رواية من فجر ديسمبر الفصل الثاني عشر 12 - بقلم Zoka 🌷

من فجر ديسمبر
🍁
🍁
من عفتهه رحت خذيت التشيريت وصعدت لحجرتهه
قفلت الباب ومشيت فتحت الشباج عبن ريحه الاصباغ
ماليتهه ...
وكفت جدام لوحه النجمه وصفنت عليهه وانه اكولن عليش
انته؟؟؟ عليش تنطرك ؟ منين عرفتك ؟؟
اضل انه اتسائل بهالربى شلون بيه !!!!

مشيت للجربايه وعاينت ثوب ابيض شلته وضليت اعاينله
كصير كِلش وستن وبي شيالات رفيعه ... كربته ليه شميته
بي ريحتهه اثاريهه جانت لابسته ونزعته من نزلت ...

انه همت بهالريحه تسلب عكلي بشمتهه .. ذبيت هدومي وضليت
بالشورت وحضنت ثوبهه ونمت وكل الفراش بعطرهه يفوح
وهالستن البارد عله ايديني تيهني من نفسي ... صرت ماعرفن
شي غير افكر بيهه واشمن هالريحه اكثر واكثر اشبع ريتي منهه
عبن روحتي ماضللهه ساعات واعوفنه ...

نمت عله ريحتهه وانه تعودت عليهه بحيث من اصحى الكه
نفسي مرتاح ونومتي بيهه تصير سريعه جني اخدر واغفى بساع

كعدت ب ٧ الصبح تلمست فراشهه وحضنت غطاهه ورديت
اشمن بي وتالي كمت خذيت ذاك العطر اليدوخني وحفظت اسمه
ورشيت منه عله التشيريت عبن ريحه بدت تخف وانه وراي سنه
كامله بعيد اريدن يصبرني شويه ...

لبست هدومي واجيت اطلع وعيني صارت عله ذاك الثوب الستن
كلت لا مااخذه كافي هيج .. طلعت ووصلت ليم الدرج وحسيت
راح اتندم اذا ماخذيته ورديت رحت شلته صفطته وضميته جوه
هدومي ونزلت ... رحت ضميته بجنطه السفر هوه والتشيرت
المعطر ورحت غسلت ...

صبحت عله عمتي وربى اجتي حطت الريوك كعدت اكِل
وعمتي كالت ..
- يايمه شهاب صدك حتسافر اليوم
- اي عمه بالليل طيارتي
- وليش هيج مستعجل ياعمه اي بعد وكت اشفنه منك احنه
كله كاضيهه بالشغل لاكعدنه ولاسولفنه وياك
- هاي الحياه عمه كلهه شغل ماتفرغ وانه وراي دوام ماريدن
اتاخر هم وراي دفع فلوس وترتيبات هم يادوب الحك اكملهن
- الله يسهلك يايمه ان شاء الله تفرحنه بنجاحك وترفع روسنه
بحق الحبيب محمد
- ان شاء الله بدعواتكم ... والله انه تعودت عليكم حته هالروحه
انه مستصعبهه علي عبن ماريدن وداعكم
- اووووف ياعمه شجابرك عله المر غير الامر منه
والله اني بالي على اخيتك زهره اكول خطيه تضل وحيده بدونك
هسه تتخبل من تدري بيك حتسافر اليوم
- متشوفين ماكلت لاحد عبن ماريدن اطول سالفه الموادع
بلاخص ويه زهره تكضيهه علي بواجي وتطير علي الاول والتالي
- اي غير اخيتك وتحبك شعدهه غيرك لعد ياعيني
- ماوصيج عليهه عمه وانتي ربى هم خفيهه وياهه شويه
ومن ترحين للسلف مري عليهه اكعدي وياهه تراها طيبه كلب
موش مثل رباب وجماعتهه
- اني ماعندي شي وياهه وهي حبابه ان شاء الله من اروح
امرلهه
- اي عفيه ماوصيج عليهه بعد .. اكولن عمه الولد وينهم
- بسام طلع بشغله وحيدر بعده نايم
- هااا جا شون انه اريدن اسلم عله بسام هاذ وين الاكيه هسه
- خابره بلكي قريب ويجي
- والله اني حته مادري تلفوني بي شحن لا

طلعت تلفوني لكيت بي حبايه وحده شحن .. خابرت بسام وكالي
ساعه ويجي وانه رحت كعدت حيدر سلمت عليه وهوه ضل
كاعد وياي لحد ماجه بسام هم تحاضنه وتوادعنه وتالي رحت
بدلت هدومي وخذيت غراضي وجيت اطلع جان عمتي انطتي
جيس كليجه ..

- مشكوره عمه ليش تعبتي روحج
- لاا بالعكس تونسنه بيهه اني وربى سويناهه من الفجر الك
- هااا تسلمون
- تروح وترجع بالسلامه يايمه دربك خضره وليدي
- الله يسلمج عمه

مشيت ليم ربى وعاينت بنص عينهه ولنمشهه وشعرهه الاحمراني وهيه صافنه لصفنتي ...
- انتبه على نفسك
- ماشي .. ربى انه تره مانسيت سالفتج لجن ارجع وافرغلج
واعرفن شنهي بالمضبوط ولو اعرفن اتذابح وياج اعرفنهه
- ههه ماشي ارجع والله كريم
- السهر موش زين لعيونج الحلوه نامي عدل
- امم
- وسم
- هااا
- حشتاك لعرايكج ياصخمه
- اممم
- دخيل محمد شكد بارده ميلي من وجهي مييلي
- توصل بالسلامه ياابن العم
- الله يسلمج

عفتهه ومشيت للسياره وصلني بسام للسلف ونزلت لاهلي
كعدت شويه وياهم وبعدين كتلهم انه حسافر الليله وزهره
انكلبت خلقتهه وضلت تبجي وتنوح ...

- زهره ياخيه هسه انتي موش تعرفين انه راح يجي يوم واردن
لتركيه عليش هالبجي
- ياخوي وانه ششفت منك كريب وماتهنيت بيك عاد تسافر هيج
وتوني يلا ادري عليش ماجيت يمي البارحه اودعنك واشمنك
كبل لاتروح
- هاي انه يمج ودعيني وشميني شتفرك يعني
- شهاااااااب ياخوي لاتروح
- تعاي ليه

جتي ليه وحضنتهه وهيه تناشغ وتبجي كطعت كلبي والله انه
مابودي اردن لتركيه لجن انه اعرفن ضلتي تجيب المصايب
اضغط عله نفسي واروحن احسن ليه وليهم ...

بوستهه وهي تشمشم بيه وتحضن ورديت رحت لجدتي مطره
- هااا ياجده حعوفنج ارتاحي
- يااااه يابعد روح جدتك وانه شفهمت منك وتروحن ولك
جا انه كل يوم اكولن هالساع يخلص شغيلاته ويمرن ليه
انتسامر سويه تالي تطمطم روحتك عننه
- ياجده هيه هيج صارت بعد ركض ركض ماهجست الا
صاحبي داك تلفون علي ويكولن لازم نرد لتركيه هاليومين
حته نلحك ندفع القسط ياجده جا شلون نجوز ماندرِس
- اوووف يايمه اوووف انه حكضيهه وحيده روح يابعد كليبي
توصل يايمه بالسلامه محروس بعين الله وابو الحسنين يوكفلك
موش تنسانه ضل دك هالتيلفون وخلنه نسمع شنهي علومك
وتخرج بساع عاد مصختهه يارايح ياراد انه اريدنك تضل
هنايه ازوجنك اشوفن فريخاتك حموتن وانه بالحسره عليك
- شنهي زواجيش جده كولي يالله تونه فتحنه للدنيا
- ياااه ياااه لك يمسودن الزغار ولدهم بطولهم وانته خلك
تلاحك وره الغيم وتاليك لا من حظت برجيلهه ولا من خذت
سيد علي
- ههههههههههههههه والله يامثالج يامطره هَيج توكع ع الجرح
حشتاكلج انه بالعباس احبنج يامطره المطرات يام شيبه الحلوه
- تعال ليه اشمنك يابعد بيتي وهلي يالعزيز يابن العزيز
اخاف اموتن ومالحك اشوفنك ياشهاااب
- لااا جده شني عمرج طويل ان شاء الله
- كضى العمر اهوه شضال منه .. بس ترد ازوجنك وان مارضيت بهالعصى اسوكنهه عله موتنك
- خخخخخخخخ تبشري يامطره ،،، انه هم يلا اروحن للشيخ
واسلم عله باكي عمامي
- يايمه شهاب دير بالك عله رويحتك يايمه ولاتنسه صلاتك
وصيامك تراهم ستر وحفظ ليك بالغربه ياوليدي
- بعون الله ماانسى .. ديربالج عله نفسج جده وادعيلي زين
- روح يمه محفوظ بمحمد واهل بيته ترد لينه بالسلامه يابعد
رويحتي والضنه

حبيت راسهه وايدهه وحضنتهه وهيه تشم بيه وانه تذكرت امي
هنايه بحضنهه لو انهه عايشه جان هيج تودعني وتشمني ..
رديت حضنت زهره وحطيت بايدهه جم فلس وطلعت لبيت
الشيخ هم سلمت عليهم وودعت عمامي وولدهم وكبل مااركب
السياره اجاني ابوي .. حط بايدي علاكه ..
- شنهي هاي بويه
- فلوس دراستك وليدي انه اعرفن انته ماتريدن تمد ايدك لحد
لجن انه ابوك وهاذ كله من خيرنه وهوه خيرك وحلالك وحصتك
خذهن يابعد ابوك ولاتعاندني
- مشكور بويه مشكوور

حضنته وهوه طبطب عله جتفي وظهري وبعينه دمعه مايريدنهه
تطيح ... حبيت راسه وصعدت بالسياره وياي بسام ونعيم وصياد
وطلعنه لمطار بغداد ،،، انه عبن اعرفن صاحب شركه الحجزت
عدهم .. هوه رفيجي من زمان سهلهه لي وعجل بسفرتي مثل اول مره من معارفه من بغداد يدبرهه بتلفون واحد لجن وياهه
شجم فلس مزودين ...

وصلنه بالخمسه العصر للمطار وضلينه ننتظر ونسولف ونعيم
كل ساع وحاضني ويكلي خاف اموتن وماشوفنك رد ليه بسرعه
وبسام يوصيني انساهه وصياد يكلي ماتحضر عرسي !!!
وانه بين اطمنن هاذ واودعن هاذ ... تالي بعد ٣ ساعات صار
وكت السفر ..

كمت حضنتهم ونعيم نزلت دموعه ماعرفتنه هلكثر يحبني بعده
جنت اظن ضميره يانبه علي بس مادريتن خوتنه عنده عزيزه بعدهه ...

عفتهم ومشيت سلمت جواز والتذكره وبعدهه مشيت للطياره
وانه احسبن شكثر عشت شغلات حلوه بهال ٣ اشهر هنايه
حسيت هالروحه صعبت علي موش مثل اول روحه ليه جانت
سهله وبس اريدن امشي .. هالساع اهجس رويحتي تريدن تضل
هنايه وماتشوف الغرب .. لجن ماضل شي كِلهه سنه وتكضي

كعدت بالطياره واول ماطرنه طلعت محفظتي انه حاط بيهه
علك جدتي مطره وصوره ربى .. شلتهه واعاين  ليهه واتبسم

- انه رايح حته انساج واطلعنج من هالبال وكون الله يكدرني عليج

جنت اعاين للغيم واتذكر حضن امي من جنت زغير بالابتدائي
جنت ارجع من المدرسه وانه هدومي مخربطه وشعري منكوش
وكلي تربان وهيه تجيني
وتصيح يمه ياشهبي خماك مضروب
واكللهه .. لاا انه اضرب مانضرب يمه
وتجي تحضني وتاخذني تغسلي وماتخليني البس وحيدي الا
هيه تلبسني وتعاين الشخوط والجلغات التصيرلي من العرك
لو من الطوبه وتكعد تحجي علي وتنبه علي اصيرن هادي
ومالي شغل بالطلايب تكلي اريدنك مثغف ترفعلي راسي
اريدن يكولون هاي جتي ام الدغتور شهاب اريدن اتباهى
بوليدي سند كبرتي وحماي بيتي ومايضيعن بيك الربه والتعب
ومن تشوفني نوبات عصبي وتحاجيني ومارد عليهه تكِلي ..
عليش يايمه ماترد علي موش انه اريدنك تحصل الجنه مني
ياوليدي ياشهبي ...

مسحت دمعتي وقريتلهه الفاتحه وهديتهه تسبيحه وصلاه عله
محمد وانه اكللهه لساعني اريدنج يايمه ماطفت نار شوكي
بفركتج ولا انجبر كسري بيج يالعزيزه ...

وصلت لتركيه نص الليل .. طلعت من المطار وشديت خط
التركي واتصلت عله زين مايرد عاد خذيت تكسي ورحت
للشقه ... اعاين لشوارعهه هااااديه وين عنج ريحه ديرتي
ريحه الجنه فاركتهه وجيتج ياتركيه ...

طلعت المفتاح من المحفظه ووكفت افتح الباب وجان اطب
واسمع صوت التلفزيون عالي مفتوح عله لعبه والمعلق خابصهه
ذبيت الجنطه بالكليدور وسديت الباب بهداي ومشيت للحجره
جان اشوفن زين منثر الشاميه حواليه وبطالت البيبسي والعصاير
مشمره وجياست الجبس والنساتل بكِل مجان جان اصيحن بي ..

Ey hayvan, kaç kez temizlik öneriyorum
" يا حيوان انه كم مره اوصيك بالتنظيف "

كمز من القنفه وفتح عينه واجاني يصيح ..

Alllah Shihab döndü .. Allah .. Seni çok  çok özledim
" الله شهاب رجعت .. اشتقت لك كثيرا"

جان يحضن بيه ويفتر ويفرني وياه وكلساع يصيحن باسمي
ويكِلي مشتاكلك ...

??Hey aptal neden bütün bu pslikler.. Neden
" ياغبي لما كل هذه الاوساخ "
Öyleyse emri yerine getir .. Senin için üzgünüm
" اهكذا تحافظ على الوصيه .. اسفي عليك "
Burada yalnız oturup, baskı ve yalnızlıktan ölürüm.
" انا اموت جالساً وحدي هنا .. من القهر والوحده "
Mazeretler yeterli değil.. İndirme Temizliği
ben uyuyacağım.. Kemiklerim kırıldı
" هذا ليس عذرا .. نظفه الان .. سأنام تكسرت عظامي "

Tabii ki, şimdi temizleyeceğim tabii ki
طبعا طبعا نام انا سانظفه فوراً

راح كمز جاب المكنسه وكعد ينظف ويلملم بالزباله وانه عفته
ورحت لحجرتي خوش بعدهه عله حطتهه ماملعوب بغراضي

نفضت الجربايه وتمددت .. وهاي رديت لتركيه بخير وسلامه
وراح نبدا من جديد ونشوف شمضموم بعد ليه ..

سبحت وطلعت لكيته واكف يحضر الاكل وكعد رتب الميز
وكلينه سوه وهوه يحجيلي شلون كاضي وكته هنايه بين يشتغل
وبين يشوف اهله لو يكضيهه يلعب بلي ويكلي جنت انامن
بفراشك نوبات من اضوج لوحدي ..

هوه حجيه مثل مال جهال ويضحك ويتنعوص هواي شكد اعلمه
يصير رجال حوك مامنه فايده ابد غاسل ايدي منه واعامله مثل
اخوي الزغير هيج احسبنه ...

رحت كبل نمت من التعب ماحسيت الا عله اذان الظهر
عبن انه شقتي بمنطقه مسلمه وجنت متعود اصلي بهالمسجد
وكِلهه سنه هنايه الا انه ووليد نصلي شيعي وويانه واحد
هم من المنطقه .. جنه بالاول ننسأل جثير اساله عله شيعتنه
ونضل نتناقش وياهم لحد مانمل بيهم الطيبين ويحسبون كلنه
اخوه وبيهم الراسهم يابس وعدهم الشيعي كافر وملحد هيج
يعاينوله ... لجن ضلينه بعيدين عنهم وهمه بالعشره عرفو
طباعنه وطيبنه وصرنه كِلنه خويين ومانمر الا مانسلم
ورمضان نصومه سوه ونكعد عله فرد سفره وضلينه متخاوين
لليوم نحبهم ويحبونه ...

كمت غسلت وصليت ورحت للثلاجه شفتهه شبه فارغه
تعاركت ويه زين وهوه الا شوي ويبجي عاد خذيته ونزلنه
تسوكنه وهوه طاير من الفرحه ... عزمني وتغدينه سوه
ورجعنه خلينه المسواك بالثلاجه ...

وانه من شوفتي للشقه مامنظفه زين وانه تعودت عله نظافه
اهلنه وبلاخص بيت عمي حاتم جنت اشوفن ربى من الصبح
تكعد تكنس وتمسح وماتبقي هدم وصخ بالحمام ماتغسله جانت
ريحه النظافه تعط بالبيت وحته الكراج دومه مغسول ومرتب
واجي هنايه اشوفن الافندي كابل واطيهه عاليهه عاد خليته
يلبس الشورت وانه وياه نزلنه دك تنظيف بالشقه ...

وكل مانخلص من شغله اتعارك وياه جيف هيج عايفهه وصخه
جلفنه الحمامات والمطبخ والحياطين مسحناهه من التراب
وحته البردات والزوالي والفرشات كلهن شلناهن وخليته
بالحمام يغسل ومايلحك ... وانه مسحت الجام والتلفزيون
والطباخ جلفته والكاعيه هم كله جلف ....

وهوه يغسل ويطلع للسطح يشر عبن انه ماحبن يضل فرشنه
بالبالكون تعاين عليه الوادم اريدن كلشي مرتب واخلي يصعد
طابقين يشرهن وينزل يكمل غسل ...

طبيت حجرتي ونظفتهه شبر شبر ... تالي كعدت اصفط هدومي
وغراضي بالكنتور وصار بايدي علاكه التشيريت وثوب ربى
اخذته وماردت افتحه اشمه كلت انه اريدن انسى .. عاد شلته
ضميته بنص كارتونه بالكنتور وكملت تصفيط ...

وماخلصنه تنظيف للمغربيه .. عاينت للمجان يبري وريحته
طيبه ونفهه .. جان زين متمدد بحجرته وفاتح ايديه ورجليه
وغافي .. انه خذيت فلوس ونزلت افتريت شويه ورحت صرفتهن
وبعدين رحت جبت اكل جاهز ورصيد ورديت للشقه ...

حطيت الاكل ورحت كعدته واكلنه تالي خليته يغسل مواعين
وانه رحت دكيت عله وليد ...

- لك ايا منعووول هاي شلون تروح وتعوفني
- هههههه شلونهه المفاجاه هااا
- يااامصخم ياحيوان بس اشوفك لاكضي بيك التوبه اني لو ما
شفت رقمك هذا الدولي جان ضليت ماعرف  انك رحت ليش هيج ولك ليش تعوفني وترووووح ياخسييس
- لك بويه صارت السالفه ركض بركض انه البارحه بالليل
وصلت ومصارلي يومين من حجزت
- ليش شكو شعندك هيج مستعجل
- سالفه طويله من تجي احجيهه الك
- اني فد اسبوع واجي شلونه زين
- شلونه كالب الشقه كلاب بالعباس اليوم خليته يكفر كعدته
غسل زوالي وبردات وفراشات الشقه كلهه طلعهن بلادي
جان مسويهه مزبله هنايه ابن الكلب
- هههههههه هسه قابل مانعرف زين جديد علينه
- شنهي بويه انه تلعب نفسي من هيج شني كاعدلي بمزبله
مشمر جباسته والبطاله بكل مجان والدهن صاير هلعلو بالمطبخ
طيحت حضه اليوم من الظهر لحد المغربيه هوه بس يجلف
ويصعد للسطح يشر وينزل يرد يغسل لك حته كنس خليته يكنس
- ههههههخخخخخخ والله وعشت يعني اني اجي ع الحاضر
- تعال واشوفلك تدباره هم انظف بعد اسبوع شني قابل نجوز
- شو جنك صاير العمه واحنه الجناين شبيك ابني شبييك
شلون نضل لازمين وصلتنه ونجلف يلا ترضى
- اي النظااافه منيننن
- من الايمان
- عفيييه بوليدي السبع لتنساهه زين ويلا ولي حتخلص رصيدي
- يلاا رايح رايح سلملي عله هاذ المطي اليمك
- يوصل يلا مع السلامه
- الله وياك

سديته ورحت لحجرتي تمددت واجتي بالي ربى وعيونهه
جنهن ماي صافي زلالي مسجوب كطره باليمنه وباليسره
طلعت صورتهه وضليت صافن عليهه واكولن لو انه شايفهه
من هيه وزغيره جان هم تناكرنه هيج !!!

تالي كلت هسه انه شسوي حته انساهه ؟؟؟ انشغل بيمن ؟؟
تذكرت انه لازم الكالي شغل ولو انه عندي فلوس خير من الله
لجن يخلصن مايضلن وماريد اوازي نفسي كلش ...
لازم باجر اطلع ادورلي شغله التهي بيهه بين مايجي الدوام

جيت انام ماكدرت ضليت بالساعتين انه بس احوص واعاين
للكنتور واكابر تالي كمت .. طلعت مخدراتي التشيرت والثوب
الكصير .... شميت التشيرت ورديته بالعلاكه وخذيت الثوب
قفلت الباب ونزعت هدومي وحضنته احبن يلامس برودته
ونعومته جسمي واهجس جني حاضنهه وانامن عله حلمي بيهه

ثاني يوم نزلنه اني وزين للشارع وضلينه ندور عله شغل
مالكينه شي مناسب تالي رحنه للمسجد صلينه الظهر والعصر
وضلينه نفتر بالشوارع لليل ردينه سوينه العشه ...

وضليت عله هالحال اربع ايام لحد مالكيت شغل .. بمحطه
غسل سيارات ... هناك همه عدهم مكاين للغسل بس الدواخل
مالهه تحتاج ايد تشتغلهه ... وانه صرت اشتغل هناك بالشفت
المسائي .. ابدا من ١٢ الظهر لحد ثمانيه بالليل ..
واكثرهه اكضيهه كاعد اسولف ويه الرايح والجاي عبن موش
جثير يجون ...

وبالاسبوع الثاني اجانه وليد ورجعت لمتنه وسهرنه وشقانه
هوه كلش يجفص بالحجي وشقاه ثكيل فزين دايماً يزعل منه
ومجلب بيه يحبني حب امه ...

جنت باليل فاتح باب البالكون وكاعد وبايدي صورتهه كاضهه
ومرجع راسي للحايط وكاعد بالكاع وصافن بيهه مابالي حجي
ليهه بس الكاني اعاينلهه بشوك ... تالي حسيت عله ايد وليد
عله راسي ..

- هااا شمسهرك
- ماجاني نوم وانته شعندك
- اني جيت اسمع سالفتك الطويله الصارلك يومين محاجيهه الي
- هههههههه ااااخ اااخ
- صاحبه الصوره مو
- هوه اكو غيرهه هالعله العلت روحي
- هههه منين هاي
- بنت عمي حاتم
- جذب هو مو ماعنده بس ولد لو اني غلطان
- لااا انه ماجنت ادري عندي بنت عم منه هيج تفاجات من عاينتهه هناك بيتهم
- اكولك احجيلي من البدايه احسن

كعدت حجيتله شلون شفتهه وشصار وماصار وهوه صافن ويسمعني .. تالي كال ..

- اني مثل حجايتك اكول اذا ماطلع وراهه شي اطلع معتب
- اعرفن هيه وراهه سالفه لجن انه هسه موش همي سالفتهه
- لعد شنو
- وليد انه اهجس تعلكت بيهه
- ااااااه
- اي بالله العظيم انه صارلي شهرين اريدن اطلعهه من بالي
موش كادر عليهه انه اجيتن هنايه بساع بساع عبن اريدن اخلص
منهه وانساهه الاكي روحي كاعد واتصفن بصورتهه واذا
كلش كلش عديت اليوم بدون ماذكرنهه مايزور عيني النوم
اذا مو ريحتهه حتسودن انه بالحسييين حتسودن
- ههههههههااااااااااايييييييي شهاااب وكع بالفخ
- فخ اكشر
- لك هاي شصاير بيك يمعود كاتلك الحب
- بويه انه ماحبنهه جم مره اعيدن
- هي شنو ماتحبهه مو هستوك تكول تعلقت بيهه بعد شكو
- بس مااهجسلهه شي بهالكلب هي بس ماتطلع من فكري
- زين انته جربت تفوت بعلاقه بلكي تنسى
- جربت وبنفس المكالمه طفشتهه وهسه كاعد افكر اشوفلي
وحده انسه بيهه بس اخافن اتورط وياهه
- زين انته ليش ماترضى بالامر الواقع تره هي بنت عمك يعني
تتزوجهه تتزوجهه وتخلص بعد شكو
- بويه انته مطي لو شني اكِله ماريدهه انننننه ماريدهه لك انه
تصير مرتي هيج بارده وجامده حته اسلوب ماعدهه تحجي بي
وشايله خشمهه ع الوادم .. انه اذا صارت مرتي اشيلن روحي
واطكهه بالكاع لك انه كل شوفتي الهه عراك وصياح وعياط
- عجيييب امرك ... لعد اذا هيج متشيلهه من بالك
- ماااااكدرررررر هالمصخم ماجاي يخلصني منهه صارت عله
بكلبي اريدن بس انساهه
- انته شتذكر منهه بالضبط
- هيج اذكرهه
- يعني تتخيلهه حلالك وهيج غير
- اي اي لتلح بهالسالفه
- هسه اني شكلت بس اريد افهم علتك وين حتى اشوفلك جاره
- هسه اذا عندك شي حل كوله خلصني
- الحل ياخويه تشوفلك وحده تعوضك عنهه بهالسالفه وصدكني
وكت التجرب غيرهه راح تروح نفسك بيهه
- مادري ماحبن هالسوالف انه
- جرب احجيلك ويه وحده اطلع وياهه هنا وافترو وخلي كل وكتك وياهه راح تشغل وكتك وتنسيك
- واذا بعدين جلبت بيه
- طك جوازك واشرد شنو صعبه يعني
-  زين جا شوفلنه وحيده منا وجاي
- هو اني لو انته التشوف
- احجيلكياهه من الاخير انه ماعرف اضبط بنات هيج واسايس
واطيحن الوحده بشباكي انه لو تجيني جاهزه لو مااحرك جدامي
- ههههههههههه حقك هو انته مسوي شي بحياتك غير تشتغل
شكو شغله جيتت بيهه كبل وين شايف نسوان وحاجي وياهن
- اي مدامك تعرفني هيج دبرهه انته
- تدلل جنك على مره اجيبلك عشره
- وحده وانه ادري حتشيب راسي بس جيب ميخالف كلشي راضي  بس هالمهجوم يبطل يفكر بيهه
- من باجر اروح اضبطلك الامور واجيبهه الك ع الجاهز
- اذا طلعت فاهيه وبارده مثلهه بالعباس اشيلهه واركعهه بيك
- هههههههههه اجيبهه هيج نجره نجره حاميه مفلفله ههههه
- ههههههه شلون بيك انته عمي جيب كلشي الجان
- اني هم اجيبلي وحده بطريقي هم اتونس
- مكافي العندك جسب خما جسب
- شبيييك نغير هذنيج شبعنه بيهن
- اكِلك صدك بس لا هم مسويلك مكسوره وياهن
- لااا والله بس ع التلفون نحجي ماماشي بغير طريق
- اي زين وهذني التركيات هم ديربالك فهمت
- اي ادري ادري
- كوم نام يلا
- وانته ماتنام
- لا انه اريد اضلن شوي مانعسان هسه
- لعد تصبح على خير
- وانته من اهله ديربالك تجيب طاري لاحد عله سالفتنه هاي
- دنجب انجب عود كاعد يوصي وصي عله شي يسوه
مو توصيني على سرك 
- ههههههه عشت يابو النسوان
- هخخخخ  عند عيناك بعد كلبي

رديت صفنت بهالسمه وانه احاجي نفسي واكولن من باجر
انه ابدي صفحه جديده مالكاج بيهه واسوي كلشي ماسويته
كبل وانساج انتي ماتفيديني وانه ماطيحن ضحيه حسنج

.
.
يتبع 🌸🌸