رواية من فجر ديسمبر الفصل الخامس عشر 15 - بقلم Zoka 🌷

من فجر ديسمبر
🍁
🍁
بعد ما توادعنه ويه زين طلعنه كبل للمطار ورديت هالمره وكلي شوك لريحه بلادي البيهه تتنفس من حركت كلبي وكلبت كياني ...

جنت متوتر من اول ما نزلنه بمطار بغداد وانه بدا بيه
التوتر اهجس كلبي يدك سريع وبطني تمغصني وعركان
ماعرفن عليش !!!!

وليد مشى لاهله وانه طلعت للعماره .. هالمره انه مانطيتهم خبر برجعتي كلت اريدن اشوفنهه متفاجئه
وكلت بلكت اشوفنهه وهيه راجعه من المدرسه عبن
هنايه اهلنه بعدهم مامخلصين امتحانات موش مثل هناك
نخلص من وكت .. بس صارت رجعتي العصريه
مالحكت عليهه ..

طلعت كبل لبيت عمي حاتم طبك بابهم ونطيته فلوسه
ونزلت اعاين للبيت واضحك اكولن اول جيتي هنايه
حسبت ارتاح ماشوفن بنات تاليهه طلعت طيحتي هنايه
مكتوبلهه ..

حركت السركي شويه ودفعت الباب نفتحت وطبيت
البيت هدوء جنهم نايمين مدري طالعين ...
فتحت باب المطبخ وحطيت الجنطه بالباب ..
هستوني مشيت خطوتين بالمطبخ وعاينت ربى طلعت
من حجره بسام وبيدهه سله ملابس ..حكيت راسي وضحكت وانه اشتعلت بنار اريدن بس اكضهه واخليهه
بصدري هاي عبرت حدود لاجل شوفتهه ..

تكربت ليهه وهيه صافنه بوجهي ..
- شهاب !
- مفاجاه مو
- اي والله فاجأتني حمدلله على السلامه شلونك
- بنص الخير انتي شلونج
- بخير
- وين الاهل
- ابويه طالع وبسام بالقسم بعده ماراجع حيدر باللعبه
وامي نايمه
- وانتي بعدج تفترين وتنظفين
- اي شسوي لعد
- هاي شنو هاي ليييش ولج
- شكو
- ليش كاصه شعرج يامعزايه
- ها هيج عجبني
- لتجذبين كولي ليش كصيتي لج جان يخبل نعله عله ابليسسسيج لج لييييش
- كتلك عجبني شعليك انته
- استغفر الله وحك علي لو ادري جان كصيتهه لايدج
ولا خليج تكصي
- وانته شعليك بيه اكصه اطوله عسى ماازين صفر
شعليك بي شعري لو شعرك
- ربى
- ها
- تجفي شر هستوني واصل وتعبان لاتخليني ابلش بيج
- اي اي هو ادري بهالسالفه قابل ماعرف
- اي زين جا امشي حطيلي شي اكله
- ماشي
- وحضريلي حمام
- ماشي
- وكعدي امج خلي اسلم عليهه
- ماشي

راحت وانه اعاين لطولهه وكلبي يرفرف هيج ويه مشيتهه بس يابويه شلون انحرك كلبي من شفت كصه
شعرهه .. مسويته لحد الجتف ومسويه كذله عدله عله الكصه مثل مال كوريين انه بلاول مانتبهت عليه عبن
رافعته بس من ركزت شفته كصير من وره تخبلت
وهم ماكدر احجي واحاسب النوب تكلب عليه بس
اضمهه بعدين ليهه ..

رحت اخذت جنطتي وحطيتهه بحجره بسام راح استغلهه الي وحدي هوه ماكو ومحد يضل يدندن فوك راسي
تمددت وجان طبت ربى ..
- امي نايمه خطيه ماردت اكعدهه هي ع الصلاه تكعد
- اي ماشي
- طلع ملابسك الحمام جاهز
- شلون جاهز وانتي مامخليه هدومي
- يعني هنه بالجنطه شسويلك
- روحي طلعيهن انه مابيه حيل
- متاكد ؟
- ايييي يلا قابل شعندي بيهه وضامه تحركي يلا
- اممم
- ههههههه
- شبيك
- ماكو شي االغراض الفوك حطيهن عله جهه ولاتلعبين بيهن
- امم

صرت احب اسمع امم منهه وانه اعاينلهه شلون ادنج
وتتحرك كذلتهه واعاين ظهرهه مشتاكله .. هيج اهجس
رويحتي تسيح جدامه ..

اخذت الهدوم وراحت وانه كمت بسرعه لحكتهه للحمام
هي جاي تعلكهن وانه واكف بالباب متجتف واعاينلهه
طلعت هيه بلا متحجي شي وانه طبيت الحمام سبحت
وطلعت لكيت عمي راجع سلمت عليه ونزلت مرت عمي
هم سلمت وبعدين كعدت اكل واحجيلهم عن سفرتي

للمغرب اجه حيدر هم سلم وكعدنه شويه وتذكرت
الهدايه كمت جبت العلاكه واجيت جان حيدر كام
واجه يمي ...

- لك هلاا هاذ الحجي الزين بله اشوف بيمن ذكرتني
- هههخخخ هاا مصلحجي
- بعد اخيك شوفني
- هااك دريس ماركه مو هيج تره
- ان اخوووك يابه والله عشششت اجه بوكته
- ههههه وخر خلي انطي للاهل
- اليوم شهاب مدللنه اليوم
- هههه جا غير اهلي

انطيت الساعه لعمي والعطر لمرت عمي وجان حيدر
يكول..
- هاي شني البقى شو خلي اشوفن
-جيب معليك
- بربك شني اشو جنهه جبيره الهديه مالمن هاي
- هاي اااا هاي مال ربى
- اااااه

انداريت عليهه وهيه جانت واكفه تكلب بالتلفزيون
وعاينتلي بصدمه عاد انه طلعت العلبه مال اللعابه
من العلاكه ومديتهه الهه .. اخذتهه مني وهيه تعاينلي
وترجع تعاينلهه جان فتحتهه وطلعتهه راساً ضحكت
وهاي انه اول مره اشوفنهه هيج تضحك واشوفن سنونهه
ضحكت لضحكتهه ودنجت وانه العب بشعري جان كالت

- هاي ليش مخنزره
- مثلج هاي تشبهج انتي دومج هيج تعاينين
- اممم
- هاا شفتي نفس النظره
- هههه بابه شوفهه صدك تشبهني
- ايي وعلي نسختج لك هاي وين الكيتهه ياشهاب
- عمي هيج بالصدفه شفتهه وذكرتني بربى هم دومهه
هيج تخنزر من احاجيهه
- هههههههههههه والله صدكت
- اممم هيج يعني
- اممم اي هيج

عاينتلي صفح وبنفس النظره مال لعابه وتالي كعدت
وكالت ..
- المهم شكراً حلوه
- عفوا

ضلت حاطتهه بحضنهه وتلعب بشعرهه وهيه وياهه
متشابهين هيه هم مسويه مثل كذلتهه والنمش نفسه
حيدر كاعد ويضحك عليهه كل شويه وانه فاصل عنهم
وصافن بيهه اكولن هاي ام ثوب الماانام ليلي بدونه
عبرت حدود لاجل ريحته جدامي وماكدر اكضنهه

تعشينه وتعللنه شويه وبعدين كلمن راح لفراشه
انه هم رحت نمت جم ساعه وكعدت عبن اعرفنهه
تسهر وانه بس اريدن كربهه ..

كعدت ب ٣ بالليل وطلعت للحديقه ومثل ماتوقعت
لكيتهه ويه دفتر رسمهه وسماعاتهه باذنهه ..
خذيت نفس ورحت ليهه وكفت جدامهه ومديت ايدي
جريت السماعات .. عكدت حواجبهه وعاينتلي

- شكو
-شعندج سهرانه
- داارسم انته شعندك كاعد
- مادري هيج فزيت بعدين انتي ماتنامين وتعوفين
الرسم مو عندج دوام الصبح
- لا ماعندي
- شني عطلتو !
- لا
- جا بعد شكو
- مااداوم اني
- شنييي !!!
- ادرس خارجي مااداوم بالمدرسه
- عليج علي صدك تحجين !
- اي
- ليييش ولج ليش الخارجي
- اتعب بسرعه
- هاا اكِلج صدك عله هالسالفه تعاي ليه اريدن اسالج عليهه
- اي شنو
- انتي موش تشتغلين اربع وعشرين ساعه تكنسين
وتجلفين ومواعين ودومج كاضه وصلتج وتنظفين
ولانوم تنامين مثل الوادم ولا اكل تاكلين عدل اشو
ماتتعبين !!! ولا كلبج يوجعج ولا كلتي اخ ولا ايخ
- وهسه انته جاي تحقق وياي يعني
- موش تحقيق لجن انه اريدن احسبهه بالعكل ماتجي
يعني بالدوام تتعبين عليش وبالبيت ماتكعدين وشلونج
تخبلين
- يعني شسوي جنت اتعب وهسه صحتي زينه شلون يعني
- وشدعواج هيج تنرفزتي
- مابيه شي
- رببببى
- هااا
- وسماااا احجي عدل
- يعني شكلك
- نبرتج عدليهه لتضلين شايله خشمج
- هسه شمسويتلك ياا
- اللهم صبرج ياروح .. انتي يمتى حتحجيلي
- شحجي
- شني سرج
- ماعندي سر
- ههههه هاي احجيهه لاهلج موش لشهاب الحافظج
عدل ويعرفن خطواتج وصفناتج
- وليش انته مميز بشي عنهم !
- اي انه اعرفنج ضامه شي وعايشه بي بنص عيشتج
هاي نسيتي لو اذكرنج بسالفه الطين
- يا طين
- تعرفينه عدل عبالج مشيتهه وصدكت جذبتج لجن
انه عفتج براحتج لحد ماافرغلج وهاي انه رجعت
وماعندي شي غيرج
- انته هواي رايح زايد بافكارك
- وحك نور محمد اذا طلع تفكيري بيج غلط انطيج
كاعي بكبرهه انطيهه لج  اذا انه اطلع غلطان زيييين
- هاي شبيك هسه قابل اني ميته عله كاعك تره اذا اريد
اجيب عشره مثلهه
- اي عمي تكدرين والله شو عشيرتنه كلهه حاطيهه
ملك يمينج
- شنو تغار
- عليج مو منج
- شنوو
- هسه ماراح تحجين
- ماعندي شي احجي
- ربى انه ماجاي اريدن اكشفج واذلج ولا اسيطر عليج
بشي لجن انه بالي يمج اريدن اساعدج اعرفن شغلتج
جبيره وحملهه ثكيل عليج كليلي واعتبريني صديق
وانه ابن عمج سترج وسندج والي يمسج يمسني ماذيج
بشي صدكيني
- تسلم بس كتلك ماعندي شي اني بس هيج مااحب الاختلاط هواي والي اجوائي احب اعيشهه بدون ازعاج
- ماشي كيفج انتي حره تردين تحجين لا بكيفج
بس بنفس الوكت انه همين حر اصدكج لو لا
- اي براحتك
- هايهيه انتي ضلي بعنادج وانه اضلن ادور وراج
وكتلج ان طلعت غلطان كاعي باسمج تصير وماعز
عله الرجل من كاعه
- نشوف شيصير
- نشوف شعدنه ننتظر خلكي طويل وياج ياربى
- اممم زين
- ماكتيلي عليش هالكصه شعرج جان حلو
- كتلك عجبتني
- لاتعيديهه بعد خلي يطول
- امم
- لايكتلج الكذله صرتي طبق الاصل من اللعابه
- اييي
- شترسمين
- عين داتعلم اضبطهه
- هاا ماعبالي ماتعرفين شي بالرسم شفته احترافي
- لا هاي اريد اضبطهه اكثر
- مبين بالج فكره وتردين ترسميه!!
- اي
- بلكي الحك اشوفهه
- شكد تبقى
- اسبوعين
- يمكن تلحك
- اي زين جا استعجلي بيهه
- امم ،، راح انام تصبح عله خير
- وانتي من اهله

مشت من يمي وعطرهه فاح وجريت بي النفس وانه
مغمض عيني واكولن افيييش ردت رويحتك ياشهاب
تالي رحت كملت نومتي براحه مامنهه راحه ..

ثاني يوم تريكت وطلعت للسلف اول مارحت للشيخ
سلمت عليه وعله الولد وطلعت لاهلنه ....

تلكاني ابوي يحضن بيه وجدتي مطره تهلهل ..
- شني جده جايج من الحرب
- يمه يبعد بيتي غير رديتلنه بسلامه شلون ماافرحن
واهلهن ليك
- ههههه يمج انه جده ومابيه الا العافيه
-يبعد رويحتي يايمه نور هالبيت بردتك شلونك
ياوليدي
- بكل خير بشوفتج زينه ياجده .. انتي شلونج شلونه
ضغطج سنيناتج ماوكعن بعدهن
- ياااه يامدولب عينك عله سنيناتي هنه كاضيات والدور
تحسدهن
- شحسد كولي يالله هنه سنين خايبه غير اريدن اسويلج
تخم سنون واريحنج بالاكل
- اوي غدي غدي احطن مدري شنهي بحلكي شمدريني
مايطلعن سنون موتى وملزكيهن لينه تف تف تف عوووذه يمه غدددي
- ههههههههههههه والله عليج سوالف يامطره خايبه
هالوادم مالهه شغله يكعدن يشلعون سنون الميت ويلزكوهن لج خايبه اسكتي رحمه لاهلج
- يااااااه عود ايتفهم وايتفسلف بروسنه هالتركي
- عمارجي انه ياجده لاتنسين
-بس بالاسم لجن رويحتك هناك تعلكت بامهات الشيرت
- يا شيرت هاذ
- هذن مدري شني يلبسن يسمو شيرت هَيج يراري
الزرور
- هههخخخخخخخخخ يااااابويه جده هاذ شووورت
ههخخخخخ بالله عليج سوالف تضحك الميت بله انه
ماعندي شغله وعمله اكعد اعاينلهن
- جاا هاا ماعينك تلولح منا ومنايه
- لاا جده انه كاضيهه يااشتغل يا ادرس زلمه فقير
- اهييي جا بالشغل والدرس مامش بنيات شني ربك
مزكيك وانه ماعرفن
- لااا انه ربي عاميني بوحيده ماشوفن غيرهه
- انه امك ياشهاب مني هاي ولك يامصخم
- اااخ جده ااااخ وحده تدولب المايتدولب
- مني ولك مننني
- وحيده خليهه
- تحجي لا بالعصه عله هالصماخ افلشنه ليك
- فلشي بروح ابيج وخلصيني منهه بلكن ارتاح
- خايب يامصخم كِلي منهي هاي العاميتك اخافن
مشربتك شي كِلي
- انه اكل واشرب من ايدهه كلشي يصير
- من عزا العزاك ياشهاب يايمه الوليد مشرباته وغادي
طلي بيدهن يايمه وين اولي وين انطي وجهي امشينه
نروحن لابو فاضل يحلنهه لينه
- اكعدي خايبه انتي ماتصدكين تمشين لابو فاضل
شني هوه ماعنده شغله غيرج خايبه اركدي وخلينه
انفهمج
-شتفهمني يامعزه ساحراتك غادي طلي مصوفر
- لا اله الا الله هسه انتي عرفتي مننووو
- مني هاي الكشره التريدهه
- انتي يابعد رويحتي
- كووووم لانعل والديك
- ابوي ابنج لاتنسين يامطوررره
- لانعل ابوك ياابو ابوك يا جلب وابن سطعش جلب
- هخخخخخخخخ عشيرتنه طاحت جلاب يامطره عليش لج عليش هاي لين احبنج
- من حبتك الكراده كووووم لابارك الله بيك
- ياااه انه حبيبج تدعين علي مامرجيه منج حجيه
- خايييييب شلون انه بيك وبمدوهرتك الماتخلص
- انه اروحن لزهره احسن ليه انتي ماتفيدين
- اخيتك بعدهه ماراده من المدرسه
- هو انه اروحن اجيبهه مشتاكلهه
- روحن يمه الله وياك
- توج ادعين علي
- خايب امش امش
- ههه احبنج وعلي

عفتهه وطلعت بالسياره لمدرسه زهره .. شوفت الجنسيه
للحارس وطبيت لغرفه المديره هم انطيتهه الجنسيه يلا
دزت عليهه ..

جانن المدرسات والطالبات يتبسبسن جوه عاد انه
كتلهه راح اوكف بالممر ...

شويه واجتي زهره ومن بعيد شافتني واجتني تركض
وكضت ايديني ودموعهه تصب .. عاد جريتهه حبيت
راسهه ..
- يمتى رديت ياخوي
- بارحه رديت وجنت بيت عمي وهاي جيتي عليج اول ماوصلت اهلنه سلمت واجيت اخذج
- يابعد رويحتي حمدلله عله سلامتك ياروح اخيتك
مشتاكتلك ياابن امي وعلي كلبي مفرفرح عليك
- انه بعد مشتاااكلج ومااملن من شوفتج لجن امشي
جيبي جنطتج ونحجي بالدرب
-اي هسه اروحن
- يلا بساع

راحت ركضت لصفهه جابت جنطتهه واجتي وطلعنه
للسياره ...
-احجيلي ياخيه شلون  كاضيه ايامج
-والله ياخوي ادرِس واتعارك ويه هالحيه هاي
- ياهي
- اختنه الله يحفظهه بنت ابونه يمااااي حيه كشره
صفيره عله امهه لو ما جدتي ولا احملهن اطكن واموتن
من الغيض بس جدتي تصبر بيه وتهد عليهن وتسكتهن
- يابه جوزي منهن يرحلج فدوه
- وانه شعندي وياهن هنه بيهن حكرص اله يذبلهن حجايه هالكبر
- هههههه بنات عمنه شلونهن وياج
- زوينات انه جنت اروحن كل جمعه لبيت الشيخ
واشوفنهن عله الغده كلهن يجن
- هااا اي شكو من اخبار علوم
- صياد حيتزوج بالعطله هاي بعد جم يوم وغزاله
بنت الشيخ جايهه خطابه من الناصريه ويكولون
خوش ناس والشيخ مايرضى ينطي وهمه يردوهه
ولاحين عليه جنه حيوافك هالجم يوم هيج احسن
- اذا خوش وادم عليش ماينطي
- ماعرف والله
- انتي هسه بيمن علاقتج زينه من عمومتنه
- اكثر شي ويه بنات عمي عمران وربى بس هذني
- هاا ربى !!
- اي خوش بنت طيبه بس مايعرفهه الا اليعاشرهه
- هاا احجيلي شمسويه وياهه
- من جنت اروحن للعزيمه الجمعه هيه تجي وهناك
تعرف مايحبنهه البنات فتضل كاعده لوحيدهه وانه
مره رحت ليهه وضلينه نسولف وهيه شلون حجاياتهه
حلوه وكعدت راوتني رسماتهه وحته رسمت كصيبتي
كالت هاي طولهه مال لوحه
- جا شبيهه تسودنت وكصت شعرهه باترته
- ياااا هيه غير كِله من المصوفره السمه هذيج رباب
- شننني هاي شدخلهه
- موش احنه نوبه بايتين هناك يم الشيخ هيه وامهه
وانه وحدي وبنات عمي عمران وليش ما كعدنه الصبح
واشوفن ربى شعرهه من الجتف للخصر كله علج ملزك
تلزك تريد تفكه ماكو وهيه دمعتهه بعينهه خطيه وهذيج المسمومه من الله لا ينطيهه اجتي وعيبت عليهه
وتكللهه ماتعرفين تاكلين علج مليصه شعرج وبعدين ترد تكللهه راحت حلاتج بعد ياهوه اليكلبج ويحسبلج حساب ياحمره ام شعر الرصخ الملزك ... تالي
كامت وكالتلي انطيني قراصتج وانطيتهه جان تلزمه
وتشده من فوك وراحت اخذت المكص ووكفت كصته لجتفهه من حد القراصه وردت نزعت القراصه شدتهه
بي وراحت للمطبخ وهيه نازعه حجابهه وعاينتلهم
جان مشت ليم رباب وحطته بحضنهه امهه صاحت
ولطمت عله صدرهه خطيه كالتلهه ليش هيج يامعزايه
جان ربى تكول ... رباب عاجبهه وانطيته الهه ماريد
يضل بنفسهه شعري خلي تشبع بي ...
هههخخخخخ مااحجيلك شلون شكلهه صار لرباب
ضلت تضرب اخماس باسداس ويابه من عرف الشيخ
بعدين يايابه شسوه شعممممل هيه وامهه اسبوعين تكميل
ماطبن البيت ولا شافنه شلونه الا اجه خالهم هم جبيرهم
وبلكوه يلا رجعهن ... وعبالك هيه حجت ربى ابد والله
خطيه بره ماخلص الريوك طبت للشيخ لابسه حجابهه
وودعته وكالت هسه نرجع دكت رجل الا هسه نرجع
وعاد صياد رجعهم

- هاااا جا منين عرف
- مو تدري بغزاله تسولف كلشي ماتضم حجايه وهوه
رايح داز عليهه وهيه كاته الاول والتالي ومخليته لازمهن كاضي بيهن التوبه ودازهن لخوالهن
- هاا هيج الحجي طلع وانه عبالي هيه مسودنه وتمشي بالكيف
- لااا خطيه يمه لو انه بدالهه يايمه يايمه شسوي شعمل
جان حطيتهه لرباب واجفص بنص بطنهه وحك علي
اطلعن حليب  امهه من خشمهه جااا انه شعري الطوله
بطولي تجي تعمل بي هالشكل ياويلي يابويه
- خايبه اسكتي سطرتي لراسي هوه انتي ياهو اليندك بيج
- اي والله يرحن ع الفقيره هذيج عبنهه سويكته ومالهه
دخل بالرايح والجاي انه لو بس اعرفن من شني كلب كلبهه اكله كضت المكص وهيه تعاينله وكصته من الركبه وهوه طوله لخصره شالته وشمرته ومارفلهه جفن ولا صاحت ولا عاطت ولا دمعه نزلت بويه هوه شاعز
ع البت من شعرهه وماتبجي ولا يهز كلبهه عليه !!!!
- هالبت كويه ومايكف بعينهه شي انه اعرفنهه خشم يابس وعنااد الصعايده عنادهه
- خويه ياعناد اكله شعر هاااذ شعرررر يكسر روحي
مو بس عنادي بس هيه الله يسلمهه كويه ومايهزهه شي
- اريدنج تكربين ليهه ازيد وتعرفين شبيهه مابيهه
خليهه رفيجتج بكل شي زين
- ان شاء الله خويه
- يلاا انزلي انه اروحن لنعيم اسلم عليه
- بالسلامه خويه

ديورت السياره ومشيت وانه اضحك عليهه واكولن
يا كبريائج الماينهز ياشمسه وبكل بروده كلب تجي تكلي عجبني اكصه !!! اجيبنج لو تصيرين جبل شامخ اجيبنج

نزلت دكيت الباب وطلع اخو نعيم سلمت عليه وهوه
رحب بيه وطبيت جوه جان نعيم نايم ع الجربايه وشكله تعبان من شافني راد يكوم وحيل مابيه عاد انه دنجتله
وحضنته وهوه يشم بيه وعيونه تصب دمع ..

- خيرك ياخوي
- المرض كضى بيه ياشهاب زين انك رديت واشوفنك يشهد الله بكل حسبه انته تجي بالي
- الحمد الله عله كل حال .. هاي انه اجيتك ياخوي لا تشيل هم شني علاجك وين ماراجعت دكتور
- راجعت وهالينطوني الادويه ماتفيد بشي عاد وصلت
الكيمياوي وهالتشوفه سوه بيه جسمي اهجسه مورم
ونار يجويني وعظامي تون علي ومابيدي شي
- لا اله الا الله ليش ياخوي رحت للكيمياوي والله لو
انك دازلي خبر جان اجيت وخذيتك وياي وهناك اعالجك
لجن انه كل ظني تحسنت وراح الخطر من هالمرض
ماظنيت هيج حالك اعذرني يانعيم والله ماعرفن بيك هيج
ولا انه تعرفني ماعزن شي عليك هالنفس اكاسمه وياك
لو تريده
- اعرفنك ياخوي اعرفنك ماعليك عتب ياشهاب هاذ
امر ربك بعد لا يدفعه لا تركيه ولا فلوس ولا شي
مكتوب علينه نجرع المر يلا نموت
- اسم الله عليك عمر الطويل ان شاء الله وجايز هالعلاج
هم يفيدنك وبس تعدي مرحلته جم يوم ويرجع جسمك زين وتكوم عله حيلك كول يالله وشد الهمه اريدنك وياي
شني جايك وتعوفني وماترافجني
- لا شلون اعوفنك
- جاا خليك كوي اريدن عزيمتك وهمتك مايكسرهه حته
المرض صير اكوه منه يانعيم اعرفنك سبع ذيييب
- ان شاء الله ادعيلي اكوم عله حيلي
- ادعيلك انه بكل صلاه جنت جايبلك هديه بس ضلت
بالبيت عبن انه هاي جيتي من مدرسه زهره وكبل اجيتك
- جيتك وحجايتك وياي كافي شسوي بالهديه
- نجب لك انه ماحبن هالحجي احجي عدل وياي مو مال فهاوه
- ههخخخخخخ طاحضك هوه انه بيا حال
- ايباااخ اشو مدلل ومدد وعليك التبريد فوك راسك
مو مثلي شابع ضيم بالشغل اركض ليل نهار
- خخخخ تحسدني ع النومه
- اييي بعلي انه ربتلي عله النومه
- عليش
- هخخخخخ عاشك خويك
- لاه لاه تجججذب
- لاوحك علي
- انه اخوك ياشهاب منهي هاي وشلون
- سالفه طويله
- احجي لا بالعباس اطيحنه لصبغك هساع منهي هاي
يول شلون تعشك وانه ماعرفن علللليش ماتكلي يامصخم
- خايب هوه انه اعرفن حته انته اتعرف
- شني هيه حزووه اعرفن وماعرفن
- مصيبه وطاحت عله راسي بلوه موش عشك
- بالعباس شلعته لكلبي كوووول مننننههههي هاااي
- بنت عمي حاتم
- انننننننه اخووووووووك الشهب عاشك الشمسه
- هههههه كلنه بحضره الشمسه نضيع
- شجابك شوداك عليه يامعزه لك بويه هاي تشل حالك
وتشيب راسك
- شدراك بيهه
- بويه انه لا اعرفنهه ولا شي لجن انه اعرفن بالشيخ
شلونه وياهه وكبل مره جارنه بيت حميد ال... طلبوهه
مره لابنهم الوسطاني وضل سنتين يتقدملهم ويرفضوه
سنتين تكميل وهوه يكوم ويكعد ويكول مااخذ الا شمس الشيخ عاد الشيخ داز عليه وكاضه من اذنه ولاويهه ليه
وكايله من تشوف الترابات يطمني عود تعال وانطك
اسمهه عله لسانك لجن هسه وانه اشمن الهوه اكصنه ليك
ووالله من ذاك اليوم وهمه لاطبو ولا وصلو بيت الشيخ
والولد طلع مخونس وتاليهه بره اربع شهور تزوج

- حيييييل يستاهل والله زين ماسوه بي
- اي بالك لا يجيك الدور
- لااا انه ماروحن هيج واطلبهه انه اتكتك يله
- شلون
- انه لو اخذ كلبهه لو مااحجي بالسالفه خير شر
- تعرفن طبايعه!!
- كويه وخشم يابس موش سهله
- جا كض مهرتك بهداوه لا تنفر منك
- الله كريم

ضليت لحد الغروب يلا رديت لبيتنه وكعدت ويه اهلي
شوي وانطيتهم هداياهم وضليت ثاني يوم هم عدهم
لجن روحي تلوب تريدن بيت الحبيبه وشلون اصلهه
بعد ماضلت حجه واضلن كاعد بيتهم

ثلاث ايام وطك جبدي عليهه العصر ورحتلهم خذيت
مخضرات وبحجتهه اكعدن يمهم هاليوم

والله وطبيت وسلمت وكعدت تغديت وانه اعاينلهه
بسكات وتالي وره الغده عمتي صعدت تنام وحيدر
راح نام وعمي يطلع لشغله وضلينه بس احنه

انه متمدد واتفرج تلفزيون وهيه تنظف بالمطبخ
تالي ردتلي حجه احاجيهه شلوون !!!

رحت للمطبخ وشربت ماي وضليت اعاينلهه
واتفحص جسمهه شبر شبر واصفنت عله شعرهه
الاحمراني الكصيرون بس لايكلهه مسمن وجهه الناعم

ردت احاجيهه ماتجرأت درت وجهي ومشيت
شلون انه يمتى اعترفلهه !! شلون اخليهه تحبني ؟؟

انه متمدد اتفرج تلفزيون بس بالي مو يمه افكر بيهه
وهيه عرفتهه طبت تسبح .. مادري شلون روحي رجفت
من تخيلت الماي يلامس جسمهه ...

كعدت عله حيلي وانطرهه تطلع ... من طلعت صحتهه
اجتني والوجه احمر والايد رطبه والريحه تسطر
وكفت هيه وتمسح بوجهه وانه افتر ماعرفن شسوي
بس اذا ييضل هالشي بكلبي يجتلني بمجاني ...

سديت الباب وهيه عاينتلي باستغراب كتلهه...
- عندي وياج حجايتين
- اي كول شنو
- ماعرف شلون ابدي بيهه
-امم

جرت منشفتهه وكامت تنشف بشعرهه وريحته فاحت
رحت ليهه بلايه وعي وتلمست خصله منه وانه عيني
ذايبه بيهه هيه ابتعدت ورجعت ليوره وانه تكربت ليهه
جريتهه من ايدهه للحايط وكربت جسمي لجسمهه نفسي
صار عالي وهمت بيهه وهيه بس مخنزره وتعاينلي
دنجت راسي وخليته يم اذنهه من بروده جسمهه وشعرهه
المبلل وهالركبه الي ياما وياما حلمت بيهه اخذت نفس
قوي ومن زفرته كلتلهه ...

-احببببج

مانطيتهه مجال تحجي شي وكربت وجهي لوجهه
وايدي حطيتهه وره ظهرهه وانه من لمسته طار كل
عگلي ... شميت خدهه واجيت كربت لشفايفهه وهيه
كضت جتفي حيل وتريد تدفعني وماكدرت ..وانه
روحي صارت بهالشفايف وهي ترجف خليت شفايفي
عليهه واجيت امصهه جان دفعتني من بطني وانه
مثل الصحيت ... جان بحركه مفاجاه منهه ضربتني
راشدي ..

هناييه تحول كل حب بيه لكره اعمى كضيت ايدهه
وعصرتهه بايدي ونفسي صار نار بوجهه وعيوني تعاتب .
- شفايفي ممباحه الك ياابن العم يامحترم
- حتندمين عله هاي سوايتج ياربى لشوفج نجوم الظهر
قسم بمحمد هاا لاحرك گلبج وابجيج دم مثل ماحرگتيني
- انته الغلطت وتستاهل من تتعدى حدودك هذا ردي الك
- كتلج احبج ماتفهمين
- متحبني تحب جسمي انته لتجذب الجذبه وتصدكهه
وخر مني وخررر لعبت نفسي منك
- وحك نور محمد ورووووح امي ان مابجيت گلبج
كبل عينج ماانام هالليله

دفعتهه عله الحايط وانضرب جسمهه بي ورديت فتحت
الباب وطلعتهه وهيه تضرب وانه ادفع عاد طلعت بره
كعدت ع الرصيف وانه ايدي ترجف من الاعصاب
بس مااريدن اهدأ ابببد اريدن اضل بهالاعصاب والهبال
هاذ حته اندمنهه ....
.
.
.
يتبع