليال شلونچ صحتچ شلونها
..مو زينه
..ليش شخيرچ بيچ شي ليال
..البيه اشتياق الك علاء مفتقدتك
..هاي انتي لو غيرچ
..لا اني ليش هيچ تحچي
..مااعرف متفاجأ شلون يعني مفتقدتني كمربي لو كزوج
..مفتقده الأثنين خنگتني العبره وصوتي تغير
علاء فدوه محتاجتك والله مشتاقه الحضنك مشتاقه اسمع نبض گلبك مشتاقه اشم عطرك
..حسيت الدنيا تفتر بيه وجسمي نحل ليال صدگ تحچين لو مليتي مناك وتردين تجين حته ترتاحين اني اريد راحتج بس اريد ارتاح ليال اني جاي اتعذب وانتي متحسين ولچ باليوم اموت الف موته واني اتذكر ضحكتج صوتج عطرج شعرج شمه من رگبتچ لچ مثل الطفل لورادله حاجه هيج اني اريدچ ماكو شي يقنعني انساچ لچ اجي من الدوام تعبان واريد انام وماانام الا واني دافن راسي بثوبچ لچ اشتم بثوبچ مثل مخنوگ ورايد يشم الهوه ليال حبچ جنه ونار الي حبچ وي كل عذابه سعاده الي گليلي شنوو اسوي وشلون اتصرف حته تحبيني
جاوبي ليش ساكته
..بقيت اسمع واني مخنوگه ماگدرت اجاوب
..الله وياج ليال هاي انتي ماعندچ جواب من تلگين جواب جاوبيني
شمرت الجهاز ع الحايط بكل قوتي صار تلث وصل ماارتاحيت گلبي مكسور اقوه من هالكسر
صوتها عذبني احساسي صار مثل العطشان ويشوف مي ويشربونه قطره
هيچ صار بيه صوتها عذبني اكثر
برودها بالجواب وياي موتني يابرود اعصابها ونار گلبي رددت هالأبيات تحچي الي بيه

أحن لمسامرك والگاگ شلگاگ
شري المعشر حلاوة شوگ مابيك

يتبع ..