رواية من فجر ديسمبر الفصل السابع والأربعون 47 - بقلم Zoka 🌷

من فجر ديسمبر
🍁
🍁
- ها حبيبي اجتي ليال

انداريت عليهه وانه ملامحي جنهه تجمدت وهيه هم صارت مثلي من شافت الشيخ واكف ع الباب
حاط ايده وره ظهره ويعاين لينه .. اجتي وصارت
بسدي جان يكول...
- شني ماتضيفونا ؟
- لا عمي تفضل حياك الله

طب جوه وهيه مجلبه بهدومي وبعينهه الف سؤال
وانه هم جني انضربت عله راسي شجابه هسه
وشدلاه بينه؟؟؟

كعدنا كلنه بالهول وشويه وكامت ربى جابت كلاص عصير وماي حطتهن جدامه واجتي كعدت بسدي وهوه جدامنه عاد شرب الماي وكال ..

- بويه شمسه ماتجين تكعدين يمي

انه درت وجهي ورفعت حواجبي عبن اعرفنهه راح تكومن ليه .. بس هيه تدنت ليه ازيد وكضت
ايدي من يم العكس وكالت ..

- لااا اضل يم شهاب

عاينتلهه وابتسمت ومسحت عله ايدهه وطمنتهه بعيوني عاد الشيخ ضحك وكال ..

- ههههههههه شني صار شهاب اكربن مني ليج !
بس والله عفيه عليك ياشهاب كدرت لمهرتك

ماحجينه شي بس واحد يعاين للاخ عاد رد كال
- اسمعوني زين .. انه جاي احجيلكم تفسير كلشي صار من كبل لليوم .. تذكر ياشهاب يوم الخليتك تتسمع علينه بخلوتنه هذيج الليله تذكرهه!!!

- اي اذكرهه

- اييي من يومهه وانه هجست بيك ريح العشك راح تطرا وجنت اعرفن دربك وعر لجن خليتك تسمع فرد شغله تسالت بيهه جثير وماعرفتنهه لليوم .. موش سمعت من جنت اكللهه عله ابو نجمه!!

-اي سمعت

- اي جا انه بالبطر اخليك تسمع !! غير اريدنك تخلهه بالك وتعرف درب وصولهه ... ويوم الشفت عشكك ليهه وروحك المرخصهه  لجدامهه تاكدت
شكوكي بانك انته الجنه ناطرينه .. ضلت سالفه عركم هيه الخربت كلشي عليكم وضيعتلكم سنين طوال .. انه متاكد لو انكم ماتخطيتم المر سوه
جان لساعكم كل واحد بصوب وتضيعن انته مره ثانيه مثل هذيج زواجتك شلون غلطت بيهه ع الاكيد تغلط مره اللخ وهيه نفس الشي هم جان ضلت معلكه روحهه بحلم جدامهه وماتشوفنه موش صح حجيي ياشمسه !

- اي صح

- والصار شله داعي باابو نجمه !

- موش هيه عليش تريدنه حته يحميهه ويصونهه
انه كل السويته عجلتلكم البعيد عليكم .. وكت الغركهه صياد انه جنت متكصد اجيبنك بنفس الساع وانه الي وصيته بهذيج السالفه وهوه طاع
ماغدر ياشهاب لجن من راح لحكهم هاي موش مني

- جا عليش ماصدكتنه بساعتهه

- انه شفت هالسالفه راح تجيبن الي بالي ازيدن من ذيج وردت اشوفنك عندك حجايتك يوم التخليت من عشيرتك ! وطلعت كفو جلمتك وحده ماتثنى من دكيت صدرك بنص ديواني وفيت حكه وعيشتهه معززه مكرمه .. جنت اعرفن انته كدهه وردتنهه تشوفن بعينهه وتفهم التريدنه جدامهه موش بعيد
انه ماعرفن شني الخلاهه تطاوعك هذاك اليوم
وبجلمه منك مشت وراك بعباته بلايه ماتحسب لاحد ولا شالت هم شي ؟؟؟ اجيت اريدن اعرفن منج ياشمسه

- لان اكو موضوع ثقه بينه ووفيت حقه

- والنعم والله والنعم

- وابويه ليش هيج سوه ؟

- ابوج ماجان يعرفن شي بس ع التالي انه حجيتله انه ردتهم يمشون اختبار ليهم لجن بعده موش راضي بس يرضى بس يشوفنج عبن روحه لايبه عليج واخوتج نفس الحال

- شعرفك بمجانه عمي؟

- هذاك الشهر رحت اشوفن بكليتهه امتحنت داومت شني الصار وجان عرفت جايبين تغارير
من اربيل عاد وصيت جماعه يشوفون مجانكم وين
وكبل يومين جابولي خبر انتم بهالمنطقه اجيت البارحه بس ماعرفت ياهي شقتكم عاد سألت واندليتكم ... هسه اريدنكم تذبون كلشي وره ظهركم وتمشون تلمون اغراضكم حته نرد للسلف وحككم علي بكل شي

- لااا عمي موش هيج السالفه لاااا

- شني لاا

- مالنه رده لذاك الدرب بعد .. هنايه اسسنه حياتنه وشغلي وعايشين بنعمه وخير موش معتازين لشي بعد كل هالشهور حياتنه مستكره هنايه ماريدن اخربنهه

- شهااب لا تحجي هالشكل هذيج كاعككم وديرتكم مردكم ليهه ابوك واخوتك متلوعين عله فراكك والبت اهلهه يدورونهه بكل مجان

- ايييي عليش يدورونهه حته يسلموهه لبسام امحضر سجاجينه لينه !!! هاي الترودنهه النوب
اخذهه لنص النار واخلي يتفنن بعذابهه !!! جان حسبت رد فعل اهلهه اول موش تفكر بيه انه هالروح مسلمهه كبل ماتنوخذ مني لجن هيه لااا
اشكال سويت وحميتهه منهم ماروحن برجلي لجتالهه

- شهاب شدتحجي شبي بسام

- ربى بعدين

- شهاب امشو وياي وبحماي انتم ماحد يطخن منهه شعره

- مشكور عمي لجن حرمتي مارخصنهه لمذلتهم
البيت بيتك عمي .. انه ترخصلي عندي شغل مستعجل .. اودعناك

عفتهم يتصفنون وكمت رحت ليم الباب وصحت ربى اجتي كلتلهه..
- اليوم انتي ام هالبيت وضيفج جبيرنا ماريدن تنكصين عليه شي احسني ضيافته
- من عيوني لاتوصيني
- سالمه عينج حبيبه
- انتبه على نفسك حبيبي ولاتتاخر فدوا
- صار .. شني بوستي وين لو شفتي الشيخ نسيتي بعد
- هههه لااا مو تدلل

رفعت نفسهه وباستني بخدي وانه بست راسهه وطلعت وبالي هالحجي يدور صدك هالوادم ثعالب جا صارلنه خمس شهور هادين السلف هساع يلا تذكرنه !!

انه هالسالفه ناهيهه من بالي رده للسلف مامش
رحت شفت الشراي وتفاهمنه عله السعر وكالي هالجم يوم يجيبن الفلوس ويجي يستلمهه .. عاد رديت للشقه وره ٣ساعات ... من طبيت ماشفته هنايه عاد صحت ربى وهيه كبل اجتني ..
- ها شني مشى!
- اي قبل ساعه راح
- تغدا ؟
- اي طبعا شلون اخلي يطلع بدون غدا
- عفيه عليج رفعه راسي انتي امن بايدج بيتي وضيفي
- وشلون ينطيني كلبي اقصر بشي يخصك

بست راسهه وطبيت بدلت هدومي واجتي صبتلي الاكل وكعدت يمي بس ساكته وصافنه علي انه
اعرفن عدهه حجي فكملت اكل وفتحت ايدي واشرتلهه تجي ... عاد اجتي حضنتني وضلت مخليه راسهه عله صدري وكالت ...

- تدري ماتوقعت هيج سبب كل الي صار يعني المده مو هينه لمثل هيج تفكير مو صح
- اي صح زودهه هواي
- هو كلي انتي شنو الي تريدي اذا بنفسج ترجعين ماعليج بي هسه اخذج وياي واذا يريدج يجيج
كتله ماطلع بدونه عاد رجع كلي هو اعرفه نفسه عزيزه ومايرجع بكلمته بس انتي نقطه ضعفه ارجعي وياي حتى يلحكنه وهناك اهله يجلبون بي واني اسويله كعده صلح وبنفسي اعتذرله كدام كل العشيره وارجعله كل حقه
- هههههه لاااا هاي كويه والله شكلتي بله
- كتله اني نقطه قوه اله وابد ماسحب قوته منه بنفسي واخلي يضعف كدام قرار هو متاخذه بكامل قناعته عاد كالي يعني صار شهاب اهم من اهلج
وسمعتج وشيخج
- وشرديتي
- كتله هو كلهم وكت الي تخلو عني هو سندني وسمعتي صانهه طلعني من بين عشيره مرفوعه راس وماعليه ذنب وهو هم ماعليه ذنب كل الي سواه دافعلي وحماني من كل كلمه وكل فعل فهو الوحيد الي يستاهل اضل وياه
- يبعد رويحتي والله ان مهرتي اصيله والتعب بيهه مايضيع
- شهاااب
- ياعيونه
- بسام شبي ؟ ليش محجيتلي عنه
- ماريدن اغثج
- ماانغث بعد اكثر من هذا الي صار احجيلي
- وصلتني رسايل من وليد ومحمد يكولون بسام حالف يمين ذبحج  ويدور علينه بكل مجان
- شنووووووو
- اهدي حبيبه موش كتلج ماريدن مغثتج
- شهاااب هذا اخويه ليش هيج يذبحني ليش ماشاف الي سووه ماسمع بالشيخ من فصلنه !! ماسمع حجي ابويه ! ليش يربي ليييش
- صوج هالشيخ موش صوج احد راد يكحلهه عماهه .. اهدي بويه لا تبجين وتمردين كلبي هسه انه عايز حريج اهدي يابويه اهدددي

ماسكتت وضلت تشهك وتبجي حكهه جا اخوهه ويريدن يذبحهه ماكدرت احجي شي بس امسح بدمعهه واحضنهه .. عاد كمت انطيتهه حبايتهه
واخذتهه نومتهه بحضني واهدي بيهه لحد مانامت
وانه عيني ماخذت نوم افكرن ساعه بعمليتهه وساعه اخافن نوبه الثانيه يجيبن اهلهه ويجي لو يضل رايح راد علينه .. ضلت افكاري تجيب وتودي لحد ما غفيتلي شويه وكعدت وانه اتذكر عندي شغل لازم اسلمه اليوم... عاد كمت فتحت اللابتوب وكعدت اكمله كعدت ربى واجتي يمي
بس حطت راسهه عله جتفي وصافنه
- شمالج بويه بيمن صافنه
- احبك
- ههههه هاذ المصفنج
- اي احبك والله
- وانه احبنج يابعد رويحتي انتي
- هواي عندك شغل
- اي لازم اسلم هالحلقه اليوم جماعه كملو وانه بعدني اخذتني النومه
- ماشي حبيبي كمل لعد

كامت للمطبخ وره شويه اجتي جابتلي فواكه
كعدت توكلني وانه اشتغل وهيه كلش هاديه
وصفنه تجيبهه وصفنه توديهه ... عاد كملت شغل
بالعشره بالليل كمت متكسره جتافي رحت سبحت بماي حار وطلعت ادورنهه شفتهه بالحجره  نايمه عله بطنهه ومدندله ايدهه من الجربايه وصافنه عاد اجيت ليمهه تمددت وهيه اندارت علي وباستني بحنجي ...
- نعيماً حبيبي
- الله ينعم عليج .. شبيهه بنيتي بس تصفن شني الشاغل هالفكر
- انته
- هاا شلون احجيلي بله
- يعني دافكر بحياتنا شلون صارت هيج وليش اني ما فهمت كل هذا من البدايه
- زين انتي احجيلي هوه شني الجنتي تردينه يصير وتفهمين شني حساباتج عله هالسالفه جانت
- قبل اني جنت احلم دائماً اني اوكع من مكان كله نور لمكان اظلم واضل احاول اطلع منه بس ماكدر
واكو من يسحبني من ظهري يجرني لمكان اكثر ظلمه من هذا واني اكعد دائماً ابجي من هالحلم هاي ضليت احلم هيج حوالي شهر بعدين صار يجيني نفس الحلم بس شنو ينزل شي يلمع ضوا قوي يصيرعليه وكبل الكه نفسي بمكان احلى من الي جنت بي .. عاد سالت الشيخ عليه بوكتهه وكالي هاي اكو شده توكعين بيهه وربج يدزلج من ينقذج فاني ضلت السالفه بالي منو هذا الي يجي ينقذني وشلون ؟؟ فبوكتهه اني ماجان عندي صديقات  ابد لا بمنطقه ولا بمدرسه لان هذيج سالفه ثانيه .. المهم جنت اتمنى هالشخص الي يجي يكون صديق الي اكدر التجىء اله بكل شده مدام يكدر هيج يساعدني ويحميني .. فعاد وره سنه تقريباً رسمت هذيج اللوحه اكيد شايفهه الايد الي بوسطهه نجمه

- هه شلون ماشوفنهه غير خذت عكلي من اول نوبه

- ايي هاي رسمتهه كتعبير عن هذاك الحلم المنتظر وضل هالحلم يجي باكثر من شكل بس نفس الضوا الكاه باي مكان اكون على وشك اني
اتاذى الكاه .. عبرت بالنجمه لان هي دليل للي يتيه دربه وهي امل ونور للظلام وعبرت بالايد لاني جنت اتمنى يكون هالشخص رجل اعتمد عليه بكل حياتي

- حلووو واخيراً ارتاح كلبي من سيره ابو نجمه
جانت تنغزني بعلي يابويه شكد كرهتن هالاسم

- ههههههه طلعت انته

- هههههه والله دنيا ماتنعرف مضاميمهه اكثر شي كرهته بحياتي طلع هوه الي ... زين شلون عرفتي من يوم الحادثه هذيج ؟

- هوه اي نصهه هذيج صارت بس اني جنت ارفض اصدك هالشي بسبب انك جنت متزوج
ماردت من صدك يطلع الشخص الي انتظره هو نفسه الي كضيت وياه سنين عرك وصياح ويطلع ماخذه شخص قبلي حيل تخبلت هذيج الفتره كلش تاذيت من التفكير ماجنت اريد اصدك هالشي

- وشني التغير!!

- التغير من شفتك وشفت الي جابلي الظنون بالبدايه خفف عليه شويه ومن شفت حبك بعده
ماتغير الي شويه اطمئنيت من هالناحيه بس ماجنت مقرره او مفكره اني راح الكه نفسي بهيج يوم وياك مادري يعني يمكن اكثر شي جنت مفكرته ممكن اكلك وافقت بالزواج بس هيج

- بلايه حب

- اي

- جان كسرتج وعلي

- ههههه لااا الحمدلله صار الاحسن

- زين شني الشفتي بيه يعني اكو شي بيه ثبتلج انه ابو نجمه ؟

- اي .. شامتك

- يا شامه ؟

- هاي الي براحه ايدك اليسرى .. شفتهه من جنت تعلمني اكتب باليسره وضليت انتبه عليهه وتذكرت اني مره بهذني الاحلام شفت هالايد تجرني وجانت بس ضوا هيج ايد بيضه تضوي فهالشامه صارت بمثابه دليل هنا لانهه تتشبه بالنجمه اذا نريد نشبهه

- هااااااا والله عليج افكار تسودن اكبر واحد
خلف الله عله هالشامه جابتج ليه

- ههههههههه

- يعني هسه انتي حبيتيني علمودهه زين عليش ماكليتلي هالشي ؟؟؟

-  اني ماكلتلك حتى لاتفكر اني حبيتك لانك ابو نجمه لااا والله اني حبيت شهاب بشخصيته وعفويته وحجاياته وكلبه الطيب اصلاً هذاك
كله نسيته حبك ملىء كل روحي ماخله بيهه مجال
لشي غير هالاحساس الي يخليني وكت اشوفك
ماشوف شي عداك كأن هالدنيا بيهه بس احنه
ماحس بكل من حواليه بس عيني تضل عليك
وفكري كله يمك هواي حبيتك لدرجه ماتخيل اكو بعد ذره حب بداخلي ممكن تنطي لاحد بعد اي شخص ام اب عم خال اي شخص ماممكن يحصل جزء بالعشره من الي حصلته انته

- وحك علي لو اتخير بطريكه شكر لربي اله ابوسه واكله ملكتني ملك سليمان هالليله رحيم رببببي رحيييييم

- ههههههههههههههه يالله على سوالفك رهيبه

- ولج بويه احبننننننج والحسين مسودنتني انه صاير مافكرن لروحي بس بيج انه متعجب شلون هيج انسان تنحط روحه بانسان ثاني ويضل عايش بي هالشكل جن مامش راحه بالدنيا غيرج بس احضنج اهجس جسمي كله يرد حيله

- لعد ليش خلق حوا من ضلع ادم غير حتى تضل هي مركزه وامانه وسنده ومن هنا يتصل هالكلب بالكلب بهالحضن حبيبي فتشوف هالراحه تزيد ولعلمك مو اي حوا ترا بس الي ياشر عليهه هذا

- اعررررف جا هوه ثبرني بيج جبت بنات خلك الله نصهن وماتخطى عليهن خطوه وحده

- شوكت يمه جايب بنات !!! 

- اهوووو بدينا عاد

- حاجيني شوكت هاي عزا بعينك شهاب يعني حاضن غيري هسه اموتك اذا صدك

- بويه كتلج ماكربتلهن جا جنت احجي هندي موش اكلج مايرضى هالمصخم ماكرب لغيرج

- اي بس ايدك راحت لغيري ادري بيهه

- شلون بلوه هاي

- يعني متشبع بنات اووووف منك اوووف اني موتي حتصير من وره سوالفك هاي

- لج لتصيرين جاهل عاد اعكلي خايبه ماتشوفين انه بايع الدنيا لعينج يابنات ياصخام شتحجين انتي
بويه ماتكليلي عليش حاركه كلبج هسه انه وياهن لو وياج

- لاااا عايز تصير وياهن ...شوف شهاب والله لو لمحت اسم بنيه هيج يفتر حواليك اكرهك عيشتك
اييي لاتضل تتمضحك هيج تره بهالسوالف تشوف الشيطان مو مثلي وبعد كتلك

- ههههههههههههههااااي لج امووووتن بغيرتج انه لج بويه والحسين مابعيني غيرج خايبه جم مره اضلن اعيد بهالسالفه

- لا تعيد بيهه بس ديربالك زين

- وعلي مالي نفس بغيرج لج انه احسبن يوم يوم لزواجنه انتي مدري شلونه عكلج خايبه ماتشوفين انه شلون محترك عليج والصبر اجدي بي جدوه وياج
- اممممم يعني بس هنا نفسك ؟؟ وغير بنات من تباوعلهن ؟
- جني ماشفتهن وحك هالعيون الزرك السبني
- احبك
- الحمدلله عدت سلامات وانه احبنج رويحتتتي
- شكد تحبني
- بكد جمالج

كلته ودنجت لشفافهه بوستهن بهداوه ورديت خذيتهه لصدري ونمنه هيج ..

ثاني يوم اخذتهه اكلنه موطه جانت تنك عليهه
وتسوكنا وردينه .. جان تجي عليه وانه اكلب بالتلفون ...
- شهاب حبيبي
- عيونه كولي
- شقررت عله حجي الشيخ
— منتهي هالحجي عندي كبل لا يبدي حبيبه
مامش رده بعد
- شهاب بس هو جانت غايته يخلينه سوه لا تقسى هيج حباب
- ربببى يا گسوه هاااي انه ماسويت شي همه اليلعبون ع الحبلين
- بس ميصير هيج يعني دفكر بالموضوع حبيبي فدوا
- ربى كتلج مارد لهناك سدي السالفه عاد
- مايصير شهاب لازم نرجع يعني هو اجه واعتذرلنه وكل حياتنه ترجع مثل قبل بعد شكو
- هاااي شمااالج انتي ... تريديني اردن مكسور ليهم !!! شيخج اجه النه حجه سالفه ابو نجمه للودام شيريد يكولن هااا!!! شيكللهم والله انه جنت اريدهم واحد يحب اللاخ واريدنهه تعرفه هوه الجانت تحلم بي !!!!!! كليلييييي هيج يحجيلهم!!!
لو يروحن يكول اي انه عفيت عنهم واحنه اهل ومابينه شي والفات مات ويطلع هوه ابو الحك واحنه المغضوب عليهم .. هيييييج احسبيهه هييج
انه ماردن واخلي علي شاااامت لااا وحك الخلك هالروح
.
.
يتبع

بارت قصير بس بي هواي اشياء انتظرتوهه اعوضكم باجر .. ردت اخلي مانزل بس كلت لا
شويه احسن ماكو 😄