رواية من فجر ديسمبر الفصل الرابع عشر 14 - بقلم Zoka 🌷

من فجر ديسمبر

ثاني يوم بالشغل جاي امسح الكاع عبن هستوني مكمل غسل
وحده من السيارات واجاني وليد .. ترخصت من صاحب الشغل
وطلعت ليه ..

- ها يامسودن شجابك هنايه
- هسه انته متكولي شعاجبك بهالشغله دعوفهه
- انه اريدن التهي شسوي يعني
- امشي وياي مسويلك فد برنامج اله بشده
- شكو
- دمشي امشي وياي خلي نغير جو مامليت بالعراق تشتغل
هنا هم تشتغل متريد تاخذلك عطله تريح نفسيتك شنو ماتتعب
- اتعب لجن شعندي انه خما اضلن كاعد ومجابلك
- وشبيه اني مااعجب
- شستفاد منك هاا كِلي
- اني. بس وجودي كافي ويلا لتاخرنه امشي غير ملابسك
وتعال يلاااا بسرعه شهاب مو وكت تصفن
- شايف اذا طلعت شغله فاكسه مثلك بعلي اطيحن بيك جلاليق
- هخخخخخخ اذا ماخليتك تكول رحم الله امك وابوك اطلع معتب
- اشوفن عود

طبيت ذبيت هدوم الشغل ولبست هدومي الاجيت بيهن وترخصت
وطلعت ويه وليد جان ياخذني لشركه سياحيه ..
- شعدنه هنايه ولك
- راح نهج
- وين يامصخم
- شبيك نروح سفره للغابات وتخييم وشغلات ونسه مسوين
خصم على الرحلات هسه خلي نستغل هالاسبوع قبل الدوام
- وين لكيتهه ولك
- شفت واحد لازم البروشر مال السفره اليوم  من جنت
اجيب خبز للغده  عاد استفسرت منه ودلاني على المكان واني كبل اجيتك كلت مابيهه مجال لازم نروح
- اي بعلي خوش فكره بس انه ماشايل فلوس تكفي
- اني جبت وياي
- زين يجي ؟
- اي ليش هو يكدر يفاركنه
- بعلي هسه يضل مجلب بذيالي
- هخخخخ لاا اني اخذه منك وانته دورلك صاكات تلحلح شويه
لتضل جامد هيج
- هخخخخخخخ الله كريم
- ادري الله كريم لعد الله ابو حاتم .. بس اكسر هالجلمود الي براسك تغزل بالبنيه انته بس كللهه عيونج حلوه وشعرج يجنن
طوله وشوفهه شلون ضحكتهه حتشك الوجه بسرعه يتقشمرن
شبيك
- هسه مو كلنه اي لتلح
- دنشوف الاي مالتك شتسوي

حجزنه وردينه للشقه حضرنه غراضنه وتعشينه ونمنه من وكت
عبن من ال ٤ الفجر احنه لازم نطلع ..
ومن طلعنه اخذت وياي جاكيت جان الجو بي بروده وكلت اخافن
هناك هم تبرد بعد وانه حضرت غراض زين هوه مطفي يسالني
جني امه .. شهاب شنو احط شهاب اخذ هاذ لو هاذ ...
وانه يمه خلي هاذ وجيب هاذ واجي اسد التلفزيون وادزه لحجرته
ينام وانه اروحن اكعده ومايمشي الا بسدي من نطلع ...
حته من كعدنه بالباص هم الا بسدي يلا يكعد وينام عله جتفي
انه انقهر عليه جيف هوه هيج طيب ومايشوفن هالدنيا شبيهه
مابيهه يخافن من كلشي داخله هش بجلمه ينهز ويتاثر بكل شي
يحجي دايما عله جسمي ومشيتي يكلي ..
اني معجب بجتافك اريدن مثل صدرك شلون اسوي وانه اكله
اكل وتصير هيج وهوه يضل ياكل ياكل وبره جم يوم يجيني
اشو مصارن مثلك واكِله بعد من تكبر هم يصيرن ويضل هيج
يكلي احسن جني امشي ويه اسد اريدن اضل محتمي بيك
بالله العظيم مرات اشكن بي اخاف خنيث بس بعدين اشوفه هوه
جاهل صح عمره بالعشرين بس عكله مال جهال ومايعرف شنهي
رجوله هيج مايع نفحه هوه تطيره ....

رحنه للغابات وتوزعنه اربع فرق كل فريق خمسه
ولد وبنات .. انه وياي زين و٣ بنات " تالا وسفانا وتبريز" ووليد وياه اربع بنات .....

بدينه ننصب الخيم ..انه وزين تعاونه بخيمتنه
والبنات وحدهن يسون خيمتهن ووليد عايش
حياته ناسي الدنيه ويه البنوات ...

من كملنه خيمتنه اجتي تالا رادت نساعدهه بخيمتهم
ورحنه رتبناهه الهن ورجعنه حطينه غراضنه
وبدينه نشوي للغده وبعد ماكلنه وكملنه بدت رحلتنه
افترينه بالمكان وتعرفنه عله شغلات جثيره وردينه
للمخيم وكمنه نحضر بالعشه وسهرنه عله عزف وغنه
وسوالف لحد نص الليل يلا طبينه لخيمنه ....

زين كبل نام لجن انه مضيع عطرهه شينومني
ضليت اتكلب لحد ماجزعت روحي كمت طلعت
كعدت يم شجره وره الخيمه وطلعت صورتهه
من المحفظه وصفنت بيهه .....

واعاين للنجوم واكولن جايز هيه كاعده تعاين
عليهن هالساع واسال نفسي بعدهه تختنك وتكع
لو صارت زينه ؟؟

اجتي تالا ليه وكعدت بسدي انه كبل ضميت الصوره
بالمحفظه ... جان تكلي ...
هاي حبيبتك عراقيه ؟ فاني كتلهه ماعندي حبيبه
كالت.... شلون شاب حلو ومرتب مثلك ماعنده حبيبه
فابتسمتلهه ودرت وجهي جان تمدلي ايدهه وكالت
اصدقاء؟
صافحتهه وقبلت صداقتهه ...

فضلت تحجيلي عن اهلهه وحياتهه وشعدهه ماعدهه
لحد مانعسنه وكمنه كل واحد لخيمته ....

ثاني يوم من الصبح كعدنه وتحضرنه وبدينه بفقره
مسابقات لحد الظهر رحنه نزلنه بالماي سبحنه ولد
وبنات وهنه كله بالداخليات ويكمزن فوك ظهور الولد
انه ضليت اقنع بزين حته ينزل للماي مايرضى يخاف
عاد شويه شويه خليته ينزل وعلمته شلون يسبح
وضلينه سوه نلعب بالماي ....

بالليل هم سوينه كعده غنه وسوالف وكرزات واكو جماعه اخذولهم ركِن .... انه يجيني وليد يكلي
تلحلح تعرف عليهن احجيلك سالفه بس انه ماتعجبني هيج شكولات ...

جيت انامن مكدرت اخذت فراشي وحطيته بره
وضليت متمدد واعاين للسمه هنايه من تعاينهه
من فوك هيج مكان عالي تحس مامش شي غيره
عله هالكاع والنجوم تلالي بيهه ... عله صفنتي
وجان اهجس باحد يمي عاينت لنهه تالا !!

اجتي مدت فراشهه بسدي وتمددت انه ماحجيت
شي ضليت اعاين للسمه وجان تكربت وحطت ايدهه
عله ركبتي عاينتلهه بخزره جان تكِلي ...
'ماكدر اقاومك '

ورادت تتكرب بعد دفعتهه ورزلتهه هذيج الرزاله التسوه وعفتهه وطبيت للخيمه ....
جا هيه شني الصبح تكمز فوك ظهور الولد وبالليل
تجيني شني هسه وصل سرايه !!!

ضلينه بهالسفره اسبوع فرينه نص  تركيه بيهه
وبعدين ردينه للشقه ونزلنه السوك اشترينه جم
لبسه للدوام .. وبدينه بالدوام ورجعت لمتنه مثل
كبل مجموعتنه سته اربع ولد واثنين بنات ..

كمت اشتغل بمحل حلويات بالشفت المسائي 
واراوح بينه وبين الدوام ... انه عندي فلوس لجن
ماحبن الكعده واريدن اضل دوم شاغل بالي بشي

خلص الشهر الاول بالدوام وانه جنت اتهرب بالنهار
منهه بالدراسه والشغل لجن من يجي الليل واطبن
حجرتي الكه رويحتي تلوب تريدن لمسه ثيابهه
واروحن بلايه وعي اخذه لحضني وانامن عله ريحته

مرت ايام وايام وكمت اتعب من هالشي حيل تعبت
بي ماتطلع من بالي جني ادمنت ريحتهه ..
كمت حته استحلم بيهه حيل كرهت روحي جان
اروحن عله وليد بالليل كلت انه اريدن احسمهه اليوم
اذا اضلن هيج اتسودن ....

رحت اخذت وليد وطلعنه رحنه لبار ....
احنه كبل جنه نروح لجن ويانه جماعه يعني لو بحفله لو بعيد ميلاد هيج يلا نروحن ومانشرب
لجن هالمره انه ضليت اشربن كلاص وره كلاص

- اكول شهاب شبيك مو عوايدك هاي
- كله منهه انه هيج اصيرن
- منو هاي بس لاا هذيج بنت عمك بعدهه بالك
- اييي ايييي ماتطلع من البال الاكشر هااذ
امشي كوم جيبلي وحده تكدر تنسيني
- هاي شبيك تخبلت انته تريد بنت ليل تنسيك
بنت عمك !!!!
- خرررب بنت العم المصخمه وساعه الكشره العرفتهه بيهه امشي كوم جيبلي وحده انساهه بيهه كوووووم
-هاي انته فاصل للاخير
- ولييييد دخيل جدك كوم انه حتسودن من وراهه
انه اليوم حالف اطلعنهه من نفسي وبالي كووم
لا تحرك اعصابي يلااا يلاااا كوووم
- حجيبلك حاته تطك بالكاع تنسيك ابو ربى بس اصبر اضبطهه
- جيب اي شي بس روح

راح وانه ضليت امشي ايدي ع الكلاص واتخيلهه
جدامي واخنكهه هيج اريدن بس اخلصن منهه
جان يجي وليد وياه اثنين عاينت لوحده منهن
من جدامهه لراسهه ... طويله وبيضه والشعر اشكر
ولابسه اسود كصير كلشي مبين منه ... جريت اخر
شي بالكلاص وخذيت محفظتي وكضيت ايدهه
وطلعت حته ماسالتهه شسمج ... طلعت وكفت
تكسي وهي صعدت جان اسمع صوت وليد وراي

- شهاااب تره هذا زنى مو نسيان خويه ارجع لبنت
عمك وحبهه وتزوجهه ولا تخلي نقطه سوده بحياتك
انته نظيف وروحك ترفه وماتطخ الحرام ارجع واتزوجهه ياخويه

اجيت عليه وحطيت اصبعي عله حلكه ..
- لاتجيب طاريهه اكرههه ااااانه اكرهه السحاره
هاي ماتصيرلي مره لو اموتن بيهه ماجيبهه مره ليه
ااااشششش انه اكرهنننن طاريهه اشش لاتجيبه
اشش

عفته وصعدت بالتكسي من سالني وين دليته
عله فندق ماعرف ليش ماردتهه تطب حجرتي
وجان هالفندق قريب من البار شغله خمس دقايق
وصلنه .... وطبيت حجزت واخذتهه وصعدت

انه لهالحظه ماعاينت بوجهه شلونه كل الشفته
جسم حلو يسوه .....

طبيت الحجره كبل نزعت حذائي والقميص
وتمددت وخليت ايدي عله وجهي عكلي يتضارب
ويه نفسه كل جهه تحجي شكل وانه تايه بنصهم

اجتي جدامي وبدت تبوس بيه وانه جريتهه
وصرت فوكاهه جانت ملابسه شي وضليت
اتلمس بجسمهه اريدن شي يشبه الراسمه بالي
وايدي متحضره للمسته وتعرف دروبه منين
مالكيت بيهه شي يشبه ربى ضليت اعصر بجسمهه
حيل واصيحن بيهه ...

' ليييش موش مثلهه ليييش '
وهيه تتموع وتعيط جان ادفرهه واكومن للحمام
فكيت الدوش وضليت جواه بملابسي بديت اصحى
واتذكر شصار وياي وتندمت وبنفس الوكت ارتاحيت
عبن انه ماسويت شي وياهه بس تلمست جسمهه

يعني هاي طيوفهه الترافجني كل ليله مارضتلي
الزله ولا رضتلي البعاد عنهه ... انه شلون بيه !!!

طلعت ومالكيتهه بعد احسن .. ضليت متمدد بالفراش
ومغطي راسي واريدن اهدأ ماصايره هاي وحك الكائنات مصايره ¡¡¡¡¡¡

نمت من تعبي من التفكير ومن كعدت الصبح لكيت
ملابسي ناشفات لبستهن ورحت للشقه لكيت الولد
هستوهم كاعدين يتريكون انه نفسي مسدوده
وراسي يوجعني ومسطوور ....

اجيت كعدت وضليت افرك براسي جان وليد كال
- هااا جنهه تعبتك البارحه
- انجب مصار شي
- عليك علي !!
- ماكدرت وليد مو مثلهه لا هاي ولا عشرين غيرهه
يجن مثلهه ايديني تعرف شتريد ومن ماتلاكي هذيج
الغيمه الترفه ماتعرف تلمس شي موش مثل مارسمتهه وخيلتهه بالي
- ولو تضل تجيب بنات من كل الدول ماتلكه مثلهه
انته مشكلتك تريدهه هيه مو غيرهه وتنساهه بيهه
انته حتى نسيانك تريده بيهه صدكني رادلك تصفن
شويه ويه نفسك وحتعرف الحل
- انه ايست من طلعتهه من بالي شجيب بعد لا بنات
بغداد ولا تركيه ولا عماره فادن وياهه شسوي بعد
لا بقيت شغله مشتغلتهه حته اتعب وانسه افكرن بيهه ولا خليت درس يعتب علي ماذبيت روحي بي
جاا هسه الا هيه اي شني مانخلق غيرهه من خرب
بقسمتي السوده
- عوف الحجي اصفن اصفن حلك بسيط بس انته
تكابر
- عوفني اروحن انام احسن
- ماوصيك بالثوب عبرت عليه ليله لوحده خطيه
روح شمه شمه تلكاه مشتاقلك
- انجبببب مالي خلكك

عفته وطبيت للحجره ذبيت نفسي ع الجربايه
وتلمست طرف ثوبهه المحطوط عله مخدتي
من اول ماطخته اصابعي عرفت دربهه وين وجنهه
تلامس منحنيات جسمهه من خصرهه لظهرهه وجتافهه هيج اتخيلهم بايديه وانعمهن ازيد بلمستي
ليهن وابرد جسمي من برودتهن ....

جريته لحضني وشميته بقوه وبلايه وعي كلت
مشتاكلج ... وهمت بيهه ونمت عله فكري بيهه

ضليت ايام وايام وانه عله خيالي بيهه لحد ما
بيوم طالعين بازار وجان اكو حجي يخط اسماء
عله جلده تصير تشكل مداليه وجان يخطهه بخط
حيل حلو يشبه الخط الكوفي عدنه ....

فانه واكف واعاينله شلون يكتب للشباب جان ياشرلي اتكرب ... تكربت ليه وكلي ..
' شنو اسم الخلتك تصفن وتضحك للعشاك '
ضحكت وكلت  بحسره ...
' ربى هو اكو غير ربى '
وماشوفلك الا جر الجلده وكعد يخط باسمهه
كتله ...
' لاا تسوي ماريد انه ماعندي حبيبه '
كالي ' بس انته عاشك ولمعه العين بذكر الحبيب
تفضح '

انه ضليت صافن يعني انه عاشكهه لربى وماعرفن
بروحي !!
دنجت ليه وكتله ..
' شلون اعرفن العاشك  '
كالي ...
' لو غمضت عينك عن الدنيا كلهه وضل هو لوحده
بعينك .. ولو تحسه نقطه ضعفك رغم قوتك بكلشي
عداه ... ولو يسكن فكرك ليل نهار فانته عاشك '

كتله ...
' والكلب اشو مايدك هيج بغرابه ليه '
كالي ...
' من تجتمع بالحبيب بقرب يضل يدك براسك فوك
ماهوه بصدرك '

خذيت المداليه وانطيته فلوس مارضى ياخذهن
عاد ضليت امشي واعاين للاسم وافكر بحجيه

هو انه صح اضعف بيهه بس ومااشيلنهه من بالي
واريدنهه بكل شي .. وحته هيه التجي بالي يوم اغمضن عيني باي لحضه وكل مناي اعرفن اخبارهه
واكربن ليهه .... جا هوه هيج العشك وانه ماعرفن!!

يعني انه عاشك ربى !! شهاب عاشك ربى !!

جنت امشي واحجي هيج واضحك وماعرفن شي
ممزوج بين فرحه وبين خوف ورفض هيج احساسي
بهالصدمه لجن انه ثبتت عله اني حته لو عاشك
ماريدنهه وانساهه ،،،

ورديت لخلوتي بريحتهه وانه اشمنهه واصيحن افيييش ... منين ماديرن وجهي الكاهه مجابلتني

بيوم من ايام شهر ال ١٢ جنت راجع من الشغل وانه
بعدني اشتغل بمحل الحلويات ... وجانت دنيه تثلج
بس اريدن اصل الشقه .. وبين ماانه امشي براس الشارع مال منطقتنه اشوفن زلم جاي يصعدون بغراض بسياره حمل جن واحد يريد يشيل من بيته
انه ماعرف عليش عيني ضلت عليهم وجان اشوفن
جاهل مدبدب طلع من البيت وشايل كارتونه زغيره
وصل ليم السياره وهناك الزلم جاي يشيلون مرايه طويله وكلهه اطار مذهب وحايرين بيهه
وهوه صار بين رجليهم هذول انشدهو رادو يوكعون
المرايه عليه جان اجفت عليه كبل مايتعثرون ويوكعونهه واكضه من هدومه واسحبه ليوره
وهمه وكعوهه وتطشرت صارت تراب .....

وهالجاهل كلبهه مناحه بس يبجي وانه احضن بي
واسكت واسمي عليه ومايفيد تالي اجاني رجال
جبير بالعمر بس مبين اكابري ....

طلع هاذ جده وابوه للولد مصارله شهرين من ميت
ويردون يشيلون من البيت عبن يذكرونه بي ...
ضل يتشكر مني وتالي كالي تعال طب وياي للبيت
طبيت وياه جان شبه فارغ بس اكو قفص ببغاء
معلك بعده ضليت اعاينله ورحت ليه صفرتله
وهوه ماصدك انخبص حار شيسوي مدري شيدردم
جان يجي الحجي وانطاني ماي وكالي ....

هاذ الببغاء للمرحوم ومن يوم ما توفى محد وصله
ولاعبه وانه حاير بي لين ماكدر اشوفنه اذكر بي المرحوم ويعز علي ابيعه بس اليوم انه اهديه الك
لين انته نقذت حفيدي وهوه من ريحه المرحوم
واعز عندي من الهوه لو ماجاي بهاللحظه عليه جان
راح من ايدي هالولد الثاني ....

انه مارضيت اخذه وضليت اعارضه لحد مااجه
الوليد الزغير وكالي ... اهتم بي مثل ابويه بهذيج
اللحظه عاد انه رضيت اخذه ...

انطاني وياه جواز اله وكالي تره هاذ اصيل وغالي
شتعلمه يحجي ....

تشكرت منهم وودعتهم واخذته ومشيت للشقه
وهوه كل الدرب يكمز بالقفص جنه مشايف ...

طبيت للشقه وتلكاني زين يسال عليه .. حجيتله
شنهي سالفته وحطيناله اكل وحطيته بحجرتي
وضليت كل يوم اصفرله واحاجي وهوه يردد وراي

جنت بالليل اتمدد واخلي ع الجربايه واضل اكله
كول ربى واعيدهه فد خمس مرات اله وهوه يعيد
وراي ... مرات اكله كول ياصخمه وينج ياصخمه
واضل اضحك وهوه يعيد مثلي ...

كلش تونست وياه .. من شفته تعود عليه  كمت اطلعنه
من القفص واخلي عله جتفي وافتر بالشقه بي
اذا اسوي اكل اباوع تلفزيون هوه معلك بجتفي
وكلشي يحجي يجلب بجلمات من وليد ويخلي
يكفر يسودنه من كثر مايعيد بيهن ....

صارت الامتحانات وانه اهجس مخنوك واهسي خربان
بكلشي كمت اهجس شي وكاض صدري خانكني
اضل اتصفن بهالصوره ومادري شبيه ....

جانت اكو حفله بفله لواحد من صحبانه ورحنه
وهناك اشكال البنات وحده منهن جلبتلي وانه
ضليت بين اي ولا لحد ما كلت استغلهه فرصه
وانسى بيهه علتي ... وجان طلعنه انه وياهه
نتمشى بالحديقه الوره ونسولف عاد هيه بالشقه
وجاي تضحك طخت ايدي وايدهه جانت بارده
كبل جفلت واذكرتهه رديت ركزت بوجهه عيونهه
زرك  ... مادري شجاني من احساس من شفت عيونهه
زرك تذكرت اخر نظره بيني وبينهه وهجست انه
بالمجان الغلط وكلشي جاي يصير غلط بغلط

عفتهه ومشيت بدون حته ماكللهه جلمه وحده
عفتهه تصيح وراي وانه كبل رحت خذيت وليد
وردينه للشقه جانت اعصابي فايره وايدي ترجف
رجف اريدن بس اصل واطب حجرتي واخلصن
من هالاعصاب هاي ..

من وصلت كبل عفت وليد هوه وصياحه عبن ليش
كطعت عليه سهرته ..وطبيت للحجره اعاين الثوب
ماهوه كلبت الحجره كلاب ماهوه طلعت اصيح
واسالهم وينه وليد كالي ماشايفه .. وزين جان وجهه
يكلب الوان زمغت بي جان يكول ....

وكعت عليه بيبسي بالغلط من جنت كاعد يم الببغاء
وخفت لا تشوفه واخذته غسلته وشريته ..

انه سمعت اكو ايد نمدت عليه غيري وجماله مغسول
نار الله كلهه شبت بيه رحت كبل كضيته من ياخته
وركعته كله وريت ضربته بوكس ولو ما وليد يجرني
منه جان كضيت بي التوبه ...

هوه كبل فتح الباب وطلع من الشقه وانه كعدت
بالكاع وكاض راسي ووليد يصيح فوك راسي

- تخبلت شبيييك تضرب هالمسكين غسله قابل كفر
خما كفر .. شبيك تخبل صاير لا ويه صحبه زين
ولا ويه هالمسكين ولا حته ويه نفسك شجاااك فهمني
شجاك هااا

- عوووووفني وليد بالعباس روحي طافره

- ليش روحك طافره هو كله خلك ثوب

- شلوووون يمد ايده عليه هاااذ مالتي يخصني
محد يكضه غيررررري عليييش مالكه غير مجان
يوكع بي بيبسي الا هاااذ

- هسه شنو اخذ روحك الولد مايدري وراح غسله
وهسه ينشف ويرجعه

- وريحتهه منين اجيبهه هااااا كلي منييييييين

- شهاب! هاي هيج متخبل عليهه !

- ايي اييييي انه متسودن بيهه وماانامن ليلي الا
بهالثوب الاكشر

- تحبهه ولك !

- اي اييييي احبنهه ايييي انه طحت ياخوي كحت
بطيوفهه ماكدرت اشيلنهه من بالي بكل بنت اشوفنهه
وين مااصد الكاهه جدامي لا ليلي ليل ولا نهاري نهار
كلشي عايشه هوه ربى هالصخمه الصخمت حياتي

-  لك هلااا والله وحبيت ياشهاب عمي بطله وكدرتلك
اني ماخليت بنيه تعتب عليه ماجبتهه الك ومكدرن
عليك هاي عبر الحدود ومخبلتك

- اااااااااه لك انه ماريدن احب والله ماررريد

- دنجججب هو انته رايح متخبل بالحب ويكلي ماريد
لتسويهه سالفه هي بنت عمك بس تتخرج اخطبهه
واشبع بالحب وبالريحه وبطل اتدور ثوابه

- ههه ازوجهه ! بالعباس لتجيب اجلي

- هواي مبالغ انته .. من تروح وتصارحهه راح تشوفهه تتغير وياك .... هسه كوم خلي نشوف هالمسكين وين راح طاح حضك ياشهاب هاي كدرتك عليه

- انه نعميت بعد ماكصدت اذيه .. كوم نشوفه وين

طلعنه بالشارع ندور عليه ولكيناه كاعد يم محل
براس الفرع .. رحت دنجت بوست راسه وهوه
كام يبجي عاد حضنته وتعذرت منه واخذته
عزمته عله حلويات بمحل مرتب وكضينه سهره
هناك وتشاقينه وغيرنه جو ...

انه كلشي بجفه وراحتي من نطكت هالجلمه بجفه
هجست مثل هم وانزاح من صدري من كلتهه
وضل مزاجي عدل كل الليله ومن ردينه رحت اخذت
الثوب وصفطته وخليته بسدي وطلعت التشيرت
شميته وعله ريحته نمت ....

صارت ايامي كلهه بتفكيري شلون اصارحهه بحبي
ليهه وانه اعرفنهه خشم يابس وراح تشلع كلبي
بس انه اريدنهه حته لو يضل بعمري يوم هم اريدن
بي اشمنهه واملكهه كَلبي واطفي ناري ببروده ايديهه

احنه خلصنه امتحانات اليوم ثاني يوم انه طلعت
حجزت تذكره للعراق من رديت لاكاني وليد

- ها يا شهاب شعندك
- كل خير ياخوي
- احجي من الاخير
- راح اردن للعماره
- عليك الله!!
- اي والله هاي رحت حجزت واجيت
- ولك يامعود هو كلهن اسبوعين ويرجع الدوام
شبيك مستعجل
- مشتاكلهه ماتحمل بعد  اريدن شوفتهه صدكني
خلص صبري
- خرررب بعمي هذا انته العاقل هيج تاليتك
اجي وياك لعد
- متاكد
- اي هم شعندي باقي ارجع وياك هم اشوف اهلي
مشتاقلهم
- وزين ؟؟
- يروح لاهله شنو ابتلينه بي
- هسه يتسودن يمكن هالمره يختل بالجنطه
- هخخخخخخ اي والله يسويهه مانكله لحد مانسافر
- لا لا خطيه يول هاذ يطك ويموت بساعتهه
خليني انه امهدله السالفه
- اي بكيفك
- جا امشي حضر امورك حته ننزل السوك نشتري جم
شغله
- ماشي هسه ارجع واخذ فلوسي والاكيك العصر
نطلع للسوك
- ماشي يلا شد الهمه
- نروح نروح لاتخاف
- ههههههه تسودن اخيك بعشك العمارجيه
- من اروحلهه فدوه ونذر حركت كلب الميت
- انجب ووولي يلاااا لانعل سلفى سلفاك

راح وهوه يضحك وانه رديت للشقه حضرت غراضي
وكعدت زين من رجع من النادي لان صاير يلعب حديد
كعدته وحجيتله اريد اسافر اسبوع وارجع ولازم
نشوف اهلنه وهوه هم يرد لاهله ويشوفهم شلون
تغير ويشوف شمحتاجين يلبيهم وضليت انفخ براسه
لحد ماكال انزل السوك وياكم اشتري لاهلي غراض
واروح بنفس يوم التروحون بي ....

عاد انه ارتاحيت خلصت من همه ... وكمت كملت
جنطتي وللعصر نزلنه السوك ثلاثتنه ...

خذيت هدوم لزهره واختي الثانيه من ابوي هم
حته لاتصير بينهن مشاحنات ...

وجاكيت مطرز لجدتي مطره .. ولابوي والشيخ
وعمامي خذتلهم ساعات وضلت الحبيبه

بالصدفه شفت هاللعابه وكبل ضحكت واخذتهه
صفنت بيهه وكلت ربى هاي ربى

.
.
شلونكم حبايب كلبي ... اعتذر كلش للتاخير
بس متدرون شلون موقف حقير صار وياي جنت
كاتبه ضعف هالبارت وتالي من اجيت لكيت محفوظ بس ٤٠٠ كلمه طكيت من القهر ...
وللعلم اني جنت بشغل مشاريع عندي ومكدرت افرغ
ولا دقيقه بس ارجع انام كبل واطلع من الصبح
وهسه يلا كدرت احصل نت وانزللكم هالكدرت ارجعه
واعوضكم بالجاي ...

واكو شغله راح تلاحظوهه تره اني كمت مااكتب
بالتركي لان حسيت محد يهتمله فحولته للعراقي
وبلهجه شهاب شفت هيج احسن اذا معجبكم كولو

احبكم 😍😍😍