رواية من فجر ديسمبر الفصل الحادي والعشرون 21 - بقلم Zoka 🌷

من فجر ديسمبر
🍁
🍁
- شو عاينيلي
- عوفني شهاب
- شنهو اعوفج شبيج
- كتلك عوفني
- ربببببى الصاحب للصاحب
- مابيه شي بس اريد ارتاح وحدي شويه
- انه اعرفن البيج محبوس بهالصدر احجيلي
انه عندج افهمج واسمعج
- شنو الاحجي الك ها .. يعني اكلك ترا اني
ضايجه من امي بس تريد تزوجني لهذا الي
مايعرف الله ودينه !! قابل انته متعرف هالشي يعني
- اعرفنه لجن ماريدن يضل شي مضايكج
- هاي عادي متعوده ماصار شي
- جذابه انه اعرفن النار الي تسعر بيج بس
انتي تضلين تكابرين وتحبسين بداخلج
- اي وشكو بيهه
- تاذين نفسج هالشكل
- ميخالف
- عليش تكرهينه لهاذ المصكوع اخافن مسويلج شي من زمان لو سامعه شي
- لااا اكرهه لانه قبل جنت اشوفه يرجع
بنص الليل سكران ويكعد هو وجماعته
ويحجون حجي محلو وصوتهم شعلوه
ومن امه تحاجي ليش يشرب لو يكللهه اتونس ويه جماعتي لو يكللهه جنت مقهور
لو عصبي وماعرفت وين اروح يعني الله عليك هو هذا سبب تخلي الواحد يروح للمعصيه برجله والله شنو جنت ضايج !!
صح هو اخلاق وشهاده واهله طيبين ويريدني بصدق بس مستحيل اني ارضى بواحد هيج
دروبه لو يعبدني هم ماارضى بي

انه هنايه كمت ما اعرفن شكول هاي اذا
عرفت سوالفي هم هيج تقفل علي !!!
يعني بس تدري اخسرهه .. يحظي هسه
حته بهاي اعوج !!!!!

- شو سكتت شبيك
- لا هيج اريدنج تكملين حجيج
- هسه كولي يعني هذا مو سبب يكفي حتى
ارفضه
- اي حكج
- لعد ليش امي مجلبه بي ومتشوف هذا كله
رغم هي تدري كلش زين بي وبسوالفه بس باقيه مجلبه بي لان ابن اخوهه ومهندس
- زين هوه اخلاقه زينه لو هم
- شسوي باخلاقه زينه وهو ساكن الملاهي
يااخلاق الي بقت
- لا مو مرات الواحد يروح لهالدرب لين
متأذي لو عنده شي يريد ينساه ومايلكه غير حل
- هاااا يعني هسه تبررله صرت
- لا موش شغله ابرر لجن هالسالفه انه اعرفنهه من الولد اغلبيتهم من يرحون
همه صايبهم الظيم
- لعد المن رب العالمين موجود الي متضايق
وعنده هم يروح يصلي ركعتين ويدعي وينزال همه وترتاح نفسيته ويصيرله الي يريده هم .. مو الله يكول " ادعوني استجب لكم "، مو " الا بذكر الله تطمئن القلوب "
شو هاي متعرفوهه بس درب الملاهي والمنكر تعرفوه يعني هسه من يسكر راح يرتاح !!
- لاا يزيد علي بس بلايه وعي يصير
- وهوه يريد يفقد وعيه ومن يصحى يلكه كلشي على حطته ماتغير شي لو يريد يخلص فد مره
- اي طبعا يريد يخلص لجن مرات شغلات مالهه حل وتثكل ع الصدر
- الي عنده هم وشي مايكدر عليه ومتاذي منه يكول " الهي اني مسني الضر وانك ارحم الراحمين " هنا ينزال همه وينشرح صدره
لاتقنعني بسبب لان لو اكو فد سبب يحلل
هذا الفعل جان ماربنا خلاه من ضمن المحرمات وعليه حساب وعقاب
- والنعم بالله
- هسه شنو جنت ناوي تروح
- اي
- خليك تغده ويانه ليش مستعجل من هسه
- زحمه مااريد اطول
- لا شهاب من صدك خليك على الاقل لحد
مايرجع ابويه لان هسه ساعه الساعه نتعارك
اني وامي
- هههههههه خايبه انتي حته ويه امج تتعاركين شني من بت انتي
- اني شعليه انتو تبطون الكلب
- لاه لاااه هالنوب احنه
- لعد منو
- يعني انه منهم
- اي مرات تصير منهم
- هاااا
- اكلك اني احتريت راح اجيب شي اشربه
تريد
- اي جيبي
- ماشي

عفتهه بالمطبخ ورحت كعدت بالديوانيه وصفنت بحجيهه .. صدك انه جنت غافل
لهالدرجه !! لو هاي سوالف الغرب اثرت
بيه ؟؟ صحيح هيه مامنهه فايده بس المذله
وتصير باضعف حالاتك وكِل الوادم تنفر
منك بساعتهه جا عليمن احنه مجلبين بيهه

بساعتهه انه حيل كرهت روحي وجان بودي
لو اكضن هذيج الايم وامحيهن محي لجن
مالكيت غير الندم جدامي ...

سمعت صوت اذان الظهر وجني اسمعنه لاول مره .. هيج اهجست جلمه " الله اكبر"
دخلت بنص عروگي وتغلغلت بكِلشي بيه
لحد ماخلت جسمي يكزبر وعگلي يصحى
وين جنت !!! انه صح اصلي لجن اخربط
بيهن موش منتظم وماعندي ذاك الخشوع
بيهن هيج تكضيه فرض وامشي .. ونوبات
اتماهل بيهن بكيفي يمتى مايصيرلي حيل
اكوم اصلي والي مابيه حيل اعوفنهه لو اضل
متمدد وتاخذني النومه وتروح علي الصلاه

لجن هالمره لكيت روحي كبل امشي للمغسله
توضيت وهوه بعده يأذن ورجعت كبل للديوانيه مديت السجاده وصحت " الله اكبر"
بكِل خشوع وجن هالصلاه صلاتي الاولى
وجن مامش حد بهالكون غير انه وربي
جان كلشي بيه ينصت لكِل جلمه بالسوره
وجني اول مره اسمعنهه ولا جني انه حافظهن عن ظهر غيب !!!

من سلمت وكعدت اسبح عاينت ربى واكفه
جدامي وابتسمتلي .. انه هنايه شفت بيهه
شي جنت غافل عنه شفت انهه جتني هدايه
بكرهه ومشكلتهه انه لكيت حك نفسي علي
ومن ساعتهه صرت استغفر هالذنب وهيه
جدام عيني وبالاخير حمدت الله عله لحظه
التذكير هاذي بواسطتهه ...

جانت شايله اثنين حليب فراوله وواكفه
شلت السجاده وحطيتهه عله المعرض
جان مدتلي واحد ..

- يابه كالولج علي كاروكي بعده ينهز وجايبتلي حليب
- انته متفهم هالحليب شلون يريح الاعصاب
- وشبي العصير مايعدل المزاج وينعش
- بكيفك تريد روح انته سوي اني عندي هذا
كافي وهم صارلي ساعه واكفه انتظره يبرد
مااجيبه حار
- هم خلف الله عليج
- امم

اجتي كعدت وتكلب بالتلفزيون وتشرب بي
وانه هم مددت واشرب صدك طعمه بارد
وطيب ...

- غداج يمتى يصير
- هسه امي داتسوي
- ابوج يتاخر
- مادري
- ربى
- ها
- تريدين خط اسيا لو اثير
- شنو هذني
- سيمكرت مال موبايل بنتي
- هاا اي اي شمدريني كيفكم
- راح اجيبلج اسيا حته اخابرج بالخدمه مال خط الشباب
- هاي شنو النوب
- هاي مالج شغل بيهه انه اسويهه
- وانته شكو تخابرني
- شننننيييي عيدي عيدي ماسمعت
- لا سمعت
- بويه جا ياهو البارحه مسموط اهله ويحجي
ويكول بتالي الليل
- هااا علمود هذيج السالفه يلا ميخالف
- هههههه وحك علي انتي وحده مشيطنه
- ههههه هسه يعني كل شكد تخابر
- كل مايعجبني ادك عليج وخلي تلفونج بايدج
مو تشمرينه مدري وين
- يعني كل يومين كل اسبوع حته اعرف
- عليش بويه كل اسبوع كل ساعتين ثلاث
تلكيني محاجيج
- لااااا شنو اني ماعندي شغله وعمله بس اضل اخابرك !
- اي شكو بيهه تفرغيلي شوي شني حتخرب
الدنيه
- ماكو هيج نحدد وكت ونلتزم بي
- ماشي اخابرج الصبح وبالليل ويمكن هم العصريه
- لاوالله
- جا شني بعد
- بس العصر
- ليش ما بالليل
- لا
- شني لاا يجوز انه ماعندي مجال العصر
باليل احاجيج براحتي
- ديلا ماشي يعني بيا ساعه
- وره ١٢
- هاي شنو اكو واحد يخابر بنص الليل
- بنتي شبيج ع الخدمه مانصرف هواي رصيد
- ما عليه ما حب هيج
- اويلي عله شلاع الگلب بدينه هاي
- اكلك لحظه هسه هوه قابل انته كل يوميه
ضايج وتعبان ومحتاجني عود من تضوج
خابر
- بلكي انه ضجت مرتين ثلاثه باليوم يعني
اخابرج بكدهن
- لااا جمعهن كلهن مال مره وحده
- عليش بله
- مو تخاف ع الرصيد
- يعني وره ١٢
- هههههههه تريد تصير مثل بسام
- ااااييباااااخ والله وكت انه كمت اصيرن
مثل بسام وجنت كبل حته شحن ماشحن هالتلفون
- اي لعد خابر فد بالعشره اني ماعندي شي
هيج وكت
- يعني يوميه بالعشره
- لااا بس للضروره
- شني للضروره بله عجبني هيج اسولف
- ماكو لعد الغيهه
- هاي شبييييييج
- شنو شبيه انته كتلي شي وهسه تريد غير شي
- هو انه شردت منج هيه مخابره بويه انتي بس دوسي الخضره واحجي وانه ادك وانه اصرف رصيد وانه المشعول اهلي
- هسه انته شكو عصبي
- اي مو انتي شلعتي باااب كلبي .. اكلج شني
اسمعي انه باليعجبني اخابر وكل ما ماتجاوبين اغرمج عليهن نص ساعه حجي
- يعني فلوس لو شنو
- فلوسيش بنتي يعني تحجين وياي نص ساعه زياده
- لاااا والله
- والله هاذ الموجود ان مايعجبج جاوبي وجفي الشر
- اووووي هسه خلي يجي هالتلفون وعود نتفاهم
- من خرب بعمي
- شكو تغلط
- لا تكلين اوي فهمتي
- هسه شنو فهمني شنووو
- شنو شنوو
- اي شكو كبل تصير اعصاب يعني هسه شسويت
- انتي ثوله لو تسمعيهه مثل مااسمعهه جان
فهمتي عليش الاعصاب
- يااا
- اي انتي تخليني احجي هيج انجبي وكافي
سدي هالسيره
- امممم
- وسم
- هااا رجعنه
- كومي شوفي امج وين الغده صار
- شو انته بس تتامر
- ربببببببببى
- اي اي كمت كافي اووي شكد تصيح
- رببببى شحجيت
- مااااتت ربى وخلصت منك كون

ضحكت عليهه وهي تمشي وتشمر بايدهه
بسرعه تتعصب هالبت بس مكابره عله نفسهه

وراهه خابرت عمي حته يجي للبيت نتغده
سوه وضليت انتظره وره نص ساعه اجه
تغدينا وطلعت للسلف ....

ورحت هالليله تعللت يم نعيم وهوه حالته
متحسنه ازيد من كبل ومارجعت لنص
الليل جان يخابرني وليد ..

- ها شعندك
- هاا جنك طلعت من منطقه الخطر
- ايييي
- خخخخخ خرب لك هاي هيج النسوان تسوي
من خرب بحظي اذا صدك
- ايباااخ اليسمعك يكول معصوم من النسوان انته ابد ماساحل رويحتك عله وحيده هااا
- لاا مو هي هيج وهيج
- خاااب دنجب كِلي جبت التلفون
- اي جبته هو اجيت اكلك شوكت تاخذه
- باجر امرلك واخذه منك
- هااا هيج مفلف على المخابره دنطي صبر يول دصببببر مو خزيتنه
- لك اخافن لاطير من ايدي هيه بلكوه صالحتهه
- يااااا ولك هاي بس مصالح لك اني عبالي راح تخطبون هالشهر
- خاااب انته والله بطران ماتولي من يمي
يكلي اخطب هيه غير النار ساعه الساعه تشب بينه بس ربك ستر وعدالنه هاليومين
- اكلك وانته لشوكت تضل هيج ماتروح تحاجي شيخكم
- خخخخخ يكلي شيخنه لك بويه هذا دوله
بوحدهه انه اخافن اروح احجي والنوبه يروح
يطيرني لكاع مابيهه غير سما الله خليني ساتر
عله رويحتي ويمتى ماهيه تحن بذاك الوكت
اشوفلي فد جيش وعگل واروح اطبن لديوانه
واخطب
- ههههههههههههههههه يااااايابه يا بويه
سالفتك سالفه ياشهاب الله وكعك وكعه
ماوكعها الواكعون
- الواكعوون اممم من اشتعلت صفحه اهلك
ميييل مناا يلاااا
- هخخخخخ بيش ساعه تجي باجر
- حضرلي ريوك
- يلا سهله
- يلا ولي لحيت
- بااي حبيبي باااي
- خااب وصمخ امشي ولي من ساعه السوده
الخابرت
- اووي عصبي اووي هههخخااااااااااااااا
- يا ستار صوتيش هذا حمار يجوعر لو شني
- لاا هاي صوت كلبك المزنجر خخخههههههخ
- هههههه كافي والحمزه ررروووح بويه
- يلاا باي

جنت اضحك عله سوالفه هالولد كارثه كلشي
يصير بساعه الضحك مامش مثله ..اذا يطب
لفاتحه يصيرلك سيد وسبحته بايده واللحيه
مدري منين تطلع هيج فجاه والكعده الثكيله
وبس نطلع يمر عله البنات ياخذله كشه
عليهن وينعنش ويرد لبيته ..ووره جم يوم
تلكاه حاضرله حنه ومسويهه بزخ للصبح
منين متجي يطلعلك بس كلبه طيب يشهد الله
واخو خيته مامش مثله زلمه ...

اجيت طبيت كعدت بالمطبخ وصحت عله زهره ...
- ها خويه توك يلا رديت
- اي اكِلج حضريلي حمام بساع يلا
- اكولن خويه
- هاا
- اشو جن حاليتلك الكعده ببيت عمنه موش عوايدك هاي
- وانتي شعليج مني
- لااا موش انه اعرفن زواغيل كلبك عليش
- يااااه يامصخمه اشو جن لسانج طولان
انه كتلج امشي حضري حمامي لو تعاي تحاسبي وياي
- العفو خويه لجن انه تعرفني السالفه اشمنهه
من بعيد ماتخفي عليه وكلت هاذ اخوي وابن
امي ويحجيلي اسرار كلبه
- من ساعه التجين تحجيلي التعرفينه عليهم
احجيلج
- شنهي شعرفن
- شتحجين انتي وربى
- هااا هيج عله الدوام وهاي
- اييي وانه هم اعرفن
- ها اي جا شني شعدنا بعد
- زهرررره
- هاا خويه
- الحماااااام
- اي بعيني اي

طكتهه ركضه للدرج وانه من خبصتهه عرفت عدهه ضميمه .. بس يجي اليوم واحجيج بي ياخيتي ...

طبيت سبحت وراهه نمت وثاني يوم من الصبح طلعت لبغداد ...

وهناك تلكاني وليد وهوه مطفي وبس يتثاوب
- هاا جنهن مسهراتك
- اااخ لك صايره علي خبصه لك البارحه
الله ستر ماراحت هاي ام كربلا
- هاا ليش
- غير دكت عليه من جنت احجي ويه ام زيونه ولزكت ادك ادك وكله يطلعلهه مشغول
لا هاي تقبل اروح واخاف هم تخابر وتلكاه
مشغول لان هذيج تلزك وياي وبلكوه دبرتهه
- ههخخخ شسوويت بله
- رحت سديته من ام زيونه واخذت تلفون ابويه وخابرت ام كربلا وكلتلهه تلفوني عند
ابن عمي ديخابر خطيه ماعنده رصيد واني
ضل بالي عليج وهيج دبرتهه
- هاااا وهيه ثوله وصدكتك ورجعت بعدين
خابرت ام زيونه
- لا هذيج تنام بسرعه لك هو اني ويه هاي
ضليت للاربعه شتحجي انته
- وشجاريلك يول ماتكول عندي خوات تطلع
بيهن انته شو صاير مو خوش
- يمعود لعد وين اولي وبعدين اني بس احجي
تدري بيه مالي شغل بالطلعات والتختل مااجاوز حدي تره
- والله مادري شكلك كيفك هاي حياتك بس
لا تجاوز الحلال والحرام
- لاا مالي دخل هنا اني بس اكضيهه سوالف
- اي زين .. هسه وينه التلفون كوم جيبه
-اويلي على ابو فلفله
- بويه غير اشوفنه يليق بالمقام لااا
- اوكف هسه اجي

كام راح جاب التلفون وجان نوعه دفتري
يصير لونه وردي عله تفاحي ويلمع وبي
بالنص تفاحه بيضه والجوه مالته كله ابيض
ضليت اكلب بي وحولته عربي وشفت دكمه
خفيفه وشكله بناتي حلو يلوكلهه .. عجبني
انطيته الفلوس الي جان منطينياهن عمي
وتريكت يمه وبعدين رجعت للعماره ...

من وصلت نزلت اخذتلهه خط اسيا وسجلته
باسمي ورحت لبيتهم ...

طلعلي عمي سلمت عليه وطبيت ..
اجتي هيه وسلمت وراحت تسوي الغده ..
انطيت العلبه مال تلفون لعمي وكال هيه
تفتحه بايدهه ..

عاد من جابت صينيه الغده صاحلهه عمي
- وينج بويه تعاي ليه
- ها بابه
- هاي هديتج بعد ابوج فجي عله ايدج

اخذته وضحكت وعاينتلي انه ضحكت ودنجت اكِل وهيه تفتح بالعلبه مالته ..
طلعته وضلت تعاينله والضحكه زادت
جان كامت حضنت ابوهه وباست راسه

- شكراً بابه كلش حلو كلش
- ههههه بعد ابوج هاذ ذوق ابن عمج انه
بس اورق ههههاااا
- شكراً شهاب شكله كلش حلو
- العفو

غمزتلهه وضحكت وهيه دارت وجهه لابوهه
وتريد تغطي ضحكتهه .. عبنها تدري عملتي
هاي كِلهه لاجل شنو ...

كملت غده وكعدت احطلهه بالخط وسجلت
رقمي بي ورقم ابوهه والشيخ وحفظت رقمهه
عندي وبعدين ترخصت وطلعت ...

وجان هاليوم عدنه حوي للحنطه ورحت ساعدت الولد بي والتهيت بيهن لحد مااذن
المغرب .. ردينه البيت غسلت وصليت
وضليت متمدد وافر بالتلفون بايدي اخابر
لو خاف يم اهلهه بعدهه ؟؟؟

اخذتلي غفوه شويه وبعدين طلعت يم الولد
نتعلل ونكرز حب ولحد ماصارت ساعه
١٢ كلمن مشه لاهله وانه وصلت بيتنه
وكعدت بالحديقه وتمددت صفح وطلعت
رقمهه كلت عليك يالله شيصير خلي يصير

جان دكيت وشويه يلا انفتح الخط من سمعت
صوتهه كبل انداريت ونمت عله ظهري
وضحكت ...

- الوو شهاب
- يا هلاا برويحته
- شنو شنوووو
- شنو شبيج سلام ميصير نسلم
- هاا هو هيج يسلمون
- جا فوك مااسلم عليج باسلوب مختلف هيج
انجازى
- يلا ماشي ماشي
- اي شلونه تلفونج الجديد
- حلو حبيته لكيت بي راديو مثل الي بالام بي ثري مالتي هذاك
- اي انه كلبته حلو وبي شغلت جديده بي العاب هم اذا تردين
- اي شفتهن
- اكلج هاي انتي وين هسه
- اني هستوني صعدت لغرفتي
- وكاعد تحجين وياي هيج لج بويه لا يسمعج احد
- هسه واذا قابل شمسويه
- خخخخخخخ ربى الي يسمع بينه نحجي ياخذهه بغير شي وبلاخص الوكت تالي الليل
يعني موش حلوه بحكنه تصيرلنه حجايه
- هممم
- يعني خليج منتبهه زين
- امم
- شبيج
- اكلك خليك شويه وياي
- شكو شعندج هسه
- اريد ابدل ملابسي واتمدد
- ها اي ماشي

انه من كالتلي هيج كبل بالي راح لهذاك الثوب
الابيض الستن الكصيرون اعرفن عدهه منه
هواي واعرفنهه تلبسه بالليل وانه ما ذوب رويحتي وكضى بيه غيره وشلون بيه وين
رجعت انه هسه ووووين مو جنت لاهي عنه

- الو تسمعني
- اي اسمعج
- اي
- خليج وياي شويه
- ماشي

رحت صعدت لحجرتي وقفلت الباب وطلعت
الثوب انه جنت ضامه وجم يوم صارلي بعيد عنه اخذته حضنته بلهفه واخذت التشيرت هم
شميته ونزعت هدومي وتمددت وخليت الثوب
عله صدري والتشيرت بايدي اشمه واحاجيهه ..
- ربى
- همم
- انه ماشايفج من كبل زين انتي هم ماتعرفيني ماشايفتني
- لا شلون مااعرفك
- هاا بله احجيلي يمتى شايفتني
- اني جنت اسمع بيك من جنت صغيره بس
ماشايفتك لان اهلي ماجانو ياخذوني وياهم
هناك وبس كم مره من صرت بعمر ١٢
سنه يلا رحت لبيت الشيخ وهناك شفتك مره
من جنتو تحوون التمر وجبتو بصناديك
وخليتو وره البيت بوكتهه سمعتهم يصيحون
باسمك وعرفتك منهه ومره سمعت بيك من سافرت والثالثه من فززتني وسويتني خدامه
- هههههههه بويه انه غير مااعرفنج واول
نوبه شفتج بيهه تغسلين مواعين وانتي وصدريتج ولا تحجين ولا تهشين ولا تنشين
شعرفني انه هيج حبتلي
- اي مره ثانيه ركز اكو واحد ميعرف عنده بنت عم
- منين اعرفج وانتي مطالعه جدامي
- يعني مسامع بيه ابد من احد
- منين اسمع انه ماحب كعده الحريم بس ويه
جدتي وعله كد مالاشيهه وامشي ماحب الكال والكلت والزلم مايجيبون طروه البنيات
- همممم
- يلاا فرصه سعيده بمعرفتج بنت عمي
- اني اسعد بمعرفتك ابن عمي
- صدك !! لو حجايه التنكال
- اثنينهن ههههه
- صايره ملعبه ولج وين جنتي فقيره
-امممم
- شبيج
- نعست
- نامي يلا
- ماشي يلا باي
- وين خليج هيج ونامي
- شلون هيج
- اي خلي التلفون هيج مفتوح ونامي معليج اني اسده
- والله عليك سوالف بس مو تحاجيني تره
ماجاوبك بعد
- اريدج تنامين شسوي بالحجي
- زين لعد تصبح على خير
- وانتي من اهله

ضلت تتحرك شويه وبعدين صرت اسمع صوت نفسهه وانه هم غمضت وحضنت الثوب وضليت اسمعلهه بهداوه واكولن
لانت وراح اكضنهه هااللبوه بس يرادلهه
شويه وكت .. واذكر ليالي بدون هالصوت
جانت جحيم هسه هاي النعمه الزينه

ضليت شويه وسديته ونمت ...
جان عدنا هالاسبوع حوي ومشغولين كِلش
جنت احاجيهه بس بالليل والي يضوجني
تكضيهه علي امم ويلا نام ماترضى حته
اكللهه مشتاكلج ولا ترضى تحجيلي عله نفسهه .. وانه اجرن خلك واكولن تعلم علي
شويه شويه ... لحد ما صار يوم الجمعه
وهيه بالليل كالتلي الشيخ عازمهم عله الغده

عاد انه رحت حلقت ولبست الدشداشه النيلي
والشماغ وتعطرت ورحت لبيت الشيخ
طبيت الديوان وصحت ...
- السسسلااام عليكم
- وعلييكم السلام والرحمه
- شلونكم بويه وشلون الصحه
- الحمدلله خيرك شني مسيرلك عله احد
- لاا عمي شعندي وين اروحن
- جا شهالعطر اليكفخ بعد عمك
- جا انتعطر مايصيرن الواحد يتعطر
- ايييي يصيرن بعد عمك ... اكولن شهاب
- كول عمي
- يمتى تزوج اشو جن سالفتك طولت هااا
- الله كريم عمي الله كريم
- الله اكرم الاكرمين لجن انته هالي كبرت
والزلمه مو خوش ليه يكبر ومايشوفن ولده
جا انته تريدنهم بالحضينه وانته بعمر الثلاثين
موش تخرجت بعد شتنطر
- انطر المره عمي مامش مره زينه المن اتزوج
- انه عمك ياشهاب لك هاذ السلف مليان حريم
بس بنات عمك وبنات عمتك وخالك يسدن عين الشمس وتكول مااا مِش !!!!
- ابو جاسم بعد اخوك عوفنه للزلمه خله
ياخذ رادته وشور كلبه
- يسلملي حلجك ياشيخ اي هاااذ الحجي الزين
اليفرح الگلب والروح
- هاااا جن ناويلك نيه ومخليهه ضميمه عبنك
فرحت بحجي الشيخ
- ياعمي هسه انته وشتريد مني مستلمني
تحكيك يلا انه بالي شي
- اييييي جاااا متكولن ونروح نمشي عليهه
- بعدهه صغيره خلهه تكبر ونمشي عليهم
- شني صغيره يامسودن منين هاي
- عمي فج مني دخيل جدك
- مااافج منين هاي جايبنهه صغيره شكد
اربعطعش اخمطعش
- اثنعش سنه بعدهه بالابتدائي
- يااامدولب وشوداك عله بنيات المهد ياابو
عيون زايغه
- اننننه اريدن اربيهه عله ايدي شعليكم مني
- تنطيهه الممه وللك ياا ياا خاب مال كون الطمك عله هالحلك المكشر عايف هالمزوينات هذن وراكضلي عله ام نص شبر هالشواربهه بعدهن مطكن
- ههخخخخخخخخ انه اريدنهه شعليكم مني
- من اهمده حضك اذا صكد تطلع
- لا عمي شني انه بس اريدن الاشيك
- لا والله ماانك تلاشي انته موش شهاب
الاولي
- هاا عليش
- اسال ابوك ويعلمك عليش
- هاا ابوي خيركم !!
- ابو شهاب بعد اخوك تكِله لو انه اكِله
- كِله انته انته ماريدن يعلي صوتي بالديوان
- خاب ماتحجون شني سالفتكم
- بعد عمك ابوك صارله جم يوم يسمعنك
شلون ادك ناعم وره اثنعش
- ااا هههههههه وشلون اهلنه مناك عمي زينين هاا
- موووش حجينه وكلنه ،، منين هاي يامصكوع
- عمي خاب هيه هالوحيده الخذت عگلي ولحكتوني عليهه هسه ماتعوفني اتمعشك
شلكم دخل بيه
- اااهيي وماتروح تخطب
- اهلهه ماينطون هسه بعد
- شني بنت الوزير وماينطون
- عمي ماينطون هسه شني
- وعليش بويه شني الخلگهه ماخلگ غيرهه
- اااه ااه لو تعرفن اهلهه جان افهمت عليش ماينطون
- انه اليوم مااهدنك اذا ماتحجيلي شني سالفتك
- عمي فج عني دخيل جدك عليك العباس فج عني انه البيه كافيني
- شني بيه شني كافيني كول مني واخذ هالزلام بتفكهم ونجيبهه ليك حته لو فصليه
- خاب عمي تهدا لخاطر الحمزه فصليتيش
- منهي بنتمن
- مامش وحيده هيج انه الاشيك خاب هسه
انه كفرت خماني كفرت وخابرتلي وحيده
- كوووم يامصكوع من الله لاينطيك حركت
دمي
- هوه منو حرك دم منو
- اكلك هاي جن سياره عمك حاتم طبكت موش صحيح
- اي اي

كمت عفته وركضت فتحت باب الديوان ورحت سلمت عله عمي وجان بسام راحع
من الدوام مخلص امتحانات هم جاي وياهم
والحبيبه تنزل عله كيفهه جنهه شيخه بلبسهه
انه ملاحظ عليهه من تجي للسلف اغلب لبسهه
لو اسود لو نيلي لو زيتوني طوخ ماتلبس الفاتح ابد .. وهالساع جانت لابسه جبه خليجي
اسود ومذهبه وحجابهه الاسود زايد نور وجهه .. عاينتلهه وابتسمتلهه وهيه هم وطبينه
جوه للديوان عبن مامش غريب بس اهلنه
ونفس كل مره الشيخ مايهاب ولا يحسب حساب احد من موجوده شمسه عينه تصد
بس ليهه .. ومن كمل سلام الكِل اخذهه لحضنه وباس راسهه وهيه باست ايده
وعيونهم دومهه تشع حنيه وشوك ...

كعدت بسده وانه اكدمتلهم الماي شربو
ورحت كعدت وعاينت تلفونهه بحضنهه
دزيتلهه رساله ...
" لاتشبين النار بيه بمحاضنج ليه خفيهه جدامي "

شفتهه قرتهه وبس رفعت تك حاجب وسدت
التلفون ورجعت تحاجي الشيخ جن مامش
شي جرى ...

بعدين راحو جوه يم الحريم لين صار وكت
الغده واحنه مدينه السفره والتمو عمامي كِلهم
وتغدينه وشربنا الجاي وكاعدين شويه واجوي جماعه عدهم طلابه وصار المصايح
بالحجي منا لحد مافضت طر العصر والجماعه مشو عاد الشيخ كام وصاح عله
بسام حته يروح يصيحن امه وربى ..

طلعت وراه جان يكِلي ...
- شهاب امش كول لعمك حاتم يلحكنه بسيارته هو واهله ورد ليه حته تسوقن انه مالي خلك
- صار شيخ

رحت كلت لعمي وهوه بلايه نقاش كبل راح
شغل سيارته وانه صعدت بسياره الشيخ شغلت ونطرتهم يصعدون يلا حركت ...

- شيخ وين النيه
- اعبرلي هالبساتين الاثنين واطلعلي يمنه
- صار

جان الشارع صاير عله جهته اليمنه البساتين
مال الوادم واحنه اليسار النه والنه نص من
كياعين الجهه اليمنه بس هاذي محد يصلهه

وصلنه تالي لكاع جرده بس تراب جان يكول
- اخذلي فره من طولهه لطولهه
- صار

ومشيت فريتهه للكاع من الطول للطول وتالي
جان طبكت بنص الكاع عاد نزلنه من سيارتنه وهمه هم نزلو ..

اجتي ربى يم الشيخ وسالته ..
- شعدنه هنا شيخي
- اصبري شوي ياابو بساام تعال ليه
- اي شيخ

التمينه حوالي وجان الشيخ يطلع من جيب
سترته ظرف جوزي وانطاه لربى ..
- شمسه بويه افتحي واكريلي شمكتوب
- حاضر،،
انه في يوم الخميس من تاريخ ٢٠١٠/٨/٢٦
تم الاتفاق بين كل من :
الطرف الاول : كريم ...
الطرف الثاني : ربى حاتم
شنو ربى !!!
- كملي بويه كملي
- وعنوانه : يحوز الطرف الاول قطعه ارض
زراعيه في ....ومساحتها ٣ دونم بموجب عقد
تنازل مؤرخ بتاريخ ٢٠١٠/٨/٢٦ من الفاضل كريم .... وحيث انه رغب بالتنازل
التام للطرف الثاني ... وقد تم الاتفاق بين الطرفين على هذه البنود بعد ان اقرا بأهليتهما القانونيه ...
حيث اقر الطرف الاول ان المساحه المتنازل عنها لم يتم التنازل عنها من قبل ولايوجد عليها اي نزاع
وان الطرف الاول قد اسقط وتنازل بكافه الضمانات العرفيه والفعليه للطرف الثاني
عن مساحه ٢ دونم
وان الطرف الثاني قد قام بالمعاينه التامه
النافيه للجهاله شرعاً .
هاي شوكت ؟؟؟؟

- ههههههه ياشمسه هاي انه رتبته لج
- يعني شنو
- يعني يابعد هلي وكل طوايفي هاي كاعج
هديه نجاحج وتكدير تعبج وصبرج
- شنو ك كااعي اني !!
- اي موش كريتي بروحج انه ماحجيت شي انتي بلسانج حجيتي
- ههههههه شكررررراً ياالله مامصدكه
بابه شفت شفت هاي الي باسمي انييي
- اي بويه تستاهلين وهيه ماتلوك لغيرج
- مبروك بنت عمي
- الله يبارك بيك شهاب
- اكولن شيخ هاي من يمتى عندك هالكاع
- هاي انه اشتريتهه من كبل شهرين والبارحه كملت التنازل ليهه
- عليش موش عدنه كياعين هالكثر بذاك الصوب
- لاااا انه عندي الشمسه ماتشارك بملكهه
مع حد هيه بروحهه ومملكتهه وحد شني
اخليهه تشارك بكاع ورثه عليهه سبعين بني ادم يطلب لاااع هاي ليهه بروحهه وبعيد
عن كِل ورث هيه بيدهه تكبر كاعهه وباجر
عكبه بتعبهه ودراستهه تشتري الثانيه والثالثه
وتبني مملكته وحيدهه بدون عازه لاحد

- شيخي ماعرف شلون اشكرك كل الكلام
وكف عاجز كدام الي انطيته الي

- هههه موش لازم يابنيتي تعاي ليه

كربت ليه وحضنته وجانت عيونهه تدمع
وتضحك وعيون امهه تضحك واخوهه وابوهه كلهم يضحكون وانه فرحتلهه اكثر
من الكِل لجن هالنوبه انه يلا صدكت شكثر
الشيخ يحبنهه وعنده شمسه خط احمر
عبن هوه حته مافكر يخليهه بكاعنه نطاهه
وحيدهه حته محد يدنالهه بمشكله او شي
وحته مابس حجاهه وكال هاي كاع لج لا
راح سوالهه سند وباسمهه متنازللهه يعني
وشكثر بعد يريد يسويلهه ؟؟؟؟
شنهو البينهم وهيج عازلهه عن امه محمد
كلهه !!!!!
.
.
.
يتتتتبع
😬😬😬😬