رواية من فجر ديسمبر الفصل الثاني والعشرون 22 - بقلم Zoka 🌷

من فجر ديسمبر
🍁
🍁
من ساعه الخذت شمسه سند الكاع وهيه
مافجت ايدهه من ايد الشيخ وتالي ردينه
للبيت وانه طلعت للولد كعدت شوي ورحت
عله جهه خابرتهه ماتردن ضليت ادك بالمره الرابع يلا ردت ...

- وينننج مو صارلي ساعه ادك
- مو تعرف كاعده يم البنات شلون اجاوبك
- اي طلعي عله جهه جا هسه شلون جاوبتي
- طلعت ويه زهره
- اريد اشوفج
- ليش
- شنوه ليش ربى
- شبيك شهاب شكو عصبي وتصيح شصاير
- استغفرررر الله اطلعيلي يم النبكه بساااع
- ماشي

طلعت بوجهي كبل لهناك ولكيتهه ويه زهره
كاعدات من وصلت وانه مدخن اعصاب
زهره كبل فهمت ومشت ...
وكفت جدامهه وافرك بوجهي وكتلهه ..
- عليش ماتسمعين الجلمه انتي
- شكو
- موش دزيتلج رساله وفهمتج كلساع هيه
- ياا صدك تحجي !!
- لااا هيج جايج متبطر بويه انه روووحي بزعت
- شهاب لهنا وكافي
- شني كاااافي
- كافي تصيح
- جااا من تحركين بيه واطريني طر موش
كافي لجن من تشوفيني اعصاب هنايه مايعجبنج الحجي
- شكو شسويتلك شبيك
- موش كلتلج بطلي تحاضنين وياه جدامي
والدور عينك عينك تبوسين بي وتكضين
ايده ماهديتيهه ماتكلين هاذ المنعول اهله يعاين وواكف بسدي مااتحسين انتي يمتى
تشيلين  هالثلجه من روحج مو شعلتي اهلي
- شهاب رجعنه !!! مو الموضوع انسد بعد شنو هالحجي
- لااااه انه كتلج ماتراجع بحجيي كتلج براحتج اعوفنج لجن من اشوفنج تصلين لغيري ذاك الوكت مااسكت موش هيج حجيييت هااااا
- اي بس هذا الشيخ مو اي احد هذا هو كل روحي لاتحاسب عليه ولاتجيب اسمه بالطاري لاي شي لان هنا تشوف غير ربى
اني ماارضى بهالاسلوب وياي تحب تغار
على عيني بس الزم حدك وياي اني مامنطيتك الحق لهذا التعامل وكت الي اصير بي ملكك
تعال حاسب واحجي وازعل هسه مايربطني بيك غير صله القرابه
- وليييييييييي من وجهههههههههي امشششي مناااااا امشششششييييييييي

صيحت بعلو صوتي بوجهه وهيه مشت وانه النار تاكل بروحي اكل ... هاي المرجيه منج
ياربى مابينه غير الكرابه وانه الكاتل روحي
عليييييش عليييييش عله وحده ماتحس!!
ماتكدر ! ماتشوفن نار الي بروحي تسعر !!
هيه هنايه اريدن احط كلبي بايدين وحده ماتعرف تطيب الخاطر !!!

ضليت احرك بروحي وبعدين مشيت رحت
لمحل براس الشارع اخذت من جكاير ورحت
كعدت جوه فَي وضليت ادخن وايدي ترجف
من الاعصاب .. شسوي مابيدي شي عليهه
لااكدر اغصبنهه عله محبتي وزواجي ولا اكدر اضربهه لا كلبي ينطيني ولا بيه حيل
الطلايب ... ولا اني الكادر اشيلنهه من بالي
واطفي نار كلبي من برودهه هاذ وصدهه
انه مكتوبلي اتلوع بهالحب !!!!!!

لليل همه سمعت بيهم مشو لبيتهم وانه لارحت
ولا كربت ليهم من هذيج الساعه واعتزلت
لوحدي بس ادخن وصافن بهالزرع ..

صرت اطلع من الصبح اشتغل ويه ولد عمنه
بالزرع اذبن كل حيلي حته ارد تعبان وانام
وماانطي روحي مجال افكرن بيهه ...

ويجي الليل وتهيج علي المواجع واضل اتكرضم عليهه بايدي التلفون واريدن بس
ادكن عليهه واسمع صوتهه باي جلمه منهه
تكدر تنسيني الي انه بي .. اريدن اشكي ليهه
وجعي منهه واكولن لااا موش حلوه ذبت روحي عليهه واصيرن ضعيف جدامهه
خليني اعيش بالوجع بروحي ولا اشوفن منهه صد ازيد من هاذ كافي تعبت منهه ...

جنت اكِعد بالحديقه احط كرسي وطبله
امدد رجلي عليهه وبايدي الجكاره وصافن
بالسمه واساعه اتذكر صوتهه وضحكهه
وساعه اذكر صياحهه وبرودهه وجرحي
منهه واحيرن بين حبهه وكرهه بس يتغلب
حبهه وياخذني لخيال وياهه بالمستكبل
واكولن هيج اشوفنهه بيتي واتلمس نمشهه
وحده وحده وانه ارتب كِذلتهه الحمره
واتذكر بروده اصابعهه من حطتهه عله
عيوني هذيج السنه لساعني احسن بيهه
جنهه كبل ساعه صارت ...

عشت هالشهر بالمكابر والتعب بالشغل
واسئله الوالد الماتخلص شبيك وعليش هالتدخين ومنهي هاي وامشي نخطبلك
واكضيهه مامش شي ومااريدن الزواج

ومره بالليل بنص شهر التاسع خابرتني
ربى وانه كاعد بالحديقه وافكر بيهه
وتفاجات بيهه مارديت بالاول رغم انه
اهجس نفسي سرع بكل دكه وردت دكت
مره الثانيه جاوبتهه ..

- الوو
- شلونك شهاب
- الحمدلله بخير انتي شلونج
- بخير خما نايم وكعدتك
- لا
- ها زين ردت اكلك شي
- اي كولي
- راح يصير التقديم مال الكليات واني بعدني انتظرك تجيبلي الدليل حتى اختار مو كلتلي
اشرحلج كل وحده شنو وتسويلي الانسيابيه
- هااا اي ان شاء الله هالايام
- شوكت يعني  راح ينسد التقديم
- هسه كتلج هالايام
- شبيك شهاب صاير وياك شي
- وشيهمج انتي شبيه !
- هاا شنو زعلان من هذاك اليوم
- ربى موش شغله زعل الشغله شغله تكدير
وهالشي موش عندج
- شهاب يعني انته تريدني اقبل بتحكمك هذا
واني مامرتبطه بيك افهمني
- كاااااافي حاط محمد عليج كااافي انتي ماتحسين بناري ربى لو احجي للصبح
سدي السالفه
- شهاب
- كتلج سديهه هاي انتي تريدين الدليل باجر
اجيبلج
- لا خلص ماريده عوفه
- شني انتي تضحكين علي
- داحسك تسوي جفيان شر فمااريد راح اكول
لبسام
- استغفرررك ربييي بويه انه بحال مايعلمه
بس ربج لاتلجمين بجرحي ربى
- يعني شبيك صايرتلك مشاكل ؟
- ربى
- ها
- باجر العصر يمكم ونكعد نتفاهم
- ماشي
- ماشي
- يلا تصبح على خير
- وانتي من اهله

سديته وانه العنهه الف مره جا شلون بيهه
ليمتى تضل رافعه هالخشم !!!!

ثاني يوم رحت العصر للمكتبه اخذت الدليل
ورحت لبيتهم .. جانت لحيتي عاليه صارلي
شهر هاملهه وشعري هيج مخربط يعني شكلي حيل فاول ومبين مال واحد زهكانه روحه ....

سلمت عله عمي ومرته وهمه يعتبون عليش
ماامرلهم وجانو الولد طالعين همه العصريه
مايلفون بالبيت وراهه طبت ربى وانه هجست
كلبي وكع بحضني من عاينتهه وانه الشوك كاتلني عليهه والتعب كاضي بيه هيج تمنيت
لو بس اكربهه لصدري واحطن راسي عله جتفهه وانسى التعب لجن انه بالحكيكه  مالي
شي عدهه غير الكرابه ...

سلمت وانطتني كلاص عصير مال بطيخ
اخذته وضليت اشرب واعاين للتلفزيون
واتحاشاهه ماريدنهه تشيخ علي وتضل تدوس
بكلبي وتكول هوه ميت علي ...

- شهاب هذا الدليل مو ؟
- اي هوه تعاي شوفي

اجتي كعدت بسدي واخذته تكلب بي وانه
صاد وجهي عنهه تالي عمي كال لازم يروحن يفتح المكتب وهوه طلع عمتي كامت
للمطبخ وضلينه لوحدنه ..
انه بداخلي متخربطه اوضاعي جيف انهه بسدي وانه ذابحني الشوك والمكابر لجن ضال صاد عنهه لحد ما هيه كالت ...

- هسه انته متحجيلي هذني شنو

بديت احجيلهه عله الكليات وشني اقسامهن
وجان اخذتلهه صفنه طويله وانه صفنت
عليهه بعد ماكدرت اكابر وياهه تهت بتفاصيلهه وريحتهه التسلب رويحتي
جان جفلتني بصوتهه العالي وكالت ..

- يعني هسه حاله هي هااااي شنو مااكو اي شي هناا ليش شنو عايشين بالمنكطعه !!!
- والله بعد هاذ عراقنه العزيز شنسويله
- هسه يعني لو بصره لو بغداد شنو هالحااال
ياربي
- انه حاير اكثر منج وصارلي هالشهر كله
انه افكر شلون وين ترحين هيه موش بالقسم
لجن بالمجان شلون بله هم تصيرين اقسام
داخليه ماارضاهه انه واهلج بعد مايرضون
- اووووف اوووووف يعني صارلي سنين
انتظر واحلم بهاليوم تاليهه هيج راح انشمر شمره !!
- تهدي تهدددي وفكري زين حته نكتب يلا
- هوه شفكر متكلي يعني وين اروح
- باعي البصره وبغداد اثنينهن نفس البعد
تقريباً عن هنايه هسه انتي كليلي شني الحطيتي بالج ياكليه
- الهندسه
- شننني عليش مو الطبيه !!
- ماحب اي شي بالطب ابد
- ربى لج بويه هاي موش ياهو الجاي يحصلهه الوادم تعيد سنتين وثلاث حته يحصلونهه وانتي تبطرين عليهه !!
- شهاب مو اتبطر بس اني ماحبهه
- شني بويه تصيرين دكتوره شني ماتحبين
- يعني هسه اله اكلك اخاف ماتحمل هيج
سوالف
- هههه صدددك
- اي صدك كافي عاد كلت هندسه وكافي
- ياقسم
- معماري لان اني احس راح يوالمني لان
مناسب ويه هوايتي بالرسم
- هااااا يعني انتي تردين تربطين بين الاثنين
- اي اني اريد ادرس بهوايتي اطور الرسم
بشي مفيد ولكيت هذا مناسب وماتراجع عنه
- هااي خوش قرار هالقسم هم خوش قسم
واسمه عالي بس خلي بالج تراه خمس سنين!!
- اي عادي
- زين وين تردين هسه بغداد لو البصره
- شهاب يعني شلون اداوم والله خايفه ومحتاره شيوديني شيجيبني ماريد اكعد بالقسم الداخلي
-  والله مادري شكلج .. بيج حيل تحملين الدرب كل يوميه من العماره لهناك روحه وجيه !!!
- اووف اووووف يعني يضيع كل يومي بالطريق كلشي مافتهم منه
- هسه خلي نقدم ونشوف وين يطلعلج
ونحلهه
- شهاب قسم داخلي مااكعد لو اعرف ابطل
- احجيلي من الاخير شني سالفتج بهاي
انه اعرفن موش شغله عناد بيهه انه
- يعني اني الي ترتيب حياتي الخاص ماحب
اكعد ويه كووومه بنات ويضلن متطفلات عليهه احب الخصوصيه هذا السبب
- هاااا بس انتي لازم تضحين بشي يعني شلون ياخط هاذ الياخذج ويجيبج كل يوميه
من محافظه لمحافظه اوزنيهه شويه
- ماااااا عفيه ماااكعد وياااهن مااكعد
- امشي صيحي امج خلي نشوفنله حل لهالسالفه حته نكتب هالغضب

راحت صاحت امهه واجتي كعدت ..
- يوم اني قررت الكليه الي اريدهه
- اي يالله شنو
- هندسه معماري
- شنوووووو ليش يمه لعد والطبيه
- ماحبهه اني اريد هاي
- ماكو هيج حجي شنو تنزلين لاقل من معدلج
هاي الصيدله طب الاسنان المن خلوهن لعد
- امي مااحبهن اني اريد هااي يعني اريدهه
- انتي متعرفين مصلحتج بعدين من تروحين
وتشوفين انتي ويه الاقل من معدلج تتندمين
من تشوفين هالطلاب يتمشون بروبهم الابيض تكومين تتحسرين عليهم .. حطي عقلج براسج واوزنيهه عدل
- اني ماحب هالسوالف يوم ماحب الطب
ماااحبه اني هوايتي غير شكل واريدهه بالهندسه هاي مناسبتني واريدهه
- كتلج مااااكوو يعني ماااكو لو طبيه لو مداومين
- شنو ماداوم شنووو انتي مووتريدين راحتي
وهاي اني داكلج هنا ارتاح بهالقسم امي ليش دائماً تجبريني
- من تحطين عقلج براسج وتفكرين زين
اعوفج براحتج بس تضلين هيج عناد وطيش
لا والله اكسره لراسج وماخليج تضيعين مستقبلج
- والله اني لو هالقسم لو مااداوم
- يمعودااااات تهدن بالرحمن تهدن شجاجن
هسه يجي عمي وهوه يحسم السالفه بس
حلن سالفه المكان فضنهه وراي شغل
- بغداد هي مبينه
- عمه بنتج ماتريد القسم الداخلي
- ليش يمه لعد وبيت خالهه وين راحو
تكعد يمهم
- لااا والله ماكعد بيتهم
- شننننوو انتي كلشي ولا لا وين اوديج يعني
- اي مكان بس ماكعد يمهم
- هااا شو قبل تكيفين بس ترحين يمهم هسه
صارو كخه
- يوم انتي تعرفين كلش زين ليش ولو ابطل
هم مااروح زييين
- انتي هاللسان الصلف اله اكصه الج يلا
ترتاحين اننننجبي ومثل ماكلت يصير وين
اوديج يعني اضل شايلتج على راسي وافتربيج هاي تريدين الكليه هاي لازم تتحملين تكعدين هناك
- خرب بهالكليه الهيج تذل

شمرت الاوراق وطلعت للحديقه انه كمت لحكتهه جانت تبجي وتفتر وبايدهه تلفونهه

- ربى تعاي طبي جوه هسه نلكه حل
- عوفني شهاب
- خايبه لايصيبج شي تهدي
- مابيه شي ،، الوو شيخي عفيه اريد اجي يمك حيل مخنوكه .. اي مااكدر ضايجه والله  ابويه طالع بس شهاب هنا .. ماشي ..

مدتلي التلفون وكامت تمسح بدموعهه وانه
اخذته حاجيت الشيخ ...
- ها شيخنه السلام عليكم
- عليكم السلام اسمعني بويه هالساع تجيبن
شمسه وتجيني ماريدن بسبسه كبل تاخذ تكسي وتجي
- شيخنه ماتستوجب هسه ابوهه عله جيه
ونحل السالفه
- ااااانه موش كلت هالساع تجيبنهه عليش ماتسمع الجلمه
- اخذهه هيج وابوهه مايعرف
- ماعليه شي تحررررك يلا بالعجل عايفهه تبجي جدامك وواكف مثل الحيط تتفرج من تخسى هالشوارب اي والله بسااع يلا
- ان شاء الله

سديته وعاينتلهه ..
- حجيب تكسي امشي حضري نفسج
- ماشي
- ربى بس ارمشلج تطلعين ماريد اضل مشتول بالباب ويه الولد
- اي كتلك ماشي

عفتهه وطبيت جوه اخذت تلفوني والمحفظه
جان اجتي عمتي ..
- اكولن عمه انه طالع اجيب تكسي الشيخ دز عله ربى يريدهه هالساع
- هااا راحت اشتكتله هوه شخبرهه غيره
- عممممه فجي من البت عليش تخربين فرحتهه هالشكل
- عشتتتو واني شسويتلهه هيه ماتعرف مصلحتهه وين
- استغفر الله انه طالع
- الله وياك

رحت للشارع العام وكفت تكسي واجيت للبيت رمشتلهه كبل طلعت وصعدت وره
ورحنه لبيت الشيخ وهيه حته بالسياره جانت
تبجي من نزلت عيونهه حمر والزراك البيهن صاير يضوي .. عفتهه ماحجيت شي ادري بيهه بحجايه وحده تنفجر ...

نزلنه جدام الفرع وتمشينه للبيت وكبل رحنه
للديوان هيه وكفت عله صفحه بين ماانه طبيت حته اشوفن منهو هنايه من الزلم
مالكيت حد والشيخ جان يسبح وكبل اشرلي اطب عاد صحتلهه وطبينه .. وهيه كبل
ذبت جنطتهه وراحت لحضن الشيخ الي جان
واكف ومنتظرهه ... جانت تبجي وهوه حاضنهه بكل هداوه تالي رفع راسهه ومسح
دموعهه وشلون يعاينلهه بحنيه ويعاملهه بهداوه واخذهه كعدهه يمه وانطاهه كلاص
ماي شربت وانه كاعد بعيد عنهم واعاينلهم
اريد اشوفن شنهو الي حيجرى ...

- شمالج يابويه منهو هاذ المنزل دموعج كولي يابعد ابوج
- شيخي اني صارلي ٣ سنين كاعده وانتظر
هاليوم الي اتخرج بي من السادس وارجع اداوم وتاليهه من يجي يخربون كلشي بي
- شنهوووو ياهو الخربه عليج
- يعني اول شي هنا ماكو كليات لو اروح بغداد لو بصره وامي تكولي تروحين بيت خالج
- شننننني منهو هاذ المنطيهه الحك تحجي
هاااا خاليش هاذ التعيشين يمه !!!
- اكللهه ماريد اروح يمهم تضل ترزلني وتكولي لو هناك لو تبطلين ومتريد الا طبيه
شيخي و انته تعرف اني مااريدهه
- اعرفن بويه اعرررفن استغفر الله هسه شني الي بالج وتردينه
- اريد هندسه معماري
- هااا والله انه تلوكلج ياشمسه تدللي يجرالج التردي ومايكون خاطرج الا طيب بعد امري
- تسلم شيخي اريدك سالم
- وسالفه الدوام والمجان انه ارتبهه لج
- يعني شلون عفيه مو تحطوني بقسم داخلي والله ماتحمل هيج
- لااااا يابويه شني اكعدج ويه هالمدري شني طينتهن
- لعد شنو شسوي فهمني شيخي ارجوووك
والله طلعت هالكليه من عيني
- شهاااب
- امر ياشيخ
- دكِلي عله هاذ بسام وابوه كلهم الشيخ طالبكَم
هالساع يلاا بالعجل
- ان شاء الله
- شمسه ابوج ايعرف بالجرى
- لاا
- ولا يعرف بكليتج الترديهه
- اي لان هو قبل ساعه تقريباً اجه شهاب وجابلي الدليل مال الكليات وحجالي عليهن
واني اختاريت هسه
- اي زين زين هوه يمتى ينسد التغديم
- كالو للاحد الجاي
- اي زين

خابرت عليهم وكالو فد ساعه ويجون وانه
طلعت وعفتهم براحتهم عبن انه اعرفنه موش
مرتاح بكعدتي يمهم لين هوه مايكدر يعاملهه
جدامي مثل ماهمه لوحيدهم .. صح انه مشيت
منهم عله اعصابي لجن اعرفنهه محتاجته
وتحملت لاجل عينهه ...

من اجوي عمي وبسام طبيت جوه وياهم
- ها شيخنه خير ان شاء الله شنهي الصاير
- ابوو بسام انته ابوهه وتعزهه واعرفن ليك
جلمه عليهه وواجب تطيعك لجن انه ابوهه
بعد ان مااجت من دمي ولحمي فانه مربيهه
بماي عيني وهالوادم والعشاير كلهه تعرف
غلات شمسه عندي وانه كبل نبهت عليكم
وكلت شمسه التريده والتختاره يتنفذ وماينكالهه غير تامري موش صار هالحجي
لو لاله
- اي بالله صار
- جا من انه صار وتعرفونه عليش هاليوم اشوفن دموعهه تطيح ونفسهه ضايكه هاا
- والله انه طلعت مابيهه شي وهيه شني الطلبته مني وانه رديتهه بيمن كصرت وياج بويه ربى كولي
- لا يابه حشاك مامنك تقصير
- مرتك ياخويه هيه العايله وياهه شني تريدنهه تكعد ببيت اخوهه شني بويه انته
ترضاهه تكعد سنين ببيتهم !!
- يمتى صار هالحجي
- من كبل ساعه
- اي شنهي الصار كولي ربى شنهي السالفه
- يابه مو اني قررت الكليه الي اريدهه
- اي ساعه المباركه ياهي بويه
- هندسه معماري وامي ماتقبل وحجت عليه
تكلي لو طبيه لو مداومين
- بويه وشبيهه الطبيه موش شغلهه زين وراتب واسم وشمحلاتهه من اسمعن يصيحولج الدكتوره
- اني مااحبهه نفسي ماترغبهه افهمني ارجوك
- بويه جا هيه امج من حجت ماتكرهنج تريدن مصلحتج وهيه تشوفن معدلج عالي
وتريدلج الزين والطبيه موش ياهو الجاي
ويحصلنهه وانتي صبرتي وتعبتي غير تاخذيلج الشي الزين
- ادري بيهه تخاف عليه بس اني هنا راحتي
اذا رحت بالطب ماانجح ادري بنفسي وماكدرلهه اني اريد هالقسم موالمني وماريد غيره رجاءاً
- سمعت ابو بسام البت هاي رغبتهه تريدن
الهندسه البت ماتكدر عله الطبيه وهوه موش كل نفس تكدر تحمل وهيه نفسهه ماتطيكنه
خلهه براحتهه
- هاي براحتهه يجرالج التردينه بويه ولا يهمج منزله دمعاتج عله هالسويلفه المتسوه ؟؟
- اني ضجت لانهه بس تجبرني وتكلي مداومين لو بيت خالج وطب لو ماكو
- زين هسه هاي فهمناهه هسه شني يا جامعه
- عمي هنه ماكو غير لو البصره لو بغداد
وبنتك ماتريد القسم الداخلي هم ولا تريد بيت الخال
- اسمعوني زين
- اي شيخ
- انه هالساع فكرت ليهه بحل وهالحل يرضي
كل الاطراف انه اهم شي عندي راحه شمسه
وسعادتهه وانه اعرفن بغداد انسب ليهه و هالساع انه دزيت عليكم لاجل اكللكم هالحجوتين ،، من الاسبوع الجاي ينزل شهاب وبسام لبغداد يدورون عله مشتمل
مرتب يأجرونه ليهه ولا منه هاذ ولا ذاك

- شلووووون تكعد بيت وحدهه !!
- عليش وحدهه جا اخيهه العود المن دازينه هناك موش انته تدرس هناكَ ترحون سوه
وتردون سوه تعوف صحبانك وتجابلهه وتكعد بالبيت
- شيخ انه عندي شغلي عندي صحباني شلون اضل مجابلهه وكاعد
- لااا يالمصكوع لك هاي اخيتك روحك ترخص ليهه تجي تكلي صحباني والله وقسم بالله ان زليت عن جلمتي هاي لاسحلن بيك
شوارع بغداد كِلهه ومايرفلي جفن عليك
فهمممممت
- صار شيخ صاار
- وممنوع اي ولد من صحبتك يطبون البيت
لا بصبح ولا بليل يردونك تطلع ليهم لجن
مايطب احد منهم عتبه الباب واختك تحامي
حته خيالهه وماتطلع الا ورجلك عله رجلهه
موش تعوفهه بالبيت وتمشي ويه هالرفجه
- شيخ شلون لا اطببهم لا اطلع وياهم شلون
هااااي
- اي يجوك وتكعد وياهم بالباب تريد تطلع
وياهم وكت الي تجي هنايه يمنه بعطلتهه
روح اشبع طلعات زززززين
-  زين شيخ هاي مثل ماتامر يصير
- شتكول ياابو بسام هالحل مناسب لاله
- لااا والله مضبوط هيج بنيتي تاخذ راحتهه
وبحمايه اخيهه وكلبنه مطمن عليهه .. هااا
بويه ربى بعدج ضايك خلكج
- هههه لااا راحت بعد اطمئنيت من حجيكم
شكراً شيخي على كل شي شكراً
- تدللين بويه انتي التردينه يجرالج لا تضنين
بيوم يجي احد يجبرج انتي شيخه وكلمتج
ماتثنى بس تلبى
- الله يخليك النه
- شهاب كوم جيب هالورقه واكعد سويلهه
الانسيابيه يلا عليش صافن
- اي ان شاء الله

انه جنت صافن بكثر هالدلال جا انه عبرت حدود وعشت الغربه خمس سنين ومايوم
شفت هيج دلال وخوف منهم علي جا شني
هالربى جايه وبحلكهه خاشوكه ذهب !!!

جبت الورقه وكعدت يمهه وضلينه نكتب
بالكليات والمعاهد رتبناهن وانه كلتلهه
اخذهن للمكتبه حته اكتبهن بالورقه المطبوعه هذيج لين هاي مسوده جانت ....

وره شويه كام عمي حته يرجعون لبيتهم
وهمه سلمو وطلعو وضلت هيه جوه يم
الشيخ وشويه وطلعت رحنه كلنه للولايه
انه نزلت للمكتبه وهمه مشو للبيت ...

وكملت اجراءات تسجيلهه وطلع هالقبول
بجامعه بغداد ونفس القسم الرادته عبن معدلهه
اعله من معدلهم فكبل انقبلت بيهه ...

وانه وبسام كضيانهه تفرفر بالعقارات لحد
مالكينه واحد كريب الكليه وجانت فلوس الايجار من  الشيخ اتفكو هو وابوهه اول
دفعه  عليه هديه ليهه والباكي من غراض البيت عله ابوهه

وضلينه كل يوم رايحين رادين نرتب بي
ونظف ونجيب غراض وهيه رادت غرفتهه
كلهه تنكل هناك وحولناهه هناك واجتي هيه
وامهه نظفن وفرشن البيت وراحن يجهزن
للدوام من هدوم وغيره واحنه مسواك البيت
جنه جايبينه من الزرع كلشي محملين اشكال

العجيب ان هيه وامهه يوم يتكافشن ثاني يوم دهن ودبس يعني من يوم الي لكينه بي البيت
امهه كيفت وضلت تشتري بهالفراش وتجيب وتودي واخذتهه لاحسن سوك واخذتلهه هدوم
الدوام واجتي محمله ميه علاكه وضحكتهه
شاكه وجهه ولا جنهه هذيج الجانت داكه رجل ماداوم !!!!

وضلينه بايتين هالليله يمهم انه وبسام بحجرته
جوه وهيه وامهه فوك وعمي رجع يم حيدر
جان ثاني يوم بدايه الدوام ..

ومن الصبح كعدنه تريكنا وهيه تكشخت
بتنوره سوده وقميص ابيض وشالهه الوردي
المورد خدودهه وامهه هم متكشخه وبسام
جنه رايح عرس موش دوام حاير شيسوي
للبنيات .. وطلعنه انه وصلت ربى وامهه
وبسام راح وحده عبن هو بالمستنصريه
موش بغداد ...

وضليت انتظر امهه لحد مارجعت وطلعنه
سويه للبيت وضليت انه اليوم كِله احسب الساعات لطلعتهه واول ماخابرتني كبل
اخذت السياره ورحت ليهه .. جنت اهجس
هاذ اول يوم بالمدرسه لبنتي وهيج خايف عليهه ...

طبكت السياره  بالكراج ورحت ليهه عاينهه
واكفه وحيدهه وتعاين للمجان من شافتني
اجتيي ليه ...
- هااا يابنت العم شلونه الدوام
- اممم يعني نوعاً ما زين
- اي زين
- شهاب عطشانه كلش
- شني ماشربتيلج شي !!
- لاا ماتحركت لاي مكان
- هههههههههه يابويه عليش المستحى موش
كِل هالطلاب مثلج وهمه المن حاطين هالمحلات غير ليكم
- اي مادري هسه شنو تجيبلي مي لو لا
- اجيبلج عمي اجيبلج

مشينه لمحل وطبيت اخذتلهه ماي وعصير
وطلعنه وهيه خلصت البطل جره وحده
وانه بس اضحك عليهه عبنهه خوافه طلعت

وردينه للبيت وشويه وطب بسام وضلت تحجيلنه عله يومهه الاول وتغدينا وللعصر
صار لازم نرجع انه وامهه ..

وامهه تطلع للباب وترد ترجع وتوصي بيهه
وانه بس صافن عليهه هاي شراح يصبرني
بهالبعاد !!!

ومرت الايام وهيه بعيده وانه اهجس مامش
شي بالعماره كله يعنيلي غيرهه اهجسنهه
فارغه ولو هيه بيهه ماتاثر بشي لجن بس
رويحتهه كريبه مني هاذ يكفيني ....

جنت اشتاااك لصوتهه لجن اكابر وهيه ماتخابر ابد وانه ضال بين الشوك والمكابر
فد شعور يكره البني ادم بروحه ..

صارت راس السنه واجوي همه من صباح
اخر يوم بهالسنه .. جان بودي اروحن اشوفنهه لجن المكابر مربطني عنهه ..

ومكضيهه جكاير وتصفن يم نعيم وهوه يضحك ويداهر علي وانه طفت كل ضحكه بيه .. جان يجيني تلفون من بسام ..

- هلااا بابن عمي العود
- هلا بيك خويه شلونك
- انه بخير انته وينك ماتكِلي نشدت عليك هالسلف كِله وانته مامش اثر ليك
- ليش انته هنايه عدنه بالسلف
- اييي صارلنه جم ساعه من جينه ببيت
الشيخ تلكانه يلاا تعال عاد مصختهه
- يلا جاي جاي

سديت الخط وطفيت الجكاره ووكفت عدلت
شعري وركض ركض طلعت واسمع ضحكه
نعيم وصلت لراس الشارع لجن انه مستعجل
بس اريدن اصل واشوفنهه ..

سويت الدرب شبختين وطبيت للديوان
جان عمومتي كلهم كاعدين وولدهم والشيخ
- السلااام عليكم
— وعليكمممم السلااام
- وشلونكم شلون الصحه
- الحمدلله الحمدلله
- اكولن شهاب
- كول يا شيخ
- تالي الليل اريدنك بحجايتين موش تنز مدري وين
- لاا هنايه ماروح صار شيخ تآمر

كعدت احاجي بسام وعمامي منا لما صار
العشه تعشينه وطلعنه نتعلل من شفت الساعه
صارت تسعه ترخصت من الولد ورحت للشيخ ...

ومن طبيت الديوان عاينت ربى كاعده عنده
صفنت شويه اهدي بيهه رويحتي الملهوفه
عليهه وكلتلهه باسلوب جاف ..
- السلام عليكم
- عليكم السلام
- شلونج بنت عمي
- الحمدلله انته شلونك
- بخير نحمد الله
- شمسه بويه روحي للبنيات شويه
- اي ماشي من رخصتكم
- مرخوصه بويه

طلعت وانه اعاينلهه شلون حليانه ووجهه باين عليه الفرح موش مثل حالي كاضي

- ايي ياشهاب
- اي شيخ
- علمني شنهي سالفتك
- ياسالفه
- ابوك يشكي منك
-هاا عليش !!
- شوف حالك بويه العيون مصوفره وتجر
ذيالك بالكوه شنهي صايرلك وين شهاب الاولي ابو ضحكه الرنانه هذاك المزيون
الكشاخ الي مايعرف الكعده شلونهه اشوفنك
دومك تفتر انته وجكارتك بهالحشيش شني
الجاريلك علمنه وانه عمك مااهدنك هالشكل

- مشكور شيخ لجن البيه موش بيد حد بيد
الله وحده وهوه يجي وكته

- شمالك غير اعرفن شني طابلك بمشروع
وخسرانه .. مديون ! فاكدلك ولف صحيب
متعارك ويه جماعه متورطلك بشي احجي
حته الكدرنه عليه نساعدك بي وتره كوم التعاونت ما ذلت وانه عمك المشاور يجيب الحل ..والماكدرناله نفج عنك موش يريحك
هَيج ...

- اي والله لجن انه مامش عندي مشاكل ويه
حد انه مشكلتي بروحي

- اظن السالفه بيهه ولف
- ايييي
- هههه عرفتنهه من جرت نفسك بالجكاره
هاي الحريجه ماتجيبنهه بس البنيات

- ههه مايعرفنهه بس المجربهه هاا

- ههههه خلك مني هالساع كِلي شنهي الجره بينكم وهالشكل كضيت

- اااخ ياشيخ المشكله ان مامش شي بينه
السالفه كِلهه حب من طرف واحد ماتحس
بيه ولا راح تحس لا اليوم ولا بعد ميه عام
وانه كلشي عليهه يكتلني من شوك وغيره
وعتب والمكاااابر ااااه يالمكابر ماعلني غيره

- هاااي مصيبه موش مشكله انه اليوم احمد الله واشكره عبن نبهني عليك وله جان ضل يعلك ويكضي حته بحشاك هالمضموم هاذ

- شيخ انه موش بيدي وحك هو الحسين
موش بيدي تمرضت بيهه انه اعرفن رويحتي انسمت بيهه ماتطيب

- الاا بيهه يلا تطيب اعرفن هالشي .. زين جم صارلك تحبهه

- سنتين

- هاا وهيه اتعرف !

- اي وماترضى ماترضى حته تصدك اني احبنهه وتحركني بالزايد بصدهه

- اتريد انمشي عليهه حته تصدك انك موش تلعب عليهه جايز البت ماعدهه سوالف التمعشك وتحب الي يجيهه من الباب

- لااا شيخ موش سالفه انهه تريد اله اخطب
شني شتعرفني انه اضحك عله البنات !!
لجن انه موش الي بالهه وهنايه عله السالفه
- اهااااا بالهه موش صافي عدهه ولف
- هيج شي اي
- والله ماعرفن شكول انه بسوالف الحب
مااحكم بشي عبن الگلب ماعليه حاكم
يبطنش بكيفه
- مااعرف ياشيخ انه وشلون بيه بهالسالفه
ماعرف ابعد عنهه واعوفنهه بكيفهه لو اضل  احاول وياهه لجن انه يعز علي صدهه ليه
كل نوبه كرامتي ماتخليني حته اسلم عليهه
من وره صدهه
- اسمعني ياشهاب اليكِلك مامش كبرياء بالحب كِله انته كلشي ماتفتهم عبن الحب
يعز نفسك عند محبوبك ..شني اذل روحي
ويه الاحبنه والله شني انه احبه !!
اي حب وضحي وافدي بدمك وسامحه ودلل
محبوبك لجن من يدوسلك عله طرف ويعلي نفسه عليك ويكلل من شانك ذاك الوكت حب
نفسك اولى منه وان جان صعب ويمرد الروح
لجن هاذ الاحسن وخلهه بالك اذا انته ما كدرت نفسك وعليت شانهه شلون تريدن الغير يعليهه !!!؟؟؟؟

- والنعم من ماكلت ياشيخ وانه هاذ المسويه
احرك بروحي لجن مااذلن روحي ليهه عبن
اعرف هالكلته

- اي لجن شغله الثانيه افهمهه انه ماريدنك
تضل تتكبر عليهه وتصد عنهه بالازيد وتاليهه تضيع منك لااا خليك اكسر واجبر
ساعه التمس كرامتك خذ موكف گوي وساعه التراضون دللـهه حسسهه بالدافنه بصدرك هاذ عاتب بهداوه تعلم الهداوهه بالحب مايجي
كلشي كبل لازم تفهم سالفه وتحطهه نصب عينك ...
يوم الي انك حبيتهه جان موش بيدك موش صح
- اي صح
- ونفس الشي حبهه هم مايجي بايدهه من تريدن منهه تحبك وتحس بيك هيه مامسؤوله بيك ومجبوره ترضيك وكبل تنفذ التريده
ولا هيه دكمه وادوسهه وكبل تحبك وتصير عله مايك لازم تهدا وتصبر عليهه يوم ضحكه يوم سالفه يوم نصيحه ويوم تسندهه هيج تحبك  من المواكف موش من الجبر

- يسلم افمك عله هالحجايه ياشيخ والله انك شرحت صدري بيهه هالساع صارلي امل
بحبهه وصدك مثل ماكلت مايجي حبهه
وكت الاريده لين انه حبيت لازم تبادل
هم لا بد يجي يوم ويتحرك شعورهه

- ههههه يجي ان شاء الله يجي بس انته تصرف عدل واحسب لكل خطوه وياهه

- بحيل الله .. اكولن شيخ جنك من نصايحك هاي مجرب الحب موش صحيح

- هههههههه انه لليوم عايش بي شتحجي انته

- عليك العباس احجيلي شلون بروح الاعزاز

- ههه انه ححجيلك لاجل تستفاد منه

- ان شاء الله

- هاي يكلك فرد يوم من سنه ٨٢ جنت متخرج كبل شهر وطالعين نصيف بالموصل
هناك ويه جماعه من ربعنه رحنه لبساتينهم
ومن هناك نطلع نفرفر بهالمدينه وليش ما عمك مكتوبه عليه وكعته هناك ويروحلك
السوك وهناك اكو كهوه ببدايته وطبينه انه
وثلاث زلام وياي وكاعدين نطك بهالزار
ونشرب الجايات وانه صايره كعدتي جدام
الشباج واشوفنلك ابو المخضر يتحارش
بالبنيات جانن حديثات وكل وحده حسنهه
يتسبح عله خلكه واكومنلك ركض عليه
وجريته من ياخته ودك بوكسيات بوجهه
فقد الزلمه جوه ايدي وانه ماهجست الا
جماعتي يجروني منه وبعز هالصياح والدم
والعالم الملتمه عيني طاحت بعينهه وهيه تلمع بالدموع انه من ساعتهه جني تبنجت انشدهت
ماعرفت وين انه رايح منين راد .. المهم
حجيت للوادم شنهو شفته يسوي لجن ماكلت
يابنات وهنه مشن اختفن وردو الوادم نزلو عليه بالحجي وطروده من السوك كِله ..
زين انه ضلت بالي هالبت يومين مااندل دربي من وره عيونهه عاد رحت للسوك
كلت بلكن الاكيهه وصدك اشوفنهه ويه مره
جبيره والحكهم واندل بيتهم وثاني يوم اروحن
واسال عنهم وجبت اصلهم وفصلهم . .. كلت
اريدن اسالهه اجس نبضهه بيه شلونه اذا بيهه
مجال اتوكل واجيب عمامي عبن انه تسودنت عليهه .. وهاذ الحجي كل ماجماعتي يرودن يردون لبيتهم اكللهم لا خلينه جم يوم لحد ما
كدرت احاجيهه عله كد حجايتين ..
كلتلهه ... يالريم انه طيحني عيونج ورايد اجي امشي عليج ترضين تصيريلي مره
وانه ابن شيوخ عمارجي اراعي الله باهل بيتي ..
كالتلي .. توكل وبيت اهلنه مفتوح الك

ودعتهه ومشيت كبل للعماره وكعدت هاليوم ببيتنه وثاني يوم كعدت حاجيت ابوي الله يرحمه وكتله اريدن اخطب بنت مصلاويه
وهوه تسودن ماخله حجايه بحلجه ماحجاهه علي شني انه شروكي ووراي المشيخه واجيبنلي مصلاويه مسيحيه تصيرن ام البيت
حجيت ردت مامش فايده جبت عمامي وحجيتلهم وكلهم عله حجايه الوحده مايطب
بينه غريب والدور مصلاوي مسيحي حته موش من دينه احنه ولدنه يطلعون من دم مسيحي تسودنو كالو احنه شيوخ شروك من اصل شروك مايتغير نسلنه ...
واطيحلك هذيج الطيحه الي حارو بي بكل طبيب وامي الله يرحمهه جابلت ابو فاضل وكعدت لاخلت نذر لا دعاء لا شي وبس تريدني اكومن عله حيلي وانه الماي مايطب بطني هيج عله غفله طحت من كد مااحركن بروحي نياط كلبي تكطعت

- وتالي شصار

- تالي خوالي حاجو عمامي حته يرحون يشوفون البت جايز يطلعون موش مسيح
وانه اعرفنهم مسيح عبن انه ماخليت شي
عن اهلهم ماعرفته لجن كلت عسى والله
يفرجهه وكمت عله حيلي لاجل عينهه
عبن انه وعدتهه اجي واخطبهه وتاخرت بالوعد ورحنه ليهم وهناك ابوهه عاند وراسه لو يكسرون حجر الجير مايكسرونه اهلي الجانو مايرضون بيهم كامو يتوسلون بي
لاخلو ذهب لافلوس حته كالوله بيت وكاع باسمهه يتسجل فوك مهرها ومارضى يكول
انه ماازوج للشروك بنتي ماتحمل عيشتكم
وردينه خايبين وانه بساعتهه اهجس النفس
ماينزل بصدري ينزل دخان ويخنكني ورديت
بعد ست شهور هم رحت عله ابوهه لوحدي
حاجيته بالمحل ماله وكتله شتريد عله مد عينك حته لو اعيشهه هنا بالموصل هم راضي بس لا تزوجهه لغيري عبن انه سمعت يريد ينطيهه لابن خالهه هم جان ضابط ورايدهه وانه تصركعت يوم السمعت
هالخبر ورحتله ومافاد الحجي يكِلي ذنبك
انته موش من ملتنه لادينه مثل دينكم ولا عيشتنه مثلكم ورديت للعماره وحجي اهلي
وابوي يزن براسي تزوج وتزوج وانه الحريج بروحي عليهه عبن ادري بيهه تزوجه
لجن ماايست ورحتله وره شهر للبيت واخذت
وياي القس مالهم من الكنيسه حجيتله سالفتي
وكال هاذ حرام عند ربنا نفرك بين الاديان
واخذته ليه ويحجي وياه ويتوسل عاد كام وكال البت باجر خطوبتهه وسدو السالفه
وانه سمعته هيج انهاريت صرت نار كبرى
عاد صحت بوجهه وكتله ...
وحك دين محمد الفركتني بي عن روحي
اله اخاصمنك بيوم الدين جدام الله وعيسى ومحمد وكل جلمه منك حجيتهه بدينه وفركت بينه مسجله عند ربك وربي ولا محالل ولا موهوب عله هالزواجه وبنتك ترجعلي اذا موش هاليوم بعد جدامنه عمر واكسرنهه لحجايتك هاي وعيش وشوف شيسوي الشروكي

وهديته وطلعت وبوكته ضليت كاعد بالكنيسه الليل كِله وجان الصبح دز عليه القس ولكيت
البت يمه عافنه لوحيدنه وجانت هاي اول مره
اشوفنهه من هذاك حجينه كالتلي بما معناه عبنهه تحجي مصلاوي لجن اعرفنك ماتفهمهه ... كالت ...

كريم انته اشجع رجل شافته عيني من كل شي حميتني وردتني واني من يوم الدافعت عني
ملكت بي كلبي بس اهلي ماكدر عليهم واني
اتشرف بدينك واتمنيت لو اصير مرت الشيخ العمارجي وازرع بين كلوب اهل الجنوب والشمال المحبه بس ربنا كاتبلنه غير طريق
وابويه حدد هالجمعه خطبتي ووره شهر العرس واني اجيت اودعك واكلك راح يضل
اسمك محفور بكلبي وشهامتك تضل عيني تذكرهه ولو بالشرع صرت ملك ثاني بس
بشرع كلبي هو ملك كريم

جان يحجيهه وصافن عله الباب وعينه الدمعه بيهه تلمع ..سكت شويه ورد كال ..

ودعتهه وانه مطمن عبن انه ماكصرت بشي جبتله اهل دين عيسى ومحمد ومارضى
وعرضت علي كل الفلوس والذهب والاراضي  وماوكف بعينه شي فكلت
مادام ربي ملكني كلبهه يجي يوم ويملكني
كلهه وضليت عايش عله امل حته بعد زواجهه وصار عدهه ولد وبنيه وردت البنيه
توفت انتلت بالكهرباء وبسنه ال ٩٦ ابوهه توفى ورد وراه بسنه ٩٩ زوجهه توفى هاي انه جنت اسمع اخبارهه من ذاك صاحبي الرحنالهم .. عاد بسنه ٢٠٠٠ رحتلهم وشفتهه من بعيد وماكدرت اكربلهه عبنهه جانت لابسه الاسود بعدهه كلت يمتى ماتفج حزنهه
يلا احاجيهه ورديت لاهلنه وسمعت وره سنتين نزعت الاسود عاد رحتلهه وهيه تشتغل مدرسه بمدرسه اعدادي مال بنات
وهناك جنت انتظرهه باب المدرسه انه وعكالي وشيبتي وانتظر باب المدارس هههه
ومن شفتهه وشافتني اثنينه صفنه وعاد تجرات ومشيت ليهه هيه كبل دمعت عينهه
وكالتلي كبل بلايه ماتسلم وتكول شي ..
كالتلي اجيت بوكتك محتاجه شهامتك مره ثانيه عاد اخذتهه ومشينه لمكان بعيد كعدنه
وحجينه وعرفت شلون تعاني بعيشتهه اهل
زوجهه ماذيهه وابنهه يتكبر عليهه ومايحترمهه وامهه مره جبيره وتعبانه بمداراتهه وفكد بنتهه ماثر عليهه وماخذ كل فرحهه كتلهه .. انه اجيتج من يوم السمعت بوفاه رجلج لجن من شفتج لابسه الاسود حرمت علي كربج وانتظرت سنتين فوك هذنيج حته احللج علي بالحجي وهالساع اريدنج حلالي بعد مايوكفني عنج شي
تدري شجاوبتني ..

- شجاوبت !!

- كالتلي ماردن ليك مكسوره وابوي ولو بكبره لجنه يصير مذلول حجايتك هذيج
وخلتني اشيل روحي واطكهه بالكاع فوك
كل هالصبر والوفا وتفكرلي بابوهه وهذيج
الحجايه  ردت عالجت وياهه مامش فايده
قفلت هالقفله ولحد هاذ يومهه ماترضى تكلي
ما اجيلك مكسوره جدام اهلك واهلي

- الله عله حبك وصبرك ياشيخ انه لو بدالك
اموتن بكاعي

- انه عشت عله امل تجيني بيوم عبن انه عيني بعين الله هوه صبرني عله فركاهه
وربك مايكطع دزلي شمسه تعوضني عنهه

- شلون يعني ؟؟

- ههههه البت الحبيتهه اسمهه شمس وهيه
صدك شمس الكصيبه خيوط من الشمس مجمعه جنهه .. والعين زركه والبياض مثل بياض شمسه انه من ساعه الشفت شمسه تكبر
جدام عيني واشوفن بيهه الحبيبه فخليت كل
حبي بيهه دلالهه ومعزتهه كلهه من معزه هذيج الريم بيهه انه اتصبر عله البعد واكولن
هاي حك حبهه انه انطيه ليهه بواسطه شمسه

- هاااا واخيراً عرفت شنهو سر الحب العجيب هاذ والله ياشيخ حبك هاذ مثل
حب قيس وليلى واضربين منه بعد

- تشوفوه عجيب وانه اشوفنه كليل جدامهه
عبن انه جان لازم احميهه وماخلي هالدهر هيج يعمل بيهه لجني طعتهه وخليتهه بروحهه

- مابيدك شي انته كدمتلهه كل الكدرت عليه
ولو هوه الميت ماتجوزله غير الرحمه لجن
ابوهه هوه السبب

- لليوم انه بعدني عله جلمتي  اخاصمنه بيوم الدين بس ربي ياذنلي عبن انه ضكت
اصل المر من وره عكله المتحجر وهيه ضاكت الذله والعوز والخوف وكل الحزن
متربع بصدرهه من وره حجايته هذيج

- ان شاء الله ربي يهديهه عليك وتحصلون
ثمره صبركم

- الله كريم الله كريم .. هالحجي ياشهاب ان عرفه خيالك اكصن راسك وحك علي اكصنه

- لاا ونوره لمحمد ماافشي سرك شيخ ماعلي
هالشارب ان نطكت بيهه جدام اهلنه

- انه حجيتلك لاجل تفهم ان الحب موش كلمه التنكال ولا ان حصلت حبهه راح ترتاح وتخلص وراك دنيا ودهر ديربالك منهم وكوي كلبك صونهه من نفسك كبل كلشي
تره هنايه غلطه الشاطر بالف لاتنسى هالشي

- والله ياشيخ ماعرف شلون اشكرك عله هالحجي هاذ ريحت بي كلبي ووعيتني عله
جثير شغلات وزرعت الامل بيه الله يجازيك
بهدايتهه عليك لاجل عونك الي

- ويجازي الكِل ان شاء الله بالحسنى والخير والبركه

- ان شاء الله

- يلا امشي لاهلك نام وريح بالك واريدن من باجر اشوفنك غير شكل زين

- ان شاء الله شيخ ان شاء الله .. يلاا تصبح عله خير

- وانته من اهله

.
.
.
يتبع ... التكمله بالليل تعويضكم مال هالايام
اعذروني وتدللون بكل شي 💜💜