رواية ملكتي قلبي الفصل الثالث والعشرون 23 - بقلم نور الشمس

شمدريني الثواني أعناد من تمشون مايمشن

علاء..
بقيت افكر شلون اخلي مرام تعترف شفتها گلت استدرجها بالكلام واذا نكرت اواجهه بالدليل

دوامي بين المراجعين والمرضا واصدقاء الدوام كلشي طبيعي عندي
واني اتمشه بالممر صادفتني مره كبيره بالعمر تطلع بگد بيبي ابتسمت بوجها
..الله يحفظك يمه
..تسلمين امي ويحفظچ
..يمه انت هنا دكتور
..أي حجيه محتاجه شي
..اي يمه فدوه الشايب تعبان كلش ومحد بحاله
..ضحكت وينه حجيه ليش محد بحاله امي منين انتي
..يمه من الناصريه
..اخذتها ورحت اشوفه اهلنه انتوو حجيه كل الهلا بيكم اني هم اصلي ناصريه بس ساكنين من زمان هنا شتحتاجون اني موجود اعتبروني ابنكم
..فدوه اروحلك يمه ربي يحفظك الشبابك ويهنيك
..تسلميلي ع الدعوه هذا الحجي شفت الحجي شلونك حجي من شنوو تشكي
..دكتور احس بدوخه وخدر براسي يصير
..من شوكت عندك هالشي قبل اكثر من سنه بس هسه زادت اكثر
بقيت اسأل ويشرحلي
..خير ان شاءالله ابقوو هنا الحد مااشوف الدكتور المختص
سألت منو مسؤل عن هذي الردهه وليش المرضا اكثرهم بدون فحص .. يعني همه مجايين مراجعه همه جايين ينامون مستشفى والاستشاريه محولتهم ليش بدون فحص منو مسؤل عن هذا اللأهمال
المساعده ..دكتور اليوم خفارة الدكتوره مرام والدكتور قصي
..خير ان شاءالله كملت ووين الدكتور قصي اريده بس ينطيني تحويل للمريض على غير قسم هالمريض يخصني وباقي المرضا ضروري يشوفهم
المساعده ..راح ابلغه هوه والدكتوره مرام
..باوعت ميحتاج اجت الدكتوره مرام
ابتسمت مرام سمعت اسمي خير دكتور علاء اليوم منور الردهه اشرت للمساعده تروح عندك مريض يخصك اكيد
..يعجبني ذكائچ اريد تحويل للمريض على الرنين
..شنوو انت تقرر
..نعم اكو مانع عادي تگدرين تعيدين الفحص وحولي ع الرنين بس ضروري يتحول هالمريض يخصني وباقي المرضا ضروري تشوفيهم همست دكتوره شنو الشاغلج وتاركتهم
..صار اعتبره تم والشاغلني كثير امور وقعت ع التحويل
..استلمته مثلا شنوو الشاغلج غير الكلنس والحاجه الي وياه بسترتي لو اكوو غيرهم شفتها وسعت عيونها وغيرت نبرت صوتها وبان عليها الأرتباك
..مافهمت شنوو تقصد
..ركزي بلي سمعتي وحتفتهمين عادي تره من اول يوم عرفتج جان مصارحتني وماله داعي هاللف والدوران اخذت التحويل وطلعت

مرام..
بقيت مصدومه معقوله عرفني شلون ماعرفت اتصرف وشلون اتفاهم وياه خلص الوقت بدون مااحس بي حته مااعرف شلون فحصت المرضا وشنو انطيتهم عبالك امشي واتحرك بدون وعي بس هالشغله ابالي هدوئه خوفني الدرجه
بس شلون اتحمل ابقه هيچ لازم احچي وياه
رحت طلبت الأذن بالدخول
بقه على نفس هدوئه ونفس الگعده اخذ الفون وبده يتصفح وأشرلي اگعد
مااعرف ليش الخوف اخذ روحي هدوئه كان قاتل
..احچي دكتوره مرام
..شنوو
..انتي على شنوو جايه
..اجيت أ.اح احاول افتهم منك بخصوص الموضوع الگلته بللت شفتي اخذت نفس كملت مااعرف انت شنو تقصد
..ليش هاللف والدوران الموضوع ميحتاج تفهمي فاهمته اكثر مني
..عن أي موضوع تحچي
..اتوقع عيب اشرح التفاصيل بس اذا تحبين ماعندي مانع اشرح
..گول العندك حته افهم
..أبتسمت انتي مصره تتغابين وهالشي موحلو بحقچ ماشي اشرحلچ لما تنتضريني اطلع من غرفتي الخاصه وتدخلين تخلين شي خاص الچ من ملابسچ الداخليه وورق كلينكس علي اثر احمر شفاهچ هذا الشي ميليق بيچ لاكبنت ولاكدكتوره وبعدها تستغليني وتطلبين الجهاز تاخذين رقم زوجتي وتسوين مشكله هم الصراحه عيب يعني صدمتيني
..لما خله عيونه بعيوني وركزت بيهن اول مره اشوف هالنضره منه دائما نضرته هادئه لكن هالمره يحچي بهدوء بس كان يضغط على اسنانه وبارزه عروق فكه ورقبته مااعرف شجاوب بس بقت دموعي تجري جاوبني
..أنتي جبرتيني اشرحلچ دموع التماسيح مااحب اشوفها وخلي ابالچ ماصار شي ولاگدرتي تخربين حياتنه حبنه اقوه من هالشي بس گنت اعتبرچ صديقه غاليه عليه ولهنا انتها كلشي بينه تحبين تنسحبين من حياتي بهدوء لو تردين افضحچ وتعرفين الكلام الي يطلع اني ماعندي شي اخسره انتي الي تخسرين ياريت تنسحبين وبلا هالمشاكل ولو شفتيني بأي مكان اعتبري نفسج متعرفيني
..علاء اني احبك
..مرام ماكو حب بالغصب انتي تحبيني واني احب غيرچ اني شخص نفسي متسمحلي اعيشچ بوهم اكو غيري عادي يحب ويعيش وياج ويعيشج حالة حب لحته تغرگين بأوهامچ ويتركچ اني كل هذا مسويته وياچ اني مااحب اذية احد بس مااعرف ليش دأئما اتأذه والي يأذوني يگولون نحبك مااعرف اذيتي من اليحبوني اكثر اذا فعلا تحبيني اتركيني والله يرزقچ بالأفضل ياريت هسه اتركيني اشوف شغلي
..علاء والله اني السويته كل هذا لأن احبك ومااعرف من اشوف زوجتك الصراحه احسدها ع النعمه الي عدها اني انانيه صح بس اتأكد احبك وابقه احبك
..حبيني بعيد عني مرام هالمره سكتت غير مره اخلي الكل يعرف شنوو انتي
..وعد مراح اتقربلك ابد وان شاءالله ربي يسعدكم
طلعت مرام خابرت عقيل

..الوو مرحبا ابو احمد
..هلا بيك علاء شلونك شعجب اشوو ابو احمد شنوو متريد تذكرها الهالدرجه
..تنهدت عقيل هيه زينه علاجها تاخذه
..بعدك تخاف عليها اني اليوم اجيت وشفتها زينه بس مو نفسها ليال ذبلانه ومتغيره
..أهاا هيه رادت هالشي
..وأنت شتريد
..ألأريده مو مهم تحسرت ..عقيل خابرتك اريد اشوفك العصر
..يعني نگول تريد ترجعها
..ضحكت بمراره لا شرجع مااريد ارجع اني اصلا ماطلعتها هيه لو تحترمني ماطلعت عوفنه من هالموضوع اريد انطيك امانه توصلها الها
..علاء ليش متجي انت تشوفها وتتفاهمون
..مراح تفهم عقيل سنين مافاهمتني تفهمني هسه يمعوود الحچي هواي والجروح گوه المهن لاتفتحهن الي مرلي ونتفاهم
..الله كريم علاء امرلك اكيد
سديت التليفون شمرته ع الميز
ذبيت نفسي ع الكرسي تنهدت رجعت راسي الوره  ادزلها هالتسجيل وبقت يمها اني تعبت واذا ابقه هيچ اتعب اكثر

خلص الدوام ورحت للبيت الغرفه گمت ماادخل الها تهيچ اوجاعي وتكأبني اروح بالمكتب لو بغرفتي القديمه بقيت افكر ليال اخخ مااعرف انتي نقمه لو نعمه انتي ناري لو جنتي ليش احسچ الأثنين
ساعات تصيرين الي جنه وساعات جهنم ساعات تصيرين الي بلسم الجراحي وساعات احسچ ملح
بقيت اني وافكاري اخذتني البعيد
والخوف البگلبي عليها شلون احله اخاف عليها من حملها وضغوطاتها النفسيه خوفي عليها من تغريد خوفي الأكبر من نفسها ليال متعرف تتصرف ولاتعرف شتريد

ليال..
ماچنت متوقعه نفسي هيچ بدونه عايشه بس جسد بس روحي يمه مااعرف ليش هيچ اتصرف وياه ليش مااعترفله اني بدونه اضيع بس الشك بعده بگلبي ممعقوله علاء يخوني ليش هيچ يجرحني ماجان اكو بگلبي مكان للثقه يمكن الخلل مني مااعرف بس اني من غيرتي عليه وشكله واسلوبه اعرف البنات يموتن عليه واعرف نفسي مقصره بحقه ممحسسني بهالشي بس عمري ودراستي وحملي يعني هواي امور ممتفرغتله اله بصوره خاصه بس هالشي مينطي حق الخيانه مااعرف يمكن تقصيري يخليني ماعندي ثقه بنفسي يمكن قلة الثقه بيه مو بي حته تفكير ماگمت افكر الحمل تعبني وصحتي بدت بالنازل واني بأول اسبوع شلون لو بقينه هيچ اكثر مااتحمل لا اتحمل ضنوني ولا اتحمل بعده عني ولا اگدر ارجعله واني ثقتي بي مهزوزه
حسيت بالعجز وارجع والوم اهلي المفروض متزوجت بهالعمر صح هوه مدللني بس على حساب نفسه ولا عمره محسسني بتقصيري بس اني عمري مو مال زواج هذا التفكير هواي عليه والي صارلي مو مال عمري تعبت واهلي الي تعبوني يمكن هوه اكثر واحد ريحني بس قضه عليه بالأخير
اكثر وقتي بغرفة امي افكر اكتب مذكراتي لو ارسم لو اشخبط حته ماكو شي معيين اخلص بي وقتي
اجاني بابا
..شلونج بابا
..باوعتله بقهر وشبه ابتسامه الحمدالله
..بابا ليش وصلتو الهالمرحله
..مااعرف
..الغلط منين
..هم مااعرف
..بابا لازم تعرفين فكري زين واعرفي هذا مصيرج ومصير طفلچ علاء خابرني وصوته حيل متغيير سأل عنچ وعن صحتج واكد على علاجج تاخذي ورادني امرله
..قاطعته بس اني ماارجع
..للأسف مرادچ ترجعين راد اوصل الج امانه والهسه مااعرف شنو هيه اشوي اروحله وافتهم بابا علاء ماكو منه لتخسري بسبب لحضة طيش منچ
..تفاجأت من گلي ابالي يريد يرجعني ويحاول يعتذر مني عله صوتي بوجه بابا ليش كلكم ضدي ليش حته وهوه غلطان متوگفون وياي وكلكم وياه رغم خيانته واستهتاره بمشاعري ليش تحسسوني اني زايده بالنسبه الكم وتحبون تتخلصون مني وترضونه على حسابي
..لا لا ..لا بابا ليش هيچ تفكرين عمرنه ماحسبناج هالشكل بالعكس انتي المدلله الغاليه وين مترحين انتي ليش تنكرين علاء احن مني عليچ اني مااكدر انكر جميله والشي الي اعرفه علاء مستحيل يخون ومو من النوع الي يوگع بسرعه بيد البنات ولا من النوع الي يحب النساء علاء شخص سوي ومحترم بس انتي الضاهر متعرفي وحقه متبعد عنچ وهسه عرفت ليش ميريد يرجعج لأن ميتحمل اذيه منچ وميريد يكرهچ
بنتي كبري عقلچ وفكري زين اني رايح اشوف شنوو عنده
راح عقيل العلاء فتحتله الباب ام علاء رحبت بي وسألت على ليال وگلتله وصل الها عتاب ليش متسأل عني اني شنو علاقتي بعلاء مو اني امها ليش صار اسبوع متحاول تشوفني الهالدرجه كارهتنه
خجل عقيل من بنته وتصرفها شرحلها انو هيه تعبانه نفسيتها تعبانه ومتعرف تفكر بالصوره الصحيحه
جاوبته بلهفه ووصته عليها عفيه عقيل عينكم عليها هيه حامل ومتتحمل هيچ مااعرف عين وصابتهم اولادي جنهم ورد هيه ورجلها يخبلون شجاهم بليله ويوم انگلبو علاء نفس الحاله متكأب ومعزول وگوه ياكل اللگمه
دخل عقيل جوه وبقه ينتضر علاء ينزل
..السلام عليكم
..وعليكم السلام هلا علاء شلونك
..تحسرت لتگلي شلونك لوني يمك واني هسه بدون لون وطعم
..ليش اثنينكم تعاندون انت اكبر منها احتويها وفهمها تره تعبتونه
..حول نضرة عينه للگاع محد تعبان غيري عقيل الصار شي اكبر من طاقتي مو ضايج من كلشي المضوجني كلامها وبس اني مناوي اخليها تطلع حته البيتك وانت تعرف ليش وتعرف خوفي عليها اكثر من اي احد محد همني بگدها ولاخفت على احد مثل مااخاف عليها ردتها تبقه هنا واني اطلع اصلا حته لو باقيه اني ماابقه چنت مستعد اسافر واتركها هيه تقرر شنوو تريد تعرف ليش كلامها غثني الدرجه خفت أذيها من اتواجد وياها بنفس البيت تعرف يمكن هيه ماحچتلك بس اني راح اگلك حچت كلام مو مقبول بحقها ضربتها اول مره اضربها تعرف تمنيت ايدي مكسوره قبل لتنمدلها تمنيتها متشنجه مشلوله ولا واصله الخدها خفت عليها اخاف اذيها اول مره افقد اعصابي عقيل اني تعبت تعبت من كلشي
جنت ابالي حبتني بس طلعت متعوده عليه مجرد تعويد عمر ليال محبتني ومثل متعودت على وجودي تتعود على عدمه الشي الي يهمني هسه صحتها وصحة الي ابطنها وحته الي ابطنها فدوه الها اهم شي هيه عقيل ليال امانه عندك بربك صونها
..علاء افهم منك تريد تنفصل عنها تره هذا الشي ميرضيني
..لا لا اني بعمري مااريد انفصل عنها لو تبقه زوجتي بس ع الورق هذا الشي يكفيني بس اني اريدها هيه الي تقرر هيه مثل ماطلعت ترجع ولمن تعكسلي الكلام الي گالته بتصرفاتها ذيج الساعه لو نرجع مثل ماجنه لو افتهم منها انو هيه متريد نستمر وعمري مراح اجبرها على شي
اني اعرف نفسي شنو اريد هيه الي مجاي تعرف راح اتركها هي الي تقرر وقرارها شماكان يمشي
..شلون تريدها ترجع وهيه الحد هسه فاهمه انو انت خاينها
..لا هالموضوع انتهينه منه مااني دزيت عليك علمود هالشي هالتسجيل امانه وصله الها هوه وهذا التصوير
وهيه راح تعرف كلشي
..يعني دليل برائتك
..ههههه حاليا بعدني بنضركم متهم ومنتضرين الدليل اي ياعمي هذا دليل برائتي مثل ماگلت
..لا والله اني اعرفك واعرف انت مو من هالنوع لك بشبابك چنت اجرجر بيك تجرجر وانت ولاهامك نسيت احنه شبابنه سوه وحافظك حفظ
..هههه رحم الله والديك اني بشبابي مااحب هالسوالف چنت اهتم بدراستي وامي وجدي وبس بس اويلي منكم انتوو بنات المنطقه تعرفوهن على ايدكم
..ههههه والله ايام چنت احب المرحومه وعمري ماحبيت غيرها بس هم وكفت الركن چانت حلوه وچنه نتسابق عليها
..هههههه اي الحد ماتزوجتها يلله تبت همزين بعدك حافظني عقيل عبالي نسيت
..لا والله مستحيل انساك قبل وهسه وبعد اعتبرك اخ الي وصديق وممعتبر نفسي عم الك حته بعد ماصرت نسيبي
..شبكت اديني عقيل اذا بعدك حافظني تعرف كمية الوجع الي بيه
..تقريبا اعرف
..تعرف هذا الليل مااگدر انام الا وشي من ملابسها ادفن راسي بي مااعرف البيه مرض مو حب
..دنگت اعتقد هيه هم محتاجتك
..اني مااعتقد.. ليال شافت نفسها كبرت وانت الله يحفظك الها موجود لغتني من حياتها تعرف ليال ممعتبرتني زوج الها چانت تعتبرني مربي وبس وبالوقت الي رجعت علاقتكم طبيعيه بأول عثره انسحبت والتجأتلك تريد توصلي اكو غيرك بديل الي
..اووو هواي شايل بگلبك
..الحچيته نقطه من بحر اشرت على ركبتي لهنا واصل حته الگلب فاض
..علاء اني راح اروح بس احب اگلك الخاطري حاول
..اني اگلك هالمره الخاطري عوفني وعوفها لتأثر عليها ولتشرحلها ولتلين گلبها وراسها اليابس عوفها مااريد احد يدخل اريدها تاخذ قرارها من نفسها