رواية من فجر ديسمبر الفصل الثاني والأربعون 42 - بقلم Zoka 🌷

من فجر ديسمبر
🍁
🍁
راحت وانه مغمض وافكر بحجيهه وحسب ماعرفن من ربى وفهمت منهه .. ان هاذ الي يصير موش هين ويتسيطر عليه وبي اذى هواي ومايتحمله هالجسم عبن جنت اشوفنهه هواي تكع
وتنام مستشفى من وراه ... يعني انه لو وافكت ماتضل حيااتي هاديه واجيبن التعب ليه بالكوه وان رفضت اعيشن براحه وماعلي شي ...

فتحت عيني وانه اعاين للسمه وضليت صافن بيهه
وشويه وشفت خيط البياض للفجر بدا يطلع انه كبل كمت ورحت ادورنهه نزلت من الجهه اليسره للتله
وهناك جان اكو شجر رارنج وكرنطوز .. ضليت
ادورنهه لحد ماشفتهه واكفه وره وحده من الشجر
تكربت يمهه وهيه من سمعت صوت خطواتي رفعت عينهه ليه وبعينهه الف سؤال وسؤال
اجيت كضيت جف ايدهه وكلتلهه ...

- ايدج مثلجه يرويحتي
- عوف ايدي كولي شنو الخلاك تجي
- لسببين .. الاول انه هجست روحي جن لكت دربهه وين والثاني اريدن اخليج بحمايتي احميج من كل كوابيسج مثل ماكدرت اهديج بنومتي عندج وتحملت كلشي وماخفت من شي ولا خفت منج ولا كرهتج بس ردت اشوفنج مرتاحه وهاذ الي جابني اشاركج حته احميج ياحلوه
- امممم تمام زين هسه اريد منك شي
- عيوني الج كولي
- اريد تثق بيه مثل الثقه الي بيهه تروح بشدتك وبحزنك وتقرا دعاء مكتوب بايد غيرك وماتعرف شنو بي بس تعرف وواثق انه طريق الوصول للراحه والي تتمناه .. تفهم هالثقه الي تكون بين لحظه وقوع كارثه ولحظه تصديهه وانته تكون تدعي وتعرف انه يستجاب هيج اريدك تثق بيه كل العمر ولو حتى ماجنت تعرف شنو الجاي بس اثق
- وعد رجال ماتلكيني بيوم الا بهالثقه ومايغيرهه شي ليوم الدين
- ان شاء الله تضل

بهاللحظه سمعنه صوت خطوات احد جاي كريب علينه انه كبل جريتهه علي وانتجيت عله تل التراب الصاير ورانه ... جان هاذ يضوي بالتلفون
منا ومنا وانه حاط راسهه عله صدري وضامه بايديه وهاديين اثنينه .. عاد حسيته تحرك شويه
رديت انداريت وخليتهه هيه تنتجي عله التل وانه جدامهه وملازك ليهه واعاين ياهوه هاذ الي اجه هالساع ماكدرت اميزن منهو عاد نزلت راسي وعيني طاحت بعينهه وهيه حاطه ايدهه عله صدري وتعاينلي وعينهه تلالي دنجت لوجهه وكلتلهه ...
- موش صار لازم تردينلي الخذيتي مني
- لا ميحتاج بعد انته قررت بنفسك شكو ارجع اتدخل بقرارك
- موش هاذ
-لعد شنو

جريت نفس من نفسهه ودنجت لشفافه اول مصه خفيفه وثلج شفافهه شعلني وخلاني ازيدن بيهه
وهيه ساكنه بين ضلوعي هاديه ومستسلمه الي
بلعتهه ريكي مثل ماسوتلي كبل وبعدت منهه وانه اعضهن علكيف وخرت وخليت وجهي عله وجهه ونفسي عالي كلتلهه..
- هااذ مزج روحج ويه روحي
- شهاب
- يارويحته
- ليش هيج احساسك عالي بكل شي
- لين كلبي بي من الاحساس لج مايفيض منه ويفوك خيالج
- زين بس بعد لاتعيدهه نشفت دمي والله يعني ماريد اضل تعارك وياك عليهه وهالمره صارت لان الهه غايه مره ثانيه لا رجاءاً
- من بطن عيني تدللي
- رجعني للبيت

اخذتهه ومشينه بهداوه للبيت وكلمن راح لحجرته
انه جنت مثل المنوم مغناطيسي هيج اضحك ويه روحي ونايم ....

للعشره كعدت وطلعت لكيتهم جاي يحضرون الغدا
وجان ينزلن ربى وزهره هم شكولهن مطفيه ومشن للمغسله يطوطحن وتالي ضلن واكفات باب المطبخ ووحده حاطه راسهه عله الثانيه ..
- خااايبات والصكع ماتصحصحن شمالجن
- اييي
- وسمممي امشن سون ريوك يلااا تحركن بوووويه شمالجن صدك جذذذب

مشن وهنه مفتحتات تك عين زمخت بيهن وراحن ركض للثلاجه .. وعماتي استلمنهن رزايل لين سهرانات بارحه وهنه ضالات يكعدن بيهن ومايكعدن متاخرات .. انه رحت بالديوانيه كعدت
انتظرهن واكلب بالتلفون جنت مشترك نت ع الرصيد وشفت وليد ناشر بالفيس صورنه وصور ويه اهله مال الخطوبه .. تذكرت بهالحظه تلفون ربى والصور العدهه صحت عليهه اجتني ..
- هاا
- جيبي تلفونج اريده
- ليش
- شني ليش اريده
-زين زين

راحت جابت تلفونهه وانطتنياه والحلو بيهه متخلي رمز كبل طبيت كنكتلهه عله جهازي ورحت دزيت صورنه مال المطعم وجم صورهه الهه
بكشخه البارحه والي ماخذتهن النه ويه زهره
وهذنيج الحطيت عيني عليهن ... كلبت شفت محادثاتهه بالفايبر كله ويه خالاتهه وصاحباتهه
مافتحت وشفت شتحجي عبن انه دايماً احب اخلي
حد خصوصيه للمراه ..صح الح وانبه عليهه بشغلات بس هيج لااا ماحبن ادور وراهه ..

سديته وخليته يمي ورحت نزلت برنامج قفل للصور وحولتهن بي وخزنتهن بالرام هم كلت كلشي يصير بالتلفون وانه متعود اخزن بهالرام
من زمان ...

جابن الريوك واكلنه ثلاثتنه وتالي طلعت للهور
تمشيت شويه وشفت ولد عمي هم ساعدتهم بجم شغله وتالي ردينه تغدينه ووره الغدا وكفت اشرب الجاي جدام الحوش واعاين لربى وزهره راحن
يتمشن وشايلات جداري يردن ينظفهن بره
وهناك شفت صياد يمشي وراهن ذبيت الي بيدي
ولحكتهم واشوفنه يريد يحاجي ربى وهيه صاده عنه عاد جر ايدهه وانه اجيت كضيته من جتفه
ودرته علي وكبل لزكته بوكسي بنص وجهه

- شعنددددددك انته ماتجووووز شنييييي التريدددده احججججججي
- شهااب عوفه الله يخليك عوووفه
- شجاااان يريد منج
- مادري بس يكلي اريد احاجيج
-شتحاااااجيهه هيييييي نذذذذذل شتحاجييييهههه جم مررررره كتلك جووووز عنهه شبلااااااااك وصخمممم وجهك هييييج فهمننننني شعندددك لاوحك الحك اليوم اطلعن جنااااازتك منايه احجججي شتريد لاااااحك البنوااااات وتلح ماكفاااااك هذيج طيحتهه شترررررريد.

اجوي ولد عمنه يتراكضون وعمامي خذونه للشيخ
والشيخ سد هالباب وضلينه بس الاهل وهذاك لابد وره ابوه ويمسح بدمه ..
- مااااايشفعلك شي ومحممممد اكضك وين تروووحن مني يالنذذذذل
- شهاااااب بسك عااااد احترم الجدااامك
- اااانه محترم بس عاييين ابنك المادري شني باله نوبه اشوفه ياخذهن وسكتاوي ويروحن يطيح ربى بالماي ونوبه الثانيه يلحكهه ويجر بيهه شننننننني الفلم فهمننننني عممممممي فهمنننني ابنك شني راااادته من حرررمتتتتتتتي
- صياااااااد هالكاله شهااااب صحيح
- لاااا شيخ انه ماجررتهه جذب هالحجي
- ولك اااااانه بعيني شفتتتتتك شني تجذذذب عيني
جااااا عليش ضربتتتتك هااااا عليييش
- جنت اسلم عليهن انته اجيت اتهجم موش بنات عمي هم لو شني بس الك حك واحنه لاا هنايه نطلع مو خوش اوادم وبس انته التفززع
- لك هدووووني بالعبااااس اليوم مايوكفني عنك حته المووووت اذااا زلمه تعاااال ادنى ادنننننى
وواجهه لاتضل لااااابد وره ابوووك ادننننى ووواجهننننني تعاااااال
- شهاااااب بسك مصايح
- شننننني المسكتك عممممي شنننني ماتشوفن بعينك الجااااي يصيرن عليييش ساااكت وين رحت وهديت هالسالفه معلكه لا خذينا حك ولا باطل مووش بعينه شفناه اثنينه شننننني نسيت !!
- خلهه هالسالفه بعدين ... امش يامحمد صيح ربى
- خويه شتريدن من البت خلهه بعيده
- ارد افهم هالمصايح عليش صار
- ززززين خلهه تجي خلهه وخلي اشوفن شلون تسكتون بعد وره حجيهه

جنت اعاينله وانه الدم يغلي بعروكي واجتي طبت ربى رحت ليهه وكلتلهه ...
- ربببببى احجي الصاااار
- شيخي حمد لله على السلامه
- الله يسلمج ... كليلي شني الصار وخلاهم يتصايحون هالشكل
- جنه نمشي اني وزهره حتى نغسل الجداري الكبار ولحكنه صياد ضل يصيح عليه اني ماوكفتله ويريد يحاجيني مارديتله وهو اجه جرني واجاه شهاب وتعاركو
- هاااااااا سمعتووووو خووو كلكم الحجي شلووونه
هم كوووول جذذذذذب .. عممممي اااانه هالسالفه ماهدهه اذا ماينحطلهه حد وان ماكدرتم عليه انه اعرفن شلون اخذ حكي بايييدي
- شهااااااب بسك عاااد تشمر بالحجي احترم شيخك هاااذ
- عله راااسي لجن بحررررمتي ماعرفن ابووووي وبعدين عمممممي انته موش ابوهه شلووون ساااكت فهمننننننني اكله يغركهه وهالساع يجي يجرجر بيهه شتررريدن اززززيد وتحجى
- اااااانه موش ناااسي هالسالفه لجن شيخنه موووجود وهوه ابنه وبنته ويكعد يحلهه ويشوف شني الصار وعليييش
- جااااا يلاااا اكعدددو يلاااا عليش ساكتين
- صيااااااد علييييش لاحك البت هالشكل وتجرن بيهه وموش برضاهه
- شيخنه ماجنت اريدن شي بس اسلمن عليهم
- جذااااب صياد موش شكل سلااام هااذ شني تجبر البت تسلم علييييك وانته تطيحهه للموت !!
- شهااب ولدي واعرفنه ماله كصد بشي لاتسووهه سالفه سدو عاااد وفارجو
- شنننننني انفارج شننننني بعللللي هالسالفه ماتنسد
اكله يجذذذذب انه شفته يجرن بيهه وهيه ماترضى
وحجتلك بلساااانهه شتريدن ازيد بعد
- شيخ شهااب مادايجذب حجيه كله صح واني مارضيت احاجي وهو يجرني بالجبر وموقف هذاك اليوم بعده بالي شيسموه هذا
- يعننني يطيحن بنتنه للماي بنص هالبرد وهيه مريضه وتجي تريدني اسسسكت
- شهاااب شني نسيت مالك حك الحجي بعد
- عمممممممممممي الحك حكككككي لو للممات
- شهاااب بسك عاااد ولدنه ونعرفن ماله كصد لك هاذ صياد النشمي ماتطلعن منه زله عيب هالحجي جايز انته راح بالك بعيد
- يااااامحممممد بووووويه شمااااالكم ماتشووفوووون وجهه شمااالكم عمامكم الله اكلكم يجررررن بيهه موووش فاهم غلطططط اكله يطيحهه بالمااااي
- يااابه حجي شهاااب صحيح ليش مدتسمعونه شوووفو هذا ليش هيج ويااي ليش ساكتين
- بنتي شيخج يتصرف الولد ولده وكال هالحجي ماله كصد بي بس عاد فارجو
- ياااشهااااب موش كالولك بسسس عاد عليش ضال تلحن وياااي
- انته اسكتتتتتت لاااجييي اكسرررن بوزك الممدود هاااااذ يالخسسسيس يالردددي جذاااب ومااالك جلمه
- احتتتتر م عاااد شهاااب
- ااااانه احتتترم اليحترم عرررضي ويحشمه
موووش هال
- شهاااااااب
- ياااابه شكو تجي على شهاب ماتحجون على هذا المايحشم احد اله وجهين وكاعد يتحايل عليكم
هو حته زهره راد يذبهه بالمي بس هي سيطرت واني لاا
- لتجذذذذذذبيييين بنت عممممي
- ماااااكو جذاااب و ردي غيرك وهيج ابن عم اني مااتشرف بي
- رببببببببى
- اييييي متشوفه جذااااب

ربى علت صوتهه بوجه ابوهه وهوه رفع ايده جاي يضربهه انه جنت واكفه بسدهه كبل لفيت ايدي اليسره من وره ركبتهه وغطيت وجهه وباليمنه كضيت ايد عمي عنهه ...
- شنننننني انتتته وتكف بوجهههي هييييج شهاااب
امشششش منااااايه وهد البت
- مووش زلمه وحرمتي جدااامي تنهان
- موووووووش حررررمتك بطططل عااااد مااازوجنهه لمسووودن مثلك
- لاااااا حرمتي ونص وكلهه تشهد بهالشي تخصني هيه مو شرط يحضر السيد يلا ادافعن ليهه

صار مصايح بيني وبين عمي حاتم والشيخ اجه يتمشى صوبنه ويطك بسبحته تالي وكف بينه وكال
- شهاااب فج عن عمك وخلك وياي
- اي اسمعك
- جنك تناسيت لو شفتني تهاونت بالسالفه شني ضنك عفيت عن ماسلف !!! انه ساكتلك عبن الحجي بعد هذيج الجلمتين مايسوه لجن جن ذاك حجيك ضاع وي الماي وماتكدرن علي

وخرت من ربى ومشيت لجدامه ورفعت اصبعي بوجهه وكلتله ...
- لاااا انته ولااا ابنك ولا كل عشيرتك يدوسن لي عله طررررف ..وهاي انه بلايه عباه ولا عكال ومااغدرن باليسند علي .. داام هالنفس بهالريه ومرزوك بالحيل مااعاتزن لامثالكم .. انه دكيت هالصدر حماي ليهه دام هالدم بعروكي

جان يعاينلي بنظره ثابته وعاكد حواجبه وساكت
والاهل كامو يتعايطون ويحجون عاد انه رحت
جاي احاجي ابوي ... عاد الشيخ كال ..

- ياااااشهااااب هذاك اليمين يتنفذ من هالساع ودرب السلف يتعذركم منا وغاد

عاينتله بكل حقد ومشيت جريت ايد ربى وطلعنه وابوي وعمامي يلحكونه انه كبل اخذتهه لبيتنه
وطبيت لحجرتي وكفلتهه ...
- شهاااااب شهالحجي فهمني ليش هيج ليييش
- ربببى ربببى ركززززي وياااي ركززي
- ااايي
- موش البارحه اختبرتيني وردتي الثقه ونطيته لج اليوم دورج سمعتتتي دوورج اليوم .. اريدنج تطاوعيني بالي اسوي وماتكسرين بيه جدامهم
وعايني هالهوسه بره واهلنه كلهم شما يحجون ويكلون انتي عينج اريدهه بعيني وخطوتج من خطوتي زيين

عفتهه ومشيت طلعت جنطه من الكنتور وحطيت بيهه شويه هدوم والمستمسكات وشكو فلس جنت ضامه طلعتهن وحطيتهن كلهن بالجنطه وسديتهه
واجيت عليهه ..

- ربببى حطلع من هالباب واختبارج بالثقه هنايه تلحكيني ولا تسالين عن شي لين وحك نبيج نغدرنه وانه افهمج عله كلشي بعدين ان ثقيتي بيه البسي عباتج والحكيني وان لااا ضلي بهالبيت

عفتهه صافنه وفجيت الباب وطلعت اخذت السويج من المطبخ ومشيت كضتني زهره وهيه تبجي وتوسل وانه ادافع بيهه وجملتهه جدتي وامي
وابوي يهوس والدنيا نكلبت بالكوه طلعت روحي منهم ورحت شغلت السياره ونزلت وانه احاجي ابوي ..
- بووووويه حاااااسب اخوووك وحاججه بذنبيش يفصلنه هيج لااا كاتل ولاا ناهب عرررضي ودافعت عننننه لااا تجي تكف بدربي روووح افهم منه علييييش

بهاللحظه عاينت جتي ربى ولابسه عبايتهه وبيدهه جزدانهه وطلعت جاي تجي ليه وكضتهه امهه
وكامت تصيح ..
- ولللللك حااااتم الحك بنتك ياااحااتم ولج يمه وين راااايحه صخااام الصخم وجههههج اكعدددي عاد
- خليييييهههه هديههه خل تمششششي
البت الماتسمع جلمه ابوهه وتعلي صوتهه بوجهه وماتحترم مااااااي غرض بييهه

شفتهه وكفت والدموع تصب عاد عفت ابوي ورحت جريت ايدهه واخذتهه للسياره وهيه
تكلي
-ابوووويه شهاااب ابووويييه زعلان مني عوفني
خلي احاجي
- نحاجي بعدين ربببى امششي بعدين نحجي بس يهدا لوضع نحاجي

صعدتهه بالسياره ورحت صعدت وامه كعدت ادك وتلطم وزهره وياهه وانه كبل شخطت هالسياره ومشيت طلعت من السلف وجان كلتلهه ..

- مستمسكاتج وين هنايه لو بغداد
- هنا بيتنه

ديورت ومشيت لبيتهم طبكت جدام الباب ..
- انزلي جيبيهن يلا بساع
-شهاب وين رايحين
- بعدين ربى موش وكت حجي

نزلت وجرت الباب من جوه انفتح وطبت وانه ضليت بالسياره انتظرهه تالي نزلت رحت للمغاسل غسلت وجهي وهيه اجتي طلعت وكفلت الباب وحطت المفتاح بمجانه وجانت شايله جنطه
اخذتهه منهه وحطيته بالسياره وره ومشينه ...

طلعنه العماره وهيه كامت تبجي عاد طبكت عله جهه وجريتهه لصدري ..
- اهدي بنيتي اهددي لاتزيدين مواجعي
- شهااب اهلي شلون سويت هيج اني لييش ليش
ابويه صار ضدي ماسويت شي اني والله ليش هيج
- كله من هالجلااااب لعنت الله عليهم .. بنيتي اهدي بسج عاد بجي ومناحه خليني اندل دربي
- شهاب يعني شنو اهلنه مايردونه بعد !! ليش شنو هالحجي الكاله الشيخ فهمننني
- وعيونج بس نصل احجيلج كلشي ولاتخافين دام ايدج بايدي لاتخافين زيين هسه اريدج تهدين وتبطلين بجي ورانه درب طويل خليني اركز عدل ماريدن بالي يضل يمج حبيبه
- مااشي مااشي .. انتبه ع الطريق
- بعد روووحي رفعت راسي انتي

بست راسهه وهيه رجعت لمجانهه ورديت شغلت ومشيت وكل الدرب كاض ايدهه وابوسنهه كلساع بس هيه فصلت بالهه مدري وين بس صافنه عله الدرب ..
طبينه بغداد وجنت افكر الفنادق هنايه لو متزوجين وينطون غرفه مشتركه واذا اقنعهم ياخذون علينه موخوش نظره عاد تذكرت هذاك الحجي ابو محي
وطلعت لمنطقتهم .. وهناك خابرته وعرفت موجود بالبيت ننعاد مشيت لبيته ...
طبكت جدام البيت وربى كالت..
-بيت منو هذا
- صاحبي انزلي يلا

نزلنه ورحت دكيت الباب اجانه وهوه يضحك ويرحب ويهلي كبل حضني ورد عاين لربى وكال
- تزوجت ؟
- لاا حجي لاا
- من يوم يومك سوالفك طوال تعالو فوتو فوتي بنتي ياصلاوات على النبي هاي العماره كلهم حلوين هيج
- هااا حجي سالمين
- هههههه ولدي انتم ولك

طبينه جوه للهول وراح جابلنه ماي شربنه وربى كاعده بسدي ومدنجه عاد كلتله ..
- حجي ولو راح نكلفك بس اريدن نضل عندك هالليله
- بدووون متطلب اصلا اكيف بيكم ياااهلا وكل الهلا كومي بنتي هاي غرفتي طبي ارتاحي وتريدين هذا الحمام بسدهه اسبحي واخذي راحتج البيت بيتج ماعدنه احد ابني وبسامرا ميرجع منا لباجر اخذو راحتكم عيوني
- تسلم حجي
- كومي ربى امشي ناميلج شويه يلا
- ماشي

كامت وراحت للحجره وسدت الباب والحجي اجه كعد بسدي ..
- احجيلي منين هالبنيه شنو سالفتكم
- تذكرهه بنت عمي الكتلك احبهه
- اي هااي يامشاء الله تبارك الرحمن خوش مختار
- حججججي
- هسه غير انطيك رأيي دحجيلي شبيكم لعد

كعدت حجيتله القصه كلهه وهوه يسمع وصافن وتالي كال ..
- والله زين ماسويتو ولو هي خطوه صعبه وثمنها غالي بس لو ضالين جان رحتو بالرجلين بينهم
- مااادري حجي اهلنه موش هيج همه من اهل الله مادري شجاهم هالشكل نكلبو
- بالايام ينحل كلشي هسه انته كوم روح يمهه وارتاحلك شويه واني راح اطلع اجيب العشه
- لااا حجي شني تطلع لااا بالله انه اروح اكعد انته ارتاح ماريد اكلفك حجي
- ابني انتم خطاري اليوم شلون اخليك تطلع اكعد واسكت هو كلشي موجود بالمنطقه وقريب
- اببببد والحسين ماتكوم ولا تعتب الباب انه اروح

عفته ورحت للحجره شفتهه متمدده وتبجي
- ربى انه حطلع اجيب عشه تريدين شي
- لاا
- كافي بجي بنيتي كلشي ينحل
- شلون شهاب ماينحل بعد طلعنه كلشي مينحل
- استغفر الله بنتي هدي بالج وكولي يالله شني موش انه عندج عليش البجي اهلج واهلي نرضيهم سوه بس من يهدا الوضع تهدي هسه يارويحتي

مسحت دموعهه وطلعت وصيت الحجي عليهه
ورحت للشارع جبت عشه ومريت للصيدليه اخذت شريط حبوب مهدئات كلت هاي تضل هيج ادري بيهه والنوب يروح كلبهه يصيرله شي وين اروح بيهه فخليهه ترتاح هيج احسن ...

رجعت للبيت ووكفنه انه وياهه بالمطبخ هيه تحط الاكل بالمواعين وترتب الصينيه وانه اطلع كلاصات واخذت الصمون والبيبسي ورحنه كعدنه اكلنه ثلاثتنه ... والحجي يسولف ويحاول يغير الجو وابد مذكر موضوع جدامهه ....

وره العشه رحنه اثنينه للحجره وكلتلهه ...
- عندي حبوب مهدء تاخذيلج وحده شويه ترتاحين
- اي انطيني لان راسي حيل يوجعني وعيوني هم
- بطلي بجي وعيونج متوجعج
- مو بيدي شهاب هالصار مو هين
- الله كريم مدامنه احنه اهل الحك كلشي يهون

انطيتهه الحبايه وكلاص الماي شربتهن وتمددت وانه هم اخذتلي وحده ورحت كفلت الباب ونمت بسدهه كبل نمنه ...

ثاني يوم انه كعدت الظهر عاينت ساعه ١٢ شفتهه بعدهه نايمه عفتهه وطلعت سبحت وتنشطت ورحت كعدت بالهول والحجي ماهوه ..
عاد شويه وطب ابنه محي واستغرب من شافني ضل صافن .. كمت سلمت عليه وهوه راح لحجرته جان شويه وطب الحجي ومحمل علاليك
كمت خذيتهن من ايده ورحت للمطبخ .
- عليش هيج مكلف روحك حجي
- غير رادلنه غدا مرتب لعيون عروستنه ياابني
- ههههههه بعلي هسه لو تسمعك تسويلي عركه ماتخلص
- هههههه هااا خوااف
- موش خواف حجي بس بالكوه جبت الصلح وياهه ماريدن ارد للمعارك واحنه من جلمتين نكب نار حكك مشايف معاركنه
- هههه هاااي شباب كلهه هيج من تكبرون تعقلون
هسه تعال خلي نحط الغدا

جان جايب دجاج شوي عله تمن وسوينه الزلاطه والفواكه وبطاله اللبن صفطناهن بالصينيه وجان اسمع صوت ربى ..
- شهاااب وينك شهااب

طلعت رحت ليهه وجان يطلع بهالحظه محي من الحمام وضل صافن بوجهه كبل اجيت وكفت جدامهه وهوه مشى لحجرته ...
- صح النوم بويه
- شكراً وين رايح وعايفني
- كاعد اسوي غدا لجنابج عيني من يمتى تنامين للظهاري
- من وكت ماتنطيني حبوبك الغريبه
- ههههه امشي غسلي حته نتغدا
-اممم

راحت غسلت واحنه حطينه الصينيه وكعدنا ..اجتي كعدت بسدي وهمزين محي مااجه للغدا ويانه جنت شايله هم .. عاد كملنه غدا عفتهه
تغسل مواعين ورحت كعدت افكر بالحجره تالي
اجتني وجانت تريد تبدل كلتلهه...
- ربى جهزي نفسج راح نطلع لاربيل
- شنووووو اربيييل ؟؟؟
- اي .. يلا بسرعه بعدين نحجي
- شهاب اكعد فهمني احجيلي شي شنو تاخذني من مكان لمكان هيج شلون نروح واهلنه !!!
- يااهل ربببى يااهل مالنه مجان بينهم ماخلولنه شي جا تردين نضل كاعدين هالشكل بيت الغرب
هناك اكدر اجر شقه بيت والعيشه زينه هناك هنايه بين ماادورلي بيت رادلي شهر واجارات بغداد غاليه حيل وهمين ممفروش .. هناك اكدر اكعدج بفندق بين مادبر البيت اكدر كلشي اسوي هنايه ضال مربط
- شهاب خايفه افهمني الله يخليك
- تعاي ليه تعاااي

اجتي ووكفت جدامي جريت ايديهه وحطيتهن عله وجهي ورديت بستهن وكلتلهه ..
- موش تثقين بيه وشفتيني ماوكفني عنج شي من الموت طلعتج وحميتج ومن اهلنه عاديتهم ونصرتج شتضنين هسه راح ماكدرن احميج واعيشج براحه ؟؟
- مو هيج شهاب بس اهلنه شلون نعوفهم ونمشي شلووون
- انه موش وعدتج احجيلج كلشي وشتضنين بيه انه هيج عاق لاهلي وماحسبن حسابهم !!! بس الصار موش بيدي ولا بيدج احنه نغدرنه ربى نغدرنه بلايه ذنب بشي خلي ايدج بايدي وماعليج بشي انه دكيت صدري جدام عمامي كلهم احميج
واعيشج براحه لا تضنين راح تتعبين وياي
- اثق بيك وادري متقصر بشي
- هاذ هوه جا عوفي الحجي وامشي البسي حته نمشي يلا كبل ماتظلم
- ماشي

طلعت وعفتهه تبدل ورحت حاجيت الحجي وتشكرت منه وهوه كلش ضاج جيف راح نمشي
فهمته الوضع وطلعنه ... اخذتلهه علاكه حلويات
كلت حته تاكل بالدرب وضليت احجيلهه عله كل شي نشوفه بدربنا ومنطيهه تلفوني تشغل اغاني باليعجبهه وهيج كضيناهه لحد ما وصلنه ب ١١بالليل جنه كلش تعبانين .. كبل طبكت يم فندق
وسلمت المفتاح للامن وطبيت اخذتلنه حجره
ورحنه سبحنه ونمنه كبل بلايه اكل من التعب ماحسينه عله شي ...

انه جنت مكفل التلفون وضامه بالجنطه فثاني يوم
كعدت الصبح وكعدتهه وياي .. غسلنه وبدلنه ونزلنه نتريك وبعدين اخذتهه وطلعنه نفتر شويه
وهيه ضاله مبوزه مالهه واهس بشي عاد وره ماتغدينه ردينه للفندق .. عفتهه تنام وانه ضليت
اكلب بالتلفزيون وبعدين رحت عليهه كعدتهه..
- رببببى
- هاا
- انه راح اطلع انتي لاتفتحين الباب لاحد وانتبهي عله روحج زين
- وين تروح يعني
- ادور عله بيت او شقه جا شلون نضل كاعدين بالفنادق
- شهاب يعني مطولين هنا!
- من ارجع نحجي يلا انتبهي مثل ماوصيتج

طلعت ورحت ادور بالعقارات ونصحوني بشقه مفروشه بمنطقه كسنزان بمجمع سكني هناك
واتفقت وياهم ثاني يوم نروح نشوفهه عاد اخذت
عشه ورديت للفندق ...

تعشينه وهيه ضاله تحوم ماعرف شمالهه عفتهه براحتهه ورحت فتحت تلفوني اجتي كومه رسايل
من وليد ومحمد وعمامي ومكالمات انه خليته طيران وعفته عله جهه وصحت عليهه اجتي
كعدت بسدي عله الجربايه ...
- شمالج بويه فهميني
- اوووف شهاب ممرتاحه بالي يم ابويه وحجي الشيخ بالي شكد ماجاي اريد افهم مداكدر
- ربى اعرفنج كويه  واريدن منج هسه تهدين وتسمعيني زين
- ماشي احجي شنو
- بيوم الغركتي بي .. انه جنت اتمشى ويه الشيخ
وشفت صياد وهو يدفعج للماي كمت اصيح عليه
والشيخ يسكت بيه مايريدني انزل عليج اطلعج
-شنووووو لاااااااا مستحيل
- اسمعيني .. جان يكلي ماعليك بي انه دزيته
واسكت لا تلم علينه الوادم انه ماضل عكل براسي
نكثت ايده ومشيت للجرف جان يكلي اذا رحت
اثنينكم مفصولين من العشيره ولو يجي النبي مايشفعلكم عندي .. عاد انه كتله طز بيك وبعشيرتك وهالعشيره انه ماضلن بيهه دامهه هيج تغدر وعفته ونزلت للماي طلعتج وشفتي من وراهه شلون اختفى
- يعني انته جنت تسالني عليه علمود هالشي
- اييي ..روحته خربت كلشي وجيته هم خربتهه بالازيد شفتي بعينج شلون جان ساكت وماحجه شي رغم كل حجينه وصياحنه شفتي شني ردلنه
درب السلف يتعذركم !!
- لااا شهااااب الشيخ ميسوي بيه هيجي والله ميسوووي مستحيل ماااصدك شهاااب ماصدك
- اششش اهدي اهدي شكتلج انه موش كتلج اريدج كويه وتصبرين ... اهدددي ربى انه ماجذب عليج
وحك الخلكني وبيده هالنفس ماجذبت بحجايه وحده
والصار انتي تشهدين عليه موش كتلج انغدرنه يربى من سكت الشيخ سكتت كل عمامي وحته ابوج وابوي هم سكتو عبن حجايتهم جدامه ماتسىوي شي
- شهااااب لييييش هيج ليييش ماسويتله شي اني والله احبه ماسويتله شي والله  والله
- اعرف يارويحتي اعرف وعيونج اعرف جا انه المسويله بس هوه ماعرفن شني الي باله .. هسه عوفي كلشي ذبي وره ظهرج همه الخسرو وعيونج عبن احنه ماغلطنه بشي وهسه جم يوم ويردون يشوفون غلطهم وين ويعرفون شني الخسروه
- وابويه ليش ابووويه ليش فهمني لييش
- كتلج جدام اخوه مايكدر ياربى شني ماتعرفيهم
- لااااااا ماريد اصدك هالحجي شهاااب مااريد
- والله اعرفنه صعب وثكيل عليج اثكل مما علي
بس شبيدي انه فهميني هالجان بيدي سويته وخذيتج
طردونا وخلو الجلاب خلهم يجيهم يوم ويتجالبون عليهم وادور بيهم مثلنه

جانت تبجي وانه حضنتهه وامسد عله شعرهه
وتالي كامت راحت غسلت من اجتي رادت الحبايه
ترددت انطيهه لو لا تالي كلتلهه ..
- عوفي الحبوب ماريد تتعودين عليهن
- شهاب تعبانه الله يخليك مو وكت نحجي باي شي انطيني اريد انام اذا اضل صاحيه والله هسه انجلط
- زين زين بس اليوم وبعد تحلمين تشوفيهن
- ماشي

انطيتهه وشربتهه وكبل اجتي تمددت وانطتني ظهرهه وانه كمت طلعت بالبالكون ادخن وافكر بالجاي شلون تالينه وين !!

ثاني يوم طولت بالنوم لحد الظهر حسيت عله ربى تكعدني ..
- شهااااااب كوووم شنو عايفني وحدي وبس نايم
- شتريددددددين
- كوووم ضايجه

كمت كعدت وهيه واكفه ومتخوصره ..
- خيرج بويه
- طلعني ضايجه شنو جايين بس انام
- هاااه جا موش البارحه اطلعج تمدين بوزج هالطول
- لااا هسه اريد اطلع كافي ماريد افكر بشي بعد
- احجيلي شني الغيرج شصار

اجتي كعدت بسدي وكالت ..
- خابرت امي
- شعرفج بالرمز ولج
- هههه مايخفى عليه
- بس لا كلتيلهه احنه وين
- لاا بس سالتهه على ابويه وكالتلي صاير عصبي ومايتحاجى وبس يصيح بس ترجع اكسرهه وادفنهه
- شجااااك ياعمي النوب انته علينه
- المصيبه مو هنا ... المصيبه الشيخ كايللهم ممنوع هذوله الاثنين بعد احد يجيب طاريهم كدامي ومخلي ابويه بس يمه ولحد هسه اهلي بعدهم ماراجعين للبيت وتكول ابوك متعارك وياهم وعزل روحه عنهم لان بس يحجون عليك وهو يدافعلك ومايرضى لحجيهم
- الله يعينك يابوي منين تحصلهه
- تكول امي جدتك رايحه واكعه على الشيخ حتى مايفصلنه من العشيره ويرجعنه وهو  مادري شحاجي وياهه ومرجعهه يعني حتى الهه هم ماسامع ومحد وكف بعينه
- موش عايزين ليه ولعشيرته ولو ادري بجدتي والعباس ولا اخليهه تروح واحطن عليهه يمين بس مالحكت احاجيهه
- شهاااب
- ها
- من اليوم ماريد نحجي بهالسالفه بعد الخساره للي باعنه
- عفيه عليج هاذ الحجي الزين .. خلينه نعيش حياتنه موش ضاله عليهم وحك علي ماخلي ينكصج شي .. ربى انتي عندي اغلى من اهلي
انتي كل اهلي شفتيني مشيت بطرك روحي وانتي وماهميت لشي غيرج عبن حياتي كلهه انتي بيهه
خلي ايدج بايدي وانه لكطع اللوزه وياج
- الله يخليك ويحفظك .. اني ماريد شي بس خلي ننسى لان اكو وجع بكلبي ينغزني بكل ذكرى الهم
ومااريد احقد عليهم اريد انسى الاذى وبس
- انسيج كل شي بنيتي ثقي بيه
- ان شاء الله .. هسه كوم خلي ناكل وبعدين مو ورانه طلعه نشوف الشقه شو نسيتهه
- اي بعلي صدك جاا امشينه ماضل وكت

كمنه بدلنه ونزلنه تغدينه بره وطلعنه لصاحب العقار ورحنه لكسنزان شفنه الشقه جانت مساحتهه ٨٠م وململه حلوه ومفروشه وتدفئه مركزيه ربى انعجبت بيهه واتفكت ويه الزلمه وكال من باجر تجون تسلتلموهه عبن هو راد يطولهه بس انه جنت محسب حساب وزيدتله الفلوس وسرع الشغله

طلعنه واخذتهه للقلعه افترينه واخذنه صور ورجعنه للفندق وثاني يوم رحت استلمت مفتاح
الشقه ودفعت باقي الفلوس ورحنه للشقه بالدرب
تسوكت وهيه اشوفنهه تحاول تشغل نفسهه بكلشي
حته تنسى ... ضلينه ننظف سويه وهويناهه وجانت طلتهه حلوه هيه صايره بالطابق الرابع
كلشي نشوف من فوك والمنطقه هاديه وجوهه حلو

خلصنه تنظيف وراحت تسوي الاكل انه كمت
رتبت ملابسي بالكنتور وملابسهه هم وشفت ماعدهه غير لبستين مال بيت ولبسه وحده طلعه
تذكرت هيه كل هدومها بغداد وجابت بس الجايه بيهن لاهلهه .. شفت هواي شغلات ناكصتهه
وكلت باجر اخذهه تشتري كلشي جديد ..

تعشينه وسويه نظفنه المطبخ انه ماخجل من سالفه التنظيف والطبخ وشني انته زلمه وهاذ بس للمره
لاا  مامش شي عيب بيهه شني الله حط بيهه قانون بس الهن التنظيف والكراب واحنه لاا جا موش انه عشت اربع سنين وحدي حته مسح امسح وكل جمعه جنت اجمع الولد ونسوي حمله مانخلي شي مانغسله موش عيب هالشي وهيه جانت مستغربته بيه وانه احجيلهه شجنت اسوي بوليد وزين ..
جان وليد اختصاصه غسل مواعين كلشي ميحب يسوي بس يغسل مواعين ويضل يطربنه بصوته
الشجي ...

راحت تسبح وانه جنت متمدد عله الجربايه طبعا عدنه حجرتين نوم بس الثانيه فارغه مامش بيهه اثاث بس هاي  الاولى مجهزه بكل شي جربايه نفرين وكنتور اربع بوب وميزتواليت ومفروشه
فعاد اجتي تمشط وانه اكلب بالتلفون وليد حرك الدنيا وانه بس دزيتله رساله ..
" انه بخير لايضل بالكم وديربالك عله زهره "
وسدت التلفون كفلته وتمددت وهيه طفت الضوا
واجتي هم تمددت بسدي وانطتني ظهرهه وشعرهه بعده رطب وريحته مال نعناع تنعش
كربت راسي ليم شعرهه ومجتف اديه ونمت وانه اشتمن بيهه ماعرفن ليش ريحتهه مثل مخدر ليه

ثاني يوم كعدت عله صوتهه جانت محضره الريوك وكعدتني كمت غسلت وتريكت وكلتلهه
- حضري نفسج حته نطلع
- وين نروح
- للسوك نشتري كلشي ناكصنه
- ايي صحيح يلا لعد حكوم ابدل

هزيتلهه براسي بمعنى اي وراحت تبدل وانه كملت اكل وشلت الصينيه غسلتهن ورحت لكيتهه ساده الباب بعدهه .. دكيته وفتحتلي شفتهه بس ضال تلبس شالهه .. رحت اخذت هدومي وطلعت بالحمام بدلت ورحت اخذت الفلوس التلزمني ومشينه للمول الاول صار عله طريكنه مجدي مول ... المنطقه الكعدنه بيهه جانت بنصلاوه
هسه يسمونه سهل اربيل هاي تبعد حوال سبع كيلومترات من مركز المدينه بس كلش حلوه
ونفهه وانه حبيتهه عبن هاديه والطبيعه حواليهه
موش بنص المدينه وبالهوسه ...

اشترت هيه بالبدايه بجايم ومعطرات واخذت كوت عبن الجو حيل بارد هنايه وجواريب الي والهه
ورحت حته اختار ملابس الي كالت..
- انته والله عقدتني ماتغير الوانك
- هههههه شبيهن بويه
- كله اسود رصاصي نيلي .. اخذ غير الوان
-يعني شاخذ احمر
- لاا معليك اني اختار

وكفت اعاينلهه واضحك فرحان بتغيرهه هاذ وياي
عاد اختارتلي بلوزات بلون سمائي وزيتوني وبيجيات ومنهن المنقط والي ساده وبي كتابه
وقمصله انه ردتهه اسود واخذتهه وضلت تختار ملابس بيت وتجيبلي شكو لون فاتح وانه ماحبههههن وتضل تعاند واخذهن ..

جاي نمشي وكلتلي
- شهاب اوكف هنا هسه اجيك
- وييين رايحه
-شعليك اشتري شغله واجي ماتاخر منا
- وعليش اضل انتظرج مااجي وياج
-لاااا عيب ضل انتظرني بلا هالسوالف

استغلت ضحكتي وراحت لمحل الملابس النسائيه الخاصه وماتاخرت شويه وطلعت وانه الضحكه جلبت عندي عاد كرصتني وهيه تحجي من بين سنونهه..
- اسكتتت عاد
- تدرين شني المشكله انه مامتعود عليج تخجلين مني بشي فماسيطر عله ضحكتي
- امممم فوكاهه يعني فوك ماصير زينه وياك
- اروح سبع فدوات للامممم انه
- وين راحت وسسسم
- جم نوبه كتلج بويه انه الي نسميت وحك علي
- اممم يلا احسن
- احسن انسم !!
-لاا احسن كمت تحبهه
- ههههههه انتي تحيرين المايتحير
-اكلك خلي ناخذلنه بطانيه ثانيه والله بارحه تجمدت
- عليش ماجيتي لحضني دامج بردتي
- شووو انته مستحتي كله كبل تحجي يااا عيب بابا شبيك
- شني العيب محاضنج كبل يعني
- ماكو هيج قبل راح ويه قبل علينه بالجديد
- اييي شكو بيهه عمي راضين

رحنه اخذنه بطانيه وفرشه من هاي ام اللحاف المهم انه تلفست فليساتي ورديت بجيبي عشرين الف ...

.. بالليل اجتني ومبرطمه ...
- شمااالج بنيتي
- يعني هسه ليش متجيبلي تلفون
- موش اعزه عليج بويه بس اعرفنج ماتكعدين راحه ويزلك لسانج جدام اهلنه
- مااحجي شبيك بس ضوجه هيج يعني شسوي اضل صافنه
- انه يمج تردين اطلعج هسه نمشي شتردين كولي
- اريد احاجي زهره مشتاقتلهه يعني شلون يضلون ميعرفون شي عنه واحنه هم ميصير هيج
- هاااا شفتي عليش ماجيبلج من وره هالسوالف هاي اعرفنج بنيتي ماتكدرين اذا ماتحومين حواليهم
- ااااف افففف ودوامي شلون شهاب هاي سنتي الاخيره ماريد اضيعهه
- ادبرهه تدللين بس اصبريلي
- زين ماشي

كامت وانه كلت خطيه ضايجه اروحن يمهه
كمت شغلت التلفزيون وصحتهه
- تعااي اكعدي شتردين تشوفين يانوع فلم
- انته شتحب
- الاكشششن وانتي
- ههه الرومانس والدراما
- جنج عله روماااانس ببطن عيني
- لاااااا ماااريد
-هههه شمالج فزيتي
- ولا شي هيج طلعلنه اكشن احسن هو هاي حياتنه كلهه اكشن باكشن
- ااااخ والله زمن صار شكد ممتعاركين هااا
- يمعود هو احنه عايشين بنص عركه عايزنه النوب نتعارك
- هههههه جا خلي نحول للرومانسي ناكصنه اكشن احنه البينه مكفينه
- لااا عيني لااا
- ليش عيني ليش
- انته متكعد راحه ادري بيك
- ههههههاااااااي ياااابويه لج خايبه هسه انه شمسويلج صارلج اسبوع وياي كربتلج بشي
- امممم
- لتامممين وشيلي هالفكره من بالج
- يعني بعد مترجع لهذيج سوالفك
- هااا والله ماوعدج
- هاااا ليش بله
- شوفي اكلج اياهه من الاخير .. اذا تحارشتي بيه اتحارش بيج واذا صرتي حبيبتي متفاركين ضلوعي غيرهن ماكربلج بعد
- ههههههه حلوه هاي مال تحارشين بيه يعني شسويلك مثلاً ممكن تفهمني
- يعني صيري حبابه وبس
- اممم اني دايما حبابه طلعلنه فلم يلا يلا
-شو الثانيه ماعلقتي عليهه ؟؟
- مادري
-اي خليج لاتدرين احسن

طلعت فلم اكشن وسهرنه عليه ... انه هالفتره كلت بعد مافاتح وياهه موضوع الحب والزواج خلهه هيه تجي بارداتهه كل العليه سويته وماكصرتلهه بشي الباكي عليهه هيه تخطي الخطوه الفاصله

صار شهر ال ١٢ وبدت تحضيرات راس السنه
والشوارع انملت بالزينه والنفاخ الي بشكل السنه الجديده ٢٠١٤ ... وصار الثلج ينزل ونتلفلف ونطلع نلعب بالثلج العصريه هيه كلش حبت هالسالفه وكل يوميه امشي ننزل للثلج .. نوبه
نثرت الثلج عليهه وصارت ملابسهه نصهه ابيض
ومنايه الجو شكله يشبهه عاد اخذتلهه صوره بي
وكلتلهه ...
- اخيراً صورتج ويه جماعتج
-منو ياجماعه
-هالثلوج بنتي انتي منهم هاي صوره متكامله اي والله عشت عله هاللقطه
-هههههه غثيث

شمرت عليهه الثلج وهيه تمسح بملابسهه وعاد ردينه للشقه ... وانه كلت لازم الكالي شغله فلوسي
حتخلص ووراي ايجار ومصرف ماريدن اضل حاير ...عاد نزلت ادور شغل وضليت يومين
يلا لكيتلي شغله بمخزن مال غذائيه نفرغ الحاويات الي تجي ... وضليت كل يوم اطلع من السته صبح
ارجع ب ١٢ الظهر ظهري متكسر وجتافي مربطه
وتكعد هيه تدهنلي بالفكس وتفرح ظهري وجتافي

ولكيتلي شغله بالليل هم بمحطه بانزين ورحت اشتغلهه بس ماكلتلهه اشتغل شغلتين كلتلهه سونه كل ست ساعات ...

جم مره انطيهه التلفون تخابر امهه بس افتحلهه سبيكر وتضل يمي تحجي لين ادري بيهه بس امهه تتمسكن شويه الهه تحجيلهه كلشي ... وانه ماريدن
طير الطاير يعرفن شي علينه ....

جنت انتبهه عليهه دايماً تجيهه نغزات بكلبهه وتتعب هواي اذا اشتغلتلهه شغلتين بالبيت
ومن اسالهه تكلي لين تعبنه هالفتره ولحد ما
بيوم بالليل راحت تغسل مواعين العشه وانه اجيت
يمهه متعود مااعوفنهه وحدهه وجانت شايله بيدهه
اليسره كلاص ووكع من ايدهه تطشر بالكاع

اجيت عليهه وكضيتهه وهيه تعض شفتهه من الوجع ودنجت وانه سندتهه ...
- شمااالج بنيتي فهميني
- ايدي شهاب مدا احس بيهه وكلبي يعصتر
- اسم الله عليج يارويحتي تعااي

دنجت شلتهه واخذتهه للحجره مددتهه ع الجربايه
ورحت جبت ماي شربتهه وضليت افرك بايدهه
وهيه تكلي ثكيله كلش صارت .. فركتلهه كلبهه
وضليت انشرلهه بهالايات .. لحد ماارتخى جسمهه
شويه ونامت .. ضليت سهران وياهه هالليله وكلت لازم اخذهه للمستشفى بس المشكله هنايه كلش غاليات مستشفياتهم وانه راتبي بعدله اسبوع يلا

عاد ثاني يوم تطمنت عليهه وطلعت للشغل وهناك حاجيت صاحب المخزن بصرفلي الراتب هاليومين حته اخذهه الطبيب وهوه ماكصر كبل
راح جاب الفلوس واجه تشكرت منه وخلصت شغلي وطلعت ليهه ...

اول ماطبيت اصيحن عليهه وجان اسمعن صوتهه من الحجره رحتلهه وعاينتهه بالكاع كاعده وحالتهه تكسر الكلب كاضه كلبهه وبس تبجي
اجيت ركض عليهه ...
-شهااب ايدي ماكدر اشيلهه
-بسج لاتبجين يارويحتي امشي هسه اخذج المستشفى يلا عينيني يلا حبيبه يلاا كومي

.
.
يتبع
هاا شلون المفاجاه 😁😁😁