رواية من فجر ديسمبر الفصل الرابع والعشرون 24 - بقلم Zoka 🌷

من فجر ديسمبر
🍁
🍁

جريتهه وغمضت وخليتهه عله عيوني
- احبن ايدج البارده لساعني مانسيتهه من هذيج السنه لليوم
- اممم
- مو تشيليهه عليج النبي
- ماشي

شويه وغفيت عله بروده ايدهه ... حسيت عله
صوت دك عله الجامه اجيت اندار جسمي متيبس
بالكوه كدرت اشيلن ايدهه من عيوني وعاينتهه نايمه .. انداريت واشوفن ضوا لايت وزلمه واكف
نزلت فتحت الباب وحاجيته ..

ضل يسالني شعندي هنايه ومن هالبت الوياي
وكتله جايين من العماره لفد شغله هنايه و مانعرف
احد وتعبانين ضلينه نايمين هنايه ومن الصبح نطلع
فدلاني عله بيت كال هاذ بي ياجرون غرف روحو
اخذولكم وحده وارتاحو .. تشكرت منه ورديت
للسياره ...

تمددت وانداريت عليهه .. وصفنت بيهه ..
جانت مغطيتني بالعباه بس من خبصتي بالكعده
مانتبهت عليهه ومن جيت اصعد لكيتهه واكعه
وشلتهه .. الجو جان بارد حيل شغلت التدفئه
وضليت صافن عليهه .. بعدهه ماده ايدهه لجهتي
شكثر احبن حنيتهه المدفونه جواهه ومغلفتهه بالبرود ..

ماعجبني اكعدهه واكطع نومتهه واكطع عليه
شوفتهه هيج ضليت صافن عليهه واشبع عيني
من حسنهه لحد ماغفيت ...

كعدت عله صوتهه وعاينت الفجر طر ..
- صباح الخير
- صباح النور
- ربى بروح العزاز فرجيلي جتوفي مربطات
تربط من هالنومه
- لا والله .. كوم سوي رياضه وهنه يفكن.
- بويه وين اسوي الرياضه لا تسودنيني
تره مااحرك اضل هنايه وانتي كيفج
- انته وشلون وياك يعني
- فرجي فرجي يلا بنتي يلا
- خلي نرجع للبيت واني اطلعهه من عينك اصبرلي
- كلشي منج عسل عله كلبي
- اممم

انداريت ونمت عله بطني وهيه تفرج بجتافي
وركبتي بعصبيه ادوس بيهن ادوس .. انه بس
اريدن شي يلينهن اهجسهن مخيطات تخيط ومتيبسات .. عاد عله تفريجهه لانن شوي وكدرت اسوقن وطلعنه شفنه بوري ومايه جاري بنص
حوض زغير صاير براس الفرع .. نزلنه غسلنه
وشربنه منه واخذنه جرك وجاي تريكنه بيهن
وكملنه دربنه لكربلا ....

الصبحيه كلهه محمد حركه للتلفون علي كلساع
وينكم ووينكم وماوصلناهم لحد ماصارت ١٢ الظهرعود هاي احنه طالعين من الخمسه الفجر ...

طبكت السياره بالكراج ورحنه للحمامات غسلنه وتوضينه وطلعنه خابرتهم وتلاكينه بين الحرمين

- ها السلام عليكم
- عليكم السلام ها خويه حمدلله ع السلامه وين صرتو متكلولي
- بعد اخيك جا الدرب بعيده شسوي انه
- اي خويه اي دربك بعيده وشعرفنه احنه بدربك وين حته نعذركم
- هااا زهره بدينا
- اي خويه بدينا هسه تكلولي وين جنتم
- زهره حبيبتي تعبانين والله بس خلي نرتاح
ناكل تره طالعين من الفجر ومتكسرين
- انتي حسابج بعدين انه اعلمج حسبالج انساهه لج هاي روحتج انه كلت ساعه ساعتين بويه لليل
ويردون لجن تخلوني لثاني يوم بروحي ماعرفن
وينكم وشتسوون لاااا هاي مامرجيه منكم
- هههههه حقج والله كتلج تجيج السالفه بس خلي نرتاح
- زهره خويه فجيهه عاد شني ماتردين راحتنه انتي
- اي خويه اريدن .. ايييه يلا امشونه نتغدا
- خلي نزور ونطلع فد مره شتكول شهاب
- اي يلا مدامنه توضينا وصلاه الظهر هم صارت
فد نوبه نصلي ونتوكل
- يلاا شعدنه احنه امشو

طبينه اربعتنه زرنا وصلينه بالامام الحسين عليه السلام وردينه طلعنه زرنا العباس عليه السلام
وانه طلبت نذر من اهل البيت هالگلب الجليدي
يلين علي ويصيرن ملكي ونذرت اذا صارت
طلي اذبحه وانطي لعوايل الفقرا هنايه بكربلا

ورحنه عاد لمطعم تغدينا وافترينه اخذنه حلويات
للاهل وربى اخذت حلويات خاصه بس للشيخ
وماارضت الا هيه تدفع فلوسهن تكول هذني
مالات الحبيب مايدفعهن غيري ...

عفتهه براحتهه هوه انه جار خلك وياهه ضلت عله هاي .. ومشينه جان كبل مااطب للكراج اجتي ليمي ومحمد راح غادي وهيه اشرتلي ادنجلهه
وشاورتني ...

- شهاب هسه اني شكول لزهره من هسه مستلمتني تحقيق
- ومحمد هم ما كصر
- وشلون هسه شنسوي
- لا تحجين شي منا لِحد ما نحاجي الشيخ ذاك الوكت نشوف شنهي رد فعله يلا نحجيلهم وهسه
يزعلون يحجون معليج بيهَم
- ماشي اذا زعلت زهره اكللهه شهاب ميقبل هسه
زين
- عمي ذبيهه براسي امري لله
- ههه يلا امشي

رحت جبت السياره وطلعنه كبل للعماره
وبالدرب اشوفن زهره بس تكرص بربى جيف
ماترضى تحجيلهه وهيه ام لسان ماتسكت وضلت
تعد وتصف واحنه نضحك وهيه غاديه نار تاليهه
زعلت وطنكرت وضلت ربى تراضيهه تريد تعالج
ابد الا تحجولي ...

تاليهه انه زمخت بيهه يلا سكتت وهدت السالفه
بس انه اعرفنهه ضامتهه لغير وكت عبن هاي
الاذاعه زهره شلون يفوتهه حدث ماتعرفنه ماتكدر
اتضل تلوبن علي ...

وصلنه السلف وكت الغروب وانه اخذتهه لربى
ويانه مارديتهه لاهلهه حته نكمل شغلتنه ..
طبينه لبيتنه والوجوه ثكيله شوي عبن انه ماخذيت
اختي الثانيه بس زهره .. ومرت ابوي ماتصدك
تريدلهه سالفه حته تحش بابوي علينه وهاي اجت
ليمهه ..

رحنه كعدنه يم جدتي مطره وجنه جايبلهه كعك
وراحن البنيات صبن الجاي وكعدنه يمهه ناكِل
ونلاشيهه حلوه سوالفهه وهيه ماتكضيهه غير
" اااااا .،. اييييي ،. وانه امك يا منذر "
واحنه نصفط عليهه بهالحجي ونرد ليوره

تعشينه وانه طلعت للولد اشوفنهم وكعدت تعللت
يمهم وتالي من صارت ساعه عشره ونص بالليل
رديت للبيت .. شفت زهره تنظف بالمطبخ سالتهه
عله ربى كالت نامت بحجرتهه ..

عاد انه ماصدكت كبل طفرت ليهه ودكيت الباب
عله كيف متعمد حته لاتكعد وان حجت مالهه حجه
علي .. وطبيت واشوفنهه نايمه عله بطنهه والزنود
كلهه طالعه لابسه فانيله ربع ردن بهالبرد وشعرهه
الكصير منفش وهيه غاطه بالنوم ...

اجيت سحبت خصله من شعرهه تلمستهه بايدي
ورفعتهه من وجهه ...
- ربببى رببببببى كومي يلا
- هاي انته حته بالنوم تلحكني شتريد
- والله بويه انه ميت عليج وين ماترحين تلكيني
- اممم
- خاااب كوووومي ماصدكتي شني كومي ورانه
كعده ويه الشيخ شني نسيتي
- اي ايييييي
- يلاا شو كووومي جدااامي

شالت الغطى ووكفت وهيه تمط باديهه وانه انشده
عگلي بالبياض  وذاك الترف اليصيح هاااذ اني
لجن هيه ماهمتهه نظراتي ليهه كبل اندارت وجرت دشداشتهه وكالتلي ...

- ماراح تطلع
- اي يلا بساع البسي

طلعت وسديت الباب وضليت واكف وانه بالي
اعرفن هالبياض كله حينكشف عنه هالساع تسودنت ضليت ازخ بهالعرك وامسح بكصتي
عاد اجيت اصيح عليهه هي فتحت الباب وطلعت
ولابسه الدشداشه والشال ومشت جدامي نزلت
الدرج ونزلت وراهه وطلعنه تمشينه لديوان الشيخ
هيه ساكته وتلعب باطراف شالهه وانه عيني عليهه
وحاير شلون اطفي ناري منهه ...

جان اكو زلام اثنين جوه بالديوان فضلينه واكفين
بعيد لحد ماطلعو يلا طبينه ..

الشيخ تفاجىء من جيه ربى هالساع وكاملهه بلهفه
تحاضنو وهيه انطته علاكه الحلويات الجابتهن ليه
وكعدنه ....
- شمسه شني بويه من يمتى جيتي علينه وانه ماعرفن
- اجيت المغرب وجنت بيت شهاب يم زهره
- هاا من وين لج هالدهين
- مو هو جنه طالعين بكربلا اني وزهره ومحمد اخذنه شهاب البارحه
- اي زياره مقبوله بويه ان شاء الله دعيتولنه
- اي طبعا شلون انساك  بالدعاء شيخي
- والنعم منج بويه  شلونك شهاب
- بخير شيخنه دامك بخير
- عساكم بالخير دايماً

عاينتلي ربى وتاشرلي بحواجبهه احجي وانه اهزلهه بمعنى اي والشيخ يعاينلنه اثنينه تالي كال

- احجوهه بويه احجوهه هالواكفه بزدومكم كولو
- احمم شيخنه احنه بالاول نطلب منك السموحه
عبن انه وربى سوينه شي بلايه اذنك لجن من تعرفه راح تعذرنه عليه
- اي شيخي اني اسفه هاي اول مره اضم عليك شي وصدكني ماصار الا لخاطرك ورضاك
- هاااا كلتولي ضامين شي واثنينگم
-اي
- مسامحين مدامكم اعترفتم بي ماضللكم ذنب
احجو شنهي المضموم
- انه احجيلك شيخنه السالفه ومابيهه احنه جايبيلك
خبر يسر خاطرك .. هذيج الريم ياشيخ دزلتك
وصيه
- الرررريم ؟؟؟ وشوصلهه الگم
- احنه رحنالهه البارحه طلعنه من كربلا للموصل
متعنين ليهه
- شنهههههههي
- اسمعنه شيخ من رخصتك خلني اكملك السالفه
وانته احكم بالتريده علينه
- استغفر الله كملووو اشوفن شمدوهنين هناكه
- احنه تعنينه ليهه عبن سمعنه بالراح يصير
ليهه واثنينه ماكدرنه نسكت عله هالجاي يصيرن
بيكم انته ياشيخ عزيز كلوبنه وانه وانته نعرف لوعه الكلب شلون تصيرن ولو عايفين السالفه
جان راحت منك وهيه الزعلانه
- عليش زعلانه
- عبن تكول انته عايفهه وحيدهه بالمصايب وهيه
حته من جانت تكلك لا تريدن منك الازيد تضل مصر عليهه من شافت جفاك ليهه حست روحهه
ثكيله عليك وصارت عاديه ان حضلتج وان لا عادي ماتفرك هاي هيج جان بالهه .. واحنه حجينه
وفهمناهه شني الي بالك الهه وشلون كلبك بعده عليهه وشمسه شوفتهه الكلاده وهيه ضلت بس دموع تجري تالي ياشيخ امهه شجعتهه وكلتلهه
روحي عيشي وهي وصلتلك هالحجي ..
كالت ... اذا يريدني بعده خلي يواجهه هالباكين
عبنهم موش هينين وكالت ابني ماريد اتخلى عنه
خلي يشوفلي حل واصيرن اله ...

- شهتب متاكد هيج حجت من كل كلبهه لوبس تريدن تسكتكم وترحون

- لاا شيخ انه خذيت منهه جلمه يلا طلعت واسالهه لربى

- اي شيخ حته اجتي حضنتني وتبجي خطيه فرحانه من امهه وافقت وانطتهه الاذن بالزواج منك  وبعدين ضيفته حلاوه وعصاير اصلا كيفت بجيتنه عليهه ..صدكني تنتظرك  واصلا هي جانت
مقهوره لانك بعدت عنهه

- الله يبشركم بالخير مثل مابشرتوني يعني وافكت
اكيييد
- اي والله اكيد
- خطيتك بهالركبه شيخنه اذا رحت وطلعت منه حجايه جذب
- الحمدلله الحمدلله .. اسمعوني زين هاي روحتكم
حسابهه ماانساهه لجن خلي ارتبن اموري بهالسالفه وانه اعرفن شلون اطلعهه من عيونكم
- بالي تامره شيخي راضين بي بس سعادتك اهم شي عدنه

علت الضحكه عله وجه الشيخ وهوه يسبح ويردد
الحمدلله ...

- شهاب
- امرك
- باجر اريدنك من الصبح تلزم ولاد عمك وترحون الزرع وتسولي صوغه تسوه واريدن
من كل شي محملينه بالبيكم والي يسالك تكله
امر الشيخ وبس وهالحجي والصار مايطلع لبني
ادم لحد ما تنكطع انفاسكم زييييين
- هاي صار مثل ماتامر يصيرن
- شمسه دكيلي عله ابوج اريدن احاجي تضلين يمي هالجم يوم
- من عيوني شيخي

دكت عله ابوهه وهو حجه وياه وكله راح اتضل يمي ثلاث ايام .. وهيه تعاينلي وتضحك ..
- شمسه بويه باجر العصريه نطلع انه وياج وحيدنه من ادزن عليج تجيني حاضره بساع
لابسه ومكمله زين
- ماشي شيخي تامر
- اا وين ترحون
- هسه البت ماسالت انته عليش تسال
- مو كلت جوز اوصلكم شي
- لااا خلك بشغلك انته يادوب تلحك تكمل
- هاي صار

ترخصنه وكمنه بعد ماكل واحد اخذ الاوامر مالته
وردينه للبيت .. وثاني يوم من الصبح كمت كعدت
محمد ورحت عله صياد ومحمود وعلاء ابن عمي
كاظم ومسعد ابن عمي جاسم ووزعتهم كل واحد بشغله ..

وماخلينه شي بالزرع ماخذينه منه .. كل المخضر
والفواكه كله صناديك والتمر  وحته السمج صيدنالهم سبع سمجات والروبه والحليب وحته العسل هم حملناه بالسياره ...
بيكم كامله عبيناهه وغطيناهه لعيون هالريم

وللعصر سالت عله الشيخ كالو طلع ويه شمسه
وانه ضلت بالي وين روحتهم ...
بس من التعب وانه كاعد من الصبح ومناك تعب الدرب هذاك رحت ذبيت نفسي ونمت فد نومه
من هاي الزينه التنعنش جريتهه من الاربعه العصر لحد ال ١١ بالليل يلا كعدت ....

وطلعت رحت للديوان ولكيت ربى هناك ..
- السلام عليكم
- عليكم السلام بويه صح النوم
- يصح بدنك شيخ والله من التعب مال هالجم يوم كله تكوم علي فرد نوبه عاد ماحسيت عله شي
- يكون الله بعونك .. اي علمني شنهي الحملته
بهالبيكم شفتهه مجلجله
- جا شلون ماتجلجل غير ماخلينه شي ماحشناه
مليناهه تمر ومخضر ورارنج وبرتقال واللالنكي
وحته عسل هم حطيناه وضلت السمجات بالثلاجه
منضفات وكلنه يتجمدن عبن الدرب طويله ووياهن
اللبن والروب يمتى ماتكول يلا توكلو نحطهن وياهن
- ايييي والله عشت كفووو والله كفووو هاااذ تعبك
اليوم من الصبح جان حسابك عله الروحه ههعععع
- جااا يامحلاه من حساب
- وشمسه هم روحتهه جانت حسابهه
- وين اكو احلى من هالحساب
- هسه اسمعوني باجر باذن الله نطلع الصبح كون
كبل صلاه الظهر احنه هناك وانه دزيت عله جم
زلمه من الاثك بيهم وراح ينطرونه عله الدرب
ونتوكل بحيل الله
- ان شاء الله زين شيخنه ولو تدخلن مني لجن انه
بالي شلون راح تكنع هذولاك حموينهه وعمامهه
وخوالهه يعني شني الضامن ليك
- انه مضموني ربك انه رايح ومتوكل عليه وهوه
مطمن كلبي ومبشرني بالخير هاذ مضموني ومن
ناحيتهم لاهلهه هناك يصيرن الحجي العدل وتعرف شلون
- ان شاء الله خير
- شمسه مثل ما علمتج بويه لا تنسين شي زين
- اي اكيد شيخي تدلل
- يلا بويه امشو حضرو نفسكم ونامو ورانه درب طويل
- ان شاءء الله يلاا شيخنه تصبح عله خير
- تلاكون الخير بويه

كمت طلعت وطلعت وراي ربى انداريت عليهه
- هااا ماتضلين هنايه
- لاا اروح يم زهره انام احسن
- اي حياج الله
- الله يحي اصلك
- كليلي ربى وين رحتم اليوم
- رحنه لبغداد
- هاااه عليش
- امشي منا لا يسمعونه

مشينه غادي من البيت وجان كالتلي ....
- الشيخ اخذني لبغداد رحنه الكاظميه زرنه لان
هو جان طالب تسهيل من باب الحوائج ومن صارت كال لازم اروح اتشكره .. ومن هناك رحنه للسوك وكالي مو شفتيهه بعد صورتهه بالج
وتكدرين تخمنين قياسهه اخذيلهه ثوب ثكيل يليق بمرت شيخ .. ولو شايفه للثوب يجننن بمعنى الكلمه هو وقماشه وسعره كلشي بي يجنن

- يعني شلونه شكد سعره

- الثوب وحده ب ١٤٠  يصير لونه سمائي بلون عيونهه ومدموج ويه قماشه خيوط ذهبيه يعني صاير عبالك القماش منه وبي سمائي مذهب وهو حيل فخم ... ووياه تخم ذهب ناعم بمليونين ونص

- عليج علي !! هاي كلهه هديه لو مهر لو شني !!

- لا هاي بس كدام اهلهه هديه الهه وكال مهرهه
هي بعدين تطلب الي تريده هاي بس هديه الهه
لان جانت شايله بخاطرهه عليه وهم كال يريد
يرجع حلاهه ومايشوفهه بالتعب السوتهه بيهه السنين

- الله واكبر شني من كلب كلبك ياشيخ

- شعبالك لعد ماكو مثل شيخي

- اي وبعد

- واني هم اشترالي ههههه
- ههههههه جا يعوف وحده من شموسه اكيد يشتري لاثنينجن
- اي اخذلي فستان مال طلعه كال باجر تلبسي
وكلشي وياه شاله والجنطه والحذاء وحتى العطر
هم اخذلي تدري شكلي
- شنو
- كال هاي لان رحتي وضحكتيهه وكلبج عليهه
ولان مانسيتي فرحتي بيهه وسعيتي الهه هاي هديتج
- روووح عمي رووح جا شبي انه حضي خلاني اكرب من الصبح
- هههه مو انته هم ذكرك الشيخ
- بشنو
- دشداشتك يمي ويه باقي الغراض
- ااااه
- اي والله كال انتو اثنينكم تستاهلون وها تره اني
اختاريت لون حسيت ان ماعندك منه حسسسيت
بعد مادري اي لا
- يالون
- هذا اللون الرصاصي اللامع
- جبتيهه عدله انه مماخذ ابد رصاصي
- باوع تره اني بس خمنت القياس بعد انته وحظك
- مدامهه من كل كلبج تجي عدله
- اممم
- هسه باجر شراح يخلصج من زهره يااابويه
- اييي والله شايلتلهه هم
- ديربالج تحجيلهه سمعتي من كال لحد كطع النفس لاتنسين
- اي مناسيه بس هي لحد هسه زعلانه مني
- كليلهه رايحين لفد عايله نمشي لواحد من ربع
الشيخ وهيه تصير صاحبتج وفضيهه
- هم صدك
- اي يلا امشي
- شهاب عفيه اريد سله
- شلج بيهه
- مو لازم اني اشيل غراضهه ورادهن كون كدام
الكل يشوفون هديتهه بلاول
- ليش هو منطيهم خبر
- اي مخابر عله صديقه هذاك وكايله باجر تروح
تلم خوالهه وعمامهه بيتهم وتكللهم ناس رايديكم
بالخير فيعني من راح نطبلهم كلهم موجودين
- هااا فهمتج والله موش هين هالشيخ مدسترهه عدل
- لعد شعبالك شيخي مرتب بكلشي
- يجي يوم واتوبج من هالجلمه
- ياهيه
- شيخي
- لاااا وانته شعليك بيهه عيني
- انصمي احسنلج امشي ندور سله انه سالفتي وياج بعدين يجي وكتهه
- امممممم

طبينه للبيت ورحنه ندعفس بالغراض لحد مالكينه
هاي الشغلات اليسوون بيهه صينيه القاسم وهالسوالف وبيهن سلال اثنين .. اخذت وحده
وهي جان بيهه شرايط وهالشغلات بس نظفتهه
واخذتهه وصعدت وانه رحت لحجرتي صايره
بسد حجره جدتي مطره ...

هستوني نزعت واجيت اتمدد جان اندكت الباب
فتحتهه ولنهه ربى وشايله الباكيت مال الدشداشه
بيدهه ..
جنت اتخيلهه راح تعتذر لو تستحي من شوفتي
هيج بالفانيله والشورت بس هيه ابد جنهه ما شافت شي متغير جدامهه كبل كالت وبنفس نبرتهه ونظرتهه ...

- هاك كدرهه وشوفهه وحط وياهه الشماغ البي احمر يطلع احلى
- هاا زين زين تعاي فوتي وشوفيهه علي خاف يحتاجلهه شي لازم اطلع باجر مرتب
- شنو الجديد انته دائما مرتب
- لا مو باجر غير ترتيب لازم غير رايحين احنه بالوجه ويه الشيخ
- اممم ديلا البس

جنت احاجيهه وانه اطلعهه من الباكيت ونفضتهه
ولبستهه اجتي فيت علي من فوك عبن جتاف عريضه شالتهه بالطول وجانت من هاي البيهه
ازرار موش عدله ردانهه وانه تذكرت عندي منهن ضامهن مال قميص القاط طلعتهن وشكلتهن بيهه
وصارت توب

- عشتي والله خوش اختيار انه احبن هيج قماشه
- بالعافيه يلا زين اجتي فيت عليك اني هم توقعتهه
تجي هيج لان انته سمين
- سمييين !!!!
- يعني مو سمين سمين بس هن يعني مو ضعيف وهاهيه
- ههههههههههه خاااايبه انتي تجفصيهه وبعدين تبررين بويه هاي يسمونه ضخمممم يعني بعضلاتي صدري وجتافي هاي تسميني سمين!
- تره انته مو ضعيف يعني هسه اذا اريد اشبرك
تطلع مرتين مني
- ياهو الكال يجوز ٣ مرات منج
- لااا شنو مو لهدرجه
- تعاي نجرب ونشوف
- شنجرب
- تعاي قيسي الاشبار هاج هاي انه جدامج بطولي وعرضي وشوفي اذا ماتطلع٣ شتريدين انطيج
- لاااا ماريد
-  تعاي شبيج جبانه
- مااريد شنو هيه كوه
- هههههه شكو خفتي مااكلج تره
-  اففف

اجتي تدنت جدامي وانه متخوصر وهي شبرت
من جتفي اليسره لحد جتفي اليمنه وبعدين كالت

- هاي انته خمس اشبار واني اثنين يعني مو ٣ يعني خسرررررت.
- هههه اموتن عله الخساره وياج يرويحتي

ضحكت وكلتهه وانه محاوطهه باديني واعاين
ليهه واتبسم وهيه عاقجه حواجبهه وادفع ..
- ولج مشتاكلج حته وانتي كريبه مني شلون بيه
بيج
- شهاااب والله حعيط والم عليك العالم وخر عاد كااافي شنو كل مايعجبك تجي وتحضن شنو تايهتلك انته شنو متكول حرررام عيييب شو حته ماتحشم احد شبيييك دوخر
- ياثوله انتي لو تشوفين حبي ونيتي شلون صافيه
وياج مثل صفى حبج لرب العالمين هيج انه صافيه نيتي تجاهج مااحسبن حرام بملكي من احضنه
وانه كايلج من كبل انه ملكتج بليله مامثلهه ليله
ولو تعرفينهه جان فهمتي عليش هاذ كله
- مااريد اعرف ولا يهمني اعرف بس انته تروح
زايد كل ما تشوفني احجي وياك واتشاقه كم مره كتلك هالسوالف بطلهن شلووووون بيك والله خبلتني دكااافي
- ههههههههههه يامسودنه وحك علي احبنج
واحبن اشوف خبالاتج هاي اكرهن جمودج
انه اعرفن داخلج ربى ثانيه واريدن اشوفنهه
- اي باحلامك

كرصت خدهه حيل وهي ضربتني عله صدري
وانه اضحك عليهه جان تكلي ...
- انته واحد مخبل ابببد مو صاحي واني اكرررهك
لاااتوصل يمي بعد والله اندمك
- كيفج شسوين سوي انه خلكي طويل وياج
- غثثثثثثيث اكرررهك
- براحتج حبيبه

راحت وهي عصبيه وانه اضحك عليهه مايهمني
حجيهه هاذ كمت اعرفنهه تمسلت بعصبيتهه
بس هيه مو هيج ... انه اليهمني ترست ريتي
من عطرهه وهديت كلبي بكربهه شتريد تحجي
خلي تحجي هيه تاليهه الي ...

نمت وانه مرتاح هالليله عبن فعل الخير ماضاع
وكرب الحبيبه يطيرن رويحتي بالعالي ويسعدهه

ثاني يوم كعدت من الصبح سبحت وصليت وتكشخت وطلعت شفت الشيخ ولكيته داز عله
الولد جابو الغراض من الثلاجه ومحضرين كلشي
وهوه عطر العود يفوحن من بعيد .. كالي يلا
صيح شمسه .. جان شلت التلفون وخابرتهه
ورحت وكفت بالباب مال المطبخ انتظرهه
وطلعت هيه بكامل كشختهه بالثوب المشمشي
وحذاء كعب بيجي ويه الشال البيجي ومتمكيجه
وشايله السله ومغطيتهه بقماشه حمره جان رحتلهه

- اكفـيييي بويه شني هاي
- شنو
- امسحي حمرتج
- لا والله
- اي تره ماكلنالج رايحين لزفه شكو هاذ كله
- تره شبيك محاطه شي بس حمره ومسكارا
شكو خبصت الدنيه
- عليش تكشخين هالشكل وعطرج ماترشين شوي لو الا يشمه سابع جار يلا ترتاحين
- اووووي هسه انته شبيك وياي حته بالعطر لاحكني هسه انته مو متكشخ وعطرك يفوح
- اي انه موش مثلج العين علي
- واني اريد اخلي العين عليه يلا ارتاحيت
- رببببى
- هااا هااا لك خبلتني يعني من الصبح مشاكل
هاي بدال ماتكول صباح الخير تكول شي
تجي بس تتعارك
- انتتتي ماتفهمين انه شلون احترك من اشوفنج هيج ماااحبن احد يحط عينه عليج لا من مره ولا زلمه
- غطيني بجادر يلاا لو ادفني ماكو غير حل
- استغفرك ربي
-  وخر من طريقي وهالسوالف عوفهه زين
- وحك العباس لو مو هالوادم واكفه جان سحلتج من شعرج هنايه
- هوه انته بس هاي عندك بس تهدد وتصيح
وتجيني احبج ربى احببج حبتك الكراده ان شاء الله

بنص هوستنه وحريجي منهه ضحكت عليهه
من تعوج حلكهه وتعيب بجلمه احبج وصوتهه وعصبيتهه كلشي ضحكني .. ضلت تخنزر ومشت
للسياره صعدت بالصدر ويه الشيخ وانه صعدت
بالبيكم ومشينه .....

من اول ماعبرنه العماره لاكونه جماعه واحد منهم اجه صعد يمي والخمسه الباكين بسياراتهم  وكلهم
جانو معكلين وهيبه ...

انه كل الدرب عيني عليهه عبن اخافن من هذول
يحطون عينهم عليهه واول ما وصلنه انه كبل
طبكت كبل سياره الشيخ ونزلت ورحت ليمهه
وهيه تخزرني وانه خليتهه تمشي جدامي

وصرت وراهه حته محد يصلهه والشيخ يعاينلي ويضحك وهو يم جماعته ... عاد اول مافتحو الباب
طلعلنه زلمه اشكراني طويل والشيخ وكف يحاجيه
وهوه اشرلنه نفوت وكبل طبت ربى هيه وسلتهه
بالاول واحنه وراهه وجان البيت شكله يصير
بالنص مثل طرمه جبيره وداير مدايرهه الحجر
صايره وبالنص درج ملتوي يصعد لفوك وبعدين درج ويصعد للسطح ... فاحنه الزلم طبينه بحجره
عله اليمين وهيه راحت لليسار ...

بالبدايه ضيفونه الجاي والكعك وبعدين بدا الحجي
وبدا فلان يتعرف عله فلان جانو كاعدين عمامهه
اثنين وحموينهه اثنين وخالهه وابنهه ..

بدا واحد من الشيوخ وكال ....
- من رخصت هالحاضرين اليوم احنه النه الشرف
انضيف هالوادم الطيبه اخوتنه اهل الكرم والنخوه
اهل الخير هالوجوه الخيره شرف لينه مجابلهم
واحنه هاليوم جايينكم ومتعنين من جنوب للشمال لاجل عين كريمتكم رايدينهه حرمه للشيخ كريم
ابو محمود واحنه بالتطلبونه حاضرين عينكم وماتهوى وتريد يجرى

جانت وجوههم مصفنه وبلاخص الخال وابنهه
عاد الشيخ كطع صفنتهم وكال ...

- من رخصت الشيخ انه اريدن اكول فرد سالفه
- مرخوص ياشيخ انته ماتحتاج الاذن
- تسلم ... كبل كلشي انه احجيلكم شغلتين عن نفسي وهالشغلتين يعرفنهن عني كل السلف وكل
عشاير الجنوب وكل من عرفني وضاف ديواني
انه واعوذ بالله من جلمه انه .. يالربع انه زلمه
امشي عله حك الله ماارضى بالغلط لو يصيرن
ابن امي الغلطانه يتحاسب الحك جدامي وانه اراعي اهل بيتي واحشمنهم عبن هذول انه انسال
عنهم بيوم الدين وشغله الثانيه الي جنابكم متخوفين منهه هيه الدين وانه ماافرك بالدين عبن امشي عله
نهج نبينه وعليه الصلاه والسلام خله اليهودي والصبي والمسيحي والمسلم كلمن بدينه وحته
الكافر مااجبره عله شي اجي انه اكعد افرك بين
هاذ وهاذ لاااااه هاااي موش من شيم الشيوخ
وانه عهد علي امام الله ماافرضن عله الحرمه
شي من ديني الا برضاتهه كلشي ترضاه وبنفسهه
تسوي انه اكونن وياهه عون  وغيره يحرم عله
لساني جبرهه بجلمه عبن موش اجاويدي اليستضعف حرمه ويعيلين عليهه حته لو بالزغيره كبل الجبيره ... وصله الرحم وصيه من ربنا ونبينه ونبيكم حرام اليكف بدربهه بحجه الدين عبن الله
وعيسى ومحمد يناظروله من فوك ويشوفون شلون هالوادم تزرع التفركه بين الاجيال وكلمن بحاسبه
ياخوي ماينسى شي فاحنه عليش نزيدن من التفركه بين هالوادم ان جان موش ليه للغير لابد ويجي
يوم وتلكالك فرد شاب جاييله عله بت من غير
دينه وتكف الوادم بدربهم ويكطعون الوصال بين
هالدينين ويكطعون المحبه بين اهل الشمال والجنوب ... جاا احنه نجيب ونحجي عله هالحكومه ونجي نصيرن مثلهم ماسامع اليكول
"لاتنهى عن فعل وتاتي بمثلهِ عاااارًُ عليك اذا فعلت عظيم "

- صح لسانك ياشيخ هالقلتو عين عقل هوا
عيسى نبينا بشر بمحمد مثل ما محمد ذكر عيسى

- اهااااا يسلم افمك ياخويه يعني شني هالدنينين
مكملين بعضهم عليش التفركه

- لاااا ماكو تفريق

- شيخ ابو محمود اني اريد اسال شي

- تفضل

- منين عرفتنا وجاي بكل هذا خير قديش محمل
من بعيد لهنانا على اساس اشنو

- اهاا خوش سؤال .. انه الوالد الله يرحمه جنت اعرفنه والي وياه موكف من زمان وماراح من بالي وانه اجيت عله صيته وريحته وهاذ الحمل
كِله لاجل عين اهل بيته

- هااا تعرفو للخال

- اييي اعرفنه كلش زين

ضلو يتبسبسون بينهم بس ابنهه عله كعدته وصافن بوجوهنه ... عاد كال خالهم ...

- اني من رخصتكم اروح اسال الاهل عن جوابهم
- اي عمي مرخوص

هو طلع جان الشيخ يصيح لابنهه واشرله يكعد يمه
وضل يشاوره وهالولد مندمج ويسمعله وتالي فج
عيونه ورفع راسه عاينلنه ورد عاينله والشيخ يبتسم بنصر عاد ترخص وكام طلع ...

انه رحت ليم الشيخ وشاورته ...
- شيخنه هاذ اخافن يخربنهه عليك ابنهه
- لا تخاف تغديت بي كبل مايتعشى بيه
- شلوون
- هاذ عمه كِلش كاسي وياه وحارمه من الطبه والطلعه ويوم اليعصي جلمته يجتله فالوليد ماهاويهم عبن راح يضلن جدام عينه مايكدر
فانه كتله محضرلكم بيت هناك وانته تصير ايدي
اليمين بالديوان وهالمشيخه كلهه تديرهه وياي
وهوه ماصدك عبن انه اعرفن هيج جيل يحبن
احد يخلي يكض فرد مسؤوليه ويصيرن صاحب جلمه وعليه اعتماد
- والله ياشيخ انته مامش مثلك منين عرفت طينته
شعرفك بعمه وسوالفه
- جا موش بالحيف ينخفى علي شي يخصن الريم
- هههههههههه بس عاد ماتصيرن هناك طلابه
بين الاخوه
- هاي دبارتهه عندي خلي اشوفن هالخال شني
كرك جوه شماله مايجي

جنت اضحك عله لهفه الشيخ ونفس الوكت عكلي
صافن عله نباهته شلون حايكهه من كل جهه
والله وشويه جان يطب الخال وكعد جان كال

- على بركه الله يااخوان
- يبارك بيك الله سمعونه صلاوات ياالربع
- اللهم صلِ على محمد وااااال محمد

علت الهلاهل من بره والشيخ مغمض عينه ويحمد الله والضحكه عله وجهه تزيد ... جان واحد من الشيوخ كال ....

- عمي احنه عدنه بهالمناسبه نكرا سوره الفاتحه
حته نستفتح بالخير هالزواجه ياريتكم تشاركونه الاجر والمايعرفهه يردد وراي شكولن

هزو براسهم بمعنى اي وبدا الشيخ يكرا سوره الفاتحه  بصوت عالي وهالكاعدين كلهم وراه
يكرون وختمناهه ...
- اااامييييين

كام الكل باركو للشيخ واولهم اجاه ابنهه وبعدين
وره ماخلصنه مباركته كال الشيخ ...

- بويه المهر اطلبو مد عينكم وماتكلون غير جلمه تم
- شكرا شكرا المهر المرا كالت هي تطلبو بعدين
- هااي صار يجرالهه التريده احنه جايين ناخذ عزيزتكم وبكل عزه ونغليهه من كلشي ومتاع هالدنيا كله يرخص لرجليهه
- اصيل ياشيخ ماتقصرو

شويه والشيخ دزني للخال شاورته وكتله ..
- الشيخ يريد يحاجي الحرمه جلمتين كبل لايمشي
وهاذ من سنينه شرعنه لازم يشوفنهه ويسالهه
- واحنه هم عندنا هذا الشي

عاد انداريت واشرت للشيخ ان كلشي تمام
وضلينه ننتظر شويه وعاد الخال طلبنه انه
والشيخ نكوم وياه ترخصنه من الكل وكمنا
واخذنه للحجره الطبت بيهه ربى وانه جنت
اعاين الشيخ متوتر بهالخطوتين المشيناهه
يتنفس بصوت عالي ومسموع وانه اضحك
جيف انه يتوتر هالشكل من اجه طاريهه ....

طبينه وجانت بالحجره بس ربى وامها لشمس
وهيه شمس  واثنين نسوان ماعرفهن الي صدك صايره تلمع بلمعه الشمس بهالثوب والزينه والذهب يبرج بايدينهه وهيه جانت مدنجه وانه
عاينت لربى حاطه ايدهه عله حلكهه وتضحك وعيونهه مدمعه .. والشيخ واكف بمجانه شامخ
ويعاينلهه بفخر وحنيه وابتسامه رضى معتليه
وجهه ...

تكرب ليمهه واشرلي بمعنى اطلعهم وانه اول مابديت بربى صحتهه وهيه فهمت وحاجت
هذنيج النسوان وهنه طلعن وانه اخذت العربانه
الي بيهه امهه دفعتهه وطلعنه كلنه بره وسدينه
الباب ...
دنجت للحجيه وكتلهه ...

- حجيه شفتي العمارجي لعب بيهم لعب واخذهه اخذهه
- ههههههه شيخكم شهم وانتو كلكم اجاويدي مثل ماتكول شمس هههه
- ههههه بنتج تعرف حجينه ومعلمتج عليه
- يوووه تخبصنه جاا وانه كل يوم عالقسط  تكولو
- هههههه الحب هيج يسوي بالبشر حجيه
- انته تحب
- اييييه انه حالي حال هالشيخ شايفه هالحليوه
هاي
- اي هاذي ورده ناعمه وطيبه
- هاي معلعله كلبي ماترضى بحبي صارلي سنتين وهاي طبينه بالثالثه اريدن اتزوجهه وماترضى
وهيه بنت عمي وحارمتني منهه شاله حالي حاجيهه حاجيهه
- ههههه الحب ياابني مايجي بالغصب اصبر اصبر
- ههههه سمعععععتت يااابن عمييييييييي اوووف
فدوا رحتلج ياحجيه شلون حجايتج تشفي الكلب
- خايبه هو انه ياهو الردته وياج عون وماطلعلي فرعون ضلت عليهه
- هههههه ابني اسمهه ربى يعني لازم تفهم الربى
يجي بالتعب واذكر هالشي مني كل ما البشريطلع من قلبو حب عظيم ياخذ بدالو رد عظيم هي حكمه
ربنا .. السيده مريم عليها السلام وهبت روحها
وكيانها وكل عبادتها للرب عطتو حب عظيم
ردها بمنزله عظيمه وذكر عظيم لاتنسى هالموعظ
ياابني
- والنعم من ماحجيتي ياحجيه ان شاء الله ماانسى

اعاين لربى وهيه رافعه خشمهه وتضحك
حكهه بويه تنغر وتتعزز جا مدلله وحليوه
ومالكه هالكلب شتريدن بعد ....

انفتح الباب وطلع الشيخ وشمس محطوط عله
جتافهه عبايه الشيخ وهيه كاضتهه بايدهه من
جدام وتضحك اجتي يمهم ربى جان الشيخ
دنج باس راسهه وكال ...

- هاي الشمسه هديه الله الي ببعادج عزيزه مثلج
وتضل عزيزه عبن معزتهاا كبرت فوك حبج
وحبج رسم درب معزتهه فخليجن تفهمن هالشي
ان ماوحده تعله عله الثانيه بلايه زعل زيين
عبن انتي حرمتي من زمان ماتاخذ من مكانج
شمسه شي وبنفس الوكت هيه صاحبتي وبنتي
وكل اهلي وهيه شمس حبج العشته هذيج السنين
بيهه فمااكدرن ابدلن وحده بالثانيه كلمن الهه معزتهه واثنينجن مالكات هالگلب

- شيخي اني يهمني بس سعادتك لان انته طول
هالسنين غركتني باهتمامك وحبك وحمايتك الي
من كلشي فهسه اجه دور شمس الاصليه عيش
السعاده وياهه واني ابقى صديقتك مااروح

- من رخصت الشيخ اني اكول الج انتي صديقتي
هم لان اني راح احتاجج هواي هناك واني احب
كل شخص يحبه الشيخ

- ههههههه الله يخليجن الي يا نور دنياي  انتن

كضت هالجيه بالخير والفرحه وطلعنه من بيتهم
بكل مايسر الخاطر منهم وسهله رب مسهل كل عسير .. هالي تعسر كبل ٢٩ سنه تسهل هالساع
بامر منه جل جلاله .....
.
.
.
يتببببع

-