رواية من فجر ديسمبر الفصل الأول 1 - بقلم Zoka 🌷

//من فجر ديسمبر
🍁
🍁

Irak'a giden yolcular için son uyarı lütfen uçaktaki kapıya gitmek üzere

(الانذار الاخير للمسافرين الى العراق الرجاء التوجه الى البوابه الطائره على وشك الاقلاع )

Shehab Çabuk
( شهاب بسرعه )
Zain gitmeme izin verdi
( زين دعني اذهب )
Shehab beni terk etmiyor lütfen
(شهاااب لا تتركني رجاااءاً)
Sana geri geleceğimi söyledim ،، Olma bebek
( قلت لك سأعود لاتكن طفل )

- لك عوفه امشي راح نفوت الطياره امشششي

-ايي ماتشوفه شلون مجلب بقميصي .. خاايب هددني

-تعااال يلااا نعلى على ابليسك يازين شكو جبته وياك للمطار
عوفه مطمور جان هسه ماتاخرنا

-لتضل تنك فوك راسي هو جلب بيه وكاعد من الصبح يبجي
ويفتر وراي ...

-سلم جوازك يلا يمعود

سلمنه الجوازات وصعدنا بالطياره وودعنا الخطوط الجويه
التركيه جانت سنين حلوه هنايه .. راح اشتاك للجسور
ومشيه الصبح على البحر وصوت لهجتهم المليانه ميم

كلها مو مثل عراقي الحنينه تارس صدري ترس
چن هالدرب فاتح ايدينه ليه ويكول هلا ورحب
مدري الشوك يخيلي هَيَج ..

فزيت من صفنتي على صوت وليد ..
- سماعات سماعات جايب
- اي اي هاك
- اذا نمت كعدني من يجي الاكل
- بس اسكِت كلشي اسويلك

جانت الروحه صعبه وغريبه الوادم الهنايه ماصخين مو مثل
ديره هلي .. وين اكو مثل ديرتي لو افر البلاد سبع روحات
وجيات ماتجي مثل شمه تراب العماره ...

ياريحه الكصب وركبه المشحوف يادلال المضيف وعكل
الدوواوين يا چلمه البويه انه حيل مشتاك ..

الدرب طويل والكلب رجيج اعله الصبر .. والعين فياضه
دمع لچن الغربه تثگل اعله الروح ميمديهه حمل الصبر بعد
فوك الاربع سنين الحملهه ..

هالغيم يرجعلي شكثر ذكريات وموواويل اااه يازمان اللفيتني
بالغرب مضاميك صعب محذارهه ...

سنه ٢٠٠٩.. مطار بغداد الدولي

- وليد بعد اخوك خلك وياي لاتضل اتصفن واروحن اتيهك
- هاي شبيك قابل جاهل كدامك
- بسك عاد وضل فطن دور عله عمي شوفتك صورته
- ايي هذا ابو حاجب المطبور
- هاذ نيشان حربه لاتعيب
- هسه شحجيت متكولي

ضلينه واكفين ونباوع بوجوه الوادم لحد مالاكينه عمي ابو بسام
- ياهلااا وجثير الهلااا يوم السعد يوم رديت لديرتك ياشهاب
- ااااخ ردني الحنين ياعمي شلونك شلون الاهل
- بخير الحمدُلله صويحبك هاذ
- اي هاذ صاحبي وليد من بغداد عمي
- شلونك ابو بسام
- هلااا بالغالي صاحب الغالي هلاا وميه هلاا
- هلا بيك وبأصلك
- هاا نمشي ؟؟
- اي يله ماعدنه شي حاضرين
- توكلنا على الله يله انه امشي جدامكم اشوفن بسام وين طبك
السياره
- على راحتك عمي

طلعنه واشتميت هوا بلادي جريت النفس بحسره فاكد عمر
مليت ريتي منه وعيني على سماه اخيراً شافت عيني سمه
العراق بعد صفنه وحسره ايام وليالي على سمه بلاد الغُرب

وصلنه السياره ونزل بسام سلم علينه واخذنه بلاحضان
صعدنا وياهم وتحركت السياره وتحرك هنا الشوك والفرح
بصدري لديره هلي ..

نزلنه وليد بالدرب  وهو مشى لبيتهم وكملنه دربنه لاهلنه
لاهل الطيب والنخوه لاهل المضايف ..

انه شهاب ابن حجي منذر عندي سبع عمام وخمس عمات
جدي متزوج اثنين ومأسس عشيره لوحده بالخلفه ..
انه ابوي من الزوجه الثانيه يصير الثالث  بالعمام يكبره عمي
الشيخ كريم هاذ هسه هوه ماخذ المشيخه من بعد تعب ومرض
عمي الاكبر منه حميد ..والشيخ كريم هوه كاض امور السلف
كِلهه بس شكله هيبه تجبرك تحترمه وتحسبله الف حساب

يجي من بعده ابوي ومن بعده عمي كاظم ومن بعده عمي
جاسم ومن بعده عمي مروان ومن بعده عمي حاتم ابو بسام
عمامي اصغر واحد بيهم عمره بالاربعين .. كل واحد منهم
عنده كوم ولد وبنات .. الا عمي حاتم ماعنده بنات بس ولد
اثنين بسام و حيدر  ..

رحت لبيت عمي حاتم لانه بالولايه وماعدهم احد ارتاح هناك
وثاني يوم امر على السلف ..

وصلنه بيت عمي وفتنه البيت اجتي مرت عمي تلكتنه بحجيها
الحلو ووجهه المبشر ..
- ياهلا ويامرحبا بالغالي يمه وليدي ماشاء الله كبران عين
البارده عليك يمه
- هلاا بيج عمه شلونج
- الحمدلله بخير تعال اكعد اكعد خلي اجيبلك شي تشربه
سوده عليه شلون عركان
- شني هالحـررر
- ههههه شعبالك لعد هاي مو تركيا والشمس ادغدغهم هناك
هنا تحمس حمس بينه
- هههههههه چا ماكلتو جان رجعت بالشته هنايه البرد
يدغدغكم مو مثل هناك يكص كص
- ههههه انزول على حجيك ياشهاب

مرت عمي من بغداد ماخذيهه غريبه بس كِلش خوش مره
ام بيت وتراعي الضيف وتهلي بالرايح والجاي وحلوه مرتبه
اباوع لبيتهم يلهث من النظافه وشلون ترتيب وبروده حلوه
هنايه ...

- شهاب ابني كوم اسبح وارتاح بحجره بسام
- اي والله عمي جسمي مكسر من طولت الدرب
- كوم بسام دليه حجرتك ، اخذ راحتك ابني البيت بيتك
- مشكور عمي

كمت ويه بسام لحجرته خليت جنطتي وتمددت شويه وكمت
طلعت ملابسي ورحت للحمام غسلت وتبردت الجو يسمط هنايه
وطلعت واني انشف بشعري ورحت للحجره صايره بصف
الحمام مشطت وتمددت على بطني وغمضت اريد انام مطفي
فرد نوب جان يجي عمي ..

- شهاب بويه كوم العشه انصب
- يلا جاي عمي

كمت رحت للديوانيه جانو مادين السفره مشكله بكل شي
انه ذبيت نفسي اعله التمن والبانيه اكلتلي ماعونين حيل
مشتاك لهالاكل والطرشي المدبس بووويه انتعشت ...
جنت كاضيهه هناك شوي دجاج وسمج واكلات سريعه
خاست بطني منهن وين اكو مثل التمن والمرك هم واحد يحسب
نفسه ماكل بدون تمن !!!

جانت مرت عمي كاعده ويانه تاكل من كملنه كامت هي للمطبخ
واجتي بسرعه جايبه صينيه الجاي !! شبسرعه لحكت !!!
ولو هنه النسوان هنايه مثل الزيبك مايحلك عليهن احد ...

اخذو الولد المواعين ورجعو كعدو يشربون الجاي وعمي كال..
- اكول شهاب
- اي عمي كول
- فرد سؤال ضال بفكري ارد اسألك عليه
- اي شني كول
- عليش ماكلت لعمامك عله رجعتك بس لا اكو طلابه بينكم
- لااااااه عمي شني طلابتيش بينه !! انه ماردتهم يعرفون بجيتي
كونن انه مابيه حيل اروحن للسلف كبل تعرف سفر يتعب وهناك
كلهه حتلتم وتريد كعده وسالفه وانه اريدن ارتاح واطلع عله كيفي
وبعدين تريد الصِدك
- اييه
- عمي انه مفكر اضل يمكم هنايه ماردن للسلف اروحن كد
ساعتين زمان وارد
- البيت بيتك بويه عين غطه وعين فراش
- على راسي عمي ماتكصر
- بس عليش مو هناك ابوك واخوتك وولد عمك اشو جن مالك
نفس باهلك ياشهاب
- عمي انه من روحه الوالده الله يرحمها اعتزلت وكعده
ويه مرت ابوي وولده ماتصرفلي وشغلت الثانيه انه ماردت
اضل ببيوت عمامي كونن عدهم نسوانهم  جثر وانه ماحب
الكيل والكال والكعده بنص الحريم
- ابني البيت بيتك تضل يوم سنه عشره تضل معزز مكرم هنايه
واليريحك سوي شعدنه احنه ابيت وخير من الله يكفينه ويكفيك
- والنعم منكم عمي ماتكصرون

بره ساعه رحت للحجره نمت وانه متعود اكعد متأخر بالعطله
ماكعدت الا دكت ال١٢ كمت طلعت غسلت ورحت كعدت
يم مرت عمي بالهول الولد اثنينهم طالعين وعمي بعده ماراجع
من شغله ...

كامت مرت عمي تصلي وانه رحت للمطبخ اريد اشرب مي
شفت بنيه لابسه صدريه مال مطبخ ولافه وصله على راسهه
مبين شعرهه من جوه ملطخ بالحنه صاير احمر مثل شيبات عجوز ولاطختهن بحنه ودايره وجهه للسنك تغسل الخضره ..

اخذت البطل من الفريز ورحت للكاونتر اخذت الكلاص
واباوع عليهه مااندارت ولا اهتمت بجيه احد هنايه شكلها
من هذني الخدامات ...

شربت مي وطلعت للهول كعدت اكلب بالتلفزيون واجه
بسام سلم وكعد واجتي مرت عمي حطت صينيه الغده
- شني عمي يمتى يرجع
- ابويه يرجع بالاربعه
- هاا بعده بشغل العقارات مو
- اي بعده هو شكو شغل هنايه كلهه عطاله بطاله هاي انه
بالعطله اطلع اصبغ اشد كهربائيات الملي شجم فلس بين
مايجي الدوام
- وتاليهه تاخذ الشهاده وتعلكهه بالحايط وتصفن عليهه
هي هاي طيحان حظ بلدنه
- كفيلك الله بس العنده واسطات يمشوه لو جان طرن هم يشغلوه
واليفهم ويجد ويتعب محد يسال عليه
- متشوفني شردت ههههه جا ماترجع ويايه هناك يكتلون
نفسهم عله المهندسين
- لا يابه لا شيجرعهه الغربه هنايه اضل اشد كهربائيات
لما ربك يفرجهه
- خخخخخخخخ الله كريم
-بعدلك سنه وحده مو
- اي سنه الجايه واتخرج وارجع افتحلي مختبر هنايه بحيل الله
- حلوه التحليلات خوش فلوس بيهه
- اي شغلهه زين وبي ربح اكِلك يمتى نروح للسلف
- خلي يرجع ابوي ونطلع
- حيدر جا وينه
- عنده لعبه مايرجع للعصر
- هاا زين

كملنه الغده وشربنه الجاي وانه طلعت ويه بسام نفتر بالمنطقه
ويم صحبانه كعدنه شويه .. ترخصت وكمت رجعت للبيت
ارد اكوي دشداشتي ناسيهه وعيب اكولن لمرت عمي اكويلي

فتت للبيت وعاينت الخادمه كاعده على المرجوحه بس شني
لابسه الستريج الاسود وفوكاه هيج تيشيرت عريض مطلع
شويه من جتفهه والجسم يلالي ابيض وكاضه كتاب وحاطه
سماعات والmp3 بحضنهه .. رحتلهه وزمغت بيهه ..

- انتتتتي هييي شمكعدج هنايه بهاللبس شني ماكو حشمه
ياحرمه

متعاينلي ولا رفعت راسهه عتيت السماعات منهه وهي رفعت
راسهه عاينتلي ورافعه الحاجب اشكر والرموش شكر شكر
والعين زركه مدوره والوجه كله نمش الشعر احمر رافعته
ذيل حصان ..
كالت ..
- ها
- وسمااا بكلبج كون من احاجيج ردي كومي لبسي شي يسترج
مو عيب كاعده بيت عالم ومواريه جسمج هَيج امشي طبي جوه
جايبج لشغل مو عرض ازياء هنايه

هزت راسهه ورجعت السماعات وشالت الكتاب .. تنفرزت
ضربت الكتاب ووكع من ايدهه بهالحظه اجه عمي وصاح

- شبيك شهاب شكو
- عمي الله جابك شوفن هاي خادمتكم كاعده هنايه ومفرعه
والعالم تواري عليهه شني تايهين بويه شصار بالدنيه
- شبيك شبيييك ياخادمه بنتي هاي
- بنتتتك !!! من شوكت عندك بنيه انته
- هاي بنتي رُبى ماشايفهه انته لان انه ما اخذهه هواي للسلف

اعاينلهه وفاتح حلكي هاي انه شصخمت هي رفعت حاجبهه
وشالت كتابهه ومشت جوه اباوعلهه شلون شعرهه الاحمر
يهتز منا ومنا من تمشي وهي جسمها مرتب متروس بس مو سمين ...

- عمي صدك هاي بنتك لو تشاقه وياي
- بنتتتتي شبيك
- جا شو ماتشبهكم انتم سمر هاي بيضه زين هاذ شعرهه لو محنيته ؟؟
- هههههههه لك هاي بنتي هي هيج من الله خلقهه هيج شعرهه
احمر وياهو اليشوفنهه يكولن هاي محنين شعرهه
- هاااه اول مره اشوفن بنيه شعرهه احمر وين صايره هاي
- هاي عدنا صارت بعد عليش تكللهه خدامه هاي شكول خدم
- عممي شدارني عندك بنيه لا شفتهه لا سلمت لا كالت
من يوم عفتكم انه ماشايف ولا سامع عندك بنيه انه شفتهه
الظهر اليوم بالمطبخ لابسه صدريه ومدري شلافه براسهه
وتشتغل ع الساكت كلت جوز جايبيلكم خادمه شدراني بنتكم
- هههههه والله يسوالفك ياشهاااب امشي امشي
- عمي يمتى نروح للسلف
- خلي اكلي لكمه ونروح
- زين

طبيت البيت وعيني ادور عليهه ماشفتهه يجوز عدهه حجره
فوك .. بس شلون رهمت تطلع هيج حوريه من بين هالسمران
الملحان اشو اخوتهه سمر والعيون سود ابوهه وامهه سمر
هي منين جتي هيج ؟؟؟ هاي اليسموهه طفره وراثيه هعععع

جنت اضحك وانه افكر بيهه وطلعت دشداشتي ودورت على
الاوتي ماكو هنايه .. رحت صحت على مرت عمي ..
- عمممه عمممه
- هايمه هاا جيت
- عمه الاوتي وين ارد اكوي دشداشتي
- لا عمه جيبهه هسه ربى تكويهه
- لا لا انه اكويهه بس دليني الاوتي
- هسه .. ربببببى رببببى جيبي الاوتي وياج

شويه ونزلت شايله الاوتي بايد والسماعات بايد اجتي انطته
لامهه بدون مدير وجهه عليه وراحت ..

- اكول عمه
- ها يمه كول
- هاي بنتج مو ؟
- اي طبعا بنتي لعد بنتمن
- لاا بس اشو ماتشبهكم هيج يعني فرد نوب طالعه صفح
ولاجنهه منكم
- هاي بعد صارت .. هاي ربى طالعه على بيبيتي ام امي هيج
بيضه ووجهها نمش
- حييييل هاي ماخذه جينات من ام  امج زين وهم شعرهه احمر جان
- لااا هذيج شعرهه اشكر بس هاي مدري منين طلعت هيج صفح
- خخخخخخخخخ انه عبالي محنايه
- يوووه اصلا ربى تكره الحنه تموت منهه
- شو جنهه متكبره عمي شدعوه هاي لين عيونهه زرك هيج
ماتسلم
- هههههههه لاا هي متحب تختلط باحد دكمل كوي عمك
هسه يكمل اكل وانته بعدك
- يلا راح اكمل ماضل شي ،، شني ماتجون ويانه
- مادري خلي اشوفه يقبل نروح ،، انته كمل حروح اشوفه

راحت وانه كملت كوي ولبست الدشداشه ولفيت الشماغ
وتعطرت واخذت ساعتي البسهه بره وانه اتمشى للمطبخ
ردت اشوفهه اعتذر منهه .. جانت كاضه باكيت الحليب
بلفروله وتشرب وكفت بالباب وكلت ..

- ياابه انه اعتذر مادريت انتي بنت عمي ماشايفج انه
- امممم
- شني
- عادي
- هااا

مشت من يمي وهي تشرب بالحليب وراحت يم ابوهه كعدت
رحت كعدت يمهم ..

- ها عمي ناخذهم ويانه
- ربى تجين للسلف
- اذا للشيخ اي غيره لا
- هههههههه اي للشيخ
- لعد راح احضر نفسي
- عههههههههههههه ماتصبر هالبنيه

انه صافن بنصهم وهمه يضحكون وهي كمزت ركض صعدت
شدعوه هيج مفلفله للروحه مو امهه تكول متحب تختلط !!!
.
.
🍁🍁 يتببع

شلونكم ياحلوين مكدرت اصبر اطول بعد اكثر وما انزلهه
😁😁
لليل انزللكم البارت الثاني واستمتعو 💖