رواية من فجر ديسمبر الفصل السابع والعشرون 27 - بقلم Zoka 🌷

من فجر ديسمبر
🍁
🍁
- راح تنامين هنايه
- اي نعست
- زين انه حنام بالهول
- عادي خليك هنا ماتضايقني بشي اخذ راحتك اني
هسه احسبلي للخمسه تلكاني نايمه
- هههه ماشي جا احلامج سعيده
- اممم

كمت طفيت الضوا واجيت تمددت ع الجهه الثانيه
من الجربايه وداير وجهي عليهه والمسافه بينه جبيره .. هيج مجرد شعور انه كريب منهه لهالحد
يطيرن رويحتي من الفرح واضلن هايم بيهه واتخيلن ايدي تتمشى عله شعرهه الي صاير طوله للجتف واتلمس ايدهه من جتفهه لاصابعهه وابوسن عيونهه هاي كل امانيي صارت بكربها ونمت وانه احلمن باليوم اليصيرن بي ...

كعدني صوت دكت الباب وكمت فتحته لكيت هاذ
لابان واكف متخوصر ..
- ها لابان شمالك
- اشنو ماكو ريوك
- اي اي هسه نجي
- ابسرعا هييي

هز بايده ومشى انه جنت مطفي بعدني ومالي خلكه
خليته يولي وركعت الباب حيل جان ربى تفز
- شكو شصاير
- هيج مامش شي
- استغفر الله هاي طريقه واحد يكعد بيهه
- بويه انه شعلي هاذ المسعد جاينه يريد ريوك ويتامر فوكهه
- ميخالف طول خلكك وياه يعني متعرفه شنو
-  اللهم طولج ياروح كومي سويله اكل لا يشهرنا
- مااشي

كامت تعدل بشعرهه واجاني هالسؤال بالي هيه عليش ماتلبس حجاب جدامي ؟؟ رغم انهه ويه الكل تلبسه ؟!!!
اجيت اسالهه بس كلت مو مال هيج سوالف من الصبح خليهه بعدين ...

طلعت بعد مارتبت الفراش ولبست حجابهه وراحت للمطبخ هوه البيت جان كلشي جاهز بي
عاد كامت سوت الريوك وجابت الصينيه ليمهم
وانه جنت اغسل للحجيه .. وجبتهه وهيه كعدت توكلهه وهاذ المصكوع ياكل ويرد ليوره ...

من خلصنه كمت اخذت الصينيه للمطبخ وصحت عليهه ...
- ها شهاب
- تعاي اكلي ماحطيتي لكمه بحلكج
- ماعجبني الاكل وياهم صراحه
- اي حسيت هالشي
- اي هذا يضوجني محبيت اسلوبه وطريقه تعامله ابد ماستلطفته
- هوه الاحسن .. اكعدي اكلي يلا كبل لا تجيج زهره وتشلشج
- عفيه مو تخليني اروح هسه شيخلصني بعد
لازم اكعد احجيلهه كلشي صار البارحه
واذا ماحجيت تزعل واني مااحب ازعلهه
- ههههههههه هاي صايره تتهربين منهه يمي
والله عمي خوش
- شهاب هسه هي هالمره كلتلك
- يلاا بويه هسه انه شحجيت
- اي عبالي متريد
- اااخ لج انه ماريد انه شاريج بروحي يحلوه
- شكراً
- هههههههه انه لو بس اعرفن انتي امج متنسيه بيج بثلج جابتج بالشته ربج خلط بطينتج ماي بارد
وهيج طلعتي
— كلشي يصير
- هيه اكيد مبينه
- اممم

تاكل وتحجي بلا مبالاه وانه اضحك عليهه صاير حته برودهه احبنه منهه ...

رحت انه كعدت يم هالمصكوع وهوه يحوم وكلساع يكلي امشي نطلع نفتر شني حابسني هنا
وانه اكله اصبر يجي الشيخ يلا وهوه يلح تالي
كمت خابرت الشيخ وكالي ساعه ويصلون
عاد انه كلتلهم هيج والكل انخبص عله شني ماعرفن ...

ومن وصل الشيخ خابرني وطلعتله وانه طلعت
واشوفنلك امه محمد كلهه باب الديوان وطبت
سياره الشيخ والريم يمه بالصدر .. عاد انه جان
موصيني اجيبن ليه السلاح واول ماطبك السياره
ضربت بالهوا جيلتين والكل نصدمت وضلت فاكه حلوكهه .. من نزلت الريم فوك ملابسهه حاطه عبايه الشيخ وكبل هوه اجه طببهه للكراج مال بيتهه وانه سلمت عليه وباركتله واجتي ربى هم
حضنته وهوه طول بحضنتهه وكل ساع يكللهه
مشتاكلج يابعد هلي .. وعاد اخذ مني السلاح ونيشن عله جهه البستان الفارغه وضرب كل
الجيلات الضاله بالشاجور ... طلعنه وانشوفلك
كل زلم السلف واكفه وتعاين ولمحت مرته وبناته
يعاينن من بعيد وابوي وعمامي كلهه التمت وتسال
شني السالفه شكو ...

عاد الشيخ كلهم الكل للديوان تلحكني ...
ورحنه للديوان ... بعد الكعده والسلام الشيخ كال

- هاليوم انه جمعتكم لكضيه فرح وخير ان شاء الله
صح انهه تاخرت عله مسامعكم لجن لكل شي سبته
انه ياجماعه الخير تزوجت واليوم انه اريدن اضم
بينه هالشاب لابان ابنهه لحرمتي وجده الله يرحمه يصيرن معارفي من زمان

- بالمبارك ياشيخ عساهه زواجه الدهر
- تسلم تسلم ،،، اريدنكم تحفظونهم بغيابي مثل ماتحفظون وتحشمون اهل بيتي عبنهم هذول جزء من هذول وانه ماافركن بينهم بشي .. هذول من نسل عزيز علي ويضلون بديرتنه معززين مكرمين .. وانه ماارضى بالزله وياهم بشي لا من كريب ولا بعيد ... ومن بعد مشورتكم ياخيرين
انه اريدن اخلي لابان ويانه بالديوان يتعلم اصولنه
وطبايعنه ويعرف العرب شنهو طبايعهم عبن هوه
صار منا وبينه والواجب نخليه ياخذ ذبتنه حته
لا يزعجن واحد منكم ولا هوه يضل يهجس بروحه غريب مننه

- والله ياشيخ احنه نرحب بي وباهله ومضايفنه
ودوواينه كِلهه مفتوحه ليه حياك الله بينه بويه

- الله يحيك يا عم

جان الكل بينهم من ماعجبه الحجي وماراضي بي
وبين الي يضحك عله فهاوه هالوليد وبين الي يريدن يشمشم بالعلوم ازيد جان واحد منهم كال

- اكولن شيخ من رخصتك انه اهجس هالوادم
موش جنوبيين !!

- اييي صدكت ياابن العم .. هذول اهلنه من الموصل

- مسيح اسلام شني طايفتهم

- كلنه ولد ادم ياازلمه جف عنك هالحجي موش
لايك بديوان الساده احنه ربنا ودينا واحد لا نكولن سني وشيعي ولا صبي ومسيحي ومسلم البني ادم
باعماله يتحاسب ويه ربه موش ويانه احنه علينه
نعيش بسلام ويه كل اخوتنه وحجايه اللخ تطلع عله
الاديان والطوايف ينشاف الشي الي مايرضى جناب كل واحد حاضر وسمع هالجلمه

- ما كصدنا شي شيخنه ردنا نعرف اخونه منين
وحياه الله منين ماجان

هنايه عمامي جنهم فهمو السالفه عبنهم ساكتين
وماعليهم علامات العجب من السالفه .. عبنهم
من جاب طاري الموصل كلمن جر سبحته وفرهه
وعاين باريحيه للباكين ..

والشيخ عكد هالحاجب من انجاب طاري المسيح
والاسلام وضل عله هالحطه لحد ما طلعو الكل
وفرغ الديوان وضلينه بس انه وابوي وعمامي
اثنين ...
ابوي كال ..
- هاا يشهاب طلعت ادستر ويه عمك وتصفط علي بهالجذبات بله مااستحيت ماخجلت من شيبتي شكبرني وتجذب علي عينك عينك لااا والغسل اي والله ماخذني عله كد عكلي شني انته بويه هااا

- ابو شهاب تهدا خويه .. انه اللزمت عليه السكوت
عبن انه ليه نيه بالي وردتنهه تصير يلا اكولن بيهه

- سامحني بويه الضروره حكمت علي بعد

- انه اعلمك ياشهاب ماانساهه ليك هالدكه

- ابووو شهااااب شني خويه هاذ زلمه مشورب موش مال هيج حجي والزلمه ماعال بشي انه
الحكمت عليه يسكت وهوه طاع امري وسكت
جف شرك عنه ومااريدن اسمع جلمه نازله عليه
يا خويه

- هاااي ظهرك مسند عدددل .. تااامر ياخويه
تااامر

ضحكت وعاينت للشيخ وهوه ضحك وعاد شويه
وترخصنه وهوه طب لاهله .. وره ساعه مانشوفن
الا محمد ماخذ امه بالسياره وطالع ...
عرفت كبت العيطه جوه وهاي ماتحملت وشردت

لجن الحمدلله فضت هالكارثه بلايه خساير ..
لجن هالسالفه العوجه الطلعت هيه هالمصكوع
الشيخ علكه بركبتي وانه شلون احبنه بويه وتورطت بي ...

وجان اخذه كبل جبتله دشداشه من مالات صياد عبن هوه وياه نفس الطول وخليته يذب البنطرون
ويلبسهه ولفيتله الشماغ عله راسه شديته وطلعته
للزرع وضليت اكله هاي هيج وهيج ...

وضل كل يوميه يكعد ويه الشيخ بالديوان مايفاركه
وانه كل ليله اكعد اشرحله شكصدو من هالسالفه
ومن هذيج ...

الشيخ سمعت من زهره ماخذ الريم لبيته الاولي
ومعرفهه عله بناته وعله نسوان عمامي وعماتنه
وجدتي مطره وكالت بس الجده وعماتي حبنهه
الا البكيه كلهم بالكوه ردن عليهه السلام ...

والعايش الجو بكل هاذ هوه ربى ...
ضحكتهه ما نزلت من وجهه لو لحظه .. وكل ليله شايله مواعين الحلويات والكيك ورايحه هيه وزهره للريم ويكعدن دك سوالف لحد جيه الشيخ
ويكملن التعلوله وياه وهوه حاط شمساته وحده يمنه ووحده يسره ويداري بالاثنين ...

والشيخ نفسيته مرتاحه وكل كشخه ولا الثانيه
دومه يجي الوجه متفح والعطر يفوح وكعدته
وملكاه لين موش مثل كبل جلمتين والثانيه زمخ
بينه ...

ولده مالهم شغل بهالابن الجديد لجنهم راحو توسلو ابوهم حته يرد امهم وهوه بدوره كال ..
انه ماطاردهه وماعندي شي وياهه يعجبهه ترد
بيتهه مفتوح ليهه مايعجبهه كيفهه ...
وثاني يوم رايحين راديهه من خوالهم .. لجن لهالساع هيه والريم ما متلاكيات ...
ولا حته البنات يطبن عليهه كل وحده بجهه
كل اختلاطهه بربى وزهره وعماتنه ...

ووره شهرين عله هالكعده بدت تطلع المشاكل عبن كامن عماتنه يحركن بكلوب نسوان عمامي عله
جمال الريم ونزاكتهه وكامت يدللن بيهه بالازيد
ومرت الشيخ طاكه فيوزاتهه منهه ولو ما الشيخ
حاط عليهه يمين الطلاك اذا عتبت باب بيت الريم
جان هسه هيه كافشتهه وحاركتهه هم ...

رجع الدوام وراحت ربى وانه كلشي مافهمت منهه
متربط بهالمصكوع صاير جنه ضلي بس بالحمام يعوفني ... صح بدا يتغير وحجيه صار مثلنه شويه
لجن بعده موش كلش ... ما كلبي يهواه ...

وبشهر ال ١١ انه جنت اشتغل كل يومين تلاثه
اطلع اشد كهربائيات وجم يوم اكضيهن بالزرع
لو اطلع بالحمل لسامرا ،لكربلا ، للحله حسب
بعد كل يوم وشنهو رزكه ...

جان هاليوم الي انه راجع بي من شغل الكهربائيات
خابرتني ربى .. جاوبتهه وانه توني اطب البيت
وجان اسمعن صوت نفسهه المخنوك وانه تصركعت ...
- شجاااج بنيتي شماالج فهميني اححجي ربى
- شهااب ابويه
- شماله ابوج اخوج السكط وينه
- ماكو طالع ،، شهاب روحله فدوا ارجووك روح
- دخيلك ياربي عوفي ابيج هسه امشي اخذي علاجج البخاخ مالتج روحي اخذي نفسج حينكطع ربى تسمعيني

صرت مااسمع بس صوت كحتهه وتتشاهك وغراض اطركع وتالي انسد الخط وانه ضليت
شايط باعصابي عاد رحت كبل للشيخ وطبيت بنص الديوان وكبل مشيت ليه وهوه كاملي بساع

- شيخ ربى جايتهه نوبه وبوحدهه بالبيت هالساع خابرتني
- شننننني وهالمصركع ويننن ولى
- ماعرفن تكول طالع .. انه هالساع رايح ليهه
واكضنهه اتوبه لجن هيه كالت ابوهه مادري شني
مافهمت بس كالت روحله
- امشي اطلع ليهه وانه اتكفل بالباكي يلاا بساع تحرررك
- زين عود خابرني شنهي يصير
- توووكل بويه يلااا

طلعت بساع اخذت سياره ابوي وكبل لبغداد
طرت بالسياره طير لحد ماوصلتهم انه الف
ياعلي ناخي ليهه ...

جريت سيم الباب وطبيت جفت للهول وعاينتهه
كاعده بالكاع وحاطه راسهه عله الكرويته والوجه
احمررر دم غادي وبس صوت التشاهك منهه
وبايدهه التلفون والبخاخ بسدهه بالكاع ..

ركضت ليهه جريتهه لصدري وشلت شعرهه من وجهه المليان عرك وهيه ماتكدر تنطك بجلمه
العين ذبلانه وجسمهه خاوي بايدي بالكوه شلتهه
وطلعت بيهه للسياره ورديت طبيت دورت عباتهه
جبتهه حطيتهه عليهه ومشيت كبل للمستشفى

وانه كلساع ادك عله هالسكط بسام ومايرد تحلفت
بس اكضنهه ادميه ...

وكبل اخذوهه للطوارىء وضلت ع الاوكسجين والابر ومثل كل مره تخطيط للكلب ويطلع هالخفقان السبب وانه الشيخ كلساع يدك علي
واكله بالي يصير لجن هوه من اساله عله ابوهه
يكلي بعدين نحجي ويسد الخط ...

وضليت بحيرتي انه بينهم لا هاذ الاعرفنه وين ولى ولا اعرفن عمي شماله ولا هيه التكعد وتفهمني شصار ...

.
.
.
يتبع

هسه تكولون ليش مو هوايه !! بس لان الحجي الجاي يرادله كعده زينه واني عندي امتحان وسهرانه لاجل عينكم .. العصر اعوضكم بالباقي