رواية من فجر ديسمبر الفصل الخامس والعشرون 25 - بقلم Zoka 🌷

من فجر ديسمبر
🍁
🍁
وره ماودعناهم  رجعنه للعماره والكل جان يسال عله هاي روحتنه ومحد منه جاوب بشي ...

من التعب كبل رحنه نمنه عبن رجعتنه صارت
وكت العشه فوره الاول كبل للنوم وزهره جنت
اسمعنها تصلي صلي بالحجي ويه ربى وهذيج
مكضيتهه بس تكهكه عليهه وماتحجي شي ..

كعدت حوالي ساعه ٢ بالليل كمت اخذت الجكاير
وطلعت للحديقه كعدت نفس مجاني وجان اهجس
احد ورايه انداريت لنهه ربى ..

- شمكعدج هالساع ولج
- شبعت نوم وكعدت ضايجه وهاي زهره زعلانه
ماتحجي وياي كلت اطلع بره شويه الجو بارد وحلو مايتفوت
- هااا تعاي ليه هنايه جيبيلج كرسي وتعاي
- ماشي

اجتي وجابت كرسيهه وكعدت بسدي طفيت الجكاره وانداريت عليهه ...

- شنهي بالج سولفي
- حسبات
- عله شنهي
- هيج
- كيفج .. ايي شلون شفتي العروسه اليوم
- فدوه لكلبهه تجنن تدري اول مارحت عليهه
اجتي حضنتني بلهفه ومن قدمتلهه السله البيهه
الذهب والثوب كبل عيونهه كامت تلمع لمع وضحكتهه علت على وجهه جان وحده من النسوان كالت هاي شنو .. كتلهه هاي هديه الشيخ
لعزيزتنا وبعدين شاورتهه وكلتلهه هاي لان انتي
ماخذه بخاطرج منه ويكول يريد يرجع جمالج ومايشوف عليج تعب .. خطيه عاد هي كبل حضنتني وضلت تبجي واخذتني وياهه لغرفتهه
ساعدتهه بلبسه ولبستهه الذهب وهي طلعت شكو
عدهه مكياج وتكلي حطيلي اني ناسيه شلون احطهن كلشي ماعرف اسوي هسه .. فاني كعدتهه
ع الجربايه وضليت امكيجلهه وهي تكلي شكد جنت اتمنى لو اختي يمي وعرفت هي عدهه اخوان اثنين وهمه متزوجين واثنينهم بالخارج
اول مااخذو حصتهم من الورث راحو سافرو
وهاي اختهه بالولاده ماتت
— شلون اخذو الورث همه بيتهم مابايعي

- مو امهم جان عدهه ورث من امهه الله يرحمهه
وضامه فلوسهن ومن رادو يبيعون البيت هي مثل المشتريه حصصهم بس حتى يبقى بيت ابوهم ملكهم

- هااا زين سوت

- اي .. شهاب اليوم ضل سؤال بالي

- شنهو

- اني ليش اشبهه ؟؟ اليوم من جنت ارتبهه انتبهت على جسمهه وبشرتهه مثل بشرتي وعيونهه نفس عيوني حتى لاحظت هدوئها تجاه المواقف نفسي
معقول هاي كلهه صدفه !!! يعني الفرق بينه بس لون الشعر وشويه من الملامح

-  لا مامش شي بهالدنيا اسمه صدفه كلشي قدر ومكتوب لجن احنه من نشوف شي مامش له جيه
بالنه ونشوفنه يجي مفاجىء نسمي صدفه
انه اكولن هاذ كله نصيب تعب الشيخ انتي تعويضه
ربج رحيم ياربى من اخذ منه حبيبته هو يعرف
كلبه مايحمل كل بعد هالسنين ومايريده يفكد صبره ويفكد امله بربه فدزج ليه وانه مثل ماسمعت من ابوج الشيخ اجاج كبل ماانتي تجيه

- يعني شنو

- يعني وكت ولادتج نفسج رد عله ايده واذا تشوفينهه اوضح هوه جان لج الحياه كبل مانتي
تصيريله شمس حياته

- اي صح هو كلشي مترابط بينه واعمق من هذا هم

- بنفسي اعرفن شنهو هالشي الغريب بينكم غير
حب الشمس هذيج يعني ولادتج شنهو الجرى بهذيج الساعه

- ماكو شي كافي سد هالسالفه

- عليش اشوفنج من ينجاب هالطاري تخربط اوضاعج

- هيج ماكو شي متوهم

- هههه موش شهاب اليتوهم بيج يرويحتي

- انته متبطل هاي سوالفك يعني حسره ماحجيتلي حجايه وياك كبل تستغلهه فرصه

- بويه انه شمسويلج هسه وكبيتي هالشكل

- هاي كافي عوفني لاتحجي شي

- كيفج

ضلت دايره وجهه وتهز برجلهه انه تفاجات من
ضوجتهه هالشكل هسه انه شحجيت ؟!
بس اظنن بالهه شي !!!

- ربى شمالج بنتي
- ماكو شي
- شنهي الحجيته وهيج ضجتي شني جيف كتلج رويحتي اذا عليهه عمي بعد ماكولنهه
- اي احسن
- عاينيلي شو

اندارت علي وصارت عيني بعينهه وهيه عينهه
تلمع باين بيهه الحجي وحته زمه هالشفايف المغصوبه عله السكات باينه .. كلتلهه بصوت هادي مثل هداوتهه ...
- گلبي مفتوح لهالحجي الي بعيونج اطلبي هوه يريدن يلبيج

جرت نفس ودارت عينهه وضلت ساكته بعدين
كالت ...
- حافظ عليه هذا طلبي
- محفوظلج دايماً .. هالسنه الثالثه وانه اكلج بيهه
اضلن انتظرج تبردي بيوم انج ترضين بملكه
- امم .. راح اكوم انام تصبح على خير
— تلاكين الخير

راحت وانه جريتلي جكاره ثانيه وضليت اتامل بهالسما ماعرفن عليش يهدا فكري من اعاينلهه

ثاني يوم جنت بالهور اتمشى وخابرني صياد
كالي الشيخ يريدك عاد رحتله كبل طبيت لكيته
وحده كاعد ...
- ها شيخنا گوه الله حيلك
- الله يگويك اكِعد بعد عمك رايدنك بسالفه
- اي تامر
- شايفلي هالكاع الي غاد من هالديوان
- هاي يم الكرنطوز !! (شجره القرنطوز)
- اييي هيه
- اي شمالهه
- اريدن ابناهه للريم
- ايي بيهه الخير ان شاء الله
- انه وديت عليك عبن اعرفنك تعرف جم واحد
من الخلفات موش جنت تشتغل بالولايه وياهم
- اي اي
- اي واريدنك تكضلي هالكاع وتسلمنياهه مفتاح
- صاار غالي والطلب رخيص
- بعد عمك اعتمد عليك عبن انه هالسالفه ماريدنهه تطلع لبني ادم لين تتم عله خير وانته رتب امورك
وشوفلي شيحتاج ميحتاج وتعال ليه حته نرتب حساباتنه سويه
- ان شاء الله ظرف يومين واردلك خبر
- ان شاء الله
- شيخنه ولو تدخلن مني لجن يمتى الخطبه تصير
- انه تفاهمت ويه عمامهه وكلتلهم اكمل البيت واجي عبن انه ناوي بحيل الله اسوي كعده السيد
والمحكمه فرد اسبوع
- اي زين تسوي والعرس
- جاي افكرنله فرد سالفه بعد موش اكيده
- الله كريم
- خلي بالك ان انسالت عله هالبيت ماتكولن هاذ للشيخ
- جا شكول
- كول انه ليك واليسالك عله فلوسه لو شتسوي بي
كله مالكم دخل عبن ياوليدي خلهه بالك الوادم من تحط خشمهه بسالفه تخرب بالساعه ماتطول
وانه ماجبتهه الا بالمر خلهه تكضي بالخير
- هاي شيخنه يجرالك التريده
- الله يخليك .. امش رد شمسه لاهلهه ابوهه نشدني عنهه هاليوم وانه كلتله ترد العصر
- ان شاء الله تامر انته وشمسه
- هاااا
- اتغشمر شيخنه
- ههههههه روح روووح يلا لاتضيعين الوكت
- يلا اودعناك
- الله وياك

طلعت ورحت كبل لبيتنه وكعدت يم جدتي مطره
اتدفى عبن صوبتهه ليل نهار مشتعله ودزيت
يصيحون ربى .. اجتي ويه زهره وجنهن متراضيات ...
- ها شهاب ردتني
- اي الشيخ وصاني اردج لاهلج اذا تردين حضري روحج
- اي يلا ماشي

طلعت وانه اسمعن زهره تحجي عليهه وتريدهه تضل وانه هم بنفسي اخليهه تضل عدنه لجن بعد
الاوامر ماعليهه نقاش ..

بين ما هيه تسلم عله جدتي ومرت ابوي انه رحت
شغلت السياره واجتي هيه وطلعنه ...
- ان شاء الله كعدتج بينه ماضايكتج بشي
- لاا بالعكس ارتاحيت اكثر هنا ويه زهره
- عليش ماجنتي تجين كبل
- لان استحي ماجانت عندي علاقه بيكم مثل هسه
- بعد منا ورايح ممنوع تباتين بغير بيتنه
- الله كريم
- صدك عرفتي مدري لا
-شنو
- الشيخ وصاني ابناله بيت حته يكعد بي ويه الريم
- صددك وين
- يم بيته جدامه يصيرن
- ايي واخيراً راح يخلص منهم يالله شكد جنت اتمنى هاللحظه تجي واشوفه بيته ويه شمس
- هههه تحسسيني انتي امه وتمنين تشوفين يكبر
- اممم هو اني هم هيجي مداريته من كد مااحبه
صرتله مثل ام ابيها
- نياله بيج .. هاي انتي هيج حبج جبير يصير
- بس للي يلامس روحي هيج يصير
- دليني الدرب وانه اجيه مستقتل
- هههههه ماتكدر
- علييش
- صعب مو بالشي التتخيله انته بعدك مفهمت اني
شنو اريد من تفهمه يلا تكدر انته تجاوب نفسك عله هالسؤال
- سهله ان شاء الله

وصلتهه للبيت وطبيت سلمت عليهم وطلعت رحت
لجماعه اعرفهم وكعدت حجيت وياهم عله البيت
وهمه هم دزوني عله جماعه رحتلهم ثاني يوم
وضبطت كل الامور ورحت للشيخ تالي الليل
وكعدنه رتبنه الخريطه وانطاني فلوس حته ابلش
بالبناء ... 

وبظرف اسبوع حطينه الاساس وانه جنت كل يوم
من الصبح اكف وياهم لحد مايرحون العصريه
واكلهم كله جان مسؤوليه اهلنه هو الشيخ يدز كل
ليله علاكه محمله باشكال للريوك ويضل الغدا
من اهلنه يسوه ...

وصار وكت رجعه الدوام واجه بسام سلم علي
وربى ماشفتهه غير دكيكتين من طلعت من بيت
الشيخ سلمت علي ومشت للسياره ويه اخوهه

التهيت هالشهر كله ويه العمال وهوه الشيخ ماينطي مفكه كل مانخلص شغله زركني بفلوس
وكال كمل الباكي .. نوبات انه اتعجب علي منين
يجيب كل هالفلوس !! عبن بس لعيون هالشمسات
يطلعن غير شغلات ماينشافن ..

انه ابوي كل اسبوع ويجيني هاا ومنينلك وشتشتغل من وراي وماعرفن بيك !! ساعه يسويني ويه
المسلبجيه ساعه يكلي تجيبهن بالفايز ساعه يطلعني
اشتغل ويه احزاب وانه كل يومين وتكبلي عركه وياه .. اخر شي كمت مالفي بالبيت اكضيهه يم
العمال لو يم نعيم واجي عله كد اسبح ابدل واطلع
حته نوم كمت انامن بالمضيف مال الشيخ
وهوه فهمهه ويكلي تحمل كلهن جم يوم ويكضن

عاد صار وكت الي لازم نروحن بي نختار سيراميك  .. واحنه صرنا نطلع بالختلات وكلشي سكوتي بينه ..

لحد ما كملناه للبيت عكب اربع شهور وركض ركض كضيناهه ... ضل الاثاث هم طلعنه
وجنت اشوفن الشيخ مضايك وبعد ما لحيت
عليه يلا حجه وعرفت منه فلس ..
عاد انه كتله اختارهن  وانه ادفع هوه مارضى
عله هالسالفه لجن انه لحيت عليه لحد ما قنعته
و ثاني يوم اخذت فلوسي الي جنت ضامهن حته
افتح المختبر الجمعتهن من شغلي ذيج السنه
ورحت دفعتهن لاثاث بيته ....

والمشكله الصارتلي هنايه .. اهلنه جلبو الا يعرفون من حيكعد بهالبيت وزهره جلبتلي
اكعد وياك وعليش مابانيلي حجره الي ومرت
ابوي من جهه تكوم وتكعد وتكول هاي لبخت
الحبيبات يصير .. وكل يومين يجيني ابوي
مشتط اعصاب ودكه ومدكوكه من حيكعد بي
ومنيلك هالفلوس ....

مااخلص منهم الا بطلعان الروح وانه دايماً
مكفل البيت ومفتاحه بجيبي .. وحته التنظيف اخذ
الولد جماعتي بنص الليل ونطب انظفه حته
لحد منهم يضل طاب طالع عليه ...

ربالي عله هالبيت جذبت بي لحد ماعجزت كامت
الجذبات تشبج علي واجيبهه منا واوديهه منا ..
لحد ما كال الشيخ راح نكطع مهر ..

عاد انه هنايه اجيت اهلهل لو اعرفن من كثر
ما جنت مخنوك من هالسالفه وراح تنحل وارتاح

وبهالفتره كل الطلاب خلصت امتحاناتهم وعطلو
وربى بيت اهلهه لجن انه ماصحلي اشوفهه طول
هالفتره ..

و بعد يومين طلعنا ثلاثتنه هم من الصبح بسكوت
ورحنا للموصل حتى نكطع مهر وبالدرب هم
اجوي ويانه الجماعه هذولاك نفسهم وتوكلنا

والي عرفته ان الريم من طلبت مهرها كالتله
شني اغلى شي بدينكم  اريده مهري ..
فالشيخ اخذلهه كتاب القران واخذ وياه كلاده بشكل الصليب فضه هاي مهرهه وجانن مسؤوليه ربى
شايلتهن بصينيه مذهبه محطوط القران عله اليمنه
والصليب باليسره ...

وهناك تلكونه باحسن ملكى وانه الزلم كلهه معگله
وهوساتنه للشيخ رجت البيت رج بحيث كل المنطقه التمت جدام بيتهم تعاين ...

والجماعه ضيفونه الكيك والعصير لجن احنه
طلعنه جواعى فواحد من الشيوخ من اول ماصعدنه السيارات خابر عله الشيخ وكله
غداكم عله حسابي امشو ورانه للمطعم ..

انه كلشي طار من بالي وضلت بس ربى شلون
اكعدهه بنص هالزلم !!!
- شيخ انتم روحو انه ماريد
- شني عليش بويه
- شيخ شني انه اضلن ويه ربى هنايه ماخليهه اطب ويه هالعگل
- ومن كالك انه اخليهه تضل شني البت ماتجوع
ماتريد تحطلهه لكمه بحلجهه
- يعني شني
- يعني طبو اثنينكم اكعدو بجهه واحنه بجهه
شني البيهه يعني
- ربى يعجبج هالشي
- مادري كيفكم
- شهاب سوي مثل ماكلت  زين
- زين شيخ زين

ماجنت راضي عله هالطلعه لجن ماترهم بعد
وطبكنه يم مطعم وخليتهم كلهم يطبون يلا نزلت
وياهه وطبينه وراهم ..

همه طبكولهم ميزين وكعدو واحنه بميز وحد
انه صرت مجابلهم وهيه بظهرهم ...

- شهاااب
- ها
- اي كافي تباوع هيج دتحسسني كاعده بغابه مو مطعم
- بويه غير اخافن عليج من عين هالوادم
- هسه اعتبرهم ناس حالهم حال هالبقيه الكاعدين هنا عفيه انساهم وخلي ناكل براحه
- يلا بويه هاي نسيتهم

صارت هيه تختار الاكل وانه صافن عليهه گلبي
موجر شوك ليهه وحالي ببعادهه بس الله يعرفه
صح اطلع واطب واشتغل لجن روحي فارغه
وعيني ماتمليهه غير جيتهه مدري الله شبلاني
بهالحب هاذ مدري منين طاح عليه ...

بين مايجيبون الاكل انه ضال صافن عليهه وساكت هيه كطعت هالسكات وكالت ..

- تدري الريم تفاجأت من شافت الصليب
- اي توقعت
- هي كالتلي ليش جابلي صليب اني كتله دينكم
فكلتلهه احنه من ضمن دينه حب دينكم والنبي
عيسى مكمل دينه وصاحب لامامنا المنتظر
وهذني اغلى شي بدينه وجابهن الج
وهي كلش فرحت وجانت كلشش حلوه ولا عبالك عمرهه ٤٠ تخبل شكد نازكه ومرتبه
- مثلج بنيتي
- ههه شكراً
.
.
- شبيك شهاب شو جنك ممرتاح
- خلي ناكِل هسه مو وكت سوالف
- ماشي

بدينا ناكل وانه بكل لكمه اعاينلهه واطبع ملامحهه
بالي .. ماكدر اكولن تغيرت وصارت تحس شي
تجاهي جيف انهه شايله الكلافه بينه وتصرف باريحيه عبن هيه دومها هالشكل من يوم العرفتها
وهيه ماتحسب حساب لهالشغلات وياي وتخليني
محتار لا هيه التخجل بشي جدامي واكولن تغيرت
ولا هيه العدهه فرد تصرف كبل مامسويته وهسه
سوته واكولن كامت تتكربلي .. وضال بصفنتي
وياهه وحيرتي ...

كملنه اكل ونزلنه الجاي وصرنه نشرب وهيه
عينها علي وجنها تفكر بشي ...
- شنهي بالج سولفي
- دتضوجني هواي
- النووووب خايبه هوه انه شمسويلج
- ماكتلي شبيك
- كولي انتي بالاول
- هوه لان مدتحجي اني ضجت
- هااا
- شنو عندك مشاكل بالشغل او شي
- لا هيج شغلات انتي ماتحبين تعرفينهه
- هاا الله يهدي بالك

كالتهه وشالت استكانهه تشرب ودارت عينهه
عني .. انه فهمت من هالرد الجامد هاذ انهه عله
حطتهه رافضه لساعهه وماتريدن ينفتح هالطاري
عاد انه سكتت وضميت كسره كلبي بكلبي ..

شفت الشيخ وجماعته كامو ومشو جدامنه عاد
طلعنه وراهم وكملنه دربنه ..
وانه مدري شجاني الدرب كله متكئب وبس ادخن
وانه اسوق حسيت عله ايد الشيخ عله جتفي عاينتله
وهو طبطب عله جتفي وعابنلي بنظره حنيه وتبسم
مافهمت عليش سوه هالشي لجن ماجان لي خلك اافهم منه شي بس اريدن اصل البيت ..

و منا لحد ما وصلنه انه خلصت الباكيت كِله
واول مانزلتهم البيت طبكت السياره ومشيت
للنبكه وجانت الدنيا ليل مامش حد هناك ..

ضليت اروح واجي من يمهه لحد ما فكدت اعصابي وضليت اصرخ وانه اضربن بالشجره
واكولن ليييش لييش تضلين تاذيني هالشكل لا بكربج ولا بعدج مرتاح يالعنه صابتني بيج

كعدت من الجهه التصد عله الماي واسندت راسي
عليهه وانه اهجس التعب بجسمي وبراسي الي صرت اهجسه يتراخى من كثر الشد الجان بي

هالمره انه حيل كرهت حبهه عبن صرت اشوفن نفسي مايجيهه بس الاذى منهه وضال مجلب باذاي
سمعت صوت رحيم وراي انداريت وشفته جاي صوبي ...

- هااا يالشهب وينك مامريت علي اليوم
- هلا خويه جنت طالع بشغله وهالساع رديت
- ايي نشدت عليك كالو خذا الشيخ وبنت عمه ومشو من الصبح بس ما عبالي تطول طلعتكم هالكثر كلت ساعتين ثلاث ويردون
- لا شويه شغلتنه بعيده وتاخرنا
- شبيك خويه شكلك متعوب وصوتك مختلف
-  مامش شي
- لااا لاا مادام بيهه مامش يعني الكلب متعوب
سولف بعد اخوك
- بالله اسالك انه عليش كاتل رويحتي عليهه
هاا عليش موكف حياتي ليوم جيتهه
_ هاي ياخويه موش بلايد وسببه يعلمه ربك
-  انه موش جنت مكفل هالباب وحالف مااريدنهه
شمالني تغيرت وصرت اناطر حته خيالهه ياخوي
انه مالي حمل هاالحب تعبت منه هاي ثلاث سنين
انه دافنه بهالصدر وهوه جنه يزيد ماينكص هالحجي والمشاعر كلهه متراكمه هنايه جاي تخنكني بظلتهه وهيه لا من انفتح طاري هالموضوع كبل تجمده بجلمتين منهه شسوي بيهه
ماعرف وحك علي ملت روحي
- شهاب خلنه نحجي الصدك
- اي
- انته يمتى شايفهه حته تريدن منهه تجيك عله هواك وهيه شتعرف منك غير المشاكل انه وجم
مره كتلك جيبهه بالمسايس هدي اعصابك وياهه
هالبت مهره صعبه رادلهه صبر وخلك طويل
انته من جلمتين منهه تشب النار بيك وتعلكهه بينكم
- بويه هوه انته سامع حجيهه تزرف بي الروح
وانه شني متغاوي عليهه واجي اعاركنهه بويه
انه اريدنهه شاريهه بماي عيني وهيه تعزز علي
-افهمك ياخويه بس انته لازم تخلي بالك ان كضيتك موش هينه عبن البت ماناويه تحب
وتراها مبينه من ترباتهه وطبايعهه البت بالهه
شي تريد تناله ماتدور تمعشك ولا حته الزواج
يمكن خالته اخر شي بالهه هاي اذا خالته
- وشمعرفك انته
- جا هيه مبينه رادلهه روحه للقاضي البت ماحجيتلي عنهه غير هذن الكلتهم الك شني جايب
من جيبي
- نعيم اذا هيه ماتريدن تحب ولا تزوج انه شلون بيه وياهه
- كدامك حلين
- اي شني
- يا تصبر وياهه لحد ماتنال الي بالهه وتصير وياهه مثل الشيخ حته تامن بيك وتحبك وهنايه
لازم تحمل كلشي وماتضل تون من صدهه ولا اي شي يبدر منهه
- والثاني
- يا تنساهه وتشوفلك الحرمه الي تنسيك وتملي حياتك بدالهه
- انساهه !!!! شني انساهه انه حته طاري هالشي
ماحاطه بالي من يوم الدك كلبي ليهه لهاليوم
لك انه مااتخيل ايدي تكض غيرهه واعرفن برويحتي ماتكدر عله هالشي لو بعد ميه سنه
- جا مالك غير الحل الاول
-  وهوه هم هيج تاليهه ان رضيت او مارضيت
انه مالي غير اصبر وياهه
-  شد حيلك ياسبع والمفروض تتفاخر عبن مهرتك اصيله وصعبه انه اعرفنك تحب الصعب وتجيبه
شغل عكلك وياهه وجر خلك وان شاء الله من نصيبك
- ان شاء الله ،، الله يكويني عليهه

جيه نعيم ريحت كلبي شويه وخففت عني همي
عبن عرفت انه مااحيل عنهه لو موش بالاذى
وانه صبرت ليهه هالسنين وكل تاخيره بيهه خيره
نصبر والله كريم ...

وره اسبوع سمعت من الشيخ انه راح كطع مهر
محكمه وحده وكال العرس مايصير هنايه
متفكين يروح ياخذهه ويطلع كبل لسليمانيه
يضل اسبوع ويجي بيهه هنايه ...
ووصاني كبل رجعتهم اروحن اجيب امهه وابنهه
واكعدهم بالبيت واديرن بالي عليهم ...

وصدك هوه ماجذب خبر وره اربع ايام راح
وحده .. عاد انه ضليت محتار هالجماعه من اجيبهم شكول لاهلنه منين هذول !!!

ضليت محتار بهالسالفه وكل يوم اكولن خلي
اكله هوه يجبهم وبعدين اكول همه عرسان ودربهم طويل ويصيرن هيج عليهم بدال الدرب دربين
وانه وعدته اجيبهم عيب اخلفن بالوعد ..

جان كلت خلي احاجي ربى لازم تساعدني بهالسالفه انه اذا جبت المره شلون اضلن مجابلهه وكاعد !!

كمت خابرتهه وهيه تشلع الكلب يلا تجاوب ...
- هلو شهاب
- هلا بيج شلونج
- بخير وانته شلونك
- موش بخير عبن مستعد لطركاعه ثانيه حتطيح براسي
- خير ياستار شكو
- مو تعرفين شيخج راح تزوج
- اي
- اي واهل مرته يريدني اروحن اجيبهم باجر
واكعدهم بهالبيت زين انه شكول لاهلنه هنايه
هوه بالف ياعلي سكتتهم لهالساع من سالفه البيت
النوب اجيبن وادم واكعدهم بي شجذب هالنوبه
فهميني
- ايييي ادري والله صعبه وكلهه وكعت براسك
- بعلي ابوي شيبه لراسي بس اريدن يجي الشيخ ويه حرمته واكله هاي شوف موش انه حته اخلص من النك
- هههههههههه هسه انته شكو عصبي
- باع هاي البطرانه بويه انتي تفهمين شجاي احجي انه لو شني اكلج باجرررر لازم اروحن
اجيبهم راح تعلك هنايه
- جيبهم هسه هي اول وتالي راح تنحجي السالفه
- اييي يعني باجر اكللهم هذول اهل حرمه شيخ الجديده واخلي مرته تحرك هالبيت عله روسهم
- شسوي لعد شنو تكللهم اهل مرتك هم لازم تحجي
بعد سالفه ماتنضم وهو بكل الاحوال راح يجي ثاني يوم ويتفاهم وياهم
- الصراحه غلط منه ساكت لليوم المفروض يكعد يتفاهم ويه مرته حته لاتكب العيطه بطبه الجديده
- هو مايحب يشورهه بشي
- ميخالف هم تضل مرته والهه الحك تعرف بزواجته
- القرار اله بهالناحيه .. هسه باجر تروح مو
- اكيد اي
- لعد اني هم راح اجي حتى اشوف الحجيه واضل يمهه لحد مايجون ثاني يوم
- والله ياريت تجين عبن انه محتاجج بهالسالفه
- لا طبعا اجي هاي مسؤوليتنه اثنينه
- يلا جا باجر خلي بسام يجيبج الظهر حته ويه وكت رجعتنه
- ماشي
- يلا اخذي راحتج
- مع السلامه

سديته ورحت نمت حته من الصبح اطلع وبعد
الله اليستر شيصير من هالجيه ...

طلعت الصبح اخذت سياره ابوي وكبل للموصل
وصلتهم ويه اذان الظهر وهمه جانو متحضرين لامين كل غراضهم وبين مالبسو وقفلو البيت
وطلعو سلمو عله الجيران وامنوهم عله بيتهم
واجوي صعدو .. جان ابنهه الي اسمه  "لابان"
وهو ابيضاني حيل واذا ضحك كبل ينكلب وجهه احمر دم يصير وطوله زين لا كلش طويل ولا كصير  وجسمه متروس شويه ....
هوه مواليده ٩٤ يعني عمره ١٧ سنه الي عرفته
ان امه جانت حامل كبله بتوم وماتوببطنهه وصار عدهه مشاكل بالحمل وتعبت يلا صار عدهه البنيه
ووراهه يلا جابته والبنيه بال ٩٦ ماتت .. فضل
هالولد المدلل مالهم ومشيطن وعينه زايغه ماخله بت ماكصهه من فوك ليجوه ..

الدرب كله اكولن الله اليستر من جيته شراح يسوي بالسلف وبله هالشيخ حيكدر عليه ويادبه من جديد؟؟ لو هم يعوفنه يصيع هناك !!!

جانت ربى تخابرني كلساع بالدرب وتسالني
وين صرتو ومن وصلنه كبل دكيت عليهه حته
تلحكني للبيت ..

طبكت السياره جدام بيت الريم وجانت دنيا غروب
الوادم كلهه ببيوتهه محد شافهم .. عاد كبل طببتهم
جوه والحجيه بالكوه مشيتهه عبن كرسيهه مسفط
ويه الغراض بالصندوك وانه بس اريدن اطببهم
والله هالشيخ سوه بيه سوايه الماتنحجي ..

عاد توهم كعدو وسمعت الباب انفتحت وكبل
طبت ربى وهيه تلهث عاد اجتني وكبل حجت ..
- يعني وين تاخرت مو تدري بيه هنا من الظهر
شلون تعوفني وحدي هيج
- هاي شبيج ربى منا الولد كاعد
- اووف ياهو .. هاا هذا ايي والله نسيت هاي من
وره سوالف اختك براسي نسيت حتى جيتهم وخر خلي اسلم

انه صافن عليهه هاي شجاهه !! مو عوايدهه هيج تحجي ؟؟ راحت سلمت عله الحجيه وبعدين من بعيد سلمت عله لابان وهوه يردلهه السلام وعينه
تتكلب عله طولهه جان كبل رحت كضيت ايدهه
وجريتهه للمطبخ ..

- هاي شبيييك
- انتي يمتى تحسين عله دمج وتزحزين من هالمجان ماتعاينين شلون كصه لطولج كص
- اي شسويله دعوفني
- رببببى مره الثانيه ان تكرر هالشي اسوي الشي المايعجبج زيييين وتعرفيني من احذرج ماتهاون بعد
- اي اي فهمت
- زين انج فهمتي ... احجيلي شمالج شبيهه زهره وياج
- شهاب ابد مو مال حجي هسه اببببد راسي
احسه راح ينفجر اااخ يمه انته كله صوجك صوووجك ماكلتلي تعالي العصر اصلا شكو
جايه همه حينامون هسه المفروض اجي باجر
بس اني ثوله اجيت ركض
- هههههههه هاي شبيج بنتي شجاج تسودنتي
شعامله بيج زهره جنها ساطرتج بالحجي
- عوفني رحمه لاهلك يمه رااسي اكلك عفيه
لا ترجعني لبيتكم خلي نبات هنا
- وين تباتين وهاذ المصكوع هناااايه ربببى لاتخليني اطلع عن ديني
- ايييي هسه شخبصتني بي هسه عود ابقى يمي
مايجي هو
- هاي صدك يعني ماتريدين تردين للبيت !
- اي والله اني اذا اضل ساعه لخ هيج اموت
واذا ما متت يغمى عليه مابيه حيل بعد ابد
-عهههههههه يابويه هاي المسودنه شعامله بيج
بس فهميني
- كتلك ماحجي هسسسه عوفني .. كلي هذوله هسه
متعشين لا !
- لا ممتعشين بعدهم
- عفيه مابيه حيل اسوي والله
- امشي كولي لزهره تسويلهم
- لااااا لااا فدوا اروحلك لا تكللهه ولا شي اصلا هيه متدري اني اجيت هنا بس كتلهه شهاب يريدني وشردت كبل
- هههههههههه جا شلون
- جيبلهم اكل من بره اي شي عسى ما قوطيه وبسكت بس مشيهه لهاي الليله
- والله وراج سالفه انتي ولا انج ماتصلين لهالمواصيل هيج
- شهاااب
- فهمت بويه فهمت رايح اجيبلهم اكل
- جيبلي براسيتول مهدىء منوم اي شي الجان
مو تنسى
- عدنه بالبيت بنتي كلشي اكو
- ماارجع مااااارجع
- ههههه هاي بويه لا ترجعين ضلي اني اجيبلج
بس هااا عينج من هاذ ولا اكلج راح اخذه وياي
- صدك تحجي وين ماخذه
- شني اعوفنج يمه ويضل يكصص بعيونه عليج
بعلي اكص راسه .. اخذه وانه الممنون بس لا يضلن هنايه ويخليني اهوجس
- ههههه دخذه عيني اخذه بس خلصني هسه اليسمعك يكول حوريه وخايف عليهه لما جايه
بعباتي
- كمر بهالعباه يرويحتي
- شهااااب
- اودعناج

رحت للهول واخذته وياي بالسياره ورحنه حته
نجيب العشه وضليت بالدرب اعرفه عله هذا بيت
فلان وهاي كاع فلان وهوه بس يعاين ...

جبت العشه واجيت حطينالهم الصينيه وربى
راحت بحجره الشيخ تمددت جان رحت ليهه
- اكلج كومي وكلي هاي المره ماجاي ادبرهه وحدهه
- اجيت هسه

وكامت راحت يمهه كعدت توكلهه واداريهه
وهيه حجرتهم جانت حاضره اخذناهم ليهه
و وره ما تطمنه عله نومتهم طلعنه وسدينه الباب
جان ربى عاينتلي بتعب ومشت جدامي جان جريت ايدهه ..
- اكفي
- شكو
- شمالج فهميني ضل بالي عليج
- اريد اناام شهاب راسي يوجعني
- زين امشي تمددي وانه هسه اجيج

مشت هيه لحجره الشيخ وانه رحت لبيت الشيخ
عبن لو روحن لبيتنه تلاكيني زهره وشيخلصني
فرحت ليهم وخذيت براسيتول ورديت للبيت ..

جان يلاكيني اخوي محمد ..
- هاا خويه وينك من صباح الله طالع
- بعدين خويه
- شني بعدين فهمني وين ماشي
- لبيتي
- هاا شعندك هناك
- خويه كتلك بعدين انه باجر بس اصحصح شويه احجيلك كل شي بس هسه ترخصني شويه
- هاي خويه مرخوص
- تصبح عله خير .. ها صدك اكلك اذا زهره نشدت عله ربى كللهه يم شهاب ومايردهه هالساع
- هااااا اي هيج احجي شعدكم فهمني
- البت مريضه وهاي شوف رحت اجيبلهه علاج
ورديت ليهه مدري هاي اختك شعامله بيهه ساطره راسهه وهذيج وينهه البت مجضوعه وتون
- عليك العباس
- اي والعباس هاي ماتشوفن البيدي
- خرب بحظج يزهره ماتسكت عمي ماتسكت
وهاي وين متعلمه تحجي حته تسمع لغوه زهره
- هههه هسه انه مدري شبيهه وياهه خلهه تصحى شويه وافهمن منهه السالفه بس انته سوي مثل ماوصيتك كللهه يمي وماترد زين لاتكلله مريضه
- اي ماشي خويه ماشي
- يلاا روح للبيت
- تصبح عله خير خويه
- تلاكي الخير

طبيت للبيت وكفلت البوب ورحت لحجره الشيخ
فجيت الباب عله كيف وطبيت عاينتهه متمدده
وحاطه المخده عله راسه .. اجيت ليمهه وكتلهه..
- كومي جبتلج هالحبايه اخذيهه
- اي والله عشت.

كامت عله حيلهه واخذت الحبايه والكلاص وشربتهن .. وردت تمددت  وانه كاعد عله الجهه الثانيه بالطرف واعاينلهه غمضت وحركت راسهه شويه وانه هنايه طاحت من ايدي زمام الامور
تهت بيهه احبنهه وعلي كل ساعه اكرهن هالحب
بيهه اكولن خاف انه ماحبنهه وهيج موهم نفسي
لجن ساعه الاشوفن رويحتي تخرب جدام طولهه
واضلن حاير شلون اداري شوكي ليهه وهيه جدامي هنايه ابصم بالعشره عله حبي ليهه ...

هيه ومغمضه كالتلي ...
- زهره اليوم كضته بس تحجي عليك
- ماتجوز هالبت
- تكلي راح يتزوج عليج ياثوله روحي لحكي عليه
- ههعععععععااااااي شمالهه هاي
- والله تكلي من مشاكلج ضيعتي من ايدج وهذا هو
شلون كام يبني حياته بعيد عنج والف وحده حاطه
عينهه عليه ونسوان صديقات عمه. ام محمد ع اساس كايمات يتلوكلهه ويطلعن بناتهن وياهن من يجن عليكم حتى بلكي تنعجبلك بوحده منهن لو هيه عمه تختار فد وحده منهن الك
- يمتى هالحجي صاير بويه لا تصدكين انه اصلا حته مالفيت بالبيت كل هالشهور هاي روحتي تصيرن بس اسبح لو ابدل واخذ فلوس واطلع
لج من وره ابوي وسالفه هالبيت كمت انامن بالمضيف يابنات ياصخام هاي شمسلته براسج
- دسمع بعد ... تكول انته صاير تشتغل ويه الاحزاب بالختله وماشيلك ويه جماعه كلهم
واصلين وصاير ماتحب اهلك وبس تريد تخلص منهم وتكعد بيتك الجديد وتكول اكو ع اساس وحده تاخذ خيره هنا ورايحه ماخذتلك وتكول ام الخيره
هاي اكو وحده مسويتله عمل ومغمضه عينه عن اهله وناسه وتريد تاخذه وتطلع وهالوحده هو مسلمهه نفسه ومامن بايدهه وهي بس تضحك عليه
-خخههههههخخخخخخخههخهههههههههههاااااااي
اووويلي بويه شهالكارثه هاااي انه شبلاني يرحم اهلك ياشيخ رد وخلصني طلعت انه النوب ساحريلي وصاير طلي بيد مره بويه انه المره الاريدنهه شاله حاااال حالي بعلي انه الجلمه مامحصلن منهه النوب اطلع مسلمهه روحي وامشي بشورهه هيه موش بلاول تكلي شلونك
- اممممم لتضل تبسمر اني صوجي وحجيتلك
- ياخايبه جا ماتعرفين تردينهه بجلمتين تصمين حلكهه
- اني كلتلهه هاي دجاله وكلشي متفهم وعيب عليج اادورين وره اخوج هو حر بحياته وجبير وواعي لتصرفاته وان اختار فو النعم من اختياره لانه ابن شيوخ مايختار الا الاصيله
- اي هاذ الحجي الزين .. مادامج تعرفين انه مختار الاصيله عليش تطوليهه وتشلعين كلبي
- لان ممكن تكون اصيله بس مو مناسبه
- بشني ما تناسبيني احجيلي بله
- بشغلات اني اعرفهن وكافي
- شني بس معرفتج تكفي جا وانه بيمن اصبر كلبي عليج
- شهاب تؤمن بالقدر
- اي
- لو جان بيدك تكتب قدرك وكدامك اختيارين
ياما تكتبه ويه بنت تحبك وتكون طبيعيه وياك
وام جهالك وحياه مثاليه بدون تعب او تكتبه وياي
بمشقه وتعب وهواي بجي واذى
كمل صفنتك بهالسؤال لاني ماريد جواب وليد لحظه اريده وليد تفكير وقياس لعمق قدرتك عليه
والك كل الوكت
- راح تنامين هنايه
- اي نعست
- زين انه حنام بالهول
- عادي خليك هنا ماتضايقني بشي اخذ راحتك اني
هسه احسبلي للخمسه تلكاني نايمه
- هههه ماشي جا احلامج سعيده
- اممم
.
.
يتبع تكمله باجر باحداث اقوى