رواية من فجر ديسمبر الفصل الثاني 2 - بقلم Zoka 🌷

// من فجر ديسمبر
🍁
🍁
بره ساعه طلعنه بسياره عمي للسلف .. اعاين للدرب واذكر
ايام كبل من جنت اطلع ويه ابوي نسير على كرابتنه بالولايه
وشلون نضحك انه وولد عمومتي من صاعدين بالبيكم بالبدي
ونعاين اعله الدرب ونصوفر ونهوس ...

بدينه ندخل درب السلف وشميت ريحه الكصب والماي
ورد بيه الحنين يشك صدري شك .. اعاين للنسوان وهنه
شايلات الحشيش عله روسهن والجهال تراكض هنايه
عاينت لبيوت الطين مهجوره صايره للحلال وبيوت الكصب
مطشره هنا وهنايه ومبنيه بيوت من طابوك وبلوك جدد هنايه
چن هالديره مختلفه بس ريحتها هيه هيه ...

ضل عمي يدك هورن لحد ماوصلنه بيت الشيخ نزلنه والسياج
مسيج من كصب وجوه بيت جبير رنان .. طلعو زلم اثنين
ومن شافوني جوي يركضون ويهلون حضنتهم هذوله ولد
عمي الشيخ كريم ..

طبينه للمضيف واجه الشيخ صاح ..
- السلاام عليكم
- وعليييييكم السسسلاااام والرحمه شلونك شيخ
- ياهلاا وجثير الهلا وين هالغيبه بويه شننني نسيت اهلك
- لاااه شيخ شلون انسه ديرتي وهلي بس هالدنيا مانطاتينه مجال
- المهم رديت سالم لديرتك وهلك ،، شمسه وينهه ياابو بسام

عاينتلهم هذوله ضحكو ودنكو مني شمسه ؟؟؟ اشو شويه
واجتي ربى وركضت للشيخ ..

- شييييخي
- هلاا هلااا بشمسه هلااا بويه وينج اسال عنج ماعاينتج بينهم
- رحت اجيب الدفتر بقى بالسياره
- هههههه اااخ من هالدفاتر دولبتينه بيهن

انه صافن عليهم هذا الشيخ اربع وعشرين ساعه يزامط ويزكح
فوك روسنه واحدنه مايكدر يكوله عمي وهاي الهلكد كدهه
تجي وتتموعله وتحضنه والنوب هوه لافهه بعباته وحاضنهه
شننني السالفه ؟؟؟ اشو هاي بس هنايه تضحك بيتهم بس مبوزه

ضليت صافن عليهم والكل عدهم السالفه عاديه كلمن شافله
مجان واستراح وكعد وهالشمسه مدري ربى مدري صخمه
مشت ويه الشيخ وكعدت بصفه ... شلون شيخ يكعد حرمه
بصفه بنص ديوان !!!

كعدت وراسي مسطور يفر منا ومنا يحجون ويضحكون
وانه بالي شني سالفتهم هاي هيج اهلنا مطورين وانه مادري

جابولنه جاي شربنه وشويه كامن مرت عمي وبنتهه واحنه
ضلينه كاعدين ...

- شهااب
- هلا شيخ
- اشوفنك خانس شني فلمك
- هاا لاا هيج شويه حسبه بالبال
- هاا خير خير ان شاء الله ،، يمتى تكمل دراستك
- ما ضل بس سنه وتكمل
- هااا زين زين سيرت على ابوك ؟
- لااا بعدني هاي جيت بوجهي عليكم
- ياهلااا وجثير الهلاا ،، اكولن ويلادك وينهم ابو بسام
- ضلو بالدار شيخ ماكو احد
- والله زين سويت من جبتلي شمسه الصبح ذكرتهه
- هيه كالت لدارالشيخ اروحن غيره لا بس كلتلهه اي طارت
لغرفتهه لبست  ونزلت
- ههههههه ياحلاتهه هالشمسه متربعه بفادي

اي من حلاتهه تتربع بكلبك حقك قابل يتربعون هالجلحان
الملحان .... جنت ادردم ويه نفسي وحسيت عليهم كامو
كمت وياهم مشو جدامي وراحو للهور وانه امشي ووياي
ولد عمي والحريم تعاين بخلسه علي ..

انه ضليت اعاين  للكصب والحلال والشجر كلت لابن عمي
صياد ..

- اكول امشينه نروح للبستان مشتاك للشجر
- خلنه نصيد السمج ونرد للبستان من ذاك الصوب
- جا يلا امشينه
- شهاب احجيلي شلونهه تركيه شلون عايش
- تركيه حلوه حيل بارده وناسهه باردين مثلهه كلمن بصوب
محد اله دخل بالثاني نظييييفه ونظااام .. انه كاعد ويه اثنين
ولد بشقه .. واحد اسمه وليد هاذ من بغداد اهله عرفته بالسفاره
ودلاني الشقه وصرنه صحبه هواي جان يريح عني الغربه
بسوالفه وكعدته والثاني اسمه زين هاذ تركي بس جاي من
الضيعه عدهم هناك مثل القريه يعني وهم جاي يدرس هناك
هاذ صغيرون بعده وحليوه اشكراني ناعم مجلب بيه وين
ماروحن وياي جان حجيي بالتركي مكسر هو علمني احاجي
انكليزي ويعلمني تركي لين انه من اول سنه اخذت دورات
تعليم انكليزي وبعدين علموني تركي بس هالتركي مافهمه
هلكد وهوه علمني وضل مجلب بيه اذا يشرب ماي يجيبلي
يطلع للشارع لازم وياه يكلي دايماً انه احس اهلي بيك

- ههههههه خوش صحبه يعني هسه اتعرف انكليزي وتركي!!
- ايي
- والله خووش ماتزوجت !
- لااا يمعود شلي بالزواج
- هاااه ماخذتلك تركيه شني ماحلوات هناك
- لااا ولك يطكن بالكاع فلك طرهن شلون شعر شلون جسم
- هااا يعني ماعندك صويحبه منهن
- عندي صاحبات بالكليه بس مو حبيبه
- عللييييش
- بويه انه اكره الحرمه الكاشفه جسمها للوادم اجي انه اخذلي
وحده الوادم تاكلهه بعيونهه ومفرعه والرايح والجاي تحاجي
وتكهكه وياه غير الزمهه اشكهه نصين
- هااا زين يعني حرمتك من السلف ان شاء الله
- مادري بعد انه مامفكر بالزواج هسه لوكتهه الحريم جثير
ونشوفلنه وحيده
- بنياتنه هنايه خلقه واخلاق ياخوي ماتلكه مثلهن بكل هالبلاد
- اي والله صدكت يخوي هنايه امهات بيوت مو امهات اظافر
وشعر وشورتات مثل هذنيج الله يستر عليهن
- هههههه شوف هسه انه راح امشي على بنت عمي نعمان
الشهر الجاي باذن الله
- ايييي شايف كل الخير ياخويه ،، اكولن صدك بله ماتكلي
شسالفه الشيخ ويه هالشمسه شني شمسه شو جني اطرش
بالزفه بس اتصفن عليهم
- ههههههه شمسسه دير بالك ياشهاب تجيب طاريهه كدام
الشيخ والعباس يشوفك النبي عربي بعينك بس تجيب طاريهه
- شدددعوووه كلهه خلك جاهله
- لك يااابه شتحجججي انته هاي السلف كله الشيخ يخلي حوه
رجلهه بس تطلب شمسه
- اااه شني جيف حلوه
- والله شنهي السبب مانعرف بس حت بنياته للشيخ يغارن
منهه ولو يصبن الشيخ ذهب ويعبدنه مايجن بكد ربع من
حبه لشمسه تدري هالوادم من يجون مشايه مايرحون عله
ابوهه لا يجون عله الشيخ وهوه كبل يرفض بدون لايسمع
شني اصلهم فصلهم شبيهم شعدهم ابببد كبل يكول لاااا
صار واحدهم يخاف حتى يروح يمشي عليهه من رد الشيخ
- الله الله شدعوه هيج خاف رايدهه الكم
- لك يابه هو احنه منو ضل بينه ماتزوج بس انه وراح اخطب
هالجم يوم اخوتي كلهه تزوجت وولدهم بطولهم
- عجيييب هيه هم جنهه حياله وتتحايله ماشفتهه شلون تتموعله
حكه عمي تسطره
- لك بويه استر عله عظماتك واسكِت قسم بالله هسه لو تسمعك
وتروح تكول للشيخ زين اذا ضليت تكدر تمشي على حيلك
- يمعووود هسه عساس بحالهه انه هالنسوان شابع منهن
واعرفن دروبهن
- شهاب خلك بعيد عنهه ماوصيك تره الشيخ حاد سنونه
ع اليوصل شمسه
- هسه شخبصتنه بصخمه خلي تولي عوفهه ،، شوكت
هالسمج تصيده حتغرب الدنيه
- ماضل شي ذبيت الشبجه هسه بس تثكل اجرهه

انتظرنه شويه وجر الشبجه واخذنه السمجات بسطل وردينه
للدار مارحنه للبستان غربت الدنيه ووكت صلاه .. طبينه
المطبخ وسلمت على مرت عمي الشيخ وبنياته وهنه مدنجات
وانه مدنج سلمت ع السريع وطلعت رحت توضيت صليت
وكعدنه نسولف بين ماجابو العشه ..

السمج مسكوف والطماطه المشويه والخبز الحارالمكسب
والزلاطه والبصل وهذيج الخضره التفتح النفس وانه سكت
عليهن بووويه ياااكلنه يرد الروح .. اكل واكولن ...
الله ياديرتنه شعليج نفس طيبه .. والشيخ والزلم يضحكون
وانه حاير شاكل اول سكتهن سوك وكمت ارد اروح اغسل
مابيه انطحلت بالكوه جريت نفسي غسلت ورديت كعدت
شربتلي استكانين جاي من هذا اليكعدك وزن وانتجيت
عله المخده .. والتمو ولد عمومتي البقيه وبراهه بساعه
اجوي ابوي واخوتي كمت سلمت عليهم وتحاضنه ...

وكعدت بصف ابوي وهوه عينه دمعت يكلي ..
- بويه شهاب هيج هانت عليك شيبات ابوك وتعبه وشكاه
ماتمرله تشوفه
- يارويحتي يابويه شعندي غيرك يالغالي انه جيف الدرب
صعبه يابويه وهناك الوكت والتزام مو مثل هنايه غير انه
متمرمر وساكت يابويه كلبي طاك عله شمه ريحتك يابويه

حضنته ودمعت عيني اريع سنين انه ماشايفه ولا شام ريحته
الله يعلم شلون حنت بعازته هذيج الايام ..
ناكصتني شمه ريحتج يايمه يالحنينه يالغاليه كسر ظهري
غيابهه ضعت وتغربت وانسل حالي بعدهه ..

- بويه اختي زهره هنايه جتي وياكم ؟
- اي بويه جوه يم الحريم
- بويه ارد اشوفهه حيل مشتاك لاخيتي
- كوم وياي كوم

ترخصنه من الشيخ وكمنه طبينه للمطبخ وابوي صاح ..
- زهررره يازهرره بويه وينج
- جايه بويه

اجتي ومن وصلت باب المطبخ شهكت وضربت على صدرهه
- خووووويه شهااب ياابن امي انته هناااايه بالسلف
- تعالي خيتي تعاااي

اجتي حضنتهه وشبعت بواجي بحضني اااخ يايمه ريحتج بعدهه
بزهره رحتي وخليتي ريحتج بيهه اشمهه من اشتاك ..

- يبعد عيني ياخويه ليييش ماعلمتنه بجيتك هيج ترد ومانعرف
- البارحه رديت وجنت بيت عمي حاتم وهالعصريه جيت هنايه
- يبعد رويحتي ياشهاب ياخويه فركتك صعبه اعله الروح ياخويه
- اييي بالله تمرمر الغربه يازهره،،، كبرانه ولج صايره مره
- ياااه خويه جا غير صرت سبعطعش
- هههههه بعدج تدرسين لو بطلوج
- لااا والله ابوي راد يبطلني بس انه شني كضيت ايديه تبوس
وكتله ارد اصيرن مثل شهاب مثغفه ودارسه وانه اتوسل وهو
يصد بيه لييين ما جيت دخيله ع الشيخ يلا خلاني اكمل
- عفيه عفييييه بالسبعه اخيتي رفعه راااسي يله اريدج دكتوره
وانه ادرسج واوصلج
- اروحن فدوه الك خويه يابعد بيتي يايمه ولا ينشبع منك
ياشهاب والله احسن بغربه دونك ياخوي عليش ماتنشد عليه
جا مو اخيتك انه هيج ماتدري عن حالي ياخوي
- زهررره هنايه لااكو تلفون لا اكو شي شلون انه اواصلكم
هاي خلف الله على عمي حاتم يخابرني يكلي احوالكم وادزلكم
سلام وياه
- اييي والله يجي دايماً يكلي اخوج يسلم عليج
- منو جوه بعد
- اختي منال وبنات عمي وشمسه وامهه
- حت انتي هم تكلين شمسه
- ههههه ياااه هو ياهو بالسلف مايعرف شمسه
- اكلج لاتجيبين طاريهه هالبنيه ما اهضمهه انه
- اييي هيه كلش دمهه جامد ولا تنحب بس الشيخ بظهرهه
حده اليفك حلكه بحجايه وياهه
- هاااا يعني صحيح هالسالفه
- اي جا شني السلف كله ايعرف بيهه تدري خويه هالساع
شفت بركبتهه كلاده ذهب  مكتوب بيهه شمس الشيخ وجانن
بنات الشيخ زينب ورباب وغزاله كاعدات يتبسبسن لوحيدهن
عليهه جيف ان الشيخ جايبلهه ومجايبلهن
- هااااااا وهو شكو هيج جايبلهه لزراك عيونهه
- هههههههه لااا جيف نجحت من الثالث بمعدل ٩٥ جابلهه
الكلاده
- هااا زين زين اريدج اشطر منهه
- عند عيناك خويه تدلل
- يله حبيبه ردي يم الحريم وانه حطلع اكضي جم شغله
ويه الزلم
- ماشي خويه

طلعت ويه الولد نتمشى بهالزرع وناكل حب ونسولف
شكد حلوه الكعده بين الاهل هناك جنت اكضي الليل
عله التلفزيون لو اكضيهه قرايه ...

ولد عمومتي منهم مشو لاهلهم وانه ضليت ويه صياد
جيت اروحن للديوانيه اتمدد شويه وجان صياد يكضني من
زندي ..
- شبيك شكو
- وووين رايح
- ارد ارتاح بالديوانيه
- بويه استر علينه هالساع خلوه الشيخ بشمسه هنايه
- شنهييي خلوتيش هاي النوب
- هاي كل ماتجي شمسه الشيخ ياخذهه ويكعد بالديوانيه
ويضل يتسامر وياهه الليل كله والي يكطع خلوته هاي بعد
الله كتبهه عليه
- اكووول شو جن هالشمسه ساحرتكم مدري شمسويتلكم
شبيكم ترجفون رجيف من طاريهه
- بوويه مو هيه نرجف احنه من الشيخ تعال امشي
خلي اسولفلك سالفه ومنهه قيس ياخوي
- اي شنهي سولف
- هاي يكلك نوبه بيت صالح المسعد بهذاك الصوب نازلين
هالسالفه كبل ثلث سنين .. جانو جايين بالعيد هنايه الشيخ
ذبح وعزم كل السلف ليش ما بيت عمي حاتم جانو جايين
هنايه وشمسه طالعه تتمشى ويه بنات الشيخ بالزرع ومن
هناك ماشيات عله الهوربالاخير حته ياخذن الحطب ويردن
ابن صالح المسعد جان هناك ويه بنته وابنه صغار يطلع
عمرهم ١٢،١٠ سنه فايته شمسه وكوم ياابن صالح عيب
عليهه جيف هيه شعرهه احمر وكصيبتهه مبينه من حجابه
من وره ورموشهه شكر على بيض هاذ استلمهه تصنيف
ضل يكللهه البكعه الحمره الجنيه ويصيح ويكمز ويضحك
ويأشر عليهه شمسه ضاجت وكامت تبجي وراحت ركض
ردت للدار هناك اخوي رايح كايل للشيخ شمسه جتي تبجي
الشيخ هاد الديوان وطالع صايحلهه كالهه شبيج شمسه
كلتله هالوليد هيج وهيج يكول كلهه زين وكفهه يمه ودز
على صالح وولده اجري وكفو جدامه كللهم ..
الحجي هاذ خلي يسمعه كل جبير وزغير هنايه .. اليزعل
شمسه بجلمه ولا بفعل مايطب ديواني بعد
كبت العيطه بينهم والشيخ يهد وهذاك يتعذر اخر شي فصلهم
مليونين وكاللهم هسه تجيبوهن وراح اخذهن وحطهن بيد
شمسه جدام الوادم كلهه وكللهه ...
هذن حك دمع عينج ياشمسه .. ورد كال .. خلهه بالكم انه
لعيون شمسه اوكع زلام واهدر دم ولا انهه يضيك صدرهه
بشين افعالكمَ ..
ومن ذاك يوم لهاليوم لاحد كدر يكرب صوبهه ولا يحجي
جلمه وحده عليهه والشيخ يتفنن بدلاللـهه ومحد فك حلكه
وكال ليش

- شدعووووه هيج مسويهه ملك
- هاي بعد امر الشيخ تعترض !
- لا يابوي وين اعترض .. هسه انه صارلي اربع سنين ماشايفه
مادورني ولا سأل عني تجي هالجويهل هاي يكابلهه ويكعد
- ههههههههه بلشت الغيره
- جا شني هسه انته ماتغار ابوك يفركها عنكم
- تعودنه احنه ،، امشينه نام برانه كعده الصبح
- شعدكم
- باجر نذبح لرجعتك ونعزم الوادم ياخوي
- هااه صدك
- اي الشيخ وصه على ذبيحه من الصبح فخلنه ننام ياخوي
انه تكسرت اليوم
- اي بعلي انه هم نعسان اردن اشوف اخيتي زهره تضل
ترد ويه ابوي
- لا يضلون هنايه يضلون
- جا خوش

بسد الديوانيه اكو حجره نمنه بيهه وانه اتكلب ماكدرت اصفالي
عله نومه ويين وسمعت صوت الشيخ يطكطك بعوجيته بالكاع
فتحت الباب شويه وعاينته وده شمسه لحجره الحريم وصعد
لحجرته .. انه حيل ماطكتهه هالشمسه هَيج غثيثه عله الجبد

كعدت الصبح عله حس هالوادم والجيلات عاينت الساعه ٧
ونص كمزت ركض هسه شيخلصني من حجيهم نايم لهالساعه
طلعت غسلت واجتي مرت عمي شايله صينيه اللحم ..
- صباح الخير عمه
- هلا ياعيوني اصباح الخير توك اكعدت
- اي والله جيف مانمت زين البارحه هَيج تاخرت
- ايي حكك مجانك تغير احطلك لكمه تاكل
- لا لا خلي اشوفن الشيخ اول
- اي نشد عنك هالساع روحله

طلعت اعاين الوادم كلهه ملتمه ومخلصين ذبح وجاي يكطعون
باللحم ...
- السسسلام عليكم
- وعليكم السلام هاا كعدت يالتركي
- يابه شني تركي
- جا اكو زلمه يضل لهالساع نايم ماتكول ورانه وادم تنطر هنايه
ورانه ذبيحه ورانه عزه لو بعدك معلم ع الخده الهناك
- بلشت رحمه الله  ماكدرت انام باليل وتاخرت شصاار هسه
- امش امش نزل الجداري وي ولد عمك
- ان شاء الله

بلش هالصباح بهوستهم الكل تصايح ومخبوصه الوادام
نزلنه الجداري وشلنه الحطب وحطيناهن وره البيت للحريم
حته يطبخن .. علكنه الحطب وحطينه الجداري وبهالساع
جني بنات عمي رباب وغزاله ومرت عمي حاتم وربى
ومرت الشيخ ... شايلات التمن بطشت جبير وكعدت غزاله
تغسله ورباب كاضه الصونده يمهه ..
مرت عمي حاتم ومرت الشيخ يغسلن باللحم وربى راحت
يم التنور كعدت على سعفه وبيدهه دفتر وقلم .. النسوان
مخبوصات ويشتغلن وهيه مبسطه وكاعده تتفرج شني
بنت الملك وماندري !! رحت عليهه  وكفت جدامهه
هيه رفعت راسهه عاينتلي وردت دنكت ...

- بويه شني ماتكومين تعاونين امج
- ماريد
- شني ماريد مو وكت تعزز من تردين لبيت اهلج اكعدي
تعززي وادللي هنايه وكت شغل كومي عاوني الحريم لاتضلين
كاعده هَيج لا شغله ولا عمله
- امممم
- استغفرك ربي شلون تريدني اكلبهه عله وجهه هسه

احجي وهيه ولاجنهه تسمع مدنجه وبيدهه قلم رصاص ودفتر
رسم ورقه صفر وكاعده ترسم بخطوط خفيفه

- كاعد تضوجني بوكفتك فوك راسي
- اييييباااااه ضوجتج يامونليزه كوووومي لااومحمد اجربحج
بالساجه هسه
-يله ضل واكف شسويلك بس ادنى هيج شويه خلي اشوف
- اننننه وين احجي وانتتتي وين
- شكد مزعج

كالتهه وكامت كضيتهه من زندهه وعيني بعينهه اعصابي
فااارت فوووور وهيه تعاينلي بكل برود عتت ايدهه ومشت
وانه ضليت واكف افرك بوجهي من الاعصاب .. النوب مشت
منا راحت كعدت يم الباب وهم رجعت ترسم ردت اروح ازمخ
عليهه بس كلت اتجفى شرهه احسن ...

مشيت من الجهه الثانيه ماردت ارجع وامر منهه جاي اطلع
للمضيف اشوفن الشيخ ماصبحت عليه لِسه حسيت عله ايد
كضتني من جتفي انداريت ...

- شجابك هنايه
- شهاب خويه
- هششش هشش روح من وجهي ماريد ابلش بيك
- انه تعنيت لديرتك من سمعت برجعتك ماكدرت اصبر
ماشوفنك شهاااب احلفك بالعشره ياخوي لاتدير وجهك وتزيد
سنين الفركه
- رد منين ماجيت مالي حجي وياك زززززين
- يالرفيج سهام عتابك بعدهن نابتات بصدري بعدددهن
- جا وكسره ظهري الماعدلت لليوم وناااار صدري الماطفت
يانعيم
- البشر خطاء ياخوي والمسامح كريم
- ربك يسامحك مالك شي عندي روح
- سااامحني شهااااب
- مسامحك وربك يسامحك بس لاتنشدني عله خوه بعد هايهيه
كضت بينه فهمت كضت ماضل شي جاي تنشد عليه رد لديرتك
- انه موات ياشهاب
.
.
.
يتببع