رواية من فجر ديسمبر الفصل الحادي عشر 11 - بقلم Zoka 🌷

من فجـر ديـسـمبر
🍁
🍁
من هذيج حجايتهه وانه بدت بيه رغبه اتكربلهه واكولن حته
اقنع روحي متفيد وانساهه وتطلع من نفسي ...

انه وكفت شغل لين باكيلي اسبوع وارد لتركيه اريدن ارتاح
لجن ماكلتلهم عبن ماريد ارد لبيتنه لحد ماشوفلي جاره وياهه

كعدت الصبح ورحت المطبخ لكيت عمي يتريك سلمت عليه
وبهاللحضه نزلت ربى مبدله وعطرهه يفوح ...

- صباح الخير
- صباح النور
- ها بابه نروح
- ربى بنتي ماكدر اروحن راح تجيني ناس ونطلع نشوفهم البيت
ونكمل معامله وهالبيت تعبنه بسالفته
- شنوو بابه انته مو كتلي البارحه نروح لعد ليش مكتلي عندك شغل
- غير الجماعه ماردولي خبر الا تالي الليل شسوي يابتي
- هاهيه ماشي

دارت وجهه وركضت صعدت وماسمعنه الا الباب حيل انركعت
- استغفر الله
- عمي شني وين تريد تروح
- للمتنبي انه متعود اخذنهه
- اي شني خلهه غير مره نكلبت الدنيا قابل
-لااا موش هاليوم ملتكى ادباء ومهرجان شعر يبدي بالعشره
وانه واعدتهه من كبل اخذهه ليه عبن انه كل سنه اخذهه تحضره
- هااا تحب الادب
- اييي كلش تراهه تكتب اشكال ماتخطر بال احد بس ضامتهن
- ههههه عمي بتك عجيبه
- شهاب اخذهه انته
- شننني عمي انه اطلع وياهه !!
- عليش بويه ماتطلع وياهه شني بنتي تكرص اشو ماتعرف تحجي
- مو هيج عمي بس انه وبتك ساعه الساعه نتكافش وهسه احنه
صلح ماريدن نرد للعاريك
- انته لاتلح وياهه هيه مالهه شغله بيك انه بنتي واعرفنهه هاديه
ومالهه شغل باحد
- چا هسه ضروري تروحن خله تزعللهه ساعتين وترضى
- حته الشيخ يصخم عيشتنه والله ان درى ماراحت وهوه ناطرهه
تروحن وترد ليه تحجيله عله المهرجان حاسبهن يوم يوم
-بويه والله منطيهه اكبر من كدرهه لهاي البت
- يااه جا شني غير هالوحيده اكِلك من الاخير تروح لو لاله
- اروحن عمي اروحن
- امش اندهه خلني احاجيهه يلا وراي شغل
- صار

صعدت لحجرتهه ودكيت الباب .. فتحته وعاينتلي باستغراب
- ها
- انزلي عمي يريدج
- خلي ابدل واجي
- لااا ضلي بهدومج راح نطلع
- شنو وين
- خايبه نزلي وتفهمين

نزلنه وعمي كام حضنهه وباس راسهه وضل حاط ايده عله
جتفهه ...
- بويه انه ماريدن زعلج يالحبيبه انتي تعرفين شكثر انه اعزنج
لجن انه مواعد الزلم ماكدر اردن بجلمتي وياهم وعبن انه موش
هين علي كليبج يزعل كلفت شهاب ياخذج بدل عني
- شنو شهاب !
- اي زلمه ينشد بي الظهر ويديرن باله عليج وانه وصيته ما
يضوجج هاا هسه شكلتي ترحين وياه

عاينتلي وصفنت وانه اتبسملهه ومسوي شكل الحباب جان
كالت...
- اروح بس من هسه اكلك مو تضل تخبصني ويلا ويلا
- لااا بكيفج اشبعي فره
- ولاتصيح عليه كل شويه
- وانتي هم صيري حبابه
- اني اصلا حبابه ميحتاج توصي
- اي جا انه شريد
- يلا بويه امشي تحضري ومايكون خاطرج الا طيب
- يانور عيني انته الله يخليك النه يااحلى اب
- هههههههههههههه يابعد رويحتي امشي انطيج فلوسج
وانته شهاب يلا امشي تحضر يلاا هم الدرب طويل
- يلا رايح

مشيت وانه اعيب عله حجيهه .. نور عيني بابه اووي عيني
بابه والصمخ كون اي والله ... انه اضوج بالله العظيم اي شدعوه
هيج شايليهه بالصلوات جا شني بس هيه بت بهالدنيا ومتخبلين
عليهه !!!!

طلعت لكيتهه تلبس بحذائهه وتالي وكفت تعدل شالهه جدام
المراه وانه اعاين للبسهه .. ثوب وردي فاتح طويل ومطرز
شويه من الخصر والباكي ساده والردان ضيكه وشالهه مشجر
وبي سمائي وزيتوني ركزت بوجهه اخافن تحط مكياج والحمدلله
ماحاطه شي وطالعه تبرج ...

- ها شهاب نمشي
- اي يلا
- ابويه بقالنه السياره هاك السويج
- مدلـله عمي جيبي جيبي

اخذته منهه ورحت شغلت السياره وطلعنه وجانت الساعه توهه
بالسبعه صارت ..

انه ضجت من الهدوء هاذ كمت اكلب بالراديون تالي كالت
- عفيه سده صوته يزعج
- انه اريدن اسمعلي شي
- شغل كاسيت هذني هواي
- شو جيبي

اخذتهن كلبت بيهن هذن اغاني من زمن جدي وكلهن مواويل
شمرتهن عليهه ...
- ماريدن هذن يصدعن الراس
- لعد خلينه هيج هدوء حلو
- عليش ماتغنين انتي
- شنوو اني!!
- اييي انه اعرفن صوتج حلو بالغنه
- ومنين سامعني اغني
- سامعج مره
- جذاب
- بالقران سامعج تغنين
- شنو يااغنيه
- ماكولن شني الا تغنين يلا
- لا والله مااغني
- بتي مو غريب انه غني غني
- اني ماغني بس يم الناس الاحبهه
- وانه ماتحبيني
- لا ماحبك
- عليش  جا تكرهيني ؟
- مااكرهك
- جا شني
- هيج شخص عادي
- ياسبحان الله نفس الشعور
- اممم
- وسم
- هااا بدينه
- لتضلين تاممين زيييين
- زين زين بس لا تخلينه نتعارك من الصبح وتخرب مزاجي
- هسه ماتغنين
- ماغني الا من يعجبني
- كيفج

ردينه سكتنه وهي ميله راسهه للباب ومنزله الجامه وانه
بداخلي اسبن بنفسي جا انه شمكعدني من الفجر اضلن نايم
واخلصن من هالشكول تورطت بيهه انه من امده حضي
وصلنه كريب بغداد جان تغني ...

- امممم خذانا الواهس من بعيد نزف شموعنه بشوكك
مشينه وايد تشبج ايد نناغي الروح لطيوفك
العمر من غير حب شيفيد لمني بعصره جفوفك
يااااريحيه مسسج يااهيل عذبني ونين الليل
عذبني ونين الليل
اريدك بالحلم خطار مر بيه عشك اخضر
واتيهن نجمه بسنينك ادورن طيفك الما مر
مر بيه عشك اخضرر

- ماشاء الله هسه يلا عجبج تغنين
- اي هسه
- اي وصلنه بعد عيني
- اي زين
- حلو صوتج لو يتعبر الونه اصفر 
- ليش اصفر
- كونن هو ناعم وهادي ويشع بنفس الوكت ...
ينطي تمييز وثباتيه وبنفس الوكت خجول وساكن
- اممم ممكن .. حلو الاصفر

دارت وجهه للشارع وانه ضليت اهدي بروحي لين انه  اريدنهه
جف ايدي يرجف وهوه عله الستيرن اريدن انسى بالله العظيم
انه تورطت اكبر ورطه بعمري بهالشوفه الشفته ...

وصلنه للمتنبي بالعشره وشويه ... طبكت السياره بشارع بعيد
عن  شارع المتنبي .. ونزلنه تمشينه انه خليتهه عله يساري
ونمشي وهي تعاين للكاعدين اهل البسطيات مال النحاس
انه ماردتن احاجيهه بشي لين اعصابي متوتره اخافن ساعه
الساعه واجضن بيهه من كهري ...
لجن هيه تحارش ...

- شهاب داخل للمتحف البغدادي ؟
- لا
- لعد تعال نشوفه كلش حلو ويضحك
- متاكده !
- اي امشي

دخلنه وجان لازم ندفع دخوليه رادت تفتح جنطتهه انه درت
ظهري ليهه ودفعت ورديت انداريت ليهه واشرتلهه تمشي جدامي ..

مشينه وجان المكان ضيك وانه بسدهه وكت الاطخن بيهه
جسمي يكزبر .. جان بالبدايه غرف بيهه تماثيل لعبات لاهل
بغداد كبل وشلون شكل العروس كبل ورفيجاتهه بسدهه
واهل الطهور وهذيج التخبز ..وبعدين صعدنه طابق الثاني
وهناك صوت وحده تحجي بغدادي من هذول الاوليين
اليتمضيكون  بالحجي  وتضحك هالضحكه التسطر الراس
انه خربت ضحك عليهه وهيه كل ساع تعيد بحجيهه واعاين
لربى تضحك بهدوء ... تالي وكفنه عله شبابيج ونشوف منهه
شكو جوه وجان بيهه رجال ومرته نايمين بالكاع وحاطين
كاروك بسدهم ومن فوك عاينت للجوه شلون مسيج والضوه
الجاي من السكيفه المنگشه يعكس عليهم ضوا الشمس منظره
صدك حلو ويعشيك باجواء طيبه ...

تالي نزلنه وشفنه عروس القاسم والنسوان داير مدايرهه
واهل الزكريا هم مسويلهم تشبيه ... ومن عدهه طلعنه
للجهه الثانيه وجان مثل كهوه كبل شلون طبلات مال خوص
وحاطين عليهه صياني كبار وبنصهن دلال كهوه وتنكه مال
ماي صغيره ... ومعلكين لوحات صور كبل لكل شي بالعراق
من سوالف اهلنه كبل ... وانه كعدت عله وحده من الكرويتات
امهات دوشك الثخين وصفنت اتذكر طيب اهلنه كبل شلونه
ولو هالسلف عله حطته لجن انه شفت العجب بهالدنيه مامش
طيب بعد ...

ردينه طلعنه ونتمشى بشارع عريض ومنه طبينه لنص السوك
كِله محلات قرطاسيه وكتب ...
- شهاب خلي نمشي بسرعه راح نتاخر
- بويه متشوفين الازدحام هسه انه شعندي
- ميخالف سوي شوي
- اطيرن بيج يعني
- اي اي طير

ادفع ادفع وانه محاوطهه بايد والثانيه ادفع بالوادم وتالي طلعنه
من الهوسه و ركض ركض طبينه للساحه الجان بيهه المهرجان
وجانو بادين بي ... 

انه وكفت عله جهه اخذ نفس وهيه بينهم ودفترهه بيدهه والقلم
ارتاحيت شويه ورديت ليهه ... ضلينه نسمع شعرهم وهيه
تكتب شجم شغله منهن ..
- عليش تسجليهن
- حته اقراهن للشيخ
- هاا
- اي هو يحب الشعر الشعبي واني كل جيه اجيبله شكم بيت جديد
- وفيه بحب شيخج انتي
- هذا شيخي مو اي احد يستاهل كلشي بيه
- نياله مدري نيالج
- خلي نسمع كافي

ضلينه هيج نسمعلهم وانه فطست من جوعي طالع بلايه اكل
وصارت ساعه ١٢ بدت تخف الهوسه بالساحه عاد انه كتلهه
- ربببى مانمشي
- ليش
- خايبه مطلعتني من صباح الله عله لحم بطني وهالظهريه صارت وانه ماكليت شي
- بس هنا ماكو بس مكان واحد للاكل
- شنو مطعم لو بياع هيج
-  هو مطعم بس خاص للكبه
- اييي امشي هو اكو اطيب من الكبه
- بس اني ماكدر اكلهه
- هييييي شلون سالفه هاي
- يلا مو مشكله اكل انته واني بعدين اكل
- لا امشينه ادورلج شي مايصير تضلين هيج
- كيفك خلي نمشي هسه

رحنه لابو الكبه بوووويه من راس الشارع ريحتهه تكفخ بالخشم
قريت اسمهه كبه السراي ... طبينه وجان كِله زلم شياب وانه
ماخذلي حليوه صغيرونه وياي وهالوادم فكت حلوكهه ...
جان يجينه ابو المطعم جنه حس علي من خنزرت عليهم
ولطف الجو وكعدنه بزويه وضل كل ساع يجي يسولف ويسال
منين انتم ويحجيلنه عله تراث هالمكان وشلون توارث هالكبه
من اجداد اجداده لحد ماجابولنه ماعونين كبه وطرشي وزلاطه
وخبز حاار ...

- هااا تاكلين
- مادري شكلهه يشهي
- جربي اكلي شويه
- خاف يصير شي
- هههههههخخخخ بويه شني تنفجرين يعني اذا كليتيهه
انتي لازم تعودين نفسج عله هالاكل تره الخيار والفلفل ما
يجدن وياج لازملج لحمه تسند كليبج
- اعرف بس قبل جنت بهالاكل ماترتاح معدتي
- جنتي تاخذين دوه ؟؟
- اي مال قلب
- اي هاذ هم ياثر هسه هم بعدج تاخذيه
- لا عفته هسه عايشه عله الله
- رادلج اكل بويه
- راح اجرب وعلى مسئوليتك
- اكلي وخطيتج بهالركبه انه عله هالريحه الاشمنهه بووويه
اضمنلج كلشي
- اممم ماشي

بدينه ناكل وهيه مثل الواحد توه يمد رجله بالماي هيج يتجبجب
وتاكل علكيف وانه نزلت عليهه فد نزله بالعباس شكرلمه
موش كبه هَيج تذوب بالحلك ... انه خلصت ماعوني ردت
هيه انطتني ماعونهه ماكملته وهم كملته كله ويه الحبشكلات
الوياه وكعدت وزن ... رديت وصيته عله جاي جابلنه من بره
هم شلون مهيل وثكيل  يعدل الراس ....

- الحمدلله .. هااا احجيلي شلونهه الكبه
- طيبه بس ماكدرت اكملهه
- شنو توجعتي
- لاا شبعت
- ههههههه هو انتي نكرتي موش اكل هاذ
- اي بس شبعت بسرعه
- هوه هاذ المهم خلي نمشي يلا ورانه درب طويل
- شنو مانرجع من هسه
- جا شني بعد
- اريد اشتري شغلات
- هااا امشينه يلا

مشينه لنص الشارع وضلت تكلب بالكتب عله هالبسطات هالشارع شكثر ماهوه ازدحام وكله بسطيات ومفرشين بالكاع
كتبهم بس تهجسه ارقى من كل مكان يخطر بالبال ....

رادت تشتري كتاب جان تكلي ..
- مو هم تدفع انته
- لا انه ماضيعن فليساتي الاتعب بيهن عله سوالفج
- هااا زين زين
- جايات بجد وكعده من الفجر شهر انه انترست تراب يلا جبتهن
اجي اصرفهن لكتبج !!!
- لاا والله تفكيرك حلو اني لو بدالك اسوي نفس الشي
- اي انه موش بخيل بس اعرفن كيمه الفلس عبن انه ماجيبنه بالهين وشغله الثانيه انه حالف من انه وصغير ماصرفن بس
عله امي ومرتي وانتي ولا وحده منهن
- امممم تفكيرك سديد
- وحضرتج تفلسفين وياي
- مادري هيج طلعت مني بس لا من صدك عجبني هالشي منك
مادري مرات احسك متنطاق ومرات الكاك لين وطيب
- هوه حامض حلو
- اييي بالضبط ولو اني مجربه بس الحامض والمر والمالح
بيك ماوصلت الحلو
- احسن لا تصليه
- ليش
- يغيرج وانه اعرفن انتي شخصيتج تعزيهه اكثر من هلج
- هيج مؤثره
- تردين تجربين ؟ وقيسي بنفسج
- لا ماريد
- كتلج احسن لج خلينه ع الحامض
- زين هاي انته بس وياي هيج ويه البقيه حلو؟
- هههههههه انه مااصيرن حلو بس ويه امي ومرتي
- واختك
- اختي كلشي بالحد وياهه مدللهه واحبنهه لجن ليهه حد من تصل
شخصيتي عبن هيه مااستحوذتهه
- يعني هسه بس مرتك ممكن تحضى بيهه مو
- اي بس هيه لين امي راحت بعد صارت الساحه للمره بعد
- زين واذا ماعرفت تملكك ؟؟
- تبقى ع الحامض .. انه مااكشفن هالمضموم الا من يدكن هالكلب ويأشر هالعكل بخلافهه لا يضل كلشي راكد بمجانه
- امممم واذا اشر واحد منهن والثاني يرفض
- يضل مضموم
- ليش
- لين الثاني راح يكرهه عيشته عبنه موش راضي لو اثنينهم
يرضون ونعيش الحلو لو نضل ع الحامض انه كلشي عندي
ولا اصيرن بين العكل والكلب بالعباس بودي اطيحن بيهم
اكطعهم ولا اضلن بين اي ولا
- رجال حدي انته
- ماعندي شي رصاصي بحياتي لو ابيض لو اسود
- حلو هالشي محظوظ عندك القوه تختار وتسيطر بقرارك
- وانتي ماعندج ؟
- اني كلشي عندي بس كلشي متاجل لوكته
- شتنتظرين يكملن حياتج
- شي جبير ماينحجي بحرفين ،،،، اريد اشتري شغلات للرسم
خلي نعبر للجهه الثانيه
- اضلين تهربين مني
- احب الخصوصيه

عاينتلهه ورفعت حاجبي ورحنه لمحل بي كلشي يخصن الرسم
جانت تتلمس الورق بطرف اصبعهه وتجرب اقلام الرصاص
المدرجه الوانهه وعصارات الالوان تقراهن وادور بينهن بكل
تركيزهه ...

لمت علاكه شكبرهه من غير علاكه الكتب جنت واكف بسدهه
وعاينت لجزدانهه بي فلوس بكثر الاشتغلتهن هالشهر ...
انه اجدن واتعب وجتافي رايحه يلا احصلهن وهيه تجيهه ع الجاهز من صوب الشيخ كل ورثه يمكن يحطنه بايدهه وابوهه
الي يكوم ويكعد ويصيحن هالوحيده الحبيبه ....

مشينه وجان اشوفن دفاتر حلوه دراسيه وتذكرت زين هالساع
صار جدام عيني ،،، وكفتهه وضليت اكلب بيهن وخذيت اثنين
الي واله هنايه رخيصات كِلش ...

جاي نطلع وكالت ...
- شهاب بس هالمحل
- شكو النوب
- اريد ورق اصفر
- شني ؟؟؟
- تعال يلاا

طبينه للمحل وجان اكو بند اوراق ملون .. سمائي وابيض
وهاذ الاصفر .. شكله مثل اليكتبون بي رسايل كبل ..
اخذته وطلعنه ..
- شتسوين بي
- اكتب
- ماخذتي دفتر
- لا اني احب اكتب بورق هيج واجمعهن احلى عندي من الدفتر
- هااا شتكتبين
- كلشي ماينكال اكتبه
- اذا كتلج تشوفيني ماترضين مو
- هذني مو لاحد يشوفهن هذني بس ينكتبن وينسن
- ماظن هالشي صحيح
- شلون
- يجيهن يوم واذكرنج
- ماشي

رحنه للسياره وحطينه الغراض وره وشغلت ومشيت ..
هيه نص الدرب وغفت وانه ضليت اخذلي جم نظره عليهه
وهيه غافيه .. يربى انه شريدن منج ؟؟؟؟

وصلنه بالخمسه ونص للعماره وهيه كعدت ووجهه احمر
انه درت عيني منهه ماريدن يضل بالي يمهه ...
نزلنه الغراض وانه كبل طبيت ذبيت هدومي وتمددت اريدن
بس انام تكسرت ..

وضليت نايم لحد ماحسيت بنص الليل عاينت ساعه بالوحده
كمت سبحت ورحت للمطبخ افتر وحدي بالشورت والخاولي
عله جتفي مخلي ... فتحت الثلاجه وادورن شي اكله لملمت جم
شغله وكعدت كليت وسويت صينيه مرتبه واخذتهه للحديقه
لكيت بسام كاعد يخابر هناك اشرتله يطب جوه وهوه ماصدك
كبل طب وانه بسطت بالكاع وكعدت اكِل ...

جان تجي ربى برمودتهه الكصيره وتشيرتها الخفيف وبايدهه
باكيتين  حليب  من شافتني عقجت حواجبهه واجتي كعدت
عله المرجوحه ...

- هاي شوكت كعدت
- قبل نص ساعه
- اممم عبالي نايم طلعت ماخذ مكاني
- انتي ماتنامين ماتعبتي من فره اليوم
- نمت وشبعت نوم
- وراح تكضيهه سهره اليوم
- الجو حلو وعندي كتب جديده ليش لا
- هااا تونستي اليوم!
- اي تونست وانته
- اي شفت شغلات حلوه ماعرفنهه من كبل
- اي هو هذاك المكان كلشي بي حلو
- كومي اخذي الصينيه وجيبيلي جاي يلا اليوم ماصخرتج بشي
- امممم
- رببببى
- اي اي
- استغفر الله

كامت شالت الصينيه وانه انتجيت عله المرجوحه ومددت رجلي
والعب بشعري لحد ماجتي جايبه الجاي ... دنجت تحطه بسدي
واهتز صدرهه صار التيشيرت يخيل عليه وانه حبست النفس
بالكوه اريدن اطلعنهه من هالبال الاكيهه تزيدن بي ....

انه ضليت اشرب الجاي وهيه كاعده عله المرجوحه وبايدهه
كتاب ومندمجه بي حته ماينسمعلهه نفس ..
لجن انه اعاين لاصابع رجليهه رفاع وكعبهه احمر وهالرجل
زبده اريدن بس اطخنهه صارت حسره علي ... تالي كلت
انه شكاعد افكر شو جني نسيت نفسي واصول واجول بعيني
عله جسمها ياعيبه العيبه ياشهاب انته التهنى الوادم عن العرض
وتجي انته تناظره بكيفك !!!!!

ردت اكومن انام لجن شبعان نوم وين اروحن؟؟؟
ضليت كاعد واعاين للسمه وهيه عله كعدتهه ... تالي شفت
روحي ماتحمل بعد اصدن منهه كمت طبيت للحجره واول
مارحت لبسام ..

- اكِلك وين وديته
- شنهو
- تشيرتي الاخذته ويننننه
- مانطيه ليك موش كلت اريدن انسى
- بسام جيبه لا تشلع كلبي
- شنهي سالفتك فهمني مو تريد تنسى وماتريدنهه عليش ضال
تشمشم بريحتهه
- انه اريدنهه لجن هالبال مايرضى خلني اهدي رويحتي بي
جيبه كتلك
- تحبهه ؟؟
- لا
- تتزوجهه
- لاااا
- جا شنهو التريده منهه
- ماعرف ماعررررف جيبه كتلك لاتخليني اتجاتل وياك بهالليل
- خااايب اخذه بزعت روحي 

فتح الميز اليمه وطلعه وشمره علي وانه بس شميته حسيت ردتلي
رويحتي خذيته وطلعت للديوانيه ... وكفت اعاين ليهه من الشباج
واشمن بي ... هيج يلا هديت وكدرت اعدي الليله بلايه مصيبه

ثاني يوم رحت مريت لبيت هلي شفت جدتي مطر ونمت
بحضينهه شوي ولاشيتهه شوي وبعدين كعدت ويه زهره
تطمنت عليهه وطلعت للزرع .. رحت لكاعي اشوفنهه
مليانه خير من الله زرعهه جثير وريحه الخضار هاذ ترد
الروح وتنعش الريه ....

رحت تغديت بيت نعيم وتطمنت عليه وضليت عنده للمغرب
رديت لبيت اهلنه تعشيت يمهم وردت انامن ماكدرت عبن
رويحتها موش بايدي واشمنهه ... تالي طلعت بره كعدت انطر
الفجر يبزغ حته امشي ليهم وهناك انامن عبن انه عجزت وانه
اتكلب بالفراش ومامش رجيه للنوم ...

ضليت متمدد بالحديقه والعب بعود واعاين النجوم لحد ما طر
الفجر وضوت الدنيه كمت صليت وطلعت بدون ماسلم عله احد
كبل طلعت للشارع العام وصعدت ويه ابو حمل بيكم وصلني
لمجان البي سيارات ومن هناك خذيت تكسي وكبل لبيتهم

انه من وصلت جان بسام توه كاعد وهوه فتحلي الباب ..
- شجابك من صباح الله
- مامش شي اريدن انام
- عليك علي !!! شنهي بويه بيتكم ماعندك مجان تنام بي
- لاا ماعدهم ريحتهه
- نعله عله سلفى سلفاك ياشهاب لااا والغسل طحتلك طيحه
مامنهه رجيه ... هاي كاضي الليل سهر عبن ماشميت ريحتهه
وجاينه من الفجر حته تنام عليهه !!!!!!!!
- شفت ياخوي تاليتي وين بيت اهلي وماعرفن انام جيف ماشمن ريحتهه يمي ... انه وشلون بيه بالعباس حتسودن
- خويه توكل عله الله وخلنه نخطبهه لك دامك هيج رويحتك
بيهه عليمن تكابر
- ماريدنهه انه ماريدددددنهه تصير حرمتي انه اريدن تطلع من
هالبال بس هيج
- امشي سولفهه للنجوم السهرت تحسبهن ماريدهه جا ورويحتك
التلوب عليهه .. خليك هيج منا لما يجيهه واحد وياخذهه ويضل
يشمن بيهه ليل نهار وانته تحسر وضل مكابل هالتشيريت

عفته وطبيت جوه وانه حجايته تدك براسي صدك وتصير
ويجون يخطبوهه !! وربى يكضن جسمهه غيري !!
هالزبده الي انه اتحسر واتكرضم عليهه يجي واحد ع الحاضر
ياخذهه ويشبع منهه  !!!!
يجوز يجي ابو نجمه التنطره هيه متامله بيه يرجع ليهه وتسلمه
نفسهه وتنام بحضنه ويشوفن هالحسن الي انه شفته !! ويكضن
ظهرهه ويعاين شاماتهه ويشمنهه من عظم ركبتهه !!!!
صدك وتصير ياشهاب وتضل واكف بالعرس وتعاين ليهه ؟؟؟

جا ومتصير هسه انه شعلي منهه موش انه ماريدنهه عليش
خفت هالشكل ؟؟؟

طبيت للحجره وخذيت التيشيرت وجريت النفس منه وطفيت
الضوا وسديت الباب والبرده ونزعت هدومي ضليت بالشورت
وحضنته ونمت .....

من كعدت تالي الظهر ماكمت من الفراش ضليت صافن للسكف
وادورن حل لعلتي وياهه ...
تالي كلت انه احسن شي اسوي اسافر وارد لتركيه واخلصن
منهه عبن انه ماضمن روحي بعد جدامهه ان ماكضيتهه احجيلي
حجايه تضيع الاول والتالي ...
احسن شي اسافر وهناك التهي ويه الصحبه والشغل واذا كلش
كلش اشوفلي بنت مناك اتلهى وياهه وانساهه مايعصى  علي
نسيانهه وانه بعيد عنهه ...

كمت لبست وطلعت غسلت لكيتهم يحطون الغده ... كعدت تغديت
وطلعت رحت رتبت امور السفر بدون ماكولن لاحد ...
رديت للبيت تالي الليل كعدت بمجانهه وانطرهه تجي ..
وصدك وره نص ساعه اجتي هيه والحليب والكتاب ...
كربت ليه وكالت...
- انته شعندك تكعد بمكاني كل يوميه
- شني مسجل باسمج
- اي باسمي مكاني هاذ
- اكعدي هسه المجان جبير
- لاتشوش عليه اريد اقرا
- لاتخافين حعوفج بعد
- اي زين
- مايهمج وين اروحن
- راح تسافر مو
- شمدريج
- هو مابقى شي لرجعتك فتوقعت هيج
- تردين تخلصين مني
- ماعندي شي وياك ليش اخلص منك
- جا ترديني اضل
- لاا مادري
- هاا نسيت انه شخص عادي مايهمج اروحن اضل
- اي
- تدرين انه اهجس انج تجذبين هواي
- ليش
-  انه اعاين بيج خراب متلزك بجمال وضلت بنفسي اعرفن
شنهو اليآذيج
- ماكو شي ياذيني انته تفسر طبعي الهادىء لبعيد
- لااا لاا انه ماكولن حجايه ماواثك منهه .. وانه كتلج انتي تجذبين
هواي انطيج مثل .. هاذ حجيج البارد هوه غطا تغلفين بي خوفج
وتوترج وان جنت غلطان بحجيي كولي
- اي غلطان لان اني عندي كلشي بهالدنيا هو عادي فالحجي البارد هو رد فعلي تجاه كل الاشياء اني اشوفهه كلهه بارده
ماتحتاج مني اهتمام
- بس اني بنفس الوكت شغوفه بكل شي ترسمين وتكتبين وتدرسين وتنجحين بامتياز وشكلج مرتب مابيج شي يدل
عله هالبرود التشوفين الدنيه بي
- هاي كلهه اشياء نستخدمهه حته نستمر هسه هالليل من
تصفنله تشوف كلشي بي ويحوي كلشي بهالكون بس هو
بارد وهادىء تشوف الحياه بي هنا حقيقتهه تره هي صافيه
وعاديه والدليل انهه بعد كل نهار ترجع تصفى وكانهه تذب
حملهه واقنعتهه ترتاح وترجع تكمل البدته حتى تستمر
هي كلهه استمراريه مو اكثر
- اهااا جا شنهو اليكسر هالاستمراريه
- شغلتين لو الموت لو الحياه
- والحياه بيش
- من جديد انسان يحيى من جديد
- جربي تشوفين الدنيه من غير منظار يجوز تلكين اليكسر
هالاستمراريه
- لكل شي وكته كلمن عايش لهدف واني هدفي يلزمه بس وكت
ويتحقق ويكسر الاستمراريه
- ان شاء الله عن كريب تصليه
- ان شاء الله
-  اريدن اطلب منج شي تلبيني
- اذا كدرت تدلل
- اريدن انام بحجرتج هالليله
- ليش
- انه باجر من الصبح اودع اهلج واطلع لاهلي وعمامي اودعهم
وبالليل طيارتي واريدن انام براحه واخيج الله يسلمه يضل يدندن
فوك راسي وماكدر ارتاح بنومتي وانتي اعرفنج تسهرين للفجر
فخليج هنايه وانه اصعد انامن
- ماعندي مشكله روح نام اصلا اني منعسانه وراح اضل
اقرا بهالكتاب انته روح اخذ راحتك
- مشكوره
- خاف تزعجك ريحه الالوان افتح الشباك لان قبل شويه رسمت
- ماشي
- ماشي
- ربى
- ها
- ماراح تودعيني

صفنت بعيونهه وحسيت شي ينتفض بداخلي يريدن حضنهه
وهيه ضلت صافنه بعيني بكل برود نظرتهه وتالي كالت

- تروح وترجع بالسلامه ابن عمي انتبه على دراستك وفرحنه
بتخرجك
- ان شاء الله ،، انتبهي عله نفسج ياصخمه ولاتضلين تسهرين
وعدلي اكلج اريدن من ارد اشوفنج سمنانه ونكعد نتكاسم انه
وياج الثريد واللحم
- ان شاء الله
- تصبحين عله خير
- تصبح على خير

كمت وعفتهه وانه بالكوه اجرن نفسي منهه .. اريدن احطهه
بنص ضلوعي واخذ النفس من شعرهه الاحمراني وخدهه المنمش ... لجن ماذلن روحي ليهه عبن انه اعرفنهه تشلع الكلب
خلني بعيد احسن وماطبن مطبات تكسرني خلني فكره فكرتين
يخلصن مايضلن مجلبات بهالبال وانه هناك بعيد عنهه وانساهه

.
.
يتبع

طبعاً هاي كم صوره للي ماشايفين المتنبي وبلاخص
"مشمش الشام " لانهه راح يبقى تخيلهه للحدث ناقص
واني يهمني فكركم حبايبي ... وانتو كلكم معزتكم جبيره
عندي وحلات القصه وجودكم ...

استمتعو 😍