رواية من فجر ديسمبر الفصل الثامن والعشرون 28 - بقلم Zoka 🌷

من فجر ديسمبر
🍁
🍁
رحت طبيت يم ربى الي جانت غاطه بالنوم كعدت
يمهه وعدلت عباتهه وضليت صافن بيهه واسالن
روحي شنهو الضامته هالبت !! الوجه حسن ملائكي والگلب جنه جماره وروحهه طيبه جا عليش هالتسويه ؟؟؟

رديت وره ساعه خابرت عله الشيخ وجاوبني
مخبوص وبس كلي بعدين لا تشلشني كلساع
انه ضل بالي شنهي الصار هناك؟؟؟
رديت خابرت عله محمد وخليته يروح يشوفلي شنهو الصار..

وهالسكط مايرد مدري وين مختفي ... ومحد
رجعلي خبر عله شي وضال بحيرتي اهوجس
وصار الليل وكعدت ربى .. شربتهه الماي ورجعت كعدت يمهه وهيه تعاينلي بتعب تالي
كالت ..
- اخذني للبيت
- شلونه نفسج هسه طمنيني
- احسن محتاجه بس ارتاح
- وكعتي كلبي وعلي هاي انه جيتج طاير من العماره لبغداد شجاج فهميني عليش هيج
- مادري صارت بعد
- يلا نحجي بيهه بعدين خلي اشوفن الدكتور

كمت صحت الدكتور واجه فحصهه وطمني عليهه وطلعنه جانت مجلبه ببلوزي من خاصرتي وانه
اتمشى علكيف وياهه لحد ما طلعنه من باب المستشفى ورحت جبت السياره واجيت صعدتهه
ومشينه للبيت ...

من وصلنه اخذتهه لحجرتهه فوك وهيه كل بايتين
وتوكف شويه وترد تكمل ومارضت تضل جوه
اله تصعد لوحدهه تنام ..

كعدتهه ع الجربايه وهيه كاضه كلبهه كالتلي
- شهاب ولو تعبتك بس اريد ملابس ابدل
- لا تدللي انتي

فتحت خانتهه وطلعتلهه دشداشه كصيره خفيفه
عبن اعرفنهه هيج تحب تلبس من تنام .. انطيتهه
وطلعت رحت نزلت للمطبخ شفت شكو ماكو بالثلاجه .. وجانت بس فواكهه وكليلات ضالات

كل شغله اشوفنهه بهالبيت اتحلفن بيهه لكتله زايده لبسام .. رحت صعدت دكيت الباب  وطبيت كلتلهه

- شلون صرتي مرتاحه هسه ؟
- الحمدلله
- كلبج يوجعج بعده
- لا احسن خف بس شويه تعبانه
- اي حكج بويه تتعبين جا هوه هين
- الحمدلله بكل حال
- اريدن اطلع اجيبن مسواك شي تاكلي لجن ماكدر اعوفنج .. بله ماتكلي هاذ اخيج شعنده هنايه اذا
مايدير باله ع البيت ولا عليج شني كاعد خاوه
- عفيه مابيه حيله هسه لتجيب طاري
- بس كليلي وين راح اشو سبعين مره خابرته مايرد
- مادري هوه من رجع من دوامه طب سبح وكال راح اطلع وتكشخ وراح
- زين ماكتيله شلون تعوفني بوحدي موش الشيخ موصي هاذ مايتوب الا تكسر رجليه يلا
- عوفه عفيه
- نامي ارتاحي
- شهاب ابويه شلونه
- زين مابي شي
- لتجذب
- ماعرفن الصراحه انه من ساعه الخابرتيني وانه كبل مشيت للشيخ وكتله بالصار وهوه كلي انه اتكفل بالسالفه عاد عفته واجيتج
- دخابره شوف شصار
- انتي شني التعرفينه
- ماكو شي بس هيج
- شنهو الهيج تضحكين علي
- شهاب تعبانه عفيه لاتزودهه عليه
- جا نامي مدامج تعبانه ومن يصيرن شي اكلج

عفتهه وطلعت عبن انه اعصابي تلفت من العصر لهسه بالي يجيب ويودي وتاليهه تجي تراوغ براسي ...

انه نزلت وجان سمعت تلفوني يدك رحت اخذته
وشفت بسام يدك جان جاوبته ...
- هيييي يا جحششش وييين وللليييت
- هاااي شبيك شكو خابص الدنيا
- بساااام تهد كلشي بايدك وتجي البيت بساااع يلا
- يابيت بالعماره؟
- بغداد يااا مطي تعااال بساع انتظرك وحك علي لو تاخرت محمد مايخلصك مني

سديت الخط وشمرت تلفون ورحت غسلت راسي
وكعدت انتظره شويه واجه طب وهوه وقاطه
والشعر المرفوع والعطر فواح جان اجره من
سترته وكبل بوكس بنص حلكه وهوه بس صافن
اجه يحجي ضربته الثاني بخده ومطلته بالكاع
وكعدت عله صدره ...

- انتته شنننننني فهممممممني عليش صاااير سكط
لك يالاغم شلون تعوفن اخيتك هناااايه بوحدهه
شلووووون ،،، لك نااااقص غيييره انته والله فلااا رجااااال

- شببببيك شهالتمسلت شكوووو هسه شصار
وهيج متهجم عليه

- شصااار حكك بويه من الدياحه شمعرفك شصار
هاااي اختك لو ماانه متلاحكلهه جان هسه رايح تذب ترابات عليهه يااااكددديش اختك جانت مختنكه والنفس مايطب صدرهه هالساع جبتهه من المستشفى وانته تكلي شصااااااار لااانعل هالساعه السوده الامنتك عليهه

- شهاااب كوووم عنننني كووووم خنكتني

- وحك محمد لو اجنزك هنايه هسه هم مايشفى غليلي منك وووووووويييييين جننننت

- بووووويه جنت معززززوم معزززوم هسه كفرت شمدريني انه هيج يصيرلهه

- خررررب بعزايمك تعوف كلشي وتضل يمهه
لوو ماانه داري بيهه جان شكلت شحجيت لو صارلهه شي هاااا لوو راحت البت من ايدنه تفيدنه انتتتتتته السكط الخنيييييث تفييييدنه .. والعباااااس
يابساااام لووو دريت بيك تسوي هالسوايه بعد
اكسرهن لرجلييييييييييك تفههههههم ماايوكفني شي وياك لو جنت ابن اميييييي اسكطك اسكطك

كمت من صدره ودفرته وطلعت بره شمست هوا
وهديت اعصابي شويه وطبيت لكيته عله كعدته
ويمسح بدم حلكه ويعاينلي صفح ...

- كوووم اصعد تطمن عله اختك وتعذر منهه يلااا
- شهاااب كااافي عاد مصختهه
- بسااااام انه شياطين الله كلهه كاعده براسي هالساع لا تخليني ابتلي بيك امشششي شوف اختك
- استغفرررر الله

راح صعدلهه وماطول بساع نزل ..
- هااا
- ماترضى تحاجيني
- عليش
- تكلي مامحتاجتك هسه وتغطت وعافتني
- حيييييل بيك اي والله زين مااسوت
- شهاب شنهي الصار فهمني ،، انه والله جنت
بعرس صاحبي بالقاعه والموبايلات كلهن جمعناهن يم ولد وملتهين بالعرس لو يمي والله
اجيهه بالساع التريديني لججن غفلت ومادريت
- مشكلتك هاااي .. احنه العدنه انته غلطت بطلعتك وعايفهه وحدهه شني جديد عليك مرض اختك
هااا ماتعرفنهه ساعه الساع تختنك لك بويه هاي
موش افلاونزا هاااذ مرض گلب لا سامح الله
صارلهه شي فهمممممني انته شلووون يرضيك
ضميرك بعد واختك ماداريتهه وتاذت بسبب اهمالك ،،، وحك علي الشيخ يكصه لراسك بساعه اليصيرلهه شي احمد ربك تلاحكنه هالمره
- اسسسف انه والله عفتهه مابيهه شي رادت تنام
وانه كلت اروحن للعرس .. جاا انه كعدتي بهالحياطين تخنكني لا صاحب اليطبلي ولا اروحن لاحد مااايصيرن هالشكل
- اييي تلكه حل موش تعوفهه وتمشي .. ماتكدر
عله حمايتهه ومداراتهه كوووول عليش ساكت

بهالحظه خابرني الشيخ وكال راح يصل البيت
- هاي الشيخ راح يصل وطلع سباعيتك
- شهاب دخيلك خويه لاتصيرن ضدي
- ماامشي ويه الاعوج انه تصرف عدل واصيرن لك سد وحماي ظهرك .. بعدين تعال كلي انته
شني كعدتك بهالبيت طرطور حاطيك هناايه
اشو خبزه مامش بالمطبخ شتوكل اختك فهمني
- يابه والله مامكصر وياهه .. كل يوم اجيبلهه
شي من بره واحنه اثنينه بالدوام منهو اليطبخ
نرجع اثنينه ماكلين وبس العشه نجيب لفات لو شو شنو
- من اهمددداك اي والله .. لك يمتى تفتح عكلك
وتصير رجاااال بيت .. يعني هاي اضل تلفس
فلوسكم باكل الشارع لك حطلهه بطل شربت
باكيت نستله فد تمره. لبنه شي يسد جوعهه شبيييك تضل اغم هالشكل صغير انته ونعلمك

- يااابه وحك علي هسه انزل اترسلهه البيت اكل
بس كفو عني

- كوووم كووم تلكى الشيخ يلاااكوووم

كام وهوه يمسح بوجهه وبس فتح باب الشارع
الشيخ جره من ياخته وشحطه جوه وسد بالباب
انه واكف عله جهه واعاينلهم ...

اول ماكام بسام راد يسلم ع الشيخ .. ضربه راشدي فر وجهه فر بين ماعدل وكفته اجاه الثاني
- تهد شمسه ولاحك هالسرسريه هيج احنه ربينه زلامنه .. هيج بغداد علمتك ماتخاف عله عرضك
وتهده وتمشي .. ااااااانه شمووووصيك ياارعن
شكااااايل موش من اول كتلك ماتعتب الباب بدونهه
موووش كتلك عينك عليهه !!! لو راحت البت من ادينه انه شصخمممم بيك فهمننننني !!!!

- شيخنه والله عفتهه مابيهه شي اخيتي هاي انه
مااذيهه

- اننننننجب اخيته لو انك اخوه خيتك من صدك جان مالافيت ساعه وحده بره وتعوفهه هنايه
بروحهه .. افرض طاب عليهه احد صاير شي بالبيت ،. انحرك شي .. احتاجت شي وهيه صغيره وبوحدهه هنايه شلوووون هااااا شلوووون جااا انه عليمن مخليك يمهه اذا ماتعرف اداريهه
اسممممع يامصخم يالحاسب نفسك زلمه ومشورب
انه مارفعت ايدي عليك الا لسبتين ..
اولهم انك ماسمعت جلمتي وجذبت علي يوم انك تكول حاطهه بعيني ومداريهه وانته الله اليعلم شمسوي بعد بيهه
وثانيهم لين انه ماارضى تنهد حرمه بروحهه
لو مو جانت شمسه لو اي بت من هالبنات مارضاهن عبن الحرمه ضعيفه حال والزلمه
يتسمى زلمه من يراعي حرمه بيته موش من
يتشورب فهمممممت

- فهمت شيخ فهمت ..

- امشي لم هدومك وارجع لاهلك يلا مالك ضله هنايه بعد

- شيخ حاط عليك العباس سامحني مااعيدنهه وعلي

- استغفر الله اااانته تضل تجادل كتلك كوووم لاهلك اسمع الجلمه جم دوب اضلن اكووول

- صار شيخ صار

راح صعد وانه كعدت يم الشيخ ..
- والله زين ماسويت بي وانه كبلك هم ماكصرت وياه
- رادله ترباه جديده .. شمسه شلونهه
- زينه نامت هيه كالت تعبانه وتريد ترتاح
- الله يشافيهه بحك علي بن ابي طالب .. والله انه
كل وكعه تكعهه تشيط روحي وماتنطفي عليش هالجنبده هاذي هيج يصيرلهه لجن هاذ امر ربك بعد ماعليه نقاش
- الحمدلله عله كل حال نصيبهه بعد
احجيلي شيخ شنهو الصار هناك شبيهم اهلنه
- عدت بخير الحمدلله
- هوه شنهو الصار
- عمك حاتم جان متفك ويه جماعه عله فرد كاع
وهالكاع ورث وليش مااهل الكاع الرادو يبيعون
تخاربو ويه الشراي وماكايلين لعمك وهوه جان مسوي الاجراءات ومحضر الاوراق وجان يجي
للشراي وهذاك كلب عليه ويكله انته نصاب وشهره بين الوادم .. طلعت السالفه اثنينهم كرابه
وواحد يريد يعيل بالثاني وهذاك الشراي يصيح
انتم تضحكون علي والي يبيع يصيح انه ماابيع
لهيج وادم ممربايه وساعه يكلبون عله عمك وساعه تعلك بينهم ... ومن بين هالعركه طاحت
جيله برجل عمك لجن الحمدلله موش بالعظم
وهالساع عفتهم وياه  بالمستشفى وهذول نطيتهم
جم يوم ونكعدلنه كعده زينه ونتفاهم

- دخيلك ياربي شهالمصايب التجي نوبه الوحده
شو هذول سالفتهم مخربطه
- وانه عمك مافهمت كلشي منهم بس المصايح
كفيلك الله وادم ماتعرف حك الله ولا تعرف الادب شلونه كضوهه مسبه وصياح ومكافش عله شني ماندري وعمك هالمسيجين طاح بيهه
- استغفررر الله احنه مايطيح علينه  الا هالمسربتين هذول
- خماك كلتلهه شي
- لاا هو انه شعرفت حته اكللهه لجن هيه تعرفن اكثر مني ومنك
- شكصدك
- كصدي تفهمهه زين شيخنه موش انته ماتخفى عليك شمسه
- اسمع انته الثاني لاتخليني اطيحن بيك النوب
هالشمسه فجو عنهه لا تدنولهه بشي ولا احركن
شيب الخلفكم واحركنكم بكاعكم وحك علي تره
مصختوهه ويه البت
- شيخنه انه ماعايل وياهه بشي فوك مداراتي ليهه وحركان دمي عليهه تجي تحركني
- اذا تسوي شي مايعجبهه احركنك فهمت
- اي فهمت شيخنه فهمت شمسه عِليه مايتدالنهه
- اايييي رحم الله امك وابوك جا مادامك تعرف
عليش تحومي فوكهه
- هااا شمحومي !
- كووم شوف هاذ المصكوع وين وله
- اي صار

رحت صعدت صحته وهوه جان وجهه ثكيل
علي ومتزورك عاد نزلنه والشيخ كاله ..
- اسمممع يابسام تطلع بوجهك كبل للعماره
وتروحن تلحك ابوك بالمستشفى
- ابووي !؟ شماله
- اي ابوك متصاوب برجله وعمامك يمه هناك
واخوك وامك روح هناك وعينك عله اهلك زيين
- ان شاء الله شيخ .. بس كلي شلونه هوه
- كالو زين لجن انه مالحكت اشوفنه روح وشوفه بنفسك وخابرني كلساع طمني عليه فهمممت عبن انه هالليله اضلن هنايه
- صار شيخ
- يلا توكل
- مع السلامه

طلع بسام وانه ترخصت من الشيخ حته اروحن
اتسوك واجيبن شي للعشه ..
ورحت جبت من كل صنف ونوع وكثرت فواكه
وحلويات وحليب وجبت مشاوي للعشه ورجعت
كعدت اصفط بيهن بالثلاجه والشيخ فوك يمهه

عاد رحت غسلت واجيت حضرت الصينيه
وحطيتهه بالهول والنوب اتذكرت ربى ماتكدر
تنزل عاد رحت كلت اشوفهم بالاول ...

دكيت الباب ومن سمعت صوت الشيخ يلا
طبيت وشفته جان كاعد وحاط ايده وره راسهه
وهيه متمدده ...
- شيخنه علمود الاكل شلون يعني ربى
- جيبلهه هنايه
- لا لا هسه انزل صرت زينه كافي تعبتك هواي شهاب
- لا تعبج راحه بس كومي بسلامه كلشي يهون
- تسلم
- يلا بويه شمسه كومي وخليني اطمنن كلبي
بسلامتج
- تطمن شيخي مادامك موجود كلشي يصير زين

عفتهم ونزلت جوه عبن انه ماتحمل هالحجي والمغازل بينهم اضل اكل بروحي ..
كعدت جوه وهمه شويه ونزلو وجانت مغيره هدومهه ولابسه دشداشه طويله ..ضحكت
عبنهه جدامي ماتلبس هيج والشيخ لا ..
هم زين بهاي حصلت نقطه ليه ...

وكعدنه اكلنه وهيه شويه ردت الروح بيهه صدك هالشيخ دواهه .. وهوه عاف اخوه واجه لبنته
يعني هالشمسه اعز من اخوه نفسه !!!

انه شلت الصينيه وهيه لحكتني للمطبخ وكالت ..
- شهاب
- ها
- شكراً لكل شي .. اني سمعتك شلون حجيت
ويه بسام ودققت عليه بكل التفاصيل الي تخصني
رغم هو اخويه بس مايخاف عليه مثلك
- لين انتي تعنيلي كلشي بدنياي شلون مااخافن عليج
- شكراً .. صاير هواي تصرف عليه ههههه
- موش كايلج صرتي غير شي بس انتي تنسين
- اممم .. روح ارتاح اني هسه اسوي الجاي واجي
- لا مااروحن خليني هنايه
- لا والله روح ارتاح ماتعبت
- بنتي عوفيني هنايه خلي الشيخ ياخذه راحته
جاي يحاجي الريم
- هاااا اي دكول هيج من البدايه
- هاا يعني للشيخ اي لجن انه اريدن اضل يمج لا
- شهاااب
- شننني النوب
- خوش مسواك عشت
- هههههه ماتجوزين انتي من هالسالفه
- اممم
- مشتاكلج حييييل ليمتى اضلن انه متلوع بشوكج
- الله كريم
- الله اكرم الاكرمين لجن انتي ابخل هالخلك

كلتهه وعفتهه وطلعت من باب المطبخ للشارع
ضاربه اعصابي .. انه وين احجي وهيه وين
بس تعرفن تلجم بيه ببرودهه لجن ماتعرف تحس

هديت شويه ورجعت .. كعدت اشرب الجاي
واتفرج تلفزيون ومااعاينلهه .. عاد الشيخ كال
- شهاب
- عيني شيخ كول
- اريدنك تضل هنايه وياهم بالبيت
- شنيي!!
- ايي مثل ماسمعت عبن انه منا وغادي ماامن
ببسام وحيده هاذ مايعرف يتصرف لجن انته
عجبتني بشهامتك ونباهتك لكل شي واذا تصلن
هنايه انه اكدر امشي ومالتفت وراي عبن بيك
انه شاد ظهري
- شيخ انته تامر وانه اشكرك عله لهاي المعزه
وان شاء الله مايبدرن مني الا الي يسرك
لجن هناك اهلنه شلون والشغل
- الاهل انه ادبرهم وشغلك هناك محمد ينوب
وانته هنايه دورلك شغله استرزك منهه بس
وكتهه الصبح ماريدن تضل لاهي بالشغل وتعوفن البيت
- شيخ يعني كل السنه اضلن هنايه !
- اي جا شني يومين وتنز علينه
- لا بويه هاي مثل ما تريدن يصير اضل شعندي
- اي كفو والله هيج ريحت كلبي وهسه اكدر انامن
وانه متطمن

شويه وراح صعد بحجره بسام نام وانه وربى ضلينه وحدنه ..
- شهاب اذا متضايق من قرار الشيخ عادي اني احاجي واطلب منه يلغي
- كولي انتي ماتريديني
- هاي شبيك شنو هالحجي
- جا موش سمعتي انه انطيت جلمه للشيخ شني
زعطوط انه وكلساع براي
- تره بس خفت لا هالشي يضوجك ماقصدي شي ثاني
- لا ماعلي شي
- ليش ضايج
- ربى
- هاا
- جيبيلي فراش خلي انام راسي مسطور
- ماشي

راحت جابتلي الفراش .. تمددت وهيه طفت الضوا وراحت .. وانه كبل نمت من التعب والضوجه

وثاني يوم الصبح طلعنه كلنا للعماره حته نتطمن
عله عمي حاتم .. وضلينه هناك يومين وربى كالت
لازم ارجع بعد ماكدر اغيب اكثر ..

فبالليل رحت لميت غراضي وسلمت عله نعيم
وتطمنت عله زهره الي هيه كضتهه بس بواجي
تكول رايح للجبهه ..

والصبح طلعنه وويانه بسام .. وهوه كلساع يلاشيهه وضل يمشي وياهه مثل خيالهه
كلت الحمدلله انعدل وصار ادمي ..

واول يوم رحت تكاسمت الحجره ويه بسام
بعدين بس سمعته بالليل بعده عله نفس الدندنه
مال كبل شردت ونزلت اخذت فراشي وجره نمت
عبن اعرفنه راح يكطع علي راحتي ..

و ثاني يوم همه مشو لدوامهم وانه كضيتهه نوم
لحد ال ١١ يلا كعدت وهيج طخ بالي اروحن
اشوف حجرتهه واشمن عطرهه ..

وصعدت ليهه .. طبيتلهه معزله مرتبه وعله
الجربايه محطوطه اللعابه الي انه جبتهه ليهه
ودفاتر رسمهه كثرانه .. رحت اخذت واحد
كلبت بي واشوفن بي رسم لاجزاء من الجامعه
ورسمات بس عيون موش كامله ورسمات بس
دمج الوان ومأشر جوه كل واحد بحرف انكليزي ويمه رقم ...

وجان بالي ايد النجمه اشوفن وين صفه بيهه الدهر
ولكيتهه هم معلكتهه بالحايط وبغير دفتر مرسومه
ويمهه شخوط سود ... حاولت افهمن شي منهن
مافهمت .. عاد خليتهن ورحت شميت ثوبهه الكصير التنام بي .. تنفسته لحوالي نص ساعه
وعاد رحت نزلت سويتلي ريوك وكعدت اكل
واتفرج تلفزيون .. عاد سمعت صوت سياره طبكت بالباب وشويه وطبت ربى ..
- هلو شهاب
- هلا بيج هاي شنو جايه بخط
- اي

كالتها وهيه واكفه تشرب ماي
- جا وبسام شني شغله
- هو لكالي هذا الخط لان ميكدر دائماً يرجعني
مرات ازدحامات تصير ومرات هو تتاخر محاضرته فما يضبط وكتنا سوه
- هاا. وهذا جبير صغير السايق
- جبير حجي ووياي بنات اثنين هم بنفس جامعتي بس غير قسم
- زين زين روحي بدلي ارتاحي

اخذت غراضهه وصعدت وره شويه اجه بسام
فات كبل نزع حذائه وتمدد عاد انه كمت شلت
الصينيه وجاي اطلع من المطبخ جان تنزل ربى
ولابسه تراكسود قديفه رصاصي وشعرهه الاحمراني حاطه بي طاك ناعم يلمع وهوه مفتوح ابد ماترفعه عيني بلا وعي صفنت بجسمهه البارز بهاللبس عاد هيه تجاهلتني وراحت تغسل ..

رحت كعدت احاجي بسام واشوف شلونه دوامه
وهيه راحت للمطبخ ووره شويه اجتي وجايبه
ماعونين فواكه وكعدنا ناكل ونتفرج المسلسل
الي هيه لازززم تشوفهه عله شني لازم ماعرف!!

عفتهم ينامون وطلعت خابرت وليد ورحنه نفتر
وندور عله شغل ومالكينه عاد رجعت للبيت وكت
المغربيه .. كملت صلاه وشفت حاطه كتبها ومساطرهه الي كل وحده هالطول عله ميز يم
الدرج رحت وكعدت اكلب بيهن واشوف تخطيطاتهه المشخبطتهن هنا وهنا وحسيت
عله صوتهه وهيه تصيحنه للعشه ...

وكعدنا ناكل وهيه تتشاقه ويه بسام وهوه بس يطخطخ بيهه لو كلساع يشيل شعرهه ويضربهه
عله ركبتهه وتضل تتنعوص ... انه بالكوه ساكت
عبن ماريدن اطلع حقنه جدامهم لجن من خلصنه
الاكل هيه دفعت الصينيه عله جهه وارتاجت ومددت مثلنه وتلعب بتلفونهه وعاد بسام لح وياهه
اله يلعب هوه ومارضت عاد كام يكرص ويدغدغ
وهيه صارت جواه وهوه مجلب يدغدغ برجلهه
وصوتهه على وجسمهه هيج يختض عاد صحت
بيهه ...
- ربببببى صوتج منا الوادم
- اييي
- كومي شيلي الصينيه يلااا وانته اركدلك شويه

فك عنهه وراحت كامت للمطبخ وانه ضلت بالي
هالسالفه يعني هاي دومها هيج وياه !! ولبسهه!!

بين ماشربت الجاي بسام راح صعد يكول يقرا
بعد مادري صدك جذب .. وهيه راحت كعدت
يم الميز وبدت ترتب باوراقهه .. عاد صحتهه
واجتي كعدت يمي حاجيتهه بصوت ناصي ..

- ربى انتي عليش ما تنتبهين بلبسج جدامنا !
- انتو مو غربه وحتى لو مالابسه شي مفضوح
- بنيتي انه من سالتج هالشكل عبن اعرفن شحجي
موش جاي اضبط عليج ولا اخنكج بشي بس اريدن منج ماتلبسين الشي الحصر عله جسمج وهنايه
احنه عندج فوك بحجرتج البسي اليعجبج لجن هنايه لا .. يعني افهميهه ماريدن احجي بالتفصيل
- اااي ماشي ماشي
- عفيه بالسباعيه عفيه
- تجي تساعدني
- بشنو
- عندي تخطيط بابعاد ثلاثيه انته بس ركز ويايه
بالارقام لان هنه بالملي ومرات اعبر كم واحد
ويخرب وارجع اعيد
- يلا كومي

رحنه وضليت انه انبه عليهه بالارقام وانطيهه ملاحظات عله رسمهه وهيه تمشيهن وحده وحده
بالمسطره ...

ومشينا هالايام بكعده وضحكه وسالفه وانه لكيتلي
شغله بمحل ملابس رجالي بي فرعين وانه صرت
بالفرع الثاني هالمحل بالشورجه .. الحلو بهالشغله
كل العليك تتكشخ وتوكف لين انه بلبسي انطي انطباع عله المحل وكل مايترتب اكثر كل ما يمشي
الشغل احسن ... ومثل كل مره يساعدني بهالشي
ضخامتي وصوتي الخشن .. صوتي يسمونه الجهوري هاذ النوع يخلي المقابل بلا وعي يركز
وياك ويسمع حجيك ... وبي انه اكسب الزبون

جنت اطلع كل يوم من الساعه ٧ ونص وماارجع
لحد ما ادك ال ٢ .. فيعني كلنا نفس الوكت نروح
ونجي بي ...

رحنه للعماره مرتين تطمنه بيهه عله عمي حاتم
وهوه فضت سالفته بالخير .. وحلوهه بلايه فصول
وكضينا عطله نص السنه هناك وردينه ..
وبيوم انه بعدني بالمحل وخابرني بسام ...
- ها بسام
- هلا خويه اكلك هاي خابرتني ربى تكول خطهه
عاطل وانه عندي امتحان ماكدر اروحن ليهه من هسه روحلهه انته
- هيه هسه مخلصه محاضرات
- اي مخلصين وكاعده تنتظر
- يلا ماشي هسه اعزل واروح
- يلا خابرهه عود
- ماشي ماشي

رحت لصاحب المحل وكلتله اريدن اطلع اختي وداومهه وهيج وهوه عاد اجه بدالي وانه كبل
اخذت تكسي ورحت لكليتهه ...

طبيت وتمشيت شويه وانه جاي اريدن ادك عليهه
لمحتهه من بعيد عاينت زين واشوفن ولد كاعد يمهه ع المصطبه .. رحت وانه الدم احسه يدك براسي .. وكفت جدامهه وهيه جانت مدنجه وهاذ
يحاجيهه .. جان رفعت راسهه وابتسمتلي ونزلت
السماعات من اذنهه ..
هالولد ضل يعاينلي ويرجع يعاينلهه وانه كلساع
واضغط عله ايدي من الاعصاب لجن عيب اتهجم عليه هيج ...
- شهاب شعجب اجيت شو بسام ماكلي
- بعدين نحجي كومي خلي نرجع للبيت يلا
- اي يلا ماشي

انه جنت احاجيهه وعيني مركزه عله الولد وهوه
يفر براسه منا ومنا عاد كام شرد بلايه ميحجي شي
انه ضليت ساكت وامشي وهيه بسدي .. طلعت
اخذت تكسي وكبل للبيت .. وانه الدرب كله تاكل
بروحي هالسالفه ..

لحد ماطبينه البيت بس سديت الباب صحت عليهه
- هالولد منننننين وشعنده يمج
- شهاب
- بلايه مسلته سالتج جاوبيني شعنده يمج شمكعدج وياااااه
- واحد من قسمنه وهو اجه كعد وضل يحجي
- شيحجييي هاااا شيحججججي
- اهدء شبيك
- جاوبيييني
- هيج سوالف عاديه بس اني جنت حاطه سماعات
ومالي دخل بي هو يحجي واني مااسمعه اصلا مامركزه وياه ولاادري شيريد
- مادامج هيج عليش ضاله كاعده .. ماكمتي شفتيلج غير مكان يعني اليشوف هالكعده شيكوول
هااا جاوبيني شيكوووووول
- شهاب ماقصدي شي والله هو اجه وكعد واني شنو خما اكله كوم لا تكعد يمي استحي
- لاتكليله انتي كومي والبسي مثل الجلب حته يعرف حده .. هيج شكول من تنطي وجه تضل مجلبه ويضل كل يوم واكف فوك راسج ويتصيد الفرص وياج
- شهاب اني مالي دخل بهالسوالف واصلا ماعندي
اختلاط باحد هناك هنه بنات اثنين احجي وياهن واجني خطوطهن وطلعن ضليت كاعده وحدي وهذا اجه شسوي يعني
- رببببببى اليجي ويشوفج وحدج وياه وانتي ماعندج اختلاط باحد راح يروح تفكيره لبعيد
عبن ليش هاذ من دون الكل !! تفهمين كصدي
لج ياثوله انه اعرفنج شني واثك بيج وبتربيتج
لجن اخافن عليج تفهمين
- لعد ماتحجي هيج من البدايه استلمتني صياح كبل بلا ماتفهم شي مني
- رويحتي انتي اغار عليج افهمي اعصابي تلفت
من ساعه الشفته لحد ماوصلنه البيت انه احرك بروحي .. يابت الناس انه اتسودن لو ان احد عاينلج بنظره وشفت هاذ كاعد يتفنن بنظراته عليج شتريدين مني اسوي
- اي
- شنهو اي عاينيلي شبيج
- ااااف شهاب والله وكفت كلبي .. اسفه اني مالي قصد بشي والله وهو حتى مادريت شيريد والله ماسمعته شيحجي
- اي زين سويتي بس مره الثانيه انتبهي زين
انه مااكلج لا تحجين ويه احد وضلي عازله روحج
لا اعرفن الدراسه والمشاركه مهمه لجن عله كدهن وبمكان ووكفه ماتجيبلج حجايه محلوه
- ماشي انتبه بعد

هديت اعصابي وضليت واكف وحاط ايدي بجيوبي واعاينلهه .. يعجبني لبسهه المحتشم
وبنفس الوكت كشخه ومرتب ..
- طالعه حلوه
- اني دائماً حلوه
- صدكتي عمي ياهو اليصل حلاتج
- امم
- اريدن ترخصيلي بشي بلايه متسالين
- شلون ميصير هيج
- مره وحده بس
- واذا ماعجبني شلون
- سوي التريدينه
- اممم ماشي

تكربت شوي ليهه واخذت ايدهه اليسره رفعتهه
وبستهه وعيني بعينهه وهيه صفنت ،، عاد خليت
راحه ايدهه عله وجهي وغمضت من حسيت برودتهه ونعومتهه كبل حسيت طفت ناري ولا جن. صاير شي .. رديت كربتهه لشفتي بستهه
بداخل اصابعهه ونزلتهه وهيه ضاله صافنه بوجهي عاد انه ابتسمتلهه وكلتلهه ..

- امشي بدلي هدومج يلا حته نتغده
- اي ماشي

راحت كبل صعدت وانه ضحكت وكمت امطي
بجسمي ارتاحيت بلمستهه رجعتلي كل النشاط

وثاني يوم الصبح اخذهه بسام وصلهه وانه
خابرتهه ب١٢ ونص تاكدت انهه خلصت محاضرات عاد قفلت المحل ورحت ليهه

وكت الجنت اتمشى وياهه حته نطلع للشارع
جنت اشوفن جم ولد عينهم علينه لجن ارتاحيت
لهالسالفه حته الكل تعرف موش وحدهه ..

وضلينه عله هالحال اسبوع لحد مارجع خطهه
جان بيوم انه جنت رايح بيت صاحب المحل الي اشتغل وياه جايبين بضاعه جديده وبالبيت جنه
نفرزها ونسعرهه .. فتاخرت يمه لحد التسعه بالليل
يلا رجعت من طبيت شفت ربى واكفه يم راس
بسام الي هوه حاط المخده فوك راسه ومتمدد

- دكوووم شبيك بسااام
- كتلج مااااروح لتلحين وين الكالج بهالبرد
- والله اخابر ابويه هسه اذا متروح
- خابري يلا خلي اكله بنته شخطت
- هاااي شبيكم تناكرون
- شهاب همزين اجيت تعال شوفه شكله ميقبل
- شتريدين انتي ومقبل
- تريد ازبري منين اجيبلهه
- هههههخخخخ شذكرج بي هسه
- اني اريده اررريده يعني شنو هسه سويتوهه سالفه
- امشي بدلي وهسه نطلع ندور ازبري
- صدددددك عليك الله شهاب
- اي والله شبيج يلا امشي بدلي وتعاي
- شكرررا. شوووف تعلم منه تعلم فالحلي بس بالنوم
- صدك راح تاخذهه! ياهو مفتح هسه
- مفتحين وين يرحون
- والله الك خلك
- لك بويه هاي اذا ماخذناهه هسه باجر تلكه العماره كلهه فوك روسنه نستر عله رويحتنه احسن
- ههههخخخ اخذهه عمي بس خلصنه ابتلينه
بهالشمسه احنه
- تره سمعتك

كالتهه وهيه تنزل من الدرج لابسه الجبه وتعدل
بشالهه خنزرت عليه وهو ضم راسه جوه المخده
وكال ..
- طفو الضوا وياكم

وهيه عناد بي شغلت هن كلهن وطلعت ركعت الباب وانه واكف واضحك عليهه .. وكفت عدلت
شالهه وابتسمت وكالت ..
- منين راح ناكل الازبري ابن عمي
- منين ما نلكاه بت عمي

طلعنه ومشينه للشارع صعدنه كيه ونزلنه بشارع
كله محلات وضلينه نتمشى عاد كلتلهه ..
- شذكرج بي هسه كليلي
- مادري اني هيج انام واكعد اطخ بالي شغلات
وهذا بسام لو وحده من صاحباته تكوله جان راحلهه ركض بس يمي يضل يتحجج
- هههههههه هو الرجال يركضه كلبه عيني
- امممم ،، اتذكرت شغله
- اي شني
- قبل كم يوم اكو اثنين بنات بمرحله ثالثه سالني
عليك
- هااه
- اي والله جنه كاعدين اني ومنى صديقتي دنشرب عصير وهنه اجني يصيرن صديقات منى جان وحده منهن سالتني .. منو هذا الي كل يوميه يرجعج .. كلتلهه ابن عمي .. جان تكلي عليج الله هاي هيج ولد عمج حلوين فالثانيه كلتلهه اذا هي
هيج كمر اهلهه شيطلعون لعد
- ههههههههه اي
- عاد كلتلي ابن عمج متزوج  ! كتلهه لا
ممتزوج كالت لعد اكيد عنده علاقه ممعقول
هالجمال والاناقه كلهه وماعنده معجبات ولا مصادق وحده
كلتلهه حياته الخاصه بعد هاي واني ماعرفهه
- ايياااااخ متعرف
- اي ماعرف شمدريني بيك
- اي وتالي
- كالتلي عرفينه علي من يجي مره ثانيه وضلت تتوسل بس اني كلتلهه .. ابن عمي ثكيل وميحب هالسوالف ورجاءا لا تورطوني وياه بشي عاد هنه سحبن نفسهن
- ههههههههههههاااااي ليش بويه طيرتي معجباتي جان كلتيلي موش صار اسبوع اجيبج جان شوفتيني ياهنه بلكي عجبني عليش كاطعه قسمتي
- لااا والله فوك مااخلصك من هيج نماذج جايفه
بس مو صوجك صوجي اني الي افكرلك بالزين
- وشنهو الزين الفكرتي بي شوفيني شنهو
- اي يعني روحتهن منك مو شي زين
- لاااا وين الزين ضال لا صديقه لا حبيبه لا شي
- امممم متصادق احد لازمك
- جا مو هسه انتي طيرتيهن مني شلون اصادق
- روح شوف غيرهن هذني مو زينات كلش خفيفات مايلوكنلك
- جا منهي التلوكلي ؟؟ تعرفين وحده زينه
- لاا
- هاي يعني كل التعرفينهن مو زينات
- لااااا يعني مادري
- والثووول اي والله لج ياعوبه انه لو اريدن كلشي اسوي .. اطلع كل يوميه واشكال بنات اشوف
وجيبي مليان وكلشي عندي لو اريد اصاحب جان صاحبت من زمااان ولو اريدن ازوج هم جان بشهر زمان اتزوج كلشي ماعندي ياخرني من الزواج غيرج يالماتعرفين غير الثول وياي
- لا والله
- ايي والله اييي انه ماعرف انتي يمتى تشوفين
شكثر انه احبنج مادري يمتى تفرج وياج
- الله كريم
- والنعم بالله .. شعندي انه ضال انتظرج هاي
هسه طبينه بالسنه الرابعه من ٢٠٠٩ وهسه هاي احنه ب ٢٠١٢ وانه كايلج خلكي وياج طويل وانتظرج
- واني هم كتلك اختار وانته ما ختاريت
- لج ياثوله انه لو مختار غيرج مااهد اهلي وديرتي واضلن مجابلج بس مو اكلج انتي تنثولين وياي
- حتى لو هذا مو قرار عن قناعه
- ليش يعني
-هيج كلبي حاسني يجي يوم ويتغير
- يتغير حبي الج!
-مادري هو او قرارك بان تضل تنتظرني هو الصح
- باعي انه واصل وياج مرحله سلام نفسي تعرفين يعني شني هاذ
- شنو د
- يعني اذا رضيتي احطنج عله راسي وكايلج انه تملكيني بيوم تملكيني كلبج وان ما رضيتي بهالشي براحتج انه مااجبرج لجن خليهه بالج محد يكربلج الا وانه جوه التراب
- شهاب اقدرلك هالشي بس تره مااوعدك بشي
لان حياتي شويه متناسبك
- انتي لو تعلميني شنهي المضموم بحياتج جان
مالكيتي واحد ازيدن مني يحتويج بس انتي متخوفه وماتامنين بيه
- لا شلون ماامن بيك بس الشي الي عندي ماينحجي
- جا شني
- ينحس
- اكعدي اكعدي ونشوف تالينه ويه هالحسحسه

كعدت وانه رحت طلبت ازبري وموطه كبوس ورجعت ليهه ..
- يالله شهااب تدري على هالطلعه هاي شكد دعيتلك جان كلش بنفسي متتخيل شكد فرحتني بي
- ههههه بويه انتي تامرين كل ما بنفسج شي كليلي وانه اصلا هالطلعه اجتني عدله
- ليش
- لان مشتاكلج
- اممم تره عايشين سوه احنه
- عادي هسه انتي موش كريبه مني ووحدج وياي وهم مشتاكلج
- تشتاقلك العافيه

ضحكت وانتجيت وانه اكل بهالموطه واعاين للشارع وهوه الجو بي بروده بعده واصوات السيارات والجهال منا يلعبون عبن المثلجات هنايه كلهه عوائل كاعده ...

انه كملت موطتي وهيه بعدهه تتصفن شويه وترد تاكل جان اكو اربع جهال شايلين نفاخات ويلعبون بيهن ويفترون منا ومنا وليش ما واحد منهم طكت نفاخته ورانه بالضبط ...
ومااحسلك الا ربى شهكت وكضت ايدي وترجف
عاينتلهه مصدوم ...
- شبيج بنتي هيه نفاخه شجاج اسم الله

جانت تضغط عله اصابعي وتغمض بعيونهه حيل
وتتنفس بسرعه .. ضليت حاير احاجيهه ماترد
عاد خليت ايدي عله وجهه ودرتهه علي وخليتهه
تفتح عينهه .. اول مره اشوفن الخوف بعيونهه
من ضليت مركز بعينهه جنت احس جن راح اطب لغير عالم للحظه حسيت باذاني صفرت عاد هيه
سحبت ايدهه من ايدي بحركه سريعه ...

جانت تمد ايدهه حته تاخذ الازبري بس ايدهه ترجف وهيه شايلته مثل الواحد الي بالكوه مسيطر باعصابه ...
- شبيج ربى عليش هالخوف فهميني
- هيج جفلت من الصوت واني اكره الاصوات العاليه
- اي بس مو لهدرجه رعبتيني عليج
- ماكو شي عادي
- مدامه عادي عليش ترجفين لساعج
- بردت
- لتجذبين شني انه مااعرفج
- شهاب خلي نكوم نرجع
- لا مانرجع اليوم الا تفهميني شسالفتج لا تمشين علي هالسوالف ساعه برد وجفلت ومدري شني
- كتلك ماكو شي انته ليش خيالك بعيد يعني شنو يصير قابل
- مادري انتي فهميني شني اليصير
- كتلك جفلت شبيك ليش متصدك تره يعني مالهه داعي السالفه
- بس انه شفت بعينج غير شي وهالشي مايجذب مثلج هسه
- شنو شفت
- شفت فكرج الخايف
- اممممم
- موش صحيح حجيي لو انه متوهم
- مادري
- شني ماتدرين
- اي يعني هو انته شفت قابل اني
- جا حجيي صحيح عبن عيني ماتجذب
- اي زين لعد
- امشي امشي انه اعرفن شلون اطلعن هالسالفه
- اي عود كلي شتعرف
- ههه والله هالطلعه طلعه خير رجعتني لسالفه جنت لاهي عنهه وتكلي روح دورني
- شنو سالفه شهاب
- هاي السالفه ياحلوه
-اممم
.
.
.
يتبع