رواية ملكتي قلبي الفصل الثاني والعشرون 22 - بقلم نور الشمس

              أفكر بيك كل خنگه
             وأتمناك تنزل عافيه بصدري
              يالضميتلك شهگه
              يالماينذكر بلساني الا اسمك
             ردت اتبره من كلشي
             وأگضي سنيني بس يمك
            يالمابيك كل حرگه
            هم نتلاگه مثل الناس
            لو رهمتلك الفرگه
            شنو الماردته بيه وماتغيرلك
            شنو المفروض ماينگال
            وماگلته
             حته المالهن داعي
            ماضميتهن عنك
           كلشي انطيت مني وماخذت منك
          وماهمني وحبيتك بكل حيلي
          وضميتك بأخر سالفه بعيني
          خاطر ماالاگي عيون يشوفنك
         وحبيتك بگد عينك وسويت
          الردتهن مني مورغبه
          بس ماچنت انام الليل
          أذا احس خيبت ضنك

(للشاعر زيد الهاجري)

علاء ..
صار العصر واني حاير بروحي شنو اتصرف
وشلون اگدر انساها ليال هواي انطيتها وتالي شجازتني هذي احلامي هذا حدي وياها لهنا من اول مشكله تبيع ليش دائما تتخله عني ليش تحسسني اني الوقت فراغها وشدتها وبس ليش تحسسني اني بديل الها عن اب او ام او اخ ليش تحسسني اني الها عائله مؤقته گد مارجعت علاقتها بأبوها وعرفتلها اب صارت تهددني تروح يمه كأنو خلص وقتي ماكو اصعب من هالأحساس شخص تعتبره كلشي بحياتك بالمقابل هوه مخليك شي ثانوي بحياته يعني مجرد مالگت الي بديل اني انتهيت بالنسبه الها ليش دائما تتحسسني هالأحساس ليال بگد حبها جرحتني وحطمتني
اصفن اصفن واتذكر كلماتها اذا عندك كرامه طلگني ولاتنزل نفسك هههه ضحكت بمراره انزل نفسي
اي هذي تاليته الي يحب صدگ

رن الجهاز
..ألوو
..تنهدت هلا يوم
..ماما علاء شصاير ليش انت مو بالبيت ليال ليش اخذت ملابسها وطلعت شنو الي صار فهموني ليش اني بهالبيت محد منكم يحترمني كل تعبي وتربيتي الكم محد منكم ياخذ رأيي او يشرحلي ليش ماما جنكم ورد وشحلاتكم شنوو الي صار
..تحسرت ليش ليال وين راحت
..يعني انت متعرف راحت البيت ابوها مسمعت مني ولاشرحتلي
..خليها يوم خليها يمه اني تعبان هسه جاي وافهمچ وافتهم
مااعرف شلون وصلت للبيت كل تفكيري يم ليال وتصرفاتها وشنو الي تسوي اني اكدت عليها متطلع وهالمره صدگ غير كل مره خلاص الي خلقها ماخلق غيرها خلاص خلاص ليش هالعذاب ليش
ليش تحاول تتحداني اعرفها جبانه ومتتحمل اذيه
بس وياي السانها يطلع هذا هوو تتحمل اليجرالها
وهالمره اذتني اكثر من كل مره
وصلت للبيت
..ها ماما شكوو شصار
..ماكو يوم
..علاء فهمني
..يوم فدوه اروحلچ تعبان تركيني اول وتالي تفتهمين
..على راحتك ارتاح
بگلبي گلت شرتاح ياامي واني احس راسي يريد ينفجر وگلبي مخنوگ احس النفس گوه اجره
دخلت للغرفه حنيتلها كل الي گلته قبل شويه راح من بالي عقلي يگلي شي وگلبي شي ثاني اباوع للغرفه كلشي يذكرني بيها ليال حب حياتي اتذكر شلون من اخذتها من امي وهيه ملفوفه بأبيض وزنها ميتجاوز التلث كيلوات قطعه بيضه بياض خدها واللابسته نفس اللون ماعده الحمار الي بخدودها من ذاك اليوم الهذا اليوم ليال صارت كلشي بحياتي كلشي سويتلها وصارت هيه كلشي 
الحد اليوم الي صارت بي ملكي چنت اسعد انسان بالكون عبالي ملكتها صدگ وربي حقق حلمي وانتهت معاناتي مچان ابالي يفرقنه شي الا الموت اخخ ياگلبي شسويلك
مررت ايدي على فراشها هنا هيه تنام مرات وهيه نايمه احسد فراشها عليها ودي اخليها بگلبي ودي گلبي يتفتح ويصير الها فراش وغطه الحضنه مو كافيه احضنها وهيه بحضني واحس ارد اضمها بروحي عيني على مكانها الي تنام بي واحس الرؤيه ماوضحت عندي بعد الى ان نزلت دموعي اني ضعيف بس وياها احس بالضعف نقطة ضعفي هيه
دموعي بدت تنزل وبدت الامي تكبر فتحت كنتورها ماباقي من ملابسها بس ثياب النوم
الذكرى الوحيده الحلوه منها اخذت واحد منهن خليتها بين ايديه شميته بقوه اريد اشبع من ريحتها بس ثوبها ميغني عنها
اه اه عبالك اسنين مو يمي لك علاء بعدك بالبدايه
خلي قهرك للجاي اخذت ثوبها دفنت وجهي بي ونمت نسيت جرحها ونسيت كلماتها الي ابالي شي واحد وبس اشتياقي الها ذبحني وخوفي  من لجاي اكثر يمكن لأن حاسها مترجعلي بعد او مستحيل نرجع مثل ماجنه مااعرف هواي اشياء ابالي مااريد افكر بيها اترك كلشي للزمن
هوه كفيل بالنسيان

ليال..
بعد ماطلع علاء قررت اروح البيت بابا خابرته چان هوه بالدوام خابرته ابجي
..الوو بابا
..هلا ياروح بابا شبيج لولايه شكو
..بابا اريد اروح البيتكم اريد اجي يمك مااريدك تتخله عني مابقالي غيرك
..خير باباتي بيچ شي بيتي هوه بيتچ روحي حبيبتي ولتخافين من شي تغريد متگدر تسويلج شي بس فهميني شكوو شصار
..بابا الحچي مو مال تليفون سديت التليفون ورحت البيت بابا تغريد چنها تعرف بجيتي اكيد بابا گلها وره ماگتله.. اخواني لاگوني بوسوني رحت الغرفة ماما سديتها وشبعت بچي
ليش هيچ يصير وياي ليش زين معقوله صدگ اني ظالمه علاء لا شنو ظالمته واكو دليل
المفروض اسمع منه بس شسمع ماكو شي ينسمع علاء غلطان واني مااتحمل العيشه وياه وهوه خاين
بس اني ماأگدر بدونه ليش گتله طلگني ليش نزلت من كرامته وتجاوزت علي علاء ماكو شخص سوالي مثله
بس هوه لأن اقرب شخص الي لازم يتوقع ردة فعلي اقوه واصلا السويته قليل
ضليت ابچي الحد مانمت وماادري شنوو منتضرتي
وشنو مصيري اني وطفلي

علاء ..
گعدت شمرت الثوب من أيدي وگمت غسلت وبدلت ونزلت الأمي شرحتلها كلشي
..ماما هم حقها يعني هيه لو ماتحبك متغار عليك
..أمي اني مو ع الغيره انتي مسمعتي الكلام الي گالته ع العموم اني ماطردتها بالعكس اكدت عليها ممنوع تطلع من البيت بس هيه تمادت وحبي الها صار ضعف اني هالشي ميعجبني احبها صح مو معناها اني ضعيف واتحمل كلامها الي يسم ولا معناها اموت بدونها الحب اهم مقوماته الأحترام وماعادت هيه طفله ولازم اتحمل عقلها كبرت وحتصير أم اذا هيه بعدهي جاهله شلون تربيلها جاهل يمكن دلالي فسد اخلاقها حته صارت ناكره للجميل ومتعرف شلون تكلم الأكبر منها ولااحترمتني المفروض تحترمني كزوج واذا متحترمني كزوج ع الأقل تحترمني الخاطر السنين الي ربيتها بيها ليال مو بس زوجتي ليال بنتي اني ربيتها على ايدي هسه صارلها اب وعرفت تروح تحتمي عنده
..ماما انت معصب لتاخذ قرار تندم عليه
..يوم اني اعرف كلش زين شنوو اقرر هيه الي مجاي تعرف تركت القرار الها ماعاد تهمني وشتريد خل تسوي خلاص وصلت مرحله تعبت حته من نفسي
..حبيبي ماما حاسه بيك والله ليال طفله وانت دللتها
ولازم تنطي الها والنفسك فرصه ع الأقل الخاطر الي ابطنها
..هوه هذا الكاسر ضهري الي ابطنها تنهدت وطلعت
خابرت غيث يجيني گتله محتاجك نطلع نتونس بس ماحچيتله اي شي مااريد الموضوع يكبر
گتله ارد اطلع اتونس مااعرف بس طلعني من هالجوو گلي انروح النادي ليلي گتله عادي نگعد ونطلع سهر واغاني وشرب ماكو لابنات ولاشي بس گعدة شباب طبعا الشرب بحياتي مضايگه ضوگ ومستحيل اضوگه الله يبعدني من هالشي بس چنت محتاج اشوف عالم غير العالم الي اني بي
گعدنه وضلينه نستمع للغنا صح اطربني الغنا وخله على جرحي ملح حاول غيث يخليني احچيله گتله ماكو شي بس مختنگ كملت السهره ورجعت
للبيت ورجعت الامي ورجعت الغرفتي واشتياقي اليذبح راح انام بدون مااشمها بدون ماادفن وجهي بشعرها
الله ينتقم من الي كان السبب هنا اخذت عهد على تفسي لازم اعرف الي صار ومنو وراه وليال بعد متهمني تقتنع متقتنع شي راجع الها
ورجعت افكر شلونها هسه شربت علاجها اكلت لا
نايمه لو مكانهة متغير وعينها متاخذ نوم اشتاقتلي اشتاقت الحضني  اشتاقت الكلماتي ولامره اگول اسمها بدون حبيبتي وحياتي ولامره محسسها انو هيه طفله دائما احسسها هيه اميره اميرتي وملكه على عرش قلبي
الي صار القلب تحطم هواي ملوك يحطمون عروشهم بأيديهم وهذا الي صار وي ليال ليال حطمتني

ثاني يوم داومت وكأن ماكو شي بس ضليت اراقب اشوف مرام تروح وتجي تركتها الى ان اتأكد
سألت الموضف الي مسؤل ع التنضيف
گتله هم شفت احد دخل البارحه هنا گلي بس دكتوره مرام گلت يجوز لمن اجت اخذت جهازي تذكرت حچي ليال اذا شخص خابرك وگلك هيج زوجتك والكلام الي متحملته وضربتها عليه عرفت معناها احد مخابرها زين رقمها منين حصلوه معقوله من اجت مرام تاخذ الجهاز
شلون اكشفها توترت حيل لازم اهدأ وافكر صح
نزلت ع الموضف وگتله طلعلي تسجيل الكامرات ضروري عندي تقارير مهمه للمرضا مجاي الكاها ارد اعرف منو دخل الغرفه وهالشي بيني وبينك
طبعا المشكله الكامرات ماكو داخل الغرف بس بالممرات المهم اكشف منو الي دخل
طلع التسجيل من البدايه هواي مراجعين بس بنص التسجيل اني طلعت تذكرت من دز عليه مصطفى شويه ودخلت مرام گتله وگف ركزت معناها قبل لتجي تاخذ الجهاز گتله كمل مدخل احد غيرها الحد ماطلعت ورجعت اني بعدها دخلت اخذت الجهاز
هنا انكشف كلشي
بس شلون اوگعها
اني مااريد الموضوع يكبر
گلت لازم اجرجرها بالكلام واذا حاولت تنكر اوجها بالدليل

يتبع