رواية من فجر ديسمبر الفصل السادس والأربعون 46 - بقلم Zoka 🌷

من فجر ديسمبر
🍁
🍁
رجعنه شفت ربى راحت واستندت عله شجره
انه كلبي نغزني وكبل رحت اركض ليهه وهيه اندارت تدورني بعيونهه وبالكوه تجر النفس
كبل رحت كضيتهه وطاحت من طولهه وضلت تشهك وتكح جنت افرك صدرهه وايدهه وهيه عينهه بعيني ماجانت تحجي بس جنت افهمهه مادري شلون بس فهمت تريدني احضنهه ..

انه جريتهه لصدري وجنت اهمسلهه ..
- بنتي لا تخافين انه عندج لاتخافين

ماجانت ترد عليه وليال وادم انخبصو وراح ادم جاب السياره وانه شلتهه جانت بس تعاينلي وهاديه بعدني ماوصلت السياره ادندل راسهه ضليت اصيح وامشي تهسترت كعدت وره ونومتهه عله رجلي واصحي بيهه اضربهه راشديات وهيه غدت لاايد ولارجل عاد وصلنه المستشفى واخذوهه وانه بعد حيلي انهد كعدت بالكاع وكضيت راسي والومن بروحي شلون عفتهه هيج وماسويت ليهه العمليه لساعني ..شلون اخليهه تتعب وماانتبهت عليهه زين ...

صاحني ادم بفزعه وانه كمت ركضت عليه وعاينت ليال واكفه وتبجي رحت تكربت من الباب وشفت يسولهه انعاش وجسمهه يختض انه جن ظهري انكسر بشوفتهه هالشكل ماكدرت اكف عله حيلي بعد كضيت الباب وضليت اعاينلهه واحاجيهه بيني وبين روحي ...

لشويه ورد نبضهه ورد بيه الدم عاد نزلت للكاع سجدت شكر لربي والدموع ماسيطرت عليهه بعد
هيج برمشه عين الله موتهه وحياهه وردهه ليه ماكسر بيه وهوه العزيز الرحيم ..

طلع لينه الدكتور وحجالي عله العمليه مره ثانيه وكال الصمام الي يغذي للجهاز التنفسي هوه البي الخلل وجاي يصفر نبضهه لين بلايه اوكسجين والدم يتوكف بسبب الانقباضات الي تصير تمنع بعد الدم يمشي ويخربطهه ازيد الكهربائيه الضعيفه للكلب تضل فجاه تزيد بالنبض وتالي تتعب وتكع

انه كل الي جان هامني بس اسمعن صوتهه لو همس منهه يردلي حيلي واعرفن اوزن فكري وشلون اتصرف ...

بين ما انه تايه و واكف اتصفن عليهه من بعيد اجوي الممرضين واخذوهه كبل مشيت وراهم وكضني ادم كال ..
- اني كلتلهم يحولهه لغرفه خاصه اطمن
- مشكور خويه والله انه تيهت دربي
- حقك كاكا حقك يلا امشي وراهم

رحت وراهم بالمصعد وتالي وره مامشو الممرضين رحت كضيت ايدهه وبوستهه وخليتهه عله عيوني وهيه غافيه وجهاز التنفس عله وجهه
كمت اكللهه ..
- يبعد حيلي هوا الله مايدخل لريتج !! والي مايسوون تراب جدامج بي يتهنون !!! اكعدي حاجيني يارويحتي كويني بصوتج وخليني اكف عله حيلي واداريج

جنت حاضن ايدهه وابوس بيهه وطبو ليال وادم انه كل بالي يمهه اريدهه بس تصحى وتحاجيني
عيوني غوشت بالدمع وماخلي يطيح كبل امسحه
ماريد ابين ضعيف بس هاي رويحتي ماكدرن عليهه اذاهه ياذيني والحسين ...

ضليت اشتم بايدهه واحطهه عله عيني اهدا بيهه شويه وحسيت ردلي وعيي شويه عاد طلعت حته احجز للعمليه كلت اتدين من ادم شسوي ماكدر بعد اضيع وكت ...

ومن رحت جان يكلولي هاي السبع ملايين سعر بس الصمام والابر التحتاجهن بس للكهربائيه
وياهه يرادلهه غير اشياء ودكتور ثاني وياه يسويهن هو اختصاصه المهم طلع كل تكلفتهه
دفتر ومصاريف اليوم هم شفتهن دافعهن ادم والعلاج وفلوس المستشفى اخذت حسابهن كلهن
١٤ مليون .. طلعت كعدت بره والدنيا ضاكت بعيني منين اجيب كل هالفلوس هسه انه كل الجمعتهن جانن خمسه ونص .. ادفع النص لادم مال اليوم ويبقن خمسه وهي ١٤ وحالتهه موش مال تاجيل بعد ..
حسيت عله صوت ادم يمي واكف ويعاينلي ..
- ها شنو المصفنك
- هذول مدري يضحكون علي مدري انه حظي اعوج لك هسه يريدون تكاليف العمليه ١٤ مليون
وهمه كلولي ٧ قبل شهرين !!!
- شنووو ليش هيج غيرو
- طلع سبعه لعمليه وحده بس يحتاجلهه دكتورين وحسابات المستشفى وياهن
- ولا يهمك اني ادفعهن
- لاخويه شتدفع مليون اثنين
- ميخالف كاكا نتساعد مثل اختي هي وفلوسي فلوسكم كاكا عيب ترفض
- لاا خويه خلي ابيع السياره واكفي كل هذني انه غلطت جان لازم ابيعهه من زمان وماضل ماجلهه هيج
- لااااا السياره مهمه الكم اني اكلك ادفعهن وبعدين رجعهن ياشهاب لا تتحسس هيج من سالفه الدين احنه اخوان اكلنه ومشينا سوه شنو هالحجي
- اااااخ لك خويه بالله راسي صاير هالكبر ماعرفن شكول ولادري شتصرف ..بس خلني احاجيهه واشوفن شنسوي بس خلهه تصحى ويرد عكلي لراسي
- ههههههه هيج تحبها
- جا غير رويحتي هيه تيهت دربي بطيحتها وعلي حته لساني انعكد
- ان شاء الله مشافاه ويرجع حيلكم الاثنين
-ان شاء الله

رجعنه لحجرتهه وليال كامت يم ادم وانه رحت كعدت يمهه شويه وبدت تصحى اول ماعاينت الي
وردت غمضت وره وين هم كعدت رادت ترفع ايدهه تشيل الاوكسجين انه شلته عنهه وعدلت شالهه ابتسمتلي وردت عاينت الهم وهمه تحمدولهه عله السلامه وطلعو وضلينه وحدنه .. رحت كعدت بسدهه وحضنتهه ..
- نشفتي دمي بعلي ماضل بيه حيل بنومتج هاي
- لاا اريدك اقوى مني محتاجتك
- هاي انه جنت انتظر صوتج حته يرجعلي حيلي
واداريج يانظر عيني انتي .. احجيلي شلون صرتي
شني اليوجعج
- بس تعبانه مايوجعني شي
- عسى من حيلي لحيلج يابنيتي ولاتتعبين .. خلي اجيبلج ماي تشربين شويه

رجعتهه للمخده خليتهه ترتاح وكمت جبتلهه ماي
شربتهه وكعدت كضيت ايدهه بستهه وكلتلهه
- يارويحتي بيج حيل شويه نحجي
- امم اي احجي
- الدكتور كال لازملج عمليه هوه كالي عليهه من هذيج المره بس انه ماجنت جامع فلوسهه وهسه الحمدلله كدرت اجمعهن وجنت اريدن احاجيج بيهه
بس صار الي صار وتندمت لين اخرتج هيج
بس هسه لازم لااازم تسوينهه ياحبيبه
- شهاب لا
- شني لا بنتي جاي اكلج الوضع موش مال تاجيل بعد ولاتخافين انه عندج والدكاتره هنايه مضبوطين لاتخافين من شي
- مو خايفه بس اهلي ماكو شهاب شلون اسوي عمليه بدونهم
- حبيبه شلج بيهم انه عندج انه اشيلج بكلشي ماخليج تعتازين لاحد منهم
- اعرف بيك حبيبي انته ماتقصر بس اهدء واسمعني
- فهميني احجي
- ابويه بعده شايل بكلبه عليه لو رحت للعمليه وصار شي واني ممعتذرتله شلون
- شجاااااي تحجين انتتتتي بنتي كولي يالله ليش المفاول بالموزين
- هذا العمر ماينضمن حبيبي واذا اريد اسويهه لازم اعتذر لابويه واشوف امي حيل مشتاقتلهه
افهمني الله يخليك
- بنتي عمليتج ناجحه صدكيني تطلعين بسلامه وبيدي اخذج ليهم عهد علي اخذج بس خلصيني من هالشده وشتردين حاضر
- لا شهاب ماكدر والله
- رببببى موش وكت عناد حبيبه
- شهاب ماسويهه كافي سد السالفه خليني ارتاح

كمت ودفرت الكرسي الجدامي وطلعت امشي سريع وادم يصيح وراي .. عاد وكفت وضليت انافخ من الاعصاب ...
- شبيك شصار
- لك ماترضى تسويهه تريدن اهلهه تريد تحركني مرتين منين اجيبهم انه هسه .. كبل ساعتين طلعت من الموت واهلهه مايعرفون كاعهه وين وتدورهم
خررررب بهالحظ الاكششر هاااذ رااااس يااابس هاااي شيكنعههه لو يجي الحمزززه ماتغير حجيهه
- كول يالله اهدا كله ينحل اهداا .. هي اهلهه وين!
- بجنهم الحمره عوفيني دخيل الله

عفته ومشيت طلعت بره ضليت ادخن ونار اهجس راسي صار .. عاد استغفرت ربي وهديت شويه
ورجعت طبيت اول مارحت عله ادم دنجت بست راسه وتعدزت  منه استحيت انه هيج حجيت وياه
وهوه جاي يهديني .. بس كلبه طيب بساع تفهمني وكالي انه هم هيج اصيرن بالاعصاب ..

عاينت لربى وهيه تعاينلي ومتردده كلتلهه..
- بنيتي محتاجه شي اجيبه لج
- لا تسلم
- زين حنزل اجيب عشه وانتي فكري زين
-ماشي
- يلا ادم تجي
- اي يلا

نزلنه وهوه كلي خليهه براحتهه جم يوم بلكي تغير رايهه وتكدر تتفاهم وياهه بهالسالفه ..وانه هم كلت اخليهه جم يوم بين مااشوفلي شراي للسياره ..
عاد اخذنه الاكل وصعدنه ليهم ..
هيه تستحي منهم مارضت اله تاكل وحدهه وعفتهه براحتهه ليال وياهه تساعدهه وانه يم ادم ناكل
عاد رحت حاجيت الدكتور وكال تكدر تطلع بس تضل مرتاحه منا لعمليتهه اي تعب ياثر عليهه

اخذتهه وطلعنه وهناك وصلنه الشقه وصلتهه للفراش ورحت كبل للكنتور طلعت الفلوس ورحت لشقه ادم دكيت الباب وانطيتهن اله وهوه ضل يحجي علي بس انه ماكدر اخلي دين بركبتي
ماكدر انامن ليلي ...

رجعت لكيتهه واكفه يم الكنتور وتطلع ملابسهه
- شكومج بويه اكعدي هساع انه ابدلج
- لاا تره زينه صرت لاتخاف
- لاتجذبين شني ماعرفنج انه بالكوه واكفه تعاي وياي تعااي عنادج هاذ راح يجيبلي الجلطه والعباس .. بويه بس اكعدي وىكلشي ماريدن منج
- ههههه يعني انته تتعب عادي اني لا
- اي انتي لا والف لاا
- اممممم احبك يا كل نظري انته
- اووووف لج رديتي روحي بهالحجايه بويه انه انعدم من الوجود بلياج اعشكنج وعلي

ضحكت وخلت راسهه عله صدري وانه اخذتهه كعدتهه عله الجربايه ورحت جبت دشداشه كصيره
ردت البسهه مارضت عاد عفتهه وطلعت رحت سبحت واجيت طفيت الاضويه وتمددت واخذتهه لحضني بوست راسهه وهيه حاضنتني وكالت ..

- لاتزعل مني شهاب بس اهلي ماكدر بهيج خطوه بدونهم بعده كلبي يمهم صح صبرت كل هالفتره وانته عوضتني عن كلشي وعيشتني احلى ايام
بس هذوله اهلي اضل اتأمل باليوم اليجي ونرجع يمهم موبس امي وابويه حتى جدتنه مطره وزهره وبسام خطيه هسه اكيد زعلان وباله يمنه وحتى حيدر اشتاقيت لعركاتنه سوه ومحمد وسوالفه
وكل السلف بكلشي بي .. حتى النبكه وهذيج التله
كل فجر اذكرهم كل يوم اكعدك بي للشغل اني اذكرهه اريد نرجع نكعد عليهه وهالمره احجيلك بيهه اكثر واكثر بكلشي تريد تعرفه بس خلي نرجع

- يارويحتي موش بيدي هالرجعه تعرفين كلش زين هالشي .. جا انه شني مااشتاك لاهلي واخوتي وصحباني
- صحبانك شكو
- هههههه موش وكت فيوزاتج هسه
- هم خلي اشوفك اضل وياهم اربع وعشرين ساعه بس الله اليخلصك مني
- يااايمه هيج راح تخنكيني
- مو كايلتلك الغيره عندي فوك الالف باوع بكلشي توقع اغار لاتستغرب من شي ولا تضوج تره لان احبك هواي يعني مو اخنكك
- لااا يابوي انه هم اعرف هالشي جا هوه شصخم وجهي غير هالحب
- هااا هسه صار يصخم بسم الله بعدنه باوله
- ههههههاااي شني باوله !!! بويه انه خضرمت بي انتي بعدج باولج
- اي حتى لو المهم هاي بعدنه مامزوجين وهيج لعد بعدين يمكن حتى حبيبتي ماسمعهه منك
- لااااا شلون ماتسمعيهه انتي بس خليج وياي ولاتعانديني اعيشج فوك احلامج وعيونج
- اممممم اثق بيك
- هسه خلي اكلج شي .. جدامج اسبوع واحد بس
تفكرين بي ماريدن اجبرج بس حكمي عكلج شويه
اعرفن الحجي هاذ يجرح بس لازم ينكال
- شنو
- ربى يوم الطلعنه بي من السلف مامنه رده لو جان بي رده جان اجوي وسمعنه خبر زين منهم
انه كل الوصلني من رسايل عليهم كلهه نار تحركنه لو كربنه ليهم تفهميني !! عادونه ومامش ذنب لينه صار كلمن يجر بصفحه وهالجلاب الجانت تخنس جدامنه هساع كلهه كامت تعوي

- ليييش ليييييش مو اهلنه لييش هييييج

- ربج اعلم بيهم حبيبه .. فهسه اريدن تفكرين بعكل موزون .. احنه نريد نعيش حياتنه سوه ورانه زواج وتكوين عايله زين انه عفت كلشي وره ظهري وتكويت بيج خليتج حزام ظهري لو تطيحين انه اطيحن وانكسم نصين بالعباس بطيحتج هاي تيهت دربي كمت لا اشوفن الجدامي ولا البسدي لساني انعكد وماعرفت احجي جلمه تدرين انه سجدت شكر لله جيف ردج اليه ورد بيج النبض
لو صاير شي انه كتلج انعدم من الوجد هاذ كله مايضلن ليه اثر
- لاا اسم الله لا تكول هيج
- جا دامج تخافين علي فكري زين وسوي هالعمليه وخلينه تعيش مرتاحين اخلص من الخوف عليج هالشكل وخانكج بخوفي واطلعج وجاينه الصيف ماتريدين نمشي للمصايف والشلالات هنايه
- اي اريددد
- اي بس انه مااخذج اذا تضلين هيج معنده الباب ماتعبرينه
- شنوووو لييييش يعني تحبسني هيج
- بووويه اخافن عليج تتعبين ويصيرلج شي انه غير اذبح روحي لو صارلج شي
- اااااف شهااااب
- لاا اف ولا مدري شني جدامج اسبوع موش ازيد منه تحطين عكلج براسج وتفكرين زين وتجين تكليلي انه مستعده اسوي العمليه اذا عبرتي الاسبوع لو اعرفن اشيلج عله جتافي اخذج واطببج للعمليات غصب رضيتي ولا لااا زيييين
- لااااا مووو زييييين ماكو بالغصب
- لاااا اكووو عبن انه اريدن اتزوجج ونعيش موش اضلن حاط ايدي عله خدي وصافن عليج
-ههههههههه
- شمااالج
- هاي هيج الزواج مسوي بيك ههههه
- خايبه ماتنجبين لا افكسلج هالعين هسه انه مسموطين اهلي وهيه تتمضحك نامي نااامي
- ههههههه احبك هيج
- وانه احبنج من تطاوعيني ياحلوه
- اطاوعك حبيبي شعندي غيرك
- اي عفيه ببنيتي عفييه هيج حبابه صيري لاتشلعين كلبي
- لاا ابد ماشلع كلبك
- انه مارتاح لهاي الابد بس يلا نعديهه
-هههههههه

غطيتهه زين ونمنه .. وثاني يوم كعدت اكمل شغل ع اللابتوب عبن البارحه ماشتغلت شي وبنفس الوكت عرضت السياره للبيع ووصيت ادم هم يشوفلي شراي .. انه جنت مستعز بيهه جيف هيه الضلت وحيده من املاكي مناك بس كلشي جدام عينهه يرخص ...

صار يوم ٣/٢٠ وهوه يوم ميلادهه وهالايام احتفالات الربيع وكلهه اشوفنهه لابسه الزي الكردي عاد انه طلعت الصبح ورحت اشتريتلهه واحد لونه احمر وهاي الفوكاه صايره ذهبي واسود و الردانات مالته طويله حمره نازله كلش عجبني اشوفنه عليهه عبن ابد ولا مره شفتهه لابسه احمر
اخذت وياه هديه ورحت .. خابرت عله ادم واتفقت وياه يحضرون روحهم ونطلع نسويلهه مفاجأه
وادم كال نروح نفس المجان الي مسوين بي احتفالات  .. عاد طبيت للشقه وخليت العلاليك
بالكنتور ورحت ليهه بالمطبخ ..
جريت ايدهه وهيه ضلت تحجي ..
- يعني شلون شهاب مانتغدا اليوم هسه شوكت تخفف هالقلق مالتك
- انتي الي يمتى تبطلين عناد موش كايلج من انه اطلع اكعدي واسكتي هسه انه رحت واجيت ركض ركض اخافن يصيرلج شي وانه ماموجود
- مااايصير شي والله مايصير يعني اضل صافنه بالحايط والله مليت دعوفني حباااب
- هسه انتي يمتى تركدينلج شويه وتخليني افهمج
- اممممم شتفهمني
- شوفي حبيبه اريدنج تطبين تسبحين وتجين احجيلج شغله
- شنو متكولي هيج يعني ليش الا اسبح
- هخخخخخخ لج بطلي هالنظره وياي
- اييي انته مدري شنو سالفتك تخليني اشك اكو شي تره ماروح للعمليه هسه بعد اكو ٣ ايام ويخلص الاسبوع
- ههههههههههههه خايبه ماتنجبين وتمشين من جدامي
- انته مدري شبيك اليوم بس يلا خلي اسبح واشوف شنو هالسالفه الغريبه الي بيهه الحمام ضروري هيج
- ههخخخخ نخلص من الوصخ
- شنووووووو شهااااب
- بويه اشاقه والحمزه بس امشي
- اصبرلي اصبرررلي الا اطلعهه من عينك
- يبووووو شيفضهه بعد

مشت وهيه تعاينلي بهاي نظرتهه ام عين نص مسدوده وماده هالبوز تخليني افطس ضحك

رحت اطلعلي ملابس بين ماتجي وجنت حاط الزي الي اشتريته الهه عله الجربايه .. فمن طبت اجتي وهيه ادردم ..
- هاااا وين رحت لا عبالك اسكت عله هاي سالفتك تعال خلي نتعارك
- اي عليش لا نتعارك جنج عله عرك
- اي ضايجه وهاي خوش سالفه نتعارك بيهه يعني هسه اني ام الوصخ يامتسحتي هيج تحاجيني
-ههههههههه لج انجبببي لاتجفصين بالحجي حته لا من صدك نتعارك واخربلج كلشي
- شتخرب؟ باوع لاتستفزني بسالفه الاسبوع تره بعده مخلصان
- لج انتي شجلبتي بي لخاطر محمد
- اييي هو شكو.. هاي مالمن ؟؟؟
- صلوات اخيراً انتبهتي .. هاي مال حبيبتي
- اممممم احمرر ناري يجننن
- هههههه عجبج !
- اكييييد مدامه ذوقك شلون ميعجبني
- زين جا البسي خلي اشوفنه عليج انه ولا مره شايفج لابسه احمر
- هههه يعني شعري احمر والبس احمر شطلع
- تطلعين تفاحه تتعضعض
-هههههههههههه والله عليك سوالف بس خلي اجرب بله اني هم اريد اشوف شلون اطلع بالاحمر
- يلا انه بره انتظرج

اجتي باستني بخدي وضحكت وجنت اشوفن بعينهه لمعه الفرح .. طلعت وانه اتبسم صرت اريدن فرحهه وضحكهه بكل شي واتعناله عبن
من هذيج اللحظه الي شفتهه تنازع بالموت وخوفي
شلون تفاركني وانه مامسويلهه شي يسعدهه وكل الي بينه عرايك وضرب وكسر وشتايم .. تغيرت كلش وياهه صرت حته باعصابي غير شي اذا تعصبت منهه اعوفنهه وامشي اتهدا يلا اردن ليهه بس تحجيلي جلمتين تطفى ناري ...

طلعت واجتي ليه انه ضليت كاعد بمجاني وامشي عيني عليهه شبر شبر ... من شعرهه النازل الاحمراني وجسمهه المخصر بالثوب هاذ والزايد خصرهه حلا الزنجيل الذهبي مال الثوب وصايره تضوي بي الاحمر كعدلهه ازيدن من الي تصورته
جانت تتمايل بي وهيه تضحك وتحرك برداناتهه الطوال ..
- شهاااب يجنن يجنننننن تسلملييييي انته يااحن رجال بهالدنيااااا
- ههههههه يافرح كلبي بفرحتج
- لك احببببك احبببك
- هههههااااااي هاي كل الحب والبوس علمود هالثوب لو ادري من زمان جايبه
- هههههههههه مو علمود الثوب بس علمود انته تفكر بيه بكلشي وسعادتي تهمك وشايلني بعيونك الحلوه
- انه وعيوني وكلشي بيه فدا نروحن لهالضحكه
- يااااعمري انته ربي لا يحرمني منك

ضلت حاضنتني وانه اتلمس شعرهه عاد رفعت وجهه وكلتلهه ..
- ليال وادم عزومنه اليوم نطلع باحتفالات نوروز بادين بيهه
- اييييي اخيييراً راح اطلعني
- هههههه اليسمعج يكول صارلج شهر مطالعه
- اوووف شهاب صوجك انته عودتني اطلع هواي
ههههه كله من الدلال
- ههههههه وشحلات دلالج عله كليبي
- لك انته حجيك ينكرط عسل حبيبي
- ههههاااي ااااوف ربي محمود مشكووور
- ايييي اله الف حمد وشكر خلاك الي
- دايماً نضل سوه ان شاء الله
- ان شاء الله حبيبي
- امشي البسي شالج بين ماابدل وحته نطلع هسه تلكيهم تحضرو
- يلا ماشي

رحت اخذت ملابسي وبدلت ورديت للحجره شفتهه تمكيج ..
- بويه هسه شتسوين بهالمكياج والله ذبحتيني بي
- ههههههه احببه
- ضلي لغمطي ضلي انه شايف المكياج للجكمات انتي جنج الحور شتسوينبي وانتي محمره من كاعج
- هههههههه هههههههه لااازم شويه اضافات حبيبي مترهم انته مشايف الشال شيسوي بالوجه رادله طن مكياج يلا يطلع حلو
- حطي حطي خلي نشوف تاليهه بس لا تصلين للنمش اكسر ايدج انه اتسودن اذا ماشوفنه بوجهج
- اعرف والله اعرف النمش خط احمررر مانطخه
- اي عفيه يلا خفي ايدج

جانت تصفط بهالالوان عله عيونهه عاينتهه يمكن خبطت خمس الوان بس شو بعدين من كملت عاينت جنهن لون واحد !!! مادري شني سالفتهن بالعباس حيسودنني !!!!!

خليتهه تلبس شالهه وانه طلعت خابرت ادم وكال جاهزين ننتظركم عاد شويه واندكت الباب رحت فتحتهه وصحت لربى اجتي جان ادم يصيح ..
- اوووكف اووكف
- ها خيرك
-شنو كاكا اليوم انته مو كردي مايصير مرتك كردي وانته لا
- ههههههه بالعباس عبالي شو شكو .. جا شلبس هنه بنطرون وقميص شكو غيرهن
- لااااا امشي وياي اني كله كردي من اساس للاساس

هاي هوه جملته من الاساس للاساس كل سالفتين ويحطهه عاد ربى شاورتني وكالت ...
- حبيبي البس الكردي حباب حتى نطلع اثنينه سوه ونتصور تبقى تذكار
- لخاطرج بس
- اروووحلك فدوا

رحت وياه وطلعلي زي كردي ابو بجامه عريضه
لونه نيلي والقميص ابيض وهاذ الحزام بي ابيض وانيلي فاتح هوه كعد يلفه ليه ...
طلعنه كلنه بالزي الكردي ونزلنه لسياره ادم
وكضينا الدرب كله ..نركز بويه نركز...

وهناك من وصلنه اعاين كل هالبنات مطنطشات بالذهب جنه استعراض للذهب ازيد من الملابس
عاد ماهجست الا عله ضربه بخاصرتي ..
- وين عينك
- بخلك الله نعلى عليج زرفتي خاصرتي
- تريد ازرف عينك هم
-شو طولان لسانج ولج
- لتحرك كلبي وتخليني مانتبه لحجيي ماريد اضوجك فلا تضوجني
- لاااا انتي رادلج عركه من صدك صايره تجفصين هواااااي وانه ساكتلج بس بعد جلمه الثانيه ماتلومين الا نفسج
- اعتذر حبيبي بس والله اتخبل من اشوف هااااي عيونك تتطاير منا ومنا هسه علكيفك هستونه وصلنه مابقيت شبر بيهن ماباوعته
- هههخخخخخخ غير حلوات جا منعاين للحلو
- الله يحركهن ويخلصني اني صوجي وطلعت وياك بيهج يوم مو ادري بهالسوالف ادررري

ضليت اضحك عليهه وهيه تمشي وشايله ثوبهه وادردم رحنه يم ادم وليال وهيه تخنزر علي كل ماتشوفني ادير وجهي .. عاد جيت يمهه جريت ايدهه واخذتهه عله جهه ..
- بويه شلون جا اغمض يلا ترتاحين فجيهه عاد
- لتغمض بس لتضل تباوع ع الرايحه والجايه
- جا غير هنه يصيرن جدامي وين اودي عيني انه
- شهاااب شوف تره والله الدمعه بعيني واكفه كلمه الثانيه وتلكاني هنا كاعدتلك وابجي لتسوي هيج بيه
- هههههههه يبعد رويحتي لج يروحلج فدوا وغلاتج انه عيني ماتمليهه غيرج هذني مايجن بحلاتج منيلهن نمش انه مااحب بس ام شعر احمر والوجه المنمش بس هاي خذت عكلي هذني ترابات لرجلج لاتغارين ولا تهتمين
- اممممم بس ميخالف عيونك خليهن ويااااااي
- هههههههههههااااااااي صااار بويه فهمتتت
اضحكي عاد
- ما عوفني خربت مزاجي
- تره اعوفج واروحن ادورلي وحده تضحك تعدل مزاجي
- شهااااااااااب
- هههههههههااااي اموت عليج والحسسسسين بس اضحكي عاد يلاا حبيبتي ياتفاحه
- هههههه كافي
- ايييي  هيج اريدن هالضحكه تنورن هالوجه
- منك ضحكتي لتضوجني حتى متروح
- مووش تدللين

اخذتهه ورحنه يمهم وبدا الجوبي رحت انه وادم
ويه الولد وجوبنه عاد شويه والتمن البنات هم وليال تجر بربى وهيه تعاينلي اشرتلهه لااا بس هيه ضلت تعاينلي بتوسل شفته بنفسهه ماكدرت خليتهه تروح وياهن وانه اعرفن هنه بس يفترن ورفع جتاف ويه الدبجه موش ركض مثلنه ..

جنت اعاينلهه ضحكتهه علت ونورت وروت كلبي بيهه هيج حسيت وفيت حك هذيج الايام .. بلاخص
يوم كسرت ايدهه كلش ضلت تدك بكلبي لليوم
عاد بهاليوم ريحت ضميري بيهه من شفت فرحهه

رحنه ناكل كلمن ترسله ماعون ووكفنه عله جهه
ادم بسط بالكاع وصاح ..
- تعال كاكا ورانه جوووبي هواايه
- كاكا انه تكسرت مااجوب بعد
- لااااا كاكا شهاب لااا هاليوم كله جوووب

كعدت يمه واكل واضحك عله حجيه هوه يقلد لهجه زوجته ومرات تضبط وياه ومرات تطلع مدري شلونهه ... اشرت لربى اجتي كعدت بسدي واكيد مصورتنه ليال مايفارك التلفون ايدهه من يوم شفتهه وشافتني فاتحه السلفي وتصور ..

بعدين كملنه اكل كمنه شويه انه اعدل بهدومي وتذكرت الهديه عاد اشرت لليال وهيه كبل فهمت
جابت ربى واجتي وانه اعاينلهه واضحك وهيه تتسائل شكو وشبيك ... عاد تكربت ليهه وطلعت علبه جنت ماخذلهه محبس كله كرستالات فضه
جريت ايدهه وكلتلهه...
- كل عام وانتي بخير يافرح دنيتي وامي واهلي وكل سبب عيشتي

ضلت فاتحه حلكهه وعينهه دمعت وهيه تكلي
- ياارووووحي يعني عرفت ميلادي !!
- وشلون ماعرفن باحلى يوم بهالدنيا
- حبيبيييييي ياالله شكد فرحتننننني
- هههههه هو انه شريدن غير فرحتج عجبج ؟؟
- كلش كلش حلوو انته روحي وذوقك كله يودي لنفس الاشياء الي احبهه .. ربي يخليك الي ويكدرني على سعادتك كل العمر

رفعت ايدهه بستهه وادم يصفك صحتله
- خاااب فضحتنه كافي
كام يضحك ويصيح صفكوووو وكلهه ماصدكت
عاد اشتغل الجوبي مره ثانيه واخذتهه ورحنه اربعتنه جوبنه وهيه الوادم هنايه كلهه تدك بهالجوبي محد اله شغل بالثاني ..

عاد للخمسه تعبنه واخذتهه ومشينه وضلو ادم وليال هناك ..
- ابو الشهب
- ها عيني
- شكراً لكلشي حبيبي يعني اليوم ماجنت احلم بي ابد ابدد انته عيشتني عمر ثاني بهالكم شهر وكل سنيني العشرين من قبلك راحت من العمر لان صار عندي العمر هو انته
- انه ربي يحبني والله انه متاكد امي داعيتلي من السمه حته نلت حلمي وكلبي تهدا من ناره
- ههههههه ياريتني شفتهه
- عندي صورهه مضمومات بلكي احصلهن واشوفن الج
- ان شاء الله
- هسه ما تريدين كيك العيدميلاد ؟
- لا حبيبي تسلم كلش كافي الي سويته الي لحد هسه
- والكيك جنت اريدنج تاكلي ويه الكهوه مثل ماتحبينه دايماً
- نعوضهه حبيبي هسه اريد ارتاح شويه تعبت
- شننني عليش ماكلتييي شني اليوجعج
- لاتخاف شبيك مايوجعني شي بس اريد اتمدد تعبت شويه من الفره
- اييي ضلي قشمري علي بهالحجي
- شهاااب
- ربى بنتي جيبي ايدج واسكتي

اخذت ايدهه ومشيت وكفت تكسي وكبل للشقه
عاد من طبينه راحت تبدل وشويه وصاحتني
- ها بنيتي شلون صرتي
- زينه بس
- بس شني احجي لاتهبطيني
- هذيج الابره وين شويه نفسي ضاق
- هاي موجوده اكعدي هسه اجيبهه

رحت للمجر الي بجهتي طلعتهه وخبطتهه واجيت ضربتهه الابره .. لمت روحي شلون عفتهه تتعب هيج ونسيت صحتهه ضليت منومهه بحضني شويه وكالتلي ..
- حبيبي كافي ماريدك تضل تفكر هيج
- شمفكر هسه
- ههههه عبالك مادري بيك والله اسمعك
- فلك طرج هالنوب تسمعيني ؟؟
- يعني مو اسمعك اسمعك بس اعرف شيدور بالك تريد اكلك
- اي بله كليلي شفكرت
- كاعد تلوم بنفسك ليش اخذتني هناك وتعبت بسببك وانك اهملتني وهيج شي
- من عزا العزاج عله هالعكل
- هههههههههه ياروحي انته مو داكلك روحي يعني ماتفهمهه هاي قابل شنو صغيره يعني
- لااا عمي بيهه بلاوي سوده
- بس لا صدك لا تضل تفكر هيج تره ازعل منك
لانك انطيتني فرحه العمر اليوم صدكني حتى بيهه نسيتني اي عركه صارت بينه ولو اني اصلاً ناسيتهن بس انته عوضتهن كلهن
- هاي هم عرفتيني افكر بيهه
- ههههههههه
- مووووش صح
- ايييي
- خرب لج انتيي شنننني حتسودنيني
- اني بس افتهمك مثل ماتفهم نفسك بهالبساطه بس
- ومنين تعلمتي هاذ الشي
- ليش اكو احساس يتعلم ؟
- يعني هاذ الشي من صرتي تحبيني يلا
- اي من كمت تتقربلي اكثر صار هيج مو هذاك اليوم خليتك تسمعني شنو اكول
- اي هاي من حضنتج بوكت طيحتج
- اي هيه شفت جان احساسك وتفكيرك كله وياي سمعت وفهمت شردت منك بدون ماانطق حرف
ودائماً اذا تضل هيج تفهم مني الاكثر
- بس فهميني شلون عليج محمد فهميني
- حبيبي هاي مو قوه خارقه .. هاي بس زياده وتحكم بالوعي كل البشر عدهه هالشي بس اكو اليشوف واكو اليركز واكو الي يباوع من نظره اعلى لكل شي .. الاحساس يلعب دور هنا والوعي هذا يسموه التخاطر بالافكار .. اني قريت عنهه يكول اكو بدماغنه جزء واحد للوعي و٩٩ للاوعي
وهاي ٩٩ متحكمه بجسمنه والباقي منهه مخزن لوكت نعرف استخدامه واستخدامه يصير مو بالايد ولا باللسان يصير بالروح لان الروح هي الي دتحرك كلشي بينه هي تتحكم بهاالاوعي .. فاذا
كلبك نغزك لشي انته ماشايفه ولا سامع ان راح يصير بس اجاك احساس هاي منين اجه ؟؟؟
يجي من وعي الروح لكل شي وشوفهه للي مخفى علينه فتبعثه بشكل اشاره للدماغ وهناك الجزء الخاص بالمشاعر والاحاسيس يوصله الك وهذا الي صار من فهمتني شوصلتلك

- يا سبحان الله ... وانتي منين تعلمتي التخاطر من هالكتاب ؟

- لا هوه عندي من وحده بس جنت ماافهمهه شنو
لحد ما اشتريت الكتاب وبديت افهم تفسير اللاوعي وشيصير

- احس اكو حلقه مفقوده بالسالفه اكو شي يسبك هالشي لو انه غلطان ؟

- لا حبيبي مغلطان بس نحجي بي بعدين اذا ممكن
لان هسه اريد احضنك واناااام تعبت

- هههههه احضني حبيبتي احضني ونامي نحجي بي وين يروح ينكشف ينكشف

حضنتهه وشويه كمت سبحت واجيت ليهه هم اخذتني النومه وتالي كعدت بالليل عاينتهه ماموجده هنايه عرفت كامت تبحوشلهه عله شغله تسويهه
ماتعرف تركد سودنتني .. لكيتهه جاي تسوي العشه ..
- بويه دخيل الله اكعدي جزعت وانه اكلج بطلي تفرفرين اكعدي ارتاااحي
- حبيبي يعني شلون مانتعشى
- نتعشى هسه انزل اجيب عشه
- لاااا كافي شنو كل يوميه اكل من بره كافي هيج
هذا خير من الله لعد عليمن نتسوك
- ربى يعني انتي موش جنتي تعبانه شكومج
- كومني الجوع شلون متريدني اكل
- هخخخخخخ بالله هسه انتي الواحد شيحاجيج اجيبن الراحه لرجليج وتدفريهه
- لانك متعرف انته راحتي هاي مو حضنتك رجعلي كل الحيل لاتخاف يااسمر ياحلو
- هلاا هلاا كله غزل عيني مطورين
- ههههههه مو شويه شويه ديروح الخجل
- وشويه شويه ديخلص الاسبوع ضال يومين
زييين
- عااابتلك ولا تغزل بيك بعد خربت واهسي
- ههههههههههه موش انه هناك اتغزل بيج حبيبه من اشوفنج تسمعين جلمتي اشبعج غزل
- اممممم

ضليت وياهه لحد ماكملنه العشه واكلنه وراهه جبتهه كعدتهه عله الجربايه وحضنتهه وحطيت اللابتوب عله رجلي واشتغل كل ماتريد تكوم اخنكهه بايدي وضال حاصرهه هيج حته ماتتحرك مايفيدن بيهه الا هيج ..

لكيت شراي للسياره واتفقت ويه ادم نروحله ثاني يوم ... وصيته يجيب ليال يخليهه يمهه ماامن اعوفنهه وحيدهه اخافن كلشي يصير ليهه

وثاني يوم كعدت ب ١٠ سبحت وبدلت وكعدنه نتريك وصيتهه عله روحهه وعلاجهه وكمت اخذ محفظتي وجان تندك الباب ...

رحت فتحت وضليت متصنم بمجاني وربى اجتي وتكول ..
- ها حبيبي اجتي ليال
.
.
.
يتبع